৮. সমুচ্চযৰারো

১৮৭. মেথুনং ধম্মং পটিসেৰন্তো কতি আপত্তিযো আপজ্জতি? মেথুনং ধম্মং পটিসেৰন্তো তিস্সো আপত্তিযো আপজ্জতি. অক্খাযিতে সরীরে মেথুনং ধম্মং পটিসেৰতি, আপত্তি পারাজিকস্স; যেভুয্যেন খাযিতে সরীরে মেথুনং ধম্মং পটিসেৰতি, আপত্তি থুল্লচ্চযস্স; ৰট্টকতে মুখে অচ্ছুপন্তং অঙ্গজাতং পৰেসেতি, আপত্তি দুক্কটস্স – মেথুনং ধম্মং পটিসেৰন্তো ইমা তিস্সো আপত্তিযো আপজ্জতি.

তা আপত্তিযো চতুন্নং ৰিপত্তীনং কতি ৰিপত্তিযো ভজন্তি, সত্তন্নং আপত্তিক্খন্ধানং কতিহি আপত্তিক্খন্ধেহি সঙ্গহিতা, ছন্নং আপত্তিসমুট্ঠানানং কতিহি সমুট্ঠানেহি সমুট্ঠন্তি, চতুন্নং অধিকরণানং কতমং অধিকরণং, সত্তন্নং সমথানং কতিহি সমথেহি সম্মন্তি? তা আপত্তিযো চতুন্নং ৰিপত্তীনং দ্ৰে ৰিপত্তিযো ভজন্তি – সিযা সীলৰিপত্তিং, সিযা আচারৰিপত্তিং. সত্তন্নং আপত্তিক্খন্ধানং তীহি আপত্তিক্খন্ধেহি সঙ্গহিতা – সিযা পারাজিকাপত্তিক্খন্ধেন, সিযা থুল্লচ্চযাপত্তিক্খন্ধেন, সিযা দুক্কটাপত্তিক্খন্ধেন. ছন্নং আপত্তিসমুট্ঠানানং একেন সমুট্ঠানেন সমুট্ঠন্তি – কাযতো চ চিত্ততো চ সমুট্ঠন্তি, ন ৰাচতো. চতুন্নং অধিকরণানং, আপত্তাধিকরণং. সত্তন্নং সমথানং তীহি সমথেহি সম্মন্তি – সিযা সম্মুখাৰিনযেন চ পটিঞ্ঞাতকরণেন চ, সিযা সম্মুখাৰিনযেন চ তিণৰত্থারকেন চ…পে….

অনাদরিযং পটিচ্চ উদকে উচ্চারং ৰা পস্সাৰং ৰা খেল়ং ৰা করোন্তো কতি আপত্তিযো আপজ্জতি? অনাদরিযং পটিচ্চ উদকে উচ্চারং ৰা পস্সাৰং ৰা খেল়ং ৰা করোন্তো একং আপত্তিং আপজ্জতি. দুক্কটং – অনাদরিযং পটিচ্চ উদকে উচ্চারং ৰা পস্সাৰং ৰা খেল়ং ৰা করোন্তো ইমং একং আপত্তিং আপজ্জতি.

সা আপত্তি চতুন্নং ৰিপত্তীনং কতি ৰিপত্তিযো ভজতি, সত্তন্নং আপত্তিক্খন্ধানং কতিহি আপত্তিক্খন্ধেহি সঙ্গহিতা, ছন্নং আপত্তিসমুট্ঠানানং কতিহি সমুট্ঠানেহি সমুট্ঠাতি, চতুন্নং অধিকরণানং কতমং অধিকরণং, সত্তন্নং, সমথানং কতিহি সমথেহি সম্মতি? সা আপত্তি চতুন্নং ৰিপত্তীনং একং ৰিপত্তিং ভজতি – আচারৰিপত্তিং. সত্তন্নং আপত্তিক্খন্ধানং একেন আপত্তিক্খন্ধেন সঙ্গহিতা – দুক্কটাপত্তিক্খন্ধেন. ছন্নং আপত্তিসমুট্ঠানানং একেন সমুট্ঠানেন সমুট্ঠাতি – কাযতো চ চিত্ততো চ সমুট্ঠাতি, ন ৰাচতো. চতুন্নং অধিকরণানং, আপত্তাধিকরণং. সত্তন্নং সমথানং তীহি সমথেহি সম্মতি – সিযা সম্মুখাৰিনযেন চ পটিঞ্ঞাতকরণেন চ, সিযা সম্মুখাৰিনযেন চ তিণৰত্থারকেন চ.

সমুচ্চযৰারো নিট্ঠিতো অট্ঠমো.

ইমে অট্ঠ ৰারা সজ্ঝাযমগ্গেন লিখিতা.

তস্সুদ্দানং –

কত্থপঞ্ঞত্তি কতি চ, ৰিপত্তিসঙ্গহেন চ;

সমুট্ঠানাধিকরণা সমথো, সমুচ্চযেন চাতি.