𑁨. 𑀘𑀭𑀯𑀕𑁆𑀕𑁄

𑁧. 𑀘𑀭𑀲𑀼𑀢𑁆𑀢𑀁

𑁧𑁧. [𑀇𑀢𑀺𑀯𑀼. 𑁧𑁧𑁦] ‘‘𑀘𑀭𑀢𑁄 𑀘𑁂𑀧𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀉𑀧𑁆𑀧𑀚𑁆𑀚𑀢𑀺 𑀓𑀸𑀫𑀯𑀺𑀢𑀓𑁆𑀓𑁄 𑀯𑀸 𑀩𑁆𑀬𑀸𑀧𑀸𑀤𑀯𑀺𑀢𑀓𑁆𑀓𑁄 𑀯𑀸 𑀯𑀺𑀳𑀺𑀁𑀲𑀸𑀯𑀺𑀢𑀓𑁆𑀓𑁄 𑀯𑀸. 𑀢𑀁 𑀘𑁂 𑀪𑀺𑀓𑁆𑀔𑀼 𑀅𑀥𑀺𑀯𑀸𑀲𑁂𑀢𑀺, 𑀦𑀧𑁆𑀧𑀚𑀳𑀢𑀺 𑀦 𑀯𑀺𑀦𑁄𑀤𑁂𑀢𑀺 𑀦 𑀩𑁆𑀬𑀦𑁆𑀢𑀻𑀓𑀭𑁄𑀢𑀺 [𑀩𑁆𑀬𑀦𑁆𑀢𑀺𑀓𑀭𑁄𑀢𑀺 (𑀧𑀻.), 𑀩𑁆𑀬𑀦𑁆𑀢𑀺𑀁 𑀓𑀭𑁄𑀢𑀺 (𑀓.)] 𑀦 𑀅𑀦𑀪𑀸𑀯𑀁 𑀕𑀫𑁂𑀢𑀺, 𑀘𑀭𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀏𑀯𑀁𑀪𑀽𑀢𑁄 ‘𑀅𑀦𑀸𑀢𑀸𑀧𑀻 𑀅𑀦𑁄𑀢𑁆𑀢𑀸𑀧𑀻 𑀲𑀢𑀢𑀁 𑀲𑀫𑀺𑀢𑀁 𑀓𑀼𑀲𑀻𑀢𑁄 𑀳𑀻𑀦𑀯𑀻𑀭𑀺𑀬𑁄’𑀢𑀺 𑀯𑀼𑀘𑁆𑀘𑀢𑀺.

‘‘𑀞𑀺𑀢𑀲𑁆𑀲 𑀘𑁂𑀧𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀉𑀧𑁆𑀧𑀚𑁆𑀚𑀢𑀺 𑀓𑀸𑀫𑀯𑀺𑀢𑀓𑁆𑀓𑁄 𑀯𑀸 𑀩𑁆𑀬𑀸𑀧𑀸𑀤𑀯𑀺𑀢𑀓𑁆𑀓𑁄 𑀯𑀸 𑀯𑀺𑀳𑀺𑀁𑀲𑀸𑀯𑀺𑀢𑀓𑁆𑀓𑁄 𑀯𑀸. 𑀢𑀁 𑀘𑁂 𑀪𑀺𑀓𑁆𑀔𑀼 𑀅𑀥𑀺𑀯𑀸𑀲𑁂𑀢𑀺, 𑀦𑀧𑁆𑀧𑀚𑀳𑀢𑀺 𑀦 𑀯𑀺𑀦𑁄𑀤𑁂𑀢𑀺 𑀦 𑀩𑁆𑀬𑀦𑁆𑀢𑀻𑀓𑀭𑁄𑀢𑀺 𑀦 𑀅𑀦𑀪𑀸𑀯𑀁 𑀕𑀫𑁂𑀢𑀺, 𑀞𑀺𑀢𑁄𑀧𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀏𑀯𑀁𑀪𑀽𑀢𑁄 ‘𑀅𑀦𑀸𑀢𑀸𑀧𑀻 𑀅𑀦𑁄𑀢𑁆𑀢𑀸𑀧𑀻 𑀲𑀢𑀢𑀁 𑀲𑀫𑀺𑀢𑀁 𑀓𑀼𑀲𑀻𑀢𑁄 𑀳𑀻𑀦𑀯𑀻𑀭𑀺𑀬𑁄’𑀢𑀺 𑀯𑀼𑀘𑁆𑀘𑀢𑀺.

‘‘𑀦𑀺𑀲𑀺𑀦𑁆𑀦𑀲𑁆𑀲 𑀘𑁂𑀧𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀉𑀧𑁆𑀧𑀚𑁆𑀚𑀢𑀺 𑀓𑀸𑀫𑀯𑀺𑀢𑀓𑁆𑀓𑁄 𑀯𑀸 𑀩𑁆𑀬𑀸𑀧𑀸𑀤𑀯𑀺𑀢𑀓𑁆𑀓𑁄 𑀯𑀸 𑀯𑀺𑀳𑀺𑀁𑀲𑀸𑀯𑀺𑀢𑀓𑁆𑀓𑁄 𑀯𑀸. 𑀢𑀁 𑀘𑁂 𑀪𑀺𑀓𑁆𑀔𑀼 𑀅𑀥𑀺𑀯𑀸𑀲𑁂𑀢𑀺, 𑀦𑀧𑁆𑀧𑀚𑀳𑀢𑀺 𑀦 𑀯𑀺𑀦𑁄𑀤𑁂𑀢𑀺 𑀦 𑀩𑁆𑀬𑀦𑁆𑀢𑀻𑀓𑀭𑁄𑀢𑀺 𑀦 𑀅𑀦𑀪𑀸𑀯𑀁 𑀕𑀫𑁂𑀢𑀺, 𑀦𑀺𑀲𑀺𑀦𑁆𑀦𑁄𑀧𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀏𑀯𑀁𑀪𑀽𑀢𑁄 ‘𑀅𑀦𑀸𑀢𑀸𑀧𑀻 𑀅𑀦𑁄𑀢𑁆𑀢𑀸𑀧𑀻 𑀲𑀢𑀢𑀁 𑀲𑀫𑀺𑀢𑀁 𑀓𑀼𑀲𑀻𑀢𑁄 𑀳𑀻𑀦𑀯𑀻𑀭𑀺𑀬𑁄’𑀢𑀺 𑀯𑀼𑀘𑁆𑀘𑀢𑀺.

‘‘𑀲𑀬𑀸𑀦𑀲𑁆𑀲 𑀘𑁂𑀧𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀚𑀸𑀕𑀭𑀲𑁆𑀲 𑀉𑀧𑁆𑀧𑀚𑁆𑀚𑀢𑀺 𑀓𑀸𑀫𑀯𑀺𑀢𑀓𑁆𑀓𑁄 𑀯𑀸 𑀩𑁆𑀬𑀸𑀧𑀸𑀤𑀯𑀺𑀢𑀓𑁆𑀓𑁄 𑀯𑀸 𑀯𑀺𑀳𑀺𑀁𑀲𑀸𑀯𑀺𑀢𑀓𑁆𑀓𑁄 𑀯𑀸. 𑀢𑀁 𑀘𑁂 𑀪𑀺𑀓𑁆𑀔𑀼 𑀅𑀥𑀺𑀯𑀸𑀲𑁂𑀢𑀺, 𑀦𑀧𑁆𑀧𑀚𑀳𑀢𑀺 𑀦 𑀯𑀺𑀦𑁄𑀤𑁂𑀢𑀺 𑀦 𑀩𑁆𑀬𑀦𑁆𑀢𑀻𑀓𑀭𑁄𑀢𑀺 𑀦 𑀅𑀦𑀪𑀸𑀯𑀁 𑀕𑀫𑁂𑀢𑀺, 𑀲𑀬𑀸𑀦𑁄𑀧𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀚𑀸𑀕𑀭𑁄 𑀏𑀯𑀁𑀪𑀽𑀢𑁄 ‘𑀅𑀦𑀸𑀢𑀸𑀧𑀻 𑀅𑀦𑁄𑀢𑁆𑀢𑀸𑀧𑀻 𑀲𑀢𑀢𑀁 𑀲𑀫𑀺𑀢𑀁 𑀓𑀼𑀲𑀻𑀢𑁄 𑀳𑀻𑀦𑀯𑀻𑀭𑀺𑀬𑁄’𑀢𑀺 𑀯𑀼𑀘𑁆𑀘𑀢𑀺.

‘‘𑀘𑀭𑀢𑁄 𑀘𑁂𑀧𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀉𑀧𑁆𑀧𑀚𑁆𑀚𑀢𑀺 𑀓𑀸𑀫𑀯𑀺𑀢𑀓𑁆𑀓𑁄 𑀯𑀸 𑀩𑁆𑀬𑀸𑀧𑀸𑀤𑀯𑀺𑀢𑀓𑁆𑀓𑁄 𑀯𑀸 𑀯𑀺𑀳𑀺𑀁𑀲𑀸𑀯𑀺𑀢𑀓𑁆𑀓𑁄 𑀯𑀸. 𑀢𑀁 𑀘𑁂 𑀪𑀺𑀓𑁆𑀔𑀼 𑀦𑀸𑀥𑀺𑀯𑀸𑀲𑁂𑀢𑀺, 𑀧𑀚𑀳𑀢𑀺 𑀯𑀺𑀦𑁄𑀤𑁂𑀢𑀺 𑀩𑁆𑀬𑀦𑁆𑀢𑀻𑀓𑀭𑁄𑀢𑀺 𑀅𑀦𑀪𑀸𑀯𑀁 𑀕𑀫𑁂𑀢𑀺, 𑀘𑀭𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀏𑀯𑀁𑀪𑀽𑀢𑁄 ‘𑀆𑀢𑀸𑀧𑀻 𑀑𑀢𑁆𑀢𑀸𑀧𑀻 𑀲𑀢𑀢𑀁 𑀲𑀫𑀺𑀢𑀁 𑀆𑀭𑀤𑁆𑀥𑀯𑀻𑀭𑀺𑀬𑁄 𑀧𑀳𑀺𑀢𑀢𑁆𑀢𑁄’𑀢𑀺 𑀯𑀼𑀘𑁆𑀘𑀢𑀺.

‘‘𑀞𑀺𑀢𑀲𑁆𑀲 𑀘𑁂𑀧𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀉𑀧𑁆𑀧𑀚𑁆𑀚𑀢𑀺 𑀓𑀸𑀫𑀯𑀺𑀢𑀓𑁆𑀓𑁄 𑀯𑀸 𑀩𑁆𑀬𑀸𑀧𑀸𑀤𑀯𑀺𑀢𑀓𑁆𑀓𑁄 𑀯𑀸 𑀯𑀺𑀳𑀺𑀁𑀲𑀸𑀯𑀺𑀢𑀓𑁆𑀓𑁄 𑀯𑀸. 𑀢𑀁 𑀘𑁂 𑀪𑀺𑀓𑁆𑀔𑀼 𑀦𑀸𑀥𑀺𑀯𑀸𑀲𑁂𑀢𑀺, 𑀧𑀚𑀳𑀢𑀺 𑀯𑀺𑀦𑁄𑀤𑁂𑀢𑀺 𑀩𑁆𑀬𑀦𑁆𑀢𑀻𑀓𑀭𑁄𑀢𑀺 𑀅𑀦𑀪𑀸𑀯𑀁 𑀕𑀫𑁂𑀢𑀺, 𑀞𑀺𑀢𑁄𑀧𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀏𑀯𑀁𑀪𑀽𑀢𑁄 ‘𑀆𑀢𑀸𑀧𑀻 𑀑𑀢𑁆𑀢𑀸𑀧𑀻 𑀲𑀢𑀢𑀁 𑀲𑀫𑀺𑀢𑀁 𑀆𑀭𑀤𑁆𑀥𑀯𑀻𑀭𑀺𑀬𑁄 𑀧𑀳𑀺𑀢𑀢𑁆𑀢𑁄’𑀢𑀺 𑀯𑀼𑀘𑁆𑀘𑀢𑀺.

‘‘𑀦𑀺𑀲𑀺𑀦𑁆𑀦𑀲𑁆𑀲 𑀘𑁂𑀧𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀉𑀧𑁆𑀧𑀚𑁆𑀚𑀢𑀺 𑀓𑀸𑀫𑀯𑀺𑀢𑀓𑁆𑀓𑁄 𑀯𑀸 𑀩𑁆𑀬𑀸𑀧𑀸𑀤𑀯𑀺𑀢𑀓𑁆𑀓𑁄 𑀯𑀸 𑀯𑀺𑀳𑀺𑀁𑀲𑀸𑀯𑀺𑀢𑀓𑁆𑀓𑁄 𑀯𑀸. 𑀢𑀁 𑀘𑁂 𑀪𑀺𑀓𑁆𑀔𑀼 𑀦𑀸𑀥𑀺𑀯𑀸𑀲𑁂𑀢𑀺, 𑀧𑀚𑀳𑀢𑀺 𑀯𑀺𑀦𑁄𑀤𑁂𑀢𑀺 𑀩𑁆𑀬𑀦𑁆𑀢𑀻𑀓𑀭𑁄𑀢𑀺 𑀅𑀦𑀪𑀸𑀯𑀁 𑀕𑀫𑁂𑀢𑀺, 𑀦𑀺𑀲𑀺𑀦𑁆𑀦𑁄𑀧𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀏𑀯𑀁𑀪𑀽𑀢𑁄 ‘𑀆𑀢𑀸𑀧𑀻 𑀑𑀢𑁆𑀢𑀸𑀧𑀻 𑀲𑀢𑀢𑀁 𑀲𑀫𑀺𑀢𑀁 𑀆𑀭𑀤𑁆𑀥𑀯𑀻𑀭𑀺𑀬𑁄 𑀧𑀳𑀺𑀢𑀢𑁆𑀢𑁄’𑀢𑀺 𑀯𑀼𑀘𑁆𑀘𑀢𑀺.

‘‘𑀲𑀬𑀸𑀦𑀲𑁆𑀲 𑀘𑁂𑀧𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀚𑀸𑀕𑀭𑀲𑁆𑀲 𑀉𑀧𑁆𑀧𑀚𑁆𑀚𑀢𑀺 𑀓𑀸𑀫𑀯𑀺𑀢𑀓𑁆𑀓𑁄 𑀯𑀸 𑀩𑁆𑀬𑀸𑀧𑀸𑀤𑀯𑀺𑀢𑀓𑁆𑀓𑁄 𑀯𑀸 𑀯𑀺𑀳𑀺𑀁𑀲𑀸𑀯𑀺𑀢𑀓𑁆𑀓𑁄 𑀯𑀸. 𑀢𑀁 𑀘𑁂 𑀪𑀺𑀓𑁆𑀔𑀼 𑀦𑀸𑀥𑀺𑀯𑀸𑀲𑁂𑀢𑀺, 𑀧𑀚𑀳𑀢𑀺 𑀯𑀺𑀦𑁄𑀤𑁂𑀢𑀺 𑀩𑁆𑀬𑀦𑁆𑀢𑀻𑀓𑀭𑁄𑀢𑀺 𑀅𑀦𑀪𑀸𑀯𑀁 𑀕𑀫𑁂𑀢𑀺, 𑀲𑀬𑀸𑀦𑁄𑀧𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀚𑀸𑀕𑀭𑁄 𑀏𑀯𑀁𑀪𑀽𑀢𑁄 ‘𑀆𑀢𑀸𑀧𑀻 𑀑𑀢𑁆𑀢𑀸𑀧𑀻 𑀲𑀢𑀢𑀁 𑀲𑀫𑀺𑀢𑀁 𑀆𑀭𑀤𑁆𑀥𑀯𑀻𑀭𑀺𑀬𑁄 𑀧𑀳𑀺𑀢𑀢𑁆𑀢𑁄’𑀢𑀺 𑀯𑀼𑀘𑁆𑀘𑀢𑀻’’𑀢𑀺.

‘‘𑀘𑀭𑀁 𑀯𑀸 𑀬𑀤𑀺 𑀯𑀸 𑀢𑀺𑀝𑁆𑀞𑀁, 𑀦𑀺𑀲𑀺𑀦𑁆𑀦𑁄 𑀉𑀤 𑀯𑀸 𑀲𑀬𑀁;

𑀬𑁄 𑀯𑀺𑀢𑀓𑁆𑀓𑀁 𑀯𑀺𑀢𑀓𑁆𑀓𑁂𑀢𑀺, 𑀧𑀸𑀧𑀓𑀁 𑀕𑁂𑀳𑀦𑀺𑀲𑁆𑀲𑀺𑀢𑀁.

‘‘𑀓𑀼𑀫𑁆𑀫𑀕𑁆𑀕𑀧𑁆𑀧𑀝𑀺𑀧𑀦𑁆𑀦𑁄 𑀲𑁄, 𑀫𑁄𑀳𑀦𑁂𑀬𑁆𑀬𑁂𑀲𑀼 𑀫𑀼𑀘𑁆𑀙𑀺𑀢𑁄;

𑀅𑀪𑀩𑁆𑀩𑁄 𑀢𑀸𑀤𑀺𑀲𑁄 𑀪𑀺𑀓𑁆𑀔𑀼, 𑀨𑀼𑀝𑁆𑀞𑀼𑀁 𑀲𑀫𑁆𑀩𑁄𑀥𑀺𑀫𑀼𑀢𑁆𑀢𑀫𑀁.

‘‘𑀬𑁄 𑀘 𑀘𑀭𑀁 𑀯𑀸 𑀢𑀺𑀝𑁆𑀞𑀁 𑀯𑀸, 𑀦𑀺𑀲𑀺𑀦𑁆𑀦𑁄 𑀉𑀤 𑀯𑀸 𑀲𑀬𑀁;

𑀯𑀺𑀢𑀓𑁆𑀓𑀁 𑀲𑀫𑀬𑀺𑀢𑁆𑀯𑀸𑀦, 𑀯𑀺𑀢𑀓𑁆𑀓𑀽𑀧𑀲𑀫𑁂 𑀭𑀢𑁄;

𑀪𑀩𑁆𑀩𑁄 𑀲𑁄 𑀢𑀸𑀤𑀺𑀲𑁄 𑀪𑀺𑀓𑁆𑀔𑀼, 𑀨𑀼𑀝𑁆𑀞𑀼𑀁 𑀲𑀫𑁆𑀩𑁄𑀥𑀺𑀫𑀼𑀢𑁆𑀢𑀫’’𑀦𑁆𑀢𑀺. 𑀧𑀞𑀫𑀁;

𑁨. 𑀲𑀻𑀮𑀲𑀼𑀢𑁆𑀢𑀁

𑁧𑁨. ‘‘𑀲𑀫𑁆𑀧𑀦𑁆𑀦𑀲𑀻𑀮𑀸, 𑀪𑀺𑀓𑁆𑀔𑀯𑁂, 𑀯𑀺𑀳𑀭𑀣 𑀲𑀫𑁆𑀧𑀦𑁆𑀦𑀧𑀸𑀢𑀺𑀫𑁄𑀓𑁆𑀔𑀸, 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀁𑀯𑀼𑀢𑀸 𑀯𑀺𑀳𑀭𑀣 𑀆𑀘𑀸𑀭𑀕𑁄𑀘𑀭𑀲𑀫𑁆𑀧𑀦𑁆𑀦𑀸 𑀅𑀡𑀼𑀫𑀢𑁆𑀢𑁂𑀲𑀼 𑀯𑀚𑁆𑀚𑁂𑀲𑀼 𑀪𑀬𑀤𑀲𑁆𑀲𑀸𑀯𑀺𑀦𑁄. 𑀲𑀫𑀸𑀤𑀸𑀬 𑀲𑀺𑀓𑁆𑀔𑀣 𑀲𑀺𑀓𑁆𑀔𑀸𑀧𑀤𑁂𑀲𑀼. 𑀲𑀫𑁆𑀧𑀦𑁆𑀦𑀲𑀻𑀮𑀸𑀦𑀁 𑀯𑁄, 𑀪𑀺𑀓𑁆𑀔𑀯𑁂, 𑀯𑀺𑀳𑀭𑀢𑀁 𑀲𑀫𑁆𑀧𑀦𑁆𑀦𑀧𑀸𑀢𑀺𑀫𑁄𑀓𑁆𑀔𑀸𑀦𑀁 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀁𑀯𑀼𑀢𑀸𑀦𑀁 𑀯𑀺𑀳𑀭𑀢𑀁 𑀆𑀘𑀸𑀭𑀕𑁄𑀘𑀭𑀲𑀫𑁆𑀧𑀦𑁆𑀦𑀸𑀦𑀁 𑀅𑀡𑀼𑀫𑀢𑁆𑀢𑁂𑀲𑀼 𑀯𑀚𑁆𑀚𑁂𑀲𑀼 𑀪𑀬𑀤𑀲𑁆𑀲𑀸𑀯𑀻𑀦𑀁 𑀲𑀫𑀸𑀤𑀸𑀬 𑀲𑀺𑀓𑁆𑀔𑀢𑀁 𑀲𑀺𑀓𑁆𑀔𑀸𑀧𑀤𑁂𑀲𑀼 𑀓𑀺𑀫𑀲𑁆𑀲 𑀉𑀢𑁆𑀢𑀭𑀺 𑀓𑀭𑀡𑀻𑀬𑀁?

‘‘𑀘𑀭𑀢𑁄 𑀘𑁂𑀧𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀅𑀪𑀺𑀚𑁆𑀛𑀸𑀩𑁆𑀬𑀸𑀧𑀸𑀤𑁄 𑀯𑀺𑀕𑀢𑁄 𑀳𑁄𑀢𑀺, 𑀣𑀺𑀦𑀫𑀺𑀤𑁆𑀥𑀁… 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀁… 𑀯𑀺𑀘𑀺𑀓𑀺𑀘𑁆𑀙𑀸 𑀧𑀳𑀻𑀦𑀸 𑀳𑁄𑀢𑀺, 𑀆𑀭𑀤𑁆𑀥𑀁 𑀳𑁄𑀢𑀺 𑀯𑀻𑀭𑀺𑀬𑀁 𑀅𑀲𑀮𑁆𑀮𑀻𑀦𑀁, 𑀉𑀧𑀝𑁆𑀞𑀺𑀢𑀸 𑀲𑀢𑀺 𑀅𑀲𑀫𑁆𑀫𑀼𑀝𑁆𑀞𑀸, 𑀧𑀲𑁆𑀲𑀤𑁆𑀥𑁄 𑀓𑀸𑀬𑁄 𑀅𑀲𑀸𑀭𑀤𑁆𑀥𑁄, 𑀲𑀫𑀸𑀳𑀺𑀢𑀁 𑀘𑀺𑀢𑁆𑀢𑀁 𑀏𑀓𑀕𑁆𑀕𑀁, 𑀘𑀭𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀏𑀯𑀁𑀪𑀽𑀢𑁄 ‘𑀆𑀢𑀸𑀧𑀻 𑀑𑀢𑁆𑀢𑀸𑀧𑀻 𑀲𑀢𑀢𑀁 𑀲𑀫𑀺𑀢𑀁 𑀆𑀭𑀤𑁆𑀥𑀯𑀻𑀭𑀺𑀬𑁄 𑀧𑀳𑀺𑀢𑀢𑁆𑀢𑁄’𑀢𑀺 𑀯𑀼𑀘𑁆𑀘𑀢𑀺.

‘‘𑀞𑀺𑀢𑀲𑁆𑀲 𑀘𑁂𑀧𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀅𑀪𑀺𑀚𑁆𑀛𑀸𑀩𑁆𑀬𑀸𑀧𑀸𑀤𑁄 𑀯𑀺𑀕𑀢𑁄 𑀳𑁄𑀢𑀺, 𑀣𑀺𑀦𑀫𑀺𑀤𑁆𑀥𑀁… 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀁… 𑀯𑀺𑀘𑀺𑀓𑀺𑀘𑁆𑀙𑀸 𑀧𑀳𑀻𑀦𑀸 𑀳𑁄𑀢𑀺, 𑀆𑀭𑀤𑁆𑀥𑀁 𑀳𑁄𑀢𑀺 𑀯𑀻𑀭𑀺𑀬𑀁 𑀅𑀲𑀮𑁆𑀮𑀻𑀦𑀁, 𑀉𑀧𑀝𑁆𑀞𑀺𑀢𑀸 𑀲𑀢𑀺 𑀅𑀲𑀫𑁆𑀫𑀼𑀝𑁆𑀞𑀸, 𑀧𑀲𑁆𑀲𑀤𑁆𑀥𑁄 𑀓𑀸𑀬𑁄 𑀅𑀲𑀸𑀭𑀤𑁆𑀥𑁄, 𑀲𑀫𑀸𑀳𑀺𑀢𑀁 𑀘𑀺𑀢𑁆𑀢𑀁 𑀏𑀓𑀕𑁆𑀕𑀁, 𑀞𑀺𑀢𑁄𑀧𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀏𑀯𑀁𑀪𑀽𑀢𑁄 ‘𑀆𑀢𑀸𑀧𑀻 𑀑𑀢𑁆𑀢𑀸𑀧𑀻 𑀲𑀢𑀢𑀁 𑀲𑀫𑀺𑀢𑀁 𑀆𑀭𑀤𑁆𑀥𑀯𑀻𑀭𑀺𑀬𑁄 𑀧𑀳𑀺𑀢𑀢𑁆𑀢𑁄’𑀢𑀺 𑀯𑀼𑀘𑁆𑀘𑀢𑀺.

‘‘𑀦𑀺𑀲𑀺𑀦𑁆𑀦𑀲𑁆𑀲 𑀘𑁂𑀧𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀅𑀪𑀺𑀚𑁆𑀛𑀸𑀩𑁆𑀬𑀸𑀧𑀸𑀤𑁄 𑀯𑀺𑀕𑀢𑁄 𑀳𑁄𑀢𑀺, 𑀣𑀺𑀦𑀫𑀺𑀤𑁆𑀥𑀁… 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀁… 𑀯𑀺𑀘𑀺𑀓𑀺𑀘𑁆𑀙𑀸 𑀧𑀳𑀻𑀦𑀸 𑀳𑁄𑀢𑀺, 𑀆𑀭𑀤𑁆𑀥𑀁 𑀳𑁄𑀢𑀺 𑀯𑀻𑀭𑀺𑀬𑀁 𑀅𑀲𑀮𑁆𑀮𑀻𑀦𑀁, 𑀉𑀧𑀝𑁆𑀞𑀺𑀢𑀸 𑀲𑀢𑀺 𑀅𑀲𑀫𑁆𑀫𑀼𑀝𑁆𑀞𑀸, 𑀧𑀲𑁆𑀲𑀤𑁆𑀥𑁄 𑀓𑀸𑀬𑁄 𑀅𑀲𑀸𑀭𑀤𑁆𑀥𑁄, 𑀲𑀫𑀸𑀳𑀺𑀢𑀁 𑀘𑀺𑀢𑁆𑀢𑀁 𑀏𑀓𑀕𑁆𑀕𑀁, 𑀦𑀺𑀲𑀺𑀦𑁆𑀦𑁄𑀧𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀏𑀯𑀁𑀪𑀽𑀢𑁄 ‘𑀆𑀢𑀸𑀧𑀻 𑀑𑀢𑁆𑀢𑀸𑀧𑀻 𑀲𑀢𑀢𑀁 𑀲𑀫𑀺𑀢𑀁 𑀆𑀭𑀤𑁆𑀥𑀯𑀻𑀭𑀺𑀬𑁄 𑀧𑀳𑀺𑀢𑀢𑁆𑀢𑁄’𑀢𑀺 𑀯𑀼𑀘𑁆𑀘𑀢𑀺.

‘‘𑀲𑀬𑀸𑀦𑀲𑁆𑀲 𑀘𑁂𑀧𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀚𑀸𑀕𑀭𑀲𑁆𑀲 𑀅𑀪𑀺𑀚𑁆𑀛𑀸𑀩𑁆𑀬𑀸𑀧𑀸𑀤𑁄 𑀯𑀺𑀕𑀢𑁄 𑀳𑁄𑀢𑀺, 𑀣𑀺𑀦𑀫𑀺𑀤𑁆𑀥𑀁… 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀁… 𑀯𑀺𑀘𑀺𑀓𑀺𑀘𑁆𑀙𑀸 𑀧𑀳𑀻𑀦𑀸 𑀳𑁄𑀢𑀺, 𑀆𑀭𑀤𑁆𑀥𑀁 𑀳𑁄𑀢𑀺 𑀯𑀻𑀭𑀺𑀬𑀁 𑀅𑀲𑀮𑁆𑀮𑀻𑀦𑀁, 𑀉𑀧𑀝𑁆𑀞𑀺𑀢𑀸 𑀲𑀢𑀺 𑀅𑀲𑀫𑁆𑀫𑀼𑀝𑁆𑀞𑀸, 𑀧𑀲𑁆𑀲𑀤𑁆𑀥𑁄 𑀓𑀸𑀬𑁄 𑀅𑀲𑀸𑀭𑀤𑁆𑀥𑁄, 𑀲𑀫𑀸𑀳𑀺𑀢𑀁 𑀘𑀺𑀢𑁆𑀢𑀁 𑀏𑀓𑀕𑁆𑀕𑀁, 𑀲𑀬𑀸𑀦𑁄𑀧𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀚𑀸𑀕𑀭𑁄 𑀏𑀯𑀁𑀪𑀽𑀢𑁄 ‘𑀆𑀢𑀸𑀧𑀻 𑀑𑀢𑁆𑀢𑀸𑀧𑀻 𑀲𑀢𑀢𑀁 𑀲𑀫𑀺𑀢𑀁 𑀆𑀭𑀤𑁆𑀥𑀯𑀻𑀭𑀺𑀬𑁄 𑀧𑀳𑀺𑀢𑀢𑁆𑀢𑁄’𑀢𑀺 𑀯𑀼𑀘𑁆𑀘𑀢𑀻’’𑀢𑀺.

‘‘𑀬𑀢𑀁 [𑀬𑀣𑀸 (𑀓.) 𑀇𑀢𑀺𑀯𑀼. 𑁧𑁧𑁧] 𑀘𑀭𑁂 𑀬𑀢𑀁 [𑀬𑀣𑀸 (𑀓.) 𑀇𑀢𑀺𑀯𑀼. 𑁧𑁧𑁧] 𑀢𑀺𑀝𑁆𑀞𑁂, 𑀬𑀢𑀁 [𑀬𑀣𑀸 (𑀓.) 𑀇𑀢𑀺𑀯𑀼. 𑁧𑁧𑁧] 𑀅𑀘𑁆𑀙𑁂 𑀬𑀢𑀁 [𑀬𑀣𑀸 (𑀓.) 𑀇𑀢𑀺𑀯𑀼. 𑁧𑁧𑁧] 𑀲𑀬𑁂;

𑀬𑀢𑀁 [𑀬𑀣𑀸 (𑀓.) 𑀇𑀢𑀺𑀯𑀼. 𑁧𑁧𑁧] 𑀲𑀫𑀺𑀜𑁆𑀚𑀬𑁂 [𑀲𑀫𑁆𑀫𑀺𑀜𑁆𑀚𑀬𑁂 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀪𑀺𑀓𑁆𑀔𑀼, 𑀬𑀢𑀫𑁂𑀦𑀁 [𑀬𑀢𑀫𑁂𑀯 𑀦𑀁 (𑀲𑀻.), 𑀬𑀢𑀫𑁂𑀢𑀁 (𑀲𑁆𑀬𑀸. 𑀓𑀁.), 𑀬𑀢𑀫𑁂𑀯 (?)] 𑀧𑀲𑀸𑀭𑀬𑁂.

‘‘𑀉𑀤𑁆𑀥𑀁 𑀢𑀺𑀭𑀺𑀬𑀁 𑀅𑀧𑀸𑀘𑀻𑀦𑀁, 𑀬𑀸𑀯𑀢𑀸 𑀚𑀕𑀢𑁄 𑀕𑀢𑀺;

𑀲𑀫𑀯𑁂𑀓𑁆𑀔𑀺𑀢𑀸 𑀘 𑀥𑀫𑁆𑀫𑀸𑀦𑀁, 𑀔𑀦𑁆𑀥𑀸𑀦𑀁 𑀉𑀤𑀬𑀩𑁆𑀩𑀬𑀁.

‘‘𑀘𑁂𑀢𑁄𑀲𑀫𑀣𑀲𑀸𑀫𑀻𑀘𑀺𑀁, 𑀲𑀺𑀓𑁆𑀔𑀫𑀸𑀦𑀁 𑀲𑀤𑀸 𑀲𑀢𑀁;

𑀲𑀢𑀢𑀁 𑀧𑀳𑀺𑀢𑀢𑁆𑀢𑁄𑀢𑀺, 𑀆𑀳𑀼 𑀪𑀺𑀓𑁆𑀔𑀼𑀁 𑀢𑀣𑀸𑀯𑀺𑀥’’𑀦𑁆𑀢𑀺. 𑀤𑀼𑀢𑀺𑀬𑀁;

𑁩. 𑀧𑀥𑀸𑀦𑀲𑀼𑀢𑁆𑀢𑀁

𑁧𑁩. ‘‘𑀘𑀢𑁆𑀢𑀸𑀭𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀲𑀫𑁆𑀫𑀧𑁆𑀧𑀥𑀸𑀦𑀸𑀦𑀺. 𑀓𑀢𑀫𑀸𑀦𑀺 𑀘𑀢𑁆𑀢𑀸𑀭𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀅𑀦𑀼𑀧𑁆𑀧𑀦𑁆𑀦𑀸𑀦𑀁 𑀧𑀸𑀧𑀓𑀸𑀦𑀁 𑀅𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀅𑀦𑀼𑀧𑁆𑀧𑀸𑀤𑀸𑀬 𑀙𑀦𑁆𑀤𑀁 𑀚𑀦𑁂𑀢𑀺 𑀯𑀸𑀬𑀫𑀢𑀺 𑀯𑀻𑀭𑀺𑀬𑀁 𑀆𑀭𑀪𑀢𑀺 𑀘𑀺𑀢𑁆𑀢𑀁 𑀧𑀕𑁆𑀕𑀡𑁆𑀳𑀸𑀢𑀺 𑀧𑀤𑀳𑀢𑀺; 𑀉𑀧𑁆𑀧𑀦𑁆𑀦𑀸𑀦𑀁 𑀧𑀸𑀧𑀓𑀸𑀦𑀁 𑀅𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀧𑀳𑀸𑀦𑀸𑀬 𑀙𑀦𑁆𑀤𑀁 𑀚𑀦𑁂𑀢𑀺 𑀯𑀸𑀬𑀫𑀢𑀺 𑀯𑀻𑀭𑀺𑀬𑀁 𑀆𑀭𑀪𑀢𑀺 𑀘𑀺𑀢𑁆𑀢𑀁 𑀧𑀕𑁆𑀕𑀡𑁆𑀳𑀸𑀢𑀺 𑀧𑀤𑀳𑀢𑀺; 𑀅𑀦𑀼𑀧𑁆𑀧𑀦𑁆𑀦𑀸𑀦𑀁 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀉𑀧𑁆𑀧𑀸𑀤𑀸𑀬 𑀙𑀦𑁆𑀤𑀁 𑀚𑀦𑁂𑀢𑀺 𑀯𑀸𑀬𑀫𑀢𑀺 𑀯𑀻𑀭𑀺𑀬𑀁 𑀆𑀭𑀪𑀢𑀺 𑀘𑀺𑀢𑁆𑀢𑀁 𑀧𑀕𑁆𑀕𑀡𑁆𑀳𑀸𑀢𑀺 𑀧𑀤𑀳𑀢𑀺; 𑀉𑀧𑁆𑀧𑀦𑁆𑀦𑀸𑀦𑀁 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀞𑀺𑀢𑀺𑀬𑀸 𑀅𑀲𑀫𑁆𑀫𑁄𑀲𑀸𑀬 𑀪𑀺𑀬𑁆𑀬𑁄𑀪𑀸𑀯𑀸𑀬 𑀯𑁂𑀧𑀼𑀮𑁆𑀮𑀸𑀬 𑀪𑀸𑀯𑀦𑀸𑀬 𑀧𑀸𑀭𑀺𑀧𑀽𑀭𑀺𑀬𑀸 𑀙𑀦𑁆𑀤𑀁 𑀚𑀦𑁂𑀢𑀺 𑀯𑀸𑀬𑀫𑀢𑀺 𑀯𑀻𑀭𑀺𑀬𑀁 𑀆𑀭𑀪𑀢𑀺 𑀘𑀺𑀢𑁆𑀢𑀁 𑀧𑀕𑁆𑀕𑀡𑁆𑀳𑀸𑀢𑀺 𑀧𑀤𑀳𑀢𑀺. 𑀇𑀫𑀸𑀦𑀺 𑀔𑁄, 𑀪𑀺𑀓𑁆𑀔𑀯𑁂, 𑀘𑀢𑁆𑀢𑀸𑀭𑀺 𑀲𑀫𑁆𑀫𑀧𑁆𑀧𑀥𑀸𑀦𑀸𑀦𑀻’’𑀢𑀺.

‘‘𑀲𑀫𑁆𑀫𑀧𑁆𑀧𑀥𑀸𑀦𑀸 𑀫𑀸𑀭𑀥𑁂𑀬𑁆𑀬𑀸𑀪𑀺𑀪𑀽𑀢𑀸,

𑀢𑁂 𑀅𑀲𑀺𑀢𑀸 𑀚𑀸𑀢𑀺𑀫𑀭𑀡𑀪𑀬𑀲𑁆𑀲 𑀧𑀸𑀭𑀕𑀽;

𑀢𑁂 𑀢𑀼𑀲𑀺𑀢𑀸 𑀚𑁂𑀢𑁆𑀯𑀸 𑀫𑀸𑀭𑀁 𑀲𑀯𑀸𑀳𑀺𑀦𑀺𑀁 [𑀲𑀯𑀸𑀳𑀦𑀁 (𑀲𑁆𑀬𑀸. 𑀓𑀁. 𑀧𑀻. 𑀓.)] 𑀢𑁂 𑀅𑀦𑁂𑀚𑀸,

𑀲𑀩𑁆𑀩𑀁 𑀦𑀫𑀼𑀘𑀺𑀩𑀮𑀁 𑀉𑀧𑀸𑀢𑀺𑀯𑀢𑁆𑀢𑀸 𑀢𑁂 𑀲𑀼𑀔𑀺𑀢𑀸’’𑀢𑀺. 𑀢𑀢𑀺𑀬𑀁;

𑁪. 𑀲𑀁𑀯𑀭𑀲𑀼𑀢𑁆𑀢𑀁

𑁧𑁪. ‘‘𑀘𑀢𑁆𑀢𑀸𑀭𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀧𑀥𑀸𑀦𑀸𑀦𑀺. 𑀓𑀢𑀫𑀸𑀦𑀺 𑀘𑀢𑁆𑀢𑀸𑀭𑀺? 𑀲𑀁𑀯𑀭𑀧𑁆𑀧𑀥𑀸𑀦𑀁, 𑀧𑀳𑀸𑀦𑀧𑁆𑀧𑀥𑀸𑀦𑀁, 𑀪𑀸𑀯𑀦𑀸𑀧𑁆𑀧𑀥𑀸𑀦𑀁, 𑀅𑀦𑀼𑀭𑀓𑁆𑀔𑀡𑀸𑀧𑁆𑀧𑀥𑀸𑀦𑀁. 𑀓𑀢𑀫𑀜𑁆𑀘, 𑀪𑀺𑀓𑁆𑀔𑀯𑁂, 𑀲𑀁𑀯𑀭𑀧𑁆𑀧𑀥𑀸𑀦𑀁? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀘𑀓𑁆𑀔𑀼𑀦𑀸 𑀭𑀽𑀧𑀁 𑀤𑀺𑀲𑁆𑀯𑀸 𑀦 𑀦𑀺𑀫𑀺𑀢𑁆𑀢𑀕𑁆𑀕𑀸𑀳𑀻 𑀳𑁄𑀢𑀺 𑀦𑀸𑀦𑀼𑀩𑁆𑀬𑀜𑁆𑀚𑀦𑀕𑁆𑀕𑀸𑀳𑀻. 𑀬𑀢𑁆𑀯𑀸𑀥𑀺𑀓𑀭𑀡𑀫𑁂𑀦𑀁 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁 𑀅𑀲𑀁𑀯𑀼𑀢𑀁 𑀯𑀺𑀳𑀭𑀦𑁆𑀢𑀁 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲𑀸 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀅𑀦𑁆𑀯𑀸𑀲𑁆𑀲𑀯𑁂𑀬𑁆𑀬𑀼𑀁, 𑀢𑀲𑁆𑀲 𑀲𑀁𑀯𑀭𑀸𑀬 𑀧𑀝𑀺𑀧𑀚𑁆𑀚𑀢𑀺, 𑀭𑀓𑁆𑀔𑀢𑀺 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁, 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑁂 𑀲𑀁𑀯𑀭𑀁 𑀆𑀧𑀚𑁆𑀚𑀢𑀺. 𑀲𑁄𑀢𑁂𑀦 𑀲𑀤𑁆𑀤𑀁 𑀲𑀼𑀢𑁆𑀯𑀸… 𑀖𑀸𑀦𑁂𑀦 𑀕𑀦𑁆𑀥𑀁 𑀖𑀸𑀬𑀺𑀢𑁆𑀯𑀸… 𑀚𑀺𑀯𑁆𑀳𑀸𑀬 𑀭𑀲𑀁 𑀲𑀸𑀬𑀺𑀢𑁆𑀯𑀸… 𑀓𑀸𑀬𑁂𑀦 𑀨𑁄𑀝𑁆𑀞𑀩𑁆𑀩𑀁 𑀨𑀼𑀲𑀺𑀢𑁆𑀯𑀸… 𑀫𑀦𑀲𑀸 𑀥𑀫𑁆𑀫𑀁 𑀯𑀺𑀜𑁆𑀜𑀸𑀬 𑀦 𑀦𑀺𑀫𑀺𑀢𑁆𑀢𑀕𑁆𑀕𑀸𑀳𑀻 𑀳𑁄𑀢𑀺 𑀦𑀸𑀦𑀼𑀩𑁆𑀬𑀜𑁆𑀚𑀦𑀕𑁆𑀕𑀸𑀳𑀻, 𑀬𑀢𑁆𑀯𑀸𑀥𑀺𑀓𑀭𑀡𑀫𑁂𑀦𑀁 𑀫𑀦𑀺𑀦𑁆𑀤𑁆𑀭𑀺𑀬𑀁 𑀅𑀲𑀁𑀯𑀼𑀢𑀁 𑀯𑀺𑀳𑀭𑀦𑁆𑀢𑀁 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲𑀸 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀅𑀦𑁆𑀯𑀸𑀲𑁆𑀲𑀯𑁂𑀬𑁆𑀬𑀼𑀁, 𑀢𑀲𑁆𑀲 𑀲𑀁𑀯𑀭𑀸𑀬 𑀧𑀝𑀺𑀧𑀚𑁆𑀚𑀢𑀺, 𑀭𑀓𑁆𑀔𑀢𑀺 𑀫𑀦𑀺𑀦𑁆𑀤𑁆𑀭𑀺𑀬𑀁, 𑀫𑀦𑀺𑀦𑁆𑀤𑁆𑀭𑀺𑀬𑁂 𑀲𑀁𑀯𑀭𑀁 𑀆𑀧𑀚𑁆𑀚𑀢𑀺. 𑀇𑀤𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀲𑀁𑀯𑀭𑀧𑁆𑀧𑀥𑀸𑀦𑀁.

‘‘𑀓𑀢𑀫𑀜𑁆𑀘, 𑀪𑀺𑀓𑁆𑀔𑀯𑁂, 𑀧𑀳𑀸𑀦𑀧𑁆𑀧𑀥𑀸𑀦𑀁? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀉𑀧𑁆𑀧𑀦𑁆𑀦𑀁 𑀓𑀸𑀫𑀯𑀺𑀢𑀓𑁆𑀓𑀁 𑀦𑀸𑀥𑀺𑀯𑀸𑀲𑁂𑀢𑀺 𑀧𑀚𑀳𑀢𑀺 𑀯𑀺𑀦𑁄𑀤𑁂𑀢𑀺 𑀩𑁆𑀬𑀦𑁆𑀢𑀻𑀓𑀭𑁄𑀢𑀺 𑀅𑀦𑀪𑀸𑀯𑀁 𑀕𑀫𑁂𑀢𑀺; 𑀉𑀧𑁆𑀧𑀦𑁆𑀦𑀁 𑀩𑁆𑀬𑀸𑀧𑀸𑀤𑀯𑀺𑀢𑀓𑁆𑀓𑀁…𑀧𑁂… 𑀉𑀧𑁆𑀧𑀦𑁆𑀦𑀁 𑀯𑀺𑀳𑀺𑀁𑀲𑀸𑀯𑀺𑀢𑀓𑁆𑀓𑀁…𑀧𑁂… 𑀉𑀧𑁆𑀧𑀦𑁆𑀦𑀼𑀧𑁆𑀧𑀦𑁆𑀦𑁂 𑀧𑀸𑀧𑀓𑁂 𑀅𑀓𑀼𑀲𑀮𑁂 𑀥𑀫𑁆𑀫𑁂 𑀦𑀸𑀥𑀺𑀯𑀸𑀲𑁂𑀢𑀺 𑀧𑀚𑀳𑀢𑀺 𑀯𑀺𑀦𑁄𑀤𑁂𑀢𑀺 𑀩𑁆𑀬𑀦𑁆𑀢𑀻𑀓𑀭𑁄𑀢𑀺 𑀅𑀦𑀪𑀸𑀯𑀁 𑀕𑀫𑁂𑀢𑀺. 𑀇𑀤𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀧𑀳𑀸𑀦𑀧𑁆𑀧𑀥𑀸𑀦𑀁.

‘‘𑀓𑀢𑀫𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀸𑀯𑀦𑀸𑀧𑁆𑀧𑀥𑀸𑀦𑀁? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀁 𑀪𑀸𑀯𑁂𑀢𑀺 𑀯𑀺𑀯𑁂𑀓𑀦𑀺𑀲𑁆𑀲𑀺𑀢𑀁 𑀯𑀺𑀭𑀸𑀕𑀦𑀺𑀲𑁆𑀲𑀺𑀢𑀁 𑀦𑀺𑀭𑁄𑀥𑀦𑀺𑀲𑁆𑀲𑀺𑀢𑀁 𑀯𑁄𑀲𑁆𑀲𑀕𑁆𑀕𑀧𑀭𑀺𑀡𑀸𑀫𑀺𑀁, 𑀥𑀫𑁆𑀫𑀯𑀺𑀘𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀁 𑀪𑀸𑀯𑁂𑀢𑀺… 𑀯𑀻𑀭𑀺𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀁 𑀪𑀸𑀯𑁂𑀢𑀺… 𑀧𑀻𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀁 𑀪𑀸𑀯𑁂𑀢𑀺… 𑀧𑀲𑁆𑀲𑀤𑁆𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀁 𑀪𑀸𑀯𑁂𑀢𑀺… 𑀲𑀫𑀸𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀁 𑀪𑀸𑀯𑁂𑀢𑀺… 𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑀁 𑀪𑀸𑀯𑁂𑀢𑀺 𑀯𑀺𑀯𑁂𑀓𑀦𑀺𑀲𑁆𑀲𑀺𑀢𑀁 𑀯𑀺𑀭𑀸𑀕𑀦𑀺𑀲𑁆𑀲𑀺𑀢𑀁 𑀦𑀺𑀭𑁄𑀥𑀦𑀺𑀲𑁆𑀲𑀺𑀢𑀁 𑀯𑁄𑀲𑁆𑀲𑀕𑁆𑀕𑀧𑀭𑀺𑀡𑀸𑀫𑀺𑀁. 𑀇𑀤𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀪𑀸𑀯𑀦𑀸𑀧𑁆𑀧𑀥𑀸𑀦𑀁.

‘‘𑀓𑀢𑀫𑀜𑁆𑀘, 𑀪𑀺𑀓𑁆𑀔𑀯𑁂, 𑀅𑀦𑀼𑀭𑀓𑁆𑀔𑀡𑀸𑀧𑁆𑀧𑀥𑀸𑀦𑀁? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀉𑀧𑁆𑀧𑀦𑁆𑀦𑀁 𑀪𑀤𑁆𑀤𑀓𑀁 𑀲𑀫𑀸𑀥𑀺𑀦𑀺𑀫𑀺𑀢𑁆𑀢𑀁 𑀅𑀦𑀼𑀭𑀓𑁆𑀔𑀢𑀺 𑀅𑀝𑁆𑀞𑀺𑀓𑀲𑀜𑁆𑀜𑀁 𑀧𑀼𑀴𑀯𑀓𑀲𑀜𑁆𑀜𑀁 𑀯𑀺𑀦𑀻𑀮𑀓𑀲𑀜𑁆𑀜𑀁 𑀯𑀺𑀘𑁆𑀙𑀺𑀤𑁆𑀤𑀓𑀲𑀜𑁆𑀜𑀁 𑀉𑀤𑁆𑀥𑀼𑀫𑀸𑀢𑀓𑀲𑀜𑁆𑀜𑀁. 𑀇𑀤𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀅𑀦𑀼𑀭𑀓𑁆𑀔𑀡𑀸𑀧𑁆𑀧𑀥𑀸𑀦𑀁. 𑀇𑀫𑀸𑀦𑀺 𑀔𑁄, 𑀪𑀺𑀓𑁆𑀔𑀯𑁂, 𑀘𑀢𑁆𑀢𑀸𑀭𑀺 𑀧𑀥𑀸𑀦𑀸𑀦𑀻’’𑀢𑀺.

‘‘𑀲𑀁𑀯𑀭𑁄 𑀘 𑀧𑀳𑀸𑀦𑀜𑁆𑀘, 𑀪𑀸𑀯𑀦𑀸 𑀅𑀦𑀼𑀭𑀓𑁆𑀔𑀡𑀸;

𑀏𑀢𑁂 𑀧𑀥𑀸𑀦𑀸 𑀘𑀢𑁆𑀢𑀸𑀭𑁄, 𑀤𑁂𑀲𑀺𑀢𑀸𑀤𑀺𑀘𑁆𑀘𑀩𑀦𑁆𑀥𑀼𑀦𑀸;

𑀬𑁂𑀳𑀺 𑀪𑀺𑀓𑁆𑀔𑀼 𑀇𑀥𑀸𑀢𑀸𑀧𑀻, 𑀔𑀬𑀁 𑀤𑀼𑀓𑁆𑀔𑀲𑁆𑀲 𑀧𑀸𑀧𑀼𑀡𑁂’’𑀢𑀺. 𑀘𑀢𑀼𑀢𑁆𑀣𑀁;

𑁫. 𑀧𑀜𑁆𑀜𑀢𑁆𑀢𑀺𑀲𑀼𑀢𑁆𑀢𑀁

𑁧𑁫. ‘‘𑀘𑀢𑀲𑁆𑀲𑁄 𑀇𑀫𑀸, 𑀪𑀺𑀓𑁆𑀔𑀯𑁂, 𑀅𑀕𑁆𑀕𑀧𑀜𑁆𑀜𑀢𑁆𑀢𑀺𑀬𑁄. 𑀓𑀢𑀫𑀸 𑀘𑀢𑀲𑁆𑀲𑁄? 𑀏𑀢𑀤𑀕𑁆𑀕𑀁, 𑀪𑀺𑀓𑁆𑀔𑀯𑁂, 𑀅𑀢𑁆𑀢𑀪𑀸𑀯𑀻𑀦𑀁 𑀬𑀤𑀺𑀤𑀁 𑁋 𑀭𑀸𑀳𑀼 𑀅𑀲𑀼𑀭𑀺𑀦𑁆𑀤𑁄. 𑀏𑀢𑀤𑀕𑁆𑀕𑀁, 𑀪𑀺𑀓𑁆𑀔𑀯𑁂, 𑀓𑀸𑀫𑀪𑁄𑀕𑀻𑀦𑀁 𑀬𑀤𑀺𑀤𑀁 𑁋 𑀭𑀸𑀚𑀸 𑀫𑀦𑁆𑀥𑀸𑀢𑀸. 𑀏𑀢𑀤𑀕𑁆𑀕𑀁, 𑀪𑀺𑀓𑁆𑀔𑀯𑁂, 𑀆𑀥𑀺𑀧𑀢𑁂𑀬𑁆𑀬𑀸𑀦𑀁 𑀬𑀤𑀺𑀤𑀁 𑁋 𑀫𑀸𑀭𑁄 𑀧𑀸𑀧𑀺𑀫𑀸. 𑀲𑀤𑁂𑀯𑀓𑁂, 𑀪𑀺𑀓𑁆𑀔𑀯𑁂, 𑀮𑁄𑀓𑁂 𑀲𑀫𑀸𑀭𑀓𑁂 𑀲𑀩𑁆𑀭𑀳𑁆𑀫𑀓𑁂 𑀲𑀲𑁆𑀲𑀫𑀡𑀩𑁆𑀭𑀸𑀳𑁆𑀫𑀡𑀺𑀬𑀸 𑀧𑀚𑀸𑀬 𑀲𑀤𑁂𑀯𑀫𑀦𑀼𑀲𑁆𑀲𑀸𑀬 𑀢𑀣𑀸𑀕𑀢𑁄 𑀅𑀕𑁆𑀕𑀫𑀓𑁆𑀔𑀸𑀬𑀢𑀺 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄. 𑀇𑀫𑀸 𑀔𑁄, 𑀪𑀺𑀓𑁆𑀔𑀯𑁂, 𑀘𑀢𑀲𑁆𑀲𑁄 𑀅𑀕𑁆𑀕𑀧𑀜𑁆𑀜𑀢𑁆𑀢𑀺𑀬𑁄’’𑀢𑀺.

‘‘𑀭𑀸𑀳𑀼𑀕𑁆𑀕𑀁 𑀅𑀢𑁆𑀢𑀪𑀸𑀯𑀻𑀦𑀁, 𑀫𑀦𑁆𑀥𑀸𑀢𑀸 𑀓𑀸𑀫𑀪𑁄𑀕𑀺𑀦𑀁;

𑀫𑀸𑀭𑁄 𑀆𑀥𑀺𑀧𑀢𑁂𑀬𑁆𑀬𑀸𑀦𑀁, 𑀇𑀤𑁆𑀥𑀺𑀬𑀸 𑀬𑀲𑀲𑀸 𑀚𑀮𑀁.

‘‘𑀉𑀤𑁆𑀥𑀁 𑀢𑀺𑀭𑀺𑀬𑀁 𑀅𑀧𑀸𑀘𑀻𑀦𑀁, 𑀬𑀸𑀯𑀢𑀸 𑀚𑀕𑀢𑁄 𑀕𑀢𑀺;

𑀲𑀤𑁂𑀯𑀓𑀲𑁆𑀲 𑀮𑁄𑀓𑀲𑁆𑀲, 𑀩𑀼𑀤𑁆𑀥𑁄 𑀅𑀕𑁆𑀕𑁄 𑀧𑀯𑀼𑀘𑁆𑀘𑀢𑀻’’𑀢𑀺. 𑀧𑀜𑁆𑀘𑀫𑀁;

𑁬. 𑀲𑁄𑀔𑀼𑀫𑁆𑀫𑀲𑀼𑀢𑁆𑀢𑀁

𑁧𑁬. ‘‘𑀘𑀢𑁆𑀢𑀸𑀭𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀲𑁄𑀔𑀼𑀫𑁆𑀫𑀸𑀦𑀺. 𑀓𑀢𑀫𑀸𑀦𑀺 𑀘𑀢𑁆𑀢𑀸𑀭𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀭𑀽𑀧𑀲𑁄𑀔𑀼𑀫𑁆𑀫𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺 𑀧𑀭𑀫𑁂𑀦; 𑀢𑁂𑀦 𑀘 𑀭𑀽𑀧𑀲𑁄𑀔𑀼𑀫𑁆𑀫𑁂𑀦 𑀅𑀜𑁆𑀜𑀁 𑀭𑀽𑀧𑀲𑁄𑀔𑀼𑀫𑁆𑀫𑀁 𑀉𑀢𑁆𑀢𑀭𑀺𑀢𑀭𑀁 𑀯𑀸 𑀧𑀡𑀻𑀢𑀢𑀭𑀁 𑀯𑀸 𑀦 𑀲𑀫𑀦𑀼𑀧𑀲𑁆𑀲𑀢𑀺; 𑀢𑁂𑀦 𑀘 𑀭𑀽𑀧𑀲𑁄𑀔𑀼𑀫𑁆𑀫𑁂𑀦 𑀅𑀜𑁆𑀜𑀁 𑀭𑀽𑀧𑀲𑁄𑀔𑀼𑀫𑁆𑀫𑀁 𑀉𑀢𑁆𑀢𑀭𑀺𑀢𑀭𑀁 𑀯𑀸 𑀧𑀡𑀻𑀢𑀢𑀭𑀁 𑀯𑀸 𑀦 𑀧𑀢𑁆𑀣𑁂𑀢𑀺. 𑀯𑁂𑀤𑀦𑀸𑀲𑁄𑀔𑀼𑀫𑁆𑀫𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺 𑀧𑀭𑀫𑁂𑀦; 𑀢𑁂𑀦 𑀘 𑀯𑁂𑀤𑀦𑀸𑀲𑁄𑀔𑀼𑀫𑁆𑀫𑁂𑀦 𑀅𑀜𑁆𑀜𑀁 𑀯𑁂𑀤𑀦𑀸𑀲𑁄𑀔𑀼𑀫𑁆𑀫𑀁 𑀉𑀢𑁆𑀢𑀭𑀺𑀢𑀭𑀁 𑀯𑀸 𑀧𑀡𑀻𑀢𑀢𑀭𑀁 𑀯𑀸 𑀦 𑀲𑀫𑀦𑀼𑀧𑀲𑁆𑀲𑀢𑀺; 𑀢𑁂𑀦 𑀘 𑀯𑁂𑀤𑀦𑀸𑀲𑁄𑀔𑀼𑀫𑁆𑀫𑁂𑀦 𑀅𑀜𑁆𑀜𑀁 𑀯𑁂𑀤𑀦𑀸𑀲𑁄𑀔𑀼𑀫𑁆𑀫𑀁 𑀉𑀢𑁆𑀢𑀭𑀺𑀢𑀭𑀁 𑀯𑀸 𑀧𑀡𑀻𑀢𑀢𑀭𑀁 𑀯𑀸 𑀦 𑀧𑀢𑁆𑀣𑁂𑀢𑀺. 𑀲𑀜𑁆𑀜𑀸𑀲𑁄𑀔𑀼𑀫𑁆𑀫𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺 𑀧𑀭𑀫𑁂𑀦; 𑀢𑁂𑀦 𑀘 𑀲𑀜𑁆𑀜𑀸𑀲𑁄𑀔𑀼𑀫𑁆𑀫𑁂𑀦 𑀅𑀜𑁆𑀜𑀁 𑀲𑀜𑁆𑀜𑀸𑀲𑁄𑀔𑀼𑀫𑁆𑀫𑀁 𑀉𑀢𑁆𑀢𑀭𑀺𑀢𑀭𑀁 𑀯𑀸 𑀧𑀡𑀻𑀢𑀢𑀭𑀁 𑀯𑀸 𑀦 𑀲𑀫𑀦𑀼𑀧𑀲𑁆𑀲𑀢𑀺; 𑀢𑁂𑀦 𑀘 𑀲𑀜𑁆𑀜𑀸𑀲𑁄𑀔𑀼𑀫𑁆𑀫𑁂𑀦 𑀅𑀜𑁆𑀜𑀁 𑀲𑀜𑁆𑀜𑀸𑀲𑁄𑀔𑀼𑀫𑁆𑀫𑀁 𑀉𑀢𑁆𑀢𑀭𑀺𑀢𑀭𑀁 𑀯𑀸 𑀧𑀡𑀻𑀢𑀢𑀭𑀁 𑀯𑀸 𑀦 𑀧𑀢𑁆𑀣𑁂𑀢𑀺. 𑀲𑀗𑁆𑀔𑀸𑀭𑀲𑁄𑀔𑀼𑀫𑁆𑀫𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺 𑀧𑀭𑀫𑁂𑀦; 𑀢𑁂𑀦 𑀘 𑀲𑀗𑁆𑀔𑀸𑀭𑀲𑁄𑀔𑀼𑀫𑁆𑀫𑁂𑀦 𑀅𑀜𑁆𑀜𑀁 𑀲𑀗𑁆𑀔𑀸𑀭𑀲𑁄𑀔𑀼𑀫𑁆𑀫𑀁 𑀉𑀢𑁆𑀢𑀭𑀺𑀢𑀭𑀁 𑀯𑀸 𑀧𑀡𑀻𑀢𑀢𑀭𑀁 𑀯𑀸 𑀦 𑀲𑀫𑀦𑀼𑀧𑀲𑁆𑀲𑀢𑀺; 𑀢𑁂𑀦 𑀘 𑀲𑀗𑁆𑀔𑀸𑀭𑀲𑁄𑀔𑀼𑀫𑁆𑀫𑁂𑀦 𑀅𑀜𑁆𑀜𑀁 𑀲𑀗𑁆𑀔𑀸𑀭𑀲𑁄𑀔𑀼𑀫𑁆𑀫𑀁 𑀉𑀢𑁆𑀢𑀭𑀺𑀢𑀭𑀁 𑀯𑀸 𑀧𑀡𑀻𑀢𑀢𑀭𑀁 𑀯𑀸 𑀦 𑀧𑀢𑁆𑀣𑁂𑀢𑀺. 𑀇𑀫𑀸𑀦𑀺 𑀔𑁄, 𑀪𑀺𑀓𑁆𑀔𑀯𑁂, 𑀘𑀢𑁆𑀢𑀸𑀭𑀺 𑀲𑁄𑀔𑀼𑀫𑁆𑀫𑀸𑀦𑀻’’𑀢𑀺.

‘‘𑀭𑀽𑀧𑀲𑁄𑀔𑀼𑀫𑁆𑀫𑀢𑀁 𑀜𑀢𑁆𑀯𑀸, 𑀯𑁂𑀤𑀦𑀸𑀦𑀜𑁆𑀘 𑀲𑀫𑁆𑀪𑀯𑀁;

𑀲𑀜𑁆𑀜𑀸 𑀬𑀢𑁄 𑀲𑀫𑀼𑀤𑁂𑀢𑀺, 𑀅𑀢𑁆𑀣𑀁 𑀕𑀘𑁆𑀙𑀢𑀺 𑀬𑀢𑁆𑀣 𑀘;

𑀲𑀗𑁆𑀔𑀸𑀭𑁂 𑀧𑀭𑀢𑁄 𑀜𑀢𑁆𑀯𑀸, 𑀤𑀼𑀓𑁆𑀔𑀢𑁄 𑀦𑁄 𑀘 𑀅𑀢𑁆𑀢𑀢𑁄.

‘‘𑀲 𑀯𑁂 𑀲𑀫𑁆𑀫𑀤𑁆𑀤𑀲𑁄 𑀪𑀺𑀓𑁆𑀔𑀼, 𑀲𑀦𑁆𑀢𑁄 𑀲𑀦𑁆𑀢𑀺𑀧𑀤𑁂 𑀭𑀢𑁄;

𑀥𑀸𑀭𑁂𑀢𑀺 𑀅𑀦𑁆𑀢𑀺𑀫𑀁 𑀤𑁂𑀳𑀁, 𑀚𑁂𑀢𑁆𑀯𑀸 𑀫𑀸𑀭𑀁 𑀲𑀯𑀸𑀳𑀺𑀦𑀺’’𑀦𑁆𑀢𑀺. 𑀙𑀝𑁆𑀞𑀁;

𑁭. 𑀧𑀞𑀫𑀅𑀕𑀢𑀺𑀲𑀼𑀢𑁆𑀢𑀁

𑁧𑁭. ‘‘𑀘𑀢𑁆𑀢𑀸𑀭𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀅𑀕𑀢𑀺𑀕𑀫𑀦𑀸𑀦𑀺. 𑀓𑀢𑀫𑀸𑀦𑀺 𑀘𑀢𑁆𑀢𑀸𑀭𑀺? 𑀙𑀦𑁆𑀤𑀸𑀕𑀢𑀺𑀁 𑀕𑀘𑁆𑀙𑀢𑀺, 𑀤𑁄𑀲𑀸𑀕𑀢𑀺𑀁 𑀕𑀘𑁆𑀙𑀢𑀺, 𑀫𑁄𑀳𑀸𑀕𑀢𑀺𑀁 𑀕𑀘𑁆𑀙𑀢𑀺, 𑀪𑀬𑀸𑀕𑀢𑀺𑀁 𑀕𑀘𑁆𑀙𑀢𑀺 𑁋 𑀇𑀫𑀸𑀦𑀺 𑀔𑁄, 𑀪𑀺𑀓𑁆𑀔𑀯𑁂, 𑀘𑀢𑁆𑀢𑀸𑀭𑀺 𑀅𑀕𑀢𑀺𑀕𑀫𑀦𑀸𑀦𑀻’’𑀢𑀺.

‘‘𑀙𑀦𑁆𑀤𑀸 𑀤𑁄𑀲𑀸 𑀪𑀬𑀸 𑀫𑁄𑀳𑀸, 𑀬𑁄 𑀥𑀫𑁆𑀫𑀁 𑀅𑀢𑀺𑀯𑀢𑁆𑀢𑀢𑀺;

𑀦𑀺𑀳𑀻𑀬𑀢𑀺 𑀢𑀲𑁆𑀲 𑀬𑀲𑁄, 𑀓𑀸𑀴𑀧𑀓𑁆𑀔𑁂𑀯 𑀘𑀦𑁆𑀤𑀺𑀫𑀸’’𑀢𑀺. 𑀲𑀢𑁆𑀢𑀫𑀁;

𑁮. 𑀤𑀼𑀢𑀺𑀬𑀅𑀕𑀢𑀺𑀲𑀼𑀢𑁆𑀢𑀁

𑁧𑁮. ‘‘𑀘𑀢𑁆𑀢𑀸𑀭𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀦𑀸𑀕𑀢𑀺𑀕𑀫𑀦𑀸𑀦𑀺. 𑀓𑀢𑀫𑀸𑀦𑀺 𑀘𑀢𑁆𑀢𑀸𑀭𑀺? 𑀦 𑀙𑀦𑁆𑀤𑀸𑀕𑀢𑀺𑀁 𑀕𑀘𑁆𑀙𑀢𑀺, 𑀦 𑀤𑁄𑀲𑀸𑀕𑀢𑀺𑀁 𑀕𑀘𑁆𑀙𑀢𑀺, 𑀦 𑀫𑁄𑀳𑀸𑀕𑀢𑀺𑀁 𑀕𑀘𑁆𑀙𑀢𑀺, 𑀦 𑀪𑀬𑀸𑀕𑀢𑀺𑀁 𑀕𑀘𑁆𑀙𑀢𑀺 𑁋 𑀇𑀫𑀸𑀦𑀺 𑀔𑁄, 𑀪𑀺𑀓𑁆𑀔𑀯𑁂, 𑀘𑀢𑁆𑀢𑀸𑀭𑀺 𑀦𑀸𑀕𑀢𑀺𑀕𑀫𑀦𑀸𑀦𑀻’’𑀢𑀺.

‘‘𑀙𑀦𑁆𑀤𑀸 𑀤𑁄𑀲𑀸 𑀪𑀬𑀸 𑀫𑁄𑀳𑀸, 𑀬𑁄 𑀥𑀫𑁆𑀫𑀁 𑀦𑀸𑀢𑀺𑀯𑀢𑁆𑀢𑀢𑀺;

𑀆𑀧𑀽𑀭𑀢𑀺 𑀢𑀲𑁆𑀲 𑀬𑀲𑁄, 𑀲𑀼𑀓𑁆𑀓𑀧𑀓𑁆𑀔𑁂𑀯 𑀘𑀦𑁆𑀤𑀺𑀫𑀸’’𑀢𑀺. 𑀅𑀝𑁆𑀞𑀫𑀁;

𑁯. 𑀢𑀢𑀺𑀬𑀅𑀕𑀢𑀺𑀲𑀼𑀢𑁆𑀢𑀁

𑁧𑁯. ‘‘𑀘𑀢𑁆𑀢𑀸𑀭𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀅𑀕𑀢𑀺𑀕𑀫𑀦𑀸𑀦𑀺. 𑀓𑀢𑀫𑀸𑀦𑀺 𑀘𑀢𑁆𑀢𑀸𑀭𑀺? 𑀙𑀦𑁆𑀤𑀸𑀕𑀢𑀺𑀁 𑀕𑀘𑁆𑀙𑀢𑀺, 𑀤𑁄𑀲𑀸𑀕𑀢𑀺𑀁 𑀕𑀘𑁆𑀙𑀢𑀺, 𑀫𑁄𑀳𑀸𑀕𑀢𑀺𑀁 𑀕𑀘𑁆𑀙𑀢𑀺, 𑀪𑀬𑀸𑀕𑀢𑀺𑀁 𑀕𑀘𑁆𑀙𑀢𑀺 𑁋 𑀇𑀫𑀸𑀦𑀺 𑀔𑁄, 𑀪𑀺𑀓𑁆𑀔𑀯𑁂, 𑀘𑀢𑁆𑀢𑀸𑀭𑀺 𑀅𑀕𑀢𑀺𑀕𑀫𑀦𑀸𑀦𑀺.

‘‘𑀘𑀢𑁆𑀢𑀸𑀭𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀦𑀸𑀕𑀢𑀺𑀕𑀫𑀦𑀸𑀦𑀺. 𑀓𑀢𑀫𑀸𑀦𑀺 𑀘𑀢𑁆𑀢𑀸𑀭𑀺? 𑀦 𑀙𑀦𑁆𑀤𑀸𑀕𑀢𑀺𑀁 𑀕𑀘𑁆𑀙𑀢𑀺, 𑀦 𑀤𑁄𑀲𑀸𑀕𑀢𑀺𑀁 𑀕𑀘𑁆𑀙𑀢𑀺, 𑀦 𑀫𑁄𑀳𑀸𑀕𑀢𑀺𑀁 𑀕𑀘𑁆𑀙𑀢𑀺, 𑀦 𑀪𑀬𑀸𑀕𑀢𑀺𑀁 𑀕𑀘𑁆𑀙𑀢𑀺 𑁋 𑀇𑀫𑀸𑀦𑀺 𑀔𑁄, 𑀪𑀺𑀓𑁆𑀔𑀯𑁂, 𑀘𑀢𑁆𑀢𑀸𑀭𑀺 𑀦𑀸𑀕𑀢𑀺𑀕𑀫𑀦𑀸𑀦𑀻’’𑀢𑀺.

‘‘𑀙𑀦𑁆𑀤𑀸 𑀤𑁄𑀲𑀸 𑀪𑀬𑀸 𑀫𑁄𑀳𑀸, 𑀬𑁄 𑀥𑀫𑁆𑀫𑀁 𑀅𑀢𑀺𑀯𑀢𑁆𑀢𑀢𑀺;

𑀦𑀺𑀳𑀻𑀬𑀢𑀺 𑀢𑀲𑁆𑀲 𑀬𑀲𑁄, 𑀓𑀸𑀴𑀧𑀓𑁆𑀔𑁂𑀯 𑀘𑀦𑁆𑀤𑀺𑀫𑀸.

‘‘𑀙𑀦𑁆𑀤𑀸 𑀤𑁄𑀲𑀸 𑀪𑀬𑀸 𑀫𑁄𑀳𑀸, 𑀬𑁄 𑀥𑀫𑁆𑀫𑀁 𑀦𑀸𑀢𑀺𑀯𑀢𑁆𑀢𑀢𑀺;

𑀆𑀧𑀽𑀭𑀢𑀺 𑀢𑀲𑁆𑀲 𑀬𑀲𑁄, 𑀲𑀼𑀓𑁆𑀓𑀧𑀓𑁆𑀔𑁂𑀯 𑀘𑀦𑁆𑀤𑀺𑀫𑀸’’𑀢𑀺. 𑀦𑀯𑀫𑀁;

𑁧𑁦. 𑀪𑀢𑁆𑀢𑀼𑀤𑁆𑀤𑁂𑀲𑀓𑀲𑀼𑀢𑁆𑀢𑀁

𑁨𑁦. ‘‘𑀘𑀢𑀽𑀳𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀢𑁆𑀢𑀼𑀤𑁆𑀤𑁂𑀲𑀓𑁄 𑀬𑀣𑀸𑀪𑀢𑀁 𑀦𑀺𑀓𑁆𑀔𑀺𑀢𑁆𑀢𑁄 𑀏𑀯𑀁 𑀦𑀺𑀭𑀬𑁂. 𑀓𑀢𑀫𑁂𑀳𑀺 𑀘𑀢𑀽𑀳𑀺? 𑀙𑀦𑁆𑀤𑀸𑀕𑀢𑀺𑀁 𑀕𑀘𑁆𑀙𑀢𑀺, 𑀤𑁄𑀲𑀸𑀕𑀢𑀺𑀁 𑀕𑀘𑁆𑀙𑀢𑀺, 𑀫𑁄𑀳𑀸𑀕𑀢𑀺𑀁 𑀕𑀘𑁆𑀙𑀢𑀺, 𑀪𑀬𑀸𑀕𑀢𑀺𑀁 𑀕𑀘𑁆𑀙𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀘𑀢𑀽𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀢𑁆𑀢𑀼𑀤𑁆𑀤𑁂𑀲𑀓𑁄 𑀬𑀣𑀸𑀪𑀢𑀁 𑀦𑀺𑀓𑁆𑀔𑀺𑀢𑁆𑀢𑁄 𑀏𑀯𑀁 𑀦𑀺𑀭𑀬𑁂.

‘‘𑀘𑀢𑀽𑀳𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀢𑁆𑀢𑀼𑀤𑁆𑀤𑁂𑀲𑀓𑁄 𑀬𑀣𑀸𑀪𑀢𑀁 𑀦𑀺𑀓𑁆𑀔𑀺𑀢𑁆𑀢𑁄 𑀏𑀯𑀁 𑀲𑀕𑁆𑀕𑁂. 𑀓𑀢𑀫𑁂𑀳𑀺 𑀘𑀢𑀽𑀳𑀺? 𑀦 𑀙𑀦𑁆𑀤𑀸𑀕𑀢𑀺𑀁 𑀕𑀘𑁆𑀙𑀢𑀺, 𑀦 𑀤𑁄𑀲𑀸𑀕𑀢𑀺𑀁 𑀕𑀘𑁆𑀙𑀢𑀺, 𑀦 𑀫𑁄𑀳𑀸𑀕𑀢𑀺𑀁 𑀕𑀘𑁆𑀙𑀢𑀺, 𑀦 𑀪𑀬𑀸𑀕𑀢𑀺𑀁 𑀕𑀘𑁆𑀙𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀘𑀢𑀽𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀢𑁆𑀢𑀼𑀤𑁆𑀤𑁂𑀲𑀓𑁄 𑀬𑀣𑀸𑀪𑀢𑀁 𑀦𑀺𑀓𑁆𑀔𑀺𑀢𑁆𑀢𑁄 𑀏𑀯𑀁 𑀲𑀕𑁆𑀕𑁂’’𑀢𑀺.

‘‘𑀬𑁂 𑀓𑁂𑀘𑀺 𑀓𑀸𑀫𑁂𑀲𑀼 𑀅𑀲𑀜𑁆𑀜𑀢𑀸 𑀚𑀦𑀸,

𑀅𑀥𑀫𑁆𑀫𑀺𑀓𑀸 𑀳𑁄𑀦𑁆𑀢𑀺 𑀅𑀥𑀫𑁆𑀫𑀕𑀸𑀭𑀯𑀸;

𑀙𑀦𑁆𑀤𑀸 𑀤𑁄𑀲𑀸 𑀫𑁄𑀳𑀸 𑀘 𑀪𑀬𑀸 𑀕𑀸𑀫𑀺𑀦𑁄 [𑀙𑀦𑁆𑀤𑀸 𑀘 𑀤𑁄𑀲𑀸 𑀘 𑀪𑀬𑀸 𑀘 𑀕𑀸𑀫𑀺𑀦𑁄 (𑀲𑀻. 𑀲𑁆𑀬𑀸. 𑀓𑀁. 𑀧𑀻)],

𑀧𑀭𑀺𑀲𑀸𑀓𑀲𑀝𑁄 [𑀧𑀭𑀺𑀲𑀓𑁆𑀓𑀲𑀸𑀯𑁄 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀘 𑀧𑀦𑁂𑀲 𑀯𑀼𑀘𑁆𑀘𑀢𑀺.

‘‘𑀏𑀯𑀜𑁆𑀳𑀺 𑀯𑀼𑀢𑁆𑀢𑀁 𑀲𑀫𑀡𑁂𑀦 𑀚𑀸𑀦𑀢𑀸,

𑀢𑀲𑁆𑀫𑀸 𑀳𑀺 𑀢𑁂 𑀲𑀧𑁆𑀧𑀼𑀭𑀺𑀲𑀸 𑀧𑀲𑀁𑀲𑀺𑀬𑀸;

𑀥𑀫𑁆𑀫𑁂 𑀞𑀺𑀢𑀸 𑀬𑁂 𑀦 𑀓𑀭𑁄𑀦𑁆𑀢𑀺 𑀧𑀸𑀧𑀓𑀁,

𑀦 𑀙𑀦𑁆𑀤𑀸 𑀦 𑀤𑁄𑀲𑀸 𑀦 𑀫𑁄𑀳𑀸 𑀦 𑀪𑀬𑀸 𑀘 𑀕𑀸𑀫𑀺𑀦𑁄 [𑀦 𑀙𑀦𑁆𑀤𑀤𑁄𑀲𑀸 𑀦 𑀪𑀬𑀸 𑀘 𑀕𑀸𑀫𑀺𑀦𑁄 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)];

‘‘𑀧𑀭𑀺𑀲𑀸𑀬 𑀫𑀡𑁆𑀟𑁄 𑀘 𑀧𑀦𑁂𑀲 𑀯𑀼𑀘𑁆𑀘𑀢𑀺,

𑀏𑀯𑀜𑁆𑀳𑀺 𑀯𑀼𑀢𑁆𑀢𑀁 𑀲𑀫𑀡𑁂𑀦 𑀚𑀸𑀦𑀢𑀸’’𑀢𑀺. 𑀤𑀲𑀫𑀁;

𑀘𑀭𑀯𑀕𑁆𑀕𑁄 𑀤𑀼𑀢𑀺𑀬𑁄.