৫. নৰসঙ্গহৰগ্গো

৫০১. নৰসঙ্গহা – ৰত্থুসঙ্গহো, ৰিপত্তিসঙ্গহো আপত্তিসঙ্গহো, নিদানসঙ্গহো, পুগ্গলসঙ্গহো, খন্ধসঙ্গহো, সমুট্ঠানসঙ্গহো, অধিকরণসঙ্গহো, সমথসঙ্গহোতি.

অধিকরণে সমুপ্পন্নে সচে উভো অত্থপচ্চত্থিকা আগচ্ছন্তি উভিন্নম্পি ৰত্থু আরোচাপেতব্বং. উভিন্নম্পি ৰত্থু আরোচাপেত্ৰা উভিন্নম্পি পটিঞ্ঞা সোতব্বা. উভিন্নম্পি পটিঞ্ঞং সুত্ৰা উভোপি ৰত্তব্বা – ‘‘অম্হাকং ইমস্মিং অধিকরণে ৰূপসমিতে [ৰূপসমেপি (ক.)] উভোপি তুট্ঠা ভৰিস্সথা’’তি. সচে আহংসু – ‘‘উভোপি তুট্ঠা ভৰিস্সামা’’তি, সঙ্ঘেন তং অধিকরণং সম্পটিচ্ছিতব্বং. সচে অলজ্জুস্সন্না হোতি, পরিসা উব্বাহিকায ৰূপসমেতব্বং. সচে বালুস্সন্না হোতি, পরিসা ৰিনযধরো পরিযেসিতব্বো যেন ধম্মেন যেন ৰিনযেন যেন সত্থুসাসনেন তং অধিকরণং ৰূপসম্মতি. তথা তং অধিকরণং ৰূপসমেতব্বং.

ৰত্থু জানিতব্বং, গোত্তং জানিতব্বং, নামং জানিতব্বং, আপত্তি জানিতব্বা.

মেথুনধম্মোতি ৰত্থু চেৰ গোত্তঞ্চ – পারাজিকন্তি নামঞ্চেৰ আপত্তি চ.

অদিন্নাদানন্তি ৰত্থু চেৰ গোত্তঞ্চ – পারাজিকন্তি নামঞ্চেৰ আপত্তি চ.

মনুস্সৰিগ্গহোতি ৰত্থু চেৰ গোত্তঞ্চ – পারাজিকন্তি নামঞ্চেৰ আপত্তি চ.

উত্তরিমনুস্সধম্মোতি ৰত্থু চেৰ গোত্তঞ্চ – পারাজিকন্তি নামঞ্চেৰ আপত্তি চ.

সুক্কৰিস্সট্ঠীতি ৰত্থু চেৰ গোত্তঞ্চ – সঙ্ঘাদিসেসোতি নামঞ্চেৰ আপত্তি চ.

কাযসংসগ্গোতি ৰত্থু চেৰ গোত্তঞ্চ – সঙ্ঘাদিসেসোতি নামঞ্চেৰ আপত্তি চ.

দুট্ঠুল্লৰাচাতি ৰত্থু চেৰ গোত্তঞ্চ – সঙ্ঘাদিসেসোতি নামঞ্চেৰ আপত্তি চ.

অত্তকামন্তি ৰত্থু চেৰ গোত্তঞ্চ – সঙ্ঘাদিসেসোতি নামঞ্চেৰ আপত্তি চ.

সঞ্চরিত্তন্তি ৰত্থু চেৰ গোত্তঞ্চ – সঙ্ঘাদিসেসোতি নামঞ্চেৰ আপত্তি চ.

সঞ্ঞাচিকায কুটিং কারাপনন্তি ৰত্থু চেৰ গোত্তঞ্চ – সঙ্ঘাদিসেসোতি নামঞ্চেৰ আপত্তি চ.

মহল্লকং ৰিহারং কারাপনন্তি ৰত্থু চেৰ গোত্তঞ্চ – সঙ্ঘাদিসেসোতি নামঞ্চেৰ আপত্তি চ.

ভিক্খুং অমূলকেন পারাজিকেন ধম্মেন অনুদ্ধংসনন্তি ৰত্থু চেৰ গোত্তঞ্চ – সঙ্ঘাদিসেসোতি নামঞ্চেৰ আপত্তি চ.

ভিক্খুং অঞ্ঞভাগিযস্স অধিকরণস্স কিঞ্চি দেসং লেসমত্তং উপাদায পারাজিকেন ধম্মেন অনুদ্ধংসনন্তি ৰত্থু চেৰ গোত্তঞ্চ – সঙ্ঘাদিসেসোতি নামঞ্চেৰ আপত্তি চ.

সঙ্ঘভেদকস্স ভিক্খুনো যাৰততিযং সমনুভাসনায ন পটিনিস্সজ্জনন্তি ৰত্থু চেৰ গোত্তঞ্চ – সঙ্ঘাদিসেসোতি নামঞ্চেৰ আপত্তি চ.

ভেদকানুৰত্তকানং ভিক্খূনং যাৰততিযং সমনুভাসনায ন পটিনিস্সজ্জনন্তি ৰত্থু চেৰ গোত্তঞ্চ – সঙ্ঘাদিসেসোতি নামঞ্চেৰ আপত্তি চ.

দুব্বচস্স ভিক্খুনো যাৰততিযং সমনুভাসনায ন পটিনিস্সজ্জনন্তি ৰত্থু চেৰ গোত্তঞ্চ – সঙ্ঘাদিসেসোতি নামঞ্চেৰ আপত্তি চ.

কুলদূসকস্স ভিক্খুনো যাৰততিযং সমনুভাসনায ন পটিনিস্সজ্জনন্তি ৰত্থু চেৰ গোত্তঞ্চ – সঙ্ঘাদিসেসোতি নামঞ্চেৰ আপত্তি চ…পে….

অনাদরিযং পটিচ্চ উদকে উচ্চারং ৰা পস্সাৰং ৰা খেল়ং ৰা করণন্তি ৰত্থু চেৰ গোত্তঞ্চ – দুক্কটন্তি নামঞ্চেৰ আপত্তি চাতি.

নৰসঙ্গহৰগ্গো নিট্ঠিতো পঞ্চমো.