৬. অনুৰিজ্জকস্স অনুযোগং

৩৯৬. অনুৰিজ্জকেন চোদকো পুচ্ছিতব্বো – ‘‘যং খো ত্ৰং, আৰুসো, ইমস্স ভিক্খুনো পৰারণং ঠপেসি, কিম্হি নং ঠপেসি, সীলৰিপত্তিযা ৰা ঠপেসি, আচারৰিপত্তিযা ৰা ঠপেসি, দিট্ঠিৰিপত্তিযা ৰা ঠপেসী’’তি? সো চে এৰং ৰদেয্য – ‘‘সীলৰিপত্তিযা ৰা ঠপেমি আচারৰিপত্তিযা ৰা ঠপেমি দিট্ঠিৰিপত্তিযা ৰা ঠপেমী’’তি, সো এৰমস্স ৰচনীযো – ‘‘জানাতি পনাযস্মা সীলৰিপত্তিং, জানাতি আচারৰিপত্তিং, জানাতি দিট্ঠিৰিপত্তি’’ন্তি? সো চে এৰং ৰদেয্য – ‘‘জানামি খো অহং, আৰুসো, সীলৰিপত্তিং, জানামি আচারৰিপত্তিং, জানামি দিট্ঠিৰিপত্তি’’ন্তি, সো এৰমস্স ৰচনীযো – ‘‘কতমা পনাৰুসো, সীলৰিপত্তি কতমা আচারৰিপত্তি কতমা দিট্ঠিৰিপত্তী’’তি? সো চে এৰং ৰদেয্য – ‘‘চত্তারি পারাজিকানি তেরস সঙ্ঘাদিসেসা – অযং সীলৰিপত্তি. থুল্লচ্চযং পাচিত্তিযং পাটিদেসনীযং দুক্কটং দুব্ভাসিতং – অযং আচারৰিপত্তি. মিচ্ছাদিট্ঠি অন্তগ্গাহিকাদিট্ঠি – অযং দিট্ঠিৰিপত্তী’’তি, সো এৰমস্স ৰচনীযো – ‘‘যং খো ত্ৰং, আৰুসো, ইমস্স ভিক্খুনো পৰারণং ঠপেসি, দিট্ঠেন ৰা ঠপেসি, সুতেন ৰা ঠপেসি, পরিসঙ্কায ৰা ঠপেসী’’তি? সো চে এৰং ৰদেয্য – ‘‘দিট্ঠেন ৰা ঠপেমি, সুতেন ৰা ঠপেমি, পরিসঙ্কায ৰা ঠপেমী’’তি, সো এৰমস্স ৰচনীযো – ‘‘যং খো ত্ৰং, আৰুসো, ইমস্স ভিক্খুনো দিট্ঠেন পৰারণং ঠপেসি, কিং তে দিট্ঠং, কিন্তি তে দিট্ঠং, কদা তে দিট্ঠং, কত্থ তে দিট্ঠং, পারাজিকং অজ্ঝাপজ্জন্তো দিট্ঠো, সঙ্ঘাদিসেসং অজ্ঝাপজ্জন্তো দিট্ঠো, থুল্লচ্চযং… পাচিত্তিযং… পাটিদেসনীযং… দুক্কটং… দুব্ভাসিতং অজ্ঝাপজ্জন্তো দিট্ঠো, কত্থ চ ত্ৰং অহোসি, কত্থ চাযং ভিক্খু অহোসি, কিঞ্চ ত্ৰং করোসি, কিং চাযং ভিক্খু করোতী’’তি? সো চে এৰং ৰদেয্য – ‘‘ন খো অহং, আৰুসো, ইমস্স ভিক্খুনো দিট্ঠেন পৰারণং ঠপেমি, অপি চ সুতেন পৰারণং ঠপেমী’’তি, সো এৰমস্স ৰচনীযো – ‘‘যং খো ত্ৰং, আৰুসো, ইমস্স ভিক্খুনো সুতেন পৰারণং ঠপেসি কিং তে সুতং, কিন্তি তে সুতং, কদা তে সুতং, কত্থ তে সুতং, পারাজিকং অজ্ঝাপন্নোতি সুতং, সঙ্ঘাদিসেসং অজ্ঝাপন্নোতি সুতং, থুল্লচ্চযং… পাচিত্তিযং… পাটিদেসনীযং… দুক্কটং… দুব্ভাসিতং অজ্ঝাপন্নোতি সুতং, ভিক্খুস্স সুতং, ভিক্খুনিযা সুতং, সিক্খমানায সুতং, সামণেরস্স সুতং, সামণেরিযা সুতং, উপাসকস্স সুতং, উপাসিকায সুতং, রাজূনং সুতং, রাজমহামত্তানং সুতং, তিত্থিযানং সুতং, তিত্থিযসাৰকানং সুত’’ন্তি? সো চে এৰং ৰদেয্য – ‘‘ন খো অহং, আৰুসো, ইমস্স ভিক্খুনো সুতেন পৰারণং ঠপেমি, অপি চ পরিসঙ্কায পৰারণং ঠপেমী’’তি, সো এৰমস্স ৰচনীযো – ‘‘যং খো ত্ৰং, আৰুসো, ইমস্স ভিক্খুনো পরিসঙ্কায পৰারণং ঠপেসি, কিং পরিসঙ্কসি, কিন্তি পরিসঙ্কসি, কদা পরিসঙ্কসি, কত্থ পরিসঙ্কসি, পারাজিকং অজ্ঝাপন্নোতি পরিসঙ্কসি, সঙ্ঘাদিসেসং অজ্ঝাপন্নোতি পরিসঙ্কসি, থুল্লচ্চযং… পাচিত্তিযং… পাটিদেসনীযং… দুক্কটং… দুব্ভাসিতং অজ্ঝাপন্নোতি পরিসঙ্কসি, ভিক্খুস্স সুত্ৰা পরিসঙ্কসি, ভিক্খুনিযা সুত্ৰা পরিসঙ্কসি, সিক্খমানায সুত্ৰা পরিসঙ্কসি, সামণেরস্স সুত্ৰা পরিসঙ্কসি, সামণেরিযা সুত্ৰা পরিসঙ্কসি, উপাসকস্স সুত্ৰা পরিসঙ্কসি, উপাসিকায সুত্ৰা পরিসঙ্কসি, রাজূনং সুত্ৰা পরিসঙ্কসি রাজমহামত্তানং সুত্ৰা পরিসঙ্কসি, তিত্থিযানং সুত্ৰা পরিসঙ্কসি, তিত্থিযসাৰকানং সুত্ৰা পরিসঙ্কসী’’তি?

৩৯৭. দিট্ঠং দিট্ঠেন সমেতি, দিট্ঠেন সংসন্দতে দিট্ঠং;

দিট্ঠং পটিচ্চ ন উপেতি, অসুদ্ধপরিসঙ্কিতো;

সো পুগ্গলো পটিঞ্ঞায, কাতব্বা তেন পৰারণা.

সুতং সুতেন সমেতি, সুতেন সংসন্দতে সুতং;

সুতং পটিচ্চ ন উপেতি, অসুদ্ধপরিসঙ্কিতো;

সো পুগ্গলো পটিঞ্ঞায, কাতব্বা তেন পৰারণা.

মুতং মুতেন সমেতি, মুতেন সংসন্দতে মুতং;

মুতং পটিচ্চ ন উপেতি, অসুদ্ধপরিসঙ্কিতো;

সো পুগ্গলো পটিঞ্ঞায, কাতব্বা তেন পৰারণাতি.