৪. কথিনাদিজানিতব্বৰিভাগো

৪১২. কথিনং জানিতব্বং, কথিনত্থারো জানিতব্বো, কথিনস্স অত্থারমাসো জানিতব্বো, কথিনস্স অত্থারৰিপত্তি জানিতব্বা, কথিনস্স অত্থারসম্পত্তি জানিতব্বা, নিমিত্তকম্মং জানিতব্বং, পরিকথা জানিতব্বা, কুক্কুকতং জানিতব্বং, সন্নিধি জানিতব্বা, নিস্সগ্গিযং জানিতব্বং.

কথিনং জানিতব্বন্তি তেসঞ্ঞেৰ ধম্মানং সঙ্গহো সমৰাযো নামং নামকম্মং নামধেয্যং নিরুত্তি ব্যঞ্জনং অভিলাপো যদিদং কথিনন্তি.

কথিনস্স অত্থারমাসো জানিতব্বোতি ৰস্সানস্স পচ্ছিমো মাসো জানিতব্বো.

কথিনস্স অত্থারৰিপত্তি জানিতব্বাতি চতুৰীসতিযা আকারেহি কথিনস্স অত্থারৰিপত্তি জানিতব্বা.

কথিনস্স অত্থারসম্পত্তি জানিতব্বাতি সত্তরসহি আকারেহি কথিনস্স অত্থারসম্পত্তি জানিতব্বা.

নিমিত্তকম্মং জানিতব্বন্তি নিমিত্তং করোতি ইমিনা দুস্সেন কথিনং অত্থরিস্সামীতি.

পরিকথা জানিতব্বাতি পরিকথং করোতি ইমায পরিকথায কথিনদুস্সং নিব্বত্তেস্সামীতি.

কুক্কুকতং জানিতব্বন্তি অনাদিযদানং জানিতব্বং.

সন্নিধি জানিতব্বাতি দ্ৰে সন্নিধিযো জানিতব্বা – করণসন্নিধি ৰা নিচযসন্নিধি ৰা.

নিস্সগ্গিযং জানিতব্বন্তি করিযমানে অরুণং উট্ঠহতি.

কথিনত্থারো জানিতব্বোতি সচে সঙ্ঘস্স কথিনদুস্সং উপ্পন্নং হোতি, সঙ্ঘেন কথং পটিপজ্জিতব্বং, অত্থারকেন কথং পটিপজ্জিতব্বং, অনুমোদকেন কথং পটিপজ্জিতব্বং.

৪১৩. সঙ্ঘেন ঞত্তিদুতিযেন কম্মেন কথিনত্থারকস্স ভিক্খুনো দাতব্বং, তেন কথিনত্থারকেন ভিক্খুনা তদহেৰ ধোৰিত্ৰা ৰিমজ্জিত্ৰা ৰিচারেত্ৰা ছিন্দিত্ৰা সিব্বেত্ৰা রজিত্ৰা কপ্পং কত্ৰা কথিনং অত্থরিতব্বং. সচে সঙ্ঘাটিযা কথিনং অত্থরিতুকামো হোতি, পোরাণিকা সঙ্ঘাটি পচ্চুদ্ধরিতব্বা, নৰা সঙ্ঘাটি অধিট্ঠাতব্বা. ইমায সঙ্ঘাটিযা কথিনং অত্থরামীতি ৰাচা ভিন্দিতব্বা. সচে উত্তরাসঙ্গেন কথিনং অত্থরিতুকামো হোতি, পোরাণকো উত্তরাসঙ্গো পচ্চুদ্ধরিতব্বো, নৰো উত্তরাসঙ্গো অধিট্ঠাতব্বো. ইমিনা উত্তরাসঙ্গেন কথিনং অত্থরামীতি ৰাচা ভিন্দিতব্বা. সচে অন্তরৰাসকেন কথিনং অত্থরিতুকামো হোতি, পোরাণকো অন্তরৰাসকো পচ্চুদ্ধরিতব্বো, নৰো অন্তরৰাসকো অধিট্ঠাতব্বো. ইমিনা অন্তরৰাসকেন কথিনং অত্থরামীতি ৰাচা ভিন্দিতব্বা. তেন কথিনত্থারকেন ভিক্খুনা সঙ্ঘং উপসঙ্কমিত্ৰা একংসং উত্তরাসঙ্গং করিত্ৰা অঞ্জলিং পগ্গহেত্ৰা এৰমস্স ৰচনীযো – ‘‘অত্থতং, ভন্তে, সঙ্ঘস্স কথিনং, ধম্মিকো কথিনত্থারো, অনুমোদথা’’তি. তেহি অনুমোদকেহি ভিক্খূহি একংসং উত্তরাসঙ্গং করিত্ৰা অঞ্জলিং পগ্গহেত্ৰা এৰমস্স ৰচনীযো – ‘‘অত্থতং, আৰুসো, সঙ্ঘস্স কথিনং, ধম্মিকো কথিনত্থারো, অনুমোদামা’’তি. তেন কথিনত্থারকেন ভিক্খুনা সম্বহুলে ভিক্খূ উপসঙ্কমিত্ৰা একংসং উত্তরাসঙ্গং করিত্ৰা অঞ্জলিং পগ্গহেত্ৰা এৰমস্সু ৰচনীযা – ‘‘অত্থতং, ভন্তে, সঙ্ঘস্স কথিনং, ধম্মিকো কথিনত্থারো, অনুমোদথা’’তি. তেহি অনুমোদকেহি ভিক্খূহি একংসং উত্তরাসঙ্গং করিত্ৰা অঞ্জলিং পগ্গহেত্ৰা এৰমস্স ৰচনীযো – ‘‘অত্থতং, আৰুসো, সঙ্ঘস্স কথিনং, ধম্মিকো কথিনত্থারো অনুমোদামা’’তি. তেন কথিনত্থারকেন ভিক্খুনা একং ভিক্খুং উপসঙ্কমিত্ৰা একংসং উত্তরাসঙ্গং করিত্ৰা অঞ্জলিং পগ্গহেত্ৰা এৰমস্স ৰচনীযো – ‘‘অত্থতং, আৰুসো, সঙ্ঘস্স কথিনং, ধম্মিকো কথিনত্থারো, অনুমোদাহী’’তি. তেন অনুমোদকেন ভিক্খুনা একংসং উত্তরাসঙ্গং করিত্ৰা অঞ্জলিং পগ্গহেত্ৰা এৰমস্স ৰচনীযো – ‘‘অত্থতং, আৰুসো, সঙ্ঘস্স কথিনং, ধম্মিকো কথিনত্থারো, অনুমোদামী’’তি.