𑁧𑁦. 𑀤𑀼𑀢𑀺𑀬𑀦𑀺𑀤𑀸𑀦𑀲𑀼𑀢𑁆𑀢𑀁

𑁧𑁧𑁩. ‘‘𑀢𑀻𑀡𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀦𑀺𑀤𑀸𑀦𑀸𑀦𑀺 𑀓𑀫𑁆𑀫𑀸𑀦𑀁 𑀲𑀫𑀼𑀤𑀬𑀸𑀬. 𑀓𑀢𑀫𑀸𑀦𑀺 𑀢𑀻𑀡𑀺? 𑀅𑀢𑀻𑀢𑁂, 𑀪𑀺𑀓𑁆𑀔𑀯𑁂, 𑀙𑀦𑁆𑀤𑀭𑀸𑀕𑀝𑁆𑀞𑀸𑀦𑀺𑀬𑁂 𑀥𑀫𑁆𑀫𑁂 𑀆𑀭𑀩𑁆𑀪 𑀙𑀦𑁆𑀤𑁄 𑀚𑀸𑀬𑀢𑀺; 𑀅𑀦𑀸𑀕𑀢𑁂, 𑀪𑀺𑀓𑁆𑀔𑀯𑁂, 𑀙𑀦𑁆𑀤𑀭𑀸𑀕𑀝𑁆𑀞𑀸𑀦𑀺𑀬𑁂 𑀥𑀫𑁆𑀫𑁂 𑀆𑀭𑀩𑁆𑀪 𑀙𑀦𑁆𑀤𑁄 𑀚𑀸𑀬𑀢𑀺; 𑀧𑀘𑁆𑀘𑀼𑀧𑁆𑀧𑀦𑁆𑀦𑁂, 𑀪𑀺𑀓𑁆𑀔𑀯𑁂, 𑀙𑀦𑁆𑀤𑀭𑀸𑀕𑀝𑁆𑀞𑀸𑀦𑀺𑀬𑁂 𑀥𑀫𑁆𑀫𑁂 𑀆𑀭𑀩𑁆𑀪 𑀙𑀦𑁆𑀤𑁄 𑀚𑀸𑀬𑀢𑀺. 𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀅𑀢𑀻𑀢𑁂 𑀙𑀦𑁆𑀤𑀭𑀸𑀕𑀝𑁆𑀞𑀸𑀦𑀺𑀬𑁂 𑀥𑀫𑁆𑀫𑁂 𑀆𑀭𑀩𑁆𑀪 𑀙𑀦𑁆𑀤𑁄 𑀚𑀸𑀬𑀢𑀺? 𑀅𑀢𑀻𑀢𑁂, 𑀪𑀺𑀓𑁆𑀔𑀯𑁂, 𑀙𑀦𑁆𑀤𑀭𑀸𑀕𑀝𑁆𑀞𑀸𑀦𑀺𑀬𑁂 𑀥𑀫𑁆𑀫𑁂 𑀆𑀭𑀩𑁆𑀪 𑀘𑁂𑀢𑀲𑀸 𑀅𑀦𑀼𑀯𑀺𑀢𑀓𑁆𑀓𑁂𑀢𑀺 𑀅𑀦𑀼𑀯𑀺𑀘𑀸𑀭𑁂𑀢𑀺. 𑀢𑀲𑁆𑀲 𑀅𑀢𑀻𑀢𑁂 𑀙𑀦𑁆𑀤𑀭𑀸𑀕𑀝𑁆𑀞𑀸𑀦𑀺𑀬𑁂 𑀥𑀫𑁆𑀫𑁂 𑀆𑀭𑀩𑁆𑀪 𑀘𑁂𑀢𑀲𑀸 𑀅𑀦𑀼𑀯𑀺𑀢𑀓𑁆𑀓𑀬𑀢𑁄 𑀅𑀦𑀼𑀯𑀺𑀘𑀸𑀭𑀬𑀢𑁄 𑀙𑀦𑁆𑀤𑁄 𑀚𑀸𑀬𑀢𑀺. 𑀙𑀦𑁆𑀤𑀚𑀸𑀢𑁄 𑀢𑁂𑀳𑀺 𑀥𑀫𑁆𑀫𑁂𑀳𑀺 𑀲𑀁𑀬𑀼𑀢𑁆𑀢𑁄 𑀳𑁄𑀢𑀺. 𑀏𑀢𑀫𑀳𑀁, 𑀪𑀺𑀓𑁆𑀔𑀯𑁂, 𑀲𑀁𑀬𑁄𑀚𑀦𑀁 𑀯𑀤𑀸𑀫𑀺 𑀬𑁄 𑀘𑁂𑀢𑀲𑁄 𑀲𑀸𑀭𑀸𑀕𑁄. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀅𑀢𑀻𑀢𑁂 𑀙𑀦𑁆𑀤𑀭𑀸𑀕𑀝𑁆𑀞𑀸𑀦𑀺𑀬𑁂 𑀥𑀫𑁆𑀫𑁂 𑀆𑀭𑀩𑁆𑀪 𑀙𑀦𑁆𑀤𑁄 𑀚𑀸𑀬𑀢𑀺.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀅𑀦𑀸𑀕𑀢𑁂 𑀙𑀦𑁆𑀤𑀭𑀸𑀕𑀝𑁆𑀞𑀸𑀦𑀺𑀬𑁂 𑀥𑀫𑁆𑀫𑁂 𑀆𑀭𑀩𑁆𑀪 𑀙𑀦𑁆𑀤𑁄 𑀚𑀸𑀬𑀢𑀺? 𑀅𑀦𑀸𑀕𑀢𑁂, 𑀪𑀺𑀓𑁆𑀔𑀯𑁂, 𑀙𑀦𑁆𑀤𑀭𑀸𑀕𑀝𑁆𑀞𑀸𑀦𑀺𑀬𑁂 𑀥𑀫𑁆𑀫𑁂 𑀆𑀭𑀩𑁆𑀪 𑀘𑁂𑀢𑀲𑀸 𑀅𑀦𑀼𑀯𑀺𑀢𑀓𑁆𑀓𑁂𑀢𑀺 𑀅𑀦𑀼𑀯𑀺𑀘𑀸𑀭𑁂𑀢𑀺. 𑀢𑀲𑁆𑀲 𑀅𑀦𑀸𑀕𑀢𑁂 𑀙𑀦𑁆𑀤𑀭𑀸𑀕𑀝𑁆𑀞𑀸𑀦𑀺𑀬𑁂 𑀥𑀫𑁆𑀫𑁂 𑀆𑀭𑀩𑁆𑀪 𑀘𑁂𑀢𑀲𑀸 𑀅𑀦𑀼𑀯𑀺𑀢𑀓𑁆𑀓𑀬𑀢𑁄 𑀅𑀦𑀼𑀯𑀺𑀘𑀸𑀭𑀬𑀢𑁄 𑀙𑀦𑁆𑀤𑁄 𑀚𑀸𑀬𑀢𑀺. 𑀙𑀦𑁆𑀤𑀚𑀸𑀢𑁄 𑀢𑁂𑀳𑀺 𑀥𑀫𑁆𑀫𑁂𑀳𑀺 𑀲𑀁𑀬𑀼𑀢𑁆𑀢𑁄 𑀳𑁄𑀢𑀺. 𑀏𑀢𑀫𑀳𑀁, 𑀪𑀺𑀓𑁆𑀔𑀯𑁂, 𑀲𑀁𑀬𑁄𑀚𑀦𑀁 𑀯𑀤𑀸𑀫𑀺 𑀬𑁄 𑀘𑁂𑀢𑀲𑁄 𑀲𑀸𑀭𑀸𑀕𑁄. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀅𑀦𑀸𑀕𑀢𑁂 𑀙𑀦𑁆𑀤𑀭𑀸𑀕𑀝𑁆𑀞𑀸𑀦𑀺𑀬𑁂 𑀥𑀫𑁆𑀫𑁂 𑀆𑀭𑀩𑁆𑀪 𑀙𑀦𑁆𑀤𑁄 𑀚𑀸𑀬𑀢𑀺.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀙𑀦𑁆𑀤𑀭𑀸𑀕𑀝𑁆𑀞𑀸𑀦𑀺𑀬𑁂 𑀥𑀫𑁆𑀫𑁂 𑀆𑀭𑀩𑁆𑀪 𑀙𑀦𑁆𑀤𑁄 𑀚𑀸𑀬𑀢𑀺? 𑀧𑀘𑁆𑀘𑀼𑀧𑁆𑀧𑀦𑁆𑀦𑁂, 𑀪𑀺𑀓𑁆𑀔𑀯𑁂, 𑀙𑀦𑁆𑀤𑀭𑀸𑀕𑀝𑁆𑀞𑀸𑀦𑀺𑀬𑁂 𑀥𑀫𑁆𑀫𑁂 𑀆𑀭𑀩𑁆𑀪 𑀘𑁂𑀢𑀲𑀸 𑀅𑀦𑀼𑀯𑀺𑀢𑀓𑁆𑀓𑁂𑀢𑀺 𑀅𑀦𑀼𑀯𑀺𑀘𑀸𑀭𑁂𑀢𑀺. 𑀢𑀲𑁆𑀲 𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀙𑀦𑁆𑀤𑀭𑀸𑀕𑀝𑁆𑀞𑀸𑀦𑀺𑀬𑁂 𑀥𑀫𑁆𑀫𑁂 𑀆𑀭𑀩𑁆𑀪 𑀘𑁂𑀢𑀲𑀸 𑀅𑀦𑀼𑀯𑀺𑀢𑀓𑁆𑀓𑀬𑀢𑁄 𑀅𑀦𑀼𑀯𑀺𑀘𑀸𑀭𑀬𑀢𑁄 𑀙𑀦𑁆𑀤𑁄 𑀚𑀸𑀬𑀢𑀺. 𑀙𑀦𑁆𑀤𑀚𑀸𑀢𑁄 𑀢𑁂𑀳𑀺 𑀥𑀫𑁆𑀫𑁂𑀳𑀺 𑀲𑀁𑀬𑀼𑀢𑁆𑀢𑁄 𑀳𑁄𑀢𑀺. 𑀏𑀢𑀫𑀳𑀁, 𑀪𑀺𑀓𑁆𑀔𑀯𑁂, 𑀲𑀁𑀬𑁄𑀚𑀦𑀁 𑀯𑀤𑀸𑀫𑀺 𑀬𑁄 𑀘𑁂𑀢𑀲𑁄 𑀲𑀸𑀭𑀸𑀕𑁄. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀙𑀦𑁆𑀤𑀭𑀸𑀕𑀝𑁆𑀞𑀸𑀦𑀺𑀬𑁂 𑀥𑀫𑁆𑀫𑁂 𑀆𑀭𑀩𑁆𑀪 𑀙𑀦𑁆𑀤𑁄 𑀚𑀸𑀬𑀢𑀺. 𑀇𑀫𑀸𑀦𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀻𑀡𑀺 𑀦𑀺𑀤𑀸𑀦𑀸𑀦𑀺 𑀓𑀫𑁆𑀫𑀸𑀦𑀁 𑀲𑀫𑀼𑀤𑀬𑀸𑀬.

‘‘𑀢𑀻𑀡𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀦𑀺𑀤𑀸𑀦𑀸𑀦𑀺 𑀓𑀫𑁆𑀫𑀸𑀦𑀁 𑀲𑀫𑀼𑀤𑀬𑀸𑀬. 𑀓𑀢𑀫𑀸𑀦𑀺 𑀢𑀻𑀡𑀺? 𑀅𑀢𑀻𑀢𑁂, 𑀪𑀺𑀓𑁆𑀔𑀯𑁂, 𑀙𑀦𑁆𑀤𑀭𑀸𑀕𑀝𑁆𑀞𑀸𑀦𑀺𑀬𑁂 𑀥𑀫𑁆𑀫𑁂 𑀆𑀭𑀩𑁆𑀪 𑀙𑀦𑁆𑀤𑁄 𑀦 𑀚𑀸𑀬𑀢𑀺; 𑀅𑀦𑀸𑀕𑀢𑁂 𑀪𑀺𑀓𑁆𑀔𑀯𑁂, 𑀙𑀦𑁆𑀤𑀭𑀸𑀕𑀝𑁆𑀞𑀸𑀦𑀺𑀬𑁂 𑀥𑀫𑁆𑀫𑁂 𑀆𑀭𑀩𑁆𑀪 𑀙𑀦𑁆𑀤𑁄 𑀦 𑀚𑀸𑀬𑀢𑀺; 𑀧𑀘𑁆𑀘𑀼𑀧𑁆𑀧𑀦𑁆𑀦𑁂, 𑀪𑀺𑀓𑁆𑀔𑀯𑁂, 𑀙𑀦𑁆𑀤𑀭𑀸𑀕𑀝𑁆𑀞𑀸𑀦𑀺𑀬𑁂 𑀥𑀫𑁆𑀫𑁂 𑀆𑀭𑀩𑁆𑀪 𑀙𑀦𑁆𑀤𑁄 𑀦 𑀚𑀸𑀬𑀢𑀺. 𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀅𑀢𑀻𑀢𑁂 𑀙𑀦𑁆𑀤𑀭𑀸𑀕𑀝𑁆𑀞𑀸𑀦𑀺𑀬𑁂 𑀥𑀫𑁆𑀫𑁂 𑀆𑀭𑀩𑁆𑀪 𑀙𑀦𑁆𑀤𑁄 𑀦 𑀚𑀸𑀬𑀢𑀺? 𑀅𑀢𑀻𑀢𑀸𑀦𑀁, 𑀪𑀺𑀓𑁆𑀔𑀯𑁂, 𑀙𑀦𑁆𑀤𑀭𑀸𑀕𑀝𑁆𑀞𑀸𑀦𑀺𑀬𑀸𑀦𑀁 𑀥𑀫𑁆𑀫𑀸𑀦𑀁 𑀆𑀬𑀢𑀺𑀁 𑀯𑀺𑀧𑀸𑀓𑀁 𑀧𑀚𑀸𑀦𑀸𑀢𑀺. 𑀆𑀬𑀢𑀺𑀁 𑀯𑀺𑀧𑀸𑀓𑀁 𑀯𑀺𑀤𑀺𑀢𑁆𑀯𑀸 𑀢𑀤𑀪𑀺𑀦𑀺𑀯𑀢𑁆𑀢𑁂𑀢𑀺. 𑀢𑀤𑀪𑀺𑀦𑀺𑀯𑀢𑁆𑀢𑁂𑀢𑁆𑀯𑀸 [𑀢𑀤𑀪𑀺𑀦𑀺𑀯𑀚𑁆𑀚𑁂𑀢𑀺, 𑀢𑀤𑀪𑀺𑀦𑀺𑀯𑀚𑁆𑀚𑁂𑀢𑁆𑀯𑀸 (𑀲𑀻. 𑀲𑁆𑀬𑀸. 𑀓𑀁.)] 𑀘𑁂𑀢𑀲𑀸 𑀅𑀪𑀺𑀦𑀺𑀯𑀺𑀚𑁆𑀛𑀺𑀢𑁆𑀯𑀸 [𑀅𑀪𑀺𑀯𑀺𑀭𑀸𑀚𑁂𑀢𑁆𑀯𑀸 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀧𑀜𑁆𑀜𑀸𑀬 𑀅𑀢𑀺𑀯𑀺𑀚𑁆𑀛 [𑀅𑀪𑀺𑀦𑀺𑀯𑀺𑀚𑁆𑀛 (𑀓.)] 𑀧𑀲𑁆𑀲𑀢𑀺. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀅𑀢𑀻𑀢𑁂 𑀙𑀦𑁆𑀤𑀭𑀸𑀕𑀝𑁆𑀞𑀸𑀦𑀺𑀬𑁂 𑀥𑀫𑁆𑀫𑁂 𑀆𑀭𑀩𑁆𑀪 𑀙𑀦𑁆𑀤𑁄 𑀦 𑀚𑀸𑀬𑀢𑀺.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀅𑀦𑀸𑀕𑀢𑁂 𑀙𑀦𑁆𑀤𑀭𑀸𑀕𑀝𑁆𑀞𑀸𑀦𑀺𑀬𑁂 𑀥𑀫𑁆𑀫𑁂 𑀆𑀭𑀩𑁆𑀪 𑀙𑀦𑁆𑀤𑁄 𑀦 𑀚𑀸𑀬𑀢𑀺? 𑀅𑀦𑀸𑀕𑀢𑀸𑀦𑀁, 𑀪𑀺𑀓𑁆𑀔𑀯𑁂, 𑀙𑀦𑁆𑀤𑀭𑀸𑀕𑀝𑁆𑀞𑀸𑀦𑀺𑀬𑀸𑀦𑀁 𑀥𑀫𑁆𑀫𑀸𑀦𑀁 𑀆𑀬𑀢𑀺𑀁 𑀯𑀺𑀧𑀸𑀓𑀁 𑀧𑀚𑀸𑀦𑀸𑀢𑀺. 𑀆𑀬𑀢𑀺𑀁 𑀯𑀺𑀧𑀸𑀓𑀁 𑀯𑀺𑀤𑀺𑀢𑁆𑀯𑀸 𑀢𑀤𑀪𑀺𑀦𑀺𑀯𑀢𑁆𑀢𑁂𑀢𑀺. 𑀢𑀤𑀪𑀺𑀦𑀺𑀯𑀢𑁆𑀢𑁂𑀢𑁆𑀯𑀸 𑀘𑁂𑀢𑀲𑀸 𑀅𑀪𑀺𑀦𑀺𑀯𑀺𑀚𑁆𑀛𑀺𑀢𑁆𑀯𑀸 𑀧𑀜𑁆𑀜𑀸𑀬 𑀅𑀢𑀺𑀯𑀺𑀚𑁆𑀛 𑀧𑀲𑁆𑀲𑀢𑀺. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀅𑀦𑀸𑀕𑀢𑁂 𑀙𑀦𑁆𑀤𑀭𑀸𑀕𑀝𑁆𑀞𑀸𑀦𑀺𑀬𑁂 𑀥𑀫𑁆𑀫𑁂 𑀆𑀭𑀩𑁆𑀪 𑀙𑀦𑁆𑀤𑁄 𑀦 𑀚𑀸𑀬𑀢𑀺.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀙𑀦𑁆𑀤𑀭𑀸𑀕𑀝𑁆𑀞𑀸𑀦𑀺𑀬𑁂 𑀥𑀫𑁆𑀫𑁂 𑀆𑀭𑀩𑁆𑀪 𑀙𑀦𑁆𑀤𑁄 𑀦 𑀚𑀸𑀬𑀢𑀺? 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀦𑀁, 𑀪𑀺𑀓𑁆𑀔𑀯𑁂, 𑀙𑀦𑁆𑀤𑀭𑀸𑀕𑀝𑁆𑀞𑀸𑀦𑀺𑀬𑀸𑀦𑀁 𑀥𑀫𑁆𑀫𑀸𑀦𑀁 𑀆𑀬𑀢𑀺𑀁 𑀯𑀺𑀧𑀸𑀓𑀁 𑀧𑀚𑀸𑀦𑀸𑀢𑀺, 𑀆𑀬𑀢𑀺𑀁 𑀯𑀺𑀧𑀸𑀓𑀁 𑀯𑀺𑀤𑀺𑀢𑁆𑀯𑀸 𑀢𑀤𑀪𑀺𑀦𑀺𑀯𑀢𑁆𑀢𑁂𑀢𑀺, 𑀢𑀤𑀪𑀺𑀦𑀺𑀯𑀢𑁆𑀢𑁂𑀢𑁆𑀯𑀸 𑀘𑁂𑀢𑀲𑀸 𑀅𑀪𑀺𑀦𑀺𑀯𑀺𑀚𑁆𑀛𑀺𑀢𑁆𑀯𑀸 𑀧𑀜𑁆𑀜𑀸𑀬 𑀅𑀢𑀺𑀯𑀺𑀚𑁆𑀛 𑀧𑀲𑁆𑀲𑀢𑀺. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀙𑀦𑁆𑀤𑀭𑀸𑀕𑀝𑁆𑀞𑀸𑀦𑀺𑀬𑁂 𑀥𑀫𑁆𑀫𑁂 𑀆𑀭𑀩𑁆𑀪 𑀙𑀦𑁆𑀤𑁄 𑀦 𑀚𑀸𑀬𑀢𑀺. 𑀇𑀫𑀸𑀦𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀻𑀡𑀺 𑀦𑀺𑀤𑀸𑀦𑀸𑀦𑀺 𑀓𑀫𑁆𑀫𑀸𑀦𑀁 𑀲𑀫𑀼𑀤𑀬𑀸𑀬𑀸’’𑀢𑀺. 𑀤𑀲𑀫𑀁.

𑀲𑀫𑁆𑀩𑁄𑀥𑀯𑀕𑁆𑀕𑁄 𑀧𑀞𑀫𑁄.