১৪. অন্তেৰাসিকৰত্তকথা

৩৮১. তেন খো পন সমযেন আচরিযা অন্তেৰাসিকেসু ন সম্মা ৰত্তন্তি. যে তে ভিক্খূ অপ্পিচ্ছা…পে… তে উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম আচরিযা অন্তেৰাসিকেসু ন সম্মা ৰত্তিস্সন্তী’’তি! অথ খো তে ভিক্খূ ভগৰতো এতমত্থং আরোচেসুং. অথ খো ভগৰা এতস্মিং নিদানে এতস্মিং পকরণে ভিক্খুসঙ্ঘং সন্নিপাতাপেত্ৰা ভিক্খূ পটিপুচ্ছি – ‘‘সচ্চং কির, ভিক্খৰে, আচরিযা অন্তেৰাসিকেসু ন সম্মা ৰত্তন্তী’’তি? ‘‘সচ্চং ভগৰা’’তি…পে… ৰিগরহিত্ৰা…পে… ধম্মিং কথং কত্ৰা ভিক্খূ আমন্তেসি –

৩৮২. ‘‘তেন হি, ভিক্খৰে, আচরিযানং অন্তেৰাসিকেসু ৰত্তং পঞ্ঞপেস্সামি যথা আচরিযেহি অন্তেৰাসিকেসু সম্মা ৰত্তিতব্বং. [মহাৰ. ৭৯] আচরিযেন, ভিক্খৰে, অন্তেৰাসিকম্হি সম্মা ৰত্তিতব্বং. তত্রাযং সম্মাৰত্তনা –

‘‘আচরিযেন, ভিক্খৰে, অন্তেৰাসিকো সঙ্গহেতব্বো অনুগ্গহেতব্বো উদ্দেসেন পরিপুচ্ছায ওৰাদেন অনুসাসনিযা. সচে আচরিযস্স পত্তো হোতি, অন্তেৰাসিকস্স পত্তো ন হোতি, আচরিযেন অন্তেৰাসিকস্স পত্তো দাতব্বো, উস্সুক্কং ৰা কাতব্বং – কিন্তি নু খো অন্তেৰাসিকস্স পত্তো উপ্পজ্জিযেথাতি. সচে আচরিযস্স চীৰরং হোতি, অন্তেৰাসিকস্স চীৰরং ন হোতি, আচরিযেন অন্তেৰাসিকস্স চীৰরং দাতব্বং, উস্সুক্কং ৰা কাতব্বং – কিন্তি নু খো অন্তেৰাসিকস্স চীৰরং উপ্পজ্জিযেথাতি. সচে আচরিযস্স পরিক্খারো হোতি, অন্তেৰাসিকস্স পরিক্খারো ন হোতি, আচরিযেন অন্তেৰাসিকস্স পরিক্খারো দাতব্বো, উস্সুক্কং ৰা কাতব্বং – কিন্তি নু খো অন্তেৰাসিকস্স পরিক্খারো উপ্পজ্জিযেথাতি.

‘‘সচে অন্তেৰাসিকো গিলানো হোতি, কালস্সেৰ উট্ঠায দন্তকট্ঠং দাতব্বং, মুখোদকং দাতব্বং, আসনং পঞ্ঞপেতব্বং. সচে যাগু হোতি, ভাজনং ধোৰিত্ৰা যাগু উপনামেতব্বা. যাগুং পীতস্স উদকং দত্ৰা ভাজনং পটিগ্গহেত্ৰা নীচং কত্ৰা সাধুকং অপ্পটিঘংসন্তেন ধোৰিত্ৰা পটিসামেতব্বং. অন্তেৰাসিকম্হি ৰুট্ঠিতে আসনং উদ্ধরিতব্বং. সচে সো দেসো উক্লাপো হোতি, সো দেসো সম্মজ্জিতব্বো.

‘‘সচে অন্তেৰাসিকো গামং পৰিসিতুকামো হোতি, নিৰাসনং দাতব্বং, পটিনিৰাসনং পটিগ্গহেতব্বং, কাযবন্ধনং দাতব্বং, সগুণং কত্ৰা সঙ্ঘাটিযো দাতব্বা, ধোৰিত্ৰা পত্তো সোদকো দাতব্বো.

‘‘এত্তাৰতা নিৰত্তিস্সতীতি আসনং পঞ্ঞপেতব্বং, পাদোদকং পাদপীঠং পাদকথলিকং উপনিক্খিপিতব্বং, পচ্চুগ্গন্ত্ৰা পত্তচীৰরং পটিগ্গহেতব্বং, পটিনিৰাসনং দাতব্বং, নিৰাসনং পটিগ্গহেতব্বং. সচে চীৰরং সিন্নং হোতি, মুহুত্তং উণ্হে ওতাপেতব্বং, ন চ উণ্হে চীৰরং নিদহিতব্বং. চীৰরং সঙ্ঘরিতব্বং. চীৰরং সঙ্ঘরন্তেন চতুরঙ্গুলং কণ্ণং উস্সারেত্ৰা চীৰরং সঙ্ঘরিতব্বং – মা মজ্ঝে ভঙ্গো অহোসীতি. ওভোগে কাযবন্ধনং কাতব্বং.

‘‘সচে পিণ্ডপাতো হোতি, অন্তেৰাসিকো চ ভুঞ্জিতুকামো হোতি, উদকং দত্ৰা পিণ্ডপাতো উপনামেতব্বো. অন্তেৰাসিকো পানীযেন পুচ্ছিতব্বো. ভুত্তাৰিস্স উদকং দত্ৰা পত্তং পটিগ্গহেত্ৰা নীচং কত্ৰা সাধুকং অপ্পটিঘংসন্তেন ধোৰিত্ৰা ৰোদকং কত্ৰা মুহুত্তং উণ্হে ওতাপেতব্বো, ন চ উণ্হে পত্তো নিদহিতব্বো. পত্তচীৰরং নিক্খিপিতব্বং. পত্তং নিক্খিপন্তেন…পে… চীৰরং নিক্খিপন্তেন…পে… পারতো অন্তং ওরতো ভোগং কত্ৰা চীৰরং নিক্খিপিতব্বং. অন্তেৰাসিকম্হি উট্ঠিতে আসনং উদ্ধরিতব্বং, পাদোদকং পাদপীঠং পাদকথলিকং পটিসামেতব্বং. সচে সো দেসো উক্লাপো হোতি, সো দেসো সম্মজ্জিতব্বো.

‘‘সচে অন্তেৰাসিকো নহাযিতুকামো হোতি, নহানং পটিযাদেতব্বং. সচে সীতেন অত্থো হোতি, সীতং পটিযাদেতব্বং. সচে উণ্হেন অত্থো হোতি, উণ্হং পটিযাদেতব্বং.

‘‘সচে অন্তেৰাসিকো জন্তাঘরং পৰিসিতুকামো হোতি, চুণ্ণং সন্নেতব্বং, মত্তিকা তেমেতব্বা, জন্তাঘরপীঠং আদায [আদায অন্তেৰাসিকস্স পিট্ঠিতো পিট্ঠিতো (ক.)] গন্ত্ৰা জন্তাঘরপীঠং দত্ৰা চীৰরং পটিগ্গহেত্ৰা একমন্তং নিক্খিপিতব্বং, চুণ্ণং দাতব্বং, মত্তিকা দাতব্বা. সচে উস্সহতি জন্তাঘরং পৰিসিতব্বং. জন্তাঘরং পৰিসন্তেন মত্তিকায মুখং মক্খেত্ৰা পুরতো চ পচ্ছতো চ পটিচ্ছাদেত্ৰা জন্তাঘরং পৰিসিতব্বং. ন থেরে ভিক্খূ অনুপখজ্জ নিসীদিতব্বং. ন নৰা ভিক্খূ আসনেন পটিবাহিতব্বা. জন্তাঘরে অন্তেৰাসিকস্স পরিকম্মং কাতব্বং. জন্তাঘরা নিক্খমন্তেন জন্তাঘরপীঠং আদায পুরতো চ পচ্ছতো চ পটিচ্ছাদেত্ৰা জন্তাঘরা নিক্খমিতব্বং.

‘‘উদকেপি অন্তেৰাসিকস্স পরিকম্মং কাতব্বং. নহাতেন পঠমতরং উত্তরিত্ৰা অত্তনো গত্তং ৰোদকং কত্ৰা নিৰাসেত্ৰা অন্তেৰাসিকস্স গত্ততো উদকং পমজ্জিতব্বং, নিৰাসনং দাতব্বং, সঙ্ঘাটি দাতব্বা, জন্তাঘরপীঠং আদায পঠমতরং আগন্ত্ৰা আসনং পঞ্ঞপেতব্বং, পাদোদকং পাদপীঠং পাদকথলিকং উপনিক্খিপিতব্বং, অন্তেৰাসিকো পানীযেন পুচ্ছিতব্বো.

‘‘যস্মিং ৰিহারে অন্তেৰাসিকো ৰিহরতি, সচে সো ৰিহারো উক্লাপো হোতি, সচে উস্সহতি, সোধেতব্বো. ৰিহারং সোধেন্তেন পঠমং পত্তচীৰরং নীহরিত্ৰা একমন্তং নিক্খিপিতব্বং…পে… আচমনকুম্ভিযা উদকং ন হোতি, আচমনকুম্ভিযা উদকং আসিঞ্চিতব্বং.

‘‘সচে অন্তেৰাসিকস্স অনভিরতি উপ্পন্না হোতি, আচরিযেন ৰূপকাসেতব্বো, ৰূপকাসাপেতব্বো, ধম্মকথা ৰাস্স কাতব্বা. সচে অন্তেৰাসিকস্স কুক্কুচ্চং উপ্পন্নং হোতি, আচরিযেন ৰিনোদেতব্বং, ৰিনোদাপেতব্বং, ধম্মকথা ৰাস্স কাতব্বা. সচে অন্তেৰাসিকস্স দিট্ঠিগতং উপ্পন্নং হোতি, আচরিযেন ৰিৰেচেতব্বং, ৰিৰেচাপেতব্বং, ধম্মকথা ৰাস্স কাতব্বা. সচে অন্তেৰাসিকো গরুধম্মং অজ্ঝাপন্নো হোতি, পরিৰাসারহো, আচরিযেন উস্সুক্কং কাতব্বং – কিন্তি নু খো সঙ্ঘো অন্তেৰাসিকস্স পরিৰাসং দদেয্যাতি. সচে অন্তেৰাসিকো মূলাযপটিকস্সনারহো হোতি, আচরিযেন উস্সুক্কং কাতব্বং – কিন্তি নু খো সঙ্ঘো অন্তেৰাসিকং মূলায পটিকস্সেয্যাতি. সচে অন্তেৰাসিকো মানত্তারহো হোতি, আচরিযেন উস্সুক্কং কাতব্বং – কিন্তি নু খো সঙ্ঘো অন্তেৰাসিকস্স মানত্তং দদেয্যাতি. সচে অন্তেৰাসিকো অব্ভানারহো হোতি, আচরিযেন উস্সুক্কং কাতব্বং – কিন্তি নু খো সঙ্ঘো অন্তেৰাসিকং অব্ভেয্যাতি. সচে সঙ্ঘো অন্তেৰাসিকস্স কম্মং কত্তুকামো হোতি, তজ্জনীযং ৰা নিযস্সং ৰা পব্বাজনীযং ৰা পটিসারণীযং ৰা উক্খেপনীযং ৰা, আচরিযেন উস্সুক্কং কাতব্বং – কিন্তি নু খো সঙ্ঘো অন্তেৰাসিকস্স কম্মং ন করেয্য, লহুকায ৰা পরিণামেয্যাতি. কতং ৰা পনস্স হোতি, সঙ্ঘেন কম্মং, তজ্জনীযং ৰা নিযস্সং ৰা পব্বাজনীযং ৰা পটিসারণীযং ৰা উক্খেপনীযং ৰা, আচরিযেন উস্সুক্কং কাতব্বং – কিন্তি নু খো অন্তেৰাসিকো সম্মা ৰত্তেয্য, লোমং পাতেয্য, নেত্থারং ৰত্তেয্য, সঙ্ঘো তং কম্মং পটিপ্পস্সম্ভেয্যাতি.

‘‘সচে অন্তেৰাসিকস্স চীৰরং ধোৰিতব্বং হোতি, আচরিযেন আচিক্খিতব্বং – এৰং ধোৰেয্যাসীতি, উস্সুক্কং ৰা কাতব্বং – কিন্তি নু খো অন্তেৰাসিকস্স চীৰরং ধোৰিযেথাতি. সচে অন্তেৰাসিকস্স চীৰরং কাতব্বং হোতি, আচরিযেন আচিক্খিতব্বং – এৰং করেয্যাসীতি, উস্সুক্কং ৰা কাতব্বং – কিন্তি নু খো অন্তেৰাসিকস্স চীৰরং করিযেথাতি. সচে অন্তেৰাসিকস্স রজনং পচিতব্বং হোতি, আচরিযেন আচিক্খিতব্বং – এৰং পচেয্যাসীতি, উস্সুক্কং ৰা কাতব্বং – কিন্তি নু খো অন্তেৰাসিকস্স রজনং পচিযেথাতি. সচে অন্তেৰাসিকস্স চীৰরং রজিতব্বং হোতি, আচরিযেন আচিক্খিতব্বং – এৰং রজেয্যাসীতি, উস্সুক্কং ৰা কাতব্বং – কিন্তি নু খো অন্তেৰাসিকস্স চীৰরং রজিযেথাতি. চীৰরং রজন্তেন সাধুকং সম্পরিৰত্তকং সম্পরিৰত্তকং রজিতব্বং. ন চ অচ্ছিন্নে থেৰে পক্কমিতব্বং. সচে অন্তেৰাসিকো গিলানো হোতি, যাৰজীৰং উপট্ঠাতব্বো, ৰুট্ঠানমস্স আগমেতব্বং. ইদং খো, ভিক্খৰে, আচরিযানং অন্তেৰাসিকেসু ৰত্তং যথা আচরিযেহি অন্তেৰাসিকেসু সম্মা ৰত্তিতব্ব’’ন্তি.

ৰত্তক্খন্ধকো অট্ঠমো.

ইমম্হি খন্ধকে ৰত্থূ একূনৰীসতি, ৰত্তা চুদ্দস.

তস্সুদ্দানং –

সউপাহনা ছত্তা চ, ওগুণ্ঠি সীসং পানীযং;

নাভিৰাদে ন পুচ্ছন্তি, অহি উজ্ঝন্তি পেসলা.

ওমুঞ্চি ছত্তং খন্ধে চ, অতরঞ্চ পটিক্কমং;

পত্তচীৰরং নিক্খিপা, পতিরূপঞ্চ পুচ্ছিতা.

আসিঞ্চেয্য ধোৰিতেন, সুক্খেনল্লেনুপাহনা;

ৰুড্ঢো নৰকো পুচ্ছেয্য, অজ্ঝাৰুট্ঠঞ্চ গোচরা.

সেক্খা ৰচ্চা পানী পরি, কত্তরং কতিকং ততো;

কালং মুহুত্তং উক্লাপো, ভূমত্থরণং নীহরে.

পটিপাদো ভিসিবিব্বো, মঞ্চপীঠঞ্চ মল্লকং;

অপস্সেনুল্লোককণ্ণা, গেরুকা কাল় অকতা.

সঙ্কারঞ্চ ভূমত্থরণং, পটিপাদকং মঞ্চপীঠং;

ভিসি নিসীদনম্পি, মল্লকং অপস্সেন চ.

পত্তচীৰরং ভূমি চ, পারন্তং ওরতো ভোগং;

পুরত্থিমা পচ্ছিমা চ, উত্তরা অথ দক্খিণা.

সীতুণ্হে চ দিৰারত্তিং, পরিৰেণঞ্চ কোট্ঠকো;

উপট্ঠানগ্গি সালা চ, ৰত্তং ৰচ্চকুটীসু চ.

পানী পরিভোজনিযা, কুম্ভি আচমনেসু চ;

অনোপমেন পঞ্ঞত্তং, ৰত্তং আগন্তুকেহিমে [ৰে (ক. এৰমুপরিপি)].

নেৰাসনং ন উদকং, ন পচ্চু ন চ পানিযং;

নাভিৰাদে নপঞ্ঞপে, উজ্ঝাযন্তি চ পেসলা.

ৰুড্ঢাসনঞ্চ উদকং, পচ্চুগ্গন্ত্ৰা চ পানিযং;

উপাহনে একমন্তং, অভিৰাদে চ পঞ্ঞপে.

ৰুত্থং গোচরসেক্খো চ, ঠানং পানিযভোজনং;

কত্তরং কতিকং কালং, নৰকস্স নিসিন্নকে.

অভিৰাদযে আচিক্খে, যথা হেট্ঠা তথা নযে;

নিদ্দিট্ঠং সত্থৰাহেন ৰত্তং আৰাসিকেহিমে.

গমিকা দারুমত্তি চ, ৰিৰরিত্ৰা ন পুচ্ছিয;

নস্সন্তি চ অগুত্তঞ্চ, উজ্ঝাযন্তি চ পেসলা.

পটিসামেত্ৰা থকেত্ৰা, আপুচ্ছিত্ৰাৰ পক্কমে;

ভিক্খু ৰা সামণেরো ৰা, আরামিকো উপাসকো.

পাসাণকেসু চ পুঞ্জং, পটিসামে থকেয্য চ;

সচে উস্সহতি উস্সুক্কং, অনোৰস্সে তথেৰ চ.

সব্বো ওৰস্সতি গামং, অজ্ঝোকাসে তথেৰ চ;

অপ্পেৰঙ্গানি সেসেয্যুং, ৰত্তং গমিকভিক্খুনা.

নানুমোদন্তি থেরেন, ওহায চতুপঞ্চহি;

ৰচ্চিতো মুচ্ছিতো আসি, ৰত্তানুমোদনেসুমে.

ছব্বগ্গিযা দুন্নিৰত্থা, অথোপি চ দুপ্পারুতা;

অনাকপ্পা চ ৰোক্কম্ম, থেরে অনুপখজ্জনে.

নৰে ভিক্খূ চ সঙ্ঘাটি, উজ্ঝাযন্তি চ পেসলা;

তিমণ্ডলং নিৰাসেত্ৰা, কাযসগুণগণ্ঠিকা.

ন ৰোক্কম্ম পটিচ্ছন্নং, সুসংৰুতোক্খিত্তচক্খু;

উক্খিত্তোজ্জগ্ঘিকাসদ্দো, তযো চেৰ পচালনা.

খম্ভোগুণ্ঠিউক্কুটিকা, পটিচ্ছন্নং সুসংৰুতো;

ওক্খিত্তুক্খিত্তউজ্জগ্ঘি, অপ্পসদ্দো তযো চলা.

খম্ভোগুণ্ঠিপল্লত্থি চ, অনুপখজ্জ নাসনে;

ওত্থরিত্ৰান উদকে, নীচং কত্ৰান সিঞ্চিযা.

পটি সামন্তা সঙ্ঘাটি, ওদনে চ পটিগ্গহে;

সূপং উত্তরিভঙ্গেন, সব্বেসং সমতিত্থি চ.

সক্কচ্চং পত্তসঞ্ঞী চ, সপদানঞ্চ সূপকং;

ন থূপতো পটিচ্ছাদে, ৰিঞ্ঞত্তুজ্ঝানসঞ্ঞিনা.

মহন্তমণ্ডলদ্ৰারং, সব্বহত্থো ন ব্যাহরে;

উক্খেপো ছেদনাগণ্ড, ধুনং সিত্থাৰকারকং.

জিৰ্হানিচ্ছারকঞ্চেৰ, চপুচপু সুরুসুরু;

হত্থপত্তোট্ঠনিল্লেহং, সামিসেন পটিগ্গহে.

যাৰ ন সব্বে উদকে, নীচং কত্ৰান সিঞ্চিযং;

পটি সামন্তা সঙ্ঘাটি, নীচং কত্ৰা ছমায চ.

সসিত্থকং নিৰত্তন্তে, সুপ্পটিচ্ছন্নমুক্কুটি;

ধম্মরাজেন পঞ্ঞত্তং, ইদং ভত্তগ্গৰত্তনং.

দুন্নিৰত্থা অনাকপ্পা, অসল্লেক্খেত্ৰা চ সহসা;

দূরে অচ্চ চিরং লহুং, তথেৰ পিণ্ডচারিকো.

পটিচ্ছন্নোৰ গচ্ছেয্য, সুংসৰুতোক্খিত্তচক্খু;

উক্খিত্তোজ্জগ্ঘিকাসদ্দো, তযো চেৰ পচালনা.

খম্ভোগুণ্ঠিউক্কুটিকা, সল্লক্খেত্ৰা চ সহসা;

দূরে অচ্চ চিরং লহুং, আসনকং কটচ্ছুকা.

ভাজনং ৰা ঠপেতি চ, উচ্চারেত্ৰা পণামেত্ৰা;

পটিগ্গহে ন উল্লোকে, সূপেসুপি তথেৰ তং.

ভিক্খু সঙ্ঘাটিযা ছাদে, পটিচ্ছন্নেৰ গচ্ছিযং;

সংৰুতোক্খিত্তচক্খু চ, উক্খিত্তোজ্জগ্ঘিকায চ;

অপ্পসদ্দো তযো চালা, খম্ভোগুণ্ঠিকউক্কুটি.

পঠমাসনৰক্কার, পানিযং পরিভোজনী;

পচ্ছাকঙ্খতি ভুঞ্জেয্য, ওপিলাপেয্য উদ্ধরে.

পটিসামেয্য সম্মজ্জে, রিত্তং তুচ্ছং উপট্ঠপে;

হত্থৰিকারে ভিন্দেয্য, ৰত্তিদং পিণ্ডচারিকে.

পানী পরি অগ্গিরণি, নক্খত্তদিসচোরা চ;

সব্বং নত্থীতি কোট্টেত্ৰা, পত্তংসে চীৰরং ততো.

ইদানি অংসে লগ্গেত্ৰা, তিমণ্ডলং পরিমণ্ডলং;

যথা পিণ্ডচারিৰত্তং, নযে আরঞ্ঞকেসুপি.

পত্তংসে চীৰরং সীসে, আরোহিত্ৰা চ পানিযং;

পরিভোজনিযং অগ্গি, অরণী চাপি কত্তরং.

নক্খত্তং সপ্পদেসং ৰা, দিসাপি কুসলো ভৰে;

সত্তুত্তমেন পঞ্ঞত্তং, ৰত্তং আরঞ্ঞকেসুমে.

অজ্ঝোকাসে ওকিরিংসু, উজ্ঝাযন্তি চ পেসলা;

সচে ৰিহারো উক্লাপো, পঠমং পত্তচীৰরং.

ভিসিবিব্বোহনং মঞ্চং, পীঠঞ্চ খেল়মল্লকং;

অপস্সেনুল্লোককণ্ণা, গেরুকা কাল় অকতা.

সঙ্কারং ভিক্খুসামন্তা, সেনাৰিহারপানিযং;

পরিভোজনসামন্তা, পটিৰাতে চ অঙ্গণে.

অধোৰাতে অত্থরণং, পটিপাদকমঞ্চো চ;

পীঠং ভিসি নিসীদনং, মল্লকং অপস্সেন চ.

পত্তচীৰরং ভূমি চ, পারন্তং ওরতো ভোগং;

পুরত্থিমা চ পচ্ছিমা, উত্তরা অথ দক্খিণা.

সীতুণ্হে চ দিৰা রত্তিং, পরিৰেণঞ্চ কোট্ঠকো;

উপট্ঠানগ্গিসালা চ, ৰচ্চকুটী চ পানিযং.

আচমনকুম্ভি ৰুড্ঢে চ, উদ্দেসপুচ্ছনা সজ্ঝা;

ধম্মো পদীপং ৰিজ্ঝাপে, ন ৰিৰরে নপি থকে.

যেন ৰুড্ঢো পরিৰত্তি, কণ্ণেনপি ন ঘট্টযে;

পঞ্ঞপেসি মহাৰীরো, ৰত্তং সেনাসনেসু তং.

নিৰারিযমানা দ্ৰারং, মুচ্ছিতুজ্ঝন্তি পেসলা;

ছারিকং ছড্ডযে জন্তা, পরিভণ্ডং তথেৰ চ.

পরিৰেণং কোট্ঠকো সালা, চুণ্ণমত্তিকদোণিকা;

মুখং পুরতো ন থেরে, ন নৰে উস্সহতি সচে.

পুরতো উপরিমগ্গো, চিক্খল্লং মত্তি পীঠকং;

ৰিজ্ঝাপেত্ৰা থকেত্ৰা চ, ৰত্তং জন্তাঘরেসুমে.

নাচমেতি যথাৰুড্ঢং, পটিপাটি চ সহসা;

উব্ভজি নিত্থুনো কট্ঠং, ৰচ্চং পস্সাৰ খেল়কং.

ফরুসা কূপ সহসা, উব্ভজি চপু সেসেন;

বহি অন্তো চ উক্কাসে, রজ্জু অতরমানঞ্চ.

সহসা উব্ভজি ঠিতে, নিত্থুনে কট্ঠ ৰচ্চঞ্চ;

পস্সাৰ খেল় ফরুসা, কূপঞ্চ ৰচ্চপাদুকে.

নাতিসহসা উব্ভজি, পাদুকায চপুচপু;

ন সেসযে পটিচ্ছাদে, উহতপিধরেন চ.

ৰচ্চকুটী পরিভণ্ডং, পরিৰেণঞ্চ কোট্ঠকো;

আচমনে চ উদকং, ৰত্তং ৰচ্চকুটীসুমে.

উপাহনা দন্তকট্ঠং, মুখোদকঞ্চ আসনং;

যাগু উদকং ধোৰিত্ৰা, উদ্ধারুক্লাপ গাম চ.

নিৰাসনা কাযবন্ধা, সগুণং পত্তসোদকং;

পচ্ছা তিমণ্ডলো চেৰ, পরিমণ্ডল বন্ধনং.

সগুণং ধোৰিত্ৰা পচ্ছা, নাতিদূরে পটিগ্গহে;

ভণমানস্স আপত্তি, পঠমাগন্ত্ৰান আসনং.

উদকং পীঠকথলি, পচ্চুগ্গন্ত্ৰা নিৰাসনং;

ওতাপে নিদহি ভঙ্গো, ওভোগে ভুঞ্জিতু নমে.

পানীযং উদকং নীচং, মুহুত্তং ন চ নিদহে;

পত্তচীৰরং ভূমি চ, পারন্তং ওরতো ভোগং.

উদ্ধরে পটিসামে চ, উক্লাপো চ নহাযিতুং;

সীতং উণ্হং জন্তাঘরং, চুণ্ণং মত্তিক পিট্ঠিতো.

পীঠঞ্চ চীৰরং চুণ্ণং, মত্তিকুস্সহতি মুখং;

পুরতো থেরে নৰে চ, পরিকম্মঞ্চ নিক্খমে.

পুরতো উদকে ন্হাতে, নিৰাসেত্ৰা উপজ্ঝাযং;

নিৰাসনঞ্চ সঙ্ঘাটি, পীঠকং আসনেন চ.

পাদো পীঠং কথলিঞ্চ, পানীযুদ্দেসপুচ্ছনা;

উক্লাপং সুসোধেয্য, পঠমং পত্তচীৰরং.

নিসীদনপচ্চত্থরণং, ভিসি বিব্বোহনানি চ;

মঞ্চো পীঠং পটিপাদং, মল্লকং অপস্সেন চ.