(𑁧𑁭) 𑁨. 𑀚𑀸𑀡𑀼𑀲𑁆𑀲𑁄𑀡𑀺𑀯𑀕𑁆𑀕𑁄

𑁧. 𑀩𑁆𑀭𑀸𑀳𑁆𑀫𑀡𑀧𑀘𑁆𑀘𑁄𑀭𑁄𑀳𑀡𑀻𑀲𑀼𑀢𑁆𑀢𑀁

𑁧𑁬𑁭. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀚𑀸𑀡𑀼𑀲𑁆𑀲𑁄𑀡𑀺 𑀩𑁆𑀭𑀸𑀳𑁆𑀫𑀡𑁄 𑀢𑀤𑀳𑀼𑀧𑁄𑀲𑀣𑁂 𑀲𑀻𑀲𑀁𑀦𑁆𑀳𑀸𑀢𑁄 𑀦𑀯𑀁 𑀔𑁄𑀫𑀬𑀼𑀕𑀁 𑀦𑀺𑀯𑀢𑁆𑀣𑁄 𑀅𑀮𑁆𑀮𑀓𑀼𑀲𑀫𑀼𑀝𑁆𑀞𑀺𑀁 𑀆𑀤𑀸𑀬 𑀪𑀕𑀯𑀢𑁄 𑀅𑀯𑀺𑀤𑀽𑀭𑁂 𑀏𑀓𑀫𑀦𑁆𑀢𑀁 𑀞𑀺𑀢𑁄 𑀳𑁄𑀢𑀺.

𑀅𑀤𑁆𑀤𑀲𑀸 𑀔𑁄 𑀪𑀕𑀯𑀸 𑀚𑀸𑀡𑀼𑀲𑁆𑀲𑁄𑀡𑀺𑀁 𑀩𑁆𑀭𑀸𑀳𑁆𑀫𑀡𑀁 𑀢𑀤𑀳𑀼𑀧𑁄𑀲𑀣𑁂 𑀲𑀻𑀲𑀁𑀦𑁆𑀳𑀸𑀢𑀁 𑀦𑀯𑀁 𑀔𑁄𑀫𑀬𑀼𑀕𑀁 𑀦𑀺𑀯𑀢𑁆𑀣𑀁 𑀅𑀮𑁆𑀮𑀓𑀼𑀲𑀫𑀼𑀝𑁆𑀞𑀺𑀁 𑀆𑀤𑀸𑀬 𑀏𑀓𑀫𑀦𑁆𑀢𑀁 𑀞𑀺𑀢𑀁. 𑀤𑀺𑀲𑁆𑀯𑀸𑀦 𑀚𑀸𑀡𑀼𑀲𑁆𑀲𑁄𑀡𑀺𑀁 𑀩𑁆𑀭𑀸𑀳𑁆𑀫𑀡𑀁 𑀏𑀢𑀤𑀯𑁄𑀘 𑁋 ‘‘𑀓𑀺𑀁 𑀦𑀼 𑀢𑁆𑀯𑀁, 𑀩𑁆𑀭𑀸𑀳𑁆𑀫𑀡, 𑀢𑀤𑀳𑀼𑀧𑁄𑀲𑀣𑁂 𑀲𑀻𑀲𑀁𑀦𑁆𑀳𑀸𑀢𑁄 𑀦𑀯𑀁 𑀔𑁄𑀫𑀬𑀼𑀕𑀁 𑀦𑀺𑀯𑀢𑁆𑀣𑁄 𑀅𑀮𑁆𑀮𑀓𑀼𑀲𑀫𑀼𑀝𑁆𑀞𑀺𑀁 𑀆𑀤𑀸𑀬 𑀏𑀓𑀫𑀦𑁆𑀢𑀁 𑀞𑀺𑀢𑁄? 𑀓𑀺𑀁 𑀦𑁆𑀯𑀚𑁆𑀚 𑀩𑁆𑀭𑀸𑀳𑁆𑀫𑀡𑀓𑀼𑀮𑀲𑁆𑀲𑀸’’𑀢𑀺? ‘‘𑀧𑀘𑁆𑀘𑁄𑀭𑁄𑀳𑀡𑀻, 𑀪𑁄 𑀕𑁄𑀢𑀫, 𑀅𑀚𑁆𑀚 𑀩𑁆𑀭𑀸𑀳𑁆𑀫𑀡𑀓𑀼𑀮𑀲𑁆𑀲𑀸’’𑀢𑀺.

‘‘𑀬𑀣𑀸 𑀓𑀣𑀁 𑀧𑀦, 𑀩𑁆𑀭𑀸𑀳𑁆𑀫𑀡, 𑀩𑁆𑀭𑀸𑀳𑁆𑀫𑀡𑀸𑀦𑀁 𑀧𑀘𑁆𑀘𑁄𑀭𑁄𑀳𑀡𑀻 𑀳𑁄𑀢𑀻’’𑀢𑀺? ‘‘𑀇𑀥, 𑀪𑁄 𑀕𑁄𑀢𑀫, 𑀩𑁆𑀭𑀸𑀳𑁆𑀫𑀡𑀸 𑀢𑀤𑀳𑀼𑀧𑁄𑀲𑀣𑁂 𑀲𑀻𑀲𑀁𑀦𑁆𑀳𑀸𑀢𑀸 𑀦𑀯𑀁 𑀔𑁄𑀫𑀬𑀼𑀕𑀁 𑀦𑀺𑀯𑀢𑁆𑀣𑀸 𑀅𑀮𑁆𑀮𑁂𑀦 𑀕𑁄𑀫𑀬𑁂𑀦 𑀧𑀣𑀯𑀺𑀁 𑀑𑀧𑀼𑀜𑁆𑀚𑀺𑀢𑁆𑀯𑀸 𑀳𑀭𑀺𑀢𑁂𑀳𑀺 𑀓𑀼𑀲𑁂𑀳𑀺 𑀧𑀢𑁆𑀣𑀭𑀺𑀢𑁆𑀯𑀸 𑀅𑀦𑁆𑀢𑀭𑀸 𑀘 𑀯𑁂𑀮𑀁 𑀅𑀦𑁆𑀢𑀭𑀸 𑀘 𑀅𑀕𑁆𑀬𑀸𑀕𑀸𑀭𑀁 𑀲𑁂𑀬𑁆𑀬𑀁 𑀓𑀧𑁆𑀧𑁂𑀦𑁆𑀢𑀺. 𑀢𑁂 𑀢𑀁 𑀭𑀢𑁆𑀢𑀺𑀁 𑀢𑀺𑀓𑁆𑀔𑀢𑁆𑀢𑀼𑀁 𑀧𑀘𑁆𑀘𑀼𑀝𑁆𑀞𑀸𑀬 𑀧𑀜𑁆𑀚𑀮𑀺𑀓𑀸 𑀅𑀕𑁆𑀕𑀺𑀁 𑀦𑀫𑀲𑁆𑀲𑀦𑁆𑀢𑀺 𑁋 ‘𑀧𑀘𑁆𑀘𑁄𑀭𑁄𑀳𑀸𑀫 𑀪𑀯𑀦𑁆𑀢𑀁, 𑀧𑀘𑁆𑀘𑁄𑀭𑁄𑀳𑀸𑀫 𑀪𑀯𑀦𑁆𑀢’𑀦𑁆𑀢𑀺. 𑀩𑀳𑀼𑀓𑁂𑀦 𑀘 𑀲𑀧𑁆𑀧𑀺𑀢𑁂𑀮𑀦𑀯𑀦𑀻𑀢𑁂𑀦 𑀅𑀕𑁆𑀕𑀺𑀁 𑀲𑀦𑁆𑀢𑀧𑁆𑀧𑁂𑀦𑁆𑀢𑀺. 𑀢𑀲𑁆𑀲𑀸 𑀘 𑀭𑀢𑁆𑀢𑀺𑀬𑀸 𑀅𑀘𑁆𑀘𑀬𑁂𑀦 𑀧𑀡𑀻𑀢𑁂𑀦 𑀔𑀸𑀤𑀦𑀻𑀬𑁂𑀦 𑀪𑁄𑀚𑀦𑀻𑀬𑁂𑀦 𑀩𑁆𑀭𑀸𑀳𑁆𑀫𑀡𑁂 𑀲𑀦𑁆𑀢𑀧𑁆𑀧𑁂𑀦𑁆𑀢𑀺. 𑀏𑀯𑀁, 𑀪𑁄 𑀕𑁄𑀢𑀫, 𑀩𑁆𑀭𑀸𑀳𑁆𑀫𑀡𑀸𑀦𑀁 𑀧𑀘𑁆𑀘𑁄𑀭𑁄𑀳𑀡𑀻 𑀳𑁄𑀢𑀻’’𑀢𑀺.

‘‘𑀅𑀜𑁆𑀜𑀣𑀸 𑀔𑁄, 𑀩𑁆𑀭𑀸𑀳𑁆𑀫𑀡, 𑀩𑁆𑀭𑀸𑀳𑁆𑀫𑀡𑀸𑀦𑀁 𑀧𑀘𑁆𑀘𑁄𑀭𑁄𑀳𑀡𑀻 𑀳𑁄𑀢𑀺, 𑀅𑀜𑁆𑀜𑀣𑀸 𑀘 𑀧𑀦 𑀅𑀭𑀺𑀬𑀲𑁆𑀲 𑀯𑀺𑀦𑀬𑁂 𑀧𑀘𑁆𑀘𑁄𑀭𑁄𑀳𑀡𑀻 𑀳𑁄𑀢𑀻’’𑀢𑀺. ‘‘𑀬𑀣𑀸 𑀓𑀣𑀁 𑀧𑀦, 𑀪𑁄 𑀕𑁄𑀢𑀫, 𑀅𑀭𑀺𑀬𑀲𑁆𑀲 𑀯𑀺𑀦𑀬𑁂 𑀧𑀘𑁆𑀘𑁄𑀭𑁄𑀳𑀡𑀻 𑀳𑁄𑀢𑀺? 𑀲𑀸𑀥𑀼 𑀫𑁂 𑀪𑀯𑀁 𑀕𑁄𑀢𑀫𑁄 𑀢𑀣𑀸 𑀥𑀫𑁆𑀫𑀁 𑀤𑁂𑀲𑁂𑀢𑀼 𑀬𑀣𑀸 𑀅𑀭𑀺𑀬𑀲𑁆𑀲 𑀯𑀺𑀦𑀬𑁂 𑀧𑀘𑁆𑀘𑁄𑀭𑁄𑀳𑀡𑀻 𑀳𑁄𑀢𑀻’’𑀢𑀺.

‘‘𑀢𑁂𑀦 𑀳𑀺, 𑀩𑁆𑀭𑀸𑀳𑁆𑀫𑀡, 𑀲𑀼𑀡𑀸𑀳𑀺, 𑀲𑀸𑀥𑀼𑀓𑀁 𑀫𑀦𑀲𑀺 𑀓𑀭𑁄𑀳𑀺; 𑀪𑀸𑀲𑀺𑀲𑁆𑀲𑀸𑀫𑀻’’𑀢𑀺. ‘‘𑀏𑀯𑀁, 𑀪𑁄’’𑀢𑀺 𑀔𑁄 𑀚𑀸𑀡𑀼𑀲𑁆𑀲𑁄𑀡𑀺 𑀩𑁆𑀭𑀸𑀳𑁆𑀫𑀡𑁄 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀺. 𑀪𑀕𑀯𑀸 𑀏𑀢𑀤𑀯𑁄𑀘 𑁋

‘‘𑀇𑀥, 𑀩𑁆𑀭𑀸𑀳𑁆𑀫𑀡, 𑀅𑀭𑀺𑀬𑀲𑀸𑀯𑀓𑁄 𑀇𑀢𑀺 𑀧𑀝𑀺𑀲𑀜𑁆𑀘𑀺𑀓𑁆𑀔𑀢𑀺 𑁋 ‘𑀧𑀸𑀡𑀸𑀢𑀺𑀧𑀸𑀢𑀲𑁆𑀲 𑀔𑁄 𑀧𑀸𑀧𑀓𑁄 𑀯𑀺𑀧𑀸𑀓𑁄 𑀤𑀺𑀝𑁆𑀞𑁂 𑀘𑁂𑀯 𑀥𑀫𑁆𑀫𑁂 𑀅𑀪𑀺𑀲𑀫𑁆𑀧𑀭𑀸𑀬𑀜𑁆𑀘𑀸’ 𑀢𑀺. 𑀲𑁄 𑀇𑀢𑀺 𑀧𑀝𑀺𑀲𑀗𑁆𑀔𑀸𑀬 𑀧𑀸𑀡𑀸𑀢𑀺𑀧𑀸𑀢𑀁 𑀧𑀚𑀳𑀢𑀺; 𑀧𑀸𑀡𑀸𑀢𑀺𑀧𑀸𑀢𑀸 𑀧𑀘𑁆𑀘𑁄𑀭𑁄𑀳𑀢𑀺.

…𑀅𑀤𑀺𑀦𑁆𑀦𑀸𑀤𑀸𑀦𑀲𑁆𑀲 𑀔𑁄 𑀧𑀸𑀧𑀓𑁄 𑀯𑀺𑀧𑀸𑀓𑁄 𑁋 𑀤𑀺𑀝𑁆𑀞𑁂 𑀘𑁂𑀯 𑀥𑀫𑁆𑀫𑁂 𑀅𑀪𑀺𑀲𑀫𑁆𑀧𑀭𑀸𑀬𑀜𑁆𑀘𑀸𑀢𑀺. 𑀲𑁄 𑀇𑀢𑀺 𑀧𑀝𑀺𑀲𑀗𑁆𑀔𑀸𑀬 𑀅𑀤𑀺𑀦𑁆𑀦𑀸𑀤𑀸𑀦𑀁 𑀧𑀚𑀳𑀢𑀺; 𑀅𑀤𑀺𑀦𑁆𑀦𑀸𑀤𑀸𑀦𑀸 𑀧𑀘𑁆𑀘𑁄𑀭𑁄𑀳𑀢𑀺.

…𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀲𑁆𑀲 𑀔𑁄 𑀧𑀸𑀧𑀓𑁄 𑀯𑀺𑀧𑀸𑀓𑁄 𑁋 𑀤𑀺𑀝𑁆𑀞𑁂 𑀘𑁂𑀯 𑀥𑀫𑁆𑀫𑁂 𑀅𑀪𑀺𑀲𑀫𑁆𑀧𑀭𑀸𑀬𑀜𑁆𑀘𑀸𑀢𑀺. 𑀲𑁄 𑀇𑀢𑀺 𑀧𑀝𑀺𑀲𑀗𑁆𑀔𑀸𑀬 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀁 𑀧𑀚𑀳𑀢𑀺; 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀸 𑀧𑀘𑁆𑀘𑁄𑀭𑁄𑀳𑀢𑀺.

…𑀫𑀼𑀲𑀸𑀯𑀸𑀤𑀲𑁆𑀲 𑀔𑁄 𑀧𑀸𑀧𑀓𑁄 𑀯𑀺𑀧𑀸𑀓𑁄 𑁋 𑀤𑀺𑀝𑁆𑀞𑁂 𑀘𑁂𑀯 𑀥𑀫𑁆𑀫𑁂 𑀅𑀪𑀺𑀲𑀫𑁆𑀧𑀭𑀸𑀬𑀜𑁆𑀘𑀸𑀢𑀺. 𑀲𑁄 𑀇𑀢𑀺 𑀧𑀝𑀺𑀲𑀗𑁆𑀔𑀸𑀬 𑀫𑀼𑀲𑀸𑀯𑀸𑀤𑀁 𑀧𑀚𑀳𑀢𑀺; 𑀫𑀼𑀲𑀸𑀯𑀸𑀤𑀸 𑀧𑀘𑁆𑀘𑁄𑀭𑁄𑀳𑀢𑀺.

…𑀧𑀺𑀲𑀼𑀡𑀸𑀬 𑀯𑀸𑀘𑀸𑀬 𑀔𑁄 𑀧𑀸𑀧𑀓𑁄 𑀯𑀺𑀧𑀸𑀓𑁄 𑁋 𑀤𑀺𑀝𑁆𑀞𑁂 𑀘𑁂𑀯 𑀥𑀫𑁆𑀫𑁂 𑀅𑀪𑀺𑀲𑀫𑁆𑀧𑀭𑀸𑀬𑀜𑁆𑀘𑀸𑀢𑀺. 𑀲𑁄 𑀇𑀢𑀺 𑀧𑀝𑀺𑀲𑀗𑁆𑀔𑀸𑀬 𑀧𑀺𑀲𑀼𑀡𑀁 𑀯𑀸𑀘𑀁 𑀧𑀚𑀳𑀢𑀺; 𑀧𑀺𑀲𑀼𑀡𑀸𑀬 𑀯𑀸𑀘𑀸𑀬 𑀧𑀘𑁆𑀘𑁄𑀭𑁄𑀳𑀢𑀺.

…𑀨𑀭𑀼𑀲𑀸𑀬 𑀯𑀸𑀘𑀸𑀬 𑀔𑁄 𑀧𑀸𑀧𑀓𑁄 𑀯𑀺𑀧𑀸𑀓𑁄 𑁋 𑀤𑀺𑀝𑁆𑀞𑁂 𑀘𑁂𑀯 𑀥𑀫𑁆𑀫𑁂 𑀅𑀪𑀺𑀲𑀫𑁆𑀧𑀭𑀸𑀬𑀜𑁆𑀘𑀸𑀢𑀺. 𑀲𑁄 𑀇𑀢𑀺 𑀧𑀝𑀺𑀲𑀗𑁆𑀔𑀸𑀬 𑀨𑀭𑀼𑀲𑀁 𑀯𑀸𑀘𑀁 𑀧𑀚𑀳𑀢𑀺; 𑀨𑀭𑀼𑀲𑀸𑀬 𑀯𑀸𑀘𑀸𑀬 𑀧𑀘𑁆𑀘𑁄𑀭𑁄𑀳𑀢𑀺.

…𑀲𑀫𑁆𑀨𑀧𑁆𑀧𑀮𑀸𑀧𑀲𑁆𑀲 𑀔𑁄 𑀧𑀸𑀧𑀓𑁄 𑀯𑀺𑀧𑀸𑀓𑁄 𑁋 𑀤𑀺𑀝𑁆𑀞𑁂 𑀘𑁂𑀯 𑀥𑀫𑁆𑀫𑁂 𑀅𑀪𑀺𑀲𑀫𑁆𑀧𑀭𑀸𑀬𑀜𑁆𑀘𑀸𑀢𑀺. 𑀲𑁄 𑀇𑀢𑀺 𑀧𑀝𑀺𑀲𑀗𑁆𑀔𑀸𑀬 𑀲𑀫𑁆𑀨𑀧𑁆𑀧𑀮𑀸𑀧𑀁 𑀧𑀚𑀳𑀢𑀺; 𑀲𑀫𑁆𑀨𑀧𑁆𑀧𑀮𑀸𑀧𑀸 𑀧𑀘𑁆𑀘𑁄𑀭𑁄𑀳𑀢𑀺.

…𑀅𑀪𑀺𑀚𑁆𑀛𑀸𑀬 𑀔𑁄 𑀧𑀸𑀧𑀓𑁄 𑀯𑀺𑀧𑀸𑀓𑁄 𑁋 𑀤𑀺𑀝𑁆𑀞𑁂 𑀘𑁂𑀯 𑀥𑀫𑁆𑀫𑁂 𑀅𑀪𑀺𑀲𑀫𑁆𑀧𑀭𑀸𑀬𑀜𑁆𑀘𑀸𑀢𑀺. 𑀲𑁄 𑀇𑀢𑀺 𑀧𑀝𑀺𑀲𑀗𑁆𑀔𑀸𑀬 𑀅𑀪𑀺𑀚𑁆𑀛𑀁 𑀧𑀚𑀳𑀢𑀺; 𑀅𑀪𑀺𑀚𑁆𑀛𑀸𑀬 𑀧𑀘𑁆𑀘𑁄𑀭𑁄𑀳𑀢𑀺.

…𑀩𑁆𑀬𑀸𑀧𑀸𑀤𑀲𑁆𑀲 𑀔𑁄 𑀧𑀸𑀧𑀓𑁄 𑀯𑀺𑀧𑀸𑀓𑁄 𑁋 𑀤𑀺𑀝𑁆𑀞𑁂 𑀘𑁂𑀯 𑀥𑀫𑁆𑀫𑁂 𑀅𑀪𑀺𑀲𑀫𑁆𑀧𑀭𑀸𑀬𑀜𑁆𑀘𑀸𑀢𑀺. 𑀲𑁄 𑀇𑀢𑀺 𑀧𑀝𑀺𑀲𑀗𑁆𑀔𑀸𑀬 𑀩𑁆𑀬𑀸𑀧𑀸𑀤𑀁 𑀧𑀚𑀳𑀢𑀺; 𑀩𑁆𑀬𑀸𑀧𑀸𑀤𑀸 𑀧𑀘𑁆𑀘𑁄𑀭𑁄𑀳𑀢𑀺.

…𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀬𑀸 𑀔𑁄 𑀧𑀸𑀧𑀓𑁄 𑀯𑀺𑀧𑀸𑀓𑁄 𑁋 𑀤𑀺𑀝𑁆𑀞𑁂 𑀘𑁂𑀯 𑀥𑀫𑁆𑀫𑁂 𑀅𑀪𑀺𑀲𑀫𑁆𑀧𑀭𑀸𑀬𑀜𑁆𑀘𑀸’𑀢𑀺. 𑀲𑁄 𑀇𑀢𑀺 𑀧𑀝𑀺𑀲𑀗𑁆𑀔𑀸𑀬 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀁 𑀧𑀚𑀳𑀢𑀺; 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀬𑀸 𑀧𑀘𑁆𑀘𑁄𑀭𑁄𑀳𑀢𑀺. 𑀏𑀯𑀁 𑀔𑁄, 𑀩𑁆𑀭𑀸𑀳𑁆𑀫𑀡, 𑀅𑀭𑀺𑀬𑀲𑁆𑀲 𑀯𑀺𑀦𑀬𑁂 𑀧𑀘𑁆𑀘𑁄𑀭𑁄𑀳𑀡𑀻 𑀳𑁄𑀢𑀻’’𑀢𑀺.

‘‘𑀅𑀜𑁆𑀜𑀣𑀸 𑀔𑁄, 𑀪𑁄 𑀕𑁄𑀢𑀫, 𑀩𑁆𑀭𑀸𑀳𑁆𑀫𑀡𑀸𑀦𑀁 𑀧𑀘𑁆𑀘𑁄𑀭𑁄𑀳𑀡𑀻 𑀳𑁄𑀢𑀺, 𑀅𑀜𑁆𑀜𑀣𑀸 𑀘 𑀧𑀦 𑀅𑀭𑀺𑀬𑀲𑁆𑀲 𑀯𑀺𑀦𑀬𑁂 𑀧𑀘𑁆𑀘𑁄𑀭𑁄𑀳𑀡𑀻 𑀳𑁄𑀢𑀺. 𑀇𑀫𑀺𑀲𑁆𑀲𑀸, 𑀪𑁄 𑀕𑁄𑀢𑀫, 𑀅𑀭𑀺𑀬𑀲𑁆𑀲 𑀯𑀺𑀦𑀬𑁂 𑀧𑀘𑁆𑀘𑁄𑀭𑁄𑀳𑀡𑀺𑀬𑀸 𑀩𑁆𑀭𑀸𑀳𑁆𑀫𑀡𑀸𑀦𑀁 𑀧𑀘𑁆𑀘𑁄𑀭𑁄𑀳𑀡𑀻 𑀓𑀮𑀁 𑀦𑀸𑀕𑁆𑀖𑀢𑀺 𑀲𑁄𑀴𑀲𑀺𑀁. 𑀅𑀪𑀺𑀓𑁆𑀓𑀦𑁆𑀢𑀁, 𑀪𑁄 𑀕𑁄𑀢𑀫…𑀧𑁂… 𑀉𑀧𑀸𑀲𑀓𑀁 𑀫𑀁 𑀪𑀯𑀁 𑀕𑁄𑀢𑀫𑁄 𑀥𑀸𑀭𑁂𑀢𑀼 𑀅𑀚𑁆𑀚𑀢𑀕𑁆𑀕𑁂 𑀧𑀸𑀡𑀼𑀧𑁂𑀢𑀁 𑀲𑀭𑀡𑀁 𑀕𑀢’’𑀦𑁆𑀢𑀺. 𑀧𑀞𑀫𑀁.

𑁨. 𑀅𑀭𑀺𑀬𑀧𑀘𑁆𑀘𑁄𑀭𑁄𑀳𑀡𑀻𑀲𑀼𑀢𑁆𑀢𑀁

𑁧𑁬𑁮. ‘‘𑀅𑀭𑀺𑀬𑀁 𑀯𑁄, 𑀪𑀺𑀓𑁆𑀔𑀯𑁂, 𑀧𑀘𑁆𑀘𑁄𑀭𑁄𑀳𑀡𑀺𑀁 𑀤𑁂𑀲𑁂𑀲𑁆𑀲𑀸𑀫𑀺. 𑀢𑀁 𑀲𑀼𑀡𑀸𑀣, 𑀲𑀸𑀥𑀼𑀓𑀁 𑀫𑀦𑀲𑀺 𑀓𑀭𑁄𑀣; 𑀪𑀸𑀲𑀺𑀲𑁆𑀲𑀸𑀫𑀻’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀼𑀁. 𑀪𑀕𑀯𑀸 𑀏𑀢𑀤𑀯𑁄𑀘 𑁋

‘‘𑀓𑀢𑀫𑀸 𑀘, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀸 𑀧𑀘𑁆𑀘𑁄𑀭𑁄𑀳𑀡𑀻? 𑀇𑀥, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀲𑀸𑀯𑀓𑁄 𑀇𑀢𑀺 𑀧𑀝𑀺𑀲𑀜𑁆𑀘𑀺𑀓𑁆𑀔𑀢𑀺 𑁋 ‘𑀧𑀸𑀡𑀸𑀢𑀺𑀧𑀸𑀢𑀲𑁆𑀲 𑀔𑁄 𑀧𑀸𑀧𑀓𑁄 𑀯𑀺𑀧𑀸𑀓𑁄 𑁋 𑀤𑀺𑀝𑁆𑀞𑁂 𑀘𑁂𑀯 𑀥𑀫𑁆𑀫𑁂 𑀅𑀪𑀺𑀲𑀫𑁆𑀧𑀭𑀸𑀬𑀜𑁆𑀘𑀸’𑀢𑀺. 𑀲𑁄 𑀇𑀢𑀺 𑀧𑀝𑀺𑀲𑀗𑁆𑀔𑀸𑀬 𑀧𑀸𑀡𑀸𑀢𑀺𑀧𑀸𑀢𑀁 𑀧𑀚𑀳𑀢𑀺; 𑀧𑀸𑀡𑀸𑀢𑀺𑀧𑀸𑀢𑀸 𑀧𑀘𑁆𑀘𑁄𑀭𑁄𑀳𑀢𑀺.

… ‘𑀅𑀤𑀺𑀦𑁆𑀦𑀸𑀤𑀸𑀦𑀲𑁆𑀲 𑀔𑁄 𑀧𑀸𑀧𑀓𑁄 𑀯𑀺𑀧𑀸𑀓𑁄 𑁋 𑀤𑀺𑀝𑁆𑀞𑁂 𑀘𑁂𑀯 𑀥𑀫𑁆𑀫𑁂 𑀅𑀪𑀺𑀲𑀫𑁆𑀧𑀭𑀸𑀬𑀜𑁆𑀘𑀸’𑀢𑀺. 𑀲𑁄 𑀇𑀢𑀺 𑀧𑀝𑀺𑀲𑀗𑁆𑀔𑀸𑀬 𑀅𑀤𑀺𑀦𑁆𑀦𑀸𑀤𑀸𑀦𑀁 𑀧𑀚𑀳𑀢𑀺; 𑀅𑀤𑀺𑀦𑁆𑀦𑀸𑀤𑀸𑀦𑀸 𑀧𑀘𑁆𑀘𑁄𑀭𑁄𑀳𑀢𑀺.

… ‘𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀲𑁆𑀲 𑀔𑁄 𑀧𑀸𑀧𑀓𑁄 𑀯𑀺𑀧𑀸𑀓𑁄…𑀧𑁂… 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀸 𑀧𑀘𑁆𑀘𑁄𑀭𑁄𑀳𑀢𑀺.

… ‘𑀫𑀼𑀲𑀸𑀯𑀸𑀤𑀲𑁆𑀲 𑀔𑁄 𑀧𑀸𑀧𑀓𑁄 𑀯𑀺𑀧𑀸𑀓𑁄…𑀧𑁂… 𑀫𑀼𑀲𑀸𑀯𑀸𑀤𑀸 𑀧𑀘𑁆𑀘𑁄𑀭𑁄𑀳𑀢𑀺.

… ‘𑀧𑀺𑀲𑀼𑀡𑀸𑀬 𑀯𑀸𑀘𑀸𑀬 𑀔𑁄 𑀧𑀸𑀧𑀓𑁄 𑀯𑀺𑀧𑀸𑀓𑁄…𑀧𑁂… 𑀧𑀺𑀲𑀼𑀡𑀸𑀬 𑀯𑀸𑀘𑀸𑀬 𑀧𑀘𑁆𑀘𑁄𑀭𑁄𑀳𑀢𑀺.

… ‘𑀨𑀭𑀼𑀲𑀸𑀬 𑀯𑀸𑀘𑀸𑀬 𑀔𑁄 𑀧𑀸𑀧𑀓𑁄 𑀯𑀺𑀧𑀸𑀓𑁄…𑀧𑁂… 𑀨𑀭𑀼𑀲𑀸𑀬 𑀯𑀸𑀘𑀸𑀬 𑀧𑀘𑁆𑀘𑁄𑀭𑁄𑀳𑀢𑀺.

… ‘𑀲𑀫𑁆𑀨𑀧𑁆𑀧𑀮𑀸𑀧𑀲𑁆𑀲 𑀔𑁄 𑀧𑀸𑀧𑀓𑁄 𑀯𑀺𑀧𑀸𑀓𑁄…𑀧𑁂… 𑀲𑀫𑁆𑀨𑀧𑁆𑀧𑀮𑀸𑀧𑀸 𑀧𑀘𑁆𑀘𑁄𑀭𑁄𑀳𑀢𑀺.

… ‘𑀅𑀪𑀺𑀚𑁆𑀛𑀸𑀬 𑀔𑁄 𑀧𑀸𑀧𑀓𑁄 𑀯𑀺𑀧𑀸𑀓𑁄…𑀧𑁂… 𑀅𑀪𑀺𑀚𑁆𑀛𑀸𑀬 𑀧𑀘𑁆𑀘𑁄𑀭𑁄𑀳𑀢𑀺.

… ‘𑀩𑁆𑀬𑀸𑀧𑀸𑀤𑀲𑁆𑀲 𑀔𑁄 𑀧𑀸𑀧𑀓𑁄 𑀯𑀺𑀧𑀸𑀓𑁄…𑀧𑁂… 𑀩𑁆𑀬𑀸𑀧𑀸𑀤𑀸 𑀧𑀘𑁆𑀘𑁄𑀭𑁄𑀳𑀢𑀺.

‘‘𑀓𑀢𑀫𑀸 𑀘, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀸 𑀧𑀘𑁆𑀘𑁄𑀭𑁄𑀳𑀡𑀻? 𑀇𑀥, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀲𑀸𑀯𑀓𑁄 𑀇𑀢𑀺 𑀧𑀝𑀺𑀲𑀜𑁆𑀘𑀺𑀓𑁆𑀔𑀢𑀺 𑁋 ‘𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀬𑀸 𑀔𑁄 𑀧𑀸𑀧𑀓𑁄 𑀯𑀺𑀧𑀸𑀓𑁄 𑀤𑀺𑀝𑁆𑀞𑁂 𑀘𑁂𑀯 𑀥𑀫𑁆𑀫𑁂 𑀅𑀪𑀺𑀲𑀫𑁆𑀧𑀭𑀸𑀬𑀜𑁆𑀘𑀸’𑀢𑀺. 𑀲𑁄 𑀇𑀢𑀺 𑀧𑀝𑀺𑀲𑀗𑁆𑀔𑀸𑀬 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀁 𑀧𑀚𑀳𑀢𑀺; 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀬𑀸 𑀧𑀘𑁆𑀘𑁄𑀭𑁄𑀳𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀸 𑀧𑀘𑁆𑀘𑁄𑀭𑁄𑀳𑀡𑀻’’𑀢𑀺. 𑀤𑀼𑀢𑀺𑀬𑀁.

𑁩. 𑀲𑀗𑁆𑀕𑀸𑀭𑀯𑀲𑀼𑀢𑁆𑀢𑀁

𑁧𑁬𑁯. [𑀅. 𑀦𑀺. 𑁧𑁦.𑁧𑁧𑁭] 𑀅𑀣 𑀔𑁄 𑀲𑀗𑁆𑀕𑀸𑀭𑀯𑁄 𑀩𑁆𑀭𑀸𑀳𑁆𑀫𑀡𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀢𑀸 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺. 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀲𑀸𑀭𑀡𑀻𑀬𑀁 𑀯𑀻𑀢𑀺𑀲𑀸𑀭𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀲𑀗𑁆𑀕𑀸𑀭𑀯𑁄 𑀩𑁆𑀭𑀸𑀳𑁆𑀫𑀡𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋

‘‘𑀓𑀺𑀁 𑀦𑀼 𑀔𑁄, 𑀪𑁄 𑀕𑁄𑀢𑀫, 𑀑𑀭𑀺𑀫𑀁 𑀢𑀻𑀭𑀁, 𑀓𑀺𑀁 𑀧𑀸𑀭𑀺𑀫𑀁 𑀢𑀻𑀭’’𑀦𑁆𑀢𑀺? ‘‘𑀧𑀸𑀡𑀸𑀢𑀺𑀧𑀸𑀢𑁄 𑀔𑁄, 𑀩𑁆𑀭𑀸𑀳𑁆𑀫𑀡, 𑀑𑀭𑀺𑀫𑀁 𑀢𑀻𑀭𑀁, 𑀧𑀸𑀡𑀸𑀢𑀺𑀧𑀸𑀢𑀸 𑀯𑁂𑀭𑀫𑀡𑀻 𑀧𑀸𑀭𑀺𑀫𑀁 𑀢𑀻𑀭𑀁. 𑀅𑀤𑀺𑀦𑁆𑀦𑀸𑀤𑀸𑀦𑀁 𑀔𑁄, 𑀩𑁆𑀭𑀸𑀳𑁆𑀫𑀡, 𑀑𑀭𑀺𑀫𑀁 𑀢𑀻𑀭𑀁, 𑀅𑀤𑀺𑀦𑁆𑀦𑀸𑀤𑀸𑀦𑀸 𑀯𑁂𑀭𑀫𑀡𑀻 𑀧𑀸𑀭𑀺𑀫𑀁 𑀢𑀻𑀭𑀁. 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑁄 𑀑𑀭𑀺𑀫𑀁 𑀢𑀻𑀭𑀁, 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀸 𑀯𑁂𑀭𑀫𑀡𑀻 𑀧𑀸𑀭𑀺𑀫𑀁 𑀢𑀻𑀭𑀁. 𑀫𑀼𑀲𑀸𑀯𑀸𑀤𑁄 𑀑𑀭𑀺𑀫𑀁 𑀢𑀻𑀭𑀁, 𑀫𑀼𑀲𑀸𑀯𑀸𑀤𑀸 𑀯𑁂𑀭𑀫𑀡𑀻 𑀧𑀸𑀭𑀺𑀫𑀁 𑀢𑀻𑀭𑀁. 𑀧𑀺𑀲𑀼𑀡𑀸 𑀯𑀸𑀘𑀸 𑀑𑀭𑀺𑀫𑀁 𑀢𑀻𑀭𑀁, 𑀧𑀺𑀲𑀼𑀡𑀸𑀬 𑀯𑀸𑀘𑀸𑀬 𑀯𑁂𑀭𑀫𑀡𑀻 𑀧𑀸𑀭𑀺𑀫𑀁 𑀢𑀻𑀭𑀁. 𑀨𑀭𑀼𑀲𑀸 𑀯𑀸𑀘𑀸 𑀑𑀭𑀺𑀫𑀁 𑀢𑀻𑀭𑀁, 𑀨𑀭𑀼𑀲𑀸𑀬 𑀯𑀸𑀘𑀸𑀬 𑀯𑁂𑀭𑀫𑀡𑀻 𑀧𑀸𑀭𑀺𑀫𑀁 𑀢𑀻𑀭𑀁. 𑀲𑀫𑁆𑀨𑀧𑁆𑀧𑀮𑀸𑀧𑁄 𑀑𑀭𑀺𑀫𑀁 𑀢𑀻𑀭𑀁, 𑀲𑀫𑁆𑀨𑀧𑁆𑀧𑀮𑀸𑀧𑀸 𑀯𑁂𑀭𑀫𑀡𑀻 𑀧𑀸𑀭𑀺𑀫𑀁 𑀢𑀻𑀭𑀁. 𑀅𑀪𑀺𑀚𑁆𑀛𑀸 𑀑𑀭𑀺𑀫𑀁 𑀢𑀻𑀭𑀁, 𑀅𑀦𑀪𑀺𑀚𑁆𑀛𑀸 𑀧𑀸𑀭𑀺𑀫𑀁 𑀢𑀻𑀭𑀁. 𑀩𑁆𑀬𑀸𑀧𑀸𑀤𑁄 𑀑𑀭𑀺𑀫𑀁 𑀢𑀻𑀭𑀁, 𑀅𑀩𑁆𑀬𑀸𑀧𑀸𑀤𑁄 𑀧𑀸𑀭𑀺𑀫𑀁 𑀢𑀻𑀭𑀁. 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀑𑀭𑀺𑀫𑀁 𑀢𑀻𑀭𑀁, 𑀲𑀫𑁆𑀫𑀸𑀤𑀺𑀝𑁆𑀞𑀺 𑀧𑀸𑀭𑀺𑀫𑀁 𑀢𑀻𑀭𑀁. 𑀇𑀤𑀁 𑀔𑁄, 𑀩𑁆𑀭𑀸𑀳𑁆𑀫𑀡, 𑀑𑀭𑀺𑀫𑀁 𑀢𑀻𑀭𑀁, 𑀇𑀤𑀁 𑀧𑀸𑀭𑀺𑀫𑀁 𑀢𑀻𑀭𑀦𑁆𑀢𑀺.

‘‘𑀅𑀧𑁆𑀧𑀓𑀸 𑀢𑁂 𑀫𑀦𑀼𑀲𑁆𑀲𑁂𑀲𑀼, 𑀬𑁂 𑀚𑀦𑀸 𑀧𑀸𑀭𑀕𑀸𑀫𑀺𑀦𑁄;

𑀅𑀣𑀸𑀬𑀁 𑀇𑀢𑀭𑀸 𑀧𑀚𑀸, 𑀢𑀻𑀭𑀫𑁂𑀯𑀸𑀦𑀼𑀥𑀸𑀯𑀢𑀺.

‘‘𑀬𑁂 𑀘 𑀔𑁄 𑀲𑀫𑁆𑀫𑀤𑀓𑁆𑀔𑀸𑀢𑁂, 𑀥𑀫𑁆𑀫𑁂 𑀥𑀫𑁆𑀫𑀸𑀦𑀼𑀯𑀢𑁆𑀢𑀺𑀦𑁄;

𑀢𑁂 𑀚𑀦𑀸 𑀧𑀸𑀭𑀫𑁂𑀲𑁆𑀲𑀦𑁆𑀢𑀺, 𑀫𑀘𑁆𑀘𑀼𑀥𑁂𑀬𑁆𑀬𑀁 𑀲𑀼𑀤𑀼𑀢𑁆𑀢𑀭𑀁.

‘‘𑀓𑀡𑁆𑀳𑀁 𑀥𑀫𑁆𑀫𑀁 𑀯𑀺𑀧𑁆𑀧𑀳𑀸𑀬, 𑀲𑀼𑀓𑁆𑀓𑀁 𑀪𑀸𑀯𑁂𑀣 𑀧𑀡𑁆𑀟𑀺𑀢𑁄;

𑀑𑀓𑀸 𑀅𑀦𑁄𑀓𑀫𑀸𑀕𑀫𑁆𑀫, 𑀯𑀺𑀯𑁂𑀓𑁂 𑀬𑀢𑁆𑀣 𑀤𑀽𑀭𑀫𑀁.

‘‘𑀢𑀢𑁆𑀭𑀸𑀪𑀺𑀭𑀢𑀺𑀫𑀺𑀘𑁆𑀙𑁂𑀬𑁆𑀬, 𑀳𑀺𑀢𑁆𑀯𑀸 𑀓𑀸𑀫𑁂 𑀅𑀓𑀺𑀜𑁆𑀘𑀦𑁄;

𑀧𑀭𑀺𑀬𑁄𑀤𑀧𑁂𑀬𑁆𑀬 𑀅𑀢𑁆𑀢𑀸𑀦𑀁, 𑀘𑀺𑀢𑁆𑀢𑀓𑁆𑀮𑁂𑀲𑁂𑀳𑀺 𑀧𑀡𑁆𑀟𑀺𑀢𑁄.

‘‘𑀬𑁂𑀲𑀁 𑀲𑀫𑁆𑀩𑁄𑀥𑀺𑀬𑀗𑁆𑀕𑁂𑀲𑀼, 𑀲𑀫𑁆𑀫𑀸 𑀘𑀺𑀢𑁆𑀢𑀁 𑀲𑀼𑀪𑀸𑀯𑀺𑀢𑀁;

𑀆𑀤𑀸𑀦𑀧𑀝𑀺𑀦𑀺𑀲𑁆𑀲𑀕𑁆𑀕𑁂, 𑀅𑀦𑀼𑀧𑀸𑀤𑀸𑀬 𑀬𑁂 𑀭𑀢𑀸;

𑀔𑀻𑀡𑀸𑀲𑀯𑀸 𑀚𑀼𑀢𑀺𑀫𑀦𑁆𑀢𑁄, 𑀢𑁂 𑀮𑁄𑀓𑁂 𑀧𑀭𑀺𑀦𑀺𑀩𑁆𑀩𑀼𑀢𑀸’’𑀢𑀺. 𑀢𑀢𑀺𑀬𑀁;

𑁪. 𑀑𑀭𑀺𑀫𑀲𑀼𑀢𑁆𑀢𑀁

𑁧𑁭𑁦. ‘‘𑀑𑀭𑀺𑀫𑀜𑁆𑀘, 𑀪𑀺𑀓𑁆𑀔𑀯𑁂, 𑀢𑀻𑀭𑀁 𑀤𑁂𑀲𑁂𑀲𑁆𑀲𑀸𑀫𑀺 𑀧𑀸𑀭𑀺𑀫𑀜𑁆𑀘 𑀢𑀻𑀭𑀁. 𑀢𑀁 𑀲𑀼𑀡𑀸𑀣…𑀧𑁂… 𑀓𑀢𑀫𑀜𑁆𑀘, 𑀪𑀺𑀓𑁆𑀔𑀯𑁂, 𑀑𑀭𑀺𑀫𑀁 𑀢𑀻𑀭𑀁, 𑀓𑀢𑀫𑀜𑁆𑀘 𑀧𑀸𑀭𑀺𑀫𑀁 𑀢𑀻𑀭𑀁? 𑀧𑀸𑀡𑀸𑀢𑀺𑀧𑀸𑀢𑁄, 𑀪𑀺𑀓𑁆𑀔𑀯𑁂, 𑀑𑀭𑀺𑀫𑀁 𑀢𑀻𑀭𑀁, 𑀧𑀸𑀡𑀸𑀢𑀺𑀧𑀸𑀢𑀸 𑀯𑁂𑀭𑀫𑀡𑀻 𑀧𑀸𑀭𑀺𑀫𑀁 𑀢𑀻𑀭𑀁. 𑀅𑀤𑀺𑀦𑁆𑀦𑀸𑀤𑀸𑀦𑀁 𑀑𑀭𑀺𑀫𑀁 𑀢𑀻𑀭𑀁, 𑀅𑀤𑀺𑀦𑁆𑀦𑀸𑀤𑀸𑀦𑀸 𑀯𑁂𑀭𑀫𑀡𑀻 𑀧𑀸𑀭𑀺𑀫𑀁 𑀢𑀻𑀭𑀁. 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑁄 𑀑𑀭𑀺𑀫𑀁 𑀢𑀻𑀭𑀁, 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀸 𑀯𑁂𑀭𑀫𑀡𑀻 𑀧𑀸𑀭𑀺𑀫𑀁 𑀢𑀻𑀭𑀁. 𑀫𑀼𑀲𑀸𑀯𑀸𑀤𑁄 𑀑𑀭𑀺𑀫𑀁 𑀢𑀻𑀭𑀁, 𑀫𑀼𑀲𑀸𑀯𑀸𑀤𑀸 𑀯𑁂𑀭𑀫𑀡𑀻 𑀧𑀸𑀭𑀺𑀫𑀁 𑀢𑀻𑀭𑀁. 𑀧𑀺𑀲𑀼𑀡𑀸 𑀯𑀸𑀘𑀸 𑀑𑀭𑀺𑀫𑀁 𑀢𑀻𑀭𑀁, 𑀧𑀺𑀲𑀼𑀡𑀸𑀬 𑀯𑀸𑀘𑀸𑀬 𑀯𑁂𑀭𑀫𑀡𑀻 𑀧𑀸𑀭𑀺𑀫𑀁 𑀢𑀻𑀭𑀁. 𑀨𑀭𑀼𑀲𑀸 𑀯𑀸𑀘𑀸 𑀑𑀭𑀺𑀫𑀁 𑀢𑀻𑀭𑀁, 𑀨𑀭𑀼𑀲𑀸𑀬 𑀯𑀸𑀘𑀸𑀬 𑀯𑁂𑀭𑀫𑀡𑀻 𑀧𑀸𑀭𑀺𑀫𑀁 𑀢𑀻𑀭𑀁. 𑀲𑀫𑁆𑀨𑀧𑁆𑀧𑀮𑀸𑀧𑁄 𑀑𑀭𑀺𑀫𑀁 𑀢𑀻𑀭𑀁, 𑀲𑀫𑁆𑀨𑀧𑁆𑀧𑀮𑀸𑀧𑀸 𑀯𑁂𑀭𑀫𑀡𑀻 𑀧𑀸𑀭𑀺𑀫𑀁 𑀢𑀻𑀭𑀁. 𑀅𑀪𑀺𑀚𑁆𑀛𑀸 𑀑𑀭𑀺𑀫𑀁 𑀢𑀻𑀭𑀁, 𑀅𑀦𑀪𑀺𑀚𑁆𑀛𑀸 𑀧𑀸𑀭𑀺𑀫𑀁 𑀢𑀻𑀭𑀁. 𑀩𑁆𑀬𑀸𑀧𑀸𑀤𑁄 𑀑𑀭𑀺𑀫𑀁 𑀢𑀻𑀭𑀁, 𑀅𑀩𑁆𑀬𑀸𑀧𑀸𑀤𑁄 𑀧𑀸𑀭𑀺𑀫𑀁 𑀢𑀻𑀭𑀁. 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀑𑀭𑀺𑀫𑀁 𑀢𑀻𑀭𑀁, 𑀲𑀫𑁆𑀫𑀸𑀤𑀺𑀝𑁆𑀞𑀺 𑀧𑀸𑀭𑀺𑀫𑀁 𑀢𑀻𑀭𑀁. 𑀇𑀤𑀁 𑀔𑁄, 𑀪𑀺𑀓𑁆𑀔𑀯𑁂, 𑀑𑀭𑀺𑀫𑀁 𑀢𑀻𑀭𑀁, 𑀇𑀤𑀁 𑀧𑀸𑀭𑀺𑀫𑀁 𑀢𑀻𑀭𑀦𑁆𑀢𑀺.

‘‘𑀅𑀧𑁆𑀧𑀓𑀸 𑀢𑁂 𑀫𑀦𑀼𑀲𑁆𑀲𑁂𑀲𑀼, 𑀬𑁂 𑀚𑀦𑀸 𑀧𑀸𑀭𑀕𑀸𑀫𑀺𑀦𑁄;

𑀅𑀣𑀸𑀬𑀁 𑀇𑀢𑀭𑀸 𑀧𑀚𑀸, 𑀢𑀻𑀭𑀫𑁂𑀯𑀸𑀦𑀼𑀥𑀸𑀯𑀢𑀺.

‘‘𑀬𑁂 𑀘 𑀔𑁄 𑀲𑀫𑁆𑀫𑀤𑀓𑁆𑀔𑀸𑀢𑁂, 𑀥𑀫𑁆𑀫𑁂 𑀥𑀫𑁆𑀫𑀸𑀦𑀼𑀯𑀢𑁆𑀢𑀺𑀦𑁄;

𑀢𑁂 𑀚𑀦𑀸 𑀧𑀸𑀭𑀫𑁂𑀲𑁆𑀲𑀦𑁆𑀢𑀺, 𑀫𑀘𑁆𑀘𑀼𑀥𑁂𑀬𑁆𑀬𑀁 𑀲𑀼𑀤𑀼𑀢𑁆𑀢𑀭𑀁.

‘‘𑀓𑀡𑁆𑀳𑀁 𑀥𑀫𑁆𑀫𑀁 𑀯𑀺𑀧𑁆𑀧𑀳𑀸𑀬, 𑀲𑀼𑀓𑁆𑀓𑀁 𑀪𑀸𑀯𑁂𑀣 𑀧𑀡𑁆𑀟𑀺𑀢𑁄;

𑀑𑀓𑀸 𑀅𑀦𑁄𑀓𑀫𑀸𑀕𑀫𑁆𑀫, 𑀯𑀺𑀯𑁂𑀓𑁂 𑀬𑀢𑁆𑀣 𑀤𑀽𑀭𑀫𑀁.

‘‘𑀢𑀢𑁆𑀭𑀸𑀪𑀺𑀭𑀢𑀺𑀫𑀺𑀘𑁆𑀙𑁂𑀬𑁆𑀬, 𑀳𑀺𑀢𑁆𑀯𑀸 𑀓𑀸𑀫𑁂 𑀅𑀓𑀺𑀜𑁆𑀘𑀦𑁄;

𑀧𑀭𑀺𑀬𑁄𑀤𑀧𑁂𑀬𑁆𑀬 𑀅𑀢𑁆𑀢𑀸𑀦𑀁, 𑀘𑀺𑀢𑁆𑀢𑀓𑁆𑀮𑁂𑀲𑁂𑀳𑀺 𑀧𑀡𑁆𑀟𑀺𑀢𑁄.

‘‘𑀬𑁂𑀲𑀁 𑀲𑀫𑁆𑀩𑁄𑀥𑀺𑀬𑀗𑁆𑀕𑁂𑀲𑀼, 𑀲𑀫𑁆𑀫𑀸 𑀘𑀺𑀢𑁆𑀢𑀁 𑀲𑀼𑀪𑀸𑀯𑀺𑀢𑀁;

𑀆𑀤𑀸𑀦𑀧𑀝𑀺𑀦𑀺𑀲𑁆𑀲𑀕𑁆𑀕𑁂, 𑀅𑀦𑀼𑀧𑀸𑀤𑀸𑀬 𑀬𑁂 𑀭𑀢𑀸;

𑀔𑀻𑀡𑀸𑀲𑀯𑀸 𑀚𑀼𑀢𑀺𑀫𑀦𑁆𑀢𑁄, 𑀢𑁂 𑀮𑁄𑀓𑁂 𑀧𑀭𑀺𑀦𑀺𑀩𑁆𑀩𑀼𑀢𑀸’’𑀢𑀺. 𑀘𑀢𑀼𑀢𑁆𑀣𑀁;

𑁫. 𑀧𑀞𑀫𑀅𑀥𑀫𑁆𑀫𑀲𑀼𑀢𑁆𑀢𑀁

𑁧𑁭𑁧. [𑀅. 𑀦𑀺. 𑁧𑁦.𑁧𑁧𑁩] ‘‘𑀅𑀥𑀫𑁆𑀫𑁄 𑀘, 𑀪𑀺𑀓𑁆𑀔𑀯𑁂, 𑀯𑁂𑀤𑀺𑀢𑀩𑁆𑀩𑁄 𑀅𑀦𑀢𑁆𑀣𑁄 𑀘; 𑀥𑀫𑁆𑀫𑁄 𑀘 𑀯𑁂𑀤𑀺𑀢𑀩𑁆𑀩𑁄 𑀅𑀢𑁆𑀣𑁄 𑀘. 𑀅𑀥𑀫𑁆𑀫𑀜𑁆𑀘 𑀯𑀺𑀤𑀺𑀢𑁆𑀯𑀸 𑀅𑀦𑀢𑁆𑀣𑀜𑁆𑀘, 𑀥𑀫𑁆𑀫𑀜𑁆𑀘 𑀯𑀺𑀤𑀺𑀢𑁆𑀯𑀸 𑀅𑀢𑁆𑀣𑀜𑁆𑀘 𑀬𑀣𑀸 𑀥𑀫𑁆𑀫𑁄 𑀬𑀣𑀸 𑀅𑀢𑁆𑀣𑁄 𑀢𑀣𑀸 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀁.

‘‘𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀅𑀥𑀫𑁆𑀫𑁄 𑀘 𑀅𑀦𑀢𑁆𑀣𑁄 𑀘? 𑀧𑀸𑀡𑀸𑀢𑀺𑀧𑀸𑀢𑁄, 𑀅𑀤𑀺𑀦𑁆𑀦𑀸𑀤𑀸𑀦𑀁, 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑁄, 𑀫𑀼𑀲𑀸𑀯𑀸𑀤𑁄, 𑀧𑀺𑀲𑀼𑀡𑀸 𑀯𑀸𑀘𑀸, 𑀨𑀭𑀼𑀲𑀸 𑀯𑀸𑀘𑀸, 𑀲𑀫𑁆𑀨𑀧𑁆𑀧𑀮𑀸𑀧𑁄, 𑀅𑀪𑀺𑀚𑁆𑀛𑀸, 𑀩𑁆𑀬𑀸𑀧𑀸𑀤𑁄, 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑁋 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀅𑀥𑀫𑁆𑀫𑁄 𑀘 𑀅𑀦𑀢𑁆𑀣𑁄 𑀘.

‘‘𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁄 𑀘 𑀅𑀢𑁆𑀣𑁄 𑀘? 𑀧𑀸𑀡𑀸𑀢𑀺𑀧𑀸𑀢𑀸 𑀯𑁂𑀭𑀫𑀡𑀻, 𑀅𑀤𑀺𑀦𑁆𑀦𑀸𑀤𑀸𑀦𑀸 𑀯𑁂𑀭𑀫𑀡𑀻, 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀸 𑀯𑁂𑀭𑀫𑀡𑀻, 𑀫𑀼𑀲𑀸𑀯𑀸𑀤𑀸 𑀯𑁂𑀭𑀫𑀡𑀻, 𑀧𑀺𑀲𑀼𑀡𑀸𑀬 𑀯𑀸𑀘𑀸𑀬 𑀯𑁂𑀭𑀫𑀡𑀻, 𑀨𑀭𑀼𑀲𑀸𑀬 𑀯𑀸𑀘𑀸𑀬 𑀯𑁂𑀭𑀫𑀡𑀻, 𑀲𑀫𑁆𑀨𑀧𑁆𑀧𑀮𑀸𑀧𑀸 𑀯𑁂𑀭𑀫𑀡𑀻, 𑀅𑀦𑀪𑀺𑀚𑁆𑀛𑀸, 𑀅𑀩𑁆𑀬𑀸𑀧𑀸𑀤𑁄, 𑀲𑀫𑁆𑀫𑀸𑀤𑀺𑀝𑁆𑀞𑀺 𑁋 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁄 𑀘 𑀅𑀢𑁆𑀣𑁄 𑀘.

‘‘‘𑀅𑀥𑀫𑁆𑀫𑁄 𑀘, 𑀪𑀺𑀓𑁆𑀔𑀯𑁂, 𑀯𑁂𑀤𑀺𑀢𑀩𑁆𑀩𑁄 𑀅𑀦𑀢𑁆𑀣𑁄 𑀘; 𑀥𑀫𑁆𑀫𑁄 𑀘 𑀯𑁂𑀤𑀺𑀢𑀩𑁆𑀩𑁄 𑀅𑀢𑁆𑀣𑁄 𑀘. 𑀅𑀥𑀫𑁆𑀫𑀜𑁆𑀘 𑀯𑀺𑀤𑀺𑀢𑁆𑀯𑀸 𑀅𑀦𑀢𑁆𑀣𑀜𑁆𑀘, 𑀥𑀫𑁆𑀫𑀜𑁆𑀘 𑀯𑀺𑀤𑀺𑀢𑁆𑀯𑀸 𑀅𑀢𑁆𑀣𑀜𑁆𑀘 𑀬𑀣𑀸 𑀥𑀫𑁆𑀫𑁄 𑀬𑀣𑀸 𑀅𑀢𑁆𑀣𑁄 𑀢𑀣𑀸 𑀧𑀝𑀺𑀧𑀚𑁆𑀚𑀺𑀢𑀩𑁆𑀩’𑀦𑁆𑀢𑀺, 𑀇𑀢𑀺 𑀬𑀁 𑀢𑀁 𑀯𑀼𑀢𑁆𑀢𑀁, 𑀇𑀤𑀫𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢’’𑀦𑁆𑀢𑀺. 𑀧𑀜𑁆𑀘𑀫𑀁.

𑁬. 𑀤𑀼𑀢𑀺𑀬𑀅𑀥𑀫𑁆𑀫𑀲𑀼𑀢𑁆𑀢𑀁

𑁧𑁭𑁨. ‘‘𑀅𑀥𑀫𑁆𑀫𑁄 𑀘, 𑀪𑀺𑀓𑁆𑀔𑀯𑁂, 𑀯𑁂𑀤𑀺𑀢𑀩𑁆𑀩𑁄 𑀥𑀫𑁆𑀫𑁄 𑀘; 𑀅𑀦𑀢𑁆𑀣𑁄 𑀘 𑀯𑁂𑀤𑀺𑀢𑀩𑁆𑀩𑁄 𑀅𑀢𑁆𑀣𑁄 𑀘. 𑀅𑀥𑀫𑁆𑀫𑀜𑁆𑀘 𑀯𑀺𑀤𑀺𑀢𑁆𑀯𑀸 𑀥𑀫𑁆𑀫𑀜𑁆𑀘, 𑀅𑀦𑀢𑁆𑀣𑀜𑁆𑀘 𑀯𑀺𑀤𑀺𑀢𑁆𑀯𑀸 𑀅𑀢𑁆𑀣𑀜𑁆𑀘 𑀬𑀣𑀸 𑀥𑀫𑁆𑀫𑁄 𑀬𑀣𑀸 𑀅𑀢𑁆𑀣𑁄 𑀢𑀣𑀸 𑀧𑀝𑀺𑀧𑀚𑁆𑀚𑀺𑀢𑀩𑁆𑀩’’𑀦𑁆𑀢𑀺. 𑀇𑀤𑀫𑀯𑁄𑀘 𑀪𑀕𑀯𑀸. 𑀇𑀤𑀁 𑀯𑀢𑁆𑀯𑀸𑀦 𑀲𑀼𑀕𑀢𑁄 𑀉𑀝𑁆𑀞𑀸𑀬𑀸𑀲𑀦𑀸 𑀯𑀺𑀳𑀸𑀭𑀁 𑀧𑀸𑀯𑀺𑀲𑀺.

𑀅𑀣 𑀔𑁄 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀅𑀘𑀺𑀭𑀧𑀓𑁆𑀓𑀦𑁆𑀢𑀲𑁆𑀲 𑀪𑀕𑀯𑀢𑁄 𑀏𑀢𑀤𑀳𑁄𑀲𑀺 𑁋 ‘‘𑀇𑀤𑀁 𑀔𑁄 𑀦𑁄, 𑀆𑀯𑀼𑀲𑁄, 𑀪𑀕𑀯𑀸 𑀲𑀁𑀔𑀺𑀢𑁆𑀢𑁂𑀦 𑀉𑀤𑁆𑀤𑁂𑀲𑀁 𑀉𑀤𑁆𑀤𑀺𑀲𑀺𑀢𑁆𑀯𑀸 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑀁 𑀅𑀯𑀺𑀪𑀚𑀺𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀯𑀺𑀳𑀸𑀭𑀁 𑀧𑀯𑀺𑀝𑁆𑀞𑁄 𑁋 ‘𑀅𑀥𑀫𑁆𑀫𑁄 𑀘, 𑀪𑀺𑀓𑁆𑀔𑀯𑁂, 𑀯𑁂𑀤𑀺𑀢𑀩𑁆𑀩𑁄 𑀥𑀫𑁆𑀫𑁄 𑀘; 𑀅𑀦𑀢𑁆𑀣𑁄 𑀘 𑀯𑁂𑀤𑀺𑀢𑀩𑁆𑀩𑁄 𑀅𑀢𑁆𑀣𑁄 𑀘. 𑀅𑀥𑀫𑁆𑀫𑀜𑁆𑀘 𑀯𑀺𑀤𑀺𑀢𑁆𑀯𑀸 𑀥𑀫𑁆𑀫𑀜𑁆𑀘, 𑀅𑀦𑀢𑁆𑀣𑀜𑁆𑀘 𑀯𑀺𑀤𑀺𑀢𑁆𑀯𑀸 𑀅𑀢𑁆𑀣𑀜𑁆𑀘 𑀬𑀣𑀸 𑀥𑀫𑁆𑀫𑁄 𑀬𑀣𑀸 𑀅𑀢𑁆𑀣𑁄 𑀢𑀣𑀸 𑀧𑀝𑀺𑀧𑀚𑁆𑀚𑀺𑀢𑀩𑁆𑀩’𑀦𑁆𑀢𑀺. 𑀓𑁄 𑀦𑀼 𑀔𑁄 𑀇𑀫𑀲𑁆𑀲 𑀪𑀕𑀯𑀢𑀸 𑀲𑀁𑀔𑀺𑀢𑁆𑀢𑁂𑀦 𑀉𑀤𑁆𑀤𑁂𑀲𑀲𑁆𑀲 𑀉𑀤𑁆𑀤𑀺𑀝𑁆𑀞𑀲𑁆𑀲 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑀁 𑀅𑀯𑀺𑀪𑀢𑁆𑀢𑀲𑁆𑀲 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑀁 𑀯𑀺𑀪𑀚𑁂𑀬𑁆𑀬𑀸’’𑀢𑀺?

𑀅𑀣 𑀔𑁄 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀏𑀢𑀤𑀳𑁄𑀲𑀺 𑁋 ‘‘𑀅𑀬𑀁 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀓𑀘𑁆𑀘𑀸𑀦𑁄 𑀲𑀢𑁆𑀣𑀼 𑀘𑁂𑀯 𑀲𑀁𑀯𑀡𑁆𑀡𑀺𑀢𑁄, 𑀲𑀫𑁆𑀪𑀸𑀯𑀺𑀢𑁄 𑀘 𑀯𑀺𑀜𑁆𑀜𑀽𑀦𑀁 𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀁. 𑀧𑀳𑁄𑀢𑀺 𑀘𑀸𑀬𑀲𑁆𑀫𑀸 𑀫𑀳𑀸𑀓𑀘𑁆𑀘𑀸𑀦𑁄 𑀇𑀫𑀲𑁆𑀲 𑀪𑀕𑀯𑀢𑀸 𑀲𑀁𑀔𑀺𑀢𑁆𑀢𑁂𑀦 𑀉𑀤𑁆𑀤𑁂𑀲𑀲𑁆𑀲 𑀉𑀤𑁆𑀤𑀺𑀝𑁆𑀞𑀲𑁆𑀲 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑀁 𑀅𑀯𑀺𑀪𑀢𑁆𑀢𑀲𑁆𑀲 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑀁 𑀯𑀺𑀪𑀚𑀺𑀢𑀼𑀁. 𑀬𑀁𑀦𑀽𑀦 𑀫𑀬𑀁 𑀬𑁂𑀦𑀸𑀬𑀲𑁆𑀫𑀸 𑀫𑀳𑀸𑀓𑀘𑁆𑀘𑀸𑀦𑁄 𑀢𑁂𑀦𑀼𑀧𑀲𑀗𑁆𑀓𑀫𑁂𑀬𑁆𑀬𑀸𑀫; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀫𑀳𑀸𑀓𑀘𑁆𑀘𑀸𑀦𑀁 𑀏𑀢𑀫𑀢𑁆𑀣𑀁 𑀧𑀼𑀘𑁆𑀙𑁂𑀬𑁆𑀬𑀸𑀫. 𑀬𑀣𑀸 𑀦𑁄 𑀆𑀬𑀲𑁆𑀫𑀸 𑀫𑀳𑀸𑀓𑀘𑁆𑀘𑀸𑀦𑁄 𑀩𑁆𑀬𑀸𑀓𑀭𑀺𑀲𑁆𑀲𑀢𑀺 𑀢𑀣𑀸 𑀦𑀁 𑀥𑀸𑀭𑁂𑀲𑁆𑀲𑀸𑀫𑀸’’𑀢𑀺.

𑀅𑀣 𑀔𑁄 𑀢𑁂 𑀪𑀺𑀓𑁆𑀔𑀽 𑀬𑁂𑀦𑀸𑀬𑀲𑁆𑀫𑀸 𑀫𑀳𑀸𑀓𑀘𑁆𑀘𑀸𑀦𑁄 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀢𑀸 𑀫𑀳𑀸𑀓𑀘𑁆𑀘𑀸𑀦𑁂𑀦 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺𑀁𑀲𑀼. 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀲𑀸𑀭𑀡𑀻𑀬𑀁 𑀯𑀻𑀢𑀺𑀲𑀸𑀭𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀸 𑀔𑁄 𑀢𑁂 𑀪𑀺𑀓𑁆𑀔𑀽 𑀆𑀬𑀲𑁆𑀫𑀦𑁆𑀢𑀁 𑀫𑀳𑀸𑀓𑀘𑁆𑀘𑀸𑀦𑀁 𑀏𑀢𑀤𑀯𑁄𑀘𑀼𑀁 𑁋

‘‘𑀇𑀤𑀁 𑀔𑁄 𑀦𑁄, 𑀆𑀯𑀼𑀲𑁄 𑀓𑀘𑁆𑀘𑀸𑀦, 𑀪𑀕𑀯𑀸 𑀲𑀁𑀔𑀺𑀢𑁆𑀢𑁂𑀦 𑀉𑀤𑁆𑀤𑁂𑀲𑀁 𑀉𑀤𑁆𑀤𑀺𑀲𑀺𑀢𑁆𑀯𑀸 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑀁 𑀅𑀯𑀺𑀪𑀚𑀺𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀯𑀺𑀳𑀸𑀭𑀁 𑀧𑀯𑀺𑀝𑁆𑀞𑁄 𑁋 ‘𑀅𑀥𑀫𑁆𑀫𑁄 𑀘, 𑀪𑀺𑀓𑁆𑀔𑀯𑁂, 𑀯𑁂𑀤𑀺𑀢𑀩𑁆𑀩𑁄 𑀥𑀫𑁆𑀫𑁄 𑀘; 𑀅𑀦𑀢𑁆𑀣𑁄 𑀘 𑀯𑁂𑀤𑀺𑀢𑀩𑁆𑀩𑁄 𑀅𑀢𑁆𑀣𑁄 𑀘. 𑀅𑀥𑀫𑁆𑀫𑀜𑁆𑀘 𑀯𑀺𑀤𑀺𑀢𑁆𑀯𑀸 𑀥𑀫𑁆𑀫𑀜𑁆𑀘, 𑀅𑀦𑀢𑁆𑀣𑀜𑁆𑀘 𑀯𑀺𑀤𑀺𑀢𑁆𑀯𑀸 𑀅𑀢𑁆𑀣𑀜𑁆𑀘 𑀬𑀣𑀸 𑀥𑀫𑁆𑀫𑁄 𑀬𑀣𑀸 𑀅𑀢𑁆𑀣𑁄 𑀢𑀣𑀸 𑀧𑀝𑀺𑀧𑀚𑁆𑀚𑀺𑀢𑀩𑁆𑀩’𑀦𑁆𑀢𑀺.

‘‘𑀢𑁂𑀲𑀁 𑀦𑁄, 𑀆𑀯𑀼𑀲𑁄, 𑀅𑀫𑁆𑀳𑀸𑀓𑀁 𑀅𑀘𑀺𑀭𑀧𑀓𑁆𑀓𑀦𑁆𑀢𑀲𑁆𑀲 𑀪𑀕𑀯𑀢𑁄 𑀏𑀢𑀤𑀳𑁄𑀲𑀺 𑁋 ‘𑀇𑀤𑀁 𑀔𑁄 𑀦𑁄, 𑀆𑀯𑀼𑀲𑁄, 𑀪𑀕𑀯𑀸 𑀲𑀁𑀔𑀺𑀢𑁆𑀢𑁂𑀦 𑀉𑀤𑁆𑀤𑁂𑀲𑀁 𑀉𑀤𑁆𑀤𑀺𑀲𑀺𑀢𑁆𑀯𑀸 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑀁 𑀅𑀯𑀺𑀪𑀚𑀺𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀯𑀺𑀳𑀸𑀭𑀁 𑀧𑀯𑀺𑀝𑁆𑀞𑁄 𑁋 𑀅𑀥𑀫𑁆𑀫𑁄 𑀘, 𑀪𑀺𑀓𑁆𑀔𑀯𑁂…𑀧𑁂… 𑀢𑀣𑀸 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀦𑁆𑀢𑀺. 𑀓𑁄 𑀦𑀼 𑀔𑁄 𑀇𑀫𑀲𑁆𑀲 𑀪𑀕𑀯𑀢𑀸 𑀲𑀁𑀔𑀺𑀢𑁆𑀢𑁂𑀦 𑀉𑀤𑁆𑀤𑁂𑀲𑀲𑁆𑀲 𑀉𑀤𑁆𑀤𑀺𑀝𑁆𑀞𑀲𑁆𑀲 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑀁 𑀅𑀯𑀺𑀪𑀢𑁆𑀢𑀲𑁆𑀲 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑀁 𑀯𑀺𑀪𑀚𑁂𑀬𑁆𑀬𑀸’𑀢𑀺?

‘‘𑀢𑁂𑀲𑀁 𑀦𑁄, 𑀆𑀯𑀼𑀲𑁄, 𑀅𑀫𑁆𑀳𑀸𑀓𑀁 𑀏𑀢𑀤𑀳𑁄𑀲𑀺 𑁋 ‘𑀅𑀬𑀁 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀓𑀘𑁆𑀘𑀸𑀦𑁄 𑀲𑀢𑁆𑀣𑀼 𑀘𑁂𑀯 𑀲𑀁𑀯𑀡𑁆𑀡𑀺𑀢𑁄, 𑀲𑀫𑁆𑀪𑀸𑀯𑀺𑀢𑁄 𑀘 𑀯𑀺𑀜𑁆𑀜𑀽𑀦𑀁 𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀁. 𑀧𑀳𑁄𑀢𑀺 𑀘𑀸𑀬𑀲𑁆𑀫𑀸 𑀫𑀳𑀸𑀓𑀘𑁆𑀘𑀸𑀦𑁄 𑀇𑀫𑀲𑁆𑀲 𑀪𑀕𑀯𑀢𑀸 𑀲𑀁𑀔𑀺𑀢𑁆𑀢𑁂𑀦 𑀉𑀤𑁆𑀤𑁂𑀲𑀲𑁆𑀲 𑀉𑀤𑁆𑀤𑀺𑀝𑁆𑀞𑀲𑁆𑀲 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑀁 𑀅𑀯𑀺𑀪𑀢𑁆𑀢𑀲𑁆𑀲 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑀁 𑀯𑀺𑀪𑀚𑀺𑀢𑀼𑀁. 𑀬𑀁𑀦𑀽𑀦 𑀫𑀬𑀁 𑀬𑁂𑀦𑀸𑀬𑀲𑁆𑀫𑀸 𑀫𑀳𑀸𑀓𑀘𑁆𑀘𑀸𑀦𑁄 𑀢𑁂𑀦𑀼𑀧𑀲𑀗𑁆𑀓𑀫𑁂𑀬𑁆𑀬𑀸𑀫; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀫𑀳𑀸𑀓𑀘𑁆𑀘𑀸𑀦𑀁 𑀏𑀢𑀫𑀢𑁆𑀣𑀁 𑀧𑀝𑀺𑀧𑀼𑀘𑁆𑀙𑁂𑀬𑁆𑀬𑀸𑀫. 𑀬𑀣𑀸 𑀦𑁄 𑀆𑀬𑀲𑁆𑀫𑀸 𑀫𑀳𑀸𑀓𑀘𑁆𑀘𑀸𑀦𑁄 𑀩𑁆𑀬𑀸𑀓𑀭𑀺𑀲𑁆𑀲𑀢𑀺 𑀢𑀣𑀸 𑀦𑀁 𑀥𑀸𑀭𑁂𑀲𑁆𑀲𑀸𑀫𑀸’𑀢𑀺. 𑀯𑀺𑀪𑀚𑀢𑀼 𑀆𑀬𑀲𑁆𑀫𑀸 𑀫𑀳𑀸𑀓𑀘𑁆𑀘𑀸𑀦𑁄’’𑀢𑀺.

‘‘𑀲𑁂𑀬𑁆𑀬𑀣𑀸𑀧𑀺, 𑀆𑀯𑀼𑀲𑁄, 𑀧𑀼𑀭𑀺𑀲𑁄 𑀲𑀸𑀭𑀢𑁆𑀣𑀺𑀓𑁄 𑀲𑀸𑀭𑀁 𑀕𑀯𑁂𑀲𑀻 𑀲𑀸𑀭𑀧𑀭𑀺𑀬𑁂𑀲𑀦𑀁 𑀘𑀭𑀫𑀸𑀦𑁄 𑀫𑀳𑀢𑁄 𑀭𑀼𑀓𑁆𑀔𑀲𑁆𑀲 𑀢𑀺𑀝𑁆𑀞𑀢𑁄 𑀲𑀸𑀭𑀯𑀢𑁄 𑀅𑀢𑀺𑀓𑁆𑀓𑀫𑁆𑀫𑁂𑀯 𑀫𑀽𑀮𑀁 𑀅𑀢𑀺𑀓𑁆𑀓𑀫𑁆𑀫 𑀔𑀦𑁆𑀥𑀁 𑀲𑀸𑀔𑀸𑀧𑀮𑀸𑀲𑁂 𑀲𑀸𑀭𑀁 𑀧𑀭𑀺𑀬𑁂𑀲𑀺𑀢𑀩𑁆𑀩𑀁 𑀫𑀜𑁆𑀜𑁂𑀬𑁆𑀬. 𑀏𑀯𑀁𑀲𑀫𑁆𑀧𑀤𑀫𑀺𑀤𑀁 𑀆𑀬𑀲𑁆𑀫𑀦𑁆𑀢𑀸𑀦𑀁 𑀲𑀢𑁆𑀣𑀭𑀺 𑀲𑀫𑁆𑀫𑀼𑀔𑀻𑀪𑀽𑀢𑁂 𑀢𑀁 𑀪𑀕𑀯𑀦𑁆𑀢𑀁 𑀅𑀢𑀺𑀲𑀺𑀢𑁆𑀯𑀸 𑀅𑀫𑁆𑀳𑁂 𑀏𑀢𑀫𑀢𑁆𑀣𑀁 𑀧𑀝𑀺𑀧𑀼𑀘𑁆𑀙𑀺𑀢𑀩𑁆𑀩𑀁 𑀫𑀜𑁆𑀜𑀣 [𑀫𑀜𑁆𑀜𑁂𑀣 (𑀲𑀻.), 𑀫𑀜𑁆𑀜𑁂𑀬𑁆𑀬𑀸𑀣 (𑀓.)]. 𑀲𑁄 𑀳𑀸𑀯𑀼𑀲𑁄, 𑀪𑀕𑀯𑀸 𑀚𑀸𑀦𑀁 𑀚𑀸𑀦𑀸𑀢𑀺 𑀧𑀲𑁆𑀲𑀁 𑀧𑀲𑁆𑀲𑀢𑀺 𑀘𑀓𑁆𑀔𑀼𑀪𑀽𑀢𑁄 𑀜𑀸𑀡𑀪𑀽𑀢𑁄 𑀥𑀫𑁆𑀫𑀪𑀽𑀢𑁄 𑀩𑁆𑀭𑀳𑁆𑀫𑀪𑀽𑀢𑁄 𑀯𑀢𑁆𑀢𑀸 𑀧𑀯𑀢𑁆𑀢𑀸 𑀅𑀢𑁆𑀣𑀲𑁆𑀲 𑀦𑀺𑀦𑁆𑀦𑁂𑀢𑀸 𑀅𑀫𑀢𑀲𑁆𑀲 𑀤𑀸𑀢𑀸 𑀥𑀫𑁆𑀫𑀲𑁆𑀲𑀸𑀫𑀻 𑀢𑀣𑀸𑀕𑀢𑁄. 𑀲𑁄 𑀘𑁂𑀯 𑀧𑀦𑁂𑀢𑀲𑁆𑀲 𑀓𑀸𑀮𑁄 𑀅𑀳𑁄𑀲𑀺 𑀬𑀁 𑀢𑀼𑀫𑁆𑀳𑁂 𑀪𑀕𑀯𑀦𑁆𑀢𑀁𑀬𑁂𑀯 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀢𑀫𑀢𑁆𑀣𑀁 𑀧𑀝𑀺𑀧𑀼𑀘𑁆𑀙𑁂𑀬𑁆𑀬𑀸𑀣. 𑀬𑀣𑀸 𑀯𑁄 𑀪𑀕𑀯𑀸 𑀩𑁆𑀬𑀸𑀓𑀭𑁂𑀬𑁆𑀬 𑀢𑀣𑀸 𑀦𑀁 𑀥𑀸𑀭𑁂𑀬𑁆𑀬𑀸𑀣𑀸’’𑀢𑀺.

‘‘𑀅𑀤𑁆𑀥𑀸, 𑀆𑀯𑀼𑀲𑁄 𑀓𑀘𑁆𑀘𑀸𑀦, 𑀪𑀕𑀯𑀸 𑀚𑀸𑀦𑀁 𑀚𑀸𑀦𑀸𑀢𑀺 𑀧𑀲𑁆𑀲𑀁 𑀧𑀲𑁆𑀲𑀢𑀺 𑀘𑀓𑁆𑀔𑀼𑀪𑀽𑀢𑁄 𑀜𑀸𑀡𑀪𑀽𑀢𑁄 𑀥𑀫𑁆𑀫𑀪𑀽𑀢𑁄 𑀩𑁆𑀭𑀳𑁆𑀫𑀪𑀽𑀢𑁄 𑀯𑀢𑁆𑀢𑀸 𑀧𑀯𑀢𑁆𑀢𑀸 𑀅𑀢𑁆𑀣𑀲𑁆𑀲 𑀦𑀺𑀦𑁆𑀦𑁂𑀢𑀸 𑀅𑀫𑀢𑀲𑁆𑀲 𑀤𑀸𑀢𑀸 𑀥𑀫𑁆𑀫𑀲𑁆𑀲𑀸𑀫𑀻 𑀢𑀣𑀸𑀕𑀢𑁄. 𑀲𑁄 𑀘𑁂𑀯 𑀧𑀦𑁂𑀢𑀲𑁆𑀲 𑀓𑀸𑀮𑁄 𑀅𑀳𑁄𑀲𑀺 𑀬𑀁 𑀫𑀬𑀁 𑀪𑀕𑀯𑀦𑁆𑀢𑀁𑀬𑁂𑀯 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀢𑀫𑀢𑁆𑀣𑀁 𑀧𑀝𑀺𑀧𑀼𑀘𑁆𑀙𑁂𑀬𑁆𑀬𑀸𑀫. 𑀬𑀣𑀸 𑀦𑁄 𑀪𑀕𑀯𑀸 𑀩𑁆𑀬𑀸𑀓𑀭𑁂𑀬𑁆𑀬 𑀢𑀣𑀸 𑀦𑀁 𑀥𑀸𑀭𑁂𑀬𑁆𑀬𑀸𑀫. 𑀅𑀧𑀺 𑀘𑀸𑀬𑀲𑁆𑀫𑀸 𑀫𑀳𑀸𑀓𑀘𑁆𑀘𑀸𑀦𑁄 𑀲𑀢𑁆𑀣𑀼 𑀘𑁂𑀯 𑀲𑀁𑀯𑀡𑁆𑀡𑀺𑀢𑁄, 𑀲𑀫𑁆𑀪𑀸𑀯𑀺𑀢𑁄 𑀘 𑀯𑀺𑀜𑁆𑀜𑀽𑀦𑀁 𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀁. 𑀧𑀳𑁄𑀢𑀺 𑀘𑀸𑀬𑀲𑁆𑀫𑀸 𑀫𑀳𑀸𑀓𑀘𑁆𑀘𑀸𑀦𑁄 𑀇𑀫𑀲𑁆𑀲 𑀪𑀕𑀯𑀢𑀸 𑀲𑀁𑀔𑀺𑀢𑁆𑀢𑁂𑀦 𑀉𑀤𑁆𑀤𑁂𑀲𑀲𑁆𑀲 𑀉𑀤𑁆𑀤𑀺𑀝𑁆𑀞𑀲𑁆𑀲 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑀁 𑀅𑀯𑀺𑀪𑀢𑁆𑀢𑀲𑁆𑀲 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑀁 𑀯𑀺𑀪𑀚𑀺𑀢𑀼𑀁. 𑀯𑀺𑀪𑀚𑀢𑀸𑀬𑀲𑁆𑀫𑀸 𑀫𑀳𑀸𑀓𑀘𑁆𑀘𑀸𑀦𑁄 𑀅𑀕𑀭𑀼𑀁 𑀓𑀭𑀺𑀢𑁆𑀯𑀸’’𑀢𑀺.

‘‘𑀢𑁂𑀦 𑀳𑀸𑀯𑀼𑀲𑁄, 𑀲𑀼𑀡𑀸𑀣, 𑀲𑀸𑀥𑀼𑀓𑀁 𑀫𑀦𑀲𑀺 𑀓𑀭𑁄𑀣; 𑀪𑀸𑀲𑀺𑀲𑁆𑀲𑀸𑀫𑀻’’𑀢𑀺. ‘‘𑀏𑀯𑀁, 𑀆𑀯𑀼𑀲𑁄’’𑀢𑀺 𑀔𑁄 𑀢𑁂 𑀪𑀺𑀓𑁆𑀔𑀽 𑀆𑀬𑀲𑁆𑀫𑀢𑁄 𑀫𑀳𑀸𑀓𑀘𑁆𑀘𑀸𑀦𑀲𑁆𑀲 𑀧𑀘𑁆𑀘𑀲𑁆𑀲𑁄𑀲𑀼𑀁. 𑀅𑀣𑀸𑀬𑀲𑁆𑀫𑀸 𑀫𑀳𑀸𑀓𑀘𑁆𑀘𑀸𑀦𑁄 𑀏𑀢𑀤𑀯𑁄𑀘 𑁋

‘‘𑀬𑀁 𑀔𑁄 𑀦𑁄, 𑀆𑀯𑀼𑀲𑁄, 𑀪𑀕𑀯𑀸 𑀲𑀁𑀔𑀺𑀢𑁆𑀢𑁂𑀦 𑀉𑀤𑁆𑀤𑁂𑀲𑀁 𑀉𑀤𑁆𑀤𑀺𑀲𑀺𑀢𑁆𑀯𑀸 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑀁 𑀅𑀯𑀺𑀪𑀚𑀺𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀯𑀺𑀳𑀸𑀭𑀁 𑀧𑀯𑀺𑀝𑁆𑀞𑁄 𑁋 ‘𑀅𑀥𑀫𑁆𑀫𑁄 𑀘, 𑀪𑀺𑀓𑁆𑀔𑀯𑁂, 𑀯𑁂𑀤𑀺𑀢𑀩𑁆𑀩𑁄…𑀧𑁂… 𑀢𑀣𑀸 𑀧𑀝𑀺𑀧𑀚𑁆𑀚𑀺𑀢𑀩𑁆𑀩’𑀦𑁆𑀢𑀺.

‘‘𑀓𑀢𑀫𑁄, 𑀘𑀸𑀯𑀼𑀲𑁄, 𑀅𑀥𑀫𑁆𑀫𑁄; 𑀓𑀢𑀫𑁄 𑀘 𑀥𑀫𑁆𑀫𑁄? 𑀓𑀢𑀫𑁄 𑀘 𑀅𑀦𑀢𑁆𑀣𑁄, 𑀓𑀢𑀫𑁄 𑀘 𑀅𑀢𑁆𑀣𑁄? ‘‘𑀧𑀸𑀡𑀸𑀢𑀺𑀧𑀸𑀢𑁄, 𑀆𑀯𑀼𑀲𑁄, 𑀅𑀥𑀫𑁆𑀫𑁄; 𑀧𑀸𑀡𑀸𑀢𑀺𑀧𑀸𑀢𑀸 𑀯𑁂𑀭𑀫𑀡𑀻 𑀥𑀫𑁆𑀫𑁄; 𑀬𑁂 𑀘 𑀧𑀸𑀡𑀸𑀢𑀺𑀧𑀸𑀢𑀧𑀘𑁆𑀘𑀬𑀸 𑀅𑀦𑁂𑀓𑁂 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀲𑀫𑁆𑀪𑀯𑀦𑁆𑀢𑀺, 𑀅𑀬𑀁 𑀅𑀦𑀢𑁆𑀣𑁄; 𑀧𑀸𑀡𑀸𑀢𑀺𑀧𑀸𑀢𑀸 𑀯𑁂𑀭𑀫𑀡𑀺𑀧𑀘𑁆𑀘𑀬𑀸 𑀘 𑀅𑀦𑁂𑀓𑁂 𑀓𑀼𑀲𑀮𑀸 𑀥𑀫𑁆𑀫𑀸 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀦𑁆𑀢𑀺, 𑀅𑀬𑀁 𑀅𑀢𑁆𑀣𑁄.

‘‘𑀅𑀤𑀺𑀦𑁆𑀦𑀸𑀤𑀸𑀦𑀁, 𑀆𑀯𑀼𑀲𑁄, 𑀅𑀥𑀫𑁆𑀫𑁄; 𑀅𑀤𑀺𑀦𑁆𑀦𑀸𑀤𑀸𑀦𑀸 𑀯𑁂𑀭𑀫𑀡𑀻 𑀥𑀫𑁆𑀫𑁄; 𑀬𑁂 𑀘 𑀅𑀤𑀺𑀦𑁆𑀦𑀸𑀤𑀸𑀦𑀧𑀘𑁆𑀘𑀬𑀸 𑀅𑀦𑁂𑀓𑁂 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀲𑀫𑁆𑀪𑀯𑀦𑁆𑀢𑀺, 𑀅𑀬𑀁 𑀅𑀦𑀢𑁆𑀣𑁄; 𑀅𑀤𑀺𑀦𑁆𑀦𑀸𑀤𑀸𑀦𑀸 𑀯𑁂𑀭𑀫𑀡𑀺𑀧𑀘𑁆𑀘𑀬𑀸 𑀘 𑀅𑀦𑁂𑀓𑁂 𑀓𑀼𑀲𑀮𑀸 𑀥𑀫𑁆𑀫𑀸 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀦𑁆𑀢𑀺, 𑀅𑀬𑀁 𑀅𑀢𑁆𑀣𑁄.

‘‘𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑁄, 𑀆𑀯𑀼𑀲𑁄, 𑀅𑀥𑀫𑁆𑀫𑁄; 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀸 𑀯𑁂𑀭𑀫𑀡𑀻 𑀥𑀫𑁆𑀫𑁄; 𑀬𑁂 𑀘 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀧𑀘𑁆𑀘𑀬𑀸 𑀅𑀦𑁂𑀓𑁂 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀲𑀫𑁆𑀪𑀯𑀦𑁆𑀢𑀺, 𑀅𑀬𑀁 𑀅𑀦𑀢𑁆𑀣𑁄; 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀸 𑀯𑁂𑀭𑀫𑀡𑀺𑀧𑀘𑁆𑀘𑀬𑀸 𑀘 𑀅𑀦𑁂𑀓𑁂 𑀓𑀼𑀲𑀮𑀸 𑀥𑀫𑁆𑀫𑀸 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀦𑁆𑀢𑀺, 𑀅𑀬𑀁 𑀅𑀢𑁆𑀣𑁄.

‘‘𑀫𑀼𑀲𑀸𑀯𑀸𑀤𑁄, 𑀆𑀯𑀼𑀲𑁄, 𑀅𑀥𑀫𑁆𑀫𑁄; 𑀫𑀼𑀲𑀸𑀯𑀸𑀤𑀸 𑀯𑁂𑀭𑀫𑀡𑀻 𑀥𑀫𑁆𑀫𑁄; 𑀬𑁂 𑀘 𑀫𑀼𑀲𑀸𑀯𑀸𑀤𑀧𑀘𑁆𑀘𑀬𑀸 𑀅𑀦𑁂𑀓𑁂 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀲𑀫𑁆𑀪𑀯𑀦𑁆𑀢𑀺, 𑀅𑀬𑀁 𑀅𑀦𑀢𑁆𑀣𑁄; 𑀫𑀼𑀲𑀸𑀯𑀸𑀤𑀸 𑀯𑁂𑀭𑀫𑀡𑀺𑀧𑀘𑁆𑀘𑀬𑀸 𑀘 𑀅𑀦𑁂𑀓𑁂 𑀓𑀼𑀲𑀮𑀸 𑀥𑀫𑁆𑀫𑀸 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀦𑁆𑀢𑀺, 𑀅𑀬𑀁 𑀅𑀢𑁆𑀣𑁄.

‘‘𑀧𑀺𑀲𑀼𑀡𑀸 𑀯𑀸𑀘𑀸, 𑀆𑀯𑀼𑀲𑁄, 𑀅𑀥𑀫𑁆𑀫𑁄; 𑀧𑀺𑀲𑀼𑀡𑀸𑀬 𑀯𑀸𑀘𑀸𑀬 𑀯𑁂𑀭𑀫𑀡𑀻 𑀥𑀫𑁆𑀫𑁄; 𑀬𑁂 𑀘 𑀧𑀺𑀲𑀼𑀡𑀸𑀯𑀸𑀘𑀸𑀧𑀘𑁆𑀘𑀬𑀸 𑀅𑀦𑁂𑀓𑁂 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀲𑀫𑁆𑀪𑀯𑀦𑁆𑀢𑀺, 𑀅𑀬𑀁 𑀅𑀦𑀢𑁆𑀣𑁄; 𑀧𑀺𑀲𑀼𑀡𑀸𑀬 𑀯𑀸𑀘𑀸𑀬 𑀯𑁂𑀭𑀫𑀡𑀺𑀧𑀘𑁆𑀘𑀬𑀸 𑀘 𑀅𑀦𑁂𑀓𑁂 𑀓𑀼𑀲𑀮𑀸 𑀥𑀫𑁆𑀫𑀸 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀦𑁆𑀢𑀺, 𑀅𑀬𑀁 𑀅𑀢𑁆𑀣𑁄.

‘‘𑀨𑀭𑀼𑀲𑀸 𑀯𑀸𑀘𑀸, 𑀆𑀯𑀼𑀲𑁄, 𑀅𑀥𑀫𑁆𑀫𑁄; 𑀨𑀭𑀼𑀲𑀸𑀬 𑀯𑀸𑀘𑀸𑀬 𑀯𑁂𑀭𑀫𑀡𑀻 𑀥𑀫𑁆𑀫𑁄; 𑀬𑁂 𑀘 𑀨𑀭𑀼𑀲𑀸𑀯𑀸𑀘𑀸𑀧𑀘𑁆𑀘𑀬𑀸 𑀅𑀦𑁂𑀓𑁂 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀲𑀫𑁆𑀪𑀯𑀦𑁆𑀢𑀺, 𑀅𑀬𑀁 𑀅𑀦𑀢𑁆𑀣𑁄; 𑀨𑀭𑀼𑀲𑀸𑀬 𑀯𑀸𑀘𑀸𑀬 𑀯𑁂𑀭𑀫𑀡𑀺𑀧𑀘𑁆𑀘𑀬𑀸 𑀘 𑀅𑀦𑁂𑀓𑁂 𑀓𑀼𑀲𑀮𑀸 𑀥𑀫𑁆𑀫𑀸 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀦𑁆𑀢𑀺, 𑀅𑀬𑀁 𑀅𑀢𑁆𑀣𑁄.

‘‘𑀲𑀫𑁆𑀨𑀧𑁆𑀧𑀮𑀸𑀧𑁄, 𑀆𑀯𑀼𑀲𑁄, 𑀅𑀥𑀫𑁆𑀫𑁄; 𑀲𑀫𑁆𑀨𑀧𑁆𑀧𑀮𑀸𑀧𑀸 𑀯𑁂𑀭𑀫𑀡𑀻 𑀥𑀫𑁆𑀫𑁄; 𑀬𑁂 𑀘 𑀲𑀫𑁆𑀨𑀧𑁆𑀧𑀮𑀸𑀧𑀧𑀘𑁆𑀘𑀬𑀸 𑀅𑀦𑁂𑀓𑁂 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀲𑀫𑁆𑀪𑀯𑀦𑁆𑀢𑀺, 𑀅𑀬𑀁 𑀅𑀦𑀢𑁆𑀣𑁄; 𑀲𑀫𑁆𑀨𑀧𑁆𑀧𑀮𑀸𑀧𑀸 𑀯𑁂𑀭𑀫𑀡𑀺𑀧𑀘𑁆𑀘𑀬𑀸 𑀘 𑀅𑀦𑁂𑀓𑁂 𑀓𑀼𑀲𑀮𑀸 𑀥𑀫𑁆𑀫𑀸 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀦𑁆𑀢𑀺, 𑀅𑀬𑀁 𑀅𑀢𑁆𑀣𑁄.

‘‘𑀅𑀪𑀺𑀚𑁆𑀛𑀸, 𑀆𑀯𑀼𑀲𑁄, 𑀅𑀥𑀫𑁆𑀫𑁄; 𑀅𑀦𑀪𑀺𑀚𑁆𑀛𑀸 𑀥𑀫𑁆𑀫𑁄; 𑀬𑁂 𑀘 𑀅𑀪𑀺𑀚𑁆𑀛𑀸𑀧𑀘𑁆𑀘𑀬𑀸 𑀅𑀦𑁂𑀓𑁂 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀲𑀫𑁆𑀪𑀯𑀦𑁆𑀢𑀺, 𑀅𑀬𑀁 𑀅𑀦𑀢𑁆𑀣𑁄; 𑀅𑀦𑀪𑀺𑀚𑁆𑀛𑀸𑀧𑀘𑁆𑀘𑀬𑀸 𑀘 𑀅𑀦𑁂𑀓𑁂 𑀓𑀼𑀲𑀮𑀸 𑀥𑀫𑁆𑀫𑀸 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀦𑁆𑀢𑀺, 𑀅𑀬𑀁 𑀅𑀢𑁆𑀣𑁄.

‘‘𑀩𑁆𑀬𑀸𑀧𑀸𑀤𑁄, 𑀆𑀯𑀼𑀲𑁄, 𑀅𑀥𑀫𑁆𑀫𑁄; 𑀅𑀩𑁆𑀬𑀸𑀧𑀸𑀤𑁄 𑀥𑀫𑁆𑀫𑁄; 𑀬𑁂 𑀘 𑀩𑁆𑀬𑀸𑀧𑀸𑀤𑀧𑀘𑁆𑀘𑀬𑀸 𑀅𑀦𑁂𑀓𑁂 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀲𑀫𑁆𑀪𑀯𑀦𑁆𑀢𑀺, 𑀅𑀬𑀁 𑀅𑀦𑀢𑁆𑀣𑁄; 𑀅𑀩𑁆𑀬𑀸𑀧𑀸𑀤𑀧𑀘𑁆𑀘𑀬𑀸 𑀘 𑀅𑀦𑁂𑀓𑁂 𑀓𑀼𑀲𑀮𑀸 𑀥𑀫𑁆𑀫𑀸 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀦𑁆𑀢𑀺, 𑀅𑀬𑀁 𑀅𑀢𑁆𑀣𑁄.

‘‘𑀫𑀺𑀘𑁆𑀙𑀸𑀤𑀺𑀝𑁆𑀞𑀺, 𑀆𑀯𑀼𑀲𑁄, 𑀅𑀥𑀫𑁆𑀫𑁄; 𑀲𑀫𑁆𑀫𑀸𑀤𑀺𑀝𑁆𑀞𑀺 𑀥𑀫𑁆𑀫𑁄; 𑀬𑁂 𑀘 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀧𑀘𑁆𑀘𑀬𑀸 𑀅𑀦𑁂𑀓𑁂 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀲𑀫𑁆𑀪𑀯𑀦𑁆𑀢𑀺, 𑀅𑀬𑀁 𑀅𑀦𑀢𑁆𑀣𑁄; 𑀲𑀫𑁆𑀫𑀸𑀤𑀺𑀝𑁆𑀞𑀺𑀧𑀘𑁆𑀘𑀬𑀸 𑀘 𑀅𑀦𑁂𑀓𑁂 𑀓𑀼𑀲𑀮𑀸 𑀥𑀫𑁆𑀫𑀸 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀦𑁆𑀢𑀺, 𑀅𑀬𑀁 𑀅𑀢𑁆𑀣𑁄.

‘‘‘𑀬𑀁 𑀔𑁄 𑀦𑁄, 𑀆𑀯𑀼𑀲𑁄, 𑀪𑀕𑀯𑀸 𑀲𑀁𑀔𑀺𑀢𑁆𑀢𑁂𑀦 𑀉𑀤𑁆𑀤𑁂𑀲𑀁 𑀉𑀤𑁆𑀤𑀺𑀲𑀺𑀢𑁆𑀯𑀸 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑀁 𑀅𑀯𑀺𑀪𑀚𑀺𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀯𑀺𑀳𑀸𑀭𑀁 𑀧𑀯𑀺𑀝𑁆𑀞𑁄 𑁋 𑀅𑀥𑀫𑁆𑀫𑁄 𑀘, 𑀪𑀺𑀓𑁆𑀔𑀯𑁂, 𑀯𑁂𑀤𑀺𑀢𑀩𑁆𑀩𑁄…𑀧𑁂… 𑀢𑀣𑀸 𑀧𑀝𑀺𑀧𑀚𑁆𑀚𑀺𑀢𑀩𑁆𑀩’𑀦𑁆𑀢𑀺. 𑀇𑀫𑀲𑁆𑀲 𑀔𑁄 𑀅𑀳𑀁, 𑀆𑀯𑀼𑀲𑁄, 𑀪𑀕𑀯𑀢𑀸 𑀲𑀁𑀔𑀺𑀢𑁆𑀢𑁂𑀦 𑀉𑀤𑁆𑀤𑁂𑀲𑀲𑁆𑀲 𑀉𑀤𑁆𑀤𑀺𑀝𑁆𑀞𑀲𑁆𑀲 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑀁 𑀅𑀯𑀺𑀪𑀢𑁆𑀢𑀲𑁆𑀲 𑀏𑀯𑀁 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑀁 𑀆𑀚𑀸𑀦𑀸𑀫𑀺. 𑀆𑀓𑀗𑁆𑀔𑀫𑀸𑀦𑀸 𑀘 𑀧𑀦 𑀢𑀼𑀫𑁆𑀳𑁂, 𑀆𑀯𑀼𑀲𑁄, 𑀪𑀕𑀯𑀦𑁆𑀢𑀁𑀬𑁂𑀯 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀢𑀫𑀢𑁆𑀣𑀁 𑀧𑀝𑀺𑀧𑀼𑀘𑁆𑀙𑁂𑀬𑁆𑀬𑀸𑀣. 𑀬𑀣𑀸 𑀦𑁄 𑀪𑀕𑀯𑀸 𑀩𑁆𑀬𑀸𑀓𑀭𑁄𑀢𑀺 𑀢𑀣𑀸 𑀦𑀁 𑀥𑀸𑀭𑁂𑀬𑁆𑀬𑀸𑀣𑀸’’𑀢𑀺.

‘‘𑀏𑀯𑀫𑀸𑀯𑀼𑀲𑁄’’𑀢𑀺 𑀔𑁄 𑀢𑁂 𑀪𑀺𑀓𑁆𑀔𑀽 𑀆𑀬𑀲𑁆𑀫𑀢𑁄 𑀫𑀳𑀸𑀓𑀘𑁆𑀘𑀸𑀦𑀲𑁆𑀲 𑀪𑀸𑀲𑀺𑀢𑀁 𑀅𑀪𑀺𑀦𑀦𑁆𑀤𑀺𑀢𑁆𑀯𑀸 𑀅𑀦𑀼𑀫𑁄𑀤𑀺𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀸 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘𑀼𑀁 𑁋

‘‘𑀬𑀁 𑀔𑁄 𑀦𑁄, 𑀪𑀦𑁆𑀢𑁂, 𑀪𑀕𑀯𑀸 𑀲𑀁𑀔𑀺𑀢𑁆𑀢𑁂𑀦 𑀉𑀤𑁆𑀤𑁂𑀲𑀁 𑀉𑀤𑁆𑀤𑀺𑀲𑀺𑀢𑁆𑀯𑀸 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑀁 𑀅𑀯𑀺𑀪𑀚𑀺𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀯𑀺𑀳𑀸𑀭𑀁 𑀧𑀯𑀺𑀝𑁆𑀞𑁄 𑁋 ‘𑀅𑀥𑀫𑁆𑀫𑁄 𑀘, 𑀪𑀺𑀓𑁆𑀔𑀯𑁂, 𑀯𑁂𑀤𑀺𑀢𑀩𑁆𑀩𑁄…𑀧𑁂… 𑀢𑀣𑀸 𑀧𑀝𑀺𑀧𑀚𑁆𑀚𑀺𑀢𑀩𑁆𑀩’𑀦𑁆𑀢𑀺.

‘‘𑀢𑁂𑀲𑀁 𑀦𑁄, 𑀪𑀦𑁆𑀢𑁂, 𑀅𑀫𑁆𑀳𑀸𑀓𑀁 𑀅𑀘𑀺𑀭𑀧𑀓𑁆𑀓𑀦𑁆𑀢𑀲𑁆𑀲 𑀪𑀕𑀯𑀢𑁄 𑀏𑀢𑀤𑀳𑁄𑀲𑀺 𑁋 ‘𑀇𑀤𑀁 𑀔𑁄 𑀦𑁄, 𑀆𑀯𑀼𑀲𑁄, 𑀪𑀕𑀯𑀸 𑀲𑀁𑀔𑀺𑀢𑁆𑀢𑁂𑀦 𑀉𑀤𑁆𑀤𑁂𑀲𑀁 𑀉𑀤𑁆𑀤𑀺𑀲𑀺𑀢𑁆𑀯𑀸 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑀁 𑀅𑀯𑀺𑀪𑀚𑀺𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀯𑀺𑀳𑀸𑀭𑀁 𑀧𑀯𑀺𑀝𑁆𑀞𑁄 𑁋 ‘𑀅𑀥𑀫𑁆𑀫𑁄 𑀘, 𑀪𑀺𑀓𑁆𑀔𑀯𑁂, 𑀯𑁂𑀤𑀺𑀢𑀩𑁆𑀩𑁄…𑀧𑁂… 𑀢𑀣𑀸 𑀧𑀝𑀺𑀧𑀚𑁆𑀚𑀺𑀢𑀩𑁆𑀩’𑀦𑁆𑀢𑀺. 𑀓𑁄 𑀦𑀼 𑀔𑁄 𑀇𑀫𑀲𑁆𑀲 𑀪𑀕𑀯𑀢𑀸 𑀲𑀁𑀔𑀺𑀢𑁆𑀢𑁂𑀦 𑀉𑀤𑁆𑀤𑁂𑀲𑀲𑁆𑀲 𑀉𑀤𑁆𑀤𑀺𑀝𑁆𑀞𑀲𑁆𑀲 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑀁 𑀅𑀯𑀺𑀪𑀢𑁆𑀢𑀲𑁆𑀲 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑀁 𑀯𑀺𑀪𑀚𑁂𑀬𑁆𑀬𑀸’𑀢𑀺?

‘‘𑀢𑁂𑀲𑀁 𑀦𑁄, 𑀪𑀦𑁆𑀢𑁂, 𑀅𑀫𑁆𑀳𑀸𑀓𑀁 𑀏𑀢𑀤𑀳𑁄𑀲𑀺 𑁋 ‘𑀅𑀬𑀁 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀓𑀘𑁆𑀘𑀸𑀦𑁄 𑀲𑀢𑁆𑀣𑀼 𑀘𑁂𑀯 𑀲𑀁𑀯𑀡𑁆𑀡𑀺𑀢𑁄, 𑀲𑀫𑁆𑀪𑀸𑀯𑀺𑀢𑁄 𑀘 𑀯𑀺𑀜𑁆𑀜𑀽𑀦𑀁 𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀁. 𑀧𑀳𑁄𑀢𑀺 𑀘𑀸𑀬𑀲𑁆𑀫𑀸 𑀫𑀳𑀸𑀓𑀘𑁆𑀘𑀸𑀦𑁄 𑀇𑀫𑀲𑁆𑀲 𑀪𑀕𑀯𑀢𑀸 𑀲𑀁𑀔𑀺𑀢𑁆𑀢𑁂𑀦 𑀉𑀤𑁆𑀤𑁂𑀲𑀲𑁆𑀲 𑀉𑀤𑁆𑀤𑀺𑀝𑁆𑀞𑀲𑁆𑀲 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑀁 𑀅𑀯𑀺𑀪𑀢𑁆𑀢𑀲𑁆𑀲 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑀁 𑀯𑀺𑀪𑀚𑀺𑀢𑀼𑀁. 𑀬𑀁𑀦𑀽𑀦 𑀫𑀬𑀁 𑀬𑁂𑀦𑀸𑀬𑀲𑁆𑀫𑀸 𑀫𑀳𑀸𑀓𑀘𑁆𑀘𑀸𑀦𑁄 𑀢𑁂𑀦𑀼𑀧𑀲𑀗𑁆𑀓𑀫𑁂𑀬𑁆𑀬𑀸𑀫; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀫𑀳𑀸𑀓𑀘𑁆𑀘𑀸𑀦𑀁 𑀏𑀢𑀫𑀢𑁆𑀣𑀁 𑀧𑀝𑀺𑀧𑀼𑀘𑁆𑀙𑁂𑀬𑁆𑀬𑀸𑀫. 𑀬𑀣𑀸 𑀦𑁄 𑀆𑀬𑀲𑁆𑀫𑀸 𑀫𑀳𑀸𑀓𑀘𑁆𑀘𑀸𑀦𑁄 𑀩𑁆𑀬𑀸𑀓𑀭𑀺𑀲𑁆𑀲𑀢𑀺 𑀢𑀣𑀸 𑀦𑀁 𑀥𑀸𑀭𑁂𑀲𑁆𑀲𑀸𑀫𑀸’𑀢𑀺.

‘‘𑀅𑀣 𑀔𑁄 𑀫𑀬𑀁, 𑀪𑀦𑁆𑀢𑁂, 𑀬𑁂𑀦𑀸𑀬𑀲𑁆𑀫𑀸 𑀫𑀳𑀸𑀓𑀘𑁆𑀘𑀸𑀦𑁄 𑀢𑁂𑀦𑀼𑀧𑀲𑀗𑁆𑀓𑀫𑀺𑀫𑁆𑀳𑀸; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀫𑀳𑀸𑀓𑀘𑁆𑀘𑀸𑀦𑀁 𑀏𑀢𑀫𑀢𑁆𑀣𑀁 𑀅𑀧𑀼𑀘𑁆𑀙𑀺𑀫𑁆𑀳𑀸. 𑀢𑁂𑀲𑀁 𑀦𑁄, 𑀪𑀦𑁆𑀢𑁂, 𑀆𑀬𑀲𑁆𑀫𑀢𑀸 𑀫𑀳𑀸𑀓𑀘𑁆𑀘𑀸𑀦𑁂𑀦 𑀇𑀫𑁂𑀳𑀺 𑀅𑀓𑁆𑀔𑀭𑁂𑀳𑀺 𑀇𑀫𑁂𑀳𑀺 𑀧𑀤𑁂𑀳𑀺 𑀇𑀫𑁂𑀳𑀺 𑀩𑁆𑀬𑀜𑁆𑀚𑀦𑁂𑀳𑀺 𑀅𑀢𑁆𑀣𑁄 𑀲𑀼𑀯𑀺𑀪𑀢𑁆𑀢𑁄’’𑀢𑀺.

‘‘𑀲𑀸𑀥𑀼 𑀲𑀸𑀥𑀼, 𑀪𑀺𑀓𑁆𑀔𑀯𑁂! 𑀧𑀡𑁆𑀟𑀺𑀢𑁄, 𑀪𑀺𑀓𑁆𑀔𑀯𑁂, 𑀫𑀳𑀸𑀓𑀘𑁆𑀘𑀸𑀦𑁄. 𑀫𑀳𑀸𑀧𑀜𑁆𑀜𑁄, 𑀪𑀺𑀓𑁆𑀔𑀯𑁂, 𑀫𑀳𑀸𑀓𑀘𑁆𑀘𑀸𑀦𑁄. 𑀫𑀁 𑀘𑁂𑀧𑀺 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀢𑀫𑀢𑁆𑀣𑀁 𑀧𑀝𑀺𑀧𑀼𑀘𑁆𑀙𑁂𑀬𑁆𑀬𑀸𑀣, 𑀅𑀳𑀫𑁆𑀧𑀺 𑀘𑁂𑀢𑀁 𑀏𑀯𑀫𑁂𑀯𑀁 𑀩𑁆𑀬𑀸𑀓𑀭𑁂𑀬𑁆𑀬𑀁 𑀬𑀣𑀸 𑀢𑀁 𑀫𑀳𑀸𑀓𑀘𑁆𑀘𑀸𑀦𑁂𑀦 𑀩𑁆𑀬𑀸𑀓𑀢𑀁. 𑀏𑀲𑁄 𑀘𑁂𑀯 𑀢𑀲𑁆𑀲 𑀅𑀢𑁆𑀣𑁄. 𑀏𑀯𑀜𑁆𑀘 𑀦𑀁 𑀥𑀸𑀭𑁂𑀬𑁆𑀬𑀸𑀣𑀸’’𑀢𑀺. 𑀙𑀝𑁆𑀞𑀁.

𑁭. 𑀢𑀢𑀺𑀬𑀅𑀥𑀫𑁆𑀫𑀲𑀼𑀢𑁆𑀢𑀁

𑁧𑁭𑁩. ‘‘𑀅𑀥𑀫𑁆𑀫𑁄 𑀘, 𑀪𑀺𑀓𑁆𑀔𑀯𑁂, 𑀯𑁂𑀤𑀺𑀢𑀩𑁆𑀩𑁄 𑀥𑀫𑁆𑀫𑁄 𑀘; 𑀅𑀦𑀢𑁆𑀣𑁄 𑀘 𑀯𑁂𑀤𑀺𑀢𑀩𑁆𑀩𑁄 𑀅𑀢𑁆𑀣𑁄 𑀘. 𑀅𑀥𑀫𑁆𑀫𑀜𑁆𑀘 𑀯𑀺𑀤𑀺𑀢𑁆𑀯𑀸 𑀥𑀫𑁆𑀫𑀜𑁆𑀘, 𑀅𑀦𑀢𑁆𑀣𑀜𑁆𑀘 𑀯𑀺𑀤𑀺𑀢𑁆𑀯𑀸 𑀅𑀢𑁆𑀣𑀜𑁆𑀘 𑀬𑀣𑀸 𑀥𑀫𑁆𑀫𑁄 𑀬𑀣𑀸 𑀅𑀢𑁆𑀣𑁄 𑀢𑀣𑀸 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀁.

‘‘𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀅𑀥𑀫𑁆𑀫𑁄, 𑀓𑀢𑀫𑁄 𑀘 𑀥𑀫𑁆𑀫𑁄; 𑀓𑀢𑀫𑁄 𑀘 𑀅𑀦𑀢𑁆𑀣𑁄, 𑀓𑀢𑀫𑁄 𑀘 𑀅𑀢𑁆𑀣𑁄? 𑀧𑀸𑀡𑀸𑀢𑀺𑀧𑀸𑀢𑁄, 𑀪𑀺𑀓𑁆𑀔𑀯𑁂, 𑀅𑀥𑀫𑁆𑀫𑁄; 𑀧𑀸𑀡𑀸𑀢𑀺𑀧𑀸𑀢𑀸 𑀯𑁂𑀭𑀫𑀡𑀻 𑀥𑀫𑁆𑀫𑁄; 𑀬𑁂 𑀘 𑀧𑀸𑀡𑀸𑀢𑀺𑀧𑀸𑀢𑀧𑀘𑁆𑀘𑀬𑀸 𑀅𑀦𑁂𑀓𑁂 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀲𑀫𑁆𑀪𑀯𑀦𑁆𑀢𑀺, 𑀅𑀬𑀁 𑀅𑀦𑀢𑁆𑀣𑁄; 𑀧𑀸𑀡𑀸𑀢𑀺𑀧𑀸𑀢𑀸 𑀯𑁂𑀭𑀫𑀡𑀺𑀧𑀘𑁆𑀘𑀬𑀸 𑀘 𑀅𑀦𑁂𑀓𑁂 𑀓𑀼𑀲𑀮𑀸 𑀥𑀫𑁆𑀫𑀸 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀦𑁆𑀢𑀺, 𑀅𑀬𑀁 𑀅𑀢𑁆𑀣𑁄.

‘‘𑀅𑀤𑀺𑀦𑁆𑀦𑀸𑀤𑀸𑀦𑀁, 𑀪𑀺𑀓𑁆𑀔𑀯𑁂, 𑀅𑀥𑀫𑁆𑀫𑁄; 𑀅𑀤𑀺𑀦𑁆𑀦𑀸𑀤𑀸𑀦𑀸 𑀯𑁂𑀭𑀫𑀡𑀻 𑀥𑀫𑁆𑀫𑁄… 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑁄, 𑀪𑀺𑀓𑁆𑀔𑀯𑁂, 𑀅𑀥𑀫𑁆𑀫𑁄; 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀸 𑀯𑁂𑀭𑀫𑀡𑀻 𑀥𑀫𑁆𑀫𑁄… 𑀫𑀼𑀲𑀸𑀯𑀸𑀤𑁄, 𑀪𑀺𑀓𑁆𑀔𑀯𑁂, 𑀅𑀥𑀫𑁆𑀫𑁄; 𑀫𑀼𑀲𑀸𑀯𑀸𑀤𑀸 𑀯𑁂𑀭𑀫𑀡𑀻 𑀥𑀫𑁆𑀫𑁄… 𑀧𑀺𑀲𑀼𑀡𑀸 𑀯𑀸𑀘𑀸, 𑀪𑀺𑀓𑁆𑀔𑀯𑁂, 𑀅𑀥𑀫𑁆𑀫𑁄; 𑀧𑀺𑀲𑀼𑀡𑀸𑀬 𑀯𑀸𑀘𑀸𑀬 𑀯𑁂𑀭𑀫𑀡𑀻 𑀥𑀫𑁆𑀫𑁄… 𑀨𑀭𑀼𑀲𑀸 𑀯𑀸𑀘𑀸, 𑀪𑀺𑀓𑁆𑀔𑀯𑁂, 𑀅𑀥𑀫𑁆𑀫𑁄; 𑀨𑀭𑀼𑀲𑀸𑀬 𑀯𑀸𑀘𑀸𑀬 𑀯𑁂𑀭𑀫𑀡𑀻 𑀥𑀫𑁆𑀫𑁄… 𑀲𑀫𑁆𑀨𑀧𑁆𑀧𑀮𑀸𑀧𑁄, 𑀪𑀺𑀓𑁆𑀔𑀯𑁂, 𑀅𑀥𑀫𑁆𑀫𑁄; 𑀲𑀫𑁆𑀨𑀧𑁆𑀧𑀮𑀸𑀧𑀸 𑀯𑁂𑀭𑀫𑀡𑀻 𑀥𑀫𑁆𑀫𑁄… 𑀅𑀪𑀺𑀚𑁆𑀛𑀸, 𑀪𑀺𑀓𑁆𑀔𑀯𑁂, 𑀅𑀥𑀫𑁆𑀫𑁄; 𑀅𑀦𑀪𑀺𑀚𑁆𑀛𑀸 𑀥𑀫𑁆𑀫𑁄… 𑀩𑁆𑀬𑀸𑀧𑀸𑀤𑁄, 𑀪𑀺𑀓𑁆𑀔𑀯𑁂, 𑀅𑀥𑀫𑁆𑀫𑁄; 𑀅𑀩𑁆𑀬𑀸𑀧𑀸𑀤𑁄 𑀥𑀫𑁆𑀫𑁄….

‘‘𑀫𑀺𑀘𑁆𑀙𑀸𑀤𑀺𑀝𑁆𑀞𑀺, 𑀪𑀺𑀓𑁆𑀔𑀯𑁂, 𑀅𑀥𑀫𑁆𑀫𑁄; 𑀲𑀫𑁆𑀫𑀸𑀤𑀺𑀝𑁆𑀞𑀺 𑀥𑀫𑁆𑀫𑁄; 𑀬𑁂 𑀘 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀧𑀘𑁆𑀘𑀬𑀸 𑀅𑀦𑁂𑀓𑁂 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀲𑀫𑁆𑀪𑀯𑀦𑁆𑀢𑀺, 𑀅𑀬𑀁 𑀅𑀦𑀢𑁆𑀣𑁄; 𑀲𑀫𑁆𑀫𑀸𑀤𑀺𑀝𑁆𑀞𑀺𑀧𑀘𑁆𑀘𑀬𑀸 𑀘 𑀅𑀦𑁂𑀓𑁂 𑀓𑀼𑀲𑀮𑀸 𑀥𑀫𑁆𑀫𑀸 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀦𑁆𑀢𑀺, 𑀅𑀬𑀁 𑀅𑀢𑁆𑀣𑁄.

‘‘‘𑀅𑀥𑀫𑁆𑀫𑁄 𑀘, 𑀪𑀺𑀓𑁆𑀔𑀯𑁂, 𑀯𑁂𑀤𑀺𑀢𑀩𑁆𑀩𑁄 𑀥𑀫𑁆𑀫𑁄 𑀘; 𑀅𑀦𑀢𑁆𑀣𑁄 𑀘 𑀯𑁂𑀤𑀺𑀢𑀩𑁆𑀩𑁄 𑀅𑀢𑁆𑀣𑁄 𑀘. 𑀅𑀥𑀫𑁆𑀫𑀜𑁆𑀘 𑀯𑀺𑀤𑀺𑀢𑁆𑀯𑀸 𑀥𑀫𑁆𑀫𑀜𑁆𑀘, 𑀅𑀦𑀢𑁆𑀣𑀜𑁆𑀘 𑀯𑀺𑀤𑀺𑀢𑁆𑀯𑀸 𑀅𑀢𑁆𑀣𑀜𑁆𑀘 𑀬𑀣𑀸 𑀥𑀫𑁆𑀫𑁄 𑀬𑀣𑀸 𑀅𑀢𑁆𑀣𑁄 𑀢𑀣𑀸 𑀧𑀝𑀺𑀧𑀚𑁆𑀚𑀺𑀢𑀩𑁆𑀩’𑀦𑁆𑀢𑀺, 𑀇𑀢𑀺 𑀬𑀁 𑀢𑀁 𑀯𑀼𑀢𑁆𑀢𑀁, 𑀇𑀤𑀫𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢’’𑀦𑁆𑀢𑀺. 𑀲𑀢𑁆𑀢𑀫𑀁.

𑁮. 𑀓𑀫𑁆𑀫𑀦𑀺𑀤𑀸𑀦𑀲𑀼𑀢𑁆𑀢𑀁

𑁧𑁭𑁪. ‘‘𑀧𑀸𑀡𑀸𑀢𑀺𑀧𑀸𑀢𑀫𑁆𑀧𑀸𑀳𑀁, 𑀪𑀺𑀓𑁆𑀔𑀯𑁂, 𑀢𑀺𑀯𑀺𑀥𑀁 𑀯𑀤𑀸𑀫𑀺 𑁋 𑀮𑁄𑀪𑀳𑁂𑀢𑀼𑀓𑀫𑁆𑀧𑀺, 𑀤𑁄𑀲𑀳𑁂𑀢𑀼𑀓𑀫𑁆𑀧𑀺, 𑀫𑁄𑀳𑀳𑁂𑀢𑀼𑀓𑀫𑁆𑀧𑀺.

‘‘𑀅𑀤𑀺𑀦𑁆𑀦𑀸𑀤𑀸𑀦𑀫𑁆𑀧𑀸𑀳𑀁, 𑀪𑀺𑀓𑁆𑀔𑀯𑁂, 𑀢𑀺𑀯𑀺𑀥𑀁 𑀯𑀤𑀸𑀫𑀺 𑁋 𑀮𑁄𑀪𑀳𑁂𑀢𑀼𑀓𑀫𑁆𑀧𑀺, 𑀤𑁄𑀲𑀳𑁂𑀢𑀼𑀓𑀫𑁆𑀧𑀺, 𑀫𑁄𑀳𑀳𑁂𑀢𑀼𑀓𑀫𑁆𑀧𑀺.

‘‘𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀫𑁆𑀧𑀸𑀳𑀁, 𑀪𑀺𑀓𑁆𑀔𑀯𑁂, 𑀢𑀺𑀯𑀺𑀥𑀁 𑀯𑀤𑀸𑀫𑀺 𑁋 𑀮𑁄𑀪𑀳𑁂𑀢𑀼𑀓𑀫𑁆𑀧𑀺, 𑀤𑁄𑀲𑀳𑁂𑀢𑀼𑀓𑀫𑁆𑀧𑀺, 𑀫𑁄𑀳𑀳𑁂𑀢𑀼𑀓𑀫𑁆𑀧𑀺.

‘‘𑀫𑀼𑀲𑀸𑀯𑀸𑀤𑀫𑁆𑀧𑀸𑀳𑀁, 𑀪𑀺𑀓𑁆𑀔𑀯𑁂, 𑀢𑀺𑀯𑀺𑀥𑀁 𑀯𑀤𑀸𑀫𑀺 𑁋 𑀮𑁄𑀪𑀳𑁂𑀢𑀼𑀓𑀫𑁆𑀧𑀺, 𑀤𑁄𑀲𑀳𑁂𑀢𑀼𑀓𑀫𑁆𑀧𑀺, 𑀫𑁄𑀳𑀳𑁂𑀢𑀼𑀓𑀫𑁆𑀧𑀺.

‘‘𑀧𑀺𑀲𑀼𑀡𑀯𑀸𑀘𑀫𑁆𑀧𑀸𑀳𑀁, 𑀪𑀺𑀓𑁆𑀔𑀯𑁂, 𑀢𑀺𑀯𑀺𑀥𑀁 𑀯𑀤𑀸𑀫𑀺 𑁋 𑀮𑁄𑀪𑀳𑁂𑀢𑀼𑀓𑀫𑁆𑀧𑀺, 𑀤𑁄𑀲𑀳𑁂𑀢𑀼𑀓𑀫𑁆𑀧𑀺, 𑀫𑁄𑀳𑀳𑁂𑀢𑀼𑀓𑀫𑁆𑀧𑀺.

‘‘𑀨𑀭𑀼𑀲𑀯𑀸𑀘𑀫𑁆𑀧𑀸𑀳𑀁, 𑀪𑀺𑀓𑁆𑀔𑀯𑁂, 𑀢𑀺𑀯𑀺𑀥𑀁 𑀯𑀤𑀸𑀫𑀺 𑁋 𑀮𑁄𑀪𑀳𑁂𑀢𑀼𑀓𑀫𑁆𑀧𑀺, 𑀤𑁄𑀲𑀳𑁂𑀢𑀼𑀓𑀫𑁆𑀧𑀺, 𑀫𑁄𑀳𑀳𑁂𑀢𑀼𑀓𑀫𑁆𑀧𑀺.

‘‘𑀲𑀫𑁆𑀨𑀧𑁆𑀧𑀮𑀸𑀧𑀫𑁆𑀧𑀸𑀳𑀁, 𑀪𑀺𑀓𑁆𑀔𑀯𑁂, 𑀢𑀺𑀯𑀺𑀥𑀁 𑀯𑀤𑀸𑀫𑀺 𑁋 𑀮𑁄𑀪𑀳𑁂𑀢𑀼𑀓𑀫𑁆𑀧𑀺, 𑀤𑁄𑀲𑀳𑁂𑀢𑀼𑀓𑀫𑁆𑀧𑀺, 𑀫𑁄𑀳𑀳𑁂𑀢𑀼𑀓𑀫𑁆𑀧𑀺.

‘‘𑀅𑀪𑀺𑀚𑁆𑀛𑀫𑁆𑀧𑀸𑀳𑀁, 𑀪𑀺𑀓𑁆𑀔𑀯𑁂, 𑀢𑀺𑀯𑀺𑀥𑀁 𑀯𑀤𑀸𑀫𑀺 𑁋 𑀮𑁄𑀪𑀳𑁂𑀢𑀼𑀓𑀫𑁆𑀧𑀺, 𑀤𑁄𑀲𑀳𑁂𑀢𑀼𑀓𑀫𑁆𑀧𑀺, 𑀫𑁄𑀳𑀳𑁂𑀢𑀼𑀓𑀫𑁆𑀧𑀺.

‘‘𑀩𑁆𑀬𑀸𑀧𑀸𑀤𑀫𑁆𑀧𑀸𑀳𑀁, 𑀪𑀺𑀓𑁆𑀔𑀯𑁂, 𑀢𑀺𑀯𑀺𑀥𑀁 𑀯𑀤𑀸𑀫𑀺 𑁋 𑀮𑁄𑀪𑀳𑁂𑀢𑀼𑀓𑀫𑁆𑀧𑀺, 𑀤𑁄𑀲𑀳𑁂𑀢𑀼𑀓𑀫𑁆𑀧𑀺, 𑀫𑁄𑀳𑀳𑁂𑀢𑀼𑀓𑀫𑁆𑀧𑀺.

‘‘𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀫𑁆𑀧𑀸𑀳𑀁, 𑀪𑀺𑀓𑁆𑀔𑀯𑁂, 𑀢𑀺𑀯𑀺𑀥𑀁 𑀯𑀤𑀸𑀫𑀺 𑁋 𑀮𑁄𑀪𑀳𑁂𑀢𑀼𑀓𑀫𑁆𑀧𑀺, 𑀤𑁄𑀲𑀳𑁂𑀢𑀼𑀓𑀫𑁆𑀧𑀺, 𑀫𑁄𑀳𑀳𑁂𑀢𑀼𑀓𑀫𑁆𑀧𑀺. 𑀇𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀮𑁄𑀪𑁄 𑀓𑀫𑁆𑀫𑀦𑀺𑀤𑀸𑀦𑀲𑀫𑁆𑀪𑀯𑁄, 𑀤𑁄𑀲𑁄 𑀓𑀫𑁆𑀫𑀦𑀺𑀤𑀸𑀦𑀲𑀫𑁆𑀪𑀯𑁄, 𑀫𑁄𑀳𑁄 𑀓𑀫𑁆𑀫𑀦𑀺𑀤𑀸𑀦𑀲𑀫𑁆𑀪𑀯𑁄. 𑀮𑁄𑀪𑀓𑁆𑀔𑀬𑀸 𑀓𑀫𑁆𑀫𑀦𑀺𑀤𑀸𑀦𑀲𑀗𑁆𑀔𑀬𑁄, 𑀤𑁄𑀲𑀓𑁆𑀔𑀬𑀸 𑀓𑀫𑁆𑀫𑀦𑀺𑀤𑀸𑀦𑀲𑀗𑁆𑀔𑀬𑁄, 𑀫𑁄𑀳𑀓𑁆𑀔𑀬𑀸 𑀓𑀫𑁆𑀫𑀦𑀺𑀤𑀸𑀦𑀲𑀗𑁆𑀔𑀬𑁄’’𑀢𑀺. 𑀅𑀝𑁆𑀞𑀫𑀁.

𑁯. 𑀧𑀭𑀺𑀓𑁆𑀓𑀫𑀦𑀲𑀼𑀢𑁆𑀢𑀁

𑁧𑁭𑁫. ‘‘𑀲𑀧𑀭𑀺𑀓𑁆𑀓𑀫𑀦𑁄 𑀅𑀬𑀁, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁄, 𑀦𑀸𑀬𑀁 𑀥𑀫𑁆𑀫𑁄 𑀅𑀧𑀭𑀺𑀓𑁆𑀓𑀫𑀦𑁄. 𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀲𑀧𑀭𑀺𑀓𑁆𑀓𑀫𑀦𑁄 𑀅𑀬𑀁 𑀥𑀫𑁆𑀫𑁄, 𑀦𑀸𑀬𑀁 𑀥𑀫𑁆𑀫𑁄 𑀅𑀧𑀭𑀺𑀓𑁆𑀓𑀫𑀦𑁄? 𑀧𑀸𑀡𑀸𑀢𑀺𑀧𑀸𑀢𑀺𑀲𑁆𑀲, 𑀪𑀺𑀓𑁆𑀔𑀯𑁂, 𑀧𑀸𑀡𑀸𑀢𑀺𑀧𑀸𑀢𑀸 𑀯𑁂𑀭𑀫𑀡𑀻 𑀧𑀭𑀺𑀓𑁆𑀓𑀫𑀦𑀁 𑀳𑁄𑀢𑀺. 𑀅𑀤𑀺𑀦𑁆𑀦𑀸𑀤𑀸𑀬𑀺𑀲𑁆𑀲, 𑀪𑀺𑀓𑁆𑀔𑀯𑁂, 𑀅𑀤𑀺𑀦𑁆𑀦𑀸𑀤𑀸𑀦𑀸 𑀯𑁂𑀭𑀫𑀡𑀻 𑀧𑀭𑀺𑀓𑁆𑀓𑀫𑀦𑀁 𑀳𑁄𑀢𑀺. 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀺𑀲𑁆𑀲, 𑀪𑀺𑀓𑁆𑀔𑀯𑁂, 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀸 𑀯𑁂𑀭𑀫𑀡𑀻 𑀧𑀭𑀺𑀓𑁆𑀓𑀫𑀦𑀁 𑀳𑁄𑀢𑀺. 𑀫𑀼𑀲𑀸𑀯𑀸𑀤𑀺𑀲𑁆𑀲, 𑀪𑀺𑀓𑁆𑀔𑀯𑁂, 𑀫𑀼𑀲𑀸𑀯𑀸𑀤𑀸 𑀯𑁂𑀭𑀫𑀡𑀻 𑀧𑀭𑀺𑀓𑁆𑀓𑀫𑀦𑀁 𑀳𑁄𑀢𑀺. 𑀧𑀺𑀲𑀼𑀡𑀯𑀸𑀘𑀲𑁆𑀲, 𑀪𑀺𑀓𑁆𑀔𑀯𑁂, 𑀧𑀺𑀲𑀼𑀡𑀸𑀬 𑀯𑀸𑀘𑀸𑀬 𑀯𑁂𑀭𑀫𑀡𑀻 𑀧𑀭𑀺𑀓𑁆𑀓𑀫𑀦𑀁 𑀳𑁄𑀢𑀺. 𑀨𑀭𑀼𑀲𑀯𑀸𑀘𑀲𑁆𑀲, 𑀪𑀺𑀓𑁆𑀔𑀯𑁂, 𑀨𑀭𑀼𑀲𑀸𑀬 𑀯𑀸𑀘𑀸𑀬 𑀯𑁂𑀭𑀫𑀡𑀻 𑀧𑀭𑀺𑀓𑁆𑀓𑀫𑀦𑀁 𑀳𑁄𑀢𑀺. 𑀲𑀫𑁆𑀨𑀧𑁆𑀧𑀮𑀸𑀧𑀺𑀲𑁆𑀲, 𑀪𑀺𑀓𑁆𑀔𑀯𑁂, 𑀲𑀫𑁆𑀨𑀧𑁆𑀧𑀮𑀸𑀧𑀸 𑀯𑁂𑀭𑀫𑀡𑀻 𑀧𑀭𑀺𑀓𑁆𑀓𑀫𑀦𑀁 𑀳𑁄𑀢𑀺. 𑀅𑀪𑀺𑀚𑁆𑀛𑀸𑀮𑀼𑀲𑁆𑀲, 𑀪𑀺𑀓𑁆𑀔𑀯𑁂, 𑀅𑀦𑀪𑀺𑀚𑁆𑀛𑀸 𑀧𑀭𑀺𑀓𑁆𑀓𑀫𑀦𑀁 𑀳𑁄𑀢𑀺. 𑀩𑁆𑀬𑀸𑀧𑀦𑁆𑀦𑀘𑀺𑀢𑁆𑀢𑀲𑁆𑀲 [𑀩𑁆𑀬𑀸𑀧𑀸𑀤𑀲𑁆𑀲 (𑀲𑀻. 𑀧𑀻. 𑀓.), 𑀩𑁆𑀬𑀸𑀧𑀦𑁆𑀦𑀲𑁆𑀲 (𑀲𑁆𑀬𑀸.)], 𑀪𑀺𑀓𑁆𑀔𑀯𑁂, 𑀅𑀩𑁆𑀬𑀸𑀧𑀸𑀤𑁄 𑀧𑀭𑀺𑀓𑁆𑀓𑀫𑀦𑀁 𑀳𑁄𑀢𑀺. 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀲𑁆𑀲, 𑀪𑀺𑀓𑁆𑀔𑀯𑁂, 𑀲𑀫𑁆𑀫𑀸𑀤𑀺𑀝𑁆𑀞𑀺 𑀧𑀭𑀺𑀓𑁆𑀓𑀫𑀦𑀁 𑀳𑁄𑀢𑀺. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀲𑀧𑀭𑀺𑀓𑁆𑀓𑀫𑀦𑁄 𑀅𑀬𑀁 𑀥𑀫𑁆𑀫𑁄, 𑀦𑀸𑀬𑀁 𑀥𑀫𑁆𑀫𑁄 𑀅𑀧𑀭𑀺𑀓𑁆𑀓𑀫𑀦𑁄’’𑀢𑀺. 𑀦𑀯𑀫𑀁.

𑁧𑁦. 𑀘𑀼𑀦𑁆𑀤𑀲𑀼𑀢𑁆𑀢𑀁

𑁧𑁭𑁬. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀧𑀸𑀯𑀸𑀬𑀁 [𑀘𑀫𑁆𑀧𑀸𑀬𑀁 (𑀓. 𑀲𑀻.) 𑀤𑀻. 𑀦𑀺. 𑁨.𑁧𑁮𑁯 𑀧𑀲𑁆𑀲𑀺𑀢𑀩𑁆𑀩𑀁] 𑀯𑀺𑀳𑀭𑀢𑀺 𑀘𑀼𑀦𑁆𑀤𑀲𑁆𑀲 𑀓𑀫𑁆𑀫𑀸𑀭𑀧𑀼𑀢𑁆𑀢𑀲𑁆𑀲 𑀅𑀫𑁆𑀩𑀯𑀦𑁂. 𑀅𑀣 𑀔𑁄 𑀘𑀼𑀦𑁆𑀤𑁄 𑀓𑀫𑁆𑀫𑀸𑀭𑀧𑀼𑀢𑁆𑀢𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀁 𑀔𑁄 𑀘𑀼𑀦𑁆𑀤𑀁 𑀓𑀫𑁆𑀫𑀸𑀭𑀧𑀼𑀢𑁆𑀢𑀁 𑀪𑀕𑀯𑀸 𑀏𑀢𑀤𑀯𑁄𑀘 𑁋 ‘‘𑀓𑀲𑁆𑀲 𑀦𑁄 𑀢𑁆𑀯𑀁, 𑀘𑀼𑀦𑁆𑀤, 𑀲𑁄𑀘𑁂𑀬𑁆𑀬𑀸𑀦𑀺 𑀭𑁄𑀘𑁂𑀲𑀻’’𑀢𑀺? ‘‘𑀩𑁆𑀭𑀸𑀳𑁆𑀫𑀡𑀸, 𑀪𑀦𑁆𑀢𑁂, 𑀧𑀘𑁆𑀙𑀸𑀪𑀽𑀫𑀓𑀸 𑀓𑀫𑀡𑁆𑀟𑀮𑀼𑀓𑀸 𑀲𑁂𑀯𑀸𑀮𑀫𑀸𑀮𑀺𑀓𑀸 [𑀲𑁂𑀯𑀸𑀮𑀫𑀸𑀮𑀓𑀸 (𑀲𑀻. 𑀲𑁆𑀬𑀸. 𑀧𑀻.)] 𑀅𑀕𑁆𑀕𑀺𑀧𑀭𑀺𑀘𑀸𑀭𑀺𑀓𑀸 𑀉𑀤𑀓𑁄𑀭𑁄𑀳𑀓𑀸 𑀲𑁄𑀘𑁂𑀬𑁆𑀬𑀸𑀦𑀺 𑀧𑀜𑁆𑀜𑀧𑁂𑀦𑁆𑀢𑀺; 𑀢𑁂𑀲𑀸𑀳𑀁 𑀲𑁄𑀘𑁂𑀬𑁆𑀬𑀸𑀦𑀺 𑀭𑁄𑀘𑁂𑀫𑀻’’𑀢𑀺.

‘‘𑀬𑀣𑀸 𑀓𑀣𑀁 𑀧𑀦, 𑀘𑀼𑀦𑁆𑀤, 𑀩𑁆𑀭𑀸𑀳𑁆𑀫𑀡𑀸 𑀧𑀘𑁆𑀙𑀸𑀪𑀽𑀫𑀓𑀸 𑀓𑀫𑀡𑁆𑀟𑀮𑀼𑀓𑀸 𑀲𑁂𑀯𑀸𑀮𑀫𑀸𑀮𑀺𑀓𑀸 𑀅𑀕𑁆𑀕𑀺𑀧𑀭𑀺𑀘𑀸𑀭𑀺𑀓𑀸 𑀉𑀤𑀓𑁄𑀭𑁄𑀳𑀓𑀸 𑀲𑁄𑀘𑁂𑀬𑁆𑀬𑀸𑀦𑀺 𑀧𑀜𑁆𑀜𑀧𑁂𑀦𑁆𑀢𑀻’’𑀢𑀺? ‘‘𑀇𑀥, 𑀪𑀦𑁆𑀢𑁂, 𑀩𑁆𑀭𑀸𑀳𑁆𑀫𑀡𑀸 𑀧𑀘𑁆𑀙𑀸𑀪𑀽𑀫𑀓𑀸 𑀓𑀫𑀡𑁆𑀟𑀮𑀼𑀓𑀸 𑀲𑁂𑀯𑀸𑀮𑀫𑀸𑀮𑀺𑀓𑀸 𑀅𑀕𑁆𑀕𑀺𑀧𑀭𑀺𑀘𑀸𑀭𑀺𑀓𑀸 𑀉𑀤𑀓𑁄𑀭𑁄𑀳𑀓𑀸. 𑀢𑁂 𑀲𑀸𑀯𑀓𑀁 [𑀲𑀸𑀯𑀓𑁂 (𑀲𑁆𑀬𑀸. 𑀓.)] 𑀏𑀯𑀁 𑀲𑀫𑀸𑀤𑀧𑁂𑀦𑁆𑀢𑀺 𑁋 ‘𑀏𑀳𑀺 𑀢𑁆𑀯𑀁, 𑀅𑀫𑁆𑀪𑁄 𑀧𑀼𑀭𑀺𑀲, 𑀓𑀸𑀮𑀲𑁆𑀲𑁂𑀯 [𑀲𑀓𑀸𑀮𑀲𑁆𑀲𑁂𑀯 (𑀲𑁆𑀬𑀸.)] 𑀉𑀝𑁆𑀞𑀳𑀦𑁆𑀢𑁄𑀯 [𑀉𑀝𑁆𑀞𑀳𑀦𑁆𑀢𑁄 (𑀲𑁆𑀬𑀸.), 𑀯𑀼𑀝𑁆𑀞𑀳𑀦𑁆𑀢𑁄𑀯 (𑀧𑀻. 𑀓.)] 𑀲𑀬𑀦𑀫𑁆𑀳𑀸 𑀧𑀣𑀯𑀺𑀁 𑀆𑀫𑀲𑁂𑀬𑁆𑀬𑀸𑀲𑀺; 𑀦𑁄 𑀘𑁂 𑀧𑀣𑀯𑀺𑀁 𑀆𑀫𑀲𑁂𑀬𑁆𑀬𑀸𑀲𑀺, 𑀅𑀮𑁆𑀮𑀸𑀦𑀺 𑀕𑁄𑀫𑀬𑀸𑀦𑀺 𑀆𑀫𑀲𑁂𑀬𑁆𑀬𑀸𑀲𑀺; 𑀦𑁄 𑀘𑁂 𑀅𑀮𑁆𑀮𑀸𑀦𑀺 𑀕𑁄𑀫𑀬𑀸𑀦𑀺 𑀆𑀫𑀲𑁂𑀬𑁆𑀬𑀸𑀲𑀺, 𑀳𑀭𑀺𑀢𑀸𑀦𑀺 𑀢𑀺𑀡𑀸𑀦𑀺 𑀆𑀫𑀲𑁂𑀬𑁆𑀬𑀸𑀲𑀺; 𑀦𑁄 𑀘𑁂 𑀳𑀭𑀺𑀢𑀸𑀦𑀺 𑀢𑀺𑀡𑀸𑀦𑀺 𑀆𑀫𑀲𑁂𑀬𑁆𑀬𑀸𑀲𑀺, 𑀅𑀕𑁆𑀕𑀺𑀁 𑀧𑀭𑀺𑀘𑀭𑁂𑀬𑁆𑀬𑀸𑀲𑀺; 𑀦𑁄 𑀘𑁂 𑀅𑀕𑁆𑀕𑀺𑀁 𑀧𑀭𑀺𑀘𑀭𑁂𑀬𑁆𑀬𑀸𑀲𑀺, 𑀧𑀜𑁆𑀚𑀮𑀺𑀓𑁄 𑀆𑀤𑀺𑀘𑁆𑀘𑀁 𑀦𑀫𑀲𑁆𑀲𑁂𑀬𑁆𑀬𑀸𑀲𑀺; 𑀦𑁄 𑀘𑁂 𑀧𑀜𑁆𑀚𑀮𑀺𑀓𑁄 𑀆𑀤𑀺𑀘𑁆𑀘𑀁 𑀦𑀫𑀲𑁆𑀲𑁂𑀬𑁆𑀬𑀸𑀲𑀺, 𑀲𑀸𑀬𑀢𑀢𑀺𑀬𑀓𑀁 𑀉𑀤𑀓𑀁 𑀑𑀭𑁄𑀳𑁂𑀬𑁆𑀬𑀸𑀲𑀻’𑀢𑀺. 𑀏𑀯𑀁 𑀔𑁄, 𑀪𑀦𑁆𑀢𑁂, 𑀩𑁆𑀭𑀸𑀳𑁆𑀫𑀡𑀸 𑀧𑀘𑁆𑀙𑀸𑀪𑀽𑀫𑀓𑀸 𑀓𑀫𑀡𑁆𑀟𑀮𑀼𑀓𑀸 𑀲𑁂𑀯𑀸𑀮𑀫𑀸𑀮𑀺𑀓𑀸 𑀅𑀕𑁆𑀕𑀺𑀧𑀭𑀺𑀘𑀸𑀭𑀺𑀓𑀸 𑀉𑀤𑀓𑁄𑀭𑁄𑀳𑀓𑀸 𑀲𑁄𑀘𑁂𑀬𑁆𑀬𑀸𑀦𑀺 𑀧𑀜𑁆𑀜𑀧𑁂𑀦𑁆𑀢𑀺; 𑀢𑁂𑀲𑀸𑀳𑀁 𑀲𑁄𑀘𑁂𑀬𑁆𑀬𑀸𑀦𑀺 𑀭𑁄𑀘𑁂𑀫𑀻’’𑀢𑀺.

‘‘𑀅𑀜𑁆𑀜𑀣𑀸 𑀔𑁄, 𑀘𑀼𑀦𑁆𑀤, 𑀩𑁆𑀭𑀸𑀳𑁆𑀫𑀡𑀸 𑀧𑀘𑁆𑀙𑀸𑀪𑀽𑀫𑀓𑀸 𑀓𑀫𑀡𑁆𑀟𑀮𑀼𑀓𑀸 𑀲𑁂𑀯𑀸𑀮𑀫𑀸𑀮𑀺𑀓𑀸 𑀅𑀕𑁆𑀕𑀺𑀧𑀭𑀺𑀘𑀸𑀭𑀺𑀓𑀸 𑀉𑀤𑀓𑁄𑀭𑁄𑀳𑀓𑀸 𑀲𑁄𑀘𑁂𑀬𑁆𑀬𑀸𑀦𑀺 𑀧𑀜𑁆𑀜𑀧𑁂𑀦𑁆𑀢𑀺, 𑀅𑀜𑁆𑀜𑀣𑀸 𑀘 𑀧𑀦 𑀅𑀭𑀺𑀬𑀲𑁆𑀲 𑀯𑀺𑀦𑀬𑁂 𑀲𑁄𑀘𑁂𑀬𑁆𑀬𑀁 𑀳𑁄𑀢𑀻’’𑀢𑀺. ‘‘𑀬𑀣𑀸 𑀓𑀣𑀁 𑀧𑀦, 𑀪𑀦𑁆𑀢𑁂, 𑀅𑀭𑀺𑀬𑀲𑁆𑀲 𑀯𑀺𑀦𑀬𑁂 𑀲𑁄𑀘𑁂𑀬𑁆𑀬𑀁 𑀳𑁄𑀢𑀺? 𑀲𑀸𑀥𑀼 𑀫𑁂, 𑀪𑀦𑁆𑀢𑁂, 𑀪𑀕𑀯𑀸 𑀢𑀣𑀸 𑀥𑀫𑁆𑀫𑀁 𑀤𑁂𑀲𑁂𑀢𑀼 𑀬𑀣𑀸 𑀅𑀭𑀺𑀬𑀲𑁆𑀲 𑀯𑀺𑀦𑀬𑁂 𑀲𑁄𑀘𑁂𑀬𑁆𑀬𑀁 𑀳𑁄𑀢𑀻’’𑀢𑀺.

‘‘𑀢𑁂𑀦 𑀳𑀺, 𑀘𑀼𑀦𑁆𑀤, 𑀲𑀼𑀡𑀸𑀳𑀺, 𑀲𑀸𑀥𑀼𑀓𑀁 𑀫𑀦𑀲𑀺 𑀓𑀭𑁄𑀳𑀺; 𑀪𑀸𑀲𑀺𑀲𑁆𑀲𑀸𑀫𑀻’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀘𑀼𑀦𑁆𑀤𑁄 𑀓𑀫𑁆𑀫𑀸𑀭𑀧𑀼𑀢𑁆𑀢𑁄 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀺. 𑀪𑀕𑀯𑀸 𑀏𑀢𑀤𑀯𑁄𑀘 𑁋

‘‘𑀢𑀺𑀯𑀺𑀥𑀁 𑀔𑁄, 𑀘𑀼𑀦𑁆𑀤, 𑀓𑀸𑀬𑁂𑀦 𑀅𑀲𑁄𑀘𑁂𑀬𑁆𑀬𑀁 𑀳𑁄𑀢𑀺; 𑀘𑀢𑀼𑀩𑁆𑀩𑀺𑀥𑀁 𑀯𑀸𑀘𑀸𑀬 𑀅𑀲𑁄𑀘𑁂𑀬𑁆𑀬𑀁 𑀳𑁄𑀢𑀺; 𑀢𑀺𑀯𑀺𑀥𑀁 𑀫𑀦𑀲𑀸 𑀅𑀲𑁄𑀘𑁂𑀬𑁆𑀬𑀁 𑀳𑁄𑀢𑀺.

‘‘𑀓𑀣𑀜𑁆𑀘, 𑀘𑀼𑀦𑁆𑀤, 𑀢𑀺𑀯𑀺𑀥𑀁 𑀓𑀸𑀬𑁂𑀦 𑀅𑀲𑁄𑀘𑁂𑀬𑁆𑀬𑀁 𑀳𑁄𑀢𑀺? ‘‘𑀇𑀥, 𑀘𑀼𑀦𑁆𑀤, 𑀏𑀓𑀘𑁆𑀘𑁄 𑀧𑀸𑀡𑀸𑀢𑀺𑀧𑀸𑀢𑀻 𑀳𑁄𑀢𑀺 𑀮𑀼𑀤𑁆𑀤𑁄 𑀮𑁄𑀳𑀺𑀢𑀧𑀸𑀡𑀺 𑀳𑀢𑀧𑀳𑀢𑁂 𑀦𑀺𑀯𑀺𑀝𑁆𑀞𑁄 𑀅𑀤𑀬𑀸𑀧𑀦𑁆𑀦𑁄 𑀲𑀩𑁆𑀩𑀧𑀸𑀡𑀪𑀽𑀢𑁂𑀲𑀼 [𑀧𑀸𑀡𑀪𑀽𑀢𑁂𑀲𑀼 (𑀓.)].

‘‘𑀅𑀤𑀺𑀦𑁆𑀦𑀸𑀤𑀸𑀬𑀻 𑀳𑁄𑀢𑀺. 𑀬𑀁 𑀢𑀁 𑀧𑀭𑀲𑁆𑀲 𑀧𑀭𑀯𑀺𑀢𑁆𑀢𑀽𑀧𑀓𑀭𑀡𑀁 𑀕𑀸𑀫𑀕𑀢𑀁 𑀯𑀸 𑀅𑀭𑀜𑁆𑀜𑀕𑀢𑀁 𑀯𑀸 𑀢𑀁 𑀅𑀤𑀺𑀦𑁆𑀦𑀁 𑀣𑁂𑀬𑁆𑀬𑀲𑀗𑁆𑀔𑀸𑀢𑀁 𑀆𑀤𑀸𑀢𑀸 𑀳𑁄𑀢𑀺.

‘‘𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀻 𑀳𑁄𑀢𑀺. 𑀬𑀸 𑀢𑀸 𑀫𑀸𑀢𑀼𑀭𑀓𑁆𑀔𑀺𑀢𑀸 𑀧𑀺𑀢𑀼𑀭𑀓𑁆𑀔𑀺𑀢𑀸 𑀫𑀸𑀢𑀸𑀧𑀺𑀢𑀼𑀭𑀓𑁆𑀔𑀺𑀢𑀸 [𑀦𑀢𑁆𑀣𑀺 𑀲𑀻. 𑀲𑁆𑀬𑀸. 𑀧𑀻. 𑀧𑁄𑀢𑁆𑀣𑀓𑁂𑀲𑀼] 𑀪𑀸𑀢𑀼𑀭𑀓𑁆𑀔𑀺𑀢𑀸 𑀪𑀕𑀺𑀦𑀺𑀭𑀓𑁆𑀔𑀺𑀢𑀸 𑀜𑀸𑀢𑀺𑀭𑀓𑁆𑀔𑀺𑀢𑀸 𑀕𑁄𑀢𑁆𑀢𑀭𑀓𑁆𑀔𑀺𑀢𑀸 [𑀦𑀢𑁆𑀣𑀺 𑀲𑀻. 𑀲𑁆𑀬𑀸. 𑀧𑀻. 𑀧𑁄𑀢𑁆𑀣𑀓𑁂𑀲𑀼] 𑀥𑀫𑁆𑀫𑀭𑀓𑁆𑀔𑀺𑀢𑀸 𑀲𑀲𑀸𑀫𑀺𑀓𑀸 𑀲𑀧𑀭𑀺𑀤𑀡𑁆𑀟𑀸 𑀅𑀦𑁆𑀢𑀫𑀲𑁄 𑀫𑀸𑀮𑀸𑀕𑀼𑀴𑀧𑀭𑀺𑀓𑁆𑀔𑀺𑀢𑁆𑀢𑀸𑀧𑀺, 𑀢𑀣𑀸𑀭𑀽𑀧𑀸𑀲𑀼 𑀘𑀸𑀭𑀺𑀢𑁆𑀢𑀁 𑀆𑀧𑀚𑁆𑀚𑀺𑀢𑀸 𑀳𑁄𑀢𑀺. 𑀏𑀯𑀁 𑀔𑁄, 𑀘𑀼𑀦𑁆𑀤, 𑀢𑀺𑀯𑀺𑀥𑀁 𑀓𑀸𑀬𑁂𑀦 𑀅𑀲𑁄𑀘𑁂𑀬𑁆𑀬𑀁 𑀳𑁄𑀢𑀺.

‘‘𑀓𑀣𑀜𑁆𑀘, 𑀘𑀼𑀦𑁆𑀤, 𑀘𑀢𑀼𑀩𑁆𑀩𑀺𑀥𑀁 𑀯𑀸𑀘𑀸𑀬 𑀅𑀲𑁄𑀘𑁂𑀬𑁆𑀬𑀁 𑀳𑁄𑀢𑀺? 𑀇𑀥, 𑀘𑀼𑀦𑁆𑀤, 𑀏𑀓𑀘𑁆𑀘𑁄 𑀫𑀼𑀲𑀸𑀯𑀸𑀤𑀻 𑀳𑁄𑀢𑀺. 𑀲𑀪𑀕𑁆𑀕𑀢𑁄 𑀯𑀸 𑀧𑀭𑀺𑀲𑀕𑁆𑀕𑀢𑁄 𑀯𑀸 𑀜𑀸𑀢𑀺𑀫𑀚𑁆𑀛𑀕𑀢𑁄 𑀯𑀸 𑀧𑀽𑀕𑀫𑀚𑁆𑀛𑀕𑀢𑁄 𑀯𑀸 𑀭𑀸𑀚𑀓𑀼𑀮𑀫𑀚𑁆𑀛𑀕𑀢𑁄 𑀯𑀸 𑀅𑀪𑀺𑀦𑀻𑀢𑁄 𑀲𑀓𑁆𑀔𑀺𑀧𑀼𑀝𑁆𑀞𑁄 𑁋 ‘𑀏𑀳𑀫𑁆𑀪𑁄 𑀧𑀼𑀭𑀺𑀲, 𑀬𑀁 𑀚𑀸𑀦𑀸𑀲𑀺 𑀢𑀁 𑀯𑀤𑁂𑀳𑀻’𑀢𑀺 [𑀲𑁄 𑀅𑀚𑀸𑀦𑀁 𑀯𑀸 𑀅𑀳𑀁 𑀚𑀸𑀦𑀸𑀫𑀻𑀢𑀺, 𑀚𑀸𑀦𑀁 𑀯𑀸 𑀅𑀳𑀁 𑀦 𑀚𑀸𑀦𑀸𑀫𑀻𑀢𑀺, 𑀅𑀧𑀲𑁆𑀲𑀁 𑀯𑀸 𑀅𑀳𑀁 𑀧𑀲𑁆𑀲𑀸𑀫𑀻𑀢𑀺, 𑀧𑀲𑁆𑀲𑀁 𑀯𑀸 𑀅𑀳𑀁 𑀦 𑀧𑀲𑁆𑀲𑀸𑀫𑀻𑀢𑀺 (𑀧𑀻. 𑀓.) 𑀏𑀯𑀫𑀼𑀧𑀭𑀺𑀧𑀺], 𑀲𑁄 𑀅𑀚𑀸𑀦𑀁 𑀯𑀸 𑀆𑀳 ‘𑀚𑀸𑀦𑀸𑀫𑀻’𑀢𑀺, 𑀚𑀸𑀦𑀁 𑀯𑀸 𑀆𑀳 ‘𑀦 𑀚𑀸𑀦𑀸𑀫𑀻’𑀢𑀺; 𑀅𑀧𑀲𑁆𑀲𑀁 𑀯𑀸 𑀆𑀳 ‘𑀧𑀲𑁆𑀲𑀸𑀫𑀻’𑀢𑀺, 𑀧𑀲𑁆𑀲𑀁 𑀯𑀸 𑀆𑀳 ‘𑀦 𑀧𑀲𑁆𑀲𑀸𑀫𑀻’𑀢𑀺 [𑀲𑁄 𑀅𑀚𑀸𑀦𑀁 𑀯𑀸 𑀅𑀳𑀁 𑀚𑀸𑀦𑀸𑀫𑀻𑀢𑀺, 𑀚𑀸𑀦𑀁 𑀯𑀸 𑀅𑀳𑀁 𑀦 𑀚𑀸𑀦𑀸𑀫𑀻𑀢𑀺, 𑀅𑀧𑀲𑁆𑀲𑀁 𑀯𑀸 𑀅𑀳𑀁 𑀧𑀲𑁆𑀲𑀸𑀫𑀻𑀢𑀺, 𑀧𑀲𑁆𑀲𑀁 𑀯𑀸 𑀅𑀳𑀁 𑀦 𑀧𑀲𑁆𑀲𑀸𑀫𑀻𑀢𑀺 (𑀧𑀻. 𑀓.) 𑀏𑀯𑀫𑀼𑀧𑀭𑀺𑀧𑀺]. 𑀇𑀢𑀺 𑀅𑀢𑁆𑀢𑀳𑁂𑀢𑀼 𑀯𑀸 𑀧𑀭𑀳𑁂𑀢𑀼 𑀯𑀸 𑀆𑀫𑀺𑀲𑀓𑀺𑀜𑁆𑀘𑀺𑀓𑁆𑀔𑀳𑁂𑀢𑀼 𑀯𑀸 𑀲𑀫𑁆𑀧𑀚𑀸𑀦𑀫𑀼𑀲𑀸 𑀪𑀸𑀲𑀺𑀢𑀸 𑀳𑁄𑀢𑀺.

‘‘𑀧𑀺𑀲𑀼𑀡𑀯𑀸𑀘𑁄 𑀳𑁄𑀢𑀺. 𑀇𑀢𑁄 𑀲𑀼𑀢𑁆𑀯𑀸 𑀅𑀫𑀼𑀢𑁆𑀭 𑀅𑀓𑁆𑀔𑀸𑀢𑀸 𑀇𑀫𑁂𑀲𑀁 𑀪𑁂𑀤𑀸𑀬, 𑀅𑀫𑀼𑀢𑁆𑀭 𑀯𑀸 𑀲𑀼𑀢𑁆𑀯𑀸 𑀇𑀫𑁂𑀲𑀁 𑀅𑀓𑁆𑀔𑀸𑀢𑀸 𑀅𑀫𑀽𑀲𑀁 𑀪𑁂𑀤𑀸𑀬. 𑀇𑀢𑀺 𑀲𑀫𑀕𑁆𑀕𑀸𑀦𑀁 𑀯𑀸 𑀪𑁂𑀢𑁆𑀢𑀸 [𑀪𑁂𑀤𑀸𑀢𑀸 (𑀓.)], 𑀪𑀺𑀦𑁆𑀦𑀸𑀦𑀁 𑀯𑀸 𑀅𑀦𑀼𑀧𑁆𑀧𑀤𑀸𑀢𑀸, 𑀯𑀕𑁆𑀕𑀸𑀭𑀸𑀫𑁄 𑀯𑀕𑁆𑀕𑀭𑀢𑁄 𑀯𑀕𑁆𑀕𑀦𑀦𑁆𑀤𑀻 𑀯𑀕𑁆𑀕𑀓𑀭𑀡𑀺𑀁 𑀯𑀸𑀘𑀁 𑀪𑀸𑀲𑀺𑀢𑀸 𑀳𑁄𑀢𑀺.

‘‘𑀨𑀭𑀼𑀲𑀯𑀸𑀘𑁄 𑀳𑁄𑀢𑀺. 𑀬𑀸 𑀲𑀸 𑀯𑀸𑀘𑀸 𑀅𑀡𑁆𑀟𑀓𑀸 𑀓𑀓𑁆𑀓𑀲𑀸 𑀧𑀭𑀓𑀝𑀼𑀓𑀸 𑀧𑀭𑀸𑀪𑀺𑀲𑀚𑁆𑀚𑀦𑀻 𑀓𑁄𑀥𑀲𑀸𑀫𑀦𑁆𑀢𑀸 𑀅𑀲𑀫𑀸𑀥𑀺𑀲𑀁𑀯𑀢𑁆𑀢𑀦𑀺𑀓𑀸, 𑀢𑀣𑀸𑀭𑀽𑀧𑀺𑀁 𑀯𑀸𑀘𑀁 𑀪𑀸𑀲𑀺𑀢𑀸 𑀳𑁄𑀢𑀺.

‘‘𑀲𑀫𑁆𑀨𑀧𑁆𑀧𑀮𑀸𑀧𑀻 𑀳𑁄𑀢𑀺 𑀅𑀓𑀸𑀮𑀯𑀸𑀤𑀻 𑀅𑀪𑀽𑀢𑀯𑀸𑀤𑀻 𑀅𑀦𑀢𑁆𑀣𑀯𑀸𑀤𑀻 𑀅𑀥𑀫𑁆𑀫𑀯𑀸𑀤𑀻 𑀅𑀯𑀺𑀦𑀬𑀯𑀸𑀤𑀻; 𑀅𑀦𑀺𑀥𑀸𑀦𑀯𑀢𑀺𑀁 𑀯𑀸𑀘𑀁 𑀪𑀸𑀲𑀺𑀢𑀸 𑀳𑁄𑀢𑀺 𑀅𑀓𑀸𑀮𑁂𑀦 𑀅𑀦𑀧𑀤𑁂𑀲𑀁 𑀅𑀧𑀭𑀺𑀬𑀦𑁆𑀢𑀯𑀢𑀺𑀁 𑀅𑀦𑀢𑁆𑀣𑀲𑀁𑀳𑀺𑀢𑀁. 𑀏𑀯𑀁 𑀔𑁄, 𑀘𑀼𑀦𑁆𑀤, 𑀘𑀢𑀼𑀩𑁆𑀩𑀺𑀥𑀁 𑀯𑀸𑀘𑀸𑀬 𑀅𑀲𑁄𑀘𑁂𑀬𑁆𑀬𑀁 𑀳𑁄𑀢𑀺.

‘‘𑀓𑀣𑀜𑁆𑀘, 𑀘𑀼𑀦𑁆𑀤, 𑀢𑀺𑀯𑀺𑀥𑀁 𑀫𑀦𑀲𑀸 𑀅𑀲𑁄𑀘𑁂𑀬𑁆𑀬𑀁 𑀳𑁄𑀢𑀺? 𑀇𑀥, 𑀘𑀼𑀦𑁆𑀤, 𑀏𑀓𑀘𑁆𑀘𑁄 𑀅𑀪𑀺𑀚𑁆𑀛𑀸𑀮𑀼 𑀳𑁄𑀢𑀺. 𑀬𑀁 𑀢𑀁 𑀧𑀭𑀲𑁆𑀲 𑀧𑀭𑀯𑀺𑀢𑁆𑀢𑀽𑀧𑀓𑀭𑀡𑀁 𑀢𑀁 𑀅𑀪𑀺𑀚𑁆𑀛𑀸𑀢𑀸 [𑀅𑀪𑀺𑀚𑁆𑀛𑀺𑀢𑀸 (𑀓.) 𑀫. 𑀦𑀺. 𑁧.𑁪𑁪𑁦 𑀧𑀲𑁆𑀲𑀺𑀢𑀩𑁆𑀩𑀁] 𑀳𑁄𑀢𑀺 𑁋 ‘𑀅𑀳𑁄 𑀯𑀢 𑀬𑀁 𑀧𑀭𑀲𑁆𑀲 𑀢𑀁 𑀫𑀫𑀲𑁆𑀲𑀸’𑀢𑀺.

‘‘𑀩𑁆𑀬𑀸𑀧𑀦𑁆𑀦𑀘𑀺𑀢𑁆𑀢𑁄 𑀳𑁄𑀢𑀺 𑀧𑀤𑀼𑀝𑁆𑀞𑀫𑀦𑀲𑀗𑁆𑀓𑀧𑁆𑀧𑁄 𑁋 ‘𑀇𑀫𑁂 𑀲𑀢𑁆𑀢𑀸 𑀳𑀜𑁆𑀜𑀦𑁆𑀢𑀼 𑀯𑀸 𑀩𑀚𑁆𑀛𑀦𑁆𑀢𑀼 𑀯𑀸 𑀉𑀘𑁆𑀙𑀺𑀚𑁆𑀚𑀦𑁆𑀢𑀼 𑀯𑀸 𑀯𑀺𑀦𑀲𑁆𑀲𑀦𑁆𑀢𑀼 𑀯𑀸 𑀫𑀸 𑀯𑀸 𑀅𑀳𑁂𑀲𑀼’𑀦𑁆𑀢𑀺 [𑀫𑀸 𑀯𑀸 𑀅𑀳𑁂𑀲𑀼𑀁 𑀇𑀢𑀺 𑀯𑀸 𑀢𑀺 (𑀲𑀻. 𑀧𑀻. 𑀓.)].

‘‘𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑁄 𑀳𑁄𑀢𑀺 𑀯𑀺𑀧𑀭𑀻𑀢𑀤𑀲𑁆𑀲𑀦𑁄 𑁋 ‘𑀦𑀢𑁆𑀣𑀺 𑀤𑀺𑀦𑁆𑀦𑀁, 𑀦𑀢𑁆𑀣𑀺 𑀬𑀺𑀝𑁆𑀞𑀁, 𑀦𑀢𑁆𑀣𑀺 𑀳𑀼𑀢𑀁, 𑀦𑀢𑁆𑀣𑀺 𑀲𑀼𑀓𑀝𑀤𑀼𑀓𑁆𑀓𑀝𑀸𑀦𑀁 [𑀦𑀢𑁆𑀣𑁂𑀢𑁆𑀣 𑀧𑀸𑀞𑀪𑁂𑀤𑁄] 𑀓𑀫𑁆𑀫𑀸𑀦𑀁 𑀨𑀮𑀁 𑀯𑀺𑀧𑀸𑀓𑁄, 𑀦𑀢𑁆𑀣𑀺 𑀅𑀬𑀁 𑀮𑁄𑀓𑁄, 𑀦𑀢𑁆𑀣𑀺 𑀧𑀭𑁄 𑀮𑁄𑀓𑁄, 𑀦𑀢𑁆𑀣𑀺 𑀫𑀸𑀢𑀸, 𑀦𑀢𑁆𑀣𑀺 𑀧𑀺𑀢𑀸, 𑀦𑀢𑁆𑀣𑀺 𑀲𑀢𑁆𑀢𑀸 𑀑𑀧𑀧𑀸𑀢𑀺𑀓𑀸, 𑀦𑀢𑁆𑀣𑀺 𑀮𑁄𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀲𑀫𑁆𑀫𑀕𑁆𑀕𑀢𑀸 𑀲𑀫𑁆𑀫𑀸𑀧𑀝𑀺𑀧𑀦𑁆𑀦𑀸 𑀬𑁂 𑀇𑀫𑀜𑁆𑀘 𑀮𑁄𑀓𑀁 𑀧𑀭𑀜𑁆𑀘 𑀮𑁄𑀓𑀁 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀧𑀯𑁂𑀤𑁂𑀦𑁆𑀢𑀻’𑀢𑀺. 𑀏𑀯𑀁 𑀔𑁄, 𑀘𑀼𑀦𑁆𑀤, 𑀫𑀦𑀲𑀸 𑀢𑀺𑀯𑀺𑀥𑀁 𑀅𑀲𑁄𑀘𑁂𑀬𑁆𑀬𑀁 𑀳𑁄𑀢𑀺.

‘‘𑀇𑀫𑁂 𑀔𑁄, 𑀘𑀼𑀦𑁆𑀤, 𑀤𑀲 𑀅𑀓𑀼𑀲𑀮𑀓𑀫𑁆𑀫𑀧𑀣𑀸 [𑀅𑀓𑀼𑀲𑀮𑀸 𑀓𑀫𑁆𑀫𑀧𑀣𑀸 (?)]. 𑀇𑀫𑁂𑀳𑀺 𑀔𑁄, 𑀘𑀼𑀦𑁆𑀤, 𑀤𑀲𑀳𑀺 𑀅𑀓𑀼𑀲𑀮𑁂𑀳𑀺 𑀓𑀫𑁆𑀫𑀧𑀣𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀓𑀸𑀮𑀲𑁆𑀲𑁂𑀯 𑀉𑀝𑁆𑀞𑀳𑀦𑁆𑀢𑁄𑀯 𑀲𑀬𑀦𑀫𑁆𑀳𑀸 𑀧𑀣𑀯𑀺𑀁 𑀘𑁂𑀧𑀺 𑀆𑀫𑀲𑀢𑀺, 𑀅𑀲𑀼𑀘𑀺𑀬𑁂𑀯 𑀳𑁄𑀢𑀺; 𑀦𑁄 𑀘𑁂𑀧𑀺 𑀧𑀣𑀯𑀺𑀁 𑀆𑀫𑀲𑀢𑀺, 𑀅𑀲𑀼𑀘𑀺𑀬𑁂𑀯 𑀳𑁄𑀢𑀺.

‘‘𑀅𑀮𑁆𑀮𑀸𑀦𑀺 𑀘𑁂𑀧𑀺 𑀕𑁄𑀫𑀬𑀸𑀦𑀺 𑀆𑀫𑀲𑀢𑀺, 𑀅𑀲𑀼𑀘𑀺𑀬𑁂𑀯 𑀳𑁄𑀢𑀺; 𑀦𑁄 𑀘𑁂𑀧𑀺 𑀅𑀮𑁆𑀮𑀸𑀦𑀺 𑀕𑁄𑀫𑀬𑀸𑀦𑀺 𑀆𑀫𑀲𑀢𑀺, 𑀅𑀲𑀼𑀘𑀺𑀬𑁂𑀯 𑀳𑁄𑀢𑀺.

‘‘𑀳𑀭𑀺𑀢𑀸𑀦𑀺 𑀘𑁂𑀧𑀺 𑀢𑀺𑀡𑀸𑀦𑀺 𑀆𑀫𑀲𑀢𑀺, 𑀅𑀲𑀼𑀘𑀺𑀬𑁂𑀯 𑀳𑁄𑀢𑀺; 𑀦𑁄 𑀘𑁂𑀧𑀺 𑀳𑀭𑀺𑀢𑀸𑀦𑀺 𑀢𑀺𑀡𑀸𑀦𑀺 𑀆𑀫𑀲𑀢𑀺, 𑀅𑀲𑀼𑀘𑀺𑀬𑁂𑀯 𑀳𑁄𑀢𑀺.

‘‘𑀅𑀕𑁆𑀕𑀺𑀁 𑀘𑁂𑀧𑀺 𑀧𑀭𑀺𑀘𑀭𑀢𑀺, 𑀅𑀲𑀼𑀘𑀺𑀬𑁂𑀯 𑀳𑁄𑀢𑀺, 𑀦𑁄 𑀘𑁂𑀧𑀺 𑀅𑀕𑁆𑀕𑀺𑀁 𑀧𑀭𑀺𑀘𑀭𑀢𑀺, 𑀅𑀲𑀼𑀘𑀺𑀬𑁂𑀯 𑀳𑁄𑀢𑀺.

‘‘𑀧𑀜𑁆𑀚𑀮𑀺𑀓𑁄 𑀘𑁂𑀧𑀺 𑀆𑀤𑀺𑀘𑁆𑀘𑀁 𑀦𑀫𑀲𑁆𑀲𑀢𑀺, 𑀅𑀲𑀼𑀘𑀺𑀬𑁂𑀯 𑀳𑁄𑀢𑀺; 𑀦𑁄 𑀘𑁂𑀧𑀺 𑀧𑀜𑁆𑀚𑀮𑀺𑀓𑁄 𑀆𑀤𑀺𑀘𑁆𑀘𑀁 𑀦𑀫𑀲𑁆𑀲𑀢𑀺, 𑀅𑀲𑀼𑀘𑀺𑀬𑁂𑀯 𑀳𑁄𑀢𑀺.

‘‘𑀲𑀸𑀬𑀢𑀢𑀺𑀬𑀓𑀁 𑀘𑁂𑀧𑀺 𑀉𑀤𑀓𑀁 𑀑𑀭𑁄𑀳𑀢𑀺, 𑀅𑀲𑀼𑀘𑀺𑀬𑁂𑀯 𑀳𑁄𑀢𑀺; 𑀦𑁄 𑀘𑁂𑀧𑀺 𑀲𑀸𑀬𑀢𑀢𑀺𑀬𑀓𑀁 𑀉𑀤𑀓𑀁 𑀑𑀭𑁄𑀳𑀢𑀺, 𑀅𑀲𑀼𑀘𑀺𑀬𑁂𑀯 𑀳𑁄𑀢𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀇𑀫𑁂, 𑀘𑀼𑀦𑁆𑀤, 𑀤𑀲 𑀅𑀓𑀼𑀲𑀮𑀓𑀫𑁆𑀫𑀧𑀣𑀸 𑀅𑀲𑀼𑀘𑀻𑀬𑁂𑀯 [𑀅𑀲𑀼𑀘𑀺𑀘𑁆𑀘𑁂𑀯 (𑀲𑁆𑀬𑀸.)] 𑀳𑁄𑀦𑁆𑀢𑀺 𑀅𑀲𑀼𑀘𑀺𑀓𑀭𑀡𑀸 𑀘.

‘‘𑀇𑀫𑁂𑀲𑀁 𑀧𑀦, 𑀘𑀼𑀦𑁆𑀤, 𑀤𑀲𑀦𑁆𑀦𑀁 𑀅𑀓𑀼𑀲𑀮𑀸𑀦𑀁 𑀓𑀫𑁆𑀫𑀧𑀣𑀸𑀦𑀁 𑀲𑀫𑀦𑁆𑀦𑀸𑀕𑀫𑀦𑀳𑁂𑀢𑀼 𑀦𑀺𑀭𑀬𑁄 𑀧𑀜𑁆𑀜𑀸𑀬𑀢𑀺, 𑀢𑀺𑀭𑀘𑁆𑀙𑀸𑀦𑀬𑁄𑀦𑀺 𑀧𑀜𑁆𑀜𑀸𑀬𑀢𑀺, 𑀧𑁂𑀢𑁆𑀢𑀺𑀯𑀺𑀲𑀬𑁄 𑀧𑀜𑁆𑀜𑀸𑀬𑀢𑀺, 𑀬𑀸 𑀯𑀸 [𑀬𑀸 𑀘 (𑀓.)] 𑀧𑀦𑀜𑁆𑀜𑀸𑀧𑀺 𑀓𑀸𑀘𑀺 𑀤𑀼𑀕𑁆𑀕𑀢𑀺𑀬𑁄 [𑀤𑀼𑀕𑁆𑀕𑀢𑀺 𑀳𑁄𑀢𑀺 (𑀲𑁆𑀬𑀸. 𑀓.)].

‘‘𑀢𑀺𑀯𑀺𑀥𑀁 𑀔𑁄, 𑀘𑀼𑀦𑁆𑀤, 𑀓𑀸𑀬𑁂𑀦 𑀲𑁄𑀘𑁂𑀬𑁆𑀬𑀁 𑀳𑁄𑀢𑀺; 𑀘𑀢𑀼𑀩𑁆𑀩𑀺𑀥𑀁 𑀯𑀸𑀘𑀸𑀬 𑀲𑁄𑀘𑁂𑀬𑁆𑀬𑀁 𑀳𑁄𑀢𑀺; 𑀢𑀺𑀯𑀺𑀥𑀁 𑀫𑀦𑀲𑀸 𑀲𑁄𑀘𑁂𑀬𑁆𑀬𑀁 𑀳𑁄𑀢𑀺.

‘‘𑀓𑀣𑀁, 𑀘𑀼𑀦𑁆𑀤, 𑀢𑀺𑀯𑀺𑀥𑀁 𑀓𑀸𑀬𑁂𑀦 𑀲𑁄𑀘𑁂𑀬𑁆𑀬𑀁 𑀳𑁄𑀢𑀺? 𑀇𑀥, 𑀘𑀼𑀦𑁆𑀤, 𑀏𑀓𑀘𑁆𑀘𑁄 𑀧𑀸𑀡𑀸𑀢𑀺𑀧𑀸𑀢𑀁 𑀧𑀳𑀸𑀬 𑀧𑀸𑀡𑀸𑀢𑀺𑀧𑀸𑀢𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺 𑀦𑀺𑀳𑀺𑀢𑀤𑀡𑁆𑀟𑁄 𑀦𑀺𑀳𑀺𑀢𑀲𑀢𑁆𑀣𑁄, 𑀮𑀚𑁆𑀚𑀻 𑀤𑀬𑀸𑀧𑀦𑁆𑀦𑁄, 𑀲𑀩𑁆𑀩𑀧𑀸𑀡𑀪𑀽𑀢𑀳𑀺𑀢𑀸𑀦𑀼𑀓𑀫𑁆𑀧𑀻 𑀯𑀺𑀳𑀭𑀢𑀺.

‘‘𑀅𑀤𑀺𑀦𑁆𑀦𑀸𑀤𑀸𑀦𑀁 𑀧𑀳𑀸𑀬, 𑀅𑀤𑀺𑀦𑁆𑀦𑀸𑀤𑀸𑀦𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺. 𑀬𑀁 𑀢𑀁 𑀧𑀭𑀲𑁆𑀲 𑀧𑀭𑀯𑀺𑀢𑁆𑀢𑀽𑀧𑀓𑀭𑀡𑀁 𑀕𑀸𑀫𑀕𑀢𑀁 𑀯𑀸 𑀅𑀭𑀜𑁆𑀜𑀕𑀢𑀁 𑀯𑀸, 𑀦 𑀢𑀁 𑀅𑀤𑀺𑀦𑁆𑀦𑀁 [𑀢𑀁 𑀦𑀸𑀤𑀺𑀦𑁆𑀦𑀁 (𑀓. 𑀲𑀻., 𑀫. 𑀦𑀺. 𑁧.𑁪𑁪𑁧)] 𑀣𑁂𑀬𑁆𑀬𑀲𑀗𑁆𑀔𑀸𑀢𑀁 𑀆𑀤𑀸𑀢𑀸 𑀳𑁄𑀢𑀺.

‘‘𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀁 𑀧𑀳𑀸𑀬, 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺 𑀬𑀸 𑀢𑀸 𑀫𑀸𑀢𑀼𑀭𑀓𑁆𑀔𑀺𑀢𑀸 𑀧𑀺𑀢𑀼𑀭𑀓𑁆𑀔𑀺𑀢𑀸 𑀫𑀸𑀢𑀸𑀧𑀺𑀢𑀼𑀭𑀓𑁆𑀔𑀺𑀢𑀸 𑀪𑀸𑀢𑀼𑀭𑀓𑁆𑀔𑀺𑀢𑀸 𑀪𑀕𑀺𑀦𑀺𑀭𑀓𑁆𑀔𑀺𑀢𑀸 𑀜𑀸𑀢𑀺𑀭𑀓𑁆𑀔𑀺𑀢𑀸 𑀕𑁄𑀢𑁆𑀢𑀭𑀓𑁆𑀔𑀺𑀢𑀸 𑀥𑀫𑁆𑀫𑀭𑀓𑁆𑀔𑀺𑀢𑀸 𑀲𑀲𑀸𑀫𑀺𑀓𑀸 𑀲𑀧𑀭𑀺𑀤𑀡𑁆𑀟𑀸 𑀅𑀦𑁆𑀢𑀫𑀲𑁄 𑀫𑀸𑀮𑀸𑀕𑀼𑀴𑀧𑀭𑀺𑀓𑁆𑀔𑀺𑀢𑁆𑀢𑀸𑀧𑀺, 𑀢𑀣𑀸𑀭𑀽𑀧𑀸𑀲𑀼 𑀦 𑀘𑀸𑀭𑀺𑀢𑁆𑀢𑀁 𑀆𑀧𑀚𑁆𑀚𑀺𑀢𑀸 𑀳𑁄𑀢𑀺. 𑀏𑀯𑀁 𑀔𑁄, 𑀘𑀼𑀦𑁆𑀤, 𑀢𑀺𑀯𑀺𑀥𑀁 𑀓𑀸𑀬𑁂𑀦 𑀲𑁄𑀘𑁂𑀬𑁆𑀬𑀁 𑀳𑁄𑀢𑀺.

‘‘𑀓𑀣𑀜𑁆𑀘, 𑀘𑀼𑀦𑁆𑀤, 𑀘𑀢𑀼𑀩𑁆𑀩𑀺𑀥𑀁 𑀯𑀸𑀘𑀸𑀬 𑀲𑁄𑀘𑁂𑀬𑁆𑀬𑀁 𑀳𑁄𑀢𑀺? 𑀇𑀥, 𑀘𑀼𑀦𑁆𑀤, 𑀏𑀓𑀘𑁆𑀘𑁄 𑀫𑀼𑀲𑀸𑀯𑀸𑀤𑀁 𑀧𑀳𑀸𑀬 𑀫𑀼𑀲𑀸𑀯𑀸𑀤𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺. 𑀲𑀪𑀕𑁆𑀕𑀢𑁄 𑀯𑀸 𑀧𑀭𑀺𑀲𑀕𑁆𑀕𑀢𑁄 𑀯𑀸 𑀜𑀸𑀢𑀺𑀫𑀚𑁆𑀛𑀕𑀢𑁄 𑀯𑀸 𑀧𑀽𑀕𑀫𑀚𑁆𑀛𑀕𑀢𑁄 𑀯𑀸 𑀭𑀸𑀚𑀓𑀼𑀮𑀫𑀚𑁆𑀛𑀕𑀢𑁄 𑀯𑀸 𑀅𑀪𑀺𑀦𑀻𑀢𑁄 𑀲𑀓𑁆𑀔𑀺𑀧𑀼𑀝𑁆𑀞𑁄 𑁋 ‘𑀏𑀳𑀫𑁆𑀪𑁄 𑀧𑀼𑀭𑀺𑀲, 𑀬𑀁 𑀚𑀸𑀦𑀸𑀲𑀺 𑀢𑀁 𑀯𑀤𑁂𑀳𑀻’𑀢𑀺, 𑀲𑁄 𑀅𑀚𑀸𑀦𑀁 𑀯𑀸 𑀆𑀳 ‘𑀦 𑀚𑀸𑀦𑀸𑀫𑀻’𑀢𑀺, 𑀚𑀸𑀦𑀁 𑀯𑀸 𑀆𑀳 ‘𑀚𑀸𑀦𑀸𑀫𑀻’𑀢𑀺, 𑀅𑀧𑀲𑁆𑀲𑀁 𑀯𑀸 𑀆𑀳 ‘𑀦 𑀧𑀲𑁆𑀲𑀸𑀫𑀻’𑀢𑀺, 𑀧𑀲𑁆𑀲𑀁 𑀯𑀸 𑀆𑀳 ‘𑀧𑀲𑁆𑀲𑀸𑀫𑀻’𑀢𑀺. 𑀇𑀢𑀺 𑀅𑀢𑁆𑀢𑀳𑁂𑀢𑀼 𑀯𑀸 𑀧𑀭𑀳𑁂𑀢𑀼 𑀯𑀸 𑀆𑀫𑀺𑀲𑀓𑀺𑀜𑁆𑀘𑀺𑀓𑁆𑀔𑀳𑁂𑀢𑀼 𑀯𑀸 𑀦 𑀲𑀫𑁆𑀧𑀚𑀸𑀦𑀫𑀼𑀲𑀸 𑀪𑀸𑀲𑀺𑀢𑀸 𑀳𑁄𑀢𑀺.

‘‘𑀧𑀺𑀲𑀼𑀡𑀁 𑀯𑀸𑀘𑀁 𑀧𑀳𑀸𑀬, 𑀧𑀺𑀲𑀼𑀡𑀸𑀬 𑀯𑀸𑀘𑀸𑀬 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺 𑁋 𑀦 𑀇𑀢𑁄 𑀲𑀼𑀢𑁆𑀯𑀸 𑀅𑀫𑀼𑀢𑁆𑀭 𑀅𑀓𑁆𑀔𑀸𑀢𑀸 𑀇𑀫𑁂𑀲𑀁 𑀪𑁂𑀤𑀸𑀬, 𑀦 𑀅𑀫𑀼𑀢𑁆𑀭 𑀯𑀸 𑀲𑀼𑀢𑁆𑀯𑀸 𑀇𑀫𑁂𑀲𑀁 𑀅𑀓𑁆𑀔𑀸𑀢𑀸 𑀅𑀫𑀽𑀲𑀁 𑀪𑁂𑀤𑀸𑀬. 𑀇𑀢𑀺 𑀪𑀺𑀦𑁆𑀦𑀸𑀦𑀁 𑀯𑀸 𑀲𑀦𑁆𑀥𑀸𑀢𑀸 𑀲𑀳𑀺𑀢𑀸𑀦𑀁 𑀯𑀸 𑀅𑀦𑀼𑀧𑁆𑀧𑀤𑀸𑀢𑀸 𑀲𑀫𑀕𑁆𑀕𑀸𑀭𑀸𑀫𑁄 𑀲𑀫𑀕𑁆𑀕𑀭𑀢𑁄 𑀲𑀫𑀕𑁆𑀕𑀦𑀦𑁆𑀤𑀻 𑀲𑀫𑀕𑁆𑀕𑀓𑀭𑀡𑀺𑀁 𑀯𑀸𑀘𑀁 𑀪𑀸𑀲𑀺𑀢𑀸 𑀳𑁄𑀢𑀺.

‘‘𑀨𑀭𑀼𑀲𑀁 𑀯𑀸𑀘𑀁 𑀧𑀳𑀸𑀬, 𑀨𑀭𑀼𑀲𑀸𑀬 𑀯𑀸𑀘𑀸𑀬 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺. 𑀬𑀸 𑀲𑀸 𑀯𑀸𑀘𑀸 𑀦𑁂𑀮𑀸 𑀓𑀡𑁆𑀡𑀲𑀼𑀔𑀸 𑀧𑁂𑀫𑀦𑀻𑀬𑀸 𑀳𑀤𑀬𑀗𑁆𑀕𑀫𑀸 𑀧𑁄𑀭𑀻 𑀩𑀳𑀼𑀚𑀦𑀓𑀦𑁆𑀢𑀸 𑀩𑀳𑀼𑀚𑀦𑀫𑀦𑀸𑀧𑀸, 𑀢𑀣𑀸𑀭𑀽𑀧𑀺𑀁 𑀯𑀸𑀘𑀁 𑀪𑀸𑀲𑀺𑀢𑀸 𑀳𑁄𑀢𑀺.

‘‘𑀲𑀫𑁆𑀨𑀧𑁆𑀧𑀮𑀸𑀧𑀁 𑀧𑀳𑀸𑀬, 𑀲𑀫𑁆𑀨𑀧𑁆𑀧𑀮𑀸𑀧𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺 𑀓𑀸𑀮𑀯𑀸𑀤𑀻 𑀪𑀽𑀢𑀯𑀸𑀤𑀻 𑀅𑀢𑁆𑀣𑀯𑀸𑀤𑀻 𑀥𑀫𑁆𑀫𑀯𑀸𑀤𑀻 𑀯𑀺𑀦𑀬𑀯𑀸𑀤𑀻; 𑀦𑀺𑀥𑀸𑀦𑀯𑀢𑀺𑀁 𑀯𑀸𑀘𑀁 𑀪𑀸𑀲𑀺𑀢𑀸 𑀳𑁄𑀢𑀺 𑀓𑀸𑀮𑁂𑀦 𑀲𑀸𑀧𑀤𑁂𑀲𑀁 𑀧𑀭𑀺𑀬𑀦𑁆𑀢𑀯𑀢𑀺𑀁 𑀅𑀢𑁆𑀣𑀲𑀁𑀳𑀺𑀢𑀁. 𑀏𑀯𑀁 𑀔𑁄, 𑀘𑀼𑀦𑁆𑀤, 𑀘𑀢𑀼𑀩𑁆𑀩𑀺𑀥𑀁 𑀯𑀸𑀘𑀸𑀬 𑀲𑁄𑀘𑁂𑀬𑁆𑀬𑀁 𑀳𑁄𑀢𑀺.

‘‘𑀓𑀣𑀜𑁆𑀘, 𑀘𑀼𑀦𑁆𑀤, 𑀢𑀺𑀯𑀺𑀥𑀁 𑀫𑀦𑀲𑀸 𑀲𑁄𑀘𑁂𑀬𑁆𑀬𑀁 𑀳𑁄𑀢𑀺? 𑀇𑀥, 𑀘𑀼𑀦𑁆𑀤, 𑀏𑀓𑀘𑁆𑀘𑁄 𑀅𑀦𑀪𑀺𑀚𑁆𑀛𑀸𑀮𑀼 𑀳𑁄𑀢𑀺. 𑀬𑀁 𑀢𑀁 𑀧𑀭𑀲𑁆𑀲 𑀧𑀭𑀯𑀺𑀢𑁆𑀢𑀽𑀧𑀓𑀭𑀡𑀁 𑀢𑀁 𑀅𑀦𑀪𑀺𑀚𑁆𑀛𑀺𑀢𑀸 𑀳𑁄𑀢𑀺 𑁋 ‘𑀅𑀳𑁄 𑀯𑀢 𑀬𑀁 𑀧𑀭𑀲𑁆𑀲 𑀢𑀁 𑀫𑀫𑀲𑁆𑀲𑀸’𑀢𑀺.

‘‘𑀅𑀩𑁆𑀬𑀸𑀧𑀦𑁆𑀦𑀘𑀺𑀢𑁆𑀢𑁄 𑀳𑁄𑀢𑀺 𑀅𑀧𑁆𑀧𑀤𑀼𑀝𑁆𑀞𑀫𑀦𑀲𑀗𑁆𑀓𑀧𑁆𑀧𑁄 𑁋 ‘𑀇𑀫𑁂 𑀲𑀢𑁆𑀢𑀸 𑀅𑀯𑁂𑀭𑀸 𑀳𑁄𑀦𑁆𑀢𑀼 [𑀇𑀤𑀁 𑀧𑀤𑀁 𑀲𑀻. 𑀲𑁆𑀬𑀸. 𑀧𑀻. 𑀧𑁄𑀢𑁆𑀣𑀓𑁂𑀲𑀼 𑀦𑀢𑁆𑀣𑀺, 𑀢𑀣𑀸 𑀫. 𑀦𑀺. 𑁧.𑁪𑁪𑁧] 𑀅𑀩𑁆𑀬𑀸𑀧𑀚𑁆𑀚𑀸, 𑀅𑀦𑀻𑀖𑀸 𑀲𑀼𑀔𑀻 𑀅𑀢𑁆𑀢𑀸𑀦𑀁 𑀧𑀭𑀺𑀳𑀭𑀦𑁆𑀢𑀽’𑀢𑀺.

‘‘𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑁄 𑀳𑁄𑀢𑀺 𑀅𑀯𑀺𑀧𑀭𑀻𑀢𑀤𑀲𑁆𑀲𑀦𑁄 𑁋 ‘𑀅𑀢𑁆𑀣𑀺 𑀤𑀺𑀦𑁆𑀦𑀁, 𑀅𑀢𑁆𑀣𑀺 𑀬𑀺𑀝𑁆𑀞𑀁, 𑀅𑀢𑁆𑀣𑀺 𑀳𑀼𑀢𑀁, 𑀅𑀢𑁆𑀣𑀺 𑀲𑀼𑀓𑀝𑀤𑀼𑀓𑁆𑀓𑀝𑀸𑀦𑀁 𑀓𑀫𑁆𑀫𑀸𑀦𑀁 𑀨𑀮𑀁 𑀯𑀺𑀧𑀸𑀓𑁄, 𑀅𑀢𑁆𑀣𑀺 𑀅𑀬𑀁 𑀮𑁄𑀓𑁄, 𑀅𑀢𑁆𑀣𑀺 𑀧𑀭𑁄 𑀮𑁄𑀓𑁄, 𑀅𑀢𑁆𑀣𑀺 𑀫𑀸𑀢𑀸, 𑀅𑀢𑁆𑀣𑀺 𑀧𑀺𑀢𑀸, 𑀅𑀢𑁆𑀣𑀺 𑀲𑀢𑁆𑀢𑀸 𑀑𑀧𑀧𑀸𑀢𑀺𑀓𑀸, 𑀅𑀢𑁆𑀣𑀺 𑀮𑁄𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀲𑀫𑁆𑀫𑀕𑁆𑀕𑀢𑀸 𑀲𑀫𑁆𑀫𑀸𑀧𑀝𑀺𑀧𑀦𑁆𑀦𑀸 𑀬𑁂 𑀇𑀫𑀜𑁆𑀘 𑀮𑁄𑀓𑀁 𑀧𑀭𑀜𑁆𑀘 𑀮𑁄𑀓𑀁 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀧𑀯𑁂𑀤𑁂𑀦𑁆𑀢𑀻’𑀢𑀺. 𑀏𑀯𑀁 𑀔𑁄, 𑀘𑀼𑀦𑁆𑀤, 𑀢𑀺𑀯𑀺𑀥𑀁 𑀫𑀦𑀲𑀸 𑀲𑁄𑀘𑁂𑀬𑁆𑀬𑀁 𑀳𑁄𑀢𑀺.

‘‘𑀇𑀫𑁂 𑀔𑁄, 𑀘𑀼𑀦𑁆𑀤, 𑀤𑀲 𑀓𑀼𑀲𑀮𑀓𑀫𑁆𑀫𑀧𑀣𑀸. 𑀇𑀫𑁂𑀳𑀺 𑀔𑁄, 𑀘𑀼𑀦𑁆𑀤, 𑀤𑀲𑀳𑀺 𑀓𑀼𑀲𑀮𑁂𑀳𑀺 𑀓𑀫𑁆𑀫𑀧𑀣𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀓𑀸𑀮𑀲𑁆𑀲𑁂𑀯 𑀉𑀝𑁆𑀞𑀳𑀦𑁆𑀢𑁄𑀯 𑀲𑀬𑀦𑀫𑁆𑀳𑀸 𑀧𑀣𑀯𑀺𑀁 𑀘𑁂𑀧𑀺 𑀆𑀫𑀲𑀢𑀺, 𑀲𑀼𑀘𑀺𑀬𑁂𑀯 𑀳𑁄𑀢𑀺; 𑀦𑁄 𑀘𑁂𑀧𑀺 𑀧𑀣𑀯𑀺𑀁 𑀆𑀫𑀲𑀢𑀺, 𑀲𑀼𑀘𑀺𑀬𑁂𑀯 𑀳𑁄𑀢𑀺.

‘‘𑀅𑀮𑁆𑀮𑀸𑀦𑀺 𑀘𑁂𑀧𑀺 𑀕𑁄𑀫𑀬𑀸𑀦𑀺 𑀆𑀫𑀲𑀢𑀺, 𑀲𑀼𑀘𑀺𑀬𑁂𑀯 𑀳𑁄𑀢𑀺; 𑀦𑁄 𑀘𑁂𑀧𑀺 𑀅𑀮𑁆𑀮𑀸𑀦𑀺 𑀕𑁄𑀫𑀬𑀸𑀦𑀺 𑀆𑀫𑀲𑀢𑀺, 𑀲𑀼𑀘𑀺𑀬𑁂𑀯 𑀳𑁄𑀢𑀺.

‘‘𑀳𑀭𑀺𑀢𑀸𑀦𑀺 𑀘𑁂𑀧𑀺 𑀢𑀺𑀡𑀸𑀦𑀺 𑀆𑀫𑀲𑀢𑀺, 𑀲𑀼𑀘𑀺𑀬𑁂𑀯 𑀳𑁄𑀢𑀺; 𑀦𑁄 𑀘𑁂𑀧𑀺 𑀳𑀭𑀺𑀢𑀸𑀦𑀺 𑀢𑀺𑀡𑀸𑀦𑀺 𑀆𑀫𑀲𑀢𑀺, 𑀲𑀼𑀘𑀺𑀬𑁂𑀯 𑀳𑁄𑀢𑀺.

‘‘𑀅𑀕𑁆𑀕𑀺𑀁 𑀘𑁂𑀧𑀺 𑀧𑀭𑀺𑀘𑀭𑀢𑀺, 𑀲𑀼𑀘𑀺𑀬𑁂𑀯 𑀳𑁄𑀢𑀺; 𑀦𑁄 𑀘𑁂𑀧𑀺 𑀅𑀕𑁆𑀕𑀺𑀁 𑀧𑀭𑀺𑀘𑀭𑀢𑀺, 𑀲𑀼𑀘𑀺𑀬𑁂𑀯 𑀳𑁄𑀢𑀺.

‘‘𑀧𑀜𑁆𑀚𑀮𑀺𑀓𑁄 𑀘𑁂𑀧𑀺 𑀆𑀤𑀺𑀘𑁆𑀘𑀁 𑀦𑀫𑀲𑁆𑀲𑀢𑀺, 𑀲𑀼𑀘𑀺𑀬𑁂𑀯 𑀳𑁄𑀢𑀺; 𑀦𑁄 𑀘𑁂𑀧𑀺 𑀧𑀜𑁆𑀚𑀮𑀺𑀓𑁄 𑀆𑀤𑀺𑀘𑁆𑀘𑀁 𑀦𑀫𑀲𑁆𑀲𑀢𑀺, 𑀲𑀼𑀘𑀺𑀬𑁂𑀯 𑀳𑁄𑀢𑀺.

‘‘𑀲𑀸𑀬𑀢𑀢𑀺𑀬𑀓𑀁 𑀘𑁂𑀧𑀺 𑀉𑀤𑀓𑀁 𑀑𑀭𑁄𑀳𑀢𑀺, 𑀲𑀼𑀘𑀺𑀬𑁂𑀯 𑀳𑁄𑀢𑀺; 𑀦𑁄 𑀘𑁂𑀧𑀺 𑀲𑀸𑀬𑀢𑀢𑀺𑀬𑀓𑀁 𑀉𑀤𑀓𑀁 𑀑𑀭𑁄𑀳𑀢𑀺, 𑀲𑀼𑀘𑀺𑀬𑁂𑀯 𑀳𑁄𑀢𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀇𑀫𑁂, 𑀘𑀼𑀦𑁆𑀤, 𑀤𑀲 𑀓𑀼𑀲𑀮𑀓𑀫𑁆𑀫𑀧𑀣𑀸 𑀲𑀼𑀘𑀻𑀬𑁂𑀯 𑀳𑁄𑀦𑁆𑀢𑀺 𑀲𑀼𑀘𑀺𑀓𑀭𑀡𑀸 𑀘.