𑁭. 𑀅𑀭𑀓𑁆𑀔𑀺𑀢𑀲𑀼𑀢𑁆𑀢𑀁

𑁧𑁧𑁦. 𑀅𑀣 𑀔𑁄 𑀅𑀦𑀸𑀣𑀧𑀺𑀡𑁆𑀟𑀺𑀓𑁄 𑀕𑀳𑀧𑀢𑀺 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀁 𑀔𑁄 𑀅𑀦𑀸𑀣𑀧𑀺𑀡𑁆𑀟𑀺𑀓𑀁 𑀕𑀳𑀧𑀢𑀺𑀁 𑀪𑀕𑀯𑀸 𑀏𑀢𑀤𑀯𑁄𑀘 𑁋 ‘‘𑀘𑀺𑀢𑁆𑀢𑁂, 𑀕𑀳𑀧𑀢𑀺, 𑀅𑀭𑀓𑁆𑀔𑀺𑀢𑁂 𑀓𑀸𑀬𑀓𑀫𑁆𑀫𑀫𑁆𑀧𑀺 𑀅𑀭𑀓𑁆𑀔𑀺𑀢𑀁 𑀳𑁄𑀢𑀺, 𑀯𑀘𑀻𑀓𑀫𑁆𑀫𑀫𑁆𑀧𑀺 𑀅𑀭𑀓𑁆𑀔𑀺𑀢𑀁 𑀳𑁄𑀢𑀺, 𑀫𑀦𑁄𑀓𑀫𑁆𑀫𑀫𑁆𑀧𑀺 𑀅𑀭𑀓𑁆𑀔𑀺𑀢𑀁 𑀳𑁄𑀢𑀺. 𑀢𑀲𑁆𑀲 𑀅𑀭𑀓𑁆𑀔𑀺𑀢𑀓𑀸𑀬𑀓𑀫𑁆𑀫𑀦𑁆𑀢𑀲𑁆𑀲 𑀅𑀭𑀓𑁆𑀔𑀺𑀢𑀯𑀘𑀻𑀓𑀫𑁆𑀫𑀦𑁆𑀢𑀲𑁆𑀲 𑀅𑀭𑀓𑁆𑀔𑀺𑀢𑀫𑀦𑁄𑀓𑀫𑁆𑀫𑀦𑁆𑀢𑀲𑁆𑀲 𑀓𑀸𑀬𑀓𑀫𑁆𑀫𑀫𑁆𑀧𑀺 𑀅𑀯𑀲𑁆𑀲𑀼𑀢𑀁 𑀳𑁄𑀢𑀺, 𑀯𑀘𑀻𑀓𑀫𑁆𑀫𑀫𑁆𑀧𑀺 𑀅𑀯𑀲𑁆𑀲𑀼𑀢𑀁 𑀳𑁄𑀢𑀺, 𑀫𑀦𑁄𑀓𑀫𑁆𑀫𑀫𑁆𑀧𑀺 𑀅𑀯𑀲𑁆𑀲𑀼𑀢𑀁 𑀳𑁄𑀢𑀺. 𑀢𑀲𑁆𑀲 𑀅𑀯𑀲𑁆𑀲𑀼𑀢𑀓𑀸𑀬𑀓𑀫𑁆𑀫𑀦𑁆𑀢𑀲𑁆𑀲 𑀅𑀯𑀲𑁆𑀲𑀼𑀢𑀯𑀘𑀻𑀓𑀫𑁆𑀫𑀦𑁆𑀢𑀲𑁆𑀲 𑀅𑀯𑀲𑁆𑀲𑀼𑀢𑀫𑀦𑁄𑀓𑀫𑁆𑀫𑀦𑁆𑀢𑀲𑁆𑀲 𑀓𑀸𑀬𑀓𑀫𑁆𑀫𑀫𑁆𑀧𑀺 𑀧𑀽𑀢𑀺𑀓𑀁 𑀳𑁄𑀢𑀺, 𑀯𑀘𑀻𑀓𑀫𑁆𑀫𑀫𑁆𑀧𑀺 𑀧𑀽𑀢𑀺𑀓𑀁 𑀳𑁄𑀢𑀺, 𑀫𑀦𑁄𑀓𑀫𑁆𑀫𑀫𑁆𑀧𑀺 𑀧𑀽𑀢𑀺𑀓𑀁 𑀳𑁄𑀢𑀺. 𑀢𑀲𑁆𑀲 𑀧𑀽𑀢𑀺𑀓𑀸𑀬𑀓𑀫𑁆𑀫𑀦𑁆𑀢𑀲𑁆𑀲 𑀧𑀽𑀢𑀺𑀯𑀘𑀻𑀓𑀫𑁆𑀫𑀦𑁆𑀢𑀲𑁆𑀲 𑀧𑀽𑀢𑀺𑀫𑀦𑁄𑀓𑀫𑁆𑀫𑀦𑁆𑀢𑀲𑁆𑀲 𑀦 𑀪𑀤𑁆𑀤𑀓𑀁 𑀫𑀭𑀡𑀁 𑀳𑁄𑀢𑀺, 𑀦 𑀪𑀤𑁆𑀤𑀺𑀓𑀸 𑀓𑀸𑀮𑀗𑁆𑀓𑀺𑀭𑀺𑀬𑀸.

‘‘𑀲𑁂𑀬𑁆𑀬𑀣𑀸𑀧𑀺, 𑀕𑀳𑀧𑀢𑀺, 𑀓𑀽𑀝𑀸𑀕𑀸𑀭𑁂 𑀤𑀼𑀘𑁆𑀙𑀦𑁆𑀦𑁂 𑀓𑀽𑀝𑀫𑁆𑀧𑀺 𑀅𑀭𑀓𑁆𑀔𑀺𑀢𑀁 𑀳𑁄𑀢𑀺, 𑀕𑁄𑀧𑀸𑀦𑀲𑀺𑀬𑁄𑀧𑀺 𑀅𑀭𑀓𑁆𑀔𑀺𑀢𑀸 𑀳𑁄𑀦𑁆𑀢𑀺, 𑀪𑀺𑀢𑁆𑀢𑀺𑀧𑀺 𑀅𑀭𑀓𑁆𑀔𑀺𑀢𑀸 𑀳𑁄𑀢𑀺; 𑀓𑀽𑀝𑀫𑁆𑀧𑀺 𑀅𑀯𑀲𑁆𑀲𑀼𑀢𑀁 𑀳𑁄𑀢𑀺, 𑀕𑁄𑀧𑀸𑀦𑀲𑀺𑀬𑁄𑀧𑀺 𑀅𑀯𑀲𑁆𑀲𑀼𑀢𑀸 𑀳𑁄𑀦𑁆𑀢𑀺, 𑀪𑀺𑀢𑁆𑀢𑀺𑀧𑀺 𑀅𑀯𑀲𑁆𑀲𑀼𑀢𑀸 𑀳𑁄𑀢𑀺; 𑀓𑀽𑀝𑀫𑁆𑀧𑀺 𑀧𑀽𑀢𑀺𑀓𑀁 𑀳𑁄𑀢𑀺, 𑀕𑁄𑀧𑀸𑀦𑀲𑀺𑀬𑁄𑀧𑀺 𑀧𑀽𑀢𑀺𑀓𑀸 𑀳𑁄𑀦𑁆𑀢𑀺, 𑀪𑀺𑀢𑁆𑀢𑀺𑀧𑀺 𑀧𑀽𑀢𑀺𑀓𑀸 𑀳𑁄𑀢𑀺.

‘‘𑀏𑀯𑀫𑁂𑀯𑀁 𑀔𑁄, 𑀕𑀳𑀧𑀢𑀺, 𑀘𑀺𑀢𑁆𑀢𑁂 𑀅𑀭𑀓𑁆𑀔𑀺𑀢𑁂 𑀓𑀸𑀬𑀓𑀫𑁆𑀫𑀫𑁆𑀧𑀺 𑀅𑀭𑀓𑁆𑀔𑀺𑀢𑀁 𑀳𑁄𑀢𑀺, 𑀯𑀘𑀻𑀓𑀫𑁆𑀫𑀫𑁆𑀧𑀺 𑀅𑀭𑀓𑁆𑀔𑀺𑀢𑀁 𑀳𑁄𑀢𑀺, 𑀫𑀦𑁄𑀓𑀫𑁆𑀫𑀫𑁆𑀧𑀺 𑀅𑀭𑀓𑁆𑀔𑀺𑀢𑀁 𑀳𑁄𑀢𑀺. 𑀢𑀲𑁆𑀲 𑀅𑀭𑀓𑁆𑀔𑀺𑀢𑀓𑀸𑀬𑀓𑀫𑁆𑀫𑀦𑁆𑀢𑀲𑁆𑀲 𑀅𑀭𑀓𑁆𑀔𑀺𑀢𑀯𑀘𑀻𑀓𑀫𑁆𑀫𑀦𑁆𑀢𑀲𑁆𑀲 𑀅𑀭𑀓𑁆𑀔𑀺𑀢𑀫𑀦𑁄𑀓𑀫𑁆𑀫𑀦𑁆𑀢𑀲𑁆𑀲 𑀓𑀸𑀬𑀓𑀫𑁆𑀫𑀫𑁆𑀧𑀺 𑀅𑀯𑀲𑁆𑀲𑀼𑀢𑀁 𑀳𑁄𑀢𑀺, 𑀯𑀘𑀻𑀓𑀫𑁆𑀫𑀫𑁆𑀧𑀺 𑀅𑀯𑀲𑁆𑀲𑀼𑀢𑀁 𑀳𑁄𑀢𑀺, 𑀫𑀦𑁄𑀓𑀫𑁆𑀫𑀫𑁆𑀧𑀺 𑀅𑀯𑀲𑁆𑀲𑀼𑀢𑀁 𑀳𑁄𑀢𑀺. 𑀢𑀲𑁆𑀲 𑀅𑀯𑀲𑁆𑀲𑀼𑀢𑀓𑀸𑀬𑀓𑀫𑁆𑀫𑀦𑁆𑀢𑀲𑁆𑀲 𑀅𑀯𑀲𑁆𑀲𑀼𑀢𑀯𑀘𑀻𑀓𑀫𑁆𑀫𑀦𑁆𑀢𑀲𑁆𑀲 𑀅𑀯𑀲𑁆𑀲𑀼𑀢𑀫𑀦𑁄𑀓𑀫𑁆𑀫𑀦𑁆𑀢𑀲𑁆𑀲 𑀓𑀸𑀬𑀓𑀫𑁆𑀫𑀫𑁆𑀧𑀺 𑀧𑀽𑀢𑀺𑀓𑀁 𑀳𑁄𑀢𑀺, 𑀯𑀘𑀻𑀓𑀫𑁆𑀫𑀫𑁆𑀧𑀺 𑀧𑀽𑀢𑀺𑀓𑀁 𑀳𑁄𑀢𑀺, 𑀫𑀦𑁄𑀓𑀫𑁆𑀫𑀫𑁆𑀧𑀺 𑀧𑀽𑀢𑀺𑀓𑀁 𑀳𑁄𑀢𑀺. 𑀢𑀲𑁆𑀲 𑀧𑀽𑀢𑀺𑀓𑀸𑀬𑀓𑀫𑁆𑀫𑀦𑁆𑀢𑀲𑁆𑀲 𑀧𑀽𑀢𑀺𑀯𑀘𑀻𑀓𑀫𑁆𑀫𑀦𑁆𑀢𑀲𑁆𑀲 𑀧𑀽𑀢𑀺𑀫𑀦𑁄𑀓𑀫𑁆𑀫𑀦𑁆𑀢𑀲𑁆𑀲 𑀦 𑀪𑀤𑁆𑀤𑀓𑀁 𑀫𑀭𑀡𑀁 𑀳𑁄𑀢𑀺, 𑀦 𑀪𑀤𑁆𑀤𑀺𑀓𑀸 𑀓𑀸𑀮𑀗𑁆𑀓𑀺𑀭𑀺𑀬𑀸.

‘‘𑀘𑀺𑀢𑁆𑀢𑁂, 𑀕𑀳𑀧𑀢𑀺, 𑀭𑀓𑁆𑀔𑀺𑀢𑁂 𑀓𑀸𑀬𑀓𑀫𑁆𑀫𑀫𑁆𑀧𑀺 𑀭𑀓𑁆𑀔𑀺𑀢𑀁 𑀳𑁄𑀢𑀺, 𑀯𑀘𑀻𑀓𑀫𑁆𑀫𑀫𑁆𑀧𑀺 𑀭𑀓𑁆𑀔𑀺𑀢𑀁 𑀳𑁄𑀢𑀺, 𑀫𑀦𑁄𑀓𑀫𑁆𑀫𑀫𑁆𑀧𑀺 𑀭𑀓𑁆𑀔𑀺𑀢𑀁 𑀳𑁄𑀢𑀺. 𑀢𑀲𑁆𑀲 𑀭𑀓𑁆𑀔𑀺𑀢𑀓𑀸𑀬𑀓𑀫𑁆𑀫𑀦𑁆𑀢𑀲𑁆𑀲 𑀭𑀓𑁆𑀔𑀺𑀢𑀯𑀘𑀻𑀓𑀫𑁆𑀫𑀦𑁆𑀢𑀲𑁆𑀲 𑀭𑀓𑁆𑀔𑀺𑀢𑀫𑀦𑁄𑀓𑀫𑁆𑀫𑀦𑁆𑀢𑀲𑁆𑀲 𑀓𑀸𑀬𑀓𑀫𑁆𑀫𑀫𑁆𑀧𑀺 𑀅𑀦𑀯𑀲𑁆𑀲𑀼𑀢𑀁 𑀳𑁄𑀢𑀺, 𑀯𑀘𑀻𑀓𑀫𑁆𑀫𑀫𑁆𑀧𑀺 𑀅𑀦𑀯𑀲𑁆𑀲𑀼𑀢𑀁 𑀳𑁄𑀢𑀺, 𑀫𑀦𑁄𑀓𑀫𑁆𑀫𑀫𑁆𑀧𑀺 𑀅𑀦𑀯𑀲𑁆𑀲𑀼𑀢𑀁 𑀳𑁄𑀢𑀺. 𑀢𑀲𑁆𑀲 𑀅𑀦𑀯𑀲𑁆𑀲𑀼𑀢𑀓𑀸𑀬𑀓𑀫𑁆𑀫𑀦𑁆𑀢𑀲𑁆𑀲 𑀅𑀦𑀯𑀲𑁆𑀲𑀼𑀢𑀯𑀘𑀻𑀓𑀫𑁆𑀫𑀦𑁆𑀢𑀲𑁆𑀲 𑀅𑀦𑀯𑀲𑁆𑀲𑀼𑀢𑀫𑀦𑁄𑀓𑀫𑁆𑀫𑀦𑁆𑀢𑀲𑁆𑀲 𑀓𑀸𑀬𑀓𑀫𑁆𑀫𑀫𑁆𑀧𑀺 𑀅𑀧𑀽𑀢𑀺𑀓𑀁 𑀳𑁄𑀢𑀺, 𑀯𑀘𑀻𑀓𑀫𑁆𑀫𑀫𑁆𑀧𑀺 𑀅𑀧𑀽𑀢𑀺𑀓𑀁 𑀳𑁄𑀢𑀺, 𑀫𑀦𑁄𑀓𑀫𑁆𑀫𑀫𑁆𑀧𑀺 𑀅𑀧𑀽𑀢𑀺𑀓𑀁 𑀳𑁄𑀢𑀺. 𑀢𑀲𑁆𑀲 𑀅𑀧𑀽𑀢𑀺𑀓𑀸𑀬𑀓𑀫𑁆𑀫𑀦𑁆𑀢𑀲𑁆𑀲 𑀅𑀧𑀽𑀢𑀺𑀯𑀘𑀻𑀓𑀫𑁆𑀫𑀦𑁆𑀢𑀲𑁆𑀲 𑀅𑀧𑀽𑀢𑀺𑀫𑀦𑁄𑀓𑀫𑁆𑀫𑀦𑁆𑀢𑀲𑁆𑀲 𑀪𑀤𑁆𑀤𑀓𑀁 𑀫𑀭𑀡𑀁 𑀳𑁄𑀢𑀺, 𑀪𑀤𑁆𑀤𑀺𑀓𑀸 𑀓𑀸𑀮𑀗𑁆𑀓𑀺𑀭𑀺𑀬𑀸.

‘‘𑀲𑁂𑀬𑁆𑀬𑀣𑀸𑀧𑀺, 𑀕𑀳𑀧𑀢𑀺, 𑀓𑀽𑀝𑀸𑀕𑀸𑀭𑁂 𑀲𑀼𑀘𑁆𑀙𑀦𑁆𑀦𑁂 𑀓𑀽𑀝𑀫𑁆𑀧𑀺 𑀭𑀓𑁆𑀔𑀺𑀢𑀁 𑀳𑁄𑀢𑀺, 𑀕𑁄𑀧𑀸𑀦𑀲𑀺𑀬𑁄𑀧𑀺 𑀭𑀓𑁆𑀔𑀺𑀢𑀸 𑀳𑁄𑀦𑁆𑀢𑀺, 𑀪𑀺𑀢𑁆𑀢𑀺𑀧𑀺 𑀭𑀓𑁆𑀔𑀺𑀢𑀸 𑀳𑁄𑀢𑀺; 𑀓𑀽𑀝𑀫𑁆𑀧𑀺 𑀅𑀦𑀯𑀲𑁆𑀲𑀼𑀢𑀁 𑀳𑁄𑀢𑀺, 𑀕𑁄𑀧𑀸𑀦𑀲𑀺𑀬𑁄𑀧𑀺 𑀅𑀦𑀯𑀲𑁆𑀲𑀼𑀢𑀸 𑀳𑁄𑀦𑁆𑀢𑀺, 𑀪𑀺𑀢𑁆𑀢𑀺𑀧𑀺 𑀅𑀦𑀯𑀲𑁆𑀲𑀼𑀢𑀸 𑀳𑁄𑀢𑀺; 𑀓𑀽𑀝𑀫𑁆𑀧𑀺 𑀅𑀧𑀽𑀢𑀺𑀓𑀁 𑀳𑁄𑀢𑀺, 𑀕𑁄𑀧𑀸𑀦𑀲𑀺𑀬𑁄𑀧𑀺 𑀅𑀧𑀽𑀢𑀺𑀓𑀸 𑀳𑁄𑀦𑁆𑀢𑀺, 𑀪𑀺𑀢𑁆𑀢𑀺𑀧𑀺 𑀅𑀧𑀽𑀢𑀺𑀓𑀸 𑀳𑁄𑀢𑀺.

𑀏𑀯𑀫𑁂𑀯𑀁 𑀔𑁄, 𑀕𑀳𑀧𑀢𑀺, 𑀘𑀺𑀢𑁆𑀢𑁂 𑀭𑀓𑁆𑀔𑀺𑀢𑁂 𑀓𑀸𑀬𑀓𑀫𑁆𑀫𑀫𑁆𑀧𑀺 𑀭𑀓𑁆𑀔𑀺𑀢𑀁 𑀳𑁄𑀢𑀺, 𑀯𑀘𑀻𑀓𑀫𑁆𑀫𑀫𑁆𑀧𑀺 𑀭𑀓𑁆𑀔𑀺𑀢𑀁 𑀳𑁄𑀢𑀺, 𑀫𑀦𑁄𑀓𑀫𑁆𑀫𑀫𑁆𑀧𑀺 𑀭𑀓𑁆𑀔𑀺𑀢𑀁 𑀳𑁄𑀢𑀺. 𑀢𑀲𑁆𑀲 𑀭𑀓𑁆𑀔𑀺𑀢𑀓𑀸𑀬𑀓𑀫𑁆𑀫𑀦𑁆𑀢𑀲𑁆𑀲 𑀭𑀓𑁆𑀔𑀺𑀢𑀯𑀘𑀻𑀓𑀫𑁆𑀫𑀦𑁆𑀢𑀲𑁆𑀲 𑀭𑀓𑁆𑀔𑀺𑀢𑀫𑀦𑁄𑀓𑀫𑁆𑀫𑀦𑁆𑀢𑀲𑁆𑀲 𑀓𑀸𑀬𑀓𑀫𑁆𑀫𑀫𑁆𑀧𑀺 𑀅𑀦𑀯𑀲𑁆𑀲𑀼𑀢𑀁 𑀳𑁄𑀢𑀺, 𑀯𑀘𑀻𑀓𑀫𑁆𑀫𑀫𑁆𑀧𑀺 𑀅𑀦𑀯𑀲𑁆𑀲𑀼𑀢𑀁 𑀳𑁄𑀢𑀺, 𑀫𑀦𑁄𑀓𑀫𑁆𑀫𑀫𑁆𑀧𑀺 𑀅𑀦𑀯𑀲𑁆𑀲𑀼𑀢𑀁 𑀳𑁄𑀢𑀺. 𑀢𑀲𑁆𑀲 𑀅𑀦𑀯𑀲𑁆𑀲𑀼𑀢𑀓𑀸𑀬𑀓𑀫𑁆𑀫𑀦𑁆𑀢𑀲𑁆𑀲 𑀅𑀦𑀯𑀲𑁆𑀲𑀼𑀢𑀯𑀘𑀻𑀓𑀫𑁆𑀫𑀦𑁆𑀢𑀲𑁆𑀲 𑀅𑀦𑀯𑀲𑁆𑀲𑀼𑀢𑀫𑀦𑁄𑀓𑀫𑁆𑀫𑀦𑁆𑀢𑀲𑁆𑀲 𑀓𑀸𑀬𑀓𑀫𑁆𑀫𑀫𑁆𑀧𑀺 𑀅𑀧𑀽𑀢𑀺𑀓𑀁 𑀳𑁄𑀢𑀺, 𑀯𑀘𑀻𑀓𑀫𑁆𑀫𑀫𑁆𑀧𑀺 𑀅𑀧𑀽𑀢𑀺𑀓𑀁 𑀳𑁄𑀢𑀺, 𑀫𑀦𑁄𑀓𑀫𑁆𑀫𑀫𑁆𑀧𑀺 𑀅𑀧𑀽𑀢𑀺𑀓𑀁 𑀳𑁄𑀢𑀺. 𑀢𑀲𑁆𑀲 𑀅𑀧𑀽𑀢𑀺𑀓𑀸𑀬𑀓𑀫𑁆𑀫𑀦𑁆𑀢𑀲𑁆𑀲 𑀅𑀧𑀽𑀢𑀺𑀯𑀘𑀻𑀓𑀫𑁆𑀫𑀦𑁆𑀢𑀲𑁆𑀲 𑀅𑀧𑀽𑀢𑀺𑀫𑀦𑁄𑀓𑀫𑁆𑀫𑀦𑁆𑀢𑀲𑁆𑀲 𑀪𑀤𑁆𑀤𑀓𑀁 𑀫𑀭𑀡𑀁 𑀳𑁄𑀢𑀺, 𑀪𑀤𑁆𑀤𑀺𑀓𑀸 𑀓𑀸𑀮𑀗𑁆𑀓𑀺𑀭𑀺𑀬𑀸’’𑀢𑀺. 𑀲𑀢𑁆𑀢𑀫𑀁.