𑁩. 𑀫𑀳𑀸𑀯𑀕𑁆𑀕𑁄

𑁧. 𑀲𑀻𑀳𑀦𑀸𑀤𑀲𑀼𑀢𑁆𑀢𑀁

𑁨𑁧. ‘‘𑀲𑀻𑀳𑁄, 𑀪𑀺𑀓𑁆𑀔𑀯𑁂, 𑀫𑀺𑀕𑀭𑀸𑀚𑀸 𑀲𑀸𑀬𑀦𑁆𑀳𑀲𑀫𑀬𑀁 𑀆𑀲𑀬𑀸 𑀦𑀺𑀓𑁆𑀔𑀫𑀢𑀺. 𑀆𑀲𑀬𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀯𑀺𑀚𑀫𑁆𑀪𑀢𑀺. 𑀯𑀺𑀚𑀫𑁆𑀪𑀺𑀢𑁆𑀯𑀸 𑀲𑀫𑀦𑁆𑀢𑀸 𑀘𑀢𑀼𑀤𑁆𑀤𑀺𑀲𑀁 [𑀘𑀢𑀼𑀤𑁆𑀤𑀺𑀲𑀸 (𑀲𑁆𑀬𑀸. 𑀓.) 𑀅. 𑀦𑀺. 𑁬.𑁬𑁪] 𑀅𑀦𑀼𑀯𑀺𑀮𑁄𑀓𑁂𑀢𑀺. 𑀲𑀫𑀦𑁆𑀢𑀸 𑀘𑀢𑀼𑀤𑁆𑀤𑀺𑀲𑀁 [𑀘𑀢𑀼𑀤𑁆𑀤𑀺𑀲𑀸 (𑀲𑁆𑀬𑀸. 𑀓.) 𑀅. 𑀦𑀺. 𑁬.𑁬𑁪] 𑀅𑀦𑀼𑀯𑀺𑀮𑁄𑀓𑁂𑀢𑁆𑀯𑀸 𑀢𑀺𑀓𑁆𑀔𑀢𑁆𑀢𑀼𑀁 𑀲𑀻𑀳𑀦𑀸𑀤𑀁 𑀦𑀤𑀢𑀺. 𑀢𑀺𑀓𑁆𑀔𑀢𑁆𑀢𑀼𑀁 𑀲𑀻𑀳𑀦𑀸𑀤𑀁 𑀦𑀤𑀺𑀢𑁆𑀯𑀸 𑀕𑁄𑀘𑀭𑀸𑀬 𑀧𑀓𑁆𑀓𑀫𑀢𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? ‘𑀫𑀸𑀳𑀁 𑀔𑀼𑀤𑁆𑀤𑀓𑁂 𑀧𑀸𑀡𑁂 𑀯𑀺𑀲𑀫𑀕𑀢𑁂 𑀲𑀗𑁆𑀖𑀸𑀢𑀁 𑀆𑀧𑀸𑀤𑁂𑀲𑀺’𑀦𑁆𑀢𑀺!

‘‘‘𑀲𑀻𑀳𑁄’𑀢𑀺, 𑀔𑁄 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲. 𑀬𑀁 𑀔𑁄, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑁄 𑀧𑀭𑀺𑀲𑀸𑀬 𑀥𑀫𑁆𑀫𑀁 𑀤𑁂𑀲𑁂𑀢𑀺, 𑀇𑀤𑀫𑀲𑁆𑀲 𑀳𑁄𑀢𑀺 𑀲𑀻𑀳𑀦𑀸𑀤𑀲𑁆𑀫𑀺𑀁.

[𑀫. 𑀦𑀺. 𑁧.𑁧𑁪𑁮; 𑀯𑀺𑀪. 𑁭𑁬𑁦; 𑀧𑀝𑀺. 𑀫. 𑁨.𑁪𑁪] ‘‘𑀤𑀲𑀬𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑀲𑁆𑀲 𑀢𑀣𑀸𑀕𑀢𑀩𑀮𑀸𑀦𑀺, 𑀬𑁂𑀳𑀺 𑀩𑀮𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀢𑀣𑀸𑀕𑀢𑁄 𑀆𑀲𑀪𑀁 𑀞𑀸𑀦𑀁 𑀧𑀝𑀺𑀚𑀸𑀦𑀸𑀢𑀺, 𑀧𑀭𑀺𑀲𑀸𑀲𑀼 𑀲𑀻𑀳𑀦𑀸𑀤𑀁 𑀦𑀤𑀢𑀺, 𑀩𑁆𑀭𑀳𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑁂𑀢𑀺. 𑀓𑀢𑀫𑀸𑀦𑀺 𑀤𑀲? 𑀇𑀥, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑁄 𑀞𑀸𑀦𑀜𑁆𑀘 𑀞𑀸𑀦𑀢𑁄 𑀅𑀝𑁆𑀞𑀸𑀦𑀜𑁆𑀘 𑀅𑀝𑁆𑀞𑀸𑀦𑀢𑁄 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺. 𑀬𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑁄 𑀞𑀸𑀦𑀜𑁆𑀘 𑀞𑀸𑀦𑀢𑁄 𑀅𑀝𑁆𑀞𑀸𑀦𑀜𑁆𑀘 𑀅𑀝𑁆𑀞𑀸𑀦𑀢𑁄 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, 𑀇𑀤𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑀲𑁆𑀲 𑀢𑀣𑀸𑀕𑀢𑀩𑀮𑀁 𑀳𑁄𑀢𑀺, 𑀬𑀁 𑀩𑀮𑀁 𑀆𑀕𑀫𑁆𑀫 𑀢𑀣𑀸𑀕𑀢𑁄 𑀆𑀲𑀪𑀁 𑀞𑀸𑀦𑀁 𑀧𑀝𑀺𑀚𑀸𑀦𑀸𑀢𑀺, 𑀧𑀭𑀺𑀲𑀸𑀲𑀼 𑀲𑀻𑀳𑀦𑀸𑀤𑀁 𑀦𑀤𑀢𑀺, 𑀩𑁆𑀭𑀳𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑁂𑀢𑀺.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑁄 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀦𑀁 𑀓𑀫𑁆𑀫𑀲𑀫𑀸𑀤𑀸𑀦𑀸𑀦𑀁 𑀞𑀸𑀦𑀲𑁄 𑀳𑁂𑀢𑀼𑀲𑁄 𑀯𑀺𑀧𑀸𑀓𑀁 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺. 𑀬𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑁄 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀦𑀁 𑀓𑀫𑁆𑀫𑀲𑀫𑀸𑀤𑀸𑀦𑀸𑀦𑀁 𑀞𑀸𑀦𑀲𑁄 𑀳𑁂𑀢𑀼𑀲𑁄 𑀯𑀺𑀧𑀸𑀓𑀁 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, 𑀇𑀤𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑀲𑁆𑀲 𑀢𑀣𑀸𑀕𑀢𑀩𑀮𑀁 𑀳𑁄𑀢𑀺, 𑀬𑀁 𑀩𑀮𑀁 𑀆𑀕𑀫𑁆𑀫 𑀢𑀣𑀸𑀕𑀢𑁄 𑀆𑀲𑀪𑀁 𑀞𑀸𑀦𑀁 𑀧𑀝𑀺𑀚𑀸𑀦𑀸𑀢𑀺, 𑀧𑀭𑀺𑀲𑀸𑀲𑀼 𑀲𑀻𑀳𑀦𑀸𑀤𑀁 𑀦𑀤𑀢𑀺, 𑀩𑁆𑀭𑀳𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑁂𑀢𑀺.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑁄 𑀲𑀩𑁆𑀩𑀢𑁆𑀣𑀕𑀸𑀫𑀺𑀦𑀺𑀁 𑀧𑀝𑀺𑀧𑀤𑀁 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺. 𑀬𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑁄 𑀲𑀩𑁆𑀩𑀢𑁆𑀣𑀕𑀸𑀫𑀺𑀦𑀺𑀁 𑀧𑀝𑀺𑀧𑀤𑀁 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, 𑀇𑀤𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑀲𑁆𑀲 𑀢𑀣𑀸𑀕𑀢𑀩𑀮𑀁 𑀳𑁄𑀢𑀺, 𑀬𑀁 𑀩𑀮𑀁 𑀆𑀕𑀫𑁆𑀫 𑀢𑀣𑀸𑀕𑀢𑁄 𑀆𑀲𑀪𑀁 𑀞𑀸𑀦𑀁 𑀧𑀝𑀺𑀚𑀸𑀦𑀸𑀢𑀺, 𑀧𑀭𑀺𑀲𑀸𑀲𑀼 𑀲𑀻𑀳𑀦𑀸𑀤𑀁 𑀦𑀤𑀢𑀺, 𑀩𑁆𑀭𑀳𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑁂𑀢𑀺.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑁄 𑀅𑀦𑁂𑀓𑀥𑀸𑀢𑀼𑀁 𑀦𑀸𑀦𑀸𑀥𑀸𑀢𑀼𑀁 𑀮𑁄𑀓𑀁 [𑀅𑀦𑁂𑀓𑀥𑀸𑀢𑀼𑀦𑀸𑀦𑀸𑀥𑀸𑀢𑀼𑀮𑁄𑀓𑀁 (𑀲𑀻. 𑀓.)] 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺. 𑀬𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑁄 𑀅𑀦𑁂𑀓𑀥𑀸𑀢𑀼𑀁 𑀦𑀸𑀦𑀸𑀥𑀸𑀢𑀼𑀁 𑀮𑁄𑀓𑀁 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, 𑀇𑀤𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑀲𑁆𑀲 𑀢𑀣𑀸𑀕𑀢𑀩𑀮𑀁 𑀳𑁄𑀢𑀺…𑀧𑁂… 𑀩𑁆𑀭𑀳𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑁂𑀢𑀺.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑁄 𑀲𑀢𑁆𑀢𑀸𑀦𑀁 𑀦𑀸𑀦𑀸𑀥𑀺𑀫𑀼𑀢𑁆𑀢𑀺𑀓𑀢𑀁 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺. 𑀬𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑁄 𑀲𑀢𑁆𑀢𑀸𑀦𑀁 𑀦𑀸𑀦𑀸𑀥𑀺𑀫𑀼𑀢𑁆𑀢𑀺𑀓𑀢𑀁 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, 𑀇𑀤𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑀲𑁆𑀲 𑀢𑀣𑀸𑀕𑀢𑀩𑀮𑀁 𑀳𑁄𑀢𑀺…𑀧𑁂… 𑀩𑁆𑀭𑀳𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑁂𑀢𑀺.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑁄 𑀧𑀭𑀲𑀢𑁆𑀢𑀸𑀦𑀁 𑀧𑀭𑀧𑀼𑀕𑁆𑀕𑀮𑀸𑀦𑀁 𑀇𑀦𑁆𑀤𑁆𑀭𑀺𑀬𑀧𑀭𑁄𑀧𑀭𑀺𑀬𑀢𑁆𑀢𑀁 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺. 𑀬𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑁄 𑀧𑀭𑀲𑀢𑁆𑀢𑀸𑀦𑀁 𑀧𑀭𑀧𑀼𑀕𑁆𑀕𑀮𑀸𑀦𑀁 𑀇𑀦𑁆𑀤𑁆𑀭𑀺𑀬𑀧𑀭𑁄𑀧𑀭𑀺𑀬𑀢𑁆𑀢𑀁 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, 𑀇𑀤𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑀲𑁆𑀲 𑀢𑀣𑀸𑀕𑀢𑀩𑀮𑀁 𑀳𑁄𑀢𑀺…𑀧𑁂… 𑀩𑁆𑀭𑀳𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑁂𑀢𑀺.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑁄 𑀛𑀸𑀦𑀯𑀺𑀫𑁄𑀓𑁆𑀔𑀲𑀫𑀸𑀥𑀺𑀲𑀫𑀸𑀧𑀢𑁆𑀢𑀻𑀦𑀁 𑀲𑀁𑀓𑀺𑀮𑁂𑀲𑀁 𑀯𑁄𑀤𑀸𑀦𑀁 𑀯𑀼𑀝𑁆𑀞𑀸𑀦𑀁 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺. 𑀬𑀫𑁆𑀧𑀺…𑀧𑁂… 𑀧𑀚𑀸𑀦𑀸𑀢𑀺, 𑀇𑀤𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑀲𑁆𑀲 𑀢𑀣𑀸𑀕𑀢𑀩𑀮𑀁 𑀳𑁄𑀢𑀺…𑀧𑁂… 𑀩𑁆𑀭𑀳𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑁂𑀢𑀺.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑁄 𑀅𑀦𑁂𑀓𑀯𑀺𑀳𑀺𑀢𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀅𑀦𑀼𑀲𑁆𑀲𑀭𑀢𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀏𑀓𑀫𑁆𑀧𑀺 𑀚𑀸𑀢𑀺𑀁 𑀤𑁆𑀯𑁂𑀧𑀺 𑀚𑀸𑀢𑀺𑀬𑁄 𑀢𑀺𑀲𑁆𑀲𑁄𑀧𑀺 𑀚𑀸𑀢𑀺𑀬𑁄 𑀘𑀢𑀲𑁆𑀲𑁄𑀧𑀺 𑀚𑀸𑀢𑀺𑀬𑁄 𑀧𑀜𑁆𑀘𑀧𑀺 𑀚𑀸𑀢𑀺𑀬𑁄 𑀤𑀲𑀧𑀺 𑀚𑀸𑀢𑀺𑀬𑁄 𑀯𑀻𑀲𑀫𑁆𑀧𑀺 𑀚𑀸𑀢𑀺𑀬𑁄 𑀢𑀺𑀁𑀲𑀫𑁆𑀧𑀺 𑀚𑀸𑀢𑀺𑀬𑁄 𑀘𑀢𑁆𑀢𑀸𑀮𑀻𑀲𑀫𑁆𑀧𑀺 𑀚𑀸𑀢𑀺𑀬𑁄 𑀧𑀜𑁆𑀜𑀸𑀲𑀫𑁆𑀧𑀺 𑀚𑀸𑀢𑀺𑀬𑁄 𑀚𑀸𑀢𑀺𑀲𑀢𑀫𑁆𑀧𑀺 𑀚𑀸𑀢𑀺𑀲𑀳𑀲𑁆𑀲𑀫𑁆𑀧𑀺 𑀚𑀸𑀢𑀺𑀲𑀢𑀲𑀳𑀲𑁆𑀲𑀫𑁆𑀧𑀺 𑀅𑀦𑁂𑀓𑁂𑀧𑀺 𑀲𑀁𑀯𑀝𑁆𑀝𑀓𑀧𑁆𑀧𑁂 𑀅𑀦𑁂𑀓𑁂𑀧𑀺 𑀯𑀺𑀯𑀝𑁆𑀝𑀓𑀧𑁆𑀧𑁂 𑀅𑀦𑁂𑀓𑁂𑀧𑀺 𑀲𑀁𑀯𑀝𑁆𑀝𑀯𑀺𑀯𑀝𑁆𑀝𑀓𑀧𑁆𑀧𑁂, ‘𑀅𑀫𑀼𑀢𑁆𑀭𑀸𑀲𑀺𑀁 𑀏𑀯𑀁𑀦𑀸𑀫𑁄 𑀏𑀯𑀁𑀕𑁄𑀢𑁆𑀢𑁄 𑀏𑀯𑀁𑀯𑀡𑁆𑀡𑁄 𑀏𑀯𑀫𑀸𑀳𑀸𑀭𑁄 𑀏𑀯𑀁𑀲𑀼𑀔𑀤𑀼𑀓𑁆𑀔𑀧𑁆𑀧𑀝𑀺𑀲𑀁𑀯𑁂𑀤𑀻 𑀏𑀯𑀫𑀸𑀬𑀼𑀧𑀭𑀺𑀬𑀦𑁆𑀢𑁄, 𑀲𑁄 𑀢𑀢𑁄 𑀘𑀼𑀢𑁄 𑀅𑀫𑀼𑀢𑁆𑀭 𑀉𑀤𑀧𑀸𑀤𑀺𑀁; 𑀢𑀢𑁆𑀭𑀸𑀧𑀸𑀲𑀺𑀁 𑀏𑀯𑀁𑀦𑀸𑀫𑁄 𑀏𑀯𑀁𑀕𑁄𑀢𑁆𑀢𑁄 𑀏𑀯𑀁𑀯𑀡𑁆𑀡𑁄 𑀏𑀯𑀫𑀸𑀳𑀸𑀭𑁄 𑀏𑀯𑀁𑀲𑀼𑀔𑀤𑀼𑀓𑁆𑀔𑀧𑁆𑀧𑀝𑀺𑀲𑀁𑀯𑁂𑀤𑀻 𑀏𑀯𑀫𑀸𑀬𑀼𑀧𑀭𑀺𑀬𑀦𑁆𑀢𑁄, 𑀲𑁄 𑀢𑀢𑁄 𑀘𑀼𑀢𑁄 𑀇𑀥𑀽𑀧𑀧𑀦𑁆𑀦𑁄’𑀢𑀺, 𑀇𑀢𑀺 𑀲𑀸𑀓𑀸𑀭𑀁 𑀲𑀉𑀤𑁆𑀤𑁂𑀲𑀁 𑀅𑀦𑁂𑀓𑀯𑀺𑀳𑀺𑀢𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀅𑀦𑀼𑀲𑁆𑀲𑀭𑀢𑀺. 𑀬𑀫𑁆𑀧𑀺 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑁄 𑀅𑀦𑁂𑀓𑀯𑀺𑀳𑀺𑀢𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀅𑀦𑀼𑀲𑁆𑀲𑀭𑀢𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀏𑀓𑀫𑁆𑀧𑀺 𑀚𑀸𑀢𑀺𑀁 𑀤𑁆𑀯𑁂𑀧𑀺 𑀚𑀸𑀢𑀺𑀬𑁄…𑀧𑁂… 𑀇𑀢𑀺 𑀲𑀸𑀓𑀸𑀭𑀁 𑀲𑀉𑀤𑁆𑀤𑁂𑀲𑀁 𑀅𑀦𑁂𑀓𑀯𑀺𑀳𑀺𑀢𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀅𑀦𑀼𑀲𑁆𑀲𑀭𑀢𑀺, 𑀇𑀤𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑀲𑁆𑀲 𑀢𑀣𑀸𑀕𑀢𑀩𑀮𑀁 𑀳𑁄𑀢𑀺, 𑀬𑀁 𑀩𑀮𑀁 𑀆𑀕𑀫𑁆𑀫 𑀢𑀣𑀸𑀕𑀢𑁄 𑀆𑀲𑀪𑀁 𑀞𑀸𑀦𑀁 𑀧𑀝𑀺𑀚𑀸𑀦𑀸𑀢𑀺, 𑀧𑀭𑀺𑀲𑀸𑀲𑀼 𑀲𑀻𑀳𑀦𑀸𑀤𑀁 𑀦𑀤𑀢𑀺, 𑀩𑁆𑀭𑀳𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑁂𑀢𑀺.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑁄 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀯𑀺𑀲𑀼𑀤𑁆𑀥𑁂𑀦 𑀅𑀢𑀺𑀓𑁆𑀓𑀦𑁆𑀢𑀫𑀸𑀦𑀼𑀲𑀓𑁂𑀦 𑀲𑀢𑁆𑀢𑁂 𑀧𑀲𑁆𑀲𑀢𑀺 𑀘𑀯𑀫𑀸𑀦𑁂 𑀉𑀧𑀧𑀚𑁆𑀚𑀫𑀸𑀦𑁂 𑀳𑀻𑀦𑁂 𑀧𑀡𑀻𑀢𑁂 𑀲𑀼𑀯𑀡𑁆𑀡𑁂 𑀤𑀼𑀩𑁆𑀩𑀡𑁆𑀡𑁂, 𑀲𑀼𑀕𑀢𑁂 𑀤𑀼𑀕𑁆𑀕𑀢𑁂 𑀬𑀣𑀸𑀓𑀫𑁆𑀫𑀽𑀧𑀕𑁂 𑀲𑀢𑁆𑀢𑁂 𑀧𑀚𑀸𑀦𑀸𑀢𑀺 𑁋 ‘𑀇𑀫𑁂 𑀯𑀢 𑀪𑁄𑀦𑁆𑀢𑁄 𑀲𑀢𑁆𑀢𑀸 𑀓𑀸𑀬𑀤𑀼𑀘𑁆𑀘𑀭𑀺𑀢𑁂𑀦 𑀲𑀫𑀦𑁆𑀦𑀸𑀕𑀢𑀸 𑀯𑀘𑀻𑀤𑀼𑀘𑁆𑀘𑀭𑀺𑀢𑁂𑀦 𑀲𑀫𑀦𑁆𑀦𑀸𑀕𑀢𑀸 𑀫𑀦𑁄𑀤𑀼𑀘𑁆𑀘𑀭𑀺𑀢𑁂𑀦 𑀲𑀫𑀦𑁆𑀦𑀸𑀕𑀢𑀸 𑀅𑀭𑀺𑀬𑀸𑀦𑀁 𑀉𑀧𑀯𑀸𑀤𑀓𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀫𑁆𑀫𑀲𑀫𑀸𑀤𑀸𑀦𑀸, 𑀢𑁂 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀦𑀺𑀭𑀬𑀁 𑀉𑀧𑀧𑀦𑁆𑀦𑀸; 𑀇𑀫𑁂 𑀯𑀸 𑀧𑀦 𑀪𑁄𑀦𑁆𑀢𑁄 𑀲𑀢𑁆𑀢𑀸 𑀓𑀸𑀬𑀲𑀼𑀘𑀭𑀺𑀢𑁂𑀦 𑀲𑀫𑀦𑁆𑀦𑀸𑀕𑀢𑀸 𑀯𑀘𑀻𑀲𑀼𑀘𑀭𑀺𑀢𑁂𑀦 𑀲𑀫𑀦𑁆𑀦𑀸𑀕𑀢𑀸 𑀫𑀦𑁄𑀲𑀼𑀘𑀭𑀺𑀢𑁂𑀦 𑀲𑀫𑀦𑁆𑀦𑀸𑀕𑀢𑀸 𑀅𑀭𑀺𑀬𑀸𑀦𑀁 𑀅𑀦𑀼𑀧𑀯𑀸𑀤𑀓𑀸 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑀸 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑀫𑁆𑀫𑀲𑀫𑀸𑀤𑀸𑀦𑀸, 𑀢𑁂 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀦𑁆𑀦𑀸’𑀢𑀺. 𑀇𑀢𑀺 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀯𑀺𑀲𑀼𑀤𑁆𑀥𑁂𑀦 𑀅𑀢𑀺𑀓𑁆𑀓𑀦𑁆𑀢𑀫𑀸𑀦𑀼𑀲𑀓𑁂𑀦 𑀲𑀢𑁆𑀢𑁂 𑀧𑀲𑁆𑀲𑀢𑀺 𑀘𑀯𑀫𑀸𑀦𑁂 𑀉𑀧𑀧𑀚𑁆𑀚𑀫𑀸𑀦𑁂 𑀳𑀻𑀦𑁂 𑀧𑀡𑀻𑀢𑁂 𑀲𑀼𑀯𑀡𑁆𑀡𑁂 𑀤𑀼𑀩𑁆𑀩𑀡𑁆𑀡𑁂, 𑀲𑀼𑀕𑀢𑁂 𑀤𑀼𑀕𑁆𑀕𑀢𑁂 𑀬𑀣𑀸𑀓𑀫𑁆𑀫𑀽𑀧𑀕𑁂 𑀲𑀢𑁆𑀢𑁂 𑀧𑀚𑀸𑀦𑀸𑀢𑀺. 𑀬𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑁄 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀯𑀺𑀲𑀼𑀤𑁆𑀥𑁂𑀦 𑀅𑀢𑀺𑀓𑁆𑀓𑀦𑁆𑀢𑀫𑀸𑀦𑀼𑀲𑀓𑁂𑀦…𑀧𑁂… 𑀬𑀣𑀸𑀓𑀫𑁆𑀫𑀽𑀧𑀕𑁂 𑀲𑀢𑁆𑀢𑁂 𑀧𑀚𑀸𑀦𑀸𑀢𑀺, 𑀇𑀤𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑀲𑁆𑀲 𑀢𑀣𑀸𑀕𑀢𑀩𑀮𑀁 𑀳𑁄𑀢𑀺, 𑀬𑀁 𑀩𑀮𑀁 𑀆𑀕𑀫𑁆𑀫 𑀢𑀣𑀸𑀕𑀢𑁄 𑀆𑀲𑀪𑀁 𑀞𑀸𑀦𑀁 𑀧𑀝𑀺𑀚𑀸𑀦𑀸𑀢𑀺, 𑀧𑀭𑀺𑀲𑀸𑀲𑀼 𑀲𑀻𑀳𑀦𑀸𑀤𑀁 𑀦𑀤𑀢𑀺, 𑀩𑁆𑀭𑀳𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑁂𑀢𑀺.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑁄 𑀆𑀲𑀯𑀸𑀦𑀁 𑀔𑀬𑀸 𑀅𑀦𑀸𑀲𑀯𑀁 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀁 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀬𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑁄 𑀆𑀲𑀯𑀸𑀦𑀁 𑀔𑀬𑀸 𑀅𑀦𑀸𑀲𑀯𑀁 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀁 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺, 𑀇𑀤𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑀲𑁆𑀲 𑀢𑀣𑀸𑀕𑀢𑀩𑀮𑀁 𑀳𑁄𑀢𑀺, 𑀬𑀁 𑀩𑀮𑀁 𑀆𑀕𑀫𑁆𑀫 𑀢𑀣𑀸𑀕𑀢𑁄 𑀆𑀲𑀪𑀁 𑀞𑀸𑀦𑀁 𑀧𑀝𑀺𑀚𑀸𑀦𑀸𑀢𑀺, 𑀧𑀭𑀺𑀲𑀸𑀲𑀼 𑀲𑀻𑀳𑀦𑀸𑀤𑀁 𑀦𑀤𑀢𑀺, 𑀩𑁆𑀭𑀳𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑁂𑀢𑀺.

‘‘𑀇𑀫𑀸𑀦𑀺 𑀔𑁄, 𑀪𑀺𑀓𑁆𑀔𑀯𑁂, 𑀤𑀲 𑀢𑀣𑀸𑀕𑀢𑀲𑁆𑀲 𑀢𑀣𑀸𑀕𑀢𑀩𑀮𑀸𑀦𑀺, 𑀬𑁂𑀳𑀺 𑀩𑀮𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀢𑀣𑀸𑀕𑀢𑁄 𑀆𑀲𑀪𑀁 𑀞𑀸𑀦𑀁 𑀧𑀝𑀺𑀚𑀸𑀦𑀸𑀢𑀺, 𑀧𑀭𑀺𑀲𑀸𑀲𑀼 𑀲𑀻𑀳𑀦𑀸𑀤𑀁 𑀦𑀤𑀢𑀺, 𑀩𑁆𑀭𑀳𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑁂𑀢𑀻’’𑀢𑀺. 𑀧𑀞𑀫𑀁.

𑁨. 𑀅𑀥𑀺𑀯𑀼𑀢𑁆𑀢𑀺𑀧𑀤𑀲𑀼𑀢𑁆𑀢𑀁

𑁨𑁨. 𑀅𑀣 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀁 𑀔𑁄 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀪𑀕𑀯𑀸 𑀏𑀢𑀤𑀯𑁄𑀘 𑁋

‘‘𑀬𑁂 𑀢𑁂, 𑀆𑀦𑀦𑁆𑀤, 𑀥𑀫𑁆𑀫𑀸 𑀢𑁂𑀲𑀁 𑀢𑁂𑀲𑀁 𑀅𑀥𑀺𑀯𑀼𑀢𑁆𑀢𑀺𑀧𑀤𑀸𑀦𑀁 [𑀅𑀥𑀺𑀫𑀼𑀢𑁆𑀢𑀺𑀧𑀤𑀸𑀦𑀁 (𑀓.)] 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀲𑀁𑀯𑀢𑁆𑀢𑀦𑁆𑀢𑀺, 𑀯𑀺𑀲𑀸𑀭𑀤𑁄 𑀅𑀳𑀁, 𑀆𑀦𑀦𑁆𑀤, 𑀢𑀢𑁆𑀣 𑀧𑀝𑀺𑀚𑀸𑀦𑀸𑀫𑀺. ‘𑀢𑁂𑀲𑀁 𑀢𑁂𑀲𑀁 𑀢𑀣𑀸 𑀢𑀣𑀸 𑀥𑀫𑁆𑀫𑀁 𑀤𑁂𑀲𑁂𑀢𑀼𑀁 𑀬𑀣𑀸 𑀬𑀣𑀸 𑀧𑀝𑀺𑀧𑀦𑁆𑀦𑁄 𑀲𑀦𑁆𑀢𑀁 𑀯𑀸 𑀅𑀢𑁆𑀣𑀻𑀢𑀺 𑀜𑀲𑁆𑀲𑀢𑀺, 𑀅𑀲𑀦𑁆𑀢𑀁 𑀯𑀸 𑀦𑀢𑁆𑀣𑀻𑀢𑀺 𑀜𑀲𑁆𑀲𑀢𑀺, 𑀳𑀻𑀦𑀁 𑀯𑀸 𑀳𑀻𑀦𑀦𑁆𑀢𑀺 𑀜𑀲𑁆𑀲𑀢𑀺, 𑀧𑀡𑀻𑀢𑀁 𑀯𑀸 𑀧𑀡𑀻𑀢𑀦𑁆𑀢𑀺 𑀜𑀲𑁆𑀲𑀢𑀺, 𑀲𑀉𑀢𑁆𑀢𑀭𑀁 𑀯𑀸 𑀲𑀉𑀢𑁆𑀢𑀭𑀦𑁆𑀢𑀺 𑀜𑀲𑁆𑀲𑀢𑀺, 𑀅𑀦𑀼𑀢𑁆𑀢𑀭𑀁 𑀯𑀸 𑀅𑀦𑀼𑀢𑁆𑀢𑀭𑀦𑁆𑀢𑀺 𑀜𑀲𑁆𑀲𑀢𑀺; 𑀬𑀣𑀸 𑀬𑀣𑀸 𑀯𑀸 𑀧𑀦 𑀢𑀁 𑀜𑀸𑀢𑁂𑀬𑁆𑀬𑀁 𑀯𑀸 𑀤𑀝𑁆𑀞𑁂𑀬𑁆𑀬𑀁 𑀯𑀸 𑀲𑀘𑁆𑀙𑀺𑀓𑀭𑁂𑀬𑁆𑀬𑀁 𑀯𑀸, 𑀢𑀣𑀸 𑀢𑀣𑀸 𑀜𑀲𑁆𑀲𑀢𑀺 𑀯𑀸 𑀤𑀓𑁆𑀔𑀢𑀺 𑀯𑀸 𑀲𑀘𑁆𑀙𑀺𑀓𑀭𑀺𑀲𑁆𑀲𑀢𑀺 𑀯𑀸’𑀢𑀺 𑀞𑀸𑀦𑀫𑁂𑀢𑀁 𑀯𑀺𑀚𑁆𑀚𑀢𑀺. 𑀏𑀢𑀤𑀸𑀦𑀼𑀢𑁆𑀢𑀭𑀺𑀬𑀁, 𑀆𑀦𑀦𑁆𑀤, 𑀜𑀸𑀡𑀸𑀦𑀁 𑀬𑀤𑀺𑀤𑀁 𑀢𑀢𑁆𑀣 𑀢𑀢𑁆𑀣 𑀬𑀣𑀸𑀪𑀽𑀢𑀜𑀸𑀡𑀁. 𑀏𑀢𑀲𑁆𑀫𑀸 𑀘𑀸𑀳𑀁, 𑀆𑀦𑀦𑁆𑀤, 𑀜𑀸𑀡𑀸 𑀅𑀜𑁆𑀜𑀁 𑀜𑀸𑀡𑀁 𑀉𑀢𑁆𑀢𑀭𑀺𑀢𑀭𑀁 𑀯𑀸 𑀧𑀡𑀻𑀢𑀢𑀭𑀁 𑀯𑀸 𑀦𑀢𑁆𑀣𑀻𑀢𑀺 𑀯𑀤𑀸𑀫𑀺.

‘‘𑀤𑀲𑀬𑀺𑀫𑀸𑀦𑀺, 𑀆𑀦𑀦𑁆𑀤, 𑀢𑀣𑀸𑀕𑀢𑀲𑁆𑀲 𑀢𑀣𑀸𑀕𑀢𑀩𑀮𑀸𑀦𑀺, 𑀬𑁂𑀳𑀺 𑀩𑀮𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀢𑀣𑀸𑀕𑀢𑁄 𑀆𑀲𑀪𑀁 𑀞𑀸𑀦𑀁 𑀧𑀝𑀺𑀚𑀸𑀦𑀸𑀢𑀺, 𑀧𑀭𑀺𑀲𑀸𑀲𑀼 𑀲𑀻𑀳𑀦𑀸𑀤𑀁 𑀦𑀤𑀢𑀺, 𑀩𑁆𑀭𑀳𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑁂𑀢𑀺. 𑀓𑀢𑀫𑀸𑀦𑀺 𑀤𑀲? 𑀇𑀥𑀸𑀦𑀦𑁆𑀤, 𑀢𑀣𑀸𑀕𑀢𑁄 𑀞𑀸𑀦𑀜𑁆𑀘 𑀞𑀸𑀦𑀢𑁄 𑀅𑀝𑁆𑀞𑀸𑀦𑀜𑁆𑀘 𑀅𑀝𑁆𑀞𑀸𑀦𑀢𑁄 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺. 𑀬𑀫𑁆𑀧𑀸𑀦𑀦𑁆𑀤, 𑀢𑀣𑀸𑀕𑀢𑁄 𑀞𑀸𑀦𑀜𑁆𑀘 𑀞𑀸𑀦𑀢𑁄 𑀅𑀝𑁆𑀞𑀸𑀦𑀜𑁆𑀘 𑀅𑀝𑁆𑀞𑀸𑀦𑀢𑁄 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, 𑀇𑀤𑀫𑁆𑀧𑀸𑀦𑀦𑁆𑀤, 𑀢𑀣𑀸𑀕𑀢𑀲𑁆𑀲 𑀢𑀣𑀸𑀕𑀢𑀩𑀮𑀁 𑀳𑁄𑀢𑀺, 𑀬𑀁 𑀩𑀮𑀁 𑀆𑀕𑀫𑁆𑀫 𑀢𑀣𑀸𑀕𑀢𑁄 𑀆𑀲𑀪𑀁 𑀞𑀸𑀦𑀁 𑀧𑀝𑀺𑀚𑀸𑀦𑀸𑀢𑀺, 𑀧𑀭𑀺𑀲𑀸𑀲𑀼 𑀲𑀻𑀳𑀦𑀸𑀤𑀁 𑀦𑀤𑀢𑀺, 𑀩𑁆𑀭𑀳𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑁂𑀢𑀺.

‘‘𑀧𑀼𑀦 𑀘𑀧𑀭𑀁, 𑀆𑀦𑀦𑁆𑀤, 𑀢𑀣𑀸𑀕𑀢𑁄 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀦𑀁 𑀓𑀫𑁆𑀫𑀲𑀫𑀸𑀤𑀸𑀦𑀸𑀦𑀁 𑀞𑀸𑀦𑀲𑁄 𑀳𑁂𑀢𑀼𑀲𑁄 𑀯𑀺𑀧𑀸𑀓𑀁 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺. 𑀬𑀫𑁆𑀧𑀸𑀦𑀦𑁆𑀤…𑀧𑁂… 𑀇𑀤𑀫𑁆𑀧𑀸𑀦𑀦𑁆𑀤…𑀧𑁂….

‘‘𑀧𑀼𑀦 𑀘𑀧𑀭𑀁, 𑀆𑀦𑀦𑁆𑀤, 𑀢𑀣𑀸𑀕𑀢𑁄 𑀲𑀩𑁆𑀩𑀢𑁆𑀣𑀕𑀸𑀫𑀺𑀦𑀺𑀁 𑀧𑀝𑀺𑀧𑀤𑀁 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺. 𑀬𑀫𑁆𑀧𑀸𑀦𑀦𑁆𑀤…𑀧𑁂… 𑀇𑀤𑀫𑁆𑀧𑀸𑀦𑀦𑁆𑀤…𑀧𑁂….

‘‘𑀧𑀼𑀦 𑀘𑀧𑀭𑀁, 𑀆𑀦𑀦𑁆𑀤, 𑀢𑀣𑀸𑀕𑀢𑁄 𑀅𑀦𑁂𑀓𑀥𑀸𑀢𑀼𑀁 𑀦𑀸𑀦𑀸𑀥𑀸𑀢𑀼𑀁 𑀮𑁄𑀓𑀁 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺. 𑀬𑀫𑁆𑀧𑀸𑀦𑀦𑁆𑀤 …𑀧𑁂… 𑀇𑀤𑀫𑁆𑀧𑀸𑀦𑀦𑁆𑀤…𑀧𑁂….

‘‘𑀧𑀼𑀦 𑀘𑀧𑀭𑀁, 𑀆𑀦𑀦𑁆𑀤, 𑀢𑀣𑀸𑀕𑀢𑁄 𑀲𑀢𑁆𑀢𑀸𑀦𑀁 𑀦𑀸𑀦𑀸𑀥𑀺𑀫𑀼𑀢𑁆𑀢𑀺𑀓𑀢𑀁 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺. 𑀬𑀫𑁆𑀧𑀸𑀦𑀦𑁆𑀤…𑀧𑁂… 𑀇𑀤𑀫𑁆𑀧𑀸𑀦𑀦𑁆𑀤…𑀧𑁂….

‘‘𑀧𑀼𑀦 𑀘𑀧𑀭𑀁, 𑀆𑀦𑀦𑁆𑀤, 𑀢𑀣𑀸𑀕𑀢𑁄 𑀧𑀭𑀲𑀢𑁆𑀢𑀸𑀦𑀁 𑀧𑀭𑀧𑀼𑀕𑁆𑀕𑀮𑀸𑀦𑀁 𑀇𑀦𑁆𑀤𑁆𑀭𑀺𑀬𑀧𑀭𑁄𑀧𑀭𑀺𑀬𑀢𑁆𑀢𑀁 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺. 𑀬𑀫𑁆𑀧𑀸𑀦𑀦𑁆𑀤…𑀧𑁂… 𑀇𑀤𑀫𑁆𑀧𑀸𑀦𑀦𑁆𑀤…𑀧𑁂….

‘‘𑀧𑀼𑀦 𑀘𑀧𑀭𑀁, 𑀆𑀦𑀦𑁆𑀤, 𑀢𑀣𑀸𑀕𑀢𑁄 𑀛𑀸𑀦𑀯𑀺𑀫𑁄𑀓𑁆𑀔𑀲𑀫𑀸𑀥𑀺𑀲𑀫𑀸𑀧𑀢𑁆𑀢𑀻𑀦𑀁 𑀲𑀁𑀓𑀺𑀮𑁂𑀲𑀁 𑀯𑁄𑀤𑀸𑀦𑀁 𑀯𑀼𑀝𑁆𑀞𑀸𑀦𑀁 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺. 𑀬𑀫𑁆𑀧𑀸𑀦𑀦𑁆𑀤…𑀧𑁂… 𑀇𑀤𑀫𑁆𑀧𑀸𑀦𑀦𑁆𑀤…𑀧𑁂….

‘‘𑀧𑀼𑀦 𑀘𑀧𑀭𑀁, 𑀆𑀦𑀦𑁆𑀤, 𑀢𑀣𑀸𑀕𑀢𑁄 𑀅𑀦𑁂𑀓𑀯𑀺𑀳𑀺𑀢𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀅𑀦𑀼𑀲𑁆𑀲𑀭𑀢𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀏𑀓𑀫𑁆𑀧𑀺 𑀚𑀸𑀢𑀺𑀁 𑀤𑁆𑀯𑁂𑀧𑀺 𑀚𑀸𑀢𑀺𑀬𑁄…𑀧𑁂… 𑀇𑀢𑀺 𑀲𑀸𑀓𑀸𑀭𑀁 𑀲𑀉𑀤𑁆𑀤𑁂𑀲𑀁 𑀅𑀦𑁂𑀓𑀯𑀺𑀳𑀺𑀢𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀅𑀦𑀼𑀲𑁆𑀲𑀭𑀢𑀺. 𑀬𑀫𑁆𑀧𑀸𑀦𑀦𑁆𑀤…𑀧𑁂… 𑀇𑀤𑀫𑁆𑀧𑀸𑀦𑀦𑁆𑀤…𑀧𑁂….

‘‘𑀧𑀼𑀦 𑀘𑀧𑀭𑀁, 𑀆𑀦𑀦𑁆𑀤, 𑀢𑀣𑀸𑀕𑀢𑁄 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀯𑀺𑀲𑀼𑀤𑁆𑀥𑁂𑀦 𑀅𑀢𑀺𑀓𑁆𑀓𑀦𑁆𑀢𑀫𑀸𑀦𑀼𑀲𑀓𑁂𑀦…𑀧𑁂… 𑀬𑀣𑀸𑀓𑀫𑁆𑀫𑀽𑀧𑀕𑁂 𑀲𑀢𑁆𑀢𑁂 𑀧𑀚𑀸𑀦𑀸𑀢𑀺. 𑀬𑀫𑁆𑀧𑀸𑀦𑀦𑁆𑀤…𑀧𑁂… 𑀇𑀤𑀫𑁆𑀧𑀸𑀦𑀦𑁆𑀤…𑀧𑁂….

‘‘𑀧𑀼𑀦 𑀘𑀧𑀭𑀁, 𑀆𑀦𑀦𑁆𑀤, 𑀢𑀣𑀸𑀕𑀢𑁄 𑀆𑀲𑀯𑀸𑀦𑀁 𑀔𑀬𑀸 𑀅𑀦𑀸𑀲𑀯𑀁 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀁 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀬𑀫𑁆𑀧𑀸𑀦𑀦𑁆𑀤, 𑀢𑀣𑀸𑀕𑀢𑁄 𑀆𑀲𑀯𑀸𑀦𑀁 𑀔𑀬𑀸 𑀅𑀦𑀸𑀲𑀯𑀁 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁…𑀧𑁂… 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀇𑀤𑀫𑁆𑀧𑀸𑀦𑀦𑁆𑀤, 𑀢𑀣𑀸𑀕𑀢𑀲𑁆𑀲 𑀢𑀣𑀸𑀕𑀢𑀩𑀮𑀁 𑀳𑁄𑀢𑀺, 𑀬𑀁 𑀩𑀮𑀁 𑀆𑀕𑀫𑁆𑀫 𑀢𑀣𑀸𑀕𑀢𑁄 𑀆𑀲𑀪𑀁 𑀞𑀸𑀦𑀁 𑀧𑀝𑀺𑀚𑀸𑀦𑀸𑀢𑀺, 𑀧𑀭𑀺𑀲𑀸𑀲𑀼 𑀲𑀻𑀳𑀦𑀸𑀤𑀁 𑀦𑀤𑀢𑀺, 𑀩𑁆𑀭𑀳𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑁂𑀢𑀺.

‘‘𑀇𑀫𑀸𑀦𑀺 𑀔𑁄, 𑀆𑀦𑀦𑁆𑀤, 𑀤𑀲 𑀢𑀣𑀸𑀕𑀢𑀲𑁆𑀲 𑀢𑀣𑀸𑀕𑀢𑀩𑀮𑀸𑀦𑀺, 𑀬𑁂𑀳𑀺 𑀩𑀮𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀢𑀣𑀸𑀕𑀢𑁄 𑀆𑀲𑀪𑀁 𑀞𑀸𑀦𑀁 𑀧𑀝𑀺𑀚𑀸𑀦𑀸𑀢𑀺, 𑀧𑀭𑀺𑀲𑀸𑀲𑀼 𑀲𑀻𑀳𑀦𑀸𑀤𑀁 𑀦𑀤𑀢𑀺, 𑀩𑁆𑀭𑀳𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑁂𑀢𑀻’’𑀢𑀺. 𑀤𑀼𑀢𑀺𑀬𑀁.

𑁩. 𑀓𑀸𑀬𑀲𑀼𑀢𑁆𑀢𑀁

𑁨𑁩. ‘‘𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸 𑀓𑀸𑀬𑁂𑀦 𑀧𑀳𑀸𑀢𑀩𑁆𑀩𑀸, 𑀦𑁄 𑀯𑀸𑀘𑀸𑀬. 𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸 𑀯𑀸𑀘𑀸𑀬 𑀧𑀳𑀸𑀢𑀩𑁆𑀩𑀸, 𑀦𑁄 𑀓𑀸𑀬𑁂𑀦. 𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸 𑀦𑁂𑀯 𑀓𑀸𑀬𑁂𑀦 𑀧𑀳𑀸𑀢𑀩𑁆𑀩𑀸 𑀦𑁄 𑀯𑀸𑀘𑀸𑀬, 𑀧𑀜𑁆𑀜𑀸𑀬 𑀤𑀺𑀲𑁆𑀯𑀸 [𑀤𑀺𑀲𑁆𑀯𑀸 𑀤𑀺𑀲𑁆𑀯𑀸 (𑀲𑀻. 𑀲𑁆𑀬𑀸.)] 𑀧𑀳𑀸𑀢𑀩𑁆𑀩𑀸.

‘‘𑀓𑀢𑀫𑁂 𑀘, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸 𑀓𑀸𑀬𑁂𑀦 𑀧𑀳𑀸𑀢𑀩𑁆𑀩𑀸, 𑀦𑁄 𑀯𑀸𑀘𑀸𑀬? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀅𑀓𑀼𑀲𑀮𑀁 𑀆𑀧𑀦𑁆𑀦𑁄 𑀳𑁄𑀢𑀺 𑀓𑀺𑀜𑁆𑀘𑀺 𑀤𑁂𑀲𑀁 [𑀓𑀜𑁆𑀘𑀺 𑀤𑁂𑀯 𑀤𑁂𑀲𑀁 (𑀲𑀻. 𑀲𑁆𑀬𑀸.)] 𑀓𑀸𑀬𑁂𑀦. 𑀢𑀫𑁂𑀦𑀁 𑀅𑀦𑀼𑀯𑀺𑀘𑁆𑀘 𑀯𑀺𑀜𑁆𑀜𑀽 𑀲𑀩𑁆𑀭𑀳𑁆𑀫𑀘𑀸𑀭𑀻 𑀏𑀯𑀫𑀸𑀳𑀁𑀲𑀼 𑁋 ‘𑀆𑀬𑀲𑁆𑀫𑀸 𑀔𑁄 𑀅𑀓𑀼𑀲𑀮𑀁 𑀆𑀧𑀦𑁆𑀦𑁄 𑀓𑀺𑀜𑁆𑀘𑀺 𑀤𑁂𑀲𑀁 𑀓𑀸𑀬𑁂𑀦. 𑀲𑀸𑀥𑀼 𑀯𑀢𑀸𑀬𑀲𑁆𑀫𑀸 𑀓𑀸𑀬𑀤𑀼𑀘𑁆𑀘𑀭𑀺𑀢𑀁 𑀧𑀳𑀸𑀬 𑀓𑀸𑀬𑀲𑀼𑀘𑀭𑀺𑀢𑀁 𑀪𑀸𑀯𑁂𑀢𑀽’𑀢𑀺. 𑀲𑁄 𑀅𑀦𑀼𑀯𑀺𑀘𑁆𑀘 𑀯𑀺𑀜𑁆𑀜𑀽𑀳𑀺 𑀲𑀩𑁆𑀭𑀳𑁆𑀫𑀘𑀸𑀭𑀻𑀳𑀺 𑀯𑀼𑀘𑁆𑀘𑀫𑀸𑀦𑁄 𑀓𑀸𑀬𑀤𑀼𑀘𑁆𑀘𑀭𑀺𑀢𑀁 𑀧𑀳𑀸𑀬 𑀓𑀸𑀬𑀲𑀼𑀘𑀭𑀺𑀢𑀁 𑀪𑀸𑀯𑁂𑀢𑀺. 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸 𑀓𑀸𑀬𑁂𑀦 𑀧𑀳𑀸𑀢𑀩𑁆𑀩𑀸, 𑀦𑁄 𑀯𑀸𑀘𑀸𑀬.

‘‘𑀓𑀢𑀫𑁂 𑀘, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸 𑀯𑀸𑀘𑀸𑀬 𑀧𑀳𑀸𑀢𑀩𑁆𑀩𑀸, 𑀦𑁄 𑀓𑀸𑀬𑁂𑀦? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀅𑀓𑀼𑀲𑀮𑀁 𑀆𑀧𑀦𑁆𑀦𑁄 𑀳𑁄𑀢𑀺 𑀓𑀺𑀜𑁆𑀘𑀺 𑀤𑁂𑀲𑀁 𑀯𑀸𑀘𑀸𑀬. 𑀢𑀫𑁂𑀦𑀁 𑀅𑀦𑀼𑀯𑀺𑀘𑁆𑀘 𑀯𑀺𑀜𑁆𑀜𑀽 𑀲𑀩𑁆𑀭𑀳𑁆𑀫𑀘𑀸𑀭𑀻 𑀏𑀯𑀫𑀸𑀳𑀁𑀲𑀼 𑁋 ‘𑀆𑀬𑀲𑁆𑀫𑀸 𑀔𑁄 𑀅𑀓𑀼𑀲𑀮𑀁 𑀆𑀧𑀦𑁆𑀦𑁄 𑀓𑀺𑀜𑁆𑀘𑀺 𑀤𑁂𑀲𑀁 𑀯𑀸𑀘𑀸𑀬. 𑀲𑀸𑀥𑀼 𑀯𑀢𑀸𑀬𑀲𑁆𑀫𑀸 𑀯𑀘𑀻𑀤𑀼𑀘𑁆𑀘𑀭𑀺𑀢𑀁 𑀧𑀳𑀸𑀬 𑀯𑀘𑀻𑀲𑀼𑀘𑀭𑀺𑀢𑀁 𑀪𑀸𑀯𑁂𑀢𑀽’𑀢𑀺. 𑀲𑁄 𑀅𑀦𑀼𑀯𑀺𑀘𑁆𑀘 𑀯𑀺𑀜𑁆𑀜𑀽𑀳𑀺 𑀲𑀩𑁆𑀭𑀳𑁆𑀫𑀘𑀸𑀭𑀻𑀳𑀺 𑀯𑀼𑀘𑁆𑀘𑀫𑀸𑀦𑁄 𑀯𑀘𑀻𑀤𑀼𑀘𑁆𑀘𑀭𑀺𑀢𑀁 𑀧𑀳𑀸𑀬 𑀯𑀘𑀻𑀲𑀼𑀘𑀭𑀺𑀢𑀁 𑀪𑀸𑀯𑁂𑀢𑀺. 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸 𑀯𑀸𑀘𑀸𑀬 𑀧𑀳𑀸𑀢𑀩𑁆𑀩𑀸, 𑀦𑁄 𑀓𑀸𑀬𑁂𑀦.

‘‘𑀓𑀢𑀫𑁂 𑀘, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸 𑀦𑁂𑀯 𑀓𑀸𑀬𑁂𑀦 𑀧𑀳𑀸𑀢𑀩𑁆𑀩𑀸 𑀦𑁄 𑀯𑀸𑀘𑀸𑀬, 𑀧𑀜𑁆𑀜𑀸𑀬 𑀤𑀺𑀲𑁆𑀯𑀸 𑀧𑀳𑀸𑀢𑀩𑁆𑀩𑀸? 𑀮𑁄𑀪𑁄, 𑀪𑀺𑀓𑁆𑀔𑀯𑁂, 𑀦𑁂𑀯 𑀓𑀸𑀬𑁂𑀦 𑀧𑀳𑀸𑀢𑀩𑁆𑀩𑁄 𑀦𑁄 𑀯𑀸𑀘𑀸𑀬, 𑀧𑀜𑁆𑀜𑀸𑀬 𑀤𑀺𑀲𑁆𑀯𑀸 𑀧𑀳𑀸𑀢𑀩𑁆𑀩𑁄. 𑀤𑁄𑀲𑁄, 𑀪𑀺𑀓𑁆𑀔𑀯𑁂…𑀧𑁂… 𑀫𑁄𑀳𑁄… 𑀓𑁄𑀥𑁄… 𑀉𑀧𑀦𑀸𑀳𑁄… 𑀫𑀓𑁆𑀔𑁄… 𑀧𑀴𑀸𑀲𑁄 … 𑀫𑀘𑁆𑀙𑀭𑀺𑀬𑀁, 𑀪𑀺𑀓𑁆𑀔𑀯𑁂, 𑀦𑁂𑀯 𑀓𑀸𑀬𑁂𑀦 𑀧𑀳𑀸𑀢𑀩𑁆𑀩𑀁 𑀦𑁄 𑀯𑀸𑀘𑀸𑀬, 𑀧𑀜𑁆𑀜𑀸𑀬 𑀤𑀺𑀲𑁆𑀯𑀸 𑀧𑀳𑀸𑀢𑀩𑁆𑀩𑀁.

‘‘𑀧𑀸𑀧𑀺𑀓𑀸, 𑀪𑀺𑀓𑁆𑀔𑀯𑁂, 𑀇𑀲𑁆𑀲𑀸 𑀦𑁂𑀯 𑀓𑀸𑀬𑁂𑀦 𑀧𑀳𑀸𑀢𑀩𑁆𑀩𑀸 𑀦𑁄 𑀯𑀸𑀘𑀸𑀬, 𑀧𑀜𑁆𑀜𑀸𑀬 𑀤𑀺𑀲𑁆𑀯𑀸 𑀧𑀳𑀸𑀢𑀩𑁆𑀩𑀸. 𑀓𑀢𑀫𑀸 𑀘, 𑀪𑀺𑀓𑁆𑀔𑀯𑁂, 𑀧𑀸𑀧𑀺𑀓𑀸 𑀇𑀲𑁆𑀲𑀸? 𑀇𑀥, 𑀪𑀺𑀓𑁆𑀔𑀯𑁂, 𑀇𑀚𑁆𑀛𑀢𑀺 𑀕𑀳𑀧𑀢𑀺𑀲𑁆𑀲 𑀯𑀸 𑀕𑀳𑀧𑀢𑀺𑀧𑀼𑀢𑁆𑀢𑀲𑁆𑀲 𑀯𑀸 𑀥𑀦𑁂𑀦 𑀯𑀸 𑀥𑀜𑁆𑀜𑁂𑀦 𑀯𑀸 𑀭𑀚𑀢𑁂𑀦 𑀯𑀸 𑀚𑀸𑀢𑀭𑀽𑀧𑁂𑀦 𑀯𑀸. 𑀢𑀢𑁆𑀭𑀸𑀜𑁆𑀜𑀢𑀭𑀲𑁆𑀲 𑀤𑀸𑀲𑀲𑁆𑀲 𑀯𑀸 𑀉𑀧𑀯𑀸𑀲𑀲𑁆𑀲 𑀯𑀸 𑀏𑀯𑀁 𑀳𑁄𑀢𑀺 𑁋 ‘𑀅𑀳𑁄 𑀯𑀢𑀺𑀫𑀲𑁆𑀲 𑀕𑀳𑀧𑀢𑀺𑀲𑁆𑀲 𑀯𑀸 𑀕𑀳𑀧𑀢𑀺𑀧𑀼𑀢𑁆𑀢𑀲𑁆𑀲 𑀯𑀸 𑀦 𑀇𑀚𑁆𑀛𑁂𑀬𑁆𑀬 𑀥𑀦𑁂𑀦 𑀯𑀸 𑀥𑀜𑁆𑀜𑁂𑀦 𑀯𑀸 𑀭𑀚𑀢𑁂𑀦 𑀯𑀸 𑀚𑀸𑀢𑀭𑀽𑀧𑁂𑀦 𑀯𑀸’𑀢𑀺. 𑀲𑀫𑀡𑁄 𑀯𑀸 𑀧𑀦 𑀩𑁆𑀭𑀸𑀳𑁆𑀫𑀡𑁄 𑀯𑀸 𑀮𑀸𑀪𑀻 𑀳𑁄𑀢𑀺 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀸𑀦𑀁. 𑀢𑀢𑁆𑀭𑀸𑀜𑁆𑀜𑀢𑀭𑀲𑁆𑀲 𑀲𑀫𑀡𑀲𑁆𑀲 𑀯𑀸 𑀩𑁆𑀭𑀸𑀳𑁆𑀫𑀡𑀲𑁆𑀲 𑀯𑀸 𑀏𑀯𑀁 𑀳𑁄𑀢𑀺 𑁋 ‘𑀅𑀳𑁄 𑀯𑀢 𑀅𑀬𑀫𑀸𑀬𑀲𑁆𑀫𑀸 𑀦 𑀮𑀸𑀪𑀻 𑀅𑀲𑁆𑀲 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀸𑀦’𑀦𑁆𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀧𑀸𑀧𑀺𑀓𑀸 𑀇𑀲𑁆𑀲𑀸.

‘‘𑀧𑀸𑀧𑀺𑀓𑀸, 𑀪𑀺𑀓𑁆𑀔𑀯𑁂, 𑀇𑀘𑁆𑀙𑀸 𑀦𑁂𑀯 𑀓𑀸𑀬𑁂𑀦 𑀧𑀳𑀸𑀢𑀩𑁆𑀩𑀸 𑀦𑁄 𑀯𑀸𑀘𑀸𑀬, 𑀧𑀜𑁆𑀜𑀸𑀬 𑀤𑀺𑀲𑁆𑀯𑀸 𑀧𑀳𑀸𑀢𑀩𑁆𑀩𑀸. 𑀓𑀢𑀫𑀸 𑀘, 𑀪𑀺𑀓𑁆𑀔𑀯𑁂, 𑀧𑀸𑀧𑀺𑀓𑀸 𑀇𑀘𑁆𑀙𑀸? [𑀯𑀺𑀪. 𑁮𑁫𑁧] 𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀅𑀲𑁆𑀲𑀤𑁆𑀥𑁄 𑀲𑀫𑀸𑀦𑁄 ‘𑀲𑀤𑁆𑀥𑁄𑀢𑀺 𑀫𑀁 𑀚𑀸𑀦𑁂𑀬𑁆𑀬𑀼’𑀦𑁆𑀢𑀺 𑀇𑀘𑁆𑀙𑀢𑀺; 𑀤𑀼𑀲𑁆𑀲𑀻𑀮𑁄 𑀲𑀫𑀸𑀦𑁄 ‘𑀲𑀻𑀮𑀯𑀸𑀢𑀺 𑀫𑀁 𑀚𑀸𑀦𑁂𑀬𑁆𑀬𑀼’𑀦𑁆𑀢𑀺 𑀇𑀘𑁆𑀙𑀢𑀺; 𑀅𑀧𑁆𑀧𑀲𑁆𑀲𑀼𑀢𑁄 𑀲𑀫𑀸𑀦𑁄 ‘𑀩𑀳𑀼𑀲𑁆𑀲𑀼𑀢𑁄𑀢𑀺 𑀫𑀁 𑀚𑀸𑀦𑁂𑀬𑁆𑀬𑀼’𑀦𑁆𑀢𑀺 𑀇𑀘𑁆𑀙𑀢𑀺; 𑀲𑀗𑁆𑀕𑀡𑀺𑀓𑀸𑀭𑀸𑀫𑁄 𑀲𑀫𑀸𑀦𑁄 ‘𑀧𑀯𑀺𑀯𑀺𑀢𑁆𑀢𑁄𑀢𑀺 𑀫𑀁 𑀚𑀸𑀦𑁂𑀬𑁆𑀬𑀼’𑀦𑁆𑀢𑀺 𑀇𑀘𑁆𑀙𑀢𑀺; 𑀓𑀼𑀲𑀻𑀢𑁄 𑀲𑀫𑀸𑀦𑁄 ‘𑀆𑀭𑀤𑁆𑀥𑀯𑀻𑀭𑀺𑀬𑁄𑀢𑀺 𑀫𑀁 𑀚𑀸𑀦𑁂𑀬𑁆𑀬𑀼’𑀦𑁆𑀢𑀺 𑀇𑀘𑁆𑀙𑀢𑀺; 𑀫𑀼𑀝𑁆𑀞𑀲𑁆𑀲𑀢𑀺 𑀲𑀫𑀸𑀦𑁄 ‘𑀉𑀧𑀝𑁆𑀞𑀺𑀢𑀲𑁆𑀲𑀢𑀻𑀢𑀺 𑀫𑀁 𑀚𑀸𑀦𑁂𑀬𑁆𑀬𑀼’𑀦𑁆𑀢𑀺 𑀇𑀘𑁆𑀙𑀢𑀺; 𑀅𑀲𑀫𑀸𑀳𑀺𑀢𑁄 𑀲𑀫𑀸𑀦𑁄 ‘𑀲𑀫𑀸𑀳𑀺𑀢𑁄𑀢𑀺 𑀫𑀁 𑀚𑀸𑀦𑁂𑀬𑁆𑀬𑀼’𑀦𑁆𑀢𑀺 𑀇𑀘𑁆𑀙𑀢𑀺; 𑀤𑀼𑀧𑁆𑀧𑀜𑁆𑀜𑁄 𑀲𑀫𑀸𑀦𑁄 ‘𑀧𑀜𑁆𑀜𑀯𑀸𑀢𑀺 𑀫𑀁 𑀚𑀸𑀦𑁂𑀬𑁆𑀬𑀼’𑀦𑁆𑀢𑀺 𑀇𑀘𑁆𑀙𑀢𑀺; 𑀅𑀔𑀻𑀡𑀸𑀲𑀯𑁄 𑀲𑀫𑀸𑀦𑁄 ‘𑀔𑀻𑀡𑀸𑀲𑀯𑁄𑀢𑀺 𑀫𑀁 𑀚𑀸𑀦𑁂𑀬𑁆𑀬𑀼’𑀦𑁆𑀢𑀺 𑀇𑀘𑁆𑀙𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀧𑀸𑀧𑀺𑀓𑀸 𑀇𑀘𑁆𑀙𑀸. 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸 𑀦𑁂𑀯 𑀓𑀸𑀬𑁂𑀦 𑀧𑀳𑀸𑀢𑀩𑁆𑀩𑀸 𑀦𑁄 𑀯𑀸𑀘𑀸𑀬, 𑀧𑀜𑁆𑀜𑀸𑀬 𑀤𑀺𑀲𑁆𑀯𑀸 𑀧𑀳𑀸𑀢𑀩𑁆𑀩𑀸.

‘‘𑀢𑀜𑁆𑀘𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀁 𑀮𑁄𑀪𑁄 𑀅𑀪𑀺𑀪𑀼𑀬𑁆𑀬 𑀇𑀭𑀺𑀬𑀢𑀺, 𑀤𑁄𑀲𑁄… 𑀫𑁄𑀳𑁄… 𑀓𑁄𑀥𑁄… 𑀉𑀧𑀦𑀸𑀳𑁄… 𑀫𑀓𑁆𑀔𑁄… 𑀧𑀴𑀸𑀲𑁄… 𑀫𑀘𑁆𑀙𑀭𑀺𑀬𑀁… 𑀧𑀸𑀧𑀺𑀓𑀸 𑀇𑀲𑁆𑀲𑀸… 𑀧𑀸𑀧𑀺𑀓𑀸 𑀇𑀘𑁆𑀙𑀸 𑀅𑀪𑀺𑀪𑀼𑀬𑁆𑀬 𑀇𑀭𑀺𑀬𑀢𑀺. 𑀲𑁄 𑀏𑀯𑀫𑀲𑁆𑀲 𑀯𑁂𑀤𑀺𑀢𑀩𑁆𑀩𑁄 𑁋 ‘𑀦𑀸𑀬𑀫𑀸𑀬𑀲𑁆𑀫𑀸 𑀢𑀣𑀸 𑀧𑀚𑀸𑀦𑀸𑀢𑀺 𑀬𑀣𑀸 𑀧𑀚𑀸𑀦𑀢𑁄 𑀮𑁄𑀪𑁄 𑀦 𑀳𑁄𑀢𑀺, 𑀢𑀣𑀸𑀳𑀺𑀫𑀁 𑀆𑀬𑀲𑁆𑀫𑀦𑁆𑀢𑀁 𑀮𑁄𑀪𑁄 𑀅𑀪𑀺𑀪𑀼𑀬𑁆𑀬 𑀇𑀭𑀺𑀬𑀢𑀺; 𑀦𑀸𑀬𑀫𑀸𑀬𑀲𑁆𑀫𑀸 𑀢𑀣𑀸 𑀧𑀚𑀸𑀦𑀸𑀢𑀺 𑀬𑀣𑀸 𑀧𑀚𑀸𑀦𑀢𑁄 𑀤𑁄𑀲𑁄 𑀦 𑀳𑁄𑀢𑀺… 𑀫𑁄𑀳𑁄… 𑀓𑁄𑀥𑁄… 𑀉𑀧𑀦𑀸𑀳𑁄… 𑀫𑀓𑁆𑀔𑁄… 𑀧𑀴𑀸𑀲𑁄… 𑀫𑀘𑁆𑀙𑀭𑀺𑀬𑀁… 𑀧𑀸𑀧𑀺𑀓𑀸 𑀇𑀲𑁆𑀲𑀸… 𑀧𑀸𑀧𑀺𑀓𑀸 𑀇𑀘𑁆𑀙𑀸 𑀦 𑀳𑁄𑀢𑀺, 𑀢𑀣𑀸𑀳𑀺𑀫𑀁 𑀆𑀬𑀲𑁆𑀫𑀦𑁆𑀢𑀁 𑀧𑀸𑀧𑀺𑀓𑀸 𑀇𑀘𑁆𑀙𑀸 𑀅𑀪𑀺𑀪𑀼𑀬𑁆𑀬 𑀇𑀭𑀺𑀬𑀢𑀻’𑀢𑀺.

‘‘𑀢𑀜𑁆𑀘𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀁 𑀮𑁄𑀪𑁄 𑀦𑀸𑀪𑀺𑀪𑀼𑀬𑁆𑀬 𑀇𑀭𑀺𑀬𑀢𑀺, 𑀤𑁄𑀲𑁄… 𑀫𑁄𑀳𑁄… 𑀓𑁄𑀥𑁄… 𑀉𑀧𑀦𑀸𑀳𑁄… 𑀫𑀓𑁆𑀔𑁄… 𑀧𑀴𑀸𑀲𑁄… 𑀫𑀘𑁆𑀙𑀭𑀺𑀬𑀁… 𑀧𑀸𑀧𑀺𑀓𑀸 𑀇𑀲𑁆𑀲𑀸… 𑀧𑀸𑀧𑀺𑀓𑀸 𑀇𑀘𑁆𑀙𑀸 𑀦𑀸𑀪𑀺𑀪𑀼𑀬𑁆𑀬 𑀇𑀭𑀺𑀬𑀢𑀺, 𑀲𑁄 𑀏𑀯𑀫𑀲𑁆𑀲 𑀯𑁂𑀤𑀺𑀢𑀩𑁆𑀩𑁄 𑁋 ‘𑀢𑀣𑀸 𑀅𑀬𑀫𑀸𑀬𑀲𑁆𑀫𑀸 𑀧𑀚𑀸𑀦𑀸𑀢𑀺 𑀬𑀣𑀸 𑀧𑀚𑀸𑀦𑀢𑁄 𑀮𑁄𑀪𑁄 𑀦 𑀳𑁄𑀢𑀺, 𑀢𑀣𑀸𑀳𑀺𑀫𑀁 𑀆𑀬𑀲𑁆𑀫𑀦𑁆𑀢𑀁 𑀮𑁄𑀪𑁄 𑀦𑀸𑀪𑀺𑀪𑀼𑀬𑁆𑀬 𑀇𑀭𑀺𑀬𑀢𑀺; 𑀢𑀣𑀸 𑀅𑀬𑀫𑀸𑀬𑀲𑁆𑀫𑀸 𑀧𑀚𑀸𑀦𑀸𑀢𑀺 𑀬𑀣𑀸 𑀧𑀚𑀸𑀦𑀢𑁄 𑀤𑁄𑀲𑁄 𑀦 𑀳𑁄𑀢𑀺… 𑀫𑁄𑀳𑁄… 𑀓𑁄𑀥𑁄 … 𑀉𑀧𑀦𑀸𑀳𑁄… 𑀫𑀓𑁆𑀔𑁄… 𑀧𑀴𑀸𑀲𑁄… 𑀫𑀘𑁆𑀙𑀭𑀺𑀬𑀁… 𑀧𑀸𑀧𑀺𑀓𑀸 𑀇𑀲𑁆𑀲𑀸… 𑀧𑀸𑀧𑀺𑀓𑀸 𑀇𑀘𑁆𑀙𑀸 𑀦 𑀳𑁄𑀢𑀺, 𑀢𑀣𑀸𑀳𑀺𑀫𑀁 𑀆𑀬𑀲𑁆𑀫𑀦𑁆𑀢𑀁 𑀧𑀸𑀧𑀺𑀓𑀸 𑀇𑀘𑁆𑀙𑀸 𑀦𑀸𑀪𑀺𑀪𑀼𑀬𑁆𑀬 𑀇𑀭𑀺𑀬𑀢𑀻’’’𑀢𑀺. 𑀢𑀢𑀺𑀬𑀁.

𑁪. 𑀫𑀳𑀸𑀘𑀼𑀦𑁆𑀤𑀲𑀼𑀢𑁆𑀢𑀁

𑁨𑁪. 𑀏𑀓𑀁 𑀲𑀫𑀬𑀁 𑀆𑀬𑀲𑁆𑀫𑀸 𑀫𑀳𑀸𑀘𑀼𑀦𑁆𑀤𑁄 𑀘𑁂𑀢𑀻𑀲𑀼 𑀯𑀺𑀳𑀭𑀢𑀺 𑀲𑀳𑀚𑀸𑀢𑀺𑀬𑀁. 𑀢𑀢𑁆𑀭 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀘𑀼𑀦𑁆𑀤𑁄 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀆𑀯𑀼𑀲𑁄 𑀪𑀺𑀓𑁆𑀔𑀯𑁂’’𑀢𑀺. ‘‘𑀆𑀯𑀼𑀲𑁄’’𑀢𑀺 𑀔𑁄 𑀢𑁂 𑀪𑀺𑀓𑁆𑀔𑀽 𑀆𑀬𑀲𑁆𑀫𑀢𑁄 𑀫𑀳𑀸𑀘𑀼𑀦𑁆𑀤𑀲𑁆𑀲 𑀧𑀘𑁆𑀘𑀲𑁆𑀲𑁄𑀲𑀼𑀁. 𑀆𑀬𑀲𑁆𑀫𑀸 𑀫𑀳𑀸𑀘𑀼𑀦𑁆𑀤𑁄 𑀏𑀢𑀤𑀯𑁄𑀘 𑁋

‘‘𑀜𑀸𑀡𑀯𑀸𑀤𑀁, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀯𑀤𑀫𑀸𑀦𑁄 𑁋 ‘𑀚𑀸𑀦𑀸𑀫𑀺𑀫𑀁 𑀥𑀫𑁆𑀫𑀁, 𑀧𑀲𑁆𑀲𑀸𑀫𑀺𑀫𑀁 𑀥𑀫𑁆𑀫’𑀦𑁆𑀢𑀺. 𑀢𑀜𑁆𑀘𑁂, 𑀆𑀯𑀼𑀲𑁄, 𑀪𑀺𑀓𑁆𑀔𑀼𑀁 𑀮𑁄𑀪𑁄 𑀅𑀪𑀺𑀪𑀼𑀬𑁆𑀬 𑀢𑀺𑀝𑁆𑀞𑀢𑀺, 𑀤𑁄𑀲𑁄… 𑀫𑁄𑀳𑁄 … 𑀓𑁄𑀥𑁄… 𑀉𑀧𑀦𑀸𑀳𑁄… 𑀫𑀓𑁆𑀔𑁄… 𑀧𑀴𑀸𑀲𑁄… 𑀫𑀘𑁆𑀙𑀭𑀺𑀬𑀁… 𑀧𑀸𑀧𑀺𑀓𑀸 𑀇𑀲𑁆𑀲𑀸… 𑀧𑀸𑀧𑀺𑀓𑀸 𑀇𑀘𑁆𑀙𑀸 𑀅𑀪𑀺𑀪𑀼𑀬𑁆𑀬 𑀢𑀺𑀝𑁆𑀞𑀢𑀺, 𑀲𑁄 𑀏𑀯𑀫𑀲𑁆𑀲 𑀯𑁂𑀤𑀺𑀢𑀩𑁆𑀩𑁄 𑁋 ‘𑀦𑀸𑀬𑀫𑀸𑀬𑀲𑁆𑀫𑀸 𑀢𑀣𑀸 𑀧𑀚𑀸𑀦𑀸𑀢𑀺 𑀬𑀣𑀸 𑀧𑀚𑀸𑀦𑀢𑁄 𑀮𑁄𑀪𑁄 𑀦 𑀳𑁄𑀢𑀺, 𑀢𑀣𑀸𑀳𑀺𑀫𑀁 𑀆𑀬𑀲𑁆𑀫𑀦𑁆𑀢𑀁 𑀮𑁄𑀪𑁄 𑀅𑀪𑀺𑀪𑀼𑀬𑁆𑀬 𑀢𑀺𑀝𑁆𑀞𑀢𑀺; 𑀦𑀸𑀬𑀫𑀸𑀬𑀲𑁆𑀫𑀸 𑀢𑀣𑀸 𑀧𑀚𑀸𑀦𑀸𑀢𑀺 𑀬𑀣𑀸 𑀧𑀚𑀸𑀦𑀢𑁄 𑀤𑁄𑀲𑁄 𑀦 𑀳𑁄𑀢𑀺… 𑀫𑁄𑀳𑁄… 𑀓𑁄𑀥𑁄… 𑀉𑀧𑀦𑀸𑀳𑁄… 𑀫𑀓𑁆𑀔𑁄… 𑀧𑀴𑀸𑀲𑁄… 𑀫𑀘𑁆𑀙𑀭𑀺𑀬𑀁… 𑀧𑀸𑀧𑀺𑀓𑀸 𑀇𑀲𑁆𑀲𑀸… 𑀧𑀸𑀧𑀺𑀓𑀸 𑀇𑀘𑁆𑀙𑀸 𑀦 𑀳𑁄𑀢𑀺, 𑀢𑀣𑀸𑀳𑀺𑀫𑀁 𑀆𑀬𑀲𑁆𑀫𑀦𑁆𑀢𑀁 𑀧𑀸𑀧𑀺𑀓𑀸 𑀇𑀘𑁆𑀙𑀸 𑀅𑀪𑀺𑀪𑀼𑀬𑁆𑀬 𑀢𑀺𑀝𑁆𑀞𑀢𑀻’𑀢𑀺.

‘‘𑀪𑀸𑀯𑀦𑀸𑀯𑀸𑀤𑀁, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀯𑀤𑀫𑀸𑀦𑁄 𑁋 ‘𑀪𑀸𑀯𑀺𑀢𑀓𑀸𑀬𑁄𑀫𑁆𑀳𑀺 𑀪𑀸𑀯𑀺𑀢𑀲𑀻𑀮𑁄 𑀪𑀸𑀯𑀺𑀢𑀘𑀺𑀢𑁆𑀢𑁄 𑀪𑀸𑀯𑀺𑀢𑀧𑀜𑁆𑀜𑁄’𑀢𑀺. 𑀢𑀜𑁆𑀘𑁂, 𑀆𑀯𑀼𑀲𑁄, 𑀪𑀺𑀓𑁆𑀔𑀼𑀁 𑀮𑁄𑀪𑁄 𑀅𑀪𑀺𑀪𑀼𑀬𑁆𑀬 𑀢𑀺𑀝𑁆𑀞𑀢𑀺, 𑀤𑁄𑀲𑁄… 𑀫𑁄𑀳𑁄… 𑀓𑁄𑀥𑁄… 𑀉𑀧𑀦𑀸𑀳𑁄… 𑀫𑀓𑁆𑀔𑁄… 𑀧𑀴𑀸𑀲𑁄… 𑀫𑀘𑁆𑀙𑀭𑀺𑀬𑀁… 𑀧𑀸𑀧𑀺𑀓𑀸 𑀇𑀲𑁆𑀲𑀸… 𑀧𑀸𑀧𑀺𑀓𑀸 𑀇𑀘𑁆𑀙𑀸 𑀅𑀪𑀺𑀪𑀼𑀬𑁆𑀬 𑀢𑀺𑀝𑁆𑀞𑀢𑀺, 𑀲𑁄 𑀏𑀯𑀫𑀲𑁆𑀲 𑀯𑁂𑀤𑀺𑀢𑀩𑁆𑀩𑁄 𑁋 ‘𑀦𑀸𑀬𑀫𑀸𑀬𑀲𑁆𑀫𑀸 𑀢𑀣𑀸 𑀧𑀚𑀸𑀦𑀸𑀢𑀺 𑀬𑀣𑀸 𑀧𑀚𑀸𑀦𑀢𑁄 𑀮𑁄𑀪𑁄 𑀦 𑀳𑁄𑀢𑀺, 𑀢𑀣𑀸𑀳𑀺𑀫𑀁 𑀆𑀬𑀲𑁆𑀫𑀦𑁆𑀢𑀁 𑀮𑁄𑀪𑁄 𑀅𑀪𑀺𑀪𑀼𑀬𑁆𑀬 𑀢𑀺𑀝𑁆𑀞𑀢𑀺; 𑀦𑀸𑀬𑀫𑀸𑀬𑀲𑁆𑀫𑀸 𑀢𑀣𑀸 𑀧𑀚𑀸𑀦𑀸𑀢𑀺 𑀬𑀣𑀸 𑀧𑀚𑀸𑀦𑀢𑁄 𑀤𑁄𑀲𑁄 𑀦 𑀳𑁄𑀢𑀺… 𑀫𑁄𑀳𑁄… 𑀓𑁄𑀥𑁄… 𑀉𑀧𑀦𑀸𑀳𑁄… 𑀫𑀓𑁆𑀔𑁄… 𑀧𑀴𑀸𑀲𑁄 … 𑀫𑀘𑁆𑀙𑀭𑀺𑀬𑀁… 𑀧𑀸𑀧𑀺𑀓𑀸 𑀇𑀲𑁆𑀲𑀸… 𑀧𑀸𑀧𑀺𑀓𑀸 𑀇𑀘𑁆𑀙𑀸 𑀦 𑀳𑁄𑀢𑀺, 𑀢𑀣𑀸𑀳𑀺𑀫𑀁 𑀆𑀬𑀲𑁆𑀫𑀦𑁆𑀢𑀁 𑀧𑀸𑀧𑀺𑀓𑀸 𑀇𑀘𑁆𑀙𑀸 𑀅𑀪𑀺𑀪𑀼𑀬𑁆𑀬 𑀢𑀺𑀝𑁆𑀞𑀢𑀻’𑀢𑀺.

‘‘𑀜𑀸𑀡𑀯𑀸𑀤𑀜𑁆𑀘, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀯𑀤𑀫𑀸𑀦𑁄 𑀪𑀸𑀯𑀦𑀸𑀯𑀸𑀤𑀜𑁆𑀘 𑁋 ‘𑀚𑀸𑀦𑀸𑀫𑀺𑀫𑀁 𑀥𑀫𑁆𑀫𑀁, 𑀧𑀲𑁆𑀲𑀸𑀫𑀺𑀫𑀁 𑀥𑀫𑁆𑀫𑀁, 𑀪𑀸𑀯𑀺𑀢𑀓𑀸𑀬𑁄𑀫𑁆𑀳𑀺 𑀪𑀸𑀯𑀺𑀢𑀲𑀻𑀮𑁄 𑀪𑀸𑀯𑀺𑀢𑀘𑀺𑀢𑁆𑀢𑁄 𑀪𑀸𑀯𑀺𑀢𑀧𑀜𑁆𑀜𑁄’𑀢𑀺. 𑀢𑀜𑁆𑀘𑁂, 𑀆𑀯𑀼𑀲𑁄, 𑀪𑀺𑀓𑁆𑀔𑀼𑀁 𑀮𑁄𑀪𑁄 𑀅𑀪𑀺𑀪𑀼𑀬𑁆𑀬 𑀢𑀺𑀝𑁆𑀞𑀢𑀺, 𑀤𑁄𑀲𑁄… 𑀫𑁄𑀳𑁄… 𑀓𑁄𑀥𑁄… 𑀉𑀧𑀦𑀸𑀳𑁄… 𑀫𑀓𑁆𑀔𑁄… 𑀧𑀴𑀸𑀲𑁄… 𑀫𑀘𑁆𑀙𑀭𑀺𑀬𑀁… 𑀧𑀸𑀧𑀺𑀓𑀸 𑀇𑀲𑁆𑀲𑀸… 𑀧𑀸𑀧𑀺𑀓𑀸 𑀇𑀘𑁆𑀙𑀸 𑀅𑀪𑀺𑀪𑀼𑀬𑁆𑀬 𑀢𑀺𑀝𑁆𑀞𑀢𑀺, 𑀲𑁄 𑀏𑀯𑀫𑀲𑁆𑀲 𑀯𑁂𑀤𑀺𑀢𑀩𑁆𑀩𑁄 𑁋 ‘𑀦𑀸𑀬𑀫𑀸𑀬𑀲𑁆𑀫𑀸 𑀢𑀣𑀸 𑀧𑀚𑀸𑀦𑀸𑀢𑀺 𑀬𑀣𑀸 𑀧𑀚𑀸𑀦𑀢𑁄 𑀮𑁄𑀪𑁄 𑀦 𑀳𑁄𑀢𑀺, 𑀢𑀣𑀸𑀳𑀺𑀫𑀁 𑀆𑀬𑀲𑁆𑀫𑀦𑁆𑀢𑀁 𑀮𑁄𑀪𑁄 𑀅𑀪𑀺𑀪𑀼𑀬𑁆𑀬 𑀢𑀺𑀝𑁆𑀞𑀢𑀺; 𑀦𑀸𑀬𑀫𑀸𑀬𑀲𑁆𑀫𑀸 𑀢𑀣𑀸 𑀧𑀚𑀸𑀦𑀸𑀢𑀺 𑀬𑀣𑀸 𑀧𑀚𑀸𑀦𑀢𑁄 𑀤𑁄𑀲𑁄 𑀦 𑀳𑁄𑀢𑀺… 𑀫𑁄𑀳𑁄… 𑀓𑁄𑀥𑁄… 𑀉𑀧𑀦𑀸𑀳𑁄… 𑀫𑀓𑁆𑀔𑁄… 𑀧𑀴𑀸𑀲𑁄… 𑀫𑀘𑁆𑀙𑀭𑀺𑀬𑀁… 𑀧𑀸𑀧𑀺𑀓𑀸 𑀇𑀲𑁆𑀲𑀸… 𑀧𑀸𑀧𑀺𑀓𑀸 𑀇𑀘𑁆𑀙𑀸 𑀦 𑀳𑁄𑀢𑀺, 𑀢𑀣𑀸𑀳𑀺𑀫𑀁 𑀆𑀬𑀲𑁆𑀫𑀦𑁆𑀢𑀁 𑀧𑀸𑀧𑀺𑀓𑀸 𑀇𑀘𑁆𑀙𑀸 𑀅𑀪𑀺𑀪𑀼𑀬𑁆𑀬 𑀢𑀺𑀝𑁆𑀞𑀢𑀻’𑀢𑀺.

‘‘𑀲𑁂𑀬𑁆𑀬𑀣𑀸𑀧𑀺, 𑀆𑀯𑀼𑀲𑁄, 𑀧𑀼𑀭𑀺𑀲𑁄 𑀤𑀮𑀺𑀤𑁆𑀤𑁄𑀯 𑀲𑀫𑀸𑀦𑁄 𑀅𑀟𑁆𑀠𑀯𑀸𑀤𑀁 𑀯𑀤𑁂𑀬𑁆𑀬, 𑀅𑀥𑀦𑁄𑀯 𑀲𑀫𑀸𑀦𑁄 𑀥𑀦𑀯𑀸𑀯𑀸𑀤𑀁 𑀯𑀤𑁂𑀬𑁆𑀬, 𑀅𑀪𑁄𑀕𑁄𑀯 𑀲𑀫𑀸𑀦𑁄 𑀪𑁄𑀕𑀯𑀸𑀯𑀸𑀤𑀁 𑀯𑀤𑁂𑀬𑁆𑀬. 𑀲𑁄 𑀓𑀺𑀲𑁆𑀫𑀺𑀜𑁆𑀘𑀺𑀤𑁂𑀯 𑀥𑀦𑀓𑀭𑀡𑀻𑀬𑁂 𑀲𑀫𑀼𑀧𑁆𑀧𑀦𑁆𑀦𑁂 𑀦 𑀲𑀓𑁆𑀓𑀼𑀡𑁂𑀬𑁆𑀬 𑀉𑀧𑀦𑀻𑀳𑀸𑀢𑀼𑀁 𑀥𑀦𑀁 𑀯𑀸 𑀥𑀜𑁆𑀜𑀁 𑀯𑀸 𑀭𑀚𑀢𑀁 𑀯𑀸 𑀚𑀸𑀢𑀭𑀽𑀧𑀁 𑀯𑀸. 𑀢𑀫𑁂𑀦𑀁 𑀏𑀯𑀁 𑀚𑀸𑀦𑁂𑀬𑁆𑀬𑀼𑀁 𑁋 ‘𑀤𑀮𑀺𑀤𑁆𑀤𑁄𑀯 𑀅𑀬𑀫𑀸𑀬𑀲𑁆𑀫𑀸 𑀲𑀫𑀸𑀦𑁄 𑀅𑀟𑁆𑀠𑀯𑀸𑀤𑀁 𑀯𑀤𑁂𑀢𑀺, 𑀅𑀥𑀦𑁄𑀯 𑀅𑀬𑀫𑀸𑀬𑀲𑁆𑀫𑀸 𑀲𑀫𑀸𑀦𑁄 𑀥𑀦𑀯𑀸𑀯𑀸𑀤𑀁 𑀯𑀤𑁂𑀢𑀺, 𑀅𑀪𑁄𑀕𑀯𑀸𑀯 𑀅𑀬𑀫𑀸𑀬𑀲𑁆𑀫𑀸 𑀲𑀫𑀸𑀦𑁄 𑀪𑁄𑀕𑀯𑀸𑀯𑀸𑀤𑀁 𑀯𑀤𑁂𑀢𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀢𑀣𑀸 𑀳𑀺 𑀅𑀬𑀫𑀸𑀬𑀲𑁆𑀫𑀸 𑀓𑀺𑀲𑁆𑀫𑀺𑀜𑁆𑀘𑀺𑀤𑁂𑀯 𑀥𑀦𑀓𑀭𑀡𑀻𑀬𑁂 𑀲𑀫𑀼𑀧𑁆𑀧𑀦𑁆𑀦𑁂 𑀦 𑀲𑀓𑁆𑀓𑁄𑀢𑀺 𑀉𑀧𑀦𑀻𑀳𑀸𑀢𑀼𑀁 𑀥𑀦𑀁 𑀯𑀸 𑀥𑀜𑁆𑀜𑀁 𑀯𑀸 𑀭𑀚𑀢𑀁 𑀯𑀸 𑀚𑀸𑀢𑀭𑀽𑀧𑀁 𑀯𑀸’𑀢𑀺.

‘‘𑀏𑀯𑀫𑁂𑀯𑀁 𑀔𑁄, 𑀆𑀯𑀼𑀲𑁄, 𑀜𑀸𑀡𑀯𑀸𑀤𑀜𑁆𑀘 𑀪𑀺𑀓𑁆𑀔𑀼 𑀯𑀤𑀫𑀸𑀦𑁄 𑀪𑀸𑀯𑀦𑀸𑀯𑀸𑀤𑀜𑁆𑀘 𑁋 ‘𑀚𑀸𑀦𑀸𑀫𑀺𑀫𑀁 𑀥𑀫𑁆𑀫𑀁, 𑀧𑀲𑁆𑀲𑀸𑀫𑀺𑀫𑀁 𑀥𑀫𑁆𑀫𑀁, 𑀪𑀸𑀯𑀺𑀢𑀓𑀸𑀬𑁄𑀫𑁆𑀳𑀺 𑀪𑀸𑀯𑀺𑀢𑀲𑀻𑀮𑁄 𑀪𑀸𑀯𑀺𑀢𑀘𑀺𑀢𑁆𑀢𑁄 𑀪𑀸𑀯𑀺𑀢𑀧𑀜𑁆𑀜𑁄’𑀢𑀺. 𑀢𑀁 𑀘𑁂, 𑀆𑀯𑀼𑀲𑁄, 𑀪𑀺𑀓𑁆𑀔𑀼𑀁 𑀮𑁄𑀪𑁄 𑀅𑀪𑀺𑀪𑀼𑀬𑁆𑀬 𑀢𑀺𑀝𑁆𑀞𑀢𑀺, 𑀤𑁄𑀲𑁄… 𑀫𑁄𑀳𑁄… 𑀓𑁄𑀥𑁄… 𑀉𑀧𑀦𑀸𑀳𑁄… 𑀫𑀓𑁆𑀔𑁄… 𑀧𑀴𑀸𑀲𑁄… 𑀫𑀘𑁆𑀙𑀭𑀺𑀬𑀁… 𑀧𑀸𑀧𑀺𑀓𑀸 𑀇𑀲𑁆𑀲𑀸… 𑀧𑀸𑀧𑀺𑀓𑀸 𑀇𑀘𑁆𑀙𑀸 𑀅𑀪𑀺𑀪𑀼𑀬𑁆𑀬 𑀢𑀺𑀝𑁆𑀞𑀢𑀺, 𑀲𑁄 𑀏𑀯𑀫𑀲𑁆𑀲 𑀯𑁂𑀤𑀺𑀢𑀩𑁆𑀩𑁄 𑁋 ‘𑀦𑀸𑀬𑀫𑀸𑀬𑀲𑁆𑀫𑀸 𑀢𑀣𑀸 𑀧𑀚𑀸𑀦𑀸𑀢𑀺 𑀬𑀣𑀸 𑀧𑀚𑀸𑀦𑀢𑁄 𑀮𑁄𑀪𑁄 𑀦 𑀳𑁄𑀢𑀺, 𑀢𑀣𑀸𑀳𑀺𑀫𑀁 𑀆𑀬𑀲𑁆𑀫𑀦𑁆𑀢𑀁 𑀮𑁄𑀪𑁄 𑀅𑀪𑀺𑀪𑀼𑀬𑁆𑀬 𑀢𑀺𑀝𑁆𑀞𑀢𑀺; 𑀦𑀸𑀬𑀫𑀸𑀬𑀲𑁆𑀫𑀸 𑀢𑀣𑀸 𑀧𑀚𑀸𑀦𑀸𑀢𑀺 𑀬𑀣𑀸 𑀧𑀚𑀸𑀦𑀢𑁄 𑀤𑁄𑀲𑁄 𑀦 𑀳𑁄𑀢𑀺… 𑀫𑁄𑀳𑁄… 𑀓𑁄𑀥𑁄… 𑀉𑀧𑀦𑀸𑀳𑁄… 𑀫𑀓𑁆𑀔𑁄… 𑀧𑀴𑀸𑀲𑁄… 𑀫𑀘𑁆𑀙𑀭𑀺𑀬𑀁… 𑀧𑀸𑀧𑀺𑀓𑀸 𑀇𑀲𑁆𑀲𑀸 … 𑀧𑀸𑀧𑀺𑀓𑀸 𑀇𑀘𑁆𑀙𑀸 𑀦 𑀳𑁄𑀢𑀺, 𑀢𑀣𑀸𑀳𑀺𑀫𑀁 𑀆𑀬𑀲𑁆𑀫𑀦𑁆𑀢𑀁 𑀧𑀸𑀧𑀺𑀓𑀸 𑀇𑀘𑁆𑀙𑀸 𑀅𑀪𑀺𑀪𑀼𑀬𑁆𑀬 𑀢𑀺𑀝𑁆𑀞𑀢𑀻’𑀢𑀺.

‘‘𑀜𑀸𑀡𑀯𑀸𑀤𑀁, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀯𑀤𑀫𑀸𑀦𑁄 𑁋 ‘𑀚𑀸𑀦𑀸𑀫𑀺𑀫𑀁 𑀥𑀫𑁆𑀫𑀁, 𑀧𑀲𑁆𑀲𑀸𑀫𑀺𑀫𑀁 𑀥𑀫𑁆𑀫’𑀦𑁆𑀢𑀺. 𑀢𑀜𑁆𑀘𑁂, 𑀆𑀯𑀼𑀲𑁄, 𑀪𑀺𑀓𑁆𑀔𑀼𑀁 𑀮𑁄𑀪𑁄 𑀦𑀸𑀪𑀺𑀪𑀼𑀬𑁆𑀬 𑀢𑀺𑀝𑁆𑀞𑀢𑀺, 𑀤𑁄𑀲𑁄… 𑀫𑁄𑀳𑁄… 𑀓𑁄𑀥𑁄… 𑀉𑀧𑀦𑀸𑀳𑁄… 𑀫𑀓𑁆𑀔𑁄… 𑀧𑀴𑀸𑀲𑁄… 𑀫𑀘𑁆𑀙𑀭𑀺𑀬𑀁… 𑀧𑀸𑀧𑀺𑀓𑀸 𑀇𑀲𑁆𑀲𑀸… 𑀧𑀸𑀧𑀺𑀓𑀸 𑀇𑀘𑁆𑀙𑀸 𑀦𑀸𑀪𑀺𑀪𑀼𑀬𑁆𑀬 𑀢𑀺𑀝𑁆𑀞𑀢𑀺, 𑀲𑁄 𑀏𑀯𑀫𑀲𑁆𑀲 𑀯𑁂𑀤𑀺𑀢𑀩𑁆𑀩𑁄 𑁋 ‘𑀅𑀬𑀫𑀸𑀬𑀲𑁆𑀫𑀸 𑀢𑀣𑀸 𑀧𑀚𑀸𑀦𑀸𑀢𑀺 𑀬𑀣𑀸 𑀧𑀚𑀸𑀦𑀢𑁄 𑀮𑁄𑀪𑁄 𑀦 𑀳𑁄𑀢𑀺, 𑀢𑀣𑀸𑀳𑀺𑀫𑀁 𑀆𑀬𑀲𑁆𑀫𑀦𑁆𑀢𑀁 𑀮𑁄𑀪𑁄 𑀦𑀸𑀪𑀺𑀪𑀼𑀬𑁆𑀬 𑀢𑀺𑀝𑁆𑀞𑀢𑀺; 𑀢𑀣𑀸 𑀅𑀬𑀫𑀸𑀬𑀲𑁆𑀫𑀸 𑀧𑀚𑀸𑀦𑀸𑀢𑀺 𑀬𑀣𑀸 𑀧𑀚𑀸𑀦𑀢𑁄 𑀤𑁄𑀲𑁄 𑀦 𑀳𑁄𑀢𑀺… 𑀫𑁄𑀳𑁄… 𑀓𑁄𑀥𑁄… 𑀉𑀧𑀦𑀸𑀳𑁄… 𑀫𑀓𑁆𑀔𑁄… 𑀧𑀴𑀸𑀲𑁄… 𑀫𑀘𑁆𑀙𑀭𑀺𑀬𑀁… 𑀧𑀸𑀧𑀺𑀓𑀸 𑀇𑀲𑁆𑀲𑀸… 𑀧𑀸𑀧𑀺𑀓𑀸 𑀇𑀘𑁆𑀙𑀸 𑀦 𑀳𑁄𑀢𑀺, 𑀢𑀣𑀸𑀳𑀺𑀫𑀁 𑀆𑀬𑀲𑁆𑀫𑀦𑁆𑀢𑀁 𑀧𑀸𑀧𑀺𑀓𑀸 𑀇𑀘𑁆𑀙𑀸 𑀦𑀸𑀪𑀺𑀪𑀼𑀬𑁆𑀬 𑀢𑀺𑀝𑁆𑀞𑀢𑀻’𑀢𑀺.

‘‘𑀪𑀸𑀯𑀦𑀸𑀯𑀸𑀤𑀁, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀯𑀤𑀫𑀸𑀦𑁄 𑁋 ‘𑀪𑀸𑀯𑀺𑀢𑀓𑀸𑀬𑁄𑀫𑁆𑀳𑀺 𑀪𑀸𑀯𑀺𑀢𑀲𑀻𑀮𑁄 𑀪𑀸𑀯𑀺𑀢𑀘𑀺𑀢𑁆𑀢𑁄 𑀪𑀸𑀯𑀺𑀢𑀧𑀜𑁆𑀜𑁄’𑀢𑀺. 𑀢𑀜𑁆𑀘𑁂, 𑀆𑀯𑀼𑀲𑁄, 𑀪𑀺𑀓𑁆𑀔𑀼𑀁 𑀮𑁄𑀪𑁄 𑀦𑀸𑀪𑀺𑀪𑀼𑀬𑁆𑀬 𑀢𑀺𑀝𑁆𑀞𑀢𑀺, 𑀤𑁄𑀲𑁄… 𑀫𑁄𑀳𑁄… 𑀓𑁄𑀥𑁄… 𑀉𑀧𑀦𑀸𑀳𑁄… 𑀫𑀓𑁆𑀔𑁄… 𑀧𑀴𑀸𑀲𑁄… 𑀫𑀘𑁆𑀙𑀭𑀺𑀬𑀁… 𑀧𑀸𑀧𑀺𑀓𑀸 𑀇𑀲𑁆𑀲𑀸… 𑀧𑀸𑀧𑀺𑀓𑀸 𑀇𑀘𑁆𑀙𑀸 𑀦𑀸𑀪𑀺𑀪𑀼𑀬𑁆𑀬 𑀢𑀺𑀝𑁆𑀞𑀢𑀺, 𑀲𑁄 𑀏𑀯𑀫𑀲𑁆𑀲 𑀯𑁂𑀤𑀺𑀢𑀩𑁆𑀩𑁄 𑁋 ‘𑀢𑀣𑀸 𑀅𑀬𑀫𑀸𑀬𑀲𑁆𑀫𑀸 𑀧𑀚𑀸𑀦𑀸𑀢𑀺 𑀬𑀣𑀸 𑀧𑀚𑀸𑀦𑀢𑁄 𑀮𑁄𑀪𑁄 𑀦 𑀳𑁄𑀢𑀺, 𑀢𑀣𑀸𑀳𑀺𑀫𑀁 𑀆𑀬𑀲𑁆𑀫𑀦𑁆𑀢𑀁 𑀮𑁄𑀪𑁄 𑀦𑀸𑀪𑀺𑀪𑀼𑀬𑁆𑀬 𑀢𑀺𑀝𑁆𑀞𑀢𑀺; 𑀢𑀣𑀸 𑀅𑀬𑀫𑀸𑀬𑀲𑁆𑀫𑀸 𑀧𑀚𑀸𑀦𑀸𑀢𑀺 𑀬𑀣𑀸 𑀧𑀚𑀸𑀦𑀢𑁄 𑀤𑁄𑀲𑁄 𑀦 𑀳𑁄𑀢𑀺… 𑀫𑁄𑀳𑁄… 𑀓𑁄𑀥𑁄… 𑀉𑀧𑀦𑀸𑀳𑁄… 𑀫𑀓𑁆𑀔𑁄… 𑀧𑀴𑀸𑀲𑁄… 𑀫𑀘𑁆𑀙𑀭𑀺𑀬𑀁… 𑀧𑀸𑀧𑀺𑀓𑀸 𑀇𑀲𑁆𑀲𑀸… 𑀧𑀸𑀧𑀺𑀓𑀸 𑀇𑀘𑁆𑀙𑀸 𑀦 𑀳𑁄𑀢𑀺, 𑀢𑀣𑀸𑀳𑀺𑀫𑀁 𑀆𑀬𑀲𑁆𑀫𑀦𑁆𑀢𑀁 𑀧𑀸𑀧𑀺𑀓𑀸 𑀇𑀘𑁆𑀙𑀸 𑀦𑀸𑀪𑀺𑀪𑀼𑀬𑁆𑀬 𑀢𑀺𑀝𑁆𑀞𑀢𑀻’𑀢𑀺.

‘‘𑀜𑀸𑀡𑀯𑀸𑀤𑀜𑁆𑀘, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀯𑀤𑀫𑀸𑀦𑁄 𑀪𑀸𑀯𑀦𑀸𑀯𑀸𑀤𑀜𑁆𑀘 𑁋 ‘𑀚𑀸𑀦𑀸𑀫𑀺𑀫𑀁 𑀥𑀫𑁆𑀫𑀁, 𑀧𑀲𑁆𑀲𑀸𑀫𑀺𑀫𑀁 𑀥𑀫𑁆𑀫𑀁, 𑀪𑀸𑀯𑀺𑀢𑀓𑀸𑀬𑁄𑀫𑁆𑀳𑀺 𑀪𑀸𑀯𑀺𑀢𑀲𑀻𑀮𑁄 𑀪𑀸𑀯𑀺𑀢𑀘𑀺𑀢𑁆𑀢𑁄 𑀪𑀸𑀯𑀺𑀢𑀧𑀜𑁆𑀜𑁄’𑀢𑀺. 𑀢𑀜𑁆𑀘𑁂, 𑀆𑀯𑀼𑀲𑁄, 𑀪𑀺𑀓𑁆𑀔𑀼𑀁 𑀮𑁄𑀪𑁄 𑀦𑀸𑀪𑀺𑀪𑀼𑀬𑁆𑀬 𑀢𑀺𑀝𑁆𑀞𑀢𑀺, 𑀤𑁄𑀲𑁄… 𑀫𑁄𑀳𑁄… 𑀓𑁄𑀥𑁄… 𑀉𑀧𑀦𑀸𑀳𑁄… 𑀫𑀓𑁆𑀔𑁄… 𑀧𑀴𑀸𑀲𑁄… 𑀫𑀘𑁆𑀙𑀭𑀺𑀬𑀁… 𑀧𑀸𑀧𑀺𑀓𑀸 𑀇𑀲𑁆𑀲𑀸… 𑀧𑀸𑀧𑀺𑀓𑀸 𑀇𑀘𑁆𑀙𑀸 𑀦𑀸𑀪𑀺𑀪𑀼𑀬𑁆𑀬 𑀢𑀺𑀝𑁆𑀞𑀢𑀺, 𑀲𑁄 𑀏𑀯𑀫𑀲𑁆𑀲 𑀯𑁂𑀤𑀺𑀢𑀩𑁆𑀩𑁄 𑁋 ‘𑀢𑀣𑀸 𑀅𑀬𑀫𑀸𑀬𑀲𑁆𑀫𑀸 𑀧𑀚𑀸𑀦𑀸𑀢𑀺 𑀬𑀣𑀸 𑀧𑀚𑀸𑀦𑀢𑁄 𑀮𑁄𑀪𑁄 𑀦 𑀳𑁄𑀢𑀺, 𑀢𑀣𑀸𑀳𑀺𑀫𑀁 𑀆𑀬𑀲𑁆𑀫𑀦𑁆𑀢𑀁 𑀮𑁄𑀪𑁄 𑀦𑀸𑀪𑀺𑀪𑀼𑀬𑁆𑀬 𑀢𑀺𑀝𑁆𑀞𑀢𑀺; 𑀢𑀣𑀸 𑀅𑀬𑀫𑀸𑀬𑀲𑁆𑀫𑀸 𑀧𑀚𑀸𑀦𑀸𑀢𑀺 𑀬𑀣𑀸 𑀧𑀚𑀸𑀦𑀢𑁄 𑀤𑁄𑀲𑁄 𑀳𑁄𑀢𑀺… 𑀫𑁄𑀳𑁄… 𑀓𑁄𑀥𑁄… 𑀉𑀧𑀦𑀸𑀳𑁄… 𑀫𑀓𑁆𑀔𑁄… 𑀧𑀴𑀸𑀲𑁄… 𑀫𑀘𑁆𑀙𑀭𑀺𑀬𑀁… 𑀧𑀸𑀧𑀺𑀓𑀸 𑀇𑀲𑁆𑀲𑀸… 𑀧𑀸𑀧𑀺𑀓𑀸 𑀇𑀘𑁆𑀙𑀸 𑀦 𑀳𑁄𑀢𑀺, 𑀢𑀣𑀸𑀳𑀺𑀫𑀁 𑀆𑀬𑀲𑁆𑀫𑀦𑁆𑀢𑀁 𑀧𑀸𑀧𑀺𑀓𑀸 𑀇𑀘𑁆𑀙𑀸 𑀦𑀸𑀪𑀺𑀪𑀼𑀬𑁆𑀬 𑀢𑀺𑀝𑁆𑀞𑀢𑀻’𑀢𑀺.

‘‘𑀲𑁂𑀬𑁆𑀬𑀣𑀸𑀧𑀺, 𑀆𑀯𑀼𑀲𑁄, 𑀧𑀼𑀭𑀺𑀲𑁄 𑀅𑀟𑁆𑀠𑁄𑀯 𑀲𑀫𑀸𑀦𑁄 𑀅𑀟𑁆𑀠𑀯𑀸𑀤𑀁 𑀯𑀤𑁂𑀬𑁆𑀬, 𑀥𑀦𑀯𑀸𑀯 𑀲𑀫𑀸𑀦𑁄 𑀥𑀦𑀯𑀸𑀯𑀸𑀤𑀁 𑀯𑀤𑁂𑀬𑁆𑀬, 𑀪𑁄𑀕𑀯𑀸𑀯 𑀲𑀫𑀸𑀦𑁄 𑀪𑁄𑀕𑀯𑀸𑀯𑀸𑀤𑀁 𑀯𑀤𑁂𑀬𑁆𑀬. 𑀲𑁄 𑀓𑀺𑀲𑁆𑀫𑀺𑀜𑁆𑀘𑀺𑀤𑁂𑀯 𑀥𑀦𑀓𑀭𑀡𑀻𑀬𑁂 𑀲𑀫𑀼𑀧𑁆𑀧𑀦𑁆𑀦𑁂 𑀲𑀓𑁆𑀓𑀼𑀡𑁂𑀬𑁆𑀬 𑀉𑀧𑀦𑀻𑀳𑀸𑀢𑀼𑀁 𑀥𑀦𑀁 𑀯𑀸 𑀥𑀜𑁆𑀜𑀁 𑀯𑀸 𑀭𑀚𑀢𑀁 𑀯𑀸 𑀚𑀸𑀢𑀭𑀽𑀧𑀁 𑀯𑀸. 𑀢𑀫𑁂𑀦𑀁 𑀏𑀯𑀁 𑀚𑀸𑀦𑁂𑀬𑁆𑀬𑀼𑀁 𑁋 ‘𑀅𑀟𑁆𑀠𑁄𑀯 𑀅𑀬𑀫𑀸𑀬𑀲𑁆𑀫𑀸 𑀲𑀫𑀸𑀦𑁄 𑀅𑀟𑁆𑀠𑀯𑀸𑀤𑀁 𑀯𑀤𑁂𑀢𑀺, 𑀥𑀦𑀯𑀸𑀯 𑀅𑀬𑀫𑀸𑀬𑀲𑁆𑀫𑀸 𑀲𑀫𑀸𑀦𑁄 𑀥𑀦𑀯𑀸𑀯𑀸𑀤𑀁 𑀯𑀤𑁂𑀢𑀺, 𑀪𑁄𑀕𑀯𑀸𑀯 𑀅𑀬𑀫𑀸𑀬𑀲𑁆𑀫𑀸 𑀲𑀫𑀸𑀦𑁄 𑀪𑁄𑀕𑀯𑀸𑀯𑀸𑀤𑀁 𑀯𑀤𑁂𑀢𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀢𑀣𑀸 𑀳𑀺 𑀅𑀬𑀫𑀸𑀬𑀲𑁆𑀫𑀸 𑀓𑀺𑀲𑁆𑀫𑀺𑀜𑁆𑀘𑀺𑀤𑁂𑀯 𑀥𑀦𑀓𑀭𑀡𑀻𑀬𑁂 𑀲𑀫𑀼𑀧𑁆𑀧𑀦𑁆𑀦𑁂 𑀲𑀓𑁆𑀓𑁄𑀢𑀺 𑀉𑀧𑀦𑀻𑀳𑀸𑀢𑀼𑀁 𑀥𑀦𑀁 𑀯𑀸 𑀥𑀜𑁆𑀜𑀁 𑀯𑀸 𑀭𑀚𑀢𑀁 𑀯𑀸 𑀚𑀸𑀢𑀭𑀽𑀧𑀁 𑀯𑀸’𑀢𑀺.

𑀏𑀯𑀫𑁂𑀯𑀁 𑀔𑁄, 𑀆𑀯𑀼𑀲𑁄, 𑀜𑀸𑀡𑀯𑀸𑀤𑀜𑁆𑀘 𑀪𑀺𑀓𑁆𑀔𑀼 𑀯𑀤𑀫𑀸𑀦𑁄 𑀪𑀸𑀯𑀦𑀸𑀯𑀸𑀤𑀜𑁆𑀘 𑁋 ‘𑀚𑀸𑀦𑀸𑀫𑀺𑀫𑀁 𑀥𑀫𑁆𑀫𑀁, 𑀧𑀲𑁆𑀲𑀸𑀫𑀺𑀫𑀁 𑀥𑀫𑁆𑀫𑀁, 𑀪𑀸𑀯𑀺𑀢𑀓𑀸𑀬𑁄𑀫𑁆𑀳𑀺 𑀪𑀸𑀯𑀺𑀢𑀲𑀻𑀮𑁄 𑀪𑀸𑀯𑀺𑀢𑀘𑀺𑀢𑁆𑀢𑁄 𑀪𑀸𑀯𑀺𑀢𑀧𑀜𑁆𑀜𑁄’𑀢𑀺. 𑀢𑀜𑁆𑀘𑁂, 𑀆𑀯𑀼𑀲𑁄, 𑀪𑀺𑀓𑁆𑀔𑀼𑀁 𑀮𑁄𑀪𑁄 𑀦𑀸𑀪𑀺𑀪𑀼𑀬𑁆𑀬 𑀢𑀺𑀝𑁆𑀞𑀢𑀺, 𑀤𑁄𑀲𑁄… 𑀫𑁄𑀳𑁄… 𑀓𑁄𑀥𑁄… 𑀉𑀧𑀦𑀸𑀳𑁄… 𑀫𑀓𑁆𑀔𑁄… 𑀧𑀴𑀸𑀲𑁄… 𑀫𑀘𑁆𑀙𑀭𑀺𑀬𑀁… 𑀧𑀸𑀧𑀺𑀓𑀸 𑀇𑀲𑁆𑀲𑀸… 𑀧𑀸𑀧𑀺𑀓𑀸 𑀇𑀘𑁆𑀙𑀸 𑀦𑀸𑀪𑀺𑀪𑀼𑀬𑁆𑀬 𑀢𑀺𑀝𑁆𑀞𑀢𑀺, 𑀲𑁄 𑀏𑀯𑀫𑀲𑁆𑀲 𑀯𑁂𑀤𑀺𑀢𑀩𑁆𑀩𑁄 𑁋 ‘𑀢𑀣𑀸 𑀅𑀬𑀫𑀸𑀬𑀲𑁆𑀫𑀸 𑀧𑀚𑀸𑀦𑀸𑀢𑀺 𑀬𑀣𑀸 𑀧𑀚𑀸𑀦𑀢𑁄 𑀮𑁄𑀪𑁄 𑀦 𑀳𑁄𑀢𑀺, 𑀢𑀣𑀸𑀳𑀺𑀫𑀁 𑀆𑀬𑀲𑁆𑀫𑀦𑁆𑀢𑀁 𑀮𑁄𑀪𑁄 𑀦𑀸𑀪𑀺𑀪𑀼𑀬𑁆𑀬 𑀢𑀺𑀝𑁆𑀞𑀢𑀺; 𑀢𑀣𑀸 𑀅𑀬𑀫𑀸𑀬𑀲𑁆𑀫𑀸 𑀧𑀚𑀸𑀦𑀸𑀢𑀺 𑀬𑀣𑀸 𑀧𑀚𑀸𑀦𑀢𑁄 𑀤𑁄𑀲𑁄 𑀦 𑀳𑁄𑀢𑀺… 𑀫𑁄𑀳𑁄… 𑀓𑁄𑀥𑁄… 𑀉𑀧𑀦𑀸𑀳𑁄… 𑀫𑀓𑁆𑀔𑁄… 𑀧𑀴𑀸𑀲𑁄… 𑀫𑀘𑁆𑀙𑀭𑀺𑀬𑀁… 𑀧𑀸𑀧𑀺𑀓𑀸 𑀇𑀲𑁆𑀲𑀸… 𑀧𑀸𑀧𑀺𑀓𑀸 𑀇𑀘𑁆𑀙𑀸 𑀦 𑀳𑁄𑀢𑀺, 𑀢𑀣𑀸𑀳𑀺𑀫𑀁 𑀆𑀬𑀲𑁆𑀫𑀦𑁆𑀢𑀁 𑀧𑀸𑀧𑀺𑀓𑀸 𑀇𑀘𑁆𑀙𑀸 𑀦𑀸𑀪𑀺𑀪𑀼𑀬𑁆𑀬 𑀢𑀺𑀝𑁆𑀞𑀢𑀻’’’𑀢𑀺. 𑀘𑀢𑀼𑀢𑁆𑀣𑀁.

𑁫. 𑀓𑀲𑀺𑀡𑀲𑀼𑀢𑁆𑀢𑀁

𑁨𑁫. [𑀤𑀻. 𑀦𑀺. 𑁩.𑁩𑁪𑁬, 𑁩𑁬𑁦; 𑀅. 𑀦𑀺. 𑁧𑁦.𑁨𑁯] ‘‘𑀤𑀲𑀬𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀓𑀲𑀺𑀡𑀸𑀬𑀢𑀦𑀸𑀦𑀺. 𑀓𑀢𑀫𑀸𑀦𑀺 𑀤𑀲? 𑀧𑀣𑀯𑀻𑀓𑀲𑀺𑀡𑀫𑁂𑀓𑁄 𑀲𑀜𑁆𑀚𑀸𑀦𑀸𑀢𑀺 𑀉𑀤𑁆𑀥𑀁 𑀅𑀥𑁄 𑀢𑀺𑀭𑀺𑀬𑀁 𑀅𑀤𑁆𑀯𑀬𑀁 𑀅𑀧𑁆𑀧𑀫𑀸𑀡𑀁; 𑀆𑀧𑁄𑀓𑀲𑀺𑀡𑀫𑁂𑀓𑁄 𑀲𑀜𑁆𑀚𑀸𑀦𑀸𑀢𑀺…𑀧𑁂… 𑀢𑁂𑀚𑁄𑀓𑀲𑀺𑀡𑀫𑁂𑀓𑁄 𑀲𑀜𑁆𑀚𑀸𑀦𑀸𑀢𑀺… 𑀯𑀸𑀬𑁄𑀓𑀲𑀺𑀡𑀫𑁂𑀓𑁄 𑀲𑀜𑁆𑀚𑀸𑀦𑀸𑀢𑀺… 𑀦𑀻𑀮𑀓𑀲𑀺𑀡𑀫𑁂𑀓𑁄 𑀲𑀜𑁆𑀚𑀸𑀦𑀸𑀢𑀺… 𑀧𑀻𑀢𑀓𑀲𑀺𑀡𑀫𑁂𑀓𑁄 𑀲𑀜𑁆𑀚𑀸𑀦𑀸𑀢𑀺… 𑀮𑁄𑀳𑀺𑀢𑀓𑀲𑀺𑀡𑀫𑁂𑀓𑁄 𑀲𑀜𑁆𑀚𑀸𑀦𑀸𑀢𑀺… 𑀑𑀤𑀸𑀢𑀓𑀲𑀺𑀡𑀫𑁂𑀓𑁄 𑀲𑀜𑁆𑀚𑀸𑀦𑀸𑀢𑀺… 𑀆𑀓𑀸𑀲𑀓𑀲𑀺𑀡𑀫𑁂𑀓𑁄 𑀲𑀜𑁆𑀚𑀸𑀦𑀸𑀢𑀺… 𑀯𑀺𑀜𑁆𑀜𑀸𑀡𑀓𑀲𑀺𑀡𑀫𑁂𑀓𑁄 𑀲𑀜𑁆𑀚𑀸𑀦𑀸𑀢𑀺 𑀉𑀤𑁆𑀥𑀁 𑀅𑀥𑁄 𑀢𑀺𑀭𑀺𑀬𑀁 𑀅𑀤𑁆𑀯𑀬𑀁 𑀅𑀧𑁆𑀧𑀫𑀸𑀡𑀁. 𑀇𑀫𑀸𑀦𑀺 𑀔𑁄, 𑀪𑀺𑀓𑁆𑀔𑀯𑁂, 𑀤𑀲 𑀓𑀲𑀺𑀡𑀸𑀬𑀢𑀦𑀸𑀦𑀻’’𑀢𑀺. 𑀧𑀜𑁆𑀘𑀫𑀁.

𑁬. 𑀓𑀸𑀴𑀻𑀲𑀼𑀢𑁆𑀢𑀁

𑁨𑁬. 𑀏𑀓𑀁 𑀲𑀫𑀬𑀁 𑀆𑀬𑀲𑁆𑀫𑀸 𑀫𑀳𑀸𑀓𑀘𑁆𑀘𑀸𑀦𑁄 𑀅𑀯𑀦𑁆𑀢𑀻𑀲𑀼 𑀯𑀺𑀳𑀭𑀢𑀺 𑀓𑀼𑀭𑀭𑀖𑀭𑁂 [𑀕𑀼𑀮𑀖𑀭𑁂 (𑀓.) 𑀓𑀼𑀭𑀼𑀭𑀖𑀭𑁂 𑀫𑀳𑀸𑀯. 𑁨𑁫𑁭] 𑀧𑀯𑀢𑁆𑀢𑁂 𑀧𑀩𑁆𑀩𑀢𑁂. 𑀅𑀣 𑀔𑁄 𑀓𑀸𑀴𑀻 𑀉𑀧𑀸𑀲𑀺𑀓𑀸 𑀓𑀼𑀭𑀭𑀖𑀭𑀺𑀓𑀸 𑀬𑁂𑀦𑀸𑀬𑀲𑁆𑀫𑀸 𑀫𑀳𑀸𑀓𑀘𑁆𑀘𑀸𑀦𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀫𑀳𑀸𑀓𑀘𑁆𑀘𑀸𑀦𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀸 𑀔𑁄 𑀓𑀸𑀴𑀻 𑀉𑀧𑀸𑀲𑀺𑀓𑀸 𑀓𑀼𑀭𑀭𑀖𑀭𑀺𑀓𑀸 𑀆𑀬𑀲𑁆𑀫𑀦𑁆𑀢𑀁 𑀫𑀳𑀸𑀓𑀘𑁆𑀘𑀸𑀦𑀁 𑀏𑀢𑀤𑀯𑁄𑀘 𑁋 ‘‘𑀯𑀼𑀢𑁆𑀢𑀫𑀺𑀤𑀁, 𑀪𑀦𑁆𑀢𑁂, 𑀪𑀕𑀯𑀢𑀸 𑀓𑀼𑀫𑀸𑀭𑀺𑀧𑀜𑁆𑀳𑁂𑀲𑀼 𑁋

‘𑀅𑀢𑁆𑀣𑀲𑁆𑀲 𑀧𑀢𑁆𑀢𑀺𑀁 𑀳𑀤𑀬𑀲𑁆𑀲 𑀲𑀦𑁆𑀢𑀺𑀁,

𑀚𑁂𑀢𑁆𑀯𑀸𑀦 𑀲𑁂𑀦𑀁 𑀧𑀺𑀬𑀲𑀸𑀢𑀭𑀽𑀧𑀁;

𑀏𑀓𑁄𑀳𑀁 [𑀏𑀓𑀸𑀳𑀁 (𑀓.)] 𑀛𑀸𑀬𑀁 𑀲𑀼𑀔𑀫𑀦𑀼𑀩𑁄𑀥𑀺𑀁,

𑀢𑀲𑁆𑀫𑀸 𑀚𑀦𑁂𑀦 𑀦 𑀓𑀭𑁄𑀫𑀺 𑀲𑀓𑁆𑀔𑀺𑀁 [𑀲𑀔𑀺𑀁 (𑀓.) 𑀲𑀁. 𑀦𑀺. 𑁧.𑁧𑁬𑁧 𑀧𑀲𑁆𑀲𑀺𑀢𑀩𑁆𑀩𑀁];

𑀲𑀓𑁆𑀔𑀻 [𑀲𑀔𑀻 (𑀓.)] 𑀦 𑀲𑀫𑁆𑀧𑀚𑁆𑀚𑀢𑀺 𑀓𑁂𑀦𑀘𑀺 𑀫𑁂’𑀢𑀺.

‘‘𑀇𑀫𑀲𑁆𑀲 𑀔𑁄, 𑀪𑀦𑁆𑀢𑁂, 𑀪𑀕𑀯𑀢𑀸 𑀲𑀁𑀔𑀺𑀢𑁆𑀢𑁂𑀦 𑀪𑀸𑀲𑀺𑀢𑀲𑁆𑀲 𑀓𑀣𑀁 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄’’𑀢𑀺?

‘‘𑀧𑀣𑀯𑀻𑀓𑀲𑀺𑀡𑀲𑀫𑀸𑀧𑀢𑁆𑀢𑀺𑀧𑀭𑀫𑀸 𑀔𑁄, 𑀪𑀕𑀺𑀦𑀺, 𑀏𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 ‘𑀅𑀢𑁆𑀣𑁄’𑀢𑀺 𑀅𑀪𑀺𑀦𑀺𑀩𑁆𑀩𑀢𑁆𑀢𑁂𑀲𑀼𑀁 [𑀅𑀢𑁆𑀣𑀸𑀪𑀺𑀦𑀺𑀩𑁆𑀩𑀢𑁆𑀢𑁂𑀲𑀼𑀁 (𑀲𑀻. 𑀲𑁆𑀬𑀸.)]. 𑀬𑀸𑀯𑀢𑀸 𑀔𑁄, 𑀪𑀕𑀺𑀦𑀺, 𑀧𑀣𑀯𑀻𑀓𑀲𑀺𑀡𑀲𑀫𑀸𑀧𑀢𑁆𑀢𑀺𑀧𑀭𑀫𑀢𑀸, 𑀢𑀤𑀪𑀺𑀜𑁆𑀜𑀸𑀲𑀺 𑀪𑀕𑀯𑀸. 𑀢𑀤𑀪𑀺𑀜𑁆𑀜𑀸𑀬 𑀪𑀕𑀯𑀸 𑀅𑀲𑁆𑀲𑀸𑀤𑀫𑀤𑁆𑀤𑀲 [𑀆𑀤𑀺𑀫𑀤𑁆𑀤𑀲 (𑀲𑀻. 𑀲𑁆𑀬𑀸.)] 𑀆𑀤𑀻𑀦𑀯𑀫𑀤𑁆𑀤𑀲 𑀦𑀺𑀲𑁆𑀲𑀭𑀡𑀫𑀤𑁆𑀤𑀲 𑀫𑀕𑁆𑀕𑀸𑀫𑀕𑁆𑀕𑀜𑀸𑀡𑀤𑀲𑁆𑀲𑀦𑀫𑀤𑁆𑀤𑀲. 𑀢𑀲𑁆𑀲 𑀅𑀲𑁆𑀲𑀸𑀤𑀤𑀲𑁆𑀲𑀦𑀳𑁂𑀢𑀼 𑀆𑀤𑀻𑀦𑀯𑀤𑀲𑁆𑀲𑀦𑀳𑁂𑀢𑀼 𑀦𑀺𑀲𑁆𑀲𑀭𑀡𑀤𑀲𑁆𑀲𑀦𑀳𑁂𑀢𑀼 𑀫𑀕𑁆𑀕𑀸𑀫𑀕𑁆𑀕𑀜𑀸𑀡𑀤𑀲𑁆𑀲𑀦𑀳𑁂𑀢𑀼 𑀅𑀢𑁆𑀣𑀲𑁆𑀲 𑀧𑀢𑁆𑀢𑀺 𑀳𑀤𑀬𑀲𑁆𑀲 𑀲𑀦𑁆𑀢𑀺 𑀯𑀺𑀤𑀺𑀢𑀸 𑀳𑁄𑀢𑀺.

‘‘𑀆𑀧𑁄𑀓𑀲𑀺𑀡𑀲𑀫𑀸𑀧𑀢𑁆𑀢𑀺𑀧𑀭𑀫𑀸 𑀔𑁄, 𑀪𑀕𑀺𑀦𑀺…𑀧𑁂… 𑀢𑁂𑀚𑁄𑀓𑀲𑀺𑀡𑀲𑀫𑀸𑀧𑀢𑁆𑀢𑀺𑀧𑀭𑀫𑀸 𑀔𑁄, 𑀪𑀕𑀺𑀦𑀺… 𑀯𑀸𑀬𑁄𑀓𑀲𑀺𑀡𑀲𑀫𑀸𑀧𑀢𑁆𑀢𑀺𑀧𑀭𑀫𑀸 𑀔𑁄, 𑀪𑀕𑀺𑀦𑀺… 𑀦𑀻𑀮𑀓𑀲𑀺𑀡𑀲𑀫𑀸𑀧𑀢𑁆𑀢𑀺𑀧𑀭𑀫𑀸 𑀔𑁄, 𑀪𑀕𑀺𑀦𑀺… 𑀧𑀻𑀢𑀓𑀲𑀺𑀡𑀲𑀫𑀸𑀧𑀢𑁆𑀢𑀺𑀧𑀭𑀫𑀸 𑀔𑁄, 𑀪𑀕𑀺𑀦𑀺… 𑀮𑁄𑀳𑀺𑀢𑀓𑀲𑀺𑀡𑀲𑀫𑀸𑀧𑀢𑁆𑀢𑀺𑀧𑀭𑀫𑀸 𑀔𑁄, 𑀪𑀕𑀺𑀦𑀺… 𑀑𑀤𑀸𑀢𑀓𑀲𑀺𑀡𑀲𑀫𑀸𑀧𑀢𑁆𑀢𑀺𑀧𑀭𑀫𑀸 𑀔𑁄, 𑀪𑀕𑀺𑀦𑀺… 𑀆𑀓𑀸𑀲𑀓𑀲𑀺𑀡𑀲𑀫𑀸𑀧𑀢𑁆𑀢𑀺𑀧𑀭𑀫𑀸 𑀔𑁄, 𑀪𑀕𑀺𑀦𑀺… 𑀯𑀺𑀜𑁆𑀜𑀸𑀡𑀓𑀲𑀺𑀡𑀲𑀫𑀸𑀧𑀢𑁆𑀢𑀺𑀧𑀭𑀫𑀸 𑀔𑁄, 𑀪𑀕𑀺𑀦𑀺, 𑀏𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 ‘𑀅𑀢𑁆𑀣𑁄’𑀢𑀺 𑀅𑀪𑀺𑀦𑀺𑀩𑁆𑀩𑀢𑁆𑀢𑁂𑀲𑀼𑀁. 𑀬𑀸𑀯𑀢𑀸 𑀔𑁄, 𑀪𑀕𑀺𑀦𑀺, 𑀯𑀺𑀜𑁆𑀜𑀸𑀡𑀓𑀲𑀺𑀡𑀲𑀫𑀸𑀧𑀢𑁆𑀢𑀺𑀧𑀭𑀫𑀢𑀸, 𑀢𑀤𑀪𑀺𑀜𑁆𑀜𑀸𑀲𑀺 𑀪𑀕𑀯𑀸. 𑀢𑀤𑀪𑀺𑀜𑁆𑀜𑀸𑀬 𑀪𑀕𑀯𑀸 𑀅𑀲𑁆𑀲𑀸𑀤𑀫𑀤𑁆𑀤𑀲 𑀆𑀤𑀻𑀦𑀯𑀫𑀤𑁆𑀤𑀲 𑀦𑀺𑀲𑁆𑀲𑀭𑀡𑀫𑀤𑁆𑀤𑀲 𑀫𑀕𑁆𑀕𑀸𑀫𑀕𑁆𑀕𑀜𑀸𑀡𑀤𑀲𑁆𑀲𑀦𑀫𑀤𑁆𑀤𑀲. 𑀢𑀲𑁆𑀲 𑀅𑀲𑁆𑀲𑀸𑀤𑀤𑀲𑁆𑀲𑀦𑀳𑁂𑀢𑀼 𑀆𑀤𑀻𑀦𑀯𑀤𑀲𑁆𑀲𑀦𑀳𑁂𑀢𑀼 𑀦𑀺𑀲𑁆𑀲𑀭𑀡𑀤𑀲𑁆𑀲𑀦𑀳𑁂𑀢𑀼 𑀫𑀕𑁆𑀕𑀸𑀫𑀕𑁆𑀕𑀜𑀸𑀡𑀤𑀲𑁆𑀲𑀦𑀳𑁂𑀢𑀼 𑀅𑀢𑁆𑀣𑀲𑁆𑀲 𑀧𑀢𑁆𑀢𑀺 𑀳𑀤𑀬𑀲𑁆𑀲 𑀲𑀦𑁆𑀢𑀺 𑀯𑀺𑀤𑀺𑀢𑀸 𑀳𑁄𑀢𑀺. 𑀇𑀢𑀺 𑀔𑁄, 𑀪𑀕𑀺𑀦𑀺, 𑀬𑀁 𑀢𑀁 𑀯𑀼𑀢𑁆𑀢𑀁 𑀪𑀕𑀯𑀢𑀸 𑀓𑀼𑀫𑀸𑀭𑀺𑀧𑀜𑁆𑀳𑁂𑀲𑀼 𑁋

‘𑀅𑀢𑁆𑀣𑀲𑁆𑀲 𑀧𑀢𑁆𑀢𑀺𑀁 𑀳𑀤𑀬𑀲𑁆𑀲 𑀲𑀦𑁆𑀢𑀺𑀁,

𑀚𑁂𑀢𑁆𑀯𑀸𑀦 𑀲𑁂𑀦𑀁 𑀧𑀺𑀬𑀲𑀸𑀢𑀭𑀽𑀧𑀁;

𑀏𑀓𑁄𑀳𑀁 𑀛𑀸𑀬𑀁 𑀲𑀼𑀔𑀫𑀦𑀼𑀩𑁄𑀥𑀺𑀁,

𑀢𑀲𑁆𑀫𑀸 𑀚𑀦𑁂𑀦 𑀦 𑀓𑀭𑁄𑀫𑀺 𑀲𑀓𑁆𑀔𑀺𑀁;

𑀲𑀓𑁆𑀔𑀻 𑀦 𑀲𑀫𑁆𑀧𑀚𑁆𑀚𑀢𑀺 𑀓𑁂𑀦𑀘𑀺 𑀫𑁂’𑀢𑀺.

‘‘𑀇𑀫𑀲𑁆𑀲 𑀔𑁄, 𑀪𑀕𑀺𑀦𑀺, 𑀪𑀕𑀯𑀢𑀸 𑀲𑀁𑀔𑀺𑀢𑁆𑀢𑁂𑀦 𑀪𑀸𑀲𑀺𑀢𑀲𑁆𑀲 𑀏𑀯𑀁 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄’’𑀢𑀺. 𑀙𑀝𑁆𑀞𑀁.

𑁭. 𑀧𑀞𑀫𑀫𑀳𑀸𑀧𑀜𑁆𑀳𑀸𑀲𑀼𑀢𑁆𑀢𑀁

𑁨𑁭. 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀅𑀣 𑀔𑁄 𑀲𑀫𑁆𑀩𑀳𑀼𑀮𑀸 𑀪𑀺𑀓𑁆𑀔𑀽 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀲𑀸𑀯𑀢𑁆𑀣𑀺𑀁 𑀧𑀺𑀡𑁆𑀟𑀸𑀬 𑀧𑀯𑀺𑀲𑀺𑀁𑀲𑀼. 𑀅𑀣 𑀔𑁄 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀏𑀢𑀤𑀳𑁄𑀲𑀺 𑁋 ‘‘𑀅𑀢𑀺𑀧𑁆𑀧𑀕𑁄 𑀔𑁄 𑀢𑀸𑀯 𑀲𑀸𑀯𑀢𑁆𑀣𑀺𑀬𑀁 𑀧𑀺𑀡𑁆𑀟𑀸𑀬 𑀘𑀭𑀺𑀢𑀼𑀁; 𑀬𑀁𑀦𑀽𑀦 𑀫𑀬𑀁 𑀬𑁂𑀦 𑀅𑀜𑁆𑀜𑀢𑀺𑀢𑁆𑀣𑀺𑀬𑀸𑀦𑀁 𑀧𑀭𑀺𑀩𑁆𑀩𑀸𑀚𑀓𑀸𑀦𑀁 𑀆𑀭𑀸𑀫𑁄 𑀢𑁂𑀦𑀼𑀧𑀲𑀗𑁆𑀓𑀫𑁂𑀬𑁆𑀬𑀸𑀫𑀸’’𑀢𑀺.

𑀅𑀣 𑀔𑁄 𑀢𑁂 𑀪𑀺𑀓𑁆𑀔𑀽 𑀬𑁂𑀦 𑀅𑀜𑁆𑀜𑀢𑀺𑀢𑁆𑀣𑀺𑀬𑀸𑀦𑀁 𑀧𑀭𑀺𑀩𑁆𑀩𑀸𑀚𑀓𑀸𑀦𑀁 𑀆𑀭𑀸𑀫𑁄 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑁂𑀳𑀺 𑀅𑀜𑁆𑀜𑀢𑀺𑀢𑁆𑀣𑀺𑀬𑁂𑀳𑀺 𑀧𑀭𑀺𑀩𑁆𑀩𑀸𑀚𑀓𑁂𑀳𑀺 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺𑀁𑀲𑀼. 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀲𑀸𑀭𑀡𑀻𑀬𑀁 𑀯𑀻𑀢𑀺𑀲𑀸𑀭𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁂 𑀔𑁄 𑀢𑁂 𑀪𑀺𑀓𑁆𑀔𑀽 𑀢𑁂 𑀅𑀜𑁆𑀜𑀢𑀺𑀢𑁆𑀣𑀺𑀬𑀸 𑀧𑀭𑀺𑀩𑁆𑀩𑀸𑀚𑀓𑀸 𑀏𑀢𑀤𑀯𑁄𑀘𑀼𑀁 𑁋

‘‘𑀲𑀫𑀡𑁄, 𑀆𑀯𑀼𑀲𑁄, 𑀕𑁄𑀢𑀫𑁄 𑀲𑀸𑀯𑀓𑀸𑀦𑀁 𑀏𑀯𑀁 𑀥𑀫𑁆𑀫𑀁 𑀤𑁂𑀲𑁂𑀢𑀺 𑁋 ‘𑀏𑀣 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀲𑀩𑁆𑀩𑀁 𑀥𑀫𑁆𑀫𑀁 𑀅𑀪𑀺𑀚𑀸𑀦𑀸𑀣, 𑀲𑀩𑁆𑀩𑀁 𑀥𑀫𑁆𑀫𑀁 𑀅𑀪𑀺𑀜𑁆𑀜𑀸𑀬 𑀯𑀺𑀳𑀭𑀣𑀸’𑀢𑀺; 𑀫𑀬𑀫𑁆𑀧𑀺 𑀔𑁄, 𑀆𑀯𑀼𑀲𑁄, 𑀲𑀸𑀯𑀓𑀸𑀦𑀁 𑀏𑀯𑀁 𑀥𑀫𑁆𑀫𑀁 𑀤𑁂𑀲𑁂𑀫 𑁋 ‘𑀏𑀣 𑀢𑀼𑀫𑁆𑀳𑁂, 𑀆𑀯𑀼𑀲𑁄, 𑀲𑀩𑁆𑀩𑀁 𑀥𑀫𑁆𑀫𑀁 𑀅𑀪𑀺𑀚𑀸𑀦𑀸𑀣, 𑀲𑀩𑁆𑀩𑀁 𑀥𑀫𑁆𑀫𑀁 𑀅𑀪𑀺𑀜𑁆𑀜𑀸𑀬 𑀯𑀺𑀳𑀭𑀣𑀸’𑀢𑀺. 𑀇𑀥 𑀦𑁄, 𑀆𑀯𑀼𑀲𑁄, 𑀓𑁄 𑀯𑀺𑀲𑁂𑀲𑁄 𑀓𑁄 𑀅𑀥𑀺𑀧𑁆𑀧𑀬𑀸𑀲𑁄 𑀓𑀺𑀁 𑀦𑀸𑀦𑀸𑀓𑀭𑀡𑀁 𑀲𑀫𑀡𑀲𑁆𑀲 𑀯𑀸 𑀕𑁄𑀢𑀫𑀲𑁆𑀲 𑀅𑀫𑁆𑀳𑀸𑀓𑀁 𑀯𑀸, 𑀬𑀤𑀺𑀤𑀁 𑀥𑀫𑁆𑀫𑀤𑁂𑀲𑀦𑀸𑀬 𑀯𑀸 𑀥𑀫𑁆𑀫𑀤𑁂𑀲𑀦𑀁 𑀅𑀦𑀼𑀲𑀸𑀲𑀦𑀺𑀬𑀸 𑀯𑀸 𑀅𑀦𑀼𑀲𑀸𑀲𑀦𑀺’’𑀦𑁆𑀢𑀺?

𑀅𑀣 𑀔𑁄 𑀢𑁂 𑀪𑀺𑀓𑁆𑀔𑀽 𑀢𑁂𑀲𑀁 𑀅𑀜𑁆𑀜𑀢𑀺𑀢𑁆𑀣𑀺𑀬𑀸𑀦𑀁 𑀧𑀭𑀺𑀩𑁆𑀩𑀸𑀚𑀓𑀸𑀦𑀁 𑀪𑀸𑀲𑀺𑀢𑀁 𑀦𑁂𑀯 𑀅𑀪𑀺𑀦𑀦𑁆𑀤𑀺𑀁𑀲𑀼 𑀦𑀧𑁆𑀧𑀝𑀺𑀓𑁆𑀓𑁄𑀲𑀺𑀁𑀲𑀼. 𑀅𑀦𑀪𑀺𑀦𑀦𑁆𑀤𑀺𑀢𑁆𑀯𑀸 𑀅𑀧𑁆𑀧𑀝𑀺𑀓𑁆𑀓𑁄𑀲𑀺𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀧𑀓𑁆𑀓𑀫𑀺𑀁𑀲𑀼 𑁋 ‘‘𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀏𑀢𑀲𑁆𑀲 𑀪𑀸𑀲𑀺𑀢𑀲𑁆𑀲 𑀅𑀢𑁆𑀣𑀁 𑀆𑀚𑀸𑀦𑀺𑀲𑁆𑀲𑀸𑀫𑀸’’𑀢𑀺.

𑀅𑀣 𑀔𑁄 𑀢𑁂 𑀪𑀺𑀓𑁆𑀔𑀽 𑀲𑀸𑀯𑀢𑁆𑀣𑀺𑀬𑀁 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀧𑀘𑁆𑀙𑀸𑀪𑀢𑁆𑀢𑀁 𑀧𑀺𑀡𑁆𑀟𑀧𑀸𑀢𑀧𑀝𑀺𑀓𑁆𑀓𑀦𑁆𑀢𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀸 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘𑀼𑀁 𑁋

‘‘𑀇𑀥 𑀫𑀬𑀁, 𑀪𑀦𑁆𑀢𑁂, 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀲𑀸𑀯𑀢𑁆𑀣𑀺𑀁 𑀧𑀺𑀡𑁆𑀟𑀸𑀬 𑀧𑀯𑀺𑀲𑀺𑀫𑁆𑀳𑀸. 𑀢𑁂𑀲𑀁 𑀦𑁄, 𑀪𑀦𑁆𑀢𑁂, 𑀅𑀫𑁆𑀳𑀸𑀓𑀁 𑀏𑀢𑀤𑀳𑁄𑀲𑀺 𑁋 ‘𑀅𑀢𑀺𑀧𑁆𑀧𑀕𑁄 𑀔𑁄 𑀢𑀸𑀯 𑀲𑀸𑀯𑀢𑁆𑀣𑀺𑀬𑀁 𑀧𑀺𑀡𑁆𑀟𑀸𑀬 𑀘𑀭𑀺𑀢𑀼𑀁; 𑀬𑀁𑀦𑀽𑀦 𑀫𑀬𑀁 𑀬𑁂𑀦 𑀅𑀜𑁆𑀜𑀢𑀺𑀢𑁆𑀣𑀺𑀬𑀸𑀦𑀁 𑀧𑀭𑀺𑀩𑁆𑀩𑀸𑀚𑀓𑀸𑀦𑀁 𑀆𑀭𑀸𑀫𑁄 𑀢𑁂𑀦𑀼𑀧𑀲𑀗𑁆𑀓𑀫𑁂𑀬𑁆𑀬𑀸𑀫𑀸’𑀢𑀺. 𑀅𑀣 𑀔𑁄 𑀫𑀬𑀁, 𑀪𑀦𑁆𑀢𑁂, 𑀬𑁂𑀦 𑀅𑀜𑁆𑀜𑀢𑀺𑀢𑁆𑀣𑀺𑀬𑀸𑀦𑀁 𑀧𑀭𑀺𑀩𑁆𑀩𑀸𑀚𑀓𑀸𑀦𑀁 𑀆𑀭𑀸𑀫𑁄 𑀢𑁂𑀦𑀼𑀧𑀲𑀗𑁆𑀓𑀫𑀺𑀫𑁆𑀳𑀸; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑁂𑀳𑀺 𑀅𑀜𑁆𑀜𑀢𑀺𑀢𑁆𑀣𑀺𑀬𑁂𑀳𑀺 𑀧𑀭𑀺𑀩𑁆𑀩𑀸𑀚𑀓𑁂𑀳𑀺 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺𑀫𑁆𑀳𑀸. 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀲𑀸𑀭𑀡𑀻𑀬𑀁 𑀯𑀻𑀢𑀺𑀲𑀸𑀭𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀫𑁆𑀳𑀸. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁂 𑀔𑁄, 𑀪𑀦𑁆𑀢𑁂, 𑀅𑀜𑁆𑀜𑀢𑀺𑀢𑁆𑀣𑀺𑀬𑀸 𑀧𑀭𑀺𑀩𑁆𑀩𑀸𑀚𑀓𑀸 𑀅𑀫𑁆𑀳𑁂 𑀏𑀢𑀤𑀯𑁄𑀘𑀼𑀁 𑁋

‘𑀲𑀫𑀡𑁄, 𑀆𑀯𑀼𑀲𑁄, 𑀕𑁄𑀢𑀫𑁄 𑀲𑀸𑀯𑀓𑀸𑀦𑀁 𑀏𑀯𑀁 𑀥𑀫𑁆𑀫𑀁 𑀤𑁂𑀲𑁂𑀢𑀺 𑁋 𑀏𑀣 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀲𑀩𑁆𑀩𑀁 𑀥𑀫𑁆𑀫𑀁 𑀅𑀪𑀺𑀚𑀸𑀦𑀸𑀣, 𑀲𑀩𑁆𑀩𑀁 𑀥𑀫𑁆𑀫𑀁 𑀅𑀪𑀺𑀜𑁆𑀜𑀸𑀬 𑀯𑀺𑀳𑀭𑀣𑀸𑀢𑀺; 𑀫𑀬𑀫𑁆𑀧𑀺 𑀔𑁄, 𑀆𑀯𑀼𑀲𑁄, 𑀲𑀸𑀯𑀓𑀸𑀦𑀁 𑀏𑀯𑀁 𑀥𑀫𑁆𑀫𑀁 𑀤𑁂𑀲𑁂𑀫 𑁋 𑀏𑀣 𑀢𑀼𑀫𑁆𑀳𑁂, 𑀆𑀯𑀼𑀲𑁄, 𑀲𑀩𑁆𑀩𑀁 𑀥𑀫𑁆𑀫𑀁 𑀅𑀪𑀺𑀚𑀸𑀦𑀸𑀣, 𑀲𑀩𑁆𑀩𑀁 𑀥𑀫𑁆𑀫𑀁 𑀅𑀪𑀺𑀜𑁆𑀜𑀸𑀬 𑀯𑀺𑀳𑀭𑀣𑀸𑀢𑀺. 𑀇𑀥 𑀦𑁄, 𑀆𑀯𑀼𑀲𑁄, 𑀓𑁄 𑀯𑀺𑀲𑁂𑀲𑁄 𑀓𑁄 𑀅𑀥𑀺𑀧𑁆𑀧𑀬𑀸𑀲𑁄 𑀓𑀺𑀁 𑀦𑀸𑀦𑀸𑀓𑀭𑀡𑀁 𑀲𑀫𑀡𑀲𑁆𑀲 𑀯𑀸 𑀕𑁄𑀢𑀫𑀲𑁆𑀲 𑀅𑀫𑁆𑀳𑀸𑀓𑀁 𑀯𑀸, 𑀬𑀤𑀺𑀤𑀁 𑀥𑀫𑁆𑀫𑀤𑁂𑀲𑀦𑀸𑀬 𑀯𑀸 𑀥𑀫𑁆𑀫𑀤𑁂𑀲𑀦𑀁 𑀅𑀦𑀼𑀲𑀸𑀲𑀦𑀺𑀬𑀸 𑀯𑀸 𑀅𑀦𑀼𑀲𑀸𑀲𑀦𑀺’𑀦𑁆𑀢𑀺?

‘‘𑀅𑀣 𑀔𑁄 𑀫𑀬𑀁, 𑀪𑀦𑁆𑀢𑁂, 𑀢𑁂𑀲𑀁 𑀅𑀜𑁆𑀜𑀢𑀺𑀢𑁆𑀣𑀺𑀬𑀸𑀦𑀁 𑀧𑀭𑀺𑀩𑁆𑀩𑀸𑀚𑀓𑀸𑀦𑀁 𑀪𑀸𑀲𑀺𑀢𑀁 𑀦𑁂𑀯 𑀅𑀪𑀺𑀦𑀦𑁆𑀤𑀺𑀫𑁆𑀳𑀸 𑀦𑀧𑁆𑀧𑀝𑀺𑀓𑁆𑀓𑁄𑀲𑀺𑀫𑁆𑀳𑀸. 𑀅𑀦𑀪𑀺𑀦𑀦𑁆𑀤𑀺𑀢𑁆𑀯𑀸 𑀅𑀧𑁆𑀧𑀝𑀺𑀓𑁆𑀓𑁄𑀲𑀺𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀧𑀓𑁆𑀓𑀫𑀺𑀫𑁆𑀳𑀸 𑁋 ‘𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀏𑀢𑀲𑁆𑀲 𑀪𑀸𑀲𑀺𑀢𑀲𑁆𑀲 𑀅𑀢𑁆𑀣𑀁 𑀆𑀚𑀸𑀦𑀺𑀲𑁆𑀲𑀸𑀫𑀸’’’𑀢𑀺.

‘‘𑀏𑀯𑀁𑀯𑀸𑀤𑀺𑀦𑁄, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑀺𑀢𑁆𑀣𑀺𑀬𑀸 𑀧𑀭𑀺𑀩𑁆𑀩𑀸𑀚𑀓𑀸 𑀏𑀯𑀫𑀲𑁆𑀲𑀼 𑀯𑀘𑀦𑀻𑀬𑀸 𑁋 ‘𑀏𑀓𑁄, 𑀆𑀯𑀼𑀲𑁄, 𑀧𑀜𑁆𑀳𑁄 𑀏𑀓𑁄 𑀉𑀤𑁆𑀤𑁂𑀲𑁄 𑀏𑀓𑀁 𑀯𑁂𑀬𑁆𑀬𑀸𑀓𑀭𑀡𑀁, 𑀤𑁆𑀯𑁂 𑀧𑀜𑁆𑀳𑀸 𑀤𑁆𑀯𑁂 𑀉𑀤𑁆𑀤𑁂𑀲𑀸 𑀤𑁆𑀯𑁂 𑀯𑁂𑀬𑁆𑀬𑀸𑀓𑀭𑀡𑀸𑀦𑀺, 𑀢𑀬𑁄 𑀧𑀜𑁆𑀳𑀸 𑀢𑀬𑁄 𑀉𑀤𑁆𑀤𑁂𑀲𑀸 𑀢𑀻𑀡𑀺 𑀯𑁂𑀬𑁆𑀬𑀸𑀓𑀭𑀡𑀸𑀦𑀺, 𑀘𑀢𑁆𑀢𑀸𑀭𑁄 𑀧𑀜𑁆𑀳𑀸 𑀘𑀢𑁆𑀢𑀸𑀭𑁄 𑀉𑀤𑁆𑀤𑁂𑀲𑀸 𑀘𑀢𑁆𑀢𑀸𑀭𑀺 𑀯𑁂𑀬𑁆𑀬𑀸𑀓𑀭𑀡𑀸𑀦𑀺, 𑀧𑀜𑁆𑀘 𑀧𑀜𑁆𑀳𑀸 𑀧𑀜𑁆𑀘𑀼𑀤𑁆𑀤𑁂𑀲𑀸 𑀧𑀜𑁆𑀘 𑀯𑁂𑀬𑁆𑀬𑀸𑀓𑀭𑀡𑀸𑀦𑀺, 𑀙 𑀧𑀜𑁆𑀳𑀸 𑀙 𑀉𑀤𑁆𑀤𑁂𑀲𑀸 𑀙 𑀯𑁂𑀬𑁆𑀬𑀸𑀓𑀭𑀡𑀸𑀦𑀺, 𑀲𑀢𑁆𑀢 𑀧𑀜𑁆𑀳𑀸 𑀲𑀢𑁆𑀢𑀼𑀤𑁆𑀤𑁂𑀲𑀸 𑀲𑀢𑁆𑀢 𑀯𑁂𑀬𑁆𑀬𑀸𑀓𑀭𑀡𑀸𑀦𑀺, 𑀅𑀝𑁆𑀞 𑀧𑀜𑁆𑀳𑀸 𑀅𑀝𑁆𑀞𑀼𑀤𑁆𑀤𑁂𑀲𑀸 𑀅𑀝𑁆𑀞 𑀯𑁂𑀬𑁆𑀬𑀸𑀓𑀭𑀡𑀸𑀦𑀺, 𑀦𑀯 𑀧𑀜𑁆𑀳𑀸 𑀦𑀯𑀼𑀤𑁆𑀤𑁂𑀲𑀸 𑀦𑀯 𑀯𑁂𑀬𑁆𑀬𑀸𑀓𑀭𑀡𑀸𑀦𑀺, 𑀤𑀲 𑀧𑀜𑁆𑀳𑀸 𑀤𑀲𑀼𑀤𑁆𑀤𑁂𑀲𑀸 𑀤𑀲 𑀯𑁂𑀬𑁆𑀬𑀸𑀓𑀭𑀡𑀸𑀦𑀻’𑀢𑀺. 𑀏𑀯𑀁 𑀧𑀼𑀝𑁆𑀞𑀸, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑀺𑀢𑁆𑀣𑀺𑀬𑀸 𑀧𑀭𑀺𑀩𑁆𑀩𑀸𑀚𑀓𑀸 𑀦 𑀘𑁂𑀯 𑀲𑀫𑁆𑀧𑀸𑀬𑀺𑀲𑁆𑀲𑀦𑁆𑀢𑀺, 𑀉𑀢𑁆𑀢𑀭𑀺 𑀘 𑀯𑀺𑀖𑀸𑀢𑀁 𑀆𑀧𑀚𑁆𑀚𑀺𑀲𑁆𑀲𑀦𑁆𑀢𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀬𑀣𑀸 𑀢𑀁, 𑀪𑀺𑀓𑁆𑀔𑀯𑁂, 𑀅𑀯𑀺𑀲𑀬𑀲𑁆𑀫𑀺𑀁. 𑀦𑀸𑀳𑀁 𑀢𑀁, 𑀪𑀺𑀓𑁆𑀔𑀯𑁂, 𑀧𑀲𑁆𑀲𑀸𑀫𑀺 𑀲𑀤𑁂𑀯𑀓𑁂 𑀮𑁄𑀓𑁂 𑀲𑀫𑀸𑀭𑀓𑁂 𑀲𑀩𑁆𑀭𑀳𑁆𑀫𑀓𑁂 𑀲𑀲𑁆𑀲𑀫𑀡𑀩𑁆𑀭𑀸𑀳𑁆𑀫𑀡𑀺𑀬𑀸 𑀧𑀚𑀸𑀬 𑀲𑀤𑁂𑀯𑀫𑀦𑀼𑀲𑁆𑀲𑀸𑀬 𑀬𑁄 𑀇𑀫𑁂𑀲𑀁 𑀧𑀜𑁆𑀳𑀸𑀦𑀁 𑀯𑁂𑀬𑁆𑀬𑀸𑀓𑀭𑀡𑁂𑀦 𑀘𑀺𑀢𑁆𑀢𑀁 𑀆𑀭𑀸𑀥𑁂𑀬𑁆𑀬, 𑀅𑀜𑁆𑀜𑀢𑁆𑀭 𑀢𑀣𑀸𑀕𑀢𑁂𑀦 𑀯𑀸 𑀢𑀣𑀸𑀕𑀢𑀲𑀸𑀯𑀓𑁂𑀦 𑀯𑀸 𑀇𑀢𑁄 𑀯𑀸 𑀧𑀦 𑀲𑀼𑀢𑁆𑀯𑀸.

‘‘‘𑀏𑀓𑁄 𑀧𑀜𑁆𑀳𑁄 𑀏𑀓𑁄 𑀉𑀤𑁆𑀤𑁂𑀲𑁄 𑀏𑀓𑀁 𑀯𑁂𑀬𑁆𑀬𑀸𑀓𑀭𑀡’𑀦𑁆𑀢𑀺, 𑀇𑀢𑀺 𑀔𑁄 𑀧𑀦𑁂𑀢𑀁 𑀯𑀼𑀢𑁆𑀢𑀁. 𑀓𑀺𑀜𑁆𑀘𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁? 𑀏𑀓𑀥𑀫𑁆𑀫𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀫𑁆𑀫𑀸 𑀦𑀺𑀩𑁆𑀩𑀺𑀦𑁆𑀤𑀫𑀸𑀦𑁄 𑀲𑀫𑁆𑀫𑀸 𑀯𑀺𑀭𑀚𑁆𑀚𑀫𑀸𑀦𑁄 𑀲𑀫𑁆𑀫𑀸 𑀯𑀺𑀫𑀼𑀘𑁆𑀘𑀫𑀸𑀦𑁄 𑀲𑀫𑁆𑀫𑀸 𑀧𑀭𑀺𑀬𑀦𑁆𑀢𑀤𑀲𑁆𑀲𑀸𑀯𑀻 𑀲𑀫𑁆𑀫𑀤𑀢𑁆𑀣𑀁 𑀅𑀪𑀺𑀲𑀫𑁂𑀘𑁆𑀘 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀤𑀼𑀓𑁆𑀔𑀲𑁆𑀲𑀦𑁆𑀢𑀓𑀭𑁄 𑀳𑁄𑀢𑀺. 𑀓𑀢𑀫𑀲𑁆𑀫𑀺𑀁 𑀏𑀓𑀥𑀫𑁆𑀫𑁂? ‘𑀲𑀩𑁆𑀩𑁂 𑀲𑀢𑁆𑀢𑀸 𑀆𑀳𑀸𑀭𑀝𑁆𑀞𑀺𑀢𑀺𑀓𑀸’ 𑁋 𑀇𑀫𑀲𑁆𑀫𑀺𑀁 𑀔𑁄, 𑀪𑀺𑀓𑁆𑀔𑀯𑁂, 𑀏𑀓𑀥𑀫𑁆𑀫𑁂 𑀪𑀺𑀓𑁆𑀔𑀼 𑀲𑀫𑁆𑀫𑀸 𑀦𑀺𑀩𑁆𑀩𑀺𑀦𑁆𑀤𑀫𑀸𑀦𑁄 𑀲𑀫𑁆𑀫𑀸 𑀯𑀺𑀭𑀚𑁆𑀚𑀫𑀸𑀦𑁄 𑀲𑀫𑁆𑀫𑀸 𑀯𑀺𑀫𑀼𑀘𑁆𑀘𑀫𑀸𑀦𑁄 𑀲𑀫𑁆𑀫𑀸 𑀧𑀭𑀺𑀬𑀦𑁆𑀢𑀤𑀲𑁆𑀲𑀸𑀯𑀻 𑀲𑀫𑁆𑀫𑀤𑀢𑁆𑀣𑀁 𑀅𑀪𑀺𑀲𑀫𑁂𑀘𑁆𑀘 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀤𑀼𑀓𑁆𑀔𑀲𑁆𑀲𑀦𑁆𑀢𑀓𑀭𑁄 𑀳𑁄𑀢𑀺. ‘𑀏𑀓𑁄 𑀧𑀜𑁆𑀳𑁄 𑀏𑀓𑁄 𑀉𑀤𑁆𑀤𑁂𑀲𑁄 𑀏𑀓𑀁 𑀯𑁂𑀬𑁆𑀬𑀸𑀓𑀭𑀡’𑀦𑁆𑀢𑀺, 𑀇𑀢𑀺 𑀬𑀁 𑀢𑀁 𑀯𑀼𑀢𑁆𑀢𑀁 𑀇𑀤𑀫𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁.

‘‘‘𑀤𑁆𑀯𑁂 𑀧𑀜𑁆𑀳𑀸 𑀤𑁆𑀯𑁂 𑀉𑀤𑁆𑀤𑁂𑀲𑀸 𑀤𑁆𑀯𑁂 𑀯𑁂𑀬𑁆𑀬𑀸𑀓𑀭𑀡𑀸𑀦𑀻’𑀢𑀺, 𑀇𑀢𑀺 𑀔𑁄 𑀧𑀦𑁂𑀢𑀁 𑀯𑀼𑀢𑁆𑀢𑀁. 𑀓𑀺𑀜𑁆𑀘𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁? 𑀤𑁆𑀯𑀻𑀲𑀼, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀲𑀼 𑀪𑀺𑀓𑁆𑀔𑀼 𑀲𑀫𑁆𑀫𑀸 𑀦𑀺𑀩𑁆𑀩𑀺𑀦𑁆𑀤𑀫𑀸𑀦𑁄 𑀲𑀫𑁆𑀫𑀸 𑀯𑀺𑀭𑀚𑁆𑀚𑀫𑀸𑀦𑁄 𑀲𑀫𑁆𑀫𑀸 𑀯𑀺𑀫𑀼𑀘𑁆𑀘𑀫𑀸𑀦𑁄 𑀲𑀫𑁆𑀫𑀸 𑀧𑀭𑀺𑀬𑀦𑁆𑀢𑀤𑀲𑁆𑀲𑀸𑀯𑀻 𑀲𑀫𑁆𑀫𑀤𑀢𑁆𑀣𑀁 𑀅𑀪𑀺𑀲𑀫𑁂𑀘𑁆𑀘 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀤𑀼𑀓𑁆𑀔𑀲𑁆𑀲𑀦𑁆𑀢𑀓𑀭𑁄 𑀳𑁄𑀢𑀺. 𑀓𑀢𑀫𑁂𑀲𑀼 𑀤𑁆𑀯𑀻𑀲𑀼? 𑀦𑀸𑀫𑁂 𑀘 𑀭𑀽𑀧𑁂 𑀘 𑁋 𑀇𑀫𑁂𑀲𑀼 𑀔𑁄, 𑀪𑀺𑀓𑁆𑀔𑀯𑁂, 𑀤𑁆𑀯𑀻𑀲𑀼 𑀥𑀫𑁆𑀫𑁂𑀲𑀼 𑀪𑀺𑀓𑁆𑀔𑀼 𑀲𑀫𑁆𑀫𑀸 𑀦𑀺𑀩𑁆𑀩𑀺𑀦𑁆𑀤𑀫𑀸𑀦𑁄 𑀲𑀫𑁆𑀫𑀸 𑀯𑀺𑀭𑀚𑁆𑀚𑀫𑀸𑀦𑁄 𑀲𑀫𑁆𑀫𑀸 𑀯𑀺𑀫𑀼𑀘𑁆𑀘𑀫𑀸𑀦𑁄 𑀲𑀫𑁆𑀫𑀸 𑀧𑀭𑀺𑀬𑀦𑁆𑀢𑀤𑀲𑁆𑀲𑀸𑀯𑀻 𑀲𑀫𑁆𑀫𑀤𑀢𑁆𑀣𑀁 𑀅𑀪𑀺𑀲𑀫𑁂𑀘𑁆𑀘 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀤𑀼𑀓𑁆𑀔𑀲𑁆𑀲𑀦𑁆𑀢𑀓𑀭𑁄 𑀳𑁄𑀢𑀺. ‘𑀤𑁆𑀯𑁂 𑀧𑀜𑁆𑀳𑀸 𑀤𑁆𑀯𑁂 𑀉𑀤𑁆𑀤𑁂𑀲𑀸 𑀤𑁆𑀯𑁂 𑀯𑁂𑀬𑁆𑀬𑀸𑀓𑀭𑀡𑀸𑀦𑀻’𑀢𑀺, 𑀇𑀢𑀺 𑀬𑀁 𑀢𑀁 𑀯𑀼𑀢𑁆𑀢𑀁 𑀇𑀤𑀫𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁.

‘‘‘𑀢𑀬𑁄 𑀧𑀜𑁆𑀳𑀸 𑀢𑀬𑁄 𑀉𑀤𑁆𑀤𑁂𑀲𑀸 𑀢𑀻𑀡𑀺 𑀯𑁂𑀬𑁆𑀬𑀸𑀓𑀭𑀡𑀸𑀦𑀻’𑀢𑀺, 𑀇𑀢𑀺 𑀔𑁄 𑀧𑀦𑁂𑀢𑀁 𑀯𑀼𑀢𑁆𑀢𑀁. 𑀓𑀺𑀜𑁆𑀘𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁? 𑀢𑀻𑀲𑀼, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀲𑀼 𑀪𑀺𑀓𑁆𑀔𑀼 𑀲𑀫𑁆𑀫𑀸 𑀦𑀺𑀩𑁆𑀩𑀺𑀦𑁆𑀤𑀫𑀸𑀦𑁄 𑀲𑀫𑁆𑀫𑀸 𑀯𑀺𑀭𑀚𑁆𑀚𑀫𑀸𑀦𑁄 𑀲𑀫𑁆𑀫𑀸 𑀯𑀺𑀫𑀼𑀘𑁆𑀘𑀫𑀸𑀦𑁄 𑀲𑀫𑁆𑀫𑀸 𑀧𑀭𑀺𑀬𑀦𑁆𑀢𑀤𑀲𑁆𑀲𑀸𑀯𑀻 𑀲𑀫𑁆𑀫𑀤𑀢𑁆𑀣𑀁 𑀅𑀪𑀺𑀲𑀫𑁂𑀘𑁆𑀘 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀤𑀼𑀓𑁆𑀔𑀲𑁆𑀲𑀦𑁆𑀢𑀓𑀭𑁄 𑀳𑁄𑀢𑀺. 𑀓𑀢𑀫𑁂𑀲𑀼 𑀢𑀻𑀲𑀼? 𑀢𑀻𑀲𑀼 𑀯𑁂𑀤𑀦𑀸𑀲𑀼 𑁋 𑀇𑀫𑁂𑀲𑀼 𑀔𑁄, 𑀪𑀺𑀓𑁆𑀔𑀯𑁂, 𑀢𑀻𑀲𑀼 𑀥𑀫𑁆𑀫𑁂𑀲𑀼 𑀪𑀺𑀓𑁆𑀔𑀼 𑀲𑀫𑁆𑀫𑀸 𑀦𑀺𑀩𑁆𑀩𑀺𑀦𑁆𑀤𑀫𑀸𑀦𑁄 𑀲𑀫𑁆𑀫𑀸 𑀯𑀺𑀭𑀚𑁆𑀚𑀫𑀸𑀦𑁄 𑀲𑀫𑁆𑀫𑀸 𑀯𑀺𑀫𑀼𑀘𑁆𑀘𑀫𑀸𑀦𑁄 𑀲𑀫𑁆𑀫𑀸 𑀧𑀭𑀺𑀬𑀦𑁆𑀢𑀤𑀲𑁆𑀲𑀸𑀯𑀻 𑀲𑀫𑁆𑀫𑀤𑀢𑁆𑀣𑀁 𑀅𑀪𑀺𑀲𑀫𑁂𑀘𑁆𑀘 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀤𑀼𑀓𑁆𑀔𑀲𑁆𑀲𑀦𑁆𑀢𑀓𑀭𑁄 𑀳𑁄𑀢𑀺. ‘𑀢𑀬𑁄 𑀧𑀜𑁆𑀳𑀸 𑀢𑀬𑁄 𑀉𑀤𑁆𑀤𑁂𑀲𑀸 𑀢𑀻𑀡𑀺 𑀯𑁂𑀬𑁆𑀬𑀸𑀓𑀭𑀡𑀸𑀦𑀻’𑀢𑀺, 𑀇𑀢𑀺 𑀬𑀁 𑀢𑀁 𑀯𑀼𑀢𑁆𑀢𑀁 𑀇𑀤𑀫𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁.

‘‘‘𑀘𑀢𑁆𑀢𑀸𑀭𑁄 𑀧𑀜𑁆𑀳𑀸 𑀘𑀢𑁆𑀢𑀸𑀭𑁄 𑀉𑀤𑁆𑀤𑁂𑀲𑀸 𑀘𑀢𑁆𑀢𑀸𑀭𑀺 𑀯𑁂𑀬𑁆𑀬𑀸𑀓𑀭𑀡𑀸𑀦𑀻’𑀢𑀺, 𑀇𑀢𑀺 𑀔𑁄 𑀧𑀦𑁂𑀢𑀁 𑀯𑀼𑀢𑁆𑀢𑀁. 𑀓𑀺𑀜𑁆𑀘𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁? 𑀘𑀢𑀽𑀲𑀼, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀲𑀼 𑀪𑀺𑀓𑁆𑀔𑀼 𑀲𑀫𑁆𑀫𑀸 𑀦𑀺𑀩𑁆𑀩𑀺𑀦𑁆𑀤𑀫𑀸𑀦𑁄 𑀲𑀫𑁆𑀫𑀸 𑀯𑀺𑀭𑀚𑁆𑀚𑀫𑀸𑀦𑁄 𑀲𑀫𑁆𑀫𑀸 𑀯𑀺𑀫𑀼𑀘𑁆𑀘𑀫𑀸𑀦𑁄 𑀲𑀫𑁆𑀫𑀸 𑀧𑀭𑀺𑀬𑀦𑁆𑀢𑀤𑀲𑁆𑀲𑀸𑀯𑀻 𑀲𑀫𑁆𑀫𑀤𑀢𑁆𑀣𑀁 𑀅𑀪𑀺𑀲𑀫𑁂𑀘𑁆𑀘 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀤𑀼𑀓𑁆𑀔𑀲𑁆𑀲𑀦𑁆𑀢𑀓𑀭𑁄 𑀳𑁄𑀢𑀺. 𑀓𑀢𑀫𑁂𑀲𑀼 𑀘𑀢𑀽𑀲𑀼? 𑀘𑀢𑀽𑀲𑀼 𑀆𑀳𑀸𑀭𑁂𑀲𑀼 𑁋 𑀇𑀫𑁂𑀲𑀼 𑀔𑁄, 𑀪𑀺𑀓𑁆𑀔𑀯𑁂, 𑀘𑀢𑀽𑀲𑀼 𑀥𑀫𑁆𑀫𑁂𑀲𑀼 𑀪𑀺𑀓𑁆𑀔𑀼 𑀲𑀫𑁆𑀫𑀸 𑀦𑀺𑀩𑁆𑀩𑀺𑀦𑁆𑀤𑀫𑀸𑀦𑁄 𑀲𑀫𑁆𑀫𑀸 𑀯𑀺𑀭𑀚𑁆𑀚𑀫𑀸𑀦𑁄 𑀲𑀫𑁆𑀫𑀸 𑀯𑀺𑀫𑀼𑀘𑁆𑀘𑀫𑀸𑀦𑁄 𑀲𑀫𑁆𑀫𑀸 𑀧𑀭𑀺𑀬𑀦𑁆𑀢𑀤𑀲𑁆𑀲𑀸𑀯𑀻 𑀲𑀫𑁆𑀫𑀤𑀢𑁆𑀣𑀁 𑀅𑀪𑀺𑀲𑀫𑁂𑀘𑁆𑀘 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀤𑀼𑀓𑁆𑀔𑀲𑁆𑀲𑀦𑁆𑀢𑀓𑀭𑁄 𑀳𑁄𑀢𑀺. ‘𑀘𑀢𑁆𑀢𑀸𑀭𑁄 𑀧𑀜𑁆𑀳𑀸 𑀘𑀢𑁆𑀢𑀸𑀭𑁄 𑀉𑀤𑁆𑀤𑁂𑀲𑀸 𑀘𑀢𑁆𑀢𑀸𑀭𑀺 𑀯𑁂𑀬𑁆𑀬𑀸𑀓𑀭𑀡𑀸𑀦𑀻’𑀢𑀺, 𑀇𑀢𑀺 𑀬𑀁 𑀢𑀁 𑀯𑀼𑀢𑁆𑀢𑀁 𑀇𑀤𑀫𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁.

‘‘‘𑀧𑀜𑁆𑀘 𑀧𑀜𑁆𑀳𑀸 𑀧𑀜𑁆𑀘𑀼𑀤𑁆𑀤𑁂𑀲𑀸 𑀧𑀜𑁆𑀘 𑀯𑁂𑀬𑁆𑀬𑀸𑀓𑀭𑀡𑀸𑀦𑀻’𑀢𑀺, 𑀇𑀢𑀺 𑀔𑁄 𑀧𑀦𑁂𑀢𑀁 𑀯𑀼𑀢𑁆𑀢𑀁. 𑀓𑀺𑀜𑁆𑀘𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁? 𑀧𑀜𑁆𑀘𑀲𑀼, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀲𑀼 𑀪𑀺𑀓𑁆𑀔𑀼 𑀲𑀫𑁆𑀫𑀸 𑀦𑀺𑀩𑁆𑀩𑀺𑀦𑁆𑀤𑀫𑀸𑀦𑁄 𑀲𑀫𑁆𑀫𑀸 𑀯𑀺𑀭𑀚𑁆𑀚𑀫𑀸𑀦𑁄 𑀲𑀫𑁆𑀫𑀸 𑀯𑀺𑀫𑀼𑀘𑁆𑀘𑀫𑀸𑀦𑁄 𑀲𑀫𑁆𑀫𑀸 𑀧𑀭𑀺𑀬𑀦𑁆𑀢𑀤𑀲𑁆𑀲𑀸𑀯𑀻 𑀲𑀫𑁆𑀫𑀤𑀢𑁆𑀣𑀁 𑀅𑀪𑀺𑀲𑀫𑁂𑀘𑁆𑀘 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀤𑀼𑀓𑁆𑀔𑀲𑁆𑀲𑀦𑁆𑀢𑀓𑀭𑁄 𑀳𑁄𑀢𑀺. 𑀓𑀢𑀫𑁂𑀲𑀼 𑀧𑀜𑁆𑀘𑀲𑀼? 𑀧𑀜𑁆𑀘𑀲𑀼 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑁂𑀲𑀼 𑁋 𑀇𑀫𑁂𑀲𑀼 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀲𑀼 𑀥𑀫𑁆𑀫𑁂𑀲𑀼 𑀪𑀺𑀓𑁆𑀔𑀼 𑀲𑀫𑁆𑀫𑀸 𑀦𑀺𑀩𑁆𑀩𑀺𑀦𑁆𑀤𑀫𑀸𑀦𑁄 𑀲𑀫𑁆𑀫𑀸 𑀯𑀺𑀭𑀚𑁆𑀚𑀫𑀸𑀦𑁄 𑀲𑀫𑁆𑀫𑀸 𑀯𑀺𑀫𑀼𑀘𑁆𑀘𑀫𑀸𑀦𑁄 𑀲𑀫𑁆𑀫𑀸 𑀧𑀭𑀺𑀬𑀦𑁆𑀢𑀤𑀲𑁆𑀲𑀸𑀯𑀻 𑀲𑀫𑁆𑀫𑀤𑀢𑁆𑀣𑀁 𑀅𑀪𑀺𑀲𑀫𑁂𑀘𑁆𑀘 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀤𑀼𑀓𑁆𑀔𑀲𑁆𑀲𑀦𑁆𑀢𑀓𑀭𑁄 𑀳𑁄𑀢𑀺. ‘𑀧𑀜𑁆𑀘 𑀧𑀜𑁆𑀳𑀸 𑀧𑀜𑁆𑀘𑀼𑀤𑁆𑀤𑁂𑀲𑀸 𑀧𑀜𑁆𑀘 𑀯𑁂𑀬𑁆𑀬𑀸𑀓𑀭𑀡𑀸𑀦𑀻’𑀢𑀺, 𑀇𑀢𑀺 𑀬𑀁 𑀢𑀁 𑀯𑀼𑀢𑁆𑀢𑀁 𑀇𑀤𑀫𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁.

‘‘‘𑀙 𑀧𑀜𑁆𑀳𑀸 𑀙 𑀉𑀤𑁆𑀤𑁂𑀲𑀸 𑀙 𑀯𑁂𑀬𑁆𑀬𑀸𑀓𑀭𑀡𑀸𑀦𑀻’𑀢𑀺, 𑀇𑀢𑀺 𑀔𑁄 𑀧𑀦𑁂𑀢𑀁 𑀯𑀼𑀢𑁆𑀢𑀁. 𑀓𑀺𑀜𑁆𑀘𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁? 𑀙𑀲𑀼, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀲𑀼 𑀪𑀺𑀓𑁆𑀔𑀼 𑀲𑀫𑁆𑀫𑀸 𑀦𑀺𑀩𑁆𑀩𑀺𑀦𑁆𑀤𑀫𑀸𑀦𑁄 𑀲𑀫𑁆𑀫𑀸 𑀯𑀺𑀭𑀚𑁆𑀚𑀫𑀸𑀦𑁄 𑀲𑀫𑁆𑀫𑀸 𑀯𑀺𑀫𑀼𑀘𑁆𑀘𑀫𑀸𑀦𑁄 𑀲𑀫𑁆𑀫𑀸 𑀧𑀭𑀺𑀬𑀦𑁆𑀢𑀤𑀲𑁆𑀲𑀸𑀯𑀻 𑀲𑀫𑁆𑀫𑀤𑀢𑁆𑀣𑀁 𑀅𑀪𑀺𑀲𑀫𑁂𑀘𑁆𑀘 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀤𑀼𑀓𑁆𑀔𑀲𑁆𑀲𑀦𑁆𑀢𑀓𑀭𑁄 𑀳𑁄𑀢𑀺. 𑀓𑀢𑀫𑁂𑀲𑀼 𑀙𑀲𑀼? 𑀙𑀲𑀼 𑀅𑀚𑁆𑀛𑀢𑁆𑀢𑀺𑀓𑁂𑀲𑀼 𑀆𑀬𑀢𑀦𑁂𑀲𑀼 𑁋 𑀇𑀫𑁂𑀲𑀼 𑀔𑁄, 𑀪𑀺𑀓𑁆𑀔𑀯𑁂, 𑀙𑀲𑀼 𑀥𑀫𑁆𑀫𑁂𑀲𑀼 𑀪𑀺𑀓𑁆𑀔𑀼 𑀲𑀫𑁆𑀫𑀸 𑀦𑀺𑀩𑁆𑀩𑀺𑀦𑁆𑀤𑀫𑀸𑀦𑁄 𑀲𑀫𑁆𑀫𑀸 𑀯𑀺𑀭𑀚𑁆𑀚𑀫𑀸𑀦𑁄 𑀲𑀫𑁆𑀫𑀸 𑀯𑀺𑀫𑀼𑀘𑁆𑀘𑀫𑀸𑀦𑁄 𑀲𑀫𑁆𑀫𑀸 𑀧𑀭𑀺𑀬𑀦𑁆𑀢𑀤𑀲𑁆𑀲𑀸𑀯𑀻 𑀲𑀫𑁆𑀫𑀤𑀢𑁆𑀣𑀁 𑀅𑀪𑀺𑀲𑀫𑁂𑀘𑁆𑀘 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀤𑀼𑀓𑁆𑀔𑀲𑁆𑀲𑀦𑁆𑀢𑀓𑀭𑁄 𑀳𑁄𑀢𑀺. ‘𑀙 𑀧𑀜𑁆𑀳𑀸 𑀙 𑀉𑀤𑁆𑀤𑁂𑀲𑀸 𑀙 𑀯𑁂𑀬𑁆𑀬𑀸𑀓𑀭𑀡𑀸𑀦𑀻’𑀢𑀺, 𑀇𑀢𑀺 𑀬𑀁 𑀢𑀁 𑀯𑀼𑀢𑁆𑀢𑀁 𑀇𑀤𑀫𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁.

‘‘‘𑀲𑀢𑁆𑀢 𑀧𑀜𑁆𑀳𑀸 𑀲𑀢𑁆𑀢𑀼𑀤𑁆𑀤𑁂𑀲𑀸 𑀲𑀢𑁆𑀢 𑀯𑁂𑀬𑁆𑀬𑀸𑀓𑀭𑀡𑀸𑀦𑀻’𑀢𑀺, 𑀇𑀢𑀺 𑀔𑁄 𑀧𑀦𑁂𑀢𑀁 𑀯𑀼𑀢𑁆𑀢𑀁. 𑀓𑀺𑀜𑁆𑀘𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁? 𑀲𑀢𑁆𑀢𑀲𑀼, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀲𑀼 𑀪𑀺𑀓𑁆𑀔𑀼 𑀲𑀫𑁆𑀫𑀸 𑀦𑀺𑀩𑁆𑀩𑀺𑀦𑁆𑀤𑀫𑀸𑀦𑁄 𑀲𑀫𑁆𑀫𑀸 𑀯𑀺𑀭𑀚𑁆𑀚𑀫𑀸𑀦𑁄 𑀲𑀫𑁆𑀫𑀸 𑀯𑀺𑀫𑀼𑀘𑁆𑀘𑀫𑀸𑀦𑁄 𑀲𑀫𑁆𑀫𑀸 𑀧𑀭𑀺𑀬𑀦𑁆𑀢𑀤𑀲𑁆𑀲𑀸𑀯𑀻 𑀲𑀫𑁆𑀫𑀤𑀢𑁆𑀣𑀁 𑀅𑀪𑀺𑀲𑀫𑁂𑀘𑁆𑀘 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀤𑀼𑀓𑁆𑀔𑀲𑁆𑀲𑀦𑁆𑀢𑀓𑀭𑁄 𑀳𑁄𑀢𑀺. 𑀓𑀢𑀫𑁂𑀲𑀼 𑀲𑀢𑁆𑀢𑀲𑀼? 𑀲𑀢𑁆𑀢𑀲𑀼 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀻𑀲𑀼 𑁋 𑀇𑀫𑁂𑀲𑀼 𑀔𑁄, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀲𑀼 𑀥𑀫𑁆𑀫𑁂𑀲𑀼 𑀪𑀺𑀓𑁆𑀔𑀼 𑀲𑀫𑁆𑀫𑀸 𑀦𑀺𑀩𑁆𑀩𑀺𑀦𑁆𑀤𑀫𑀸𑀦𑁄 𑀲𑀫𑁆𑀫𑀸 𑀯𑀺𑀭𑀚𑁆𑀚𑀫𑀸𑀦𑁄 𑀲𑀫𑁆𑀫𑀸 𑀯𑀺𑀫𑀼𑀘𑁆𑀘𑀫𑀸𑀦𑁄 𑀲𑀫𑁆𑀫𑀸 𑀧𑀭𑀺𑀬𑀦𑁆𑀢𑀤𑀲𑁆𑀲𑀸𑀯𑀻 𑀲𑀫𑁆𑀫𑀤𑀢𑁆𑀣𑀁 𑀅𑀪𑀺𑀲𑀫𑁂𑀘𑁆𑀘 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀤𑀼𑀓𑁆𑀔𑀲𑁆𑀲𑀦𑁆𑀢𑀓𑀭𑁄 𑀳𑁄𑀢𑀺. ‘𑀲𑀢𑁆𑀢 𑀧𑀜𑁆𑀳𑀸 𑀲𑀢𑁆𑀢𑀼𑀤𑁆𑀤𑁂𑀲𑀸 𑀲𑀢𑁆𑀢 𑀯𑁂𑀬𑁆𑀬𑀸𑀓𑀭𑀡𑀸𑀦𑀻’𑀢𑀺, 𑀇𑀢𑀺 𑀬𑀁 𑀢𑀁 𑀯𑀼𑀢𑁆𑀢𑀁 𑀇𑀤𑀫𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁.

‘‘‘𑀅𑀝𑁆𑀞 𑀧𑀜𑁆𑀳𑀸 𑀅𑀝𑁆𑀞𑀼𑀤𑁆𑀤𑁂𑀲𑀸 𑀅𑀝𑁆𑀞 𑀯𑁂𑀬𑁆𑀬𑀸𑀓𑀭𑀡𑀸𑀦𑀻’𑀢𑀺, 𑀇𑀢𑀺 𑀔𑁄 𑀧𑀦𑁂𑀢𑀁 𑀯𑀼𑀢𑁆𑀢𑀁. 𑀓𑀺𑀜𑁆𑀘𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁? 𑀅𑀝𑁆𑀞𑀲𑀼, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀲𑀼 𑀪𑀺𑀓𑁆𑀔𑀼 𑀲𑀫𑁆𑀫𑀸 𑀦𑀺𑀩𑁆𑀩𑀺𑀦𑁆𑀤𑀫𑀸𑀦𑁄 𑀲𑀫𑁆𑀫𑀸 𑀯𑀺𑀭𑀚𑁆𑀚𑀫𑀸𑀦𑁄 𑀲𑀫𑁆𑀫𑀸 𑀯𑀺𑀫𑀼𑀘𑁆𑀘𑀫𑀸𑀦𑁄 𑀲𑀫𑁆𑀫𑀸 𑀧𑀭𑀺𑀬𑀦𑁆𑀢𑀤𑀲𑁆𑀲𑀸𑀯𑀻 𑀲𑀫𑁆𑀫𑀤𑀢𑁆𑀣𑀁 𑀅𑀪𑀺𑀲𑀫𑁂𑀘𑁆𑀘 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀤𑀼𑀓𑁆𑀔𑀲𑁆𑀲𑀦𑁆𑀢𑀓𑀭𑁄 𑀳𑁄𑀢𑀺. 𑀓𑀢𑀫𑁂𑀲𑀼 𑀅𑀝𑁆𑀞𑀲𑀼? 𑀅𑀝𑁆𑀞𑀲𑀼 𑀮𑁄𑀓𑀥𑀫𑁆𑀫𑁂𑀲𑀼 𑁋 𑀇𑀫𑁂𑀲𑀼 𑀔𑁄, 𑀪𑀺𑀓𑁆𑀔𑀯𑁂, 𑀅𑀝𑁆𑀞𑀲𑀼 𑀥𑀫𑁆𑀫𑁂𑀲𑀼 𑀪𑀺𑀓𑁆𑀔𑀼 𑀲𑀫𑁆𑀫𑀸 𑀦𑀺𑀩𑁆𑀩𑀺𑀦𑁆𑀤𑀫𑀸𑀦𑁄…𑀧𑁂… 𑀤𑀼𑀓𑁆𑀔𑀲𑁆𑀲𑀦𑁆𑀢𑀓𑀭𑁄 𑀳𑁄𑀢𑀺. ‘𑀅𑀝𑁆𑀞 𑀧𑀜𑁆𑀳𑀸 𑀅𑀝𑁆𑀞𑀼𑀤𑁆𑀤𑁂𑀲𑀸 𑀅𑀝𑁆𑀞 𑀯𑁂𑀬𑁆𑀬𑀸𑀓𑀭𑀡𑀸𑀦𑀻’𑀢𑀺, 𑀇𑀢𑀺 𑀬𑀁 𑀢𑀁 𑀯𑀼𑀢𑁆𑀢𑀁 𑀇𑀤𑀫𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁.

‘‘‘𑀦𑀯 𑀧𑀜𑁆𑀳𑀸 𑀦𑀯𑀼𑀤𑁆𑀤𑁂𑀲𑀸 𑀦𑀯 𑀯𑁂𑀬𑁆𑀬𑀸𑀓𑀭𑀡𑀸𑀦𑀻’𑀢𑀺, 𑀇𑀢𑀺 𑀔𑁄 𑀧𑀦𑁂𑀢𑀁 𑀯𑀼𑀢𑁆𑀢𑀁. 𑀓𑀺𑀜𑁆𑀘𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁? 𑀦𑀯𑀲𑀼, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀲𑀼 𑀪𑀺𑀓𑁆𑀔𑀼 𑀲𑀫𑁆𑀫𑀸 𑀦𑀺𑀩𑁆𑀩𑀺𑀦𑁆𑀤𑀫𑀸𑀦𑁄 𑀲𑀫𑁆𑀫𑀸 𑀯𑀺𑀭𑀚𑁆𑀚𑀫𑀸𑀦𑁄 𑀲𑀫𑁆𑀫𑀸 𑀯𑀺𑀫𑀼𑀘𑁆𑀘𑀫𑀸𑀦𑁄 𑀲𑀫𑁆𑀫𑀸 𑀧𑀭𑀺𑀬𑀦𑁆𑀢𑀤𑀲𑁆𑀲𑀸𑀯𑀻 𑀲𑀫𑁆𑀫𑀤𑀢𑁆𑀣𑀁 𑀅𑀪𑀺𑀲𑀫𑁂𑀘𑁆𑀘 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀤𑀼𑀓𑁆𑀔𑀲𑁆𑀲𑀦𑁆𑀢𑀓𑀭𑁄 𑀳𑁄𑀢𑀺. 𑀓𑀢𑀫𑁂𑀲𑀼 𑀦𑀯𑀲𑀼? 𑀦𑀯𑀲𑀼 𑀲𑀢𑁆𑀢𑀸𑀯𑀸𑀲𑁂𑀲𑀼 𑁋 𑀇𑀫𑁂𑀲𑀼 𑀔𑁄, 𑀪𑀺𑀓𑁆𑀔𑀯𑁂, 𑀦𑀯𑀲𑀼 𑀥𑀫𑁆𑀫𑁂𑀲𑀼 𑀪𑀺𑀓𑁆𑀔𑀼 𑀲𑀫𑁆𑀫𑀸 𑀦𑀺𑀩𑁆𑀩𑀺𑀦𑁆𑀤𑀫𑀸𑀦𑁄 𑀲𑀫𑁆𑀫𑀸 𑀯𑀺𑀭𑀚𑁆𑀚𑀫𑀸𑀦𑁄 𑀲𑀫𑁆𑀫𑀸 𑀯𑀺𑀫𑀼𑀘𑁆𑀘𑀫𑀸𑀦𑁄 𑀲𑀫𑁆𑀫𑀸 𑀧𑀭𑀺𑀬𑀦𑁆𑀢𑀤𑀲𑁆𑀲𑀸𑀯𑀻 𑀲𑀫𑁆𑀫𑀤𑀢𑁆𑀣𑀁 𑀅𑀪𑀺𑀲𑀫𑁂𑀘𑁆𑀘 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀤𑀼𑀓𑁆𑀔𑀲𑁆𑀲𑀦𑁆𑀢𑀓𑀭𑁄 𑀳𑁄𑀢𑀺. ‘𑀦𑀯 𑀧𑀜𑁆𑀳𑀸 𑀦𑀯𑀼𑀤𑁆𑀤𑁂𑀲𑀸 𑀦𑀯 𑀯𑁂𑀬𑁆𑀬𑀸𑀓𑀭𑀡𑀸𑀦𑀻’𑀢𑀺, 𑀇𑀢𑀺 𑀬𑀁 𑀢𑀁 𑀯𑀼𑀢𑁆𑀢𑀁 𑀇𑀤𑀫𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁.

‘‘‘𑀤𑀲 𑀧𑀜𑁆𑀳𑀸 𑀤𑀲𑀼𑀤𑁆𑀤𑁂𑀲𑀸 𑀤𑀲 𑀯𑁂𑀬𑁆𑀬𑀸𑀓𑀭𑀡𑀸𑀦𑀻’𑀢𑀺, 𑀇𑀢𑀺 𑀔𑁄 𑀧𑀦𑁂𑀢𑀁 𑀯𑀼𑀢𑁆𑀢𑀁. 𑀓𑀺𑀜𑁆𑀘𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁? 𑀤𑀲𑀲𑀼, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀲𑀼 𑀪𑀺𑀓𑁆𑀔𑀼 𑀲𑀫𑁆𑀫𑀸 𑀦𑀺𑀩𑁆𑀩𑀺𑀦𑁆𑀤𑀫𑀸𑀦𑁄 𑀲𑀫𑁆𑀫𑀸 𑀯𑀺𑀭𑀚𑁆𑀚𑀫𑀸𑀦𑁄 𑀲𑀫𑁆𑀫𑀸 𑀯𑀺𑀫𑀼𑀘𑁆𑀘𑀫𑀸𑀦𑁄 𑀲𑀫𑁆𑀫𑀸 𑀧𑀭𑀺𑀬𑀦𑁆𑀢𑀤𑀲𑁆𑀲𑀸𑀯𑀻 𑀲𑀫𑁆𑀫𑀤𑀢𑁆𑀣𑀁 𑀅𑀪𑀺𑀲𑀫𑁂𑀘𑁆𑀘 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀤𑀼𑀓𑁆𑀔𑀲𑁆𑀲𑀦𑁆𑀢𑀓𑀭𑁄 𑀳𑁄𑀢𑀺. 𑀓𑀢𑀫𑁂𑀲𑀼 𑀤𑀲𑀲𑀼? 𑀤𑀲𑀲𑀼 𑀅𑀓𑀼𑀲𑀮𑁂𑀲𑀼 𑀓𑀫𑁆𑀫𑀧𑀣𑁂𑀲𑀼 𑁋 𑀇𑀫𑁂𑀲𑀼 𑀔𑁄, 𑀪𑀺𑀓𑁆𑀔𑀯𑁂, 𑀤𑀲𑀲𑀼 𑀥𑀫𑁆𑀫𑁂𑀲𑀼 𑀪𑀺𑀓𑁆𑀔𑀼 𑀲𑀫𑁆𑀫𑀸 𑀦𑀺𑀩𑁆𑀩𑀺𑀦𑁆𑀤𑀫𑀸𑀦𑁄 𑀲𑀫𑁆𑀫𑀸 𑀯𑀺𑀭𑀚𑁆𑀚𑀫𑀸𑀦𑁄 𑀲𑀫𑁆𑀫𑀸 𑀯𑀺𑀫𑀼𑀘𑁆𑀘𑀫𑀸𑀦𑁄 𑀲𑀫𑁆𑀫𑀸 𑀧𑀭𑀺𑀬𑀦𑁆𑀢𑀤𑀲𑁆𑀲𑀸𑀯𑀻 𑀲𑀫𑁆𑀫𑀤𑀢𑁆𑀣𑀁 𑀅𑀪𑀺𑀲𑀫𑁂𑀘𑁆𑀘 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀤𑀼𑀓𑁆𑀔𑀲𑁆𑀲𑀦𑁆𑀢𑀓𑀭𑁄 𑀳𑁄𑀢𑀺. ‘𑀤𑀲 𑀧𑀜𑁆𑀳𑀸 𑀤𑀲𑀼𑀤𑁆𑀤𑁂𑀲𑀸 𑀤𑀲 𑀯𑁂𑀬𑁆𑀬𑀸𑀓𑀭𑀡𑀸𑀦𑀻’𑀢𑀺, 𑀇𑀢𑀺 𑀬𑀁 𑀢𑀁 𑀯𑀼𑀢𑁆𑀢𑀁 𑀇𑀤𑀫𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢’’𑀦𑁆𑀢𑀺. 𑀲𑀢𑁆𑀢𑀫𑀁.

𑁮. 𑀤𑀼𑀢𑀺𑀬𑀫𑀳𑀸𑀧𑀜𑁆𑀳𑀸𑀲𑀼𑀢𑁆𑀢𑀁

𑁨𑁮. 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀓𑀚𑀗𑁆𑀕𑀮𑀸𑀬𑀁 𑀯𑀺𑀳𑀭𑀢𑀺 𑀯𑁂𑀴𑀼𑀯𑀦𑁂. 𑀅𑀣 𑀔𑁄 𑀲𑀫𑁆𑀩𑀳𑀼𑀮𑀸 𑀓𑀚𑀗𑁆𑀕𑀮𑀓𑀸 𑀉𑀧𑀸𑀲𑀓𑀸 𑀬𑁂𑀦 𑀓𑀚𑀗𑁆𑀕𑀮𑀺𑀓𑀸 𑀪𑀺𑀓𑁆𑀔𑀼𑀦𑀻 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀓𑀚𑀗𑁆𑀕𑀮𑀺𑀓𑀁 𑀪𑀺𑀓𑁆𑀔𑀼𑀦𑀺𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀸 𑀔𑁄 𑀓𑀚𑀗𑁆𑀕𑀮𑀓𑀸 𑀉𑀧𑀸𑀲𑀓𑀸 𑀓𑀚𑀗𑁆𑀕𑀮𑀺𑀓𑀁 𑀪𑀺𑀓𑁆𑀔𑀼𑀦𑀺𑀁 𑀏𑀢𑀤𑀯𑁄𑀘𑀼𑀁 𑁋

‘‘𑀯𑀼𑀢𑁆𑀢𑀫𑀺𑀤𑀁, 𑀅𑀬𑁆𑀬𑁂, 𑀪𑀕𑀯𑀢𑀸 𑀫𑀳𑀸𑀧𑀜𑁆𑀳𑁂𑀲𑀼 𑁋 ‘𑀏𑀓𑁄 𑀧𑀜𑁆𑀳𑁄 𑀏𑀓𑁄 𑀉𑀤𑁆𑀤𑁂𑀲𑁄 𑀏𑀓𑀁 𑀯𑁂𑀬𑁆𑀬𑀸𑀓𑀭𑀡𑀁, 𑀤𑁆𑀯𑁂 𑀧𑀜𑁆𑀳𑀸 𑀤𑁆𑀯𑁂 𑀉𑀤𑁆𑀤𑁂𑀲𑀸 𑀤𑁆𑀯𑁂 𑀯𑁂𑀬𑁆𑀬𑀸𑀓𑀭𑀡𑀸𑀦𑀺, 𑀢𑀬𑁄 𑀧𑀜𑁆𑀳𑀸 𑀢𑀬𑁄 𑀉𑀤𑁆𑀤𑁂𑀲𑀸 𑀢𑀻𑀡𑀺 𑀯𑁂𑀬𑁆𑀬𑀸𑀓𑀭𑀡𑀸𑀦𑀺, 𑀘𑀢𑁆𑀢𑀸𑀭𑁄 𑀧𑀜𑁆𑀳𑀸 𑀘𑀢𑁆𑀢𑀸𑀭𑁄 𑀉𑀤𑁆𑀤𑁂𑀲𑀸 𑀘𑀢𑁆𑀢𑀸𑀭𑀺 𑀯𑁂𑀬𑁆𑀬𑀸𑀓𑀭𑀡𑀸𑀦𑀺, 𑀧𑀜𑁆𑀘 𑀧𑀜𑁆𑀳𑀸 𑀧𑀜𑁆𑀘𑀼𑀤𑁆𑀤𑁂𑀲𑀸 𑀧𑀜𑁆𑀘 𑀯𑁂𑀬𑁆𑀬𑀸𑀓𑀭𑀡𑀸𑀦𑀺, 𑀙 𑀧𑀜𑁆𑀳𑀸 𑀙 𑀉𑀤𑁆𑀤𑁂𑀲𑀸 𑀙 𑀯𑁂𑀬𑁆𑀬𑀸𑀓𑀭𑀡𑀸𑀦𑀺, 𑀲𑀢𑁆𑀢 𑀧𑀜𑁆𑀳𑀸 𑀲𑀢𑁆𑀢𑀼𑀤𑁆𑀤𑁂𑀲𑀸 𑀲𑀢𑁆𑀢 𑀯𑁂𑀬𑁆𑀬𑀸𑀓𑀭𑀡𑀸𑀦𑀺, 𑀅𑀝𑁆𑀞 𑀧𑀜𑁆𑀳𑀸 𑀅𑀝𑁆𑀞𑀼𑀤𑁆𑀤𑁂𑀲𑀸 𑀅𑀝𑁆𑀞 𑀯𑁂𑀬𑁆𑀬𑀸𑀓𑀭𑀡𑀸𑀦𑀺, 𑀦𑀯 𑀧𑀜𑁆𑀳𑀸 𑀦𑀯𑀼𑀤𑁆𑀤𑁂𑀲𑀸 𑀦𑀯 𑀯𑁂𑀬𑁆𑀬𑀸𑀓𑀭𑀡𑀸𑀦𑀺, 𑀤𑀲 𑀧𑀜𑁆𑀳𑀸 𑀤𑀲𑀼𑀤𑁆𑀤𑁂𑀲𑀸 𑀤𑀲 𑀯𑁂𑀬𑁆𑀬𑀸𑀓𑀭𑀡𑀸𑀦𑀻’𑀢𑀺. 𑀇𑀫𑀲𑁆𑀲 𑀦𑀼 𑀔𑁄, 𑀅𑀬𑁆𑀬𑁂, 𑀪𑀕𑀯𑀢𑀸 𑀲𑀁𑀔𑀺𑀢𑁆𑀢𑁂𑀦 𑀪𑀸𑀲𑀺𑀢𑀲𑁆𑀲 𑀓𑀣𑀁 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄’’𑀢𑀺?

‘‘𑀦 𑀔𑁄 𑀧𑀦𑁂𑀢𑀁, 𑀆𑀯𑀼𑀲𑁄, 𑀪𑀕𑀯𑀢𑁄 𑀲𑀫𑁆𑀫𑀼𑀔𑀸 𑀲𑀼𑀢𑀁 𑀲𑀫𑁆𑀫𑀼𑀔𑀸 𑀧𑀝𑀺𑀕𑁆𑀕𑀳𑀺𑀢𑀁, 𑀦𑀧𑀺 𑀫𑀦𑁄𑀪𑀸𑀯𑀦𑀻𑀬𑀸𑀦𑀁 𑀪𑀺𑀓𑁆𑀔𑀽𑀦𑀁 𑀲𑀫𑁆𑀫𑀼𑀔𑀸 𑀲𑀼𑀢𑀁 𑀲𑀫𑁆𑀫𑀼𑀔𑀸 𑀧𑀝𑀺𑀕𑁆𑀕𑀳𑀺𑀢𑀁; 𑀅𑀧𑀺 𑀘, 𑀬𑀣𑀸 𑀫𑁂𑀢𑁆𑀣 𑀔𑀸𑀬𑀢𑀺 𑀢𑀁 𑀲𑀼𑀡𑀸𑀣, 𑀲𑀸𑀥𑀼𑀓𑀁 𑀫𑀦𑀲𑀺 𑀓𑀭𑁄𑀣, 𑀪𑀸𑀲𑀺𑀲𑁆𑀲𑀸𑀫𑀻’’𑀢𑀺. ‘‘𑀏𑀯𑀁, 𑀅𑀬𑁆𑀬𑁂’’𑀢𑀺, 𑀔𑁄 𑀓𑀚𑀗𑁆𑀕𑀮𑀓𑀸 𑀉𑀧𑀸𑀲𑀓𑀸 𑀓𑀚𑀗𑁆𑀕𑀮𑀺𑀓𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀧𑀘𑁆𑀘𑀲𑁆𑀲𑁄𑀲𑀼𑀁. 𑀓𑀚𑀗𑁆𑀕𑀮𑀺𑀓𑀸 𑀪𑀺𑀓𑁆𑀔𑀼𑀦𑀻 𑀏𑀢𑀤𑀯𑁄𑀘 𑁋

‘‘‘𑀏𑀓𑁄 𑀧𑀜𑁆𑀳𑁄 𑀏𑀓𑁄 𑀉𑀤𑁆𑀤𑁂𑀲𑁄 𑀏𑀓𑀁 𑀯𑁂𑀬𑁆𑀬𑀸𑀓𑀭𑀡’𑀦𑁆𑀢𑀺, 𑀇𑀢𑀺 𑀔𑁄 𑀧𑀦𑁂𑀢𑀁 𑀯𑀼𑀢𑁆𑀢𑀁 𑀪𑀕𑀯𑀢𑀸. 𑀓𑀺𑀜𑁆𑀘𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁? 𑀏𑀓𑀥𑀫𑁆𑀫𑁂, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀲𑀫𑁆𑀫𑀸 𑀦𑀺𑀩𑁆𑀩𑀺𑀦𑁆𑀤𑀫𑀸𑀦𑁄 𑀲𑀫𑁆𑀫𑀸 𑀯𑀺𑀭𑀚𑁆𑀚𑀫𑀸𑀦𑁄 𑀲𑀫𑁆𑀫𑀸 𑀯𑀺𑀫𑀼𑀘𑁆𑀘𑀫𑀸𑀦𑁄 𑀲𑀫𑁆𑀫𑀸 𑀧𑀭𑀺𑀬𑀦𑁆𑀢𑀤𑀲𑁆𑀲𑀸𑀯𑀻 𑀲𑀫𑁆𑀫𑀤𑀢𑁆𑀣𑀁 𑀅𑀪𑀺𑀲𑀫𑁂𑀘𑁆𑀘 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀤𑀼𑀓𑁆𑀔𑀲𑁆𑀲𑀦𑁆𑀢𑀓𑀭𑁄 𑀳𑁄𑀢𑀺. 𑀓𑀢𑀫𑀲𑁆𑀫𑀺𑀁 𑀏𑀓𑀥𑀫𑁆𑀫𑁂? 𑀲𑀩𑁆𑀩𑁂 𑀲𑀢𑁆𑀢𑀸 𑀆𑀳𑀸𑀭𑀝𑁆𑀞𑀺𑀢𑀺𑀓𑀸 𑁋 𑀇𑀫𑀲𑁆𑀫𑀺𑀁 𑀔𑁄, 𑀆𑀯𑀼𑀲𑁄, 𑀏𑀓𑀥𑀫𑁆𑀫𑁂 𑀪𑀺𑀓𑁆𑀔𑀼 𑀲𑀫𑁆𑀫𑀸 𑀦𑀺𑀩𑁆𑀩𑀺𑀦𑁆𑀤𑀫𑀸𑀦𑁄 𑀲𑀫𑁆𑀫𑀸 𑀯𑀺𑀭𑀚𑁆𑀚𑀫𑀸𑀦𑁄 𑀲𑀫𑁆𑀫𑀸 𑀯𑀺𑀫𑀼𑀘𑁆𑀘𑀫𑀸𑀦𑁄 𑀲𑀫𑁆𑀫𑀸 𑀧𑀭𑀺𑀬𑀦𑁆𑀢𑀤𑀲𑁆𑀲𑀸𑀯𑀻 𑀲𑀫𑁆𑀫𑀤𑀢𑁆𑀣𑀁 𑀅𑀪𑀺𑀲𑀫𑁂𑀘𑁆𑀘 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀤𑀼𑀓𑁆𑀔𑀲𑁆𑀲𑀦𑁆𑀢𑀓𑀭𑁄 𑀳𑁄𑀢𑀺. ‘𑀏𑀓𑁄 𑀧𑀜𑁆𑀳𑁄 𑀏𑀓𑁄 𑀉𑀤𑁆𑀤𑁂𑀲𑁄 𑀏𑀓𑀁 𑀯𑁂𑀬𑁆𑀬𑀸𑀓𑀭𑀡𑀦𑁆𑀢𑀺, 𑀇𑀢𑀺 𑀬𑀁 𑀢𑀁 𑀯𑀼𑀢𑁆𑀢𑀁 𑀪𑀕𑀯𑀢𑀸 𑀇𑀤𑀫𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁.

‘‘‘𑀤𑁆𑀯𑁂 𑀧𑀜𑁆𑀳𑀸 𑀤𑁆𑀯𑁂 𑀉𑀤𑁆𑀤𑁂𑀲𑀸 𑀤𑁆𑀯𑁂 𑀯𑁂𑀬𑁆𑀬𑀸𑀓𑀭𑀡𑀸𑀦𑀻’𑀢𑀺 𑀇𑀢𑀺, 𑀔𑁄 𑀧𑀦𑁂𑀢𑀁 𑀯𑀼𑀢𑁆𑀢𑀁 𑀪𑀕𑀯𑀢𑀸. 𑀓𑀺𑀜𑁆𑀘𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁? 𑀤𑁆𑀯𑀻𑀲𑀼, 𑀆𑀯𑀼𑀲𑁄, 𑀥𑀫𑁆𑀫𑁂𑀲𑀼 𑀪𑀺𑀓𑁆𑀔𑀼 𑀲𑀫𑁆𑀫𑀸 𑀦𑀺𑀩𑁆𑀩𑀺𑀦𑁆𑀤𑀫𑀸𑀦𑁄 𑀲𑀫𑁆𑀫𑀸 𑀯𑀺𑀭𑀚𑁆𑀚𑀫𑀸𑀦𑁄 𑀲𑀫𑁆𑀫𑀸 𑀯𑀺𑀫𑀼𑀘𑁆𑀘𑀫𑀸𑀦𑁄 𑀲𑀫𑁆𑀫𑀸 𑀧𑀭𑀺𑀬𑀦𑁆𑀢𑀤𑀲𑁆𑀲𑀸𑀯𑀻 𑀲𑀫𑁆𑀫𑀤𑀢𑁆𑀣𑀁 𑀅𑀪𑀺𑀲𑀫𑁂𑀘𑁆𑀘 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀤𑀼𑀓𑁆𑀔𑀲𑁆𑀲𑀦𑁆𑀢𑀓𑀭𑁄 𑀳𑁄𑀢𑀺. 𑀓𑀢𑀫𑁂𑀲𑀼 𑀤𑁆𑀯𑀻𑀲𑀼? 𑀦𑀸𑀫𑁂 𑀘 𑀭𑀽𑀧𑁂 𑀘…𑀧𑁂… 𑀓𑀢𑀫𑁂𑀲𑀼 𑀢𑀻𑀲𑀼? 𑀢𑀻𑀲𑀼 𑀯𑁂𑀤𑀦𑀸𑀲𑀼 𑁋 𑀇𑀫𑁂𑀲𑀼 𑀔𑁄, 𑀆𑀯𑀼𑀲𑁄, 𑀢𑀻𑀲𑀼 𑀥𑀫𑁆𑀫𑁂𑀲𑀼 𑀪𑀺𑀓𑁆𑀔𑀼 𑀲𑀫𑁆𑀫𑀸 𑀦𑀺𑀩𑁆𑀩𑀺𑀦𑁆𑀤𑀫𑀸𑀦𑁄 𑀲𑀫𑁆𑀫𑀸 𑀯𑀺𑀭𑀚𑁆𑀚𑀫𑀸𑀦𑁄 𑀲𑀫𑁆𑀫𑀸 𑀯𑀺𑀫𑀼𑀘𑁆𑀘𑀫𑀸𑀦𑁄 𑀲𑀫𑁆𑀫𑀸 𑀧𑀭𑀺𑀬𑀦𑁆𑀢𑀤𑀲𑁆𑀲𑀸𑀯𑀻 𑀲𑀫𑁆𑀫𑀤𑀢𑁆𑀣𑀁 𑀅𑀪𑀺𑀲𑀫𑁂𑀘𑁆𑀘 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀤𑀼𑀓𑁆𑀔𑀲𑁆𑀲𑀦𑁆𑀢𑀓𑀭𑁄 𑀳𑁄𑀢𑀺. ‘𑀢𑀬𑁄 𑀧𑀜𑁆𑀳𑀸 𑀢𑀬𑁄 𑀉𑀤𑁆𑀤𑁂𑀲𑀸 𑀢𑀻𑀡𑀺 𑀯𑁂𑀬𑁆𑀬𑀸𑀓𑀭𑀡𑀸𑀦𑀻’𑀢𑀺, 𑀇𑀢𑀺 𑀬𑀁 𑀢𑀁 𑀯𑀼𑀢𑁆𑀢𑀁 𑀪𑀕𑀯𑀢𑀸 𑀇𑀤𑀫𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁.

‘‘‘𑀘𑀢𑁆𑀢𑀸𑀭𑁄 𑀧𑀜𑁆𑀳𑀸 𑀘𑀢𑁆𑀢𑀸𑀭𑁄 𑀉𑀤𑁆𑀤𑁂𑀲𑀸 𑀘𑀢𑁆𑀢𑀸𑀭𑀺 𑀯𑁂𑀬𑁆𑀬𑀸𑀓𑀭𑀡𑀸𑀦𑀻’𑀢𑀺, 𑀇𑀢𑀺 𑀔𑁄 𑀧𑀦𑁂𑀢𑀁 𑀯𑀼𑀢𑁆𑀢𑀁 𑀪𑀕𑀯𑀢𑀸. 𑀓𑀺𑀜𑁆𑀘𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁? 𑀘𑀢𑀽𑀲𑀼, 𑀆𑀯𑀼𑀲𑁄, 𑀥𑀫𑁆𑀫𑁂𑀲𑀼 𑀪𑀺𑀓𑁆𑀔𑀼 𑀲𑀫𑁆𑀫𑀸 𑀲𑀼𑀪𑀸𑀯𑀺𑀢𑀘𑀺𑀢𑁆𑀢𑁄 𑀲𑀫𑁆𑀫𑀸 𑀧𑀭𑀺𑀬𑀦𑁆𑀢𑀤𑀲𑁆𑀲𑀸𑀯𑀻 𑀲𑀫𑁆𑀫𑀤𑀢𑁆𑀣𑀁 𑀅𑀪𑀺𑀲𑀫𑁂𑀘𑁆𑀘 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀤𑀼𑀓𑁆𑀔𑀲𑁆𑀲𑀦𑁆𑀢𑀓𑀭𑁄 𑀳𑁄𑀢𑀺. 𑀓𑀢𑀫𑁂𑀲𑀼 𑀘𑀢𑀽𑀲𑀼? 𑀘𑀢𑀽𑀲𑀼 𑀲𑀢𑀺𑀧𑀝𑁆𑀞𑀸𑀦𑁂𑀲𑀼 𑁋 𑀇𑀫𑁂𑀲𑀼 𑀔𑁄, 𑀆𑀯𑀼𑀲𑁄, 𑀘𑀢𑀽𑀲𑀼 𑀥𑀫𑁆𑀫𑁂𑀲𑀼 𑀪𑀺𑀓𑁆𑀔𑀼 𑀲𑀫𑁆𑀫𑀸 𑀲𑀼𑀪𑀸𑀯𑀺𑀢𑀘𑀺𑀢𑁆𑀢𑁄 𑀲𑀫𑁆𑀫𑀸 𑀧𑀭𑀺𑀬𑀦𑁆𑀢𑀤𑀲𑁆𑀲𑀸𑀯𑀻 𑀲𑀫𑁆𑀫𑀤𑀢𑁆𑀣𑀁 𑀅𑀪𑀺𑀲𑀫𑁂𑀘𑁆𑀘 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀤𑀼𑀓𑁆𑀔𑀲𑁆𑀲𑀦𑁆𑀢𑀓𑀭𑁄 𑀳𑁄𑀢𑀺. ‘𑀘𑀢𑁆𑀢𑀸𑀭𑁄 𑀧𑀜𑁆𑀳𑀸 𑀘𑀢𑁆𑀢𑀸𑀭𑁄 𑀉𑀤𑁆𑀤𑁂𑀲𑀸 𑀘𑀢𑁆𑀢𑀸𑀭𑀺 𑀯𑁂𑀬𑁆𑀬𑀸𑀓𑀭𑀡𑀸𑀦𑀻’𑀢𑀺, 𑀇𑀢𑀺 𑀬𑀁 𑀢𑀁 𑀯𑀼𑀢𑁆𑀢𑀁 𑀪𑀕𑀯𑀢𑀸 𑀇𑀤𑀫𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁.

‘‘‘𑀧𑀜𑁆𑀘 𑀧𑀜𑁆𑀳𑀸 𑀧𑀜𑁆𑀘𑀼𑀤𑁆𑀤𑁂𑀲𑀸 𑀧𑀜𑁆𑀘 𑀯𑁂𑀬𑁆𑀬𑀸𑀓𑀭𑀡𑀸𑀦𑀻’𑀢𑀺, 𑀇𑀢𑀺 𑀔𑁄 𑀧𑀦𑁂𑀢𑀁 𑀯𑀼𑀢𑁆𑀢𑀁 𑀪𑀕𑀯𑀢𑀸. 𑀓𑀺𑀜𑁆𑀘𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁? 𑀧𑀜𑁆𑀘𑀲𑀼, 𑀆𑀯𑀼𑀲𑁄, 𑀥𑀫𑁆𑀫𑁂𑀲𑀼 𑀪𑀺𑀓𑁆𑀔𑀼 𑀲𑀫𑁆𑀫𑀸 𑀲𑀼𑀪𑀸𑀯𑀺𑀢𑀘𑀺𑀢𑁆𑀢𑁄 𑀲𑀫𑁆𑀫𑀸 𑀧𑀭𑀺𑀬𑀦𑁆𑀢𑀤𑀲𑁆𑀲𑀸𑀯𑀻 𑀲𑀫𑁆𑀫𑀤𑀢𑁆𑀣𑀁 𑀅𑀪𑀺𑀲𑀫𑁂𑀘𑁆𑀘 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀤𑀼𑀓𑁆𑀔𑀲𑁆𑀲𑀦𑁆𑀢𑀓𑀭𑁄 𑀳𑁄𑀢𑀺. 𑀓𑀢𑀫𑁂𑀲𑀼 𑀧𑀜𑁆𑀘𑀲𑀼? 𑀧𑀜𑁆𑀘𑀲𑀼 𑀇𑀦𑁆𑀤𑁆𑀭𑀺𑀬𑁂𑀲𑀼…𑀧𑁂… 𑀓𑀢𑀫𑁂𑀲𑀼 𑀙𑀲𑀼? 𑀙𑀲𑀼 𑀦𑀺𑀲𑁆𑀲𑀭𑀡𑀻𑀬𑀸𑀲𑀼 𑀥𑀸𑀢𑀽𑀲𑀼…𑀧𑁂… 𑀓𑀢𑀫𑁂𑀲𑀼 𑀲𑀢𑁆𑀢𑀲𑀼? 𑀲𑀢𑁆𑀢𑀲𑀼 𑀩𑁄𑀚𑁆𑀛𑀗𑁆𑀕𑁂𑀲𑀼…𑀧𑁂… 𑀓𑀢𑀫𑁂𑀲𑀼 𑀅𑀝𑁆𑀞𑀲𑀼? 𑀅𑀝𑁆𑀞𑀲𑀼 𑀅𑀭𑀺𑀬𑀅𑀝𑁆𑀞𑀗𑁆𑀕𑀺𑀓𑀫𑀕𑁆𑀕𑁂𑀲𑀼 𑁋 𑀇𑀫𑁂𑀲𑀼 𑀔𑁄, 𑀆𑀯𑀼𑀲𑁄, 𑀅𑀝𑁆𑀞𑀲𑀼 𑀥𑀫𑁆𑀫𑁂𑀲𑀼 𑀪𑀺𑀓𑁆𑀔𑀼 𑀲𑀫𑁆𑀫𑀸 𑀲𑀼𑀪𑀸𑀯𑀺𑀢𑀘𑀺𑀢𑁆𑀢𑁄 𑀲𑀫𑁆𑀫𑀸 𑀧𑀭𑀺𑀬𑀦𑁆𑀢𑀤𑀲𑁆𑀲𑀸𑀯𑀻 𑀲𑀫𑁆𑀫𑀤𑀢𑁆𑀣𑀁 𑀅𑀪𑀺𑀲𑀫𑁂𑀘𑁆𑀘 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀤𑀼𑀓𑁆𑀔𑀲𑁆𑀲𑀦𑁆𑀢𑀓𑀭𑁄 𑀳𑁄𑀢𑀺. ‘𑀅𑀝𑁆𑀞 𑀧𑀜𑁆𑀳𑀸 𑀅𑀝𑁆𑀞𑀼𑀤𑁆𑀤𑁂𑀲𑀸 𑀅𑀝𑁆𑀞 𑀯𑁂𑀬𑁆𑀬𑀸𑀓𑀭𑀡𑀸𑀦𑀻’𑀢𑀺, 𑀇𑀢𑀺 𑀬𑀁 𑀢𑀁 𑀯𑀼𑀢𑁆𑀢𑀁 𑀪𑀕𑀯𑀢𑀸 𑀇𑀤𑀫𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁.

‘‘‘𑀦𑀯 𑀧𑀜𑁆𑀳𑀸 𑀦𑀯𑀼𑀤𑁆𑀤𑁂𑀲𑀸 𑀦𑀯 𑀯𑁂𑀬𑁆𑀬𑀸𑀓𑀭𑀡𑀸𑀦𑀻’𑀢𑀺, 𑀇𑀢𑀺 𑀔𑁄 𑀧𑀦𑁂𑀢𑀁 𑀯𑀼𑀢𑁆𑀢𑀁 𑀪𑀕𑀯𑀢𑀸. 𑀓𑀺𑀜𑁆𑀘𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁? 𑀦𑀯𑀲𑀼, 𑀆𑀯𑀼𑀲𑁄, 𑀥𑀫𑁆𑀫𑁂𑀲𑀼 𑀪𑀺𑀓𑁆𑀔𑀼 𑀲𑀫𑁆𑀫𑀸 𑀦𑀺𑀩𑁆𑀩𑀺𑀦𑁆𑀤𑀫𑀸𑀦𑁄 𑀲𑀫𑁆𑀫𑀸 𑀯𑀺𑀭𑀚𑁆𑀚𑀫𑀸𑀦𑁄 𑀲𑀫𑁆𑀫𑀸 𑀯𑀺𑀫𑀼𑀘𑁆𑀘𑀫𑀸𑀦𑁄 𑀲𑀫𑁆𑀫𑀸 𑀧𑀭𑀺𑀬𑀦𑁆𑀢𑀤𑀲𑁆𑀲𑀸𑀯𑀻 𑀲𑀫𑁆𑀫𑀤𑀢𑁆𑀣𑀁 𑀅𑀪𑀺𑀲𑀫𑁂𑀘𑁆𑀘 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀤𑀼𑀓𑁆𑀔𑀲𑁆𑀲𑀦𑁆𑀢𑀓𑀭𑁄 𑀳𑁄𑀢𑀺. 𑀓𑀢𑀫𑁂𑀲𑀼 𑀦𑀯𑀲𑀼? 𑀦𑀯𑀲𑀼 𑀲𑀢𑁆𑀢𑀸𑀯𑀸𑀲𑁂𑀲𑀼 𑁋 𑀇𑀫𑁂𑀲𑀼 𑀔𑁄, 𑀆𑀯𑀼𑀲𑁄, 𑀦𑀯𑀲𑀼 𑀥𑀫𑁆𑀫𑁂𑀲𑀼 𑀪𑀺𑀓𑁆𑀔𑀼 𑀲𑀫𑁆𑀫𑀸 𑀦𑀺𑀩𑁆𑀩𑀺𑀦𑁆𑀤𑀫𑀸𑀦𑁄 𑀲𑀫𑁆𑀫𑀸 𑀯𑀺𑀭𑀚𑁆𑀚𑀫𑀸𑀦𑁄 𑀲𑀫𑁆𑀫𑀸 𑀯𑀺𑀫𑀼𑀘𑁆𑀘𑀫𑀸𑀦𑁄 𑀲𑀫𑁆𑀫𑀸 𑀧𑀭𑀺𑀬𑀦𑁆𑀢𑀤𑀲𑁆𑀲𑀸𑀯𑀻 𑀲𑀫𑁆𑀫𑀤𑀢𑁆𑀣𑀁 𑀅𑀪𑀺𑀲𑀫𑁂𑀘𑁆𑀘 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀤𑀼𑀓𑁆𑀔𑀲𑁆𑀲𑀦𑁆𑀢𑀓𑀭𑁄 𑀳𑁄𑀢𑀺. ‘𑀦𑀯 𑀧𑀜𑁆𑀳𑀸 𑀦𑀯𑀼𑀤𑁆𑀤𑁂𑀲𑀸 𑀦𑀯 𑀯𑁂𑀬𑁆𑀬𑀸𑀓𑀭𑀡𑀸𑀦𑀻’𑀢𑀺, 𑀇𑀢𑀺 𑀬𑀁 𑀢𑀁 𑀯𑀼𑀢𑁆𑀢𑀁 𑀪𑀕𑀯𑀢𑀸 𑀇𑀤𑀫𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁.

‘‘‘𑀤𑀲 𑀧𑀜𑁆𑀳𑀸 𑀤𑀲𑀼𑀤𑁆𑀤𑁂𑀲𑀸 𑀤𑀲 𑀯𑁂𑀬𑁆𑀬𑀸𑀓𑀭𑀡𑀸𑀦𑀻’𑀢𑀺, 𑀇𑀢𑀺 𑀔𑁄 𑀧𑀦𑁂𑀢𑀁 𑀯𑀼𑀢𑁆𑀢𑀁 𑀪𑀕𑀯𑀢𑀸. 𑀓𑀺𑀜𑁆𑀘𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁? 𑀤𑀲𑀲𑀼, 𑀆𑀯𑀼𑀲𑁄, 𑀥𑀫𑁆𑀫𑁂𑀲𑀼 𑀪𑀺𑀓𑁆𑀔𑀼 𑀲𑀫𑁆𑀫𑀸 𑀲𑀼𑀪𑀸𑀯𑀺𑀢𑀘𑀺𑀢𑁆𑀢𑁄 𑀲𑀫𑁆𑀫𑀸 𑀧𑀭𑀺𑀬𑀦𑁆𑀢𑀤𑀲𑁆𑀲𑀸𑀯𑀻 𑀲𑀫𑁆𑀫𑀤𑀢𑁆𑀣𑀁 𑀅𑀪𑀺𑀲𑀫𑁂𑀘𑁆𑀘 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀤𑀼𑀓𑁆𑀔𑀲𑁆𑀲𑀦𑁆𑀢𑀓𑀭𑁄 𑀳𑁄𑀢𑀺. 𑀓𑀢𑀫𑁂𑀲𑀼 𑀤𑀲𑀲𑀼? 𑀤𑀲𑀲𑀼 𑀓𑀼𑀲𑀮𑁂𑀲𑀼 𑀓𑀫𑁆𑀫𑀧𑀣𑁂𑀲𑀼 𑁋 𑀇𑀫𑁂𑀲𑀼 𑀔𑁄, 𑀆𑀯𑀼𑀲𑁄, 𑀤𑀲𑀲𑀼 𑀥𑀫𑁆𑀫𑁂𑀲𑀼 𑀪𑀺𑀓𑁆𑀔𑀼 𑀲𑀫𑁆𑀫𑀸 𑀲𑀼𑀪𑀸𑀯𑀺𑀢𑀘𑀺𑀢𑁆𑀢𑁄 𑀲𑀫𑁆𑀫𑀸 𑀧𑀭𑀺𑀬𑀦𑁆𑀢𑀤𑀲𑁆𑀲𑀸𑀯𑀻 𑀲𑀫𑁆𑀫𑀤𑀢𑁆𑀣𑀁 𑀅𑀪𑀺𑀲𑀫𑁂𑀘𑁆𑀘 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀤𑀼𑀓𑁆𑀔𑀲𑁆𑀲𑀦𑁆𑀢𑀓𑀭𑁄 𑀳𑁄𑀢𑀺. ‘𑀤𑀲 𑀧𑀜𑁆𑀳𑀸 𑀤𑀲𑀼𑀤𑁆𑀤𑁂𑀲𑀸 𑀤𑀲 𑀯𑁂𑀬𑁆𑀬𑀸𑀓𑀭𑀡𑀸𑀦𑀻’𑀢𑀺, 𑀇𑀢𑀺 𑀬𑀁 𑀢𑀁 𑀯𑀼𑀢𑁆𑀢𑀁 𑀪𑀕𑀯𑀢𑀸 𑀇𑀤𑀫𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁.

‘‘𑀇𑀢𑀺 𑀔𑁄, 𑀆𑀯𑀼𑀲𑁄, 𑀬𑀁 𑀢𑀁 𑀯𑀼𑀢𑁆𑀢𑀁 𑀪𑀕𑀯𑀢𑀸 𑀲𑀁𑀔𑀺𑀢𑁆𑀢𑁂𑀦 𑀪𑀸𑀲𑀺𑀢𑀸𑀲𑀼 𑀫𑀳𑀸𑀧𑀜𑁆𑀳𑀸𑀲𑀼 𑁋 ‘𑀏𑀓𑁄 𑀧𑀜𑁆𑀳𑁄 𑀏𑀓𑁄 𑀉𑀤𑁆𑀤𑁂𑀲𑁄 𑀏𑀓𑀁 𑀯𑁂𑀬𑁆𑀬𑀸𑀓𑀭𑀡𑀁…𑀧𑁂… 𑀤𑀲 𑀧𑀜𑁆𑀳𑀸 𑀤𑀲𑀼𑀤𑁆𑀤𑁂𑀲𑀸 𑀤𑀲 𑀯𑁂𑀬𑁆𑀬𑀸𑀓𑀭𑀡𑀸𑀦𑀻’𑀢𑀺, 𑀇𑀫𑀲𑁆𑀲 𑀔𑁄 𑀅𑀳𑀁, 𑀆𑀯𑀼𑀲𑁄, 𑀪𑀕𑀯𑀢𑀸 𑀲𑀁𑀔𑀺𑀢𑁆𑀢𑁂𑀦 𑀪𑀸𑀲𑀺𑀢𑀲𑁆𑀲 𑀏𑀯𑀁 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑀁 𑀆𑀚𑀸𑀦𑀸𑀫𑀺. 𑀆𑀓𑀗𑁆𑀔𑀫𑀸𑀦𑀸 𑀘 𑀧𑀦 𑀢𑀼𑀫𑁆𑀳𑁂, 𑀆𑀯𑀼𑀲𑁄, 𑀪𑀕𑀯𑀦𑁆𑀢𑀜𑁆𑀜𑁂𑀯 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀢𑀫𑀢𑁆𑀣𑀁 𑀧𑀝𑀺𑀧𑀼𑀘𑁆𑀙𑁂𑀬𑁆𑀬𑀸𑀣. 𑀬𑀣𑀸 𑀯𑁄 [𑀬𑀣𑀸 𑀔𑁄 (𑀓.), 𑀬𑀣𑀸 𑀦𑁄 (𑀩𑀳𑀽𑀲𑀼) 𑀅. 𑀦𑀺. 𑁧𑁦.𑁧𑁧𑁫, 𑁧𑁭𑁨 𑀧𑀦 𑀧𑀸𑀞𑀪𑁂𑀤𑁄 𑀦𑀢𑁆𑀣𑀺] 𑀪𑀕𑀯𑀸 𑀩𑁆𑀬𑀸𑀓𑀭𑁄𑀢𑀺 𑀢𑀣𑀸 𑀦𑀁 𑀥𑀸𑀭𑁂𑀬𑁆𑀬𑀸𑀣𑀸’’𑀢𑀺. ‘‘𑀏𑀯𑀁, 𑀅𑀬𑁆𑀬𑁂’’𑀢𑀺 𑀔𑁄 𑀓𑀚𑀗𑁆𑀕𑀮𑀓𑀸 𑀉𑀧𑀸𑀲𑀓𑀸 𑀓𑀚𑀗𑁆𑀕𑀮𑀺𑀓𑀸𑀬 𑀔𑁄 𑀪𑀺𑀓𑁆𑀔𑀼𑀦𑀺𑀬𑀸 𑀪𑀸𑀲𑀺𑀢𑀁 𑀅𑀪𑀺𑀦𑀦𑁆𑀤𑀺𑀢𑁆𑀯𑀸 𑀅𑀦𑀼𑀫𑁄𑀤𑀺𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀓𑀚𑀗𑁆𑀕𑀮𑀺𑀓𑀁 𑀪𑀺𑀓𑁆𑀔𑀼𑀦𑀺𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀸 𑀔𑁄 𑀓𑀚𑀗𑁆𑀕𑀮𑀓𑀸 𑀉𑀧𑀸𑀲𑀓𑀸 𑀬𑀸𑀯𑀢𑀓𑁄 𑀅𑀳𑁄𑀲𑀺 𑀓𑀚𑀗𑁆𑀕𑀮𑀺𑀓𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀲𑀤𑁆𑀥𑀺𑀁 𑀓𑀣𑀸𑀲𑀮𑁆𑀮𑀸𑀧𑁄, 𑀢𑀁 𑀲𑀩𑁆𑀩𑀁 𑀪𑀕𑀯𑀢𑁄 𑀆𑀭𑁄𑀘𑁂𑀲𑀼𑀁.

‘‘𑀲𑀸𑀥𑀼 𑀲𑀸𑀥𑀼, 𑀕𑀳𑀧𑀢𑀬𑁄! 𑀧𑀡𑁆𑀟𑀺𑀢𑀸, 𑀕𑀳𑀧𑀢𑀬𑁄, 𑀓𑀚𑀗𑁆𑀕𑀮𑀺𑀓𑀸 𑀪𑀺𑀓𑁆𑀔𑀼𑀦𑀻. 𑀫𑀳𑀸𑀧𑀜𑁆𑀜𑀸, 𑀕𑀳𑀧𑀢𑀬𑁄, 𑀓𑀚𑀗𑁆𑀕𑀮𑀺𑀓𑀸 𑀪𑀺𑀓𑁆𑀔𑀼𑀦𑀻. 𑀫𑀜𑁆𑀘𑁂𑀧𑀺 𑀢𑀼𑀫𑁆𑀳𑁂, 𑀕𑀳𑀧𑀢𑀬𑁄, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀢𑀫𑀢𑁆𑀣𑀁 𑀧𑀝𑀺𑀧𑀼𑀘𑁆𑀙𑁂𑀬𑁆𑀬𑀸𑀣, 𑀅𑀳𑀫𑁆𑀧𑀺 𑀘𑁂𑀢𑀁 𑀏𑀯𑀫𑁂𑀯𑀁 [𑀏𑀯𑀫𑁂𑀯 (𑀓.) 𑀫. 𑀦𑀺. 𑁧.𑁨𑁦𑁫 𑀧𑀲𑁆𑀲𑀺𑀢𑀩𑁆𑀩𑀁] 𑀩𑁆𑀬𑀸𑀓𑀭𑁂𑀬𑁆𑀬𑀁 𑀬𑀣𑀸 𑀢𑀁 𑀓𑀚𑀗𑁆𑀕𑀮𑀺𑀓𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀩𑁆𑀬𑀸𑀓𑀢𑀁. 𑀏𑀲𑁄 𑀘𑁂𑀯 𑀢𑀲𑁆𑀲 [𑀏𑀲𑁄 𑀘𑁂𑀯𑁂𑀢𑀲𑁆𑀲 (𑀫. 𑀦𑀺. 𑁧.𑁨𑁦𑁫)] 𑀅𑀢𑁆𑀣𑁄. 𑀏𑀯𑀜𑁆𑀘 𑀦𑀁 𑀥𑀸𑀭𑁂𑀬𑁆𑀬𑀸𑀣𑀸’’𑀢𑀺. 𑀅𑀝𑁆𑀞𑀫𑀁.

𑁯. 𑀧𑀞𑀫𑀓𑁄𑀲𑀮𑀲𑀼𑀢𑁆𑀢𑀁

𑁨𑁯. ‘‘𑀬𑀸𑀯𑀢𑀸, 𑀪𑀺𑀓𑁆𑀔𑀯𑁂, 𑀓𑀸𑀲𑀺𑀓𑁄𑀲𑀮𑀸, 𑀬𑀸𑀯𑀢𑀸 𑀭𑀜𑁆𑀜𑁄 𑀧𑀲𑁂𑀦𑀤𑀺𑀲𑁆𑀲 𑀓𑁄𑀲𑀮𑀲𑁆𑀲 𑀯𑀺𑀚𑀺𑀢𑀁 [𑀯𑀺𑀚𑀺𑀢𑁂 (𑀲𑀻. 𑀓.)], 𑀭𑀸𑀚𑀸 𑀢𑀢𑁆𑀣 𑀧𑀲𑁂𑀦𑀤𑀺 𑀓𑁄𑀲𑀮𑁄 𑀅𑀕𑁆𑀕𑀫𑀓𑁆𑀔𑀸𑀬𑀢𑀺. 𑀭𑀜𑁆𑀜𑁄𑀧𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀲𑁂𑀦𑀤𑀺𑀲𑁆𑀲 𑀓𑁄𑀲𑀮𑀲𑁆𑀲 𑀅𑀢𑁆𑀣𑁂𑀯 𑀅𑀜𑁆𑀜𑀣𑀢𑁆𑀢𑀁 𑀅𑀢𑁆𑀣𑀺 𑀯𑀺𑀧𑀭𑀺𑀡𑀸𑀫𑁄. 𑀏𑀯𑀁 𑀧𑀲𑁆𑀲𑀁, 𑀪𑀺𑀓𑁆𑀔𑀯𑁂, 𑀲𑀼𑀢𑀯𑀸 𑀅𑀭𑀺𑀬𑀲𑀸𑀯𑀓𑁄 𑀢𑀲𑁆𑀫𑀺𑀫𑁆𑀧𑀺 𑀦𑀺𑀩𑁆𑀩𑀺𑀦𑁆𑀤𑀢𑀺. 𑀢𑀲𑁆𑀫𑀺𑀁 𑀦𑀺𑀩𑁆𑀩𑀺𑀦𑁆𑀤𑀦𑁆𑀢𑁄 𑀅𑀕𑁆𑀕𑁂 𑀯𑀺𑀭𑀚𑁆𑀚𑀢𑀺, 𑀧𑀕𑁂𑀯 𑀳𑀻𑀦𑀲𑁆𑀫𑀺𑀁.

‘‘𑀬𑀸𑀯𑀢𑀸, 𑀪𑀺𑀓𑁆𑀔𑀯𑁂, 𑀘𑀦𑁆𑀤𑀺𑀫𑀲𑀽𑀭𑀺𑀬𑀸 𑀧𑀭𑀺𑀳𑀭𑀦𑁆𑀢𑀺 𑀤𑀺𑀲𑀸 𑀪𑀦𑁆𑀢𑀺 𑀯𑀺𑀭𑁄𑀘𑀫𑀸𑀦𑀸, 𑀢𑀸𑀯 𑀲𑀳𑀲𑁆𑀲𑀥𑀸 𑀮𑁄𑀓𑁄. 𑀢𑀲𑁆𑀫𑀺𑀁 𑀲𑀳𑀲𑁆𑀲𑀥𑀸 𑀮𑁄𑀓𑁂 𑀲𑀳𑀲𑁆𑀲𑀁 𑀘𑀦𑁆𑀤𑀸𑀦𑀁 𑀲𑀳𑀲𑁆𑀲𑀁 𑀲𑀽𑀭𑀺𑀬𑀸𑀦𑀁 [𑀲𑀼𑀭𑀺𑀬𑀸𑀦𑀁 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀲𑀳𑀲𑁆𑀲𑀁 𑀲𑀺𑀦𑁂𑀭𑀼𑀧𑀩𑁆𑀩𑀢𑀭𑀸𑀚𑀸𑀦𑀁 𑀲𑀳𑀲𑁆𑀲𑀁 𑀚𑀫𑁆𑀩𑀼𑀤𑀻𑀧𑀸𑀦𑀁 𑀲𑀳𑀲𑁆𑀲𑀁 𑀅𑀧𑀭𑀕𑁄𑀬𑀸𑀦𑀸𑀦𑀁 𑀲𑀳𑀲𑁆𑀲𑀁 𑀉𑀢𑁆𑀢𑀭𑀓𑀼𑀭𑀽𑀦𑀁 𑀲𑀳𑀲𑁆𑀲𑀁 𑀧𑀼𑀩𑁆𑀩𑀯𑀺𑀤𑁂𑀳𑀸𑀦𑀁 𑀘𑀢𑁆𑀢𑀸𑀭𑀺 𑀫𑀳𑀸𑀲𑀫𑀼𑀤𑁆𑀤𑀲𑀳𑀲𑁆𑀲𑀸𑀦𑀺 𑀘𑀢𑁆𑀢𑀸𑀭𑀺 𑀫𑀳𑀸𑀭𑀸𑀚𑀲𑀳𑀲𑁆𑀲𑀸𑀦𑀺 𑀲𑀳𑀲𑁆𑀲𑀁 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸𑀦𑀁 𑀲𑀳𑀲𑁆𑀲𑀁 𑀢𑀸𑀯𑀢𑀺𑀁𑀲𑀸𑀦𑀁 𑀲𑀳𑀲𑁆𑀲𑀁 𑀬𑀸𑀫𑀸𑀦𑀁 𑀲𑀳𑀲𑁆𑀲𑀁 𑀢𑀼𑀲𑀺𑀢𑀸𑀦𑀁 𑀲𑀳𑀲𑁆𑀲𑀁 𑀦𑀺𑀫𑁆𑀫𑀸𑀦𑀭𑀢𑀻𑀦𑀁 𑀲𑀳𑀲𑁆𑀲𑀁 𑀧𑀭𑀦𑀺𑀫𑁆𑀫𑀺𑀢𑀯𑀲𑀯𑀢𑁆𑀢𑀻𑀦𑀁 𑀲𑀳𑀲𑁆𑀲𑀁 𑀩𑁆𑀭𑀳𑁆𑀫𑀮𑁄𑀓𑀸𑀦𑀁. 𑀬𑀸𑀯𑀢𑀸, 𑀪𑀺𑀓𑁆𑀔𑀯𑁂, 𑀲𑀳𑀲𑁆𑀲𑀻 𑀮𑁄𑀓𑀥𑀸𑀢𑀼, 𑀫𑀳𑀸𑀩𑁆𑀭𑀳𑁆𑀫𑀸 𑀢𑀢𑁆𑀣 𑀅𑀕𑁆𑀕𑀫𑀓𑁆𑀔𑀸𑀬𑀢𑀺. 𑀫𑀳𑀸𑀩𑁆𑀭𑀳𑁆𑀫𑀼𑀦𑁄𑀧𑀺 𑀔𑁄, 𑀪𑀺𑀓𑁆𑀔𑀯𑁂, 𑀅𑀢𑁆𑀣𑁂𑀯 𑀅𑀜𑁆𑀜𑀣𑀢𑁆𑀢𑀁 𑀅𑀢𑁆𑀣𑀺 𑀯𑀺𑀧𑀭𑀺𑀡𑀸𑀫𑁄. 𑀏𑀯𑀁 𑀧𑀲𑁆𑀲𑀁, 𑀪𑀺𑀓𑁆𑀔𑀯𑁂, 𑀲𑀼𑀢𑀯𑀸 𑀅𑀭𑀺𑀬𑀲𑀸𑀯𑀓𑁄 𑀢𑀲𑁆𑀫𑀺𑀫𑁆𑀧𑀺 𑀦𑀺𑀩𑁆𑀩𑀺𑀦𑁆𑀤𑀢𑀺. 𑀢𑀲𑁆𑀫𑀺𑀁 𑀦𑀺𑀩𑁆𑀩𑀺𑀦𑁆𑀤𑀦𑁆𑀢𑁄 𑀅𑀕𑁆𑀕𑁂 𑀯𑀺𑀭𑀚𑁆𑀚𑀢𑀺, 𑀧𑀕𑁂𑀯 𑀳𑀻𑀦𑀲𑁆𑀫𑀺𑀁.

‘‘𑀳𑁄𑀢𑀺 𑀲𑁄, 𑀪𑀺𑀓𑁆𑀔𑀯𑁂, 𑀲𑀫𑀬𑁄 𑀬𑀁 𑀅𑀬𑀁 𑀮𑁄𑀓𑁄 𑀲𑀁𑀯𑀝𑁆𑀝𑀢𑀺. 𑀲𑀁𑀯𑀝𑁆𑀝𑀫𑀸𑀦𑁂, 𑀪𑀺𑀓𑁆𑀔𑀯𑁂, 𑀮𑁄𑀓𑁂 𑀬𑁂𑀪𑀼𑀬𑁆𑀬𑁂𑀦 𑀲𑀢𑁆𑀢𑀸 𑀆𑀪𑀲𑁆𑀲𑀭𑀲𑀁𑀯𑀢𑁆𑀢𑀦𑀺𑀓𑀸 [𑀆𑀪𑀲𑁆𑀲𑀭𑀯𑀢𑁆𑀢𑀦𑀺𑀓𑀸 (𑀲𑀻. 𑀲𑁆𑀬𑀸.)] 𑀪𑀯𑀦𑁆𑀢𑀺. 𑀢𑁂 𑀢𑀢𑁆𑀣 𑀳𑁄𑀦𑁆𑀢𑀺 𑀫𑀦𑁄𑀫𑀬𑀸 𑀧𑀻𑀢𑀺𑀪𑀓𑁆𑀔𑀸 𑀲𑀬𑀁𑀧𑀪𑀸 𑀅𑀦𑁆𑀢𑀮𑀺𑀓𑁆𑀔𑁂𑀘𑀭𑀸 𑀲𑀼𑀪𑀝𑁆𑀞𑀸𑀬𑀺𑀦𑁄 𑀘𑀺𑀭𑀁 𑀤𑀻𑀖𑀫𑀤𑁆𑀥𑀸𑀦𑀁 𑀢𑀺𑀝𑁆𑀞𑀦𑁆𑀢𑀺. 𑀲𑀁𑀯𑀝𑁆𑀝𑀫𑀸𑀦𑁂, 𑀪𑀺𑀓𑁆𑀔𑀯𑁂, 𑀮𑁄𑀓𑁂 𑀆𑀪𑀲𑁆𑀲𑀭𑀸 𑀤𑁂𑀯𑀸 𑀅𑀕𑁆𑀕𑀫𑀓𑁆𑀔𑀸𑀬𑀦𑁆𑀢𑀺. 𑀆𑀪𑀲𑁆𑀲𑀭𑀸𑀦𑀫𑁆𑀧𑀺 𑀔𑁄, 𑀪𑀺𑀓𑁆𑀔𑀯𑁂, 𑀤𑁂𑀯𑀸𑀦𑀁 𑀅𑀢𑁆𑀣𑁂𑀯 𑀅𑀜𑁆𑀜𑀣𑀢𑁆𑀢𑀁 𑀅𑀢𑁆𑀣𑀺 𑀯𑀺𑀧𑀭𑀺𑀡𑀸𑀫𑁄. 𑀏𑀯𑀁 𑀧𑀲𑁆𑀲𑀁, 𑀪𑀺𑀓𑁆𑀔𑀯𑁂, 𑀲𑀼𑀢𑀯𑀸 𑀅𑀭𑀺𑀬𑀲𑀸𑀯𑀓𑁄 𑀢𑀲𑁆𑀫𑀺𑀫𑁆𑀧𑀺 𑀦𑀺𑀩𑁆𑀩𑀺𑀦𑁆𑀤𑀢𑀺. 𑀢𑀲𑁆𑀫𑀺𑀁 𑀦𑀺𑀩𑁆𑀩𑀺𑀦𑁆𑀤𑀦𑁆𑀢𑁄 𑀅𑀕𑁆𑀕𑁂 𑀯𑀺𑀭𑀚𑁆𑀚𑀢𑀺, 𑀧𑀕𑁂𑀯 𑀳𑀻𑀦𑀲𑁆𑀫𑀺𑀁.

[𑀅. 𑀦𑀺. 𑁧𑁦.𑁨𑁫] ‘‘𑀤𑀲𑀬𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀓𑀲𑀺𑀡𑀸𑀬𑀢𑀦𑀸𑀦𑀺. 𑀓𑀢𑀫𑀸𑀦𑀺 𑀤𑀲? 𑀧𑀣𑀯𑀻𑀓𑀲𑀺𑀡𑀫𑁂𑀓𑁄 𑀲𑀜𑁆𑀚𑀸𑀦𑀸𑀢𑀺 𑀉𑀤𑁆𑀥𑀁 𑀅𑀥𑁄 𑀢𑀺𑀭𑀺𑀬𑀁 𑀅𑀤𑁆𑀯𑀬𑀁 𑀅𑀧𑁆𑀧𑀫𑀸𑀡𑀁; 𑀆𑀧𑁄𑀓𑀲𑀺𑀡𑀫𑁂𑀓𑁄 𑀲𑀜𑁆𑀚𑀸𑀦𑀸𑀢𑀺…𑀧𑁂… 𑀢𑁂𑀚𑁄𑀓𑀲𑀺𑀡𑀫𑁂𑀓𑁄 𑀲𑀜𑁆𑀚𑀸𑀦𑀸𑀢𑀺… 𑀯𑀸𑀬𑁄𑀓𑀲𑀺𑀡𑀫𑁂𑀓𑁄 𑀲𑀜𑁆𑀚𑀸𑀦𑀸𑀢𑀺… 𑀦𑀻𑀮𑀓𑀲𑀺𑀡𑀫𑁂𑀓𑁄 𑀲𑀜𑁆𑀚𑀸𑀦𑀸𑀢𑀺… 𑀧𑀻𑀢𑀓𑀲𑀺𑀡𑀫𑁂𑀓𑁄 𑀲𑀜𑁆𑀚𑀸𑀦𑀸𑀢𑀺… 𑀮𑁄𑀳𑀺𑀢𑀓𑀲𑀺𑀡𑀫𑁂𑀓𑁄 𑀲𑀜𑁆𑀚𑀸𑀦𑀸𑀢𑀺… 𑀑𑀤𑀸𑀢𑀓𑀲𑀺𑀡𑀫𑁂𑀓𑁄 𑀲𑀜𑁆𑀚𑀸𑀦𑀸𑀢𑀺… 𑀆𑀓𑀸𑀲𑀓𑀲𑀺𑀡𑀫𑁂𑀓𑁄 𑀲𑀜𑁆𑀚𑀸𑀦𑀸𑀢𑀺… 𑀯𑀺𑀜𑁆𑀜𑀸𑀡𑀓𑀲𑀺𑀡𑀫𑁂𑀓𑁄 𑀲𑀜𑁆𑀚𑀸𑀦𑀸𑀢𑀺 𑀉𑀤𑁆𑀥𑀁 𑀅𑀥𑁄 𑀢𑀺𑀭𑀺𑀬𑀁 𑀅𑀤𑁆𑀯𑀬𑀁 𑀅𑀧𑁆𑀧𑀫𑀸𑀡𑀁. 𑀇𑀫𑀸𑀦𑀺 𑀔𑁄, 𑀪𑀺𑀓𑁆𑀔𑀯𑁂, 𑀤𑀲 𑀓𑀲𑀺𑀡𑀸𑀬𑀢𑀦𑀸𑀦𑀺.

‘‘𑀏𑀢𑀤𑀕𑁆𑀕𑀁, 𑀪𑀺𑀓𑁆𑀔𑀯𑁂, 𑀇𑀫𑁂𑀲𑀁 𑀤𑀲𑀦𑁆𑀦𑀁 𑀓𑀲𑀺𑀡𑀸𑀬𑀢𑀦𑀸𑀦𑀁 𑀬𑀤𑀺𑀤𑀁 𑀯𑀺𑀜𑁆𑀜𑀸𑀡𑀓𑀲𑀺𑀡𑀁 𑀏𑀓𑁄 𑀲𑀜𑁆𑀚𑀸𑀦𑀸𑀢𑀺 𑀉𑀤𑁆𑀥𑀁 𑀅𑀥𑁄 𑀢𑀺𑀭𑀺𑀬𑀁 𑀅𑀤𑁆𑀯𑀬𑀁 𑀅𑀧𑁆𑀧𑀫𑀸𑀡𑀁. 𑀏𑀯𑀁𑀲𑀜𑁆𑀜𑀺𑀦𑁄𑀧𑀺 𑀔𑁄, 𑀪𑀺𑀓𑁆𑀔𑀯𑁂, 𑀲𑀦𑁆𑀢𑀺 𑀲𑀢𑁆𑀢𑀸. 𑀏𑀯𑀁𑀲𑀜𑁆𑀜𑀻𑀦𑀫𑁆𑀧𑀺 𑀔𑁄, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀸𑀦𑀁 𑀅𑀢𑁆𑀣𑁂𑀯 𑀅𑀜𑁆𑀜𑀣𑀢𑁆𑀢𑀁 𑀅𑀢𑁆𑀣𑀺 𑀯𑀺𑀧𑀭𑀺𑀡𑀸𑀫𑁄. 𑀏𑀯𑀁 𑀧𑀲𑁆𑀲𑀁, 𑀪𑀺𑀓𑁆𑀔𑀯𑁂, 𑀲𑀼𑀢𑀯𑀸 𑀅𑀭𑀺𑀬𑀲𑀸𑀯𑀓𑁄 𑀢𑀲𑁆𑀫𑀺𑀫𑁆𑀧𑀺 𑀦𑀺𑀩𑁆𑀩𑀺𑀦𑁆𑀤𑀢𑀺. 𑀢𑀲𑁆𑀫𑀺𑀁 𑀦𑀺𑀩𑁆𑀩𑀺𑀦𑁆𑀤𑀦𑁆𑀢𑁄 𑀅𑀕𑁆𑀕𑁂 𑀯𑀺𑀭𑀚𑁆𑀚𑀢𑀺, 𑀧𑀕𑁂𑀯 𑀳𑀻𑀦𑀲𑁆𑀫𑀺𑀁.

[𑀤𑀻. 𑀦𑀺. 𑁩.𑁩𑁩𑁮, 𑁩𑁫𑁮; 𑀅. 𑀦𑀺. 𑁮.𑁬𑁪] ‘‘𑀅𑀝𑁆𑀞𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀅𑀪𑀺𑀪𑀸𑀬𑀢𑀦𑀸𑀦𑀺. 𑀓𑀢𑀫𑀸𑀦𑀺 𑀅𑀝𑁆𑀞? 𑀅𑀚𑁆𑀛𑀢𑁆𑀢𑀁 𑀭𑀽𑀧𑀲𑀜𑁆𑀜𑀻 𑀏𑀓𑁄 𑀩𑀳𑀺𑀤𑁆𑀥𑀸 𑀭𑀽𑀧𑀸𑀦𑀺 𑀧𑀲𑁆𑀲𑀢𑀺 𑀧𑀭𑀺𑀢𑁆𑀢𑀸𑀦𑀺 𑀲𑀼𑀯𑀡𑁆𑀡𑀤𑀼𑀩𑁆𑀩𑀡𑁆𑀡𑀸𑀦𑀺; ‘𑀢𑀸𑀦𑀺 𑀅𑀪𑀺𑀪𑀼𑀬𑁆𑀬 𑀚𑀸𑀦𑀸𑀫𑀺 𑀧𑀲𑁆𑀲𑀸𑀫𑀻’𑀢𑀺, 𑀏𑀯𑀁𑀲𑀜𑁆𑀜𑀻 𑀳𑁄𑀢𑀺. 𑀇𑀤𑀁 𑀧𑀞𑀫𑀁 𑀅𑀪𑀺𑀪𑀸𑀬𑀢𑀦𑀁.

‘‘𑀅𑀚𑁆𑀛𑀢𑁆𑀢𑀁 𑀭𑀽𑀧𑀲𑀜𑁆𑀜𑀻 𑀏𑀓𑁄 𑀩𑀳𑀺𑀤𑁆𑀥𑀸 𑀭𑀽𑀧𑀸𑀦𑀺 𑀧𑀲𑁆𑀲𑀢𑀺 𑀅𑀧𑁆𑀧𑀫𑀸𑀡𑀸𑀦𑀺 𑀲𑀼𑀯𑀡𑁆𑀡𑀤𑀼𑀩𑁆𑀩𑀡𑁆𑀡𑀸𑀦𑀺; ‘𑀢𑀸𑀦𑀺 𑀅𑀪𑀺𑀪𑀼𑀬𑁆𑀬 𑀚𑀸𑀦𑀸𑀫𑀺 𑀧𑀲𑁆𑀲𑀸𑀫𑀻’𑀢𑀺, 𑀏𑀯𑀁𑀲𑀜𑁆𑀜𑀻 𑀳𑁄𑀢𑀺. 𑀇𑀤𑀁 𑀤𑀼𑀢𑀺𑀬𑀁 𑀅𑀪𑀺𑀪𑀸𑀬𑀢𑀦𑀁.

‘‘𑀅𑀚𑁆𑀛𑀢𑁆𑀢𑀁 𑀅𑀭𑀽𑀧𑀲𑀜𑁆𑀜𑀻 𑀏𑀓𑁄 𑀩𑀳𑀺𑀤𑁆𑀥𑀸 𑀭𑀽𑀧𑀸𑀦𑀺 𑀧𑀲𑁆𑀲𑀢𑀺 𑀧𑀭𑀺𑀢𑁆𑀢𑀸𑀦𑀺 𑀲𑀼𑀯𑀡𑁆𑀡𑀤𑀼𑀩𑁆𑀩𑀡𑁆𑀡𑀸𑀦𑀺; ‘𑀢𑀸𑀦𑀺 𑀅𑀪𑀺𑀪𑀼𑀬𑁆𑀬 𑀚𑀸𑀦𑀸𑀫𑀺 𑀧𑀲𑁆𑀲𑀸𑀫𑀻’𑀢𑀺, 𑀏𑀯𑀁𑀲𑀜𑁆𑀜𑀻 𑀳𑁄𑀢𑀺. 𑀇𑀤𑀁 𑀢𑀢𑀺𑀬𑀁 𑀅𑀪𑀺𑀪𑀸𑀬𑀢𑀦𑀁.

‘‘𑀅𑀚𑁆𑀛𑀢𑁆𑀢𑀁 𑀅𑀭𑀽𑀧𑀲𑀜𑁆𑀜𑀻 𑀏𑀓𑁄 𑀩𑀳𑀺𑀤𑁆𑀥𑀸 𑀭𑀽𑀧𑀸𑀦𑀺 𑀧𑀲𑁆𑀲𑀢𑀺 𑀅𑀧𑁆𑀧𑀫𑀸𑀡𑀸𑀦𑀺 𑀲𑀼𑀯𑀡𑁆𑀡𑀤𑀼𑀩𑁆𑀩𑀡𑁆𑀡𑀸𑀦𑀺; ‘𑀢𑀸𑀦𑀺 𑀅𑀪𑀺𑀪𑀼𑀬𑁆𑀬 𑀚𑀸𑀦𑀸𑀫𑀺 𑀧𑀲𑁆𑀲𑀸𑀫𑀻’𑀢𑀺, 𑀏𑀯𑀁𑀲𑀜𑁆𑀜𑀻 𑀳𑁄𑀢𑀺. 𑀇𑀤𑀁 𑀘𑀢𑀼𑀢𑁆𑀣𑀁 𑀅𑀪𑀺𑀪𑀸𑀬𑀢𑀦𑀁.

‘‘𑀅𑀚𑁆𑀛𑀢𑁆𑀢𑀁 𑀅𑀭𑀽𑀧𑀲𑀜𑁆𑀜𑀻 𑀏𑀓𑁄 𑀩𑀳𑀺𑀤𑁆𑀥𑀸 𑀭𑀽𑀧𑀸𑀦𑀺 𑀧𑀲𑁆𑀲𑀢𑀺 𑀦𑀻𑀮𑀸𑀦𑀺 𑀦𑀻𑀮𑀯𑀡𑁆𑀡𑀸𑀦𑀺 𑀦𑀻𑀮𑀦𑀺𑀤𑀲𑁆𑀲𑀦𑀸𑀦𑀺 𑀦𑀻𑀮𑀦𑀺𑀪𑀸𑀲𑀸𑀦𑀺. 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀉𑀫𑀸𑀧𑀼𑀧𑁆𑀨𑀁 𑀦𑀻𑀮𑀁 𑀦𑀻𑀮𑀯𑀡𑁆𑀡𑀁 𑀦𑀻𑀮𑀦𑀺𑀤𑀲𑁆𑀲𑀦𑀁 𑀦𑀻𑀮𑀦𑀺𑀪𑀸𑀲𑀁, 𑀲𑁂𑀬𑁆𑀬𑀣𑀸 𑀯𑀸 𑀧𑀦 𑀢𑀁 𑀯𑀢𑁆𑀣𑀁 𑀩𑀸𑀭𑀸𑀡𑀲𑁂𑀬𑁆𑀬𑀓𑀁 𑀉𑀪𑀢𑁄𑀪𑀸𑀕𑀯𑀺𑀫𑀝𑁆𑀞𑀁 𑀦𑀻𑀮𑀁 𑀦𑀻𑀮𑀯𑀡𑁆𑀡𑀁 𑀦𑀻𑀮𑀦𑀺𑀤𑀲𑁆𑀲𑀦𑀁 𑀦𑀻𑀮𑀦𑀺𑀪𑀸𑀲𑀁; 𑀏𑀯𑀫𑁂𑀯𑀁 𑀅𑀚𑁆𑀛𑀢𑁆𑀢𑀁 𑀅𑀭𑀽𑀧𑀲𑀜𑁆𑀜𑀻 𑀏𑀓𑁄 𑀩𑀳𑀺𑀤𑁆𑀥𑀸 𑀭𑀽𑀧𑀸𑀦𑀺 𑀧𑀲𑁆𑀲𑀢𑀺 𑀦𑀻𑀮𑀸𑀦𑀺 𑀦𑀻𑀮𑀯𑀡𑁆𑀡𑀸𑀦𑀺 𑀦𑀻𑀮𑀦𑀺𑀤𑀲𑁆𑀲𑀦𑀸𑀦𑀺 𑀦𑀻𑀮𑀦𑀺𑀪𑀸𑀲𑀸𑀦𑀺; ‘𑀢𑀸𑀦𑀺 𑀅𑀪𑀺𑀪𑀼𑀬𑁆𑀬 𑀚𑀸𑀦𑀸𑀫𑀺 𑀧𑀲𑁆𑀲𑀸𑀫𑀻’𑀢𑀺, 𑀏𑀯𑀁𑀲𑀜𑁆𑀜𑀻 𑀳𑁄𑀢𑀺. 𑀇𑀤𑀁 𑀧𑀜𑁆𑀘𑀫𑀁 𑀅𑀪𑀺𑀪𑀸𑀬𑀢𑀦𑀁.

‘‘𑀅𑀚𑁆𑀛𑀢𑁆𑀢𑀁 𑀅𑀭𑀽𑀧𑀲𑀜𑁆𑀜𑀻 𑀏𑀓𑁄 𑀩𑀳𑀺𑀤𑁆𑀥𑀸 𑀭𑀽𑀧𑀸𑀦𑀺 𑀧𑀲𑁆𑀲𑀢𑀺 𑀧𑀻𑀢𑀸𑀦𑀺 𑀧𑀻𑀢𑀯𑀡𑁆𑀡𑀸𑀦𑀺 𑀧𑀻𑀢𑀦𑀺𑀤𑀲𑁆𑀲𑀦𑀸𑀦𑀺 𑀧𑀻𑀢𑀦𑀺𑀪𑀸𑀲𑀸𑀦𑀺. 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀓𑀡𑀺𑀓𑀸𑀭𑀧𑀼𑀧𑁆𑀨𑀁 𑀧𑀻𑀢𑀁 𑀧𑀻𑀢𑀯𑀡𑁆𑀡𑀁 𑀧𑀻𑀢𑀦𑀺𑀤𑀲𑁆𑀲𑀦𑀁 𑀧𑀻𑀢𑀦𑀺𑀪𑀸𑀲𑀁, 𑀲𑁂𑀬𑁆𑀬𑀣𑀸 𑀯𑀸 𑀧𑀦 𑀢𑀁 𑀯𑀢𑁆𑀣𑀁 𑀩𑀸𑀭𑀸𑀡𑀲𑁂𑀬𑁆𑀬𑀓𑀁 𑀉𑀪𑀢𑁄𑀪𑀸𑀕𑀯𑀺𑀫𑀝𑁆𑀞𑀁 𑀧𑀻𑀢𑀁 𑀧𑀻𑀢𑀯𑀡𑁆𑀡𑀁 𑀧𑀻𑀢𑀦𑀺𑀤𑀲𑁆𑀲𑀦𑀁 𑀧𑀻𑀢𑀦𑀺𑀪𑀸𑀲𑀁; 𑀏𑀯𑀫𑁂𑀯𑀁 𑀅𑀚𑁆𑀛𑀢𑁆𑀢𑀁 𑀅𑀭𑀽𑀧𑀲𑀜𑁆𑀜𑀻 𑀏𑀓𑁄 𑀩𑀳𑀺𑀤𑁆𑀥𑀸 𑀭𑀽𑀧𑀸𑀦𑀺 𑀧𑀲𑁆𑀲𑀢𑀺 𑀧𑀻𑀢𑀸𑀦𑀺 𑀧𑀻𑀢𑀯𑀡𑁆𑀡𑀸𑀦𑀺 𑀧𑀻𑀢𑀦𑀺𑀤𑀲𑁆𑀲𑀦𑀸𑀦𑀺 𑀧𑀻𑀢𑀦𑀺𑀪𑀸𑀲𑀸𑀦𑀺; ‘𑀢𑀸𑀦𑀺 𑀅𑀪𑀺𑀪𑀼𑀬𑁆𑀬 𑀚𑀸𑀦𑀸𑀫𑀺 𑀧𑀲𑁆𑀲𑀸𑀫𑀻’𑀢𑀺, 𑀏𑀯𑀁𑀲𑀜𑁆𑀜𑀻 𑀳𑁄𑀢𑀺. 𑀇𑀤𑀁 𑀙𑀝𑁆𑀞𑀁 𑀅𑀪𑀺𑀪𑀸𑀬𑀢𑀦𑀁.

‘‘𑀅𑀚𑁆𑀛𑀢𑁆𑀢𑀁 𑀅𑀭𑀽𑀧𑀲𑀜𑁆𑀜𑀻 𑀏𑀓𑁄 𑀩𑀳𑀺𑀤𑁆𑀥𑀸 𑀭𑀽𑀧𑀸𑀦𑀺 𑀧𑀲𑁆𑀲𑀢𑀺 𑀮𑁄𑀳𑀺𑀢𑀓𑀸𑀦𑀺 𑀮𑁄𑀳𑀺𑀢𑀓𑀯𑀡𑁆𑀡𑀸𑀦𑀺 𑀮𑁄𑀳𑀺𑀢𑀓𑀦𑀺𑀤𑀲𑁆𑀲𑀦𑀸𑀦𑀺 𑀮𑁄𑀳𑀺𑀢𑀓𑀦𑀺𑀪𑀸𑀲𑀸𑀦𑀺. 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀩𑀦𑁆𑀥𑀼𑀚𑀻𑀯𑀓𑀧𑀼𑀧𑁆𑀨𑀁 𑀮𑁄𑀳𑀺𑀢𑀓𑀁 𑀮𑁄𑀳𑀺𑀢𑀓𑀯𑀡𑁆𑀡𑀁 𑀮𑁄𑀳𑀺𑀢𑀓𑀦𑀺𑀤𑀲𑁆𑀲𑀦𑀁 𑀮𑁄𑀳𑀺𑀢𑀓𑀦𑀺𑀪𑀸𑀲𑀁, 𑀲𑁂𑀬𑁆𑀬𑀣𑀸 𑀯𑀸 𑀧𑀦 𑀢𑀁 𑀯𑀢𑁆𑀣𑀁 𑀩𑀸𑀭𑀸𑀡𑀲𑁂𑀬𑁆𑀬𑀓𑀁 𑀉𑀪𑀢𑁄𑀪𑀸𑀕𑀯𑀺𑀫𑀝𑁆𑀞𑀁 𑀮𑁄𑀳𑀺𑀢𑀓𑀁 𑀮𑁄𑀳𑀺𑀢𑀓𑀯𑀡𑁆𑀡𑀁 𑀮𑁄𑀳𑀺𑀢𑀓𑀦𑀺𑀤𑀲𑁆𑀲𑀦𑀁 𑀮𑁄𑀳𑀺𑀢𑀓𑀦𑀺𑀪𑀸𑀲𑀁; 𑀏𑀯𑀫𑁂𑀯𑀁 𑀅𑀚𑁆𑀛𑀢𑁆𑀢𑀁 𑀅𑀭𑀽𑀧𑀲𑀜𑁆𑀜𑀻 𑀏𑀓𑁄 𑀩𑀳𑀺𑀤𑁆𑀥𑀸 𑀭𑀽𑀧𑀸𑀦𑀺 𑀧𑀲𑁆𑀲𑀢𑀺 𑀮𑁄𑀳𑀺𑀢𑀓𑀸𑀦𑀺 𑀮𑁄𑀳𑀺𑀢𑀓𑀯𑀡𑁆𑀡𑀸𑀦𑀺 𑀮𑁄𑀳𑀺𑀢𑀓𑀦𑀺𑀤𑀲𑁆𑀲𑀦𑀸𑀦𑀺 𑀮𑁄𑀳𑀺𑀢𑀓𑀦𑀺𑀪𑀸𑀲𑀸𑀦𑀺; ‘𑀢𑀸𑀦𑀺 𑀅𑀪𑀺𑀪𑀼𑀬𑁆𑀬 𑀚𑀸𑀦𑀸𑀫𑀺 𑀧𑀲𑁆𑀲𑀸𑀫𑀻’𑀢𑀺, 𑀏𑀯𑀁𑀲𑀜𑁆𑀜𑀻 𑀳𑁄𑀢𑀺. 𑀇𑀤𑀁 𑀲𑀢𑁆𑀢𑀫𑀁 𑀅𑀪𑀺𑀪𑀸𑀬𑀢𑀦𑀁.

‘‘𑀅𑀚𑁆𑀛𑀢𑁆𑀢𑀁 𑀅𑀭𑀽𑀧𑀲𑀜𑁆𑀜𑀻 𑀏𑀓𑁄 𑀩𑀳𑀺𑀤𑁆𑀥𑀸 𑀭𑀽𑀧𑀸𑀦𑀺 𑀧𑀲𑁆𑀲𑀢𑀺 𑀑𑀤𑀸𑀢𑀸𑀦𑀺 𑀑𑀤𑀸𑀢𑀯𑀡𑁆𑀡𑀸𑀦𑀺 𑀑𑀤𑀸𑀢𑀦𑀺𑀤𑀲𑁆𑀲𑀦𑀸𑀦𑀺 𑀑𑀤𑀸𑀢𑀦𑀺𑀪𑀸𑀲𑀸𑀦𑀺. 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀑𑀲𑀥𑀺𑀢𑀸𑀭𑀓𑀸 𑀑𑀤𑀸𑀢𑀸 𑀑𑀤𑀸𑀢𑀯𑀡𑁆𑀡𑀸 𑀑𑀤𑀸𑀢𑀦𑀺𑀤𑀲𑁆𑀲𑀦𑀸 𑀑𑀤𑀸𑀢𑀦𑀺𑀪𑀸𑀲𑀸, 𑀲𑁂𑀬𑁆𑀬𑀣𑀸 𑀯𑀸 𑀧𑀦 𑀢𑀁 𑀯𑀢𑁆𑀣𑀁 𑀩𑀸𑀭𑀸𑀡𑀲𑁂𑀬𑁆𑀬𑀓𑀁 𑀉𑀪𑀢𑁄𑀪𑀸𑀕𑀯𑀺𑀫𑀝𑁆𑀞𑀁 𑀑𑀤𑀸𑀢𑀁 𑀑𑀤𑀸𑀢𑀯𑀡𑁆𑀡𑀁 𑀑𑀤𑀸𑀢𑀦𑀺𑀤𑀲𑁆𑀲𑀦𑀁 𑀑𑀤𑀸𑀢𑀦𑀺𑀪𑀸𑀲𑀁; 𑀏𑀯𑀫𑁂𑀯𑀁 𑀅𑀚𑁆𑀛𑀢𑁆𑀢𑀁 𑀅𑀭𑀽𑀧𑀲𑀜𑁆𑀜𑀻 𑀏𑀓𑁄 𑀩𑀳𑀺𑀤𑁆𑀥𑀸 𑀭𑀽𑀧𑀸𑀦𑀺 𑀧𑀲𑁆𑀲𑀢𑀺 𑀑𑀤𑀸𑀢𑀸𑀦𑀺 𑀑𑀤𑀸𑀢𑀯𑀡𑁆𑀡𑀸𑀦𑀺 𑀑𑀤𑀸𑀢𑀦𑀺𑀤𑀲𑁆𑀲𑀦𑀸𑀦𑀺 𑀑𑀤𑀸𑀢𑀦𑀺𑀪𑀸𑀲𑀸𑀦𑀺; ‘𑀢𑀸𑀦𑀺 𑀅𑀪𑀺𑀪𑀼𑀬𑁆𑀬 𑀚𑀸𑀦𑀸𑀫𑀺 𑀧𑀲𑁆𑀲𑀸𑀫𑀻’𑀢𑀺, 𑀏𑀯𑀁𑀲𑀜𑁆𑀜𑀻 𑀳𑁄𑀢𑀺. 𑀇𑀤𑀁 𑀅𑀝𑁆𑀞𑀫𑀁 𑀅𑀪𑀺𑀪𑀸𑀬𑀢𑀦𑀁. 𑀇𑀫𑀸𑀦𑀺 𑀔𑁄, 𑀪𑀺𑀓𑁆𑀔𑀯𑁂, 𑀅𑀝𑁆𑀞 𑀅𑀪𑀺𑀪𑀸𑀬𑀢𑀦𑀸𑀦𑀺.

‘‘𑀏𑀢𑀤𑀕𑁆𑀕𑀁, 𑀪𑀺𑀓𑁆𑀔𑀯𑁂, 𑀇𑀫𑁂𑀲𑀁 𑀅𑀝𑁆𑀞𑀦𑁆𑀦𑀁 𑀅𑀪𑀺𑀪𑀸𑀬𑀢𑀦𑀸𑀦𑀁 𑀬𑀤𑀺𑀤𑀁 𑀅𑀚𑁆𑀛𑀢𑁆𑀢𑀁 𑀅𑀭𑀽𑀧𑀲𑀜𑁆𑀜𑀻 𑀏𑀓𑁄 𑀩𑀳𑀺𑀤𑁆𑀥𑀸 𑀭𑀽𑀧𑀸𑀦𑀺 𑀧𑀲𑁆𑀲𑀢𑀺 𑀑𑀤𑀸𑀢𑀸𑀦𑀺 𑀑𑀤𑀸𑀢𑀯𑀡𑁆𑀡𑀸𑀦𑀺 𑀑𑀤𑀸𑀢𑀦𑀺𑀤𑀲𑁆𑀲𑀦𑀸𑀦𑀺 𑀑𑀤𑀸𑀢𑀦𑀺𑀪𑀸𑀲𑀸𑀦𑀺; ‘𑀢𑀸𑀦𑀺 𑀅𑀪𑀺𑀪𑀼𑀬𑁆𑀬 𑀚𑀸𑀦𑀸𑀫𑀺 𑀧𑀲𑁆𑀲𑀸𑀫𑀻’𑀢𑀺, 𑀏𑀯𑀁𑀲𑀜𑁆𑀜𑀻 𑀳𑁄𑀢𑀺. 𑀏𑀯𑀁𑀲𑀜𑁆𑀜𑀺𑀦𑁄𑀧𑀺 𑀔𑁄, 𑀪𑀺𑀓𑁆𑀔𑀯𑁂, 𑀲𑀦𑁆𑀢𑀺 𑀲𑀢𑁆𑀢𑀸. 𑀏𑀯𑀁𑀲𑀜𑁆𑀜𑀻𑀦𑀫𑁆𑀧𑀺 𑀔𑁄, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀸𑀦𑀁 𑀅𑀢𑁆𑀣𑁂𑀯 𑀅𑀜𑁆𑀜𑀣𑀢𑁆𑀢𑀁 𑀅𑀢𑁆𑀣𑀺 𑀯𑀺𑀧𑀭𑀺𑀡𑀸𑀫𑁄. 𑀏𑀯𑀁 𑀧𑀲𑁆𑀲𑀁, 𑀪𑀺𑀓𑁆𑀔𑀯𑁂, 𑀲𑀼𑀢𑀯𑀸 𑀅𑀭𑀺𑀬𑀲𑀸𑀯𑀓𑁄 𑀢𑀲𑁆𑀫𑀺𑀫𑁆𑀧𑀺 𑀦𑀺𑀩𑁆𑀩𑀺𑀦𑁆𑀤𑀢𑀺. 𑀢𑀲𑁆𑀫𑀺𑀁 𑀦𑀺𑀩𑁆𑀩𑀺𑀦𑁆𑀤𑀦𑁆𑀢𑁄 𑀅𑀕𑁆𑀕𑁂 𑀯𑀺𑀭𑀚𑁆𑀚𑀢𑀺, 𑀧𑀕𑁂𑀯 𑀳𑀻𑀦𑀲𑁆𑀫𑀺𑀁.

‘‘𑀘𑀢𑀲𑁆𑀲𑁄 𑀇𑀫𑀸, 𑀪𑀺𑀓𑁆𑀔𑀯𑁂, 𑀧𑀝𑀺𑀧𑀤𑀸. 𑀓𑀢𑀫𑀸 𑀘𑀢𑀲𑁆𑀲𑁄? 𑀤𑀼𑀓𑁆𑀔𑀸 𑀧𑀝𑀺𑀧𑀤𑀸 𑀤𑀦𑁆𑀥𑀸𑀪𑀺𑀜𑁆𑀜𑀸, 𑀤𑀼𑀓𑁆𑀔𑀸 𑀧𑀝𑀺𑀧𑀤𑀸 𑀔𑀺𑀧𑁆𑀧𑀸𑀪𑀺𑀜𑁆𑀜𑀸, 𑀲𑀼𑀔𑀸 𑀧𑀝𑀺𑀧𑀤𑀸 𑀤𑀦𑁆𑀥𑀸𑀪𑀺𑀜𑁆𑀜𑀸, 𑀲𑀼𑀔𑀸 𑀧𑀝𑀺𑀧𑀤𑀸 𑀔𑀺𑀧𑁆𑀧𑀸𑀪𑀺𑀜𑁆𑀜𑀸 𑁋 𑀇𑀫𑀸 𑀔𑁄, 𑀪𑀺𑀓𑁆𑀔𑀯𑁂, 𑀘𑀢𑀲𑁆𑀲𑁄 𑀧𑀝𑀺𑀧𑀤𑀸.

‘‘𑀏𑀢𑀤𑀕𑁆𑀕𑀁, 𑀪𑀺𑀓𑁆𑀔𑀯𑁂, 𑀇𑀫𑀸𑀲𑀁 𑀘𑀢𑀼𑀦𑁆𑀦𑀁 𑀧𑀝𑀺𑀧𑀤𑀸𑀦𑀁 𑀬𑀤𑀺𑀤𑀁 𑀲𑀼𑀔𑀸 𑀧𑀝𑀺𑀧𑀤𑀸 𑀔𑀺𑀧𑁆𑀧𑀸𑀪𑀺𑀜𑁆𑀜𑀸. 𑀏𑀯𑀁𑀧𑀝𑀺𑀧𑀦𑁆𑀦𑀸𑀧𑀺 𑀔𑁄, 𑀪𑀺𑀓𑁆𑀔𑀯𑁂, 𑀲𑀦𑁆𑀢𑀺 𑀲𑀢𑁆𑀢𑀸. 𑀏𑀯𑀁𑀧𑀝𑀺𑀧𑀦𑁆𑀦𑀸𑀦𑀫𑁆𑀧𑀺 𑀔𑁄, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀸𑀦𑀁 𑀅𑀢𑁆𑀣𑁂𑀯 𑀅𑀜𑁆𑀜𑀣𑀢𑁆𑀢𑀁 𑀅𑀢𑁆𑀣𑀺 𑀯𑀺𑀧𑀭𑀺𑀡𑀸𑀫𑁄. 𑀏𑀯𑀁 𑀧𑀲𑁆𑀲𑀁, 𑀪𑀺𑀓𑁆𑀔𑀯𑁂, 𑀲𑀼𑀢𑀯𑀸 𑀅𑀭𑀺𑀬𑀲𑀸𑀯𑀓𑁄 𑀢𑀲𑁆𑀫𑀺𑀫𑁆𑀧𑀺 𑀦𑀺𑀩𑁆𑀩𑀺𑀦𑁆𑀤𑀢𑀺. 𑀢𑀲𑁆𑀫𑀺𑀁 𑀦𑀺𑀩𑁆𑀩𑀺𑀦𑁆𑀤𑀦𑁆𑀢𑁄 𑀅𑀕𑁆𑀕𑁂 𑀯𑀺𑀭𑀚𑁆𑀚𑀢𑀺, 𑀧𑀕𑁂𑀯 𑀳𑀻𑀦𑀲𑁆𑀫𑀺𑀁.

‘‘𑀘𑀢𑀲𑁆𑀲𑁄 𑀇𑀫𑀸, 𑀪𑀺𑀓𑁆𑀔𑀯𑁂, 𑀲𑀜𑁆𑀜𑀸. 𑀓𑀢𑀫𑀸 𑀘𑀢𑀲𑁆𑀲𑁄? 𑀧𑀭𑀺𑀢𑁆𑀢𑀫𑁂𑀓𑁄 𑀲𑀜𑁆𑀚𑀸𑀦𑀸𑀢𑀺, 𑀫𑀳𑀕𑁆𑀕𑀢𑀫𑁂𑀓𑁄 𑀲𑀜𑁆𑀚𑀸𑀦𑀸𑀢𑀺, 𑀅𑀧𑁆𑀧𑀫𑀸𑀡𑀫𑁂𑀓𑁄 𑀲𑀜𑁆𑀚𑀸𑀦𑀸𑀢𑀺, ‘𑀦𑀢𑁆𑀣𑀺 𑀓𑀺𑀜𑁆𑀘𑀻’𑀢𑀺 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀫𑁂𑀓𑁄 𑀲𑀜𑁆𑀚𑀸𑀦𑀸𑀢𑀺 𑁋 𑀇𑀫𑀸 𑀔𑁄, 𑀪𑀺𑀓𑁆𑀔𑀯𑁂, 𑀘𑀢𑀲𑁆𑀲𑁄 𑀲𑀜𑁆𑀜𑀸.

‘‘𑀏𑀢𑀤𑀕𑁆𑀕𑀁, 𑀪𑀺𑀓𑁆𑀔𑀯𑁂, 𑀇𑀫𑀸𑀲𑀁 𑀘𑀢𑀼𑀦𑁆𑀦𑀁 𑀲𑀜𑁆𑀜𑀸𑀦𑀁 𑀬𑀤𑀺𑀤𑀁 ‘𑀦𑀢𑁆𑀣𑀺 𑀓𑀺𑀜𑁆𑀘𑀻’𑀢𑀺 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀫𑁂𑀓𑁄 𑀲𑀜𑁆𑀚𑀸𑀦𑀸𑀢𑀺. 𑀏𑀯𑀁𑀲𑀜𑁆𑀜𑀺𑀦𑁄𑀧𑀺 𑀔𑁄, 𑀪𑀺𑀓𑁆𑀔𑀯𑁂, 𑀲𑀦𑁆𑀢𑀺 𑀲𑀢𑁆𑀢𑀸. 𑀏𑀯𑀁𑀲𑀜𑁆𑀜𑀻𑀦𑀫𑁆𑀧𑀺 𑀔𑁄, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀸𑀦𑀁 𑀅𑀢𑁆𑀣𑁂𑀯 𑀅𑀜𑁆𑀜𑀣𑀢𑁆𑀢𑀁 𑀅𑀢𑁆𑀣𑀺 𑀯𑀺𑀧𑀭𑀺𑀡𑀸𑀫𑁄. 𑀏𑀯𑀁 𑀧𑀲𑁆𑀲𑀁, 𑀪𑀺𑀓𑁆𑀔𑀯𑁂, 𑀲𑀼𑀢𑀯𑀸 𑀅𑀭𑀺𑀬𑀲𑀸𑀯𑀓𑁄 𑀢𑀲𑁆𑀫𑀺𑀫𑁆𑀧𑀺 𑀦𑀺𑀩𑁆𑀩𑀺𑀦𑁆𑀤𑀢𑀺. 𑀢𑀲𑁆𑀫𑀺𑀁 𑀦𑀺𑀩𑁆𑀩𑀺𑀦𑁆𑀤𑀦𑁆𑀢𑁄 𑀅𑀕𑁆𑀕𑁂 𑀯𑀺𑀭𑀚𑁆𑀚𑀢𑀺, 𑀧𑀕𑁂𑀯 𑀳𑀻𑀦𑀲𑁆𑀫𑀺𑀁.

‘‘𑀏𑀢𑀤𑀕𑁆𑀕𑀁, 𑀪𑀺𑀓𑁆𑀔𑀯𑁂, 𑀩𑀸𑀳𑀺𑀭𑀓𑀸𑀦𑀁 𑀤𑀺𑀝𑁆𑀞𑀺𑀕𑀢𑀸𑀦𑀁 𑀬𑀤𑀺𑀤𑀁 ‘𑀦𑁄 𑀘𑀲𑁆𑀲𑀁, 𑀦𑁄 𑀘 𑀫𑁂 𑀲𑀺𑀬𑀸, 𑀦 𑀪𑀯𑀺𑀲𑁆𑀲𑀸𑀫𑀺, 𑀦 𑀫𑁂 𑀪𑀯𑀺𑀲𑁆𑀲𑀢𑀻’𑀢𑀺. 𑀏𑀯𑀁𑀤𑀺𑀝𑁆𑀞𑀺𑀦𑁄, 𑀪𑀺𑀓𑁆𑀔𑀯𑁂, 𑀏𑀢𑀁 𑀧𑀸𑀝𑀺𑀓𑀗𑁆𑀔𑀁 𑁋 ‘𑀬𑀸 𑀘𑀸𑀬𑀁 𑀪𑀯𑁂 𑀅𑀧𑁆𑀧𑀝𑀺𑀓𑀼𑀮𑁆𑀬𑀢𑀸, 𑀲𑀸 𑀘𑀲𑁆𑀲 𑀦 𑀪𑀯𑀺𑀲𑁆𑀲𑀢𑀺; 𑀬𑀸 𑀘𑀸𑀬𑀁 𑀪𑀯𑀦𑀺𑀭𑁄𑀥𑁂 𑀧𑀸𑀝𑀺𑀓𑀼𑀮𑁆𑀬𑀢𑀸, 𑀲𑀸 𑀘𑀲𑁆𑀲 𑀦 𑀪𑀯𑀺𑀲𑁆𑀲𑀢𑀻’𑀢𑀺. 𑀏𑀯𑀁𑀤𑀺𑀝𑁆𑀞𑀺𑀦𑁄𑀧𑀺 𑀔𑁄, 𑀪𑀺𑀓𑁆𑀔𑀯𑁂, 𑀲𑀦𑁆𑀢𑀺 𑀲𑀢𑁆𑀢𑀸. 𑀏𑀯𑀁𑀤𑀺𑀝𑁆𑀞𑀻𑀦𑀫𑁆𑀧𑀺 𑀔𑁄, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀸𑀦𑀁 𑀅𑀢𑁆𑀣𑁂𑀯 𑀅𑀜𑁆𑀜𑀣𑀢𑁆𑀢𑀁 𑀅𑀢𑁆𑀣𑀺 𑀯𑀺𑀧𑀭𑀺𑀡𑀸𑀫𑁄. 𑀏𑀯𑀁 𑀧𑀲𑁆𑀲𑀁, 𑀪𑀺𑀓𑁆𑀔𑀯𑁂, 𑀲𑀼𑀢𑀯𑀸 𑀅𑀭𑀺𑀬𑀲𑀸𑀯𑀓𑁄 𑀢𑀲𑁆𑀫𑀺𑀫𑁆𑀧𑀺 𑀦𑀺𑀩𑁆𑀩𑀺𑀦𑁆𑀤𑀢𑀺. 𑀢𑀲𑁆𑀫𑀺𑀁 𑀦𑀺𑀩𑁆𑀩𑀺𑀦𑁆𑀤𑀦𑁆𑀢𑁄 𑀅𑀕𑁆𑀕𑁂 𑀯𑀺𑀭𑀚𑁆𑀚𑀢𑀺, 𑀧𑀕𑁂𑀯 𑀳𑀻𑀦𑀲𑁆𑀫𑀺𑀁.

‘‘𑀲𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀏𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀧𑀭𑀫𑀢𑁆𑀣𑀯𑀺𑀲𑀼𑀤𑁆𑀥𑀺𑀁 𑀧𑀜𑁆𑀜𑀸𑀧𑁂𑀦𑁆𑀢𑀺. 𑀏𑀢𑀤𑀕𑁆𑀕𑀁, 𑀪𑀺𑀓𑁆𑀔𑀯𑁂, 𑀧𑀭𑀫𑀢𑁆𑀣𑀯𑀺𑀲𑀼𑀤𑁆𑀥𑀺𑀁 𑀧𑀜𑁆𑀜𑀸𑀧𑁂𑀦𑁆𑀢𑀸𑀦𑀁 𑀬𑀤𑀺𑀤𑀁 𑀲𑀩𑁆𑀩𑀲𑁄 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁 𑀲𑀫𑀢𑀺𑀓𑁆𑀓𑀫𑁆𑀫 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀢𑁂 𑀢𑀤𑀪𑀺𑀜𑁆𑀜𑀸𑀬 𑀢𑀲𑁆𑀲 𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀺. 𑀏𑀯𑀁𑀯𑀸𑀤𑀺𑀦𑁄𑀧𑀺 𑀔𑁄, 𑀪𑀺𑀓𑁆𑀔𑀯𑁂, 𑀲𑀦𑁆𑀢𑀺 𑀲𑀢𑁆𑀢𑀸. 𑀏𑀯𑀁𑀯𑀸𑀤𑀻𑀦𑀫𑁆𑀧𑀺 𑀔𑁄, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀸𑀦𑀁 𑀅𑀢𑁆𑀣𑁂𑀯 𑀅𑀜𑁆𑀜𑀣𑀢𑁆𑀢𑀁 𑀅𑀢𑁆𑀣𑀺 𑀯𑀺𑀧𑀭𑀺𑀡𑀸𑀫𑁄. 𑀏𑀯𑀁 𑀧𑀲𑁆𑀲𑀁, 𑀪𑀺𑀓𑁆𑀔𑀯𑁂, 𑀲𑀼𑀢𑀯𑀸 𑀅𑀭𑀺𑀬𑀲𑀸𑀯𑀓𑁄 𑀢𑀲𑁆𑀫𑀺𑀫𑁆𑀧𑀺 𑀦𑀺𑀩𑁆𑀩𑀺𑀦𑁆𑀤𑀢𑀺. 𑀢𑀲𑁆𑀫𑀺𑀁 𑀦𑀺𑀩𑁆𑀩𑀺𑀦𑁆𑀤𑀦𑁆𑀢𑁄 𑀅𑀕𑁆𑀕𑁂 𑀯𑀺𑀭𑀚𑁆𑀚𑀢𑀺, 𑀧𑀕𑁂𑀯 𑀳𑀻𑀦𑀲𑁆𑀫𑀺𑀁.

‘‘𑀲𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀏𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀧𑀭𑀫𑀤𑀺𑀝𑁆𑀞𑀥𑀫𑁆𑀫𑀦𑀺𑀩𑁆𑀩𑀸𑀦𑀁 𑀧𑀜𑁆𑀜𑀸𑀧𑁂𑀦𑁆𑀢𑀺. 𑀏𑀢𑀤𑀕𑁆𑀕𑀁, 𑀪𑀺𑀓𑁆𑀔𑀯𑁂, 𑀧𑀭𑀫𑀤𑀺𑀝𑁆𑀞𑀥𑀫𑁆𑀫𑀦𑀺𑀩𑁆𑀩𑀸𑀦𑀁 𑀧𑀜𑁆𑀜𑀸𑀧𑁂𑀦𑁆𑀢𑀸𑀦𑀁 𑀬𑀤𑀺𑀤𑀁 𑀙𑀦𑁆𑀦𑀁 𑀨𑀲𑁆𑀲𑀸𑀬𑀢𑀦𑀸𑀦𑀁 𑀲𑀫𑀼𑀤𑀬𑀜𑁆𑀘 𑀅𑀢𑁆𑀣𑀗𑁆𑀕𑀫𑀜𑁆𑀘 𑀅𑀲𑁆𑀲𑀸𑀤𑀜𑁆𑀘 𑀆𑀤𑀻𑀦𑀯𑀜𑁆𑀘 𑀦𑀺𑀲𑁆𑀲𑀭𑀡𑀜𑁆𑀘 𑀬𑀣𑀸𑀪𑀽𑀢𑀁 𑀯𑀺𑀤𑀺𑀢𑁆𑀯𑀸 𑀅𑀦𑀼𑀧𑀸𑀤𑀸 𑀯𑀺𑀫𑁄𑀓𑁆𑀔𑁄. 𑀏𑀯𑀁𑀯𑀸𑀤𑀺𑀁 𑀔𑁄 𑀫𑀁, 𑀪𑀺𑀓𑁆𑀔𑀯𑁂, 𑀏𑀯𑀫𑀓𑁆𑀔𑀸𑀬𑀺𑀁 𑀏𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀅𑀲𑀢𑀸 𑀢𑀼𑀘𑁆𑀙𑀸 𑀫𑀼𑀲𑀸 𑀅𑀪𑀽𑀢𑁂𑀦 𑀅𑀩𑁆𑀪𑀸𑀘𑀺𑀓𑁆𑀔𑀦𑁆𑀢𑀺 𑁋 ‘𑀲𑀫𑀡𑁄 𑀕𑁄𑀢𑀫𑁄 𑀦 𑀓𑀸𑀫𑀸𑀦𑀁 𑀧𑀭𑀺𑀜𑁆𑀜𑀁 𑀧𑀜𑁆𑀜𑀸𑀧𑁂𑀢𑀺, 𑀦 𑀭𑀽𑀧𑀸𑀦𑀁 𑀧𑀭𑀺𑀜𑁆𑀜𑀁 𑀧𑀜𑁆𑀜𑀸𑀧𑁂𑀢𑀺, 𑀦 𑀯𑁂𑀤𑀦𑀸𑀦𑀁 𑀧𑀭𑀺𑀜𑁆𑀜𑀁 𑀧𑀜𑁆𑀜𑀸𑀧𑁂𑀢𑀻’𑀢𑀺. 𑀓𑀸𑀫𑀸𑀦𑀜𑁆𑀘𑀸𑀳𑀁, 𑀪𑀺𑀓𑁆𑀔𑀯𑁂, 𑀧𑀭𑀺𑀜𑁆𑀜𑀁 𑀧𑀜𑁆𑀜𑀸𑀧𑁂𑀫𑀺, 𑀭𑀽𑀧𑀸𑀦𑀜𑁆𑀘 𑀧𑀭𑀺𑀜𑁆𑀜𑀁 𑀧𑀜𑁆𑀜𑀸𑀧𑁂𑀫𑀺, 𑀯𑁂𑀤𑀦𑀸𑀦𑀜𑁆𑀘 𑀧𑀭𑀺𑀜𑁆𑀜𑀁 𑀧𑀜𑁆𑀜𑀸𑀧𑁂𑀫𑀺, 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀦𑀺𑀘𑁆𑀙𑀸𑀢𑁄 𑀦𑀺𑀩𑁆𑀩𑀼𑀢𑁄 𑀲𑀻𑀢𑀺𑀪𑀽𑀢𑁄 𑀅𑀦𑀼𑀧𑀸𑀤𑀸 𑀧𑀭𑀺𑀦𑀺𑀩𑁆𑀩𑀸𑀦𑀁 𑀧𑀜𑁆𑀜𑀸𑀧𑁂𑀫𑀻’’𑀢𑀺. 𑀦𑀯𑀫𑀁.

𑁧𑁦. 𑀤𑀼𑀢𑀺𑀬𑀓𑁄𑀲𑀮𑀲𑀼𑀢𑁆𑀢𑀁

𑁩𑁦. 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀭𑀸𑀚𑀸 𑀧𑀲𑁂𑀦𑀤𑀺 𑀓𑁄𑀲𑀮𑁄 𑀉𑀬𑁆𑀬𑁄𑀥𑀺𑀓𑀸 𑀦𑀺𑀯𑀢𑁆𑀢𑁄 𑀳𑁄𑀢𑀺 𑀯𑀺𑀚𑀺𑀢𑀲𑀗𑁆𑀕𑀸𑀫𑁄 𑀮𑀤𑁆𑀥𑀸𑀥𑀺𑀧𑁆𑀧𑀸𑀬𑁄. 𑀅𑀣 𑀔𑁄 𑀭𑀸𑀚𑀸 𑀧𑀲𑁂𑀦𑀤𑀺 𑀓𑁄𑀲𑀮𑁄 𑀬𑁂𑀦 𑀆𑀭𑀸𑀫𑁄 𑀢𑁂𑀦 𑀧𑀸𑀬𑀸𑀲𑀺. 𑀬𑀸𑀯𑀢𑀺𑀓𑀸 𑀬𑀸𑀦𑀲𑁆𑀲 𑀪𑀽𑀫𑀺, 𑀬𑀸𑀦𑁂𑀦 𑀕𑀦𑁆𑀢𑁆𑀯𑀸 𑀬𑀸𑀦𑀸 𑀧𑀘𑁆𑀘𑁄𑀭𑁄𑀳𑀺𑀢𑁆𑀯𑀸 𑀧𑀢𑁆𑀢𑀺𑀓𑁄𑀯 𑀆𑀭𑀸𑀫𑀁 𑀧𑀸𑀯𑀺𑀲𑀺. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑀫𑁆𑀩𑀳𑀼𑀮𑀸 𑀪𑀺𑀓𑁆𑀔𑀽 𑀅𑀩𑁆𑀪𑁄𑀓𑀸𑀲𑁂 𑀘𑀗𑁆𑀓𑀫𑀦𑁆𑀢𑀺. 𑀅𑀣 𑀔𑁄 𑀭𑀸𑀚𑀸 𑀧𑀲𑁂𑀦𑀤𑀺 𑀓𑁄𑀲𑀮𑁄 𑀬𑁂𑀦 𑀢𑁂 𑀪𑀺𑀓𑁆𑀔𑀽 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑁂 𑀪𑀺𑀓𑁆𑀔𑀽 𑀏𑀢𑀤𑀯𑁄𑀘 𑁋 ‘‘𑀓𑀳𑀁 𑀦𑀼 𑀔𑁄, 𑀪𑀦𑁆𑀢𑁂, 𑀪𑀕𑀯𑀸 𑀏𑀢𑀭𑀳𑀺 𑀯𑀺𑀳𑀭𑀢𑀺 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄. 𑀤𑀲𑁆𑀲𑀦𑀓𑀸𑀫𑀸 𑀳𑀺 𑀫𑀬𑀁, 𑀪𑀦𑁆𑀢𑁂, 𑀢𑀁 𑀪𑀕𑀯𑀦𑁆𑀢𑀁 𑀅𑀭𑀳𑀦𑁆𑀢𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥’’𑀦𑁆𑀢𑀺. ‘‘𑀏𑀲𑁄, 𑀫𑀳𑀸𑀭𑀸𑀚, 𑀯𑀺𑀳𑀸𑀭𑁄 𑀲𑀁𑀯𑀼𑀢𑀤𑁆𑀯𑀸𑀭𑁄. 𑀢𑁂𑀦 𑀅𑀧𑁆𑀧𑀲𑀤𑁆𑀤𑁄 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀅𑀢𑀭𑀫𑀸𑀦𑁄 𑀆𑀮𑀺𑀦𑁆𑀤𑀁 𑀧𑀯𑀺𑀲𑀺𑀢𑁆𑀯𑀸 𑀉𑀓𑁆𑀓𑀸𑀲𑀺𑀢𑁆𑀯𑀸 𑀅𑀕𑁆𑀕𑀴𑀁 𑀆𑀓𑁄𑀝𑁂𑀳𑀺; 𑀯𑀺𑀯𑀭𑀺𑀲𑁆𑀲𑀢𑀺 𑀢𑁂 𑀪𑀕𑀯𑀸 𑀤𑁆𑀯𑀸𑀭’’𑀦𑁆𑀢𑀺.

𑀅𑀣 𑀔𑁄 𑀭𑀸𑀚𑀸 𑀧𑀲𑁂𑀦𑀤𑀺 𑀓𑁄𑀲𑀮𑁄 𑀬𑁂𑀦 𑀲𑁄 𑀯𑀺𑀳𑀸𑀭𑁄 𑀲𑀁𑀯𑀼𑀢𑀤𑁆𑀯𑀸𑀭𑁄, 𑀢𑁂𑀦 𑀅𑀧𑁆𑀧𑀲𑀤𑁆𑀤𑁄 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀅𑀢𑀭𑀫𑀸𑀦𑁄 𑀆𑀮𑀺𑀦𑁆𑀤𑀁 𑀧𑀯𑀺𑀲𑀺𑀢𑁆𑀯𑀸 𑀉𑀓𑁆𑀓𑀸𑀲𑀺𑀢𑁆𑀯𑀸 𑀅𑀕𑁆𑀕𑀴𑀁 𑀆𑀓𑁄𑀝𑁂𑀲𑀺. 𑀯𑀺𑀯𑀭𑀺 𑀪𑀕𑀯𑀸 𑀤𑁆𑀯𑀸𑀭𑀁. 𑀅𑀣 𑀔𑁄 𑀭𑀸𑀚𑀸 𑀧𑀲𑁂𑀦𑀤𑀺 𑀓𑁄𑀲𑀮𑁄 𑀯𑀺𑀳𑀸𑀭𑀁 𑀧𑀯𑀺𑀲𑀺𑀢𑁆𑀯𑀸 𑀪𑀕𑀯𑀢𑁄 𑀧𑀸𑀤𑁂𑀲𑀼 𑀲𑀺𑀭𑀲𑀸 𑀦𑀺𑀧𑀢𑀺𑀢𑁆𑀯𑀸 𑀪𑀕𑀯𑀢𑁄 𑀧𑀸𑀤𑀸𑀦𑀺 𑀫𑀼𑀔𑁂𑀦 𑀘 𑀧𑀭𑀺𑀘𑀼𑀫𑁆𑀩𑀢𑀺 𑀧𑀸𑀡𑀻𑀳𑀺 𑀘 𑀧𑀭𑀺𑀲𑀫𑁆𑀩𑀸𑀳𑀢𑀺 𑀦𑀸𑀫𑀜𑁆𑀘 𑀲𑀸𑀯𑁂𑀢𑀺 𑁋 ‘‘𑀭𑀸𑀚𑀸𑀳𑀁, 𑀪𑀦𑁆𑀢𑁂, 𑀧𑀲𑁂𑀦𑀤𑀺 𑀓𑁄𑀲𑀮𑁄; 𑀭𑀸𑀚𑀸𑀳𑀁, 𑀪𑀦𑁆𑀢𑁂, 𑀧𑀲𑁂𑀦𑀤𑀺 𑀓𑁄𑀲𑀮𑁄’’𑀢𑀺.

‘‘𑀓𑀁 𑀧𑀦 𑀢𑁆𑀯𑀁, 𑀫𑀳𑀸𑀭𑀸𑀚, 𑀅𑀢𑁆𑀣𑀯𑀲𑀁 𑀲𑀫𑁆𑀧𑀲𑁆𑀲𑀫𑀸𑀦𑁄 𑀇𑀫𑀲𑁆𑀫𑀺𑀁 𑀲𑀭𑀻𑀭𑁂 𑀏𑀯𑀭𑀽𑀧𑀁 𑀧𑀭𑀫𑀦𑀺𑀧𑀘𑁆𑀘𑀓𑀸𑀭𑀁 𑀓𑀭𑁄𑀲𑀺, 𑀫𑁂𑀢𑁆𑀢𑀽𑀧𑀳𑀸𑀭𑀁 𑀉𑀧𑀤𑀁𑀲𑁂𑀲𑀻’’𑀢𑀺? ‘‘𑀓𑀢𑀜𑁆𑀜𑀼𑀢𑀁 𑀔𑁄 𑀅𑀳𑀁, 𑀪𑀦𑁆𑀢𑁂, 𑀓𑀢𑀯𑁂𑀤𑀺𑀢𑀁 𑀲𑀫𑁆𑀧𑀲𑁆𑀲𑀫𑀸𑀦𑁄 𑀪𑀕𑀯𑀢𑀺 𑀏𑀯𑀭𑀽𑀧𑀁 𑀧𑀭𑀫𑀦𑀺𑀧𑀘𑁆𑀘𑀓𑀸𑀭𑀁 𑀓𑀭𑁄𑀫𑀺, 𑀫𑁂𑀢𑁆𑀢𑀽𑀧𑀳𑀸𑀭𑀁 𑀉𑀧𑀤𑀁𑀲𑁂𑀫𑀺.

‘‘𑀪𑀕𑀯𑀸 𑀳𑀺, 𑀪𑀦𑁆𑀢𑁂, 𑀩𑀳𑀼𑀚𑀦𑀳𑀺𑀢𑀸𑀬 𑀧𑀝𑀺𑀧𑀦𑁆𑀦𑁄 𑀩𑀳𑀼𑀚𑀦𑀲𑀼𑀔𑀸𑀬 𑀩𑀳𑀼𑀦𑁄 𑀚𑀦𑀲𑁆𑀲 𑀅𑀭𑀺𑀬𑁂 𑀜𑀸𑀬𑁂 𑀧𑀢𑀺𑀝𑁆𑀞𑀸𑀧𑀺𑀢𑀸 𑀬𑀤𑀺𑀤𑀁 𑀓𑀮𑁆𑀬𑀸𑀡𑀥𑀫𑁆𑀫𑀢𑀸𑀬 𑀓𑀼𑀲𑀮𑀥𑀫𑁆𑀫𑀢𑀸𑀬. 𑀬𑀫𑁆𑀧𑀺, 𑀪𑀦𑁆𑀢𑁂, 𑀪𑀕𑀯𑀸 𑀩𑀳𑀼𑀚𑀦𑀳𑀺𑀢𑀸𑀬 𑀧𑀝𑀺𑀧𑀦𑁆𑀦𑁄 𑀩𑀳𑀼𑀚𑀦𑀲𑀼𑀔𑀸𑀬 𑀩𑀳𑀼𑀦𑁄 𑀚𑀦𑀲𑁆𑀲 𑀅𑀭𑀺𑀬𑁂 𑀜𑀸𑀬𑁂 𑀧𑀢𑀺𑀝𑁆𑀞𑀸𑀧𑀺𑀢𑀸 𑀬𑀤𑀺𑀤𑀁 𑀓𑀮𑁆𑀬𑀸𑀡𑀥𑀫𑁆𑀫𑀢𑀸𑀬 𑀓𑀼𑀲𑀮𑀥𑀫𑁆𑀫𑀢𑀸𑀬, 𑀇𑀤𑀫𑁆𑀧𑀺 𑀔𑁄 𑀅𑀳𑀁, 𑀪𑀦𑁆𑀢𑁂, 𑀅𑀢𑁆𑀣𑀯𑀲𑀁 𑀲𑀫𑁆𑀧𑀲𑁆𑀲𑀫𑀸𑀦𑁄 𑀪𑀕𑀯𑀢𑀺 𑀏𑀯𑀭𑀽𑀧𑀁 𑀧𑀭𑀫𑀦𑀺𑀧𑀘𑁆𑀘𑀓𑀸𑀭𑀁 𑀓𑀭𑁄𑀫𑀺, 𑀫𑁂𑀢𑁆𑀢𑀽𑀧𑀳𑀸𑀭𑀁 𑀉𑀧𑀤𑀁𑀲𑁂𑀫𑀺.

‘‘𑀧𑀼𑀦 𑀘𑀧𑀭𑀁, 𑀪𑀦𑁆𑀢𑁂, 𑀪𑀕𑀯𑀸 𑀲𑀻𑀮𑀯𑀸 𑀯𑀼𑀤𑁆𑀥𑀲𑀻𑀮𑁄 𑀅𑀭𑀺𑀬𑀲𑀻𑀮𑁄 𑀓𑀼𑀲𑀮𑀲𑀻𑀮𑁄 𑀓𑀼𑀲𑀮𑀲𑀻𑀮𑁂𑀦 𑀲𑀫𑀦𑁆𑀦𑀸𑀕𑀢𑁄. 𑀬𑀫𑁆𑀧𑀺, 𑀪𑀦𑁆𑀢𑁂, 𑀪𑀕𑀯𑀸 𑀲𑀻𑀮𑀯𑀸 𑀯𑀼𑀤𑁆𑀥𑀲𑀻𑀮𑁄 𑀅𑀭𑀺𑀬𑀲𑀻𑀮𑁄 𑀓𑀼𑀲𑀮𑀲𑀻𑀮𑁄 𑀓𑀼𑀲𑀮𑀲𑀻𑀮𑁂𑀦 𑀲𑀫𑀦𑁆𑀦𑀸𑀕𑀢𑁄, 𑀇𑀤𑀫𑁆𑀧𑀺 𑀔𑁄 𑀅𑀳𑀁, 𑀪𑀦𑁆𑀢𑁂, 𑀅𑀢𑁆𑀣𑀯𑀲𑀁 𑀲𑀫𑁆𑀧𑀲𑁆𑀲𑀫𑀸𑀦𑁄 𑀪𑀕𑀯𑀢𑀺 𑀏𑀯𑀭𑀽𑀧𑀁 𑀧𑀭𑀫𑀦𑀺𑀧𑀘𑁆𑀘𑀓𑀸𑀭𑀁 𑀓𑀭𑁄𑀫𑀺, 𑀫𑁂𑀢𑁆𑀢𑀽𑀧𑀳𑀸𑀭𑀁 𑀉𑀧𑀤𑀁𑀲𑁂𑀫𑀺.

‘‘𑀧𑀼𑀦 𑀘𑀧𑀭𑀁, 𑀪𑀦𑁆𑀢𑁂, 𑀪𑀕𑀯𑀸 𑀤𑀻𑀖𑀭𑀢𑁆𑀢𑀁 𑀆𑀭𑀜𑁆𑀜𑀺𑀓𑁄, 𑀅𑀭𑀜𑁆𑀜𑀯𑀦𑀧𑀢𑁆𑀣𑀸𑀦𑀺 𑀧𑀦𑁆𑀢𑀸𑀦𑀺 𑀲𑁂𑀦𑀸𑀲𑀦𑀸𑀦𑀺 𑀧𑀝𑀺𑀲𑁂𑀯𑀢𑀺. 𑀬𑀫𑁆𑀧𑀺, 𑀪𑀦𑁆𑀢𑁂, 𑀪𑀕𑀯𑀸 𑀤𑀻𑀖𑀭𑀢𑁆𑀢𑀁 𑀆𑀭𑀜𑁆𑀜𑀺𑀓𑁄, 𑀅𑀭𑀜𑁆𑀜𑀯𑀦𑀧𑀢𑁆𑀣𑀸𑀦𑀺 𑀧𑀦𑁆𑀢𑀸𑀦𑀺 𑀲𑁂𑀦𑀸𑀲𑀦𑀸𑀦𑀺 𑀧𑀝𑀺𑀲𑁂𑀯𑀢𑀺, 𑀇𑀤𑀫𑁆𑀧𑀺 𑀔𑁄 𑀅𑀳𑀁, 𑀪𑀦𑁆𑀢𑁂, 𑀅𑀢𑁆𑀣𑀯𑀲𑀁 𑀲𑀫𑁆𑀧𑀲𑁆𑀲𑀫𑀸𑀦𑁄 𑀪𑀕𑀯𑀢𑀺 𑀏𑀯𑀭𑀽𑀧𑀁 𑀧𑀭𑀫𑀦𑀺𑀧𑀘𑁆𑀘𑀓𑀸𑀭𑀁 𑀓𑀭𑁄𑀫𑀺, 𑀫𑁂𑀢𑁆𑀢𑀽𑀧𑀳𑀸𑀭𑀁 𑀉𑀧𑀤𑀁𑀲𑁂𑀫𑀺.

‘‘𑀧𑀼𑀦 𑀘𑀧𑀭𑀁, 𑀪𑀦𑁆𑀢𑁂, 𑀪𑀕𑀯𑀸 𑀲𑀦𑁆𑀢𑀼𑀝𑁆𑀞𑁄 𑀇𑀢𑀭𑀻𑀢𑀭𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑁂𑀦. 𑀬𑀫𑁆𑀧𑀺, 𑀪𑀦𑁆𑀢𑁂, 𑀪𑀕𑀯𑀸 𑀲𑀦𑁆𑀢𑀼𑀝𑁆𑀞𑁄 𑀇𑀢𑀭𑀻𑀢𑀭𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑁂𑀦, 𑀇𑀤𑀫𑁆𑀧𑀺 𑀔𑁄 𑀅𑀳𑀁, 𑀪𑀦𑁆𑀢𑁂, 𑀅𑀢𑁆𑀣𑀯𑀲𑀁 𑀲𑀫𑁆𑀧𑀲𑁆𑀲𑀫𑀸𑀦𑁄 𑀪𑀕𑀯𑀢𑀺 𑀏𑀯𑀭𑀽𑀧𑀁 𑀧𑀭𑀫𑀦𑀺𑀧𑀘𑁆𑀘𑀓𑀸𑀭𑀁 𑀓𑀭𑁄𑀫𑀺, 𑀫𑁂𑀢𑁆𑀢𑀽𑀧𑀳𑀸𑀭𑀁 𑀉𑀧𑀤𑀁𑀲𑁂𑀫𑀺. ‘‘𑀧𑀼𑀦 𑀘𑀧𑀭𑀁, 𑀪𑀦𑁆𑀢𑁂, 𑀪𑀕𑀯𑀸 𑀆𑀳𑀼𑀦𑁂𑀬𑁆𑀬𑁄 𑀧𑀸𑀳𑀼𑀦𑁂𑀬𑁆𑀬𑁄 𑀤𑀓𑁆𑀔𑀺𑀡𑁂𑀬𑁆𑀬𑁄 𑀅𑀜𑁆𑀚𑀮𑀺𑀓𑀭𑀡𑀻𑀬𑁄 𑀅𑀦𑀼𑀢𑁆𑀢𑀭𑀁 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀁 𑀮𑁄𑀓𑀲𑁆𑀲. 𑀬𑀫𑁆𑀧𑀺, 𑀪𑀦𑁆𑀢𑁂, 𑀪𑀕𑀯𑀸 𑀆𑀳𑀼𑀦𑁂𑀬𑁆𑀬𑁄 𑀧𑀸𑀳𑀼𑀦𑁂𑀬𑁆𑀬𑁄 𑀤𑀓𑁆𑀔𑀺𑀡𑁂𑀬𑁆𑀬𑁄 𑀅𑀜𑁆𑀚𑀮𑀺𑀓𑀭𑀡𑀻𑀬𑁄 𑀅𑀦𑀼𑀢𑁆𑀢𑀭𑀁 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀁 𑀮𑁄𑀓𑀲𑁆𑀲, 𑀇𑀤𑀫𑁆𑀧𑀺 𑀔𑁄 𑀅𑀳𑀁, 𑀪𑀦𑁆𑀢𑁂, 𑀅𑀢𑁆𑀣𑀯𑀲𑀁 𑀲𑀫𑁆𑀧𑀲𑁆𑀲𑀫𑀸𑀦𑁄 𑀪𑀕𑀯𑀢𑀺 𑀏𑀯𑀭𑀽𑀧𑀁 𑀧𑀭𑀫𑀦𑀺𑀧𑀘𑁆𑀘𑀓𑀸𑀭𑀁 𑀓𑀭𑁄𑀫𑀺, 𑀫𑁂𑀢𑁆𑀢𑀽𑀧𑀳𑀸𑀭𑀁 𑀉𑀧𑀤𑀁𑀲𑁂𑀫𑀺.

‘‘𑀧𑀼𑀦 𑀘𑀧𑀭𑀁, 𑀪𑀦𑁆𑀢𑁂, 𑀪𑀕𑀯𑀸 𑀬𑀸𑀬𑀁 𑀓𑀣𑀸 𑀅𑀪𑀺𑀲𑀮𑁆𑀮𑁂𑀔𑀺𑀓𑀸 𑀘𑁂𑀢𑁄𑀯𑀺𑀯𑀭𑀡𑀲𑀧𑁆𑀧𑀸𑀬𑀸, 𑀲𑁂𑀬𑁆𑀬𑀣𑀺𑀤𑀁 𑁋 𑀅𑀧𑁆𑀧𑀺𑀘𑁆𑀙𑀓𑀣𑀸 𑀲𑀦𑁆𑀢𑀼𑀝𑁆𑀞𑀺𑀓𑀣𑀸 𑀧𑀯𑀺𑀯𑁂𑀓𑀓𑀣𑀸 𑀅𑀲𑀁𑀲𑀕𑁆𑀕𑀓𑀣𑀸 𑀯𑀻𑀭𑀺𑀬𑀸𑀭𑀫𑁆𑀪𑀓𑀣𑀸 𑀲𑀻𑀮𑀓𑀣𑀸 𑀲𑀫𑀸𑀥𑀺𑀓𑀣𑀸 𑀧𑀜𑁆𑀜𑀸𑀓𑀣𑀸 𑀯𑀺𑀫𑀼𑀢𑁆𑀢𑀺𑀓𑀣𑀸 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀓𑀣𑀸, 𑀏𑀯𑀭𑀽𑀧𑀸𑀬 𑀓𑀣𑀸𑀬 𑀦𑀺𑀓𑀸𑀫𑀮𑀸𑀪𑀻 𑀅𑀓𑀺𑀘𑁆𑀙𑀮𑀸𑀪𑀻 𑀅𑀓𑀲𑀺𑀭𑀮𑀸𑀪𑀻. 𑀬𑀫𑁆𑀧𑀺, 𑀪𑀦𑁆𑀢𑁂, 𑀪𑀕𑀯𑀸 𑀬𑀸𑀬𑀁 𑀓𑀣𑀸 𑀅𑀪𑀺𑀲𑀮𑁆𑀮𑁂𑀔𑀺𑀓𑀸 𑀘𑁂𑀢𑁄𑀯𑀺𑀯𑀭𑀡𑀲𑀧𑁆𑀧𑀸𑀬𑀸, 𑀲𑁂𑀬𑁆𑀬𑀣𑀺𑀤𑀁 𑁋 𑀅𑀧𑁆𑀧𑀺𑀘𑁆𑀙𑀓𑀣𑀸…𑀧𑁂… 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀓𑀣𑀸, 𑀏𑀯𑀭𑀽𑀧𑀸𑀬 𑀓𑀣𑀸𑀬 𑀦𑀺𑀓𑀸𑀫𑀮𑀸𑀪𑀻 𑀅𑀓𑀺𑀘𑁆𑀙𑀮𑀸𑀪𑀻 𑀅𑀓𑀲𑀺𑀭𑀮𑀸𑀪𑀻, 𑀇𑀤𑀫𑁆𑀧𑀺 𑀔𑁄 𑀅𑀳𑀁, 𑀪𑀦𑁆𑀢𑁂, 𑀅𑀢𑁆𑀣𑀯𑀲𑀁 𑀲𑀫𑁆𑀧𑀲𑁆𑀲𑀫𑀸𑀦𑁄 𑀪𑀕𑀯𑀢𑀺 𑀏𑀯𑀭𑀽𑀧𑀁 𑀧𑀭𑀫𑀦𑀺𑀧𑀘𑁆𑀘𑀓𑀸𑀭𑀁 𑀓𑀭𑁄𑀫𑀺, 𑀫𑁂𑀢𑁆𑀢𑀽𑀧𑀳𑀸𑀭𑀁 𑀉𑀧𑀤𑀁𑀲𑁂𑀫𑀺.

‘‘𑀧𑀼𑀦 𑀘𑀧𑀭𑀁, 𑀪𑀦𑁆𑀢𑁂, 𑀪𑀕𑀯𑀸 𑀘𑀢𑀼𑀦𑁆𑀦𑀁 𑀛𑀸𑀦𑀸𑀦𑀁 𑀆𑀪𑀺𑀘𑁂𑀢𑀲𑀺𑀓𑀸𑀦𑀁 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀸𑀦𑀁 𑀦𑀺𑀓𑀸𑀫𑀮𑀸𑀪𑀻 𑀅𑀓𑀺𑀘𑁆𑀙𑀮𑀸𑀪𑀻 𑀅𑀓𑀲𑀺𑀭𑀮𑀸𑀪𑀻. 𑀬𑀫𑁆𑀧𑀺, 𑀪𑀦𑁆𑀢𑁂, 𑀪𑀕𑀯𑀸 𑀘𑀢𑀼𑀦𑁆𑀦𑀁 𑀛𑀸𑀦𑀸𑀦𑀁 𑀆𑀪𑀺𑀘𑁂𑀢𑀲𑀺𑀓𑀸𑀦𑀁 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀸𑀦𑀁 𑀦𑀺𑀓𑀸𑀫𑀮𑀸𑀪𑀻 𑀅𑀓𑀺𑀘𑁆𑀙𑀮𑀸𑀪𑀻 𑀅𑀓𑀲𑀺𑀭𑀮𑀸𑀪𑀻, 𑀇𑀤𑀫𑁆𑀧𑀺 𑀔𑁄 𑀅𑀳𑀁, 𑀪𑀦𑁆𑀢𑁂, 𑀅𑀢𑁆𑀣𑀯𑀲𑀁 𑀲𑀫𑁆𑀧𑀲𑁆𑀲𑀫𑀸𑀦𑁄 𑀪𑀕𑀯𑀢𑀺 𑀏𑀯𑀭𑀽𑀧𑀁 𑀧𑀭𑀫𑀦𑀺𑀧𑀘𑁆𑀘𑀓𑀸𑀭𑀁 𑀓𑀭𑁄𑀫𑀺, 𑀫𑁂𑀢𑁆𑀢𑀽𑀧𑀳𑀸𑀭𑀁 𑀉𑀧𑀤𑀁𑀲𑁂𑀫𑀺.

‘‘𑀧𑀼𑀦 𑀘𑀧𑀭𑀁, 𑀪𑀦𑁆𑀢𑁂, 𑀪𑀕𑀯𑀸 𑀅𑀦𑁂𑀓𑀯𑀺𑀳𑀺𑀢𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀅𑀦𑀼𑀲𑁆𑀲𑀭𑀢𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀏𑀓𑀫𑁆𑀧𑀺 𑀚𑀸𑀢𑀺𑀁 𑀤𑁆𑀯𑁂𑀧𑀺 𑀚𑀸𑀢𑀺𑀬𑁄 𑀢𑀺𑀲𑁆𑀲𑁄𑀧𑀺 𑀚𑀸𑀢𑀺𑀬𑁄 𑀘𑀢𑀲𑁆𑀲𑁄𑀧𑀺 𑀚𑀸𑀢𑀺𑀬𑁄 𑀧𑀜𑁆𑀘𑀧𑀺 𑀚𑀸𑀢𑀺𑀬𑁄 𑀤𑀲𑀧𑀺 𑀚𑀸𑀢𑀺𑀬𑁄 𑀯𑀻𑀲𑀫𑁆𑀧𑀺 𑀚𑀸𑀢𑀺𑀬𑁄 𑀢𑀺𑀁𑀲𑀫𑁆𑀧𑀺 𑀚𑀸𑀢𑀺𑀬𑁄 𑀘𑀢𑁆𑀢𑀸𑀮𑀻𑀲𑀫𑁆𑀧𑀺 𑀚𑀸𑀢𑀺𑀬𑁄 𑀧𑀜𑁆𑀜𑀸𑀲𑀫𑁆𑀧𑀺 𑀚𑀸𑀢𑀺𑀬𑁄 𑀚𑀸𑀢𑀺𑀲𑀢𑀫𑁆𑀧𑀺 𑀚𑀸𑀢𑀺𑀲𑀳𑀲𑁆𑀲𑀫𑁆𑀧𑀺 𑀚𑀸𑀢𑀺𑀲𑀢𑀲𑀳𑀲𑁆𑀲𑀫𑁆𑀧𑀺 𑀅𑀦𑁂𑀓𑁂𑀧𑀺 𑀲𑀁𑀯𑀝𑁆𑀝𑀓𑀧𑁆𑀧𑁂 𑀅𑀦𑁂𑀓𑁂𑀧𑀺 𑀯𑀺𑀯𑀝𑁆𑀝𑀓𑀧𑁆𑀧𑁂 𑀅𑀦𑁂𑀓𑁂𑀧𑀺 𑀲𑀁𑀯𑀝𑁆𑀝𑀯𑀺𑀯𑀝𑁆𑀝𑀓𑀧𑁆𑀧𑁂 𑁋 ‘𑀅𑀫𑀼𑀢𑁆𑀭𑀸𑀲𑀺𑀁 𑀏𑀯𑀁𑀦𑀸𑀫𑁄 𑀏𑀯𑀁𑀕𑁄𑀢𑁆𑀢𑁄 𑀏𑀯𑀁𑀯𑀡𑁆𑀡𑁄 𑀏𑀯𑀫𑀸𑀳𑀸𑀭𑁄 𑀏𑀯𑀁𑀲𑀼𑀔𑀤𑀼𑀓𑁆𑀔𑀧𑁆𑀧𑀝𑀺𑀲𑀁𑀯𑁂𑀤𑀻 𑀏𑀯𑀫𑀸𑀬𑀼𑀧𑀭𑀺𑀬𑀦𑁆𑀢𑁄, 𑀲𑁄 𑀢𑀢𑁄 𑀘𑀼𑀢𑁄 𑀅𑀫𑀼𑀢𑁆𑀭 𑀉𑀤𑀧𑀸𑀤𑀺𑀁; 𑀢𑀢𑁆𑀭𑀸𑀧𑀸𑀲𑀺𑀁 𑀏𑀯𑀁𑀦𑀸𑀫𑁄 𑀏𑀯𑀁𑀕𑁄𑀢𑁆𑀢𑁄 𑀏𑀯𑀁𑀯𑀡𑁆𑀡𑁄 𑀏𑀯𑀫𑀸𑀳𑀸𑀭𑁄 𑀏𑀯𑀁𑀲𑀼𑀔𑀤𑀼𑀓𑁆𑀔𑀧𑁆𑀧𑀝𑀺𑀲𑀁𑀯𑁂𑀤𑀻 𑀏𑀯𑀫𑀸𑀬𑀼𑀧𑀭𑀺𑀬𑀦𑁆𑀢𑁄, 𑀲𑁄 𑀢𑀢𑁄 𑀘𑀼𑀢𑁄 𑀇𑀥𑀽𑀧𑀧𑀦𑁆𑀦𑁄’𑀢𑀺. 𑀇𑀢𑀺 𑀲𑀸𑀓𑀸𑀭𑀁 𑀲𑀉𑀤𑁆𑀤𑁂𑀲𑀁 𑀅𑀦𑁂𑀓𑀯𑀺𑀳𑀺𑀢𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀅𑀦𑀼𑀲𑁆𑀲𑀭𑀢𑀺. 𑀬𑀫𑁆𑀧𑀺, 𑀪𑀦𑁆𑀢𑁂, 𑀪𑀕𑀯𑀸 𑀅𑀦𑁂𑀓𑀯𑀺𑀳𑀺𑀢𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀅𑀦𑀼𑀲𑁆𑀲𑀭𑀢𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀏𑀓𑀫𑁆𑀧𑀺 𑀚𑀸𑀢𑀺𑀁 𑀤𑁆𑀯𑁂𑀧𑀺 𑀚𑀸𑀢𑀺𑀬𑁄…𑀧𑁂… 𑀇𑀢𑀺 𑀲𑀸𑀓𑀸𑀭𑀁 𑀲𑀉𑀤𑁆𑀤𑁂𑀲𑀁 𑀅𑀦𑁂𑀓𑀯𑀺𑀳𑀺𑀢𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀅𑀦𑀼𑀲𑁆𑀲𑀭𑀢𑀺, 𑀇𑀤𑀫𑁆𑀧𑀺 𑀔𑁄 𑀅𑀳𑀁, 𑀪𑀦𑁆𑀢𑁂, 𑀅𑀢𑁆𑀣𑀯𑀲𑀁 𑀲𑀫𑁆𑀧𑀲𑁆𑀲𑀫𑀸𑀦𑁄 𑀪𑀕𑀯𑀢𑀺 𑀏𑀯𑀭𑀽𑀧𑀁 𑀧𑀭𑀫𑀦𑀺𑀧𑀘𑁆𑀘𑀓𑀸𑀭𑀁 𑀓𑀭𑁄𑀫𑀺, 𑀫𑁂𑀢𑁆𑀢𑀽𑀧𑀳𑀸𑀭𑀁 𑀉𑀧𑀤𑀁𑀲𑁂𑀫𑀺.

‘‘𑀧𑀼𑀦 𑀘𑀧𑀭𑀁, 𑀪𑀦𑁆𑀢𑁂, 𑀪𑀕𑀯𑀸 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀯𑀺𑀲𑀼𑀤𑁆𑀥𑁂𑀦 𑀅𑀢𑀺𑀓𑁆𑀓𑀦𑁆𑀢𑀫𑀸𑀦𑀼𑀲𑀓𑁂𑀦 𑀲𑀢𑁆𑀢𑁂 𑀧𑀲𑁆𑀲𑀢𑀺 𑀘𑀯𑀫𑀸𑀦𑁂 𑀉𑀧𑀧𑀚𑁆𑀚𑀫𑀸𑀦𑁂 𑀳𑀻𑀦𑁂 𑀧𑀡𑀻𑀢𑁂 𑀲𑀼𑀯𑀡𑁆𑀡𑁂 𑀤𑀼𑀩𑁆𑀩𑀡𑁆𑀡𑁂, 𑀲𑀼𑀕𑀢𑁂 𑀤𑀼𑀕𑁆𑀕𑀢𑁂 𑀬𑀣𑀸𑀓𑀫𑁆𑀫𑀽𑀧𑀕𑁂 𑀲𑀢𑁆𑀢𑁂 𑀧𑀚𑀸𑀦𑀸𑀢𑀺 𑁋 ‘𑀇𑀫𑁂 𑀯𑀢 𑀪𑁄𑀦𑁆𑀢𑁄 𑀲𑀢𑁆𑀢𑀸 𑀓𑀸𑀬𑀤𑀼𑀘𑁆𑀘𑀭𑀺𑀢𑁂𑀦 𑀲𑀫𑀦𑁆𑀦𑀸𑀕𑀢𑀸 𑀯𑀘𑀻𑀤𑀼𑀘𑁆𑀘𑀭𑀺𑀢𑁂𑀦 𑀲𑀫𑀦𑁆𑀦𑀸𑀕𑀢𑀸 𑀫𑀦𑁄𑀤𑀼𑀘𑁆𑀘𑀭𑀺𑀢𑁂𑀦 𑀲𑀫𑀦𑁆𑀦𑀸𑀕𑀢𑀸 𑀅𑀭𑀺𑀬𑀸𑀦𑀁 𑀉𑀧𑀯𑀸𑀤𑀓𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀫𑁆𑀫𑀲𑀫𑀸𑀤𑀸𑀦𑀸, 𑀢𑁂 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀦𑀺𑀭𑀬𑀁 𑀉𑀧𑀧𑀦𑁆𑀦𑀸; 𑀇𑀫𑁂 𑀯𑀸 𑀧𑀦 𑀪𑁄𑀦𑁆𑀢𑁄 𑀲𑀢𑁆𑀢𑀸 𑀓𑀸𑀬𑀲𑀼𑀘𑀭𑀺𑀢𑁂𑀦 𑀲𑀫𑀦𑁆𑀦𑀸𑀕𑀢𑀸 𑀯𑀘𑀻𑀲𑀼𑀘𑀭𑀺𑀢𑁂𑀦 𑀲𑀫𑀦𑁆𑀦𑀸𑀕𑀢𑀸 𑀫𑀦𑁄𑀲𑀼𑀘𑀭𑀺𑀢𑁂𑀦 𑀲𑀫𑀦𑁆𑀦𑀸𑀕𑀢𑀸 𑀅𑀭𑀺𑀬𑀸𑀦𑀁 𑀅𑀦𑀼𑀧𑀯𑀸𑀤𑀓𑀸 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑀸 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑀫𑁆𑀫𑀲𑀫𑀸𑀤𑀸𑀦𑀸, 𑀢𑁂 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀦𑁆𑀦𑀸’𑀢𑀺, 𑀇𑀢𑀺 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀯𑀺𑀲𑀼𑀤𑁆𑀥𑁂𑀦 𑀅𑀢𑀺𑀓𑁆𑀓𑀦𑁆𑀢𑀫𑀸𑀦𑀼𑀲𑀓𑁂𑀦 𑀲𑀢𑁆𑀢𑁂 𑀧𑀲𑁆𑀲𑀢𑀺…𑀧𑁂… 𑀬𑀣𑀸𑀓𑀫𑁆𑀫𑀽𑀧𑀕𑁂 𑀲𑀢𑁆𑀢𑁂 𑀧𑀚𑀸𑀦𑀸𑀢𑀺. 𑀬𑀫𑁆𑀧𑀺, 𑀪𑀦𑁆𑀢𑁂, 𑀪𑀕𑀯𑀸 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀯𑀺𑀲𑀼𑀤𑁆𑀥𑁂𑀦 𑀅𑀢𑀺𑀓𑁆𑀓𑀦𑁆𑀢𑀫𑀸𑀦𑀼𑀲𑀓𑁂𑀦…𑀧𑁂… 𑀬𑀣𑀸𑀓𑀫𑁆𑀫𑀽𑀧𑀕𑁂 𑀲𑀢𑁆𑀢𑁂 𑀧𑀚𑀸𑀦𑀸𑀢𑀺, 𑀇𑀤𑀫𑁆𑀧𑀺 𑀔𑁄 𑀅𑀳𑀁, 𑀪𑀦𑁆𑀢𑁂, 𑀅𑀢𑁆𑀣𑀯𑀲𑀁 𑀲𑀫𑁆𑀧𑀲𑁆𑀲𑀫𑀸𑀦𑁄 𑀪𑀕𑀯𑀢𑀺 𑀏𑀯𑀭𑀽𑀧𑀁 𑀧𑀭𑀫𑀦𑀺𑀧𑀘𑁆𑀘𑀓𑀸𑀭𑀁 𑀓𑀭𑁄𑀫𑀺, 𑀫𑁂𑀢𑁆𑀢𑀽𑀧𑀳𑀸𑀭𑀁 𑀉𑀧𑀤𑀁𑀲𑁂𑀫𑀺.

‘‘𑀧𑀼𑀦 𑀘𑀧𑀭𑀁, 𑀪𑀦𑁆𑀢𑁂, 𑀪𑀕𑀯𑀸 𑀆𑀲𑀯𑀸𑀦𑀁 𑀔𑀬𑀸 𑀅𑀦𑀸𑀲𑀯𑀁 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀁 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀬𑀫𑁆𑀧𑀺, 𑀪𑀦𑁆𑀢𑁂, 𑀪𑀕𑀯𑀸 𑀆𑀲𑀯𑀸𑀦𑀁 𑀔𑀬𑀸 𑀅𑀦𑀸𑀲𑀯𑀁 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁…𑀧𑁂… 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺, 𑀇𑀤𑀫𑁆𑀧𑀺 𑀔𑁄 𑀅𑀳𑀁, 𑀪𑀦𑁆𑀢𑁂, 𑀅𑀢𑁆𑀣𑀯𑀲𑀁 𑀲𑀫𑁆𑀧𑀲𑁆𑀲𑀫𑀸𑀦𑁄 𑀪𑀕𑀯𑀢𑀺 𑀏𑀯𑀭𑀽𑀧𑀁 𑀧𑀭𑀫𑀦𑀺𑀧𑀘𑁆𑀘𑀓𑀸𑀭𑀁 𑀓𑀭𑁄𑀫𑀺, 𑀫𑁂𑀢𑁆𑀢𑀽𑀧𑀳𑀸𑀭𑀁 𑀉𑀧𑀤𑀁𑀲𑁂𑀫𑀺.

‘‘𑀳𑀦𑁆𑀤 𑀘 𑀤𑀸𑀦𑀺 𑀫𑀬𑀁, 𑀪𑀦𑁆𑀢𑁂, 𑀕𑀘𑁆𑀙𑀸𑀫. 𑀩𑀳𑀼𑀓𑀺𑀘𑁆𑀘𑀸 𑀫𑀬𑀁 𑀩𑀳𑀼𑀓𑀭𑀡𑀻𑀬𑀸’’𑀢𑀺. ‘‘𑀬𑀲𑁆𑀲 𑀤𑀸𑀦𑀺 𑀢𑁆𑀯𑀁, 𑀫𑀳𑀸𑀭𑀸𑀚, 𑀓𑀸𑀮𑀁 𑀫𑀜𑁆𑀜𑀲𑀻’’𑀢𑀺. 𑀅𑀣 𑀔𑁄 𑀭𑀸𑀚𑀸 𑀧𑀲𑁂𑀦𑀤𑀺 𑀓𑁄𑀲𑀮𑁄 𑀉𑀝𑁆𑀞𑀸𑀬𑀸𑀲𑀦𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀧𑀓𑁆𑀓𑀸𑀫𑀻𑀢𑀺. 𑀤𑀲𑀫𑀁.

𑀫𑀳𑀸𑀯𑀕𑁆𑀕𑁄 𑀢𑀢𑀺𑀬𑁄.