𑁨. 𑀕𑀤𑁆𑀭𑀪𑀲𑀼𑀢𑁆𑀢𑀁

𑁮𑁩. ‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀕𑀤𑁆𑀭𑀪𑁄 𑀕𑁄𑀕𑀡𑀁 𑀧𑀺𑀝𑁆𑀞𑀺𑀢𑁄 𑀧𑀺𑀝𑁆𑀞𑀺𑀢𑁄 𑀅𑀦𑀼𑀩𑀦𑁆𑀥𑁄 𑀳𑁄𑀢𑀺 𑁋 ‘𑀅𑀳𑀫𑁆𑀧𑀺 𑀤𑀫𑁆𑀫𑁄, 𑀅𑀳𑀫𑁆𑀧𑀺 𑀤𑀫𑁆𑀫𑁄’𑀢𑀺 [𑀅𑀳𑀫𑁆𑀧𑀺 𑀕𑁄 𑀅𑀫𑁆𑀳𑀸 𑀅𑀳𑀫𑁆𑀧𑀺 𑀕𑁄 𑀅𑀫𑁆𑀳𑀸𑀢𑀺 (𑀲𑀻.), 𑀅𑀳𑀫𑁆𑀧𑀺 𑀅𑀫𑁆𑀳𑀸 𑀅𑀳𑀫𑁆𑀧𑀺 𑀅𑀫𑁆𑀳𑀸𑀢𑀺 (𑀲𑁆𑀬𑀸. 𑀓𑀁. 𑀧𑀻.), 𑀅𑀳𑀫𑁆𑀧𑀺 𑀕𑁄 𑀅𑀳𑀫𑁆𑀧𑀺 𑀕𑁄𑀢𑀺 (?)]. 𑀢𑀲𑁆𑀲 𑀦 𑀢𑀸𑀤𑀺𑀲𑁄 𑀯𑀡𑁆𑀡𑁄 𑀳𑁄𑀢𑀺 𑀲𑁂𑀬𑁆𑀬𑀣𑀸𑀧𑀺 𑀕𑀼𑀦𑁆𑀦𑀁, 𑀦 𑀢𑀸𑀤𑀺𑀲𑁄 𑀲𑀭𑁄 𑀳𑁄𑀢𑀺 𑀲𑁂𑀬𑁆𑀬𑀣𑀸𑀧𑀺 𑀕𑀼𑀦𑁆𑀦𑀁, 𑀦 𑀢𑀸𑀤𑀺𑀲𑀁 𑀧𑀤𑀁 𑀳𑁄𑀢𑀺 𑀲𑁂𑀬𑁆𑀬𑀣𑀸𑀧𑀺 𑀕𑀼𑀦𑁆𑀦𑀁. 𑀲𑁄 𑀕𑁄𑀕𑀡𑀁𑀬𑁂𑀯 𑀧𑀺𑀝𑁆𑀞𑀺𑀢𑁄 𑀧𑀺𑀝𑁆𑀞𑀺𑀢𑁄 𑀅𑀦𑀼𑀩𑀦𑁆𑀥𑁄 𑀳𑁄𑀢𑀺 𑁋 ‘𑀅𑀳𑀫𑁆𑀧𑀺 𑀤𑀫𑁆𑀫𑁄, 𑀅𑀳𑀫𑁆𑀧𑀺 𑀤𑀫𑁆𑀫𑁄’’’𑀢𑀺.

‘‘𑀏𑀯𑀫𑁂𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀇𑀥𑁂𑀓𑀘𑁆𑀘𑁄 𑀪𑀺𑀓𑁆𑀔𑀼 𑀪𑀺𑀓𑁆𑀔𑀼𑀲𑀗𑁆𑀖𑀁 𑀧𑀺𑀝𑁆𑀞𑀺𑀢𑁄 𑀧𑀺𑀝𑁆𑀞𑀺𑀢𑁄 𑀅𑀦𑀼𑀩𑀦𑁆𑀥𑁄 𑀳𑁄𑀢𑀺 𑁋 ‘𑀅𑀳𑀫𑁆𑀧𑀺 𑀪𑀺𑀓𑁆𑀔𑀼, 𑀅𑀳𑀫𑁆𑀧𑀺 𑀪𑀺𑀓𑁆𑀔𑀽’𑀢𑀺. 𑀢𑀲𑁆𑀲 𑀦 𑀢𑀸𑀤𑀺𑀲𑁄 𑀙𑀦𑁆𑀤𑁄 𑀳𑁄𑀢𑀺 𑀅𑀥𑀺𑀲𑀻𑀮𑀲𑀺𑀓𑁆𑀔𑀸𑀲𑀫𑀸𑀤𑀸𑀦𑁂 𑀲𑁂𑀬𑁆𑀬𑀣𑀸𑀧𑀺 𑀅𑀜𑁆𑀜𑁂𑀲𑀁 𑀪𑀺𑀓𑁆𑀔𑀽𑀦𑀁, 𑀦 𑀢𑀸𑀤𑀺𑀲𑁄 𑀙𑀦𑁆𑀤𑁄 𑀳𑁄𑀢𑀺 𑀅𑀥𑀺𑀘𑀺𑀢𑁆𑀢𑀲𑀺𑀓𑁆𑀔𑀸𑀲𑀫𑀸𑀤𑀸𑀦𑁂 𑀲𑁂𑀬𑁆𑀬𑀣𑀸𑀧𑀺 𑀅𑀜𑁆𑀜𑁂𑀲𑀁 𑀪𑀺𑀓𑁆𑀔𑀽𑀦𑀁, 𑀦 𑀢𑀸𑀤𑀺𑀲𑁄 𑀙𑀦𑁆𑀤𑁄 𑀳𑁄𑀢𑀺 𑀅𑀥𑀺𑀧𑀜𑁆𑀜𑀸𑀲𑀺𑀓𑁆𑀔𑀸𑀲𑀫𑀸𑀤𑀸𑀦𑁂 𑀲𑁂𑀬𑁆𑀬𑀣𑀸𑀧𑀺 𑀅𑀜𑁆𑀜𑁂𑀲𑀁 𑀪𑀺𑀓𑁆𑀔𑀽𑀦𑀁. 𑀲𑁄 𑀪𑀺𑀓𑁆𑀔𑀼𑀲𑀗𑁆𑀖𑀁𑀬𑁂𑀯 𑀧𑀺𑀝𑁆𑀞𑀺𑀢𑁄 𑀧𑀺𑀝𑁆𑀞𑀺𑀢𑁄 𑀅𑀦𑀼𑀩𑀦𑁆𑀥𑁄 𑀳𑁄𑀢𑀺 𑁋 ‘𑀅𑀳𑀫𑁆𑀧𑀺 𑀪𑀺𑀓𑁆𑀔𑀼, 𑀅𑀳𑀫𑁆𑀧𑀺 𑀪𑀺𑀓𑁆𑀔𑀽’’’𑀢𑀺.

‘‘𑀢𑀲𑁆𑀫𑀸𑀢𑀺𑀳, 𑀪𑀺𑀓𑁆𑀔𑀯𑁂, 𑀏𑀯𑀁 𑀲𑀺𑀓𑁆𑀔𑀺𑀢𑀩𑁆𑀩𑀁 𑁋 ‘𑀢𑀺𑀩𑁆𑀩𑁄 𑀦𑁄 𑀙𑀦𑁆𑀤𑁄 𑀪𑀯𑀺𑀲𑁆𑀲𑀢𑀺 𑀅𑀥𑀺𑀲𑀻𑀮𑀲𑀺𑀓𑁆𑀔𑀸𑀲𑀫𑀸𑀤𑀸𑀦𑁂, 𑀢𑀺𑀩𑁆𑀩𑁄 𑀦𑁄 𑀙𑀦𑁆𑀤𑁄 𑀪𑀯𑀺𑀲𑁆𑀲𑀢𑀺 𑀅𑀥𑀺𑀘𑀺𑀢𑁆𑀢𑀲𑀺𑀓𑁆𑀔𑀸𑀲𑀫𑀸𑀤𑀸𑀦𑁂, 𑀢𑀺𑀩𑁆𑀩𑁄 𑀦𑁄 𑀙𑀦𑁆𑀤𑁄 𑀪𑀯𑀺𑀲𑁆𑀲𑀢𑀺 𑀅𑀥𑀺𑀧𑀜𑁆𑀜𑀸𑀲𑀺𑀓𑁆𑀔𑀸𑀲𑀫𑀸𑀤𑀸𑀦𑁂’𑀢𑀺. 𑀏𑀯𑀜𑁆𑀳𑀺 𑀯𑁄, 𑀪𑀺𑀓𑁆𑀔𑀯𑁂, 𑀲𑀺𑀓𑁆𑀔𑀺𑀢𑀩𑁆𑀩’’𑀦𑁆𑀢𑀺. 𑀤𑀼𑀢𑀺𑀬𑀁.