𑁯. 𑀢𑀡𑁆𑀳𑀼𑀧𑁆𑀧𑀸𑀤𑀲𑀼𑀢𑁆𑀢𑀁

𑁯. ‘‘𑀘𑀢𑁆𑀢𑀸𑀭𑁄𑀫𑁂, 𑀪𑀺𑀓𑁆𑀔𑀯𑁂, 𑀢𑀡𑁆𑀳𑀼𑀧𑁆𑀧𑀸𑀤𑀸 𑀬𑀢𑁆𑀣 𑀪𑀺𑀓𑁆𑀔𑀼𑀦𑁄 𑀢𑀡𑁆𑀳𑀸 𑀉𑀧𑁆𑀧𑀚𑁆𑀚𑀫𑀸𑀦𑀸 𑀉𑀧𑁆𑀧𑀚𑁆𑀚𑀢𑀺. 𑀓𑀢𑀫𑁂 𑀘𑀢𑁆𑀢𑀸𑀭𑁄? 𑀘𑀻𑀯𑀭𑀳𑁂𑀢𑀼 𑀯𑀸, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀢𑀡𑁆𑀳𑀸 𑀉𑀧𑁆𑀧𑀚𑁆𑀚𑀫𑀸𑀦𑀸 𑀉𑀧𑁆𑀧𑀚𑁆𑀚𑀢𑀺; 𑀧𑀺𑀡𑁆𑀟𑀧𑀸𑀢𑀳𑁂𑀢𑀼 𑀯𑀸, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀢𑀡𑁆𑀳𑀸 𑀉𑀧𑁆𑀧𑀚𑁆𑀚𑀫𑀸𑀦𑀸 𑀉𑀧𑁆𑀧𑀚𑁆𑀚𑀢𑀺; 𑀲𑁂𑀦𑀸𑀲𑀦𑀳𑁂𑀢𑀼 𑀯𑀸, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀢𑀡𑁆𑀳𑀸 𑀉𑀧𑁆𑀧𑀚𑁆𑀚𑀫𑀸𑀦𑀸 𑀉𑀧𑁆𑀧𑀚𑁆𑀚𑀢𑀺; 𑀇𑀢𑀺𑀪𑀯𑀸𑀪𑀯𑀳𑁂𑀢𑀼 𑀯𑀸, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀢𑀡𑁆𑀳𑀸 𑀉𑀧𑁆𑀧𑀚𑁆𑀚𑀫𑀸𑀦𑀸 𑀉𑀧𑁆𑀧𑀚𑁆𑀚𑀢𑀺. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀘𑀢𑁆𑀢𑀸𑀭𑁄 𑀢𑀡𑁆𑀳𑀼𑀧𑁆𑀧𑀸𑀤𑀸 𑀬𑀢𑁆𑀣 𑀪𑀺𑀓𑁆𑀔𑀼𑀦𑁄 𑀢𑀡𑁆𑀳𑀸 𑀉𑀧𑁆𑀧𑀚𑁆𑀚𑀫𑀸𑀦𑀸 𑀉𑀧𑁆𑀧𑀚𑁆𑀚𑀢𑀻’’𑀢𑀺.

‘‘𑀢𑀡𑁆𑀳𑀸 𑀤𑀼𑀢𑀺𑀬𑁄 𑀧𑀼𑀭𑀺𑀲𑁄, 𑀤𑀻𑀖𑀫𑀤𑁆𑀥𑀸𑀦 𑀲𑀁𑀲𑀭𑀁;

𑀇𑀢𑁆𑀣𑀪𑀸𑀯𑀜𑁆𑀜𑀣𑀸𑀪𑀸𑀯𑀁, 𑀲𑀁𑀲𑀸𑀭𑀁 𑀦𑀸𑀢𑀺𑀯𑀢𑁆𑀢𑀢𑀺.

‘‘𑀏𑀯𑀫𑀸𑀤𑀻𑀦𑀯𑀁 𑀜𑀢𑁆𑀯𑀸, 𑀢𑀡𑁆𑀳𑀁 𑀤𑀼𑀓𑁆𑀔𑀲𑁆𑀲 𑀲𑀫𑁆𑀪𑀯𑀁;

𑀯𑀻𑀢𑀢𑀡𑁆𑀳𑁄 𑀅𑀦𑀸𑀤𑀸𑀦𑁄, 𑀲𑀢𑁄 𑀪𑀺𑀓𑁆𑀔𑀼 𑀧𑀭𑀺𑀩𑁆𑀩𑀚𑁂’’𑀢𑀺 [𑀇𑀢𑀺𑀯𑀼. 𑁧𑁫, 𑁧𑁦𑁫]. 𑀦𑀯𑀫𑀁;