(𑁧𑁧) 𑁧. 𑀆𑀲𑀸𑀤𑀼𑀧𑁆𑀧𑀚𑀳𑀯𑀕𑁆𑀕𑁄

𑁧𑁧𑁯. ‘‘𑀤𑁆𑀯𑁂𑀫𑀸, 𑀪𑀺𑀓𑁆𑀔𑀯𑁂, 𑀆𑀲𑀸 𑀤𑀼𑀧𑁆𑀧𑀚𑀳𑀸. 𑀓𑀢𑀫𑀸 𑀤𑁆𑀯𑁂? 𑀮𑀸𑀪𑀸𑀲𑀸 𑀘 𑀚𑀻𑀯𑀺𑀢𑀸𑀲𑀸 𑀘. 𑀇𑀫𑀸 𑀔𑁄, 𑀪𑀺𑀓𑁆𑀔𑀯𑁂, 𑀤𑁆𑀯𑁂 𑀆𑀲𑀸 𑀤𑀼𑀧𑁆𑀧𑀚𑀳𑀸’’𑀢𑀺.

𑁧𑁨𑁦. ‘‘𑀤𑁆𑀯𑁂𑀫𑁂, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑀸 𑀤𑀼𑀮𑁆𑀮𑀪𑀸 𑀮𑁄𑀓𑀲𑁆𑀫𑀺𑀁. 𑀓𑀢𑀫𑁂 𑀤𑁆𑀯𑁂? 𑀬𑁄 𑀘 𑀧𑀼𑀩𑁆𑀩𑀓𑀸𑀭𑀻, 𑀬𑁄 𑀘 𑀓𑀢𑀜𑁆𑀜𑀽 𑀓𑀢𑀯𑁂𑀤𑀻. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀤𑁆𑀯𑁂 𑀧𑀼𑀕𑁆𑀕𑀮𑀸 𑀤𑀼𑀮𑁆𑀮𑀪𑀸 𑀮𑁄𑀓𑀲𑁆𑀫𑀺’’𑀦𑁆𑀢𑀺.

𑁧𑁨𑁧. ‘‘𑀤𑁆𑀯𑁂𑀫𑁂, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑀸 𑀤𑀼𑀮𑁆𑀮𑀪𑀸 𑀮𑁄𑀓𑀲𑁆𑀫𑀺𑀁. 𑀓𑀢𑀫𑁂 𑀤𑁆𑀯𑁂? 𑀢𑀺𑀢𑁆𑀢𑁄 𑀘 𑀢𑀧𑁆𑀧𑁂𑀢𑀸 𑀘. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀤𑁆𑀯𑁂 𑀧𑀼𑀕𑁆𑀕𑀮𑀸 𑀤𑀼𑀮𑁆𑀮𑀪𑀸 𑀮𑁄𑀓𑀲𑁆𑀫𑀺’’𑀦𑁆𑀢𑀺.

𑁧𑁨𑁨. ‘‘𑀤𑁆𑀯𑁂𑀫𑁂, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑀸 𑀤𑀼𑀢𑁆𑀢𑀧𑁆𑀧𑀬𑀸. 𑀓𑀢𑀫𑁂 𑀤𑁆𑀯𑁂? 𑀬𑁄 𑀘 𑀮𑀤𑁆𑀥𑀁 𑀮𑀤𑁆𑀥𑀁 𑀦𑀺𑀓𑁆𑀔𑀺𑀧𑀢𑀺, 𑀬𑁄 𑀘 𑀮𑀤𑁆𑀥𑀁 𑀮𑀤𑁆𑀥𑀁 𑀯𑀺𑀲𑁆𑀲𑀚𑁆𑀚𑁂𑀢𑀺. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀤𑁆𑀯𑁂 𑀧𑀼𑀕𑁆𑀕𑀮𑀸 𑀤𑀼𑀢𑁆𑀢𑀧𑁆𑀧𑀬𑀸’’𑀢𑀺.

𑁧𑁨𑁩. ‘‘𑀤𑁆𑀯𑁂𑀫𑁂, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑀸 𑀲𑀼𑀢𑀧𑁆𑀧𑀬𑀸. 𑀓𑀢𑀫𑁂 𑀤𑁆𑀯𑁂? 𑀬𑁄 𑀘 𑀮𑀤𑁆𑀥𑀁 𑀮𑀤𑁆𑀥𑀁 𑀦 𑀦𑀺𑀓𑁆𑀔𑀺𑀧𑀢𑀺, 𑀬𑁄 𑀘 𑀮𑀤𑁆𑀥𑀁 𑀮𑀤𑁆𑀥𑀁 𑀦 𑀯𑀺𑀲𑁆𑀲𑀚𑁆𑀚𑁂𑀢𑀺. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀤𑁆𑀯𑁂 𑀧𑀼𑀕𑁆𑀕𑀮𑀸 𑀲𑀼𑀢𑀧𑁆𑀧𑀬𑀸’’𑀢𑀺.

𑁧𑁨𑁪. ‘‘𑀤𑁆𑀯𑁂𑀫𑁂, 𑀪𑀺𑀓𑁆𑀔𑀯𑁂, 𑀧𑀘𑁆𑀘𑀬𑀸 𑀭𑀸𑀕𑀲𑁆𑀲 𑀉𑀧𑁆𑀧𑀸𑀤𑀸𑀬. 𑀓𑀢𑀫𑁂 𑀤𑁆𑀯𑁂? 𑀲𑀼𑀪𑀦𑀺𑀫𑀺𑀢𑁆𑀢𑀜𑁆𑀘 𑀅𑀬𑁄𑀦𑀺𑀲𑁄 𑀘 𑀫𑀦𑀲𑀺𑀓𑀸𑀭𑁄. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀤𑁆𑀯𑁂 𑀧𑀘𑁆𑀘𑀬𑀸 𑀭𑀸𑀕𑀲𑁆𑀲 𑀉𑀧𑁆𑀧𑀸𑀤𑀸𑀬𑀸’’𑀢𑀺.

𑁧𑁨𑁫. ‘‘𑀤𑁆𑀯𑁂𑀫𑁂, 𑀪𑀺𑀓𑁆𑀔𑀯𑁂, 𑀧𑀘𑁆𑀘𑀬𑀸 𑀤𑁄𑀲𑀲𑁆𑀲 𑀉𑀧𑁆𑀧𑀸𑀤𑀸𑀬. 𑀓𑀢𑀫𑁂 𑀤𑁆𑀯𑁂? 𑀧𑀝𑀺𑀖𑀦𑀺𑀫𑀺𑀢𑁆𑀢𑀜𑁆𑀘 𑀅𑀬𑁄𑀦𑀺𑀲𑁄 𑀘 𑀫𑀦𑀲𑀺𑀓𑀸𑀭𑁄. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀤𑁆𑀯𑁂 𑀧𑀘𑁆𑀘𑀬𑀸 𑀤𑁄𑀲𑀲𑁆𑀲 𑀉𑀧𑁆𑀧𑀸𑀤𑀸𑀬𑀸’’𑀢𑀺.

𑁧𑁨𑁬. ‘‘𑀤𑁆𑀯𑁂𑀫𑁂, 𑀪𑀺𑀓𑁆𑀔𑀯𑁂, 𑀧𑀘𑁆𑀘𑀬𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀬𑀸 𑀉𑀧𑁆𑀧𑀸𑀤𑀸𑀬. 𑀓𑀢𑀫𑁂 𑀤𑁆𑀯𑁂? 𑀧𑀭𑀢𑁄 𑀘 𑀖𑁄𑀲𑁄 𑀅𑀬𑁄𑀦𑀺𑀲𑁄 𑀘 𑀫𑀦𑀲𑀺𑀓𑀸𑀭𑁄. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀤𑁆𑀯𑁂 𑀧𑀘𑁆𑀘𑀬𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀬𑀸 𑀉𑀧𑁆𑀧𑀸𑀤𑀸𑀬𑀸’’𑀢𑀺.

𑁧𑁨𑁭. ‘‘𑀤𑁆𑀯𑁂𑀫𑁂, 𑀪𑀺𑀓𑁆𑀔𑀯𑁂, 𑀧𑀘𑁆𑀘𑀬𑀸 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀉𑀧𑁆𑀧𑀸𑀤𑀸𑀬. 𑀓𑀢𑀫𑁂 𑀤𑁆𑀯𑁂? 𑀧𑀭𑀢𑁄 𑀘 𑀖𑁄𑀲𑁄, 𑀬𑁄𑀦𑀺𑀲𑁄 𑀘 𑀫𑀦𑀲𑀺𑀓𑀸𑀭𑁄. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀤𑁆𑀯𑁂 𑀧𑀘𑁆𑀘𑀬𑀸 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀉𑀧𑁆𑀧𑀸𑀤𑀸𑀬𑀸’’𑀢𑀺.

𑁧𑁨𑁮. ‘‘𑀤𑁆𑀯𑁂𑀫𑀸, 𑀪𑀺𑀓𑁆𑀔𑀯𑁂, 𑀆𑀧𑀢𑁆𑀢𑀺𑀬𑁄. 𑀓𑀢𑀫𑀸 𑀤𑁆𑀯𑁂? 𑀮𑀳𑀼𑀓𑀸 𑀘 𑀆𑀧𑀢𑁆𑀢𑀺, 𑀕𑀭𑀼𑀓𑀸 𑀘 𑀆𑀧𑀢𑁆𑀢𑀺. 𑀇𑀫𑀸 𑀔𑁄, 𑀪𑀺𑀓𑁆𑀔𑀯𑁂, 𑀤𑁆𑀯𑁂 𑀆𑀧𑀢𑁆𑀢𑀺𑀬𑁄’’𑀢𑀺.

𑁧𑁨𑁯. ‘‘𑀤𑁆𑀯𑁂𑀫𑀸, 𑀪𑀺𑀓𑁆𑀔𑀯𑁂, 𑀆𑀧𑀢𑁆𑀢𑀺𑀬𑁄. 𑀓𑀢𑀫𑀸 𑀤𑁆𑀯𑁂? 𑀤𑀼𑀝𑁆𑀞𑀼𑀮𑁆𑀮𑀸 𑀘 𑀆𑀧𑀢𑁆𑀢𑀺, 𑀅𑀤𑀼𑀝𑁆𑀞𑀼𑀮𑁆𑀮𑀸 𑀘 𑀆𑀧𑀢𑁆𑀢𑀺. 𑀇𑀫𑀸 𑀔𑁄, 𑀪𑀺𑀓𑁆𑀔𑀯𑁂, 𑀤𑁆𑀯𑁂 𑀆𑀧𑀢𑁆𑀢𑀺𑀬𑁄’’𑀢𑀺.

𑁧𑁩𑁦. ‘‘𑀤𑁆𑀯𑁂𑀫𑀸, 𑀪𑀺𑀓𑁆𑀔𑀯𑁂, 𑀆𑀧𑀢𑁆𑀢𑀺𑀬𑁄. 𑀓𑀢𑀫𑀸 𑀤𑁆𑀯𑁂? 𑀲𑀸𑀯𑀲𑁂𑀲𑀸 𑀘 𑀆𑀧𑀢𑁆𑀢𑀺, 𑀅𑀦𑀯𑀲𑁂𑀲𑀸 𑀘 𑀆𑀧𑀢𑁆𑀢𑀺. 𑀇𑀫𑀸 𑀔𑁄, 𑀪𑀺𑀓𑁆𑀔𑀯𑁂, 𑀤𑁆𑀯𑁂 𑀆𑀧𑀢𑁆𑀢𑀺𑀬𑁄’’𑀢𑀺.

𑀆𑀲𑀸𑀤𑀼𑀧𑁆𑀧𑀚𑀳𑀯𑀕𑁆𑀕𑁄 𑀧𑀞𑀫𑁄.