২. নিযস্সকম্মং

১১. তেন খো পন সমযেন আযস্মা সেয্যসকো বালো হোতি অব্যত্তো আপত্তিবহুলো অনপদানো; গিহিসংসট্ঠো ৰিহরতি অননুলোমিকেহি গিহিসংসগ্গেহি; অপিস্সু ভিক্খূ পকতা [পকতত্তা (সী. স্যা.)] পরিৰাসং দেন্তা মূলায পটিকস্সন্তা মানত্তং দেন্তা অব্ভেন্তা. যে তে ভিক্খূ অপ্পিচ্ছা…পে… তে উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম আযস্মা সেয্যসকো বালো ভৰিস্সতি অব্যত্তো আপত্তিবহুলো অনপদানো; গিহিসংসট্ঠো ৰিহরিস্সতি অননুলোমিকেহি গিহিসংসগ্গেহি; অপিস্সু ভিক্খূ পকতা পরিৰাসং দেন্তা মূলায পটিকস্সন্তা মানত্তং দেন্তা অব্ভেন্তা’’তি. অথ খো তে ভিক্খূ ভগৰতো এতমত্থং আরোচেসুং.

অথ খো ভগৰা এতস্মিং নিদানে এতস্মিং পকরণে ভিক্খুসঙ্ঘং সন্নিপাতাপেত্ৰা ভিক্খূ পটিপুচ্ছি – ‘‘সচ্চং কির, ভিক্খৰে, সেয্যসকো ভিক্খু বালো অব্যত্তো আপত্তিবহুলো অনপদানো; গিহিসংসট্ঠো ৰিহরতি অননুলোমিকেহি গিহিসংসগ্গেহি; অপিস্সু ভিক্খূ পকতা পরিৰাসং দেন্তা মূলায পটিকস্সন্তা মানত্তং দেন্তা অব্ভেন্তা’’তি? ‘‘সচ্চং ভগৰা’’তি. ৰিগরহি বুদ্ধো ভগৰা – ‘‘অননুচ্ছৰিকং, ভিক্খৰে, তস্স মোঘপুরিসস্স অননুলোমিকং অপ্পতিরূপং অস্সামণকং অকপ্পিযং অকরণীযং. কথঞ্হি নাম সো, ভিক্খৰে, মোঘপুরিসো বালো ভৰিস্সতি অব্যত্তো আপত্তিবহুলো অনপদানো; গিহিসংসট্ঠো ৰিহরিস্সতি অননুলোমিকেহি গিহিসংসগ্গেহি; অপিস্সু ভিক্খূ পকতা পরিৰাসং দেন্তা মূলায পটিকস্সন্তা মানত্তং দেন্তা অব্ভেন্তা. নেতং, ভিক্খৰে, অপ্পসন্নানং ৰা পসাদায…পে… ৰিগরহিত্ৰা…পে… ধম্মিং কথং কত্ৰা ভিক্খূ আমন্তেসি – ‘‘তেন হি, ভিক্খৰে, সঙ্ঘো সেয্যসকস্স ভিক্খুনো নিযস্সকম্মং [নিযসকম্মং (ক.)] করোতু – নিস্সায তে ৰত্থব্বন্তি. এৰঞ্চ পন, ভিক্খৰে, কাতব্বং. পঠমং সেয্যসকো ভিক্খু চোদেতব্বো, চোদেত্ৰা সারেতব্বো, সারেত্ৰা আপত্তিং আরোপেতব্বো [আপত্তি আরোপেতব্বা (সী. স্যা.)], আপত্তিং আরোপেত্ৰা ব্যত্তেন ভিক্খুনা পটিবলেন সঙ্ঘো ঞাপেতব্বো –

১২. ‘‘সুণাতু মে, ভন্তে, সঙ্ঘো. অযং সেয্যসকো ভিক্খু বালো অব্যত্তো আপত্তিবহুলো অনপদানো; গিহিসংসট্ঠো ৰিহরতি অননুলোমিকেহি গিহিসংসগ্গেহি; অপিস্সু ভিক্খূ পকতা পরিৰাসং দেন্তা মূলায পটিকস্সন্তা মানত্তং দেন্তা অব্ভেন্তা. যদি সঙ্ঘস্স পত্তকল্লং, সঙ্ঘো সেয্যসকস্স ভিক্খুনো নিযস্সকম্মং করেয্য – নিস্সায তে ৰত্থব্বন্তি. এসা ঞত্তি.

‘‘সুণাতু মে, ভন্তে, সঙ্ঘো. অযং সেয্যসকো ভিক্খু বালো অব্যত্তো আপত্তিবহুলো অনপদানো; গিহিসংসট্ঠো ৰিহরতি অননুলোমিকেহি গিহিসংসগ্গেহি; অপিস্সু ভিক্খূ পকতা পরিৰাসং দেন্তা মূলায পটিকস্সন্তা মানত্তং দেন্তা অব্ভেন্তা. সঙ্ঘো সেয্যসকস্স ভিক্খুনো নিযস্সকম্মং করোতি – নিস্সায তে ৰত্থব্বন্তি. যস্সাযস্মতো খমতি সেয্যসকস্স ভিক্খুনো নিযস্সস্স কম্মস্স করণং – নিস্সায তে ৰত্থব্বন্তি, সো তুণ্হস্স; যস্স নক্খমতি, সো ভাসেয্য.

‘‘দুতিযম্পি এতমত্থং ৰদামি…পে… ততিযম্পি এতমত্থং ৰদামি – সুণাতু মে, ভন্তে, সঙ্ঘো. অযং সেয্যসকো ভিক্খু বালো অব্যত্তো আপত্তিবহুলো অনপদানো; গিহিসংসট্ঠো ৰিহরতি অননুলোমিকেহি গিহিসংসগ্গেহি; অপিস্সু ভিক্খূ পকতা পরিৰাসং দেন্তা মূলায পটিকস্সন্তা মানত্তং দেন্তা অব্ভেন্তা. সঙ্ঘো সেয্যসকস্স ভিক্খুনো নিযস্সকম্মং করোতি – নিস্সায তে ৰত্থব্বন্তি. যস্সাযস্মতো খমতি সেয্যসকস্স ভিক্খুনো নিযস্সস্স কম্মস্স করণং – নিস্সায তে ৰত্থব্বন্তি, সো তুণ্হস্স; যস্স নক্খমতি, সো ভাসেয্য.

‘‘কতং সঙ্ঘেন সেয্যসকস্স ভিক্খুনো নিযস্সকম্মং – নিস্সায তে ৰত্থব্বন্তি. খমতি সঙ্ঘস্স, তস্মা তুণ্হী, এৰমেতং ধারযামী’’তি.

অধম্মকম্মদ্ৰাদসকং

১৩. ‘‘তীহি, ভিক্খৰে, অঙ্গেহি সমন্নাগতং নিযস্সকম্মং অধম্মকম্মঞ্চ হোতি, অৰিনযকম্মঞ্চ, দুৰূপসন্তঞ্চ. অসম্মুখা কতং হোতি, অপ্পটিপুচ্ছা কতং হোতি, অপ্পটিঞ্ঞায কতং হোতি – ইমেহি খো, ভিক্খৰে, তীহঙ্গেহি সমন্নাগতং নিযস্সকম্মং অধম্মকম্মঞ্চ হোতি, অৰিনযকম্মঞ্চ, দুৰূপসন্তঞ্চ.

‘‘অপরেহিপি, ভিক্খৰে, তীহঙ্গেহি সমন্নাগতং নিযস্সকম্মং অধম্মকম্মঞ্চ হোতি, অৰিনযকম্মঞ্চ, দুৰূপসন্তঞ্চ. অনাপত্তিযা কতং হোতি, অদেসনাগামিনিযা আপত্তিযা কতং হোতি, দেসিতায আপত্তিযা কতং হোতি – ইমেহি খো, ভিক্খৰে, তীহঙ্গেহি সমন্নাগতং নিযস্সকম্মং অধম্মকম্মঞ্চ হোতি, অৰিনযকম্মঞ্চ, দুৰূপসন্তঞ্চ.

‘‘অপরেহিপি, ভিক্খৰে, তীহঙ্গেহি সমন্নাগতং নিযস্সকম্মং অধম্মকম্মঞ্চ হোতি, অৰিনযকম্মঞ্চ, দুৰূপসন্তঞ্চ. অচোদেত্ৰা কতং হোতি, অসারেত্ৰা কতং হোতি, আপত্তিং অনারোপেত্ৰা কতং হোতি – ইমেহি খো, ভিক্খৰে, তীহঙ্গেহি সমন্নাগতং নিযস্সকম্মং অধম্মকম্মঞ্চ হোতি, অৰিনযকম্মঞ্চ, দুৰূপসন্তঞ্চ.

‘‘অপরেহিপি, ভিক্খৰে…পে… অসম্মুখা কতং হোতি, অধম্মেন কতং হোতি, ৰগ্গেন কতং হোতি – ইমেহি খো, ভিক্খৰে…পে….

‘‘অপরেহিপি, ভিক্খৰে…পে… অপ্পটিপুচ্ছা কতং হোতি, অধম্মেন কতং হোতি, ৰগ্গেন কতং হোতি – ইমেহি খো, ভিক্খৰে…পে….

‘‘অপরেহিপি, ভিক্খৰে…পে… অপ্পটিঞ্ঞায কতং হোতি, অধম্মেন কতং হোতি, ৰগ্গেন কতং হোতি – ইমেহি খো, ভিক্খৰে…পে….

‘‘অপরেহিপি, ভিক্খৰে…পে… অনাপত্তিযা কতং হোতি, অধম্মেন কতং হোতি, ৰগ্গেন কতং হোতি – ইমেহি খো, ভিক্খৰে…পে….

‘‘অপরেহিপি, ভিক্খৰে…পে… অদেসনাগামিনিযা আপত্তিযা কতং হোতি, অধম্মেন কতং হোতি, ৰগ্গেন কতং হোতি – ইমেহি খো, ভিক্খৰে…পে….

‘‘অপরেহিপি, ভিক্খৰে…পে… দেসিতায আপত্তিযা কতং হোতি, অধম্মেন কতং হোতি, ৰগ্গেন কতং হোতি – ইমেহি খো, ভিক্খৰে…পে….

‘‘অপরেহিপি, ভিক্খৰে…পে… অচোদেত্ৰা কতং হোতি, অধম্মেন কতং হোতি, ৰগ্গেন কতং হোতি – ইমেহি খো, ভিক্খৰে…পে….

‘‘অপরেহিপি, ভিক্খৰে…পে… অসারেত্ৰা কতং হোতি, অধম্মেন কতং হোতি, ৰগ্গেন কতং হোতি – ইমেহি খো, ভিক্খৰে…পে….

‘‘অপরেহিপি, ভিক্খৰে, তীহঙ্গেহি সমন্নাগতং নিযস্সকম্মং অধম্মকম্মঞ্চ হোতি, অৰিনযকম্মঞ্চ, দুৰূপসন্তঞ্চ. আপত্তিং অনারোপেত্ৰা কতং হোতি, অধম্মেন কতং হোতি, ৰগ্গেন কতং হোতি – ইমেহি খো, ভিক্খৰে, তীহঙ্গেহি সমন্নাগতং নিযস্সকম্মং অধম্মকম্মঞ্চ হোতি, অৰিনযকম্মঞ্চ, দুৰূপসন্তঞ্চ.

অধম্মকম্মদ্ৰাদসকং নিট্ঠিতং.

ধম্মকম্মদ্ৰাদসকং

১৪. ‘‘তীহি, ভিক্খৰে, অঙ্গেহি সমন্নাগতং নিযস্সকম্মং ধম্মকম্মঞ্চ হোতি, ৰিনযকম্মঞ্চ, সুৰূপসন্তঞ্চ. সম্মুখা কতং হোতি, পটিপুচ্ছা কতং হোতি, পটিঞ্ঞায কতং হোতি – ইমেহি খো, ভিক্খৰে, তীহঙ্গেহি সমন্নাগতং নিযস্সকম্মং ধম্মকম্মঞ্চ হোতি, ৰিনযকম্মঞ্চ, সুৰূপসন্তঞ্চ.

‘‘অপরেহিপি, ভিক্খৰে, তীহঙ্গেহি সমন্নাগতং নিযস্সকম্মং ধম্মকম্মঞ্চ হোতি, ৰিনযকম্মঞ্চ, সুৰূপসন্তঞ্চ. আপত্তিযা কতং হোতি, দেসনাগামিনিযা আপত্তিযা কতং হোতি, অদেসিতায আপত্তিযা কতং হোতি – ইমেহি খো, ভিক্খৰে, তীহঙ্গেহি সমন্নাগতং নিযস্সকম্মং ধম্মকম্মঞ্চ হোতি, ৰিনযকম্মঞ্চ, সুৰূপসন্তঞ্চ.

‘‘অপরেহিপি, ভিক্খৰে, তীহঙ্গেহি সমন্নাগতং নিযস্সকম্মং ধম্মকম্মঞ্চ হোতি, ৰিনযকম্মঞ্চ, সুৰূপসন্তঞ্চ. চোদেত্ৰা কতং হোতি, সারেত্ৰা কতং হোতি, আপত্তিং আরোপেত্ৰা কতং হোতি – ইমেহি খো, ভিক্খৰে, তীহঙ্গেহি সমন্নাগতং নিযস্সকম্মং ধম্মকম্মঞ্চ হোতি, ৰিনযকম্মঞ্চ, সুৰূপসন্তঞ্চ.

‘‘অপরেহিপি, ভিক্খৰে…পে… সম্মুখা কতং হোতি, ধম্মেন কতং হোতি, সমগ্গেন কতং হোতি – ইমেহি খো, ভিক্খৰে…পে….

‘‘অপরেহিপি, ভিক্খৰে…পে… পটিপুচ্ছা কতং হোতি, ধম্মেন কতং হোতি, সমগ্গেন কতং হোতি – ইমেহি খো, ভিক্খৰে…পে….

‘‘অপরেহিপি, ভিক্খৰে…পে… পটিঞ্ঞায কতং হোতি, ধম্মেন কতং হোতি, সমগ্গেন কতং হোতি – ইমেহি খো, ভিক্খৰে…পে….

‘‘অপরেহিপি, ভিক্খৰে…পে… আপত্তিযা কতং হোতি, ধম্মেন কতং হোতি, সমগ্গেন কতং হোতি – ইমেহি খো, ভিক্খৰে…পে….

‘‘অপরেহিপি, ভিক্খৰে…পে… দেসনাগামিনিযা আপত্তিযা কতং হোতি, ধম্মেন কতং হোতি, সমগ্গেন কতং হোতি – ইমেহি খো, ভিক্খৰে…পে….

‘‘অপরেহিপি, ভিক্খৰে…পে… অদেসিতায আপত্তিযা কতং হোতি, ধম্মেন কতং হোতি, সমগ্গেন কতং হোতি – ইমেহি খো, ভিক্খৰে…পে….

‘‘অপরেহিপি, ভিক্খৰে…পে… চোদেত্ৰা কতং হোতি, ধম্মেন কতং হোতি, সমগ্গেন কতং হোতি – ইমেহি খো, ভিক্খৰে…পে….

‘‘অপরেহিপি, ভিক্খৰে…পে… সারেত্ৰা কতং হোতি, ধম্মেন কতং হোতি, সমগ্গেন কতং হোতি – ইমেহি খো, ভিক্খৰে…পে….

‘‘অপরেহিপি, ভিক্খৰে, তীহঙ্গেহি সমন্নাগতং নিযস্সকম্মং ধম্মকম্মঞ্চ হোতি, ৰিনযকম্মঞ্চ, সুৰূপসন্তঞ্চ. আপত্তিং আরোপেত্ৰা কতং হোতি, ধম্মেন কতং হোতি, সমগ্গেন কতং হোতি – ইমেহি খো, ভিক্খৰে, তীহঙ্গেহি সমন্নাগতং নিযস্সকম্মং ধম্মকম্মঞ্চ হোতি, ৰিনযকম্মঞ্চ, সুৰূপসন্তঞ্চ.

ধম্মকম্মদ্ৰাদসকং নিট্ঠিতং.

আকঙ্খমানছক্কং

১৫. [পরি. ৩২৩] ‘‘তীহি, ভিক্খৰে, অঙ্গেহি সমন্নাগতস্স ভিক্খুনো, আকঙ্খমানো সঙ্ঘো, নিযস্সকম্মং করেয্য. ভণ্ডনকারকো হোতি কলহকারকো ৰিৰাদকারকো ভস্সকারকো সঙ্ঘে অধিকরণকারকো; বালো হোতি অব্যত্তো আপত্তিবহুলো অনপদানো; গিহিসংসট্ঠো ৰিহরতি অননুলোমিকেহি গিহিসংসগ্গেহি – ইমেহি খো, ভিক্খৰে, তীহঙ্গেহি সমন্নাগতস্স ভিক্খুনো, আকঙ্খমানো সঙ্ঘো, নিযস্সকম্মং করেয্য.

‘‘অপরেহিপি, ভিক্খৰে, তীহঙ্গেহি সমন্নাগতস্স ভিক্খুনো, আকঙ্খমানো সঙ্ঘো, নিযস্সকম্মং করেয্য. অধিসীলে সীলৰিপন্নো হোতি, অজ্ঝাচারে আচারৰিপন্নো হোতি, অতিদিট্ঠিযা দিট্ঠিৰিপন্নো হোতি – ইমেহি খো, ভিক্খৰে, তীহঙ্গেহি সমন্নাগতস্স ভিক্খুনো, আকঙ্খমানো সঙ্ঘো, নিযস্সকম্মং করেয্য.

‘‘অপরেহিপি, ভিক্খৰে, তীহঙ্গেহি সমন্নাগতস্স ভিক্খুনো, আকঙ্খমানো সঙ্ঘো, নিযস্সকম্মং করেয্য. বুদ্ধস্স অৰণ্ণং ভাসতি, ধম্মস্স অৰণ্ণং ভাসতি, সঙ্ঘস্স অৰণ্ণং ভাসতি – ইমেহি খো, ভিক্খৰে, তীহঙ্গেহি সমন্নাগতস্স ভিক্খুনো, আকঙ্খমানো সঙ্ঘো, নিযস্সকম্মং করেয্য.

‘‘তিণ্ণং, ভিক্খৰে, ভিক্খূনং, আকঙ্খমানো সঙ্ঘো, নিযস্সকম্মং করেয্য. একো ভণ্ডনকারকো হোতি কলহকারকো ৰিৰাদকারকো ভস্সকারকো সঙ্ঘে অধিকরণকারকো; একো বালো হোতি, অব্যত্তো আপত্তিবহুলো অনপদানো; একো গিহিসংসট্ঠো ৰিহরতি অননুলোমিকেহি গিহিসংসগ্গেহি – ইমেসং খো, ভিক্খৰে, তিণ্ণং ভিক্খূনং, আকঙ্খমানো সঙ্ঘো, নিযস্সকম্মং করেয্য.

‘‘অপরেসম্পি, ভিক্খৰে, তিণ্ণং ভিক্খূনং, আকঙ্খমানো সঙ্ঘো, নিযস্সকম্মং করেয্য. একো অধিসীলে সীলৰিপন্নো হোতি, একো অজ্ঝাচারে আচারৰিপন্নো হোতি, একো অতিদিট্ঠিযা দিট্ঠিৰিপন্নো হোতি – ইমেসং খো, ভিক্খৰে, তিণ্ণং ভিক্খূনং, আকঙ্খমানো সঙ্ঘো, নিযস্সকম্মং করেয্য.

‘‘অপরেসম্পি, ভিক্খৰে, তিণ্ণং ভিক্খূনং, আকঙ্খমানো সঙ্ঘো, নিযস্সকম্মং করেয্য. একো বুদ্ধস্স অৰণ্ণং ভাসতি, একো ধম্মস্স অৰণ্ণং ভাসতি, একো সঙ্ঘস্স অৰণ্ণং ভাসতি – ইমেসং খো, ভিক্খৰে, তিণ্ণং ভিক্খূনং, আকঙ্খমানো সঙ্ঘো, নিযস্সকম্মং করেয্য.

আকঙ্খমানছক্কং নিট্ঠিতং.

অট্ঠারসৰত্তং

১৬. ‘‘নিযস্সকম্মকতেন, ভিক্খৰে, ভিক্খুনা সম্মা ৰত্তিতব্বং. তত্রাযং সম্মাৰত্তনা – ন উপসম্পাদেতব্বং, ন নিস্সযো দাতব্বো, ন সামণেরো উপট্ঠাপেতব্বো, ন ভিক্খুনোৰাদকসম্মুতি সাদিতব্বা, সম্মতেনপি ভিক্খুনিযো ন ওৰদিতব্বা. যায আপত্তিযা সঙ্ঘেন নিযস্সকম্মং কতং হোতি সা আপত্তি ন আপজ্জিতব্বা, অঞ্ঞা ৰা তাদিসিকা, ততো ৰা পাপিট্ঠতরা; কম্মং ন গরহিতব্বং, কম্মিকা ন গরহিতব্বা. ন পকতত্তস্স ভিক্খুনো উপোসথো ঠপেতব্বো, ন পৰারণা ঠপেতব্বা, ন সৰচনীযং কাতব্বং, ন অনুৰাদো পট্ঠপেতব্বো, ন ওকাসো কারাপেতব্বো, ন চোদেতব্বো, ন সারেতব্বো, ন ভিক্খূহি সম্পযোজেতব্ব’’ন্তি.

নিযস্সকম্মে অট্ঠারসৰত্তং নিট্ঠিতং.

১৭. অথ খো সঙ্ঘো সেয্যসকস্স ভিক্খুনো নিযস্সকম্মং অকাসি – নিস্সায তে ৰত্থব্বন্তি. সো সঙ্ঘেন নিযস্সকম্মকতো কল্যাণমিত্তে সেৰমানো ভজমানো পযিরুপাসমানো উদ্দিসাপেন্তো পরিপুচ্ছন্তো বহুস্সুতো হোতি, আগতাগমো ধম্মধরো ৰিনযধরো মাতিকাধরো পণ্ডিতো ৰিযত্তো মেধাৰী লজ্জী কুক্কুচ্চকো সিক্খাকামো. সম্মা ৰত্ততি, লোমং পাতেতি, নেত্থারং ৰত্ততি, ভিক্খূ উপসঙ্কমিত্ৰা এৰং ৰদেতি – ‘‘অহং, আৰুসো, সঙ্ঘেন নিযস্সকম্মকতো সম্মা ৰত্তামি, লোমং পাতেমি, নেত্থারং ৰত্তামি. কথং নু খো মযা পটিপজ্জিতব্ব’’ন্তি? ভিক্খূ ভগৰতো এতমত্থং আরোচেসুং…পে…. ‘‘তেন হি, ভিক্খৰে, সঙ্ঘো সেয্যসকস্স ভিক্খুনো নিযস্সকম্মং পটিপ্পস্সম্ভেতু.

নপ্পটিপ্পস্সম্ভেতব্বঅট্ঠারসকং

১৮. ‘‘পঞ্চহি, ভিক্খৰে, অঙ্গেহি সমন্নাগতস্স ভিক্খুনো নিযস্সকম্মং নপ্পটিপ্পস্সম্ভেতব্বং. উপসম্পাদেতি, নিস্সযং দেতি, সামণেরং উপট্ঠাপেতি, ভিক্খুনোৰাদকসম্মুতিং সাদিযতি, সম্মতোপি ভিক্খুনিযো ওৰদতি – ইমেহি খো, ভিক্খৰে, পঞ্চহঙ্গেহি সমন্নাগতস্স ভিক্খুনো নিযস্সকম্মং নপ্পটিপ্পস্সম্ভেতব্বং.

[পরি. ৪২০] ‘‘অপরেহিপি, ভিক্খৰে, পঞ্চহঙ্গেহি সমন্নাগতস্স ভিক্খুনো নিযস্সকম্মং নপ্পটিপ্পস্সম্ভেতব্বং. যায আপত্তিযা সঙ্ঘেন নিযস্সকম্মং কতং হোতি তং আপত্তিং আপজ্জতি, অঞ্ঞং ৰা তাদিসিকং, ততো ৰা পাপিট্ঠতরং; কম্মং গরহতি, কম্মিকে গরহতি – ইমেহি খো, ভিক্খৰে, পঞ্চহঙ্গেহি সমন্নাগতস্স ভিক্খুনো নিযস্সকম্মং নপ্পটিপ্পস্সম্ভেতব্বং.

‘‘অট্ঠহি, ভিক্খৰে, অঙ্গেহি সমন্নাগতস্স ভিক্খুনো নিযস্সকম্মং নপ্পটিপ্পস্সম্ভেতব্বং. পকতত্তস্স ভিক্খুনো উপোসথং ঠপেতি, পৰারণং ঠপেতি, সৰচনীযং করোতি, অনুৰাদং পট্ঠপেতি, ওকাসং কারেতি, চোদেতি, সারেতি, ভিক্খূহি সম্পযোজেতি – ইমেহি খো, ভিক্খৰে, অট্ঠহঙ্গেহি সমন্নাগতস্স ভিক্খুনো নিযস্সকম্মং নপ্পটিপ্পস্সম্ভেতব্বং.

নপ্পটিপ্পস্সম্ভেতব্বঅট্ঠারসকং নিট্ঠিতং.

পটিপ্পস্সম্ভেতব্বঅট্ঠারসকং

১৯. ‘‘পঞ্চহি, ভিক্খৰে, অঙ্গেহি সমন্নাগতস্স ভিক্খুনো নিযস্সকম্মং পটিপ্পস্সম্ভেতব্বং. ন উপসম্পাদেতি, ন নিস্সযং দেতি, ন সামণেরং উপট্ঠাপেতি, ন ভিক্খুনোৰাদকসম্মুতিং সাদিযতি, সম্মতোপি ভিক্খুনিযো ন ওৰদতি – ইমেহি খো, ভিক্খৰে, পঞ্চহঙ্গেহি সমন্নাগতস্স ভিক্খুনো নিযস্সকম্মং পটিপ্পস্সম্ভেতব্বং.

‘‘অপরেহিপি, ভিক্খৰে, পঞ্চহঙ্গেহি সমন্নাগতস্স ভিক্খুনো নিযস্সকম্মং পটিপ্পস্সম্ভেতব্বং. যায আপত্তিযা সঙ্ঘেন নিযস্সকম্মং কতং হোতি তং আপত্তিং ন আপজ্জতি, অঞ্ঞং ৰা তাদিসিকং, ততো ৰা পাপিট্ঠতরং; কম্মং ন গরহতি, কম্মিকে ন গরহতি – ইমেহি খো, ভিক্খৰে, পঞ্চহঙ্গেহি সমন্নাগতস্স ভিক্খুনো নিযস্সকম্মং পটিপ্পস্সম্ভেতব্বং.

‘‘অট্ঠহি, ভিক্খৰে, অঙ্গেহি সমন্নাগতস্স ভিক্খুনো নিযস্সকম্মং পটিপ্পস্সম্ভেতব্বং.

ন পকতত্তস্স ভিক্খুনো উপোসথং ঠপেতি, ন পৰারণং ঠপেতি, ন সৰচনীযং করোতি, ন অনুৰাদং পট্ঠপেতি, ন ওকাসং কারেতি, ন চোদেতি, ন সারেতি, ন ভিক্খূহি সম্পযোজেতি – ইমেহি খো, ভিক্খৰে, অট্ঠহঙ্গেহি সমন্নাগতস্স ভিক্খুনো নিযস্সকম্মং পটিপ্পস্সম্ভেতব্বং.

পটিপ্পস্সম্ভেতব্বঅট্ঠারসকং নিট্ঠিতং.

২০. ‘‘এৰঞ্চ পন, ভিক্খৰে, পটিপ্পস্সম্ভেতব্বং. তেন, ভিক্খৰে, সেয্যসকেন ভিক্খুনা সঙ্ঘং উপসঙ্কমিত্ৰা একংসং উত্তরাসঙ্গং করিত্ৰা ৰুড্ঢানং ভিক্খূনং পাদে ৰন্দিত্ৰা উক্কুটিকং নিসীদিত্ৰা অঞ্জলিং পগ্গহেত্ৰা এৰমস্স ৰচনীযো – ‘অহং, ভন্তে, সঙ্ঘেন নিযস্সকম্মকতো সম্মা ৰত্তামি, লোমং পাতেমি, নেত্থারং ৰত্তামি, নিযস্সস্স কম্মস্স পটিপ্পস্সদ্ধিং যাচামী’তি. দুতিযম্পি যাচিতব্বা. ততিযম্পি যাচিতব্বা. ব্যত্তেন ভিক্খুনা পটিবলেন সঙ্ঘো ঞাপেতব্বো –

‘‘সুণাতু মে, ভন্তে, সঙ্ঘো. অযং সেয্যসকো ভিক্খু সঙ্ঘেন নিযস্সকম্মকতো সম্মা ৰত্ততি, লোমং পাতেতি, নেত্থারং ৰত্ততি, নিযস্সস্স কম্মস্স পটিপ্পস্সদ্ধিং যাচতি. যদি সঙ্ঘস্স পত্তকল্লং, সঙ্ঘো সেয্যসকস্স ভিক্খুনো নিযস্সকম্মং পটিপ্পস্সম্ভেয্য. এসা ঞত্তি.

‘‘সুণাতু মে, ভন্তে, সঙ্ঘো. অযং সেয্যসকো ভিক্খু সঙ্ঘেন নিযস্সকম্মকতো সম্মা ৰত্ততি, লোমং পাতেতি, নেত্থারং ৰত্ততি, নিযস্সস্স কম্মস্স পটিপ্পস্সদ্ধিং যাচতি. সঙ্ঘো সেয্যসকস্স ভিক্খুনো নিযস্সকম্মং পটিপ্পস্সম্ভেতি. যস্সাযস্মতো খমতি সেয্যসকস্স ভিক্খুনো নিযস্সস্স কম্মস্স পটিপ্পস্সদ্ধি, সো তুণ্হস্স; যস্স নক্খমতি, সো ভাসেয্য.

‘‘দুতিযম্পি এতমত্থং ৰদামি – সুণাতু মে, ভন্তে, সঙ্ঘো. অযং সেয্যসকো ভিক্খু সঙ্ঘেন নিযস্সকম্মকতো সম্মা ৰত্ততি, লোমং পাতেতি, নেত্থারং ৰত্ততি, নিযস্সস্স কম্মস্স পটিপ্পস্সদ্ধিং যাচতি. সঙ্ঘো সেয্যসকস্স ভিক্খুনো নিযস্সকম্মং পটিপ্পস্সম্ভেতি. যস্সাযস্মতো খমতি সেয্যসকস্স ভিক্খুনো নিযস্সস্স কম্মস্স পটিপ্পস্সদ্ধি, সো তুণ্হস্স; যস্স নক্খমতি, সো ভাসেয্য.

‘‘ততিযম্পি এতমত্থং ৰদামি – সুণাতু মে, ভন্তে, সঙ্ঘো. অযং সেয্যসকো ভিক্খু সঙ্ঘেন নিযস্সকম্মকতো সম্মা ৰত্ততি, লোমং পাতেতি, নেত্থারং ৰত্ততি, নিযস্সস্স কম্মস্স পটিপ্পস্সদ্ধিং যাচতি. সঙ্ঘো সেয্যসকস্স ভিক্খুনো নিযস্সকম্মং পটিপ্পস্সম্ভেতি. যস্সাযস্মতো খমতি সেয্যসকস্স ভিক্খুনো নিযস্সস্স কম্মস্স পটিপ্পস্সদ্ধি, সো তুণ্হস্স; যস্স নক্খমতি, সো ভাসেয্য.

‘‘পটিপ্পস্সদ্ধং সঙ্ঘেন সেয্যসকস্স ভিক্খুনো নিযস্সকম্মং. খমতি সঙ্ঘস্স, তস্মা তুণ্হী, এৰমেতং ধারযামী’’তি.

নিযস্সকম্মং নিট্ঠিতং দুতিযং.