𑁫. 𑀧𑀡𑁆𑀟𑀺𑀢𑀲𑀼𑀢𑁆𑀢𑀁

𑁪𑁫. ‘‘𑀢𑀻𑀡𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀧𑀡𑁆𑀟𑀺𑀢𑀧𑀜𑁆𑀜𑀢𑁆𑀢𑀸𑀦𑀺 𑀲𑀧𑁆𑀧𑀼𑀭𑀺𑀲𑀧𑀜𑁆𑀜𑀢𑁆𑀢𑀸𑀦𑀺. 𑀓𑀢𑀫𑀸𑀦𑀺 𑀢𑀻𑀡𑀺? 𑀤𑀸𑀦𑀁, 𑀪𑀺𑀓𑁆𑀔𑀯𑁂, 𑀧𑀡𑁆𑀟𑀺𑀢𑀧𑀜𑁆𑀜𑀢𑁆𑀢𑀁 𑀲𑀧𑁆𑀧𑀼𑀭𑀺𑀲𑀧𑀜𑁆𑀜𑀢𑁆𑀢𑀁. 𑀧𑀩𑁆𑀩𑀚𑁆𑀚𑀸, 𑀪𑀺𑀓𑁆𑀔𑀯𑁂, 𑀧𑀡𑁆𑀟𑀺𑀢𑀧𑀜𑁆𑀜𑀢𑁆𑀢𑀸 𑀲𑀧𑁆𑀧𑀼𑀭𑀺𑀲𑀧𑀜𑁆𑀜𑀢𑁆𑀢𑀸. 𑀫𑀸𑀢𑀸𑀧𑀺𑀢𑀽𑀦𑀁, 𑀪𑀺𑀓𑁆𑀔𑀯𑁂, 𑀉𑀧𑀝𑁆𑀞𑀸𑀦𑀁 𑀧𑀡𑁆𑀟𑀺𑀢𑀧𑀜𑁆𑀜𑀢𑁆𑀢𑀁 𑀲𑀧𑁆𑀧𑀼𑀭𑀺𑀲𑀧𑀜𑁆𑀜𑀢𑁆𑀢𑀁. 𑀇𑀫𑀸𑀦𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀻𑀡𑀺 𑀧𑀡𑁆𑀟𑀺𑀢𑀧𑀜𑁆𑀜𑀢𑁆𑀢𑀸𑀦𑀺 𑀲𑀧𑁆𑀧𑀼𑀭𑀺𑀲𑀧𑀜𑁆𑀜𑀢𑁆𑀢𑀸𑀦𑀻’’𑀢𑀺.

‘‘𑀲𑀩𑁆𑀪𑀺 𑀤𑀸𑀦𑀁 𑀉𑀧𑀜𑁆𑀜𑀢𑁆𑀢𑀁, 𑀅𑀳𑀺𑀁𑀲𑀸 𑀲𑀁𑀬𑀫𑁄 𑀤𑀫𑁄;

𑀫𑀸𑀢𑀸𑀧𑀺𑀢𑀼 𑀉𑀧𑀝𑁆𑀞𑀸𑀦𑀁, 𑀲𑀦𑁆𑀢𑀸𑀦𑀁 𑀩𑁆𑀭𑀳𑁆𑀫𑀘𑀸𑀭𑀺𑀦𑀁.

‘‘𑀲𑀢𑀁 𑀏𑀢𑀸𑀦𑀺 𑀞𑀸𑀦𑀸𑀦𑀺, 𑀬𑀸𑀦𑀺 𑀲𑁂𑀯𑁂𑀣 𑀧𑀡𑁆𑀟𑀺𑀢𑁄;

𑀅𑀭𑀺𑀬𑁄 𑀤𑀲𑁆𑀲𑀦𑀲𑀫𑁆𑀧𑀦𑁆𑀦𑁄, 𑀲 𑀮𑁄𑀓𑀁 𑀪𑀚𑀢𑁂 𑀲𑀺𑀯’’𑀦𑁆𑀢𑀺. 𑀧𑀜𑁆𑀘𑀫𑀁;