৮. দ্ৰেভিক্খুৰারএকাদসকং

১৮১. ‘‘দ্ৰে ভিক্খূ সঙ্ঘাদিসেসং আপন্না হোন্তি. তে সঙ্ঘাদিসেসে সঙ্ঘাদিসেসদিট্ঠিনো হোন্তি. একো ছাদেতি, একো নচ্ছাদেতি. যো ছাদেতি সো দুক্কটং দেসাপেতব্বো. যথাপটিচ্ছন্নে [যথাপটিচ্ছন্নানং (সী.)] চস্স পরিৰাসং দত্ৰা উভিন্নম্পি মানত্তং দাতব্বং.

‘‘দ্ৰে ভিক্খূ সঙ্ঘাদিসেসং আপন্না হোন্তি. তে সঙ্ঘাদিসেসে ৰেমতিকা হোন্তি. একো ছাদেতি, একো নচ্ছাদেতি. যো ছাদেতি সো দুক্কটং দেসাপেতব্বো. যথাপটিচ্ছন্নে চস্স পরিৰাসং দত্ৰা উভিন্নম্পি মানত্তং দাতব্বং.

‘‘দ্ৰে ভিক্খূ সঙ্ঘাদিসেসং আপন্না হোন্তি. তে সঙ্ঘাদিসেসে মিস্সকদিট্ঠিনো হোন্তি. একো ছাদেতি, একো নচ্ছাদেতি. যো ছাদেতি সো দুক্কটং দেসাপেতব্বো. যথাপটিচ্ছন্নে চস্স পরিৰাসং দত্ৰা উভিন্নম্পি মানত্তং দাতব্বং.

‘‘দ্ৰে ভিক্খূ মিস্সকং আপন্না হোন্তি. তে মিস্সকে সঙ্ঘাদিসেসদিট্ঠিনো হোন্তি. একো ছাদেতি, একো নচ্ছাদেতি. যো ছাদেতি সো দুক্কটং দেসাপেতব্বো. যথাপটিচ্ছন্নে চস্স পরিৰাসং দত্ৰা উভিন্নম্পি মানত্তং দাতব্বং.

‘‘দ্ৰে ভিক্খূ মিস্সকং আপন্না হোন্তি. তে মিস্সকে মিস্সকদিট্ঠিনো হোন্তি. একো ছাদেতি, একো নচ্ছাদেতি. যো ছাদেতি সো দুক্কটং দেসাপেতব্বো. যথাপটিচ্ছন্নে চস্স পরিৰাসং দত্ৰা উভিন্নম্পি মানত্তং দাতব্বং.

‘‘দ্ৰে ভিক্খূ সুদ্ধকং আপন্না হোন্তি. তে সুদ্ধকে সঙ্ঘাদিসেসদিট্ঠিনো হোন্তি. একো ছাদেতি, একো নচ্ছাদেতি. যো ছাদেতি সো দুক্কটং দেসাপেতব্বো. উভোপি যথাধম্মং কারাপেতব্বা.

‘‘দ্ৰে ভিক্খূ সুদ্ধকং আপন্না হোন্তি. তে সুদ্ধকে সুদ্ধকদিট্ঠিনো হোন্তি. একো ছাদেতি, একো নচ্ছাদেতি. যো ছাদেতি সো দুক্কটং দেসাপেতব্বো. উভোপি যথাধম্মং কারাপেতব্বা.

‘‘দ্ৰে ভিক্খূ সঙ্ঘাদিসেসং আপন্না হোন্তি. তে সঙ্ঘাদিসেসে সঙ্ঘাদিসেসদিট্ঠিনো হোন্তি. একস্স হোতি আরোচেস্সামীতি, একস্স হোতি ন আরোচেস্সামীতি. সো পঠমম্পি যামং ছাদেতি, দুতিযম্পি যামং ছাদেতি, ততিযম্পি যামং ছাদেতি – উট্ঠিতে অরুণে ছন্না হোতি আপত্তি. যো ছাদেতি সো দুক্কটং দেসাপেতব্বো. যথাপটিচ্ছন্নে চস্স পরিৰাসং দত্ৰা উভিন্নম্পি মানত্তং দাতব্বং.

‘‘দ্ৰে ভিক্খূ সঙ্ঘাদিসেসং আপন্না হোন্তি. তে সঙ্ঘাদিসেসে সঙ্ঘাদিসেসদিট্ঠিনো হোন্তি. তে গচ্ছন্তি আরোচেস্সামাতি. একস্স অন্তরামগ্গে মক্খধম্মো উপ্পজ্জতি ন আরোচেস্সামীতি. সো পঠমম্পি যামং ছাদেতি, দুতিযম্পি যামং ছাদেতি, ততিযম্পি যামং ছাদেতি – উট্ঠিতে অরুণে ছন্না হোতি আপত্তি. যো ছাদেতি সো দুক্কটং দেসাপেতব্বো. যথাপটিচ্ছন্নে চস্স পরিৰাসং দত্ৰা উভিন্নম্পি মানত্তং দাতব্বং.

‘‘দ্ৰে ভিক্খূ সঙ্ঘাদিসেসং আপন্না হোন্তি. তে সঙ্ঘাদিসেসে সঙ্ঘাদিসেসদিট্ঠিনো হোন্তি. তে উম্মত্তকা হোন্তি. তে পচ্ছা অনুম্মত্তকা হুত্ৰা একো ছাদেতি, একো নচ্ছাদেতি. যো ছাদেতি সো দুক্কটং দেসাপেতব্বো. যথাপটিচ্ছন্নে চস্স পরিৰাসং দত্ৰা উভিন্নম্পি মানত্তং দাতব্বং.

‘‘দ্ৰে ভিক্খূ সঙ্ঘাদিসেসং আপন্না হোন্তি. তে পাতিমোক্খে উদ্দিস্সমানে এৰং ৰদন্তি – ‘ইদানেৰ খো মযং জানাম – অযম্পি কির ধম্মো সুত্তাগতো সুত্তপরিযাপন্নো অন্ৰদ্ধমাসং উদ্দেসং আগচ্ছতী’তি. তে সঙ্ঘাদিসেসে সঙ্ঘাদিসেসদিট্ঠিনো হোন্তি. একো ছাদেতি, একো নচ্ছাদেতি. যো ছাদেতি সো দুক্কটং দেসাপেতব্বো. যথাপটিচ্ছন্নে চস্স পরিৰাসং দত্ৰা উভিন্নম্পি মানত্তং দাতব্বং.

দ্ৰেভিক্খুৰারএকাদসকং নিট্ঠিতং.