১১. গরুপাৰুরণসিক্খাপদৰণ্ণনা

দুতিযস্স পঠমে গরুপাৰুরণন্তি সীতকালে পাৰুরণং. চতুক্কংসপরমন্তি কংসো নাম চতুক্কহাপণিকো হোতি, তস্মা সোল়সকহাপণগ্ঘনকং. চেতাপেতব্বন্তি ঠপেত্ৰা সহধম্মিকে চ ঞাতকপ্পৰারিতে চ অঞ্ঞেন কিস্মিঞ্চিদেৰ গুণে পরিতুট্ঠেন ‘‘ৰদেথায্যে, যেনত্থো’’তি ৰুত্তায ৰিঞ্ঞাপেতব্বং. ততো চে উত্তরীতি ততুত্তরি ৰিঞ্ঞাপেন্তিযা দুক্কটং, পটিলদ্ধং নিস্সগ্গিযং হোতি.

সাৰত্থিযং থুল্লনন্দং আরব্ভ রাজানং কম্বলং ৰিঞ্ঞাপনৰত্থুস্মিং পঞ্ঞত্তং, তিকপাচিত্তিযং, ঊনকচতুক্কংসে দ্ৰিকদুক্কটং. তস্মিং পন ঊনকসঞ্ঞায, চতুক্কংসপরমং চেতাপেন্তিযা, ঞাতকপ্পৰারিতে ৰা, অঞ্ঞস্স ৰা অত্থায, অত্তনো ৰা ধনেন, মহগ্ঘং চেতাপেন্তং অপ্পগ্ঘং চেতাপেন্তিযা, উম্মত্তিকাদীনঞ্চ অনাপত্তি. গরুপাৰুরণতা, অতিরেকচতুক্কংসতা, অননুঞ্ঞাতট্ঠানে ৰিঞ্ঞত্তি, পটিলাভোতি ইমানেত্থ চত্তারি অঙ্গানি. সমুট্ঠানাদীনি সঞ্চরিত্তসদিসানীতি.

গরুপাৰুরণসিক্খাপদৰণ্ণনা নিট্ঠিতা.