২. দুতিযপারাজিকসমুট্ঠানং

২৫৯. অদিন্নং ৰিগ্গহুত্তরি, দুট্ঠুল্লা অত্তকামিনং;

অমূলা অঞ্ঞভাগিযা, অনিযতা দুতিযিকা.

অচ্ছিন্দে পরিণামনে, মুসা ওমসপেসুণা;

দুট্ঠুল্লা পথৰীখণে, ভূতং অঞ্ঞায উজ্ঝাপে.

নিক্কড্ঢনং সিঞ্চনঞ্চ, আমিসহেতু ভুত্তাৰী;

এহি অনাদরি ভিংসা, অপনিধে চ জীৰিতং.

জানং সপ্পাণকং কম্মং, ঊনসংৰাসনাসনা;

সহধম্মিকৰিলেখা, মোহো অমূলকেন চ.

কুক্কুচ্চং ধম্মিকং চীৰরং, দত্ৰা [কুক্কুচ্চং ধম্মিকং চীৰরং (সী.), কুক্কুচ্চং ধম্মিকং দত্ৰা (স্যা.)] পরিণামেয্য পুগ্গলে;

কিং তে অকালং অচ্ছিন্দে, দুগ্গহী নিরযেন চ.

গণং ৰিভঙ্গং দুব্বলং, কথিনাফাসুপস্সযং;

অক্কোসচণ্ডী মচ্ছরী, গব্ভিনী চ পাযন্তিযা.

দ্ৰেৰস্সং সিক্খা সঙ্ঘেন, তযো চেৰ গিহীগতা;

কুমারিভূতা তিস্সো চ, ঊনদ্ৰাদসসম্মতা.

অলং তাৰ সোকাৰাসং, ছন্দা অনুৰস্সা চ দ্ৰে;

সিক্খাপদা সত্ততিমে, সমুট্ঠানা তিকা কতা.

কাযচিত্তেন ন ৰাচা, ৰাচাচিত্তং ন কাযিকং;

তীহি দ্ৰারেহি জাযন্তি, পারাজিকং দুতিযং যথা.

দুতিযপারাজিকসমুট্ঠানং নিট্ঠিতং.