𑁩. 𑀧𑀞𑀫𑀲𑀁𑀯𑀸𑀲𑀲𑀼𑀢𑁆𑀢𑀁

𑁫𑁩. 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀅𑀦𑁆𑀢𑀭𑀸 𑀘 𑀫𑀥𑀼𑀭𑀁 𑀅𑀦𑁆𑀢𑀭𑀸 𑀘 𑀯𑁂𑀭𑀜𑁆𑀚𑀁 𑀅𑀤𑁆𑀥𑀸𑀦𑀫𑀕𑁆𑀕𑀧𑁆𑀧𑀝𑀺𑀧𑀦𑁆𑀦𑁄 𑀳𑁄𑀢𑀺. 𑀲𑀫𑁆𑀩𑀳𑀼𑀮𑀸𑀧𑀺 𑀔𑁄 𑀕𑀳𑀧𑀢𑀻 𑀘 𑀕𑀳𑀧𑀢𑀸𑀦𑀺𑀬𑁄 𑀘 𑀅𑀦𑁆𑀢𑀭𑀸 𑀘 𑀫𑀥𑀼𑀭𑀁 𑀅𑀦𑁆𑀢𑀭𑀸 𑀘 𑀯𑁂𑀭𑀜𑁆𑀚𑀁 𑀅𑀤𑁆𑀥𑀸𑀦𑀫𑀕𑁆𑀕𑀧𑁆𑀧𑀝𑀺𑀧𑀦𑁆𑀦𑀸 𑀳𑁄𑀦𑁆𑀢𑀺. 𑀅𑀣 𑀔𑁄 𑀪𑀕𑀯𑀸 𑀫𑀕𑁆𑀕𑀸 𑀑𑀓𑁆𑀓𑀫𑁆𑀫 𑀅𑀜𑁆𑀜𑀢𑀭𑀲𑁆𑀫𑀺𑀁 𑀭𑀼𑀓𑁆𑀔𑀫𑀽𑀮𑁂 ( ) [(𑀧𑀜𑁆𑀜𑀢𑁆𑀢𑁂 𑀆𑀲𑀦𑁂) (𑀧𑀻. 𑀓.)] 𑀦𑀺𑀲𑀻𑀤𑀺. 𑀅𑀤𑁆𑀤𑀲𑀁𑀲𑀼 𑀔𑁄 𑀕𑀳𑀧𑀢𑀻 𑀘 𑀕𑀳𑀧𑀢𑀸𑀦𑀺𑀬𑁄 𑀘 𑀪𑀕𑀯𑀦𑁆𑀢𑀁 𑀅𑀜𑁆𑀜𑀢𑀭𑀲𑁆𑀫𑀺𑀁 𑀭𑀼𑀓𑁆𑀔𑀫𑀽𑀮𑁂 𑀦𑀺𑀲𑀺𑀦𑁆𑀦𑀁. 𑀤𑀺𑀲𑁆𑀯𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁂 𑀔𑁄 𑀢𑁂 𑀕𑀳𑀧𑀢𑀻 𑀘 𑀕𑀳𑀧𑀢𑀸𑀦𑀺𑀬𑁄 𑀘 𑀪𑀕𑀯𑀸 𑀏𑀢𑀤𑀯𑁄𑀘 𑁋

‘‘𑀘𑀢𑁆𑀢𑀸𑀭𑁄𑀫𑁂, 𑀕𑀳𑀧𑀢𑀬𑁄, 𑀲𑀁𑀯𑀸𑀲𑀸. 𑀓𑀢𑀫𑁂 𑀘𑀢𑁆𑀢𑀸𑀭𑁄? 𑀙𑀯𑁄 𑀙𑀯𑀸𑀬 𑀲𑀤𑁆𑀥𑀺𑀁 𑀲𑀁𑀯𑀲𑀢𑀺, 𑀙𑀯𑁄 𑀤𑁂𑀯𑀺𑀬𑀸 𑀲𑀤𑁆𑀥𑀺𑀁 𑀲𑀁𑀯𑀲𑀢𑀺, 𑀤𑁂𑀯𑁄 𑀙𑀯𑀸𑀬 𑀲𑀤𑁆𑀥𑀺𑀁 𑀲𑀁𑀯𑀲𑀢𑀺, 𑀤𑁂𑀯𑁄 𑀤𑁂𑀯𑀺𑀬𑀸 𑀲𑀤𑁆𑀥𑀺𑀁 𑀲𑀁𑀯𑀲𑀢𑀺.

‘‘𑀓𑀣𑀜𑁆𑀘, 𑀕𑀳𑀧𑀢𑀬𑁄, 𑀙𑀯𑁄 𑀙𑀯𑀸𑀬 𑀲𑀤𑁆𑀥𑀺𑀁 𑀲𑀁𑀯𑀲𑀢𑀺? 𑀇𑀥, 𑀕𑀳𑀧𑀢𑀬𑁄, 𑀲𑀸𑀫𑀺𑀓𑁄 𑀳𑁄𑀢𑀺 𑀧𑀸𑀡𑀸𑀢𑀺𑀧𑀸𑀢𑀻 𑀅𑀤𑀺𑀦𑁆𑀦𑀸𑀤𑀸𑀬𑀻 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀻 𑀫𑀼𑀲𑀸𑀯𑀸𑀤𑀻 𑀲𑀼𑀭𑀸𑀫𑁂𑀭𑀬𑀫𑀚𑁆𑀚𑀧𑀫𑀸𑀤𑀝𑁆𑀞𑀸𑀬𑀻 𑀤𑀼𑀲𑁆𑀲𑀻𑀮𑁄 𑀧𑀸𑀧𑀥𑀫𑁆𑀫𑁄 𑀫𑀘𑁆𑀙𑁂𑀭𑀫𑀮𑀧𑀭𑀺𑀬𑀼𑀝𑁆𑀞𑀺𑀢𑁂𑀦 𑀘𑁂𑀢𑀲𑀸 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀢𑀺 𑀅𑀓𑁆𑀓𑁄𑀲𑀓𑀧𑀭𑀺𑀪𑀸𑀲𑀓𑁄 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁; 𑀪𑀭𑀺𑀬𑀸𑀧𑀺𑀲𑁆𑀲 𑀳𑁄𑀢𑀺 𑀧𑀸𑀡𑀸𑀢𑀺𑀧𑀸𑀢𑀺𑀦𑀻 𑀅𑀤𑀺𑀦𑁆𑀦𑀸𑀤𑀸𑀬𑀺𑀦𑀻 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀺𑀦𑀻 𑀫𑀼𑀲𑀸𑀯𑀸𑀤𑀺𑀦𑀻 𑀲𑀼𑀭𑀸𑀫𑁂𑀭𑀬𑀫𑀚𑁆𑀚𑀧𑀫𑀸𑀤𑀝𑁆𑀞𑀸𑀬𑀺𑀦𑀻 𑀤𑀼𑀲𑁆𑀲𑀻𑀮𑀸 𑀧𑀸𑀧𑀥𑀫𑁆𑀫𑀸 𑀫𑀘𑁆𑀙𑁂𑀭𑀫𑀮𑀧𑀭𑀺𑀬𑀼𑀝𑁆𑀞𑀺𑀢𑁂𑀦 𑀘𑁂𑀢𑀲𑀸 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀢𑀺 𑀅𑀓𑁆𑀓𑁄𑀲𑀺𑀓𑀧𑀭𑀺𑀪𑀸𑀲𑀺𑀓𑀸 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁. 𑀏𑀯𑀁 𑀔𑁄, 𑀕𑀳𑀧𑀢𑀬𑁄, 𑀙𑀯𑁄 𑀙𑀯𑀸𑀬 𑀲𑀤𑁆𑀥𑀺𑀁 𑀲𑀁𑀯𑀲𑀢𑀺.

‘‘𑀓𑀣𑀜𑁆𑀘, 𑀕𑀳𑀧𑀢𑀬𑁄, 𑀙𑀯𑁄 𑀤𑁂𑀯𑀺𑀬𑀸 𑀲𑀤𑁆𑀥𑀺𑀁 𑀲𑀁𑀯𑀲𑀢𑀺? 𑀇𑀥, 𑀕𑀳𑀧𑀢𑀬𑁄, 𑀲𑀸𑀫𑀺𑀓𑁄 𑀳𑁄𑀢𑀺 𑀧𑀸𑀡𑀸𑀢𑀺𑀧𑀸𑀢𑀻 𑀅𑀤𑀺𑀦𑁆𑀦𑀸𑀤𑀸𑀬𑀻 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀻 𑀫𑀼𑀲𑀸𑀯𑀸𑀤𑀻 𑀲𑀼𑀭𑀸𑀫𑁂𑀭𑀬𑀫𑀚𑁆𑀚𑀧𑀫𑀸𑀤𑀝𑁆𑀞𑀸𑀬𑀻 𑀤𑀼𑀲𑁆𑀲𑀻𑀮𑁄 𑀧𑀸𑀧𑀥𑀫𑁆𑀫𑁄 𑀫𑀘𑁆𑀙𑁂𑀭𑀫𑀮𑀧𑀭𑀺𑀬𑀼𑀝𑁆𑀞𑀺𑀢𑁂𑀦 𑀘𑁂𑀢𑀲𑀸 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀢𑀺 𑀅𑀓𑁆𑀓𑁄𑀲𑀓𑀧𑀭𑀺𑀪𑀸𑀲𑀓𑁄 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁; 𑀪𑀭𑀺𑀬𑀸 𑀔𑁆𑀯𑀲𑁆𑀲 𑀳𑁄𑀢𑀺 𑀧𑀸𑀡𑀸𑀢𑀺𑀧𑀸𑀢𑀸 𑀧𑀝𑀺𑀯𑀺𑀭𑀢𑀸 𑀅𑀤𑀺𑀦𑁆𑀦𑀸𑀤𑀸𑀦𑀸 𑀧𑀝𑀺𑀯𑀺𑀭𑀢𑀸 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀸 𑀧𑀝𑀺𑀯𑀺𑀭𑀢𑀸 𑀫𑀼𑀲𑀸𑀯𑀸𑀤𑀸 𑀧𑀝𑀺𑀯𑀺𑀭𑀢𑀸 𑀲𑀼𑀭𑀸𑀫𑁂𑀭𑀬𑀫𑀚𑁆𑀚𑀧𑀫𑀸𑀤𑀝𑁆𑀞𑀸𑀦𑀸 𑀧𑀝𑀺𑀯𑀺𑀭𑀢𑀸 𑀲𑀻𑀮𑀯𑀢𑀻 𑀓𑀮𑁆𑀬𑀸𑀡𑀥𑀫𑁆𑀫𑀸 𑀯𑀺𑀕𑀢𑀫𑀮𑀫𑀘𑁆𑀙𑁂𑀭𑁂𑀦 𑀘𑁂𑀢𑀲𑀸 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀢𑀺 𑀅𑀦𑀓𑁆𑀓𑁄𑀲𑀺𑀓𑀧𑀭𑀺𑀪𑀸𑀲𑀺𑀓𑀸 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁. 𑀏𑀯𑀁 𑀔𑁄, 𑀕𑀳𑀧𑀢𑀬𑁄, 𑀙𑀯𑁄 𑀤𑁂𑀯𑀺𑀬𑀸 𑀲𑀤𑁆𑀥𑀺𑀁 𑀲𑀁𑀯𑀲𑀢𑀺.

‘‘𑀓𑀣𑀜𑁆𑀘, 𑀕𑀳𑀧𑀢𑀬𑁄, 𑀤𑁂𑀯𑁄 𑀙𑀯𑀸𑀬 𑀲𑀤𑁆𑀥𑀺𑀁 𑀲𑀁𑀯𑀲𑀢𑀺? 𑀇𑀥, 𑀕𑀳𑀧𑀢𑀬𑁄, 𑀲𑀸𑀫𑀺𑀓𑁄 𑀳𑁄𑀢𑀺 𑀧𑀸𑀡𑀸𑀢𑀺𑀧𑀸𑀢𑀸 𑀧𑀝𑀺𑀯𑀺𑀭𑀢𑁄 𑀅𑀤𑀺𑀦𑁆𑀦𑀸𑀤𑀸𑀦𑀸 𑀧𑀝𑀺𑀯𑀺𑀭𑀢𑁄 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀸 𑀧𑀝𑀺𑀯𑀺𑀭𑀢𑁄 𑀫𑀼𑀲𑀸𑀯𑀸𑀤𑀸 𑀧𑀝𑀺𑀯𑀺𑀭𑀢𑁄 𑀲𑀼𑀭𑀸𑀫𑁂𑀭𑀬𑀫𑀚𑁆𑀚𑀧𑀫𑀸𑀤𑀝𑁆𑀞𑀸𑀦𑀸 𑀧𑀝𑀺𑀯𑀺𑀭𑀢𑁄 𑀲𑀻𑀮𑀯𑀸 𑀓𑀮𑁆𑀬𑀸𑀡𑀥𑀫𑁆𑀫𑁄 𑀯𑀺𑀕𑀢𑀫𑀮𑀫𑀘𑁆𑀙𑁂𑀭𑁂𑀦 𑀘𑁂𑀢𑀲𑀸 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀢𑀺 𑀅𑀦𑀓𑁆𑀓𑁄𑀲𑀓𑀧𑀭𑀺𑀪𑀸𑀲𑀓𑁄 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁; 𑀪𑀭𑀺𑀬𑀸 𑀔𑁆𑀯𑀲𑁆𑀲 𑀳𑁄𑀢𑀺 𑀧𑀸𑀡𑀸𑀢𑀺𑀧𑀸𑀢𑀺𑀦𑀻…𑀧𑁂… 𑀲𑀼𑀭𑀸𑀫𑁂𑀭𑀬𑀫𑀚𑁆𑀚𑀧𑀫𑀸𑀤𑀝𑁆𑀞𑀸𑀬𑀺𑀦𑀻 𑀤𑀼𑀲𑁆𑀲𑀻𑀮𑀸 𑀧𑀸𑀧𑀥𑀫𑁆𑀫𑀸 𑀫𑀘𑁆𑀙𑁂𑀭𑀫𑀮𑀧𑀭𑀺𑀬𑀼𑀝𑁆𑀞𑀺𑀢𑁂𑀦 𑀘𑁂𑀢𑀲𑀸 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀢𑀺 𑀅𑀓𑁆𑀓𑁄𑀲𑀺𑀓𑀧𑀭𑀺𑀪𑀸𑀲𑀺𑀓𑀸 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁. 𑀏𑀯𑀁 𑀔𑁄, 𑀕𑀳𑀧𑀢𑀬𑁄, 𑀤𑁂𑀯𑁄 𑀙𑀯𑀸𑀬 𑀲𑀤𑁆𑀥𑀺𑀁 𑀲𑀁𑀯𑀲𑀢𑀺.

‘‘𑀓𑀣𑀜𑁆𑀘, 𑀕𑀳𑀧𑀢𑀬𑁄, 𑀤𑁂𑀯𑁄 𑀤𑁂𑀯𑀺𑀬𑀸 𑀲𑀤𑁆𑀥𑀺𑀁 𑀲𑀁𑀯𑀲𑀢𑀺? 𑀇𑀥, 𑀕𑀳𑀧𑀢𑀬𑁄, 𑀲𑀸𑀫𑀺𑀓𑁄 𑀳𑁄𑀢𑀺 𑀧𑀸𑀡𑀸𑀢𑀺𑀧𑀸𑀢𑀸 𑀧𑀝𑀺𑀯𑀺𑀭𑀢𑁄…𑀧𑁂… 𑀲𑀻𑀮𑀯𑀸 𑀓𑀮𑁆𑀬𑀸𑀡𑀥𑀫𑁆𑀫𑁄 𑀯𑀺𑀕𑀢𑀫𑀮𑀫𑀘𑁆𑀙𑁂𑀭𑁂𑀦 𑀘𑁂𑀢𑀲𑀸 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀢𑀺 𑀅𑀦𑀓𑁆𑀓𑁄𑀲𑀓𑀧𑀭𑀺𑀪𑀸𑀲𑀓𑁄 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁; 𑀪𑀭𑀺𑀬𑀸𑀧𑀺𑀲𑁆𑀲 𑀳𑁄𑀢𑀺 𑀧𑀸𑀡𑀸𑀢𑀺𑀧𑀸𑀢𑀸 𑀧𑀝𑀺𑀯𑀺𑀭𑀢𑀸…𑀧𑁂… 𑀲𑀼𑀭𑀸𑀫𑁂𑀭𑀬𑀫𑀚𑁆𑀚𑀧𑀫𑀸𑀤𑀝𑁆𑀞𑀸𑀦𑀸 𑀧𑀝𑀺𑀯𑀺𑀭𑀢𑀸 𑀲𑀻𑀮𑀯𑀢𑀻 𑀓𑀮𑁆𑀬𑀸𑀡𑀥𑀫𑁆𑀫𑀸 𑀯𑀺𑀕𑀢𑀫𑀮𑀫𑀘𑁆𑀙𑁂𑀭𑁂𑀦 𑀘𑁂𑀢𑀲𑀸 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀢𑀺 𑀅𑀦𑀓𑁆𑀓𑁄𑀲𑀺𑀓𑀧𑀭𑀺𑀪𑀸𑀲𑀺𑀓𑀸 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁. 𑀏𑀯𑀁 𑀔𑁄, 𑀕𑀳𑀧𑀢𑀬𑁄, 𑀤𑁂𑀯𑁄 𑀤𑁂𑀯𑀺𑀬𑀸 𑀲𑀤𑁆𑀥𑀺𑀁 𑀲𑀁𑀯𑀲𑀢𑀺. 𑀇𑀫𑁂 𑀔𑁄, 𑀕𑀳𑀧𑀢𑀬𑁄, 𑀘𑀢𑁆𑀢𑀸𑀭𑁄 𑀲𑀁𑀯𑀸𑀲𑀸’’𑀢𑀺.

‘‘𑀉𑀪𑁄 𑀘 𑀳𑁄𑀦𑁆𑀢𑀺 𑀤𑀼𑀲𑁆𑀲𑀻𑀮𑀸, 𑀓𑀤𑀭𑀺𑀬𑀸 𑀧𑀭𑀺𑀪𑀸𑀲𑀓𑀸;

𑀢𑁂 𑀳𑁄𑀦𑁆𑀢𑀺 𑀚𑀸𑀦𑀺𑀧𑀢𑀬𑁄, 𑀙𑀯𑀸 𑀲𑀁𑀯𑀸𑀲𑀫𑀸𑀕𑀢𑀸.

‘‘𑀲𑀸𑀫𑀺𑀓𑁄 𑀳𑁄𑀢𑀺 𑀤𑀼𑀲𑁆𑀲𑀻𑀮𑁄, 𑀓𑀤𑀭𑀺𑀬𑁄 𑀧𑀭𑀺𑀪𑀸𑀲𑀓𑁄;

𑀪𑀭𑀺𑀬𑀸 𑀲𑀻𑀮𑀯𑀢𑀻 𑀳𑁄𑀢𑀺, 𑀯𑀤𑀜𑁆𑀜𑀽 𑀯𑀻𑀢𑀫𑀘𑁆𑀙𑀭𑀸;

𑀲𑀸𑀧𑀺 𑀤𑁂𑀯𑀻 𑀲𑀁𑀯𑀲𑀢𑀺, 𑀙𑀯𑁂𑀦 𑀧𑀢𑀺𑀦𑀸 𑀲𑀳.

‘‘𑀲𑀸𑀫𑀺𑀓𑁄 𑀲𑀻𑀮𑀯𑀸 𑀳𑁄𑀢𑀺, 𑀯𑀤𑀜𑁆𑀜𑀽 𑀯𑀻𑀢𑀫𑀘𑁆𑀙𑀭𑁄;

𑀪𑀭𑀺𑀬𑀸 𑀳𑁄𑀢𑀺 𑀤𑀼𑀲𑁆𑀲𑀻𑀮𑀸, 𑀓𑀤𑀭𑀺𑀬𑀸 𑀧𑀭𑀺𑀪𑀸𑀲𑀺𑀓𑀸;

𑀲𑀸𑀧𑀺 𑀙𑀯𑀸 𑀲𑀁𑀯𑀲𑀢𑀺, 𑀤𑁂𑀯𑁂𑀦 𑀧𑀢𑀺𑀦𑀸 𑀲𑀳.

‘‘𑀉𑀪𑁄 𑀲𑀤𑁆𑀥𑀸 𑀯𑀤𑀜𑁆𑀜𑀽 𑀘, 𑀲𑀜𑁆𑀜𑀢𑀸 𑀥𑀫𑁆𑀫𑀚𑀻𑀯𑀺𑀦𑁄;

𑀢𑁂 𑀳𑁄𑀦𑁆𑀢𑀺 𑀚𑀸𑀦𑀺𑀧𑀢𑀬𑁄, 𑀅𑀜𑁆𑀜𑀫𑀜𑁆𑀜𑀁 𑀧𑀺𑀬𑀁𑀯𑀤𑀸.

‘‘𑀅𑀢𑁆𑀣𑀸𑀲𑀁 𑀧𑀘𑀼𑀭𑀸 𑀳𑁄𑀦𑁆𑀢𑀺, 𑀨𑀸𑀲𑀼𑀓𑀁 [𑀨𑀸𑀲𑀢𑁆𑀢𑀁 (𑀲𑀻.), 𑀯𑀸𑀲𑀢𑁆𑀣𑀁 (𑀧𑀻.)] 𑀉𑀧𑀚𑀸𑀬𑀢𑀺;

𑀅𑀫𑀺𑀢𑁆𑀢𑀸 𑀤𑀼𑀫𑁆𑀫𑀦𑀸 𑀳𑁄𑀦𑁆𑀢𑀺, 𑀉𑀪𑀺𑀦𑁆𑀦𑀁 𑀲𑀫𑀲𑀻𑀮𑀺𑀦𑀁.

‘‘𑀇𑀥 𑀥𑀫𑁆𑀫𑀁 𑀘𑀭𑀺𑀢𑁆𑀯𑀸𑀦, 𑀲𑀫𑀲𑀻𑀮𑀩𑁆𑀩𑀢𑀸 𑀉𑀪𑁄;

𑀦𑀦𑁆𑀤𑀺𑀦𑁄 𑀤𑁂𑀯𑀮𑁄𑀓𑀲𑁆𑀫𑀺𑀁, 𑀫𑁄𑀤𑀦𑁆𑀢𑀺 𑀓𑀸𑀫𑀓𑀸𑀫𑀺𑀦𑁄’’𑀢𑀺. 𑀢𑀢𑀺𑀬𑀁;