𑁭. 𑀲𑁄𑀪𑀦𑀲𑀼𑀢𑁆𑀢𑀁

𑁭. ‘‘𑀘𑀢𑁆𑀢𑀸𑀭𑁄𑀫𑁂, 𑀪𑀺𑀓𑁆𑀔𑀯𑁂, 𑀯𑀺𑀬𑀢𑁆𑀢𑀸 𑀯𑀺𑀦𑀻𑀢𑀸 𑀯𑀺𑀲𑀸𑀭𑀤𑀸 𑀩𑀳𑀼𑀲𑁆𑀲𑀼𑀢𑀸 𑀥𑀫𑁆𑀫𑀥𑀭𑀸 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑁆𑀧𑀝𑀺𑀧𑀦𑁆𑀦𑀸 𑀲𑀗𑁆𑀖𑀁 𑀲𑁄𑀪𑁂𑀦𑁆𑀢𑀺. 𑀓𑀢𑀫𑁂 𑀘𑀢𑁆𑀢𑀸𑀭𑁄? 𑀪𑀺𑀓𑁆𑀔𑀼, 𑀪𑀺𑀓𑁆𑀔𑀯𑁂, 𑀯𑀺𑀬𑀢𑁆𑀢𑁄 𑀯𑀺𑀦𑀻𑀢𑁄 𑀯𑀺𑀲𑀸𑀭𑀤𑁄 𑀩𑀳𑀼𑀲𑁆𑀲𑀼𑀢𑁄 𑀥𑀫𑁆𑀫𑀥𑀭𑁄 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑁆𑀧𑀝𑀺𑀧𑀦𑁆𑀦𑁄 𑀲𑀗𑁆𑀖𑀁 𑀲𑁄𑀪𑁂𑀢𑀺. 𑀪𑀺𑀓𑁆𑀔𑀼𑀦𑀻, 𑀪𑀺𑀓𑁆𑀔𑀯𑁂, 𑀯𑀺𑀬𑀢𑁆𑀢𑀸 𑀯𑀺𑀦𑀻𑀢𑀸 𑀯𑀺𑀲𑀸𑀭𑀤𑀸 𑀩𑀳𑀼𑀲𑁆𑀲𑀼𑀢𑀸 𑀥𑀫𑁆𑀫𑀥𑀭𑀸 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑁆𑀧𑀝𑀺𑀧𑀦𑁆𑀦𑀸 𑀲𑀗𑁆𑀖𑀁 𑀲𑁄𑀪𑁂𑀢𑀺. 𑀉𑀧𑀸𑀲𑀓𑁄, 𑀪𑀺𑀓𑁆𑀔𑀯𑁂, 𑀯𑀺𑀬𑀢𑁆𑀢𑁄 𑀯𑀺𑀦𑀻𑀢𑁄 𑀯𑀺𑀲𑀸𑀭𑀤𑁄 𑀩𑀳𑀼𑀲𑁆𑀲𑀼𑀢𑁄 𑀥𑀫𑁆𑀫𑀥𑀭𑁄 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑁆𑀧𑀝𑀺𑀧𑀦𑁆𑀦𑁄 𑀲𑀗𑁆𑀖𑀁 𑀲𑁄𑀪𑁂𑀢𑀺. 𑀉𑀧𑀸𑀲𑀺𑀓𑀸, 𑀪𑀺𑀓𑁆𑀔𑀯𑁂, 𑀯𑀺𑀬𑀢𑁆𑀢𑀸 𑀯𑀺𑀦𑀻𑀢𑀸 𑀯𑀺𑀲𑀸𑀭𑀤𑀸 𑀩𑀳𑀼𑀲𑁆𑀲𑀼𑀢𑀸 𑀥𑀫𑁆𑀫𑀥𑀭𑀸 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑁆𑀧𑀝𑀺𑀧𑀦𑁆𑀦𑀸 𑀲𑀗𑁆𑀖𑀁 𑀲𑁄𑀪𑁂𑀢𑀺. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀘𑀢𑁆𑀢𑀸𑀭𑁄 𑀯𑀺𑀬𑀢𑁆𑀢𑀸 𑀯𑀺𑀦𑀻𑀢𑀸 𑀯𑀺𑀲𑀸𑀭𑀤𑀸 𑀩𑀳𑀼𑀲𑁆𑀲𑀼𑀢𑀸 𑀥𑀫𑁆𑀫𑀥𑀭𑀸 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑁆𑀧𑀝𑀺𑀧𑀦𑁆𑀦𑀸 𑀲𑀗𑁆𑀖𑀁 𑀲𑁄𑀪𑁂𑀦𑁆𑀢𑀻’’𑀢𑀺.

‘‘𑀬𑁄 𑀳𑁄𑀢𑀺 𑀯𑀺𑀬𑀢𑁆𑀢𑁄 [𑀯𑁆𑀬𑀢𑁆𑀢𑁄 (𑀲𑀻. 𑀧𑀻.), 𑀩𑁆𑀬𑀢𑁆𑀢𑁄 (𑀲𑁆𑀬𑀸. 𑀓𑀁.)] 𑀘 𑀯𑀺𑀲𑀸𑀭𑀤𑁄 𑀘,

𑀩𑀳𑀼𑀲𑁆𑀲𑀼𑀢𑁄 𑀥𑀫𑁆𑀫𑀥𑀭𑁄 𑀘 𑀳𑁄𑀢𑀺;

𑀥𑀫𑁆𑀫𑀲𑁆𑀲 𑀳𑁄𑀢𑀺 𑀅𑀦𑀼𑀥𑀫𑁆𑀫𑀘𑀸𑀭𑀻,

𑀲 𑀢𑀸𑀤𑀺𑀲𑁄 𑀯𑀼𑀘𑁆𑀘𑀢𑀺 𑀲𑀗𑁆𑀖𑀲𑁄𑀪𑀦𑁄 [𑀲𑀁𑀖𑀲𑁄𑀪𑀡𑁄 (𑀓.)].

‘‘𑀪𑀺𑀓𑁆𑀔𑀼 𑀘 𑀲𑀻𑀮𑀲𑀫𑁆𑀧𑀦𑁆𑀦𑁄, 𑀪𑀺𑀓𑁆𑀔𑀼𑀦𑀻 𑀘 𑀩𑀳𑀼𑀲𑁆𑀲𑀼𑀢𑀸;

𑀉𑀧𑀸𑀲𑀓𑁄 𑀘 𑀬𑁄 𑀲𑀤𑁆𑀥𑁄, 𑀬𑀸 𑀘 𑀲𑀤𑁆𑀥𑀸 𑀉𑀧𑀸𑀲𑀺𑀓𑀸;

𑀏𑀢𑁂 𑀔𑁄 𑀲𑀗𑁆𑀖𑀁 𑀲𑁄𑀪𑁂𑀦𑁆𑀢𑀺, 𑀏𑀢𑁂 𑀳𑀺 𑀲𑀗𑁆𑀖𑀲𑁄𑀪𑀦𑀸’’𑀢𑀺. 𑀲𑀢𑁆𑀢𑀫𑀁;