মহাৰিভঙ্গসঙ্গহকথা

৪. মেথুনং পটিসেৰন্তো, কতি আপত্তিযো ফুসে;

মেথুনং পটিসেৰন্তো, তিস্সো আপত্তিযো ফুসে.

৫. ভৰে পারাজিকং খেত্তে, যেভুয্যক্খাযিতে পন;

থুল্লচ্চযং মুখে ৰট্ট-কতে ৰুত্তং তু দুক্কটং.

৬. অদিন্নং আদিযন্তো যো;

কতি আপত্তিযো ফুসে;

অদিন্নং আদিযন্তো সো;

তিস্সো আপত্তিযো ফুসে.

৭. পঞ্চমাসগ্ঘনে ৰাপি, অধিকে ৰা পরাজযো;

মাসে ৰা দুক্কটং ঊনে, মজ্ঝে থুল্লচ্চযং ততো.

৮. মনুস্সজাতিং মারেন্তো;

কতি আপত্তিযো ফুসে;

মনুস্সজাতিং মারেন্তো;

তিস্সো আপত্তিযো ফুসে.

৯. মনুস্সমুদ্দিস্সোপাতং, খণনে দুক্কটং সিযা;

দুক্খে থুল্লচ্চযং জাতে, মতে পারাজিকং সিযা.

১০. অসন্তং উত্তরিং ধম্মং, ৰদমত্তূপনাযিকং;

কতি আপজ্জতাপত্তী? তিস্সো আপত্তিযো ফুসে.

১১. অসন্তং উত্তরিং ধম্মং, ভণন্তস্স পরাজযো;

থুল্লচ্চযং পরিযাযে, ঞাতে, নো চে তু দুক্কটং.

পারাজিককথা.

১২. ভণ সুক্কং ৰিমোচেন্তো;

কতি আপত্তিযো ফুসে;

সুণ সুক্কং ৰিমোচেন্তো;

তিস্সো আপত্তিযো ফুসে.

১৩. গরুকং যদি চেতেতি, উপক্কমতি মুচ্চতি;

দ্ৰঙ্গে থুল্লচ্চযং ৰুত্তং, পযোগে দুক্কটং সিযা.

১৪. ইতো পট্ঠায মুঞ্চিত্ৰা, পঞ্হাপুচ্ছনমত্তকং;

ৰিস্সজ্জনৰসেনেৰ, হোতি অত্থৰিনিচ্ছযো.

১৫. ইত্থিযা কাযসংসগ্গে, তিস্সো আপত্তিযো ফুসে;

আমসন্তস্স কাযেন, কাযং তু গরুকং সিযা.

১৬. কাযেন কাযবদ্ধং তু, ফুসং থুল্লচ্চযং ফুসে;

পটিবদ্ধেন কাযেন, পটিবদ্ধে তু দুক্কটং.

১৭. ইত্থিং দুট্ঠুল্লৰাচাহি, তিস্সো ওভাসতো সিযুং;

ৰণ্ণাৰণ্ণং ৰদং দ্ৰিন্নং, মগ্গানং গরুকং ফুসে.

১৮. ৰণ্ণাদিভঞ্ঞে আদিস্স, উব্ভজাণুমধক্খকং;

হোতি থুল্লচ্চযং, কায-পটিবদ্ধে তু দুক্কটং.

১৯. অত্তকামচরিযায, ৰদতো ৰণ্ণমিত্থিযা;

সন্তিকে গরুকং হোতি, সচে জানাতি সা পন.

২০. সন্তিকে পণ্ডকস্সাপি, তস্স থুল্লচ্চযং সিযা;

তিরচ্ছানগতস্সাপি, সন্তিকে দুক্কটং মতং.

২১. পটিগ্গণ্হনৰীমংসা, পচ্চাহরণকত্তিকে;

সঞ্চরিত্তং সমাপন্নে, গরুকং নিদ্দিসে বুধো.

২২. তস্স দ্ৰঙ্গসমাযোগে, হোতি থুল্লচ্চযং তথা;

অঙ্গে সতি পনেকস্মিং, হোতি আপত্তি দুক্কটং.

২৩. সংযাচিকায চ কুটিং;

ৰিহারঞ্চ মহল্লকং;

কারাপেতি সচে ভিক্খু;

তিস্সো আপত্তিযো ফুসে.

২৪. পযোগে দুক্কটং ৰুত্তং, একপিণ্ডে অনাগতে;

হোতি থুল্লচ্চযং, তস্মিং, পিণ্ডে গরুকমাগতে.

২৫. পারাজিকেন ধম্মেন, ভিক্খুং অমূলকেনিধ;

অনুদ্ধংসেতি যো তস্স, তিস্সো আপত্তিযো সিযুং.

২৬. ওকাসং ন চ কারেত্ৰা, হুত্ৰা চাৰনচেতনো;

সচে চোদেতি সঙ্ঘাদি-সেসেন সহ দুক্কটং.

২৭. ওকাসং পন কারেত্ৰা, হুত্ৰা অক্কোসচেতনো;

চোদেতি ওমসৰাদে, পাচিত্তিং পরিদীপযে.

২৮. অনন্তরসমানোৰ, নৰমে অঞ্ঞভাগিযে;

সব্বো আপত্তিভেদো হি, নত্থি কাচি ৰিসেসতা.

২৯. সঙ্ঘস্স ভেদকো ভিক্খু, যাৰততিযকং পন;

সমনুভাসনাযেৰ, গাহং ন পটিনিস্সজং.

৩০. ঞত্তিযা দুক্কটং, দ্ৰীহি, কম্মৰাচাহি থুল্লতং;

কম্মৰাচায ওসানে, আপত্তি গরুকং সিযা.

৩১. ভেদানুৰত্তকে চেৰ, দুব্বচে কুলদূসকে;

সঙ্ঘভেদকতুল্যোৰ, হোতি আপত্তিনিচ্ছযো.

সঙ্ঘাদিসেসকথা.

৩২. অতিক্কমন্তো অতিরেকচীৰরং;

দসাহমাপজ্জতি একমেৰ;

নিস্সগ্গিপাচিত্তিযমেকরত্তিং;

তিচীৰরেনাপি ৰিনা ৰসন্তো.

৩৩. মাসং অতিক্কমন্তো হি, গহেত্ৰা কালচীৰরং;

একং আপজ্জতাপত্তিং, নিস্সগ্গিযমুদীরিতং.

৩৪. অঞ্ঞাতিকায যং কিঞ্চি;

পুরাণচীৰরং পন;

ধোৰাপেতি সচে তস্স;

হোন্তি আপত্তিযো দুৰে.

৩৫. ধোৰাপেতি পযোগস্মিং, দুক্কটং সমুদাহটং;

নিস্সগ্গিযাৰ পাচিত্তি, হোতি ধোৰাপিতে পন.

৩৬. অঞ্ঞাতিকায হত্থম্হা, চীৰরং পটিগণ্হতো;

গহণে দুক্কটং ৰুত্তং, পাচিত্তি গহিতে সিযা.

৩৭. অঞ্ঞাতকং গহপতিং, গহপতানিমেৰ ৰা;

চীৰরং ৰিঞ্ঞাপেন্তো দ্ৰে, ভিক্খু আপত্তিযো ফুসে.

৩৮. ৰিঞ্ঞাপেতি পযোগস্মিং, দুক্কটং পরিকিত্তিতং;

ৰিঞ্ঞাপিতে চ নিস্সগ্গি, পাচিত্তি পরিযাপুতা.

৩৯. ভিক্খু চীৰরমঞ্ঞাতিং, ৰিঞ্ঞাপেন্তো তদুত্তরিং;

পযোগে দুক্কটং, ৰিঞ্ঞা-পিতে নিস্সগ্গিযং ফুসে.

৪০. অঞ্ঞাতকং কঞ্চি উপাসকং ৰা;

উপাসিকং ৰা উপসঙ্কমিত্ৰা;

পুব্বেৰ হুত্ৰা পন অপ্পৰারিতো;

ৰত্থে ৰিকপ্পং পটিপজ্জমানো.

৪১. দুৰে আপজ্জতাপত্তী, পযোগে দুক্কটং সিযা;

ৰিকপ্পং পন আপন্নে, নিস্সগ্গিযমুদীরিতং.

৪২. অঞ্ঞাতিং উপসঙ্কম্ম, পুব্বেযেৰপ্পৰারিতো;

ৰিকপ্পং চীৰরে ভিক্খু, আপজ্জন্তো দুৰে ফুসে.

৪৩. তথাতিরেকতিক্খত্তুং, চোদনায চ ভিক্খু চে;

গন্ত্ৰাতিরেকছক্খত্তুং, ঠানেনপি চ চীৰরং.

৪৪. নিপ্ফাদেতি সচে তস্স, হোন্তি আপত্তিযো দুৰে;

পযোগে দুক্কটং, তস্স, লাভে নিস্সগ্গিযং সিযা.

কথিনৰগ্গো পঠমো.

৪৫. দোসা কোসিযৰগ্গস্স, দ্ৰেদ্ৰেআদীসু পঞ্চসু;

পযোগে দুক্কটং ৰুত্তং, লাভে নিস্সগ্গিযং সিযা.

৪৬. গহেত্ৰেল়কলোমানি, তিযোজনমতিক্কমং;

দুক্কটং পঠমে পাদে, নিস্সগ্গিং দুতিযে ফুসে.

৪৭. ভিক্খু ভিক্খুনিযঞ্ঞায, ধোৰাপেতেল়লোমকং;

পযোগে দুক্কটং, তস্স, ধোতে নিস্সগ্গিযং সিযা.

৪৮. রূপিযং পটিগণ্হন্তো, দ্ৰে পনাপত্তিযো ফুসে;

পযোগে দুক্কটং ৰুত্তং, নিস্সগ্গি গহিতে সিযা.

৪৯. নানাকারং সমাপজ্জং, সংৰোহারঞ্চ রূপিযে;

সমাপন্নে চ নিস্সগ্গিং, পযোগে দুক্কটং ফুসে.

৫০. নানপ্পকারকং ভিক্খু, আপজ্জে কযৰিক্কযং;

পযোগে দুক্কটং, তস্মিং, কতে নিস্সগ্গিযং ফুসে.

কোসিযৰগ্গো দুতিযো.

৫১. পত্তং অতিক্কমেন্তস্স, দসাহমতিরেককং;

তস্স নিস্সগ্গিযাপত্তি, হোতি একাৰ ভিক্খুনো.

৫২. অপঞ্চবন্ধনে পত্তে, ৰিজ্জমানেপি ভিক্খুনো;

অঞ্ঞং পন নৰং পত্তং, চেতাপেতি সচে পন.

৫৩. দ্ৰে পনাপত্তিযো ভিক্খু, আপজ্জতি, ন সংসযো;

পযোগে দুক্কটং, তস্স, লাভে নিস্সগ্গিযং ফুসে.

৫৪. পটিগ্গহেত্ৰা ভেসজ্জং, সত্তাহং যো অতিক্কমে;

একং নিস্সগ্গিযাপত্তিং, আপজ্জতি হি সো পন.

৫৫. অকালে পরিযেসন্তো, ৰস্সসাটিকচীৰরং;

পযোগে দুক্কটং, তস্স, লাভে নিস্সগ্গিযং ফুসে.

৫৬. ভিক্খুনো চীৰরং দত্ৰা, অচ্ছিন্দন্তো দুৰে ফুসে;

পযোগে দুক্কটং ৰুত্তং, হটে নিস্সগ্গিযং সিযা.

৫৭. ৰিঞ্ঞাপেত্ৰা সযং সুত্তং, তন্তৰাযেহি চীৰরং;

ৰাযাপেতি সচে ভিক্খু, দ্ৰে পনাপত্তিযো ফুসে.

৫৮. যো পনঞ্ঞাতকস্সেৰ, তন্তৰাযে সমেচ্চ চে;

ৰিকপ্পং চীৰরে ভিক্খু, আপজ্জং অপ্পৰারিতো.

৫৯. দ্ৰে পনাপত্তিযো সো হি, আপজ্জতি, ন সংসযো;

পযোগে দুক্কটং, তস্স, লাভে নিস্সগ্গিযং সিযা.

৬০. পটিগ্গহেত্ৰা অচ্চেক-সঞ্ঞিতং পন চীৰরং;

কালং অতিক্কমেন্তো তং, একং নিস্সগ্গিযং ফুসে.

৬১. তিণ্ণমঞ্ঞতরং ৰত্থং, নিদহিত্ৰা ঘরেধিকং;

ছারত্ততো ৰিনা তেন, ৰসং নিস্সগ্গিযং ফুসে.

৬২. জানং পরিণতং লাভং, সঙ্ঘিকং অত্তনো পন;

পরিণামেতি চে ভিক্খু, দ্ৰে পনাপত্তিযো ফুসে.

৬৩. পযোগে দুক্কটং হোতি, নিস্সগ্গি পরিণামিতে;

সব্বত্থ অপ্পনাৰার-পরিহানি কতা মযা.

পত্তৰগ্গো ততিযো.

তিংসনিস্সগ্গিযকথা.

৬৪. ৰদন্তস্স মুসাৰাদং, পঞ্চ আপত্তিযো সিযুং;

মনুস্সুত্তরিধম্মে তু, অভূতস্মিং পরাজযো.

৬৫. চোদনায গরুং ভিক্খুং, অমূলন্তিমৰত্থুনা;

পরিযাযৰচনে ঞাতে, থুল্লচ্চযমুদীরিতং.

৬৬. নো চে পটিৰিজানাতি, দুক্কটং সমুদাহটং;

সম্পজানমুসাৰাদে, পাচিত্তি পরিদীপিতা.

৬৭. আপত্তিযো দুৰে ৰুত্তা, ভিক্খুস্সোমসতো পন;

পাচিত্তি উপসম্পন্নং, দুক্কটং ইতরং সিযা.

৬৮. পেসুঞ্ঞহরণে দ্ৰেপি, হোন্তি, পাচিত্তিযং পন;