১. পরিমণ্ডলৰগ্গো

১৫০. যং তেন ভগৰতা জানতা পস্সতা অরহতা সম্মাসম্বুদ্ধেন অনাদরিযং পটিচ্চ পুরতো ৰা পচ্ছতো ৰা ওলম্বেন্তেন নিৰাসেন্তস্স দুক্কটং কত্থ পঞ্ঞত্তন্তি? সাৰত্থিযং পঞ্ঞত্তং. কং আরব্ভাতি? ছব্বগ্গিযে ভিক্খূ আরব্ভ. কিস্মিং ৰত্থুস্মিন্তি? ছব্বগ্গিযা ভিক্খূ পুরতোপি পচ্ছতোপি ওলম্বেন্তা নিৰাসেসুং, তস্মিং ৰত্থুস্মিং. একা পঞ্ঞত্তি. ছন্নং আপত্তিসমুট্ঠানানং একেন সমুট্ঠানেন সমুট্ঠাতি – কাযতো চ চিত্ততো চ সমুট্ঠাতি, ন ৰাচতো…পে….

অনাদরিযং পটিচ্চ পুরতো ৰা পচ্ছতো ৰা ওলম্বেন্তেন পারুপন্তস্স দুক্কটং কত্থ পঞ্ঞত্তন্তি? সাৰত্থিযং পঞ্ঞত্তং. কং আরব্ভাতি? ছব্বগ্গিযে ভিক্খূ আরব্ভ. কিস্মিং ৰত্থুস্মিন্তি? ছব্বগ্গিযা ভিক্খূ পুরতোপি পচ্ছতোপি ওলম্বেন্তা পারুপিংসু, তস্মিং ৰত্থুস্মিং. একা পঞ্ঞত্তি. ছন্নং আপত্তিসমুট্ঠানানং একেন সমুট্ঠানেন সমুট্ঠাতি – কাযতো চ চিত্ততো চ সমুট্ঠাতি, ন ৰাচতো…পে….

অনাদরিযং পটিচ্চ কাযং ৰিৰরিত্ৰা অন্তরঘরে গচ্ছন্তস্স দুক্কটং…পে… একা পঞ্ঞত্তি. একেন সমুট্ঠানেন সমুট্ঠাতি – কাযতো চ চিত্ততো চ সমুট্ঠাতি, ন ৰাচতো…পে….

অনাদরিযং পটিচ্চ কাযং ৰিৰরিত্ৰা অন্তরঘরে নিসীদন্তস্স দুক্কটং…পে… একা পঞ্ঞত্তি. একেন সমুট্ঠানেন সমুট্ঠাতি – কাযতো চ চিত্ততো চ সমুট্ঠাতি, ন ৰাচতো…পে….

অনাদরিযং পটিচ্চ হত্থং ৰা পাদং ৰা কীল়াপেন্তেন অন্তরঘরে গচ্ছন্তস্স দুক্কটং…পে… একা পঞ্ঞত্তি. একেন সমুট্ঠানেন সমুট্ঠাতি – কাযতো চ চিত্ততো চ সমুট্ঠাতি, ন ৰাচতো…পে….

অনাদরিযং পটিচ্চ হত্থং ৰা পাদং ৰা কীল়াপেন্তেন অন্তরঘরে নিসীদন্তস্স দুক্কটং …পে… একা পঞ্ঞত্তি. একেন সমুট্ঠানেন সমুট্ঠাতি – কাযতো চ চিত্ততো চ সমুট্ঠাতি, ন ৰাচতো…পে….

অনাদরিযং পটিচ্চ তহং তহং ওলোকেন্তেন অন্তরঘরে গচ্ছন্তস্স দুক্কটং…পে… একা পঞ্ঞত্তি. একেন সমুট্ঠানেন সমুট্ঠাতি – কাযতো চ চিত্ততো চ সমুট্ঠাতি, ন ৰাচতো…পে….

অনাদরিযং পটিচ্চ তহং তহং ওলোকেন্তেন অন্তরঘরে নিসীদন্তস্স দুক্কটং…পে… একা পঞ্ঞত্তি. একেন সমুট্ঠানেন সমুট্ঠাতি – কাযতো চ চিত্ততো চ সমুট্ঠাতি, ন ৰাচতো…পে….

অনাদরিযং পটিচ্চ উক্খিত্তকায অন্তরঘরে গচ্ছন্তস্স দুক্কটং…পে… একা পঞ্ঞত্তি. একেন সমুট্ঠানেন সমুট্ঠাতি – কাযতো চ চিত্ততো চ সমুট্ঠাতি, ন ৰাচতো…পে….

অনাদরিযং পটিচ্চ উক্খিত্তকায অন্তরঘরে নিসীদন্তস্স দুক্কটং…পে… একা পঞ্ঞত্তি. একেন সমুট্ঠানেন সমুট্ঠাতি – কাযতো চ চিত্ততো চ সমুট্ঠাতি, ন ৰাচতো…পে….

পরিমণ্ডলৰগ্গো পঠমো.