অনিযতকণ্ডো

১. পঠমানিযতসিক্খাপদৰণ্ণনা

অনিযতুদ্দেসে ইমে খো পনাতিআদি ৰুত্তনযমেৰ. মাতুগামেনাতি তদহুজাতাযপি জীৰমানকমনুস্সিত্থিযা. একো একাযাতি একো ভিক্খু মাতুগামসঙ্খাতায একায ইত্থিযা সদ্ধিং. রহোতি চক্খুস্স রহো. কিঞ্চাপি পাল়িযং (পারা. ৪৪৫) সোতস্স রহো আগতো, চক্খুস্সেৰ পন রহো ‘‘রহো’’তি ইধ অধিপ্পেতো. সচেপি হি পিহিতকৰাটস্স গব্ভস্স দ্ৰারে নিসিন্নো ৰিঞ্ঞূ পুরিসো হোতি, নেৰ অনাপত্তিং করোতি. যত্থ পন সক্কা দট্ঠুং, তাদিসে অন্তোদ্ৰাদসহত্থেপি ওকাসে নিসিন্নো সচক্খুকো ৰিক্খিত্তচিত্তোপি নিদ্দাযন্তোপি অনাপত্তিং করোতি, সমীপে ঠিতোপি অন্ধো ন করোতি, চক্খুমাপি নিপজ্জিত্ৰা নিদ্দাযন্তোপি ন করোতি, ইত্থীনং পন সতম্পি ন করোতিযেৰ, তেন ৰুত্তং ‘‘রহোতি চক্খুস্স রহো’’তি. পটিচ্ছন্নে আসনেতি কুট্টাদীহি পটিচ্ছন্নোকাসে. অলংকম্মনিযেতি কম্মক্খমং কম্মযোগ্গন্তি কম্মনিযং, অলং পরিযত্তং কম্মনিযভাৰাযাতি অলংকম্মনিযং, তস্মিং অলংকম্মনিযে. যত্থ অজ্ঝাচারং করোন্তা সক্কোন্তি তং কম্মং কাতুং, তাদিসেতি অত্থো. নিসজ্জং কপ্পেয্যাতি নিসজ্জং করেয্য, নিসীদেয্যাতি অত্থো. এত্থ চ সযনম্পি নিসজ্জায এৰ সঙ্গহিতং. সদ্ধেয্যৰচসাতি সদ্ধাতব্বৰচনা, অরিযসাৰিকাতি অত্থো. নিসজ্জং ভিক্খু পটিজানমানোতি কিঞ্চাপি এৰরূপা উপাসিকা দিস্ৰা ৰদতি, অথ খো ভিক্খু নিসজ্জং পটিজানমানোৰ তিণ্ণং ধম্মানং অঞ্ঞতরেন কারেতব্বো, ন অপ্পটিজানমানোতি অত্থো. যেন ৰা সাতি নিসজ্জাদীসু আকারেসু যেন ৰা আকারেন সদ্ধিং মেথুনাদীনি আরোপেত্ৰা সা উপাসিকা ৰদেয্য, পটিজানমানোৰ তেন সো ভিক্খু কারেতব্বো, এৰরূপাযপি হি উপাসিকায ৰচনমত্তেন আকারেন ন কারেতব্বোতি অত্থো. কস্মা? যস্মা দিট্ঠং নাম তথাপি হোতি, অঞ্ঞথাপীতি. অযং ধম্মো অনিযতোতি তিণ্ণং আপত্তীনং যং আপত্তিং ৰা ৰত্থুং ৰা পটিজানাতি, তস্স ৰসেন কারেতব্বতায অনিযতো.

সাৰত্থিযং উদাযিত্থেরং আরব্ভ মাতুগামেন সদ্ধিং ৰুত্তপ্পকারে আসনে নিসজ্জকপ্পনৰত্থুস্মিং পঞ্ঞত্তং, অসাধারণপঞ্ঞত্তি, অনাণত্তিকং, মেথুনধম্মসন্নিস্সিতকিলেসসঙ্খাতেন রহস্সাদেন মাতুগামস্স সন্তিকং গন্তুকামতায অক্খিঅঞ্জনাদিতো পট্ঠায সব্বপযোগেসু দুক্কটং. গন্ত্ৰা তস্মিং ৰা নিসিন্নে ইত্থী নিসীদতু, তস্সা ৰা নিসিন্নায সো নিসীদতু, অপচ্ছা অপুরিমংযেৰ উভো ৰা নিসীদন্তু, উভিন্নং নিসজ্জায পাচিত্তিযং. সচে পন কাযসংসগ্গং ৰা মেথুনং ৰা সমাপজ্জতি, তেসং ৰসেন কারেতব্বো. নিপজ্জনেপি এসেৰ নযো. ৰুত্তপ্পকারে পুরিসে নিপজ্জিত্ৰা অনিদ্দাযন্তে অনন্ধে ৰিঞ্ঞুপুরিসে উপচারগতে সতি, ঠিতস্স, অরহোপেক্খস্স, অঞ্ঞৰিহিতস্স চ নিসজ্জনপচ্চযা অনাপত্তি. উম্মত্তকাদীনং পন তীহিপি আপত্তীহি অনাপত্তি. সিযা সীলৰিপত্তি, সিযা আচারৰিপত্তি. যং পন আপত্তিং পটিজানাতি, তস্সা ৰসেন অঙ্গভেদো ঞাতব্বো. সমুট্ঠানাদীনি পঠমপারাজিকসদিসানেৰাতি.

পঠমানিযতসিক্খাপদৰণ্ণনা নিট্ঠিতা.

২. দুতিযানিযতসিক্খাপদৰণ্ণনা

দুতিযে ইত্থীপি পুরিসোপি যো কোচি ৰিঞ্ঞূ অনন্ধো অবধিরো অন্তোদ্ৰাদসহত্থে ওকাসে ঠিতো ৰা নিসিন্নো ৰা ৰিক্খিত্তোপি নিদ্দাযন্তোপি অনাপত্তিং করোতি. বধিরো পন চক্খুমাপি, অন্ধো ৰা অবধিরোপি ন করোতি. পারাজিকাপত্তিঞ্চ পরিহাপেত্ৰা দুট্ঠুল্লৰাচাপত্তি ৰুত্তাতি অযং ৰিসেসো. সেসং পুরিমনযেনেৰ ৰেদিতব্বং. সমুট্ঠানাদীনি পনেত্থ অদিন্নাদানসদিসানেৰাতি.

দুতিযানিযতসিক্খাপদৰণ্ণনা নিট্ঠিতা.

উদ্দিট্ঠা খোতিআদি সব্বত্থ ৰুত্তনযেনেৰ ৰেদিতব্বং.

কঙ্খাৰিতরণিযা পাতিমোক্খৰণ্ণনায

অনিযতৰণ্ণনা নিট্ঠিতা.