অসাধারণপারাজিকং

৫. উব্ভজাণুমণ্ডলিকাসিক্খাপদৰণ্ণনা

অসাধারণেসু পন চতুন্নং তাৰ পারাজিকানং পঠমে অৰস্সুতাতি কাযসংসগ্গরাগেন তিন্তা, কিলিন্নাতি অত্থো. দুতিযপদেপি এসেৰ নযো. পুরিসপুগ্গলস্সাতি কাযসংসগ্গং সমাপজ্জিতুং ৰিঞ্ঞুস্স মনুস্সজাতিকস্স পুরিসসঙ্খাতস্স পুগ্গলস্স. অধক্খকন্তি অত্তনো অক্খকানং অধো. উব্ভজাণুমণ্ডলন্তি জাণুমণ্ডলানং উপরি, এত্থ চ উব্ভকপ্পরম্পি উব্ভজাণুমণ্ডলেনেৰ সঙ্গহিতং. আমসনন্তি আমজ্জনং ফুট্ঠোকাসং অনতিক্কমিত্ৰা তত্থেৰ সঙ্ঘট্টনং. পরামসনন্তি ইতো চিতো চ সঞ্চরণং. গহণন্তি গহিতমত্তং. ছুপনন্তি অসঙ্ঘট্টেত্ৰা ফুট্ঠমত্তং. পটিপীল়নন্তি অঙ্গে গহেত্ৰা নিপ্পীল়নং. সাদিযেয্যাতি যা ভিক্খুনী অত্তনো যথাপরিচ্ছিন্নে কাযে পুরিসস্স এতং আমসনাদিং সাদিযতি, সযং ৰা পন তেন কাযেন পুরিসস্স যংকিঞ্চি কাযপ্পদেসং সাদযমানা ছুপতি, অযং উব্ভজাণুমণ্ডলিকা নাম পারাজিকাতি অযমেত্থ সঙ্খেপো.

‘‘নিদানং পুগ্গলং ৰত্থু’’ন্তিআদিকে (কঙ্খা. অট্ঠ. পঠমপারাজিকৰণ্ণনা) তেন ৰিত্থারৰিনিচ্ছযে যস্মা সব্বানেৰ অসাধারণপঞ্ঞত্তিযো হোন্তি, তস্মা ইতো পট্ঠায সন্তিং অনুপঞ্ঞত্তিং ৰত্ৰা সাধারণপঞ্ঞত্তীতি ৰা অসাধারণপঞ্ঞত্তীতি ৰা ন ৰক্খাম, আণত্তিযং যত্থ আণত্তি নত্থি, তত্থ কিঞ্চি অৰত্ৰা যত্থ অত্থি, তত্থেৰ ৰক্খাম, ৰিপত্তিৰিচারণা ৰুত্তাযেৰ.

অৰসেসং পন সব্বত্থ ৰত্তব্বং, তযিদং ৰুচ্চতি, ইদং তাৰ সিক্খাপদং সাৰত্থিযং সুন্দরীনন্দং আরব্ভ কাযসংসগ্গং সমাপজ্জনৰত্থুস্মিং পঞ্ঞত্তং, একতোঅৰস্সুতে যথাপরিচ্ছিন্নেন কাযেন পুরিসস্স কাযং, উভতোঅৰস্সুতেপি কাযেন কাযপ্পটিবদ্ধং, যথাপরিচ্ছিন্নকাযপ্পটিবদ্ধেন ৰা অৰসেসকাযেন ৰা তস্স কাযং আমসন্তিযা থুল্লচ্চযং, যক্খপেতপণ্ডকতিরচ্ছানগতমনুস্সৰিগ্গহানং উভতোঅৰস্সুতে যথাপরিচ্ছিন্নেন কাযেন কাযং আমসন্তিযাপি থুল্লচ্চযং, সচে পন পুরিসস্স কাযসংসগ্গরাগো নত্থি, পারাজিকক্খেত্তেপি থুল্লচ্চযমেৰ. অৰসেসে পন কাযপ্পটিবদ্ধেন কাযপ্পটিবদ্ধাদিভেদে, মেথুনরাগগেহসিতপেমেসু চ সব্বত্থ দুক্কটং. অসঞ্চিচ্চ, অস্সতিযা, অজানন্তিযা, অসাদিযন্তিযা, উম্মত্তিকাদীনঞ্চ অনাপত্তি. অঙ্গানি সমুট্ঠানাদীনি চ ভিক্খুপাতিমোক্খে কাযসংসগ্গে ৰুত্তনযেনেৰ ৰেদিতব্বানীতি.

উব্ভজাণুমণ্ডলিকাসিক্খাপদৰণ্ণনা নিট্ঠিতা.

৬. ৰজ্জপ্পটিচ্ছাদিকাসিক্খাপদৰণ্ণনা

দুতিযে গণস্সাতি অঞ্ঞাসং ভিক্খুনীনং. ঠিতাতি সলিঙ্গে ঠিতা. চুতাতি কালঙ্কতা. নাসিতাতি লিঙ্গনাসনায সযং ৰা নট্ঠা, অঞ্ঞেহি ৰা নাসিতা. অৰস্সটাতি তিত্থাযতনং সঙ্কন্তা. পুব্বেৰাহং অয্যে অঞ্ঞাসিন্তি ইদং তস্সা ৰচনকালদস্সনং, সলিঙ্গে ঠিতায পন পারাজিকভাৰং ঞত্ৰা ‘‘ন দানি নং কস্সচি আরোচেস্সামী’’তি ধুরে নিক্খিত্তমত্তেযেৰ অযং ৰজ্জপ্পটিচ্ছাদিকা নাম পারাজিকা হোতীতি.

সাৰত্থিযং থুল্লনন্দং আরব্ভ নেৰঅত্তনাপটিচোদনা নগণস্স আরোচনৰত্থুস্মিং পঞ্ঞত্তং, সেসমেত্থ সপ্পাণকৰগ্গম্হি দুট্ঠুল্লাপত্তিপ্পটিচ্ছাদনসিক্খাপদে ৰুত্তনযেনেৰ ৰেদিতব্বং. তত্র হি পাচিত্তিযং, ইধ পারাজিকন্তি অযমেৰ ৰিসেসো, সেসং তাদিসমেৰাতি.

ৰজ্জপ্পটিচ্ছাদিকাসিক্খাপদৰণ্ণনা নিট্ঠিতা.

৭. উক্খিত্তানুৰত্তিকাসিক্খাপদৰণ্ণনা

ততিযে উক্খিত্তন্তি আপত্তিযা অদস্সনাদীসু উক্খিত্তং. ধম্মেনাতি ভূতেন ৰত্থুনা. ৰিনযেনাতি চোদেত্ৰা সারেত্ৰা. সত্থুসাসনেনাতি ইধাপি চোদেত্ৰা সারেত্ৰা করণমেৰ সত্থুসাসনং নাম. অনাদরন্তি যেন সঙ্ঘেন উক্খেপনিযকম্মং কতং, তস্মিং ৰা, তত্থ পরিযাপন্নগণে ৰা একপুগ্গলে ৰা তস্মিং ৰা কম্মে আদরৰিরহিতং, সম্মাৰত্তনায অৰত্তমানন্তি অত্থো. অপ্পটিকারন্তি পটিকাররহিতং, অনোসারিতন্তি অত্থো. অকতসহাযন্তি এককম্মাদিকে সংৰাসে সহ অযনভাৰেন সমানসংৰাসকা ভিক্খূ সহাযা নাম, যস্স পন সো সংৰাসো তেহি সদ্ধিং নত্থি ন তেন তে সহাযা কতা হোন্তি, ইতি সো অকতসহাযো নাম, তং অকতসহাযং, সমানসংৰাসকভাৰং অনুপগতন্তি অত্থো. তমনুৰত্তেয্যাতি তং উক্খিত্তকং উক্খিত্তকভাৰেযেৰ ঠিতং ভিক্খুং যা ভিক্খুনী যংদিট্ঠিকো সো হোতি, তায দিট্ঠিযা গহণভাৰেন অনুৰত্তেয্য. সা ভিক্খুনী ভিক্খুনীহি সঙ্ঘভেদসিক্খাপদাদীসু ৰুত্তনযেন ৰিসুং সঙ্ঘমজ্ঝে চ ৰুচ্চমানা তং ৰত্থুং অপ্পটিনিস্সজ্জন্তী সমনুভাসনকম্মপরিযোসানে উক্খিত্তানুৰত্তিকা নাম পারাজিকা হোতীতি.

সাৰত্থিযং থুল্লনন্দং আরব্ভ উক্খিত্তানুৰত্তনৰত্থুস্মিং পঞ্ঞত্তং, ঞত্তিযা দুক্কটং, দ্ৰীহি কম্মৰাচাহি দ্ৰে থুল্লচ্চযা, ‘‘যস্সা নক্খমতি, সা ভাসেয্যা’’তি এৰং য্য-কারপ্পত্তায ততিযকম্মৰাচায পারাজিকং, অধম্মকম্মে তিকদুক্কটং, সেসং সঙ্ঘভেদসিক্খাপদাদীসু ৰুত্তনযেনেৰ ৰেদিতব্বং.

উক্খিত্তানুৰত্তিকাসিক্খাপদৰণ্ণনা নিট্ঠিতা.

৮. অট্ঠৰত্থুকাসিক্খাপদৰণ্ণনা

চতুত্থে অৰস্সুতাতি লোকস্সাদমিত্তসন্থৰৰসেন কাযসংসগ্গরাগেন তিন্তা. অযমেৰ হি অত্থো সীহল়মাতিকাট্ঠকথাযং ৰুত্তো, সমন্তপাসাদিকাযং (পাচি. অট্ঠ. ৬৭৫) পনস্স ৰিচারণা কতা, দুতিযপদেপি এসেৰ নযো. পুরিসপুগ্গলস্স হত্থগ্গহণং ৰাতিআদীসু পন যং পুরিসপুগ্গলেন হত্থে গহণং কতং, তং ‘‘পুরিসপুগ্গলস্স হত্থগ্গহণ’’ন্তি ৰুত্তং, এসেৰ নযো সঙ্ঘাটিকণ্ণগ্গহণেপি. হত্থগ্গহণন্তি এত্থ চ যস্স কস্সচি অপারাজিকক্খেত্তভূতস্স অঙ্গস্স গহণং হত্থগ্গহণং, যস্স কস্সচি নিৰত্থস্স ৰা পারুতস্স ৰা গহণং সঙ্ঘাটিকণ্ণগ্গহণং. সন্তিট্ঠেয্য ৰাতিআদীসু কাযসংসগ্গসঙ্খাতস্স অসদ্ধম্মস্স পটিসেৰনত্থায পুরিসস্স হত্থপাসে সন্তিট্ঠেয্য ৰা, তত্থ ঠিতা সল্লপেয্য ৰা, পুরিসেন ৰা ‘‘ইত্থন্নামং ঠানং আগচ্ছা’’তি ৰুত্তা তং সঙ্কেতং গচ্ছেয্য, তস্স ৰা পুরিসস্স অব্ভাগমনং সাদিযেয্য, যেন কেনচি ৰা পটিচ্ছন্নং ওকাসং পৰিসেয্য, পুরিসস্স হত্থপাসে ঠত্ৰা কাযং উপসংহরেয্যাতি এৰমত্থো দট্ঠব্বো. অযম্পি পারাজিকাতি যথা পুরিমাযো, এৰং অযম্পি ভিক্খুনী এতস্স কাযসংসগ্গসঙ্খাতস্স অসদ্ধম্মস্স পটিসেৰনত্থায এতানি অট্ঠ ৰত্থূনি পটিপাটিযা ৰা উপ্পটিপাটিযা ৰা পূরেত্ৰা অট্ঠৰত্থুকা নাম পারাজিকা হোতীতি.

সাৰত্থিযং ছব্বগ্গিযা ভিক্খুনিযো আরব্ভ অট্ঠমং ৰত্থুং পরিপূরণৰত্থুস্মিং পঞ্ঞত্তং, সঙ্কেতগমনে পদে পদে দুক্কটং, পুরিসস্স হত্থপাসং ওক্কন্তমত্তে থুল্লচ্চযং, পুরিসস্স অব্ভাগমনসাদযমানেপি দুক্কটং. হত্থপাসোক্কমনে থুল্লচ্চযং, সেসেসু একেকস্মিং থুল্লচ্চযমেৰ, অট্ঠমে পরিপুণ্ণে পারাজিকং. একেকস্মিং পন ৰত্থুস্মিং সতক্খত্তুম্পি ৰীতিক্কন্তে তা আপত্তিযো দেসেত্ৰা মুচ্চতি, অপিচেত্থ গণনূপিকা আপত্তি ৰেদিতব্বা, ‘‘ইদানি নাপজ্জিস্সামী’’তি হি ধুরনিক্খেপং কত্ৰা দেসিতা গণনূপিকা, দেসিতগণনং উপেতি, পারাজিকস্স অঙ্গং ন হোতি. তস্মা যা একং আপন্না ধুরনিক্খেপং কত্ৰা দেসেত্ৰা পুন কিলেসৰসেন আপজ্জতি, পুনপি দেসেতি, এৰং অট্ঠমং পরিপূরেন্তীপি পারাজিকা ন হোতি. যা পন আপজ্জিত্ৰা ‘‘পুনপি অঞ্ঞং ৰত্থুং আপজ্জিস্সামী’’তি সউস্সাহাৰ দেসেতি, তস্সা সা আপত্তি অগণনূপিকা, দেসিতাপি অদেসিতা হোতি, পারাজিকস্স অঙ্গং হোতি. অসঞ্চিচ্চ, অস্সতিযা, অজানন্তিযা অসাদিযন্তিযা, উম্মত্তিকাদীনঞ্চ অনাপত্তি. কাযসংসগ্গরাগো, সউস্সাহতা, অট্ঠমস্স ৰত্থুস্স পূরণন্তি ইমানেত্থ তীণি অঙ্গানি. সমনুভাসনসমুট্ঠানং, কিরিযাকিরিযং, সঞ্ঞাৰিমোক্খং, সচিত্তকং, লোকৰজ্জং, কাযকম্মং, ৰচীকম্মং, অকুসলচিত্তং, দ্ৰিৰেদনন্তি.

অট্ঠৰত্থুকাসিক্খাপদৰণ্ণনা নিট্ঠিতা.

উদ্দিট্ঠা খো অয্যাযো অট্ঠ পারাজিকা ধম্মাতি ভিক্খূ আরব্ভ পঞ্ঞত্তা সাধারণা চত্তারো, ইমে চত্তারোতি এৰং পাতিমোক্খুদ্দেসমগ্গেন অট্ঠ পারাজিকা ধম্মা উদ্দিট্ঠাতি এৰমেত্থ অত্থো ৰেদিতব্বো, সেসং ভিক্খুপাতিমোক্খৰণ্ণনাযং ৰুত্তনযমেৰাতি.

কঙ্খাৰিতরণিযা পাতিমোক্খৰণ্ণনায

ভিক্খুনিপাতিমোক্খে

পারাজিকৰণ্ণনা নিট্ঠিতা.