৬. আপত্তিযা অপ্পটিকম্মে উক্খেপনীযকম্মং

৫৬. তেন সমযেন বুদ্ধো ভগৰা কোসম্বিযং ৰিহরতি ঘোসিতারামে. তেন খো পন সমযেন আযস্মা ছন্নো আপত্তিং আপজ্জিত্ৰা ন ইচ্ছতি আপত্তিং পটিকাতুং. যে তে ভিক্খূ অপ্পিচ্ছা…পে… তে উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম আযস্মা ছন্নো আপত্তিং আপজ্জিত্ৰা ন ইচ্ছিস্সতি আপত্তিং পটিকাতু’’ন্তি? অথ খো তে ভিক্খূ ভগৰতো এতমত্থং আরোচেসুং.

অথ খো ভগৰা এতস্মিং নিদানে এতস্মিং পকরণে ভিক্খুসঙ্ঘং সন্নিপাতাপেত্ৰা ভিক্খূ পটিপুচ্ছি – ‘‘সচ্চং কির, ভিক্খৰে, ছন্নো ভিক্খু আপত্তিং আপজ্জিত্ৰা ন ইচ্ছতি আপত্তিং পটিকাতু’’ন্তি? ‘‘সচ্চং ভগৰা’’তি. ৰিগরহি বুদ্ধো ভগৰা – ‘‘অননুচ্ছৰিকং…পে… কথঞ্হি নাম সো, ভিক্খৰে, মোঘপুরিসো আপত্তিং আপজ্জিত্ৰা ন ইচ্ছিস্সতি আপত্তিং পটিকাতুং. নেতং, ভিক্খৰে, অপ্পসন্নানং ৰা পসাদায…পে… ৰিগরহিত্ৰা…পে… ধম্মিং কথং কত্ৰা ভিক্খূ আমন্তেসি – তেন হি, ভিক্খৰে, সঙ্ঘো ছন্নস্স ভিক্খুনো, আপত্তিযা অপ্পটিকম্মে, উক্খেপনীযকম্মং করোতু – অসম্ভোগং সঙ্ঘেন. এৰঞ্চ পন, ভিক্খৰে, কাতব্বং – পঠমং ছন্নো ভিক্খু চোদেতব্বো, চোদেত্ৰা সারেতব্বো, সারেত্ৰা আপত্তিং আরোপেতব্বো, আপত্তিং আরোপেত্ৰা ব্যত্তেন ভিক্খুনা পটিবলেন সঙ্ঘো ঞাপেতব্বো –

‘‘সুণাতু মে, ভন্তে, সঙ্ঘো. অযং ছন্নো ভিক্খু আপত্তিং আপজ্জিত্ৰা ন ইচ্ছতি আপত্তিং পটিকাতুং. যদি সঙ্ঘস্স পত্তকল্লং, সঙ্ঘো ছন্নস্স ভিক্খুনো, আপত্তিযা অপ্পটিকম্মে, উক্খেপনীযকম্মং করেয্য – অসম্ভোগং সঙ্ঘেন. এসা ঞত্তি.

‘‘সুণাতু মে, ভন্তে, সঙ্ঘো. অযং ছন্নো ভিক্খু আপত্তিং আপজ্জিত্ৰা ন ইচ্ছতি আপত্তিং পটিকাতুং. সঙ্ঘো ছন্নস্স ভিক্খুনো, আপত্তিযা অপ্পটিকম্মে, উক্খেপনীযকম্মং করোতি – অসম্ভোগং সঙ্ঘেন. যস্সাযস্মতো খমতি ছন্নস্স ভিক্খুনো, আপত্তিযা অপ্পটিকম্মে, উক্খেপনীযস্স কম্মস্স করণং – অসম্ভোগং সঙ্ঘেন, সো তুণ্হস্স; যস্স নক্খমতি, সো ভাসেয্য.

‘‘দুতিযম্পি এতমত্থং ৰদামি…পে… ততিযম্পি এতমত্থং ৰদামি – সুণাতু মে, ভন্তে, সঙ্ঘো. অযং ছন্নো ভিক্খু আপত্তিং আপজ্জিত্ৰা ন ইচ্ছতি আপত্তিং পটিকাতুং. সঙ্ঘো ছন্নস্স ভিক্খুনো, আপত্তিযা অপ্পটিকম্মে, উক্খেপনীযকম্মং করোতি – অসম্ভোগং সঙ্ঘেন. যস্সাযস্মতো খমতি ছন্নস্স ভিক্খুনো, আপত্তিযা অপ্পটিকম্মে, উক্খেপনীযস্স কম্মস্স করণং – অসম্ভোগং সঙ্ঘেন, সো তুণ্হস্স; যস্স নক্খমতি, সো ভাসেয্য.

‘‘কতং সঙ্ঘেন ছন্নস্স ভিক্খুনো, আপত্তিযা অপ্পটিকম্মে, উক্খেপনীযকম্মং – অসম্ভোগং সঙ্ঘেন. খমতি সঙ্ঘস্স, তস্মা তুণ্হী, এৰমেতং ধারযামীতি.

‘‘আৰাসপরম্পরঞ্চ, ভিক্খৰে, সংসথ – ‘ছন্নো ভিক্খু, সঙ্ঘেন আপত্তিযা [ছন্নো ভিক্খু আপত্তিযা (সী. ক.)] অপ্পটিকম্মে, উক্খেপনীযকম্মকতো – অসম্ভোগং সঙ্ঘেনা’তি.

অধম্মকম্মদ্ৰাদসকং

৫৭. ‘‘তীহি, ভিক্খৰে, অঙ্গেহি সমন্নাগতং, আপত্তিযা অপ্পটিকম্মে, উক্খেপনীযকম্মং অধম্মকম্মঞ্চ হোতি, অৰিনযকম্মঞ্চ, দুৰূপসন্তঞ্চ. অসম্মুখা কতং হোতি, অপ্পটিপুচ্ছা কতং হোতি, অপ্পটিঞ্ঞায কতং হোতি – ইমেহি খো, ভিক্খৰে, তীহঙ্গেহি সমন্নাগতং, আপত্তিযা অপ্পটিকম্মে, উক্খেপনীযকম্মং অধম্মকম্মঞ্চ হোতি, অৰিনযকম্মঞ্চ, দুৰূপসন্তঞ্চ.

‘‘অপরেহিপি, ভিক্খৰে, তীহঙ্গেহি সমন্নাগতং, আপত্তিযা অপ্পটিকম্মে, উক্খেপনীযকম্মং অধম্মকম্মঞ্চ হোতি, অৰিনযকম্মঞ্চ, দুৰূপসন্তঞ্চ. অনাপত্তিযা কতং হোতি, অদেসনাগামিনিযা আপত্তিযা কতং হোতি, দেসিতায আপত্তিযা কতং হোতি…পে… অচোদেত্ৰা কতং হোতি, অসারেত্ৰা কতং হোতি, আপত্তিং অনারোপেত্ৰা কতং হোতি…পে… অসম্মুখা কতং হোতি, অধম্মেন কতং হোতি, ৰগ্গেন কতং হোতি…পে… অপ্পটিপুচ্ছা কতং হোতি, অধম্মেন কতং হোতি, ৰগ্গেন কতং হোতি…পে… অপ্পটিঞ্ঞায কতং হোতি, অধম্মেন কতং হোতি, ৰগ্গেন কতং হোতি…পে… অনাপত্তিযা কতং হোতি, অধম্মেন কতং হোতি, ৰগ্গেন কতং হোতি…পে… অদেসনাগামিনিযা আপত্তিযা কতং হোতি, অধম্মেন কতং হোতি, ৰগ্গেন কতং হোতি…পে… দেসিতায আপত্তিযা কতং হোতি, অধম্মেন কতং হোতি, ৰগ্গেন কতং হোতি…পে… অচোদেত্ৰা কতং হোতি, অধম্মেন কতং হোতি, ৰগ্গেন কতং হোতি…পে… অসারেত্ৰা কতং হোতি, অধম্মেন কতং হোতি, ৰগ্গেন কতং হোতি…পে… আপত্তিং অনারোপেত্ৰা কতং হোতি, অধম্মেন কতং হোতি, ৰগ্গেন কতং হোতি – ইমেহি খো, ভিক্খৰে, তীহঙ্গেহি সমন্নাগতং, আপত্তিযা অপ্পটিকম্মে, উক্খেপনীযকম্মং অধম্মকম্মঞ্চ হোতি, অৰিনযকম্মঞ্চ, দুৰূপসন্তঞ্চ.

আপত্তিযা অপ্পটিকম্মে উক্খেপনীযকম্মে

অধম্মকম্মদ্ৰাদসকং নিট্ঠিতং.

ধম্মকম্মদ্ৰাদসকং

৫৮. ‘‘তীহি, ভিক্খৰে, অঙ্গেহি সমন্নাগতং, আপত্তিযা অপ্পটিকম্মে, উক্খেপনীযকম্মং ধম্মকম্মঞ্চ হোতি, ৰিনযকম্মঞ্চ, সুৰূপসন্তঞ্চ. সম্মুখা কতং হোতি, পটিপুচ্ছা কতং হোতি, পটিঞ্ঞায কতং হোতি – ইমেহি খো, ভিক্খৰে, তীহঙ্গেহি সমন্নাগতং, আপত্তিযা অপ্পটিকম্মে, উক্খেপনীযকম্মং ধম্মকম্মঞ্চ হোতি, ৰিনযকম্মঞ্চ, সুৰূপসন্তঞ্চ.

‘‘অপরেহিপি, ভিক্খৰে, তীহঙ্গেহি সমন্নাগতং, আপত্তিযা অপ্পটিকম্মে, উক্খেপনীযকম্মং ধম্মকম্মঞ্চ হোতি, ৰিনযকম্মঞ্চ, সুৰূপসন্তঞ্চ. আপত্তিযা কতং হোতি, দেসনাগামিনিযা আপত্তিযা কতং হোতি, অদেসিতায আপত্তিযা কতং হোতি…পে… চোদেত্ৰা কতং হোতি, সারেত্ৰা কতং হোতি, আপত্তিং আরোপেত্ৰা কতং হোতি…পে… সম্মুখা কতং হোতি, ধম্মেন কতং হোতি, সমগ্গেন কতং হোতি…পে… পটিপুচ্ছা কতং হোতি, ধম্মেন কতং হোতি, সমগ্গেন কতং হোতি…পে… পটিঞ্ঞায কতং হোতি, ধম্মেন কতং হোতি, সমগ্গেন কতং হোতি…পে… আপত্তিযা কতং হোতি, ধম্মেন কতং হোতি, সমগ্গেন কতং হোতি…পে… দেসনাগামিনিযা আপত্তিযা কতং হোতি, ধম্মেন কতং হোতি, সমগ্গেন কতং হোতি…পে… অদেসিতায আপত্তিযা কতং হোতি, ধম্মেন কতং হোতি, সমগ্গেন কতং হোতি…পে… চোদেত্ৰা কতং হোতি, ধম্মেন কতং হোতি, সমগ্গেন কতং হোতি…পে… সারেত্ৰা কতং হোতি, ধম্মেন কতং হোতি, সমগ্গেন কতং হোতি…পে… আপত্তিং আরোপেত্ৰা কতং হোতি, ধম্মেন কতং হোতি, সমগ্গেন কতং হোতি – ইমেহি খো, ভিক্খৰে, তীহঙ্গেহি সমন্নাগতং, আপত্তিযা অপ্পটিকম্মে, উক্খেপনীযকম্মং ধম্মকম্মঞ্চ হোতি, ৰিনযকম্মঞ্চ, সুৰূপসন্তঞ্চ.

আপত্তিযা অপ্পটিকম্মে উক্খেপনীযকম্মে

ধম্মকম্মদ্ৰাদসকং নিট্ঠিতং.

আকঙ্খমানছক্কং

৫৯. [পরি. ৩২৩] ‘‘তীহি, ভিক্খৰে, অঙ্গেহি সমন্নাগতস্স ভিক্খুনো, আকঙ্খমানো সঙ্ঘো, আপত্তিযা অপ্পটিকম্মে, উক্খেপনীযকম্মং করেয্য. ভণ্ডনকারকো হোতি কলহকারকো ৰিৰাদকারকো ভস্সকারকো সঙ্ঘে অধিকরণকারকো; বালো হোতি অব্যত্তো আপত্তিবহুলো অনপদানো; গিহিসংসট্ঠো ৰিহরতি অননুলোমিকেহি গিহিসংসগ্গেহি – ইমেহি খো, ভিক্খৰে, তীহঙ্গেহি সমন্নাগতস্স ভিক্খুনো, আকঙ্খমানো সঙ্ঘো, আপত্তিযা অপ্পটিকম্মে, উক্খেপনীযকম্মং করেয্য.

‘‘অপরেহিপি, ভিক্খৰে, তীহঙ্গেহি সমন্নাগতস্স ভিক্খুনো, আকঙ্খমানো সঙ্ঘো, আপত্তিযা অপ্পটিকম্মে, উক্খেপনীযকম্মং করেয্য. অধিসীলে সীলৰিপন্নো হোতি, অজ্ঝাচারে আচারৰিপন্নো হোতি, অতিদিট্ঠিযা দিট্ঠিৰিপন্নো হোতি – ইমেহি খো, ভিক্খৰে, তীহঙ্গেহি সমন্নাগতস্স ভিক্খুনো, আকঙ্খমানো সঙ্ঘো, আপত্তিযা অপ্পটিকম্মে, উক্খেপনীযকম্মং করেয্য.

‘‘অপরেহিপি, ভিক্খৰে, তীহঙ্গেহি সমন্নাগতস্স ভিক্খুনো, আকঙ্খমানো সঙ্ঘো, আপত্তিযা অপ্পটিকম্মে, উক্খেপনীযকম্মং করেয্য. বুদ্ধস্স অৰণ্ণং ভাসতি, ধম্মস্স অৰণ্ণং ভাসতি, সঙ্ঘস্স অৰণ্ণং ভাসতি – ইমেহি খো, ভিক্খৰে, তীহঙ্গেহি সমন্নাগতস্স ভিক্খুনো, আকঙ্খমানো সঙ্ঘো, আপত্তিযা অপ্পটিকম্মে, উক্খেপনীযকম্মং করেয্য.

‘‘তিণ্ণং, ভিক্খৰে, ভিক্খূনং, আকঙ্খমানো সঙ্ঘো, আপত্তিযা অপ্পটিকম্মে, উক্খেপনীযকম্মং করেয্য. একো ভণ্ডনকারকো হোতি কলহকারকো ৰিৰাদকারকো ভস্সকারকো সঙ্ঘে অধিকরণকারকো; একো বালো হোতি অব্যত্তো আপত্তিবহুলো অনপদানো; একো গিহিসংসট্ঠো ৰিহরতি অননুলোমিকেহি গিহিসংসগ্গেহি – ইমেসং খো, ভিক্খৰে, তিণ্ণং ভিক্খূনং, আকঙ্খমানো সঙ্ঘো, আপত্তিযা অপ্পটিকম্মে, উক্খেপনীযকম্মং করেয্য.

‘‘অপরেসম্পি, ভিক্খৰে, তিণ্ণং ভিক্খূনং, আকঙ্খমানো সঙ্ঘো, আপত্তিযা অপ্পটিকম্মে, উক্খেপনীযকম্মং করেয্য. একো অধিসীলে সীলৰিপন্নো হোতি, একো অজ্ঝাচারে আচারৰিপন্নো হোতি, একো অতিদিট্ঠিযা দিট্ঠিৰিপন্নো হোতি – ইমেসং খো, ভিক্খৰে, তিণ্ণং ভিক্খূনং, আকঙ্খমানো সঙ্ঘো, আপত্তিযা অপ্পটিকম্মে, উক্খেপনীযকম্মং করেয্য.

‘‘অপরেসম্পি, ভিক্খৰে, তিণ্ণং ভিক্খূনং, আকঙ্খমানো সঙ্ঘো, আপত্তিযা অপ্পটিকম্মে, উক্খেপনীযকম্মং করেয্য. একো বুদ্ধস্স অৰণ্ণং ভাসতি, একো ধম্মস্স অৰণ্ণং ভাসতি, একো সঙ্ঘস্স অৰণ্ণং ভাসতি – ইমেসং খো, ভিক্খৰে, তিণ্ণং ভিক্খূনং, আকঙ্খমানো সঙ্ঘো, আপত্তিযা অপ্পটিকম্মে, উক্খেপনীযকম্মং করেয্য.

আপত্তিযা অপ্পটিকম্মে উক্খেপনীযকম্মে

আকঙ্খমানছক্কং নিট্ঠিতং.

তেচত্তালীসৰত্তং

৬০. ‘‘আপত্তিযা অপ্পটিকম্মে উক্খেপনীযকম্মকতেন, ভিক্খৰে, ভিক্খুনা সম্মা ৰত্তিতব্বং. তত্রাযং সম্মাৰত্তনা – ন উপসম্পাদেতব্বং, ন নিস্সযো দাতব্বো, ন সামণেরো উপট্ঠাপেতব্বো, ন ভিক্খুনোৰাদকসম্মুতি সাদিতব্বা, সম্মতেনপি ভিক্খুনিযো ন ওৰদিতব্বা. যায আপত্তিযা সঙ্ঘেন, আপত্তিযা অপ্পটিকম্মে, উক্খেপনীযকম্মং কতং হোতি সা আপত্তি ন আপজ্জিতব্বা, অঞ্ঞা ৰা তাদিসিকা, ততো ৰা পাপিট্ঠতরা; কম্মং ন গরহিতব্বং, কম্মিকা ন গরহিতব্বা. ন পকতত্তস্স ভিক্খুনো অভিৰাদনং, পচ্চুট্ঠানং, অঞ্জলিকম্মং, সামীচিকম্মং, আসনাভিহারো, সেয্যাভিহারো, পাদোদকং পাদপীঠং, পাদকথলিকং, পত্তচীৰরপ্পটিগ্গহণং, নহানে পিট্ঠিপরিকম্মং সাদিতব্বং. ন পকতত্তো ভিক্খু সীলৰিপত্তিযা অনুদ্ধংসেতব্বো, ন আচারৰিপত্তিযা অনুদ্ধংসেতব্বো, ন দিট্ঠিৰিপত্তিযা অনুদ্ধংসেতব্বো, ন আজীৰৰিপত্তিযা অনুদ্ধংসেতব্বো, ন ভিক্খু ভিক্খূহি ভেদেতব্বো. ন গিহিদ্ধজো ধারেতব্বো, ন তিত্থিযদ্ধজো ধারেতব্বো, ন তিত্থিযা সেৰিতব্বা; ভিক্খূ সেৰিতব্বা, ভিক্খুসিক্খায সিক্খিতব্বং. ন পকতত্তেন ভিক্খুনা সদ্ধিং একচ্ছন্নে আৰাসে ৰত্থব্বং, ন একচ্ছন্নে অনাৰাসে ৰত্থব্বং, ন একচ্ছন্নে আৰাসে ৰা অনাৰাসে ৰা ৰত্থব্বং, পকতত্তং ভিক্খুং দিস্ৰা আসনা ৰুট্ঠাতব্বং, ন পকতত্তো ভিক্খু আসাদেতব্বো অন্তো ৰা বহি ৰা. ন পকতত্তস্স ভিক্খুনো উপোসথো ঠপেতব্বো, ন পৰারণা ঠপেতব্বা, ন সৰচনীযং কাতব্বং, ন অনুৰাদো পট্ঠপেতব্বো, ন ওকাসো কারেতব্বো, ন চোদেতব্বো, ন সারেতব্বো, ন ভিক্খূহি সম্পযোজেতব্ব’’ন্তি.

আপত্তিযা অপ্পটিকম্মে উক্খেপনীযকম্মে

তেচত্তালীসৰত্তং নিট্ঠিতং.

৬১. অথ খো সঙ্ঘো ছন্নস্স ভিক্খুনো, আপত্তিযা অপ্পটিকম্মে, উক্খেপনীযকম্মং অকাসি – অসম্ভোগং সঙ্ঘেন. সো সঙ্ঘেন, আপত্তিযা অপ্পটিকম্মে, উক্খেপনীযকম্মকতো তম্হা আৰাসা অঞ্ঞং আৰাসং অগমাসি. তত্থ ভিক্খূ নেৰ অভিৰাদেসুং, ন পচ্চুট্ঠেসুং, ন অঞ্জলিকম্মং ন সামীচিকম্মং অকংসু, ন সক্করিংসু, ন গরুং করিংসু, ন মানেসুং, ন পূজেসুং. সো ভিক্খূহি অসক্করিযমানো অগরুকরিযমানো অমানিযমানো অপূজিযমানো অসক্কারপকতো তম্হাপি আৰাসা অঞ্ঞং আৰাসং অগমাসি. তত্থপি ভিক্খূ নেৰ অভিৰাদেসুং, ন পচ্চুট্ঠেসুং, ন অঞ্জলিকম্মং ন সামীচিকম্মং অকংসু, ন সক্করিংসু, ন গরুং করিংসু, ন মানেসুং, ন পূজেসুং. সো ভিক্খূহি অসক্করিযমানো অগরুকরিযমানো অমানিযমানো অপূজিযমানো অসক্কারপকতো তম্হাপি আৰাসা অঞ্ঞং আৰাসং অগমাসি. তত্থপি ভিক্খূ নেৰ অভিৰাদেসুং, ন পচ্চুট্ঠেসুং, ন অঞ্জলিকম্মং ন সামীচিকম্মং অকংসু, ন সক্করিংসু, ন গরুং করিংসু, ন মানেসুং, ন পূজেসুং. সো ভিক্খূহি অসক্করিযমানো অগরুকরিযমানো অমানিযমানো অপূজিযমানো অসক্কারপকতো পুনদেৰ কোসম্বিং পচ্চাগঞ্ছি. সো সম্মা ৰত্ততি, লোমং পাতেতি, নেত্থারং ৰত্ততি, ভিক্খূ উপসঙ্কমিত্ৰা এৰং ৰদেতি – ‘‘অহং, আৰুসো, সঙ্ঘেন, আপত্তিযা অপ্পটিকম্মে, উক্খেপনীযকম্মকতো সম্মা ৰত্তামি, লোমং পাতেমি, নেত্থারং ৰত্তামি. কথং নু খো মযা পটিপজ্জিতব্ব’’ন্তি? ভিক্খূ ভগৰতো এতমত্থং আরোচেসুং…পে…. ‘‘তেন হি, ভিক্খৰে, সঙ্ঘো ছন্নস্স ভিক্খুনো, আপত্তিযা অপ্পটিকম্মে, উক্খেপনীযকম্মং পটিপ্পস্সম্ভেতু.

নপ্পটিপ্পস্সম্ভেতব্বতেচত্তালীসকং

৬২. ‘‘পঞ্চহি, ভিক্খৰে, অঙ্গেহি সমন্নাগতস্স ভিক্খুনো, আপত্তিযা অপ্পটিকম্মে, উক্খেপনীযকম্মং নপ্পটিপ্পস্সম্ভেতব্বং. উপসম্পাদেতি, নিস্সযং দেতি, সামণেরং উপট্ঠাপেতি, ভিক্খুনোৰাদকসম্মুতিং সাদিযতি, সম্মতোপি ভিক্খুনিযো ওৰদতি – ইমেহি খো, ভিক্খৰে, পঞ্চহঙ্গেহি সমন্নাগতস্স ভিক্খুনো, আপত্তিযা অপ্পটিকম্মে, উক্খেপনীযকম্মং নপ্পটিপ্পস্সম্ভেতব্বং.

[পরি. ৪২০] ‘‘অপরেহিপি, ভিক্খৰে, পঞ্চহঙ্গেহি সমন্নাগতস্স ভিক্খুনো, আপত্তিযা অপ্পটিকম্মে, উক্খেপনীযকম্মং নপ্পটিপ্পস্সম্ভেতব্বং. যায আপত্তিযা সঙ্ঘেন, আপত্তিযা অপ্পটিকম্মে, উক্খেপনীযকম্মং কতং হোতি তং আপত্তিং আপজ্জতি, অঞ্ঞং ৰা তাদিসিকং, ততো ৰা পাপিট্ঠতরং; কম্মং গরহতি, কম্মিকে গরহতি…পে… পকতত্তস্স ভিক্খুনো অভিৰাদনং, পচ্চুট্ঠানং, অঞ্জলিকম্মং, সামীচিকম্মং, আসনাভিহারং সাদিযতি…পে… পকতত্তস্স ভিক্খুনো সেয্যাভিহারং, পাদোদকং পাদপীঠং, পাদকথলিকং, পত্তচীৰরপ্পটিগ্গহণং, নহানে পিট্ঠিপরিকম্মং সাদিযতি…পে… পকতত্তং ভিক্খুং সীলৰিপত্তিযা অনুদ্ধংসেতি, আচারৰিপত্তিযা অনুদ্ধংসেতি, দিট্ঠিৰিপত্তিযা অনুদ্ধংসেতি, আজীৰৰিপত্তিযা অনুদ্ধংসেতি, ভিক্খুং ভিক্খূহি ভেদেতি…পে… গিহিদ্ধজং ধারেতি, তিত্থিযদ্ধজং ধারেতি, তিত্থিযে সেৰতি, ভিক্খূ ন সেৰতি, ভিক্খুসিক্খায ন সিক্খতি…পে… পকতত্তেন ভিক্খুনা সদ্ধিং একচ্ছন্নে আৰাসে ৰসতি, একচ্ছন্নে অনাৰাসে ৰসতি, একচ্ছন্নে আৰাসে ৰা অনাৰাসে ৰা ৰসতি, পকতত্তং ভিক্খুং দিস্ৰা আসনা ন ৰুট্ঠাতি, পকতত্তং ভিক্খুং আসাদেতি অন্তো ৰা বহি ৰা – ইমেহি খো, ভিক্খৰে, পঞ্চহঙ্গেহি সমন্নাগতস্স ভিক্খুনো, আপত্তিযা অপ্পটিকম্মে, উক্খেপনীযকম্মং নপ্পটিপ্পস্সম্ভেতব্বং.

‘‘অট্ঠহি, ভিক্খৰে, অঙ্গেহি সমন্নাগতস্স ভিক্খুনো, আপত্তিযা অপ্পটিকম্মে, উক্খেপনীযকম্মং নপ্পটিপ্পস্সম্ভেতব্বং. পকতত্তস্স ভিক্খুনো উপোসথং ঠপেতি, পৰারণং ঠপেতি, সৰচনীযং করোতি, অনুৰাদং পট্ঠপেতি, ওকাসং কারেতি, চোদেতি, সারেতি, ভিক্খূহি সম্পযোজেতি – ইমেহি খো, ভিক্খৰে, অট্ঠহঙ্গেহি সমন্নাগতস্স ভিক্খুনো, আপত্তিযা অপ্পটিকম্মে, উক্খেপনীযকম্মং নপ্পটিপ্পস্সম্ভেতব্বং.

আপত্তিযা অপ্পটিকম্মে উক্খেপনীযকম্মে

নপ্পটিপ্পস্সম্ভেতব্বতেচত্তালীসকং নিট্ঠিতং.

পটিপ্পস্সম্ভেতব্বতেচত্তালীসকং

৬৩. ‘‘পঞ্চহি, ভিক্খৰে, অঙ্গেহি সমন্নাগতস্স ভিক্খুনো, আপত্তিযা অপ্পটিকম্মে, উক্খেপনীযকম্মং পটিপ্পস্সম্ভেতব্বং. ন উপসম্পাদেতি, ন নিস্সযং দেতি, ন সামণেরং উপট্ঠাপেতি, ন ভিক্খুনোৰাদকসম্মুতিং সাদিযতি, সম্মতোপি ভিক্খুনিযো ন ওৰদতি – ইমেহি খো, ভিক্খৰে, পঞ্চহঙ্গেহি সমন্নাগতস্স ভিক্খুনো, আপত্তিযা অপ্পটিকম্মে, উক্খেপনীযকম্মং পটিপ্পস্সম্ভেতব্বং.

‘‘অপরেহিপি, ভিক্খৰে, পঞ্চহঙ্গেহি সমন্নাগতস্স ভিক্খুনো, আপত্তিযা অপ্পটিকম্মে, উক্খেপনীযকম্মং পটিপ্পস্সম্ভেতব্বং. যায আপত্তিযা সঙ্ঘেন, আপত্তিযা অপ্পটিকম্মে, উক্খেপনীযকম্মং কতং হোতি তং আপত্তিং ন আপজ্জতি, অঞ্ঞং ৰা তাদিসিকং, ততো ৰা পাপিট্ঠতরং; কম্মং ন গরহতি, কম্মিকে ন গরহতি…পে… ন পকতত্তস্স ভিক্খুনো অভিৰাদনং, পচ্চুট্ঠানং, অঞ্জলিকম্মং, সামীচিকম্মং, আসনাভিহারং সাদিযতি…পে… ন পকতত্তস্স ভিক্খুনো সেয্যাভিহারং, পাদোদকং পাদপীঠং, পাদকথলিকং, পত্তচীৰরপ্পটিগ্গহণং, নহানে পিট্ঠিপরিকম্মং সাদিযতি…পে… ন পকতত্তং ভিক্খুং সীলৰিপত্তিযা অনুদ্ধংসেতি, ন আচারৰিপত্তিযা অনুদ্ধংসেতি, ন দিট্ঠিৰিপত্তিযা অনুদ্ধংসেতি, ন আজীৰৰিপত্তিযা অনুদ্ধংসেতি, ন ভিক্খুং ভিক্খূহি ভেদেতি…পে… ন গিহিদ্ধজং ধারেতি, ন তিত্থিযদ্ধজং ধারেতি, ন তিত্থিযে সেৰতি, ভিক্খূ সেৰতি, ভিক্খুসিক্খায সিক্খতি…পে… ন পকতত্তেন ভিক্খুনা সদ্ধিং একচ্ছন্নে আৰাসে ৰসতি, ন একচ্ছন্নে অনাৰাসে ৰসতি, ন একচ্ছন্নে আৰাসে ৰা অনাৰাসে ৰা ৰসতি, পকতত্তং ভিক্খুং দিস্ৰা আসনা ৰুট্ঠাতি, ন পকতত্তং ভিক্খুং আসাদেতি অন্তো ৰা বহি ৰা – ইমেহি খো, ভিক্খৰে, পঞ্চহঙ্গেহি সমন্নাগতস্স ভিক্খুনো, আপত্তিযা অপ্পটিকম্মে, উক্খেপনীযকম্মং পটিপ্পস্সম্ভেতব্বং.

‘‘অট্ঠহি, ভিক্খৰে, অঙ্গেহি সমন্নাগতস্স ভিক্খুনো, আপত্তিযা অপ্পটিকম্মে, উক্খেপনীযকম্মং পটিপ্পস্সম্ভেতব্বং. ন পকতত্তস্স ভিক্খুনো উপোসথং ঠপেতি, ন পৰারণং ঠপেতি, ন সৰচনীযং করোতি, ন অনুৰাদং পট্ঠপেতি, ন ওকাসং কারেতি, ন চোদেতি, ন সারেতি, ন ভিক্খূহি সম্পযোজেতি – ইমেহি খো, ভিক্খৰে, অট্ঠহঙ্গেহি সমন্নাগতস্স ভিক্খুনো, আপত্তিযা অপ্পটিকম্মে, উক্খেপনীযকম্মং পটিপ্পস্সম্ভেতব্বং.

আপত্তিযা অপ্পটিকম্মে উক্খেপনীযকম্মে

পটিপ্পস্সম্ভেতব্বতেচত্তালীসকং নিট্ঠিতং.

৬৪. ‘‘এৰঞ্চ পন, ভিক্খৰে, পটিপ্পস্সম্ভেতব্বং. তেন ভিক্খৰে, ছন্নেন ভিক্খুনা সঙ্ঘং উপসঙ্কমিত্ৰা একংসং উত্তরাসঙ্গং করিত্ৰা ৰুড্ঢানং ভিক্খূনং পাদে ৰন্দিত্ৰা উক্কুটিকং নিসীদিত্ৰা অঞ্জলিং পগ্গহেত্ৰা এৰমস্স ৰচনীযো – ‘অহং, ভন্তে, সঙ্ঘেন, আপত্তিযা অপ্পটিকম্মে, উক্খেপনীযকম্মকতো সম্মা ৰত্তামি, লোমং পাতেমি, নেত্থারং ৰত্তামি, আপত্তিযা অপ্পটিকম্মে উক্খেপনীযস্স কম্মস্স পটিপ্পস্সদ্ধিং যাচামী’তি. দুতিযম্পি যাচিতব্বা. ততিযম্পি যাচিতব্বা. ব্যত্তেন ভিক্খুনা পটিবলেন সঙ্ঘো ঞাপেতব্বো –

‘‘সুণাতু মে, ভন্তে, সঙ্ঘো. অযং ছন্নো ভিক্খু সঙ্ঘেন, আপত্তিযা অপ্পটিকম্মে, উক্খেপনীযকম্মকতো সম্মা ৰত্ততি, লোমং পাতেতি, নেত্থারং ৰত্ততি, আপত্তিযা অপ্পটিকম্মে উক্খেপনীযস্স কম্মস্স পটিপ্পস্সদ্ধিং যাচতি. যদি সঙ্ঘস্স পত্তকল্লং, সঙ্ঘো ছন্নস্স ভিক্খুনো, আপত্তিযা অপ্পটিকম্মে, উক্খেপনীযকম্মং পটিপ্পস্সম্ভেয্য. এসা ঞত্তি.

‘‘সুণাতু মে, ভন্তে, সঙ্ঘো. অযং ছন্নো ভিক্খু সঙ্ঘেন, আপত্তিযা অপ্পটিকম্মে, উক্খেপনীযকম্মকতো সম্মা ৰত্ততি, লোমং পাতেতি, নেত্থারং ৰত্ততি, আপত্তিযা অপ্পটিকম্মে উক্খেপনীযস্স কম্মস্স পটিপ্পস্সদ্ধিং যাচতি. সঙ্ঘো ছন্নস্স ভিক্খুনো, আপত্তিযা অপ্পটিকম্মে, উক্খেপনীযকম্মং পটিপ্পস্সম্ভেতি. যস্সাযস্মতো খমতি ছন্নস্স ভিক্খুনো, আপত্তিযা অপ্পটিকম্মে, উক্খেপনীযস্স কম্মস্স পটিপ্পস্সদ্ধি, সো তুণ্হস্স; যস্স নক্খমতি, সো ভাসেয্য.

‘‘দুতিযম্পি এতমত্থং ৰদামি…পে… ততিযম্পি এতমত্থং ৰদামি – সুণাতু মে, ভন্তে, সঙ্ঘো. অযং ছন্নো ভিক্খু সঙ্ঘেন, আপত্তিযা অপ্পটিকম্মে, উক্খেপনীযকম্মকতো সম্মা ৰত্ততি, লোমং পাতেতি, নেত্থারং ৰত্ততি, আপত্তিযা অপ্পটিকম্মে, উক্খেপনীযস্স কম্মস্স পটিপ্পস্সদ্ধিং যাচতি. সঙ্ঘো ছন্নস্স ভিক্খুনো, আপত্তিযা অপ্পটিকম্মে, উক্খেপনীযকম্মং পটিপ্পস্সম্ভেতি. যস্সাযস্মতো খমতি ছন্নস্স ভিক্খুনো, আপত্তিযা অপ্পটিকম্মে, উক্খেপনীযস্স কম্মস্স পটিপ্পস্সদ্ধি, সো তুণ্হস্স; যস্স নক্খমতি, সো ভাসেয্য.

‘‘পটিপ্পস্সদ্ধং সঙ্ঘেন ছন্নস্স ভিক্খুনো, আপত্তিযা অপ্পটিকম্মে, উক্খেপনীযকম্মং. খমতি সঙ্ঘস্স, তস্মা তুণ্হী, এৰমেতং ধারযামী’’তি.

আপত্তিযা অপ্পটিকম্মে উক্খেপনীযকম্মং নিট্ঠিতং ছট্ঠং.