𑁬. 𑀓𑀼𑀳𑀲𑀼𑀢𑁆𑀢𑀁

𑁨𑁬. [𑀇𑀢𑀺𑀯𑀼. 𑁧𑁦𑁮 𑀇𑀢𑀺𑀯𑀼𑀢𑁆𑀢𑀓𑁂𑀧𑀺] ‘‘𑀬𑁂 𑀢𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀓𑀼𑀳𑀸 𑀣𑀤𑁆𑀥𑀸 𑀮𑀧𑀸 𑀲𑀺𑀗𑁆𑀕𑀻 𑀉𑀦𑁆𑀦𑀴𑀸 𑀅𑀲𑀫𑀸𑀳𑀺𑀢𑀸, 𑀦 𑀫𑁂 𑀢𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀫𑀸𑀫𑀓𑀸. 𑀅𑀧𑀕𑀢𑀸 𑀘 𑀢𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀇𑀫𑀲𑁆𑀫𑀸 𑀥𑀫𑁆𑀫𑀯𑀺𑀦𑀬𑀸, 𑀦 𑀘 𑀢𑁂 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀯𑀼𑀤𑁆𑀥𑀺𑀁 𑀯𑀺𑀭𑀼𑀴𑁆𑀳𑀺𑀁 𑀯𑁂𑀧𑀼𑀮𑁆𑀮𑀁 𑀆𑀧𑀚𑁆𑀚𑀦𑁆𑀢𑀺. 𑀬𑁂 𑀘 𑀔𑁄 𑀢𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀦𑀺𑀓𑁆𑀓𑀼𑀳𑀸 𑀦𑀺𑀮𑁆𑀮𑀧𑀸 𑀥𑀻𑀭𑀸 𑀅𑀢𑁆𑀣𑀤𑁆𑀥𑀸 𑀲𑀼𑀲𑀫𑀸𑀳𑀺𑀢𑀸, 𑀢𑁂 𑀔𑁄 𑀫𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀫𑀸𑀫𑀓𑀸. 𑀅𑀦𑀧𑀕𑀢𑀸 𑀘 𑀢𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀇𑀫𑀲𑁆𑀫𑀸 𑀥𑀫𑁆𑀫𑀯𑀺𑀦𑀬𑀸. 𑀢𑁂 𑀘 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀯𑀼𑀤𑁆𑀥𑀺𑀁 𑀯𑀺𑀭𑀼𑀴𑁆𑀳𑀺𑀁 𑀯𑁂𑀧𑀼𑀮𑁆𑀮𑀁 𑀆𑀧𑀚𑁆𑀚𑀦𑁆𑀢𑀻’’𑀢𑀺.

[𑀇𑀢𑀺𑀯𑀼. 𑁧𑁦𑁮 𑀇𑀢𑀺𑀯𑀼𑀢𑁆𑀢𑀓𑁂𑀧𑀺] ‘‘𑀓𑀼𑀳𑀸 𑀣𑀤𑁆𑀥𑀸 𑀮𑀧𑀸 𑀲𑀺𑀗𑁆𑀕𑀻, 𑀉𑀦𑁆𑀦𑀴𑀸 𑀅𑀲𑀫𑀸𑀳𑀺𑀢𑀸;

𑀦 𑀢𑁂 𑀥𑀫𑁆𑀫𑁂 𑀯𑀺𑀭𑀽𑀳𑀦𑁆𑀢𑀺, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀤𑁂𑀲𑀺𑀢𑁂.

‘‘𑀦𑀺𑀓𑁆𑀓𑀼𑀳𑀸 𑀦𑀺𑀮𑁆𑀮𑀧𑀸 𑀥𑀻𑀭𑀸, 𑀅𑀢𑁆𑀣𑀤𑁆𑀥𑀸 𑀲𑀼𑀲𑀫𑀸𑀳𑀺𑀢𑀸;

𑀢𑁂 𑀯𑁂 𑀥𑀫𑁆𑀫𑁂 𑀯𑀺𑀭𑀽𑀳𑀦𑁆𑀢𑀺, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀤𑁂𑀲𑀺𑀢𑁂’’𑀢𑀺. 𑀙𑀝𑁆𑀞𑀁;