𑁨. 𑀧𑀞𑀫𑀅𑀲𑁆𑀲𑀸𑀤𑀲𑀼𑀢𑁆𑀢𑀁

𑁧𑁦𑁫. ‘‘𑀮𑁄𑀓𑀲𑁆𑀲𑀸𑀳𑀁, 𑀪𑀺𑀓𑁆𑀔𑀯𑁂, 𑀅𑀲𑁆𑀲𑀸𑀤𑀧𑀭𑀺𑀬𑁂𑀲𑀦𑀁 𑀅𑀘𑀭𑀺𑀁. 𑀬𑁄 𑀮𑁄𑀓𑁂 𑀅𑀲𑁆𑀲𑀸𑀤𑁄 𑀢𑀤𑀚𑁆𑀛𑀕𑀫𑀁. 𑀬𑀸𑀯𑀢𑀓𑁄 𑀮𑁄𑀓𑁂 𑀅𑀲𑁆𑀲𑀸𑀤𑁄, 𑀧𑀜𑁆𑀜𑀸𑀬 𑀫𑁂 𑀲𑁄 𑀲𑀼𑀤𑀺𑀝𑁆𑀞𑁄. 𑀮𑁄𑀓𑀲𑁆𑀲𑀸𑀳𑀁, 𑀪𑀺𑀓𑁆𑀔𑀯𑁂, 𑀆𑀤𑀻𑀦𑀯𑀧𑀭𑀺𑀬𑁂𑀲𑀦𑀁 𑀅𑀘𑀭𑀺𑀁. 𑀬𑁄 𑀮𑁄𑀓𑁂 𑀆𑀤𑀻𑀦𑀯𑁄 𑀢𑀤𑀚𑁆𑀛𑀕𑀫𑀁. 𑀬𑀸𑀯𑀢𑀓𑁄 𑀮𑁄𑀓𑁂 𑀆𑀤𑀻𑀦𑀯𑁄, 𑀧𑀜𑁆𑀜𑀸𑀬 𑀫𑁂 𑀲𑁄 𑀲𑀼𑀤𑀺𑀝𑁆𑀞𑁄. 𑀮𑁄𑀓𑀲𑁆𑀲𑀸𑀳𑀁, 𑀪𑀺𑀓𑁆𑀔𑀯𑁂, 𑀦𑀺𑀲𑁆𑀲𑀭𑀡𑀧𑀭𑀺𑀬𑁂𑀲𑀦𑀁 𑀅𑀘𑀭𑀺𑀁. 𑀬𑀁 𑀮𑁄𑀓𑁂 𑀦𑀺𑀲𑁆𑀲𑀭𑀡𑀁 𑀢𑀤𑀚𑁆𑀛𑀕𑀫𑀁. 𑀬𑀸𑀯𑀢𑀓𑀁 𑀮𑁄𑀓𑁂 𑀦𑀺𑀲𑁆𑀲𑀭𑀡𑀁, 𑀧𑀜𑁆𑀜𑀸𑀬 𑀫𑁂 𑀢𑀁 𑀲𑀼𑀤𑀺𑀝𑁆𑀞𑀁. 𑀬𑀸𑀯𑀓𑀻𑀯𑀜𑁆𑀘𑀸𑀳𑀁, 𑀪𑀺𑀓𑁆𑀔𑀯𑁂, 𑀮𑁄𑀓𑀲𑁆𑀲 𑀅𑀲𑁆𑀲𑀸𑀤𑀜𑁆𑀘 𑀅𑀲𑁆𑀲𑀸𑀤𑀢𑁄 𑀆𑀤𑀻𑀦𑀯𑀜𑁆𑀘 𑀆𑀤𑀻𑀦𑀯𑀢𑁄 𑀦𑀺𑀲𑁆𑀲𑀭𑀡𑀜𑁆𑀘 𑀦𑀺𑀲𑁆𑀲𑀭𑀡𑀢𑁄 𑀬𑀣𑀸𑀪𑀽𑀢𑀁 𑀦𑀸𑀩𑁆𑀪𑀜𑁆𑀜𑀸𑀲𑀺𑀁, 𑀦𑁂𑀯 𑀢𑀸𑀯𑀸𑀳𑀁, 𑀪𑀺𑀓𑁆𑀔𑀯𑁂, 𑀲𑀤𑁂𑀯𑀓𑁂 𑀮𑁄𑀓𑁂 𑀲𑀫𑀸𑀭𑀓𑁂 𑀲𑀩𑁆𑀭𑀳𑁆𑀫𑀓𑁂 𑀲𑀲𑁆𑀲𑀫𑀡𑀩𑁆𑀭𑀸𑀳𑁆𑀫𑀡𑀺𑀬𑀸 𑀧𑀚𑀸𑀬 𑀲𑀤𑁂𑀯𑀫𑀦𑀼𑀲𑁆𑀲𑀸𑀬 ‘𑀅𑀦𑀼𑀢𑁆𑀢𑀭𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀅𑀪𑀺𑀲𑀫𑁆𑀩𑀼𑀤𑁆𑀥𑁄’𑀢𑀺 𑀧𑀘𑁆𑀘𑀜𑁆𑀜𑀸𑀲𑀺𑀁. 𑀬𑀢𑁄 𑀘 𑀔𑁆𑀯𑀸𑀳𑀁, 𑀪𑀺𑀓𑁆𑀔𑀯𑁂, 𑀮𑁄𑀓𑀲𑁆𑀲 𑀅𑀲𑁆𑀲𑀸𑀤𑀜𑁆𑀘 𑀅𑀲𑁆𑀲𑀸𑀤𑀢𑁄 𑀆𑀤𑀻𑀦𑀯𑀜𑁆𑀘 𑀆𑀤𑀻𑀦𑀯𑀢𑁄 𑀦𑀺𑀲𑁆𑀲𑀭𑀡𑀜𑁆𑀘 𑀦𑀺𑀲𑁆𑀲𑀭𑀡𑀢𑁄 𑀬𑀣𑀸𑀪𑀽𑀢𑀁 𑀅𑀩𑁆𑀪𑀜𑁆𑀜𑀸𑀲𑀺𑀁, 𑀅𑀣𑀸𑀳𑀁, 𑀪𑀺𑀓𑁆𑀔𑀯𑁂, 𑀲𑀤𑁂𑀯𑀓𑁂 𑀮𑁄𑀓𑁂 𑀲𑀫𑀸𑀭𑀓𑁂 𑀲𑀩𑁆𑀭𑀳𑁆𑀫𑀓𑁂 𑀲𑀲𑁆𑀲𑀫𑀡𑀩𑁆𑀭𑀸𑀳𑁆𑀫𑀡𑀺𑀬𑀸 𑀧𑀚𑀸𑀬 𑀲𑀤𑁂𑀯𑀫𑀦𑀼𑀲𑁆𑀲𑀸𑀬 ‘𑀅𑀦𑀼𑀢𑁆𑀢𑀭𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀅𑀪𑀺𑀲𑀫𑁆𑀩𑀼𑀤𑁆𑀥𑁄’𑀢𑀺 𑀧𑀘𑁆𑀘𑀜𑁆𑀜𑀸𑀲𑀺𑀁. 𑀜𑀸𑀡𑀜𑁆𑀘 𑀧𑀦 𑀫𑁂 𑀤𑀲𑁆𑀲𑀦𑀁 𑀉𑀤𑀧𑀸𑀤𑀺 𑁋 ‘𑀅𑀓𑀼𑀧𑁆𑀧𑀸 𑀫𑁂 𑀯𑀺𑀫𑀼𑀢𑁆𑀢𑀺, 𑀅𑀬𑀫𑀦𑁆𑀢𑀺𑀫𑀸 𑀚𑀸𑀢𑀺, 𑀦𑀢𑁆𑀣𑀺 𑀤𑀸𑀦𑀺 𑀧𑀼𑀦𑀩𑁆𑀪𑀯𑁄’’’𑀢𑀺. 𑀤𑀼𑀢𑀺𑀬𑀁.