𑁨. 𑀤𑀼𑀢𑀺𑀬𑀧𑀡𑁆𑀡𑀸𑀲𑀓𑀁

(𑁬) 𑁧. 𑀧𑀼𑀕𑁆𑀕𑀮𑀯𑀕𑁆𑀕𑁄

𑁫𑁩. ‘‘𑀤𑁆𑀯𑁂𑀫𑁂, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑀸 𑀮𑁄𑀓𑁂 𑀉𑀧𑁆𑀧𑀚𑁆𑀚𑀫𑀸𑀦𑀸 𑀉𑀧𑁆𑀧𑀚𑁆𑀚𑀦𑁆𑀢𑀺 𑀩𑀳𑀼𑀚𑀦𑀳𑀺𑀢𑀸𑀬 𑀩𑀳𑀼𑀚𑀦𑀲𑀼𑀔𑀸𑀬, 𑀩𑀳𑀼𑀦𑁄 𑀚𑀦𑀲𑁆𑀲 𑀅𑀢𑁆𑀣𑀸𑀬 𑀳𑀺𑀢𑀸𑀬 𑀲𑀼𑀔𑀸𑀬 𑀤𑁂𑀯𑀫𑀦𑀼𑀲𑁆𑀲𑀸𑀦𑀁. 𑀓𑀢𑀫𑁂 𑀤𑁆𑀯𑁂? 𑀢𑀣𑀸𑀕𑀢𑁄 𑀘 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄, 𑀭𑀸𑀚𑀸 𑀘 𑀘𑀓𑁆𑀓𑀯𑀢𑁆𑀢𑀻. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀤𑁆𑀯𑁂 𑀧𑀼𑀕𑁆𑀕𑀮𑀸 𑀮𑁄𑀓𑁂 𑀉𑀧𑁆𑀧𑀚𑁆𑀚𑀫𑀸𑀦𑀸 𑀉𑀧𑁆𑀧𑀚𑁆𑀚𑀦𑁆𑀢𑀺 𑀩𑀳𑀼𑀚𑀦𑀳𑀺𑀢𑀸𑀬 𑀩𑀳𑀼𑀚𑀦𑀲𑀼𑀔𑀸𑀬, 𑀩𑀳𑀼𑀦𑁄 𑀚𑀦𑀲𑁆𑀲 𑀅𑀢𑁆𑀣𑀸𑀬 𑀳𑀺𑀢𑀸𑀬 𑀲𑀼𑀔𑀸𑀬 𑀤𑁂𑀯𑀫𑀦𑀼𑀲𑁆𑀲𑀸𑀦’’𑀦𑁆𑀢𑀺.

𑁫𑁪. ‘‘𑀤𑁆𑀯𑁂𑀫𑁂, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑀸 𑀮𑁄𑀓𑁂 𑀉𑀧𑁆𑀧𑀚𑁆𑀚𑀫𑀸𑀦𑀸 𑀉𑀧𑁆𑀧𑀚𑁆𑀚𑀦𑁆𑀢𑀺 𑀅𑀘𑁆𑀙𑀭𑀺𑀬𑀫𑀦𑀼𑀲𑁆𑀲𑀸. 𑀓𑀢𑀫𑁂 𑀤𑁆𑀯𑁂? 𑀢𑀣𑀸𑀕𑀢𑁄 𑀘 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄, 𑀭𑀸𑀚𑀸 𑀘 𑀘𑀓𑁆𑀓𑀯𑀢𑁆𑀢𑀻. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀤𑁆𑀯𑁂 𑀧𑀼𑀕𑁆𑀕𑀮𑀸 𑀮𑁄𑀓𑁂 𑀉𑀧𑁆𑀧𑀚𑁆𑀚𑀫𑀸𑀦𑀸 𑀉𑀧𑁆𑀧𑀚𑁆𑀚𑀦𑁆𑀢𑀺 𑀅𑀘𑁆𑀙𑀭𑀺𑀬𑀫𑀦𑀼𑀲𑁆𑀲𑀸’’𑀢𑀺.

𑁫𑁫. ‘‘𑀤𑁆𑀯𑀺𑀦𑁆𑀦𑀁, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑀸𑀦𑀁 𑀓𑀸𑀮𑀓𑀺𑀭𑀺𑀬𑀸 𑀩𑀳𑀼𑀦𑁄 𑀚𑀦𑀲𑁆𑀲 𑀅𑀦𑀼𑀢𑀧𑁆𑀧𑀸 𑀳𑁄𑀢𑀺. 𑀓𑀢𑀫𑁂𑀲𑀁 𑀤𑁆𑀯𑀺𑀦𑁆𑀦𑀁? 𑀢𑀣𑀸𑀕𑀢𑀲𑁆𑀲 𑀘 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲, 𑀭𑀜𑁆𑀜𑁄 𑀘 𑀘𑀓𑁆𑀓𑀯𑀢𑁆𑀢𑀺𑀲𑁆𑀲. 𑀇𑀫𑁂𑀲𑀁 𑀔𑁄, 𑀪𑀺𑀓𑁆𑀔𑀯𑁂, 𑀤𑁆𑀯𑀺𑀦𑁆𑀦𑀁 𑀧𑀼𑀕𑁆𑀕𑀮𑀸𑀦𑀁 𑀓𑀸𑀮𑀓𑀺𑀭𑀺𑀬𑀸 𑀩𑀳𑀼𑀦𑁄 𑀚𑀦𑀲𑁆𑀲 𑀅𑀦𑀼𑀢𑀧𑁆𑀧𑀸 𑀳𑁄𑀢𑀻’’𑀢𑀺.

𑁫𑁬. ‘‘𑀤𑁆𑀯𑁂𑀫𑁂, 𑀪𑀺𑀓𑁆𑀔𑀯𑁂, 𑀣𑀽𑀧𑀸𑀭𑀳𑀸. 𑀓𑀢𑀫𑁂 𑀤𑁆𑀯𑁂? 𑀢𑀣𑀸𑀕𑀢𑁄 𑀘 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄, 𑀭𑀸𑀚𑀸 𑀘 𑀘𑀓𑁆𑀓𑀯𑀢𑁆𑀢𑀻. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀤𑁆𑀯𑁂 𑀣𑀽𑀧𑀸𑀭𑀳𑀸’’𑀢𑀺.

𑁫𑁭. ‘‘𑀤𑁆𑀯𑁂𑀫𑁂, 𑀪𑀺𑀓𑁆𑀔𑀯𑁂, 𑀩𑀼𑀤𑁆𑀥𑀸. 𑀓𑀢𑀫𑁂 𑀤𑁆𑀯𑁂? 𑀢𑀣𑀸𑀕𑀢𑁄 𑀘 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄, 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀘. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀤𑁆𑀯𑁂 𑀩𑀼𑀤𑁆𑀥𑀸’’𑀢𑀺.

𑁫𑁮. ‘‘𑀤𑁆𑀯𑁂𑀫𑁂, 𑀪𑀺𑀓𑁆𑀔𑀯𑁂, 𑀅𑀲𑀦𑀺𑀬𑀸 𑀨𑀮𑀦𑁆𑀢𑀺𑀬𑀸 𑀦 𑀲𑀦𑁆𑀢𑀲𑀦𑁆𑀢𑀺. 𑀓𑀢𑀫𑁂 𑀤𑁆𑀯𑁂? 𑀪𑀺𑀓𑁆𑀔𑀼 𑀘 𑀔𑀻𑀡𑀸𑀲𑀯𑁄, 𑀳𑀢𑁆𑀣𑀸𑀚𑀸𑀦𑀻𑀬𑁄 𑀘. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀤𑁆𑀯𑁂 𑀅𑀲𑀦𑀺𑀬𑀸 𑀨𑀮𑀦𑁆𑀢𑀺𑀬𑀸 𑀦 𑀲𑀦𑁆𑀢𑀲𑀦𑁆𑀢𑀻’’𑀢𑀺.

𑁫𑁯. ‘‘𑀤𑁆𑀯𑁂𑀫𑁂, 𑀪𑀺𑀓𑁆𑀔𑀯𑁂, 𑀅𑀲𑀦𑀺𑀬𑀸 𑀨𑀮𑀦𑁆𑀢𑀺𑀬𑀸 𑀦 𑀲𑀦𑁆𑀢𑀲𑀦𑁆𑀢𑀺. 𑀓𑀢𑀫𑁂 𑀤𑁆𑀯𑁂? 𑀪𑀺𑀓𑁆𑀔𑀼 𑀘 𑀔𑀻𑀡𑀸𑀲𑀯𑁄, 𑀅𑀲𑁆𑀲𑀸𑀚𑀸𑀦𑀻𑀬𑁄 𑀘. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀤𑁆𑀯𑁂 𑀅𑀲𑀦𑀺𑀬𑀸 𑀨𑀮𑀦𑁆𑀢𑀺𑀬𑀸 𑀦 𑀲𑀦𑁆𑀢𑀲𑀦𑁆𑀢𑀻’’𑀢𑀺.

𑁬𑁦. ‘‘𑀤𑁆𑀯𑁂𑀫𑁂, 𑀪𑀺𑀓𑁆𑀔𑀯𑁂, 𑀅𑀲𑀦𑀺𑀬𑀸 𑀨𑀮𑀦𑁆𑀢𑀺𑀬𑀸 𑀦 𑀲𑀦𑁆𑀢𑀲𑀦𑁆𑀢𑀺. 𑀓𑀢𑀫𑁂 𑀤𑁆𑀯𑁂? 𑀪𑀺𑀓𑁆𑀔𑀼 𑀘 𑀔𑀻𑀡𑀸𑀲𑀯𑁄, 𑀲𑀻𑀳𑁄 𑀘 𑀫𑀺𑀕𑀭𑀸𑀚𑀸. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀤𑁆𑀯𑁂 𑀅𑀲𑀦𑀺𑀬𑀸 𑀨𑀮𑀦𑁆𑀢𑀺𑀬𑀸 𑀦 𑀲𑀦𑁆𑀢𑀲𑀦𑁆𑀢𑀻’’𑀢𑀺.

𑁬𑁧. ‘‘𑀤𑁆𑀯𑁂𑀫𑁂, 𑀪𑀺𑀓𑁆𑀔𑀯𑁂, 𑀅𑀢𑁆𑀣𑀯𑀲𑁂 𑀲𑀫𑁆𑀧𑀲𑁆𑀲𑀫𑀸𑀦𑀸 𑀓𑀺𑀁𑀧𑀼𑀭𑀺𑀲𑀸 𑀫𑀸𑀦𑀼𑀲𑀺𑀁 𑀯𑀸𑀘𑀁 𑀦 𑀪𑀸𑀲𑀦𑁆𑀢𑀺. 𑀓𑀢𑀫𑁂 𑀤𑁆𑀯𑁂? 𑀫𑀸 𑀘 𑀫𑀼𑀲𑀸 𑀪𑀡𑀺𑀫𑁆𑀳𑀸, 𑀫𑀸 𑀘 𑀧𑀭𑀁 𑀅𑀪𑀽𑀢𑁂𑀦 𑀅𑀩𑁆𑀪𑀸𑀘𑀺𑀓𑁆𑀔𑀺𑀫𑁆𑀳𑀸𑀢𑀺. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀤𑁆𑀯𑁂 𑀅𑀢𑁆𑀣𑀯𑀲𑁂 𑀲𑀫𑁆𑀧𑀲𑁆𑀲𑀫𑀸𑀦𑀸 𑀓𑀺𑀁𑀧𑀼𑀭𑀺𑀲𑀸 𑀫𑀸𑀦𑀼𑀲𑀺𑀁 𑀯𑀸𑀘𑀁 𑀦 𑀪𑀸𑀲𑀦𑁆𑀢𑀻’’𑀢𑀺.

𑁬𑁨. ‘‘𑀤𑁆𑀯𑀺𑀦𑁆𑀦𑀁 𑀥𑀫𑁆𑀫𑀸𑀦𑀁, 𑀪𑀺𑀓𑁆𑀔𑀯𑁂, 𑀅𑀢𑀺𑀢𑁆𑀢𑁄 𑀅𑀧𑁆𑀧𑀝𑀺𑀯𑀸𑀦𑁄 𑀫𑀸𑀢𑀼𑀕𑀸𑀫𑁄 𑀓𑀸𑀮𑀁 𑀓𑀭𑁄𑀢𑀺. 𑀓𑀢𑀫𑁂𑀲𑀁 𑀤𑁆𑀯𑀺𑀦𑁆𑀦𑀁? 𑀫𑁂𑀣𑀼𑀦𑀲𑀫𑀸𑀧𑀢𑁆𑀢𑀺𑀬𑀸 𑀘 𑀯𑀺𑀚𑀸𑀬𑀦𑀲𑁆𑀲 𑀘. 𑀇𑀫𑁂𑀲𑀁 𑀔𑁄, 𑀪𑀺𑀓𑁆𑀔𑀯𑁂, 𑀤𑁆𑀯𑀺𑀦𑁆𑀦𑀁 𑀥𑀫𑁆𑀫𑀸𑀦𑀁 𑀅𑀢𑀺𑀢𑁆𑀢𑁄 𑀅𑀧𑁆𑀧𑀝𑀺𑀯𑀸𑀦𑁄 𑀫𑀸𑀢𑀼𑀕𑀸𑀫𑁄 𑀓𑀸𑀮𑀁 𑀓𑀭𑁄𑀢𑀻’’𑀢𑀺.

𑁬𑁩. ‘‘𑀅𑀲𑀦𑁆𑀢𑀲𑀦𑁆𑀦𑀺𑀯𑀸𑀲𑀜𑁆𑀘 𑀯𑁄, 𑀪𑀺𑀓𑁆𑀔𑀯𑁂, 𑀤𑁂𑀲𑁂𑀲𑁆𑀲𑀸𑀫𑀺 𑀲𑀦𑁆𑀢𑀲𑀦𑁆𑀦𑀺𑀯𑀸𑀲𑀜𑁆𑀘. 𑀢𑀁 𑀲𑀼𑀡𑀸𑀣, 𑀲𑀸𑀥𑀼𑀓𑀁 𑀫𑀦𑀲𑀺 𑀓𑀭𑁄𑀣; 𑀪𑀸𑀲𑀺𑀲𑁆𑀲𑀸𑀫𑀻’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀼𑀁. 𑀪𑀕𑀯𑀸 𑀏𑀢𑀤𑀯𑁄𑀘 𑁋

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀅𑀲𑀦𑁆𑀢𑀲𑀦𑁆𑀦𑀺𑀯𑀸𑀲𑁄 𑀳𑁄𑀢𑀺, 𑀓𑀣𑀜𑁆𑀘 𑀅𑀲𑀦𑁆𑀢𑁄 𑀲𑀦𑁆𑀦𑀺𑀯𑀲𑀦𑁆𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀣𑁂𑀭𑀲𑁆𑀲 𑀪𑀺𑀓𑁆𑀔𑀼𑀦𑁄 𑀏𑀯𑀁 𑀳𑁄𑀢𑀺 𑁋 ‘𑀣𑁂𑀭𑁄𑀧𑀺 𑀫𑀁 𑀦 𑀯𑀤𑁂𑀬𑁆𑀬, 𑀫𑀚𑁆𑀛𑀺𑀫𑁄𑀧𑀺 𑀫𑀁 𑀦 𑀯𑀤𑁂𑀬𑁆𑀬, 𑀦𑀯𑁄𑀧𑀺 𑀫𑀁 𑀦 𑀯𑀤𑁂𑀬𑁆𑀬; 𑀣𑁂𑀭𑀫𑁆𑀧𑀸𑀳𑀁 𑀦 𑀯𑀤𑁂𑀬𑁆𑀬𑀁, 𑀫𑀚𑁆𑀛𑀺𑀫𑀫𑁆𑀧𑀸𑀳𑀁 𑀦 𑀯𑀤𑁂𑀬𑁆𑀬𑀁, 𑀦𑀯𑀫𑁆𑀧𑀸𑀳𑀁 𑀦 𑀯𑀤𑁂𑀬𑁆𑀬𑀁. 𑀣𑁂𑀭𑁄 𑀘𑁂𑀧𑀺 𑀫𑀁 𑀯𑀤𑁂𑀬𑁆𑀬 𑀅𑀳𑀺𑀢𑀸𑀦𑀼𑀓𑀫𑁆𑀧𑀻 𑀫𑀁 𑀯𑀤𑁂𑀬𑁆𑀬 𑀦𑁄 𑀳𑀺𑀢𑀸𑀦𑀼𑀓𑀫𑁆𑀧𑀻, 𑀦𑁄𑀢𑀺 𑀦𑀁 𑀯𑀤𑁂𑀬𑁆𑀬𑀁 𑀯𑀺𑀳𑁂𑀞𑁂𑀬𑁆𑀬𑀁 [𑀯𑀺𑀳𑁂𑀲𑁂𑀬𑁆𑀬𑀁 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀧𑀲𑁆𑀲𑀫𑁆𑀧𑀺𑀲𑁆𑀲 𑀦𑀧𑁆𑀧𑀝𑀺𑀓𑀭𑁂𑀬𑁆𑀬𑀁. 𑀫𑀚𑁆𑀛𑀺𑀫𑁄 𑀘𑁂𑀧𑀺 𑀫𑀁 𑀯𑀤𑁂𑀬𑁆𑀬…𑀧𑁂… 𑀦𑀯𑁄 𑀘𑁂𑀧𑀺 𑀫𑀁 𑀯𑀤𑁂𑀬𑁆𑀬 𑀅𑀳𑀺𑀢𑀸𑀦𑀼𑀓𑀫𑁆𑀧𑀻 𑀫𑀁 𑀯𑀤𑁂𑀬𑁆𑀬 𑀦𑁄 𑀳𑀺𑀢𑀸𑀦𑀼𑀓𑀫𑁆𑀧𑀻, 𑀦𑁄𑀢𑀺 𑀦𑀁 𑀯𑀤𑁂𑀬𑁆𑀬𑀁 𑀯𑀺𑀳𑁂𑀞𑁂𑀬𑁆𑀬𑀁 𑀧𑀲𑁆𑀲𑀫𑁆𑀧𑀺𑀲𑁆𑀲 𑀦𑀧𑁆𑀧𑀝𑀺𑀓𑀭𑁂𑀬𑁆𑀬𑀁’. 𑀫𑀚𑁆𑀛𑀺𑀫𑀲𑁆𑀲𑀧𑀺 𑀪𑀺𑀓𑁆𑀔𑀼𑀦𑁄 𑀏𑀯𑀁 𑀳𑁄𑀢𑀺…𑀧𑁂… 𑀦𑀯𑀲𑁆𑀲𑀧𑀺 𑀪𑀺𑀓𑁆𑀔𑀼𑀦𑁄 𑀏𑀯𑀁 𑀳𑁄𑀢𑀺 𑁋 ‘𑀣𑁂𑀭𑁄𑀧𑀺 𑀫𑀁 𑀦 𑀯𑀤𑁂𑀬𑁆𑀬, 𑀫𑀚𑁆𑀛𑀺𑀫𑁄𑀧𑀺 𑀫𑀁 𑀦 𑀯𑀤𑁂𑀬𑁆𑀬, 𑀦𑀯𑁄𑀧𑀺 𑀫𑀁 𑀦 𑀯𑀤𑁂𑀬𑁆𑀬; 𑀣𑁂𑀭𑀫𑁆𑀧𑀸𑀳𑀁 𑀦 𑀯𑀤𑁂𑀬𑁆𑀬𑀁, 𑀫𑀚𑁆𑀛𑀺𑀫𑀫𑁆𑀧𑀸𑀳𑀁 𑀦 𑀯𑀤𑁂𑀬𑁆𑀬𑀁, 𑀦𑀯𑀫𑁆𑀧𑀸𑀳𑀁 𑀦 𑀯𑀤𑁂𑀬𑁆𑀬𑀁. 𑀣𑁂𑀭𑁄 𑀘𑁂𑀧𑀺 𑀫𑀁 𑀯𑀤𑁂𑀬𑁆𑀬 𑀅𑀳𑀺𑀢𑀸𑀦𑀼𑀓𑀫𑁆𑀧𑀻 𑀫𑀁 𑀯𑀤𑁂𑀬𑁆𑀬 𑀦𑁄 𑀳𑀺𑀢𑀸𑀦𑀼𑀓𑀫𑁆𑀧𑀻 𑀦𑁄𑀢𑀺 𑀦𑀁 𑀯𑀤𑁂𑀬𑁆𑀬𑀁 𑀯𑀺𑀳𑁂𑀞𑁂𑀬𑁆𑀬𑀁 𑀧𑀲𑁆𑀲𑀫𑁆𑀧𑀺𑀲𑁆𑀲 𑀦𑀧𑁆𑀧𑀝𑀺𑀓𑀭𑁂𑀬𑁆𑀬𑀁. 𑀫𑀚𑁆𑀛𑀺𑀫𑁄 𑀘𑁂𑀧𑀺 𑀫𑀁 𑀯𑀤𑁂𑀬𑁆𑀬…𑀧𑁂… 𑀦𑀯𑁄 𑀘𑁂𑀧𑀺 𑀫𑀁 𑀯𑀤𑁂𑀬𑁆𑀬 𑀅𑀳𑀺𑀢𑀸𑀦𑀼𑀓𑀫𑁆𑀧𑀻 𑀫𑀁 𑀯𑀤𑁂𑀬𑁆𑀬 𑀦𑁄 𑀳𑀺𑀢𑀸𑀦𑀼𑀓𑀫𑁆𑀧𑀻, 𑀦𑁄𑀢𑀺 𑀦𑀁 𑀯𑀤𑁂𑀬𑁆𑀬𑀁 𑀯𑀺𑀳𑁂𑀞𑁂𑀬𑁆𑀬𑀁 𑀧𑀲𑁆𑀲𑀫𑁆𑀧𑀺𑀲𑁆𑀲 𑀦𑀧𑁆𑀧𑀝𑀺𑀓𑀭𑁂𑀬𑁆𑀬𑀁’. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀅𑀲𑀦𑁆𑀢𑀲𑀦𑁆𑀦𑀺𑀯𑀸𑀲𑁄 𑀳𑁄𑀢𑀺, 𑀏𑀯𑀜𑁆𑀘 𑀅𑀲𑀦𑁆𑀢𑁄 𑀲𑀦𑁆𑀦𑀺𑀯𑀲𑀦𑁆𑀢𑀺.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀲𑀦𑁆𑀢𑀲𑀦𑁆𑀦𑀺𑀯𑀸𑀲𑁄 𑀳𑁄𑀢𑀺, 𑀓𑀣𑀜𑁆𑀘 𑀲𑀦𑁆𑀢𑁄 𑀲𑀦𑁆𑀦𑀺𑀯𑀲𑀦𑁆𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀣𑁂𑀭𑀲𑁆𑀲 𑀪𑀺𑀓𑁆𑀔𑀼𑀦𑁄 𑀏𑀯𑀁 𑀳𑁄𑀢𑀺 𑁋 ‘𑀣𑁂𑀭𑁄𑀧𑀺 𑀫𑀁 𑀯𑀤𑁂𑀬𑁆𑀬, 𑀫𑀚𑁆𑀛𑀺𑀫𑁄𑀧𑀺 𑀫𑀁 𑀯𑀤𑁂𑀬𑁆𑀬, 𑀦𑀯𑁄𑀧𑀺 𑀫𑀁 𑀯𑀤𑁂𑀬𑁆𑀬; 𑀣𑁂𑀭𑀫𑁆𑀧𑀸𑀳𑀁 𑀯𑀤𑁂𑀬𑁆𑀬𑀁, 𑀫𑀚𑁆𑀛𑀺𑀫𑀫𑁆𑀧𑀸𑀳𑀁 𑀯𑀤𑁂𑀬𑁆𑀬𑀁, 𑀦𑀯𑀫𑁆𑀧𑀸𑀳𑀁 𑀯𑀤𑁂𑀬𑁆𑀬𑀁. 𑀣𑁂𑀭𑁄 𑀘𑁂𑀧𑀺 𑀫𑀁 𑀯𑀤𑁂𑀬𑁆𑀬 𑀳𑀺𑀢𑀸𑀦𑀼𑀓𑀫𑁆𑀧𑀻 𑀫𑀁 𑀯𑀤𑁂𑀬𑁆𑀬 𑀦𑁄 𑀅𑀳𑀺𑀢𑀸𑀦𑀼𑀓𑀫𑁆𑀧𑀻, 𑀲𑀸𑀥𑀽𑀢𑀺 𑀦𑀁 𑀯𑀤𑁂𑀬𑁆𑀬𑀁 𑀦 𑀯𑀺𑀳𑁂𑀞𑁂𑀬𑁆𑀬𑀁 𑀧𑀲𑁆𑀲𑀫𑁆𑀧𑀺𑀲𑁆𑀲 𑀧𑀝𑀺𑀓𑀭𑁂𑀬𑁆𑀬𑀁. 𑀫𑀚𑁆𑀛𑀺𑀫𑁄 𑀘𑁂𑀧𑀺 𑀫𑀁 𑀯𑀤𑁂𑀬𑁆𑀬…𑀧𑁂… 𑀦𑀯𑁄 𑀘𑁂𑀧𑀺 𑀫𑀁 𑀯𑀤𑁂𑀬𑁆𑀬 𑀳𑀺𑀢𑀸𑀦𑀼𑀓𑀫𑁆𑀧𑀻 𑀫𑀁 𑀯𑀤𑁂𑀬𑁆𑀬 𑀦𑁄 𑀅𑀳𑀺𑀢𑀸𑀦𑀼𑀓𑀫𑁆𑀧𑀻, 𑀲𑀸𑀥𑀽𑀢𑀺 𑀦𑀁 𑀯𑀤𑁂𑀬𑁆𑀬𑀁 𑀦 𑀦𑀁 𑀯𑀺𑀳𑁂𑀞𑁂𑀬𑁆𑀬𑀁 𑀧𑀲𑁆𑀲𑀫𑁆𑀧𑀺𑀲𑁆𑀲 𑀧𑀝𑀺𑀓𑀭𑁂𑀬𑁆𑀬𑀁’. 𑀫𑀚𑁆𑀛𑀺𑀫𑀲𑁆𑀲𑀧𑀺 𑀪𑀺𑀓𑁆𑀔𑀼𑀦𑁄 𑀏𑀯𑀁 𑀳𑁄𑀢𑀺…𑀧𑁂… 𑀦𑀯𑀲𑁆𑀲𑀧𑀺 𑀪𑀺𑀓𑁆𑀔𑀼𑀦𑁄 𑀏𑀯𑀁 𑀳𑁄𑀢𑀺 𑁋 ‘𑀣𑁂𑀭𑁄𑀧𑀺 𑀫𑀁 𑀯𑀤𑁂𑀬𑁆𑀬, 𑀫𑀚𑁆𑀛𑀺𑀫𑁄𑀧𑀺 𑀫𑀁 𑀯𑀤𑁂𑀬𑁆𑀬, 𑀦𑀯𑁄𑀧𑀺 𑀫𑀁 𑀯𑀤𑁂𑀬𑁆𑀬; 𑀣𑁂𑀭𑀫𑁆𑀧𑀸𑀳𑀁 𑀯𑀤𑁂𑀬𑁆𑀬𑀁, 𑀫𑀚𑁆𑀛𑀺𑀫𑀫𑁆𑀧𑀸𑀳𑀁 𑀯𑀤𑁂𑀬𑁆𑀬𑀁, 𑀦𑀯𑀫𑁆𑀧𑀸𑀳𑀁 𑀯𑀤𑁂𑀬𑁆𑀬𑀁. 𑀣𑁂𑀭𑁄 𑀘𑁂𑀧𑀺 𑀫𑀁 𑀯𑀤𑁂𑀬𑁆𑀬 𑀳𑀺𑀢𑀸𑀦𑀼𑀓𑀫𑁆𑀧𑀻 𑀫𑀁 𑀯𑀤𑁂𑀬𑁆𑀬 𑀦𑁄 𑀅𑀳𑀺𑀢𑀸𑀦𑀼𑀓𑀫𑁆𑀧𑀻, 𑀲𑀸𑀥𑀽𑀢𑀺 𑀦𑀁 𑀯𑀤𑁂𑀬𑁆𑀬𑀁 𑀦 𑀦𑀁 𑀯𑀺𑀳𑁂𑀞𑁂𑀬𑁆𑀬𑀁 𑀧𑀲𑁆𑀲𑀫𑁆𑀧𑀺𑀲𑁆𑀲 𑀧𑀝𑀺𑀓𑀭𑁂𑀬𑁆𑀬𑀁. 𑀫𑀚𑁆𑀛𑀺𑀫𑁄 𑀘𑁂𑀧𑀺 𑀫𑀁 𑀯𑀤𑁂𑀬𑁆𑀬…𑀧𑁂… 𑀦𑀯𑁄 𑀘𑁂𑀧𑀺 𑀫𑀁 𑀯𑀤𑁂𑀬𑁆𑀬 𑀳𑀺𑀢𑀸𑀦𑀼𑀓𑀫𑁆𑀧𑀻 𑀫𑀁 𑀯𑀤𑁂𑀬𑁆𑀬 𑀦𑁄 𑀅𑀳𑀺𑀢𑀸𑀦𑀼𑀓𑀫𑁆𑀧𑀻, 𑀲𑀸𑀥𑀽𑀢𑀺 𑀦𑀁 𑀯𑀤𑁂𑀬𑁆𑀬𑀁 𑀦 𑀦𑀁 𑀯𑀺𑀳𑁂𑀞𑁂𑀬𑁆𑀬𑀁 𑀧𑀲𑁆𑀲𑀫𑁆𑀧𑀺𑀲𑁆𑀲 𑀧𑀝𑀺𑀓𑀭𑁂𑀬𑁆𑀬𑀁’. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀲𑀦𑁆𑀢𑀲𑀦𑁆𑀦𑀺𑀯𑀸𑀲𑁄 𑀳𑁄𑀢𑀺, 𑀏𑀯𑀜𑁆𑀘 𑀲𑀦𑁆𑀢𑁄 𑀲𑀦𑁆𑀦𑀺𑀯𑀲𑀦𑁆𑀢𑀻’’𑀢𑀺.

𑁬𑁪. ‘‘𑀬𑀲𑁆𑀫𑀺𑀁, 𑀪𑀺𑀓𑁆𑀔𑀯𑁂, 𑀅𑀥𑀺𑀓𑀭𑀡𑁂 𑀉𑀪𑀢𑁄 𑀯𑀘𑀻𑀲𑀁𑀲𑀸𑀭𑁄 𑀤𑀺𑀝𑁆𑀞𑀺𑀧𑀴𑀸𑀲𑁄 𑀘𑁂𑀢𑀲𑁄 𑀆𑀖𑀸𑀢𑁄 𑀅𑀧𑁆𑀧𑀘𑁆𑀘𑀬𑁄 𑀅𑀦𑀪𑀺𑀭𑀤𑁆𑀥𑀺 𑀅𑀚𑁆𑀛𑀢𑁆𑀢𑀁 𑀅𑀯𑀽𑀧𑀲𑀦𑁆𑀢𑀁 𑀳𑁄𑀢𑀺, 𑀢𑀲𑁆𑀫𑁂𑀢𑀁, 𑀪𑀺𑀓𑁆𑀔𑀯𑁂, 𑀅𑀥𑀺𑀓𑀭𑀡𑁂 𑀧𑀸𑀝𑀺𑀓𑀗𑁆𑀔𑀁 𑁋 ‘𑀤𑀻𑀖𑀢𑁆𑀢𑀸𑀬 𑀔𑀭𑀢𑁆𑀢𑀸𑀬 𑀯𑀸𑀴𑀢𑁆𑀢𑀸𑀬 𑀲𑀁𑀯𑀢𑁆𑀢𑀺𑀲𑁆𑀲𑀢𑀺, 𑀪𑀺𑀓𑁆𑀔𑀽 𑀘 𑀦 𑀨𑀸𑀲𑀼𑀁 [𑀨𑀸𑀲𑀼 (𑀓.)] 𑀯𑀺𑀳𑀭𑀺𑀲𑁆𑀲𑀦𑁆𑀢𑀺’. 𑀬𑀲𑁆𑀫𑀺𑀜𑁆𑀘 𑀔𑁄, 𑀪𑀺𑀓𑁆𑀔𑀯𑁂, 𑀅𑀥𑀺𑀓𑀭𑀡𑁂 𑀉𑀪𑀢𑁄 𑀯𑀘𑀻𑀲𑀁𑀲𑀸𑀭𑁄 𑀤𑀺𑀝𑁆𑀞𑀺𑀧𑀴𑀸𑀲𑁄 𑀘𑁂𑀢𑀲𑁄 𑀆𑀖𑀸𑀢𑁄 𑀅𑀧𑁆𑀧𑀘𑁆𑀘𑀬𑁄 𑀅𑀦𑀪𑀺𑀭𑀤𑁆𑀥𑀺 𑀅𑀚𑁆𑀛𑀢𑁆𑀢𑀁 𑀲𑀼𑀯𑀽𑀧𑀲𑀦𑁆𑀢𑀁 𑀳𑁄𑀢𑀺, 𑀢𑀲𑁆𑀫𑁂𑀢𑀁, 𑀪𑀺𑀓𑁆𑀔𑀯𑁂, 𑀅𑀥𑀺𑀓𑀭𑀡𑁂 𑀧𑀸𑀝𑀺𑀓𑀗𑁆𑀔𑀁 𑁋 ‘𑀦 𑀤𑀻𑀖𑀢𑁆𑀢𑀸𑀬 𑀔𑀭𑀢𑁆𑀢𑀸𑀬 𑀯𑀸𑀴𑀢𑁆𑀢𑀸𑀬 𑀲𑀁𑀯𑀢𑁆𑀢𑀺𑀲𑁆𑀲𑀢𑀺, 𑀪𑀺𑀓𑁆𑀔𑀽 𑀘 𑀨𑀸𑀲𑀼𑀁 𑀯𑀺𑀳𑀭𑀺𑀲𑁆𑀲𑀦𑁆𑀢𑀻’’’𑀢𑀺.

𑀧𑀼𑀕𑁆𑀕𑀮𑀯𑀕𑁆𑀕𑁄 𑀧𑀞𑀫𑁄.

(𑁭) 𑁨. 𑀲𑀼𑀔𑀯𑀕𑁆𑀕𑁄

𑁬𑁫. ‘‘𑀤𑁆𑀯𑁂𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀲𑀼𑀔𑀸𑀦𑀺. 𑀓𑀢𑀫𑀸𑀦𑀺 𑀤𑁆𑀯𑁂? 𑀕𑀺𑀳𑀺𑀲𑀼𑀔𑀜𑁆𑀘 𑀧𑀩𑁆𑀩𑀚𑀺𑀢𑀲𑀼𑀔𑀜𑁆𑀘. 𑀇𑀫𑀸𑀦𑀺 𑀔𑁄, 𑀪𑀺𑀓𑁆𑀔𑀯𑁂, 𑀤𑁆𑀯𑁂 𑀲𑀼𑀔𑀸𑀦𑀺. 𑀏𑀢𑀤𑀕𑁆𑀕𑀁, 𑀪𑀺𑀓𑁆𑀔𑀯𑁂, 𑀇𑀫𑁂𑀲𑀁 𑀤𑁆𑀯𑀺𑀦𑁆𑀦𑀁 𑀲𑀼𑀔𑀸𑀦𑀁 𑀬𑀤𑀺𑀤𑀁 𑀧𑀩𑁆𑀩𑀚𑀺𑀢𑀲𑀼𑀔’’𑀦𑁆𑀢𑀺.

𑁬𑁬. ‘‘𑀤𑁆𑀯𑁂𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀲𑀼𑀔𑀸𑀦𑀺. 𑀓𑀢𑀫𑀸𑀦𑀺 𑀤𑁆𑀯𑁂? 𑀓𑀸𑀫𑀲𑀼𑀔𑀜𑁆𑀘 𑀦𑁂𑀓𑁆𑀔𑀫𑁆𑀫𑀲𑀼𑀔𑀜𑁆𑀘. 𑀇𑀫𑀸𑀦𑀺 𑀔𑁄, 𑀪𑀺𑀓𑁆𑀔𑀯𑁂, 𑀤𑁆𑀯𑁂 𑀲𑀼𑀔𑀸𑀦𑀺. 𑀏𑀢𑀤𑀕𑁆𑀕𑀁, 𑀪𑀺𑀓𑁆𑀔𑀯𑁂, 𑀇𑀫𑁂𑀲𑀁 𑀤𑁆𑀯𑀺𑀦𑁆𑀦𑀁 𑀲𑀼𑀔𑀸𑀦𑀁 𑀬𑀤𑀺𑀤𑀁 𑀦𑁂𑀓𑁆𑀔𑀫𑁆𑀫𑀲𑀼𑀔’’𑀦𑁆𑀢𑀺.

𑁬𑁭. ‘‘𑀤𑁆𑀯𑁂𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀲𑀼𑀔𑀸𑀦𑀺. 𑀓𑀢𑀫𑀸𑀦𑀺 𑀤𑁆𑀯𑁂? 𑀉𑀧𑀥𑀺𑀲𑀼𑀔𑀜𑁆𑀘 𑀦𑀺𑀭𑀼𑀧𑀥𑀺𑀲𑀼𑀔𑀜𑁆𑀘. 𑀇𑀫𑀸𑀦𑀺 𑀔𑁄, 𑀪𑀺𑀓𑁆𑀔𑀯𑁂, 𑀤𑁆𑀯𑁂 𑀲𑀼𑀔𑀸𑀦𑀺. 𑀏𑀢𑀤𑀕𑁆𑀕𑀁, 𑀪𑀺𑀓𑁆𑀔𑀯𑁂, 𑀇𑀫𑁂𑀲𑀁 𑀤𑁆𑀯𑀺𑀦𑁆𑀦𑀁 𑀲𑀼𑀔𑀸𑀦𑀁 𑀬𑀤𑀺𑀤𑀁 𑀦𑀺𑀭𑀼𑀧𑀥𑀺𑀲𑀼𑀔’’𑀦𑁆𑀢𑀺.

𑁬𑁮. ‘‘𑀤𑁆𑀯𑁂𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀲𑀼𑀔𑀸𑀦𑀺. 𑀓𑀢𑀫𑀸𑀦𑀺 𑀤𑁆𑀯𑁂? 𑀲𑀸𑀲𑀯𑀲𑀼𑀔𑀜𑁆𑀘 𑀅𑀦𑀸𑀲𑀯𑀲𑀼𑀔𑀜𑁆𑀘. 𑀇𑀫𑀸𑀦𑀺 𑀔𑁄, 𑀪𑀺𑀓𑁆𑀔𑀯𑁂, 𑀤𑁆𑀯𑁂 𑀲𑀼𑀔𑀸𑀦𑀺. 𑀏𑀢𑀤𑀕𑁆𑀕𑀁, 𑀪𑀺𑀓𑁆𑀔𑀯𑁂, 𑀇𑀫𑁂𑀲𑀁 𑀤𑁆𑀯𑀺𑀦𑁆𑀦𑀁 𑀲𑀼𑀔𑀸𑀦𑀁 𑀬𑀤𑀺𑀤𑀁 𑀅𑀦𑀸𑀲𑀯𑀲𑀼𑀔’’𑀦𑁆𑀢𑀺.

𑁬𑁯. ‘‘𑀤𑁆𑀯𑁂𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀲𑀼𑀔𑀸𑀦𑀺. 𑀓𑀢𑀫𑀸𑀦𑀺 𑀤𑁆𑀯𑁂? 𑀲𑀸𑀫𑀺𑀲𑀜𑁆𑀘 𑀲𑀼𑀔𑀁 𑀦𑀺𑀭𑀸𑀫𑀺𑀲𑀜𑁆𑀘 𑀲𑀼𑀔𑀁. 𑀇𑀫𑀸𑀦𑀺 𑀔𑁄, 𑀪𑀺𑀓𑁆𑀔𑀯𑁂, 𑀤𑁆𑀯𑁂 𑀲𑀼𑀔𑀸𑀦𑀺. 𑀏𑀢𑀤𑀕𑁆𑀕𑀁, 𑀪𑀺𑀓𑁆𑀔𑀯𑁂, 𑀇𑀫𑁂𑀲𑀁 𑀤𑁆𑀯𑀺𑀦𑁆𑀦𑀁 𑀲𑀼𑀔𑀸𑀦𑀁 𑀬𑀤𑀺𑀤𑀁 𑀦𑀺𑀭𑀸𑀫𑀺𑀲𑀁 𑀲𑀼𑀔’’𑀦𑁆𑀢𑀺.

𑁭𑁦. ‘‘𑀤𑁆𑀯𑁂𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀲𑀼𑀔𑀸𑀦𑀺. 𑀓𑀢𑀫𑀸𑀦𑀺 𑀤𑁆𑀯𑁂? 𑀅𑀭𑀺𑀬𑀲𑀼𑀔𑀜𑁆𑀘 𑀅𑀦𑀭𑀺𑀬𑀲𑀼𑀔𑀜𑁆𑀘. 𑀇𑀫𑀸𑀦𑀺 𑀔𑁄, 𑀪𑀺𑀓𑁆𑀔𑀯𑁂, 𑀤𑁆𑀯𑁂 𑀲𑀼𑀔𑀸𑀦𑀺. 𑀏𑀢𑀤𑀕𑁆𑀕𑀁, 𑀪𑀺𑀓𑁆𑀔𑀯𑁂, 𑀇𑀫𑁂𑀲𑀁 𑀤𑁆𑀯𑀺𑀦𑁆𑀦𑀁 𑀲𑀼𑀔𑀸𑀦𑀁 𑀬𑀤𑀺𑀤𑀁 𑀅𑀭𑀺𑀬𑀲𑀼𑀔’’𑀦𑁆𑀢𑀺.

𑁭𑁧. ‘‘𑀤𑁆𑀯𑁂𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀲𑀼𑀔𑀸𑀦𑀺. 𑀓𑀢𑀫𑀸𑀦𑀺 𑀤𑁆𑀯𑁂? 𑀓𑀸𑀬𑀺𑀓𑀜𑁆𑀘 𑀲𑀼𑀔𑀁 𑀘𑁂𑀢𑀲𑀺𑀓𑀜𑁆𑀘 𑀲𑀼𑀔𑀁. 𑀇𑀫𑀸𑀦𑀺 𑀔𑁄, 𑀪𑀺𑀓𑁆𑀔𑀯𑁂, 𑀤𑁆𑀯𑁂 𑀲𑀼𑀔𑀸𑀦𑀺. 𑀏𑀢𑀤𑀕𑁆𑀕𑀁, 𑀪𑀺𑀓𑁆𑀔𑀯𑁂, 𑀇𑀫𑁂𑀲𑀁 𑀤𑁆𑀯𑀺𑀦𑁆𑀦𑀁 𑀲𑀼𑀔𑀸𑀦𑀁 𑀬𑀤𑀺𑀤𑀁 𑀘𑁂𑀢𑀲𑀺𑀓𑀁 𑀲𑀼𑀔’’𑀦𑁆𑀢𑀺.

𑁭𑁨. ‘‘𑀤𑁆𑀯𑁂𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀲𑀼𑀔𑀸𑀦𑀺. 𑀓𑀢𑀫𑀸𑀦𑀺 𑀤𑁆𑀯𑁂? 𑀲𑀧𑁆𑀧𑀻𑀢𑀺𑀓𑀜𑁆𑀘 𑀲𑀼𑀔𑀁 𑀦𑀺𑀧𑁆𑀧𑀻𑀢𑀺𑀓𑀜𑁆𑀘 𑀲𑀼𑀔𑀁. 𑀇𑀫𑀸𑀦𑀺 𑀔𑁄, 𑀪𑀺𑀓𑁆𑀔𑀯𑁂, 𑀤𑁆𑀯𑁂 𑀲𑀼𑀔𑀸𑀦𑀺. 𑀏𑀢𑀤𑀕𑁆𑀕𑀁, 𑀪𑀺𑀓𑁆𑀔𑀯𑁂, 𑀇𑀫𑁂𑀲𑀁 𑀤𑁆𑀯𑀺𑀦𑁆𑀦𑀁 𑀲𑀼𑀔𑀸𑀦𑀁 𑀬𑀤𑀺𑀤𑀁 𑀦𑀺𑀧𑁆𑀧𑀻𑀢𑀺𑀓𑀁 𑀲𑀼𑀔’’𑀦𑁆𑀢𑀺.

𑁭𑁩. ‘‘𑀤𑁆𑀯𑁂𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀲𑀼𑀔𑀸𑀦𑀺. 𑀓𑀢𑀫𑀸𑀦𑀺 𑀤𑁆𑀯𑁂? 𑀲𑀸𑀢𑀲𑀼𑀔𑀜𑁆𑀘 𑀉𑀧𑁂𑀓𑁆𑀔𑀸𑀲𑀼𑀔𑀜𑁆𑀘. 𑀇𑀫𑀸𑀦𑀺 𑀔𑁄, 𑀪𑀺𑀓𑁆𑀔𑀯𑁂, 𑀤𑁆𑀯𑁂 𑀲𑀼𑀔𑀸𑀦𑀺. 𑀏𑀢𑀤𑀕𑁆𑀕𑀁, 𑀪𑀺𑀓𑁆𑀔𑀯𑁂, 𑀇𑀫𑁂𑀲𑀁 𑀤𑁆𑀯𑀺𑀦𑁆𑀦𑀁 𑀲𑀼𑀔𑀸𑀦𑀁 𑀬𑀤𑀺𑀤𑀁 𑀉𑀧𑁂𑀓𑁆𑀔𑀸𑀲𑀼𑀔’’𑀦𑁆𑀢𑀺.

𑁭𑁪. ‘‘𑀤𑁆𑀯𑁂𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀲𑀼𑀔𑀸𑀦𑀺. 𑀓𑀢𑀫𑀸𑀦𑀺 𑀤𑁆𑀯𑁂? 𑀲𑀫𑀸𑀥𑀺𑀲𑀼𑀔𑀜𑁆𑀘 𑀅𑀲𑀫𑀸𑀥𑀺𑀲𑀼𑀔𑀜𑁆𑀘. 𑀇𑀫𑀸𑀦𑀺 𑀔𑁄, 𑀪𑀺𑀓𑁆𑀔𑀯𑁂, 𑀤𑁆𑀯𑁂 𑀲𑀼𑀔𑀸𑀦𑀺. 𑀏𑀢𑀤𑀕𑁆𑀕𑀁, 𑀪𑀺𑀓𑁆𑀔𑀯𑁂, 𑀇𑀫𑁂𑀲𑀁 𑀤𑁆𑀯𑀺𑀦𑁆𑀦𑀁 𑀲𑀼𑀔𑀸𑀦𑀁 𑀬𑀤𑀺𑀤𑀁 𑀲𑀫𑀸𑀥𑀺𑀲𑀼𑀔’’𑀦𑁆𑀢𑀺.

𑁭𑁫. ‘‘𑀤𑁆𑀯𑁂𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀲𑀼𑀔𑀸𑀦𑀺. 𑀓𑀢𑀫𑀸𑀦𑀺 𑀤𑁆𑀯𑁂? 𑀲𑀧𑁆𑀧𑀻𑀢𑀺𑀓𑀸𑀭𑀫𑁆𑀫𑀡𑀜𑁆𑀘 𑀲𑀼𑀔𑀁 𑀦𑀺𑀧𑁆𑀧𑀻𑀢𑀺𑀓𑀸𑀭𑀫𑁆𑀫𑀡𑀜𑁆𑀘 𑀲𑀼𑀔𑀁. 𑀇𑀫𑀸𑀦𑀺 𑀔𑁄, 𑀪𑀺𑀓𑁆𑀔𑀯𑁂, 𑀤𑁆𑀯𑁂 𑀲𑀼𑀔𑀸𑀦𑀺. 𑀏𑀢𑀤𑀕𑁆𑀕𑀁, 𑀪𑀺𑀓𑁆𑀔𑀯𑁂, 𑀇𑀫𑁂𑀲𑀁 𑀤𑁆𑀯𑀺𑀦𑁆𑀦𑀁 𑀲𑀼𑀔𑀸𑀦𑀁 𑀬𑀤𑀺𑀤𑀁 𑀦𑀺𑀧𑁆𑀧𑀻𑀢𑀺𑀓𑀸𑀭𑀫𑁆𑀫𑀡𑀁 𑀲𑀼𑀔’’𑀦𑁆𑀢𑀺.

𑁭𑁬. ‘‘𑀤𑁆𑀯𑁂𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀲𑀼𑀔𑀸𑀦𑀺. 𑀓𑀢𑀫𑀸𑀦𑀺 𑀤𑁆𑀯𑁂? 𑀲𑀸𑀢𑀸𑀭𑀫𑁆𑀫𑀡𑀜𑁆𑀘 𑀲𑀼𑀔𑀁 𑀉𑀧𑁂𑀓𑁆𑀔𑀸𑀭𑀫𑁆𑀫𑀡𑀜𑁆𑀘 𑀲𑀼𑀔𑀁. 𑀇𑀫𑀸𑀦𑀺 𑀔𑁄, 𑀪𑀺𑀓𑁆𑀔𑀯𑁂, 𑀤𑁆𑀯𑁂 𑀲𑀼𑀔𑀸𑀦𑀺. 𑀏𑀢𑀤𑀕𑁆𑀕𑀁, 𑀪𑀺𑀓𑁆𑀔𑀯𑁂, 𑀇𑀫𑁂𑀲𑀁 𑀤𑁆𑀯𑀺𑀦𑁆𑀦𑀁 𑀲𑀼𑀔𑀸𑀦𑀁 𑀬𑀤𑀺𑀤𑀁 𑀉𑀧𑁂𑀓𑁆𑀔𑀸𑀭𑀫𑁆𑀫𑀡𑀁 𑀲𑀼𑀔’’𑀦𑁆𑀢𑀺.

𑁭𑁭. ‘‘𑀤𑁆𑀯𑁂𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀲𑀼𑀔𑀸𑀦𑀺. 𑀓𑀢𑀫𑀸𑀦𑀺 𑀤𑁆𑀯𑁂? 𑀭𑀽𑀧𑀸𑀭𑀫𑁆𑀫𑀡𑀜𑁆𑀘 𑀲𑀼𑀔𑀁 𑀅𑀭𑀽𑀧𑀸𑀭𑀫𑁆𑀫𑀡𑀜𑁆𑀘 𑀲𑀼𑀔𑀁. 𑀇𑀫𑀸𑀦𑀺 𑀔𑁄, 𑀪𑀺𑀓𑁆𑀔𑀯𑁂, 𑀤𑁆𑀯𑁂 𑀲𑀼𑀔𑀸𑀦𑀺. 𑀏𑀢𑀤𑀕𑁆𑀕𑀁, 𑀪𑀺𑀓𑁆𑀔𑀯𑁂, 𑀇𑀫𑁂𑀲𑀁 𑀤𑁆𑀯𑀺𑀦𑁆𑀦𑀁 𑀲𑀼𑀔𑀸𑀦𑀁 𑀬𑀤𑀺𑀤𑀁 𑀅𑀭𑀽𑀧𑀸𑀭𑀫𑁆𑀫𑀡𑀁 𑀲𑀼𑀔’’𑀦𑁆𑀢𑀺.

𑀲𑀼𑀔𑀯𑀕𑁆𑀕𑁄 𑀤𑀼𑀢𑀺𑀬𑁄.

(𑁮) 𑁩. 𑀲𑀦𑀺𑀫𑀺𑀢𑁆𑀢𑀯𑀕𑁆𑀕𑁄

𑁭𑁮. ‘‘𑀲𑀦𑀺𑀫𑀺𑀢𑁆𑀢𑀸, 𑀪𑀺𑀓𑁆𑀔𑀯𑁂, 𑀉𑀧𑁆𑀧𑀚𑁆𑀚𑀦𑁆𑀢𑀺 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸, 𑀦𑁄 𑀅𑀦𑀺𑀫𑀺𑀢𑁆𑀢𑀸. 𑀢𑀲𑁆𑀲𑁂𑀯 𑀦𑀺𑀫𑀺𑀢𑁆𑀢𑀲𑁆𑀲 𑀧𑀳𑀸𑀦𑀸 𑀏𑀯𑀁 𑀢𑁂 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀦 𑀳𑁄𑀦𑁆𑀢𑀻’’𑀢𑀺.

𑁭𑁯. ‘‘𑀲𑀦𑀺𑀤𑀸𑀦𑀸, 𑀪𑀺𑀓𑁆𑀔𑀯𑁂, 𑀉𑀧𑁆𑀧𑀚𑁆𑀚𑀦𑁆𑀢𑀺 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸, 𑀦𑁄 𑀅𑀦𑀺𑀤𑀸𑀦𑀸. 𑀢𑀲𑁆𑀲𑁂𑀯 𑀦𑀺𑀤𑀸𑀦𑀲𑁆𑀲 𑀧𑀳𑀸𑀦𑀸 𑀏𑀯𑀁 𑀢𑁂 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀦 𑀳𑁄𑀦𑁆𑀢𑀻’’𑀢𑀺.

𑁮𑁦. ‘‘𑀲𑀳𑁂𑀢𑀼𑀓𑀸, 𑀪𑀺𑀓𑁆𑀔𑀯𑁂, 𑀉𑀧𑁆𑀧𑀚𑁆𑀚𑀦𑁆𑀢𑀺 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸, 𑀦𑁄 𑀅𑀳𑁂𑀢𑀼𑀓𑀸. 𑀢𑀲𑁆𑀲𑁂𑀯 𑀳𑁂𑀢𑀼𑀲𑁆𑀲 𑀧𑀳𑀸𑀦𑀸 𑀏𑀯𑀁 𑀢𑁂 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀦 𑀳𑁄𑀦𑁆𑀢𑀻’’𑀢𑀺.

𑁮𑁧. ‘‘𑀲𑀲𑀗𑁆𑀔𑀸𑀭𑀸, 𑀪𑀺𑀓𑁆𑀔𑀯𑁂, 𑀉𑀧𑁆𑀧𑀚𑁆𑀚𑀦𑁆𑀢𑀺 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸, 𑀦𑁄 𑀅𑀲𑀗𑁆𑀔𑀸𑀭𑀸. 𑀢𑁂𑀲𑀁𑀬𑁂𑀯 𑀲𑀗𑁆𑀔𑀸𑀭𑀸𑀦𑀁 𑀧𑀳𑀸𑀦𑀸 𑀏𑀯𑀁 𑀢𑁂 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀦 𑀳𑁄𑀦𑁆𑀢𑀻’’𑀢𑀺.

𑁮𑁨. ‘‘𑀲𑀧𑁆𑀧𑀘𑁆𑀘𑀬𑀸, 𑀪𑀺𑀓𑁆𑀔𑀯𑁂, 𑀉𑀧𑁆𑀧𑀚𑁆𑀚𑀦𑁆𑀢𑀺 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸, 𑀦𑁄 𑀅𑀧𑁆𑀧𑀘𑁆𑀘𑀬𑀸. 𑀢𑀲𑁆𑀲𑁂𑀯 𑀧𑀘𑁆𑀘𑀬𑀲𑁆𑀲 𑀧𑀳𑀸𑀦𑀸 𑀏𑀯𑀁 𑀢𑁂 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀦 𑀳𑁄𑀦𑁆𑀢𑀻’’𑀢𑀺.

𑁮𑁩. ‘‘𑀲𑀭𑀽𑀧𑀸, 𑀪𑀺𑀓𑁆𑀔𑀯𑁂, 𑀉𑀧𑁆𑀧𑀚𑁆𑀚𑀦𑁆𑀢𑀺 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸, 𑀦𑁄 𑀅𑀭𑀽𑀧𑀸. 𑀢𑀲𑁆𑀲𑁂𑀯 𑀭𑀽𑀧𑀲𑁆𑀲 𑀧𑀳𑀸𑀦𑀸 𑀏𑀯𑀁 𑀢𑁂 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀦 𑀳𑁄𑀦𑁆𑀢𑀻’’𑀢𑀺.

𑁮𑁪. ‘‘𑀲𑀯𑁂𑀤𑀦𑀸, 𑀪𑀺𑀓𑁆𑀔𑀯𑁂, 𑀉𑀧𑁆𑀧𑀚𑁆𑀚𑀦𑁆𑀢𑀺 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸, 𑀦𑁄 𑀅𑀯𑁂𑀤𑀦𑀸. 𑀢𑀲𑁆𑀲𑀸𑀬𑁂𑀯 𑀯𑁂𑀤𑀦𑀸𑀬 𑀧𑀳𑀸𑀦𑀸 𑀏𑀯𑀁 𑀢𑁂 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀦 𑀳𑁄𑀦𑁆𑀢𑀻’’𑀢𑀺.

𑁮𑁫. ‘‘𑀲𑀲𑀜𑁆𑀜𑀸, 𑀪𑀺𑀓𑁆𑀔𑀯𑁂, 𑀉𑀧𑁆𑀧𑀚𑁆𑀚𑀦𑁆𑀢𑀺 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸, 𑀦𑁄 𑀅𑀲𑀜𑁆𑀜𑀸. 𑀢𑀲𑁆𑀲𑀸𑀬𑁂𑀯 𑀲𑀜𑁆𑀜𑀸𑀬 𑀧𑀳𑀸𑀦𑀸 𑀏𑀯𑀁 𑀢𑁂 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀦 𑀳𑁄𑀦𑁆𑀢𑀻’’𑀢𑀺.

𑁮𑁬. ‘‘𑀲𑀯𑀺𑀜𑁆𑀜𑀸𑀡𑀸, 𑀪𑀺𑀓𑁆𑀔𑀯𑁂, 𑀉𑀧𑁆𑀧𑀚𑁆𑀚𑀦𑁆𑀢𑀺 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸, 𑀦𑁄 𑀅𑀯𑀺𑀜𑁆𑀜𑀸𑀡𑀸. 𑀢𑀲𑁆𑀲𑁂𑀯 𑀯𑀺𑀜𑁆𑀜𑀸𑀡𑀲𑁆𑀲 𑀧𑀳𑀸𑀦𑀸 𑀏𑀯𑀁 𑀢𑁂 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀦 𑀳𑁄𑀦𑁆𑀢𑀻’’𑀢𑀺.

𑁮𑁭. ‘‘𑀲𑀗𑁆𑀔𑀢𑀸𑀭𑀫𑁆𑀫𑀡𑀸, 𑀪𑀺𑀓𑁆𑀔𑀯𑁂, 𑀉𑀧𑁆𑀧𑀚𑁆𑀚𑀦𑁆𑀢𑀺 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸, 𑀦𑁄 𑀅𑀲𑀗𑁆𑀔𑀢𑀸𑀭𑀫𑁆𑀫𑀡𑀸. 𑀢𑀲𑁆𑀲𑁂𑀯 𑀲𑀗𑁆𑀔𑀢𑀲𑁆𑀲 𑀧𑀳𑀸𑀦𑀸 𑀏𑀯𑀁 𑀢𑁂 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀦 𑀳𑁄𑀦𑁆𑀢𑀻’’𑀢𑀺.

𑀲𑀦𑀺𑀫𑀺𑀢𑁆𑀢𑀯𑀕𑁆𑀕𑁄 𑀢𑀢𑀺𑀬𑁄.

(𑁯) 𑁪. 𑀥𑀫𑁆𑀫𑀯𑀕𑁆𑀕𑁄

𑁮𑁮. ‘‘𑀤𑁆𑀯𑁂𑀫𑁂, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸. 𑀓𑀢𑀫𑁂 𑀤𑁆𑀯𑁂? 𑀘𑁂𑀢𑁄𑀯𑀺𑀫𑀼𑀢𑁆𑀢𑀺 𑀘 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺 𑀘. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀤𑁆𑀯𑁂 𑀥𑀫𑁆𑀫𑀸’’𑀢𑀺.

𑁮𑁯. ‘‘𑀤𑁆𑀯𑁂𑀫𑁂, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸. 𑀓𑀢𑀫𑁂 𑀤𑁆𑀯𑁂? 𑀧𑀕𑁆𑀕𑀸𑀳𑁄 𑀘 𑀅𑀯𑀺𑀓𑁆𑀔𑁂𑀧𑁄 𑀘. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀤𑁆𑀯𑁂 𑀥𑀫𑁆𑀫𑀸’’𑀢𑀺.

𑁯𑁦. ‘‘𑀤𑁆𑀯𑁂𑀫𑁂, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸. 𑀓𑀢𑀫𑁂 𑀤𑁆𑀯𑁂? 𑀦𑀸𑀫𑀜𑁆𑀘 𑀭𑀽𑀧𑀜𑁆𑀘. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀤𑁆𑀯𑁂 𑀥𑀫𑁆𑀫𑀸’’𑀢𑀺.

𑁯𑁧. ‘‘𑀤𑁆𑀯𑁂𑀫𑁂, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸. 𑀓𑀢𑀫𑁂 𑀤𑁆𑀯𑁂? 𑀯𑀺𑀚𑁆𑀚𑀸 𑀘 𑀯𑀺𑀫𑀼𑀢𑁆𑀢𑀺 𑀘. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀤𑁆𑀯𑁂 𑀥𑀫𑁆𑀫𑀸’’𑀢𑀺.

𑁯𑁨. ‘‘𑀤𑁆𑀯𑁂𑀫𑁂, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸. 𑀓𑀢𑀫𑁂 𑀤𑁆𑀯𑁂? 𑀪𑀯𑀤𑀺𑀝𑁆𑀞𑀺 𑀘 𑀯𑀺𑀪𑀯𑀤𑀺𑀝𑁆𑀞𑀺 𑀘. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀤𑁆𑀯𑁂 𑀥𑀫𑁆𑀫𑀸’’𑀢𑀺.

𑁯𑁩. ‘‘𑀤𑁆𑀯𑁂𑀫𑁂, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸. 𑀓𑀢𑀫𑁂 𑀤𑁆𑀯𑁂? 𑀅𑀳𑀺𑀭𑀺𑀓𑀜𑁆𑀘 𑀅𑀦𑁄𑀢𑁆𑀢𑀧𑁆𑀧𑀜𑁆𑀘. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀤𑁆𑀯𑁂 𑀥𑀫𑁆𑀫𑀸’’𑀢𑀺.

𑁯𑁪. ‘‘𑀤𑁆𑀯𑁂𑀫𑁂, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸. 𑀓𑀢𑀫𑁂 𑀤𑁆𑀯𑁂? 𑀳𑀺𑀭𑀻 𑀘 𑀑𑀢𑁆𑀢𑀧𑁆𑀧𑀜𑁆𑀘. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀤𑁆𑀯𑁂 𑀥𑀫𑁆𑀫𑀸’’𑀢𑀺.

𑁯𑁫. ‘‘𑀤𑁆𑀯𑁂𑀫𑁂, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸. 𑀓𑀢𑀫𑁂 𑀤𑁆𑀯𑁂? 𑀤𑁄𑀯𑀘𑀲𑁆𑀲𑀢𑀸 𑀘 𑀧𑀸𑀧𑀫𑀺𑀢𑁆𑀢𑀢𑀸 𑀘. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀤𑁆𑀯𑁂 𑀥𑀫𑁆𑀫𑀸’’𑀢𑀺.

𑁯𑁬. ‘‘𑀤𑁆𑀯𑁂𑀫𑁂, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸. 𑀓𑀢𑀫𑁂 𑀤𑁆𑀯𑁂? 𑀲𑁄𑀯𑀘𑀲𑁆𑀲𑀢𑀸 𑀘 𑀓𑀮𑁆𑀬𑀸𑀡𑀫𑀺𑀢𑁆𑀢𑀢𑀸 𑀘. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀤𑁆𑀯𑁂 𑀥𑀫𑁆𑀫𑀸’’𑀢𑀺.

𑁯𑁭. ‘‘𑀤𑁆𑀯𑁂𑀫𑁂, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸. 𑀓𑀢𑀫𑁂 𑀤𑁆𑀯𑁂? 𑀥𑀸𑀢𑀼𑀓𑀼𑀲𑀮𑀢𑀸 𑀘 𑀫𑀦𑀲𑀺𑀓𑀸𑀭𑀓𑀼𑀲𑀮𑀢𑀸 𑀘. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀤𑁆𑀯𑁂 𑀥𑀫𑁆𑀫𑀸’’𑀢𑀺.

𑁯𑁮. ‘‘𑀤𑁆𑀯𑁂𑀫𑁂, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸. 𑀓𑀢𑀫𑁂 𑀤𑁆𑀯𑁂? 𑀆𑀧𑀢𑁆𑀢𑀺𑀓𑀼𑀲𑀮𑀢𑀸 𑀘 𑀆𑀧𑀢𑁆𑀢𑀺𑀯𑀼𑀝𑁆𑀞𑀸𑀦𑀓𑀼𑀲𑀮𑀢𑀸 𑀘. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀤𑁆𑀯𑁂 𑀥𑀫𑁆𑀫𑀸’’𑀢𑀺.

𑀥𑀫𑁆𑀫𑀯𑀕𑁆𑀕𑁄 𑀘𑀢𑀼𑀢𑁆𑀣𑁄.

(𑁧𑁦) 𑁫. 𑀩𑀸𑀮𑀯𑀕𑁆𑀕𑁄

𑁯𑁯. ‘‘𑀤𑁆𑀯𑁂𑀫𑁂, 𑀪𑀺𑀓𑁆𑀔𑀯𑁂, 𑀩𑀸𑀮𑀸. 𑀓𑀢𑀫𑁂 𑀤𑁆𑀯𑁂? 𑀬𑁄 𑀘 𑀅𑀦𑀸𑀕𑀢𑀁 𑀪𑀸𑀭𑀁 𑀯𑀳𑀢𑀺, 𑀬𑁄 𑀘 𑀆𑀕𑀢𑀁 𑀪𑀸𑀭𑀁 𑀦 𑀯𑀳𑀢𑀺. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀤𑁆𑀯𑁂 𑀩𑀸𑀮𑀸’’𑀢𑀺.

𑁧𑁦𑁦. ‘‘𑀤𑁆𑀯𑁂𑀫𑁂, 𑀪𑀺𑀓𑁆𑀔𑀯𑁂, 𑀧𑀡𑁆𑀟𑀺𑀢𑀸. 𑀓𑀢𑀫𑁂 𑀤𑁆𑀯𑁂? 𑀬𑁄 𑀘 𑀅𑀦𑀸𑀕𑀢𑀁 𑀪𑀸𑀭𑀁 𑀦 𑀯𑀳𑀢𑀺, 𑀬𑁄 𑀘 𑀆𑀕𑀢𑀁 𑀪𑀸𑀭𑀁 𑀯𑀳𑀢𑀺. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀤𑁆𑀯𑁂 𑀧𑀡𑁆𑀟𑀺𑀢𑀸’’𑀢𑀺.

𑁧𑁦𑁧. ‘‘𑀤𑁆𑀯𑁂𑀫𑁂, 𑀪𑀺𑀓𑁆𑀔𑀯𑁂, 𑀩𑀸𑀮𑀸. 𑀓𑀢𑀫𑁂 𑀤𑁆𑀯𑁂? 𑀬𑁄 𑀘 𑀅𑀓𑀧𑁆𑀧𑀺𑀬𑁂 𑀓𑀧𑁆𑀧𑀺𑀬𑀲𑀜𑁆𑀜𑀻, 𑀬𑁄 𑀘 𑀓𑀧𑁆𑀧𑀺𑀬𑁂 𑀅𑀓𑀧𑁆𑀧𑀺𑀬𑀲𑀜𑁆𑀜𑀻. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀤𑁆𑀯𑁂 𑀩𑀸𑀮𑀸’’𑀢𑀺.

𑁧𑁦𑁨. ‘‘𑀤𑁆𑀯𑁂𑀫𑁂, 𑀪𑀺𑀓𑁆𑀔𑀯𑁂, 𑀧𑀡𑁆𑀟𑀺𑀢𑀸. 𑀓𑀢𑀫𑁂 𑀤𑁆𑀯𑁂? 𑀬𑁄 𑀘 𑀅𑀓𑀧𑁆𑀧𑀺𑀬𑁂 𑀅𑀓𑀧𑁆𑀧𑀺𑀬𑀲𑀜𑁆𑀜𑀻, 𑀬𑁄 𑀘 𑀓𑀧𑁆𑀧𑀺𑀬𑁂 𑀓𑀧𑁆𑀧𑀺𑀬𑀲𑀜𑁆𑀜𑀻. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀤𑁆𑀯𑁂 𑀧𑀡𑁆𑀟𑀺𑀢𑀸’’𑀢𑀺.

𑁧𑁦𑁩. ‘‘𑀤𑁆𑀯𑁂𑀫𑁂, 𑀪𑀺𑀓𑁆𑀔𑀯𑁂, 𑀩𑀸𑀮𑀸. 𑀓𑀢𑀫𑁂 𑀤𑁆𑀯𑁂? 𑀬𑁄 𑀘 𑀅𑀦𑀸𑀧𑀢𑁆𑀢𑀺𑀬𑀸 𑀆𑀧𑀢𑁆𑀢𑀺𑀲𑀜𑁆𑀜𑀻, 𑀬𑁄 𑀘 𑀆𑀧𑀢𑁆𑀢𑀺𑀬𑀸 𑀅𑀦𑀸𑀧𑀢𑁆𑀢𑀺𑀲𑀜𑁆𑀜𑀻. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀤𑁆𑀯𑁂 𑀩𑀸𑀮𑀸’’𑀢𑀺.

𑁧𑁦𑁪. ‘‘𑀤𑁆𑀯𑁂𑀫𑁂, 𑀪𑀺𑀓𑁆𑀔𑀯𑁂, 𑀧𑀡𑁆𑀟𑀺𑀢𑀸. 𑀓𑀢𑀫𑁂 𑀤𑁆𑀯𑁂? 𑀬𑁄 𑀘 𑀅𑀦𑀸𑀧𑀢𑁆𑀢𑀺𑀬𑀸 𑀅𑀦𑀸𑀧𑀢𑁆𑀢𑀺𑀲𑀜𑁆𑀜𑀻, 𑀬𑁄 𑀘 𑀆𑀧𑀢𑁆𑀢𑀺𑀬𑀸 𑀆𑀧𑀢𑁆𑀢𑀺𑀲𑀜𑁆𑀜𑀻. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀤𑁆𑀯𑁂 𑀧𑀡𑁆𑀟𑀺𑀢𑀸’’𑀢𑀺.

𑁧𑁦𑁫. ‘‘𑀤𑁆𑀯𑁂𑀫𑁂, 𑀪𑀺𑀓𑁆𑀔𑀯𑁂, 𑀩𑀸𑀮𑀸. 𑀓𑀢𑀫𑁂 𑀤𑁆𑀯𑁂? 𑀬𑁄 𑀘 𑀅𑀥𑀫𑁆𑀫𑁂 𑀥𑀫𑁆𑀫𑀲𑀜𑁆𑀜𑀻, 𑀬𑁄 𑀘 𑀥𑀫𑁆𑀫𑁂 𑀅𑀥𑀫𑁆𑀫𑀲𑀜𑁆𑀜𑀻. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀤𑁆𑀯𑁂 𑀩𑀸𑀮𑀸’’𑀢𑀺.

𑁧𑁦𑁬. ‘‘𑀤𑁆𑀯𑁂𑀫𑁂, 𑀪𑀺𑀓𑁆𑀔𑀯𑁂, 𑀧𑀡𑁆𑀟𑀺𑀢𑀸. 𑀓𑀢𑀫𑁂 𑀤𑁆𑀯𑁂? 𑀬𑁄 𑀘 𑀥𑀫𑁆𑀫𑁂 𑀥𑀫𑁆𑀫𑀲𑀜𑁆𑀜𑀻, 𑀬𑁄 𑀘 𑀅𑀥𑀫𑁆𑀫𑁂 𑀅𑀥𑀫𑁆𑀫𑀲𑀜𑁆𑀜𑀻. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀤𑁆𑀯𑁂 𑀧𑀡𑁆𑀟𑀺𑀢𑀸’’𑀢𑀺.

𑁧𑁦𑁭. ‘‘𑀤𑁆𑀯𑁂𑀫𑁂, 𑀪𑀺𑀓𑁆𑀔𑀯𑁂, 𑀩𑀸𑀮𑀸. 𑀓𑀢𑀫𑁂 𑀤𑁆𑀯𑁂? 𑀬𑁄 𑀘 𑀅𑀯𑀺𑀦𑀬𑁂 𑀯𑀺𑀦𑀬𑀲𑀜𑁆𑀜𑀻, 𑀬𑁄 𑀘 𑀯𑀺𑀦𑀬𑁂 𑀅𑀯𑀺𑀦𑀬𑀲𑀜𑁆𑀜𑀻. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀤𑁆𑀯𑁂 𑀩𑀸𑀮𑀸’’𑀢𑀺.

𑁧𑁦𑁮. ‘‘𑀤𑁆𑀯𑁂𑀫𑁂, 𑀪𑀺𑀓𑁆𑀔𑀯𑁂, 𑀧𑀡𑁆𑀟𑀺𑀢𑀸. 𑀓𑀢𑀫𑁂 𑀤𑁆𑀯𑁂? 𑀬𑁄 𑀘 𑀅𑀯𑀺𑀦𑀬𑁂 𑀅𑀯𑀺𑀦𑀬𑀲𑀜𑁆𑀜𑀻, 𑀬𑁄 𑀘 𑀯𑀺𑀦𑀬𑁂 𑀯𑀺𑀦𑀬𑀲𑀜𑁆𑀜𑀻. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀤𑁆𑀯𑁂 𑀧𑀡𑁆𑀟𑀺𑀢𑀸’’𑀢𑀺.

𑁧𑁦𑁯. ‘‘𑀤𑁆𑀯𑀺𑀦𑁆𑀦𑀁, 𑀪𑀺𑀓𑁆𑀔𑀯𑁂, 𑀆𑀲𑀯𑀸 𑀯𑀟𑁆𑀠𑀦𑁆𑀢𑀺. 𑀓𑀢𑀫𑁂𑀲𑀁 𑀤𑁆𑀯𑀺𑀦𑁆𑀦𑀁? 𑀬𑁄 𑀘 𑀦 𑀓𑀼𑀓𑁆𑀓𑀼𑀘𑁆𑀘𑀸𑀬𑀺𑀢𑀩𑁆𑀩𑀁 𑀓𑀼𑀓𑁆𑀓𑀼𑀘𑁆𑀘𑀸𑀬𑀢𑀺, 𑀬𑁄 𑀘 𑀓𑀼𑀓𑁆𑀓𑀼𑀘𑁆𑀘𑀸𑀬𑀺𑀢𑀩𑁆𑀩𑀁 𑀦 𑀓𑀼𑀓𑁆𑀓𑀼𑀘𑁆𑀘𑀸𑀬𑀢𑀺. 𑀇𑀫𑁂𑀲𑀁 𑀔𑁄, 𑀪𑀺𑀓𑁆𑀔𑀯𑁂, 𑀤𑁆𑀯𑀺𑀦𑁆𑀦𑀁 𑀆𑀲𑀯𑀸 𑀯𑀟𑁆𑀠𑀦𑁆𑀢𑀻’’𑀢𑀺.

𑁧𑁧𑁦. ‘‘𑀤𑁆𑀯𑀺𑀦𑁆𑀦𑀁, 𑀪𑀺𑀓𑁆𑀔𑀯𑁂, 𑀆𑀲𑀯𑀸 𑀦 𑀯𑀟𑁆𑀠𑀦𑁆𑀢𑀺. 𑀓𑀢𑀫𑁂𑀲𑀁 𑀤𑁆𑀯𑀺𑀦𑁆𑀦𑀁? 𑀬𑁄 𑀘 𑀦 𑀓𑀼𑀓𑁆𑀓𑀼𑀘𑁆𑀘𑀸𑀬𑀺𑀢𑀩𑁆𑀩𑀁 𑀦 𑀓𑀼𑀓𑁆𑀓𑀼𑀘𑁆𑀘𑀸𑀬𑀢𑀺, 𑀬𑁄 𑀘 𑀓𑀼𑀓𑁆𑀓𑀼𑀘𑁆𑀘𑀸𑀬𑀺𑀢𑀩𑁆𑀩𑀁 𑀓𑀼𑀓𑁆𑀓𑀼𑀘𑁆𑀘𑀸𑀬𑀢𑀺. 𑀇𑀫𑁂𑀲𑀁 𑀔𑁄, 𑀪𑀺𑀓𑁆𑀔𑀯𑁂, 𑀤𑁆𑀯𑀺𑀦𑁆𑀦𑀁 𑀆𑀲𑀯𑀸 𑀦 𑀯𑀟𑁆𑀠𑀦𑁆𑀢𑀻’’𑀢𑀺.

𑁧𑁧𑁧. ‘‘𑀤𑁆𑀯𑀺𑀦𑁆𑀦𑀁, 𑀪𑀺𑀓𑁆𑀔𑀯𑁂, 𑀆𑀲𑀯𑀸 𑀯𑀟𑁆𑀠𑀦𑁆𑀢𑀺. 𑀓𑀢𑀫𑁂𑀲𑀁 𑀤𑁆𑀯𑀺𑀦𑁆𑀦𑀁? 𑀬𑁄 𑀘 𑀅𑀓𑀧𑁆𑀧𑀺𑀬𑁂 𑀓𑀧𑁆𑀧𑀺𑀬𑀲𑀜𑁆𑀜𑀻, 𑀬𑁄 𑀘 𑀓𑀧𑁆𑀧𑀺𑀬𑁂 𑀅𑀓𑀧𑁆𑀧𑀺𑀬𑀲𑀜𑁆𑀜𑀻. 𑀇𑀫𑁂𑀲𑀁 𑀔𑁄, 𑀪𑀺𑀓𑁆𑀔𑀯𑁂, 𑀤𑁆𑀯𑀺𑀦𑁆𑀦𑀁 𑀆𑀲𑀯𑀸 𑀯𑀟𑁆𑀠𑀦𑁆𑀢𑀻’’𑀢𑀺.

𑁧𑁧𑁨. ‘‘𑀤𑁆𑀯𑀺𑀦𑁆𑀦𑀁, 𑀪𑀺𑀓𑁆𑀔𑀯𑁂, 𑀆𑀲𑀯𑀸 𑀦 𑀯𑀟𑁆𑀠𑀦𑁆𑀢𑀺. 𑀓𑀢𑀫𑁂𑀲𑀁 𑀤𑁆𑀯𑀺𑀦𑁆𑀦𑀁? 𑀬𑁄 𑀘 𑀅𑀓𑀧𑁆𑀧𑀺𑀬𑁂 𑀅𑀓𑀧𑁆𑀧𑀺𑀬𑀲𑀜𑁆𑀜𑀻, 𑀬𑁄 𑀘 𑀓𑀧𑁆𑀧𑀺𑀬𑁂 𑀓𑀧𑁆𑀧𑀺𑀬𑀲𑀜𑁆𑀜𑀻. 𑀇𑀫𑁂𑀲𑀁 𑀔𑁄, 𑀪𑀺𑀓𑁆𑀔𑀯𑁂, 𑀤𑁆𑀯𑀺𑀦𑁆𑀦𑀁 𑀆𑀲𑀯𑀸 𑀦 𑀯𑀟𑁆𑀠𑀦𑁆𑀢𑀻’’𑀢𑀺.

𑁧𑁧𑁩. ‘‘𑀤𑁆𑀯𑀺𑀦𑁆𑀦𑀁, 𑀪𑀺𑀓𑁆𑀔𑀯𑁂, 𑀆𑀲𑀯𑀸 𑀯𑀟𑁆𑀠𑀦𑁆𑀢𑀺. 𑀓𑀢𑀫𑁂𑀲𑀁 𑀤𑁆𑀯𑀺𑀦𑁆𑀦𑀁? 𑀬𑁄 𑀘 𑀆𑀧𑀢𑁆𑀢𑀺𑀬𑀸 𑀅𑀦𑀸𑀧𑀢𑁆𑀢𑀺𑀲𑀜𑁆𑀜𑀻, 𑀬𑁄 𑀘 𑀅𑀦𑀸𑀧𑀢𑁆𑀢𑀺𑀬𑀸 𑀆𑀧𑀢𑁆𑀢𑀺𑀲𑀜𑁆𑀜𑀻. 𑀇𑀫𑁂𑀲𑀁 𑀔𑁄, 𑀪𑀺𑀓𑁆𑀔𑀯𑁂, 𑀤𑁆𑀯𑀺𑀦𑁆𑀦𑀁 𑀆𑀲𑀯𑀸 𑀯𑀟𑁆𑀠𑀦𑁆𑀢𑀻’’𑀢𑀺.

𑁧𑁧𑁪. ‘‘𑀤𑁆𑀯𑀺𑀦𑁆𑀦𑀁, 𑀪𑀺𑀓𑁆𑀔𑀯𑁂, 𑀆𑀲𑀯𑀸 𑀦 𑀯𑀟𑁆𑀠𑀦𑁆𑀢𑀺. 𑀓𑀢𑀫𑁂𑀲𑀁 𑀤𑁆𑀯𑀺𑀦𑁆𑀦𑀁? 𑀬𑁄 𑀘 𑀆𑀧𑀢𑁆𑀢𑀺𑀬𑀸 𑀆𑀧𑀢𑁆𑀢𑀺𑀲𑀜𑁆𑀜𑀻, 𑀬𑁄 𑀘 𑀅𑀦𑀸𑀧𑀢𑁆𑀢𑀺𑀬𑀸 𑀅𑀦𑀸𑀧𑀢𑁆𑀢𑀺𑀲𑀜𑁆𑀜𑀻. 𑀇𑀫𑁂𑀲𑀁 𑀔𑁄, 𑀪𑀺𑀓𑁆𑀔𑀯𑁂, 𑀤𑁆𑀯𑀺𑀦𑁆𑀦𑀁 𑀆𑀲𑀯𑀸 𑀦 𑀯𑀟𑁆𑀠𑀦𑁆𑀢𑀻’’𑀢𑀺.

𑁧𑁧𑁫. ‘‘𑀤𑁆𑀯𑀺𑀦𑁆𑀦𑀁, 𑀪𑀺𑀓𑁆𑀔𑀯𑁂, 𑀆𑀲𑀯𑀸 𑀯𑀟𑁆𑀠𑀦𑁆𑀢𑀺. 𑀓𑀢𑀫𑁂𑀲𑀁 𑀤𑁆𑀯𑀺𑀦𑁆𑀦𑀁? 𑀬𑁄 𑀘 𑀅𑀥𑀫𑁆𑀫𑁂 𑀥𑀫𑁆𑀫𑀲𑀜𑁆𑀜𑀻, 𑀬𑁄 𑀘 𑀥𑀫𑁆𑀫𑁂 𑀅𑀥𑀫𑁆𑀫𑀲𑀜𑁆𑀜𑀻. 𑀇𑀫𑁂𑀲𑀁 𑀔𑁄, 𑀪𑀺𑀓𑁆𑀔𑀯𑁂, 𑀤𑁆𑀯𑀺𑀦𑁆𑀦𑀁 𑀆𑀲𑀯𑀸 𑀯𑀟𑁆𑀠𑀦𑁆𑀢𑀻’’𑀢𑀺.

𑁧𑁧𑁬. ‘‘𑀤𑁆𑀯𑀺𑀦𑁆𑀦𑀁, 𑀪𑀺𑀓𑁆𑀔𑀯𑁂, 𑀆𑀲𑀯𑀸 𑀦 𑀯𑀟𑁆𑀠𑀦𑁆𑀢𑀺. 𑀓𑀢𑀫𑁂𑀲𑀁 𑀤𑁆𑀯𑀺𑀦𑁆𑀦𑀁? 𑀬𑁄 𑀘 𑀥𑀫𑁆𑀫𑁂 𑀥𑀫𑁆𑀫𑀲𑀜𑁆𑀜𑀻, 𑀬𑁄 𑀘 𑀅𑀥𑀫𑁆𑀫𑁂 𑀅𑀥𑀫𑁆𑀫𑀲𑀜𑁆𑀜𑀻. 𑀇𑀫𑁂𑀲𑀁 𑀔𑁄, 𑀪𑀺𑀓𑁆𑀔𑀯𑁂, 𑀤𑁆𑀯𑀺𑀦𑁆𑀦𑀁 𑀆𑀲𑀯𑀸 𑀦 𑀯𑀟𑁆𑀠𑀦𑁆𑀢𑀻’’𑀢𑀺.

𑁧𑁧𑁭. ‘‘𑀤𑁆𑀯𑀺𑀦𑁆𑀦𑀁, 𑀪𑀺𑀓𑁆𑀔𑀯𑁂, 𑀆𑀲𑀯𑀸 𑀯𑀟𑁆𑀠𑀦𑁆𑀢𑀺. 𑀓𑀢𑀫𑁂𑀲𑀁 𑀤𑁆𑀯𑀺𑀦𑁆𑀦𑀁? 𑀬𑁄 𑀘 𑀅𑀯𑀺𑀦𑀬𑁂 𑀯𑀺𑀦𑀬𑀲𑀜𑁆𑀜𑀻, 𑀬𑁄 𑀘 𑀯𑀺𑀦𑀬𑁂 𑀅𑀯𑀺𑀦𑀬𑀲𑀜𑁆𑀜𑀻. 𑀇𑀫𑁂𑀲𑀁 𑀔𑁄, 𑀪𑀺𑀓𑁆𑀔𑀯𑁂, 𑀤𑁆𑀯𑀺𑀦𑁆𑀦𑀁 𑀆𑀲𑀯𑀸 𑀯𑀟𑁆𑀠𑀦𑁆𑀢𑀻’’𑀢𑀺.

𑁧𑁧𑁮. ‘‘𑀤𑁆𑀯𑀺𑀦𑁆𑀦𑀁, 𑀪𑀺𑀓𑁆𑀔𑀯𑁂, 𑀆𑀲𑀯𑀸 𑀦 𑀯𑀟𑁆𑀠𑀦𑁆𑀢𑀺. 𑀓𑀢𑀫𑁂𑀲𑀁 𑀤𑁆𑀯𑀺𑀦𑁆𑀦𑀁? 𑀬𑁄 𑀘 𑀅𑀯𑀺𑀦𑀬𑁂 𑀅𑀯𑀺𑀦𑀬𑀲𑀜𑁆𑀜𑀻, 𑀬𑁄 𑀘 𑀯𑀺𑀦𑀬𑁂 𑀯𑀺𑀦𑀬𑀲𑀜𑁆𑀜𑀻. 𑀇𑀫𑁂𑀲𑀁 𑀔𑁄, 𑀪𑀺𑀓𑁆𑀔𑀯𑁂, 𑀤𑁆𑀯𑀺𑀦𑁆𑀦𑀁 𑀆𑀲𑀯𑀸 𑀦 𑀯𑀟𑁆𑀠𑀦𑁆𑀢𑀻’’𑀢𑀺.

𑀩𑀸𑀮𑀯𑀕𑁆𑀕𑁄 𑀧𑀜𑁆𑀘𑀫𑁄.

𑀤𑀼𑀢𑀺𑀬𑁄 𑀧𑀡𑁆𑀡𑀸𑀲𑀓𑁄 𑀲𑀫𑀢𑁆𑀢𑁄.