১. উক্কোটনভেদাদি

৩৪০. [চূল়ৰ. ২১৫; পরি. ২৭৫] চত্তারি অধিকরণানি. ৰিৰাদাধিকরণং, অনুৰাদাধিকরণং, আপত্তাধিকরণং, কিচ্চাধিকরণং – ইমানি চত্তারি অধিকরণানি.

ইমেসং চতুন্নং অধিকরণানং কতি উক্কোটা? ইমেসং চতুন্নং অধিকরণানং দস উক্কোটা. ৰিৰাদাধিকরণস্স দ্ৰে উক্কোটা, অনুৰাদাধিকরণস্স চত্তারো উক্কোটা, আপত্তাধিকরণস্স তযো উক্কোটা, কিচ্চাধিকরণস্স একো উক্কোটো – ইমেসং চতুন্নং অধিকরণানং ইমে দস উক্কোটা.

ৰিৰাদাধিকরণং উক্কোটেন্তো কতি সমথে উক্কোটেতি? অনুৰাদাধিকরণং উক্কোটেন্তো কতি সমথে উক্কোটেতি? আপত্তাধিকরণং উক্কোটেন্তো কতি সমথে উক্কোটেতি? কিচ্চাধিকরণং উক্কোটেন্তো কতি সমথে উক্কোটেতি?

ৰিৰাদাধিকরণং উক্কোটেন্তো দ্ৰে সমথে উক্কোটেতি. অনুৰাদাধিকরণং উক্কোটেন্তো চত্তারো সমথে উক্কোটেতি. আপত্তাধিকরণং উক্কোটেন্তো তযো সমথে উক্কোটেতি. কিচ্চাধিকরণং উক্কোটেন্তো একং সমথং উক্কোটেতি.

৩৪১. কতি উক্কোটা? কতিহাকারেহি উক্কোটনং পসৰতি? কতিহঙ্গেহি সমন্নাগতো পুগ্গলো অধিকরণং উক্কোটেতি? কতি পুগ্গলা অধিকরণং উক্কোটেন্তা আপত্তিং আপজ্জন্তি?

দ্ৰাদস উক্কোটা. দসহাকারেহি উক্কোটনং পসৰতি. চতূহঙ্গেহি সমন্নাগতো পুগ্গলো অধিকরণং উক্কোটেতি. চত্তারো পুগ্গলা অধিকরণং উক্কোটেন্তা আপত্তিং আপজ্জন্তি?

কতমে দ্ৰাদস উক্কোটা? অকতং কম্মং, দুক্কটং কম্মং, পুন কাতব্বং কম্মং, অনিহতং, দুন্নিহতং, পুন নিহনিতব্বং, অৰিনিচ্ছিতং, দুৰিনিচ্ছিতং, পুন ৰিনিচ্ছিতব্বং, অৰূপসন্তং, দুৰূপসন্তং, পুন ৰূপসমেতব্বন্তি – ইমে দ্ৰাদস উক্কোটা.

কতমেহি দসহাকারেহি উক্কোটনং পসৰতি? তত্থ জাতকং অধিকরণং উক্কোটেতি, তত্থ জাতকং ৰূপসন্তং অধিকরণং উক্কোটেতি, অন্তরামগ্গে অধিকরণং উক্কোটেতি, অন্তরামগ্গে ৰূপসন্তং অধিকরণং উক্কোটেতি, তত্থ গতং অধিকরণং উক্কোটেতি, তত্থ গতং ৰূপসন্তং অধিকরণং উক্কোটেতি, সতিৰিনযং উক্কোটেতি, অমূল়্হৰিনযং উক্কোটেতি, তস্সপাপিযসিকং উক্কোটেতি, তিণৰত্থারকং উক্কোটেতি – ইমেহি দসহাকারেহি উক্কোটনং পসৰতি.

কতমেহি চতূহঙ্গেহি সমন্নাগতো পুগ্গলো অধিকরণং উক্কোটেতি? ছন্দাগতিং গচ্ছন্তো অধিকরণং উক্কোটেতি, দোসাগতিং গচ্ছন্তো অধিকরণং উক্কোটেতি, মোহাগতিং গচ্ছন্তো অধিকরণং উক্কোটেতি, ভযাগতিং গচ্ছন্তো অধিকরণং উক্কোটেতি – ইমেহি চতূহঙ্গেহি সমন্নাগতো পুগ্গলো অধিকরণং উক্কোটেতি.

কতমে চত্তারো পুগ্গলা অধিকরণং উক্কোটেন্তা আপত্তিং আপজ্জন্তি? তদহুপসম্পন্নো উক্কোটেতি উক্কোটনকং পাচিত্তিযং, আগন্তুকো উক্কোটেতি উক্কোটনকং পাচিত্তিযং, কারকো উক্কোটেতি উক্কোটনকং পাচিত্তিযং, ছন্দদাযকো উক্কোটেতি উক্কোটনকং পাচিত্তিযং – ইমে চত্তারো পুগ্গলা অধিকরণং উক্কোটেন্তা আপত্তিং আপজ্জন্তি.