𑁩. 𑀤𑀼𑀢𑀺𑀬𑀯𑀺𑀯𑀸𑀤𑀫𑀽𑀮𑀲𑀼𑀢𑁆𑀢𑀁

𑁪𑁩. ‘‘𑀓𑀢𑀺 𑀦𑀼 𑀔𑁄, 𑀪𑀦𑁆𑀢𑁂, 𑀯𑀺𑀯𑀸𑀤𑀫𑀽𑀮𑀸𑀦𑀻’’𑀢𑀺? ‘‘𑀤𑀲 𑀔𑁄, 𑀉𑀧𑀸𑀮𑀺, 𑀯𑀺𑀯𑀸𑀤𑀫𑀽𑀮𑀸𑀦𑀺. 𑀓𑀢𑀫𑀸𑀦𑀺 𑀤𑀲? 𑀇𑀥𑀼𑀧𑀸𑀮𑀺, 𑀪𑀺𑀓𑁆𑀔𑀽 𑀅𑀦𑀸𑀧𑀢𑁆𑀢𑀺𑀁 𑀆𑀧𑀢𑁆𑀢𑀻𑀢𑀺 𑀤𑀻𑀧𑁂𑀦𑁆𑀢𑀺, 𑀆𑀧𑀢𑁆𑀢𑀺𑀁 𑀅𑀦𑀸𑀧𑀢𑁆𑀢𑀻𑀢𑀺 𑀤𑀻𑀧𑁂𑀦𑁆𑀢𑀺, 𑀮𑀳𑀼𑀓𑀁 𑀆𑀧𑀢𑁆𑀢𑀺𑀁 𑀕𑀭𑀼𑀓𑀸𑀧𑀢𑁆𑀢𑀻𑀢𑀺 𑀤𑀻𑀧𑁂𑀦𑁆𑀢𑀺, 𑀕𑀭𑀼𑀓𑀁 𑀆𑀧𑀢𑁆𑀢𑀺𑀁 𑀮𑀳𑀼𑀓𑀸𑀧𑀢𑁆𑀢𑀻𑀢𑀺 𑀤𑀻𑀧𑁂𑀦𑁆𑀢𑀺, 𑀤𑀼𑀝𑁆𑀞𑀼𑀮𑁆𑀮𑀁 𑀆𑀧𑀢𑁆𑀢𑀺𑀁 𑀅𑀤𑀼𑀝𑁆𑀞𑀼𑀮𑁆𑀮𑀸𑀧𑀢𑁆𑀢𑀻𑀢𑀺 𑀤𑀻𑀧𑁂𑀦𑁆𑀢𑀺, 𑀅𑀤𑀼𑀝𑁆𑀞𑀼𑀮𑁆𑀮𑀁 𑀆𑀧𑀢𑁆𑀢𑀺𑀁 𑀤𑀼𑀝𑁆𑀞𑀼𑀮𑁆𑀮𑀸𑀧𑀢𑁆𑀢𑀻𑀢𑀺 𑀤𑀻𑀧𑁂𑀦𑁆𑀢𑀺, 𑀲𑀸𑀯𑀲𑁂𑀲𑀁 𑀆𑀧𑀢𑁆𑀢𑀺𑀁 𑀅𑀦𑀯𑀲𑁂𑀲𑀸𑀧𑀢𑁆𑀢𑀻𑀢𑀺 𑀤𑀻𑀧𑁂𑀦𑁆𑀢𑀺, 𑀅𑀦𑀯𑀲𑁂𑀲𑀁 𑀆𑀧𑀢𑁆𑀢𑀺𑀁 𑀲𑀸𑀯𑀲𑁂𑀲𑀸𑀧𑀢𑁆𑀢𑀻𑀢𑀺 𑀤𑀻𑀧𑁂𑀦𑁆𑀢𑀺, 𑀲𑀧𑁆𑀧𑀝𑀺𑀓𑀫𑁆𑀫𑀁 𑀆𑀧𑀢𑁆𑀢𑀺𑀁 𑀅𑀧𑁆𑀧𑀝𑀺𑀓𑀫𑁆𑀫𑀸𑀧𑀢𑁆𑀢𑀻𑀢𑀺 𑀤𑀻𑀧𑁂𑀦𑁆𑀢𑀺, 𑀅𑀧𑁆𑀧𑀝𑀺𑀓𑀫𑁆𑀫𑀁 𑀆𑀧𑀢𑁆𑀢𑀺𑀁 𑀲𑀧𑁆𑀧𑀝𑀺𑀓𑀫𑁆𑀫𑀸𑀧𑀢𑁆𑀢𑀻𑀢𑀺 𑀤𑀻𑀧𑁂𑀦𑁆𑀢𑀺. 𑀇𑀫𑀸𑀦𑀺 𑀔𑁄, 𑀉𑀧𑀸𑀮𑀺, 𑀤𑀲 𑀯𑀺𑀯𑀸𑀤𑀫𑀽𑀮𑀸𑀦𑀻’’𑀢𑀺. 𑀢𑀢𑀺𑀬𑀁.