(𑁧𑁦) 𑁫. 𑀮𑁄𑀡𑀓𑀧𑀮𑁆𑀮𑀯𑀕𑁆𑀕𑁄

𑁧. 𑀅𑀘𑁆𑀘𑀸𑀬𑀺𑀓𑀲𑀼𑀢𑁆𑀢𑀁

𑁯𑁩. ‘‘𑀢𑀻𑀡𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀓𑀲𑁆𑀲𑀓𑀲𑁆𑀲 𑀕𑀳𑀧𑀢𑀺𑀲𑁆𑀲 𑀅𑀘𑁆𑀘𑀸𑀬𑀺𑀓𑀸𑀦𑀺 𑀓𑀭𑀡𑀻𑀬𑀸𑀦𑀺. 𑀓𑀢𑀫𑀸𑀦𑀺 𑀢𑀻𑀡𑀺? 𑀇𑀥, 𑀪𑀺𑀓𑁆𑀔𑀯𑁂, 𑀓𑀲𑁆𑀲𑀓𑁄 𑀕𑀳𑀧𑀢𑀺 𑀲𑀻𑀖𑀁 𑀲𑀻𑀖𑀁 𑀔𑁂𑀢𑁆𑀢𑀁 𑀲𑀼𑀓𑀝𑁆𑀞𑀁 𑀓𑀭𑁄𑀢𑀺 𑀲𑀼𑀫𑀢𑀺𑀓𑀢𑀁. 𑀲𑀻𑀖𑀁 𑀲𑀻𑀖𑀁 𑀔𑁂𑀢𑁆𑀢𑀁 𑀲𑀼𑀓𑀝𑁆𑀞𑀁 𑀓𑀭𑀺𑀢𑁆𑀯𑀸 𑀲𑀼𑀫𑀢𑀺𑀓𑀢𑀁 𑀲𑀻𑀖𑀁 𑀲𑀻𑀖𑀁 𑀩𑀻𑀚𑀸𑀦𑀺 𑀧𑀢𑀺𑀝𑁆𑀞𑀸𑀧𑁂𑀢𑀺. 𑀲𑀻𑀖𑀁 𑀲𑀻𑀖𑀁 𑀩𑀻𑀚𑀸𑀦𑀺 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀲𑀻𑀖𑀁 𑀲𑀻𑀖𑀁 𑀉𑀤𑀓𑀁 𑀅𑀪𑀺𑀦𑁂𑀢𑀺𑀧𑀺 𑀅𑀧𑀦𑁂𑀢𑀺𑀧𑀺. 𑀇𑀫𑀸𑀦𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀻𑀡𑀺 𑀓𑀲𑁆𑀲𑀓𑀲𑁆𑀲 𑀕𑀳𑀧𑀢𑀺𑀲𑁆𑀲 𑀅𑀘𑁆𑀘𑀸𑀬𑀺𑀓𑀸𑀦𑀺 𑀓𑀭𑀡𑀻𑀬𑀸𑀦𑀺. 𑀢𑀲𑁆𑀲 𑀔𑁄 𑀢𑀁, 𑀪𑀺𑀓𑁆𑀔𑀯𑁂, 𑀓𑀲𑁆𑀲𑀓𑀲𑁆𑀲 𑀕𑀳𑀧𑀢𑀺𑀲𑁆𑀲 𑀦𑀢𑁆𑀣𑀺 𑀲𑀸 𑀇𑀤𑁆𑀥𑀺 𑀯𑀸 𑀆𑀦𑀼𑀪𑀸𑀯𑁄 𑀯𑀸 𑁋 ‘𑀅𑀚𑁆𑀚𑁂𑀯 𑀫𑁂 𑀥𑀜𑁆𑀜𑀸𑀦𑀺 𑀚𑀸𑀬𑀦𑁆𑀢𑀼, 𑀲𑁆𑀯𑁂𑀯 𑀕𑀩𑁆𑀪𑀻𑀦𑀺 𑀳𑁄𑀦𑁆𑀢𑀼, 𑀉𑀢𑁆𑀢𑀭𑀲𑁆𑀯𑁂𑀯 𑀧𑀘𑁆𑀘𑀦𑁆𑀢𑀽’𑀢𑀺. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀳𑁄𑀢𑀺 𑀲𑁄 𑀲𑀫𑀬𑁄 𑀬𑀁 𑀢𑀲𑁆𑀲 𑀓𑀲𑁆𑀲𑀓𑀲𑁆𑀲 𑀕𑀳𑀧𑀢𑀺𑀲𑁆𑀲 𑀢𑀸𑀦𑀺 𑀥𑀜𑁆𑀜𑀸𑀦𑀺 𑀉𑀢𑀼𑀧𑀭𑀺𑀡𑀸𑀫𑀻𑀦𑀺 𑀚𑀸𑀬𑀦𑁆𑀢𑀺𑀧𑀺 𑀕𑀩𑁆𑀪𑀻𑀦𑀺𑀧𑀺 𑀳𑁄𑀦𑁆𑀢𑀺 𑀧𑀘𑁆𑀘𑀦𑁆𑀢𑀺𑀧𑀺.

‘‘𑀏𑀯𑀫𑁂𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀢𑀻𑀡𑀺𑀫𑀸𑀦𑀺 𑀪𑀺𑀓𑁆𑀔𑀼𑀲𑁆𑀲 𑀅𑀘𑁆𑀘𑀸𑀬𑀺𑀓𑀸𑀦𑀺 𑀓𑀭𑀡𑀻𑀬𑀸𑀦𑀺. 𑀓𑀢𑀫𑀸𑀦𑀺 𑀢𑀻𑀡𑀺? 𑀅𑀥𑀺𑀲𑀻𑀮𑀲𑀺𑀓𑁆𑀔𑀸𑀲𑀫𑀸𑀤𑀸𑀦𑀁, 𑀅𑀥𑀺𑀘𑀺𑀢𑁆𑀢𑀲𑀺𑀓𑁆𑀔𑀸𑀲𑀫𑀸𑀤𑀸𑀦𑀁, 𑀅𑀥𑀺𑀧𑀜𑁆𑀜𑀸𑀲𑀺𑀓𑁆𑀔𑀸𑀲𑀫𑀸𑀤𑀸𑀦𑀁 𑁋 𑀇𑀫𑀸𑀦𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀻𑀡𑀺 𑀪𑀺𑀓𑁆𑀔𑀼𑀲𑁆𑀲 𑀅𑀘𑁆𑀘𑀸𑀬𑀺𑀓𑀸𑀦𑀺 𑀓𑀭𑀡𑀻𑀬𑀸𑀦𑀺. 𑀢𑀲𑁆𑀲 𑀔𑁄 𑀢𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀦𑀢𑁆𑀣𑀺 𑀲𑀸 𑀇𑀤𑁆𑀥𑀺 𑀯𑀸 𑀅𑀦𑀼𑀪𑀸𑀯𑁄 𑀯𑀸 𑁋 ‘𑀅𑀚𑁆𑀚𑁂𑀯 𑀫𑁂 𑀅𑀦𑀼𑀧𑀸𑀤𑀸𑀬 𑀆𑀲𑀯𑁂𑀳𑀺 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀢𑀼 𑀲𑁆𑀯𑁂 𑀯𑀸 𑀉𑀢𑁆𑀢𑀭𑀲𑁆𑀯𑁂 𑀯𑀸’𑀢𑀺. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀳𑁄𑀢𑀺 𑀲𑁄 𑀲𑀫𑀬𑁄 𑀬𑀁 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀥𑀺𑀲𑀻𑀮𑀫𑁆𑀧𑀺 𑀲𑀺𑀓𑁆𑀔𑀢𑁄 𑀅𑀥𑀺𑀘𑀺𑀢𑁆𑀢𑀫𑁆𑀧𑀺 𑀲𑀺𑀓𑁆𑀔𑀢𑁄 𑀅𑀥𑀺𑀧𑀜𑁆𑀜𑀫𑁆𑀧𑀺 𑀲𑀺𑀓𑁆𑀔𑀢𑁄 𑀅𑀦𑀼𑀧𑀸𑀤𑀸𑀬 𑀆𑀲𑀯𑁂𑀳𑀺 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀢𑀺.

‘‘𑀢𑀲𑁆𑀫𑀸𑀢𑀺𑀳, 𑀪𑀺𑀓𑁆𑀔𑀯𑁂, 𑀏𑀯𑀁 𑀲𑀺𑀓𑁆𑀔𑀺𑀢𑀩𑁆𑀩𑀁 𑁋 ‘𑀢𑀺𑀩𑁆𑀩𑁄 𑀦𑁄 𑀙𑀦𑁆𑀤𑁄 𑀪𑀯𑀺𑀲𑁆𑀲𑀢𑀺 𑀅𑀥𑀺𑀲𑀻𑀮𑀲𑀺𑀓𑁆𑀔𑀸𑀲𑀫𑀸𑀤𑀸𑀦𑁂, 𑀢𑀺𑀩𑁆𑀩𑁄 𑀙𑀦𑁆𑀤𑁄 𑀪𑀯𑀺𑀲𑁆𑀲𑀢𑀺 𑀅𑀥𑀺𑀘𑀺𑀢𑁆𑀢𑀲𑀺𑀓𑁆𑀔𑀸𑀲𑀫𑀸𑀤𑀸𑀦𑁂, 𑀢𑀺𑀩𑁆𑀩𑁄 𑀙𑀦𑁆𑀤𑁄 𑀪𑀯𑀺𑀲𑁆𑀲𑀢𑀺 𑀅𑀥𑀺𑀧𑀜𑁆𑀜𑀸𑀲𑀺𑀓𑁆𑀔𑀸𑀲𑀫𑀸𑀤𑀸𑀦𑁂’𑀢𑀺. 𑀏𑀯𑀜𑁆𑀳𑀺 𑀯𑁄, 𑀪𑀺𑀓𑁆𑀔𑀯𑁂, 𑀲𑀺𑀓𑁆𑀔𑀺𑀢𑀩𑁆𑀩’’𑀦𑁆𑀢𑀺. 𑀧𑀞𑀫𑀁.

𑁨. 𑀧𑀯𑀺𑀯𑁂𑀓𑀲𑀼𑀢𑁆𑀢𑀁

𑁯𑁪. ‘‘𑀢𑀻𑀡𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑀺𑀢𑁆𑀣𑀺𑀬𑀸 𑀧𑀭𑀺𑀩𑁆𑀩𑀸𑀚𑀓𑀸 𑀧𑀯𑀺𑀯𑁂𑀓𑀸𑀦𑀺 𑀧𑀜𑁆𑀜𑀸𑀧𑁂𑀦𑁆𑀢𑀺. 𑀓𑀢𑀫𑀸𑀦𑀺 𑀢𑀻𑀡𑀺? 𑀘𑀻𑀯𑀭𑀧𑀯𑀺𑀯𑁂𑀓𑀁, 𑀧𑀺𑀡𑁆𑀟𑀧𑀸𑀢𑀧𑀯𑀺𑀯𑁂𑀓𑀁, 𑀲𑁂𑀦𑀸𑀲𑀦𑀧𑀯𑀺𑀯𑁂𑀓𑀁.

‘‘𑀢𑀢𑁆𑀭𑀺𑀤𑀁, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑀺𑀢𑁆𑀣𑀺𑀬𑀸 𑀧𑀭𑀺𑀩𑁆𑀩𑀸𑀚𑀓𑀸 𑀘𑀻𑀯𑀭𑀧𑀯𑀺𑀯𑁂𑀓𑀲𑁆𑀫𑀺𑀁 𑀧𑀜𑁆𑀜𑀸𑀧𑁂𑀦𑁆𑀢𑀺, 𑀲𑀸𑀡𑀸𑀦𑀺𑀧𑀺 𑀥𑀸𑀭𑁂𑀦𑁆𑀢𑀺, 𑀫𑀲𑀸𑀡𑀸𑀦𑀺𑀧𑀺 𑀥𑀸𑀭𑁂𑀦𑁆𑀢𑀺, 𑀙𑀯𑀤𑀼𑀲𑁆𑀲𑀸𑀦𑀺𑀧𑀺 𑀥𑀸𑀭𑁂𑀦𑁆𑀢𑀺, 𑀧𑀁𑀲𑀼𑀓𑀽𑀮𑀸𑀦𑀺𑀧𑀺 𑀥𑀸𑀭𑁂𑀦𑁆𑀢𑀺, 𑀢𑀺𑀭𑀻𑀝𑀸𑀦𑀺𑀧𑀺 𑀥𑀸𑀭𑁂𑀦𑁆𑀢𑀺, 𑀅𑀚𑀺𑀦𑀫𑁆𑀧𑀺 𑀥𑀸𑀭𑁂𑀦𑁆𑀢𑀺, 𑀅𑀚𑀺𑀦𑀓𑁆𑀔𑀺𑀧𑀫𑁆𑀧𑀺 𑀥𑀸𑀭𑁂𑀦𑁆𑀢𑀺, 𑀓𑀼𑀲𑀘𑀻𑀭𑀫𑁆𑀧𑀺 𑀥𑀸𑀭𑁂𑀦𑁆𑀢𑀺, 𑀯𑀸𑀓𑀘𑀻𑀭𑀫𑁆𑀧𑀺 𑀥𑀸𑀭𑁂𑀦𑁆𑀢𑀺, 𑀨𑀮𑀓𑀘𑀻𑀭𑀫𑁆𑀧𑀺 𑀥𑀸𑀭𑁂𑀦𑁆𑀢𑀺, 𑀓𑁂𑀲𑀓𑀫𑁆𑀩𑀮𑀫𑁆𑀧𑀺 𑀥𑀸𑀭𑁂𑀦𑁆𑀢𑀺, 𑀯𑀸𑀮𑀓𑀫𑁆𑀩𑀮𑀫𑁆𑀧𑀺 𑀥𑀸𑀭𑁂𑀦𑁆𑀢𑀺, 𑀉𑀮𑀽𑀓𑀧𑀓𑁆𑀔𑀺𑀓𑀫𑁆𑀧𑀺 𑀥𑀸𑀭𑁂𑀦𑁆𑀢𑀺. 𑀇𑀤𑀁 𑀔𑁄, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑀺𑀢𑁆𑀣𑀺𑀬𑀸 𑀧𑀭𑀺𑀩𑁆𑀩𑀸𑀚𑀓𑀸 𑀘𑀻𑀯𑀭𑀧𑀯𑀺𑀯𑁂𑀓𑀲𑁆𑀫𑀺𑀁 𑀧𑀜𑁆𑀜𑀸𑀧𑁂𑀦𑁆𑀢𑀺.

‘‘𑀢𑀢𑁆𑀭𑀺𑀤𑀁, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑀺𑀢𑁆𑀣𑀺𑀬𑀸 𑀧𑀭𑀺𑀩𑁆𑀩𑀸𑀚𑀓𑀸 𑀧𑀺𑀡𑁆𑀟𑀧𑀸𑀢𑀧𑀯𑀺𑀯𑁂𑀓𑀲𑁆𑀫𑀺𑀁 𑀧𑀜𑁆𑀜𑀸𑀧𑁂𑀦𑁆𑀢𑀺. 𑀲𑀸𑀓𑀪𑀓𑁆𑀔𑀸𑀧𑀺 𑀳𑁄𑀦𑁆𑀢𑀺, 𑀲𑀸𑀫𑀸𑀓𑀪𑀓𑁆𑀔𑀸𑀧𑀺 𑀳𑁄𑀦𑁆𑀢𑀺, 𑀦𑀻𑀯𑀸𑀭𑀪𑀓𑁆𑀔𑀸𑀧𑀺 𑀳𑁄𑀦𑁆𑀢𑀺, 𑀤𑀤𑁆𑀤𑀼𑀮𑀪𑀓𑁆𑀔𑀸𑀧𑀺 𑀳𑁄𑀦𑁆𑀢𑀺, 𑀳𑀝𑀪𑀓𑁆𑀔𑀸𑀧𑀺 𑀳𑁄𑀦𑁆𑀢𑀺, 𑀓𑀡𑀪𑀓𑁆𑀔𑀸𑀧𑀺 𑀳𑁄𑀦𑁆𑀢𑀺, 𑀆𑀘𑀸𑀫𑀪𑀓𑁆𑀔𑀸𑀧𑀺 𑀳𑁄𑀦𑁆𑀢𑀺, 𑀧𑀺𑀜𑁆𑀜𑀸𑀓𑀪𑀓𑁆𑀔𑀸𑀧𑀺 𑀳𑁄𑀦𑁆𑀢𑀺, 𑀢𑀺𑀡𑀪𑀓𑁆𑀔𑀸𑀧𑀺 𑀳𑁄𑀦𑁆𑀢𑀺, 𑀕𑁄𑀫𑀬𑀪𑀓𑁆𑀔𑀸𑀧𑀺 𑀳𑁄𑀦𑁆𑀢𑀺, 𑀯𑀦𑀫𑀽𑀮𑀨𑀮𑀸𑀳𑀸𑀭𑀸 𑀬𑀸𑀧𑁂𑀦𑁆𑀢𑀺 𑀧𑀯𑀢𑁆𑀢𑀨𑀮𑀪𑁄𑀚𑀻. 𑀇𑀤𑀁 𑀔𑁄, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑀺𑀢𑁆𑀣𑀺𑀬𑀸 𑀧𑀭𑀺𑀩𑁆𑀩𑀸𑀚𑀓𑀸 𑀧𑀺𑀡𑁆𑀟𑀧𑀸𑀢𑀧𑀯𑀺𑀯𑁂𑀓𑀲𑁆𑀫𑀺𑀁 𑀧𑀜𑁆𑀜𑀸𑀧𑁂𑀦𑁆𑀢𑀺.

‘‘𑀢𑀢𑁆𑀭𑀺𑀤𑀁, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑀺𑀢𑁆𑀣𑀺𑀬𑀸 𑀧𑀭𑀺𑀩𑁆𑀩𑀸𑀚𑀓𑀸 𑀲𑁂𑀦𑀸𑀲𑀦𑀧𑀯𑀺𑀯𑁂𑀓𑀲𑁆𑀫𑀺𑀁 𑀧𑀜𑁆𑀜𑀸𑀧𑁂𑀦𑁆𑀢𑀺 𑀅𑀭𑀜𑁆𑀜𑀁 𑀭𑀼𑀓𑁆𑀔𑀫𑀽𑀮𑀁 𑀲𑀼𑀲𑀸𑀦𑀁 [𑀭𑀼𑀓𑁆𑀔𑀫𑀽𑀮𑀁 𑀪𑀼𑀲𑀸𑀕𑀸𑀭𑀁 𑀲𑀼𑀲𑀸𑀦𑀁 (𑀓.)] 𑀯𑀦𑀧𑀢𑁆𑀣𑀁 𑀅𑀩𑁆𑀪𑁄𑀓𑀸𑀲𑀁 𑀧𑀮𑀸𑀮𑀧𑀼𑀜𑁆𑀚𑀁 𑀪𑀼𑀲𑀸𑀕𑀸𑀭𑀁 [𑀲𑀼𑀜𑁆𑀜𑀸𑀕𑀸𑀭𑀁 (𑀓.)]. 𑀇𑀤𑀁 𑀔𑁄, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑀺𑀢𑁆𑀣𑀺𑀬𑀸 𑀧𑀭𑀺𑀩𑁆𑀩𑀸𑀚𑀓𑀸 𑀲𑁂𑀦𑀸𑀲𑀦𑀧𑀯𑀺𑀯𑁂𑀓𑀲𑁆𑀫𑀺𑀁 𑀧𑀜𑁆𑀜𑀸𑀧𑁂𑀦𑁆𑀢𑀺. 𑀇𑀫𑀸𑀦𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀻𑀡𑀺 𑀅𑀜𑁆𑀜𑀢𑀺𑀢𑁆𑀣𑀺𑀬𑀸 𑀧𑀭𑀺𑀩𑁆𑀩𑀸𑀚𑀓𑀸 𑀧𑀯𑀺𑀯𑁂𑀓𑀸𑀦𑀺 𑀧𑀜𑁆𑀜𑀸𑀧𑁂𑀦𑁆𑀢𑀺.

‘‘𑀢𑀻𑀡𑀺 𑀔𑁄 𑀧𑀦𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀪𑀺𑀓𑁆𑀔𑀼𑀦𑁄 𑀧𑀯𑀺𑀯𑁂𑀓𑀸𑀦𑀺. 𑀓𑀢𑀫𑀸𑀦𑀺 𑀢𑀻𑀡𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀻𑀮𑀯𑀸 𑀘 𑀳𑁄𑀢𑀺, 𑀤𑀼𑀲𑁆𑀲𑀻𑀮𑁆𑀬𑀜𑁆𑀘𑀲𑁆𑀲 𑀧𑀳𑀻𑀦𑀁 𑀳𑁄𑀢𑀺, 𑀢𑁂𑀦 𑀘 𑀯𑀺𑀯𑀺𑀢𑁆𑀢𑁄 𑀳𑁄𑀢𑀺; 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑁄 𑀘 𑀳𑁄𑀢𑀺, 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀘𑀲𑁆𑀲 𑀧𑀳𑀻𑀦𑀸 𑀳𑁄𑀢𑀺, 𑀢𑀸𑀬 𑀘 𑀯𑀺𑀯𑀺𑀢𑁆𑀢𑁄 𑀳𑁄𑀢𑀺; 𑀔𑀻𑀡𑀸𑀲𑀯𑁄 𑀘 𑀳𑁄𑀢𑀺, 𑀆𑀲𑀯𑀸 𑀘𑀲𑁆𑀲 𑀧𑀳𑀻𑀦𑀸 𑀳𑁄𑀦𑁆𑀢𑀺, 𑀢𑁂𑀳𑀺 𑀘 𑀯𑀺𑀯𑀺𑀢𑁆𑀢𑁄 𑀳𑁄𑀢𑀺. 𑀬𑀢𑁄 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀻𑀮𑀯𑀸 𑀳𑁄𑀢𑀺, 𑀤𑀼𑀲𑁆𑀲𑀻𑀮𑁆𑀬𑀜𑁆𑀘𑀲𑁆𑀲 𑀧𑀳𑀻𑀦𑀁 𑀳𑁄𑀢𑀺, 𑀢𑁂𑀦 𑀘 𑀯𑀺𑀯𑀺𑀢𑁆𑀢𑁄 𑀳𑁄𑀢𑀺; 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑁄 𑀘 𑀳𑁄𑀢𑀺, 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀘𑀲𑁆𑀲 𑀧𑀳𑀻𑀦𑀸 𑀳𑁄𑀢𑀺, 𑀢𑀸𑀬 𑀘 𑀯𑀺𑀯𑀺𑀢𑁆𑀢𑁄 𑀳𑁄𑀢𑀺; 𑀔𑀻𑀡𑀸𑀲𑀯𑁄 𑀘 𑀳𑁄𑀢𑀺, 𑀆𑀲𑀯𑀸 𑀘𑀲𑁆𑀲 𑀧𑀳𑀻𑀦𑀸 𑀳𑁄𑀦𑁆𑀢𑀺, 𑀢𑁂𑀳𑀺 𑀘 𑀯𑀺𑀯𑀺𑀢𑁆𑀢𑁄 𑀳𑁄𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, ‘𑀪𑀺𑀓𑁆𑀔𑀼 𑀅𑀕𑁆𑀕𑀧𑁆𑀧𑀢𑁆𑀢𑁄 𑀲𑀸𑀭𑀧𑁆𑀧𑀢𑁆𑀢𑁄 𑀲𑀼𑀤𑁆𑀥𑁄 𑀲𑀸𑀭𑁂 𑀧𑀢𑀺𑀝𑁆𑀞𑀺𑀢𑁄’’’.

‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀓𑀲𑁆𑀲𑀓𑀲𑁆𑀲 𑀕𑀳𑀧𑀢𑀺𑀲𑁆𑀲 𑀲𑀫𑁆𑀧𑀦𑁆𑀦𑀁 𑀲𑀸𑀮𑀺𑀓𑁆𑀔𑁂𑀢𑁆𑀢𑀁. 𑀢𑀫𑁂𑀦𑀁 𑀓𑀲𑁆𑀲𑀓𑁄 𑀕𑀳𑀧𑀢𑀺 𑀲𑀻𑀖𑀁 𑀲𑀻𑀖𑀁 [𑀲𑀻𑀖𑀲𑀻𑀖𑀁 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀮𑀯𑀸𑀧𑁂𑀬𑁆𑀬. 𑀲𑀻𑀖𑀁 𑀲𑀻𑀖𑀁 𑀮𑀯𑀸𑀧𑁂𑀢𑁆𑀯𑀸 𑀲𑀻𑀖𑀁 𑀲𑀻𑀖𑀁 𑀲𑀗𑁆𑀖𑀭𑀸𑀧𑁂𑀬𑁆𑀬. 𑀲𑀻𑀖𑀁 𑀲𑀻𑀖𑀁 𑀲𑀗𑁆𑀖𑀭𑀸𑀧𑁂𑀢𑁆𑀯𑀸 𑀲𑀻𑀖𑀁 𑀲𑀻𑀖𑀁 𑀉𑀩𑁆𑀩𑀳𑀸𑀧𑁂𑀬𑁆𑀬 [𑀉𑀩𑁆𑀩𑀸𑀳𑀸𑀧𑁂𑀬𑁆𑀬 (𑀲𑁆𑀬𑀸. 𑀓𑀁.)]. 𑀲𑀻𑀖𑀁 𑀲𑀻𑀖𑀁 𑀉𑀩𑁆𑀩𑀳𑀸𑀧𑁂𑀢𑁆𑀯𑀸 𑀲𑀻𑀖𑀁 𑀲𑀻𑀖𑀁 𑀧𑀼𑀜𑁆𑀚𑀁 𑀓𑀸𑀭𑀸𑀧𑁂𑀬𑁆𑀬. 𑀲𑀻𑀖𑀁 𑀲𑀻𑀖𑀁 𑀧𑀼𑀜𑁆𑀚𑀁 𑀓𑀸𑀭𑀸𑀧𑁂𑀢𑁆𑀯𑀸 𑀲𑀻𑀖𑀁 𑀲𑀻𑀖𑀁 𑀫𑀤𑁆𑀤𑀸𑀧𑁂𑀬𑁆𑀬. 𑀲𑀻𑀖𑀁 𑀲𑀻𑀖𑀁 𑀫𑀤𑁆𑀤𑀸𑀧𑁂𑀢𑁆𑀯𑀸 𑀲𑀻𑀖𑀁 𑀲𑀻𑀖𑀁 𑀧𑀮𑀸𑀮𑀸𑀦𑀺 𑀉𑀤𑁆𑀥𑀭𑀸𑀧𑁂𑀬𑁆𑀬. 𑀲𑀻𑀖𑀁 𑀲𑀻𑀖𑀁 𑀧𑀮𑀸𑀮𑀸𑀦𑀺 𑀉𑀤𑁆𑀥𑀭𑀸𑀧𑁂𑀢𑁆𑀯𑀸 𑀲𑀻𑀖𑀁 𑀲𑀻𑀖𑀁 𑀪𑀼𑀲𑀺𑀓𑀁 𑀉𑀤𑁆𑀥𑀭𑀸𑀧𑁂𑀬𑁆𑀬. 𑀲𑀻𑀖𑀁 𑀲𑀻𑀖𑀁 𑀪𑀼𑀲𑀺𑀓𑀁 𑀉𑀤𑁆𑀥𑀭𑀸𑀧𑁂𑀢𑁆𑀯𑀸 𑀲𑀻𑀖𑀁 𑀲𑀻𑀖𑀁 𑀑𑀧𑀼𑀦𑀸𑀧𑁂𑀬𑁆𑀬. 𑀲𑀻𑀖𑀁 𑀲𑀻𑀖𑀁 𑀑𑀧𑀼𑀦𑀸𑀧𑁂𑀢𑁆𑀯𑀸 𑀲𑀻𑀖𑀁 𑀲𑀻𑀖𑀁 𑀅𑀢𑀺𑀳𑀭𑀸𑀧𑁂𑀬𑁆𑀬. 𑀲𑀻𑀖𑀁 𑀲𑀻𑀖𑀁 𑀅𑀢𑀺𑀳𑀭𑀸𑀧𑁂𑀢𑁆𑀯𑀸 𑀲𑀻𑀖𑀁 𑀲𑀻𑀖𑀁 𑀓𑁄𑀝𑁆𑀝𑀸𑀧𑁂𑀬𑁆𑀬. 𑀲𑀻𑀖𑀁 𑀲𑀻𑀖𑀁 𑀓𑁄𑀝𑁆𑀝𑀸𑀧𑁂𑀢𑁆𑀯𑀸 𑀲𑀻𑀖𑀁 𑀲𑀻𑀖𑀁 𑀣𑀼𑀲𑀸𑀦𑀺 𑀉𑀤𑁆𑀥𑀭𑀸𑀧𑁂𑀬𑁆𑀬. 𑀏𑀯𑀫𑀲𑁆𑀲𑀼 [𑀏𑀯𑀲𑁆𑀲𑀼 (𑀓.)] 𑀢𑀸𑀦𑀺, 𑀪𑀺𑀓𑁆𑀔𑀯𑁂, 𑀓𑀲𑁆𑀲𑀓𑀲𑁆𑀲 𑀕𑀳𑀧𑀢𑀺𑀲𑁆𑀲 𑀥𑀜𑁆𑀜𑀸𑀦𑀺 𑀅𑀕𑁆𑀕𑀧𑁆𑀧𑀢𑁆𑀢𑀸𑀦𑀺 𑀲𑀸𑀭𑀧𑁆𑀧𑀢𑁆𑀢𑀸𑀦𑀺 𑀲𑀼𑀤𑁆𑀥𑀸𑀦𑀺 𑀲𑀸𑀭𑁂 𑀧𑀢𑀺𑀝𑁆𑀞𑀺𑀢𑀸𑀦𑀺.

‘‘𑀏𑀯𑀫𑁂𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀬𑀢𑁄 𑀪𑀺𑀓𑁆𑀔𑀼 𑀲𑀻𑀮𑀯𑀸 𑀘 𑀳𑁄𑀢𑀺, 𑀤𑀼𑀲𑁆𑀲𑀻𑀮𑁆𑀬𑀜𑁆𑀘𑀲𑁆𑀲 𑀧𑀳𑀻𑀦𑀁 𑀳𑁄𑀢𑀺, 𑀢𑁂𑀦 𑀘 𑀯𑀺𑀯𑀺𑀢𑁆𑀢𑁄 𑀳𑁄𑀢𑀺; 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑁄 𑀘 𑀳𑁄𑀢𑀺, 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀘𑀲𑁆𑀲 𑀧𑀳𑀻𑀦𑀸 𑀳𑁄𑀢𑀺, 𑀢𑀸𑀬 𑀘 𑀯𑀺𑀯𑀺𑀢𑁆𑀢𑁄 𑀳𑁄𑀢𑀺; 𑀔𑀻𑀡𑀸𑀲𑀯𑁄 𑀘 𑀳𑁄𑀢𑀺, 𑀆𑀲𑀯𑀸 𑀘𑀲𑁆𑀲 𑀧𑀳𑀻𑀦𑀸 𑀳𑁄𑀦𑁆𑀢𑀺, 𑀢𑁂𑀳𑀺 𑀘 𑀯𑀺𑀯𑀺𑀢𑁆𑀢𑁄 𑀳𑁄𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, ‘𑀪𑀺𑀓𑁆𑀔𑀼 𑀅𑀕𑁆𑀕𑀧𑁆𑀧𑀢𑁆𑀢𑁄 𑀲𑀸𑀭𑀧𑁆𑀧𑀢𑁆𑀢𑁄 𑀲𑀼𑀤𑁆𑀥𑁄 𑀲𑀸𑀭𑁂 𑀧𑀢𑀺𑀝𑁆𑀞𑀺𑀢𑁄’’’𑀢𑀺. 𑀤𑀼𑀢𑀺𑀬𑀁.

𑁩. 𑀲𑀭𑀤𑀲𑀼𑀢𑁆𑀢𑀁

𑁯𑁫. ‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀲𑀭𑀤𑀲𑀫𑀬𑁂 𑀯𑀺𑀤𑁆𑀥𑁂 𑀯𑀺𑀕𑀢𑀯𑀮𑀸𑀳𑀓𑁂 𑀤𑁂𑀯𑁂 𑀆𑀤𑀺𑀘𑁆𑀘𑁄 𑀦𑀪𑀁 𑀅𑀩𑁆𑀪𑀼𑀲𑁆𑀲𑀓𑁆𑀓𑀫𑀸𑀦𑁄 [𑀅𑀩𑁆𑀪𑀼𑀲𑁆𑀲𑀼𑀓𑁆𑀓𑀫𑀸𑀦𑁄 (𑀲𑀻. 𑀧𑀻.)] 𑀲𑀩𑁆𑀩𑀁 𑀆𑀓𑀸𑀲𑀕𑀢𑀁 𑀢𑀫𑀕𑀢𑀁 𑀅𑀪𑀺𑀯𑀺𑀳𑀘𑁆𑀘 𑀪𑀸𑀲𑀢𑁂 𑀘 𑀢𑀧𑀢𑁂 𑀘 𑀯𑀺𑀭𑁄𑀘𑀢𑀺 𑀘.

‘‘𑀏𑀯𑀫𑁂𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀬𑀢𑁄 𑀅𑀭𑀺𑀬𑀲𑀸𑀯𑀓𑀲𑁆𑀲 𑀯𑀺𑀭𑀚𑀁 𑀯𑀻𑀢𑀫𑀮𑀁 𑀥𑀫𑁆𑀫𑀘𑀓𑁆𑀔𑀼𑀁 𑀉𑀧𑁆𑀧𑀚𑁆𑀚𑀢𑀺 [𑀉𑀤𑀧𑀸𑀤𑀺 (𑀲𑀩𑁆𑀩𑀢𑁆𑀣)], 𑀲𑀳 𑀤𑀲𑁆𑀲𑀦𑀼𑀧𑁆𑀧𑀸𑀤𑀸, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀲𑀸𑀯𑀓𑀲𑁆𑀲 𑀢𑀻𑀡𑀺 𑀲𑀁𑀬𑁄𑀚𑀦𑀸𑀦𑀺 𑀧𑀳𑀻𑀬𑀦𑁆𑀢𑀺 𑁋 𑀲𑀓𑁆𑀓𑀸𑀬𑀤𑀺𑀝𑁆𑀞𑀺, 𑀯𑀺𑀘𑀺𑀓𑀺𑀘𑁆𑀙𑀸, 𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑁄.

‘‘𑀅𑀣𑀸𑀧𑀭𑀁 𑀤𑁆𑀯𑀻𑀳𑀺 𑀥𑀫𑁆𑀫𑁂𑀳𑀺 𑀦𑀺𑀬𑁆𑀬𑀸𑀢𑀺 𑀅𑀪𑀺𑀚𑁆𑀛𑀸𑀬 𑀘 𑀩𑁆𑀬𑀸𑀧𑀸𑀤𑁂𑀦 𑀘. 𑀲𑁄 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀺 𑀯𑀺𑀯𑀺𑀘𑁆𑀘 𑀅𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀺 𑀲𑀯𑀺𑀢𑀓𑁆𑀓𑀁 𑀲𑀯𑀺𑀘𑀸𑀭𑀁 𑀯𑀺𑀯𑁂𑀓𑀚𑀁 𑀧𑀻𑀢𑀺𑀲𑀼𑀔𑀁 𑀧𑀞𑀫𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀢𑀲𑁆𑀫𑀺𑀁 𑀘𑁂, 𑀪𑀺𑀓𑁆𑀔𑀯𑁂, 𑀲𑀫𑀬𑁂 𑀅𑀭𑀺𑀬𑀲𑀸𑀯𑀓𑁄 𑀓𑀸𑀮𑀁 𑀓𑀭𑁂𑀬𑁆𑀬, 𑀦𑀢𑁆𑀣𑀺 𑀢𑀁 [𑀢𑀲𑁆𑀲 (𑀓.)] 𑀲𑀁𑀬𑁄𑀚𑀦𑀁 𑀬𑁂𑀦 𑀲𑀁𑀬𑁄𑀚𑀦𑁂𑀦 𑀲𑀁𑀬𑀼𑀢𑁆𑀢𑁄 𑀅𑀭𑀺𑀬𑀲𑀸𑀯𑀓𑁄 𑀧𑀼𑀦 𑀇𑀫𑀁 [𑀧𑀼𑀦𑀬𑀺𑀫𑀁 (𑀲𑁆𑀬𑀸. 𑀓𑀁. 𑀓.)] 𑀮𑁄𑀓𑀁 𑀆𑀕𑀘𑁆𑀙𑁂𑀬𑁆𑀬𑀸’’𑀢𑀺. 𑀢𑀢𑀺𑀬𑀁.

𑁪. 𑀧𑀭𑀺𑀲𑀸𑀲𑀼𑀢𑁆𑀢𑀁

𑁯𑁬. ‘‘𑀢𑀺𑀲𑁆𑀲𑁄 𑀇𑀫𑀸, 𑀪𑀺𑀓𑁆𑀔𑀯𑁂, 𑀧𑀭𑀺𑀲𑀸. 𑀓𑀢𑀫𑀸 𑀢𑀺𑀲𑁆𑀲𑁄? 𑀅𑀕𑁆𑀕𑀯𑀢𑀻 𑀧𑀭𑀺𑀲𑀸, 𑀯𑀕𑁆𑀕𑀸 𑀧𑀭𑀺𑀲𑀸, 𑀲𑀫𑀕𑁆𑀕𑀸 𑀧𑀭𑀺𑀲𑀸.

‘‘𑀓𑀢𑀫𑀸 𑀘, 𑀪𑀺𑀓𑁆𑀔𑀯𑁂, 𑀅𑀕𑁆𑀕𑀯𑀢𑀻 𑀧𑀭𑀺𑀲𑀸? 𑀇𑀥, 𑀪𑀺𑀓𑁆𑀔𑀯𑁂, 𑀬𑀲𑁆𑀲𑀁 𑀧𑀭𑀺𑀲𑀸𑀬𑀁 𑀣𑁂𑀭𑀸 𑀪𑀺𑀓𑁆𑀔𑀽 𑀦 𑀩𑀸𑀳𑀼𑀮𑀺𑀓𑀸 𑀳𑁄𑀦𑁆𑀢𑀺 𑀦 𑀲𑀸𑀣𑀮𑀺𑀓𑀸, 𑀑𑀓𑁆𑀓𑀫𑀦𑁂 𑀦𑀺𑀓𑁆𑀔𑀺𑀢𑁆𑀢𑀥𑀼𑀭𑀸 𑀧𑀯𑀺𑀯𑁂𑀓𑁂 𑀧𑀼𑀩𑁆𑀩𑀗𑁆𑀕𑀫𑀸, 𑀯𑀻𑀭𑀺𑀬𑀁 𑀆𑀭𑀪𑀦𑁆𑀢𑀺 𑀅𑀧𑁆𑀧𑀢𑁆𑀢𑀲𑁆𑀲 𑀧𑀢𑁆𑀢𑀺𑀬𑀸 𑀅𑀦𑀥𑀺𑀕𑀢𑀲𑁆𑀲 𑀅𑀥𑀺𑀕𑀫𑀸𑀬 𑀅𑀲𑀘𑁆𑀙𑀺𑀓𑀢𑀲𑁆𑀲 𑀲𑀘𑁆𑀙𑀺𑀓𑀺𑀭𑀺𑀬𑀸𑀬, 𑀢𑁂𑀲𑀁 𑀧𑀘𑁆𑀙𑀺𑀫𑀸 𑀚𑀦𑀢𑀸 𑀤𑀺𑀝𑁆𑀞𑀸𑀦𑀼𑀕𑀢𑀺𑀁 𑀆𑀧𑀚𑁆𑀚𑀢𑀺. 𑀲𑀸𑀧𑀺 𑀳𑁄𑀢𑀺 𑀦 𑀩𑀸𑀳𑀼𑀮𑀺𑀓𑀸 𑀦 𑀲𑀸𑀣𑀮𑀺𑀓𑀸 𑀑𑀓𑁆𑀓𑀫𑀦𑁂 𑀦𑀺𑀓𑁆𑀔𑀺𑀢𑁆𑀢𑀥𑀼𑀭𑀸 𑀧𑀯𑀺𑀯𑁂𑀓𑁂 𑀧𑀼𑀩𑁆𑀩𑀗𑁆𑀕𑀫𑀸, 𑀯𑀻𑀭𑀺𑀬𑀁 𑀆𑀭𑀪𑀢𑀺 𑀅𑀧𑁆𑀧𑀢𑁆𑀢𑀲𑁆𑀲 𑀧𑀢𑁆𑀢𑀺𑀬𑀸 𑀅𑀦𑀥𑀺𑀕𑀢𑀲𑁆𑀲 𑀅𑀥𑀺𑀕𑀫𑀸𑀬 𑀅𑀲𑀘𑁆𑀙𑀺𑀓𑀢𑀲𑁆𑀲 𑀲𑀘𑁆𑀙𑀺𑀓𑀺𑀭𑀺𑀬𑀸𑀬. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀅𑀕𑁆𑀕𑀯𑀢𑀻 𑀧𑀭𑀺𑀲𑀸.

‘‘𑀓𑀢𑀫𑀸 𑀘, 𑀪𑀺𑀓𑁆𑀔𑀯𑁂, 𑀯𑀕𑁆𑀕𑀸 𑀧𑀭𑀺𑀲𑀸? 𑀇𑀥, 𑀪𑀺𑀓𑁆𑀔𑀯𑁂, 𑀬𑀲𑁆𑀲𑀁 𑀧𑀭𑀺𑀲𑀸𑀬𑀁 𑀪𑀺𑀓𑁆𑀔𑀽 𑀪𑀡𑁆𑀟𑀦𑀚𑀸𑀢𑀸 𑀓𑀮𑀳𑀚𑀸𑀢𑀸 𑀯𑀺𑀯𑀸𑀤𑀸𑀧𑀦𑁆𑀦𑀸 𑀅𑀜𑁆𑀜𑀫𑀜𑁆𑀜𑀁 𑀫𑀼𑀔𑀲𑀢𑁆𑀢𑀻𑀳𑀺 𑀯𑀺𑀢𑀼𑀤𑀦𑁆𑀢𑀸 𑀯𑀺𑀳𑀭𑀦𑁆𑀢𑀺, 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀯𑀕𑁆𑀕𑀸 𑀧𑀭𑀺𑀲𑀸.

‘‘𑀓𑀢𑀫𑀸 𑀘, 𑀪𑀺𑀓𑁆𑀔𑀯𑁂, 𑀲𑀫𑀕𑁆𑀕𑀸 𑀧𑀭𑀺𑀲𑀸? 𑀇𑀥, 𑀪𑀺𑀓𑁆𑀔𑀯𑁂, 𑀬𑀲𑁆𑀲𑀁 𑀧𑀭𑀺𑀲𑀸𑀬𑀁 𑀪𑀺𑀓𑁆𑀔𑀽 𑀲𑀫𑀕𑁆𑀕𑀸 𑀲𑀫𑁆𑀫𑁄𑀤𑀫𑀸𑀦𑀸 𑀅𑀯𑀺𑀯𑀤𑀫𑀸𑀦𑀸 𑀔𑀻𑀭𑁄𑀤𑀓𑀻𑀪𑀽𑀢𑀸 𑀅𑀜𑁆𑀜𑀫𑀜𑁆𑀜𑀁 𑀧𑀺𑀬𑀘𑀓𑁆𑀔𑀽𑀳𑀺 𑀲𑀫𑁆𑀧𑀲𑁆𑀲𑀦𑁆𑀢𑀸 𑀯𑀺𑀳𑀭𑀦𑁆𑀢𑀺, 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀲𑀫𑀕𑁆𑀕𑀸 𑀧𑀭𑀺𑀲𑀸.

‘‘𑀬𑀲𑁆𑀫𑀺𑀁, 𑀪𑀺𑀓𑁆𑀔𑀯𑁂, 𑀲𑀫𑀬𑁂 𑀪𑀺𑀓𑁆𑀔𑀽 𑀲𑀫𑀕𑁆𑀕𑀸 𑀲𑀫𑁆𑀫𑁄𑀤𑀫𑀸𑀦𑀸 𑀅𑀯𑀺𑀯𑀤𑀫𑀸𑀦𑀸 𑀔𑀻𑀭𑁄𑀤𑀓𑀻𑀪𑀽𑀢𑀸 𑀅𑀜𑁆𑀜𑀫𑀜𑁆𑀜𑀁 𑀧𑀺𑀬𑀘𑀓𑁆𑀔𑀽𑀳𑀺 𑀲𑀫𑁆𑀧𑀲𑁆𑀲𑀦𑁆𑀢𑀸 𑀯𑀺𑀳𑀭𑀦𑁆𑀢𑀺, 𑀩𑀳𑀼𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀢𑀲𑁆𑀫𑀺𑀁 𑀲𑀫𑀬𑁂 𑀧𑀼𑀜𑁆𑀜𑀁 𑀧𑀲𑀯𑀦𑁆𑀢𑀺. 𑀩𑁆𑀭𑀳𑁆𑀫𑀁, 𑀪𑀺𑀓𑁆𑀔𑀯𑁂, 𑀯𑀺𑀳𑀸𑀭𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀪𑀺𑀓𑁆𑀔𑀽 𑀯𑀺𑀳𑀭𑀦𑁆𑀢𑀺, 𑀬𑀤𑀺𑀤𑀁 𑀫𑀼𑀤𑀺𑀢𑀸𑀬 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀬𑀸. 𑀧𑀫𑀼𑀤𑀺𑀢𑀲𑁆𑀲 𑀧𑀻𑀢𑀺 𑀚𑀸𑀬𑀢𑀺, 𑀧𑀻𑀢𑀺𑀫𑀦𑀲𑁆𑀲 𑀓𑀸𑀬𑁄 𑀧𑀲𑁆𑀲𑀫𑁆𑀪𑀢𑀺, 𑀧𑀲𑁆𑀲𑀤𑁆𑀥𑀓𑀸𑀬𑁄 𑀲𑀼𑀔𑀁 𑀯𑁂𑀤𑀺𑀬𑀢𑀺, 𑀲𑀼𑀔𑀺𑀦𑁄 𑀘𑀺𑀢𑁆𑀢𑀁 𑀲𑀫𑀸𑀥𑀺𑀬𑀢𑀺.

‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀉𑀧𑀭𑀺𑀧𑀩𑁆𑀩𑀢𑁂 𑀣𑀼𑀮𑁆𑀮𑀨𑀼𑀲𑀺𑀢𑀓𑁂 𑀤𑁂𑀯𑁂 𑀯𑀲𑁆𑀲𑀦𑁆𑀢𑁂 𑀢𑀁 𑀉𑀤𑀓𑀁 𑀬𑀣𑀸𑀦𑀺𑀦𑁆𑀦𑀁 𑀧𑀯𑀢𑁆𑀢𑀫𑀸𑀦𑀁 𑀧𑀩𑁆𑀩𑀢𑀓𑀦𑁆𑀤𑀭𑀧𑀤𑀭𑀲𑀸𑀔𑀸 𑀧𑀭𑀺𑀧𑀽𑀭𑁂𑀢𑀺, 𑀧𑀩𑁆𑀩𑀢𑀓𑀦𑁆𑀤𑀭𑀧𑀤𑀭𑀲𑀸𑀔𑀸 𑀧𑀭𑀺𑀧𑀽𑀭𑀸 𑀓𑀼𑀲𑁄𑀩𑁆𑀪𑁂 [𑀓𑀼𑀲𑁆𑀲𑀼𑀫𑁆𑀪𑁂 (𑀲𑀻. 𑀧𑀻.), 𑀓𑀼𑀲𑀼𑀫𑁆𑀪𑁂 (𑀲𑁆𑀬𑀸. 𑀓𑀁. 𑀓.)] 𑀧𑀭𑀺𑀧𑀽𑀭𑁂𑀦𑁆𑀢𑀺, 𑀓𑀼𑀲𑁄𑀩𑁆𑀪𑀸 𑀧𑀭𑀺𑀧𑀽𑀭𑀸 𑀫𑀳𑀸𑀲𑁄𑀩𑁆𑀪𑁂 𑀧𑀭𑀺𑀧𑀽𑀭𑁂𑀦𑁆𑀢𑀺, 𑀫𑀳𑀸𑀲𑁄𑀩𑁆𑀪𑀸 𑀧𑀭𑀺𑀧𑀽𑀭𑀸 𑀓𑀼𑀦𑁆𑀦𑀤𑀺𑀬𑁄 𑀧𑀭𑀺𑀧𑀽𑀭𑁂𑀦𑁆𑀢𑀺, 𑀓𑀼𑀦𑁆𑀦𑀤𑀺𑀬𑁄 𑀧𑀭𑀺𑀧𑀽𑀭𑀸 𑀫𑀳𑀸𑀦𑀤𑀺𑀬𑁄 𑀧𑀭𑀺𑀧𑀽𑀭𑁂𑀦𑁆𑀢𑀺, 𑀫𑀳𑀸𑀦𑀤𑀺𑀬𑁄 𑀧𑀭𑀺𑀧𑀽𑀭𑀸 𑀲𑀫𑀼𑀤𑁆𑀤𑀁 [𑀲𑀫𑀼𑀤𑁆𑀤𑀲𑀸𑀕𑀭𑁂 (𑀓.)] 𑀧𑀭𑀺𑀧𑀽𑀭𑁂𑀦𑁆𑀢𑀺.

‘‘𑀏𑀯𑀫𑁂𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀬𑀲𑁆𑀫𑀺𑀁 𑀲𑀫𑀬𑁂 𑀪𑀺𑀓𑁆𑀔𑀽 𑀲𑀫𑀕𑁆𑀕𑀸 𑀲𑀫𑁆𑀫𑁄𑀤𑀫𑀸𑀦𑀸 𑀅𑀯𑀺𑀯𑀤𑀫𑀸𑀦𑀸 𑀔𑀻𑀭𑁄𑀤𑀓𑀻𑀪𑀽𑀢𑀸 𑀅𑀜𑁆𑀜𑀫𑀜𑁆𑀜𑀁 𑀧𑀺𑀬𑀘𑀓𑁆𑀔𑀽𑀳𑀺 𑀲𑀫𑁆𑀧𑀲𑁆𑀲𑀦𑁆𑀢𑀸 𑀯𑀺𑀳𑀭𑀦𑁆𑀢𑀺, 𑀩𑀳𑀼𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀢𑀲𑁆𑀫𑀺𑀁 𑀲𑀫𑀬𑁂 𑀧𑀼𑀜𑁆𑀜𑀁 𑀧𑀲𑀯𑀦𑁆𑀢𑀺. 𑀩𑁆𑀭𑀳𑁆𑀫𑀁, 𑀪𑀺𑀓𑁆𑀔𑀯𑁂, 𑀯𑀺𑀳𑀸𑀭𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀪𑀺𑀓𑁆𑀔𑀽 𑀯𑀺𑀳𑀭𑀦𑁆𑀢𑀺, 𑀬𑀤𑀺𑀤𑀁 𑀫𑀼𑀤𑀺𑀢𑀸𑀬 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀬𑀸. 𑀧𑀫𑀼𑀤𑀺𑀢𑀲𑁆𑀲 𑀧𑀻𑀢𑀺 𑀚𑀸𑀬𑀢𑀺, 𑀧𑀻𑀢𑀺𑀫𑀦𑀲𑁆𑀲 𑀓𑀸𑀬𑁄 𑀧𑀲𑁆𑀲𑀫𑁆𑀪𑀢𑀺, 𑀧𑀲𑁆𑀲𑀤𑁆𑀥𑀓𑀸𑀬𑁄 𑀲𑀼𑀔𑀁 𑀯𑁂𑀤𑀺𑀬𑀢𑀺, 𑀲𑀼𑀔𑀺𑀦𑁄 𑀘𑀺𑀢𑁆𑀢𑀁 𑀲𑀫𑀸𑀥𑀺𑀬𑀢𑀺. 𑀇𑀫𑀸 𑀔𑁄, 𑀪𑀺𑀓𑁆𑀔𑀯𑁂, 𑀢𑀺𑀲𑁆𑀲𑁄 𑀧𑀭𑀺𑀲𑀸’’𑀢𑀺. 𑀘𑀢𑀼𑀢𑁆𑀣𑀁.

𑁫. 𑀧𑀞𑀫𑀆𑀚𑀸𑀦𑀻𑀬𑀲𑀼𑀢𑁆𑀢𑀁

𑁯𑁭. ‘‘𑀢𑀻𑀳𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀭𑀜𑁆𑀜𑁄 𑀪𑀤𑁆𑀭𑁄 [𑀪𑀤𑁆𑀤𑁄 (𑀓.)] 𑀅𑀲𑁆𑀲𑀸𑀚𑀸𑀦𑀻𑀬𑁄 𑀭𑀸𑀚𑀸𑀭𑀳𑁄 𑀳𑁄𑀢𑀺 𑀭𑀸𑀚𑀪𑁄𑀕𑁆𑀕𑁄, 𑀭𑀜𑁆𑀜𑁄 𑀅𑀗𑁆𑀕𑀦𑁆𑀢𑁂𑀯 𑀲𑀗𑁆𑀔𑁆𑀬𑀁 [𑀲𑀗𑁆𑀔𑀁 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀕𑀘𑁆𑀙𑀢𑀺. 𑀓𑀢𑀫𑁂𑀳𑀺 𑀢𑀻𑀳𑀺? 𑀇𑀥, 𑀪𑀺𑀓𑁆𑀔𑀯𑁂, 𑀭𑀜𑁆𑀜𑁄 𑀪𑀤𑁆𑀭𑁄 𑀅𑀲𑁆𑀲𑀸𑀚𑀸𑀦𑀻𑀬𑁄 𑀯𑀡𑁆𑀡𑀲𑀫𑁆𑀧𑀦𑁆𑀦𑁄 𑀘 𑀳𑁄𑀢𑀺 𑀩𑀮𑀲𑀫𑁆𑀧𑀦𑁆𑀦𑁄 𑀘 𑀚𑀯𑀲𑀫𑁆𑀧𑀦𑁆𑀦𑁄 𑀘. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀻𑀳𑀺 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀭𑀜𑁆𑀜𑁄 𑀪𑀤𑁆𑀭𑁄 𑀅𑀲𑁆𑀲𑀸𑀚𑀸𑀦𑀻𑀬𑁄 𑀭𑀸𑀚𑀸𑀭𑀳𑁄 𑀳𑁄𑀢𑀺 𑀭𑀸𑀚𑀪𑁄𑀕𑁆𑀕𑁄, 𑀭𑀜𑁆𑀜𑁄 𑀅𑀗𑁆𑀕𑀦𑁆𑀢𑁂𑀯 𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀺. 𑀏𑀯𑀫𑁂𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀢𑀻𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀆𑀳𑀼𑀦𑁂𑀬𑁆𑀬𑁄 𑀳𑁄𑀢𑀺 𑀧𑀸𑀳𑀼𑀦𑁂𑀬𑁆𑀬𑁄 𑀤𑀓𑁆𑀔𑀺𑀡𑁂𑀬𑁆𑀬𑁄 𑀅𑀜𑁆𑀚𑀮𑀺𑀓𑀭𑀡𑀻𑀬𑁄 𑀅𑀦𑀼𑀢𑁆𑀢𑀭𑀁 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀁 𑀮𑁄𑀓𑀲𑁆𑀲. 𑀓𑀢𑀫𑁂𑀳𑀺 𑀢𑀻𑀳𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀯𑀡𑁆𑀡𑀲𑀫𑁆𑀧𑀦𑁆𑀦𑁄 𑀘 𑀳𑁄𑀢𑀺 𑀩𑀮𑀲𑀫𑁆𑀧𑀦𑁆𑀦𑁄 𑀘 𑀚𑀯𑀲𑀫𑁆𑀧𑀦𑁆𑀦𑁄 𑀘.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀯𑀡𑁆𑀡𑀲𑀫𑁆𑀧𑀦𑁆𑀦𑁄 𑀳𑁄𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀻𑀮𑀯𑀸 𑀳𑁄𑀢𑀺, 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀁𑀯𑀼𑀢𑁄 𑀯𑀺𑀳𑀭𑀢𑀺 𑀆𑀘𑀸𑀭𑀕𑁄𑀘𑀭𑀲𑀫𑁆𑀧𑀦𑁆𑀦𑁄 𑀅𑀡𑀼𑀫𑀢𑁆𑀢𑁂𑀲𑀼 𑀯𑀚𑁆𑀚𑁂𑀲𑀼 𑀪𑀬𑀤𑀲𑁆𑀲𑀸𑀯𑀻, 𑀲𑀫𑀸𑀤𑀸𑀬 𑀲𑀺𑀓𑁆𑀔𑀢𑀺 𑀲𑀺𑀓𑁆𑀔𑀸𑀧𑀤𑁂𑀲𑀼. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀯𑀡𑁆𑀡𑀲𑀫𑁆𑀧𑀦𑁆𑀦𑁄 𑀳𑁄𑀢𑀺.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀩𑀮𑀲𑀫𑁆𑀧𑀦𑁆𑀦𑁄 𑀳𑁄𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀆𑀭𑀤𑁆𑀥𑀯𑀻𑀭𑀺𑀬𑁄 𑀯𑀺𑀳𑀭𑀢𑀺 𑀅𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀧𑀳𑀸𑀦𑀸𑀬 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀉𑀧𑀲𑀫𑁆𑀧𑀤𑀸𑀬 𑀣𑀸𑀫𑀯𑀸 𑀤𑀴𑁆𑀳𑀧𑀭𑀓𑁆𑀓𑀫𑁄 𑀅𑀦𑀺𑀓𑁆𑀔𑀺𑀢𑁆𑀢𑀥𑀼𑀭𑁄 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀩𑀮𑀲𑀫𑁆𑀧𑀦𑁆𑀦𑁄 𑀳𑁄𑀢𑀺.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀚𑀯𑀲𑀫𑁆𑀧𑀦𑁆𑀦𑁄 𑀳𑁄𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 ‘𑀇𑀤𑀁 𑀤𑀼𑀓𑁆𑀔’𑀦𑁆𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺; ‘𑀅𑀬𑀁 𑀤𑀼𑀓𑁆𑀔𑀲𑀫𑀼𑀤𑀬𑁄’𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺; ‘𑀅𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑁄’𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺; ‘𑀅𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸’𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀚𑀯𑀲𑀫𑁆𑀧𑀦𑁆𑀦𑁄 𑀳𑁄𑀢𑀺. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀻𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀆𑀳𑀼𑀦𑁂𑀬𑁆𑀬𑁄 𑀳𑁄𑀢𑀺 𑀧𑀸𑀳𑀼𑀦𑁂𑀬𑁆𑀬𑁄 𑀤𑀓𑁆𑀔𑀺𑀡𑁂𑀬𑁆𑀬𑁄 𑀅𑀜𑁆𑀚𑀮𑀺𑀓𑀭𑀡𑀻𑀬𑁄 𑀅𑀦𑀼𑀢𑁆𑀢𑀭𑀁 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀁 𑀮𑁄𑀓𑀲𑁆𑀲𑀸’’𑀢𑀺. 𑀧𑀜𑁆𑀘𑀫𑀁.

𑁬. 𑀤𑀼𑀢𑀺𑀬𑀆𑀚𑀸𑀦𑀻𑀬𑀲𑀼𑀢𑁆𑀢𑀁

𑁯𑁮. ‘‘𑀢𑀻𑀳𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀭𑀜𑁆𑀜𑁄 𑀪𑀤𑁆𑀭𑁄 𑀅𑀲𑁆𑀲𑀸𑀚𑀸𑀦𑀻𑀬𑁄 𑀭𑀸𑀚𑀸𑀭𑀳𑁄 𑀳𑁄𑀢𑀺 𑀭𑀸𑀚𑀪𑁄𑀕𑁆𑀕𑁄, 𑀭𑀜𑁆𑀜𑁄 𑀅𑀗𑁆𑀕𑀦𑁆𑀢𑁂𑀯 𑀲𑀗𑁆𑀔𑀬𑀁 𑀕𑀘𑁆𑀙𑀢𑀺. 𑀓𑀢𑀫𑁂𑀳𑀺 𑀢𑀻𑀳𑀺? 𑀇𑀥, 𑀪𑀺𑀓𑁆𑀔𑀯𑁂, 𑀭𑀜𑁆𑀜𑁄 𑀪𑀤𑁆𑀭𑁄 𑀅𑀲𑁆𑀲𑀸𑀚𑀸𑀦𑀻𑀬𑁄 𑀯𑀡𑁆𑀡𑀲𑀫𑁆𑀧𑀦𑁆𑀦𑁄 𑀘 𑀳𑁄𑀢𑀺 𑀩𑀮𑀲𑀫𑁆𑀧𑀦𑁆𑀦𑁄 𑀘 𑀚𑀯𑀲𑀫𑁆𑀧𑀦𑁆𑀦𑁄 𑀘. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀻𑀳𑀺 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀭𑀜𑁆𑀜𑁄 𑀪𑀤𑁆𑀭𑁄 𑀅𑀲𑁆𑀲𑀸𑀚𑀸𑀦𑀻𑀬𑁄 𑀭𑀸𑀚𑀸𑀭𑀳𑁄 𑀳𑁄𑀢𑀺 𑀭𑀸𑀚𑀪𑁄𑀕𑁆𑀕𑁄, 𑀭𑀜𑁆𑀜𑁄 𑀅𑀗𑁆𑀕𑀦𑁆𑀢𑁂𑀯 𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀺. 𑀏𑀯𑀫𑁂𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀢𑀻𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀆𑀳𑀼𑀦𑁂𑀬𑁆𑀬𑁄 𑀳𑁄𑀢𑀺…𑀧𑁂… 𑀅𑀦𑀼𑀢𑁆𑀢𑀭𑀁 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀁 𑀮𑁄𑀓𑀲𑁆𑀲. 𑀓𑀢𑀫𑁂𑀳𑀺 𑀢𑀻𑀳𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀯𑀡𑁆𑀡𑀲𑀫𑁆𑀧𑀦𑁆𑀦𑁄 𑀘 𑀳𑁄𑀢𑀺 𑀩𑀮𑀲𑀫𑁆𑀧𑀦𑁆𑀦𑁄 𑀘 𑀚𑀯𑀲𑀫𑁆𑀧𑀦𑁆𑀦𑁄 𑀘.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀯𑀡𑁆𑀡𑀲𑀫𑁆𑀧𑀦𑁆𑀦𑁄 𑀳𑁄𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀻𑀮𑀯𑀸 𑀳𑁄𑀢𑀺…𑀧𑁂… 𑀲𑀫𑀸𑀤𑀸𑀬 𑀲𑀺𑀓𑁆𑀔𑀢𑀺 𑀲𑀺𑀓𑁆𑀔𑀸𑀧𑀤𑁂𑀲𑀼. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀯𑀡𑁆𑀡𑀲𑀫𑁆𑀧𑀦𑁆𑀦𑁄 𑀳𑁄𑀢𑀺.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀚𑀯𑀲𑀫𑁆𑀧𑀦𑁆𑀦𑁄 𑀳𑁄𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀧𑀜𑁆𑀘𑀦𑁆𑀦𑀁 𑀑𑀭𑀫𑁆𑀪𑀸𑀕𑀺𑀬𑀸𑀦𑀁 𑀲𑀁𑀬𑁄𑀚𑀦𑀸𑀦𑀁 𑀧𑀭𑀺𑀓𑁆𑀔𑀬𑀸 𑀑𑀧𑀧𑀸𑀢𑀺𑀓𑁄 𑀳𑁄𑀢𑀺 𑀢𑀢𑁆𑀣 𑀧𑀭𑀺𑀦𑀺𑀩𑁆𑀩𑀸𑀬𑀻 𑀅𑀦𑀸𑀯𑀢𑁆𑀢𑀺𑀥𑀫𑁆𑀫𑁄 𑀢𑀲𑁆𑀫𑀸 𑀮𑁄𑀓𑀸. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀚𑀯𑀲𑀫𑁆𑀧𑀦𑁆𑀦𑁄 𑀳𑁄𑀢𑀺. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀻𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀆𑀳𑀼𑀦𑁂𑀬𑁆𑀬𑁄 𑀳𑁄𑀢𑀺…𑀧𑁂… 𑀅𑀦𑀼𑀢𑁆𑀢𑀭𑀁 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀁 𑀮𑁄𑀓𑀲𑁆𑀲𑀸’’𑀢𑀺. 𑀙𑀝𑁆𑀞𑀁.

𑁭. 𑀢𑀢𑀺𑀬𑀆𑀚𑀸𑀦𑀻𑀬𑀲𑀼𑀢𑁆𑀢𑀁

𑁯𑁯. ‘‘𑀢𑀻𑀳𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀭𑀜𑁆𑀜𑁄 𑀪𑀤𑁆𑀭𑁄 𑀅𑀲𑁆𑀲𑀸𑀚𑀸𑀦𑀻𑀬𑁄 𑀭𑀸𑀚𑀸𑀭𑀳𑁄 𑀳𑁄𑀢𑀺 𑀭𑀸𑀚𑀪𑁄𑀕𑁆𑀕𑁄, 𑀭𑀜𑁆𑀜𑁄 𑀅𑀗𑁆𑀕𑀦𑁆𑀢𑁂𑀯 𑀲𑀗𑁆𑀔𑀬𑀁 𑀕𑀘𑁆𑀙𑀢𑀺. 𑀓𑀢𑀫𑁂𑀳𑀺 𑀢𑀻𑀳𑀺? 𑀇𑀥, 𑀪𑀺𑀓𑁆𑀔𑀯𑁂, 𑀭𑀜𑁆𑀜𑁄 𑀪𑀤𑁆𑀭𑁄 𑀅𑀲𑁆𑀲𑀸𑀚𑀸𑀦𑀻𑀬𑁄 𑀯𑀡𑁆𑀡𑀲𑀫𑁆𑀧𑀦𑁆𑀦𑁄 𑀘 𑀳𑁄𑀢𑀺 𑀩𑀮𑀲𑀫𑁆𑀧𑀦𑁆𑀦𑁄 𑀘 𑀚𑀯𑀲𑀫𑁆𑀧𑀦𑁆𑀦𑁄 𑀘. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀻𑀳𑀺 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀭𑀜𑁆𑀜𑁄 𑀪𑀤𑁆𑀭𑁄 𑀅𑀲𑁆𑀲𑀸𑀚𑀸𑀦𑀻𑀬𑁄 𑀭𑀸𑀚𑀸𑀭𑀳𑁄 𑀳𑁄𑀢𑀺 𑀭𑀸𑀚𑀪𑁄𑀕𑁆𑀕𑁄, 𑀭𑀜𑁆𑀜𑁄 𑀅𑀗𑁆𑀕𑀦𑁆𑀢𑁂𑀯 𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀺. 𑀏𑀯𑀫𑁂𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀢𑀻𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀆𑀳𑀼𑀦𑁂𑀬𑁆𑀬𑁄 𑀳𑁄𑀢𑀺 𑀧𑀸𑀳𑀼𑀦𑁂𑀬𑁆𑀬𑁄 𑀤𑀓𑁆𑀔𑀺𑀡𑁂𑀬𑁆𑀬𑁄 𑀅𑀜𑁆𑀚𑀮𑀺𑀓𑀭𑀡𑀻𑀬𑁄 𑀅𑀦𑀼𑀢𑁆𑀢𑀭𑀁 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀁 𑀮𑁄𑀓𑀲𑁆𑀲. 𑀓𑀢𑀫𑁂𑀳𑀺 𑀢𑀻𑀳𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀯𑀡𑁆𑀡𑀲𑀫𑁆𑀧𑀦𑁆𑀦𑁄 𑀘 𑀳𑁄𑀢𑀺 𑀩𑀮𑀲𑀫𑁆𑀧𑀦𑁆𑀦𑁄 𑀘 𑀚𑀯𑀲𑀫𑁆𑀧𑀦𑁆𑀦𑁄 𑀘.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀚𑀯𑀲𑀫𑁆𑀧𑀦𑁆𑀦𑁄 𑀳𑁄𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀆𑀲𑀯𑀸𑀦𑀁 𑀔𑀬𑀸 𑀅𑀦𑀸𑀲𑀯𑀁 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀁 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀚𑀯𑀲𑀫𑁆𑀧𑀦𑁆𑀦𑁄 𑀳𑁄𑀢𑀺. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀻𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀆𑀳𑀼𑀦𑁂𑀬𑁆𑀬𑁄 𑀳𑁄𑀢𑀺…𑀧𑁂… 𑀅𑀦𑀼𑀢𑁆𑀢𑀭𑀁 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀁 𑀮𑁄𑀓𑀲𑁆𑀲𑀸’’𑀢𑀺. 𑀲𑀢𑁆𑀢𑀫𑀁.

𑁮. 𑀧𑁄𑀢𑁆𑀣𑀓𑀲𑀼𑀢𑁆𑀢𑀁

𑁧𑁦𑁦. ‘‘𑀦𑀯𑁄𑀧𑀺, 𑀪𑀺𑀓𑁆𑀔𑀯𑁂, 𑀧𑁄𑀢𑁆𑀣𑀓𑁄 𑀤𑀼𑀩𑁆𑀩𑀡𑁆𑀡𑁄 𑀘 𑀳𑁄𑀢𑀺 𑀤𑀼𑀓𑁆𑀔𑀲𑀫𑁆𑀨𑀲𑁆𑀲𑁄 𑀘 𑀅𑀧𑁆𑀧𑀕𑁆𑀖𑁄 𑀘; 𑀫𑀚𑁆𑀛𑀺𑀫𑁄𑀧𑀺, 𑀪𑀺𑀓𑁆𑀔𑀯𑁂, 𑀧𑁄𑀢𑁆𑀣𑀓𑁄 𑀤𑀼𑀩𑁆𑀩𑀡𑁆𑀡𑁄 𑀘 𑀳𑁄𑀢𑀺 𑀤𑀼𑀓𑁆𑀔𑀲𑀫𑁆𑀨𑀲𑁆𑀲𑁄 𑀘 𑀅𑀧𑁆𑀧𑀕𑁆𑀖𑁄 𑀘; 𑀚𑀺𑀡𑁆𑀡𑁄𑀧𑀺, 𑀪𑀺𑀓𑁆𑀔𑀯𑁂, 𑀧𑁄𑀢𑁆𑀣𑀓𑁄 𑀤𑀼𑀩𑁆𑀩𑀡𑁆𑀡𑁄 𑀘 𑀳𑁄𑀢𑀺 𑀤𑀼𑀓𑁆𑀔𑀲𑀫𑁆𑀨𑀲𑁆𑀲𑁄 𑀘 𑀅𑀧𑁆𑀧𑀕𑁆𑀖𑁄 𑀘. 𑀚𑀺𑀡𑁆𑀡𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀧𑁄𑀢𑁆𑀣𑀓𑀁 𑀉𑀓𑁆𑀔𑀮𑀺𑀧𑀭𑀺𑀫𑀚𑁆𑀚𑀦𑀁 𑀯𑀸 𑀓𑀭𑁄𑀦𑁆𑀢𑀺 𑀲𑀗𑁆𑀓𑀸𑀭𑀓𑀽𑀝𑁂 𑀯𑀸 𑀦𑀁 [𑀢𑀁 (𑀲𑀻.), 𑀞𑀸𑀦𑁂 (𑀓.)] 𑀙𑀟𑁆𑀟𑁂𑀦𑁆𑀢𑀺.

‘‘𑀏𑀯𑀫𑁂𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀦𑀯𑁄 𑀘𑁂𑀧𑀺 𑀪𑀺𑀓𑁆𑀔𑀼 𑀳𑁄𑀢𑀺 𑀤𑀼𑀲𑁆𑀲𑀻𑀮𑁄 𑀧𑀸𑀧𑀥𑀫𑁆𑀫𑁄. 𑀇𑀤𑀫𑀲𑁆𑀲 𑀤𑀼𑀩𑁆𑀩𑀡𑁆𑀡𑀢𑀸𑀬 𑀯𑀤𑀸𑀫𑀺. 𑀲𑁂𑀬𑁆𑀬𑀣𑀸𑀧𑀺 𑀲𑁄, 𑀪𑀺𑀓𑁆𑀔𑀯𑁂, 𑀧𑁄𑀢𑁆𑀣𑀓𑁄 𑀤𑀼𑀩𑁆𑀩𑀡𑁆𑀡𑁄 𑀢𑀣𑀽𑀧𑀫𑀸𑀳𑀁, 𑀪𑀺𑀓𑁆𑀔𑀯𑁂, 𑀇𑀫𑀁 𑀧𑀼𑀕𑁆𑀕𑀮𑀁 𑀯𑀤𑀸𑀫𑀺. 𑀬𑁂 𑀔𑁄 𑀧𑀦𑀲𑁆𑀲 𑀲𑁂𑀯𑀦𑁆𑀢𑀺 𑀪𑀚𑀦𑁆𑀢𑀺 𑀧𑀬𑀺𑀭𑀼𑀧𑀸𑀲𑀦𑁆𑀢𑀺 𑀤𑀺𑀝𑁆𑀞𑀸𑀦𑀼𑀕𑀢𑀺𑀁 𑀆𑀧𑀚𑁆𑀚𑀦𑁆𑀢𑀺, 𑀢𑁂𑀲𑀁 𑀢𑀁 𑀳𑁄𑀢𑀺 𑀤𑀻𑀖𑀭𑀢𑁆𑀢𑀁 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬. 𑀇𑀤𑀫𑀲𑁆𑀲 𑀤𑀼𑀓𑁆𑀔𑀲𑀫𑁆𑀨𑀲𑁆𑀲𑀢𑀸𑀬 𑀯𑀤𑀸𑀫𑀺. 𑀲𑁂𑀬𑁆𑀬𑀣𑀸𑀧𑀺 𑀲𑁄, 𑀪𑀺𑀓𑁆𑀔𑀯𑁂, 𑀧𑁄𑀢𑁆𑀣𑀓𑁄 𑀤𑀼𑀓𑁆𑀔𑀲𑀫𑁆𑀨𑀲𑁆𑀲𑁄 𑀢𑀣𑀽𑀧𑀫𑀸𑀳𑀁, 𑀪𑀺𑀓𑁆𑀔𑀯𑁂, 𑀇𑀫𑀁 𑀧𑀼𑀕𑁆𑀕𑀮𑀁 𑀯𑀤𑀸𑀫𑀺. 𑀬𑁂𑀲𑀁 𑀔𑁄 𑀧𑀦 𑀲𑁄 [𑀬𑁂𑀲𑀁 𑀔𑁄 𑀧𑀦 (𑀲𑀻. 𑀲𑁆𑀬𑀸. 𑀓𑀁. 𑀧𑀻.), 𑀬𑁂𑀲𑀁 𑀲𑁄 (𑀓.) 𑀧𑀼. 𑀧. 𑁧𑁧𑁬 𑀧𑀲𑁆𑀲𑀺𑀢𑀩𑁆𑀩𑀁] 𑀧𑀝𑀺𑀕𑁆𑀕𑀡𑁆𑀳𑀸𑀢𑀺 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑁆𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀁, 𑀢𑁂𑀲𑀁 𑀢𑀁 𑀦 𑀫𑀳𑀧𑁆𑀨𑀮𑀁 𑀳𑁄𑀢𑀺 𑀦 𑀫𑀳𑀸𑀦𑀺𑀲𑀁𑀲𑀁. 𑀇𑀤𑀫𑀲𑁆𑀲 𑀅𑀧𑁆𑀧𑀕𑁆𑀖𑀢𑀸𑀬 𑀯𑀤𑀸𑀫𑀺. 𑀲𑁂𑀬𑁆𑀬𑀣𑀸𑀧𑀺 𑀲𑁄, 𑀪𑀺𑀓𑁆𑀔𑀯𑁂, 𑀧𑁄𑀢𑁆𑀣𑀓𑁄 𑀅𑀧𑁆𑀧𑀕𑁆𑀖𑁄 𑀢𑀣𑀽𑀧𑀫𑀸𑀳𑀁, 𑀪𑀺𑀓𑁆𑀔𑀯𑁂, 𑀇𑀫𑀁 𑀧𑀼𑀕𑁆𑀕𑀮𑀁 𑀯𑀤𑀸𑀫𑀺. 𑀫𑀚𑁆𑀛𑀺𑀫𑁄 𑀘𑁂𑀧𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀳𑁄𑀢𑀺…𑀧𑁂… 𑀣𑁂𑀭𑁄 𑀘𑁂𑀧𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀳𑁄𑀢𑀺 𑀤𑀼𑀲𑁆𑀲𑀻𑀮𑁄 𑀧𑀸𑀧𑀥𑀫𑁆𑀫𑁄, 𑀇𑀤𑀫𑀲𑁆𑀲 𑀤𑀼𑀩𑁆𑀩𑀡𑁆𑀡𑀢𑀸𑀬 𑀯𑀤𑀸𑀫𑀺. 𑀲𑁂𑀬𑁆𑀬𑀣𑀸𑀧𑀺 𑀲𑁄, 𑀪𑀺𑀓𑁆𑀔𑀯𑁂, 𑀧𑁄𑀢𑁆𑀣𑀓𑁄 𑀤𑀼𑀩𑁆𑀩𑀡𑁆𑀡𑁄 𑀢𑀣𑀽𑀧𑀫𑀸𑀳𑀁, 𑀪𑀺𑀓𑁆𑀔𑀯𑁂, 𑀇𑀫𑀁 𑀧𑀼𑀕𑁆𑀕𑀮𑀁 𑀯𑀤𑀸𑀫𑀺. 𑀬𑁂 𑀔𑁄 𑀧𑀦𑀲𑁆𑀲 𑀲𑁂𑀯𑀦𑁆𑀢𑀺 𑀪𑀚𑀦𑁆𑀢𑀺 𑀧𑀬𑀺𑀭𑀼𑀧𑀸𑀲𑀦𑁆𑀢𑀺 𑀤𑀺𑀝𑁆𑀞𑀸𑀦𑀼𑀕𑀢𑀺𑀁 𑀆𑀧𑀚𑁆𑀚𑀦𑁆𑀢𑀺, 𑀢𑁂𑀲𑀁 𑀢𑀁 𑀳𑁄𑀢𑀺 𑀤𑀻𑀖𑀭𑀢𑁆𑀢𑀁 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬. 𑀇𑀤𑀫𑀲𑁆𑀲 𑀤𑀼𑀓𑁆𑀔𑀲𑀫𑁆𑀨𑀲𑁆𑀲𑀢𑀸𑀬 𑀯𑀤𑀸𑀫𑀺. 𑀲𑁂𑀬𑁆𑀬𑀣𑀸𑀧𑀺 𑀲𑁄, 𑀪𑀺𑀓𑁆𑀔𑀯𑁂, 𑀧𑁄𑀢𑁆𑀣𑀓𑁄 𑀤𑀼𑀓𑁆𑀔𑀲𑀫𑁆𑀨𑀲𑁆𑀲𑁄 𑀢𑀣𑀽𑀧𑀫𑀸𑀳𑀁, 𑀪𑀺𑀓𑁆𑀔𑀯𑁂, 𑀇𑀫𑀁 𑀧𑀼𑀕𑁆𑀕𑀮𑀁 𑀯𑀤𑀸𑀫𑀺. 𑀬𑁂𑀲𑀁 𑀔𑁄 𑀧𑀦 𑀲𑁄 𑀧𑀝𑀺𑀕𑁆𑀕𑀡𑁆𑀳𑀸𑀢𑀺 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑁆𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀁, 𑀢𑁂𑀲𑀁 𑀢𑀁 𑀦 𑀫𑀳𑀧𑁆𑀨𑀮𑀁 𑀳𑁄𑀢𑀺 𑀦 𑀫𑀳𑀸𑀦𑀺𑀲𑀁𑀲𑀁. 𑀇𑀤𑀫𑀲𑁆𑀲 𑀅𑀧𑁆𑀧𑀕𑁆𑀖𑀢𑀸𑀬 𑀯𑀤𑀸𑀫𑀺. 𑀲𑁂𑀬𑁆𑀬𑀣𑀸𑀧𑀺 𑀲𑁄, 𑀪𑀺𑀓𑁆𑀔𑀯𑁂, 𑀧𑁄𑀢𑁆𑀣𑀓𑁄 𑀅𑀧𑁆𑀧𑀕𑁆𑀖𑁄 𑀢𑀣𑀽𑀧𑀫𑀸𑀳𑀁, 𑀪𑀺𑀓𑁆𑀔𑀯𑁂, 𑀇𑀫𑀁 𑀧𑀼𑀕𑁆𑀕𑀮𑀁 𑀯𑀤𑀸𑀫𑀺.

‘‘𑀏𑀯𑀭𑀽𑀧𑁄 𑀘𑀸𑀬𑀁, 𑀪𑀺𑀓𑁆𑀔𑀯𑁂, 𑀣𑁂𑀭𑁄 𑀪𑀺𑀓𑁆𑀔𑀼 𑀲𑀗𑁆𑀖𑀫𑀚𑁆𑀛𑁂 𑀪𑀡𑀢𑀺. 𑀢𑀫𑁂𑀦𑀁 𑀪𑀺𑀓𑁆𑀔𑀽 𑀏𑀯𑀫𑀸𑀳𑀁𑀲𑀼 𑁋 ‘𑀓𑀺𑀁 𑀦𑀼 𑀔𑁄 𑀢𑀼𑀬𑁆𑀳𑀁 𑀩𑀸𑀮𑀲𑁆𑀲 𑀅𑀩𑁆𑀬𑀢𑁆𑀢𑀲𑁆𑀲 𑀪𑀡𑀺𑀢𑁂𑀦, 𑀢𑁆𑀯𑀫𑁆𑀧𑀺 𑀦𑀸𑀫 𑀪𑀡𑀺𑀢𑀩𑁆𑀩𑀁 𑀫𑀜𑁆𑀜𑀲𑀻’𑀢𑀺! 𑀲𑁄 𑀓𑀼𑀧𑀺𑀢𑁄 𑀅𑀦𑀢𑁆𑀢𑀫𑀦𑁄 𑀢𑀣𑀸𑀭𑀽𑀧𑀺𑀁 𑀯𑀸𑀘𑀁 𑀦𑀺𑀘𑁆𑀙𑀸𑀭𑁂𑀢𑀺 𑀬𑀣𑀸𑀭𑀽𑀧𑀸𑀬 𑀯𑀸𑀘𑀸𑀬 𑀲𑀗𑁆𑀖𑁄 𑀢𑀁 𑀉𑀓𑁆𑀔𑀺𑀧𑀢𑀺, 𑀲𑀗𑁆𑀓𑀸𑀭𑀓𑀽𑀝𑁂𑀯 𑀦𑀁 𑀧𑁄𑀢𑁆𑀣𑀓𑀁.

‘‘𑀦𑀯𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀓𑀸𑀲𑀺𑀓𑀁 𑀯𑀢𑁆𑀣𑀁 𑀯𑀡𑁆𑀡𑀯𑀦𑁆𑀢𑀜𑁆𑀘𑁂𑀯 𑀳𑁄𑀢𑀺 𑀲𑀼𑀔𑀲𑀫𑁆𑀨𑀲𑁆𑀲𑀜𑁆𑀘 𑀫𑀳𑀕𑁆𑀖𑀜𑁆𑀘; 𑀫𑀚𑁆𑀛𑀺𑀫𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀓𑀸𑀲𑀺𑀓𑀁 𑀯𑀢𑁆𑀣𑀁 𑀯𑀡𑁆𑀡𑀯𑀦𑁆𑀢𑀜𑁆𑀘𑁂𑀯 𑀳𑁄𑀢𑀺 𑀲𑀼𑀔𑀲𑀫𑁆𑀨𑀲𑁆𑀲𑀜𑁆𑀘 𑀫𑀳𑀕𑁆𑀖𑀜𑁆𑀘; 𑀚𑀺𑀡𑁆𑀡𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀓𑀸𑀲𑀺𑀓𑀁 𑀯𑀢𑁆𑀣𑀁 𑀯𑀡𑁆𑀡𑀯𑀦𑁆𑀢𑀜𑁆𑀘𑁂𑀯 𑀳𑁄𑀢𑀺 𑀲𑀼𑀔𑀲𑀫𑁆𑀨𑀲𑁆𑀲𑀜𑁆𑀘 𑀫𑀳𑀕𑁆𑀖𑀜𑁆𑀘. 𑀚𑀺𑀡𑁆𑀡𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀓𑀸𑀲𑀺𑀓𑀁 𑀯𑀢𑁆𑀣𑀁 𑀭𑀢𑀦𑀧𑀮𑀺𑀯𑁂𑀞𑀦𑀁 𑀯𑀸 𑀓𑀭𑁄𑀢𑀺 𑀕𑀦𑁆𑀥𑀓𑀭𑀡𑁆𑀟𑀓𑁂 𑀯𑀸 𑀦𑀁 𑀧𑀓𑁆𑀔𑀺𑀧𑀦𑁆𑀢𑀺.

‘‘𑀏𑀯𑀫𑁂𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀦𑀯𑁄 𑀘𑁂𑀧𑀺 𑀪𑀺𑀓𑁆𑀔𑀼 𑀳𑁄𑀢𑀺 𑀲𑀻𑀮𑀯𑀸 𑀓𑀮𑁆𑀬𑀸𑀡𑀥𑀫𑁆𑀫𑁄, 𑀇𑀤𑀫𑀲𑁆𑀲 𑀲𑀼𑀯𑀡𑁆𑀡𑀢𑀸𑀬 𑀯𑀤𑀸𑀫𑀺. 𑀲𑁂𑀬𑁆𑀬𑀣𑀸𑀧𑀺 𑀢𑀁, 𑀪𑀺𑀓𑁆𑀔𑀯𑁂, 𑀓𑀸𑀲𑀺𑀓𑀁 𑀯𑀢𑁆𑀣𑀁 𑀯𑀡𑁆𑀡𑀯𑀦𑁆𑀢𑀁 𑀢𑀣𑀽𑀧𑀫𑀸𑀳𑀁, 𑀪𑀺𑀓𑁆𑀔𑀯𑁂, 𑀇𑀫𑀁 𑀧𑀼𑀕𑁆𑀕𑀮𑀁 𑀯𑀤𑀸𑀫𑀺. 𑀬𑁂 𑀔𑁄 𑀧𑀦𑀲𑁆𑀲 𑀲𑁂𑀯𑀦𑁆𑀢𑀺 𑀪𑀚𑀦𑁆𑀢𑀺 𑀧𑀬𑀺𑀭𑀼𑀧𑀸𑀲𑀦𑁆𑀢𑀺 𑀤𑀺𑀝𑁆𑀞𑀸𑀦𑀼𑀕𑀢𑀺𑀁 𑀆𑀧𑀚𑁆𑀚𑀦𑁆𑀢𑀺, 𑀢𑁂𑀲𑀁 𑀢𑀁 𑀳𑁄𑀢𑀺 𑀤𑀻𑀖𑀭𑀢𑁆𑀢𑀁 𑀳𑀺𑀢𑀸𑀬 𑀲𑀼𑀔𑀸𑀬. 𑀇𑀤𑀫𑀲𑁆𑀲 𑀲𑀼𑀔𑀲𑀫𑁆𑀨𑀲𑁆𑀲𑀢𑀸𑀬 𑀯𑀤𑀸𑀫𑀺. 𑀲𑁂𑀬𑁆𑀬𑀣𑀸𑀧𑀺 𑀢𑀁, 𑀪𑀺𑀓𑁆𑀔𑀯𑁂, 𑀓𑀸𑀲𑀺𑀓𑀁 𑀯𑀢𑁆𑀣𑀁 𑀲𑀼𑀔𑀲𑀫𑁆𑀨𑀲𑁆𑀲𑀁 𑀢𑀣𑀽𑀧𑀫𑀸𑀳𑀁, 𑀪𑀺𑀓𑁆𑀔𑀯𑁂, 𑀇𑀫𑀁 𑀧𑀼𑀕𑁆𑀕𑀮𑀁 𑀯𑀤𑀸𑀫𑀺. 𑀬𑁂𑀲𑀁 𑀔𑁄 𑀧𑀦 𑀲𑁄 𑀧𑀝𑀺𑀕𑁆𑀕𑀡𑁆𑀳𑀸𑀢𑀺 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑁆𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀁, 𑀢𑁂𑀲𑀁 𑀢𑀁 𑀫𑀳𑀧𑁆𑀨𑀮𑀁 𑀳𑁄𑀢𑀺 𑀫𑀳𑀸𑀦𑀺𑀲𑀁𑀲𑀁. 𑀇𑀤𑀫𑀲𑁆𑀲 𑀫𑀳𑀕𑁆𑀖𑀢𑀸𑀬 𑀯𑀤𑀸𑀫𑀺. 𑀲𑁂𑀬𑁆𑀬𑀣𑀸𑀧𑀺 𑀢𑀁, 𑀪𑀺𑀓𑁆𑀔𑀯𑁂, 𑀓𑀸𑀲𑀺𑀓𑀁 𑀯𑀢𑁆𑀣𑀁 𑀫𑀳𑀕𑁆𑀖𑀁 𑀢𑀣𑀽𑀧𑀫𑀸𑀳𑀁, 𑀪𑀺𑀓𑁆𑀔𑀯𑁂, 𑀇𑀫𑀁 𑀧𑀼𑀕𑁆𑀕𑀮𑀁 𑀯𑀤𑀸𑀫𑀺. 𑀫𑀚𑁆𑀛𑀺𑀫𑁄 𑀘𑁂𑀧𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀳𑁄𑀢𑀺…𑀧𑁂… 𑀣𑁂𑀭𑁄 𑀘𑁂𑀧𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀳𑁄𑀢𑀺…𑀧𑁂… 𑀧𑀼𑀕𑁆𑀕𑀮𑀁 𑀯𑀤𑀸𑀫𑀺.

‘‘𑀏𑀯𑀭𑀽𑀧𑁄 𑀘𑀸𑀬𑀁, 𑀪𑀺𑀓𑁆𑀔𑀯𑁂, 𑀣𑁂𑀭𑁄 𑀪𑀺𑀓𑁆𑀔𑀼 𑀲𑀗𑁆𑀖𑀫𑀚𑁆𑀛𑁂 𑀪𑀡𑀢𑀺. 𑀢𑀫𑁂𑀦𑀁 𑀪𑀺𑀓𑁆𑀔𑀽 𑀏𑀯𑀫𑀸𑀳𑀁𑀲𑀼 𑁋 ‘𑀅𑀧𑁆𑀧𑀲𑀤𑁆𑀤𑀸 𑀆𑀬𑀲𑁆𑀫𑀦𑁆𑀢𑁄 𑀳𑁄𑀣, 𑀣𑁂𑀭𑁄 𑀪𑀺𑀓𑁆𑀔𑀼 𑀥𑀫𑁆𑀫𑀜𑁆𑀘 𑀯𑀺𑀦𑀬𑀜𑁆𑀘 𑀪𑀡𑀢𑀻’𑀢𑀺. 𑀢𑀲𑁆𑀫𑀸𑀢𑀺𑀳, 𑀪𑀺𑀓𑁆𑀔𑀯𑁂, 𑀏𑀯𑀁 𑀲𑀺𑀓𑁆𑀔𑀺𑀢𑀩𑁆𑀩𑀁 𑁋 ‘𑀓𑀸𑀲𑀺𑀓𑀯𑀢𑁆𑀣𑀽𑀧𑀫𑀸 𑀪𑀯𑀺𑀲𑁆𑀲𑀸𑀫, 𑀦 𑀧𑁄𑀢𑁆𑀣𑀓𑀽𑀧𑀫𑀸’𑀢𑀺 [𑀓𑀸𑀲𑀺𑀓𑀁 𑀯𑀢𑁆𑀣𑀁 𑀢𑀣𑀽𑀧𑀫𑀸𑀳𑀁 𑀪𑀯𑀺𑀲𑁆𑀲𑀸𑀫𑀺, 𑀦 𑀧𑁄𑀢𑁆𑀣𑀓𑀽𑀧𑀫𑀸𑀳𑀦𑁆𑀢𑀺 (𑀓.)]. 𑀏𑀯𑀜𑁆𑀳𑀺 𑀯𑁄, 𑀪𑀺𑀓𑁆𑀔𑀯𑁂, 𑀲𑀺𑀓𑁆𑀔𑀺𑀢𑀩𑁆𑀩’’𑀦𑁆𑀢𑀺. 𑀅𑀝𑁆𑀞𑀫𑀁.

𑁯. 𑀮𑁄𑀡𑀓𑀧𑀮𑁆𑀮𑀲𑀼𑀢𑁆𑀢𑀁

𑁧𑁦𑁧. ‘‘𑀬𑁄 [𑀬𑁄 𑀔𑁄 (𑀲𑁆𑀬𑀸. 𑀓𑀁.), 𑀬𑁄 𑀘 𑀔𑁄 (𑀓.)], 𑀪𑀺𑀓𑁆𑀔𑀯𑁂, 𑀏𑀯𑀁 𑀯𑀤𑁂𑀬𑁆𑀬 𑁋 ‘𑀬𑀣𑀸 𑀬𑀣𑀸𑀬𑀁 𑀧𑀼𑀭𑀺𑀲𑁄 𑀓𑀫𑁆𑀫𑀁 𑀓𑀭𑁄𑀢𑀺 𑀢𑀣𑀸 𑀢𑀣𑀸 𑀢𑀁 𑀧𑀝𑀺𑀲𑀁𑀯𑁂𑀤𑀺𑀬𑀢𑀻’𑀢𑀺, 𑀏𑀯𑀁 𑀲𑀦𑁆𑀢𑀁, 𑀪𑀺𑀓𑁆𑀔𑀯𑁂, 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄 𑀦 𑀳𑁄𑀢𑀺, 𑀑𑀓𑀸𑀲𑁄 𑀦 𑀧𑀜𑁆𑀜𑀸𑀬𑀢𑀺 𑀲𑀫𑁆𑀫𑀸 𑀤𑀼𑀓𑁆𑀔𑀲𑁆𑀲 𑀅𑀦𑁆𑀢𑀓𑀺𑀭𑀺𑀬𑀸𑀬. 𑀬𑁄 𑀘 𑀔𑁄, 𑀪𑀺𑀓𑁆𑀔𑀯𑁂, 𑀏𑀯𑀁 𑀯𑀤𑁂𑀬𑁆𑀬 𑁋 ‘𑀬𑀣𑀸 𑀬𑀣𑀸 𑀯𑁂𑀤𑀦𑀻𑀬𑀁 𑀅𑀬𑀁 𑀧𑀼𑀭𑀺𑀲𑁄 𑀓𑀫𑁆𑀫𑀁 𑀓𑀭𑁄𑀢𑀺 𑀢𑀣𑀸 𑀢𑀣𑀸𑀲𑁆𑀲 𑀯𑀺𑀧𑀸𑀓𑀁 𑀧𑀝𑀺𑀲𑀁𑀯𑁂𑀤𑀺𑀬𑀢𑀻’𑀢𑀺, 𑀏𑀯𑀁 𑀲𑀦𑁆𑀢𑀁, 𑀪𑀺𑀓𑁆𑀔𑀯𑁂, 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄 𑀳𑁄𑀢𑀺, 𑀑𑀓𑀸𑀲𑁄 𑀧𑀜𑁆𑀜𑀸𑀬𑀢𑀺 𑀲𑀫𑁆𑀫𑀸 𑀤𑀼𑀓𑁆𑀔𑀲𑁆𑀲 𑀅𑀦𑁆𑀢𑀓𑀺𑀭𑀺𑀬𑀸𑀬. 𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀅𑀧𑁆𑀧𑀫𑀢𑁆𑀢𑀓𑀫𑁆𑀧𑀺 𑀧𑀸𑀧𑀓𑀫𑁆𑀫𑀁 [𑀧𑀸𑀧𑀁 𑀓𑀫𑁆𑀫𑀁 (𑀲𑀻. 𑀧𑀻.)] 𑀓𑀢𑀁 𑀢𑀫𑁂𑀦𑀁 𑀦𑀺𑀭𑀬𑀁 𑀉𑀧𑀦𑁂𑀢𑀺. 𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀢𑀸𑀤𑀺𑀲𑀁𑀬𑁂𑀯 𑀅𑀧𑁆𑀧𑀫𑀢𑁆𑀢𑀓𑀁 𑀧𑀸𑀧𑀓𑀫𑁆𑀫𑀁 𑀓𑀢𑀁 𑀤𑀺𑀝𑁆𑀞𑀥𑀫𑁆𑀫𑀯𑁂𑀤𑀦𑀻𑀬𑀁 𑀳𑁄𑀢𑀺, 𑀦𑀸’𑀡𑀼𑀧𑀺 𑀔𑀸𑀬𑀢𑀺, 𑀓𑀺𑀁 𑀩𑀳𑀼𑀤𑁂𑀯.

‘‘𑀓𑀣𑀁𑀭𑀽𑀧𑀲𑁆𑀲, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑀲𑁆𑀲 𑀅𑀧𑁆𑀧𑀫𑀢𑁆𑀢𑀓𑀫𑁆𑀧𑀺 𑀧𑀸𑀧𑀓𑀫𑁆𑀫𑀁 𑀓𑀢𑀁 𑀢𑀫𑁂𑀦𑀁 𑀦𑀺𑀭𑀬𑀁 𑀉𑀧𑀦𑁂𑀢𑀺? 𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀅𑀪𑀸𑀯𑀺𑀢𑀓𑀸𑀬𑁄 𑀳𑁄𑀢𑀺 𑀅𑀪𑀸𑀯𑀺𑀢𑀲𑀻𑀮𑁄 𑀅𑀪𑀸𑀯𑀺𑀢𑀘𑀺𑀢𑁆𑀢𑁄 𑀅𑀪𑀸𑀯𑀺𑀢𑀧𑀜𑁆𑀜𑁄 𑀧𑀭𑀺𑀢𑁆𑀢𑁄 𑀅𑀧𑁆𑀧𑀸𑀢𑀼𑀫𑁄 𑀅𑀧𑁆𑀧𑀤𑀼𑀓𑁆𑀔𑀯𑀺𑀳𑀸𑀭𑀻. 𑀏𑀯𑀭𑀽𑀧𑀲𑁆𑀲, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑀲𑁆𑀲 𑀅𑀧𑁆𑀧𑀫𑀢𑁆𑀢𑀓𑀫𑁆𑀧𑀺 𑀧𑀸𑀧𑀓𑀫𑁆𑀫𑀁 𑀓𑀢𑀁 𑀢𑀫𑁂𑀦𑀁 𑀦𑀺𑀭𑀬𑀁 𑀉𑀧𑀦𑁂𑀢𑀺.

‘‘𑀓𑀣𑀁𑀭𑀽𑀧𑀲𑁆𑀲, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑀲𑁆𑀲 𑀢𑀸𑀤𑀺𑀲𑀁𑀬𑁂𑀯 𑀅𑀧𑁆𑀧𑀫𑀢𑁆𑀢𑀓𑀁 𑀧𑀸𑀧𑀓𑀫𑁆𑀫𑀁 𑀓𑀢𑀁 𑀤𑀺𑀝𑁆𑀞𑀥𑀫𑁆𑀫𑀯𑁂𑀤𑀦𑀻𑀬𑀁 𑀳𑁄𑀢𑀺, 𑀦𑀸’𑀡𑀼𑀧𑀺 𑀔𑀸𑀬𑀢𑀺, 𑀓𑀺𑀁 𑀩𑀳𑀼𑀤𑁂𑀯? 𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀪𑀸𑀯𑀺𑀢𑀓𑀸𑀬𑁄 𑀳𑁄𑀢𑀺 𑀪𑀸𑀯𑀺𑀢𑀲𑀻𑀮𑁄 𑀪𑀸𑀯𑀺𑀢𑀘𑀺𑀢𑁆𑀢𑁄 𑀪𑀸𑀯𑀺𑀢𑀧𑀜𑁆𑀜𑁄 𑀅𑀧𑀭𑀺𑀢𑁆𑀢𑁄 𑀫𑀳𑀢𑁆𑀢𑁄 [𑀫𑀳𑀢𑁆𑀢𑀸 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀅𑀧𑁆𑀧𑀫𑀸𑀡𑀯𑀺𑀳𑀸𑀭𑀻. 𑀏𑀯𑀭𑀽𑀧𑀲𑁆𑀲, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑀲𑁆𑀲 𑀢𑀸𑀤𑀺𑀲𑀁𑀬𑁂𑀯 𑀅𑀧𑁆𑀧𑀫𑀢𑁆𑀢𑀓𑀁 𑀧𑀸𑀧𑀓𑀫𑁆𑀫𑀁 𑀓𑀢𑀁 𑀤𑀺𑀝𑁆𑀞𑀥𑀫𑁆𑀫𑀯𑁂𑀤𑀦𑀻𑀬𑀁 𑀳𑁄𑀢𑀺, 𑀦𑀸𑀡𑀼𑀧𑀺 𑀔𑀸𑀬𑀢𑀺, 𑀓𑀺𑀁 𑀩𑀳𑀼𑀤𑁂𑀯.

‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀧𑀼𑀭𑀺𑀲𑁄 𑀮𑁄𑀡𑀓𑀧𑀮𑁆𑀮𑀁 [𑀮𑁄𑀡𑀨𑀮𑀁 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀧𑀭𑀺𑀢𑁆𑀢𑁂 𑀉𑀤𑀓𑀫𑀮𑁆𑀮𑀓𑁂 [𑀉𑀤𑀓𑀓𑀧𑀮𑁆𑀮𑀓𑁂 (𑀓.)] 𑀧𑀓𑁆𑀔𑀺𑀧𑁂𑀬𑁆𑀬. 𑀢𑀁 𑀓𑀺𑀁 𑀫𑀜𑁆𑀜𑀣, 𑀪𑀺𑀓𑁆𑀔𑀯𑁂, 𑀅𑀧𑀺 𑀦𑀼 𑀢𑀁 𑀧𑀭𑀺𑀢𑁆𑀢𑀁 𑀉𑀤𑀓𑀁 [𑀉𑀤𑀓𑀫𑀮𑁆𑀮𑀓𑁂 𑀉𑀤𑀓𑀁 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀅𑀫𑀼𑀦𑀸 𑀮𑁄𑀡𑀓𑀧𑀮𑁆𑀮𑁂𑀦 𑀮𑁄𑀡𑀁 𑀅𑀲𑁆𑀲 𑀅𑀧𑁂𑀬𑁆𑀬’’𑀦𑁆𑀢𑀺? ‘‘𑀏𑀯𑀁, 𑀪𑀦𑁆𑀢𑁂’’. ‘‘𑀢𑀁 𑀓𑀺𑀲𑁆𑀲 𑀳𑁂𑀢𑀼’’? ‘‘𑀅𑀤𑀼𑀜𑁆𑀳𑀺, 𑀪𑀦𑁆𑀢𑁂, 𑀧𑀭𑀺𑀢𑁆𑀢𑀁 𑀉𑀤𑀓𑀓𑀧𑀮𑁆𑀮𑀓𑁂 𑀉𑀤𑀓𑀁, 𑀢𑀁 𑀅𑀫𑀼𑀦𑀸 𑀮𑁄𑀡𑀓𑀧𑀮𑁆𑀮𑁂𑀦 𑀮𑁄𑀡𑀁 𑀅𑀲𑁆𑀲 𑀅𑀧𑁂𑀬𑁆𑀬’’𑀦𑁆𑀢𑀺. ‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀧𑀼𑀭𑀺𑀲𑁄 𑀮𑁄𑀡𑀓𑀧𑀮𑁆𑀮𑀓𑀁 𑀕𑀗𑁆𑀕𑀸𑀬 𑀦𑀤𑀺𑀬𑀸 𑀧𑀓𑁆𑀔𑀺𑀧𑁂𑀬𑁆𑀬. 𑀢𑀁 𑀓𑀺𑀁 𑀫𑀜𑁆𑀜𑀣, 𑀪𑀺𑀓𑁆𑀔𑀯𑁂, 𑀅𑀧𑀺 𑀦𑀼 𑀲𑀸 𑀕𑀗𑁆𑀕𑀸 𑀦𑀤𑀻 𑀅𑀫𑀼𑀦𑀸 𑀮𑁄𑀡𑀓𑀧𑀮𑁆𑀮𑁂𑀦 𑀮𑁄𑀡𑀁 𑀅𑀲𑁆𑀲 𑀅𑀧𑁂𑀬𑁆𑀬𑀸’’𑀢𑀺? ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’. ‘‘𑀢𑀁 𑀓𑀺𑀲𑁆𑀲 𑀳𑁂𑀢𑀼’’? ‘‘𑀅𑀲𑀼 𑀳𑀺, 𑀪𑀦𑁆𑀢𑁂, 𑀕𑀗𑁆𑀕𑀸𑀬 𑀦𑀤𑀺𑀬𑀸 𑀫𑀳𑀸 𑀉𑀤𑀓𑀓𑁆𑀔𑀦𑁆𑀥𑁄 𑀲𑁄 𑀅𑀫𑀼𑀦𑀸 𑀮𑁄𑀡𑀓𑀧𑀮𑁆𑀮𑁂𑀦 𑀮𑁄𑀡𑁄 𑀦 𑀅𑀲𑁆𑀲 𑀅𑀧𑁂𑀬𑁆𑀬𑁄’’𑀢𑀺 [𑀮𑁄𑀡𑀁 𑀦𑁂𑀯𑀲𑁆𑀲 𑀅𑀧𑁂𑀬𑁆𑀬𑀦𑁆𑀢𑀺 (𑀲𑀻.), 𑀦 𑀮𑁄𑀡𑁄 𑀅𑀲𑁆𑀲 𑀅𑀧𑁂𑀬𑁆𑀬𑁄𑀢𑀺 (𑀧𑀻.)].

‘‘𑀏𑀯𑀫𑁂𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀇𑀥𑁂𑀓𑀘𑁆𑀘𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀅𑀧𑁆𑀧𑀫𑀢𑁆𑀢𑀓𑀫𑁆𑀧𑀺 𑀧𑀸𑀧𑀓𑀫𑁆𑀫𑀁 𑀓𑀢𑀁 𑀢𑀫𑁂𑀦𑀁 𑀦𑀺𑀭𑀬𑀁 𑀉𑀧𑀦𑁂𑀢𑀺. 𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀢𑀸𑀤𑀺𑀲𑀁𑀬𑁂𑀯 𑀅𑀧𑁆𑀧𑀫𑀢𑁆𑀢𑀓𑀁 𑀧𑀸𑀧𑀓𑀫𑁆𑀫𑀁 𑀓𑀢𑀁 𑀤𑀺𑀝𑁆𑀞𑀥𑀫𑁆𑀫𑀯𑁂𑀤𑀦𑀻𑀬𑀁 𑀳𑁄𑀢𑀺, 𑀦𑀸𑀡𑀼𑀧𑀺 𑀔𑀸𑀬𑀢𑀺, 𑀓𑀺𑀁 𑀩𑀳𑀼𑀤𑁂𑀯.

‘‘𑀓𑀣𑀁𑀭𑀽𑀧𑀲𑁆𑀲, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑀲𑁆𑀲 𑀅𑀧𑁆𑀧𑀫𑀢𑁆𑀢𑀓𑀫𑁆𑀧𑀺 𑀧𑀸𑀧𑀓𑀫𑁆𑀫𑀁 𑀓𑀢𑀁 𑀢𑀫𑁂𑀦𑀁 𑀦𑀺𑀭𑀬𑀁 𑀉𑀧𑀦𑁂𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀅𑀪𑀸𑀯𑀺𑀢𑀓𑀸𑀬𑁄 𑀳𑁄𑀢𑀺 𑀅𑀪𑀸𑀯𑀺𑀢𑀲𑀻𑀮𑁄 𑀅𑀪𑀸𑀯𑀺𑀢𑀘𑀺𑀢𑁆𑀢𑁄 𑀅𑀪𑀸𑀯𑀺𑀢𑀧𑀜𑁆𑀜𑁄 𑀧𑀭𑀺𑀢𑁆𑀢𑁄 𑀅𑀧𑁆𑀧𑀸𑀢𑀼𑀫𑁄 𑀅𑀧𑁆𑀧𑀤𑀼𑀓𑁆𑀔𑀯𑀺𑀳𑀸𑀭𑀻. 𑀏𑀯𑀭𑀽𑀧𑀲𑁆𑀲, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑀲𑁆𑀲 𑀅𑀧𑁆𑀧𑀫𑀢𑁆𑀢𑀓𑀫𑁆𑀧𑀺 𑀧𑀸𑀧𑀓𑀫𑁆𑀫𑀁 𑀓𑀢𑀁 𑀢𑀫𑁂𑀦𑀁 𑀦𑀺𑀭𑀬𑀁 𑀉𑀧𑀦𑁂𑀢𑀺.

‘‘𑀓𑀣𑀁𑀭𑀽𑀧𑀲𑁆𑀲, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑀲𑁆𑀲 𑀢𑀸𑀤𑀺𑀲𑀁𑀬𑁂𑀯 𑀅𑀧𑁆𑀧𑀫𑀢𑁆𑀢𑀓𑀁 𑀧𑀸𑀧𑀓𑀫𑁆𑀫𑀁 𑀓𑀢𑀁 𑀤𑀺𑀝𑁆𑀞𑀥𑀫𑁆𑀫𑀯𑁂𑀤𑀦𑀻𑀬𑀁 𑀳𑁄𑀢𑀺, 𑀦𑀸𑀡𑀼𑀧𑀺 𑀔𑀸𑀬𑀢𑀺, 𑀓𑀺𑀁 𑀩𑀳𑀼𑀤𑁂𑀯? 𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀪𑀸𑀯𑀺𑀢𑀓𑀸𑀬𑁄 𑀳𑁄𑀢𑀺 𑀪𑀸𑀯𑀺𑀢𑀲𑀻𑀮𑁄 𑀪𑀸𑀯𑀺𑀢𑀘𑀺𑀢𑁆𑀢𑁄 𑀪𑀸𑀯𑀺𑀢𑀧𑀜𑁆𑀜𑁄 𑀅𑀧𑀭𑀺𑀢𑁆𑀢𑁄 𑀫𑀳𑀢𑁆𑀢𑁄 𑀅𑀧𑁆𑀧𑀫𑀸𑀡𑀯𑀺𑀳𑀸𑀭𑀻. 𑀏𑀯𑀭𑀽𑀧𑀲𑁆𑀲, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑀲𑁆𑀲 𑀢𑀸𑀤𑀺𑀲𑀁𑀬𑁂𑀯 𑀅𑀧𑁆𑀧𑀫𑀢𑁆𑀢𑀓𑀁 𑀧𑀸𑀧𑀓𑀫𑁆𑀫𑀁 𑀓𑀢𑀁 𑀤𑀺𑀝𑁆𑀞𑀥𑀫𑁆𑀫𑀯𑁂𑀤𑀦𑀻𑀬𑀁 𑀳𑁄𑀢𑀺, 𑀦𑀸𑀡𑀼𑀧𑀺 𑀔𑀸𑀬𑀢𑀺, 𑀓𑀺𑀁 𑀩𑀳𑀼𑀤𑁂𑀯.

‘‘𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀅𑀟𑁆𑀠𑀓𑀳𑀸𑀧𑀡𑁂𑀦𑀧𑀺 𑀩𑀦𑁆𑀥𑀦𑀁 𑀦𑀺𑀕𑀘𑁆𑀙𑀢𑀺, 𑀓𑀳𑀸𑀧𑀡𑁂𑀦𑀧𑀺 𑀩𑀦𑁆𑀥𑀦𑀁 𑀦𑀺𑀕𑀘𑁆𑀙𑀢𑀺, 𑀓𑀳𑀸𑀧𑀡𑀲𑀢𑁂𑀦𑀧𑀺 𑀩𑀦𑁆𑀥𑀦𑀁 𑀦𑀺𑀕𑀘𑁆𑀙𑀢𑀺. 𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀅𑀟𑁆𑀠𑀓𑀳𑀸𑀧𑀡𑁂𑀦𑀧𑀺 𑀦 𑀩𑀦𑁆𑀥𑀦𑀁 𑀦𑀺𑀕𑀘𑁆𑀙𑀢𑀺, 𑀓𑀳𑀸𑀧𑀡𑁂𑀦𑀧𑀺 𑀦 𑀩𑀦𑁆𑀥𑀦𑀁 𑀦𑀺𑀕𑀘𑁆𑀙𑀢𑀺, 𑀓𑀳𑀸𑀧𑀡𑀲𑀢𑁂𑀦𑀧𑀺 𑀦 𑀩𑀦𑁆𑀥𑀦𑀁 𑀦𑀺𑀕𑀘𑁆𑀙𑀢𑀺.

‘‘𑀓𑀣𑀁𑀭𑀽𑀧𑁄, 𑀪𑀺𑀓𑁆𑀔𑀯𑁂, 𑀅𑀟𑁆𑀠𑀓𑀳𑀸𑀧𑀡𑁂𑀦𑀧𑀺 𑀩𑀦𑁆𑀥𑀦𑀁 𑀦𑀺𑀕𑀘𑁆𑀙𑀢𑀺, 𑀓𑀳𑀸𑀧𑀡𑁂𑀦𑀧𑀺 𑀩𑀦𑁆𑀥𑀦𑀁 𑀦𑀺𑀕𑀘𑁆𑀙𑀢𑀺, 𑀓𑀳𑀸𑀧𑀡𑀲𑀢𑁂𑀦𑀧𑀺 𑀩𑀦𑁆𑀥𑀦𑀁 𑀦𑀺𑀕𑀘𑁆𑀙𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀤𑀮𑀺𑀤𑁆𑀤𑁄 𑀳𑁄𑀢𑀺 𑀅𑀧𑁆𑀧𑀲𑁆𑀲𑀓𑁄 𑀅𑀧𑁆𑀧𑀪𑁄𑀕𑁄. 𑀏𑀯𑀭𑀽𑀧𑁄, 𑀪𑀺𑀓𑁆𑀔𑀯𑁂, 𑀅𑀟𑁆𑀠𑀓𑀳𑀸𑀧𑀡𑁂𑀦𑀧𑀺 𑀩𑀦𑁆𑀥𑀦𑀁 𑀦𑀺𑀕𑀘𑁆𑀙𑀢𑀺, 𑀓𑀳𑀸𑀧𑀡𑁂𑀦𑀧𑀺 𑀩𑀦𑁆𑀥𑀦𑀁 𑀦𑀺𑀕𑀘𑁆𑀙𑀢𑀺, 𑀓𑀳𑀸𑀧𑀡𑀲𑀢𑁂𑀦𑀧𑀺 𑀩𑀦𑁆𑀥𑀦𑀁 𑀦𑀺𑀕𑀘𑁆𑀙𑀢𑀺.

‘‘𑀓𑀣𑀁𑀭𑀽𑀧𑁄, 𑀪𑀺𑀓𑁆𑀔𑀯𑁂, 𑀅𑀟𑁆𑀠𑀓𑀳𑀸𑀧𑀡𑁂𑀦𑀧𑀺 𑀦 𑀩𑀦𑁆𑀥𑀦𑀁 𑀦𑀺𑀕𑀘𑁆𑀙𑀢𑀺, 𑀓𑀳𑀸𑀧𑀡𑁂𑀦𑀧𑀺 𑀦 𑀩𑀦𑁆𑀥𑀦𑀁 𑀦𑀺𑀕𑀘𑁆𑀙𑀢𑀺, 𑀓𑀳𑀸𑀧𑀡𑀲𑀢𑁂𑀦𑀧𑀺 𑀦 𑀩𑀦𑁆𑀥𑀦𑀁 𑀦𑀺𑀕𑀘𑁆𑀙𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀅𑀟𑁆𑀠𑁄 𑀳𑁄𑀢𑀺 𑀫𑀳𑀤𑁆𑀥𑀦𑁄 𑀫𑀳𑀸𑀪𑁄𑀕𑁄. 𑀏𑀯𑀭𑀽𑀧𑁄, 𑀪𑀺𑀓𑁆𑀔𑀯𑁂, 𑀅𑀟𑁆𑀠𑀓𑀳𑀸𑀧𑀡𑁂𑀦𑀧𑀺 𑀦 𑀩𑀦𑁆𑀥𑀦𑀁 𑀦𑀺𑀕𑀘𑁆𑀙𑀢𑀺, 𑀓𑀳𑀸𑀧𑀡𑁂𑀦𑀧𑀺 𑀦 𑀩𑀦𑁆𑀥𑀦𑀁 𑀦𑀺𑀕𑀘𑁆𑀙𑀢𑀺, 𑀓𑀳𑀸𑀧𑀡𑀲𑀢𑁂𑀦𑀧𑀺 𑀦 𑀩𑀦𑁆𑀥𑀦𑀁 𑀦𑀺𑀕𑀘𑁆𑀙𑀢𑀺. 𑀏𑀯𑀫𑁂𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀇𑀥𑁂𑀓𑀘𑁆𑀘𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀅𑀧𑁆𑀧𑀫𑀢𑁆𑀢𑀓𑀁 𑀧𑀸𑀧𑀓𑀫𑁆𑀫𑀁 𑀓𑀢𑀁. 𑀢𑀫𑁂𑀦𑀁 𑀦𑀺𑀭𑀬𑀁 𑀉𑀧𑀦𑁂𑀢𑀺. 𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀢𑀸𑀤𑀺𑀲𑀁𑀬𑁂𑀯 𑀅𑀧𑁆𑀧𑀫𑀢𑁆𑀢𑀓𑀁 𑀧𑀸𑀧𑀓𑀫𑁆𑀫𑀁 𑀓𑀢𑀁 𑀤𑀺𑀝𑁆𑀞𑀥𑀫𑁆𑀫𑀯𑁂𑀤𑀦𑀻𑀬𑀁 𑀳𑁄𑀢𑀺, 𑀦𑀸𑀡𑀼𑀧𑀺 𑀔𑀸𑀬𑀢𑀺, 𑀓𑀺𑀁 𑀩𑀳𑀼𑀤𑁂𑀯.

‘‘𑀓𑀣𑀁𑀭𑀽𑀧𑀲𑁆𑀲, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑀲𑁆𑀲 𑀅𑀧𑁆𑀧𑀫𑀢𑁆𑀢𑀓𑀁 𑀧𑀸𑀧𑀓𑀫𑁆𑀫𑀁 𑀓𑀢𑀁, 𑀢𑀫𑁂𑀦𑀁 𑀦𑀺𑀭𑀬𑀁 𑀉𑀧𑀦𑁂𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀅𑀪𑀸𑀯𑀺𑀢𑀓𑀸𑀬𑁄 𑀳𑁄𑀢𑀺 𑀅𑀪𑀸𑀯𑀺𑀢𑀲𑀻𑀮𑁄 𑀅𑀪𑀸𑀯𑀺𑀢𑀘𑀺𑀢𑁆𑀢𑁄 𑀅𑀪𑀸𑀯𑀺𑀢𑀧𑀜𑁆𑀜𑁄 𑀧𑀭𑀺𑀢𑁆𑀢𑁄 𑀅𑀧𑁆𑀧𑀸𑀢𑀼𑀫𑁄 𑀅𑀧𑁆𑀧𑀤𑀼𑀓𑁆𑀔𑀯𑀺𑀳𑀸𑀭𑀻. 𑀏𑀯𑀭𑀽𑀧𑀲𑁆𑀲, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑀲𑁆𑀲 𑀢𑀸𑀤𑀺𑀲𑀁𑀬𑁂𑀯 𑀅𑀧𑁆𑀧𑀫𑀢𑁆𑀢𑀓𑀁 𑀧𑀸𑀧𑀓𑀫𑁆𑀫𑀁 𑀓𑀢𑀁 𑀢𑀫𑁂𑀦𑀁 𑀦𑀺𑀭𑀬𑀁 𑀉𑀧𑀦𑁂𑀢𑀺.

‘‘𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀪𑀸𑀯𑀺𑀢𑀓𑀸𑀬𑁄 𑀳𑁄𑀢𑀺 𑀪𑀸𑀯𑀺𑀢𑀲𑀻𑀮𑁄 𑀪𑀸𑀯𑀺𑀢𑀘𑀺𑀢𑁆𑀢𑁄 𑀪𑀸𑀯𑀺𑀢𑀧𑀜𑁆𑀜𑁄 𑀅𑀧𑀭𑀺𑀢𑁆𑀢𑁄 𑀫𑀳𑀢𑁆𑀢𑁄 𑀅𑀧𑁆𑀧𑀫𑀸𑀡𑀯𑀺𑀳𑀸𑀭𑀻. 𑀏𑀯𑀭𑀽𑀧𑀲𑁆𑀲, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑀲𑁆𑀲 𑀢𑀸𑀤𑀺𑀲𑀁𑀬𑁂𑀯 𑀅𑀧𑁆𑀧𑀫𑀢𑁆𑀢𑀓𑀁 𑀧𑀸𑀧𑀓𑀫𑁆𑀫𑀁 𑀓𑀢𑀁 𑀤𑀺𑀝𑁆𑀞𑀥𑀫𑁆𑀫𑀯𑁂𑀤𑀦𑀻𑀬𑀁 𑀳𑁄𑀢𑀺, 𑀦𑀸𑀡𑀼𑀧𑀺 𑀔𑀸𑀬𑀢𑀺, 𑀓𑀺𑀁 𑀩𑀳𑀼𑀤𑁂𑀯. 𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀑𑀭𑀩𑁆𑀪𑀺𑀓𑁄 𑀯𑀸 𑀉𑀭𑀩𑁆𑀪𑀖𑀸𑀢𑀓𑁄 𑀯𑀸 𑀅𑀧𑁆𑀧𑁂𑀓𑀘𑁆𑀘𑀁 𑀉𑀭𑀩𑁆𑀪𑀁 𑀅𑀤𑀺𑀦𑁆𑀦𑀁 𑀆𑀤𑀺𑀬𑀫𑀸𑀦𑀁 𑀧𑀳𑁄𑀢𑀺 𑀳𑀦𑁆𑀢𑀼𑀁 𑀯𑀸 𑀩𑀦𑁆𑀥𑀺𑀢𑀼𑀁 𑀯𑀸 𑀚𑀸𑀧𑁂𑀢𑀼𑀁 𑀯𑀸 𑀬𑀣𑀸𑀧𑀘𑁆𑀘𑀬𑀁 𑀯𑀸 𑀓𑀸𑀢𑀼𑀁, 𑀅𑀧𑁆𑀧𑁂𑀓𑀘𑁆𑀘𑀁 𑀉𑀭𑀩𑁆𑀪𑀁 𑀅𑀤𑀺𑀦𑁆𑀦𑀁 𑀆𑀤𑀺𑀬𑀫𑀸𑀦𑀁 𑀦𑀧𑁆𑀧𑀳𑁄𑀢𑀺 𑀳𑀦𑁆𑀢𑀼𑀁 𑀯𑀸 𑀩𑀦𑁆𑀥𑀺𑀢𑀼𑀁 𑀯𑀸 𑀚𑀸𑀧𑁂𑀢𑀼𑀁 𑀯𑀸 𑀬𑀣𑀸𑀧𑀘𑁆𑀘𑀬𑀁 𑀯𑀸 𑀓𑀸𑀢𑀼𑀁.

‘‘𑀓𑀣𑀁𑀭𑀽𑀧𑀁, 𑀪𑀺𑀓𑁆𑀔𑀯𑁂, 𑀑𑀭𑀩𑁆𑀪𑀺𑀓𑁄 𑀯𑀸 𑀉𑀭𑀩𑁆𑀪𑀖𑀸𑀢𑀓𑁄 𑀯𑀸 𑀉𑀭𑀩𑁆𑀪𑀁 𑀅𑀤𑀺𑀦𑁆𑀦𑀁 𑀆𑀤𑀺𑀬𑀫𑀸𑀦𑀁 𑀧𑀳𑁄𑀢𑀺 𑀳𑀦𑁆𑀢𑀼𑀁 𑀯𑀸 𑀩𑀦𑁆𑀥𑀺𑀢𑀼𑀁 𑀯𑀸 𑀚𑀸𑀧𑁂𑀢𑀼𑀁 𑀯𑀸 𑀬𑀣𑀸𑀧𑀘𑁆𑀘𑀬𑀁 𑀯𑀸 𑀓𑀸𑀢𑀼𑀁? 𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀤𑀮𑀺𑀤𑁆𑀤𑁄 𑀳𑁄𑀢𑀺 𑀅𑀧𑁆𑀧𑀲𑁆𑀲𑀓𑁄 𑀅𑀧𑁆𑀧𑀪𑁄𑀕𑁄. 𑀏𑀯𑀭𑀽𑀧𑀁, 𑀪𑀺𑀓𑁆𑀔𑀯𑁂, 𑀑𑀭𑀩𑁆𑀪𑀺𑀓𑁄 𑀯𑀸 𑀉𑀭𑀩𑁆𑀪𑀖𑀸𑀢𑀓𑁄 𑀯𑀸 𑀉𑀭𑀩𑁆𑀪𑀁 𑀅𑀤𑀺𑀦𑁆𑀦𑀁 𑀆𑀤𑀺𑀬𑀫𑀸𑀦𑀁 𑀧𑀳𑁄𑀢𑀺 𑀳𑀦𑁆𑀢𑀼𑀁 𑀯𑀸 𑀩𑀦𑁆𑀥𑀺𑀢𑀼𑀁 𑀯𑀸 𑀚𑀸𑀧𑁂𑀢𑀼𑀁 𑀯𑀸 𑀬𑀣𑀸𑀧𑀘𑁆𑀘𑀬𑀁 𑀯𑀸 𑀓𑀸𑀢𑀼𑀁.

‘‘𑀓𑀣𑀁𑀭𑀽𑀧𑀁, 𑀪𑀺𑀓𑁆𑀔𑀯𑁂, 𑀑𑀭𑀩𑁆𑀪𑀺𑀓𑁄 𑀯𑀸 𑀉𑀭𑀩𑁆𑀪𑀖𑀸𑀢𑀓𑁄 𑀯𑀸 𑀉𑀭𑀩𑁆𑀪𑀁 𑀅𑀤𑀺𑀦𑁆𑀦𑀁 𑀆𑀤𑀺𑀬𑀫𑀸𑀦𑀁 𑀦𑀧𑁆𑀧𑀳𑁄𑀢𑀺 𑀳𑀦𑁆𑀢𑀼𑀁 𑀯𑀸 𑀩𑀦𑁆𑀥𑀺𑀢𑀼𑀁 𑀯𑀸 𑀚𑀸𑀧𑁂𑀢𑀼𑀁 𑀯𑀸 𑀬𑀣𑀸𑀧𑀘𑁆𑀘𑀬𑀁 𑀯𑀸 𑀓𑀸𑀢𑀼𑀁. 𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀅𑀟𑁆𑀠𑁄 𑀳𑁄𑀢𑀺 𑀫𑀳𑀤𑁆𑀥𑀦𑁄 𑀫𑀳𑀸𑀪𑁄𑀕𑁄 𑀭𑀸𑀚𑀸 𑀯𑀸 𑀭𑀸𑀚𑀫𑀳𑀸𑀫𑀢𑁆𑀢𑁄 𑀯𑀸. 𑀏𑀯𑀭𑀽𑀧𑀁, 𑀪𑀺𑀓𑁆𑀔𑀯𑁂, 𑀑𑀭𑀩𑁆𑀪𑀺𑀓𑁄 𑀯𑀸 𑀉𑀭𑀩𑁆𑀪𑀖𑀸𑀢𑀓𑁄 𑀯𑀸 𑀉𑀭𑀩𑁆𑀪𑀁 𑀅𑀤𑀺𑀦𑁆𑀦𑀁 𑀆𑀤𑀺𑀬𑀫𑀸𑀦𑀁 𑀦𑀧𑁆𑀧𑀳𑁄𑀢𑀺 𑀳𑀦𑁆𑀢𑀼𑀁 𑀯𑀸 𑀩𑀦𑁆𑀥𑀺𑀢𑀼𑀁 𑀯𑀸 𑀚𑀸𑀧𑁂𑀢𑀼𑀁 𑀯𑀸 𑀬𑀣𑀸𑀧𑀘𑁆𑀘𑀬𑀁 𑀯𑀸 𑀓𑀸𑀢𑀼𑀁. 𑀅𑀜𑁆𑀜𑀤𑀢𑁆𑀣𑀼 𑀧𑀜𑁆𑀚𑀮𑀺𑀓𑁄𑀯 [𑀧𑀜𑁆𑀚𑀮𑀺𑀓𑁄 (𑀓.)] 𑀦𑀁 [𑀧𑀭𑀁 (𑀓.)] 𑀬𑀸𑀘𑀢𑀺 𑁋 ‘𑀤𑁂𑀳𑀺 𑀫𑁂, 𑀫𑀸𑀭𑀺𑀲, 𑀉𑀭𑀩𑁆𑀪𑀁 𑀯𑀸 𑀉𑀭𑀩𑁆𑀪𑀥𑀦𑀁 𑀯𑀸’𑀢𑀺. 𑀏𑀯𑀫𑁂𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀇𑀥𑁂𑀓𑀘𑁆𑀘𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀢𑀸𑀤𑀺𑀲𑀁𑀬𑁂𑀯 𑀅𑀧𑁆𑀧𑀫𑀢𑁆𑀢𑀓𑀫𑁆𑀧𑀺 𑀧𑀸𑀧𑀓𑀫𑁆𑀫𑀁 𑀓𑀢𑀁 𑀢𑀫𑁂𑀦𑀁 𑀦𑀺𑀭𑀬𑀁 𑀉𑀧𑀦𑁂𑀢𑀺. 𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀢𑀸𑀤𑀺𑀲𑀁𑀬𑁂𑀯 𑀅𑀧𑁆𑀧𑀫𑀢𑁆𑀢𑀓𑀁 𑀧𑀸𑀧𑀓𑀫𑁆𑀫𑀁 𑀓𑀢𑀁 𑀤𑀺𑀝𑁆𑀞𑀥𑀫𑁆𑀫𑀯𑁂𑀤𑀦𑀻𑀬𑀁 𑀳𑁄𑀢𑀺, 𑀦𑀸𑀡𑀼𑀧𑀺 𑀔𑀸𑀬𑀢𑀺, 𑀓𑀺𑀁 𑀩𑀳𑀼𑀤𑁂𑀯.

‘‘𑀬𑁄, 𑀪𑀺𑀓𑁆𑀔𑀯𑁂, 𑀏𑀯𑀁 𑀯𑀤𑁂𑀬𑁆𑀬 𑁋 ‘𑀬𑀣𑀸 𑀬𑀣𑀸𑀬𑀁 𑀧𑀼𑀭𑀺𑀲𑁄 𑀓𑀫𑁆𑀫𑀁 𑀓𑀭𑁄𑀢𑀺 𑀢𑀣𑀸 𑀢𑀣𑀸 𑀢𑀁 𑀧𑀝𑀺𑀲𑀁𑀯𑁂𑀤𑁂𑀢𑀻’𑀢𑀺, 𑀏𑀯𑀁 𑀲𑀦𑁆𑀢𑀁, 𑀪𑀺𑀓𑁆𑀔𑀯𑁂, 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄 𑀦 𑀳𑁄𑀢𑀺, 𑀑𑀓𑀸𑀲𑁄 𑀦 𑀧𑀜𑁆𑀜𑀸𑀬𑀢𑀺 𑀲𑀫𑁆𑀫𑀸 𑀤𑀼𑀓𑁆𑀔𑀲𑁆𑀲 𑀅𑀦𑁆𑀢𑀓𑀺𑀭𑀺𑀬𑀸𑀬. 𑀬𑁄 𑀘 𑀔𑁄, 𑀪𑀺𑀓𑁆𑀔𑀯𑁂, 𑀏𑀯𑀁 𑀯𑀤𑁂𑀬𑁆𑀬 𑁋 ‘𑀬𑀣𑀸 𑀬𑀣𑀸 𑀯𑁂𑀤𑀦𑀻𑀬𑀁 𑀅𑀬𑀁 𑀧𑀼𑀭𑀺𑀲𑁄 𑀓𑀫𑁆𑀫𑀁 𑀓𑀭𑁄𑀢𑀺 𑀢𑀣𑀸 𑀢𑀣𑀸 𑀢𑀲𑁆𑀲 𑀯𑀺𑀧𑀸𑀓𑀁 𑀧𑀝𑀺𑀲𑀁𑀯𑁂𑀤𑁂𑀢𑀻’𑀢𑀺, 𑀏𑀯𑀁 𑀲𑀦𑁆𑀢𑀁, 𑀪𑀺𑀓𑁆𑀔𑀯𑁂, 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄 𑀳𑁄𑀢𑀺, 𑀑𑀓𑀸𑀲𑁄 𑀧𑀜𑁆𑀜𑀸𑀬𑀢𑀺 𑀲𑀫𑁆𑀫𑀸 𑀤𑀼𑀓𑁆𑀔𑀲𑁆𑀲 𑀅𑀦𑁆𑀢𑀓𑀺𑀭𑀺𑀬𑀸𑀬𑀸’’𑀢𑀺. 𑀦𑀯𑀫𑀁.

𑁧𑁦. 𑀧𑀁𑀲𑀼𑀥𑁄𑀯𑀓𑀲𑀼𑀢𑁆𑀢𑀁

𑁧𑁦𑁨. ‘‘𑀲𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀚𑀸𑀢𑀭𑀽𑀧𑀲𑁆𑀲 𑀑𑀴𑀸𑀭𑀺𑀓𑀸 𑀉𑀧𑀓𑁆𑀓𑀺𑀮𑁂𑀲𑀸 𑀧𑀁𑀲𑀼𑀯𑀸𑀮𑀼𑀓𑀸 [𑀧𑀁𑀲𑀼𑀯𑀸𑀮𑀺𑀓𑀸 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀲𑀓𑁆𑀔𑀭𑀓𑀞𑀮𑀸. 𑀢𑀫𑁂𑀦𑀁 𑀧𑀁𑀲𑀼𑀥𑁄𑀯𑀓𑁄 𑀯𑀸 𑀧𑀁𑀲𑀼𑀥𑁄𑀯𑀓𑀦𑁆𑀢𑁂𑀯𑀸𑀲𑀻 𑀯𑀸 𑀤𑁄𑀡𑀺𑀬𑀁 𑀆𑀓𑀺𑀭𑀺𑀢𑁆𑀯𑀸 𑀥𑁄𑀯𑀢𑀺 𑀲𑀦𑁆𑀥𑁄𑀯𑀢𑀺 𑀦𑀺𑀤𑁆𑀥𑁄𑀯𑀢𑀺. 𑀢𑀲𑁆𑀫𑀺𑀁 𑀧𑀳𑀻𑀦𑁂 𑀢𑀲𑁆𑀫𑀺𑀁 𑀩𑁆𑀬𑀦𑁆𑀢𑀻𑀓𑀢𑁂 𑀲𑀦𑁆𑀢𑀺 𑀚𑀸𑀢𑀭𑀽𑀧𑀲𑁆𑀲 𑀫𑀚𑁆𑀛𑀺𑀫𑀲𑀳𑀕𑀢𑀸 𑀉𑀧𑀓𑁆𑀓𑀺𑀮𑁂𑀲𑀸 𑀲𑀼𑀔𑀼𑀫𑀲𑀓𑁆𑀔𑀭𑀸 𑀣𑀽𑀮𑀯𑀸𑀮𑀼𑀓𑀸 [𑀣𑀽𑀮𑀯𑀸𑀮𑀺𑀓𑀸 (𑀲𑀻. 𑀧𑀻.), 𑀣𑀼𑀮𑁆𑀮𑀯𑀸𑀮𑀺𑀓𑀸 (𑀲𑁆𑀬𑀸. 𑀓𑀁.)]. 𑀢𑀫𑁂𑀦𑀁 𑀧𑀁𑀲𑀼𑀥𑁄𑀯𑀓𑁄 𑀯𑀸 𑀧𑀁𑀲𑀼𑀥𑁄𑀯𑀓𑀦𑁆𑀢𑁂𑀯𑀸𑀲𑀻 𑀯𑀸 𑀥𑁄𑀯𑀢𑀺 𑀲𑀦𑁆𑀥𑁄𑀯𑀢𑀺 𑀦𑀺𑀤𑁆𑀥𑁄𑀯𑀢𑀺. 𑀢𑀲𑁆𑀫𑀺𑀁 𑀧𑀳𑀻𑀦𑁂 𑀢𑀲𑁆𑀫𑀺𑀁 𑀩𑁆𑀬𑀦𑁆𑀢𑀻𑀓𑀢𑁂 𑀲𑀦𑁆𑀢𑀺 𑀚𑀸𑀢𑀭𑀽𑀧𑀲𑁆𑀲 𑀲𑀼𑀔𑀼𑀫𑀲𑀳𑀕𑀢𑀸 𑀉𑀧𑀓𑁆𑀓𑀺𑀮𑁂𑀲𑀸 𑀲𑀼𑀔𑀼𑀫𑀯𑀸𑀮𑀼𑀓𑀸 𑀓𑀸𑀴𑀚𑀮𑁆𑀮𑀺𑀓𑀸. 𑀢𑀫𑁂𑀦𑀁 𑀧𑀁𑀲𑀼𑀥𑁄𑀯𑀓𑁄 𑀯𑀸 𑀧𑀁𑀲𑀼𑀥𑁄𑀯𑀓𑀦𑁆𑀢𑁂𑀯𑀸𑀲𑀻 𑀯𑀸 𑀥𑁄𑀯𑀢𑀺 𑀲𑀦𑁆𑀥𑁄𑀯𑀢𑀺 𑀦𑀺𑀤𑁆𑀥𑁄𑀯𑀢𑀺. 𑀢𑀲𑁆𑀫𑀺𑀁 𑀧𑀳𑀻𑀦𑁂 𑀢𑀲𑁆𑀫𑀺𑀁 𑀩𑁆𑀬𑀦𑁆𑀢𑀻𑀓𑀢𑁂 𑀅𑀣𑀸𑀧𑀭𑀁 𑀲𑀼𑀯𑀡𑁆𑀡𑀲𑀺𑀓𑀢𑀸𑀯𑀲𑀺𑀲𑁆𑀲𑀦𑁆𑀢𑀺 [𑀲𑀼𑀯𑀡𑁆𑀡𑀚𑀸𑀢𑀭𑀽𑀧𑀓𑀸𑀯𑀲𑀺𑀲𑁆𑀲𑀦𑁆𑀢𑀺 (𑀓.)]. 𑀢𑀫𑁂𑀦𑀁 𑀲𑀼𑀯𑀡𑁆𑀡𑀓𑀸𑀭𑁄 𑀯𑀸 𑀲𑀼𑀯𑀡𑁆𑀡𑀓𑀸𑀭𑀦𑁆𑀢𑁂𑀯𑀸𑀲𑀻 𑀯𑀸 𑀚𑀸𑀢𑀭𑀽𑀧𑀁 𑀫𑀽𑀲𑀸𑀬𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀥𑀫𑀢𑀺 𑀲𑀦𑁆𑀥𑀫𑀢𑀺 𑀦𑀺𑀤𑁆𑀥𑀫𑀢𑀺. 𑀢𑀁 𑀳𑁄𑀢𑀺 𑀚𑀸𑀢𑀭𑀽𑀧𑀁 𑀥𑀦𑁆𑀢𑀁 𑀲𑀦𑁆𑀥𑀦𑁆𑀢𑀁 [𑀅𑀥𑀦𑁆𑀢𑀁 𑀅𑀲𑀦𑁆𑀥𑀦𑁆𑀢𑀁 (𑀲𑁆𑀬𑀸. 𑀓𑀁.)] 𑀦𑀺𑀤𑁆𑀥𑀦𑁆𑀢𑀁 𑀅𑀦𑀺𑀤𑁆𑀥𑀦𑁆𑀢𑀓𑀲𑀸𑀯𑀁 [𑀅𑀦𑀺𑀤𑁆𑀥𑀦𑁆𑀢𑀁 𑀅𑀦𑀺𑀳𑀺𑀢𑀁 𑀅𑀦𑀺𑀦𑁆𑀦𑀻𑀢𑀓𑀲𑀸𑀯𑀁 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)], 𑀦 𑀘𑁂𑀯 𑀫𑀼𑀤𑀼 𑀳𑁄𑀢𑀺 𑀦 𑀘 𑀓𑀫𑁆𑀫𑀦𑀺𑀬𑀁, 𑀦 𑀘 𑀧𑀪𑀲𑁆𑀲𑀭𑀁 𑀧𑀪𑀗𑁆𑀕𑀼 𑀘, 𑀦 𑀘 𑀲𑀫𑁆𑀫𑀸 𑀉𑀧𑁂𑀢𑀺 𑀓𑀫𑁆𑀫𑀸𑀬. 𑀳𑁄𑀢𑀺 𑀲𑁄, 𑀪𑀺𑀓𑁆𑀔𑀯𑁂, 𑀲𑀫𑀬𑁄 𑀬𑀁 𑀲𑀼𑀯𑀡𑁆𑀡𑀓𑀸𑀭𑁄 𑀯𑀸 𑀲𑀼𑀯𑀡𑁆𑀡𑀓𑀸𑀭𑀦𑁆𑀢𑁂𑀯𑀸𑀲𑀻 𑀯𑀸 𑀢𑀁 𑀚𑀸𑀢𑀭𑀽𑀧𑀁 𑀥𑀫𑀢𑀺 𑀲𑀦𑁆𑀥𑀫𑀢𑀺 𑀦𑀺𑀤𑁆𑀥𑀫𑀢𑀺. 𑀢𑀁 𑀳𑁄𑀢𑀺 𑀚𑀸𑀢𑀭𑀽𑀧𑀁 𑀥𑀦𑁆𑀢𑀁 𑀲𑀦𑁆𑀥𑀦𑁆𑀢𑀁 𑀦𑀺𑀤𑁆𑀥𑀦𑁆𑀢𑀁 𑀦𑀺𑀤𑁆𑀥𑀦𑁆𑀢𑀓𑀲𑀸𑀯𑀁 [𑀦𑀺𑀳𑀺𑀢𑀁 𑀦𑀺𑀦𑁆𑀦𑀻𑀢𑀓𑀲𑀸𑀯𑀁 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)], 𑀫𑀼𑀤𑀼 𑀘 𑀳𑁄𑀢𑀺 𑀓𑀫𑁆𑀫𑀦𑀺𑀬𑀜𑁆𑀘 𑀧𑀪𑀲𑁆𑀲𑀭𑀜𑁆𑀘, 𑀦 𑀘 𑀧𑀪𑀗𑁆𑀕𑀼, 𑀲𑀫𑁆𑀫𑀸 𑀉𑀧𑁂𑀢𑀺 𑀓𑀫𑁆𑀫𑀸𑀬. 𑀬𑀲𑁆𑀲𑀸 𑀬𑀲𑁆𑀲𑀸 𑀘 𑀧𑀺𑀮𑀦𑁆𑀥𑀦𑀯𑀺𑀓𑀢𑀺𑀬𑀸 𑀆𑀓𑀗𑁆𑀔𑀢𑀺 𑁋 𑀬𑀤𑀺 𑀧𑀝𑁆𑀝𑀺𑀓𑀸𑀬 [𑀫𑀼𑀤𑁆𑀤𑀺𑀓𑀸𑀬 (𑀅. 𑀦𑀺. 𑁫.𑁨𑁩], 𑀬𑀤𑀺 𑀓𑀼𑀡𑁆𑀟𑀮𑀸𑀬, 𑀬𑀤𑀺 𑀕𑀻𑀯𑁂𑀬𑁆𑀬𑀓𑁂 [𑀕𑀻𑀯𑁂𑀬𑁆𑀬𑀓𑁂𑀦 (𑀓.), 𑀕𑀻𑀯𑁂𑀬𑁆𑀬𑀓𑀸𑀬 (?)], 𑀬𑀤𑀺 𑀲𑀼𑀯𑀡𑁆𑀡𑀫𑀸𑀮𑀸𑀬 𑁋 𑀢𑀜𑁆𑀘𑀲𑁆𑀲 𑀅𑀢𑁆𑀣𑀁 𑀅𑀦𑀼𑀪𑁄𑀢𑀺.

‘‘𑀏𑀯𑀫𑁂𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀲𑀦𑁆𑀢𑀺 𑀅𑀥𑀺𑀘𑀺𑀢𑁆𑀢𑀫𑀦𑀼𑀬𑀼𑀢𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀑𑀴𑀸𑀭𑀺𑀓𑀸 𑀉𑀧𑀓𑁆𑀓𑀺𑀮𑁂𑀲𑀸 𑀓𑀸𑀬𑀤𑀼𑀘𑁆𑀘𑀭𑀺𑀢𑀁 𑀯𑀘𑀻𑀤𑀼𑀘𑁆𑀘𑀭𑀺𑀢𑀁 𑀫𑀦𑁄𑀤𑀼𑀘𑁆𑀘𑀭𑀺𑀢𑀁, 𑀢𑀫𑁂𑀦𑀁 𑀲𑀘𑁂𑀢𑀲𑁄 𑀪𑀺𑀓𑁆𑀔𑀼 𑀤𑀩𑁆𑀩𑀚𑀸𑀢𑀺𑀓𑁄 𑀧𑀚𑀳𑀢𑀺 𑀯𑀺𑀦𑁄𑀤𑁂𑀢𑀺 𑀩𑁆𑀬𑀦𑁆𑀢𑀻𑀓𑀭𑁄𑀢𑀺 𑀅𑀦𑀪𑀸𑀯𑀁 𑀕𑀫𑁂𑀢𑀺. 𑀢𑀲𑁆𑀫𑀺𑀁 𑀧𑀳𑀻𑀦𑁂 𑀢𑀲𑁆𑀫𑀺𑀁 𑀩𑁆𑀬𑀦𑁆𑀢𑀻𑀓𑀢𑁂 𑀲𑀦𑁆𑀢𑀺 𑀅𑀥𑀺𑀘𑀺𑀢𑁆𑀢𑀫𑀦𑀼𑀬𑀼𑀢𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀫𑀚𑁆𑀛𑀺𑀫𑀲𑀳𑀕𑀢𑀸 𑀉𑀧𑀓𑁆𑀓𑀺𑀮𑁂𑀲𑀸 𑀓𑀸𑀫𑀯𑀺𑀢𑀓𑁆𑀓𑁄 𑀩𑁆𑀬𑀸𑀧𑀸𑀤𑀯𑀺𑀢𑀓𑁆𑀓𑁄 𑀯𑀺𑀳𑀺𑀁𑀲𑀸𑀯𑀺𑀢𑀓𑁆𑀓𑁄, 𑀢𑀫𑁂𑀦𑀁 𑀲𑀘𑁂𑀢𑀲𑁄 𑀪𑀺𑀓𑁆𑀔𑀼 𑀤𑀩𑁆𑀩𑀚𑀸𑀢𑀺𑀓𑁄 𑀧𑀚𑀳𑀢𑀺 𑀯𑀺𑀦𑁄𑀤𑁂𑀢𑀺 𑀩𑁆𑀬𑀦𑁆𑀢𑀻𑀓𑀭𑁄𑀢𑀺 𑀅𑀦𑀪𑀸𑀯𑀁 𑀕𑀫𑁂𑀢𑀺. 𑀢𑀲𑁆𑀫𑀺𑀁 𑀧𑀳𑀻𑀦𑁂 𑀢𑀲𑁆𑀫𑀺𑀁 𑀩𑁆𑀬𑀦𑁆𑀢𑀻𑀓𑀢𑁂 𑀲𑀦𑁆𑀢𑀺 𑀅𑀥𑀺𑀘𑀺𑀢𑁆𑀢𑀫𑀦𑀼𑀬𑀼𑀢𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑀼𑀔𑀼𑀫𑀲𑀳𑀕𑀢𑀸 𑀉𑀧𑀓𑁆𑀓𑀺𑀮𑁂𑀲𑀸 𑀜𑀸𑀢𑀺𑀯𑀺𑀢𑀓𑁆𑀓𑁄 𑀚𑀦𑀧𑀤𑀯𑀺𑀢𑀓𑁆𑀓𑁄 𑀅𑀦𑀯𑀜𑁆𑀜𑀢𑁆𑀢𑀺𑀧𑀝𑀺𑀲𑀁𑀬𑀼𑀢𑁆𑀢𑁄 𑀯𑀺𑀢𑀓𑁆𑀓𑁄, 𑀢𑀫𑁂𑀦𑀁 𑀲𑀘𑁂𑀢𑀲𑁄 𑀪𑀺𑀓𑁆𑀔𑀼 𑀤𑀩𑁆𑀩𑀚𑀸𑀢𑀺𑀓𑁄 𑀧𑀚𑀳𑀢𑀺 𑀯𑀺𑀦𑁄𑀤𑁂𑀢𑀺 𑀩𑁆𑀬𑀦𑁆𑀢𑀻𑀓𑀭𑁄𑀢𑀺 𑀅𑀦𑀪𑀸𑀯𑀁 𑀕𑀫𑁂𑀢𑀺. 𑀢𑀲𑁆𑀫𑀺𑀁 𑀧𑀳𑀻𑀦𑁂 𑀢𑀲𑁆𑀫𑀺𑀁 𑀩𑁆𑀬𑀦𑁆𑀢𑀻𑀓𑀢𑁂 𑀅𑀣𑀸𑀧𑀭𑀁 𑀥𑀫𑁆𑀫𑀯𑀺𑀢𑀓𑁆𑀓𑀸𑀯𑀲𑀺𑀲𑁆𑀲𑀢𑀺 [𑀥𑀫𑁆𑀫𑀯𑀺𑀢𑀓𑁆𑀓𑁄𑀯𑀲𑀺𑀲𑁆𑀲𑀢𑀺 (𑀓.)]. 𑀲𑁄 𑀳𑁄𑀢𑀺 𑀲𑀫𑀸𑀥𑀺 𑀦 𑀘𑁂𑀯 𑀲𑀦𑁆𑀢𑁄 𑀦 𑀘 𑀧𑀡𑀻𑀢𑁄 𑀦𑀧𑁆𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀮𑀤𑁆𑀥𑁄 𑀦 𑀏𑀓𑁄𑀤𑀺𑀪𑀸𑀯𑀸𑀥𑀺𑀕𑀢𑁄 𑀲𑀲𑀗𑁆𑀔𑀸𑀭𑀦𑀺𑀕𑁆𑀕𑀬𑁆𑀳𑀯𑀸𑀭𑀺𑀢𑀕𑀢𑁄 [𑀲𑀲𑀗𑁆𑀔𑀸𑀭𑀦𑀺𑀕𑁆𑀕𑀬𑁆𑀳𑀯𑀸𑀭𑀺𑀢𑀯𑀢𑁄 (𑀲𑀻. 𑀲𑁆𑀬𑀸. 𑀓𑀁. 𑀧𑀻.), 𑀲𑀲𑀗𑁆𑀔𑀸𑀭𑀦𑀺𑀕𑁆𑀕𑀬𑁆𑀳𑀯𑀸𑀭𑀺𑀯𑀸𑀯𑀢𑁄 (𑀓.), 𑀲𑀲𑀗𑁆𑀔𑀸𑀭𑀦𑀺𑀕𑁆𑀕𑀬𑁆𑀳𑀯𑀸𑀭𑀺𑀬𑀸𑀥𑀺𑀕𑀢𑁄 (?) 𑀅. 𑀦𑀺. 𑁯.𑁩𑁭; 𑀤𑀻. 𑀦𑀺. 𑁩.𑁩𑁫𑁫] 𑀳𑁄𑀢𑀺. 𑀲𑁄, 𑀪𑀺𑀓𑁆𑀔𑀯𑁂, 𑀲𑀫𑀬𑁄 𑀬𑀁 𑀢𑀁 𑀘𑀺𑀢𑁆𑀢𑀁 𑀅𑀚𑁆𑀛𑀢𑁆𑀢𑀁𑀬𑁂𑀯 𑀲𑀦𑁆𑀢𑀺𑀝𑁆𑀞𑀢𑀺 𑀲𑀦𑁆𑀦𑀺𑀲𑀻𑀤𑀢𑀺 𑀏𑀓𑁄𑀤𑀺 𑀳𑁄𑀢𑀺 [𑀏𑀓𑁄𑀤𑀺𑀪𑀸𑀯𑀁 𑀕𑀘𑁆𑀙𑀢𑀺 (𑀲𑀻.), 𑀏𑀓𑁄𑀤𑀺𑀪𑀸𑀯𑁄 𑀳𑁄𑀢𑀺 (𑀲𑁆𑀬𑀸. 𑀓𑀁. 𑀓.), 𑀏𑀓𑁄𑀤𑀺𑀳𑁄𑀢𑀺 (𑀧𑀻.)] 𑀲𑀫𑀸𑀥𑀺𑀬𑀢𑀺. 𑀲𑁄 𑀳𑁄𑀢𑀺 𑀲𑀫𑀸𑀥𑀺 𑀲𑀦𑁆𑀢𑁄 𑀧𑀡𑀻𑀢𑁄 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀮𑀤𑁆𑀥𑁄 𑀏𑀓𑁄𑀤𑀺𑀪𑀸𑀯𑀸𑀥𑀺𑀕𑀢𑁄 𑀦 𑀲𑀲𑀗𑁆𑀔𑀸𑀭𑀦𑀺𑀕𑁆𑀕𑀬𑁆𑀳𑀯𑀸𑀭𑀺𑀢𑀕𑀢𑁄. 𑀬𑀲𑁆𑀲 𑀬𑀲𑁆𑀲 𑀘 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀭𑀡𑀻𑀬𑀲𑁆𑀲 𑀥𑀫𑁆𑀫𑀲𑁆𑀲 𑀘𑀺𑀢𑁆𑀢𑀁 𑀅𑀪𑀺𑀦𑀺𑀦𑁆𑀦𑀸𑀫𑁂𑀢𑀺 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀢𑀢𑁆𑀭 𑀢𑀢𑁆𑀭𑁂𑀯 𑀲𑀓𑁆𑀔𑀺𑀪𑀩𑁆𑀩𑀢𑀁 𑀧𑀸𑀧𑀼𑀡𑀸𑀢𑀺 𑀲𑀢𑀺 𑀲𑀢𑀺𑀆𑀬𑀢𑀦𑁂.

‘‘𑀲𑁄 𑀲𑀘𑁂 𑀆𑀓𑀗𑁆𑀔𑀢𑀺 𑁋 ‘𑀅𑀦𑁂𑀓𑀯𑀺𑀳𑀺𑀢𑀁 𑀇𑀤𑁆𑀥𑀺𑀯𑀺𑀥𑀁 𑀧𑀘𑁆𑀘𑀦𑀼𑀪𑀯𑁂𑀬𑁆𑀬𑀁 𑁋 𑀏𑀓𑁄𑀧𑀺 𑀳𑀼𑀢𑁆𑀯𑀸 𑀩𑀳𑀼𑀥𑀸 𑀅𑀲𑁆𑀲𑀁, 𑀩𑀳𑀼𑀥𑀸𑀧𑀺 𑀳𑀼𑀢𑁆𑀯𑀸 𑀏𑀓𑁄 𑀅𑀲𑁆𑀲𑀁; 𑀆𑀯𑀺𑀪𑀸𑀯𑀁, 𑀢𑀺𑀭𑁄𑀪𑀸𑀯𑀁; 𑀢𑀺𑀭𑁄𑀓𑀼𑀝𑁆𑀝𑀁 𑀢𑀺𑀭𑁄𑀧𑀸𑀓𑀸𑀭𑀁 𑀢𑀺𑀭𑁄𑀧𑀩𑁆𑀩𑀢𑀁 𑀅𑀲𑀚𑁆𑀚𑀫𑀸𑀦𑁄 𑀕𑀘𑁆𑀙𑁂𑀬𑁆𑀬𑀁, 𑀲𑁂𑀬𑁆𑀬𑀣𑀸𑀧𑀺 𑀆𑀓𑀸𑀲𑁂; 𑀧𑀣𑀯𑀺𑀬𑀸𑀧𑀺 𑀉𑀫𑁆𑀫𑀼𑀚𑁆𑀚𑀦𑀺𑀫𑀼𑀚𑁆𑀚𑀁 𑀓𑀭𑁂𑀬𑁆𑀬𑀁, 𑀲𑁂𑀬𑁆𑀬𑀣𑀸𑀧𑀺 𑀉𑀤𑀓𑁂; 𑀉𑀤𑀓𑁂𑀧𑀺 𑀅𑀪𑀺𑀚𑁆𑀚𑀫𑀸𑀦𑁂 [𑀅𑀪𑀺𑀚𑁆𑀚𑀫𑀸𑀦𑁄 (𑀲𑀻. 𑀧𑀻. 𑀓.)] 𑀕𑀘𑁆𑀙𑁂𑀬𑁆𑀬𑀁, 𑀲𑁂𑀬𑁆𑀬𑀣𑀸𑀧𑀺 𑀧𑀣𑀯𑀺𑀬𑀁; 𑀆𑀓𑀸𑀲𑁂𑀧𑀺 𑀧𑀮𑁆𑀮𑀗𑁆𑀓𑁂𑀦 𑀓𑀫𑁂𑀬𑁆𑀬𑀁, 𑀲𑁂𑀬𑁆𑀬𑀣𑀸𑀧𑀺 𑀧𑀓𑁆𑀔𑀻 𑀲𑀓𑀼𑀡𑁄; 𑀇𑀫𑁂𑀧𑀺 𑀘𑀦𑁆𑀤𑀺𑀫𑀲𑀽𑀭𑀺𑀬𑁂 𑀏𑀯𑀁𑀫𑀳𑀺𑀤𑁆𑀥𑀺𑀓𑁂 𑀏𑀯𑀁𑀫𑀳𑀸𑀦𑀼𑀪𑀸𑀯𑁂 𑀧𑀸𑀡𑀺𑀦𑀸 𑀧𑀭𑀺𑀫𑀲𑁂𑀬𑁆𑀬𑀁 𑀧𑀭𑀺𑀫𑀚𑁆𑀚𑁂𑀬𑁆𑀬𑀁; 𑀬𑀸𑀯 𑀩𑁆𑀭𑀳𑁆𑀫𑀮𑁄𑀓𑀸𑀧𑀺 𑀓𑀸𑀬𑁂𑀦 𑀯𑀲𑀁 𑀯𑀢𑁆𑀢𑁂𑀬𑁆𑀬’𑀦𑁆𑀢𑀺, 𑀢𑀢𑁆𑀭 𑀢𑀢𑁆𑀭𑁂𑀯 𑀲𑀓𑁆𑀔𑀺𑀪𑀩𑁆𑀩𑀢𑀁 𑀧𑀸𑀧𑀼𑀡𑀸𑀢𑀺 𑀲𑀢𑀺 𑀲𑀢𑀺𑀆𑀬𑀢𑀦𑁂.

‘‘𑀲𑁄 𑀲𑀘𑁂 𑀆𑀓𑀗𑁆𑀔𑀢𑀺 𑁋 ‘𑀤𑀺𑀩𑁆𑀩𑀸𑀬 𑀲𑁄𑀢𑀥𑀸𑀢𑀼𑀬𑀸 𑀯𑀺𑀲𑀼𑀤𑁆𑀥𑀸𑀬 𑀅𑀢𑀺𑀓𑁆𑀓𑀦𑁆𑀢𑀫𑀸𑀦𑀼𑀲𑀺𑀓𑀸𑀬 𑀉𑀪𑁄 𑀲𑀤𑁆𑀤𑁂 𑀲𑀼𑀡𑁂𑀬𑁆𑀬𑀁 𑀤𑀺𑀩𑁆𑀩𑁂 𑀘 𑀫𑀸𑀦𑀼𑀲𑁂 𑀘 𑀬𑁂 𑀤𑀽𑀭𑁂 𑀲𑀦𑁆𑀢𑀺𑀓𑁂 𑀘𑀸’𑀢𑀺, 𑀢𑀢𑁆𑀭 𑀢𑀢𑁆𑀭𑁂𑀯 𑀲𑀓𑁆𑀔𑀺𑀪𑀩𑁆𑀩𑀢𑀁 𑀧𑀸𑀧𑀼𑀡𑀸𑀢𑀺 𑀲𑀢𑀺 𑀲𑀢𑀺𑀆𑀬𑀢𑀦𑁂.

‘‘𑀲𑁄 𑀲𑀘𑁂 𑀆𑀓𑀗𑁆𑀔𑀢𑀺 𑁋 ‘𑀧𑀭𑀲𑀢𑁆𑀢𑀸𑀦𑀁 𑀧𑀭𑀧𑀼𑀕𑁆𑀕𑀮𑀸𑀦𑀁 𑀘𑁂𑀢𑀲𑀸 𑀘𑁂𑀢𑁄 𑀧𑀭𑀺𑀘𑁆𑀘 𑀧𑀚𑀸𑀦𑁂𑀬𑁆𑀬𑀁 𑁋 𑀲𑀭𑀸𑀕𑀁 𑀯𑀸 𑀘𑀺𑀢𑁆𑀢𑀁 𑀲𑀭𑀸𑀕𑀁 𑀘𑀺𑀢𑁆𑀢𑀦𑁆𑀢𑀺 𑀧𑀚𑀸𑀦𑁂𑀬𑁆𑀬𑀁, 𑀯𑀻𑀢𑀭𑀸𑀕𑀁 𑀯𑀸 𑀘𑀺𑀢𑁆𑀢𑀁 𑀯𑀻𑀢𑀭𑀸𑀕𑀁 𑀘𑀺𑀢𑁆𑀢𑀦𑁆𑀢𑀺 𑀧𑀚𑀸𑀦𑁂𑀬𑁆𑀬𑀁; 𑀲𑀤𑁄𑀲𑀁 𑀯𑀸 𑀘𑀺𑀢𑁆𑀢𑀁 𑀲𑀤𑁄𑀲𑀁 𑀘𑀺𑀢𑁆𑀢𑀦𑁆𑀢𑀺 𑀧𑀚𑀸𑀦𑁂𑀬𑁆𑀬𑀁, 𑀯𑀻𑀢𑀤𑁄𑀲𑀁 𑀯𑀸 𑀘𑀺𑀢𑁆𑀢𑀁 𑀯𑀻𑀢𑀤𑁄𑀲𑀁 𑀘𑀺𑀢𑁆𑀢𑀦𑁆𑀢𑀺 𑀧𑀚𑀸𑀦𑁂𑀬𑁆𑀬𑀁; 𑀲𑀫𑁄𑀳𑀁 𑀯𑀸 𑀘𑀺𑀢𑁆𑀢𑀁 𑀲𑀫𑁄𑀳𑀁 𑀘𑀺𑀢𑁆𑀢𑀦𑁆𑀢𑀺 𑀧𑀚𑀸𑀦𑁂𑀬𑁆𑀬𑀁, 𑀯𑀻𑀢𑀫𑁄𑀳𑀁 𑀯𑀸 𑀘𑀺𑀢𑁆𑀢𑀁 𑀯𑀻𑀢𑀫𑁄𑀳𑀁 𑀘𑀺𑀢𑁆𑀢𑀦𑁆𑀢𑀺 𑀧𑀚𑀸𑀦𑁂𑀬𑁆𑀬𑀁; 𑀲𑀁𑀔𑀺𑀢𑁆𑀢𑀁 𑀯𑀸 𑀘𑀺𑀢𑁆𑀢𑀁 𑀲𑀁𑀔𑀺𑀢𑁆𑀢𑀁 𑀘𑀺𑀢𑁆𑀢𑀦𑁆𑀢𑀺 𑀧𑀚𑀸𑀦𑁂𑀬𑁆𑀬𑀁, 𑀯𑀺𑀓𑁆𑀔𑀺𑀢𑁆𑀢𑀁 𑀯𑀸 𑀘𑀺𑀢𑁆𑀢𑀁 𑀯𑀺𑀓𑁆𑀔𑀺𑀢𑁆𑀢𑀁 𑀘𑀺𑀢𑁆𑀢𑀦𑁆𑀢𑀺 𑀧𑀚𑀸𑀦𑁂𑀬𑁆𑀬𑀁; 𑀫𑀳𑀕𑁆𑀕𑀢𑀁 𑀯𑀸 𑀘𑀺𑀢𑁆𑀢𑀁 𑀫𑀳𑀕𑁆𑀕𑀢𑀁 𑀘𑀺𑀢𑁆𑀢𑀦𑁆𑀢𑀺 𑀧𑀚𑀸𑀦𑁂𑀬𑁆𑀬𑀁, 𑀅𑀫𑀳𑀕𑁆𑀕𑀢𑀁 𑀯𑀸 𑀘𑀺𑀢𑁆𑀢𑀁 𑀅𑀫𑀳𑀕𑁆𑀕𑀢𑀁 𑀘𑀺𑀢𑁆𑀢𑀦𑁆𑀢𑀺 𑀧𑀚𑀸𑀦𑁂𑀬𑁆𑀬𑀁; 𑀲𑀉𑀢𑁆𑀢𑀭𑀁 𑀯𑀸 𑀘𑀺𑀢𑁆𑀢𑀁 𑀲𑀉𑀢𑁆𑀢𑀭𑀁 𑀘𑀺𑀢𑁆𑀢𑀦𑁆𑀢𑀺 𑀧𑀚𑀸𑀦𑁂𑀬𑁆𑀬𑀁, 𑀅𑀦𑀼𑀢𑁆𑀢𑀭𑀁 𑀯𑀸 𑀘𑀺𑀢𑁆𑀢𑀁 𑀅𑀦𑀼𑀢𑁆𑀢𑀭𑀁 𑀘𑀺𑀢𑁆𑀢𑀦𑁆𑀢𑀺 𑀧𑀚𑀸𑀦𑁂𑀬𑁆𑀬𑀁; 𑀲𑀫𑀸𑀳𑀺𑀢𑀁 𑀯𑀸 𑀘𑀺𑀢𑁆𑀢𑀁 𑀲𑀫𑀸𑀳𑀺𑀢𑀁 𑀘𑀺𑀢𑁆𑀢𑀦𑁆𑀢𑀺 𑀧𑀚𑀸𑀦𑁂𑀬𑁆𑀬𑀁, 𑀅𑀲𑀫𑀸𑀳𑀺𑀢𑀁 𑀯𑀸 𑀘𑀺𑀢𑁆𑀢𑀁 𑀅𑀲𑀫𑀸𑀳𑀺𑀢𑀁 𑀘𑀺𑀢𑁆𑀢𑀦𑁆𑀢𑀺 𑀧𑀚𑀸𑀦𑁂𑀬𑁆𑀬𑀁; 𑀯𑀺𑀫𑀼𑀢𑁆𑀢𑀁 𑀯𑀸 𑀘𑀺𑀢𑁆𑀢𑀁 𑀯𑀺𑀫𑀼𑀢𑁆𑀢𑀁 𑀘𑀺𑀢𑁆𑀢𑀦𑁆𑀢𑀺 𑀧𑀚𑀸𑀦𑁂𑀬𑁆𑀬𑀁, 𑀅𑀯𑀺𑀫𑀼𑀢𑁆𑀢𑀁 𑀯𑀸 𑀘𑀺𑀢𑁆𑀢𑀁 𑀅𑀯𑀺𑀫𑀼𑀢𑁆𑀢𑀁 𑀘𑀺𑀢𑁆𑀢𑀦𑁆𑀢𑀺 𑀧𑀚𑀸𑀦𑁂𑀬𑁆𑀬’𑀦𑁆𑀢𑀺, 𑀢𑀢𑁆𑀭 𑀢𑀢𑁆𑀭𑁂𑀯 𑀲𑀓𑁆𑀔𑀺𑀪𑀩𑁆𑀩𑀢𑀁 𑀧𑀸𑀧𑀼𑀡𑀸𑀢𑀺 𑀲𑀢𑀺 𑀲𑀢𑀺𑀆𑀬𑀢𑀦𑁂.

‘‘𑀲𑁄 𑀲𑀘𑁂 𑀆𑀓𑀗𑁆𑀔𑀢𑀺 𑁋 ‘𑀅𑀦𑁂𑀓𑀯𑀺𑀳𑀺𑀢𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀅𑀦𑀼𑀲𑁆𑀲𑀭𑁂𑀬𑁆𑀬𑀁, 𑀲𑁂𑀬𑁆𑀬𑀣𑀺𑀤𑀁 𑁋 𑀏𑀓𑀫𑁆𑀧𑀺 𑀚𑀸𑀢𑀺𑀁 𑀤𑁆𑀯𑁂𑀧𑀺 𑀚𑀸𑀢𑀺𑀬𑁄 𑀢𑀺𑀲𑁆𑀲𑁄𑀧𑀺 𑀚𑀸𑀢𑀺𑀬𑁄 𑀘𑀢𑀲𑁆𑀲𑁄𑀧𑀺 𑀚𑀸𑀢𑀺𑀬𑁄 𑀧𑀜𑁆𑀘𑀧𑀺 𑀚𑀸𑀢𑀺𑀬𑁄 𑀤𑀲𑀧𑀺 𑀚𑀸𑀢𑀺𑀬𑁄 𑀯𑀻𑀲𑀫𑁆𑀧𑀺 𑀚𑀸𑀢𑀺𑀬𑁄 𑀢𑀺𑀁𑀲𑀫𑁆𑀧𑀺 𑀚𑀸𑀢𑀺𑀬𑁄 𑀘𑀢𑁆𑀢𑀸𑀮𑀻𑀲𑀫𑁆𑀧𑀺 𑀚𑀸𑀢𑀺𑀬𑁄 𑀧𑀜𑁆𑀜𑀸𑀲𑀫𑁆𑀧𑀺 𑀚𑀸𑀢𑀺𑀬𑁄 𑀚𑀸𑀢𑀺𑀲𑀢𑀫𑁆𑀧𑀺 𑀚𑀸𑀢𑀺𑀲𑀳𑀲𑁆𑀲𑀫𑁆𑀧𑀺 𑀚𑀸𑀢𑀺𑀲𑀢𑀲𑀳𑀲𑁆𑀲𑀫𑁆𑀧𑀺 𑀅𑀦𑁂𑀓𑁂𑀧𑀺 𑀲𑀁𑀯𑀝𑁆𑀝𑀓𑀧𑁆𑀧𑁂 𑀅𑀦𑁂𑀓𑁂𑀧𑀺 𑀯𑀺𑀯𑀝𑁆𑀝𑀓𑀧𑁆𑀧𑁂 𑀅𑀦𑁂𑀓𑁂𑀧𑀺 𑀲𑀁𑀯𑀝𑁆𑀝𑀯𑀺𑀯𑀝𑁆𑀝𑀓𑀧𑁆𑀧𑁂 𑁋 𑀅𑀫𑀼𑀢𑁆𑀭𑀸𑀲𑀺𑀁 𑀏𑀯𑀁𑀦𑀸𑀫𑁄 𑀏𑀯𑀁𑀕𑁄𑀢𑁆𑀢𑁄 𑀏𑀯𑀁𑀯𑀡𑁆𑀡𑁄 𑀏𑀯𑀫𑀸𑀳𑀸𑀭𑁄 𑀏𑀯𑀁𑀲𑀼𑀔𑀤𑀼𑀓𑁆𑀔𑀧𑁆𑀧𑀝𑀺𑀲𑀁𑀯𑁂𑀤𑀻 𑀏𑀯𑀫𑀸𑀬𑀼𑀧𑀭𑀺𑀬𑀦𑁆𑀢𑁄, 𑀲𑁄 𑀢𑀢𑁄 𑀘𑀼𑀢𑁄 𑀅𑀫𑀼𑀢𑁆𑀭 𑀉𑀤𑀧𑀸𑀤𑀺𑀁; 𑀢𑀢𑁆𑀭𑀸𑀧𑀸𑀲𑀺𑀁 𑀏𑀯𑀁𑀦𑀸𑀫𑁄 𑀏𑀯𑀁𑀕𑁄𑀢𑁆𑀢𑁄 𑀏𑀯𑀁𑀯𑀡𑁆𑀡𑁄 𑀏𑀯𑀫𑀸𑀳𑀸𑀭𑁄 𑀏𑀯𑀁𑀲𑀼𑀔𑀤𑀼𑀓𑁆𑀔𑀧𑁆𑀧𑀝𑀺𑀲𑀁𑀯𑁂𑀤𑀻 𑀏𑀯𑀫𑀸𑀬𑀼𑀧𑀭𑀺𑀬𑀦𑁆𑀢𑁄, 𑀲𑁄 𑀢𑀢𑁄 𑀘𑀼𑀢𑁄 𑀇𑀥𑀽𑀧𑀧𑀦𑁆𑀦𑁄𑀢𑀺, 𑀇𑀢𑀺 𑀲𑀸𑀓𑀸𑀭𑀁 𑀲𑀉𑀤𑁆𑀤𑁂𑀲𑀁 𑀅𑀦𑁂𑀓𑀯𑀺𑀳𑀺𑀢𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀅𑀦𑀼𑀲𑁆𑀲𑀭𑁂𑀬𑁆𑀬’𑀦𑁆𑀢𑀺, 𑀢𑀢𑁆𑀭 𑀢𑀢𑁆𑀭𑁂𑀯 𑀲𑀓𑁆𑀔𑀺𑀪𑀩𑁆𑀩𑀢𑀁 𑀧𑀸𑀧𑀼𑀡𑀸𑀢𑀺 𑀲𑀢𑀺 𑀲𑀢𑀺𑀆𑀬𑀢𑀦𑁂.

‘‘𑀲𑁄 𑀲𑀘𑁂 𑀆𑀓𑀗𑁆𑀔𑀢𑀺 𑁋 ‘𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀯𑀺𑀲𑀼𑀤𑁆𑀥𑁂𑀦 𑀅𑀢𑀺𑀓𑁆𑀓𑀦𑁆𑀢𑀫𑀸𑀦𑀼𑀲𑀓𑁂𑀦 𑀲𑀢𑁆𑀢𑁂 𑀧𑀲𑁆𑀲𑁂𑀬𑁆𑀬𑀁 𑀘𑀯𑀫𑀸𑀦𑁂 𑀉𑀧𑀧𑀚𑁆𑀚𑀫𑀸𑀦𑁂 𑀳𑀻𑀦𑁂 𑀧𑀡𑀻𑀢𑁂 𑀲𑀼𑀯𑀡𑁆𑀡𑁂 𑀤𑀼𑀩𑁆𑀩𑀡𑁆𑀡𑁂, 𑀲𑀼𑀕𑀢𑁂 𑀤𑀼𑀕𑁆𑀕𑀢𑁂 𑀬𑀣𑀸𑀓𑀫𑁆𑀫𑀽𑀧𑀕𑁂 𑀲𑀢𑁆𑀢𑁂 𑀧𑀚𑀸𑀦𑁂𑀬𑁆𑀬𑀁 𑁋 𑀇𑀫𑁂 𑀯𑀢 𑀪𑁄𑀦𑁆𑀢𑁄 𑀲𑀢𑁆𑀢𑀸 𑀓𑀸𑀬𑀤𑀼𑀘𑁆𑀘𑀭𑀺𑀢𑁂𑀦 𑀲𑀫𑀦𑁆𑀦𑀸𑀕𑀢𑀸 𑀯𑀘𑀻𑀤𑀼𑀘𑁆𑀘𑀭𑀺𑀢𑁂𑀦 𑀲𑀫𑀦𑁆𑀦𑀸𑀕𑀢𑀸 𑀫𑀦𑁄𑀤𑀼𑀘𑁆𑀘𑀭𑀺𑀢𑁂𑀦 𑀲𑀫𑀦𑁆𑀦𑀸𑀕𑀢𑀸 𑀅𑀭𑀺𑀬𑀸𑀦𑀁 𑀉𑀧𑀯𑀸𑀤𑀓𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀫𑁆𑀫𑀲𑀫𑀸𑀤𑀸𑀦𑀸, 𑀢𑁂 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀦𑀺𑀭𑀬𑀁 𑀉𑀧𑀧𑀦𑁆𑀦𑀸; 𑀇𑀫𑁂 𑀯𑀸 𑀧𑀦 𑀪𑁄𑀦𑁆𑀢𑁄 𑀲𑀢𑁆𑀢𑀸 𑀓𑀸𑀬𑀲𑀼𑀘𑀭𑀺𑀢𑁂𑀦 𑀲𑀫𑀦𑁆𑀦𑀸𑀕𑀢𑀸 𑀯𑀘𑀻𑀲𑀼𑀘𑀭𑀺𑀢𑁂𑀦 𑀲𑀫𑀦𑁆𑀦𑀸𑀕𑀢𑀸 𑀫𑀦𑁄𑀲𑀼𑀘𑀭𑀺𑀢𑁂𑀦 𑀲𑀫𑀦𑁆𑀦𑀸𑀕𑀢𑀸 𑀅𑀭𑀺𑀬𑀸𑀦𑀁 𑀅𑀦𑀼𑀧𑀯𑀸𑀤𑀓𑀸 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑀸 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑀫𑁆𑀫𑀲𑀫𑀸𑀤𑀸𑀦𑀸, 𑀢𑁂 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀦𑁆𑀦𑀸𑀢𑀺, 𑀇𑀢𑀺 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀯𑀺𑀲𑀼𑀤𑁆𑀥𑁂𑀦 𑀅𑀢𑀺𑀓𑁆𑀓𑀦𑁆𑀢𑀫𑀸𑀦𑀼𑀲𑀓𑁂𑀦 𑀲𑀢𑁆𑀢𑁂 𑀧𑀲𑁆𑀲𑁂𑀬𑁆𑀬𑀁 𑀘𑀯𑀫𑀸𑀦𑁂 𑀉𑀧𑀧𑀚𑁆𑀚𑀫𑀸𑀦𑁂 𑀳𑀻𑀦𑁂 𑀧𑀡𑀻𑀢𑁂 𑀲𑀼𑀯𑀡𑁆𑀡𑁂 𑀤𑀼𑀩𑁆𑀩𑀡𑁆𑀡𑁂, 𑀲𑀼𑀕𑀢𑁂 𑀤𑀼𑀕𑁆𑀕𑀢𑁂 𑀬𑀣𑀸𑀓𑀫𑁆𑀫𑀽𑀧𑀕𑁂 𑀲𑀢𑁆𑀢𑁂 𑀧𑀚𑀸𑀦𑁂𑀬𑁆𑀬’𑀦𑁆𑀢𑀺, 𑀢𑀢𑁆𑀭 𑀢𑀢𑁆𑀭𑁂𑀯 𑀲𑀓𑁆𑀔𑀺𑀪𑀩𑁆𑀩𑀢𑀁 𑀧𑀸𑀧𑀼𑀡𑀸𑀢𑀺 𑀲𑀢𑀺 𑀲𑀢𑀺𑀆𑀬𑀢𑀦𑁂.

‘‘𑀲𑁄 𑀲𑀘𑁂 𑀆𑀓𑀗𑁆𑀔𑀢𑀺 𑁋 ‘𑀆𑀲𑀯𑀸𑀦𑀁 𑀔𑀬𑀸 𑀅𑀦𑀸𑀲𑀯𑀁 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀁 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑁂𑀬𑁆𑀬’𑀦𑁆𑀢𑀺, 𑀢𑀢𑁆𑀭 𑀢𑀢𑁆𑀭𑁂𑀯 𑀲𑀓𑁆𑀔𑀺𑀪𑀩𑁆𑀩𑀢𑀁 𑀧𑀸𑀧𑀼𑀡𑀸𑀢𑀺 𑀲𑀢𑀺 𑀲𑀢𑀺𑀆𑀬𑀢𑀦𑁂’’𑀢𑀺. 𑀤𑀲𑀫𑀁.

𑁧𑁧. 𑀦𑀺𑀫𑀺𑀢𑁆𑀢𑀲𑀼𑀢𑁆𑀢𑀁

𑁧𑁦𑁩. ‘‘𑀅𑀥𑀺𑀘𑀺𑀢𑁆𑀢𑀫𑀦𑀼𑀬𑀼𑀢𑁆𑀢𑁂𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 𑀢𑀻𑀡𑀺 𑀦𑀺𑀫𑀺𑀢𑁆𑀢𑀸𑀦𑀺 𑀓𑀸𑀮𑁂𑀦 𑀓𑀸𑀮𑀁 𑀫𑀦𑀲𑀺 𑀓𑀸𑀢𑀩𑁆𑀩𑀸𑀦𑀺 𑁋 𑀓𑀸𑀮𑁂𑀦 𑀓𑀸𑀮𑀁 𑀲𑀫𑀸𑀥𑀺𑀦𑀺𑀫𑀺𑀢𑁆𑀢𑀁 𑀫𑀦𑀲𑀺 𑀓𑀸𑀢𑀩𑁆𑀩𑀁, 𑀓𑀸𑀮𑁂𑀦 𑀓𑀸𑀮𑀁 𑀧𑀕𑁆𑀕𑀳𑀦𑀺𑀫𑀺𑀢𑁆𑀢𑀁 𑀫𑀦𑀲𑀺 𑀓𑀸𑀢𑀩𑁆𑀩𑀁, 𑀓𑀸𑀮𑁂𑀦 𑀓𑀸𑀮𑀁 𑀉𑀧𑁂𑀓𑁆𑀔𑀸𑀦𑀺𑀫𑀺𑀢𑁆𑀢𑀁 𑀫𑀦𑀲𑀺 𑀓𑀸𑀢𑀩𑁆𑀩𑀁. 𑀲𑀘𑁂, 𑀪𑀺𑀓𑁆𑀔𑀯𑁂, 𑀅𑀥𑀺𑀘𑀺𑀢𑁆𑀢𑀫𑀦𑀼𑀬𑀼𑀢𑁆𑀢𑁄 𑀪𑀺𑀓𑁆𑀔𑀼 𑀏𑀓𑀦𑁆𑀢𑀁 𑀲𑀫𑀸𑀥𑀺𑀦𑀺𑀫𑀺𑀢𑁆𑀢𑀁𑀬𑁂𑀯 𑀫𑀦𑀲𑀺 𑀓𑀭𑁂𑀬𑁆𑀬, 𑀞𑀸𑀦𑀁 𑀢𑀁 𑀘𑀺𑀢𑁆𑀢𑀁 𑀓𑁄𑀲𑀚𑁆𑀚𑀸𑀬 𑀲𑀁𑀯𑀢𑁆𑀢𑁂𑀬𑁆𑀬. 𑀲𑀘𑁂, 𑀪𑀺𑀓𑁆𑀔𑀯𑁂, 𑀅𑀥𑀺𑀘𑀺𑀢𑁆𑀢𑀫𑀦𑀼𑀬𑀼𑀢𑁆𑀢𑁄 𑀪𑀺𑀓𑁆𑀔𑀼 𑀏𑀓𑀦𑁆𑀢𑀁 𑀧𑀕𑁆𑀕𑀳𑀦𑀺𑀫𑀺𑀢𑁆𑀢𑀁𑀬𑁂𑀯 𑀫𑀦𑀲𑀺 𑀓𑀭𑁂𑀬𑁆𑀬, 𑀞𑀸𑀦𑀁 𑀢𑀁 𑀘𑀺𑀢𑁆𑀢𑀁 𑀉𑀤𑁆𑀥𑀘𑁆𑀘𑀸𑀬 𑀲𑀁𑀯𑀢𑁆𑀢𑁂𑀬𑁆𑀬. 𑀲𑀘𑁂, 𑀪𑀺𑀓𑁆𑀔𑀯𑁂, 𑀅𑀥𑀺𑀘𑀺𑀢𑁆𑀢𑀫𑀦𑀼𑀬𑀼𑀢𑁆𑀢𑁄 𑀪𑀺𑀓𑁆𑀔𑀼 𑀏𑀓𑀦𑁆𑀢𑀁 𑀉𑀧𑁂𑀓𑁆𑀔𑀸𑀦𑀺𑀫𑀺𑀢𑁆𑀢𑀁𑀬𑁂𑀯 𑀫𑀦𑀲𑀺 𑀓𑀭𑁂𑀬𑁆𑀬, 𑀞𑀸𑀦𑀁 𑀢𑀁 𑀘𑀺𑀢𑁆𑀢𑀁 𑀦 𑀲𑀫𑁆𑀫𑀸 𑀲𑀫𑀸𑀥𑀺𑀬𑁂𑀬𑁆𑀬 𑀆𑀲𑀯𑀸𑀦𑀁 𑀔𑀬𑀸𑀬. 𑀬𑀢𑁄 𑀘 𑀔𑁄, 𑀪𑀺𑀓𑁆𑀔𑀯𑁂, 𑀅𑀥𑀺𑀘𑀺𑀢𑁆𑀢𑀫𑀦𑀼𑀬𑀼𑀢𑁆𑀢𑁄 𑀪𑀺𑀓𑁆𑀔𑀼 𑀓𑀸𑀮𑁂𑀦 𑀓𑀸𑀮𑀁 𑀲𑀫𑀸𑀥𑀺𑀦𑀺𑀫𑀺𑀢𑁆𑀢𑀁 𑀫𑀦𑀲𑀺 𑀓𑀭𑁄𑀢𑀺, 𑀓𑀸𑀮𑁂𑀦 𑀓𑀸𑀮𑀁 𑀧𑀕𑁆𑀕𑀳𑀦𑀺𑀫𑀺𑀢𑁆𑀢𑀁 𑀫𑀦𑀲𑀺 𑀓𑀭𑁄𑀢𑀺, 𑀓𑀸𑀮𑁂𑀦 𑀓𑀸𑀮𑀁 𑀉𑀧𑁂𑀓𑁆𑀔𑀸𑀦𑀺𑀫𑀺𑀢𑁆𑀢𑀁 𑀫𑀦𑀲𑀺 𑀓𑀭𑁄𑀢𑀺, 𑀢𑀁 𑀳𑁄𑀢𑀺 𑀘𑀺𑀢𑁆𑀢𑀁 𑀫𑀼𑀤𑀼𑀜𑁆𑀘 𑀓𑀫𑁆𑀫𑀦𑀺𑀬𑀜𑁆𑀘 𑀧𑀪𑀲𑁆𑀲𑀭𑀜𑁆𑀘, 𑀦 𑀘 𑀧𑀪𑀗𑁆𑀕𑀼, 𑀲𑀫𑁆𑀫𑀸 𑀲𑀫𑀸𑀥𑀺𑀬𑀢𑀺 𑀆𑀲𑀯𑀸𑀦𑀁 𑀔𑀬𑀸𑀬.

‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀲𑀼𑀯𑀡𑁆𑀡𑀓𑀸𑀭𑁄 𑀯𑀸 𑀲𑀼𑀯𑀡𑁆𑀡𑀓𑀸𑀭𑀦𑁆𑀢𑁂𑀯𑀸𑀲𑀻 𑀯𑀸 𑀉𑀓𑁆𑀓𑀁 𑀩𑀦𑁆𑀥𑁂𑀬𑁆𑀬 [𑀩𑀦𑁆𑀥𑀢𑀺… 𑀆𑀮𑀺𑀫𑁆𑀧𑀢𑀺 (𑀯𑀺𑀲𑀼𑀤𑁆𑀥𑀺. 𑁧.𑁧𑁮𑁧 𑀢𑀁𑀝𑀻𑀓𑀸𑀬𑀁 𑀘) 𑀫. 𑀦𑀺. 𑀅𑀝𑁆𑀞. 𑁧.𑁭𑁬; 𑀫. 𑀦𑀺. 𑁩.𑁩𑁬𑁦 𑀢𑀁𑀅𑀝𑁆𑀞𑀓𑀣𑀸𑀝𑀻𑀓𑀸𑀲𑀼 𑀘 𑀧𑀲𑁆𑀲𑀺𑀢𑀩𑁆𑀩𑀁], 𑀉𑀓𑁆𑀓𑀁 𑀩𑀦𑁆𑀥𑀺𑀢𑁆𑀯𑀸 𑀉𑀓𑁆𑀓𑀸𑀫𑀼𑀔𑀁 𑀆𑀮𑀺𑀫𑁆𑀧𑁂𑀬𑁆𑀬, 𑀉𑀓𑁆𑀓𑀸𑀫𑀼𑀔𑀁 𑀆𑀮𑀺𑀫𑁆𑀧𑁂𑀢𑁆𑀯𑀸 𑀲𑀡𑁆𑀟𑀸𑀲𑁂𑀦 𑀚𑀸𑀢𑀭𑀽𑀧𑀁 𑀕𑀳𑁂𑀢𑁆𑀯𑀸 𑀉𑀓𑁆𑀓𑀸𑀫𑀼𑀔𑁂 𑀧𑀓𑁆𑀔𑀺𑀧𑁂𑀬𑁆𑀬 [𑀧𑀓𑁆𑀔𑀺𑀧𑀢𑀺 (𑀯𑀺𑀲𑀼𑀤𑁆𑀥𑀺. 𑁧.𑁧𑁮𑁧)], 𑀉𑀓𑁆𑀓𑀸𑀫𑀼𑀔𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀓𑀸𑀮𑁂𑀦 𑀓𑀸𑀮𑀁 𑀅𑀪𑀺𑀥𑀫𑀢𑀺, 𑀓𑀸𑀮𑁂𑀦 𑀓𑀸𑀮𑀁 𑀉𑀤𑀓𑁂𑀦 𑀧𑀭𑀺𑀧𑁆𑀨𑁄𑀲𑁂𑀢𑀺, 𑀓𑀸𑀮𑁂𑀦 𑀓𑀸𑀮𑀁 𑀅𑀚𑁆𑀛𑀼𑀧𑁂𑀓𑁆𑀔𑀢𑀺. 𑀲𑀘𑁂, 𑀪𑀺𑀓𑁆𑀔𑀯𑁂, 𑀲𑀼𑀯𑀡𑁆𑀡𑀓𑀸𑀭𑁄 𑀯𑀸 𑀲𑀼𑀯𑀡𑁆𑀡𑀓𑀸𑀭𑀦𑁆𑀢𑁂𑀯𑀸𑀲𑀻 𑀯𑀸 𑀢𑀁 𑀚𑀸𑀢𑀭𑀽𑀧𑀁 𑀏𑀓𑀦𑁆𑀢𑀁 𑀅𑀪𑀺𑀥𑀫𑁂𑀬𑁆𑀬, 𑀞𑀸𑀦𑀁 𑀢𑀁 𑀚𑀸𑀢𑀭𑀽𑀧𑀁 𑀟𑀳𑁂𑀬𑁆𑀬. 𑀲𑀘𑁂, 𑀪𑀺𑀓𑁆𑀔𑀯𑁂, 𑀲𑀼𑀯𑀡𑁆𑀡𑀓𑀸𑀭𑁄 𑀯𑀸 𑀲𑀼𑀯𑀡𑁆𑀡𑀓𑀸𑀭𑀦𑁆𑀢𑁂𑀯𑀸𑀲𑀻 𑀯𑀸 𑀢𑀁 𑀚𑀸𑀢𑀭𑀽𑀧𑀁 𑀏𑀓𑀦𑁆𑀢𑀁 𑀉𑀤𑀓𑁂𑀦 𑀧𑀭𑀺𑀧𑁆𑀨𑁄𑀲𑁂𑀬𑁆𑀬, 𑀞𑀸𑀦𑀁 𑀢𑀁 𑀚𑀸𑀢𑀭𑀽𑀧𑀁 𑀦𑀺𑀩𑁆𑀩𑀸𑀧𑁂𑀬𑁆𑀬 [𑀦𑀺𑀩𑁆𑀩𑀸𑀬𑁂𑀬𑁆𑀬 (𑀲𑀻.)]. 𑀲𑀘𑁂, 𑀪𑀺𑀓𑁆𑀔𑀯𑁂, 𑀲𑀼𑀯𑀡𑁆𑀡𑀓𑀸𑀭𑁄 𑀯𑀸 𑀲𑀼𑀯𑀡𑁆𑀡𑀓𑀸𑀭𑀦𑁆𑀢𑁂𑀯𑀸𑀲𑀻 𑀯𑀸 𑀢𑀁 𑀚𑀸𑀢𑀭𑀽𑀧𑀁 𑀏𑀓𑀦𑁆𑀢𑀁 𑀅𑀚𑁆𑀛𑀼𑀧𑁂𑀓𑁆𑀔𑁂𑀬𑁆𑀬, 𑀞𑀸𑀦𑀁 𑀢𑀁 𑀚𑀸𑀢𑀭𑀽𑀧𑀁 𑀦 𑀲𑀫𑁆𑀫𑀸 𑀧𑀭𑀺𑀧𑀸𑀓𑀁 𑀕𑀘𑁆𑀙𑁂𑀬𑁆𑀬. 𑀬𑀢𑁄 𑀘 𑀔𑁄, 𑀪𑀺𑀓𑁆𑀔𑀯𑁂, 𑀲𑀼𑀯𑀡𑁆𑀡𑀓𑀸𑀭𑁄 𑀯𑀸 𑀲𑀼𑀯𑀡𑁆𑀡𑀓𑀸𑀭𑀦𑁆𑀢𑁂𑀯𑀸𑀲𑀻 𑀯𑀸 𑀢𑀁 𑀚𑀸𑀢𑀭𑀽𑀧𑀁 𑀓𑀸𑀮𑁂𑀦 𑀓𑀸𑀮𑀁 𑀅𑀪𑀺𑀥𑀫𑀢𑀺, 𑀓𑀸𑀮𑁂𑀦 𑀓𑀸𑀮𑀁 𑀉𑀤𑀓𑁂𑀦 𑀧𑀭𑀺𑀧𑁆𑀨𑁄𑀲𑁂𑀢𑀺, 𑀓𑀸𑀮𑁂𑀦 𑀓𑀸𑀮𑀁 𑀅𑀚𑁆𑀛𑀼𑀧𑁂𑀓𑁆𑀔𑀢𑀺, 𑀢𑀁 𑀳𑁄𑀢𑀺 𑀚𑀸𑀢𑀭𑀽𑀧𑀁 𑀫𑀼𑀤𑀼𑀜𑁆𑀘 𑀓𑀫𑁆𑀫𑀦𑀺𑀬𑀜𑁆𑀘 𑀧𑀪𑀲𑁆𑀲𑀭𑀜𑁆𑀘, 𑀦 𑀘 𑀧𑀪𑀗𑁆𑀕𑀼, 𑀲𑀫𑁆𑀫𑀸 𑀉𑀧𑁂𑀢𑀺 𑀓𑀫𑁆𑀫𑀸𑀬. 𑀬𑀲𑁆𑀲𑀸 𑀬𑀲𑁆𑀲𑀸 𑀘 𑀧𑀺𑀮𑀦𑁆𑀥𑀦𑀯𑀺𑀓𑀢𑀺𑀬𑀸 𑀆𑀓𑀗𑁆𑀔𑀢𑀺 𑁋 𑀬𑀤𑀺 𑀧𑀝𑁆𑀝𑀺𑀓𑀸𑀬, 𑀬𑀤𑀺 𑀓𑀼𑀡𑁆𑀟𑀮𑀸𑀬, 𑀬𑀤𑀺 𑀕𑀻𑀯𑁂𑀬𑁆𑀬𑀓𑁂, 𑀬𑀤𑀺 𑀲𑀼𑀯𑀡𑁆𑀡𑀫𑀸𑀮𑀸𑀬 𑁋 𑀢𑀜𑁆𑀘𑀲𑁆𑀲 𑀅𑀢𑁆𑀣𑀁 𑀅𑀦𑀼𑀪𑁄𑀢𑀺.

‘‘𑀏𑀯𑀫𑁂𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀅𑀥𑀺𑀘𑀺𑀢𑁆𑀢𑀫𑀦𑀼𑀬𑀼𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀢𑀻𑀡𑀺 𑀦𑀺𑀫𑀺𑀢𑁆𑀢𑀸𑀦𑀺 𑀓𑀸𑀮𑁂𑀦 𑀓𑀸𑀮𑀁 𑀫𑀦𑀲𑀺 𑀓𑀸𑀢𑀩𑁆𑀩𑀸𑀦𑀺 𑁋 𑀓𑀸𑀮𑁂𑀦 𑀓𑀸𑀮𑀁 𑀲𑀫𑀸𑀥𑀺𑀦𑀺𑀫𑀺𑀢𑁆𑀢𑀁 𑀫𑀦𑀲𑀺 𑀓𑀸𑀢𑀩𑁆𑀩𑀁, 𑀓𑀸𑀮𑁂𑀦 𑀓𑀸𑀮𑀁 𑀧𑀕𑁆𑀕𑀳𑀦𑀺𑀫𑀺𑀢𑁆𑀢𑀁 𑀫𑀦𑀲𑀺 𑀓𑀸𑀢𑀩𑁆𑀩𑀁, 𑀓𑀸𑀮𑁂𑀦 𑀓𑀸𑀮𑀁 𑀉𑀧𑁂𑀓𑁆𑀔𑀸𑀦𑀺𑀫𑀺𑀢𑁆𑀢𑀁 𑀫𑀦𑀲𑀺 𑀓𑀸𑀢𑀩𑁆𑀩𑀁. 𑀲𑀘𑁂, 𑀪𑀺𑀓𑁆𑀔𑀯𑁂, 𑀅𑀥𑀺𑀘𑀺𑀢𑁆𑀢𑀫𑀦𑀼𑀬𑀼𑀢𑁆𑀢𑁄 𑀪𑀺𑀓𑁆𑀔𑀼 𑀏𑀓𑀦𑁆𑀢𑀁 𑀲𑀫𑀸𑀥𑀺𑀦𑀺𑀫𑀺𑀢𑁆𑀢𑀁𑀬𑁂𑀯 𑀫𑀦𑀲𑀺 𑀓𑀭𑁂𑀬𑁆𑀬, 𑀞𑀸𑀦𑀁 𑀢𑀁 𑀘𑀺𑀢𑁆𑀢𑀁 𑀓𑁄𑀲𑀚𑁆𑀚𑀸𑀬 𑀲𑀁𑀯𑀢𑁆𑀢𑁂𑀬𑁆𑀬. 𑀲𑀘𑁂, 𑀪𑀺𑀓𑁆𑀔𑀯𑁂, 𑀅𑀥𑀺𑀘𑀺𑀢𑁆𑀢𑀫𑀦𑀼𑀬𑀼𑀢𑁆𑀢𑁄 𑀪𑀺𑀓𑁆𑀔𑀼 𑀏𑀓𑀦𑁆𑀢𑀁 𑀧𑀕𑁆𑀕𑀳𑀦𑀺𑀫𑀺𑀢𑁆𑀢𑀁𑀬𑁂𑀯 𑀫𑀦𑀲𑀺 𑀓𑀭𑁂𑀬𑁆𑀬, 𑀞𑀸𑀦𑀁 𑀢𑀁 𑀘𑀺𑀢𑁆𑀢𑀁 𑀉𑀤𑁆𑀥𑀘𑁆𑀘𑀸𑀬 𑀲𑀁𑀯𑀢𑁆𑀢𑁂𑀬𑁆𑀬. 𑀲𑀘𑁂, 𑀪𑀺𑀓𑁆𑀔𑀯𑁂, 𑀅𑀥𑀺𑀘𑀺𑀢𑁆𑀢𑀫𑀦𑀼𑀬𑀼𑀢𑁆𑀢𑁄 𑀪𑀺𑀓𑁆𑀔𑀼 𑀏𑀓𑀦𑁆𑀢𑀁 𑀉𑀧𑁂𑀓𑁆𑀔𑀸𑀦𑀺𑀫𑀺𑀢𑁆𑀢𑀁𑀬𑁂𑀯 𑀫𑀦𑀲𑀺 𑀓𑀭𑁂𑀬𑁆𑀬, 𑀞𑀸𑀦𑀁 𑀢𑀁 𑀘𑀺𑀢𑁆𑀢𑀁 𑀦 𑀲𑀫𑁆𑀫𑀸 𑀲𑀫𑀸𑀥𑀺𑀬𑁂𑀬𑁆𑀬 𑀆𑀲𑀯𑀸𑀦𑀁 𑀔𑀬𑀸𑀬. 𑀬𑀢𑁄 𑀘 𑀔𑁄, 𑀪𑀺𑀓𑁆𑀔𑀯𑁂, 𑀅𑀥𑀺𑀘𑀺𑀢𑁆𑀢𑀫𑀦𑀼𑀬𑀼𑀢𑁆𑀢𑁄 𑀪𑀺𑀓𑁆𑀔𑀼 𑀓𑀸𑀮𑁂𑀦 𑀓𑀸𑀮𑀁 𑀲𑀫𑀸𑀥𑀺𑀦𑀺𑀫𑀺𑀢𑁆𑀢𑀁 𑀫𑀦𑀲𑀺 𑀓𑀭𑁄𑀢𑀺, 𑀓𑀸𑀮𑁂𑀦 𑀓𑀸𑀮𑀁 𑀧𑀕𑁆𑀕𑀳𑀦𑀺𑀫𑀺𑀢𑁆𑀢𑀁 𑀫𑀦𑀲𑀺 𑀓𑀭𑁄𑀢𑀺, 𑀓𑀸𑀮𑁂𑀦 𑀓𑀸𑀮𑀁 𑀉𑀧𑁂𑀓𑁆𑀔𑀸𑀦𑀺𑀫𑀺𑀢𑁆𑀢𑀁 𑀫𑀦𑀲𑀺 𑀓𑀭𑁄𑀢𑀺, 𑀢𑀁 𑀳𑁄𑀢𑀺 𑀘𑀺𑀢𑁆𑀢𑀁 𑀫𑀼𑀤𑀼𑀜𑁆𑀘 𑀓𑀫𑁆𑀫𑀦𑀺𑀬𑀜𑁆𑀘 𑀧𑀪𑀲𑁆𑀲𑀭𑀜𑁆𑀘, 𑀦 𑀘 𑀧𑀪𑀗𑁆𑀕𑀼, 𑀲𑀫𑁆𑀫𑀸 𑀲𑀫𑀸𑀥𑀺𑀬𑀢𑀺 𑀆𑀲𑀯𑀸𑀦𑀁 𑀔𑀬𑀸𑀬. 𑀬𑀲𑁆𑀲 𑀬𑀲𑁆𑀲 𑀘 𑀅𑀪𑀺𑀜𑁆𑀜𑀸𑀲𑀘𑁆𑀙𑀺𑀓𑀭𑀡𑀻𑀬𑀲𑁆𑀲 𑀥𑀫𑁆𑀫𑀲𑁆𑀲 𑀘𑀺𑀢𑁆𑀢𑀁 𑀅𑀪𑀺𑀦𑀺𑀦𑁆𑀦𑀸𑀫𑁂𑀢𑀺 𑀅𑀪𑀺𑀜𑁆𑀜𑀸𑀲𑀘𑁆𑀙𑀺𑀓𑀺𑀭𑀺𑀬𑀸𑀬, 𑀢𑀢𑁆𑀭 𑀢𑀢𑁆𑀭𑁂𑀯 𑀲𑀓𑁆𑀔𑀺𑀪𑀩𑁆𑀩𑀢𑀁 𑀧𑀸𑀧𑀼𑀡𑀸𑀢𑀺 𑀲𑀢𑀺 𑀲𑀢𑀺𑀆𑀬𑀢𑀦𑁂.

‘‘𑀲𑁄 𑀲𑀘𑁂 𑀆𑀓𑀗𑁆𑀔𑀢𑀺 𑁋 ‘𑀅𑀦𑁂𑀓𑀯𑀺𑀳𑀺𑀢𑀁 𑀇𑀤𑁆𑀥𑀺𑀯𑀺𑀥𑀁 𑀧𑀘𑁆𑀘𑀦𑀼𑀪𑀯𑁂𑀬𑁆𑀬𑀁…𑀧𑁂… (𑀙 𑀅𑀪𑀺𑀜𑁆𑀜𑀸 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀸) 𑀆𑀲𑀯𑀸𑀦𑀁 𑀔𑀬𑀸…𑀧𑁂… 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑁂𑀬𑁆𑀬’𑀦𑁆𑀢𑀺, 𑀢𑀢𑁆𑀭 𑀢𑀢𑁆𑀭𑁂𑀯 𑀲𑀓𑁆𑀔𑀺𑀪𑀩𑁆𑀩𑀢𑀁 𑀧𑀸𑀧𑀼𑀡𑀸𑀢𑀺 𑀲𑀢𑀺 𑀲𑀢𑀺𑀆𑀬𑀢𑀦𑁂’’𑀢𑀺. 𑀏𑀓𑀸𑀤𑀲𑀫𑀁.

𑀮𑁄𑀡𑀓𑀧𑀮𑁆𑀮𑀯𑀕𑁆𑀕𑁄 [𑀮𑁄𑀡𑀨𑀮𑀯𑀕𑁆𑀕𑁄 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀧𑀜𑁆𑀘𑀫𑁄.