চূল়সঙ্গামো

১. অনুৰিজ্জকস্সপটিপত্তি

৩৬৫. [পরি. ৪২১] সঙ্গামাৰচরে ভিক্খুনা সঙ্ঘং উপসঙ্কমন্তেন নীচচিত্তেন সঙ্ঘো উপসঙ্কমিতব্বো রজোহরণসমেন চিত্তেন; আসনকুসলেন ভৰিতব্বং নিসজ্জকুসলেন; থেরে ভিক্খূ অনুপখজ্জন্তেন, নৰে ভিক্খূ আসনেন অপ্পটিবাহন্তেন, যথাপতিরূপে আসনে নিসীদিতব্বং; অনানাকথিকেন ভৰিতব্বং অতিরচ্ছানকথিকেন; সামং ৰা ধম্মো ভাসিতব্বো পরো ৰা অজ্ঝেসিতব্বো অরিযো ৰা তুণ্হীভাৰো নাতিমঞ্ঞিতব্বো.

সঙ্ঘেন অনুমতেন পুগ্গলেন অনুৰিজ্জকেন অনুৰিজ্জিতুকামেন ন উপজ্ঝাযো পুচ্ছিতব্বো, ন আচরিযো পুচ্ছিতব্বো, ন সদ্ধিৰিহারিকো পুচ্ছিতব্বো, ন অন্তেৰাসিকো পুচ্ছিতব্বো, ন সমানুপজ্ঝাযকো পুচ্ছিতব্বো, ন সমানাচরিযকো পুচ্ছিতব্বো, ন জাতি পুচ্ছিতব্বা, ন নামং পুচ্ছিতব্বং, ন গোত্তং পুচ্ছিতব্বং, ন আগমো পুচ্ছিতব্বো, ন কুলপদেসো পুচ্ছিতব্বো, ন জাতিভূমি পুচ্ছিতব্বা. তং কিং কারণা? অত্রস্স পেমং ৰা দোসো ৰা. পেমে ৰা সতি দোসে ৰা, ছন্দাপি গচ্ছেয্য দোসাপি গচ্ছেয্য মোহাপি গচ্ছেয্য ভযাপি গচ্ছেয্য.

সঙ্ঘেন অনুমতেন পুগ্গলেন অনুৰিজ্জকেন অনুৰিজ্জিতুকামেন সঙ্ঘগরুকেন ভৰিতব্বং নো পুগ্গলগরুকেন, সদ্ধম্মগরুকেন ভৰিতব্বং নো আমিসগরুকেন, অত্থৰসিকেন ভৰিতব্বং নো পরিসকপ্পিকেন, কালেন অনুৰিজ্জিতব্বং নো অকালেন, ভূতেন অনুৰিজ্জিতব্বং নো অভূতেন, সণ্হেন অনুৰিজ্জিতব্বং নো ফরুসেন, অত্থসংহিতেন অনুৰিজ্জিতব্বং নো অনত্থসংহিতেন, মেত্তাচিত্তেন অনুৰিজ্জিতব্বং নো দোসন্তরেন, ন উপকণ্ণকজপ্পিনা ভৰিতব্বং, ন জিম্হং পেক্খিতব্বং, ন অক্খি নিখণিতব্বং, ন ভমুকং উক্খিপিতব্বং, ন সীসং উক্খিপিতব্বং, ন হত্থৰিকারো কাতব্বো, ন হত্থমুদ্দা দস্সেতব্বা.

আসনকুসলেন ভৰিতব্বং নিসজ্জকুসলেন, যুগমত্তং পেক্খন্তেন অত্থং অনুৰিধিযন্তেন সকে আসনে নিসীদিতব্বং, ন চ আসনা ৰুট্ঠাতব্বং, ন ৰীতিহাতব্বং, ন কুম্মগ্গো সেৰিতব্বো, ন বাহাৰিক্খেপকং [ন ৰাচা ৰিক্খেপকং (স্যা.)] ভণিতব্বং, অতুরিতেন ভৰিতব্বং অসাহসিকেন, অচণ্ডিকতেন ভৰিতব্বং ৰচনক্খমে, মেত্তাচিত্তেন ভৰিতব্বং হিতানুকম্পিনা, কারুণিকেন ভৰিতব্বং হিতপরিসক্কিনা, অসম্ফপ্পলাপিনা ভৰিতব্বং পরিযন্তভাণিনা, অৰেরৰসিকেন ভৰিতব্বং অনসুরুত্তেন, অত্তা পরিগ্গহেতব্বো, পরো পরিগ্গহেতব্বো, চোদকো পরিগ্গহেতব্বো, চুদিতকো পরিগ্গহেতব্বো, অধম্মচোদকো পরিগ্গহেতব্বো, অধম্মচুদিতকো পরিগ্গহেতব্বো, ধম্মচোদকো পরিগ্গহেতব্বো, ধম্মচুদিতকো পরিগ্গহেতব্বো, ৰুত্তং অহাপেন্তেন অৰুত্তং অপকাসেন্তেন ওতিণ্ণানি পদব্যঞ্জনানি সাধুকং পরিগ্গহেত্ৰা পরো পটিপুচ্ছিত্ৰা যথা পটিঞ্ঞায কারেতব্বো, মন্দো হাসেতব্বো [ৰেপো পহাসেতব্বো (স্যা.)], ভীরূ অস্সাসেতব্বো, চণ্ডো নিসেধেতব্বো, অসুচি ৰিভাৰেতব্বো, উজুমদ্দৰেন ন ছন্দাগতিং গন্তব্বং, ন দোসাগতিং গন্তব্বং, ন মোহাগতিং গন্তব্বং, ন ভযাগতিং গন্তব্বং, মজ্ঝত্তেন ভৰিতব্বং ধম্মেসু চ পুগ্গলেসু চ. এৰঞ্চ পন অনুৰিজ্জকো অনুৰিজ্জমানো সত্থু চেৰ সাসনকরো হোতি, ৰিঞ্ঞূনঞ্চ সব্রহ্মচারীনং পিযো চ হোতি মনাপো চ গরু চ ভাৰনীযো চ.

৩৬৬. সুত্তং সংসন্দনত্থায, ওপম্মং নিদস্সনত্থায, অত্থো ৰিঞ্ঞাপনত্থায, পটিপুচ্ছা ঠপনত্থায, ওকাসকম্মং চোদনত্থায, চোদনা সারণত্থায, সারণা সৰচনীযত্থায, সৰচনীযং পলিবোধত্থায, পলিবোধো ৰিনিচ্ছযত্থায, ৰিনিচ্ছযো সন্তীরণত্থায, সন্তীরণং ঠানাঠানগমনত্থায, ঠানাঠানগমনং দুম্মঙ্কূনং পুগ্গলানং নিগ্গহত্থায, পেসলানং ভিক্খূনং সম্পগ্গহত্থায, সঙ্ঘো সম্পরিগ্গহসম্পটিচ্ছনত্থায, সঙ্ঘেন অনুমতা পুগ্গলা পচ্চেকট্ঠাযিনো অৰিসংৰাদকট্ঠাযিনো.

ৰিনযো সংৰরত্থায, সংৰরো অৰিপ্পটিসারত্থায, অৰিপ্পটিসারো পামুজ্জত্থায, পামুজ্জং পীতত্থায, পীতি পস্সদ্ধত্থায, পস্সদ্ধি সুখত্থায, সুখং সমাধত্থায, সমাধি যথাভূতঞাণদস্সনত্থায, যথাভূতঞাণদস্সনং নিব্বিদত্থায, নিব্বিদা ৰিরাগত্থায, ৰিরাগো ৰিমুত্তত্থায, ৰিমুত্তি ৰিমুত্তিঞাণদস্সনত্থায, ৰিমুত্তিঞাণদস্সনং অনুপাদাপরিনিব্বানত্থায. এতদত্থা কথা, এতদত্থা মন্তনা, এতদত্থা উপনিসা, এতদত্থং সোতাৰধানং – যদিদং অনুপাদাচিত্তস্স ৰিমোক্খোতি.

৩৬৭. অনুযোগৰত্তং নিসাময, কুসলেন বুদ্ধিমতা কতং;

সুৰুত্তং সিক্খাপদানুলোমিকং, গতিং ন নাসেন্তো সম্পরাযিকং.

ৰত্থুং ৰিপত্তিং আপত্তিং, নিদানং আকারঅকোৰিদো;

পুব্বাপরং ন জানাতি, কতাকতং সমেন চ.

কম্মঞ্চ অধিকরণঞ্চ, সমথে চাপি অকোৰিদো;

রত্তো দুট্ঠো চ মূল়্হো চ, ভযা মোহা চ গচ্ছতি.

ন চ সঞ্ঞত্তিকুসলো, নিজ্ঝত্তিযা চ অকোৰিদো;

লদ্ধপক্খো অহিরিকো, কণ্হকম্মো অনাদরো;

স ৰে [সচে (ক.)] তাদিসকো ভিক্খু, অপ্পটিক্খোতি ৰুচ্চতি.

ৰত্থুং ৰিপত্তিং আপত্তিং, নিদানং আকারকোৰিদো;

পুব্বাপরঞ্চ জানাতি, কতাকতং সমেন চ.

কম্মঞ্চ অধিকরণঞ্চ, সমথে চাপি কোৰিদো;

অরত্তো অদুট্ঠো অমূল়্হো, ভযা মোহা ন গচ্ছতি.

সঞ্ঞত্তিযা চ কুসলো, নিজ্ঝত্তিযা চ কোৰিদো;

লদ্ধপক্খো হিরিমনো, সুক্ককম্মো সগারৰো;

স ৰে তাদিসকো ভিক্খু, সপ্পটিক্খোতি ৰুচ্চতীতি.

চূল়সঙ্গামো নিট্ঠিতো.