𑁧. 𑀦𑀺𑀲𑁆𑀲𑀬𑀯𑀕𑁆𑀕𑁄

𑁧. 𑀓𑀺𑀫𑀢𑁆𑀣𑀺𑀬𑀲𑀼𑀢𑁆𑀢𑀁

𑁧. [𑀅. 𑀦𑀺. 𑁧𑁦.𑁧] 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀅𑀣 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀓𑀺𑀫𑀢𑁆𑀣𑀺𑀬𑀸𑀦𑀺, 𑀪𑀦𑁆𑀢𑁂, 𑀓𑀼𑀲𑀮𑀸𑀦𑀺 𑀲𑀻𑀮𑀸𑀦𑀺 𑀓𑀺𑀫𑀸𑀦𑀺𑀲𑀁𑀲𑀸𑀦𑀻’’𑀢𑀺? ‘‘𑀅𑀯𑀺𑀧𑁆𑀧𑀝𑀺𑀲𑀸𑀭𑀢𑁆𑀣𑀸𑀦𑀺 𑀔𑁄, 𑀆𑀦𑀦𑁆𑀤, 𑀓𑀼𑀲𑀮𑀸𑀦𑀺 𑀲𑀻𑀮𑀸𑀦𑀺 𑀅𑀯𑀺𑀧𑁆𑀧𑀝𑀺𑀲𑀸𑀭𑀸𑀦𑀺𑀲𑀁𑀲𑀸𑀦𑀻’’𑀢𑀺.

‘‘𑀅𑀯𑀺𑀧𑁆𑀧𑀝𑀺𑀲𑀸𑀭𑁄 𑀧𑀦, 𑀪𑀦𑁆𑀢𑁂, 𑀓𑀺𑀫𑀢𑁆𑀣𑀺𑀬𑁄 𑀓𑀺𑀫𑀸𑀦𑀺𑀲𑀁𑀲𑁄’’? ‘‘𑀅𑀯𑀺𑀧𑁆𑀧𑀝𑀺𑀲𑀸𑀭𑁄 𑀔𑁄, 𑀆𑀦𑀦𑁆𑀤, 𑀧𑀸𑀫𑁄𑀚𑁆𑀚𑀢𑁆𑀣𑁄 𑀧𑀸𑀫𑁄𑀚𑁆𑀚𑀸𑀦𑀺𑀲𑀁𑀲𑁄’’.

‘‘𑀧𑀸𑀫𑁄𑀚𑁆𑀚𑀁 𑀧𑀦, 𑀪𑀦𑁆𑀢𑁂, 𑀓𑀺𑀫𑀢𑁆𑀣𑀺𑀬𑀁 𑀓𑀺𑀫𑀸𑀦𑀺𑀲𑀁𑀲𑀁’’? ‘‘𑀧𑀸𑀫𑁄𑀚𑁆𑀚𑀁 𑀔𑁄, 𑀆𑀦𑀦𑁆𑀤, 𑀧𑀻𑀢𑀢𑁆𑀣𑀁 𑀧𑀻𑀢𑀸𑀦𑀺𑀲𑀁𑀲𑀁’’.

‘‘𑀧𑀻𑀢𑀺 𑀧𑀦, 𑀪𑀦𑁆𑀢𑁂, 𑀓𑀺𑀫𑀢𑁆𑀣𑀺𑀬𑀸 𑀓𑀺𑀫𑀸𑀦𑀺𑀲𑀁𑀲𑀸’’? ‘‘𑀧𑀻𑀢𑀺 𑀔𑁄, 𑀆𑀦𑀦𑁆𑀤, 𑀧𑀲𑁆𑀲𑀤𑁆𑀥𑀢𑁆𑀣𑀸 𑀧𑀲𑁆𑀲𑀤𑁆𑀥𑀸𑀦𑀺𑀲𑀁𑀲𑀸’’.

‘‘𑀧𑀲𑁆𑀲𑀤𑁆𑀥𑀺 𑀧𑀦, 𑀪𑀦𑁆𑀢𑁂, 𑀓𑀺𑀫𑀢𑁆𑀣𑀺𑀬𑀸 𑀓𑀺𑀫𑀸𑀦𑀺𑀲𑀁𑀲𑀸’’? ‘‘𑀧𑀲𑁆𑀲𑀤𑁆𑀥𑀺 𑀔𑁄, 𑀆𑀦𑀦𑁆𑀤, 𑀲𑀼𑀔𑀢𑁆𑀣𑀸 𑀲𑀼𑀔𑀸𑀦𑀺𑀲𑀁𑀲𑀸’’.

‘‘𑀲𑀼𑀔𑀁 𑀧𑀦, 𑀪𑀦𑁆𑀢𑁂, 𑀓𑀺𑀫𑀢𑁆𑀣𑀺𑀬𑀁 𑀓𑀺𑀫𑀸𑀦𑀺𑀲𑀁𑀲𑀁’’? ‘‘𑀲𑀼𑀔𑀁 𑀔𑁄, 𑀆𑀦𑀦𑁆𑀤, 𑀲𑀫𑀸𑀥𑀢𑁆𑀣𑀁 𑀲𑀫𑀸𑀥𑀸𑀦𑀺𑀲𑀁𑀲𑀁’’.

‘‘𑀲𑀫𑀸𑀥𑀺 𑀧𑀦, 𑀪𑀦𑁆𑀢𑁂, 𑀓𑀺𑀫𑀢𑁆𑀣𑀺𑀬𑁄 𑀓𑀺𑀫𑀸𑀦𑀺𑀲𑀁𑀲𑁄’’? ‘‘𑀲𑀫𑀸𑀥𑀺 𑀔𑁄, 𑀆𑀦𑀦𑁆𑀤, 𑀬𑀣𑀸𑀪𑀽𑀢𑀜𑀸𑀡𑀤𑀲𑁆𑀲𑀦𑀢𑁆𑀣𑁄 𑀬𑀣𑀸𑀪𑀽𑀢𑀜𑀸𑀡𑀤𑀲𑁆𑀲𑀦𑀸𑀦𑀺𑀲𑀁𑀲𑁄’’.

‘‘𑀬𑀣𑀸𑀪𑀽𑀢𑀜𑀸𑀡𑀤𑀲𑁆𑀲𑀦𑀁 𑀧𑀦, 𑀪𑀦𑁆𑀢𑁂, 𑀓𑀺𑀫𑀢𑁆𑀣𑀺𑀬𑀁 𑀓𑀺𑀫𑀸𑀦𑀺𑀲𑀁𑀲𑀁’’? ‘‘𑀬𑀣𑀸𑀪𑀽𑀢𑀜𑀸𑀡𑀤𑀲𑁆𑀲𑀦𑀁 𑀔𑁄, 𑀆𑀦𑀦𑁆𑀤, 𑀦𑀺𑀩𑁆𑀩𑀺𑀤𑀢𑁆𑀣𑀁 𑀦𑀺𑀩𑁆𑀩𑀺𑀤𑀸𑀦𑀺𑀲𑀁𑀲𑀁’’.

‘‘𑀦𑀺𑀩𑁆𑀩𑀺𑀤𑀸, 𑀧𑀦, 𑀪𑀦𑁆𑀢𑁂, 𑀓𑀺𑀫𑀢𑁆𑀣𑀺𑀬𑀸 𑀓𑀺𑀫𑀸𑀦𑀺𑀲𑀁𑀲𑀸’’? ‘‘𑀦𑀺𑀩𑁆𑀩𑀺𑀤𑀸 𑀔𑁄, 𑀆𑀦𑀦𑁆𑀤, 𑀯𑀺𑀭𑀸𑀕𑀢𑁆𑀣𑀸 𑀯𑀺𑀭𑀸𑀕𑀸𑀦𑀺𑀲𑀁𑀲𑀸 ’’.

‘‘𑀯𑀺𑀭𑀸𑀕𑁄 𑀧𑀦, 𑀪𑀦𑁆𑀢𑁂, 𑀓𑀺𑀫𑀢𑁆𑀣𑀺𑀬𑁄 𑀓𑀺𑀫𑀸𑀦𑀺𑀲𑀁𑀲𑁄’’? ‘‘𑀯𑀺𑀭𑀸𑀕𑁄 𑀔𑁄, 𑀆𑀦𑀦𑁆𑀤, 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀢𑁆𑀣𑁄 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀸𑀦𑀺𑀲𑀁𑀲𑁄.

‘‘𑀇𑀢𑀺 𑀔𑁄, 𑀆𑀦𑀦𑁆𑀤, 𑀓𑀼𑀲𑀮𑀸𑀦𑀺 𑀲𑀻𑀮𑀸𑀦𑀺 𑀅𑀯𑀺𑀧𑁆𑀧𑀝𑀺𑀲𑀸𑀭𑀢𑁆𑀣𑀸𑀦𑀺 𑀅𑀯𑀺𑀧𑁆𑀧𑀝𑀺𑀲𑀸𑀭𑀸𑀦𑀺𑀲𑀁𑀲𑀸𑀦𑀺, 𑀅𑀯𑀺𑀧𑁆𑀧𑀝𑀺𑀲𑀸𑀭𑁄 𑀧𑀸𑀫𑁄𑀚𑁆𑀚𑀢𑁆𑀣𑁄 𑀧𑀸𑀫𑁄𑀚𑁆𑀚𑀸𑀦𑀺𑀲𑀁𑀲𑁄, 𑀧𑀸𑀫𑁄𑀚𑁆𑀚𑀁 𑀧𑀻𑀢𑀢𑁆𑀣𑀁 𑀧𑀻𑀢𑀸𑀦𑀺𑀲𑀁𑀲𑀁, 𑀧𑀻𑀢𑀺 𑀧𑀲𑁆𑀲𑀤𑁆𑀥𑀢𑁆𑀣𑀸 𑀧𑀲𑁆𑀲𑀤𑁆𑀥𑀸𑀦𑀺𑀲𑀁𑀲𑀸, 𑀧𑀲𑁆𑀲𑀤𑁆𑀥𑀺 𑀲𑀼𑀔𑀢𑁆𑀣𑀸 𑀲𑀼𑀔𑀸𑀦𑀺𑀲𑀁𑀲𑀸, 𑀲𑀼𑀔𑀁 𑀲𑀫𑀸𑀥𑀢𑁆𑀣𑀁 𑀲𑀫𑀸𑀥𑀸𑀦𑀺𑀲𑀁𑀲𑀁, 𑀲𑀫𑀸𑀥𑀺 𑀬𑀣𑀸𑀪𑀽𑀢𑀜𑀸𑀡𑀤𑀲𑁆𑀲𑀦𑀢𑁆𑀣𑁄 𑀬𑀣𑀸𑀪𑀽𑀢𑀜𑀸𑀡𑀤𑀲𑁆𑀲𑀦𑀸𑀦𑀺𑀲𑀁𑀲𑁄, 𑀬𑀣𑀸𑀪𑀽𑀢𑀜𑀸𑀡𑀤𑀲𑁆𑀲𑀦𑀁 𑀦𑀺𑀩𑁆𑀩𑀺𑀤𑀢𑁆𑀣𑀁 𑀦𑀺𑀩𑁆𑀩𑀺𑀤𑀸𑀦𑀺𑀲𑀁𑀲𑀁, 𑀦𑀺𑀩𑁆𑀩𑀺𑀤𑀸 𑀯𑀺𑀭𑀸𑀕𑀢𑁆𑀣𑀸 𑀯𑀺𑀭𑀸𑀕𑀸𑀦𑀺𑀲𑀁𑀲𑀸, 𑀯𑀺𑀭𑀸𑀕𑁄 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀢𑁆𑀣𑁄 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀸𑀦𑀺𑀲𑀁𑀲𑁄. 𑀇𑀢𑀺 𑀔𑁄, 𑀆𑀦𑀦𑁆𑀤, 𑀓𑀼𑀲𑀮𑀸𑀦𑀺 𑀲𑀻𑀮𑀸𑀦𑀺 𑀅𑀦𑀼𑀧𑀼𑀩𑁆𑀩𑁂𑀦 𑀅𑀕𑁆𑀕𑀸𑀬 𑀧𑀭𑁂𑀦𑁆𑀢𑀻’’𑀢𑀺. 𑀧𑀞𑀫𑀁.

𑁨. 𑀘𑁂𑀢𑀦𑀸𑀓𑀭𑀡𑀻𑀬𑀲𑀼𑀢𑁆𑀢𑀁

𑁨. [𑀅. 𑀦𑀺. 𑁧𑁦.𑁨] ‘‘𑀲𑀻𑀮𑀯𑀢𑁄, 𑀪𑀺𑀓𑁆𑀔𑀯𑁂, 𑀲𑀻𑀮𑀲𑀫𑁆𑀧𑀦𑁆𑀦𑀲𑁆𑀲 𑀦 𑀘𑁂𑀢𑀦𑀸𑀬 𑀓𑀭𑀡𑀻𑀬𑀁 𑁋 ‘𑀅𑀯𑀺𑀧𑁆𑀧𑀝𑀺𑀲𑀸𑀭𑁄 𑀫𑁂 𑀉𑀧𑁆𑀧𑀚𑁆𑀚𑀢𑀽’𑀢𑀺. 𑀥𑀫𑁆𑀫𑀢𑀸 𑀏𑀲𑀸, 𑀪𑀺𑀓𑁆𑀔𑀯𑁂, 𑀬𑀁 𑀲𑀻𑀮𑀯𑀢𑁄 𑀲𑀻𑀮𑀲𑀫𑁆𑀧𑀦𑁆𑀦𑀲𑁆𑀲 𑀅𑀯𑀺𑀧𑁆𑀧𑀝𑀺𑀲𑀸𑀭𑁄 𑀉𑀧𑁆𑀧𑀚𑁆𑀚𑀢𑀺.

‘‘𑀅𑀯𑀺𑀧𑁆𑀧𑀝𑀺𑀲𑀸𑀭𑀺𑀲𑁆𑀲, 𑀪𑀺𑀓𑁆𑀔𑀯𑁂, 𑀦 𑀘𑁂𑀢𑀦𑀸𑀬 𑀓𑀭𑀡𑀻𑀬𑀁 𑁋 ‘𑀧𑀸𑀫𑁄𑀚𑁆𑀚𑀁 𑀫𑁂 𑀉𑀧𑁆𑀧𑀚𑁆𑀚𑀢𑀽’𑀢𑀺. 𑀥𑀫𑁆𑀫𑀢𑀸 𑀏𑀲𑀸, 𑀪𑀺𑀓𑁆𑀔𑀯𑁂, 𑀬𑀁 𑀅𑀯𑀺𑀧𑁆𑀧𑀝𑀺𑀲𑀸𑀭𑀺𑀲𑁆𑀲 𑀧𑀸𑀫𑁄𑀚𑁆𑀚𑀁 𑀉𑀧𑁆𑀧𑀚𑁆𑀚𑀢𑀺.

‘‘𑀧𑀫𑀼𑀤𑀺𑀢𑀲𑁆𑀲, 𑀪𑀺𑀓𑁆𑀔𑀯𑁂, 𑀦 𑀘𑁂𑀢𑀦𑀸𑀬 𑀓𑀭𑀡𑀻𑀬𑀁 𑁋 ‘𑀧𑀻𑀢𑀺 𑀫𑁂 𑀉𑀧𑁆𑀧𑀚𑁆𑀚𑀢𑀽’𑀢𑀺. 𑀥𑀫𑁆𑀫𑀢𑀸 𑀏𑀲𑀸, 𑀪𑀺𑀓𑁆𑀔𑀯𑁂, 𑀬𑀁 𑀧𑀫𑀼𑀤𑀺𑀢𑀲𑁆𑀲 𑀧𑀻𑀢𑀺 𑀉𑀧𑁆𑀧𑀚𑁆𑀚𑀢𑀺.

‘‘𑀧𑀻𑀢𑀺𑀫𑀦𑀲𑁆𑀲, 𑀪𑀺𑀓𑁆𑀔𑀯𑁂, 𑀦 𑀘𑁂𑀢𑀦𑀸𑀬 𑀓𑀭𑀡𑀻𑀬𑀁 𑁋 ‘𑀓𑀸𑀬𑁄 𑀫𑁂 𑀧𑀲𑁆𑀲𑀫𑁆𑀪𑀢𑀽’𑀢𑀺. 𑀥𑀫𑁆𑀫𑀢𑀸 𑀏𑀲𑀸, 𑀪𑀺𑀓𑁆𑀔𑀯𑁂, 𑀬𑀁 𑀧𑀻𑀢𑀺𑀫𑀦𑀲𑁆𑀲 𑀓𑀸𑀬𑁄 𑀧𑀲𑁆𑀲𑀫𑁆𑀪𑀢𑀺.

‘‘𑀧𑀲𑁆𑀲𑀤𑁆𑀥𑀓𑀸𑀬𑀲𑁆𑀲, 𑀪𑀺𑀓𑁆𑀔𑀯𑁂, 𑀦 𑀘𑁂𑀢𑀦𑀸𑀬 𑀓𑀭𑀡𑀻𑀬𑀁 𑁋 ‘𑀲𑀼𑀔𑀁 𑀯𑁂𑀤𑀺𑀬𑀸𑀫𑀻’𑀢𑀺. 𑀥𑀫𑁆𑀫𑀢𑀸 𑀏𑀲𑀸, 𑀪𑀺𑀓𑁆𑀔𑀯𑁂, 𑀬𑀁 𑀧𑀲𑁆𑀲𑀤𑁆𑀥𑀓𑀸𑀬𑁄 𑀲𑀼𑀔𑀁 𑀯𑁂𑀤𑀺𑀬𑀢𑀺.

‘‘𑀲𑀼𑀔𑀺𑀦𑁄, 𑀪𑀺𑀓𑁆𑀔𑀯𑁂, 𑀦 𑀘𑁂𑀢𑀦𑀸𑀬 𑀓𑀭𑀡𑀻𑀬𑀁 𑁋 ‘𑀘𑀺𑀢𑁆𑀢𑀁 𑀫𑁂 𑀲𑀫𑀸𑀥𑀺𑀬𑀢𑀽’𑀢𑀺. 𑀥𑀫𑁆𑀫𑀢𑀸 𑀏𑀲𑀸, 𑀪𑀺𑀓𑁆𑀔𑀯𑁂, 𑀬𑀁 𑀲𑀼𑀔𑀺𑀦𑁄 𑀘𑀺𑀢𑁆𑀢𑀁 𑀲𑀫𑀸𑀥𑀺𑀬𑀢𑀺.

‘‘𑀲𑀫𑀸𑀳𑀺𑀢𑀲𑁆𑀲, 𑀪𑀺𑀓𑁆𑀔𑀯𑁂, 𑀦 𑀘𑁂𑀢𑀦𑀸𑀬 𑀓𑀭𑀡𑀻𑀬𑀁 𑁋 ‘𑀬𑀣𑀸𑀪𑀽𑀢𑀁 𑀚𑀸𑀦𑀸𑀫𑀺 𑀧𑀲𑁆𑀲𑀸𑀫𑀻’𑀢𑀺. 𑀥𑀫𑁆𑀫𑀢𑀸 𑀏𑀲𑀸, 𑀪𑀺𑀓𑁆𑀔𑀯𑁂, 𑀬𑀁 𑀲𑀫𑀸𑀳𑀺𑀢𑁄 𑀬𑀣𑀸𑀪𑀽𑀢𑀁 𑀚𑀸𑀦𑀸𑀢𑀺 𑀧𑀲𑁆𑀲𑀢𑀺.

‘‘𑀬𑀣𑀸𑀪𑀽𑀢𑀁, 𑀪𑀺𑀓𑁆𑀔𑀯𑁂, 𑀚𑀸𑀦𑀢𑁄 𑀧𑀲𑁆𑀲𑀢𑁄 𑀦 𑀘𑁂𑀢𑀦𑀸𑀬 𑀓𑀭𑀡𑀻𑀬𑀁 𑁋 ‘𑀦𑀺𑀩𑁆𑀩𑀺𑀦𑁆𑀤𑀸𑀫𑀻’𑀢𑀺. 𑀥𑀫𑁆𑀫𑀢𑀸 𑀏𑀲𑀸, 𑀪𑀺𑀓𑁆𑀔𑀯𑁂, 𑀬𑀁 𑀬𑀣𑀸𑀪𑀽𑀢𑀁 𑀚𑀸𑀦𑀁 𑀧𑀲𑁆𑀲𑀁 𑀦𑀺𑀩𑁆𑀩𑀺𑀦𑁆𑀤𑀢𑀺.

‘‘𑀦𑀺𑀩𑁆𑀩𑀺𑀦𑁆𑀦𑀲𑁆𑀲, 𑀪𑀺𑀓𑁆𑀔𑀯𑁂, 𑀦 𑀘𑁂𑀢𑀦𑀸𑀬 𑀓𑀭𑀡𑀻𑀬𑀁 𑁋 ‘𑀯𑀺𑀭𑀚𑁆𑀚𑀸𑀫𑀻’𑀢𑀺. 𑀥𑀫𑁆𑀫𑀢𑀸 𑀏𑀲𑀸, 𑀪𑀺𑀓𑁆𑀔𑀯𑁂, 𑀬𑀁 𑀦𑀺𑀩𑁆𑀩𑀺𑀦𑁆𑀦𑁄 𑀯𑀺𑀭𑀚𑁆𑀚𑀢𑀺.

‘‘𑀯𑀺𑀭𑀢𑁆𑀢𑀲𑁆𑀲, 𑀪𑀺𑀓𑁆𑀔𑀯𑁂, 𑀦 𑀘𑁂𑀢𑀦𑀸𑀬 𑀓𑀭𑀡𑀻𑀬𑀁 𑁋 ‘𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀁 𑀲𑀘𑁆𑀙𑀺𑀓𑀭𑁄𑀫𑀻’𑀢𑀺. 𑀥𑀫𑁆𑀫𑀢𑀸 𑀏𑀲𑀸, 𑀪𑀺𑀓𑁆𑀔𑀯𑁂, 𑀬𑀁 𑀯𑀺𑀭𑀢𑁆𑀢𑁄 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀁 𑀲𑀘𑁆𑀙𑀺𑀓𑀭𑁄𑀢𑀺.

‘‘𑀇𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀯𑀺𑀭𑀸𑀕𑁄 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀢𑁆𑀣𑁄 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀸𑀦𑀺𑀲𑀁𑀲𑁄, 𑀦𑀺𑀩𑁆𑀩𑀺𑀤𑀸 𑀯𑀺𑀭𑀸𑀕𑀢𑁆𑀣𑀸 𑀯𑀺𑀭𑀸𑀕𑀸𑀦𑀺𑀲𑀁𑀲𑀸, 𑀬𑀣𑀸𑀪𑀽𑀢𑀜𑀸𑀡𑀤𑀲𑁆𑀲𑀦𑀁 𑀦𑀺𑀩𑁆𑀩𑀺𑀤𑀢𑁆𑀣𑀁 𑀦𑀺𑀩𑁆𑀩𑀺𑀤𑀸𑀦𑀺𑀲𑀁𑀲𑀁, 𑀲𑀫𑀸𑀥𑀺 𑀬𑀣𑀸𑀪𑀽𑀢𑀜𑀸𑀡𑀤𑀲𑁆𑀲𑀦𑀢𑁆𑀣𑁄 𑀬𑀣𑀸𑀪𑀽𑀢𑀜𑀸𑀡𑀤𑀲𑁆𑀲𑀦𑀸𑀦𑀺𑀲𑀁𑀲𑁄, 𑀲𑀼𑀔𑀁 𑀲𑀫𑀸𑀥𑀢𑁆𑀣𑀁 𑀲𑀫𑀸𑀥𑀸𑀦𑀺𑀲𑀁𑀲𑀁, 𑀧𑀲𑁆𑀲𑀤𑁆𑀥𑀺 𑀲𑀼𑀔𑀢𑁆𑀣𑀸 𑀲𑀼𑀔𑀸𑀦𑀺𑀲𑀁𑀲𑀸, 𑀧𑀻𑀢𑀺 𑀧𑀲𑁆𑀲𑀤𑁆𑀥𑀢𑁆𑀣𑀸 𑀧𑀲𑁆𑀲𑀤𑁆𑀥𑀸𑀦𑀺𑀲𑀁𑀲𑀸, 𑀧𑀸𑀫𑁄𑀚𑁆𑀚𑀁 𑀧𑀻𑀢𑀢𑁆𑀣𑀁 𑀧𑀻𑀢𑀸𑀦𑀺𑀲𑀁𑀲𑀁, 𑀅𑀯𑀺𑀧𑁆𑀧𑀝𑀺𑀲𑀸𑀭𑁄 𑀧𑀸𑀫𑁄𑀚𑁆𑀚𑀢𑁆𑀣𑁄 𑀧𑀸𑀫𑁄𑀚𑁆𑀚𑀸𑀦𑀺𑀲𑀁𑀲𑁄, 𑀓𑀼𑀲𑀮𑀸𑀦𑀺 𑀲𑀻𑀮𑀸𑀦𑀺 𑀅𑀯𑀺𑀧𑁆𑀧𑀝𑀺𑀲𑀸𑀭𑀢𑁆𑀣𑀸𑀦𑀺 𑀅𑀯𑀺𑀧𑁆𑀧𑀝𑀺𑀲𑀸𑀭𑀸𑀦𑀺𑀲𑀁𑀲𑀸𑀦𑀺. 𑀇𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸 𑀥𑀫𑁆𑀫𑁂 𑀅𑀪𑀺𑀲𑀦𑁆𑀤𑁂𑀦𑁆𑀢𑀺, 𑀥𑀫𑁆𑀫𑀸 𑀥𑀫𑁆𑀫𑁂 𑀧𑀭𑀺𑀧𑀽𑀭𑁂𑀦𑁆𑀢𑀺 𑀅𑀧𑀸𑀭𑀸 𑀧𑀸𑀭𑀁 𑀕𑀫𑀦𑀸𑀬𑀸’’𑀢𑀺. 𑀤𑀼𑀢𑀺𑀬𑀁.

𑁩. 𑀧𑀞𑀫𑀉𑀧𑀦𑀺𑀲𑀸𑀲𑀼𑀢𑁆𑀢𑀁

𑁩. [𑀅. 𑀦𑀺. 𑁫.𑁨𑁪; 𑁧𑁦.𑁩] ‘‘𑀤𑀼𑀲𑁆𑀲𑀻𑀮𑀲𑁆𑀲, 𑀪𑀺𑀓𑁆𑀔𑀯𑁂, 𑀲𑀻𑀮𑀯𑀺𑀧𑀦𑁆𑀦𑀲𑁆𑀲 𑀳𑀢𑀽𑀧𑀦𑀺𑀲𑁄 𑀳𑁄𑀢𑀺 𑀅𑀯𑀺𑀧𑁆𑀧𑀝𑀺𑀲𑀸𑀭𑁄. 𑀅𑀯𑀺𑀧𑁆𑀧𑀝𑀺𑀲𑀸𑀭𑁂 𑀅𑀲𑀢𑀺 𑀅𑀯𑀺𑀧𑁆𑀧𑀝𑀺𑀲𑀸𑀭𑀯𑀺𑀧𑀦𑁆𑀦𑀲𑁆𑀲 𑀳𑀢𑀽𑀧𑀦𑀺𑀲𑀁 𑀳𑁄𑀢𑀺 𑀧𑀸𑀫𑁄𑀚𑁆𑀚𑀁. 𑀧𑀸𑀫𑁄𑀚𑁆𑀚𑁂 𑀅𑀲𑀢𑀺 𑀧𑀸𑀫𑁄𑀚𑁆𑀚𑀯𑀺𑀧𑀦𑁆𑀦𑀲𑁆𑀲 𑀳𑀢𑀽𑀧𑀦𑀺𑀲𑀸 𑀳𑁄𑀢𑀺 𑀧𑀻𑀢𑀺. 𑀧𑀻𑀢𑀺𑀬𑀸 𑀅𑀲𑀢𑀺 𑀧𑀻𑀢𑀺𑀯𑀺𑀧𑀦𑁆𑀦𑀲𑁆𑀲 𑀳𑀢𑀽𑀧𑀦𑀺𑀲𑀸 𑀳𑁄𑀢𑀺 𑀧𑀲𑁆𑀲𑀤𑁆𑀥𑀺. 𑀧𑀲𑁆𑀲𑀤𑁆𑀥𑀺𑀬𑀸 𑀅𑀲𑀢𑀺 𑀧𑀲𑁆𑀲𑀤𑁆𑀥𑀺𑀯𑀺𑀧𑀦𑁆𑀦𑀲𑁆𑀲 𑀳𑀢𑀽𑀧𑀦𑀺𑀲𑀁 𑀳𑁄𑀢𑀺 𑀲𑀼𑀔𑀁. 𑀲𑀼𑀔𑁂 𑀅𑀲𑀢𑀺 𑀲𑀼𑀔𑀯𑀺𑀧𑀦𑁆𑀦𑀲𑁆𑀲 𑀳𑀢𑀽𑀧𑀦𑀺𑀲𑁄 𑀳𑁄𑀢𑀺 𑀲𑀫𑁆𑀫𑀸𑀲𑀫𑀸𑀥𑀺. 𑀲𑀫𑁆𑀫𑀸𑀲𑀫𑀸𑀥𑀺𑀫𑁆𑀳𑀺 𑀅𑀲𑀢𑀺 𑀲𑀫𑁆𑀫𑀸𑀲𑀫𑀸𑀥𑀺𑀯𑀺𑀧𑀦𑁆𑀦𑀲𑁆𑀲 𑀳𑀢𑀽𑀧𑀦𑀺𑀲𑀁 𑀳𑁄𑀢𑀺 𑀬𑀣𑀸𑀪𑀽𑀢𑀜𑀸𑀡𑀤𑀲𑁆𑀲𑀦𑀁. 𑀬𑀣𑀸𑀪𑀽𑀢𑀜𑀸𑀡𑀤𑀲𑁆𑀲𑀦𑁂 𑀅𑀲𑀢𑀺 𑀬𑀣𑀸𑀪𑀽𑀢𑀜𑀸𑀡𑀤𑀲𑁆𑀲𑀦𑀯𑀺𑀧𑀦𑁆𑀦𑀲𑁆𑀲 𑀳𑀢𑀽𑀧𑀦𑀺𑀲𑀸 𑀳𑁄𑀢𑀺 𑀦𑀺𑀩𑁆𑀩𑀺𑀤𑀸. 𑀦𑀺𑀩𑁆𑀩𑀺𑀤𑀸𑀬 𑀅𑀲𑀢𑀺 𑀦𑀺𑀩𑁆𑀩𑀺𑀤𑀸𑀯𑀺𑀧𑀦𑁆𑀦𑀲𑁆𑀲 𑀳𑀢𑀽𑀧𑀦𑀺𑀲𑁄 𑀳𑁄𑀢𑀺 𑀯𑀺𑀭𑀸𑀕𑁄. 𑀯𑀺𑀭𑀸𑀕𑁂 𑀅𑀲𑀢𑀺 𑀯𑀺𑀭𑀸𑀕𑀯𑀺𑀧𑀦𑁆𑀦𑀲𑁆𑀲 𑀳𑀢𑀽𑀧𑀦𑀺𑀲𑀁 𑀳𑁄𑀢𑀺 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀁.

‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀭𑀼𑀓𑁆𑀔𑁄 𑀲𑀸𑀔𑀸𑀧𑀮𑀸𑀲𑀯𑀺𑀧𑀦𑁆𑀦𑁄. 𑀢𑀲𑁆𑀲 𑀧𑀧𑀝𑀺𑀓𑀸𑀧𑀺 𑀦 𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀢𑀺, 𑀢𑀘𑁄𑀧𑀺… 𑀨𑁂𑀕𑁆𑀕𑀼𑀧𑀺… 𑀲𑀸𑀭𑁄𑀧𑀺 𑀦 𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀢𑀺. 𑀏𑀯𑀫𑁂𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀤𑀼𑀲𑁆𑀲𑀻𑀮𑀲𑁆𑀲 𑀲𑀻𑀮𑀯𑀺𑀧𑀦𑁆𑀦𑀲𑁆𑀲 𑀳𑀢𑀽𑀧𑀦𑀺𑀲𑁄 𑀳𑁄𑀢𑀺 𑀅𑀯𑀺𑀧𑁆𑀧𑀝𑀺𑀲𑀸𑀭𑁄, 𑀅𑀯𑀺𑀧𑁆𑀧𑀝𑀺𑀲𑀸𑀭𑁂 𑀅𑀲𑀢𑀺 𑀅𑀯𑀺𑀧𑁆𑀧𑀝𑀺𑀲𑀸𑀭𑀯𑀺𑀧𑀦𑁆𑀦𑀲𑁆𑀲 𑀳𑀢𑀽𑀧𑀦𑀺𑀲𑀁 𑀳𑁄𑀢𑀺 𑀧𑀸𑀫𑁄𑀚𑁆𑀚𑀁…𑀧𑁂… 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀁.

‘‘𑀲𑀻𑀮𑀯𑀢𑁄, 𑀪𑀺𑀓𑁆𑀔𑀯𑁂, 𑀲𑀻𑀮𑀲𑀫𑁆𑀧𑀦𑁆𑀦𑀲𑁆𑀲 𑀉𑀧𑀦𑀺𑀲𑀲𑀫𑁆𑀧𑀦𑁆𑀦𑁄 𑀳𑁄𑀢𑀺 𑀅𑀯𑀺𑀧𑁆𑀧𑀝𑀺𑀲𑀸𑀭𑁄, 𑀅𑀯𑀺𑀧𑁆𑀧𑀝𑀺𑀲𑀸𑀭𑁂 𑀲𑀢𑀺 𑀅𑀯𑀺𑀧𑁆𑀧𑀝𑀺𑀲𑀸𑀭𑀲𑀫𑁆𑀧𑀦𑁆𑀦𑀲𑁆𑀲 𑀉𑀧𑀦𑀺𑀲𑀲𑀫𑁆𑀧𑀦𑁆𑀦𑀁 𑀳𑁄𑀢𑀺 𑀧𑀸𑀫𑁄𑀚𑁆𑀚𑀁, 𑀧𑀸𑀫𑁄𑀚𑁆𑀚𑁂 𑀲𑀢𑀺 𑀧𑀸𑀫𑁄𑀚𑁆𑀚𑀲𑀫𑁆𑀧𑀦𑁆𑀦𑀲𑁆𑀲 𑀉𑀧𑀦𑀺𑀲𑀲𑀫𑁆𑀧𑀦𑁆𑀦𑀸 𑀳𑁄𑀢𑀺 𑀧𑀻𑀢𑀺, 𑀧𑀻𑀢𑀺𑀬𑀸 𑀲𑀢𑀺 𑀧𑀻𑀢𑀺𑀲𑀫𑁆𑀧𑀦𑁆𑀦𑀲𑁆𑀲 𑀉𑀧𑀦𑀺𑀲𑀲𑀫𑁆𑀧𑀦𑁆𑀦𑀸 𑀳𑁄𑀢𑀺 𑀧𑀲𑁆𑀲𑀤𑁆𑀥𑀺, 𑀧𑀲𑁆𑀲𑀤𑁆𑀥𑀺𑀬𑀸 𑀲𑀢𑀺 𑀧𑀲𑁆𑀲𑀤𑁆𑀥𑀺𑀲𑀫𑁆𑀧𑀦𑁆𑀦𑀲𑁆𑀲 𑀉𑀧𑀦𑀺𑀲𑀲𑀫𑁆𑀧𑀦𑁆𑀦𑀁 𑀳𑁄𑀢𑀺 𑀲𑀼𑀔𑀁, 𑀲𑀼𑀔𑁂 𑀲𑀢𑀺 𑀲𑀼𑀔𑀲𑀫𑁆𑀧𑀦𑁆𑀦𑀲𑁆𑀲 𑀉𑀧𑀦𑀺𑀲𑀲𑀫𑁆𑀧𑀦𑁆𑀦𑁄 𑀳𑁄𑀢𑀺 𑀲𑀫𑁆𑀫𑀸𑀲𑀫𑀸𑀥𑀺, 𑀲𑀫𑁆𑀫𑀸𑀲𑀫𑀸𑀥𑀺𑀫𑁆𑀳𑀺 𑀲𑀢𑀺 𑀲𑀫𑁆𑀫𑀸𑀲𑀫𑀸𑀥𑀺𑀲𑀫𑁆𑀧𑀦𑁆𑀦𑀲𑁆𑀲 𑀉𑀧𑀦𑀺𑀲𑀲𑀫𑁆𑀧𑀦𑁆𑀦𑀁 𑀳𑁄𑀢𑀺 𑀬𑀣𑀸𑀪𑀽𑀢𑀜𑀸𑀡𑀤𑀲𑁆𑀲𑀦𑀁, 𑀬𑀣𑀸𑀪𑀽𑀢𑀜𑀸𑀡𑀤𑀲𑁆𑀲𑀦𑁂 𑀲𑀢𑀺 𑀬𑀣𑀸𑀪𑀽𑀢𑀜𑀸𑀡𑀤𑀲𑁆𑀲𑀦𑀲𑀫𑁆𑀧𑀦𑁆𑀦𑀲𑁆𑀲 𑀉𑀧𑀦𑀺𑀲𑀲𑀫𑁆𑀧𑀦𑁆𑀦𑀸 𑀳𑁄𑀢𑀺 𑀦𑀺𑀩𑁆𑀩𑀺𑀤𑀸, 𑀦𑀺𑀩𑁆𑀩𑀺𑀤𑀸𑀬 𑀲𑀢𑀺 𑀦𑀺𑀩𑁆𑀩𑀺𑀤𑀸𑀲𑀫𑁆𑀧𑀦𑁆𑀦𑀲𑁆𑀲 𑀉𑀧𑀦𑀺𑀲𑀲𑀫𑁆𑀧𑀦𑁆𑀦𑁄 𑀳𑁄𑀢𑀺 𑀯𑀺𑀭𑀸𑀕𑁄, 𑀯𑀺𑀭𑀸𑀕𑁂 𑀲𑀢𑀺 𑀯𑀺𑀭𑀸𑀕𑀲𑀫𑁆𑀧𑀦𑁆𑀦𑀲𑁆𑀲 𑀉𑀧𑀦𑀺𑀲𑀲𑀫𑁆𑀧𑀦𑁆𑀦𑀁 𑀳𑁄𑀢𑀺 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀁.

‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀭𑀼𑀓𑁆𑀔𑁄 𑀲𑀸𑀔𑀸𑀧𑀮𑀸𑀲𑀲𑀫𑁆𑀧𑀦𑁆𑀦𑁄. 𑀢𑀲𑁆𑀲 𑀧𑀧𑀝𑀺𑀓𑀸𑀧𑀺 𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀢𑀺, 𑀢𑀘𑁄𑀧𑀺… 𑀨𑁂𑀕𑁆𑀕𑀼𑀧𑀺… 𑀲𑀸𑀭𑁄𑀧𑀺 𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀢𑀺. 𑀏𑀯𑀫𑁂𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀲𑀻𑀮𑀯𑀢𑁄 𑀲𑀻𑀮𑀲𑀫𑁆𑀧𑀦𑁆𑀦𑀲𑁆𑀲 𑀉𑀧𑀦𑀺𑀲𑀲𑀫𑁆𑀧𑀦𑁆𑀦𑁄 𑀳𑁄𑀢𑀺 𑀅𑀯𑀺𑀧𑁆𑀧𑀝𑀺𑀲𑀸𑀭𑁄, 𑀅𑀯𑀺𑀧𑁆𑀧𑀝𑀺𑀲𑀸𑀭𑁂 𑀲𑀢𑀺 𑀅𑀯𑀺𑀧𑁆𑀧𑀝𑀺𑀲𑀸𑀭𑀲𑀫𑁆𑀧𑀦𑁆𑀦𑀲𑁆𑀲 𑀉𑀧𑀦𑀺𑀲𑀲𑀫𑁆𑀧𑀦𑁆𑀦𑀁 𑀳𑁄𑀢𑀺…𑀧𑁂… 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦’’𑀦𑁆𑀢𑀺. 𑀢𑀢𑀺𑀬𑀁.

𑁪. 𑀤𑀼𑀢𑀺𑀬𑀉𑀧𑀦𑀺𑀲𑀸𑀲𑀼𑀢𑁆𑀢𑀁

𑁪. 𑀢𑀢𑁆𑀭 𑀔𑁄 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀆𑀯𑀼𑀲𑁄 𑀪𑀺𑀓𑁆𑀔𑀯𑁂’’𑀢𑀺 [𑀪𑀺𑀓𑁆𑀔𑀯𑁄𑀢𑀺 (𑀲𑀻. 𑀲𑁆𑀬𑀸. 𑀧𑀻.) 𑀏𑀯𑀁 𑀲𑀩𑁆𑀩𑀢𑁆𑀣 𑀅. 𑀦𑀺. 𑁧𑁦.𑁪]. ‘‘𑀆𑀯𑀼𑀲𑁄’’𑀢𑀺 𑀔𑁄 𑀢𑁂 𑀪𑀺𑀓𑁆𑀔𑀽 𑀆𑀬𑀲𑁆𑀫𑀢𑁄 𑀲𑀸𑀭𑀺𑀧𑀼𑀢𑁆𑀢𑀲𑁆𑀲 𑀧𑀘𑁆𑀘𑀲𑁆𑀲𑁄𑀲𑀼𑀁. 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀏𑀢𑀤𑀯𑁄𑀘 𑁋

‘‘𑀤𑀼𑀲𑁆𑀲𑀻𑀮𑀲𑁆𑀲, 𑀆𑀯𑀼𑀲𑁄, 𑀲𑀻𑀮𑀯𑀺𑀧𑀦𑁆𑀦𑀲𑁆𑀲 𑀳𑀢𑀽𑀧𑀦𑀺𑀲𑁄 𑀳𑁄𑀢𑀺 𑀅𑀯𑀺𑀧𑁆𑀧𑀝𑀺𑀲𑀸𑀭𑁄, 𑀅𑀯𑀺𑀧𑁆𑀧𑀝𑀺𑀲𑀸𑀭𑁂 𑀅𑀲𑀢𑀺 𑀅𑀯𑀺𑀧𑁆𑀧𑀝𑀺𑀲𑀸𑀭𑀯𑀺𑀧𑀦𑁆𑀦𑀲𑁆𑀲 𑀳𑀢𑀽𑀧𑀦𑀺𑀲𑀁 𑀳𑁄𑀢𑀺 𑀧𑀸𑀫𑁄𑀚𑁆𑀚𑀁, 𑀧𑀸𑀫𑁄𑀚𑁆𑀚𑁂 𑀅𑀲𑀢𑀺 𑀧𑀸𑀫𑁄𑀚𑁆𑀚𑀯𑀺𑀧𑀦𑁆𑀦𑀲𑁆𑀲 𑀳𑀢𑀽𑀧𑀦𑀺𑀲𑀸 𑀳𑁄𑀢𑀺 𑀧𑀻𑀢𑀺, 𑀧𑀻𑀢𑀺𑀬𑀸 𑀅𑀲𑀢𑀺 𑀧𑀻𑀢𑀺𑀯𑀺𑀧𑀦𑁆𑀦𑀲𑁆𑀲 𑀳𑀢𑀽𑀧𑀦𑀺𑀲𑀸 𑀳𑁄𑀢𑀺 𑀧𑀲𑁆𑀲𑀤𑁆𑀥𑀺, 𑀧𑀲𑁆𑀲𑀤𑁆𑀥𑀺𑀬𑀸 𑀅𑀲𑀢𑀺 𑀧𑀲𑁆𑀲𑀤𑁆𑀥𑀺𑀯𑀺𑀧𑀦𑁆𑀦𑀲𑁆𑀲 𑀳𑀢𑀽𑀧𑀦𑀺𑀲𑀁 𑀳𑁄𑀢𑀺 𑀲𑀼𑀔𑀁, 𑀲𑀼𑀔𑁂 𑀅𑀲𑀢𑀺 𑀲𑀼𑀔𑀯𑀺𑀧𑀦𑁆𑀦𑀲𑁆𑀲 𑀳𑀢𑀽𑀧𑀦𑀺𑀲𑁄 𑀳𑁄𑀢𑀺 𑀲𑀫𑁆𑀫𑀸𑀲𑀫𑀸𑀥𑀺, 𑀲𑀫𑁆𑀫𑀸𑀲𑀫𑀸𑀥𑀺𑀫𑁆𑀳𑀺 𑀅𑀲𑀢𑀺 𑀲𑀫𑁆𑀫𑀸𑀲𑀫𑀸𑀥𑀺𑀯𑀺𑀧𑀦𑁆𑀦𑀲𑁆𑀲 𑀳𑀢𑀽𑀧𑀦𑀺𑀲𑀁 𑀳𑁄𑀢𑀺 𑀬𑀣𑀸𑀪𑀽𑀢𑀜𑀸𑀡𑀤𑀲𑁆𑀲𑀦𑀁, 𑀬𑀣𑀸𑀪𑀽𑀢𑀜𑀸𑀡𑀤𑀲𑁆𑀲𑀦𑁂 𑀅𑀲𑀢𑀺 𑀬𑀣𑀸𑀪𑀽𑀢𑀜𑀸𑀡𑀤𑀲𑁆𑀲𑀦𑀯𑀺𑀧𑀦𑁆𑀦𑀲𑁆𑀲 𑀳𑀢𑀽𑀧𑀦𑀺𑀲𑀸 𑀳𑁄𑀢𑀺 𑀦𑀺𑀩𑁆𑀩𑀺𑀤𑀸, 𑀦𑀺𑀩𑁆𑀩𑀺𑀤𑀸𑀬 𑀅𑀲𑀢𑀺 𑀦𑀺𑀩𑁆𑀩𑀺𑀤𑀸𑀯𑀺𑀧𑀦𑁆𑀦𑀲𑁆𑀲 𑀳𑀢𑀽𑀧𑀦𑀺𑀲𑁄 𑀳𑁄𑀢𑀺 𑀯𑀺𑀭𑀸𑀕𑁄, 𑀯𑀺𑀭𑀸𑀕𑁂 𑀅𑀲𑀢𑀺 𑀯𑀺𑀭𑀸𑀕𑀯𑀺𑀧𑀦𑁆𑀦𑀲𑁆𑀲 𑀳𑀢𑀽𑀧𑀦𑀺𑀲𑀁 𑀳𑁄𑀢𑀺 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀁.

‘‘𑀲𑁂𑀬𑁆𑀬𑀣𑀸𑀧𑀺, 𑀆𑀯𑀼𑀲𑁄, 𑀭𑀼𑀓𑁆𑀔𑁄 𑀲𑀸𑀔𑀸𑀧𑀮𑀸𑀲𑀯𑀺𑀧𑀦𑁆𑀦𑁄. 𑀢𑀲𑁆𑀲 𑀧𑀧𑀝𑀺𑀓𑀸𑀧𑀺 𑀦 𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀢𑀺, 𑀢𑀘𑁄𑀧𑀺… 𑀨𑁂𑀕𑁆𑀕𑀼𑀧𑀺… 𑀲𑀸𑀭𑁄𑀧𑀺 𑀦 𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀢𑀺. 𑀏𑀯𑀫𑁂𑀯𑀁 𑀔𑁄, 𑀆𑀯𑀼𑀲𑁄, 𑀤𑀼𑀲𑁆𑀲𑀻𑀮𑀲𑁆𑀲 𑀲𑀻𑀮𑀯𑀺𑀧𑀦𑁆𑀦𑀲𑁆𑀲 𑀳𑀢𑀽𑀧𑀦𑀺𑀲𑁄 𑀳𑁄𑀢𑀺 𑀅𑀯𑀺𑀧𑁆𑀧𑀝𑀺𑀲𑀸𑀭𑁄, 𑀅𑀯𑀺𑀧𑁆𑀧𑀝𑀺𑀲𑀸𑀭𑁂 𑀅𑀲𑀢𑀺 𑀅𑀯𑀺𑀧𑁆𑀧𑀝𑀺𑀲𑀸𑀭𑀯𑀺𑀧𑀦𑁆𑀦𑀲𑁆𑀲 𑀳𑀢𑀽𑀧𑀦𑀺𑀲𑀁 𑀳𑁄𑀢𑀺 𑀧𑀸𑀫𑁄𑀚𑁆𑀚𑀁…𑀧𑁂… 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀁.

‘‘𑀲𑀻𑀮𑀯𑀢𑁄, 𑀆𑀯𑀼𑀲𑁄, 𑀲𑀻𑀮𑀲𑀫𑁆𑀧𑀦𑁆𑀦𑀲𑁆𑀲 𑀉𑀧𑀦𑀺𑀲𑀲𑀫𑁆𑀧𑀦𑁆𑀦𑁄 𑀳𑁄𑀢𑀺 𑀅𑀯𑀺𑀧𑁆𑀧𑀝𑀺𑀲𑀸𑀭𑁄, 𑀅𑀯𑀺𑀧𑁆𑀧𑀝𑀺𑀲𑀸𑀭𑁂 𑀲𑀢𑀺 𑀅𑀯𑀺𑀧𑁆𑀧𑀝𑀺𑀲𑀸𑀭𑀲𑀫𑁆𑀧𑀦𑁆𑀦𑀲𑁆𑀲 𑀉𑀧𑀦𑀺𑀲𑀲𑀫𑁆𑀧𑀦𑁆𑀦𑀁 𑀳𑁄𑀢𑀺 𑀧𑀸𑀫𑁄𑀚𑁆𑀚𑀁, 𑀧𑀸𑀫𑁄𑀚𑁆𑀚𑁂 𑀲𑀢𑀺 𑀧𑀸𑀫𑁄𑀚𑁆𑀚𑀲𑀫𑁆𑀧𑀦𑁆𑀦𑀲𑁆𑀲 𑀉𑀧𑀦𑀺𑀲𑀲𑀫𑁆𑀧𑀦𑁆𑀦𑀸 𑀳𑁄𑀢𑀺 𑀧𑀻𑀢𑀺, 𑀧𑀻𑀢𑀺𑀬𑀸 𑀲𑀢𑀺 𑀧𑀻𑀢𑀺𑀲𑀫𑁆𑀧𑀦𑁆𑀦𑀲𑁆𑀲 𑀉𑀧𑀦𑀺𑀲𑀲𑀫𑁆𑀧𑀦𑁆𑀦𑀸 𑀳𑁄𑀢𑀺 𑀧𑀲𑁆𑀲𑀤𑁆𑀥𑀺, 𑀧𑀲𑁆𑀲𑀤𑁆𑀥𑀺𑀬𑀸 𑀲𑀢𑀺 𑀧𑀲𑁆𑀲𑀤𑁆𑀥𑀺𑀲𑀫𑁆𑀧𑀦𑁆𑀦𑀲𑁆𑀲 𑀉𑀧𑀦𑀺𑀲𑀲𑀫𑁆𑀧𑀦𑁆𑀦𑀁 𑀳𑁄𑀢𑀺 𑀲𑀼𑀔𑀁, 𑀲𑀼𑀔𑁂 𑀲𑀢𑀺 𑀲𑀼𑀔𑀲𑀫𑁆𑀧𑀦𑁆𑀦𑀲𑁆𑀲 𑀉𑀧𑀦𑀺𑀲𑀲𑀫𑁆𑀧𑀦𑁆𑀦𑁄 𑀳𑁄𑀢𑀺 𑀲𑀫𑁆𑀫𑀸𑀲𑀫𑀸𑀥𑀺, 𑀲𑀫𑁆𑀫𑀸𑀲𑀫𑀸𑀥𑀺𑀫𑁆𑀳𑀺 𑀲𑀢𑀺 𑀲𑀫𑁆𑀫𑀸𑀲𑀫𑀸𑀥𑀺𑀲𑀫𑁆𑀧𑀦𑁆𑀦𑀲𑁆𑀲 𑀉𑀧𑀦𑀺𑀲𑀲𑀫𑁆𑀧𑀦𑁆𑀦𑀁 𑀳𑁄𑀢𑀺 𑀬𑀣𑀸𑀪𑀽𑀢𑀜𑀸𑀡𑀤𑀲𑁆𑀲𑀦𑀁, 𑀬𑀣𑀸𑀪𑀽𑀢𑀜𑀸𑀡𑀤𑀲𑁆𑀲𑀦𑁂 𑀲𑀢𑀺 𑀬𑀣𑀸𑀪𑀽𑀢𑀜𑀸𑀡𑀤𑀲𑁆𑀲𑀦𑀲𑀫𑁆𑀧𑀦𑁆𑀦𑀲𑁆𑀲 𑀉𑀧𑀦𑀺𑀲𑀲𑀫𑁆𑀧𑀦𑁆𑀦𑀸 𑀳𑁄𑀢𑀺 𑀦𑀺𑀩𑁆𑀩𑀺𑀤𑀸, 𑀦𑀺𑀩𑁆𑀩𑀺𑀤𑀸𑀬 𑀲𑀢𑀺 𑀦𑀺𑀩𑁆𑀩𑀺𑀤𑀸𑀲𑀫𑁆𑀧𑀦𑁆𑀦𑀲𑁆𑀲 𑀉𑀧𑀦𑀺𑀲𑀲𑀫𑁆𑀧𑀦𑁆𑀦𑁄 𑀳𑁄𑀢𑀺 𑀯𑀺𑀭𑀸𑀕𑁄, 𑀯𑀺𑀭𑀸𑀕𑁂 𑀲𑀢𑀺 𑀯𑀺𑀭𑀸𑀕𑀲𑀫𑁆𑀧𑀦𑁆𑀦𑀲𑁆𑀲 𑀉𑀧𑀦𑀺𑀲𑀲𑀫𑁆𑀧𑀦𑁆𑀦𑀁 𑀳𑁄𑀢𑀺 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀁.

‘‘𑀲𑁂𑀬𑁆𑀬𑀣𑀸𑀧𑀺, 𑀆𑀯𑀼𑀲𑁄, 𑀭𑀼𑀓𑁆𑀔𑁄 𑀲𑀸𑀔𑀸𑀧𑀮𑀸𑀲𑀲𑀫𑁆𑀧𑀦𑁆𑀦𑁄. 𑀢𑀲𑁆𑀲 𑀧𑀧𑀝𑀺𑀓𑀸𑀧𑀺 𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀢𑀺, 𑀢𑀘𑁄𑀧𑀺… 𑀨𑁂𑀕𑁆𑀕𑀼𑀧𑀺… 𑀲𑀸𑀭𑁄𑀧𑀺 𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀢𑀺. 𑀏𑀯𑀫𑁂𑀯𑀁 𑀔𑁄, 𑀆𑀯𑀼𑀲𑁄, 𑀲𑀻𑀮𑀯𑀢𑁄 𑀲𑀻𑀮𑀲𑀫𑁆𑀧𑀦𑁆𑀦𑀲𑁆𑀲 𑀉𑀧𑀦𑀺𑀲𑀲𑀫𑁆𑀧𑀦𑁆𑀦𑁄 𑀳𑁄𑀢𑀺 𑀅𑀯𑀺𑀧𑁆𑀧𑀝𑀺𑀲𑀸𑀭𑁄, 𑀅𑀯𑀺𑀧𑁆𑀧𑀝𑀺𑀲𑀸𑀭𑁂 𑀲𑀢𑀺 𑀅𑀯𑀺𑀧𑁆𑀧𑀝𑀺𑀲𑀸𑀭𑀲𑀫𑁆𑀧𑀦𑁆𑀦𑀲𑁆𑀲 𑀉𑀧𑀦𑀺𑀲𑀲𑀫𑁆𑀧𑀦𑁆𑀦𑀁 𑀳𑁄𑀢𑀺 𑀧𑀸𑀫𑁄𑀚𑁆𑀚𑀁…𑀧𑁂… 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦’’𑀦𑁆𑀢𑀺. 𑀘𑀢𑀼𑀢𑁆𑀣𑀁.

𑁫. 𑀢𑀢𑀺𑀬𑀉𑀧𑀦𑀺𑀲𑀸𑀲𑀼𑀢𑁆𑀢𑀁

𑁫. [𑀅. 𑀦𑀺. 𑁧𑁦.𑁫] 𑀢𑀢𑁆𑀭 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺…𑀧𑁂… ‘‘𑀤𑀼𑀲𑁆𑀲𑀻𑀮𑀲𑁆𑀲, 𑀆𑀯𑀼𑀲𑁄, 𑀲𑀻𑀮𑀯𑀺𑀧𑀦𑁆𑀦𑀲𑁆𑀲 𑀳𑀢𑀽𑀧𑀦𑀺𑀲𑁄 𑀳𑁄𑀢𑀺 𑀅𑀯𑀺𑀧𑁆𑀧𑀝𑀺𑀲𑀸𑀭𑁄, 𑀅𑀯𑀺𑀧𑁆𑀧𑀝𑀺𑀲𑀸𑀭𑁂 𑀅𑀲𑀢𑀺 𑀅𑀯𑀺𑀧𑁆𑀧𑀝𑀺𑀲𑀸𑀭𑀯𑀺𑀧𑀦𑁆𑀦𑀲𑁆𑀲 𑀳𑀢𑀽𑀧𑀦𑀺𑀲𑀁 𑀳𑁄𑀢𑀺 𑀧𑀸𑀫𑁄𑀚𑁆𑀚𑀁, 𑀧𑀸𑀫𑁄𑀚𑁆𑀚𑁂 𑀅𑀲𑀢𑀺 𑀧𑀸𑀫𑁄𑀚𑁆𑀚𑀯𑀺𑀧𑀦𑁆𑀦𑀲𑁆𑀲 𑀳𑀢𑀽𑀧𑀦𑀺𑀲𑀸 𑀳𑁄𑀢𑀺 𑀧𑀻𑀢𑀺, 𑀧𑀻𑀢𑀺𑀬𑀸 𑀅𑀲𑀢𑀺 𑀧𑀻𑀢𑀺𑀯𑀺𑀧𑀦𑁆𑀦𑀲𑁆𑀲 𑀳𑀢𑀽𑀧𑀦𑀺𑀲𑀸 𑀳𑁄𑀢𑀺 𑀧𑀲𑁆𑀲𑀤𑁆𑀥𑀺, 𑀧𑀲𑁆𑀲𑀤𑁆𑀥𑀺𑀬𑀸 𑀅𑀲𑀢𑀺 𑀧𑀲𑁆𑀲𑀤𑁆𑀥𑀺𑀯𑀺𑀧𑀦𑁆𑀦𑀲𑁆𑀲 𑀳𑀢𑀽𑀧𑀦𑀺𑀲𑀁 𑀳𑁄𑀢𑀺 𑀲𑀼𑀔𑀁, 𑀲𑀼𑀔𑁂 𑀅𑀲𑀢𑀺 𑀲𑀼𑀔𑀯𑀺𑀧𑀦𑁆𑀦𑀲𑁆𑀲 𑀳𑀢𑀽𑀧𑀦𑀺𑀲𑁄 𑀳𑁄𑀢𑀺 𑀲𑀫𑁆𑀫𑀸𑀲𑀫𑀸𑀥𑀺, 𑀲𑀫𑁆𑀫𑀸𑀲𑀫𑀸𑀥𑀺𑀫𑁆𑀳𑀺 𑀅𑀲𑀢𑀺 𑀲𑀫𑁆𑀫𑀸𑀲𑀫𑀸𑀥𑀺𑀯𑀺𑀧𑀦𑁆𑀦𑀲𑁆𑀲 𑀳𑀢𑀽𑀧𑀦𑀺𑀲𑀁 𑀳𑁄𑀢𑀺 𑀬𑀣𑀸𑀪𑀽𑀢𑀜𑀸𑀡𑀤𑀲𑁆𑀲𑀦𑀁, 𑀬𑀣𑀸𑀪𑀽𑀢𑀜𑀸𑀡𑀤𑀲𑁆𑀲𑀦𑁂 𑀅𑀲𑀢𑀺 𑀬𑀣𑀸𑀪𑀽𑀢𑀜𑀸𑀡𑀤𑀲𑁆𑀲𑀦𑀯𑀺𑀧𑀦𑁆𑀦𑀲𑁆𑀲 𑀳𑀢𑀽𑀧𑀦𑀺𑀲𑀸 𑀳𑁄𑀢𑀺 𑀦𑀺𑀩𑁆𑀩𑀺𑀤𑀸, 𑀦𑀺𑀩𑁆𑀩𑀺𑀤𑀸𑀬 𑀅𑀲𑀢𑀺 𑀦𑀺𑀩𑁆𑀩𑀺𑀤𑀸𑀯𑀺𑀧𑀦𑁆𑀦𑀲𑁆𑀲 𑀳𑀢𑀽𑀧𑀦𑀺𑀲𑁄 𑀳𑁄𑀢𑀺 𑀯𑀺𑀭𑀸𑀕𑁄, 𑀯𑀺𑀭𑀸𑀕𑁂 𑀅𑀲𑀢𑀺 𑀯𑀺𑀭𑀸𑀕𑀯𑀺𑀧𑀦𑁆𑀦𑀲𑁆𑀲 𑀳𑀢𑀽𑀧𑀦𑀺𑀲𑀁 𑀳𑁄𑀢𑀺 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀁.

‘‘𑀲𑁂𑀬𑁆𑀬𑀣𑀸𑀧𑀺, 𑀆𑀯𑀼𑀲𑁄, 𑀭𑀼𑀓𑁆𑀔𑁄 𑀲𑀸𑀔𑀸𑀧𑀮𑀸𑀲𑀯𑀺𑀧𑀦𑁆𑀦𑁄. 𑀢𑀲𑁆𑀲 𑀧𑀧𑀝𑀺𑀓𑀸𑀧𑀺 𑀦 𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀢𑀺, 𑀢𑀘𑁄𑀧𑀺… 𑀨𑁂𑀕𑁆𑀕𑀼𑀧𑀺… 𑀲𑀸𑀭𑁄𑀧𑀺 𑀦 𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀢𑀺. 𑀏𑀯𑀫𑁂𑀯𑀁 𑀔𑁄, 𑀆𑀯𑀼𑀲𑁄, 𑀤𑀼𑀲𑁆𑀲𑀻𑀮𑀲𑁆𑀲 𑀲𑀻𑀮𑀯𑀺𑀧𑀦𑁆𑀦𑀲𑁆𑀲 𑀳𑀢𑀽𑀧𑀦𑀺𑀲𑁄 𑀳𑁄𑀢𑀺 𑀅𑀯𑀺𑀧𑁆𑀧𑀝𑀺𑀲𑀸𑀭𑁄, 𑀅𑀯𑀺𑀧𑁆𑀧𑀝𑀺𑀲𑀸𑀭𑁂 𑀅𑀲𑀢𑀺 𑀅𑀯𑀺𑀧𑁆𑀧𑀝𑀺𑀲𑀸𑀭𑀯𑀺𑀧𑀦𑁆𑀦𑀲𑁆𑀲 𑀳𑀢𑀽𑀧𑀦𑀺𑀲𑀁 𑀳𑁄𑀢𑀺 𑀧𑀸𑀫𑁄𑀚𑁆𑀚𑀁…𑀧𑁂… 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀁.

‘‘𑀲𑀻𑀮𑀯𑀢𑁄, 𑀆𑀯𑀼𑀲𑁄, 𑀲𑀻𑀮𑀲𑀫𑁆𑀧𑀦𑁆𑀦𑀲𑁆𑀲 𑀉𑀧𑀦𑀺𑀲𑀲𑀫𑁆𑀧𑀦𑁆𑀦𑁄 𑀳𑁄𑀢𑀺 𑀅𑀯𑀺𑀧𑁆𑀧𑀝𑀺𑀲𑀸𑀭𑁄, 𑀅𑀯𑀺𑀧𑁆𑀧𑀝𑀺𑀲𑀸𑀭𑁂 𑀲𑀢𑀺 𑀅𑀯𑀺𑀧𑁆𑀧𑀝𑀺𑀲𑀸𑀭𑀲𑀫𑁆𑀧𑀦𑁆𑀦𑀲𑁆𑀲 𑀉𑀧𑀦𑀺𑀲𑀲𑀫𑁆𑀧𑀦𑁆𑀦𑀁 𑀳𑁄𑀢𑀺 𑀧𑀸𑀫𑁄𑀚𑁆𑀚𑀁, 𑀧𑀸𑀫𑁄𑀚𑁆𑀚𑁂 𑀲𑀢𑀺 𑀧𑀸𑀫𑁄𑀚𑁆𑀚𑀲𑀫𑁆𑀧𑀦𑁆𑀦𑀲𑁆𑀲 𑀉𑀧𑀦𑀺𑀲𑀲𑀫𑁆𑀧𑀦𑁆𑀦𑀸 𑀳𑁄𑀢𑀺 𑀧𑀻𑀢𑀺, 𑀧𑀻𑀢𑀺𑀬𑀸 𑀲𑀢𑀺 𑀧𑀻𑀢𑀺𑀲𑀫𑁆𑀧𑀦𑁆𑀦𑀲𑁆𑀲 𑀉𑀧𑀦𑀺𑀲𑀲𑀫𑁆𑀧𑀦𑁆𑀦𑀸 𑀳𑁄𑀢𑀺 𑀧𑀲𑁆𑀲𑀤𑁆𑀥𑀺, 𑀧𑀲𑁆𑀲𑀤𑁆𑀥𑀺𑀬𑀸 𑀲𑀢𑀺 𑀧𑀲𑁆𑀲𑀤𑁆𑀥𑀺𑀲𑀫𑁆𑀧𑀦𑁆𑀦𑀲𑁆𑀲 𑀉𑀧𑀦𑀺𑀲𑀲𑀫𑁆𑀧𑀦𑁆𑀦𑀁 𑀳𑁄𑀢𑀺 𑀲𑀼𑀔𑀁, 𑀲𑀼𑀔𑁂 𑀲𑀢𑀺 𑀲𑀼𑀔𑀲𑀫𑁆𑀧𑀦𑁆𑀦𑀲𑁆𑀲 𑀉𑀧𑀦𑀺𑀲𑀲𑀫𑁆𑀧𑀦𑁆𑀦𑁄 𑀳𑁄𑀢𑀺 𑀲𑀫𑁆𑀫𑀸𑀲𑀫𑀸𑀥𑀺, 𑀲𑀫𑁆𑀫𑀸𑀲𑀫𑀸𑀥𑀺𑀫𑁆𑀳𑀺 𑀲𑀢𑀺 𑀲𑀫𑁆𑀫𑀸𑀲𑀫𑀸𑀥𑀺𑀲𑀫𑁆𑀧𑀦𑁆𑀦𑀲𑁆𑀲 𑀉𑀧𑀦𑀺𑀲𑀲𑀫𑁆𑀧𑀦𑁆𑀦𑀁 𑀳𑁄𑀢𑀺 𑀬𑀣𑀸𑀪𑀽𑀢𑀜𑀸𑀡𑀤𑀲𑁆𑀲𑀦𑀁, 𑀬𑀣𑀸𑀪𑀽𑀢𑀜𑀸𑀡𑀤𑀲𑁆𑀲𑀦𑁂 𑀲𑀢𑀺 𑀬𑀣𑀸𑀪𑀽𑀢𑀜𑀸𑀡𑀤𑀲𑁆𑀲𑀦𑀲𑀫𑁆𑀧𑀦𑁆𑀦𑀲𑁆𑀲 𑀉𑀧𑀦𑀺𑀲𑀲𑀫𑁆𑀧𑀦𑁆𑀦𑀸 𑀳𑁄𑀢𑀺 𑀦𑀺𑀩𑁆𑀩𑀺𑀤𑀸, 𑀦𑀺𑀩𑁆𑀩𑀺𑀤𑀸𑀬 𑀲𑀢𑀺 𑀦𑀺𑀩𑁆𑀩𑀺𑀤𑀸𑀲𑀫𑁆𑀧𑀦𑁆𑀦𑀲𑁆𑀲 𑀉𑀧𑀦𑀺𑀲𑀲𑀫𑁆𑀧𑀦𑁆𑀦𑁄 𑀳𑁄𑀢𑀺 𑀯𑀺𑀭𑀸𑀕𑁄, 𑀯𑀺𑀭𑀸𑀕𑁂 𑀲𑀢𑀺 𑀯𑀺𑀭𑀸𑀕𑀲𑀫𑁆𑀧𑀦𑁆𑀦𑀲𑁆𑀲 𑀉𑀧𑀦𑀺𑀲𑀲𑀫𑁆𑀧𑀦𑁆𑀦𑀁 𑀳𑁄𑀢𑀺 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀁.

‘‘𑀲𑁂𑀬𑁆𑀬𑀣𑀸𑀧𑀺, 𑀆𑀯𑀼𑀲𑁄, 𑀭𑀼𑀓𑁆𑀔𑁄 𑀲𑀸𑀔𑀸𑀧𑀮𑀸𑀲𑀲𑀫𑁆𑀧𑀦𑁆𑀦𑁄. 𑀢𑀲𑁆𑀲 𑀧𑀧𑀝𑀺𑀓𑀸𑀧𑀺 𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀢𑀺, 𑀢𑀘𑁄𑀧𑀺… 𑀨𑁂𑀕𑁆𑀕𑀼𑀧𑀺… 𑀲𑀸𑀭𑁄𑀧𑀺 𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀢𑀺. 𑀏𑀯𑀫𑁂𑀯𑀁 𑀔𑁄, 𑀆𑀯𑀼𑀲𑁄, 𑀲𑀻𑀮𑀯𑀢𑁄 𑀲𑀻𑀮𑀲𑀫𑁆𑀧𑀦𑁆𑀦𑀲𑁆𑀲 𑀉𑀧𑀦𑀺𑀲𑀲𑀫𑁆𑀧𑀦𑁆𑀦𑁄 𑀳𑁄𑀢𑀺 𑀅𑀯𑀺𑀧𑁆𑀧𑀝𑀺𑀲𑀸𑀭𑁄, 𑀅𑀯𑀺𑀧𑁆𑀧𑀝𑀺𑀲𑀸𑀭𑁂 𑀲𑀢𑀺 𑀅𑀯𑀺𑀧𑁆𑀧𑀝𑀺𑀲𑀸𑀭𑀲𑀫𑁆𑀧𑀦𑁆𑀦𑀲𑁆𑀲 𑀉𑀧𑀦𑀺𑀲𑀲𑀫𑁆𑀧𑀦𑁆𑀦𑀁 𑀳𑁄𑀢𑀺 𑀧𑀸𑀫𑁄𑀚𑁆𑀚𑀁…𑀧𑁂… 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦’’𑀦𑁆𑀢𑀺. 𑀧𑀜𑁆𑀘𑀫𑀁.

𑁬. 𑀩𑁆𑀬𑀲𑀦𑀲𑀼𑀢𑁆𑀢𑀁

𑁬. ‘‘𑀬𑁄 𑀲𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀅𑀓𑁆𑀓𑁄𑀲𑀓𑁄 𑀧𑀭𑀺𑀪𑀸𑀲𑀓𑁄 𑀅𑀭𑀺𑀬𑀽𑀧𑀯𑀸𑀤𑁄 𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀁, 𑀞𑀸𑀦𑀫𑁂𑀢𑀁 𑀅𑀯𑀓𑀸𑀲𑁄 𑀬𑀁 𑀲𑁄 𑀏𑀓𑀸𑀤𑀲𑀦𑁆𑀦𑀁 𑀩𑁆𑀬𑀲𑀦𑀸𑀦𑀁 𑀅𑀜𑁆𑀜𑀢𑀭𑀁 𑀩𑁆𑀬𑀲𑀦𑀁 𑀦𑀺𑀕𑀘𑁆𑀙𑁂𑀬𑁆𑀬.

𑀓𑀢𑀫𑁂𑀲𑀁 𑀏𑀓𑀸𑀤𑀲𑀦𑁆𑀦𑀁? 𑀅𑀦𑀥𑀺𑀕𑀢𑀁 𑀦𑀸𑀥𑀺𑀕𑀘𑁆𑀙𑀢𑀺, 𑀅𑀥𑀺𑀕𑀢𑀸 𑀧𑀭𑀺𑀳𑀸𑀬𑀢𑀺, 𑀲𑀤𑁆𑀥𑀫𑁆𑀫𑀲𑁆𑀲 𑀦 𑀯𑁄𑀤𑀸𑀬𑀦𑁆𑀢𑀺, 𑀲𑀤𑁆𑀥𑀫𑁆𑀫𑁂𑀲𑀼 𑀯𑀸 𑀅𑀥𑀺𑀫𑀸𑀦𑀺𑀓𑁄 𑀳𑁄𑀢𑀺, 𑀅𑀦𑀪𑀺𑀭𑀢𑁄 𑀯𑀸 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀢𑀺, 𑀅𑀜𑁆𑀜𑀢𑀭𑀁 𑀯𑀸 𑀲𑀁𑀓𑀺𑀮𑀺𑀝𑁆𑀞𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀺, 𑀲𑀺𑀓𑁆𑀔𑀁 𑀯𑀸 𑀧𑀘𑁆𑀘𑀓𑁆𑀔𑀸𑀬 𑀳𑀻𑀦𑀸𑀬𑀸𑀯𑀢𑁆𑀢𑀢𑀺, 𑀕𑀸𑀴𑁆𑀳𑀁 𑀯𑀸 𑀭𑁄𑀕𑀸𑀢𑀗𑁆𑀓𑀁 𑀨𑀼𑀲𑀢𑀺, 𑀉𑀫𑁆𑀫𑀸𑀤𑀁 𑀯𑀸 𑀧𑀸𑀧𑀼𑀡𑀸𑀢𑀺 𑀘𑀺𑀢𑁆𑀢𑀓𑁆𑀔𑁂𑀧𑀁 𑀯𑀸, 𑀲𑀫𑁆𑀫𑀽𑀴𑁆𑀳𑁄 𑀓𑀸𑀮𑀁 𑀓𑀭𑁄𑀢𑀺, 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀦𑀺𑀭𑀬𑀁 𑀉𑀧𑀧𑀚𑁆𑀚𑀢𑀺 𑁋 𑀬𑁄 𑀲𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀅𑀓𑁆𑀓𑁄𑀲𑀓𑁄 𑀧𑀭𑀺𑀪𑀸𑀲𑀓𑁄 𑀅𑀭𑀺𑀬𑀽𑀧𑀯𑀸𑀤𑁄 𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀁, 𑀞𑀸𑀦𑀫𑁂𑀢𑀁 𑀅𑀯𑀓𑀸𑀲𑁄 𑀬𑀁 𑀲𑁄 𑀇𑀫𑁂𑀲𑀁 𑀏𑀓𑀸𑀤𑀲𑀦𑁆𑀦𑀁 𑀩𑁆𑀬𑀲𑀦𑀸𑀦𑀁 𑀅𑀜𑁆𑀜𑀢𑀭𑀁 𑀩𑁆𑀬𑀲𑀦𑀁 𑀦𑀺𑀕𑀘𑁆𑀙𑁂𑀬𑁆𑀬. [( ) 𑀏𑀢𑁆𑀣𑀦𑁆𑀢𑀭𑁂 𑀧𑀸𑀞𑁄 𑀲𑀻. 𑀲𑁆𑀬𑀸. 𑀓𑀁. 𑀧𑀻. 𑀧𑁄𑀢𑁆𑀣𑀓𑁂𑀲𑀼 𑀦 𑀤𑀺𑀲𑁆𑀲𑀢𑀺]

‘‘𑀬𑁄 𑀲𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀅𑀓𑁆𑀓𑁄𑀲𑀓𑁄 𑀧𑀭𑀺𑀪𑀸𑀲𑀓𑁄 𑀅𑀭𑀺𑀬𑀽𑀧𑀯𑀸𑀤𑁄 𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀁, 𑀅𑀝𑁆𑀞𑀸𑀦𑀫𑁂𑀢𑀁 𑀅𑀦𑀯𑀓𑀸𑀲𑁄 𑀬𑀁 𑀲𑁄 𑀏𑀓𑀸𑀤𑀲𑀦𑁆𑀦𑀁 𑀩𑁆𑀬𑀲𑀦𑀸𑀦𑀁 𑀅𑀜𑁆𑀜𑀢𑀭𑀁 𑀩𑁆𑀬𑀲𑀦𑀁 𑀦 𑀦𑀺𑀕𑀘𑁆𑀙𑁂𑀬𑁆𑀬.

𑀓𑀢𑀫𑁂𑀲𑀁 𑀏𑀓𑀸𑀤𑀲𑀦𑁆𑀦𑀁? 𑀅𑀦𑀥𑀺𑀕𑀢𑀁 𑀦𑀸𑀥𑀺𑀕𑀘𑁆𑀙𑀢𑀺, 𑀅𑀥𑀺𑀕𑀢𑀸 𑀧𑀭𑀺𑀳𑀸𑀬𑀢𑀺, 𑀲𑀤𑁆𑀥𑀫𑁆𑀫𑀲𑁆𑀲 𑀦 𑀯𑁄𑀤𑀸𑀬𑀦𑁆𑀢𑀺, 𑀲𑀤𑁆𑀥𑀫𑁆𑀫𑁂𑀲𑀼 𑀯𑀸 𑀅𑀥𑀺𑀫𑀸𑀦𑀺𑀓𑁄 𑀳𑁄𑀢𑀺, 𑀅𑀦𑀪𑀺𑀭𑀢𑁄 𑀯𑀸 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀢𑀺, 𑀅𑀜𑁆𑀜𑀢𑀭𑀁 𑀯𑀸 𑀲𑀁𑀓𑀺𑀮𑀺𑀝𑁆𑀞𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀺, 𑀲𑀺𑀓𑁆𑀔𑀁 𑀯𑀸 𑀧𑀘𑁆𑀘𑀓𑁆𑀔𑀸𑀬 𑀳𑀻𑀦𑀸𑀬𑀸𑀯𑀢𑁆𑀢𑀢𑀺, 𑀕𑀸𑀴𑁆𑀳𑀁 𑀯𑀸 𑀭𑁄𑀕𑀸𑀢𑀗𑁆𑀓𑀁 𑀨𑀼𑀲𑀢𑀺, 𑀉𑀫𑁆𑀫𑀸𑀤𑀁 𑀯𑀸 𑀧𑀸𑀧𑀼𑀡𑀸𑀢𑀺 𑀘𑀺𑀢𑁆𑀢𑀓𑁆𑀔𑁂𑀧𑀁 𑀯𑀸, 𑀲𑀫𑁆𑀫𑀽𑀴𑁆𑀳𑁄 𑀓𑀸𑀮𑀁 𑀓𑀭𑁄𑀢𑀺, 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀦𑀺𑀭𑀬𑀁 𑀉𑀧𑀧𑀚𑁆𑀚𑀢𑀺 𑁋 𑀬𑁄 𑀲𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀅𑀓𑁆𑀓𑁄𑀲𑀓𑁄 𑀧𑀭𑀺𑀪𑀸𑀲𑀓𑁄 𑀅𑀭𑀺𑀬𑀽𑀧𑀯𑀸𑀤𑁄 𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀁, 𑀅𑀝𑁆𑀞𑀸𑀦𑀫𑁂𑀢𑀁 𑀅𑀦𑀯𑀓𑀸𑀲𑁄 𑀬𑀁 𑀲𑁄 𑀇𑀫𑁂𑀲𑀁 𑀏𑀓𑀸𑀤𑀲𑀦𑁆𑀦𑀁 𑀩𑁆𑀬𑀲𑀦𑀸𑀦𑀁 𑀅𑀜𑁆𑀜𑀢𑀭𑀁 𑀩𑁆𑀬𑀲𑀦𑀁 𑀦 𑀦𑀺𑀕𑀘𑁆𑀙𑁂𑀬𑁆𑀬𑀸’’𑀢𑀺. 𑀙𑀝𑁆𑀞𑀁.

𑁭. 𑀲𑀜𑁆𑀜𑀸𑀲𑀼𑀢𑁆𑀢𑀁

𑁭. 𑀅𑀣 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋

‘‘𑀲𑀺𑀬𑀸 𑀦𑀼 𑀔𑁄, 𑀪𑀦𑁆𑀢𑁂, 𑀪𑀺𑀓𑁆𑀔𑀼𑀦𑁄 𑀢𑀣𑀸𑀭𑀽𑀧𑁄 𑀲𑀫𑀸𑀥𑀺𑀧𑀝𑀺𑀮𑀸𑀪𑁄 𑀬𑀣𑀸 𑀦𑁂𑀯 𑀧𑀣𑀯𑀺𑀬𑀁 𑀧𑀣𑀯𑀺𑀲𑀜𑁆𑀜𑀻 𑀅𑀲𑁆𑀲, 𑀦 𑀆𑀧𑀲𑁆𑀫𑀺𑀁 𑀆𑀧𑁄𑀲𑀜𑁆𑀜𑀻 𑀅𑀲𑁆𑀲, 𑀦 𑀢𑁂𑀚𑀲𑁆𑀫𑀺𑀁 𑀢𑁂𑀚𑁄𑀲𑀜𑁆𑀜𑀻 𑀅𑀲𑁆𑀲, 𑀦 𑀯𑀸𑀬𑀲𑁆𑀫𑀺𑀁 𑀯𑀸𑀬𑁄𑀲𑀜𑁆𑀜𑀻 𑀅𑀲𑁆𑀲, 𑀦 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑁂 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀲𑀜𑁆𑀜𑀻 𑀅𑀲𑁆𑀲, 𑀦 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑁂 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀲𑀜𑁆𑀜𑀻 𑀅𑀲𑁆𑀲, 𑀦 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑁂 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀲𑀜𑁆𑀜𑀻 𑀅𑀲𑁆𑀲, 𑀦 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑁂 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀲𑀜𑁆𑀜𑀻 𑀅𑀲𑁆𑀲, 𑀦 𑀇𑀥𑀮𑁄𑀓𑁂 𑀇𑀥𑀮𑁄𑀓𑀲𑀜𑁆𑀜𑀻 𑀅𑀲𑁆𑀲, 𑀦 𑀧𑀭𑀮𑁄𑀓𑁂 𑀧𑀭𑀮𑁄𑀓𑀲𑀜𑁆𑀜𑀻 𑀅𑀲𑁆𑀲, 𑀬𑀫𑁆𑀧𑀺𑀤𑀁 𑀤𑀺𑀝𑁆𑀞𑀁 𑀲𑀼𑀢𑀁 𑀫𑀼𑀢𑀁 𑀯𑀺𑀜𑁆𑀜𑀸𑀢𑀁 𑀧𑀢𑁆𑀢𑀁 𑀧𑀭𑀺𑀬𑁂𑀲𑀺𑀢𑀁 𑀅𑀦𑀼𑀯𑀺𑀘𑀭𑀺𑀢𑀁 𑀫𑀦𑀲𑀸, 𑀢𑀢𑁆𑀭𑀸𑀧𑀺 𑀦 𑀲𑀜𑁆𑀜𑀻 𑀅𑀲𑁆𑀲; 𑀲𑀜𑁆𑀜𑀻 𑀘 𑀧𑀦 𑀅𑀲𑁆𑀲𑀸𑀢𑀺?

‘‘𑀲𑀺𑀬𑀸, 𑀆𑀦𑀦𑁆𑀤, 𑀪𑀺𑀓𑁆𑀔𑀼𑀦𑁄 𑀢𑀣𑀸𑀭𑀽𑀧𑁄 𑀲𑀫𑀸𑀥𑀺𑀧𑀝𑀺𑀮𑀸𑀪𑁄 𑀬𑀣𑀸 𑀦𑁂𑀯 𑀧𑀣𑀯𑀺𑀬𑀁 𑀧𑀣𑀯𑀺𑀲𑀜𑁆𑀜𑀻 𑀅𑀲𑁆𑀲, 𑀦 𑀆𑀧𑀲𑁆𑀫𑀺𑀁 𑀆𑀧𑁄𑀲𑀜𑁆𑀜𑀻 𑀅𑀲𑁆𑀲, 𑀦 𑀢𑁂𑀚𑀲𑁆𑀫𑀺𑀁 𑀢𑁂𑀚𑁄𑀲𑀜𑁆𑀜𑀻 𑀅𑀲𑁆𑀲, 𑀦 𑀯𑀸𑀬𑀲𑁆𑀫𑀺𑀁 𑀯𑀸𑀬𑁄𑀲𑀜𑁆𑀜𑀻 𑀅𑀲𑁆𑀲, 𑀦 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑁂 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀲𑀜𑁆𑀜𑀻 𑀅𑀲𑁆𑀲, 𑀦 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑁂 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀲𑀜𑁆𑀜𑀻 𑀅𑀲𑁆𑀲, 𑀦 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑁂 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀲𑀜𑁆𑀜𑀻 𑀅𑀲𑁆𑀲, 𑀦 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑁂 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀲𑀜𑁆𑀜𑀻 𑀅𑀲𑁆𑀲, 𑀦 𑀇𑀥𑀮𑁄𑀓𑁂 𑀇𑀥𑀮𑁄𑀓𑀲𑀜𑁆𑀜𑀻 𑀅𑀲𑁆𑀲, 𑀦 𑀧𑀭𑀮𑁄𑀓𑁂 𑀧𑀭𑀮𑁄𑀓𑀲𑀜𑁆𑀜𑀻 𑀅𑀲𑁆𑀲, 𑀬𑀫𑁆𑀧𑀺𑀤𑀁 𑀤𑀺𑀝𑁆𑀞𑀁 𑀲𑀼𑀢𑀁 𑀫𑀼𑀢𑀁 𑀯𑀺𑀜𑁆𑀜𑀸𑀢𑀁 𑀧𑀢𑁆𑀢𑀁 𑀧𑀭𑀺𑀬𑁂𑀲𑀺𑀢𑀁 𑀅𑀦𑀼𑀯𑀺𑀘𑀭𑀺𑀢𑀁 𑀫𑀦𑀲𑀸, 𑀢𑀢𑁆𑀭𑀸𑀧𑀺 𑀦 𑀲𑀜𑁆𑀜𑀻 𑀅𑀲𑁆𑀲; 𑀲𑀜𑁆𑀜𑀻 𑀘 𑀧𑀦 𑀅𑀲𑁆𑀲𑀸’’𑀢𑀺.

‘‘𑀬𑀣𑀸 𑀓𑀣𑀁 𑀧𑀦, 𑀪𑀦𑁆𑀢𑁂, 𑀲𑀺𑀬𑀸 𑀪𑀺𑀓𑁆𑀔𑀼𑀦𑁄 𑀢𑀣𑀸𑀭𑀽𑀧𑁄 𑀲𑀫𑀸𑀥𑀺𑀧𑀝𑀺𑀮𑀸𑀪𑁄 𑀬𑀣𑀸 𑀦𑁂𑀯 𑀧𑀣𑀯𑀺𑀬𑀁 𑀧𑀣𑀯𑀺𑀲𑀜𑁆𑀜𑀻 𑀅𑀲𑁆𑀲, 𑀦 𑀆𑀧𑀲𑁆𑀫𑀺𑀁 𑀆𑀧𑁄𑀲𑀜𑁆𑀜𑀻 𑀅𑀲𑁆𑀲, 𑀦 𑀢𑁂𑀚𑀲𑁆𑀫𑀺𑀁 𑀢𑁂𑀚𑁄𑀲𑀜𑁆𑀜𑀻 𑀅𑀲𑁆𑀲, 𑀦 𑀯𑀸𑀬𑀲𑁆𑀫𑀺𑀁 𑀯𑀸𑀬𑁄𑀲𑀜𑁆𑀜𑀻 𑀅𑀲𑁆𑀲, 𑀦 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑁂 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀲𑀜𑁆𑀜𑀻 𑀅𑀲𑁆𑀲, 𑀦 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑁂 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀲𑀜𑁆𑀜𑀻 𑀅𑀲𑁆𑀲, 𑀦 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑁂 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀲𑀜𑁆𑀜𑀻 𑀅𑀲𑁆𑀲, 𑀦 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑁂 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀲𑀜𑁆𑀜𑀻 𑀅𑀲𑁆𑀲, 𑀦 𑀇𑀥𑀮𑁄𑀓𑁂 𑀇𑀥𑀮𑁄𑀓𑀲𑀜𑁆𑀜𑀻 𑀅𑀲𑁆𑀲, 𑀦 𑀧𑀭𑀮𑁄𑀓𑁂 𑀧𑀭𑀮𑁄𑀓𑀲𑀜𑁆𑀜𑀻 𑀅𑀲𑁆𑀲, 𑀬𑀫𑁆𑀧𑀺𑀤𑀁 𑀤𑀺𑀝𑁆𑀞𑀁 𑀲𑀼𑀢𑀁 𑀫𑀼𑀢𑀁 𑀯𑀺𑀜𑁆𑀜𑀸𑀢𑀁 𑀧𑀢𑁆𑀢𑀁 𑀧𑀭𑀺𑀬𑁂𑀲𑀺𑀢𑀁 𑀅𑀦𑀼𑀯𑀺𑀘𑀭𑀺𑀢𑀁 𑀫𑀦𑀲𑀸, 𑀢𑀢𑁆𑀭𑀸𑀧𑀺 𑀦 𑀲𑀜𑁆𑀜𑀻 𑀅𑀲𑁆𑀲, 𑀲𑀜𑁆𑀜𑀻 𑀘 𑀧𑀦 𑀅𑀲𑁆𑀲𑀸𑀢𑀺.

‘‘𑀇𑀥𑀸𑀦𑀦𑁆𑀤, 𑀪𑀺𑀓𑁆𑀔𑀼 𑀏𑀯𑀁𑀲𑀜𑁆𑀜𑀻 𑀳𑁄𑀢𑀺 𑁋 ‘𑀏𑀢𑀁 𑀲𑀦𑁆𑀢𑀁 𑀏𑀢𑀁 𑀧𑀡𑀻𑀢𑀁, 𑀬𑀤𑀺𑀤𑀁 𑀲𑀩𑁆𑀩𑀲𑀗𑁆𑀔𑀸𑀭𑀲𑀫𑀣𑁄 𑀲𑀩𑁆𑀩𑀽𑀧𑀥𑀺𑀧𑀝𑀺𑀦𑀺𑀲𑁆𑀲𑀕𑁆𑀕𑁄 𑀢𑀡𑁆𑀳𑀸𑀓𑁆𑀔𑀬𑁄 𑀯𑀺𑀭𑀸𑀕𑁄 𑀦𑀺𑀭𑁄𑀥𑁄 𑀦𑀺𑀩𑁆𑀩𑀸𑀦’𑀦𑁆𑀢𑀺. 𑀏𑀯𑀁 𑀔𑁄, 𑀆𑀦𑀦𑁆𑀤, 𑀲𑀺𑀬𑀸 𑀪𑀺𑀓𑁆𑀔𑀼𑀦𑁄 𑀢𑀣𑀸𑀭𑀽𑀧𑁄 𑀲𑀫𑀸𑀥𑀺𑀧𑀝𑀺𑀮𑀸𑀪𑁄 𑀬𑀣𑀸 𑀦𑁂𑀯 𑀧𑀣𑀯𑀺𑀬𑀁 𑀧𑀣𑀯𑀺𑀲𑀜𑁆𑀜𑀻 𑀅𑀲𑁆𑀲, 𑀦 𑀆𑀧𑀲𑁆𑀫𑀺𑀁 𑀆𑀧𑁄𑀲𑀜𑁆𑀜𑀻 𑀅𑀲𑁆𑀲, 𑀦 𑀢𑁂𑀚𑀲𑁆𑀫𑀺𑀁 𑀢𑁂𑀚𑁄𑀲𑀜𑁆𑀜𑀻 𑀅𑀲𑁆𑀲, 𑀦 𑀯𑀸𑀬𑀲𑁆𑀫𑀺𑀁 𑀯𑀸𑀬𑁄𑀲𑀜𑁆𑀜𑀻 𑀅𑀲𑁆𑀲, 𑀦 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑁂 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀲𑀜𑁆𑀜𑀻 𑀅𑀲𑁆𑀲, 𑀦 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑁂 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀲𑀜𑁆𑀜𑀻 𑀅𑀲𑁆𑀲, 𑀦 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑁂 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀲𑀜𑁆𑀜𑀻 𑀅𑀲𑁆𑀲, 𑀦 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑁂 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀲𑀜𑁆𑀜𑀻 𑀅𑀲𑁆𑀲, 𑀦 𑀇𑀥𑀮𑁄𑀓𑁂 𑀇𑀥𑀮𑁄𑀓𑀲𑀜𑁆𑀜𑀻 𑀅𑀲𑁆𑀲, 𑀦 𑀧𑀭𑀮𑁄𑀓𑁂 𑀧𑀭𑀮𑁄𑀓𑀲𑀜𑁆𑀜𑀻 𑀅𑀲𑁆𑀲, 𑀬𑀫𑁆𑀧𑀺𑀤𑀁 𑀤𑀺𑀝𑁆𑀞𑀁 𑀲𑀼𑀢𑀁 𑀫𑀼𑀢𑀁 𑀯𑀺𑀜𑁆𑀜𑀸𑀢𑀁 𑀧𑀢𑁆𑀢𑀁 𑀧𑀭𑀺𑀬𑁂𑀲𑀺𑀢𑀁 𑀅𑀦𑀼𑀯𑀺𑀘𑀭𑀺𑀢𑀁 𑀫𑀦𑀲𑀸, 𑀢𑀢𑁆𑀭𑀸𑀧𑀺 𑀦 𑀲𑀜𑁆𑀜𑀻 𑀅𑀲𑁆𑀲, 𑀲𑀜𑁆𑀜𑀻 𑀘 𑀧𑀦 𑀅𑀲𑁆𑀲𑀸’’𑀢𑀺.

𑀅𑀣 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀪𑀕𑀯𑀢𑁄 𑀪𑀸𑀲𑀺𑀢𑀁 𑀅𑀪𑀺𑀦𑀦𑁆𑀤𑀺𑀢𑁆𑀯𑀸 𑀅𑀦𑀼𑀫𑁄𑀤𑀺𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀬𑁂𑀦𑀸𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀢𑀸 𑀲𑀸𑀭𑀺𑀧𑀼𑀢𑁆𑀢𑁂𑀦 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺. 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀲𑀸𑀭𑀡𑀻𑀬𑀁 𑀯𑀻𑀢𑀺𑀲𑀸𑀭𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀆𑀬𑀲𑁆𑀫𑀦𑁆𑀢𑀁 𑀲𑀸𑀭𑀺𑀧𑀼𑀢𑁆𑀢𑀁 𑀏𑀢𑀤𑀯𑁄𑀘 𑁋

‘‘𑀲𑀺𑀬𑀸 𑀦𑀼 𑀔𑁄, 𑀆𑀯𑀼𑀲𑁄 𑀲𑀸𑀭𑀺𑀧𑀼𑀢𑁆𑀢, 𑀪𑀺𑀓𑁆𑀔𑀼𑀦𑁄 𑀢𑀣𑀸𑀭𑀽𑀧𑁄 𑀲𑀫𑀸𑀥𑀺𑀧𑀝𑀺𑀮𑀸𑀪𑁄 𑀬𑀣𑀸 𑀦𑁂𑀯 𑀧𑀣𑀯𑀺𑀬𑀁 𑀧𑀣𑀯𑀺𑀲𑀜𑁆𑀜𑀻 𑀅𑀲𑁆𑀲…𑀧𑁂… 𑀬𑀫𑁆𑀧𑀺𑀤𑀁 𑀤𑀺𑀝𑁆𑀞𑀁 𑀲𑀼𑀢𑀁 𑀫𑀼𑀢𑀁 𑀯𑀺𑀜𑁆𑀜𑀸𑀢𑀁 𑀧𑀢𑁆𑀢𑀁 𑀧𑀭𑀺𑀬𑁂𑀲𑀺𑀢𑀁 𑀅𑀦𑀼𑀯𑀺𑀘𑀭𑀺𑀢𑀁 𑀫𑀦𑀲𑀸, 𑀢𑀢𑁆𑀭𑀸𑀧𑀺 𑀦 𑀲𑀜𑁆𑀜𑀻 𑀅𑀲𑁆𑀲, 𑀲𑀜𑁆𑀜𑀻 𑀧𑀦 𑀅𑀲𑁆𑀲𑀸𑀢𑀺. ‘‘𑀲𑀺𑀬𑀸, 𑀆𑀯𑀼𑀲𑁄 𑀆𑀦𑀦𑁆𑀤, 𑀪𑀺𑀓𑁆𑀔𑀼𑀦𑁄 𑀢𑀣𑀸𑀭𑀽𑀧𑁄 𑀲𑀫𑀸𑀥𑀺𑀧𑀝𑀺𑀮𑀸𑀪𑁄 𑀬𑀣𑀸 𑀦𑁂𑀯 𑀧𑀣𑀯𑀺𑀬𑀁 𑀧𑀣𑀯𑀺𑀲𑀜𑁆𑀜𑀻 𑀅𑀲𑁆𑀲…𑀧𑁂… 𑀬𑀫𑁆𑀧𑀺𑀤𑀁 𑀤𑀺𑀝𑁆𑀞𑀁 𑀲𑀼𑀢𑀁 𑀫𑀼𑀢𑀁 𑀯𑀺𑀜𑁆𑀜𑀸𑀢𑀁 𑀧𑀢𑁆𑀢𑀁 𑀧𑀭𑀺𑀬𑁂𑀲𑀺𑀢𑀁 𑀅𑀦𑀼𑀯𑀺𑀘𑀭𑀺𑀢𑀁 𑀫𑀦𑀲𑀸, 𑀢𑀢𑁆𑀭𑀸𑀧𑀺 𑀦 𑀲𑀜𑁆𑀜𑀻 𑀅𑀲𑁆𑀲, 𑀲𑀜𑁆𑀜𑀻 𑀘 𑀧𑀦 𑀅𑀲𑁆𑀲𑀸’’𑀢𑀺.

‘‘𑀬𑀣𑀸 𑀓𑀣𑀁 𑀧𑀦𑀸𑀯𑀼𑀲𑁄 𑀲𑀸𑀭𑀺𑀧𑀼𑀢𑁆𑀢, 𑀲𑀺𑀬𑀸 𑀪𑀺𑀓𑁆𑀔𑀼𑀦𑁄 𑀢𑀣𑀸𑀭𑀽𑀧𑁄 𑀲𑀫𑀸𑀥𑀺𑀧𑀝𑀺𑀮𑀸𑀪𑁄 𑀬𑀣𑀸 𑀦𑁂𑀯 𑀧𑀣𑀯𑀺𑀬𑀁 𑀧𑀣𑀯𑀺𑀲𑀜𑁆𑀜𑀻 𑀅𑀲𑁆𑀲…𑀧𑁂… 𑀬𑀫𑁆𑀧𑀺𑀤𑀁 𑀤𑀺𑀝𑁆𑀞𑀁 𑀲𑀼𑀢𑀁 𑀫𑀼𑀢𑀁 𑀯𑀺𑀜𑁆𑀜𑀸𑀢𑀁 𑀧𑀢𑁆𑀢𑀁 𑀧𑀭𑀺𑀬𑁂𑀲𑀺𑀢𑀁 𑀅𑀦𑀼𑀯𑀺𑀘𑀭𑀺𑀢𑀁 𑀫𑀦𑀲𑀸, 𑀢𑀢𑁆𑀭𑀸𑀧𑀺 𑀦 𑀲𑀜𑁆𑀜𑀻 𑀅𑀲𑁆𑀲, 𑀲𑀜𑁆𑀜𑀻 𑀘 𑀧𑀦 𑀅𑀲𑁆𑀲𑀸’’𑀢𑀺?

‘‘𑀇𑀥, 𑀆𑀯𑀼𑀲𑁄 𑀆𑀦𑀦𑁆𑀤, 𑀪𑀺𑀓𑁆𑀔𑀼 𑀏𑀯𑀁𑀲𑀜𑁆𑀜𑀻 𑀳𑁄𑀢𑀺 𑁋 ‘𑀏𑀢𑀁 𑀲𑀦𑁆𑀢𑀁 𑀏𑀢𑀁 𑀧𑀡𑀻𑀢𑀁, 𑀬𑀤𑀺𑀤𑀁 𑀲𑀩𑁆𑀩𑀲𑀗𑁆𑀔𑀸𑀭𑀲𑀫𑀣𑁄 𑀲𑀩𑁆𑀩𑀽𑀧𑀥𑀺𑀧𑀝𑀺𑀦𑀺𑀲𑁆𑀲𑀕𑁆𑀕𑁄 𑀢𑀡𑁆𑀳𑀸𑀓𑁆𑀔𑀬𑁄 𑀯𑀺𑀭𑀸𑀕𑁄 𑀦𑀺𑀭𑁄𑀥𑁄 𑀦𑀺𑀩𑁆𑀩𑀸𑀦’𑀦𑁆𑀢𑀺. 𑀏𑀯𑀁 𑀔𑁄, 𑀆𑀯𑀼𑀲𑁄 𑀆𑀦𑀦𑁆𑀤, 𑀲𑀺𑀬𑀸 𑀪𑀺𑀓𑁆𑀔𑀼𑀦𑁄 𑀢𑀣𑀸𑀭𑀽𑀧𑁄 𑀲𑀫𑀸𑀥𑀺𑀧𑀝𑀺𑀮𑀸𑀪𑁄 𑀬𑀣𑀸 𑀦𑁂𑀯 𑀧𑀣𑀯𑀺𑀬𑀁 𑀧𑀣𑀯𑀺𑀲𑀜𑁆𑀜𑀻 𑀅𑀲𑁆𑀲…𑀧𑁂… 𑀬𑀫𑁆𑀧𑀺𑀤𑀁 𑀤𑀺𑀝𑁆𑀞𑀁 𑀲𑀼𑀢𑀁 𑀫𑀼𑀢𑀁 𑀯𑀺𑀜𑁆𑀜𑀸𑀢𑀁 𑀧𑀢𑁆𑀢𑀁 𑀧𑀭𑀺𑀬𑁂𑀲𑀺𑀢𑀁 𑀅𑀦𑀼𑀯𑀺𑀘𑀭𑀺𑀢𑀁 𑀫𑀦𑀲𑀸, 𑀢𑀢𑁆𑀭𑀸𑀧𑀺 𑀦 𑀲𑀜𑁆𑀜𑀻 𑀅𑀲𑁆𑀲, 𑀲𑀜𑁆𑀜𑀻 𑀘 𑀧𑀦 𑀅𑀲𑁆𑀲𑀸’’𑀢𑀺.

‘‘𑀅𑀘𑁆𑀙𑀭𑀺𑀬𑀁, 𑀆𑀯𑀼𑀲𑁄, 𑀅𑀩𑁆𑀪𑀼𑀢𑀁, 𑀆𑀯𑀼𑀲𑁄! 𑀬𑀢𑁆𑀭 𑀳𑀺 𑀦𑀸𑀫 𑀲𑀢𑁆𑀣𑀼 𑀘𑁂𑀯 𑀲𑀸𑀯𑀓𑀲𑁆𑀲 𑀘 𑀅𑀢𑁆𑀣𑁂𑀦 𑀅𑀢𑁆𑀣𑁄 𑀩𑁆𑀬𑀜𑁆𑀚𑀦𑁂𑀦 𑀩𑁆𑀬𑀜𑁆𑀚𑀦𑀁 𑀲𑀁𑀲𑀦𑁆𑀤𑀺𑀲𑁆𑀲𑀢𑀺 𑀲𑀫𑁂𑀲𑁆𑀲𑀢𑀺 𑀦 𑀯𑀺𑀕𑁆𑀕𑀬𑁆𑀳𑀺𑀲𑁆𑀲𑀢𑀺, 𑀬𑀤𑀺𑀤𑀁 𑀅𑀕𑁆𑀕𑀧𑀤𑀲𑁆𑀫𑀺𑀁! 𑀇𑀤𑀸𑀦𑀸𑀳𑀁, 𑀆𑀯𑀼𑀲𑁄, 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀢𑀫𑀢𑁆𑀣𑀁 𑀅𑀧𑀼𑀘𑁆𑀙𑀺𑀁. 𑀪𑀕𑀯𑀸𑀧𑀺 𑀫𑁂 𑀏𑀢𑁂𑀳𑀺 𑀅𑀓𑁆𑀔𑀭𑁂𑀳𑀺 𑀏𑀢𑁂𑀳𑀺 𑀧𑀤𑁂𑀳𑀺 𑀏𑀢𑁂𑀳𑀺 𑀩𑁆𑀬𑀜𑁆𑀚𑀦𑁂𑀳𑀺 𑀏𑀢𑀫𑀢𑁆𑀣𑀁 𑀩𑁆𑀬𑀸𑀓𑀸𑀲𑀺, 𑀲𑁂𑀬𑁆𑀬𑀣𑀸𑀧𑀺 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄. 𑀅𑀘𑁆𑀙𑀭𑀺𑀬𑀁, 𑀆𑀯𑀼𑀲𑁄, 𑀅𑀩𑁆𑀪𑀼𑀢𑀁, 𑀆𑀯𑀼𑀲𑁄, 𑀬𑀢𑁆𑀭 𑀳𑀺 𑀦𑀸𑀫 𑀲𑀢𑁆𑀣𑀼 𑀘𑁂𑀯 𑀲𑀸𑀯𑀓𑀲𑁆𑀲 𑀘 𑀅𑀢𑁆𑀣𑁂𑀦 𑀅𑀢𑁆𑀣𑁄 𑀩𑁆𑀬𑀜𑁆𑀚𑀦𑁂𑀦 𑀩𑁆𑀬𑀜𑁆𑀚𑀦𑀁 𑀲𑀁𑀲𑀦𑁆𑀤𑀺𑀲𑁆𑀲𑀢𑀺 𑀲𑀫𑁂𑀲𑁆𑀲𑀢𑀺 𑀦 𑀯𑀺𑀕𑁆𑀕𑀬𑁆𑀳𑀺𑀲𑁆𑀲𑀢𑀺, 𑀬𑀤𑀺𑀤𑀁 𑀅𑀕𑁆𑀕𑀧𑀤𑀲𑁆𑀫𑀺’’𑀦𑁆𑀢𑀺! 𑀲𑀢𑁆𑀢𑀫𑀁.

𑁮. 𑀫𑀦𑀲𑀺𑀓𑀸𑀭𑀲𑀼𑀢𑁆𑀢𑀁

𑁮. 𑀅𑀣 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋

‘‘𑀲𑀺𑀬𑀸 𑀦𑀼 𑀔𑁄, 𑀪𑀦𑁆𑀢𑁂, 𑀪𑀺𑀓𑁆𑀔𑀼𑀦𑁄 𑀢𑀣𑀸𑀭𑀽𑀧𑁄 𑀲𑀫𑀸𑀥𑀺𑀧𑀝𑀺𑀮𑀸𑀪𑁄 𑀬𑀣𑀸 𑀦 𑀘𑀓𑁆𑀔𑀼𑀁 𑀫𑀦𑀲𑀺 𑀓𑀭𑁂𑀬𑁆𑀬, 𑀦 𑀭𑀽𑀧𑀁 𑀫𑀦𑀲𑀺 𑀓𑀭𑁂𑀬𑁆𑀬, 𑀦 𑀲𑁄𑀢𑀁 𑀫𑀦𑀲𑀺 𑀓𑀭𑁂𑀬𑁆𑀬, 𑀦 𑀲𑀤𑁆𑀤𑀁 𑀫𑀦𑀲𑀺 𑀓𑀭𑁂𑀬𑁆𑀬, 𑀦 𑀖𑀸𑀦𑀁 𑀫𑀦𑀲𑀺 𑀓𑀭𑁂𑀬𑁆𑀬, 𑀦 𑀕𑀦𑁆𑀥𑀁 𑀫𑀦𑀲𑀺 𑀓𑀭𑁂𑀬𑁆𑀬, 𑀦 𑀚𑀺𑀯𑁆𑀳𑀁 𑀫𑀦𑀲𑀺 𑀓𑀭𑁂𑀬𑁆𑀬, 𑀦 𑀭𑀲𑀁 𑀫𑀦𑀲𑀺 𑀓𑀭𑁂𑀬𑁆𑀬, 𑀦 𑀓𑀸𑀬𑀁 𑀫𑀦𑀲𑀺 𑀓𑀭𑁂𑀬𑁆𑀬, 𑀦 𑀨𑁄𑀝𑁆𑀞𑀩𑁆𑀩𑀁 𑀫𑀦𑀲𑀺 𑀓𑀭𑁂𑀬𑁆𑀬, 𑀦 𑀧𑀣𑀯𑀺𑀁 𑀫𑀦𑀲𑀺 𑀓𑀭𑁂𑀬𑁆𑀬, 𑀦 𑀆𑀧𑀁 𑀫𑀦𑀲𑀺 𑀓𑀭𑁂𑀬𑁆𑀬, 𑀦 𑀢𑁂𑀚𑀁 𑀫𑀦𑀲𑀺 𑀓𑀭𑁂𑀬𑁆𑀬, 𑀦 𑀯𑀸𑀬𑀁 𑀫𑀦𑀲𑀺 𑀓𑀭𑁂𑀬𑁆𑀬, 𑀦 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁 𑀫𑀦𑀲𑀺 𑀓𑀭𑁂𑀬𑁆𑀬, 𑀦 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀁 𑀫𑀦𑀲𑀺 𑀓𑀭𑁂𑀬𑁆𑀬, 𑀦 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁 𑀫𑀦𑀲𑀺 𑀓𑀭𑁂𑀬𑁆𑀬, 𑀦 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁 𑀫𑀦𑀲𑀺 𑀓𑀭𑁂𑀬𑁆𑀬, 𑀦 𑀇𑀥𑀮𑁄𑀓𑀁 𑀫𑀦𑀲𑀺 𑀓𑀭𑁂𑀬𑁆𑀬, 𑀦 𑀧𑀭𑀮𑁄𑀓𑀁 𑀫𑀦𑀲𑀺 𑀓𑀭𑁂𑀬𑁆𑀬, 𑀬𑀫𑁆𑀧𑀺𑀤𑀁 𑀤𑀺𑀝𑁆𑀞𑀁 𑀲𑀼𑀢𑀁 𑀫𑀼𑀢𑀁 𑀯𑀺𑀜𑁆𑀜𑀸𑀢𑀁 𑀧𑀢𑁆𑀢𑀁 𑀧𑀭𑀺𑀬𑁂𑀲𑀺𑀢𑀁 𑀅𑀦𑀼𑀯𑀺𑀘𑀭𑀺𑀢𑀁 𑀫𑀦𑀲𑀸, 𑀢𑀫𑁆𑀧𑀺 𑀦 𑀫𑀦𑀲𑀺 𑀓𑀭𑁂𑀬𑁆𑀬; 𑀫𑀦𑀲𑀺 𑀘 𑀧𑀦 𑀓𑀭𑁂𑀬𑁆𑀬𑀸’’𑀢𑀺?

‘‘𑀲𑀺𑀬𑀸, 𑀆𑀦𑀦𑁆𑀤, 𑀪𑀺𑀓𑁆𑀔𑀼𑀦𑁄 𑀢𑀣𑀸𑀭𑀽𑀧𑁄 𑀲𑀫𑀸𑀥𑀺𑀧𑀝𑀺𑀮𑀸𑀪𑁄 𑀬𑀣𑀸 𑀦 𑀘𑀓𑁆𑀔𑀼𑀁 𑀫𑀦𑀲𑀺 𑀓𑀭𑁂𑀬𑁆𑀬, 𑀦 𑀭𑀽𑀧𑀁 𑀫𑀦𑀲𑀺 𑀓𑀭𑁂𑀬𑁆𑀬, 𑀦 𑀲𑁄𑀢𑀁 𑀫𑀦𑀲𑀺 𑀓𑀭𑁂𑀬𑁆𑀬, 𑀦 𑀲𑀤𑁆𑀤𑀁 𑀫𑀦𑀲𑀺 𑀓𑀭𑁂𑀬𑁆𑀬, 𑀦 𑀖𑀸𑀦𑀁 𑀫𑀦𑀲𑀺 𑀓𑀭𑁂𑀬𑁆𑀬, 𑀦 𑀕𑀦𑁆𑀥𑀁 𑀫𑀦𑀲𑀺 𑀓𑀭𑁂𑀬𑁆𑀬, 𑀦 𑀚𑀺𑀯𑁆𑀳𑀁 𑀫𑀦𑀲𑀺 𑀓𑀭𑁂𑀬𑁆𑀬, 𑀦 𑀭𑀲𑀁 𑀫𑀦𑀲𑀺 𑀓𑀭𑁂𑀬𑁆𑀬, 𑀦 𑀓𑀸𑀬𑀁 𑀫𑀦𑀲𑀺 𑀓𑀭𑁂𑀬𑁆𑀬, 𑀦 𑀨𑁄𑀝𑁆𑀞𑀩𑁆𑀩𑀁 𑀫𑀦𑀲𑀺 𑀓𑀭𑁂𑀬𑁆𑀬, 𑀦 𑀧𑀣𑀯𑀺𑀁 𑀫𑀦𑀲𑀺 𑀓𑀭𑁂𑀬𑁆𑀬, 𑀦 𑀆𑀧𑀁 𑀫𑀦𑀲𑀺 𑀓𑀭𑁂𑀬𑁆𑀬, 𑀦 𑀢𑁂𑀚𑀁 𑀫𑀦𑀲𑀺 𑀓𑀭𑁂𑀬𑁆𑀬, 𑀦 𑀯𑀸𑀬𑀁 𑀫𑀦𑀲𑀺 𑀓𑀭𑁂𑀬𑁆𑀬, 𑀦 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁 𑀫𑀦𑀲𑀺 𑀓𑀭𑁂𑀬𑁆𑀬, 𑀦 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀁 𑀫𑀦𑀲𑀺 𑀓𑀭𑁂𑀬𑁆𑀬, 𑀦 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁 𑀫𑀦𑀲𑀺 𑀓𑀭𑁂𑀬𑁆𑀬, 𑀦 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁 𑀫𑀦𑀲𑀺 𑀓𑀭𑁂𑀬𑁆𑀬, 𑀦 𑀇𑀥𑀮𑁄𑀓𑀁 𑀫𑀦𑀲𑀺 𑀓𑀭𑁂𑀬𑁆𑀬, 𑀦 𑀧𑀭𑀮𑁄𑀓𑀁 𑀫𑀦𑀲𑀺 𑀓𑀭𑁂𑀬𑁆𑀬, 𑀬𑀫𑁆𑀧𑀺𑀤𑀁 𑀤𑀺𑀝𑁆𑀞𑀁 𑀲𑀼𑀢𑀁 𑀫𑀼𑀢𑀁 𑀯𑀺𑀜𑁆𑀜𑀸𑀢𑀁 𑀧𑀢𑁆𑀢𑀁 𑀧𑀭𑀺𑀬𑁂𑀲𑀺𑀢𑀁 𑀅𑀦𑀼𑀯𑀺𑀘𑀭𑀺𑀢𑀁 𑀫𑀦𑀲𑀸, 𑀢𑀫𑁆𑀧𑀺 𑀦 𑀫𑀦𑀲𑀺 𑀓𑀭𑁂𑀬𑁆𑀬; 𑀫𑀦𑀲𑀺 𑀘 𑀧𑀦 𑀓𑀭𑁂𑀬𑁆𑀬𑀸’’𑀢𑀺.

‘‘𑀬𑀣𑀸 𑀓𑀣𑀁 𑀧𑀦, 𑀪𑀦𑁆𑀢𑁂, 𑀲𑀺𑀬𑀸 𑀪𑀺𑀓𑁆𑀔𑀼𑀦𑁄 𑀢𑀣𑀸𑀭𑀽𑀧𑁄 𑀲𑀫𑀸𑀥𑀺𑀧𑀝𑀺𑀮𑀸𑀪𑁄 𑀬𑀣𑀸 𑀦 𑀘𑀓𑁆𑀔𑀼𑀁 𑀫𑀦𑀲𑀺 𑀓𑀭𑁂𑀬𑁆𑀬, 𑀦 𑀭𑀽𑀧𑀁 𑀫𑀦𑀲𑀺 𑀓𑀭𑁂𑀬𑁆𑀬… 𑀬𑀫𑁆𑀧𑀺𑀤𑀁 𑀤𑀺𑀝𑁆𑀞𑀁 𑀲𑀼𑀢𑀁 𑀫𑀼𑀢𑀁 𑀯𑀺𑀜𑁆𑀜𑀸𑀢𑀁 𑀧𑀢𑁆𑀢𑀁 𑀧𑀭𑀺𑀬𑁂𑀲𑀺𑀢𑀁 𑀅𑀦𑀼𑀯𑀺𑀘𑀭𑀺𑀢𑀁 𑀫𑀦𑀲𑀸, 𑀢𑀫𑁆𑀧𑀺 𑀦 𑀫𑀦𑀲𑀺 𑀓𑀭𑁂𑀬𑁆𑀬; 𑀫𑀦𑀲𑀺 𑀘 𑀧𑀦 𑀓𑀭𑁂𑀬𑁆𑀬𑀸’’𑀢𑀺?

‘‘𑀇𑀥𑀸𑀦𑀦𑁆𑀤, 𑀪𑀺𑀓𑁆𑀔𑀼 𑀏𑀯𑀁 𑀫𑀦𑀲𑀺 𑀓𑀭𑁄𑀢𑀺 𑁋 ‘𑀏𑀢𑀁 𑀲𑀦𑁆𑀢𑀁 𑀏𑀢𑀁 𑀧𑀡𑀻𑀢𑀁, 𑀬𑀤𑀺𑀤𑀁 𑀲𑀩𑁆𑀩𑀲𑀗𑁆𑀔𑀸𑀭𑀲𑀫𑀣𑁄 𑀲𑀩𑁆𑀩𑀽𑀧𑀥𑀺𑀧𑀝𑀺𑀦𑀺𑀲𑁆𑀲𑀕𑁆𑀕𑁄 𑀢𑀡𑁆𑀳𑀸𑀓𑁆𑀔𑀬𑁄 𑀯𑀺𑀭𑀸𑀕𑁄 𑀦𑀺𑀭𑁄𑀥𑁄 𑀦𑀺𑀩𑁆𑀩𑀸𑀦’𑀦𑁆𑀢𑀺. 𑀏𑀯𑀁 𑀔𑁄, 𑀆𑀦𑀦𑁆𑀤, 𑀲𑀺𑀬𑀸 𑀪𑀺𑀓𑁆𑀔𑀼𑀦𑁄 𑀢𑀣𑀸𑀭𑀽𑀧𑁄 𑀲𑀫𑀸𑀥𑀺𑀧𑀝𑀺𑀮𑀸𑀪𑁄 𑀬𑀣𑀸 𑀦 𑀘𑀓𑁆𑀔𑀼𑀁 𑀫𑀦𑀲𑀺 𑀓𑀭𑁂𑀬𑁆𑀬, 𑀦 𑀭𑀽𑀧𑀁 𑀫𑀦𑀲𑀺 𑀓𑀭𑁂𑀬𑁆𑀬…𑀧𑁂… 𑀬𑀫𑁆𑀧𑀺𑀤𑀁 𑀤𑀺𑀝𑁆𑀞𑀁 𑀲𑀼𑀢𑀁 𑀫𑀼𑀢𑀁 𑀯𑀺𑀜𑁆𑀜𑀸𑀢𑀁 𑀧𑀢𑁆𑀢𑀁 𑀧𑀭𑀺𑀬𑁂𑀲𑀺𑀢𑀁 𑀅𑀦𑀼𑀯𑀺𑀘𑀭𑀺𑀢𑀁 𑀫𑀦𑀲𑀸, 𑀢𑀫𑁆𑀧𑀺 𑀦 𑀫𑀦𑀲𑀺 𑀓𑀭𑁂𑀬𑁆𑀬; 𑀫𑀦𑀲𑀺 𑀘 𑀧𑀦 𑀓𑀭𑁂𑀬𑁆𑀬𑀸’’𑀢𑀺. 𑀅𑀝𑁆𑀞𑀫𑀁.

𑁯. 𑀲𑀤𑁆𑀥𑀲𑀼𑀢𑁆𑀢𑀁

𑁯. 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀦𑀸𑀢𑀺𑀓𑁂 𑀯𑀺𑀳𑀭𑀢𑀺 𑀕𑀺𑀜𑁆𑀚𑀓𑀸𑀯𑀲𑀣𑁂. 𑀅𑀣 𑀔𑁄 𑀆𑀬𑀲𑁆𑀫𑀸 𑀲𑀤𑁆𑀥𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀁 𑀔𑁄 𑀆𑀬𑀲𑁆𑀫𑀦𑁆𑀢𑀁 𑀲𑀤𑁆𑀥𑀁 𑀪𑀕𑀯𑀸 𑀏𑀢𑀤𑀯𑁄𑀘 𑁋

‘‘𑀆𑀚𑀸𑀦𑀻𑀬𑀛𑀸𑀬𑀺𑀢𑀁 𑀔𑁄, 𑀲𑀤𑁆𑀥, 𑀛𑀸𑀬; 𑀫𑀸 𑀔𑀴𑀼𑀗𑁆𑀓𑀛𑀸𑀬𑀺𑀢𑀁 [𑀆𑀚𑀸𑀦𑀻𑀬𑀚𑁆𑀛𑀸𑀬𑀺𑀢𑀁 𑀔𑁄 𑀲𑀤𑁆𑀥 𑀛𑀸𑀬𑀣, 𑀫𑀸 𑀔𑀴𑀼𑀗𑁆𑀓𑀚𑁆𑀛𑀸𑀬𑀺𑀢𑀁 (𑀲𑀻. 𑀧𑀻.)]. 𑀓𑀣𑀜𑁆𑀘, 𑀔𑀴𑀼𑀗𑁆𑀓𑀛𑀸𑀬𑀺𑀢𑀁 𑀳𑁄𑀢𑀺? 𑀅𑀲𑁆𑀲𑀔𑀴𑀼𑀗𑁆𑀓𑁄 𑀳𑀺, 𑀲𑀤𑁆𑀥, 𑀤𑁄𑀡𑀺𑀬𑀸 𑀩𑀤𑁆𑀥𑁄 [𑀩𑀦𑁆𑀥𑁄 (𑀲𑁆𑀬𑀸. 𑀓.)] ‘𑀬𑀯𑀲𑀁 𑀬𑀯𑀲’𑀦𑁆𑀢𑀺 𑀛𑀸𑀬𑀢𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀦 𑀳𑀺, 𑀲𑀤𑁆𑀥, 𑀅𑀲𑁆𑀲𑀔𑀴𑀼𑀗𑁆𑀓𑀲𑁆𑀲 𑀤𑁄𑀡𑀺𑀬𑀸 𑀩𑀤𑁆𑀥𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘𑀓𑀺𑀁 𑀦𑀼 𑀔𑁄 𑀫𑀁 𑀅𑀚𑁆𑀚 𑀅𑀲𑁆𑀲𑀤𑀫𑁆𑀫𑀲𑀸𑀭𑀣𑀺 𑀓𑀸𑀭𑀡𑀁 𑀓𑀸𑀭𑁂𑀲𑁆𑀲𑀢𑀺, 𑀓𑀺𑀫𑀲𑁆𑀲𑀸𑀳𑀁 [𑀓𑀫𑁆𑀫𑀲𑁆𑀲𑀸𑀳𑀁 (𑀓.)] 𑀧𑀝𑀺𑀓𑀭𑁄𑀫𑀻’𑀢𑀺. 𑀲𑁄 𑀤𑁄𑀡𑀺𑀬𑀸 𑀩𑀤𑁆𑀥𑁄 ‘𑀬𑀯𑀲𑀁 𑀬𑀯𑀲’𑀦𑁆𑀢𑀺 𑀛𑀸𑀬𑀢𑀺. 𑀏𑀯𑀫𑁂𑀯𑀁 𑀔𑁄, 𑀲𑀤𑁆𑀥, 𑀇𑀥𑁂𑀓𑀘𑁆𑀘𑁄 𑀧𑀼𑀭𑀺𑀲𑀔𑀴𑀼𑀗𑁆𑀓𑁄 𑀅𑀭𑀜𑁆𑀜𑀕𑀢𑁄𑀧𑀺 𑀭𑀼𑀓𑁆𑀔𑀫𑀽𑀮𑀕𑀢𑁄𑀧𑀺 𑀲𑀼𑀜𑁆𑀜𑀸𑀕𑀸𑀭𑀕𑀢𑁄𑀧𑀺 𑀓𑀸𑀫𑀭𑀸𑀕𑀧𑀭𑀺𑀬𑀼𑀝𑁆𑀞𑀺𑀢𑁂𑀦 𑀘𑁂𑀢𑀲𑀸 𑀯𑀺𑀳𑀭𑀢𑀺 𑀓𑀸𑀫𑀭𑀸𑀕𑀧𑀭𑁂𑀢𑁂𑀦 𑀉𑀧𑁆𑀧𑀦𑁆𑀦𑀲𑁆𑀲 𑀘 𑀓𑀸𑀫𑀭𑀸𑀕𑀲𑁆𑀲 𑀦𑀺𑀲𑁆𑀲𑀭𑀡𑀁 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀺. 𑀲𑁄 𑀓𑀸𑀫𑀭𑀸𑀕𑀁𑀬𑁂𑀯 𑀅𑀦𑁆𑀢𑀭𑀁 𑀓𑀢𑁆𑀯𑀸 𑀛𑀸𑀬𑀢𑀺 𑀧𑀚𑁆𑀛𑀸𑀬𑀢𑀺 𑀦𑀺𑀚𑁆𑀛𑀸𑀬𑀢𑀺 𑀅𑀯𑀚𑁆𑀛𑀸𑀬𑀢𑀺, 𑀩𑁆𑀬𑀸𑀧𑀸𑀤𑀧𑀭𑀺𑀬𑀼𑀝𑁆𑀞𑀺𑀢𑁂𑀦 𑀘𑁂𑀢𑀲𑀸 𑀯𑀺𑀳𑀭𑀢𑀺… 𑀣𑀺𑀦𑀫𑀺𑀤𑁆𑀥𑀧𑀭𑀺𑀬𑀼𑀝𑁆𑀞𑀺𑀢𑁂𑀦 𑀘𑁂𑀢𑀲𑀸 𑀯𑀺𑀳𑀭𑀢𑀺… 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀧𑀭𑀺𑀬𑀼𑀝𑁆𑀞𑀺𑀢𑁂𑀦 𑀘𑁂𑀢𑀲𑀸 𑀯𑀺𑀳𑀭𑀢𑀺… 𑀯𑀺𑀘𑀺𑀓𑀺𑀘𑁆𑀙𑀸𑀧𑀭𑀺𑀬𑀼𑀝𑁆𑀞𑀺𑀢𑁂𑀦 𑀘𑁂𑀢𑀲𑀸 𑀯𑀺𑀳𑀭𑀢𑀺 𑀯𑀺𑀘𑀺𑀓𑀺𑀘𑁆𑀙𑀸𑀧𑀭𑁂𑀢𑁂𑀦, 𑀉𑀧𑁆𑀧𑀦𑁆𑀦𑀸𑀬 𑀘 𑀯𑀺𑀘𑀺𑀓𑀺𑀘𑁆𑀙𑀸𑀬 𑀦𑀺𑀲𑁆𑀲𑀭𑀡𑀁 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀺. 𑀲𑁄 𑀯𑀺𑀘𑀺𑀓𑀺𑀘𑁆𑀙𑀁𑀬𑁂𑀯 𑀅𑀦𑁆𑀢𑀭𑀁 𑀓𑀢𑁆𑀯𑀸 𑀛𑀸𑀬𑀢𑀺 𑀧𑀚𑁆𑀛𑀸𑀬𑀢𑀺 𑀦𑀺𑀚𑁆𑀛𑀸𑀬𑀢𑀺 𑀅𑀯𑀚𑁆𑀛𑀸𑀬𑀢𑀺. 𑀲𑁄 𑀧𑀣𑀯𑀺𑀫𑁆𑀧𑀺 𑀦𑀺𑀲𑁆𑀲𑀸𑀬 𑀛𑀸𑀬𑀢𑀺, 𑀆𑀧𑀫𑁆𑀧𑀺 𑀦𑀺𑀲𑁆𑀲𑀸𑀬 𑀛𑀸𑀬𑀢𑀺, 𑀢𑁂𑀚𑀫𑁆𑀧𑀺 𑀦𑀺𑀲𑁆𑀲𑀸𑀬 𑀛𑀸𑀬𑀢𑀺, 𑀯𑀸𑀬𑀫𑁆𑀧𑀺 𑀦𑀺𑀲𑁆𑀲𑀸𑀬 𑀛𑀸𑀬𑀢𑀺, 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀫𑁆𑀧𑀺 𑀦𑀺𑀲𑁆𑀲𑀸𑀬 𑀛𑀸𑀬𑀢𑀺, 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀫𑁆𑀧𑀺 𑀦𑀺𑀲𑁆𑀲𑀸𑀬 𑀛𑀸𑀬𑀢𑀺, 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀫𑁆𑀧𑀺 𑀦𑀺𑀲𑁆𑀲𑀸𑀬 𑀛𑀸𑀬𑀢𑀺, 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀫𑁆𑀧𑀺 𑀦𑀺𑀲𑁆𑀲𑀸𑀬 𑀛𑀸𑀬𑀢𑀺, 𑀇𑀥𑀮𑁄𑀓𑀫𑁆𑀧𑀺 𑀦𑀺𑀲𑁆𑀲𑀸𑀬 𑀛𑀸𑀬𑀢𑀺, 𑀧𑀭𑀮𑁄𑀓𑀫𑁆𑀧𑀺 𑀦𑀺𑀲𑁆𑀲𑀸𑀬 𑀛𑀸𑀬𑀢𑀺, 𑀬𑀫𑁆𑀧𑀺𑀤𑀁 𑀤𑀺𑀝𑁆𑀞𑀁 𑀲𑀼𑀢𑀁 𑀫𑀼𑀢𑀁 𑀯𑀺𑀜𑁆𑀜𑀸𑀢𑀁 𑀧𑀢𑁆𑀢𑀁 𑀧𑀭𑀺𑀬𑁂𑀲𑀺𑀢𑀁 𑀅𑀦𑀼𑀯𑀺𑀘𑀭𑀺𑀢𑀁 𑀫𑀦𑀲𑀸, 𑀢𑀫𑁆𑀧𑀺 𑀦𑀺𑀲𑁆𑀲𑀸𑀬 𑀛𑀸𑀬𑀢𑀺. 𑀏𑀯𑀁 𑀔𑁄, 𑀲𑀤𑁆𑀥, 𑀧𑀼𑀭𑀺𑀲𑀔𑀴𑀼𑀗𑁆𑀓𑀛𑀸𑀬𑀺𑀢𑀁 𑀳𑁄𑀢𑀺.

‘‘𑀓𑀣𑀜𑁆𑀘, 𑀲𑀤𑁆𑀥, 𑀆𑀚𑀸𑀦𑀻𑀬𑀛𑀸𑀬𑀺𑀢𑀁 𑀳𑁄𑀢𑀺? 𑀪𑀤𑁆𑀭𑁄 𑀳𑀺, 𑀲𑀤𑁆𑀥, 𑀅𑀲𑁆𑀲𑀸𑀚𑀸𑀦𑀻𑀬𑁄 𑀤𑁄𑀡𑀺𑀬𑀸 𑀩𑀤𑁆𑀥𑁄 𑀦 ‘𑀬𑀯𑀲𑀁 𑀬𑀯𑀲’𑀦𑁆𑀢𑀺 𑀛𑀸𑀬𑀢𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀪𑀤𑁆𑀭𑀲𑁆𑀲 𑀳𑀺, 𑀲𑀤𑁆𑀥, 𑀅𑀲𑁆𑀲𑀸𑀚𑀸𑀦𑀻𑀬𑀲𑁆𑀲 𑀤𑁄𑀡𑀺𑀬𑀸 𑀩𑀤𑁆𑀥𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘𑀓𑀺𑀁 𑀦𑀼 𑀔𑁄 𑀫𑀁 𑀅𑀚𑁆𑀚 𑀅𑀲𑁆𑀲𑀤𑀫𑁆𑀫𑀲𑀸𑀭𑀣𑀺 𑀓𑀸𑀭𑀡𑀁 𑀓𑀸𑀭𑁂𑀲𑁆𑀲𑀢𑀺, 𑀓𑀺𑀫𑀲𑁆𑀲𑀸𑀳𑀁 𑀧𑀝𑀺𑀓𑀭𑁄𑀫𑀻’𑀢𑀺. 𑀲𑁄 𑀤𑁄𑀡𑀺𑀬𑀸 𑀩𑀤𑁆𑀥𑁄 𑀦 ‘𑀬𑀯𑀲𑀁 𑀬𑀯𑀲’𑀦𑁆𑀢𑀺 𑀛𑀸𑀬𑀢𑀺. 𑀪𑀤𑁆𑀭𑁄 𑀳𑀺, 𑀲𑀤𑁆𑀥, 𑀅𑀲𑁆𑀲𑀸𑀚𑀸𑀦𑀻𑀬𑁄 𑀬𑀣𑀸 𑀇𑀡𑀁 𑀬𑀣𑀸 𑀩𑀦𑁆𑀥𑀁 𑀬𑀣𑀸 𑀚𑀸𑀦𑀺𑀁 𑀬𑀣𑀸 𑀓𑀮𑀺𑀁 𑀏𑀯𑀁 𑀧𑀢𑁄𑀤𑀲𑁆𑀲 𑀅𑀚𑁆𑀛𑁄𑀳𑀭𑀡𑀁 𑀲𑀫𑀦𑀼𑀧𑀲𑁆𑀲𑀢𑀺. 𑀏𑀯𑀫𑁂𑀯𑀁 𑀔𑁄, 𑀲𑀤𑁆𑀥, 𑀪𑀤𑁆𑀭𑁄 𑀧𑀼𑀭𑀺𑀲𑀸𑀚𑀸𑀦𑀻𑀬𑁄 𑀅𑀭𑀜𑁆𑀜𑀕𑀢𑁄𑀧𑀺 𑀭𑀼𑀓𑁆𑀔𑀫𑀽𑀮𑀕𑀢𑁄𑀧𑀺 𑀲𑀼𑀜𑁆𑀜𑀸𑀕𑀸𑀭𑀕𑀢𑁄𑀧𑀺 𑀦 𑀓𑀸𑀫𑀭𑀸𑀕𑀧𑀭𑀺𑀬𑀼𑀝𑁆𑀞𑀺𑀢𑁂𑀦 𑀘𑁂𑀢𑀲𑀸 𑀯𑀺𑀳𑀭𑀢𑀺 𑀦 𑀓𑀸𑀫𑀭𑀸𑀕𑀧𑀭𑁂𑀢𑁂𑀦, 𑀉𑀧𑁆𑀧𑀦𑁆𑀦𑀲𑁆𑀲 𑀘 𑀓𑀸𑀫𑀭𑀸𑀕𑀲𑁆𑀲 𑀦𑀺𑀲𑁆𑀲𑀭𑀡𑀁 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, 𑀦 𑀩𑁆𑀬𑀸𑀧𑀸𑀤𑀧𑀭𑀺𑀬𑀼𑀝𑁆𑀞𑀺𑀢𑁂𑀦 𑀘𑁂𑀢𑀲𑀸 𑀯𑀺𑀳𑀭𑀢𑀺… 𑀦 𑀣𑀺𑀦𑀫𑀺𑀤𑁆𑀥𑀧𑀭𑀺𑀬𑀼𑀝𑁆𑀞𑀺𑀢𑁂𑀦 𑀘𑁂𑀢𑀲𑀸 𑀯𑀺𑀳𑀭𑀢𑀺… 𑀦 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀧𑀭𑀺𑀬𑀼𑀝𑁆𑀞𑀺𑀢𑁂𑀦 𑀘𑁂𑀢𑀲𑀸 𑀯𑀺𑀳𑀭𑀢𑀺… 𑀦 𑀯𑀺𑀘𑀺𑀓𑀺𑀘𑁆𑀙𑀸𑀧𑀭𑀺𑀬𑀼𑀝𑁆𑀞𑀺𑀢𑁂𑀦 𑀘𑁂𑀢𑀲𑀸 𑀯𑀺𑀳𑀭𑀢𑀺 𑀦 𑀯𑀺𑀘𑀺𑀓𑀺𑀘𑁆𑀙𑀸𑀧𑀭𑁂𑀢𑁂𑀦, 𑀉𑀧𑁆𑀧𑀦𑁆𑀦𑀸𑀬 𑀘 𑀯𑀺𑀘𑀺𑀓𑀺𑀘𑁆𑀙𑀸𑀬 𑀦𑀺𑀲𑁆𑀲𑀭𑀡𑀁 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺. 𑀲𑁄 𑀦𑁂𑀯 𑀧𑀣𑀯𑀺𑀁 𑀦𑀺𑀲𑁆𑀲𑀸𑀬 𑀛𑀸𑀬𑀢𑀺, 𑀦 𑀆𑀧𑀁 𑀦𑀺𑀲𑁆𑀲𑀸𑀬 𑀛𑀸𑀬𑀢𑀺, 𑀦 𑀢𑁂𑀚𑀁 𑀦𑀺𑀲𑁆𑀲𑀸𑀬 𑀛𑀸𑀬𑀢𑀺, 𑀦 𑀯𑀸𑀬𑀁 𑀦𑀺𑀲𑁆𑀲𑀸𑀬 𑀛𑀸𑀬𑀢𑀺, 𑀦 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁 𑀦𑀺𑀲𑁆𑀲𑀸𑀬 𑀛𑀸𑀬𑀢𑀺, 𑀦 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀁 𑀦𑀺𑀲𑁆𑀲𑀸𑀬 𑀛𑀸𑀬𑀢𑀺, 𑀦 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁 𑀦𑀺𑀲𑁆𑀲𑀸𑀬 𑀛𑀸𑀬𑀢𑀺, 𑀦 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁 𑀦𑀺𑀲𑁆𑀲𑀸𑀬 𑀛𑀸𑀬𑀢𑀺, 𑀦 𑀇𑀥𑀮𑁄𑀓𑀁 𑀦𑀺𑀲𑁆𑀲𑀸𑀬 𑀛𑀸𑀬𑀢𑀺, 𑀦 𑀧𑀭𑀮𑁄𑀓𑀁 𑀦𑀺𑀲𑁆𑀲𑀸𑀬 𑀛𑀸𑀬𑀢𑀺, 𑀬𑀫𑁆𑀧𑀺𑀤𑀁 𑀤𑀺𑀝𑁆𑀞𑀁 𑀲𑀼𑀢𑀁 𑀫𑀼𑀢𑀁 𑀯𑀺𑀜𑁆𑀜𑀸𑀢𑀁 𑀧𑀢𑁆𑀢𑀁 𑀧𑀭𑀺𑀬𑁂𑀲𑀺𑀢𑀁 𑀅𑀦𑀼𑀯𑀺𑀘𑀭𑀺𑀢𑀁 𑀫𑀦𑀲𑀸, 𑀢𑀫𑁆𑀧𑀺 𑀦𑀺𑀲𑁆𑀲𑀸𑀬 𑀦 𑀛𑀸𑀬𑀢𑀺; 𑀛𑀸𑀬𑀢𑀺 𑀘 𑀧𑀦. 𑀏𑀯𑀁 𑀛𑀸𑀬𑀺𑀜𑁆𑀘 𑀧𑀦, 𑀲𑀤𑁆𑀥, 𑀪𑀤𑁆𑀭𑀁 𑀧𑀼𑀭𑀺𑀲𑀸𑀚𑀸𑀦𑀻𑀬𑀁 𑀲𑀇𑀦𑁆𑀤𑀸 𑀤𑁂𑀯𑀸 𑀲𑀩𑁆𑀭𑀳𑁆𑀫𑀓𑀸 𑀲𑀧𑀚𑀸𑀧𑀢𑀺𑀓𑀸 𑀆𑀭𑀓𑀸𑀯 𑀦𑀫𑀲𑁆𑀲𑀦𑁆𑀢𑀺 𑁋

‘‘𑀦𑀫𑁄 𑀢𑁂 𑀧𑀼𑀭𑀺𑀲𑀸𑀚𑀜𑁆𑀜, 𑀦𑀫𑁄 𑀢𑁂 𑀧𑀼𑀭𑀺𑀲𑀼𑀢𑁆𑀢𑀫;

𑀬𑀲𑁆𑀲 𑀢𑁂 𑀦𑀸𑀪𑀺𑀚𑀸𑀦𑀸𑀫, 𑀬𑀫𑁆𑀧𑀺 𑀦𑀺𑀲𑁆𑀲𑀸𑀬 𑀛𑀸𑀬𑀲𑀻’’𑀢𑀺.

𑀏𑀯𑀁 𑀯𑀼𑀢𑁆𑀢𑁂 𑀆𑀬𑀲𑁆𑀫𑀸 𑀲𑀤𑁆𑀥𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀓𑀣𑀁 𑀛𑀸𑀬𑀻 𑀧𑀦, 𑀪𑀦𑁆𑀢𑁂, 𑀪𑀤𑁆𑀭𑁄 𑀧𑀼𑀭𑀺𑀲𑀸𑀚𑀸𑀦𑀻𑀬𑁄 [𑀧𑀼𑀭𑀺𑀲𑀸𑀚𑀸𑀦𑀻𑀬𑁄 𑀛𑀸𑀬𑀢𑀺, 𑀲𑁄 (𑀲𑀻. 𑀲𑁆𑀬𑀸. 𑀧𑀻.), 𑀧𑀼𑀭𑀺𑀲𑀸𑀚𑀸𑀦𑀻𑀬𑁄, 𑀲𑁄 (𑀓.)] 𑀦𑁂𑀯 𑀧𑀣𑀯𑀺𑀁 𑀦𑀺𑀲𑁆𑀲𑀸𑀬 𑀛𑀸𑀬𑀢𑀺, 𑀦 𑀆𑀧𑀁 𑀦𑀺𑀲𑁆𑀲𑀸𑀬 𑀛𑀸𑀬𑀢𑀺, 𑀦 𑀢𑁂𑀚𑀁 𑀦𑀺𑀲𑁆𑀲𑀸𑀬 𑀛𑀸𑀬𑀢𑀺, 𑀦 𑀯𑀸𑀬𑀁 𑀦𑀺𑀲𑁆𑀲𑀸𑀬 𑀛𑀸𑀬𑀢𑀺, 𑀦 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁 𑀦𑀺𑀲𑁆𑀲𑀸𑀬 𑀛𑀸𑀬𑀢𑀺, 𑀦 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀁 𑀦𑀺𑀲𑁆𑀲𑀸𑀬 𑀛𑀸𑀬𑀢𑀺, 𑀦 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁 𑀦𑀺𑀲𑁆𑀲𑀸𑀬 𑀛𑀸𑀬𑀢𑀺, 𑀦 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁 𑀦𑀺𑀲𑁆𑀲𑀸𑀬 𑀛𑀸𑀬𑀢𑀺, 𑀦 𑀇𑀥𑀮𑁄𑀓𑀁 𑀦𑀺𑀲𑁆𑀲𑀸𑀬 𑀛𑀸𑀬𑀢𑀺, 𑀦 𑀧𑀭𑀮𑁄𑀓𑀁 𑀦𑀺𑀲𑁆𑀲𑀸𑀬 𑀛𑀸𑀬𑀢𑀺, 𑀬𑀫𑁆𑀧𑀺𑀤𑀁 𑀤𑀺𑀝𑁆𑀞𑀁 𑀲𑀼𑀢𑀁 𑀫𑀼𑀢𑀁 𑀯𑀺𑀜𑁆𑀜𑀸𑀢𑀁 𑀧𑀢𑁆𑀢𑀁 𑀧𑀭𑀺𑀬𑁂𑀲𑀺𑀢𑀁 𑀅𑀦𑀼𑀯𑀺𑀘𑀭𑀺𑀢𑀁 𑀫𑀦𑀲𑀸, 𑀢𑀫𑁆𑀧𑀺 𑀦𑀺𑀲𑁆𑀲𑀸𑀬 𑀦 𑀛𑀸𑀬𑀢𑀺; 𑀛𑀸𑀬𑀢𑀺 𑀘 𑀧𑀦? 𑀓𑀣𑀁 𑀛𑀸𑀬𑀺𑀜𑁆𑀘 𑀧𑀦, 𑀪𑀦𑁆𑀢𑁂, 𑀪𑀤𑁆𑀭𑀁 𑀧𑀼𑀭𑀺𑀲𑀸𑀚𑀸𑀦𑀻𑀬𑀁 𑀲𑀇𑀦𑁆𑀤𑀸 𑀤𑁂𑀯𑀸 𑀲𑀩𑁆𑀭𑀳𑁆𑀫𑀓𑀸 𑀲𑀧𑀚𑀸𑀧𑀢𑀺𑀓𑀸 𑀆𑀭𑀓𑀸𑀯 𑀦𑀫𑀲𑁆𑀲𑀦𑁆𑀢𑀺 𑁋

‘‘𑀦𑀫𑁄 𑀢𑁂 𑀧𑀼𑀭𑀺𑀲𑀸𑀚𑀜𑁆𑀜, 𑀦𑀫𑁄 𑀢𑁂 𑀧𑀼𑀭𑀺𑀲𑀼𑀢𑁆𑀢𑀫;

𑀬𑀲𑁆𑀲 𑀢𑁂 𑀦𑀸𑀪𑀺𑀚𑀸𑀦𑀸𑀫, 𑀬𑀫𑁆𑀧𑀺 𑀦𑀺𑀲𑁆𑀲𑀸𑀬 𑀛𑀸𑀬𑀲𑀻’’𑀢𑀺.

‘‘𑀇𑀥, 𑀲𑀤𑁆𑀥, 𑀪𑀤𑁆𑀭𑀲𑁆𑀲 𑀧𑀼𑀭𑀺𑀲𑀸𑀚𑀸𑀦𑀻𑀬𑀲𑁆𑀲 𑀧𑀣𑀯𑀺𑀬𑀁 𑀧𑀣𑀯𑀺𑀲𑀜𑁆𑀜𑀸 𑀯𑀺𑀪𑀽𑀢𑀸 𑀳𑁄𑀢𑀺, 𑀆𑀧𑀲𑁆𑀫𑀺𑀁 𑀆𑀧𑁄𑀲𑀜𑁆𑀜𑀸 𑀯𑀺𑀪𑀽𑀢𑀸 𑀳𑁄𑀢𑀺, 𑀢𑁂𑀚𑀲𑁆𑀫𑀺𑀁 𑀢𑁂𑀚𑁄𑀲𑀜𑁆𑀜𑀸 𑀯𑀺𑀪𑀽𑀢𑀸 𑀳𑁄𑀢𑀺, 𑀯𑀸𑀬𑀲𑁆𑀫𑀺𑀁 𑀯𑀸𑀬𑁄𑀲𑀜𑁆𑀜𑀸 𑀯𑀺𑀪𑀽𑀢𑀸 𑀳𑁄𑀢𑀺, 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑁂 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀲𑀜𑁆𑀜𑀸 𑀯𑀺𑀪𑀽𑀢𑀸 𑀳𑁄𑀢𑀺, 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑁂 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀲𑀜𑁆𑀜𑀸 𑀯𑀺𑀪𑀽𑀢𑀸 𑀳𑁄𑀢𑀺, 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑁂 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀲𑀜𑁆𑀜𑀸 𑀯𑀺𑀪𑀽𑀢𑀸 𑀳𑁄𑀢𑀺, 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑁂 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀲𑀜𑁆𑀜𑀸 𑀯𑀺𑀪𑀽𑀢𑀸 𑀳𑁄𑀢𑀺, 𑀇𑀥𑀮𑁄𑀓𑁂 𑀇𑀥𑀮𑁄𑀓𑀲𑀜𑁆𑀜𑀸 𑀯𑀺𑀪𑀽𑀢𑀸 𑀳𑁄𑀢𑀺, 𑀧𑀭𑀮𑁄𑀓𑁂 𑀧𑀭𑀮𑁄𑀓𑀲𑀜𑁆𑀜𑀸 𑀯𑀺𑀪𑀽𑀢𑀸 𑀳𑁄𑀢𑀺, 𑀬𑀫𑁆𑀧𑀺𑀤𑀁 𑀤𑀺𑀝𑁆𑀞𑀁 𑀲𑀼𑀢𑀁 𑀫𑀼𑀢𑀁 𑀯𑀺𑀜𑁆𑀜𑀸𑀢𑀁 𑀧𑀢𑁆𑀢𑀁 𑀧𑀭𑀺𑀬𑁂𑀲𑀺𑀢𑀁 𑀅𑀦𑀼𑀯𑀺𑀘𑀭𑀺𑀢𑀁 𑀫𑀦𑀲𑀸, 𑀢𑀢𑁆𑀭𑀸𑀧𑀺 𑀲𑀜𑁆𑀜𑀸 𑀯𑀺𑀪𑀽𑀢𑀸 𑀳𑁄𑀢𑀺. 𑀏𑀯𑀁 𑀛𑀸𑀬𑀻 𑀔𑁄, 𑀲𑀤𑁆𑀥, 𑀪𑀤𑁆𑀭𑁄 𑀧𑀼𑀭𑀺𑀲𑀸𑀚𑀸𑀦𑀻𑀬𑁄 𑀦𑁂𑀯 𑀧𑀣𑀯𑀺𑀁 𑀦𑀺𑀲𑁆𑀲𑀸𑀬 𑀛𑀸𑀬𑀢𑀺…𑀧𑁂… 𑀬𑀫𑁆𑀧𑀺𑀤𑀁 𑀤𑀺𑀝𑁆𑀞𑀁 𑀲𑀼𑀢𑀁 𑀫𑀼𑀢𑀁 𑀯𑀺𑀜𑁆𑀜𑀸𑀢𑀁 𑀧𑀢𑁆𑀢𑀁 𑀧𑀭𑀺𑀬𑁂𑀲𑀺𑀢𑀁 𑀅𑀦𑀼𑀯𑀺𑀘𑀭𑀺𑀢𑀁 𑀫𑀦𑀲𑀸, 𑀢𑀫𑁆𑀧𑀺 𑀦𑀺𑀲𑁆𑀲𑀸𑀬 𑀦 𑀛𑀸𑀬𑀢𑀺; 𑀛𑀸𑀬𑀢𑀺 𑀘 𑀧𑀦. 𑀏𑀯𑀁 𑀛𑀸𑀬𑀺𑀜𑁆𑀘 𑀧𑀦, 𑀲𑀤𑁆𑀥, 𑀪𑀤𑁆𑀭𑀁 𑀧𑀼𑀭𑀺𑀲𑀸𑀚𑀸𑀦𑀻𑀬𑀁 𑀲𑀇𑀦𑁆𑀤𑀸 𑀤𑁂𑀯𑀸 𑀲𑀩𑁆𑀭𑀳𑁆𑀫𑀓𑀸 𑀲𑀧𑀚𑀸𑀧𑀢𑀺𑀓𑀸 𑀆𑀭𑀓𑀸𑀯 𑀦𑀫𑀲𑁆𑀲𑀦𑁆𑀢𑀺 𑁋

‘‘𑀦𑀫𑁄 𑀢𑁂 𑀧𑀼𑀭𑀺𑀲𑀸𑀚𑀜𑁆𑀜, 𑀦𑀫𑁄 𑀢𑁂 𑀧𑀼𑀭𑀺𑀲𑀼𑀢𑁆𑀢𑀫;

𑀬𑀲𑁆𑀲 𑀢𑁂 𑀦𑀸𑀪𑀺𑀚𑀸𑀦𑀸𑀫, 𑀬𑀫𑁆𑀧𑀺 𑀦𑀺𑀲𑁆𑀲𑀸𑀬 𑀛𑀸𑀬𑀲𑀻’’𑀢𑀺. 𑀦𑀯𑀫𑀁;

𑁧𑁦. 𑀫𑁄𑀭𑀦𑀺𑀯𑀸𑀧𑀲𑀼𑀢𑁆𑀢𑀁

𑁧𑁦. 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀭𑀸𑀚𑀕𑀳𑁂 𑀯𑀺𑀳𑀭𑀢𑀺 𑀫𑁄𑀭𑀦𑀺𑀯𑀸𑀧𑁂 𑀧𑀭𑀺𑀩𑁆𑀩𑀸𑀚𑀓𑀸𑀭𑀸𑀫𑁂. 𑀢𑀢𑁆𑀭 𑀔𑁄 𑀪𑀕𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀪𑀺𑀓𑁆𑀔𑀯𑁄’’𑀢𑀺. ‘‘𑀪𑀤𑀦𑁆𑀢𑁂’’𑀢𑀺 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀼𑀁. 𑀪𑀕𑀯𑀸 𑀏𑀢𑀤𑀯𑁄𑀘 𑁋

‘‘𑀢𑀻𑀳𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀅𑀘𑁆𑀘𑀦𑁆𑀢𑀦𑀺𑀝𑁆𑀞𑁄 𑀳𑁄𑀢𑀺 𑀅𑀘𑁆𑀘𑀦𑁆𑀢𑀬𑁄𑀕𑀓𑁆𑀔𑁂𑀫𑀻 𑀅𑀘𑁆𑀘𑀦𑁆𑀢𑀩𑁆𑀭𑀳𑁆𑀫𑀘𑀸𑀭𑀻 𑀅𑀘𑁆𑀘𑀦𑁆𑀢𑀧𑀭𑀺𑀬𑁄𑀲𑀸𑀦𑁄 𑀲𑁂𑀝𑁆𑀞𑁄 𑀤𑁂𑀯𑀫𑀦𑀼𑀲𑁆𑀲𑀸𑀦𑀁. 𑀓𑀢𑀫𑁂𑀳𑀺 𑀢𑀻𑀳𑀺? 𑀅𑀲𑁂𑀔𑁂𑀦 𑀲𑀻𑀮𑀓𑁆𑀔𑀦𑁆𑀥𑁂𑀦, 𑀅𑀲𑁂𑀔𑁂𑀦 𑀲𑀫𑀸𑀥𑀺𑀓𑁆𑀔𑀦𑁆𑀥𑁂𑀦, 𑀅𑀲𑁂𑀔𑁂𑀦 𑀧𑀜𑁆𑀜𑀸𑀓𑁆𑀔𑀦𑁆𑀥𑁂𑀦 𑁋 𑀇𑀫𑁂𑀳𑀺, 𑀔𑁄, 𑀪𑀺𑀓𑁆𑀔𑀯𑁂, 𑀢𑀻𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀅𑀘𑁆𑀘𑀦𑁆𑀢𑀦𑀺𑀝𑁆𑀞𑁄 𑀳𑁄𑀢𑀺 𑀅𑀘𑁆𑀘𑀦𑁆𑀢𑀬𑁄𑀕𑀓𑁆𑀔𑁂𑀫𑀻 𑀅𑀘𑁆𑀘𑀦𑁆𑀢𑀩𑁆𑀭𑀳𑁆𑀫𑀘𑀸𑀭𑀻 𑀅𑀘𑁆𑀘𑀦𑁆𑀢𑀧𑀭𑀺𑀬𑁄𑀲𑀸𑀦𑁄 𑀲𑁂𑀝𑁆𑀞𑁄 𑀤𑁂𑀯𑀫𑀦𑀼𑀲𑁆𑀲𑀸𑀦𑀁.

‘‘𑀅𑀧𑀭𑁂𑀳𑀺𑀧𑀺, 𑀪𑀺𑀓𑁆𑀔𑀯𑁂, 𑀢𑀻𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀅𑀘𑁆𑀘𑀦𑁆𑀢𑀦𑀺𑀝𑁆𑀞𑁄 𑀳𑁄𑀢𑀺 𑀅𑀘𑁆𑀘𑀦𑁆𑀢𑀬𑁄𑀕𑀓𑁆𑀔𑁂𑀫𑀻 𑀅𑀘𑁆𑀘𑀦𑁆𑀢𑀩𑁆𑀭𑀳𑁆𑀫𑀘𑀸𑀭𑀻 𑀅𑀘𑁆𑀘𑀦𑁆𑀢𑀧𑀭𑀺𑀬𑁄𑀲𑀸𑀦𑁄 𑀲𑁂𑀝𑁆𑀞𑁄 𑀤𑁂𑀯𑀫𑀦𑀼𑀲𑁆𑀲𑀸𑀦𑀁. 𑀓𑀢𑀫𑁂𑀳𑀺 𑀢𑀻𑀳𑀺? 𑀇𑀤𑁆𑀥𑀺𑀧𑀸𑀝𑀺𑀳𑀸𑀭𑀺𑀬𑁂𑀦, 𑀆𑀤𑁂𑀲𑀦𑀸𑀧𑀸𑀝𑀺𑀳𑀸𑀭𑀺𑀬𑁂𑀦, 𑀅𑀦𑀼𑀲𑀸𑀲𑀦𑀻𑀧𑀸𑀝𑀺𑀳𑀸𑀭𑀺𑀬𑁂𑀦 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀻𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀅𑀘𑁆𑀘𑀦𑁆𑀢𑀦𑀺𑀝𑁆𑀞𑁄 𑀳𑁄𑀢𑀺, 𑀅𑀘𑁆𑀘𑀦𑁆𑀢𑀬𑁄𑀕𑀓𑁆𑀔𑁂𑀫𑀻 𑀅𑀘𑁆𑀘𑀦𑁆𑀢𑀩𑁆𑀭𑀳𑁆𑀫𑀘𑀸𑀭𑀻 𑀅𑀘𑁆𑀘𑀦𑁆𑀢𑀧𑀭𑀺𑀬𑁄𑀲𑀸𑀦𑁄 𑀲𑁂𑀝𑁆𑀞𑁄 𑀤𑁂𑀯𑀫𑀦𑀼𑀲𑁆𑀲𑀸𑀦𑀁.

‘‘𑀅𑀧𑀭𑁂𑀳𑀺𑀧𑀺, 𑀪𑀺𑀓𑁆𑀔𑀯𑁂, 𑀢𑀻𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀅𑀘𑁆𑀘𑀦𑁆𑀢𑀦𑀺𑀝𑁆𑀞𑁄 𑀳𑁄𑀢𑀺 𑀅𑀘𑁆𑀘𑀦𑁆𑀢𑀬𑁄𑀕𑀓𑁆𑀔𑁂𑀫𑀻 𑀅𑀘𑁆𑀘𑀦𑁆𑀢𑀩𑁆𑀭𑀳𑁆𑀫𑀘𑀸𑀭𑀻 𑀅𑀘𑁆𑀘𑀦𑁆𑀢𑀧𑀭𑀺𑀬𑁄𑀲𑀸𑀦𑁄 𑀲𑁂𑀝𑁆𑀞𑁄 𑀤𑁂𑀯𑀫𑀦𑀼𑀲𑁆𑀲𑀸𑀦𑀁. 𑀓𑀢𑀫𑁂𑀳𑀺 𑀢𑀻𑀳𑀺? 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸, 𑀲𑀫𑁆𑀫𑀸𑀜𑀸𑀡𑁂𑀦, 𑀲𑀫𑁆𑀫𑀸𑀯𑀺𑀫𑀼𑀢𑁆𑀢𑀺𑀬𑀸 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀻𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀅𑀘𑁆𑀘𑀦𑁆𑀢𑀦𑀺𑀝𑁆𑀞𑁄 𑀳𑁄𑀢𑀺 𑀅𑀘𑁆𑀘𑀦𑁆𑀢𑀬𑁄𑀕𑀓𑁆𑀔𑁂𑀫𑀻 𑀅𑀘𑁆𑀘𑀦𑁆𑀢𑀩𑁆𑀭𑀳𑁆𑀫𑀘𑀸𑀭𑀻 𑀅𑀘𑁆𑀘𑀦𑁆𑀢𑀧𑀭𑀺𑀬𑁄𑀲𑀸𑀦𑁄 𑀲𑁂𑀝𑁆𑀞𑁄 𑀤𑁂𑀯𑀫𑀦𑀼𑀲𑁆𑀲𑀸𑀦𑀁.

‘‘𑀤𑁆𑀯𑀻𑀳𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀅𑀘𑁆𑀘𑀦𑁆𑀢𑀦𑀺𑀝𑁆𑀞𑁄 𑀳𑁄𑀢𑀺 𑀅𑀘𑁆𑀘𑀦𑁆𑀢𑀬𑁄𑀕𑀓𑁆𑀔𑁂𑀫𑀻 𑀅𑀘𑁆𑀘𑀦𑁆𑀢𑀩𑁆𑀭𑀳𑁆𑀫𑀘𑀸𑀭𑀻 𑀅𑀘𑁆𑀘𑀦𑁆𑀢𑀧𑀭𑀺𑀬𑁄𑀲𑀸𑀦𑁄 𑀲𑁂𑀝𑁆𑀞𑁄 𑀤𑁂𑀯𑀫𑀦𑀼𑀲𑁆𑀲𑀸𑀦𑀁. 𑀓𑀢𑀫𑁂𑀳𑀺 𑀤𑁆𑀯𑀻𑀳𑀺? 𑀯𑀺𑀚𑁆𑀚𑀸𑀬, 𑀘𑀭𑀡𑁂𑀦 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀤𑁆𑀯𑀻𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀅𑀘𑁆𑀘𑀦𑁆𑀢𑀦𑀺𑀝𑁆𑀞𑁄 𑀳𑁄𑀢𑀺 𑀅𑀘𑁆𑀘𑀦𑁆𑀢𑀬𑁄𑀕𑀓𑁆𑀔𑁂𑀫𑀻 𑀅𑀘𑁆𑀘𑀦𑁆𑀢𑀩𑁆𑀭𑀳𑁆𑀫𑀘𑀸𑀭𑀻 𑀅𑀘𑁆𑀘𑀦𑁆𑀢𑀧𑀭𑀺𑀬𑁄𑀲𑀸𑀦𑁄 𑀲𑁂𑀝𑁆𑀞𑁄 𑀤𑁂𑀯𑀫𑀦𑀼𑀲𑁆𑀲𑀸𑀦𑀁. 𑀩𑁆𑀭𑀳𑁆𑀫𑀼𑀦𑀸 𑀧𑁂𑀲𑀸, 𑀪𑀺𑀓𑁆𑀔𑀯𑁂, 𑀲𑀦𑀗𑁆𑀓𑀼𑀫𑀸𑀭𑁂𑀦 𑀕𑀸𑀣𑀸 𑀪𑀸𑀲𑀺𑀢𑀸 𑁋

‘‘𑀔𑀢𑁆𑀢𑀺𑀬𑁄 𑀲𑁂𑀝𑁆𑀞𑁄 𑀚𑀦𑁂𑀢𑀲𑁆𑀫𑀺𑀁, 𑀬𑁂 𑀕𑁄𑀢𑁆𑀢𑀧𑀝𑀺𑀲𑀸𑀭𑀺𑀦𑁄;

𑀯𑀺𑀚𑁆𑀚𑀸𑀘𑀭𑀡𑀲𑀫𑁆𑀧𑀦𑁆𑀦𑁄, 𑀲𑁄 𑀲𑁂𑀝𑁆𑀞𑁄 𑀤𑁂𑀯𑀫𑀸𑀦𑀼𑀲𑁂’’𑀢𑀺 [𑀤𑀻. 𑀦𑀺. 𑁧.𑁨𑁭𑁭; 𑀲𑀁. 𑀦𑀺. 𑁧.𑁧𑁮𑁨; 𑁨.𑁨𑁪𑁫].

‘‘𑀲𑀸 𑀔𑁄 𑀧𑀦𑁂𑀲𑀸, 𑀪𑀺𑀓𑁆𑀔𑀯𑁂, 𑀲𑀦𑀗𑁆𑀓𑀼𑀫𑀸𑀭𑁂𑀦 𑀕𑀸𑀣𑀸 𑀪𑀸𑀲𑀺𑀢𑀸 𑀲𑀼𑀪𑀸𑀲𑀺𑀢𑀸, 𑀦𑁄 𑀤𑀼𑀩𑁆𑀪𑀸𑀲𑀺𑀢𑀸; 𑀅𑀢𑁆𑀣𑀲𑀁𑀳𑀺𑀢𑀸, 𑀦𑁄 𑀅𑀦𑀢𑁆𑀣𑀲𑀁𑀳𑀺𑀢𑀸; 𑀅𑀦𑀼𑀫𑀢𑀸 𑀫𑀬𑀸. 𑀅𑀳𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀏𑀯𑀁 𑀯𑀤𑀸𑀫𑀺 𑁋

‘‘𑀔𑀢𑁆𑀢𑀺𑀬𑁄 𑀲𑁂𑀝𑁆𑀞𑁄 𑀚𑀦𑁂𑀢𑀲𑁆𑀫𑀺𑀁, 𑀬𑁂 𑀕𑁄𑀢𑁆𑀢𑀧𑀝𑀺𑀲𑀸𑀭𑀺𑀦𑁄;

𑀯𑀺𑀚𑁆𑀚𑀸𑀘𑀭𑀡𑀲𑀫𑁆𑀧𑀦𑁆𑀦𑁄, 𑀲𑁄 𑀲𑁂𑀝𑁆𑀞𑁄 𑀤𑁂𑀯𑀫𑀸𑀦𑀼𑀲𑁂’’𑀢𑀺. 𑀤𑀲𑀫𑀁;

𑀦𑀺𑀲𑁆𑀲𑀬𑀯𑀕𑁆𑀕𑁄 [𑀦𑀺𑀲𑁆𑀲𑀸𑀬𑀯𑀕𑁆𑀕𑁄 (𑀲𑁆𑀬𑀸. 𑀓𑀁.)] 𑀧𑀞𑀫𑁄.