𑁯. 𑀧𑀞𑀫𑀅𑀭𑀺𑀬𑀸𑀯𑀸𑀲𑀲𑀼𑀢𑁆𑀢𑀁

𑁧𑁯. [𑀤𑀻. 𑀦𑀺. 𑁩.𑁩𑁪𑁮, 𑁩𑁬𑁦] ‘‘𑀤𑀲𑀬𑀺𑀫𑁂, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀸𑀯𑀸𑀲𑀸, 𑀬𑁂 𑀅𑀭𑀺𑀬𑀸 𑀆𑀯𑀲𑀺𑀁𑀲𑀼 𑀯𑀸 𑀆𑀯𑀲𑀦𑁆𑀢𑀺 𑀯𑀸 𑀆𑀯𑀲𑀺𑀲𑁆𑀲𑀦𑁆𑀢𑀺 𑀯𑀸. 𑀓𑀢𑀫𑁂 𑀤𑀲? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀧𑀜𑁆𑀘𑀗𑁆𑀕𑀯𑀺𑀧𑁆𑀧𑀳𑀻𑀦𑁄 𑀳𑁄𑀢𑀺, 𑀙𑀴𑀗𑁆𑀕𑀲𑀫𑀦𑁆𑀦𑀸𑀕𑀢𑁄, 𑀏𑀓𑀸𑀭𑀓𑁆𑀔𑁄, 𑀘𑀢𑀼𑀭𑀸𑀧𑀲𑁆𑀲𑁂𑀦𑁄, 𑀧𑀡𑀼𑀦𑁆𑀦𑀧𑀘𑁆𑀘𑁂𑀓𑀲𑀘𑁆𑀘𑁄 [𑀧𑀦𑀼𑀡𑁆𑀡𑀧𑀘𑁆𑀘𑁂𑀓𑀲𑀘𑁆𑀘𑁄 (𑀓.)], 𑀲𑀫𑀯𑀬𑀲𑀝𑁆𑀞𑁂𑀲𑀦𑁄, 𑀅𑀦𑀸𑀯𑀺𑀮𑀲𑀗𑁆𑀓𑀧𑁆𑀧𑁄, 𑀧𑀲𑁆𑀲𑀤𑁆𑀥𑀓𑀸𑀬𑀲𑀗𑁆𑀔𑀸𑀭𑁄, 𑀲𑀼𑀯𑀺𑀫𑀼𑀢𑁆𑀢𑀘𑀺𑀢𑁆𑀢𑁄, 𑀲𑀼𑀯𑀺𑀫𑀼𑀢𑁆𑀢𑀧𑀜𑁆𑀜𑁄. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀤𑀲 𑀅𑀭𑀺𑀬𑀸𑀯𑀸𑀲𑀸, 𑀬𑁂 𑀅𑀭𑀺𑀬𑀸 𑀆𑀯𑀲𑀺𑀁𑀲𑀼 𑀯𑀸 𑀆𑀯𑀲𑀦𑁆𑀢𑀺 𑀯𑀸 𑀆𑀯𑀲𑀺𑀲𑁆𑀲𑀦𑁆𑀢𑀺 𑀯𑀸’’𑀢𑀺. 𑀦𑀯𑀫𑀁.