৩. তিকৰারো

৩২৩. অত্থাপত্তি তিট্ঠন্তে ভগৰতি আপজ্জতি, নো পরিনিব্বুতে; অত্থাপত্তি পরিনিব্বুতে ভগৰতি আপজ্জতি, নো তিট্ঠন্তে; অত্থাপত্তি তিট্ঠন্তেপি ভগৰতি আপজ্জতি পরিনিব্বুতেপি. অত্থাপত্তি কালে আপজ্জতি, নো ৰিকালে; অত্থাপত্তি ৰিকালে আপজ্জতি, নো কালে; অত্থাপত্তি কালে চেৰ আপজ্জতি ৰিকালে চ. অত্থাপত্তি রত্তিং আপজ্জতি, নো দিৰা; অত্থাপত্তি দিৰা আপজ্জতি, নো রত্তিং; অত্থাপত্তি রত্তিঞ্চেৰ আপজ্জতি দিৰা চ. অত্থাপত্তি দসৰস্সো আপজ্জতি, নো ঊনদসৰস্সো; অত্থাপত্তি ঊনদসৰস্সো আপজ্জতি, নো দসৰস্সো; অত্থাপত্তি দসৰস্সো চেৰ আপজ্জতি ঊনদসৰস্সো চ. অত্থাপত্তি পঞ্চৰস্সো আপজ্জতি, নো ঊনপঞ্চৰস্সো; অত্থাপত্তি ঊনপঞ্চৰস্সো আপজ্জতি, নো পঞ্চৰস্সো; অত্থাপত্তি পঞ্চৰস্সো চেৰ আপজ্জতি ঊনপঞ্চৰস্সো চ. অত্থাপত্তি কুসলচিত্তো আপজ্জতি; অত্থাপত্তি অকুসলচিত্তো আপজ্জতি; অত্থাপত্তি অব্যাকতচিত্তো আপজ্জতি. অত্থাপত্তি সুখৰেদনাসমঙ্গী আপজ্জতি; অত্থাপত্তি দুক্খৰেদনাসমঙ্গী আপজ্জতি; অত্থাপত্তি অদুক্খমসুখৰেদনাসমঙ্গী আপজ্জতি. তীণি চোদনাৰত্থূনি – দিট্ঠেন, সুতেন, পরিসঙ্কায. তযো সলাকগ্গাহা – গুল়্হকো, ৰিৰটকো [ৰিৰট্টকো (ক.)], সকণ্ণজপ্পকো. তযো পটিক্খেপা – মহিচ্ছতা, অসন্তুট্ঠিতা [অসন্তুট্ঠতা (স্যা.)], অসল্লেখতা. তযো অনুঞ্ঞাতা – অপ্পিচ্ছতা, সন্তুট্ঠিতা, সল্লেখতা. অপরেপি তযো পটিক্খেপা – মহিচ্ছতা, অসন্তুট্ঠিতা, অমত্তঞ্ঞুতা. তযো অনুঞ্ঞাতা – অপ্পিচ্ছতা, সন্তুট্ঠিতা, মত্তঞ্ঞুতা. তিস্সো পঞ্ঞত্তিযো – পঞ্ঞত্তি, অনুপঞ্ঞত্তি, অনুপ্পন্নপঞ্ঞত্তি. অপরাপি তিস্সো পঞ্ঞত্তিযো – সব্বত্থপঞ্ঞত্তি, পদেসপঞ্ঞত্তি, সাধারণপঞ্ঞত্তি. অপরাপি তিস্সো পঞ্ঞত্তিযো – অসাধারণপঞ্ঞত্তি, একতোপঞ্ঞত্তি, উভতোপঞ্ঞত্তি.

অত্থাপত্তি বালো আপজ্জতি, নো পণ্ডিতো; অত্থাপত্তি পণ্ডিতো আপজ্জতি, নো বালো; অত্থাপত্তি বালো চেৰ আপজ্জতি পণ্ডিতো চ. অত্থাপত্তি কাল়ে আপজ্জতি, নো জুণ্হে; অত্থাপত্তি জুণ্হে আপজ্জতি, নো কাল়ে; অত্থাপত্তি কাল়ে চেৰ আপজ্জতি জুণ্হে চ. অত্থি কাল়ে কপ্পতি, নো জুণ্হে; অত্থি জুণ্হে কপ্পতি, নো কাল়ে; অত্থি কাল়ে চেৰ কপ্পতি জুণ্হে চ. অত্থাপত্তি হেমন্তে আপজ্জতি, নো গিম্হে নো ৰস্সে; অত্থাপত্তি গিম্হে আপজ্জতি, নো হেমন্তে নো ৰস্সে; অত্থাপত্তি ৰস্সে আপজ্জতি, নো হেমন্তে নো গিম্হে. অত্থাপত্তি সঙ্ঘো আপজ্জতি, ন গণো ন পুগ্গলো; অত্থাপত্তি গণো আপজ্জতি, ন সঙ্ঘো ন পুগ্গলো; অত্থাপত্তি পুগ্গলো আপজ্জতি, ন সঙ্ঘো ন গণো. অত্থি সঙ্ঘস্স কপ্পতি, ন গণস্স ন পুগ্গলস্স; অত্থি গণস্স কপ্পতি, ন সঙ্ঘস্স ন পুগ্গলস্স; অত্থি পুগ্গলস্স কপ্পতি, ন সঙ্ঘস্স ন গণস্স. তিস্সো ছাদনা ৰত্থুং ছাদেতি, নো আপত্তিং; আপত্তিং ছাদেতি, নো ৰত্থুং; ৰত্থুঞ্চেৰ ছাদেতি আপত্তিঞ্চ. তিস্সো পটিচ্ছাদিযো – জন্তাঘরপটিচ্ছাদি, উদকপটিচ্ছাদি, ৰত্থপটিচ্ছাদি. [অ. নি. ৩.১৩২] তীণি পটিচ্ছন্নানি ৰহন্তি, নো ৰিৰটানি – মাতুগামো পটিচ্ছন্নো ৰহতি, নো ৰিৰটো; ব্রাহ্মণানং মন্তা পটিচ্ছন্না ৰহন্তি, নো ৰিৰটা; মিচ্ছাদিট্ঠি পটিচ্ছন্না ৰহতি, নো ৰিৰটা. তীণি ৰিৰটানি ৰিরোচন্তি, নো পটিচ্ছন্নানি – চন্দমণ্ডলং ৰিৰটং ৰিরোচতি, নো পটিচ্ছন্নং; সূরিযমণ্ডলং ৰিৰটং ৰিরোচতি, নো পটিচ্ছন্নং; তথাগতপ্পৰেদিতো ধম্মৰিনযো ৰিৰটো ৰিরোচতি, নো পটিচ্ছন্নো. তযো সেনাসনগ্গাহা – পুরিমকো, পচ্ছিমকো, অন্তরামুত্তকো. অত্থাপত্তি গিলানো আপজ্জতি, নো অগিলানো; অত্থাপত্তি অগিলানো আপজ্জতি, নো গিলানো; অত্থাপত্তি গিলানো চেৰ আপজ্জতি অগিলানো চ.

তীণি অধম্মিকানি পাতিমোক্খট্ঠপনানি. তীণি ধম্মিকানি পাতিমোক্খট্ঠপনানি. তযো পরিৰাসা – পটিচ্ছন্নপরিৰাসো, অপ্পটিচ্ছন্নপরিৰাসো, সুদ্ধন্তপরিৰাসো. তযো মানত্তা – পটিচ্ছন্নমানত্তং, অপ্পটিচ্ছন্নমানত্তং, পক্খমানত্তং. তযো পারিৰাসিকস্স ভিক্খুনো রত্তিচ্ছেদা – সহৰাসো, ৰিপ্পৰাসো, অনারোচনা. অত্থাপত্তি অন্তো আপজ্জতি, নো বহি; অত্থাপত্তি বহি আপজ্জতি, নো অন্তো; অত্থাপত্তি অন্তো চেৰ আপজ্জতি বহি চ. অত্থাপত্তি অন্তোসীমায আপজ্জতি, নো বহিসীমায; অত্থাপত্তি বহিসীমায আপজ্জতি, নো অন্তোসীমায; অত্থাপত্তি অন্তোসীমায চেৰ আপজ্জতি বহিসীমায চ. তীহাকারেহি আপত্তিং আপজ্জতি – কাযেন আপজ্জতি, ৰাচায আপজ্জতি, কাযেন ৰাচায আপজ্জতি. অপরেহিপি তীহাকারেহি আপত্তিং আপজ্জতি – সঙ্ঘমজ্ঝে, গণমজ্ঝে, পুগ্গলস্স সন্তিকে. তীহাকারেহি আপত্তিযা ৰুট্ঠাতি – কাযেন ৰুট্ঠাতি, ৰাচায ৰুট্ঠাতি, কাযেন ৰাচায ৰুট্ঠাতি. অপরেহিপি তীহাকারেহি আপত্তিযা ৰুট্ঠাতি – সঙ্ঘমজ্ঝে, গণমজ্ঝে, পুগ্গলস্স সন্তিকে. তীণি অধম্মিকানি অমূল়্হৰিনযস্স দানানি. তীণি ধম্মিকানি অমূল়্হৰিনযস্স দানানি.

[চূল়ৰ. ৬] তীহঙ্গেহি সমন্নাগতস্স ভিক্খুনো আকঙ্খমানো সঙ্ঘো তজ্জনীযকম্মং করেয্য – ভণ্ডনকারকো হোতি কলহকারকো ৰিৰাদকারকো ভস্সকারকো সঙ্ঘে অধিকরণকারকো, বালো হোতি অব্যত্তো, আপত্তিবহুলো অনপদানো গিহিসংসট্ঠো ৰিহরতি অননুলোমিকেহি গিহিসংসগ্গেহি. [চূল়ৰ. ১৫] তীহঙ্গেহি সমন্নাগতস্স ভিক্খুনো আকঙ্খমানো সঙ্ঘো নিযস্সকম্মং করেয্য – ভণ্ডনকারকো হোতি…পে… সঙ্ঘে অধিকরণকারকো, বালো হোতি অব্যত্তো, আপত্তিবহুলো অনপদানো গিহিসংসট্ঠো ৰিহরতি অননুলোমিকেহি গিহিসংসগ্গেহি. [চূল়ৰ. ২৭] তীহঙ্গেহি সমন্নাগতস্স ভিক্খুনো আকঙ্খমানো সঙ্ঘো পব্বাজনীযকম্মং করেয্য – ভণ্ডনকারকো হোতি…পে… সঙ্ঘে অধিকরণকারকো, বালো হোতি অব্যত্তো, আপত্তিবহুলো অনপদানো কুলদূককো হোতি পাপসমাচারো পাপসমাচারা দিস্সন্তি চেৰ সুয্যন্তি চ. তীহঙ্গেহি সমন্নাগতস্স ভিক্খুনো আকঙ্খমানো সঙ্ঘো পটিসারণীযকম্মং করেয্য – ভণ্ডনকারকো হোতি…পে… সঙ্ঘে অধিকরণকারকো, বালো হোতি অব্যত্তো, আপত্তি বহুলো অনপদানো গিহী অক্কোসতি পরিভাসতি. [চূল়ৰ. ৫০] তীহঙ্গেহি সমন্নাগতস্স ভিক্খুনো আকঙ্খমানো সঙ্ঘো আপত্তিযা অদস্সনে উক্খেপনীযকম্মং করেয্য – ভণ্ডনকারকো হোতি…পে… সঙ্ঘে অধিকরণকারকো, বালো হোতি অব্যত্তো, আপত্তিবহুলো অনপদানো আপত্তিং আপজ্জিত্ৰা ন ইচ্ছতি আপত্তিং পস্সিতুং. [চূল়ৰ. ৫৯] তীহঙ্গেহি সমন্নাগতস্স ভিক্খুনো আকঙ্খমানো সঙ্ঘো আপত্তিযা অপ্পটিকম্মে উক্খেপনীযকম্মং করেয্য – ভণ্ডনকারকো হোতি…পে… সঙ্ঘে অধিকরণকারকো, বালো হোতি অব্যত্তো, আপত্তিবহুলো অনপদানো আপত্তিং আপজ্জিত্ৰা ন ইচ্ছতি আপত্তিং পটিকাতুং. [চূল়ৰ. ৬৯] তীহঙ্গেহি সমন্নাগতস্স ভিক্খুনো আকঙ্খমানো সঙ্ঘো পাপিকায দিট্ঠিযা অপ্পটিনিস্সগ্গে উক্খেপনীযকম্মং করেয্য – ভণ্ডনকারকো হোতি…পে… সঙ্ঘে অধিকরণকারকো, বালো হোতি অব্যত্তো, আপত্তিবহুলো অনপদানো ন ইচ্ছতি পাপিকং দিট্ঠিং পটিনিস্সজ্জিতুং.

তীহঙ্গেহি সমন্নাগতস্স ভিক্খুনো আকঙ্খমানো সঙ্ঘো আগাল়্হায চেতেয্য – ভণ্ডনকারকো হোতি কলহকারকো ৰিৰাদকারকো ভস্সকারকো সঙ্ঘে অধিকরণকারকো, বালো হোতি অব্যত্তো আপত্তিবহুলো অনপদানো, গিহিসংসট্ঠো ৰিহরতি অননুলোমিকেহি গিহিসংসগ্গেহি. তীহঙ্গেহি সমন্নাগতস্স ভিক্খুনো কম্মং কাতব্বং – অলজ্জী চ হোতি, বালো চ, অপকতত্তো চ. অপরেহিপি তীহঙ্গেহি সমন্নাগতস্স ভিক্খুনো কম্মং কাতব্বং – অধিসীলে সীলৰিপন্নো হোতি, অজ্ঝাচারে আচারৰিপন্নো হোতি, অতিদিট্ঠিযা দিট্ঠিৰিপন্নো হোতি. অপরেহিপি তীহঙ্গেহি সমন্নাগতস্স ভিক্খুনো কম্মং কাতব্বং – কাযিকেন দৰেন সমন্নাগতো হোতি, ৰাচসিকেন দৰেন সমন্নাগতো হোতি, কাযিকৰাচসিকেন দৰেন সমন্নাগতো হোতি. অপরেহিপি তীহঙ্গেহি সমন্নাগতস্স ভিক্খুনো কম্মং কাতব্বং – কাযিকেন অনাচারেন সমন্নাগতো হোতি, ৰাচসিকেন অনাচারেন সমন্নাগতো হোতি, কাযিকৰাচসিকেন অনাচারেন সমন্নাগতো হোতি. অপরেহিপি তীহঙ্গেহি সমন্নাগতস্স ভিক্খুনো কম্মং কাতব্বং – কাযিকেন উপঘাতিকেন সমন্নাগতো হোতি, ৰাচসিকেন উপঘাতিকেন সমন্নাগতো হোতি, কাযিকৰাচসিকেন উপঘাতিকেন সমন্নাগতো হোতি. অপরেহিপি তীহঙ্গেহি সমন্নাগতস্স ভিক্খুনো কম্মং কাতব্বং – কাযিকেন মিচ্ছাজীৰেন সমন্নাগতো হোতি, ৰাচসিকেন মিচ্ছাজীৰেন সমন্নাগতো হোতি, কাযিকৰাচসিকেন মিচ্ছাজীৰেন সমন্নাগতো হোতি. অপরেহিপি তীহঙ্গেহি সমন্নাগতস্স ভিক্খুনো কম্মং কাতব্বং – আপত্তিং আপন্নো কম্মকতো উপসম্পাদেতি, নিস্সযং দেতি, সামণেরং উপট্ঠাপেতি. অপরেহিপি তীহঙ্গেহি সমন্নাগতস্স ভিক্খুনো কম্মং কাতব্বং – যায আপত্তিযা সঙ্ঘেন কম্মং কতং হোতি তং আপত্তিং আপজ্জতি, অঞ্ঞং ৰা তাদিসিকং, ততো ৰা পাপিট্ঠতরং. অপরেহিপি তীহঙ্গেহি সমন্নাগতস্স ভিক্খুনো কম্মং কাতব্বং – বুদ্ধস্স অৰণ্ণং ভাসতি, ধম্মস্স অৰণ্ণং ভাসতি, সঙ্ঘস্স অৰণ্ণং ভাসতি.

তীহঙ্গেহি সমন্নাগতস্স ভিক্খুনো সঙ্ঘমজ্ঝে উপোসথং ঠপেন্তস্স – ‘‘অলং, ভিক্খু, মা ভণ্ডনং মা কলহং মা ৰিগ্গহং মা ৰিৰাদ’’ন্তি ওমদ্দিত্ৰা সঙ্ঘেন উপোসথো কাতব্বো – অলজ্জী চ হোতি, বালো চ, অপকতত্তো চ. তীহঙ্গেহি সমন্নাগতস্স ভিক্খুনো সঙ্ঘমজ্ঝে পৰারণং ঠপেন্তস্স – ‘‘অলং, ভিক্খু, মা ভণ্ডনং মা কলহং মা ৰিগ্গহং মা ৰিৰাদ’’ন্তি ওমদ্দিত্ৰা সঙ্ঘেন পৰারেতব্বং – অলজ্জী চ হোতি, বালো চ, অপকতত্তো চ. তীহঙ্গেহি সমন্নাগতস্স ভিক্খুনো ন কাচি সঙ্ঘসম্মুতি দাতব্বা – অলজ্জী চ হোতি, বালো চ, অপকতত্তো চ. তীহঙ্গেহি সমন্নাগতেন ভিক্খুনা সঙ্ঘে ন ৰোহরিতব্বং [সংঘো ন ৰোহরিতব্বো (স্যা.)] – অলজ্জী চ হোতি, বালো চ, অপকতত্তো চ. তীহঙ্গেহি সমন্নাগতো ভিক্খু ন কিস্মিং চি পচ্চেকট্ঠানে ঠপেতব্বো – অলজ্জী চ হোতি, বালো চ, অপকতত্তো চ. তীহঙ্গেহি সমন্নাগতস্স ভিক্খুনো নিস্সায ন ৰত্থব্বং – অলজ্জী চ হোতি, বালো চ, অপকতত্তো চ. তীহঙ্গেহি সমন্নাগতস্স ভিক্খুনো নিস্সযো ন দাতব্বো – অলজ্জী চ হোতি, বালো চ, অপকতত্তো চ. তীহঙ্গেহি সমন্নাগতস্স ভিক্খুনো ওকাসকম্মং কারাপেন্তস্স নালং ওকাসকম্মং কাতুং – অলজ্জী চ হোতি, বালো চ, অপকতত্তো চ. তীহঙ্গেহি সমন্নাগতস্স ভিক্খুনো সৰচনীযং নাদাতব্বং – অলজ্জী চ হোতি, বালো চ, অপকতত্তো চ. তীহঙ্গেহি সমন্নাগতস্স ভিক্খুনো ৰিনযো ন পুচ্ছিতব্বো – অলজ্জী চ হোতি, বালো চ, অপকতত্তো চ. তীহঙ্গেহি সমন্নাগতেন ভিক্খুনা ৰিনযো ন পুচ্ছিতব্বো – অলজ্জী চ হোতি, বালো চ, অপকতত্তো চ. তীহঙ্গেহি সমন্নাগতস্স ভিক্খুনো ৰিনযো ন ৰিস্সজ্জেতব্বো – অলজ্জী চ হোতি, বালো চ, অপকতত্তো চ. তীহঙ্গেহি সমন্নাগতেন ভিক্খুনা ৰিনযো ন ৰিস্সজ্জেতব্বো – অলজ্জী চ হোতি, বালো চ, অপকতত্তো চ. তীহঙ্গেহি সমন্নাগতস্স ভিক্খুনো অনুযোগো ন দাতব্বো – অলজ্জী চ হোতি, বালো চ, অপকতত্তো চ. তীহঙ্গেহি সমন্নাগতেন ভিক্খুনা সদ্ধিং ৰিনযো ন সাকচ্ছিতব্বো [সাকচ্ছাতব্বো (ক.)] – অলজ্জী চ হোতি, বালো চ, অপকতত্তো চ. তীহঙ্গেহি সমন্নাগতেন ভিক্খুনা ন উপসম্পাদেতব্বং ন নিস্সযো দাতব্বো ন সামণেরো উপট্ঠাপেতব্বো – অলজ্জী চ হোতি, বালো চ, অপকতত্তো চ.

তযো উপোসথা – চাতুদ্দসিকো, পন্নরসিকো, সামগ্গিউপোসথো. অপরেপি তযো উপোসথা – সঙ্ঘেউপোসথো, গণেউপোসথো, পুগ্গলেউপোসথো. অপরেপি তযো উপোসথা – সুত্তুদ্দেসোউপোসথো, পারিসুদ্ধিউপোসথো, অধিট্ঠানুপোসথো. তিস্সো পৰারণা – চাতুদ্দসিকা, পন্নরসিকা, সামগ্গিপৰারণা. অপরাপি তিস্সো পৰারণা – সঙ্ঘেপৰারণা, গণেপৰারণা, পুগ্গলেপৰারণা. অপরাপি তিস্সো পৰারণা – তেৰাচিকাপৰারণা, দ্ৰেৰাচিকাপৰারণা, সমানৰস্সিকাপৰারণা.

তযো আপাযিকা নেরযিকা – ইদমপ্পহায, যো চ অব্রহ্মচারী ব্রহ্মচারিপটিঞ্ঞো, যো চ সুদ্ধং ব্রহ্মচারিং পরিসুদ্ধব্রহ্মচরিযং চরন্তং অমূলকেন অব্রহ্মচরিযেন অনুদ্ধংসেতি, যো চাযং এৰংৰাদী এৰংদিট্ঠি [এৰংদিট্ঠী (সী.)] – ‘‘নত্থি কামেসু দোসো’’তি সো কামেসু পাতব্যতং আপজ্জতি. [অ. নি. ৩.৭০] তীণি অকুসলমূলানি – লোভো অকুসলমূলং, দোসো অকুসলমূলং, মোহো অকুসলমূলং. [অ. নি. ৩.৭০] তীণি কুসলমূলানি – অলোভো কুসলমূলং, অদোসো কুসলমূলং, অমোহো কুসলমূলং. তীণি দুচ্চরিতানি – কাযদুচ্চরিতং, ৰচীদুচ্চরিতং, মনোদুচ্চরিতং. তীণি সুচরিতানি – কাযসুচরিতং, ৰচীসুচরিতং, মনোসুচরিতং. তযো অত্থৰসে পটিচ্চ ভগৰতা কুলেসু তিকভোজনং পঞ্ঞত্তং – দুম্মঙ্কূনং পুগ্গলানং নিগ্গহায, পেসলানং ভিক্খূনং ফাসুৰিহারায, ‘‘মা পাপিচ্ছা পক্খং নিস্সায সঙ্ঘং ভিন্দেয্যু’’ন্তি কুলানুদ্দযতায চ. [চূল়ৰ. ৩৫০] তীহি অসদ্ধম্মেহি অভিভূতো পরিযাদিন্নচিত্তো দেৰদত্তো আপাযিকো নেরযিকো কপ্পট্ঠো অতেকিচ্ছো পাপিচ্ছতা পাপমিত্ততা ওরমত্তকেন ৰিসেসাধিগমেন অন্তরা ৰোসানং আপাদি. তিস্সো সম্মুতিযো – দণ্ডসম্মুতি, সিক্কাসম্মুতি, দণ্ডসিক্কাসম্মুতি. তিস্সো পাদুকা ধুৰট্ঠানিকা অসঙ্কমনীযা – ৰচ্চপাদুকা, পস্সাৰপাদুকা, আচমনপাদুকা. তিস্সো পাদঘংসনিযো – সক্খরং, কথলা, সমুদ্দফেণকোতি.

তিকং নিট্ঠিতং.

তস্সুদ্দানং –

তিট্ঠন্তে কালে রত্তিঞ্চ, দস পঞ্চ কুসলেন;

ৰেদনা চোদনা ৰত্থু, সলাকা দ্ৰে পটিক্খিপা.

পঞ্ঞত্তি অপরে দ্ৰে চ, বালো কাল়ে চ কপ্পতি;

হেমন্তে সঙ্ঘো সঙ্ঘস্স, ছাদনা চ পটিচ্ছাদি.

পটিচ্ছন্না ৰিৰটা চ, সেনাসনগিলাযনা;

পাতিমোক্খং পরিৰাসং, মানত্তা পারিৰাসিকা.

অন্তো অন্তো চ সীমায, আপজ্জতি পুনাপরে;

ৰুট্ঠাতি অপরে চেৰ, অমূল়্হৰিনযা দুৰে.

তজ্জনীযা নিযস্সা চ, পব্বাজপটিসারণী;

অদস্সনা পটিকম্মে, অনিস্সগ্গে চ দিট্ঠিযা.

আগাল়্হকম্মাধিসীলে, দৰানাচার ঘাতিকা;

আজীৰাপন্না তাদিসিকা, অৰণ্ণুপোসথেন চ.

পৰারণা সম্মুতি চ, ৰোহারপচ্চেকেন চ;

ন ৰত্থব্বং ন দাতব্বং, ওকাসং ন করে তথা.

ন করে সৰচনীযং, ন পুচ্ছিতব্বকা দুৰে;

ন ৰিস্সজ্জে দুৰে চেৰ, অনুযোগম্পি নো দদে.

সাকচ্ছা উপসম্পদা, নিস্সযসামণেরা চ;

উপোসথতিকা তীণি, পৰারণতিকা তযো.

আপাযিকা অকুসলা, কুসলা চরিতা দুৰে;

তিকভোজনসদ্ধম্মে, সম্মুতি পাদুকেন চ;

পাদঘংসনিকা চেৰ, উদ্দানং তিককে ইদন্তি.