𑁪. 𑀤𑀼𑀢𑀺𑀬𑀓𑁄𑀥𑀕𑀭𑀼𑀲𑀼𑀢𑁆𑀢𑀁

𑁪𑁪. ‘‘𑀘𑀢𑁆𑀢𑀸𑀭𑁄𑀫𑁂, 𑀪𑀺𑀓𑁆𑀔𑀯𑁂, 𑀅𑀲𑀤𑁆𑀥𑀫𑁆𑀫𑀸. 𑀓𑀢𑀫𑁂 𑀘𑀢𑁆𑀢𑀸𑀭𑁄? 𑀓𑁄𑀥𑀕𑀭𑀼𑀢𑀸 𑀦 𑀲𑀤𑁆𑀥𑀫𑁆𑀫𑀕𑀭𑀼𑀢𑀸, 𑀫𑀓𑁆𑀔𑀕𑀭𑀼𑀢𑀸 𑀦 𑀲𑀤𑁆𑀥𑀫𑁆𑀫𑀕𑀭𑀼𑀢𑀸, 𑀮𑀸𑀪𑀕𑀭𑀼𑀢𑀸 𑀦 𑀲𑀤𑁆𑀥𑀫𑁆𑀫𑀕𑀭𑀼𑀢𑀸, 𑀲𑀓𑁆𑀓𑀸𑀭𑀕𑀭𑀼𑀢𑀸 𑀦 𑀲𑀤𑁆𑀥𑀫𑁆𑀫𑀕𑀭𑀼𑀢𑀸. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀘𑀢𑁆𑀢𑀸𑀭𑁄 𑀅𑀲𑀤𑁆𑀥𑀫𑁆𑀫𑀸.

‘‘𑀘𑀢𑁆𑀢𑀸𑀭𑁄𑀫𑁂, 𑀪𑀺𑀓𑁆𑀔𑀯𑁂, 𑀲𑀤𑁆𑀥𑀫𑁆𑀫𑀸. 𑀓𑀢𑀫𑁂 𑀘𑀢𑁆𑀢𑀸𑀭𑁄? 𑀲𑀤𑁆𑀥𑀫𑁆𑀫𑀕𑀭𑀼𑀢𑀸 𑀦 𑀓𑁄𑀥𑀕𑀭𑀼𑀢𑀸, 𑀲𑀤𑁆𑀥𑀫𑁆𑀫𑀕𑀭𑀼𑀢𑀸 𑀦 𑀫𑀓𑁆𑀔𑀕𑀭𑀼𑀢𑀸, 𑀲𑀤𑁆𑀥𑀫𑁆𑀫𑀕𑀭𑀼𑀢𑀸 𑀦 𑀮𑀸𑀪𑀕𑀭𑀼𑀢𑀸, 𑀲𑀤𑁆𑀥𑀫𑁆𑀫𑀕𑀭𑀼𑀢𑀸 𑀦 𑀲𑀓𑁆𑀓𑀸𑀭𑀕𑀭𑀼𑀢𑀸. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀘𑀢𑁆𑀢𑀸𑀭𑁄 𑀲𑀤𑁆𑀥𑀫𑁆𑀫𑀸’’𑀢𑀺.

‘‘𑀓𑁄𑀥𑀫𑀓𑁆𑀔𑀕𑀭𑀼 𑀪𑀺𑀓𑁆𑀔𑀼, 𑀮𑀸𑀪𑀲𑀓𑁆𑀓𑀸𑀭𑀕𑀸𑀭𑀯𑁄;

𑀲𑀼𑀔𑁂𑀢𑁆𑀢𑁂 𑀧𑀽𑀢𑀺𑀩𑀻𑀚𑀁𑀯, 𑀲𑀤𑁆𑀥𑀫𑁆𑀫𑁂 𑀦 𑀯𑀺𑀭𑀽𑀳𑀢𑀺.

‘‘𑀬𑁂 𑀘 𑀲𑀤𑁆𑀥𑀫𑁆𑀫𑀕𑀭𑀼𑀦𑁄, 𑀯𑀺𑀳𑀁𑀲𑀼 𑀯𑀺𑀳𑀭𑀦𑁆𑀢𑀺 𑀘;

𑀢𑁂 𑀯𑁂 𑀥𑀫𑁆𑀫𑁂 𑀯𑀺𑀭𑀽𑀳𑀦𑁆𑀢𑀺, 𑀲𑁆𑀦𑁂𑀳𑀸𑀦𑁆𑀯𑀬𑀫𑀺𑀯𑁄𑀲𑀥𑀸’’𑀢𑀺 [𑀲𑁆𑀦𑁂𑀳𑀫𑀦𑁆𑀯𑀸𑀬𑀫𑀺𑀯𑁄𑀲𑀥𑀸𑀢𑀺 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)]. 𑀘𑀢𑀼𑀢𑁆𑀣𑀁;