𑁨. 𑀲𑀗𑁆𑀕𑀳𑀲𑀼𑀢𑁆𑀢𑀁

𑁩𑁨. ‘‘𑀘𑀢𑁆𑀢𑀸𑀭𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀲𑀗𑁆𑀕𑀳𑀯𑀢𑁆𑀣𑀽𑀦𑀺. 𑀓𑀢𑀫𑀸𑀦𑀺 𑀘𑀢𑁆𑀢𑀸𑀭𑀺? 𑀤𑀸𑀦𑀁, 𑀧𑁂𑀬𑁆𑀬𑀯𑀚𑁆𑀚𑀁, 𑀅𑀢𑁆𑀣𑀘𑀭𑀺𑀬𑀸, 𑀲𑀫𑀸𑀦𑀢𑁆𑀢𑀢𑀸 𑁋 𑀇𑀫𑀸𑀦𑀺 𑀔𑁄, 𑀪𑀺𑀓𑁆𑀔𑀯𑁂, 𑀘𑀢𑁆𑀢𑀸𑀭𑀺 𑀲𑀗𑁆𑀕𑀳𑀯𑀢𑁆𑀣𑀽𑀦𑀻’’𑀢𑀺.

‘‘𑀤𑀸𑀦𑀜𑁆𑀘 𑀧𑁂𑀬𑁆𑀬𑀯𑀚𑁆𑀚𑀜𑁆𑀘 [𑀲𑀗𑁆𑀕𑀳𑁂 (𑀅𑀝𑁆𑀞𑀓𑀣𑀸𑀬𑀁 𑀧𑀸𑀞𑀦𑁆𑀢𑀭𑀁) 𑀤𑀻. 𑀦𑀺. 𑁩.𑁨𑁭𑁩 𑀧𑀲𑁆𑀲𑀺𑀢𑀩𑁆𑀩𑀁], 𑀅𑀢𑁆𑀣𑀘𑀭𑀺𑀬𑀸 𑀘 𑀬𑀸 𑀇𑀥;

𑀲𑀫𑀸𑀦𑀢𑁆𑀢𑀢𑀸 𑀘 𑀥𑀫𑁆𑀫𑁂𑀲𑀼, 𑀢𑀢𑁆𑀣 𑀢𑀢𑁆𑀣 𑀬𑀣𑀸𑀭𑀳𑀁;

𑀏𑀢𑁂 𑀔𑁄 𑀲𑀗𑁆𑀕𑀳𑀸 𑀮𑁄𑀓𑁂, 𑀭𑀣𑀲𑁆𑀲𑀸𑀡𑀻𑀯 𑀬𑀸𑀬𑀢𑁄.

‘‘𑀏𑀢𑁂 𑀘 𑀲𑀗𑁆𑀕𑀳𑀸 𑀦𑀸𑀲𑁆𑀲𑀼, 𑀦 𑀫𑀸𑀢𑀸 𑀧𑀼𑀢𑁆𑀢𑀓𑀸𑀭𑀡𑀸;

𑀮𑀪𑁂𑀣 𑀫𑀸𑀦𑀁 𑀧𑀽𑀚𑀁 𑀯𑀸, 𑀧𑀺𑀢𑀸 𑀯𑀸 𑀧𑀼𑀢𑁆𑀢𑀓𑀸𑀭𑀡𑀸.

‘‘𑀬𑀲𑁆𑀫𑀸 𑀘 𑀲𑀗𑁆𑀕𑀳𑀸 [𑀲𑀗𑁆𑀕𑀳𑁂 (𑀅𑀝𑁆𑀞𑀓𑀣𑀸𑀬𑀁 𑀧𑀸𑀞𑀦𑁆𑀢𑀭𑀁) 𑀤𑀻. 𑀦𑀺. 𑁩.𑁨𑁭𑁩 𑀧𑀲𑁆𑀲𑀺𑀢𑀩𑁆𑀩𑀁] 𑀏𑀢𑁂, 𑀲𑀫𑀯𑁂𑀓𑁆𑀔𑀦𑁆𑀢𑀺 𑀧𑀡𑁆𑀟𑀺𑀢𑀸;

𑀢𑀲𑁆𑀫𑀸 𑀫𑀳𑀢𑁆𑀢𑀁 𑀧𑀧𑁆𑀧𑁄𑀦𑁆𑀢𑀺, 𑀧𑀸𑀲𑀁𑀲𑀸 𑀘 𑀪𑀯𑀦𑁆𑀢𑀺 𑀢𑁂’’𑀢𑀺. 𑀤𑀼𑀢𑀺𑀬𑀁;