৬. পাটিদেসনীযকণ্ডং

১৪৬. যং তেন ভগৰতা জানতা পস্সতা অরহতা সম্মাসম্বুদ্ধেন অঞ্ঞাতিকায ভিক্খুনিযা অন্তরঘরং পৰিট্ঠায হত্থতো খাদনীযং ৰা ভোজনীযং ৰা সহত্থা পটিগ্গহেত্ৰা ভুঞ্জন্তস্স পাটিদেসনীযং কত্থ পঞ্ঞত্তন্তি? সাৰত্থিযং পঞ্ঞত্তং. কং আরব্ভাতি? অঞ্ঞতরং ভিক্খুং আরব্ভ. কিস্মিং ৰত্থুস্মিন্তি? অঞ্ঞতরো ভিক্খু অঞ্ঞাতিকায ভিক্খুনিযা অন্তরঘরং পৰিট্ঠায হত্থতো আমিসং পটিগ্গহেসি, তস্মিং ৰত্থুস্মিং. একা পঞ্ঞত্তি. ছন্নং আপত্তিসমুট্ঠানানং দ্ৰীহি সমুট্ঠানেহি সমুট্ঠাতি – সিযা কাযতো সমুট্ঠাতি, ন ৰাচতো ন চিত্ততো; সিযা কাযতো চ চিত্ততো চ সমুট্ঠাতি, ন ৰাচতো…পে….

১৪৭. ভিক্খুনিযা ৰোসাসন্তিযা ন নিৰারেত্ৰা ভুঞ্জন্তস্স পাটিদেসনীযং কত্থ পঞ্ঞত্তন্তি? রাজগহে পঞ্ঞত্তং. কং আরব্ভাতি? ছব্বগ্গিযে ভিক্খূ আরব্ভ. কিস্মিং ৰত্থুস্মিন্তি? ছব্বগ্গিযা ভিক্খূ ভিক্খুনিযো ৰোসাসন্তিযো ন নিৰারেসুং, তস্মিং ৰত্থুস্মিং. একা পঞ্ঞত্তি. ছন্নং আপত্তিসমুট্ঠানানং দ্ৰীহি সমুট্ঠানেহি সমুট্ঠাতি – সিযা কাযতো চ ৰাচতো চ সমুট্ঠাতি, ন চিত্ততো; সিযা কাযতো চ ৰাচতো চ চিত্ততো চ সমুট্ঠাতি…পে….

১৪৮. সেক্খসম্মতেসু কুলেসু খাদনীযং ৰা ভোজনীযং ৰা সহত্থা পটিগ্গহেত্ৰা ভুঞ্জন্তস্স পাটিদেসনীযং কত্থ পঞ্ঞত্তন্তি? সাৰত্থিযং পঞ্ঞত্তং. কং আরব্ভাতি? সম্বহুলে ভিক্খূ আরব্ভ. কিস্মিং ৰত্থুস্মিন্তি? সম্বহুলা ভিক্খূ ন মত্তং জানিত্ৰা পটিগ্গহেসুং, তস্মিং ৰত্থুস্মিং. একা পঞ্ঞত্তি, দ্ৰে অনুপঞ্ঞত্তিযো. ছন্নং আপত্তিসমুট্ঠানানং দ্ৰীহি সমুট্ঠানেহি সমুট্ঠাতি – সিযা কাযতো সমুট্ঠাতি, ন ৰাচতো ন চিত্ততো; সিযা কাযতো চ চিত্ততো চ সমুট্ঠাতি, ন ৰাচতো…পে….

১৪৯. আরঞ্ঞকেসু সেনাসনেসু পুব্বে অপ্পটিসংৰিদিতং খাদনীযং ৰা ভোজনীযং ৰা অজ্ঝারামে সহত্থা পটিগ্গহেত্ৰা ভুঞ্জন্তস্স পাটিদেসনীযং কত্থ পঞ্ঞত্তন্তি? সক্কেসু পঞ্ঞত্তং. কং আরব্ভাতি? সম্বহুলে ভিক্খূ আরব্ভ. কিস্মিং ৰত্থুস্মিন্তি. সম্বহুলা ভিক্খূ আরামে চোরে পটিৰসন্তে নারোচেসুং, তস্মিং ৰত্থুস্মিং. একা পঞ্ঞত্তি, একা অনুপঞ্ঞত্তি. ছন্নং আপত্তিসমুট্ঠানানং দ্ৰীহি সমুট্ঠানেহি সমুট্ঠাতি – সিযা কাযতো চ ৰাচতো চ সমুট্ঠাতি, ন চিত্ততো; সিযা কাযতো চ ৰাচতো চ চিত্ততো চ সমুট্ঠাতি…পে….

চত্তারো পাটিদেসনীযা নিট্ঠিতা.

তস্সুদ্দানং –

অঞ্ঞাতিকায ৰোসাসং, সেক্খআরঞ্ঞকেন চ;

পাটিদেসনীযা চত্তারো, সম্বুদ্ধেন পকাসিতাতি.