৬. পিণ্ডচারিকৰত্তকথা

৩৬৫. তেন খো পন সমযেন পিণ্ডচারিকা ভিক্খূ দুন্নিৰত্থা দুপ্পারুতা অনাকপ্পসম্পন্না পিণ্ডায চরন্তি, অসল্লক্খেত্ৰাপি নিৰেসনং পৰিসন্তি, অসল্লক্খেত্ৰাপি নিক্খমন্তি, অতিসহসাপি পৰিসন্তি, অতিসহসাপি নিক্খমন্তি, অতিদূরেপি তিট্ঠন্তি, অচ্চাসন্নেপি তিট্ঠন্তি, অতিচিরম্পি তিট্ঠন্তি, অতিলহুম্পি নিৰত্তন্তি. অঞ্ঞতরোপি পিণ্ডচারিকো ভিক্খু অসল্লক্খেত্ৰা নিৰেসনং পাৰিসি. সো চ দ্ৰারং মঞ্ঞমানো অঞ্ঞতরং ওৰরকং পাৰিসি. তস্মিম্পি ওৰরকে ইত্থী নগ্গা উত্তানা নিপন্না হোতি. অদ্দসা খো সো ভিক্খু তং ইত্থিং নগ্গং উত্তানং নিপন্নং. দিস্ৰান – ‘‘নযিদং দ্ৰারং, ওৰরকং ইদ’’ন্তি তম্হা ওৰরকা নিক্খমি. অদ্দসা খো তস্সা ইত্থিযা সামিকো তং ইত্থিং নগ্গং উত্তানং নিপন্নং. দিস্ৰান – ‘‘ইমিনা মে ভিক্খুনা পজাপতী দূসিতা’’তি তং ভিক্খুং গহেত্ৰা আকোটেসি. অথ খো সা ইত্থী তেন সদ্দেন পটিবুজ্ঝিত্ৰা তং পুরিসং এতদৰোচ – ‘‘কিস্স ত্ৰং, অয্য, ইমং ভিক্খুং আকোটেসী’’তি? ‘‘ইমিনাসি ত্ৰং ভিক্খুনা দূসিতা’’তি? ‘‘নাহং, অয্য, ইমিনা ভিক্খুনা দূসিতা; অকারকো সো ভিক্খূ’’তি তং ভিক্খুং মুঞ্চাপেসি. অথ খো সো ভিক্খু আরামং গন্ত্ৰা ভিক্খূনং এতমত্থং আরোচেসি. যে তে ভিক্খূ অপ্পিচ্ছা…পে… তে উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম পিণ্ডচারিকা ভিক্খূ দুন্নিৰত্থা দুপ্পারুতা অনাকপ্পসম্পন্না পিণ্ডায চরিস্সন্তি, অসল্লক্খেত্ৰাপি নিৰেসনং পৰিসিস্সন্তি, অসল্লক্খেত্ৰাপি নিক্খমিস্সন্তি, অতিসহসাপি পৰিসিস্সন্তি, অতিসহসাপি নিক্খমিস্সন্তি, অতিদূরেপি তিট্ঠিস্সন্তি, অচ্চাসন্নেপি তিট্ঠিস্সন্তি, অতিচিরম্পি তিট্ঠিস্সন্তি, অতিলহুম্পি নিৰত্তিস্সন্তী’’তি! অথ খো তে ভিক্খূ ভগৰতো এতমত্থং আরোচেসুং…পে… সচ্চং কির, ভিক্খৰে…পে… সচ্চং ভগৰাতি…পে… ৰিগরহিত্ৰা…পে… ধম্মিং কথং কত্ৰা ভিক্খূ আমন্তেসি –

৩৬৬. ‘‘তেন হি, ভিক্খৰে, পিণ্ডচারিকানং ভিক্খূনং ৰত্তং পঞ্ঞাপেস্সামি যথা পিণ্ডচারিকেহি ভিক্খূহি সম্মা ৰত্তিতব্বং. পিণ্ডচারিকেন, ভিক্খৰে, ভিক্খুনা – ‘ইদানি গামং পৰিসিস্সামী’তি তিমণ্ডলং পটিচ্ছাদেন্তেন পরিমণ্ডলং নিৰাসেত্ৰা কাযবন্ধনং বন্ধিত্ৰা সগুণং কত্ৰা সঙ্ঘাটিযো পারুপিত্ৰা গণ্ঠিকং পটিমুঞ্চিত্ৰা ধোৰিত্ৰা পত্তং গহেত্ৰা সাধুকং অতরমানেন গামো পৰিসিতব্বো.

‘‘সুপ্পটিচ্ছন্নেন অন্তরঘরে গন্তব্বং. সুসংৰুতেন অন্তরঘরে গন্তব্বং. ওক্খিত্তচক্খুনা অন্তরঘরে গন্তব্বং. ন উক্খিত্তকায অন্তরঘরে গন্তব্বং. ন উজ্জগ্ঘিকায অন্তরঘরে গন্তব্বং. অপ্পসদ্দেন অন্তরঘরে গন্তব্বং. ন কাযপ্পচালকং অন্তরঘরে গন্তব্বং. ন বাহুপ্পচালকং অন্তরঘরে গন্তব্বং. ন সীসপ্পচালকং অন্তরঘরে গন্তব্বং. ন খম্ভকতেন অন্তরঘরে গন্তব্বং. ন ওগুণ্ঠিতেন অন্তরঘরে গন্তব্বং. ন উক্কুটিকায অন্তরঘরে গন্তব্বং.

‘‘নিৰেসনং পৰিসন্তেন সল্লক্খেতব্বং – ‘ইমিনা পৰিসিস্সামি, ইমিনা নিক্খমিস্সামী’তি. নাতিসহসা পৰিসিতব্বং. নাতিসহসা নিক্খমিতব্বং. নাতিদূরে ঠাতব্বং. নাচ্চাসন্নে ঠাতব্বং. নাতিচিরং ঠাতব্বং. নাতিলহুং নিৰত্তিতব্বং. ঠিতকেন সল্লক্খেতব্বং – ‘ভিক্খং দাতুকামা ৰা অদাতুকামা ৰা’তি. সচে কম্মং ৰা নিক্খিপতি, আসনা ৰা ৰুট্ঠাতি, কটচ্ছুং ৰা পরামসতি, ভাজনং ৰা পরামসতি, ঠপেতি [ঠাপেতি (ক.)] ৰা – দাতুকামস্সাতি [দাতুকামিযাতি (স্যা.), দাতুকামা ৰিযাতি (সী.)] ঠাতব্বং. ভিক্খায দিয্যমানায ৰামেন হত্থেন সঙ্ঘাটিং উচ্চারেত্ৰা দক্খিণেন হত্থেন পত্তং পণামেত্ৰা উভোহি হত্থেহি পত্তং পটিগ্গহেত্ৰা ভিক্খা পটিগ্গহেতব্বা. ন চ ভিক্খাদাযিকায মুখং উল্লোকেতব্বং [ওলোকেতব্বং (স্যা.)]. সল্লক্খেতব্বং – ‘সূপং দাতুকামা ৰা অদাতুকামা ৰা’তি. সচে কটচ্ছুং ৰা পরামসতি, ভাজনং ৰা পরামসতি, ঠপেতি ৰা – দাতুকামস্সাতি ঠাতব্বং. ভিক্খায দিন্নায সঙ্ঘাটিযা পত্তং পটিচ্ছাদেত্ৰা সাধুকং অতরমানেন নিৰত্তিতব্বং.

‘‘সুপ্পটিচ্ছন্নেন অন্তরঘরে গন্তব্বং. সুসংৰুতেন অন্তরঘরে গন্তব্বং. ওক্খিত্তচক্খুনা অন্তরঘরে গন্তব্বং. ন উক্খিত্তকায অন্তরঘরে গন্তব্বং. ন উজ্জগ্ঘিকায অন্তরঘরে গন্তব্বং. অপ্পসদ্দেন অন্তরঘরে গন্তব্বং. ন কাযপ্পচালকং অন্তরঘরে গন্তব্বং. ন বাহুপ্পচালকং অন্তরঘরে গন্তব্বং. ন সীসপ্পচালকং অন্তরঘরে গন্তব্বং. ন খম্ভকতেন অন্তরঘরে গন্তব্বং. ন ওগুণ্ঠিতেন অন্তরঘরে গন্তব্বং. ন উক্কুটিকায অন্তরঘরে গন্তব্বং. যো পঠমং গামতো পিণ্ডায পটিক্কমতি, তেন আসনং পঞ্ঞপেতব্বং, পাদোদকং পাদপীঠং পাদকথলিকং উপনিক্খিপিতব্বং, অৰক্কারপাতি ধোৰিত্ৰা উপট্ঠাপেতব্বা, পানীযং পরিভোজনীযং উপট্ঠাপেতব্বং. যো পচ্ছা গামতো পিণ্ডায পটিক্কমতি, সচে হোতি ভুত্তাৰসেসো, সচে আকঙ্খতি, ভুঞ্জিতব্বং. নো চে আকঙ্খতি, অপ্পহরিতে ৰা ছড্ডেতব্বং, অপ্পাণকে ৰা উদকে ওপিলাপেতব্বং. তেন আসনং উদ্ধরিতব্বং, পাদোদকং পাদপীঠং পাদকথলিকং পটিসামেতব্বং, অৰক্কারপাতি ধোৰিত্ৰা পটিসামেতব্বা, পানীযং পরিভোজনীযং পটিসামেতব্বং, ভত্তগ্গং সম্মজ্জিতব্বং. যো পস্সতি পানীযঘটং ৰা পরিভোজনীযঘটং ৰা ৰচ্চঘটং ৰা রিত্তং তুচ্ছং তেন উপট্ঠাপেতব্বং. সচস্স হোতি অৰিসয্হং, হত্থৰিকারেন দুতিযং আমন্তেত্ৰা হত্থৰিলঙ্ঘকেন উপট্ঠাপেতব্বং, ন চ তপ্পচ্চযা ৰাচা ভিন্দিতব্বা. ইদং খো, ভিক্খৰে, পিণ্ডচারিকানং ভিক্খূনং ৰত্তং যথা পিণ্ডচারিকেহি ভিক্খূহি সম্মা ৰত্তিতব্ব’’ন্তি.