১০. দসকৰারো

৩৩০. দস আঘাতৰত্থূনি. দস আঘাতপটিৰিনযা. দস ৰিনীতৰত্থূনি. দসৰত্থুকা মিচ্ছাদিট্ঠি. দসৰত্থুকা সম্মাদিট্ঠি. দস অন্তগ্গাহিকা দিট্ঠি. দস মিচ্ছত্তা. দস সম্মত্তা. দস অকুসলকম্মপথা. দস কুসলকম্মপথা. দস অধম্মিকা সলাকগ্গাহা. দস ধম্মিকা সলাকগ্গাহা. সামণেরানং দস সিক্খাপদানি. দসহঙ্গেহি সমন্নাগতো সামণেরো নাসেতব্বো.

দসহঙ্গেহি সমন্নাগতো ৰিনযধরো বালো ত্ৰেৰ সঙ্খং গচ্ছতি – অত্তনো ভাসপরিযন্তং ন উগ্গণ্হাতি, পরস্স ভাসপরিযন্তং ন উগ্গণ্হাতি, অত্তনো ভাসপরিযন্তং অনুগ্গহেত্ৰা পরস্স ভাসপরিযন্তং অনুগ্গহেত্ৰা অধম্মেন কারেতি, অপ্পটিঞ্ঞায আপত্তিং ন জানাতি, আপত্তিযা মূলং ন জানাতি, আপত্তিসমুদযং ন জানাতি, আপত্তিনিরোধং ন জানাতি, আপত্তিনিরোধগামিনিং পটিপদং ন জানাতি.

দসহঙ্গেহি সমন্নাগতো ৰিনযধরো পণ্ডিতো ত্ৰেৰ সঙ্খং গচ্ছতি – অত্তনো ভাসপরিযন্তং উগ্গণ্হাতি, পরস্স ভাসপরিযন্তং উগ্গণ্হাতি, অত্তনো ভাসপরিযন্তং উগ্গহেত্ৰা পরস্স ভাসপরিযন্তং উগ্গহেত্ৰা ধম্মেন কারেতি, পটিঞ্ঞায আপত্তিং জানাতি, আপত্তিযা মূলং জানাতি, আপত্তিসমুদযং জানাতি, আপত্তিনিরোধং জানাতি, আপত্তিনিরোধগামিনিং পটিপদং জানাতি.

অপরেহিপি দসহঙ্গেহি সমন্নাগতো ৰিনযধরো বালো ত্ৰেৰ সঙ্খং গচ্ছতি – অধিকরণং ন জানাতি, অধিকরণস্স মূলং ন জানাতি, অধিকরণসমুদযং ন জানাতি, অধিকরণনিরোধং ন জানাতি, অধিকরণনিরোধগামিনিং পটিপদং ন জানাতি, ৰত্থুং ন জানাতি, নিদানং [উদ্দানং (ক.)] ন জানাতি, পঞ্ঞত্তিং ন জানাতি, অনুপঞ্ঞত্তিং ন জানাতি, অনুসন্ধিৰচনপথং ন জানাতি.

দসহঙ্গেহি সমন্নাগতো ৰিনযধরো পণ্ডিতো ত্ৰেৰ সঙ্খং গচ্ছতি – অধিকরণং জানাতি, অধিকরণস্স মূলং জানাতি, অধিকরণসমুদযং জানাতি, অধিকরণনিরোধং জানাতি, অধিকরণনিরোধগামিনিং পটিপদং জানাতি, ৰত্থুং জানাতি, নিদানং জানাতি, পঞ্ঞত্তিং জানাতি, অনুপঞ্ঞত্তিং জানাতি, অনুসন্ধিৰচনপথং জানাতি.

অপরেহিপি দসহঙ্গেহি সমন্নাগতো ৰিনযধরো বালো ত্ৰেৰ সঙ্খং গচ্ছতি – ঞত্তিং ন জানাতি, ঞত্তিযা করণং ন জানাতি, ন পুব্বকুসলো হোতি, ন অপরকুসলো হোতি, অকালঞ্ঞূ চ হোতি, আপত্তানাপত্তিং ন জানাতি, লহুকগরুকং আপত্তিং ন জানাতি, সাৰসেসানৰসেসং আপত্তিং ন জানাতি, দুট্ঠুল্লাদুট্ঠুল্লং আপত্তিং ন জানাতি, আচরিযপরম্পরা খো পনস্স ন সুগ্গহিতা হোতি ন সুমনসিকতা ন সূপধারিতা.

দসহঙ্গেহি সমন্নাগতো ৰিনযধরো পণ্ডিতো ত্ৰেৰ সঙ্খং গচ্ছতি – ঞত্তিং জানাতি, ঞত্তিযা করণং জানাতি, পুব্বকুসলো হোতি, অপরকুসলো হোতি, কালঞ্ঞূ চ হোতি, আপত্তানাপত্তিং জানাতি, লহুকগরুকং আপত্তিং জানাতি, সাৰসেসানৰসেসং আপত্তিং জানাতি, দুট্ঠুল্লাদুট্ঠুল্লং আপত্তিং জানাতি, আচরিযপরম্পরা খো পনস্স সুগ্গহিতা হোতি সুমনসিকতা সূপধারিতা.

অপরেহিপি দসহঙ্গেহি সমন্নাগতো ৰিনযধরো বালো ত্ৰেৰ সঙ্খং গচ্ছতি – আপত্তানাপত্তিং ন জানাতি, লহুকগরুকং আপত্তিং ন জানাতি, সাৰসেসানৰসেসং আপত্তিং ন জানাতি, দুট্ঠুল্লাদুট্ঠুল্লং আপত্তিং ন জানাতি, উভযানি খো পনস্স পাতিমোক্খানি ৰিত্থারেন ন স্ৰাগতানি হোন্তি ন সুৰিভত্তানি ন সুপ্পৰত্তীনি ন সুৰিনিচ্ছিতানি সুত্তসো অনুব্যঞ্জনসো, আপত্তানাপত্তিং ন জানাতি, লহুকগরুকং আপত্তিং ন জানাতি, সাৰসেসানৰসেসং আপত্তিং ন জানাতি, দুট্ঠুল্লাদুট্ঠুল্লং আপত্তিং ন জানাতি, অধিকরণে চ ন ৰিনিচ্ছযকুসলো হোতি.

দসহঙ্গেহি সমন্নাগতো ৰিনযধরো পণ্ডিতো ত্ৰেৰ সঙ্খং গচ্ছতি – আপত্তানাপত্তিং জানাতি, লহুকগরুকং আপত্তিং জানাতি, সাৰসেসানৰসেসং আপত্তিং জানাতি, দুট্ঠুল্লাদুট্ঠুল্লং আপত্তিং জানাতি, উভযানি খো পনস্স পাতিমোক্খানি ৰিত্থারেন স্ৰাগতানি হোন্তি সুৰিভত্তানি সুপ্পৰত্তীনি সুৰিনিচ্ছিতানি সুত্তসো অনুব্যঞ্জনসো, আপত্তানাপত্তিং জানাতি, লহুকগরুকং আপত্তিং জানাতি, সাৰসেসানৰসেসং আপত্তিং জানাতি, দুট্ঠুল্লাদুট্ঠুল্লং আপত্তিং জানাতি, অধিকরণে চ ৰিনিচ্ছযকুসলো হোতি.

[অ. নি. ১০.৩৩] দসহঙ্গেহি সমন্নাগতো ভিক্খু উব্বাহিকায সম্মন্নিতব্বো. দস অত্থৰসে পটিচ্চ তথাগতেন সাৰকানং সিক্খাপদং পঞ্ঞত্তং. দস আদীনৰা রাজন্তেপুরপ্পৰেসনে. দস দানৰত্থূনি. দস রতনানি. দসৰগ্গো ভিক্খুসঙ্ঘো. দসৰগ্গেন গণেন উপসম্পাদেতব্বং. দস পংসুকূলানি. দস চীৰরধারণা [চীৰরধারণানি (স্যা.)]. দসাহপরমং অতিরেকচীৰরং ধারেতব্বং. দস সুক্কানি. দস ইত্থিযো. দস ভরিযাযো. ৰেসালিযা দস ৰত্থূনি দীপেন্তি. দস পুগ্গলা অৰন্দিযা. দস অক্কোসৰত্থূনি. দসহাকারেহি পেসুঞ্ঞং উপসংহরতি. দস সেনাসনানি. দস ৰরানি যাচিংসু. দস অধম্মিকানি পাতিমোক্খট্ঠপনানি. দস ধম্মিকানি পাতিমোক্খট্ঠপনানি. দসানিসংসা যাগুযা. দস মংসা অকপ্পিযা. দস পরমানি. দসৰস্সেন ভিক্খুনা ব্যত্তেন পটিবলেন পব্বাজেতব্বং উপসম্পাদেতব্বং নিস্সযো দাতব্বো সামণেরো উপট্ঠাপেতব্বো. দসৰস্সায ভিক্খুনিযা ব্যত্তায পটিবলায পব্বাজেতব্বং উপসম্পাদেতব্বং নিস্সযো দাতব্বো সামণেরী উপট্ঠাপেতব্বা. দসৰস্সায ভিক্খুনিযা ব্যত্তায পটিবলায ৰুট্ঠাপনসম্মুতি সাদিতব্বা. দসৰস্সায গিহিগতায সিক্খা দাতব্বাতি.

দসকং নিট্ঠিতং.

তস্সুদ্দানং –

আঘাতং ৰিনযং ৰত্থু, মিচ্ছা সম্মা চ অন্তগা;

মিচ্ছত্তা চেৰ সম্মত্তা, অকুসলা কুসলাপি চ.

সলাকা অধম্মা ধম্মা, সামণেরা চ নাসনা;

ভাসাধিকরণঞ্চেৰ, ঞত্তিলহুকমেৰ চ.

লহুকা গরুকা এতে, কণ্হসুক্কা ৰিজানথ;

উব্বাহিকা চ সিক্খা চ, অন্তেপুরে চ ৰত্থূনি.

রতনং দসৰগ্গো চ, তথেৰ উপসম্পদা;

পংসুকূলধারণা চ, দসাহসুক্কইত্থিযো.

ভরিযা দস ৰত্থূনি, অৰন্দিযক্কোসেন চ;

পেসুঞ্ঞঞ্চেৰ সেনানি, ৰরানি চ অধম্মিকা.

ধম্মিকা যাগুমংসা চ, পরমা ভিক্খু ভিক্খুনী;

ৰুট্ঠাপনা গিহিগতা, দসকা সুপ্পকাসিতাতি.