৭. পট্ঠানমাতিকত্থৰণ্ণনা

ইদানি পট্ঠানমাতিকায অত্থসংৰণ্ণনানযো হোতি. কেনট্ঠেন পট্ঠানন্তি? নানপ্পকারপচ্চযট্ঠেন. প-সদ্দো হি নানপ্পকারত্থং দীপেতি, ঠান-সদ্দো পচ্চযত্থং. অথ ৰা ৰিভজনট্ঠেন পট্ঠানং. যথা হি পঞ্ঞাপনা পট্ঠপনা ৰিৰরণা ৰিভজনা উত্তানীকম্মন্তি আগতট্ঠানে ৰিভজনট্ঠো পট্ঠানসদ্দসমানত্থো পট্ঠপনা-সদ্দো দিস্সতি, এৰমিধাপি কুসলাদীনং ধম্মানং হেতুপচ্চযাদীহি ৰিভজনতো ৰিভজনট্ঠেন পট্ঠানং নাম. অথ ৰা পট্ঠিতট্ঠেন পট্ঠানং, গমনট্ঠেনাতি অত্থো. সব্বধম্মেসু হি অসঙ্গগমনস্স সব্বঞ্ঞুতঞ্ঞাণস্স হেতুপচ্চযাদিভেদভিন্নেসু কুসলাদীসু ৰিত্থারিতনযলাভতো নিস্সঙ্গৰসেন পৰত্তগমনত্তা গমনট্ঠেন পট্ঠানং নাম, ইতি নানপ্পকারপচ্চযট্ঠেন, ৰিভজনট্ঠেন, গমনট্ঠেন চ তিকপট্ঠানাদীসু চতুৰীসতিযা পট্ঠানেসু একেকম্পি পট্ঠানং নাম, তেসং পন সমূহতো পকরণং পট্ঠানং নাম, তেসং পট্ঠানানং মাতিকা. সযম্পি ৰা পট্ঠানভূতা মাতিকা, সব্বম্পেতং পট্ঠানমাতিকা. যা সা ‘‘হেতুপচ্চযো, আরম্মণপচ্চযো…পে… অৰিগতপচ্চযো’’তি এৰং তিকপট্ঠানাদিচতুৰীসতিপ্পভেদসমন্তপট্ঠানদেসনায মূলভূতপচ্চযভেদস্স ৰসেন ভগৰতা পকরণস্স আদিম্হি ঠপিতা, অযং ইধ পট্ঠানমাতিকা নাম.

তত্থ অনুত্তানত্থাদিসহিতো সঙ্খেপত্থৰিনিচ্ছযো তাৰ এৰং ৰেদিতব্বো – হেতুপচ্চযোতিআদীসু হি হেতু চ সো পচ্চযো চাতি হেতুপচ্চযো, হেতু হুত্ৰা পচ্চযো হেতুপচ্চযো, হেতুভাৰেন পচ্চযোতি ৰুত্তং হোতি. তত্থ হেতূতি ৰচনাৰযৰকারণমূলানমেতং অধিৰচনং. ‘‘পটিঞ্ঞাহেতূ’’তিআদীসু হি লোকে ৰচনাৰযৰো ‘‘হেতূ’’তি ৰুচ্চতি, সাসনে পন ‘‘যে ধম্মা হেতুপ্পভৰা’’তিআদীসু (মহাৰ. ৬০; অপ. থের ১.১.২৮৬) কারণং, ‘‘তযো কুসলা হেতূ, তযো অকুসলা হেতূ’’তিআদীসু (ধ. স. ১০৫৯) মূলং, ইদং ইধ অধিপ্পেতং, তং পটিচ্চ এতস্মা এতীতি পচ্চযো, অপচ্চক্খায নং ৰত্ততীতি অত্থো. যো হি ধম্মো যং ধম্মং পটিচ্চ অপচ্চক্খায তিট্ঠতি ৰা উপ্পজ্জতি ৰা, সো তস্স উপকারকলক্খণেন পচ্চযো নাম. ইতি মূলট্ঠেন হেতু, উপকারকট্ঠেন পচ্চযোতি সঙ্খেপতো মূলট্ঠেন উপকারকো ধম্মো হেতুপচ্চযো, কুসলাদীনং কুসলাদিভাৰসাধকোতি কেচি, এৰং সন্তে পন তংসমুট্ঠানরূপেসু হেতুপচ্চযতা ন সম্পজ্জতি, অহেতুকচিত্তানঞ্চ ৰিনা এতেহি অব্যাকতভাৰো সিদ্ধো, সহেতুকানম্পি চ যোনিসোমনসিকারাদিপটিবদ্ধো কুসলাদিভাৰো, ন সম্পযুত্তহেতুপটিবদ্ধো. যদি চ সিযা, হেতূসুপি কুসলাদিভাৰসাধকেন অঞ্ঞেন ভৰিতব্বং, কুসলাদিভাৰসাধনৰসেন পন হেতূনং মূলট্ঠং অগ্গহেত্ৰা সুপ্পতিট্ঠিতভাৰসাধনৰসেন গয্হমানে ন কিঞ্চি ৰিরুজ্ঝতি. লদ্ধহেতুপচ্চযা হি ধম্মা ৰিরুল়্হমূলা ৰিয পাদপা থিরা হোন্তি সুপ্পতিট্ঠিতা, ইতরে পন তিলবীজকাদিসেৰালা ৰিয ন সুপ্পতিট্ঠিতা, ইতি মূলট্ঠেন উপকারকোতি সুপ্পতিট্ঠিতভাৰসাধনেন উপকারকো ধম্মো হেতুপচ্চযোতি ৰেদিতব্বো.

নিদ্দেসে ‘‘হেতূ হেতুসম্পযুত্তকানং ধম্মানং তংসমুট্ঠানানঞ্চ রূপানং হেতুপচ্চযেন পচ্চযো’’তি ৰুত্তং, তত্থ ‘‘চিত্তসমুট্ঠানান’’ন্তি অৰত্ৰা ‘‘তংসমুট্ঠানান’’ন্তি ইদং অচিত্তসমুট্ঠানানম্পি সঙ্গণ্হনত্থং. পঞ্হাৰারস্মিং হি ‘‘পটিসন্ধিক্খণে ৰিপাকাব্যাকতা হেতূ সম্পযুত্তকানং খন্ধানং কটত্তা চ রূপানং হেতুপচ্চযেন পচ্চযো’’তি আগতং, কস্মা পনাযং হেতু পটিসন্ধিযমেৰ কটত্তারূপানং হেতুপচ্চযেন পচ্চযো হোতি, ন পৰত্তেতি? পটিসন্ধিযং কম্মজরূপানং চিত্তপটিবদ্ধৰুত্তিতায, ভৰপঠমনিপাততো চিত্তজাতি. ইতররূপসন্ততিউপ্পত্থম্ভাভাৰেন এৰ দুব্বলৰত্থুং চিত্তমেৰ নিস্সায উপ্পজ্জতি চেৰ তিট্ঠতি চ. তং চিত্তম্পি হি পটিসন্ধিক্খণে কম্মৰেগক্খিত্ততায চেৰ অপুরেজাতৰত্থুকতায চ অপ্পতিট্ঠিতং, পপাতে পতিতমত্তকো পুরিসো ন কিঞ্চি সিপ্পং কাতুং ৰিয চিত্তজরূপং জনেতুং ন সক্কোতি, তমেৰ কটত্তারূপং নিস্সায পতিট্ঠাতি. পটিসন্ধিচিত্তানি হি রূপং ন জনেন্তি, কম্মজরূপমেৰ পন তেসং চিত্তসমুট্ঠানরূপট্ঠানে তিট্ঠতি, পৰত্তিযং পন পটিলদ্ধুপত্থম্ভতায তং রূপং ৰিনাপি কম্মপটিবদ্ধাৰ পৰত্তি, হেতুপচ্চযস্স পনেত্থ কুসলাদিভেদতো, ভূমিভেদতো চ ৰিভাগো হেট্ঠা ৰুত্তনযেনেৰ ৰেদিতব্বোতি অযং হেতুপচ্চযে নযো.

ততো পরেসু আরম্মণভাৰেন উপকারকো ধম্মো আরম্মণপচ্চযো, সো নিদ্দেসে ‘‘রূপাযতনং চক্খুৰিঞ্ঞাণধাতুযা…পে… ফোট্ঠব্বাযতনং কাযৰিঞ্ঞাণধাতুযা তংসম্পযুত্তকানঞ্চ ধম্মানং…পে… রূপাযতনং সদ্দগন্ধরসফোট্ঠব্বাযতনং মনোধাতুযা…পে… সব্বে ধম্মা মনোৰিঞ্ঞাণধাতুযা…পে… যং যং ধম্মং আরব্ভ যে যে ধম্মা উপ্পজ্জন্তি চিত্তচেতসিকা ধম্মা, তে তে ধম্মা তেসং তেসং ধম্মানং আরম্মণপচ্চযেন পচ্চযো’’তি এৰং নিদ্দিট্ঠত্তা ন কোচি ধম্মো ন হোতি. যথা হি দুব্বলপুরিসো দণ্ডং ৰা রজ্জুং ৰা আলম্বিত্ৰা উট্ঠহতি চেৰ তিট্ঠতি চ, এৰং চিত্তচেতসিকা ধম্মা রূপাদীসু ছসু যং কিঞ্চি আলম্বিত্ৰা উপ্পজ্জন্তি চেৰ তিট্ঠন্তি চ, তস্মা লোকিযলোকুত্তরাদিভেদা সব্বেপি ধম্মা যথাযোগং চিত্তচেতসিকানং আরম্মণপচ্চযোতি ৰেদিতব্বোতি অযং আরম্মণপচ্চযে নযো.

জেট্ঠকট্ঠেন উপকারকো ধম্মো অধিপতিপচ্চযো, সো নিদ্দেসে ‘‘ছন্দাধিপতি ছন্দসম্পযুত্তকানং ধম্মানং তংসমুট্ঠানানঞ্চ রূপানং…পে… ৰীরিযচিত্তৰীমংসাধিপতি…পে… অধিপতিপচ্চযেন পচ্চযো, যং যং ধম্মং গরুং কত্ৰা যে যে ধম্মা উপ্পজ্জন্তি চিত্তচেতসিকা ধম্মা, তে তে ধম্মা তেসং তেসং ধম্মানং অধিপতিপচ্চযেন পচ্চযো’’তি এৰং দ্ৰিধা নিদ্দিট্ঠো. তত্থ ছন্দাদযো সহজাতাধিপতিভাৰেন ৰুত্তা, গরুকাতব্বং আরম্মণাধিপতিভাৰেন. তত্থ চ লোকিযকুসলভূতো আরম্মণাধিপতি লোকিযকুসলানঞ্চেৰ লোভসহগতচিত্তানঞ্চ আরম্মণাধিপতি হোতি, নাঞ্ঞস্স, অকুসলভূতো পন লোভসহগতচিত্তুপ্পাদোতি ৰুচ্চতি ইতরেসু গরুকাতব্বতায অভাৰতো, সো দ্ৰিহেতুকাহেতুকাদিলোকিযৰিপাকরূপক্খন্ধভূতো চ লোভসহগতস্সেৰ, নাঞ্ঞস্স, তথা কিরিযভূতোপীতি অট্ঠকথাযং আগতং, তং ঞাণসম্পযুত্তকিরিযানং সব্বঞ্ঞুতঞ্ঞাণাভিঞ্ঞাদিপুব্বৰসপ্পৰত্তানং কামাৰচরকুসলেহি গরুকাতব্বভাৰস্সাৰিরোধভাৰস্স দস্সনতো ৰীমংসিতব্বং. লোকুত্তরকুসলানি পন কামাৰচরঞাণসম্পযুত্তজৰনানমেৰ আরম্মণাধিপতিপচ্চযা হোন্তি, নিব্বানং পন তেসঞ্ঞেৰ লোকুত্তরকুসলৰিপাকানঞ্চাতি ৰেদিতব্বন্তি অযং অধিপতিপচ্চযে নযো.

অনন্তরভাৰেন উপকারকো ধম্মো অনন্তরপচ্চযো, সোৰ সমনন্তরপচ্চযো, ব্যঞ্জনমত্তমেৰ নানং ‘‘উপচযসন্ততী’’তিআদীসু ৰিয. যম্পি ‘‘অত্থানন্তরতায অনন্তরপচ্চযো, কালানন্তরতায সমনন্তরপচ্চযো’’তি আচরিযানং মতং, তং ‘‘নিরোধা ৰুট্ঠহন্তস্স নেৰসঞ্ঞানাসঞ্ঞাযতনকুসলং ফলসমাপত্তিযা সমনন্তরপচ্চযেন পচ্চযো’’তিআদীহি ৰিরুজ্ঝতি, তংনিদ্দেসে ‘‘চক্খুৰিঞ্ঞাণধাতু তংসম্পযুত্তকা চ ধম্মা মনোধাতুযা…পে… কাযৰিঞ্ঞাণধাতু…পে… মনোধাতু…পে… মনোৰিঞ্ঞাণধাতুযা…পে… পুরিমা পুরিমা কুসলা ধম্মা পচ্ছিমানং পচ্ছিমানং কুসলানং ধম্মানং…পে… অব্যাকতানং ধম্মানং…পে… পুরিমা পুরিমা অকুসলা ধম্মা পচ্ছিমানং পচ্ছিমানং অকুসলানং…পে… অব্যাকতানং…পে… যেসং যেসং ধম্মানং অনন্তরা যে যে ধম্মা উপ্পজ্জন্তি চিত্তচেতসিকা ধম্মা, তে তে ধম্মা তেসং তেসং ধম্মানং অনন্তরপচ্চযেন পচ্চযো’’তি ইমিনা অনন্তরপচ্চযনিদ্দেসসমকো এৰ সমনন্তরপচ্চযো নিদ্দিট্ঠো অঞ্ঞত্র নামনানাত্তাতি অযং অনন্তরসমনন্তরপচ্চযদ্ৰযে নযো.

উপ্পজ্জমানোৰ সহ উপ্পজ্জমানভাৰেন উপকারকো ধম্মো সহজাতপচ্চযো, সো নিদ্দেসে ‘‘চত্তারো খন্ধা অরূপিনো অঞ্ঞমঞ্ঞং সহজাতপচ্চযেন পচ্চযো, চত্তারো মহাভূতা অঞ্ঞমঞ্ঞং…পে… ওক্কন্তিক্খণে নামরূপং অঞ্ঞমঞ্ঞং…পে… চিত্তচেতসিকা ধম্মা চিত্তসমুট্ঠানানং রূপানং…পে… মহাভূতা উপাদারূপানং…পে… রূপিনো ধম্মা অরূপীনং ধম্মানং কিঞ্চিকালে সহজাতপচ্চযেন পচ্চযো, কিঞ্চিকালে নসহজাতপচ্চযেন পচ্চযো’’তি এৰং ছব্বিধো নিদ্দিট্ঠো. তত্থ অঞ্ঞমঞ্ঞন্তি ইমিনা তেসং ধম্মানং একক্খণে পচ্চযভাৰঞ্চেৰ পচ্চযুপ্পন্নভাৰঞ্চ দীপেতি, পটিসন্ধিক্খণে ৰত্থুরূপং রূপং নাম. চিত্তচেতসিকাতি পৰত্তিযং চত্তারো খন্ধা, পটিসন্ধিযম্পীতি কেচি তত্থ কটত্তারূপানম্পি চিত্তসমুট্ঠানে পৰিট্ঠত্তা. তেসং হি পটিসন্ধিচিত্তচেতসিকা সহজাতপচ্চযা হোন্তিযেৰ, তানি পন ৰত্থুৰিরহিতানি রূপানি পৰত্তিযং চিত্তসমুট্ঠানানং ৰিয চিত্তচেতসিকানং পচ্চযত্থং ন ফরন্তি, তস্মা ‘‘অঞ্ঞমঞ্ঞ’’ন্তি ন ৰুত্তং, তথা ভূতানং উপাদারূপং. এৰং হি অগয্হমানে পটিসন্ধিযং কটত্তারূপানং সহজাতা নাম নিস্সযতা ন ৰুত্তাতি সহজাতপচ্চযনিদ্দেসো অপরিপুণ্ণো এৰ সিযা. কিঞ্চিকালেতি ইদম্পি ওক্কন্তিক্খণে হদযৰত্থুমেৰ সন্ধায ৰুত্তত্তা ততিযকোট্ঠাসমেৰ ভজতীতি অত্থতো অযং পচ্চযো পঞ্চৰিধোতি অযং সহজাতপচ্চযে নযো.

অঞ্ঞমঞ্ঞং উপ্পাদনুপত্থম্ভনভাৰেন উপকারকো ধম্মো অঞ্ঞমঞ্ঞপচ্চযো তিদণ্ডকং ৰিয. সো নিদ্দেসে ‘‘চত্তারো খন্ধা অরূপিনো অঞ্ঞমঞ্ঞপচ্চযেন পচ্চযো, চত্তারো মহাভূতা…পে… ওক্কন্তিক্খণে নামরূপং অঞ্ঞমঞ্ঞপচ্চযেন পচ্চযো’’তি এৰং তিধা নিদ্দিট্ঠোতি অযং অঞ্ঞমঞ্ঞপচ্চযে নযো.

অধিট্ঠানাকারেন, নিস্সযাকারেন চ উপকারকো ধম্মো নিস্সযপচ্চযো তরুচিত্তকম্মাদীনং পথৰীপটাদযো ৰিয, সো নিদ্দেসে সহজাতপচ্চযে ৰিয ছধাৰ নিদ্দিট্ঠো. ছট্ঠো পনেত্থ কোট্ঠাসো ‘‘চক্খাযতনং চক্খুৰিঞ্ঞাণধাতুযা, সোতঘানজিৰ্হাকাযাযতনং কাযৰিঞ্ঞাণধাতুযা…পে… যং রূপং নিস্সায মনোধাতু চ মনোৰিঞ্ঞাণধাতু চ ৰত্তন্তি, তং রূপং মনোধাতুযা চ মনোৰিঞ্ঞাণধাতুযা চ তংসম্পযুত্তকানঞ্চ ধম্মানং নিস্সযপচ্চযেন পচ্চযো’’তি এৰং পুরেজাতনিস্সযদস্সনৰসেন ৰিভত্তো, সেসং তাদিসমেৰ. তত্থ রূপন্তি হদযৰত্থু.

উপনিস্সযপচ্চযোতি এত্থ পনাযং ৰচনত্থো – তদধীনৰুত্তিতায অত্তনো ফলেন নিস্সিতো, নপ্পটিক্খিত্তোতি নিস্সযো, যথা পন ভুসো আযাসো উপাযাসো, এৰং ভুসো নিস্সযো উপনিস্সযো, বলৰকারণস্সেতং অধিৰচনং, তস্মা বলৰকারণভাৰেন উপকারকো ধম্মো উপনিস্সযপচ্চযোতি ৰেদিতব্বো. সো আরম্মণূপনিস্সযো অনন্তরূপনিস্সযো পকতূপনিস্সযোতি তিৰিধো হোতি. তত্থ আরম্মণূপনিস্সযো তাৰ আরম্মণাধিপতিনা সদ্ধিং নানত্তং অকত্ৰা ৰিভত্তো. তত্থ যং আরম্মণং গরুং কত্ৰা চিত্তচেতসিকা উপ্পজ্জন্তি, তং নিযমতো তেসং আরম্মণেসু বলৰারম্মণং হোতি, ইতি গরুকাতব্বমত্তট্ঠেন আরম্মণাধিপতি, বলৰকারণট্ঠেন আরম্মণূপনিস্সযোতি এৰমেতেসং নানত্তং ৰেদিতব্বং.

অনন্তরূপনিস্সযোপি অনন্তরপচ্চযেন নানত্তং অকত্ৰাৰ ৰিভত্তো, এৰং সন্তেপি অত্তনো অত্তনো অনন্তরং অনুরূপস্স চিত্তুপ্পাদস্স পৰত্তনসমত্থতায অনন্তরতা, পুরিমচিত্তস্স পচ্ছিমচিত্তুপ্পাদনে বলৰতায অনন্তরূপনিস্সযতা চ ৰেদিতব্বা. যথা হি হেতুপচ্চযাদীসু কঞ্চি ধম্মং ৰিনাপি চিত্তং উপ্পজ্জতি, ন এৰং অনন্তরচিত্তং ৰিনা চিত্তস্স উপ্পত্তি নাম অত্থি, তস্মা বলৰপচ্চযো হোতি, ইতি বলৰকারণট্ঠেন অনন্তরোৰ অনন্তরূপনিস্সযোতি এৰমেতেসং নানত্তং ৰেদিতব্বং.

পকতো উপনিস্সযো পকতূপনিস্সযো, পকতো নাম অত্তনো সন্তানে উপ্পাদিতো ৰা সদ্ধাসীলাদিউপসেৰিতো ৰা উতুভোজনাদিপকতিযাযেৰ ৰা উপনিস্সযো পকতূপনিস্সযো, ইতি পরূপনিস্সযেন অমিস্সোতি অত্থো. সো চ পকতূপনিস্সযো ‘‘সদ্ধং উপনিস্সায দানং দেতি, সীলং সমাদিযতি, উপোসথকম্মং করোতি, ঝানং উপ্পাদেতি; ৰিপস্সনং, মগ্গং, অভিঞ্ঞং, সমাপত্তিং উপ্পাদেতি; সীলং, সুতং, চাগং, পঞ্ঞং উপনিস্সায দানং দেতি…পে… সমাপত্তিং উপ্পাদেতী’’তিআদিনা ইমেসং সদ্ধাদীনং ৰসেন বহুধা ৰিভত্তো, এৰং উপনিস্সযপচ্চযো তিৰিধো. নিদ্দেসে পনাযং ‘‘পুরিমা পুরিমা কুসলা ধম্মা পচ্ছিমানং পচ্ছিমানং কুসলানং ধম্মানং …পে… অকুসলানং কেসঞ্চি…পে… অব্যাকতানং ধম্মানং…পে… পুরিমা পুরিমা অকুসলা ধম্মা পচ্ছিমানং পচ্ছিমানং অকুসলানং…পে… কুসলানং কেসঞ্চি…পে… অব্যাকতানং ধম্মানং…পে… পুরিমা পুরিমা অব্যাকতা ধম্মা…পে… অব্যাকতানং, কুসলানং, অকুসলানং উপনিস্সযপচ্চযেন পচ্চযো, পুগ্গলোপি উপনিস্সযপচ্চযেন পচ্চযো, সেনাসনম্পী’’তি এৰং নিদ্দিট্ঠো. তত্থ পুরিমাতি অনন্তরূপনিস্সযে সমনন্তরাতীতাৰ লব্ভন্তি.

আরম্মণূপনিস্সযপকতূপনিস্সযেসু পন নানাৰিধিৰসেন পুরিমতরাৰাতি তযোপি রাসী কুসলেন কুসলপদে লব্ভন্তি. কুসলেন পনাকুসলে সমনন্তরাতীতা ন লব্ভন্তি, তেনাহ ‘‘কেসঞ্চী’’তি. ইদং হি ‘‘কুসলো ধম্মো অকুসলস্স ধম্মস্স আরম্মণূপনিস্সযো পকতূপনিস্সযো, আরম্মণূপনিস্সযো পন দানং দত্ৰা…পে… তং গরুং কত্ৰা রাগো উপ্পজ্জতি…পে… পকতূপনিস্সযো সদ্ধং উপনিস্সায মানং জপ্পেতী’’তিআদিনা পঞ্হাৰারে আগতং ইমং নযং সন্ধায ৰুত্তং.

অকুসলেন কুসলপদে হি সমনন্তরাতীতা ন লব্ভন্তি, তেনাহ ‘‘কেসঞ্চী’’তি. ইদং পন ‘‘অকুসলো ধম্মো কুসলস্স ধম্মস্স পকতূপনিস্সযো. রাগং উপনিস্সায দানং দেতি…পে… পাণং হন্ত্ৰা তস্স পটিঘাতত্থায দানং দেতী’’তিআদিনা নযেন পঞ্হাৰারে আগতং পকতূপনিস্সযমেৰ সন্ধায ৰুত্তং. যথা হি অকুসলং কুসলস্স অনন্তরূপনিস্সযো ন হোতি, তথা আরম্মণূপনিস্সযোপি ন হোতি. ন হি তং গরুং কত্ৰা কুসলং পৰত্ততি.

অকুসলেন অব্যাকতপদে পন আরম্মণূপনিস্সযোৰ ন লব্ভতি. ন হি তং অব্যাকতা গরুং করোন্তি, অনন্তরা পনস্স হোন্তি. তেনেৰেত্থ ‘‘কেসঞ্চী’’তি ন ৰুত্তং. সেসপদেসু তযোপি উপনিস্সযা লব্ভন্তেৰ. ‘‘পুগ্গলোপি, সেনাসনম্পী’’তি ইদম্পি দ্ৰযং পকতূপনিস্সযৰসেনেৰেত্থ ৰুত্তং, উতুভোজনাদযো চেত্থ সঙ্গহেতব্বা. ইমস্মিঞ্চ পচ্চযে একচ্চায পঞ্ঞত্তিযা সদ্ধিং সব্বেপি চতুভূমকা ধম্মা সঙ্গহিতাতি ৰেদিতব্বাতি অযং উপনিস্সযপচ্চযে নযো.

পঠমতরং উপ্পজ্জিত্ৰা ৰত্তমানভাৰেন উপকারকা রূপধম্মা পুরেজাতপচ্চযো, সো পসাদতব্বিসযহদযৰত্থুৰসেন একাদসৰিধো. নিদ্দেসে চ ‘‘চক্খাযতনং চক্খুৰিঞ্ঞাণধাতুযা তংসম্পযুত্তকানঞ্চ ধম্মানং পুরেজাতপচ্চযেন পচ্চযো…পে… কাযাযতনং কাযৰিঞ্ঞাণধাতুযা …পে… রূপাযতনং চক্খুৰিঞ্ঞাণধাতুযা…পে… ফোট্ঠব্বাযতনং কাযৰিঞ্ঞাণধাতুযা…পে… রূপাযতনং সদ্দগন্ধরসফোট্ঠব্বাযতনং মনোধাতুযা…পে… যং রূপং নিস্সায…পে… তং রূপং মনোধাতুযা চ মনোৰিঞ্ঞাণধাতুযা চ কিঞ্চিকালে পুরেজাতপচ্চযেন পচ্চযো, কিঞ্চিকালে ন পুরেজাতপচ্চযেন পচ্চযো’’তি এৰং সব্বথাপি পঞ্চদ্ৰারে ৰত্থারম্মণৰসেন, মনোদ্ৰারে ৰত্থুৰসেনেৰ চাযং নিদ্দিট্ঠো. পঞ্হাৰারে পন আরম্মণপুরেজাতং ‘‘অরহা চক্খুং অনিচ্চতো দুক্খতো অনত্ততো ৰিপস্সতী’’তি আগতত্তা মনোদ্ৰারেপি অট্ঠারসন্নং রূপানং ৰসেন আরম্মণপুরেজাতম্পি লব্ভতেৰাতি অযং পুরেজাতপচ্চযে নযো.

পুরেজাতানং রূপধম্মানং উপত্থম্ভকট্ঠেন উপকারকো অরূপধম্মো পচ্ছাজাতপচ্চযো গিজ্ঝপোতকসরীরানং আহারাসা চেতনা ৰিয. নিদ্দেসেপি চস্স ‘‘পচ্ছাজাতা চিত্তচেতসিকা ধম্মা পুরেজাতস্স ইমস্স কাযস্স পচ্ছাজাতপচ্চযেন পচ্চযো’’তি এৰং ৰুত্তং. তত্থ ইমস্স কাযস্সাতি চতুসমুট্ঠানিকতিসমুট্ঠানিকভূতুপাদাযরূপকাযস্স. ধম্মতো চাযং ঠপেত্ৰা পটিসন্ধিৰিপাকে আরুপ্পৰিপাকে অৰসেসা সব্বে চতুভূমকা অরূপধম্মাতি ৰেদিতব্বাতি অযং পচ্ছাজাতপচ্চযে নযো.

আসেৰনট্ঠেন অনন্তরানং পগুণবলৰভাৰেন উপকারকো ধম্মো আসেৰনপচ্চযো গন্থাদিপুরিমাভিযোগো ৰিয. সো কুসলাকুসলকিরিযজৰনৰসেন তিৰিধো. নিদ্দেসে পনস্স ‘‘পুরিমা পুরিমা কুসলা ধম্মা পচ্ছিমানং পচ্ছিমানং কুসলানং ধম্মানং…পে… অকুসলানং ধম্মানং…পে… কিরিযাব্যাকতানং ধম্মানং আসেৰনপচ্চযেন পচ্চযো’’তি নিদ্দিট্ঠো. তত্থ পুরিমা পুরিমাতি সব্বত্থ সমনন্তরাতীতাৰ দট্ঠব্বা, তত্থাপি কুসলাদযো অব্যাকতাদীনং ভিন্নজাতিকানং সমনন্তরানম্পি ৰাসনাসঙ্খাতেন আসেৰনেন পগুণতরবলৰভাৰৰিসিট্ঠং অত্তনো কুসলাদিভাৰসঙ্খাতগতিং গাহাপেতুং অসমত্থতায আসেৰনপচ্চযা ন হোন্তি, ভূমিতো, পন আরম্মণতো চ ভিন্নাপি কামাৰচরতিহেতুককুসলকিরিযা অত্তনা সদিসৰেদনানমেৰ মহগ্গতলোকুত্তরকুসলকিরিযানম্পি, সঙ্খারারম্মণঞ্চ অনুলোমকুসলং নিব্বানারম্মণস্স গোত্রভুকুসলস্স আসেৰনপচ্চযা হোন্তিযেৰ. লোকুত্তরো পন আসেৰনপচ্চযো নত্থি, তথা ৰিপাকো কম্মপরিণামিতত্তাতি অযং আসেৰনপচ্চযে নযো.

চিত্তপ্পযোগসঙ্খাতেন কিরিযভাৰেন উপকারকো ধম্মো কম্মপচ্চযো. সো নানক্খণিকায কুসলাকুসলচেতনায চেৰ সহজাতায চ সব্বাযপি চেতনায ৰসেন দুৰিধো হোতি. নিদ্দেসেপি চস্স ‘‘কুসলাকুসলং কম্মং ৰিপাকানং খন্ধানং কটত্তা চ রূপানং…পে… চেতনা সম্পযুত্তকানং ধম্মানং তংসমুট্ঠানানঞ্চ রূপানং কম্মপচ্চযেন পচ্চযো’’তি দ্ৰিধাৰ ৰুত্তো. তত্থ কম্মন্তি চেতনাকম্মমেৰ. কটত্তা চ রূপানন্তি কম্মস্স কটত্তা উপচিতত্তা নিপ্ফাদিতত্তা উপ্পন্নানং কম্মজানং রূপানং কটত্তা এৰ, কম্মম্পি কালন্তরেযেৰ অৰসেসপচ্চযসমাযোগে সতি অত্তনো ফলং উপ্পাদেতি, ন তু ৰিনট্ঠত্তা ঠিতত্তা তং ৰা ঠিতং পন কম্মং ন জনেতি. এৰং তংসমুট্ঠানন্তি ইমিনা পটিসন্ধিযং কটত্তারূপগ্গহণং দট্ঠব্বন্তি অযং কম্মপচ্চযে নযো.

নিরুস্সাহসন্তভাৰেন নিরুস্সাহসন্তভাৰায উপকারকো ৰিপাকধম্মো ৰিপাকপচ্চযো. সো পৰত্তে চিত্তসমুট্ঠানানং, পটিসন্ধিক্খণে কটত্তারূপানং, সব্বত্থ চ সম্পযুত্তধম্মানং পচ্চযো হোতি. যথাহ সব্বপঞ্হাৰারে – ‘‘ৰিপাকাব্যাকতো একো খন্ধো তিণ্ণন্নং খন্ধানং চিত্তসমুট্ঠানানঞ্চ রূপানং পটিসন্ধিক্খণে…পে… কটত্তা চ রূপানং ৰিপাকপচ্চযেন পচ্চযো’’তিআদি. নিদ্দেসে পনস্স ‘‘ৰিপাকা চত্তারো খন্ধা অরূপিনো অঞ্ঞমঞ্ঞং ৰিপাকপচ্চযেন পচ্চযো’’তি এত্তকমেৰ ৰুত্তং. তং পঞ্হাৰারে ৰুত্তৰিধানং সন্ধায সাৰসেসং ৰুত্তন্তি অযং ৰিপাকপচ্চযে নযো.

রূপারূপানং উপত্থম্ভকট্ঠেন উপকারকা চত্তারো আহারা আহারপচ্চযো. নিদ্দেসে পন ‘‘কবল়ীকারো আহারো ইমস্স কাযস্স…পে… অরূপিনো আহারা সম্পযুত্তকানং ধম্মানং তংসমুট্ঠানানঞ্চ রূপানং আহারপচ্চযেন পচ্চযো’’তি এৰং নিদ্দিট্ঠো. তত্থ চতুসমুট্ঠানমুপগতা ওজা কবল়ীকারো আহারো নাম. সো যস্মা আহারূপসেৰীনঞ্ঞেৰ অজ্ঝোহটাহারউতুজাহারূপত্থদ্ধো এৰ চ কম্মজাদিআহারো ইমস্স কাযস্স ঠিতিযা পৰত্ততি, ন অঞ্ঞথা, তস্মা কবল়ীকাতব্বউতুজৰত্থুসন্নিস্সিততাদস্সনত্থং কবল়ীকারো আহারোতি ৰুত্তো. কিঞ্চাপি চাযং ‘‘ইমস্স কাযস্সা’’তি অৰিসেসেন ৰুত্তো, ৰিসেসতো পন আহারজরূপস্স জনকো চেৰ অনুপালকো চ হুত্ৰা সেসতিসন্ততিসমুট্ঠানরূপস্স অনুপালকো এৰ হুত্ৰা আহারপচ্চযো হোতি. তংসমুট্ঠানানন্তি ইমিনা পটিসন্ধিযং কম্মসমুট্ঠানানি গহিতানেৰ. পঞ্হাৰারে হি ‘‘পটিসন্ধিক্খণে ৰিপাকাব্যাকতা আহারা সম্পযুত্তকানং খন্ধানং কটত্তা চ রূপানং আহারপচ্চযেন পচ্চযো’’তি ৰুত্তন্তি অযং আহারপচ্চযে নযো.

অধিপতিযট্ঠেন উপকারকা ইত্থিন্দ্রিযপুরিসিন্দ্রিযৰজ্জা ৰীসতি ইন্দ্রিযা ইন্দ্রিযপচ্চযো. ইত্থিন্দ্রিযপুরিসিন্দ্রিযানি হি কিঞ্চাপি ইত্থিপুরিসলিঙ্গাকপ্পাদীনং বীজভূতানি, নেৰ পন তেসং, ন অঞ্ঞেসং ইন্দ্রিযাদিপচ্চযতং ফরন্তি. সুত্তন্তিকপরিযাযেন পন তেসং পকতূপনিস্সযভাৰং ফরন্তীতি বাৰীসতেৰ ইন্দ্রিযানি. তত্থ চক্খুন্দ্রিযাদযো পঞ্চ অরূপধম্মানমেৰ ইন্দ্রিযপচ্চযো, রূপজীৰিতিন্দ্রিযং কটত্তারূপানমেৰ, সেসা রূপারূপানং. নিদ্দেসে ‘‘চক্খুন্দ্রিযং চক্খুৰিঞ্ঞাণধাতুযা তংসম্পযুত্তকানঞ্চ ধম্মানং…পে… কাযৰিঞ্ঞাণধাতুযা…পে… রূপজীৰিতিন্দ্রিযং কটত্তারূপানং, অরূপিনো ইন্দ্রিযা সম্পযুত্তকানং ধম্মানং তংসমুট্ঠানানঞ্চ রূপানং ইন্দ্রিযপচ্চযেন পচ্চযো’’তি এৰং নিদ্দিট্ঠো. তংসমুট্ঠানানন্তি এত্থাপি কটত্তারূপম্পি সঙ্গহিতং. পঞ্হাৰারে হি ‘‘পটিসন্ধিক্খণে ৰিপাকাব্যাকতা ইন্দ্রিযা সম্পযুত্তকানং খন্ধানং কটত্তা চ রূপান’’ন্তি ৰুত্তন্তি অযং ইন্দ্রিযপচ্চযে নযো.

উপনিজ্ঝাযনট্ঠেন উপকারকানি ঠপেত্ৰা দ্ৰিপঞ্চৰিঞ্ঞাণেসু ৰেদনাত্তযং, একগ্গতঞ্চ সেসানি কুসলাদিভেদানি সত্ত ঝানঙ্গানি ঝানপচ্চযো. দ্ৰিপঞ্চৰিঞ্ঞাণানং হি অভিনিপাতমত্তত্তা তেসু ৰেদনেকগ্গতা উপনিজ্ঝাযনাকারস্স অভাৰেন ঝানঙ্গেসু ন উদ্ধটা, নিদ্দেসে পনস্স ‘‘ঝানঙ্গানি ঝানসম্পযুত্তকানং ধম্মানং তংসমুট্ঠানানঞ্চ রূপানং ঝানপচ্চযেন পচ্চযো’’তি নিদ্দিট্ঠো. ইধাপি তংসমুট্ঠানানন্তি ইমিনা চ কটত্তারূপম্পি গহিতং. পঞ্হাৰারেহি ‘‘পটিসন্ধিক্খণে ৰিপাকাব্যাকতানি ঝানঙ্গানি সম্পযুত্তকানং খন্ধানং কটত্তা চ রূপান’’ন্তি ৰুত্তন্তি অযং ঝানপচ্চযে নযো.

যতো ততো ৰা নিয্যানট্ঠেন উপকারকানি কুসলাদিভেদানি দ্ৰাদস মগ্গঙ্গানি মগ্গপচ্চযো. নিদ্দেসে পন ‘‘মগ্গঙ্গানি মগ্গসম্পযুত্তকানং ধম্মানং তংসমুট্ঠানানঞ্চ রূপানং মগ্গপচ্চযেন পচ্চযো’’তি নিদ্দিট্ঠো. এত্থাপি তংসমুট্ঠানানন্তি ইমিনা কটত্তারূপগ্গহণং. পঞ্হাৰারে হি ‘‘পটিসন্ধিক্খণে ৰিপাকাব্যাকতানি মগ্গঙ্গানি সম্পযুত্তকানং খন্ধানং কটত্তা চ রূপান’’ন্তি ৰুত্তং, অহেতুকচিত্তেসু চেত্থ ৰিজ্জমানানি মগ্গঙ্গানি মগ্গপচ্চযা ন হোন্তি. অযং মগ্গপচ্চযে নযো.

একৰত্থুকএকারম্মণএকুপ্পাদএকনিরোধসঙ্খাতেন সম্পযুত্তভাৰেন উপকারকা অরূপিনো ধম্মা সম্পযুত্তপচ্চযো. নিদ্দেসে পন ‘‘চত্তারো খন্ধা অরূপিনো ধম্মা অঞ্ঞমঞ্ঞং সম্পযুত্তপচ্চযেন পচ্চযো’’তি নিদ্দিট্ঠোতি অযং সম্পযুত্তপচ্চযে নযো.

একৰত্থুকাদিভাৰানুপগমেন উপকারকা রূপিনো ধম্মা অরূপীনং, অরূপিনো ধম্মা রূপীনং ৰিপ্পযুত্তপচ্চযো, সো সহজাতপুরেজাতপচ্ছাজাতৰসেন তিৰিধো হোতি. ৰুত্তং হেতং ‘‘সহজাতা কুসলা খন্ধা চিত্তসমুট্ঠানানং রূপানং…পে… পচ্ছাজাতা কুসলা খন্ধা পুরেজাতস্স ইমস্স কাযস্স ৰিপ্পযুত্তপচ্চযেন পচ্চযো’’তিআদি. পুরেজাতং পন ছৰত্থুৰসেনেৰ ৰেদিতব্বং. নিদ্দেসে পনস্স ‘‘রূপিনো ধম্মা অরূপীনং…পে… অরূপিনো ধম্মা রূপীনং ধম্মানং ৰিপ্পযুত্তপচ্চযেন পচ্চযো’’তি এৰং সামঞ্ঞতো নিদ্দিট্ঠো. তত্থ রূপিনোতি ইদং ছৰত্থূনং ৰসেন ৰুত্তং, রূপাদযো পন আরম্মণধম্মা সম্পযোগাসঙ্কাযাভাৰেন ৰিপ্পযুত্তপচ্চযা ন ৰুত্তা. চক্খাদীনং হি ৰত্থূনং অব্ভন্তরতো অরূপধম্মা নিক্খমন্তা ৰিয উপ্পজ্জন্তি, তত্থ সম্পযোগাসঙ্কা হোতি. পঞ্হাৰারেপি হি ‘‘ৰত্থু কুসলানং খন্ধানং…পে… চক্খাযতনং চক্খুৰিঞ্ঞাণধাতুযা’’তিআদিনা ছ ৰত্থূনেৰ উদ্ধটানি, অরূপিনো ধম্মা রূপীনন্তি এত্থাপি নিব্বানং অরূপম্পি সমানং রূপস্স ৰিপ্পযুত্তপচ্চযো ন হোতি সব্বথা সম্পযোগাসঙ্কাভাৰতো, ‘‘চতূহি সম্পযোগো চতূহি ৰিপ্পযোগো’’তি (ধাতু. ৩) হি ৰুত্তন্তি অযং ৰিপ্পযুত্তপচ্চযে নযো.

পচ্চুপ্পন্নলক্খণেন অত্থিভাৰেন তাদিসস্সেৰ ধম্মস্স উপত্থম্ভকট্ঠেন উপকারকো ধম্মো অত্থিপচ্চযো, সো নিদ্দেসে ‘‘চত্তারো খন্ধা অরূপিনো অঞ্ঞমঞ্ঞং…পে… চত্তারো মহাভূতা অঞ্ঞমঞ্ঞং, ওক্কন্তিক্খণে নামরূপং অঞ্ঞমঞ্ঞং, চিত্তচেতসিকা ধম্মা চিত্তসমুট্ঠানানং রূপানং, মহাভূতা উপাদারূপানং, চক্খাযতনং চক্খুৰিঞ্ঞাণধাতুযা…পে… রূপাযতনং চক্খুৰিঞ্ঞাণধাতুযা তংসম্পযুত্তকানঞ্চ ধম্মানং…পে… রূপাযতনং…পে… ফোট্ঠব্বাযতনং মনোধাতুযা…পে… মনোধাতুযা চ মনোৰিঞ্ঞাণধাতুযা চ তংসম্পযুত্তকানঞ্চ ধম্মানং অত্থিপচ্চযেন পচ্চযো’’তি এৰং সহজাতপুরেজাতৰসেন চ বহুধা নিদ্দিট্ঠো, পঞ্হাৰারে পন ‘‘সহজাতং পুরেজাতং পচ্ছাজাতং আহারং ইন্দ্রিয’’ন্তি ইমেসং পঞ্চন্নম্পি ৰসেন আগতত্তা পচ্ছাজাতকবল়ীকারআহাররূপজীৰিতিন্দ্রিযানং ৰসেনাপি অত্থিপচ্চযো গহেতব্বোৰাতি অযং অত্থিপচ্চযে নযো.

অত্তনো অনন্তরং উপ্পজ্জমানানং অরূপধম্মানং পৰত্তিওকাসদানৰসেন উপকারকা সমনন্তরনিরুদ্ধা অরূপধম্মা নত্থিপচ্চযো, নিদ্দেসে পন ‘‘সমনন্তরনিরুদ্ধা চিত্তচেতসিকা ধম্মা পটুপ্পন্নানং চিত্তচেতসিকানং ধম্মানং নত্থিপচ্চযেন পচ্চযো’’তি এৰং সামঞ্ঞতোৰ নিদ্দিট্ঠো. সব্বথা অনন্তরপচ্চযসদিসতায তত্থ নিদ্দিট্ঠনযেনেৰেত্থ ৰিসেসো ঞাতব্বোতি অযং নত্থিপচ্চযে নযো.

নত্থিপচ্চযধম্মাৰ ৰিগতভাৰেন উপকারকত্তা ৰিগতপচ্চযোতি সহ নিদ্দেসেন নত্থিপচ্চযসদিসোৰাতি.

অৰিগতপচ্চযোপি সব্বথা অত্থিপচ্চযসদিসোৰ, দেসনাৰিলাসেন, ৰেনেয্যৰসেন ৰা অযং দুকো ৰুত্তোতি অযং অৰিগতপচ্চযে নযো.

পকিণ্ণকৰিনিচ্ছযো

ইমেসু পন চতুৰীসতিযা পচ্চযেসু ঞাণচারস্স ৰিসদভাৰত্থং –

ধম্মতো কালতো চেৰ, একস্সানেকপচ্চযা;

অনেকেসঞ্চ ধম্মানং, একপচ্চযভাৰতো.

সভাগা ৰিসভাগা চ, যুগল়া জনকাদিতো;

সব্বট্ঠানাদিভেদা চ, রূপারূপৰিকপ্পতো;

ভৰতো সঙ্গহা ঞেয্যো, পকিণ্ণকৰিনিচ্ছযো.

তত্থ ধম্মতোতি ইমেসু হি পচ্চযেসু হেতুপচ্চযো তাৰ নামরূপধম্মেসু নামধম্মেকদেসো, তথা সহজাতাধিপতিকম্মঝানমগ্গপচ্চযা, তথা আসেৰনৰিপাকপচ্চযা, চতুক্খন্ধসঙ্গহিতাপি ৰিপাকধম্মা অনন্তরসমনন্তরপচ্ছাজাতসম্পযুত্তনত্থিৰিগতপচ্চযা. নিব্বানস্স অসঙ্গহতো নামেকদেসোতিপি ৰত্তুং ৰট্টতি. পুরেজাতপচ্চযো রূপধম্মোৰ, সেসা যথালাভৰসেন নামরূপধম্মা. তত্থ চ আরম্মণাধিপতিআরম্মণূপনিস্সযপকতূপনিস্সযেসু পঞ্ঞত্তিপি সঙ্গহিতাতি অযং ধম্মতো ৰিনিচ্ছযো.

কালতো পন হেতুসহজাতঅঞ্ঞমঞ্ঞনিস্সযপুরেজাতপচ্ছাজাতৰিপাকআহারইন্দ্রিযঝানমগ্গসম্পযুত্তৰিপ্পযুত্তঅত্থিঅৰিগতপচ্চযা পন্নরস পচ্চুপ্পন্নাৰ হুত্ৰা অত্তনো ফলস্স পচ্চযা হোন্তি, অনন্তরসমনন্তরআসেৰননত্থিৰিগতপচ্চযা পঞ্চ অতীতা এৰ হুত্ৰা, কম্মপচ্চযো পনেকো পচ্চুপ্পন্নোপি অতীতোপি হুত্ৰা, সেসা আরম্মণঅধিপতিউপনিস্সযপচ্চযা তযোপি তেকালিকাপি, নিব্বানপঞ্ঞত্তিৰসেন কালৰিমুত্তাপি হুত্ৰা অত্তনো ফলস্স পচ্চযা হোন্তীতি অযং কালতো ৰিনিচ্ছযো.

একস্সানেকপচ্চযাতি একধম্মস্স, একপচ্চযস্স চ অনেকপচ্চযভাৰতো. কথং? হেতুপচ্চযে তাৰ অমোহো একো ধম্মো, সো পুরেজাতকম্মআহারঝানৰজ্জানং ৰীসতিযা পচ্চযানং ৰসেন অনেকপচ্চযো হোতি, হেতুপচ্চযত্তং অৰিজহন্তোৰ অধিপতিসহজাতঅঞ্ঞমঞ্ঞনিস্সযৰিপাকিন্দ্রিযমগ্গসম্পযুত্তৰিপ্পযুত্তঅত্থিঅৰিগতানং অঞ্ঞেসং একাদসন্নং ৰসেন ৰা অনেকপচ্চযো হোতি, তথা অলোভাদযো, তেসু পন অলোভাদোসা ইন্দ্রিযমগ্গপচ্চযা ন হোন্তি, তে তযো অৰিপাকভূতা লোভদোসমোহা ৰিপাকপচ্চযাপি ন হোন্তি, তে পন অমোহৰজ্জিতা পঞ্চ অধিপতিপচ্চযা ন হোন্তি, তথা সেসাপি অৰিপাকভূতা.

আরম্মণপচ্চযে রূপাযতনং চক্খুৰিঞ্ঞাণধাতুযা আরম্মণপুরেজাতঅত্থিঅৰিগতানং চতুন্নং ৰসেন অনেকপচ্চযো হোতি, তথা মনোধাতুযা, অহেতুকমনোৰিঞ্ঞাণধাতুযা চ. সহেতুকায পন আরম্মণাধিপতিআরম্মণূপনিস্সযানম্পি ৰসেন, সদ্দাদীসুপি এসেৰ নযো. ধম্মাযতনং পন নিস্সযৰিপ্পযুত্তানং ৰসেনাপি অনেকপচ্চযো হোতি, তথা আরম্মণপচ্চযত্তং অৰিজহন্তোৰ আরম্মণাধিপতিনিস্সযউপনিস্সযপুরেজাতৰিপ্পযুত্তঅত্থিঅৰিগতানং ৰসেন অপরেসম্পি সত্তন্নং ৰসেন অনেকপচ্চযো হোতীতি অযমেত্থ উক্কট্ঠপরিচ্ছেদো. তত্থ অরূপানং পন রূপানং ৰা অতীতানাগতানং আরম্মণপচ্চযভাৰে সতি আরম্মণাধিপতিউপনিস্সযমত্তমেৰ উত্তরি লব্ভতি.

অধিপতিপচ্চযে আরম্মণাধিপতি ৰুত্তনযোৰ. সহজাতাধিপতীসু চিত্তং হেতুপুরেজাতকম্মঝানমগ্গৰজ্জানং একূনৰীসতিযা পচ্চযানং ৰসেন অনেকপচ্চযো হোতি, অধিপতিপচ্চযত্তং অৰিজহন্তো অপরেসং সহজাতঅঞ্ঞমঞ্ঞনিস্সযৰিপাকাহারিন্দ্রিযসম্পযুত্তৰিপ্পযুত্তঅত্থিঅৰিগতানং দসন্নং ৰসেনেৰ, তথা ৰীরিযং আহারপচ্চযৰজ্জানং মগ্গপচ্চযসহিতানং ৰসেন, ছন্দো আহারিন্দ্রিযৰজ্জানং ৰসেন অনেকপচ্চযো হোতি, ৰীমংসা হেতুপচ্চযে ৰুত্তনযাৰ.

অনন্তরপচ্চযে চতূসু খন্ধেসু ৰেদনাক্খন্ধো তাৰ হেতুপুরেজাতকম্মাহারমগ্গপচ্চযৰজ্জানং একূনৰীসতিযা ৰসেন, সঞ্ঞাক্খন্ধো তেসু ইন্দ্রিযঝানৰজ্জানং সত্তরসন্নং ৰসেন, সঙ্খারক্খন্ধো হেতুপুরেজাতকম্মিন্দ্রিযঝানমগ্গৰজ্জানং অট্ঠারসন্নং ৰসেন, তথা চেতনা কম্মসহিতানং, ৰিতক্কো হেতুপুরেজাতকম্মআহারিন্দ্রিযৰজ্জানং ঝানমগ্গসহিতানং, ৰিচারো, পীতি চ আনন্তরিযানং মগ্গৰজ্জানং, একগ্গতা হেতুপুরেজাতকম্মাহারৰজ্জানং ৰীসতিযা পচ্চযানং ৰসেন, সদ্ধা, জীৰিতিন্দ্রিযঞ্চ অনন্তরানং হেতুপুরেজাতকম্মাহারঝানমগ্গৰজ্জানং অট্ঠারসন্নং, সতি মগ্গসহিতানং একূনৰীসতিযা, হিরিওত্তপ্পকাযপস্সদ্ধাদিছযুগা, যেৰাপনকেসু অধিমোক্খমনসিকারতত্রমজ্ঝত্ততা, করুণামুদিতা চ হেতুপুরেজাতকম্মাহারঝানমগ্গিন্দ্রিযৰজ্জানং সত্তরসন্নং, ৰিরতিযো পন মগ্গসহিতানং অট্ঠারসন্নং, মিচ্ছাদিট্ঠি ততো ৰিপাকৰজ্জানং সত্তরসন্নং ৰসেন, মিচ্ছাৰাচাকম্মন্তাজীৰা তেহি চেৰ কম্মাহারপচ্চযেহি চাতি একূনৰীসতিযা পচ্চযানং ৰসেন, অহিরিকং অনোত্তপ্পং মানো থিনং মিদ্ধং উদ্ধচ্চন্তি ইমে হেতুপুরেজাতকম্মৰিপাকাহারিন্দ্রিযঝানমগ্গৰজ্জানং সোল়সন্নং, ৰিচিকিচ্ছা ইস্সামচ্ছরিযকুক্কুচ্চানি ততো অধিপতিৰজ্জানং পন্নরসন্নং ৰসেন অনেকপচ্চযা হোন্তি. অনন্তরপচ্চযত্তং অৰিজহন্তানং পনেতেসং সমনন্তরউপনিস্সযকম্মনত্থিৰিগতানং অপরেসং ছন্নং ৰসেন চ. ৰিঞ্ঞাণক্খন্ধস্স অধিপতিপচ্চযেনেৰ অনেকপচ্চযভাৰো ৰেদিতব্বো.

সহজাতপচ্চযে মহাভূতানি আরম্মণআরম্মণাধিপতিসহজাতঅঞ্ঞমঞ্ঞনিস্সযউপনিস্সযপুরেজাতঅত্থিঅৰিগতানং নৰন্নং, হদযৰত্থু তেসঞ্ঞেৰ ৰিপ্পযুত্তসহিতানং ৰসেন. নিস্সযপচ্চযে চক্খাযতনাদীনি আরম্মণআরম্মণাধিপতিনিস্সযউপনিস্সযপুরেজাতইন্দ্রিযৰিপ্পযুত্তঅত্থিঅৰিগতানং নৰন্নং ৰসেন. পুরেজাতপচ্চযে রূপসদ্দগন্ধরসাযতনাদীনি আরম্মণআরম্মণাধিপতিউপনিস্সযপুরেজাতঅত্থিঅৰিগতানং ছন্নং ৰসেন. আহারপচ্চযে ওজা আরম্মণআরম্মণাধিপতিউপনিস্সযাহারঅত্থিঅৰিগতানং ছন্নং পচ্চযানং ৰসেন অনেকধা পচ্চযো হোতি. তংতংপচ্চযত্তং অৰিজহন্তানং তেসং তেসং সব্বত্থ আরম্মণাধিপতিঅনন্তরসমনন্তরূপনিস্সযাদিপচ্চযতা ৰুত্তনযেন ৰেদিতব্বা. সেসং সুৰিঞ্ঞেয্যমেৰাতি অযং একস্সানেকপচ্চযতো ৰিনিচ্ছযো.

অনেকেসঞ্চ ধম্মানং, একপচ্চযভাৰতোতি এতেসু হি ঠপেত্ৰা কম্মপচ্চযং সেসেসু তেৰীসতিযা পচ্চযেসু অনেকে অনেকেসং ধম্মানং একতো একেকং পচ্চযা হোন্তি. কম্মপচ্চযো পন চেতনা একধম্মোৰাতি অযং অনেকধম্মানং একপচ্চযভাৰতো ৰিনিচ্ছযো.

সভাগা ৰিসভাগা চাতি এতেসু হি অনন্তরসমনন্তরঅনন্তরূপনিস্সযাসেৰননত্থিৰিগতপচ্চযা সভাগা, তথা আরম্মণআরম্মণাধিপতিআরম্মণূপনিস্সযা. পুরেজাতপচ্চযো পনেত্থ পচ্ছাজাতেন ৰিসভাগো, তথা সম্পযুত্তো ৰিপ্পযুত্তেন, অত্থি নত্থিনা, ৰিগতো অৰিগতেনাতি অযং সভাগৰিসভাগতো ৰিনিচ্ছযো.

যুগল়াতি এত্থ অত্থসরিক্খতায সদ্দসরিক্খতায কালপটিপক্খতায হেতুফলতায অঞ্ঞমঞ্ঞপটিপক্খতাযাতি ইমেহি কারণেহি যুগল়ং ৰেদিতব্বং. অনন্তরসমনন্তরা হি অত্থসরিক্খতায একং যুগল়ং নাম. নিস্সযূপনিস্সযা সদ্দসরিক্খতায, পুরেজাতপচ্ছাজাতা কালপটিপক্খতায, কম্মৰিপাকা হেতুফলতায, সম্পযুত্তৰিপ্পযুত্তা অঞ্ঞমঞ্ঞপটিপক্খতায একং যুগল়ং, তথা অত্থিনত্থিপচ্চযা, ৰিগতঅৰিগতপচ্চযাতি অযং যুগল়তো ৰিনিচ্ছযো.

জনকাদিতোতি জনকোপত্থম্ভকতো. এতেসু হি অনন্তরসমনন্তরূপনিস্সযপকতূপনিস্সযাসেৰনপচ্চযা, নানক্খণিকো কম্মপচ্চযো, নত্থিৰিগতপচ্চযা চাতি ইমে জনকা এৰ, ন উপত্থম্ভকা. পচ্ছাজাতপচ্চযো উপত্থম্ভকো এৰ, ন জনকো. সেসা জনকা চেৰ উপত্থম্ভকা চাতি অযং জনকাদিতো ৰিনিচ্ছযো.

সব্বট্ঠানাদিভেদাতি সব্বট্ঠানিকঅসব্বট্ঠানিকভেদতো. এতেসু হি সহজাতনিস্সযঅত্থিঅৰিগতপচ্চযা সব্বট্ঠানিকা. সব্বেসু পচ্চযুপ্পন্নেসু ইচ্ছিতব্বা. এতেহি ৰিনা উপ্পজ্জমানো একধম্মোপি নত্থি. সেসা অসব্বট্ঠানিকা. তত্থ চ আরম্মণআরম্মণাধিপতিঅনন্তরসমনন্তরানন্তরূপনিস্সযপকতূপনিস্সযপুরেজাতাসেৰনসম্পযুত্ত অত্থিনত্থিৰিগতপচ্চযা অরূপধম্মানঞ্ঞেৰ কারণতো অসব্বট্ঠানিকা. তথা পচ্ছাজাতপচ্চযো রূপানঞ্ঞেৰ কারণতো, সেসা একচ্চানং রূপারূপধম্মানং কারণতো অসব্বট্ঠানিকা. অযং সব্বট্ঠানাদিভেদতো ৰিনিচ্ছযো.

রূপারূপৰিকপ্পতোতি রূপং রূপস্স, রূপং অরূপস্সাতিআদি ৰিকপ্পতো. এতেসু হি একোপি পচ্চযো রূপমেৰ হুত্ৰা রূপস্সেৰ পচ্চযো ভৰন্তো নাম নত্থি, রূপমেৰ পন অরূপস্সেৰ অত্থি, সো পুরেজাতপচ্চযো একো এৰ. রূপমেৰ হুত্ৰা রূপারূপস্সেৰ পচ্চযো নামাতিপি নত্থি, অরূপমেৰ হুত্ৰা অরূপস্সেৰ পচ্চযোপি অত্থি, সো অনন্তরসমনন্তরআসেৰনসম্পযুত্তনত্থিৰিগতৰসেন ছব্বিধো. অরূপমেৰ পন রূপস্সেৰ পচ্চযোপি অত্থি, সো পচ্ছাজাতপচ্চযো একো এৰ. অরূপমেৰ হুত্ৰা রূপারূপানম্পি অত্থি, সো হেতুকম্মৰিপাকঝানমগ্গৰসেন পঞ্চৰিধো. রূপারূপপঞ্ঞত্তি হুত্ৰা অরূপস্সেৰ পচ্চযোপি অত্থি, সো আরম্মণউপনিস্সযৰসেন দুৰিধো. রূপারূপং পন রূপারূপস্সাপি অত্থি, সো অধিপতিসহজাতঅঞ্ঞমঞ্ঞনিস্সযাহারিন্দ্রিযৰিপ্পযুত্তঅত্থিঅৰিগতৰসেন নৰৰিধোতি অযং রূপারূপৰিকপ্পতো ৰিনিচ্ছযো.

ভৰতোতি ইমেসু হি পচ্চযেসু পঞ্চৰোকারভৰে তাৰ ন কোচি পচ্চযো ন লব্ভতি নাম, সব্বেপি লব্ভন্তি. চতুৰোকারভৰে পন পুরেজাতপচ্ছাজাতৰিপ্পযুত্তপচ্চযে অপনেত্ৰা সেসা একৰীসতিমেৰ. একৰোকারভৰে সহজাতঅঞ্ঞমঞ্ঞনিস্সযকম্মিন্দ্রিযঅত্থিঅৰিগতৰসেন সত্তেৰ. বাহিরে পন অনিন্দ্রিযবদ্ধরূপে তেসু কম্মিন্দ্রিযৰজ্জা পঞ্চেৰ লব্ভন্তীতি অযং ভৰতো ৰিনিচ্ছযো.

সঙ্গহাতি সব্বেপি হি ইমে চতুৰীসতি পচ্চযা আরম্মণসহজাতউপনিস্সযপুরেজাতপচ্ছাজাতকম্মাহারিন্দ্রিযেসু অট্ঠসু চ পচ্চযেসু সঙ্গহং গচ্ছন্তি. কথং? তেসু হি হেতুঅঞ্ঞমঞ্ঞৰিপাকঝানমগ্গসম্পযুত্তপচ্চযা ছ সহজাতপচ্চযে সঙ্গহং গচ্ছন্তি. অনন্তরসমনন্তরাসেৰননত্থিৰিগতপচ্চযা পঞ্চ অনন্তরূপনিস্সযে উপনিস্সযপচ্চযে. নিস্সযপচ্চযো সহজাতপুরেজাতভেদতো দুৰিধো. তত্থ সহজাতো সহজাতপচ্চযে, পুরেজাতো পুরেজাতপচ্চযে. অধিপতিপচ্চযোপি আরম্মণভূতো আরম্মণূপনিস্সযে, সহজাতভূতো সহজাতপচ্চযে. ৰিপ্পযুত্তপচ্চযোপি সহজাতপুরেজাতপচ্ছাজাতভূততায তত্থ তত্থ সঙ্গহং গচ্ছতি. অত্থিঅৰিগতপচ্চযাপি সহজাতপুরেজাতপচ্ছাজাতাহারিন্দ্রিযভূততায তত্থ তত্থ পচ্চযেসু সঙ্গহং গচ্ছন্তি. এৰং ইমেসু পচ্চযেসু সব্বপচ্চযানং সঙ্গহো ৰেদিতব্বো. তেনেৰ তিকপট্ঠানপাল়িযং পচ্চনীযনযে ইমেসং অট্ঠন্নং পচ্চযানং ৰসেনেৰ কতিপযপঞ্হা ৰিস্সজ্জিতা. ইমেসং পন অট্ঠন্নম্পি অঞ্ঞমঞ্ঞসঙ্গহোপি অত্থিযেৰ. তেসু হি আরম্মণপচ্চযো অধিপতিভূতো উপনিস্সযে, অনধিপতিভূতো ন কত্থচীতি আরম্মণপচ্চযো হুত্ৰা ৰিসুঞ্ঞেৰ তিট্ঠতি. কম্মপচ্চযোপি সহজাতো সহজাতে. নানক্খণিকো পন বলৰা ৰিপাকধম্মানং উপনিস্সযো হোতীতি উপনিস্সযপচ্চযে সঙ্গহং গচ্ছতি. বলৰাপি পন কম্মজরূপানং, দুব্বলো অরূপানং নানক্খণিককম্মপচ্চযো হুত্ৰা ৰিসুঞ্ঞেৰ তিট্ঠতি. আহারপচ্চযোপি অরূপভূতো সহজাতে, রূপভূতো ন কত্থচীতি ৰিসুঞ্ঞেৰ তিট্ঠতি, ইন্দ্রিযপচ্চযোপি অরূপভূতো সহজাতে, পসাদিন্দ্রিযা পুরেজাতে, রূপজীৰিতিন্দ্রিযং ন কত্থচি সঙ্গহং গচ্ছতীতি ইন্দ্রিযপচ্চযো হুত্ৰা ৰিসুঞ্ঞেৰ তিট্ঠতীতি এৰমেৰং অঞ্ঞমঞ্ঞসঙ্গহোপি অত্থেৰ. সব্বেপি পনেতে চতুৰীসতি পচ্চযা আরম্মণউপনিস্সযকম্মঅত্থিপচ্চযেসু চতূসুপি সঙ্গহং গচ্ছন্তীতি অযং সঙ্গহতো ৰিনিচ্ছযো. অযং অনুত্তানপদত্থসহিতো সঙ্খেপত্থৰিনিচ্ছযো.

পকিণ্ণকৰিনিচ্ছযো নিট্ঠিতো.

ৰিভঙ্গনযে পনেত্থ পাল়িৰৰত্থানং তাৰ সঙ্খেপতো এৰং ৰেদিতব্বং. পট্ঠানপাল়িযং হি ‘‘হেতুপচ্চযো…পে… অৰিগতপচ্চযো’’তি পচ্চযপদানি মাতিকাৰসেন নিক্খিপিত্ৰা তেসং পচ্চযানং – ‘‘হেতূ হেতুসম্পযুত্তকানং ধম্মানং তংসমুট্ঠানানঞ্চ রূপানং হেতুপচ্চযেন পচ্চযো’’তিআদিনা নযেন পচ্চযভাজনীযসঙ্খাতো নিদ্দেসৰারো পঠমং ৰুত্তো. সোপি চ অনন্তরসঙ্খেপত্থৰিনিচ্ছযো তত্থ তত্থ দস্সিতো এৰ. তদনন্তরং তেসং চতুৰীসতিযা পচ্চযানং কুসলত্তিকাদযো দ্ৰাৰীসতিতিকে, হেতুদুকাদযো সতং দুকে চ নিস্সায নানানযতো ৰিভজনৰসেন চতুৰীসতিসমন্তপট্ঠানসমোধানং অনন্তনযসমন্তপট্ঠানং ৰিভত্তং. কথং? চতুব্বিধং হি পট্ঠানং – অনুলোমপট্ঠানং, পচ্চনীকপট্ঠানং, অনুলোমপচ্চনীকপট্ঠানং, পচ্চনীকানুলোমপট্ঠানন্তি. তত্থ ‘‘কুসলং ধম্মং পটিচ্চ কুসলো ধম্মো উপ্পজ্জতি হেতুপচ্চযা’’তিআদিনা, ‘‘হেতুং ধম্মং পটিচ্চ হেতুধম্মো উপ্পজ্জতি হেতুপচ্চযা’’তিআদিনা কুসলাদীনং, হেতুআদীনঞ্চ ধম্মানং অনুলোমৰসেন পৰত্তং অনুলোমপট্ঠানং নাম. ‘‘নকুসলং ধম্মং পটিচ্চ নকুসলো ধম্মো উপ্পজ্জতি হেতুপচ্চযা…পে… নহেতুং ধম্মং পটিচ্চ নহেতুধম্মো উপ্পজ্জতি হেতুপচ্চযা’’তিআদিনা কুসলাদীনং, হেতুআদীনঞ্চ ধম্মানং পচ্চনীকৰসেন পৰত্তং পচ্চনীকপট্ঠানং নাম. ‘‘কুসলং ধম্মং পটিচ্চ নকুসলো ধম্মো উপ্পজ্জতি হেতুপচ্চযা…পে… হেতুং ধম্মং পটিচ্চ নহেতুধম্মো উপ্পজ্জতি হেতুপচ্চযা’’তিআদিনা পৰত্তং অনুলোমপচ্চনীকপট্ঠানং নাম. ‘‘নকুসলং ধম্মং পটিচ্চ কুসলো ধম্মো…পে… নহেতুং ধম্মং পটিচ্চ হেতুধম্মো উপ্পজ্জতি হেতুপচ্চযা’’তিআদিনা পৰত্তং পচ্চনীকানুলোমপট্ঠানং নাম.

এৰমেতেসু চতূসু পট্ঠানেসু যং ধম্মং অনুলোমপট্ঠানং নাম, তং তাৰ ছব্বিধং হোতি – তিকপট্ঠানং দুকপট্ঠানং দুকতিকপট্ঠানং তিকদুকপট্ঠানং তিকতিকপট্ঠানং দুকদুকপট্ঠানন্তি. যথা চেতং, এৰং পচ্চনীকপট্ঠানাদীনিপি তীণি তীণি পচ্চেকন্তি চতুৰীসতিসমন্তপট্ঠানসমোধানং পট্ঠানপ্পকরণং ৰেদিতব্বং. সম্মাসম্বুদ্ধেন হি অনুলোমপট্ঠানে দ্ৰাৰীসতিতিকে নিস্সায তিকপট্ঠানং নাম নিদ্দিট্ঠং. সতং দুকে নিস্সায দুকপট্ঠানং নাম. ততো তিকে দুকেসু পক্খিপিত্ৰা দুকতিকপট্ঠানং নাম. ততো দুকে তিকেসু পক্খিপিত্ৰা তিকদুকপট্ঠানং নাম. তিকে পন তিকেসুযেৰ পক্খিপিত্ৰা তিকতিকপট্ঠানং নাম. দুকে চ দুকেসু এৰ পক্খিপিত্ৰা দুকদুকপট্ঠানং নাম নিদ্দিট্ঠং. পঠমং তাৰেত্থ অনুলোমপট্ঠানে তিকপট্ঠাননযো নিদ্দিট্ঠো. এৰং পচ্চনীকপট্ঠানে, অনুলোমপচ্চনীকপট্ঠানে, পচ্চনীকানুলোমপট্ঠানেতি চতুৰীসতিসমন্তপট্ঠানং দেসিতং.

এত্থ চ দুৰিধং অনুলোমং, পচ্চনীকঞ্চ ধম্মানুলোমং ধম্মপচ্চনীকং, পচ্চযানুলোমং পচ্চযপচ্চনীকন্তি. তত্থ ‘‘কুসলং ধম্মং পটিচ্চ কুসলো ধম্মো’’তিআদিনা কুসলাদীনং তিকধম্মানং, হেতুআদীনং দুকধম্মানঞ্চ অনুলোমদেসনাৰসেন ধম্মানুলোমং ৰেদিতব্বং. ‘‘নকুসলং ধম্মং পটিচ্চ নকুসলো ধম্মো’’তিআদিনা তিকদুকধম্মানং পচ্চনীকৰসেন ধম্মপচ্চনীকং ৰেদিতব্বং. ‘‘হেতুপচ্চযা আরম্মণপচ্চযা’’তি এৰং চতুৰীসতিযা পচ্চযানং অনুলোমদেসনাৰসেন পচ্চযানুলোমং ৰেদিতব্বং. ‘‘নহেতুপচ্চযা নারম্মণপচ্চযা’’তি এৰং পচ্চযানং পচ্চনীকৰসেন পচ্চযপচ্চনীকঞ্চ ৰেদিতব্বং. তত্র যদিদং ধম্মানুলোমং ধম্মপচ্চনীকঞ্চ, তস্স ৰসেন চতুৰীসতিসমন্তপট্ঠানং ৰেদিতব্বং. পচ্চযানুলোমং পচ্চযপচ্চনীকঞ্চ অনুলোমতিকপট্ঠানাদীসু চতুৰীসতিযা পট্ঠানেসু একেকতিকদুকেসু এৰং লব্ভতি. তঞ্চ উপরি পাল়িনযদস্সনে এৰ পাকটং ভৰিস্সতি. তত্রিমানি চতুৰীসতি পট্ঠানানি ইমেসং তিকদুকানং ৰসেন নিদ্দিট্ঠত্তা তিকপট্ঠানং…পে… দুকদুকপট্ঠানন্তি ৰুচ্চতি.

তেসু তিকদুকেসু একেকং তিকদুকং ইমেসং হেতুপচ্চযাদীনং চতুৰীসতিযা পচ্চযানং অনুলোমাদিনযচতুক্কৰসেন সত্তহি সত্তহি মহাৰারেহি ৰিত্থারতো ৰিভত্তং. কতমেহি সত্তহি? পটিচ্চৰারো সহজাতৰারো পচ্চযৰারো নিস্সযৰারো সংসট্ঠৰারো সম্পযুত্তৰারো পঞ্হাৰারোতি ইমেহি. তত্থ ‘‘কুসলং ধম্মং পটিচ্চ কুসলো ধম্মো’’তিআদিনা পটিচ্চাভিধানেন ৰুত্তো পটিচ্চৰারো নাম. ‘‘কুসলং ধম্মং সহজাতো, কুসলং ধম্মং পচ্চযা, কুসলং ধম্মং নিস্সায, কুসলং ধম্মং সংসট্ঠো, কুসলং ধম্মং সম্পযুত্তো’’তি এৰং সহজাতাদিঅভিধানেহি ৰুত্তা পঞ্চ ৰারা সহজাতাদিৰারানি. পরতো চ সংসট্ঠসম্পযুত্তৰারেসু দ্ৰীসু অরূপধম্মৰসেনেৰ পচ্চযপচ্চযুপ্পন্না চ, সেসেসু চতূসু ৰারেসু, সত্তমেৰ পঞ্হাৰারে চ রূপারূপৰসেন, পচ্চযৰারে, নিস্সযৰারে চ সহজাতপচ্ছাজাতপুরেজাতৰসেন, সেসেসু সহজাতৰসেন পচ্চযপচ্চযুপ্পন্না চ কথিতাতি অযং ৰিসেসো. সত্তমৰারে পন যস্মা ‘‘কুসলো ধম্মো কুসলস্স ধম্মস্স হেতুপচ্চযেন পচ্চযো’’তিআদিনা নযেন তে তে পঞ্হে উদ্ধরিত্ৰা পুন ‘‘কুসলা হেতূ সম্পযুত্তকানং খন্ধান’’ন্তিআদিনা নযেন সব্বেপি তে পঞ্হা নিজ্জটা, নিগ্গুম্বা চ কত্ৰা ৰিভত্তা, তস্মা সো ৰারো পঞ্হানং সাধুকং ৰিভত্তত্তা পঞ্হাৰারোত্ৰেৰ সঙ্খং গতো. ইতি ইমেহি সত্তহি মহাৰারেহি চতুৰীসতিযা সমন্তপট্ঠানেসু সব্বেপি তিকদুকা চতুৰীসতিযা পচ্চযানং অনুলোমাদিৰসেন ৰিত্থারতো ৰিভত্তা. কথং? অনুলোমপট্ঠানে হি যদিদং দ্ৰাৰীসতিতিকে নিস্সায তিকপট্ঠানং নাম সব্বপঠমং নিদ্দিট্ঠং. তত্থ কুসলত্তিকং তাৰ ইমেহি পটিচ্চৰারাদীহি মহাৰারেহি পচ্চযানুলোমাদিনযচতুক্কতো ৰিভত্তং. তত্থ যো তাৰেস সব্বপঠমো পটিচ্চৰারো নাম, সো উদ্দেসনিদ্দেসতো দুৰিধো হোতি.

তত্থ উদ্দেসৰারো কুসলাদযো পটিচ্চ হেতুপচ্চযাদিৰসেন কুসলাদীনং যুত্তানং, অকুসলাদীনং অযুত্তকানঞ্চ ধম্মানং উপ্পত্তিপুচ্ছনৰসেনেৰ পৰত্তত্তা ‘‘পুচ্ছাৰারো’’তিপি, পুচ্ছানঞ্ঞেৰ পঞ্ঞাপনতো ‘‘পণ্ণত্তিৰারো’’তিপি ৰুচ্চতি. ন হি তত্থ ৰিস্সজ্জনং অত্থি. নিদ্দেসৰারো পন পুচ্ছাৰারে পরিপুচ্ছিতেসু পঞ্হেসু ‘‘সিযা অকুসলং ধম্মং পটিচ্চ অকুসলো ধম্মো উপ্পজ্জেয্যা’’তিআদিকং অযুত্তং পঞ্হং অনুদ্ধরিত্ৰা লব্ভমানানঞ্ঞেৰ পঞ্হানং ৰসেন পৰত্তো. ইতরেসু পন সহজাতাদীসু, সেসেসু চ তিকেসু, সেসপট্ঠানেসু চ সব্বত্থ পুচ্ছাৰারো নত্থি, লব্ভমানৰসেন সব্বৰিস্সজ্জনমেৰ দস্সিতন্তি ইদমেত্থ সঙ্খেপতো পাল়িৰৰত্থানং.

ইদানি পনেত্থ আদিতো পট্ঠায এৰং ৰিভঙ্গনযো ৰেদিতব্বো. অনুলোমপট্ঠানস্মিঞ্হি তিকপট্ঠানে কুসলত্তিকস্স সত্তসু মহাৰারেসু পঠমস্স পটিচ্চৰারস্স পুচ্ছাৰারে তাৰ – ‘‘সিযা কুসলং ধম্মং পটিচ্চ কুসলো ধম্মো উপ্পজ্জেয্য হেতুপচ্চযা…পে… অকুসলো ধম্মো…পে… অব্যাকতো…পে… কুসলো চ অব্যাকতো চ…পে… অকুসলো চ অব্যাকতো চ…পে… কুসলো চ অকুসলো চ…পে… কুসলো চ অকুসলো চ অব্যাকতো চ ধম্মা উপ্পজ্জেয্যুং হেতুপচ্চযা’’তি কুসলপদমূলা সত্ত পুচ্ছা উদ্ধটা.

এৰং অকুসলপদমূলা, অব্যাকতপদমূলা চ. ‘‘সিযা কুসলঞ্চ অব্যাকতঞ্চ ধম্মং পটিচ্চ অকুসলো…পে… সিযা অকুসলঞ্চ অব্যাকতঞ্চ…পে… সিযা কুসলঞ্চ অকুসলঞ্চ…পে… সিযা কুসলঞ্চ অকুসলঞ্চ অব্যাকতঞ্চ ধম্মং পটিচ্চা’’তি দ্ৰিমূলকা, তিমূলকা চ সত্ত সত্ত পুচ্ছাতি একূনপঞ্ঞাস পুচ্ছা হেতুপচ্চযমূলকা উদ্ধটা.

ইমিনাৰ নযেন ‘‘সিযা কুসলং ধম্মং পটিচ্চ কুসলো ধম্মো উপ্পজ্জেয্য আরম্মণপচ্চযা…পে… অৰিগতপচ্চযা’’তি এৰং সেসপচ্চযমূলকাপি পুচ্ছাৰেদিতব্বা. একমূলকনযো.

যথা চ একমূলকে, এৰং ‘‘সিযা কুসলং ধম্মং পটিচ্চ কুসলো ধম্মো উপ্পজ্জেয্য হেতুপচ্চযা আরম্মণপচ্চযা…পে… হেতুপচ্চযা অৰিগতপচ্চযা’’তিআদিনা দ্ৰিমূলকেপি. ‘‘হেতুপচ্চযা আরম্মণপচ্চযা অধিপতিপচ্চযা…পে… হেতুপচ্চযা আরম্মণপচ্চযা অনন্তরপচ্চযা…পে… হেতুপচ্চযা আরম্মণপচ্চযা অৰিগতপচ্চযা’’তিআদিনা তিমূলকাদীসু সব্বমূলকপরিযোসানেসু ৰারেসু নযা ৰেদিতব্বা. হেতুপচ্চযমূলকনযো.

যথা চ হেতুমূলকে, এৰং ‘‘সিযা কুসলং ধম্মং পটিচ্চ কুসলো ধম্মো উপ্পজ্জেয্য আরম্মণপচ্চযা’’তিআদিনা সেসপচ্চযমূলকেসুপি নযো ঞাতব্বো. পচ্চযানুলোমৰারো. এতেনেৰ উপাযেন ‘‘সিযা কুসলং ধম্মং পটিচ্চ কুসলো ধম্মো উপ্পজ্জেয্য নহেতুপচ্চযা’’তিআদিনা সব্বপ্পকারযুত্তো পচ্চযপচ্চনীকৰারোপি. ‘‘সিযা কুসলং ধম্মং…পে… উপ্পজ্জতি হেতুপচ্চযা নারম্মণপচ্চযা’’তিআদিনা অনুলোমপচ্চনীকপচ্চযৰারোপি. ‘‘সিযা কুসলং ধম্মং…পে… উপ্পজ্জেয্য নহেতুপচ্চযা আরম্মণপচ্চযা’’তিআদিনা পচ্চনীযানুলোমৰারোপি সব্বত্থ নেতব্বোতি অযং তাৰেত্থ পুচ্ছাৰারে নযো.

নিদ্দেসৰারো পন উদ্দেসৰারে দস্সিতাসু পুচ্ছাসু কুসলাকুসলাদীনং সহুপ্পত্তিযা অভাৰতো যা এতা ‘‘কুসলং ধম্মং পটিচ্চ কুসলো ধম্মো উপ্পজ্জতী’’তিআদিকা পুচ্ছা সব্বসো ৰিস্সজ্জনং লভন্তি, তা পহায যা ৰিস্সজ্জনং লভন্তি, তাসমেৰ ৰিস্সজ্জনৰসেন পৰত্তো. তত্রাযং নযো – ‘‘কুসলং ধম্মং পটিচ্চ কুসলো ধম্মো উপ্পজ্জতি হেতুপচ্চযা. কুসলং একং খন্ধং পটিচ্চ তযো খন্ধা. তযো খন্ধে পটিচ্চ একো খন্ধো. দ্ৰে খন্ধে পটিচ্চ দ্ৰে খন্ধা. কুসলং ধম্মং পটিচ্চ অব্যাকতো ধম্মো উপ্পজ্জতি হেতুপচ্চযা. কুসলে খন্ধে পটিচ্চ চিত্তসমুট্ঠানং রূপং. কুসলং ধম্মং পটিচ্চ কুসলো চ অব্যাকতো চ ধম্মা উপ্পজ্জন্তি হেতুপচ্চযা. কুসলং একং খন্ধং পটিচ্চ তযো খন্ধা চিত্তসমুট্ঠানঞ্চ রূপং. তযো খন্ধে পটিচ্চ একো খন্ধো চিত্তসমুট্ঠানঞ্চ রূপং. দ্ৰে খন্ধে পটিচ্চ দ্ৰে খন্ধা চিত্তসমুট্ঠানঞ্চ রূপ’’ন্তি এৰং কুসলপদমূলাসু সত্তসু পুচ্ছাসু তিস্সোৰ লব্ভমানা ৰিস্সজ্জিতা. তথা অকুসলপদমূলাসুপি তিস্সোৰ. অব্যাকতপদমূলাসু পন ‘‘অব্যাকতং ধম্মং পটিচ্চ অব্যাকতো ধম্মো উপ্পজ্জতি হেতুপচ্চযা. ৰিপাকাব্যাকতং কিরিযাব্যাকতং একং খন্ধং পটিচ্চ তযো খন্ধা চিত্তসমুট্ঠানঞ্চ রূপং…পে… দ্ৰে খন্ধে পটিচ্চ দ্ৰে খন্ধা চিত্তসমুট্ঠানঞ্চ রূপং. পটিসন্ধিক্খণে ৰিপাকাব্যাকতং একং খন্ধং পটিচ্চ তযো খন্ধা কটত্তা চ রূপং…পে… দ্ৰে খন্ধা কটত্তা চ রূপং. খন্ধে পটিচ্চ ৰত্থু, ৰত্থুং পটিচ্চ খন্ধা. একং মহাভূতং পটিচ্চ তযো মহাভূতা…পে… দ্ৰে মহাভূতে পটিচ্চ দ্ৰে মহাভূতা. মহাভূতে পটিচ্চ চিত্তসমুট্ঠানং রূপং কটত্তারূপং উপাদারূপ’’ন্তি একাৰ. দ্ৰিমূলিকাদীসু চ ‘‘কুসলঞ্চ অব্যাকতঞ্চ ধম্মং পটিচ্চ অব্যাকতো ধম্মো উপ্পজ্জতি হেতুপচ্চযা. কুসলে খন্ধে চ মহাভূতে চ পটিচ্চ চিত্তসমুট্ঠানং রূপ’’ন্তি একা. তথা ‘‘অকুসলঞ্চ অব্যাকতঞ্চ পটিচ্চা’’তি, এৰং হেতুপচ্চযমূলিকাসু একূনপঞ্ঞাসায পুচ্ছাসু নৰেৰ লব্ভমানা ৰিস্সজ্জিতা. সেসা চত্তালীস মোঘপুচ্ছাতি ন ৰিস্সজ্জিতা. এৰং উপরি আরম্মণপচ্চযাদীসু ৰিস্সজ্জিতাৰসেসা মোঘপুচ্ছাতি গহেতব্বা. ৰিজাননসুখত্থং পন ভগৰতা পুচ্ছাৰারে লব্ভমানা, অলব্ভমানা চ সব্বাপি তা দস্সিতাতি ৰেদিতব্বাতি.

তত্থ কুসলং ধম্মং পটিচ্চাতি সহজাতেসু ৰেদনাক্খন্ধাদিভেদং একং কুসলং ধম্মং পটিচ্চ পটিগন্ত্ৰা, সহুপ্পত্তিসঙ্খাতেন সদিসভাৰেন পত্ৰাতি অত্থো. সদিসত্থো হি এত্থ পটিসদ্দো ‘‘পটিপুগ্গলো’’তিআদীসু ৰিয. কুসলো ধম্মোতি সঞ্ঞাক্খন্ধাদিভেদো সহুপ্পন্নো কুসলো ধম্মো. উপ্পজ্জতীতি পাকটভাৰতো উদ্ধং উপ্পাদাদিং পাপুণাতি, অত্তানং ৰা পটিলভতি. হেতুপচ্চযাতি ন কেৰলং কুসলধম্মমত্তমেৰ পটিচ্চ উপ্পজ্জতি, অথ খো কুসলহেতুনা হেতুপচ্চযতং সাধেন্তেন চ উপ্পজ্জতীতি এৰমত্থো গহেতব্বো.

এৰমিদং ‘‘উপ্পজ্জেয্যা’’তি পুচ্ছায ‘‘উপ্পজ্জতী’’তি অৰিসেসেন ৰিস্সজ্জনং ৰত্ৰা ইদানি যং ধম্মং পটিচ্চ যে ধম্মা উপ্পজ্জন্তি, তে পচ্চযপচ্চযুপ্পন্নে খন্ধৰসেন ৰিসেসেত্ৰা দস্সেতুং ‘‘কুসলং একং খন্ধ’’ন্তিআদি ৰুত্তং. যস্মা পনেত্থ একো খন্ধো একস্সেৰ, দ্ৰিন্নংযেৰ ৰা, দ্ৰে ৰা পন একস্সেৰ পচ্চযা নাম ন হোন্তি, তস্মা তে পকারেন অনামসিত্ৰা ‘‘একং খন্ধং পটিচ্চ তযো খন্ধা’’তিআদিনা পচ্চযভাৰেন গহিতাৰসেসং সব্বং পচ্চযুপ্পন্নং কত্ৰা দস্সিতন্তি ৰেদিতব্বং. এৰং উপরিপি সব্বত্থ. চিত্তসমুট্ঠানং রূপন্তি ইদং পটিচ্চত্থস্স সহজাতত্থত্তা যং কুসলেন সহজাতঞ্চেৰ হেতুপচ্চযঞ্চ লভতি, তং দস্সেতুং ৰুত্তং ‘‘ৰিপাকাব্যাকতং কিরিযাব্যাকত’’ন্তি. এত্থ হেতুপচ্চযাধিকারে অহেতুকা ন গহেতব্বা. খন্ধে পটিচ্চ ৰত্থূতিআদি কটত্তারূপগ্গহণেন ৰত্থুস্মিং গহিতেপি ৰত্থুং পটিচ্চ অরূপক্খন্ধানং উপ্পত্তিদস্সনত্থং ৰুত্তং. একং মহাভূতন্তিআদি পন রূপাব্যাকতং পটিচ্চ রূপাব্যাকতস্স উপ্পত্তিদস্সনত্থং. হেতুপচ্চযে উপত্থম্ভকানমেৰ চেত্থ চিত্তজানং, পটিসন্ধিযং কম্মজানঞ্চ অঞ্ঞমঞ্ঞং পচ্চযপচ্চযুপ্পন্নতা গহেতব্বা, ন অহেতুকচিত্তজউতুজাদীনং তেসং হেতুপচ্চযা উপ্পত্তিযা অভাৰতো. মহাভূতে পটিচ্চ চিত্তসমুট্ঠানন্তিআদি মহাভূতে পটিচ্চ উপাদাদীনং উপ্পত্তিদস্সনত্থং ৰুত্তং. ইমিনা উপাযেন আরম্মণপচ্চযাদীসুপি ৰিস্সজ্জনানং অত্থো ৰেদিতব্বো.

আরম্মণপচ্চযে ‘‘কুসলং ধম্মং পটিচ্চ কুসলো ধম্মো উপ্পজ্জতি আরম্মণপচ্চযা. একং খন্ধং…পে… দ্ৰে খন্ধে পটিচ্চ দ্ৰে খন্ধা. অকুসলং ধম্মং পটিচ্চ অকুসলো ধম্মো…পে… অব্যাকতং ধম্মং পটিচ্চ অব্যাকতো ধম্মো উপ্পজ্জতি আরম্মণপচ্চযা. ৰিপাকাব্যাকতং কিরিযাব্যাকতং একং খন্ধং…পে… দ্ৰে খন্ধা. পটিসন্ধিক্খণে ৰিপাকাব্যাকতং একং খন্ধং…পে… দ্ৰে খন্ধা. ৰত্থুং পটিচ্চ খন্ধা’’তি এৰং তিস্সো ৰিস্সজ্জিতা. সেসা রূপমিস্সকত্তা, রূপস্স চ আরম্মণপচ্চযেন অনুপ্পত্তিতো ন গহিতা. তেনেৰ ‘‘ৰত্থুং পটিচ্চ খন্ধা’’তি ৰত্ৰা ‘‘খন্ধে পটিচ্চ ৰত্থূ’’তি ন ৰুত্তং. এত্থ চ আরম্মণপচ্চযাতি সহজাতং কুসলং ধম্মং পটিচ্চ উপ্পজ্জমানো কুসলো ধম্মো ততো অঞ্ঞেন অসহজাতেন ছব্বিধেন আরম্মণভূতেন পচ্চযেনাতি এৰং অত্থো গহেতব্বো. ন হি অত্তনা সহজাতং আরম্মণং কত্ৰা চিত্তচেতসিকা উপ্পজ্জন্তি.

অধিপতিপচ্চযে হেতুপচ্চযসদিসং ৰিস্সজ্জনং. অনন্তরসমনন্তরেসু পন রূপাভাৰতো আরম্মণপচ্চযসদিসং. সহজাতপচ্চযেপি হেতুপচ্চযসদিসং. অব্যাকতং পটিচ্চ অব্যাকতুপ্পত্তিযা পন ‘‘বাহিরং একং মহাভূতং পটিচ্চ…পে… দ্ৰে মহাভূতা. মহাভূতে পটিচ্চ উপাদারূপং…পে… আহারসমুট্ঠানং একং মহাভূতং…পে… দ্ৰে মহাভূতা…পে… উতুসমুট্ঠানং একং…পে… দ্ৰে মহাভূতা…পে… অসঞ্ঞসত্তানং একং মহাভূতং পটিচ্চ…পে… দ্ৰে মহাভূতা…পে… কটত্তারূপং উপাদারূপ’’ন্তি ইদং অধিকং. এৰং অঞ্ঞমঞ্ঞপচ্চযেপি. কেৰলং তত্থ কটত্তারূপং উপাদারূপঞ্চ ন গহিতং তেসং অঞ্ঞমঞ্ঞপচ্চযত্তাভাৰা. নিস্সযপচ্চযেপি সহজাতপচ্চযসদিসং ৰিস্সজ্জনং. পটিচ্চত্থস্স পন সহজাতত্থত্তা চক্খাদীসু পুরেজাতনিস্সযা ইধ ন গহিতাতি. উপনিস্সযপচ্চযেপি রূপস্স উপনিস্সযপচ্চযুপ্পন্নত্তাভাৰা আরম্মণপচ্চযসদিসমেৰ ৰিস্সজ্জনং.

পুরেজাতপচ্চযে পন ‘‘কুসলং ধম্মং পটিচ্চ কুসলো ধম্মো উপ্পজ্জতি পুরেজাতপচ্চযা. কুসলং একং…পে… দ্ৰে খন্ধা. ৰত্থুং পুরেজাতপচ্চযা. অকুসলং ধম্মং পটিচ্চ অকুসলো…পে… অব্যাকতং ধম্মং পটিচ্চ অব্যাকতো…পে… পুরেজাতপচ্চযা. ৰিপাকাব্যাকতং কিরিযাব্যাকতং একং খন্ধং…পে… দ্ৰে খন্ধা. ৰত্থুং পুরেজাতপচ্চযা’’তি এৰং তিস্সো পুচ্ছা ৰিস্সজ্জিতা. তত্থ ৰত্থুং পুরেজাতপচ্চযাতি ইদং আরম্মণপুরেজাতনিৰত্তনত্থং ৰুত্তং. তং হি চক্খুৰিঞ্ঞাণাদীনংযেৰ পুরেজাতপচ্চযতং সাধযতি, ন মনোৰিঞ্ঞাণধাতুযাতি ইধ ন গহিতং.

পচ্ছাজাতপচ্চযো ইধ অরূপধম্মেসু ন লব্ভতি. রূপধম্মেসু চ উপত্থম্ভকোৰ, ন জনকো, তস্মা ‘‘অব্যাকতং ধম্মং পটিচ্চ অব্যাকতো ধম্মো উপ্পজ্জতী’’তিআদি ন ৰত্তব্বোৰাতি অযং ন গহিতো. আসেৰনপচ্চযেপি আরম্মণপচ্চযে ৰিয তিস্সোৰ পুচ্ছা ৰিস্সজ্জিতা.

কম্মপচ্চযে ‘‘কুসলং ধম্মং পটিচ্চ কুসলো ধম্মো উপ্পজ্জতি কম্মপচ্চযা. কুসলং একং খন্ধং…পে… অব্যাকতো ধম্মো উপ্পজ্জতি…পে… চিত্তসমুট্ঠানঞ্চ রূপং…পে… কুসলো চ অব্যাকতো চ ধম্মা…পে… চিত্তসমুট্ঠানং রূপ’’ন্তি কুসলপদে তিস্সো, তথা অকুসলপদে. অব্যাকতপদে পন ‘‘অব্যাকতং ধম্মং পটিচ্চ অব্যাকতো…পে… ৰিপাকাব্যাকতং কিরিযাব্যাকতং একং খন্ধং পটিচ্চ…পে… মহাভূতে পটিচ্চ চিত্তসমুট্ঠানং রূপং কটত্তারূপং উপাদারূপং, অসঞ্ঞসত্তানং…পে… কটত্তারূপং উপাদারূপ’’ন্তি এৰং তিস্সো. ‘‘কুসলঞ্চ অব্যাকতঞ্চ ধম্মং পটিচ্চ অব্যাকতো…পে… কুসলে খন্ধে চ মহাভূতে চ পটিচ্চ চিত্তসমুট্ঠানং রূপ’’ন্তিআদিনা সহজাতসদিসং ৰিস্সজ্জনং. নত্থিৰিগতপচ্চযেসু আরম্মণসদিসং.

এৰং সব্বপচ্চযেসু লব্ভমানপঞ্হে ৰিস্সজ্জনং দস্সেত্ৰা ততো হেতুঅধিপতিঝানমগ্গপচ্চযা একসদিসা. আরম্মণানন্তরসমনন্তরূপনিস্সযাসেৰননত্থিৰিগতপচ্চযা একসদিসা. সহজাতঅঞ্ঞমঞ্ঞনিস্সযঅত্থিঅৰিগতা একসদিসা. আসেৰনপচ্চযে ৰিপাকো ন লব্ভতি. অঞ্ঞমঞ্ঞপচ্চযে চিত্তজরূপং, উপাদারূপঞ্চ ন লব্ভতীতিআদিনা পচ্চযানং অঞ্ঞমঞ্ঞসদিসত্তং ৰত্ৰা পুন তেসং ‘‘হেতুযা নৰ. আরম্মণে তীণি. অধিপতিযা নৰ. অনন্তরসমনন্তরেসু তীণি. সহজাতে নৰ. অঞ্ঞমঞ্ঞে তীণি. নিস্সযে নৰ. উপনিস্সযে তীণি. পুরেজাতে তীণি. আসেৰনে তীণি. কম্মে নৰ. ৰিপাকে একং. আহারে নৰ. ইন্দ্রিযে নৰ. ঝানে নৰ. মগ্গে নৰ. সম্পযুত্তে তীণি. ৰিপ্পযুত্তে নৰ. অত্থিযা নৰ. নত্থিযা তীণি. ৰিগতে তীণি. অৰিগতে নৰা’’তি এৰং হেতুপচ্চযাদীনং একেকস্মিং পুচ্ছাৰিস্সজ্জনৰারগণনা ৰুত্তাতি অযং একমূলকনযো.

যথা চ একমূলকে, এৰং ‘‘হেতুপচ্চযা আরম্মণপচ্চযা’’তিআদিনা দ্ৰিমূলকাদীসুপি সব্বমূলকপরিযোসানেসু যথানুরূপং নযো নেতব্বো. পাল়িযম্পি ৰিত্থারনযং অদস্সেত্ৰা ‘‘হেতুপচ্চযা আরম্মণে তীণী’’তিআদিনা ৰিস্সজ্জনৰারগণনভেদো দস্সিতোতি অযং পচ্চযানুলোমে নযো.

পচ্চযপচ্চনীযে পন ‘‘অকুসলং ধম্মং পটিচ্চ অকুসলো ধম্মো উপ্পজ্জতি নহেতুপচ্চযা. ৰিচিকিচ্ছাসহগতে উদ্ধচ্চসহগতে খন্ধে পটিচ্চ ৰিচিকিচ্ছাসহগতো উদ্ধচ্চসহগতো মোহো. অব্যাকতং ধম্মং পটিচ্চ অব্যাকতো ধম্মো উপ্পজ্জতি নহেতুপচ্চযা. অহেতুকং ৰিপাকাব্যাকতং কিরিযাব্যাকতং একং খন্ধং…পে… দ্ৰে খন্ধা চিত্তসমুট্ঠানঞ্চ রূপং. অহেতুকপটিসন্ধিক্খণে ৰিপাকাব্যাকতং একং খন্ধং…পে… দ্ৰে খন্ধা কটত্তা চ রূপং…পে… ৰত্থুং পটিচ্চ খন্ধা. একং মহাভূতং পটিচ্চ…পে… মহাভূতে পটিচ্চ চিত্তসমুট্ঠানং রূপং, কটত্তারূপং উপাদারূপং…পে… একং মহাভূতং পটিচ্চ…পে… উপাদারূপ’’ন্তি ইমা দ্ৰে ৰিস্সজ্জিতা.

নারম্মণপচ্চযে ‘‘কুসলং ধম্মং পটিচ্চ অব্যাকতো…পে… কুসলে…পে… অকুসলং ধম্মং পটিচ্চ অব্যাকতো…পে… অকুসলে…পে… অব্যাকতং ধম্মং পটিচ্চ অব্যাকতো…পে… কুসলঞ্চ অব্যাকতঞ্চ ধম্মং পটিচ্চ অব্যাকতো…পে… চিত্তসমুট্ঠানং রূপং, অকুসলঞ্চ অব্যাকতঞ্চ ধম্মং পটিচ্চ অব্যাকতো…পে… মহাভূতে পটিচ্চ চিত্তসমুট্ঠানং রূপ’’ন্তি ইমা পঞ্চ ৰিস্সজ্জিতা.

নাধিপতিপচ্চযে ‘‘কুসলং ধম্মং পটিচ্চ কুসলো…পে… কুসলং একং খন্ধং…পে… দ্ৰে খন্ধা. কুসলং ধম্মং পটিচ্চ অব্যাকতো…পে… কুসলে খন্ধে পটিচ্চ চিত্তসমুট্ঠানং রূপং. কুসলং ধম্মং পটিচ্চ কুসলো চ অব্যাকতো চ ধম্মা উপ্পজ্জন্তি…পে… অকুসলং ধম্মং পটিচ্চ অকুসলো…পে… দ্ৰে খন্ধে পটিচ্চ দ্ৰে খন্ধা, অকুসলং ধম্মং পটিচ্চ অব্যাকতো…পে… অকুসলে খন্ধে পটিচ্চ চিত্তসমুট্ঠানং রূপং. অকুসলং ধম্মং পটিচ্চ অকুসলো চ অব্যাকতো চ ধম্মা…পে… অব্যাকতং ধম্মং পটিচ্চ অব্যাকতো …পে… মহাভূতে পটিচ্চ…পে… কটত্তারূপং উপাদারূপং. কুসলঞ্চ অব্যাকতঞ্চ ধম্মং পটিচ্চ অব্যাকতো…পে… কুসলে খন্ধে চ মহাভূতে চ পটিচ্চ চিত্তসমুট্ঠানং রূপং. অকুসলঞ্চ অব্যাকতঞ্চ ধম্মং পটিচ্চ অব্যাকতো…পে… অকুসলে খন্ধে চ মহাভূতে চ পটিচ্চ চিত্তসমুট্ঠানং রূপ’’ন্তি নৰ পুচ্ছা ৰিস্সজ্জিতা. নানন্তরনসমনন্তরপচ্চযা নারম্মণপচ্চযসদিসা.

নাঞ্ঞমঞ্ঞপচ্চযে ‘‘কুসলং ধম্মং পটিচ্চ অব্যাকতো…পে… কুসলে…পে… চিত্তসমুট্ঠানং রূপং. অকুসলং ধম্মং পটিচ্চ অব্যাকতো…পে… অকুসলে…পে… চিত্তসমুট্ঠানং রূপং. অব্যাকতং ধম্মং পটিচ্চ অব্যাকতো…পে… ৰিপাকাব্যাকতে কিরিযাব্যাকতে খন্ধে পটিচ্চ চিত্তসমুট্ঠানং রূপং. পটিসন্ধিক্খণে ৰিপাকাব্যাকতে…পে… কটত্তা রূপং. মহাভূতে পটিচ্চ চিত্তসমুট্ঠানং রূপং কটত্তারূপং উপাদারূপং. বাহিরে মহাভূতে পটিচ্চ উপাদারূপং. আহারসমুট্ঠানে মহাভূতে পটিচ্চ উপাদারূপং. উতুসমুট্ঠানে…পে… উপাদারূপং. অসঞ্ঞসত্তানং মহাভূতে পটিচ্চ কটত্তারূপং উপাদারূপং. কুসলঞ্চ অব্যাকতঞ্চ ধম্মং পটিচ্চ অব্যাকতো…পে… কুসলে খন্ধে চ মহাভূতে চ পটিচ্চ চিত্তসমুট্ঠানং রূপং. অকুসলঞ্চ অব্যাকতঞ্চ ধম্মং পটিচ্চ অব্যাকতো…পে… অকুসলে খন্ধে চ মহাভূতে চ পটিচ্চ চিত্তসমুট্ঠানং রূপ’’ন্তি পঞ্চ ৰিস্সজ্জিতা. তত্থ ৰিপাকাব্যাকতে খন্ধে পটিচ্চ কটত্তারূপন্তি হদযৰত্থুৰজ্জং ৰেদিতব্বং. নউপনিস্সযপচ্চযো নারম্মণপচ্চযসদিসো.

নপুরেজাতপচ্চযে ‘‘কুসলং ধম্মং পটিচ্চ কুসলো…পে… অরূপে কুসলং…পে… দ্ৰে খন্ধা. কুসলং পটিচ্চ অব্যাকতো…পে… চিত্তসমুট্ঠানং রূপ’’ন্তি কুসলপদে দ্ৰে, তথা অকুসলপদেপি. ‘‘অব্যাকতং পটিচ্চ অব্যাকতো…পে… অরূপে ৰিপাকাব্যাকতং কিরিযাব্যাকতং…পে… বাহিরং…পে… উপাদারূপং. কুসলঞ্চ অব্যাকতঞ্চ ধম্মং পটিচ্চ অব্যাকতো. কুসলে খন্ধে চ মহাভূতে চ পটিচ্চ চিত্তসমুট্ঠানং রূপং. অকুসলঞ্চ অব্যাকতঞ্চ…পে… অকুসলে খন্ধে চ…পে… রূপ’’ন্তি ইমা তিস্সোতি সত্ত ৰিস্সজ্জিতা. নপচ্ছাজাতনাসেৰনপচ্চযা নাধিপতিপচ্চযসদিসা. তত্থ কুসলাকুসলকিরিযানং পঠমজৰনৰসেন নাসেৰনপচ্চযপ্পৰত্তি ৰেদিতব্বা.

নকম্মপচ্চযে ‘‘কুসলং পটিচ্চ কুসলো, কুসলা চেতনা. অকুসলং পটিচ্চ অকুসলো, অকুসলা চেতনা. অব্যাকতং পটিচ্চ অব্যাকতো, ৰিপাককিরিযা চেতনা. বাহিরং, আহারসমুট্ঠানং, উতুসমুট্ঠান’’ন্তি তিস্সো ৰিস্সজ্জিতা.

নৰিপাকপচ্চযে ‘‘কুসলং পটিচ্চ কুসলো, অব্যাকতো. কুসলো চ অব্যাকতো চা’’তি কুসলপদে তিস্সো, তথা অকুসলপদেপি. ‘‘অব্যাকতং পটিচ্চ অব্যাকতো…পে… বাহিরং আহারসমুট্ঠানং উতুসমুট্ঠানং অসঞ্ঞ…পে… উপাদারূপং…পে… অকুসলঞ্চ অব্যাকতঞ্চ অব্যাকতো’’তি ইমা তিস্সোতি নৰ ৰিস্সজ্জিতা.

নাহারপচ্চযে ‘‘অব্যাকতং পটিচ্চ অব্যাকতো. বাহিরং উতুসমুট্ঠানং, অসঞ্ঞ…পে… উপাদারূপ’’ন্তি একাৰ.

নইন্দ্রিযপচ্চযে ‘‘অব্যাকতং পটিচ্চ অব্যাকতো. বাহিরং আহারসমুট্ঠানং…পে… উতুসমুট্ঠানং…পে… অসঞ্ঞসত্তানং মহাভূতে পটিচ্চ রূপজীৰিতিন্দ্রিয’’ন্তি একাৰ.

নঝানপচ্চযে ‘‘অব্যাকতং পটিচ্চ অব্যাকতো. পঞ্চৰিঞ্ঞাণসহগতং…পে… বাহিরং আহারউতুঅসঞ্ঞউপাদারূপ’’ন্তি একাৰ.

নমগ্গপচ্চযে ‘‘অব্যাকতং পটিচ্চ অব্যাকতো. অহেতুকং ৰিপাকাব্যাকতং কিরিযাব্যাকতং…পে… চিত্তসমুট্ঠানং…পে… অহেতুকপটিসন্ধিক্খণে ৰিপাকা…পে… কটত্তা চ রূপং…পে… বাহিরং আহারউতুঅসঞ্ঞউপাদারূপ’’ন্তি একাৰ.

নসম্পযুত্তপচ্চযো নারম্মণপচ্চযসদিসো.

নৰিপ্পযুত্তপচ্চযে ‘‘কুসলং পটিচ্চ কুসলো. অরূপে কুসলোৰ. অকুসলং…পে… অরূপে অকুসলো. অব্যাকতং পটিচ্চ অব্যাকতো, অরূপে ৰিপাককিরিযাব্যাকতং. বাহিরং অসঞ্ঞ…পে… উপাদারূপ’’ন্তি ইমা তিস্সোৰ পুচ্ছা ৰিস্সজ্জিতা. নোনত্থিনোৰিগতপচ্চযা নারম্মণপচ্চযসদিসা. নসহজাতননিস্সযনোঅত্থিনোঅৰিগতপচ্চযা পনেত্থ চত্তারোপি ন লব্ভন্তীতি.

এৰং পচ্চনীকে লব্ভমানপঞ্হৰিস্সজ্জনং দস্সেত্ৰা ততো ‘‘নহেতুযা দ্ৰে. নারম্মণে পঞ্চ. নাধিপতিযা নৰ. নানন্তরে নসমনন্তরে নাঞ্ঞমঞ্ঞে নউপনিস্সযে পঞ্চ. নপুরেজাতে সত্ত. নপচ্ছাজাতে নাসেৰনে নৰ. নকম্মে তীণি. নৰিপাকে নৰ. নাহারে নইন্দ্রিযে নঝানে নমগ্গে একং. নসম্পযুত্তে পঞ্চ. নৰিপ্পযুত্তে তীণি. নোনত্থিনোৰিগতেসু পঞ্চা’’তি ৰিস্সজ্জনৰারগণনা ৰুত্তাতি অযং একমূলকনযো.

ইমিনাৰ নযেন দ্ৰিমূলকাদীসুপি যথানুরূপং নযো নেতব্বো, পাল়িযং পন ‘‘নহেতুপচ্চযা নারম্মণে এক’’ন্তিআদিনা ৰিস্সজ্জনৰারগণনাৰ দস্সিতাতি অযং পচ্চযপচ্চনীযনযো.

ইমিনা ৰুত্তানুসারেনেৰ ‘‘কুসলং ধম্মং পটিচ্চ অব্যাকতো ধম্মো উপ্পজ্জতি হেতুপচ্চযা নারম্মণপচ্চযা’’তিআদিনা অনুলোমপচ্চনীযনযে, ‘‘অকুসলং ধম্মং পটিচ্চ অকুসলো ধম্মো উপ্পজ্জতি নহেতুপচ্চযা আরম্মণপচ্চযা’’তিআদিনা পচ্চনীযানুলোমনযে পঞ্হৰিস্সজ্জননযো ৰেদিতব্বো. পাল়িযং পনেত্থ ৰিস্সজ্জনৰারগণনাৰ দস্সিতাতি অযং অনুলোমপচ্চনীযকুসলত্তিকে পটিচ্চৰারনযো.

সহজাতৰারাদীসুপি ছৰারেসু পটিচ্চৰারে ৰুত্তানুসারেন সব্বত্থ নযো নেতব্বো. যে পন তত্থ তত্থ পাল়িৰিসেসা, অত্থৰিসেসা চ উপলব্ভন্তি, তে পট্ঠানপাল়িঅট্ঠকথাসু এৰ সব্বাকারতো গহেতব্বা. ইধ পন তে সব্বে সঙ্খেপনযতো দস্সিযমানাপি গন্থভারিযং করোন্তীতি ন দস্সিতা.

তেসু পন ৰারেসু ‘‘কুসলং ধম্মং সহজাতো কুসলো ধম্মো উপ্পজ্জতি হেতুপচ্চযা. কুসলং ধম্মং পচ্চযা… কুসলং ধম্মং নিস্সায… কুসলং ধম্মং সংসট্ঠো… কুসলং ধম্মং সম্পযুত্তো কুসলো ধম্মো উপ্পজ্জতি হেতুপচ্চযা’’তি এৰং আদিতো পঞ্চসু ৰারেসু পাল়িগতি ঞাতব্বা. তেসু চ পটিচ্চসহজাতা একত্থা, পচ্চযনিস্সযা একত্থা, সংসট্ঠসম্পযুত্তা একত্থা. তত্থ ‘‘কুসলং ধম্মং সহজাতো’’তিআদীসু কুসলং ধম্মং পটিচ্চ তেন সহজাতো হুত্ৰাতিআদিনা যথানুরূপং অত্থো ৰেদিতব্বো. পচ্ছিমে পন পঞ্হাৰারে ‘‘কুসলো ধম্মো কুসলস্স ধম্মস্স হেতুপচ্চযেন পচ্চযো. কুসলা হেতূ সম্পযুত্তকানং খন্ধানং হেতুপচ্চযেন পচ্চযো. কুসলো অব্যাকতস্স…পে… কুসলস্স চ অব্যাকতস্স চ…পে… কুসলা হেতূ সম্পযুত্তকানং খন্ধানং চিত্তসমুট্ঠানানঞ্চা’’তিআদিনা হেতুপচ্চযে,

‘‘কুসলো ধম্মো কুসলস্স ধম্মস্স আরম্মণপচ্চযেন পচ্চযো. দানং দত্ৰা সীলং সমাদিযিত্ৰা উপোসথকম্মং কত্ৰা তং পচ্চৰেক্খতি. পুব্বে সুচিণ্ণানি…পে… ঝানা ৰুট্ঠহিত্ৰা ঝানং… সেখা গোত্রভুং ৰোদানং মগ্গং পচ্চৰেক্খন্তি. সেখা ৰা পুথুজ্জনা ৰা কুসলং অনিচ্চতো দুক্খতো অনত্ততো ৰিপস্সন্তি. চেতোপরিযঞাণেন কুসলচিত্তসমঙ্গিস্স চিত্তং জানন্তি. আকাসানঞ্চাযতনকুসলং ৰিঞ্ঞাণঞ্চাযতনকুসলস্স আরম্মণপচ্চযেন পচ্চযো. আকিঞ্চঞ্ঞাযতনকুসলং নেৰসঞ্ঞানাসঞ্ঞাযতনকুসলস্স… কুসলা খন্ধা ইদ্ধিৰিধঞাণস্স চেতোপরিযপুব্বেনিৰাসযথাকম্মূপগঅনাগতংসঞাণস্স আরম্মণপচ্চযেন পচ্চযো.

কুসলো অকুসলস্স…পে… দানং দত্ৰা…পে… কত্ৰা তং অস্সাদেতি অভিনন্দতি. তং আরব্ভ রাগো উপ্পজ্জতি. দিট্ঠি ৰিচিকিচ্ছা উদ্ধচ্চং দোমনস্সং উপ্পজ্জতি. পুব্বে সুচিণ্ণানি অস্সাদেতি …পে… দোমনস্সং উপ্পজ্জতি. ঝানা ৰুট্ঠহিত্ৰা ঝানং অস্সাদেতি…পে… উদ্ধচ্চং উপ্পজ্জতি. ঝানে পরিহীনে ৰিপ্পটিসারিস্স দোমনস্সং উপ্পজ্জতি.

কুসলো অব্যাকতস্স…পে… পচ্চযো. অরহা মগ্গং পচ্চৰেক্খতি. পুব্বে সুচিণ্ণানি… কুসল…পে… ৰিপস্সতি…পে… ৰিপাকো তদারম্মণতা উপ্পজ্জতি. আকাসানঞ্চাযতনকুসলং ৰিঞ্ঞাণঞ্চাযতনৰিপাকস্স…পে… কিরিযস্স. আকিঞ্চঞ্ঞাযতন…পে… ৰিপাকস্স চ কিরিযস্স চ. কুসলা খন্ধা চেতোপরিয…পে… অনাগতংসঞাণস্স আৰজ্জনায.

অকুসলো অকুসলস্স…পে… পচ্চযো. রাগং অস্সাদেতি…পে… উদ্ধচ্চং উপ্পজ্জতি. অকুসলো কুসলস্স…পে… পচ্চযো. সেখা পহীনে কিলেসে…পে… অনাগতংসঞাণস্স. অকুসলো অব্যাকতস্স… অরহা পহীনে কিলেসে…পে… আৰজ্জনায.

অব্যাকতো অব্যাকতস্স… অরহা ফলং পচ্চৰেক্খতি. নিব্বানং, চক্খুং…পে… ফোট্ঠব্বং ৰিপস্সতি. দিব্বেন চক্খুনা রূপং পস্সতি…পে… আকিঞ্চঞ্ঞাযতনকিরিযং…পে… কিরিযস্স. রূপাযতনং চক্খুৰিঞ্ঞাণস্স…পে… আৰজ্জনায. অব্যাকতো কুসলস্স… সেখা ফলং…পে… অনাগতংসঞাণস্স. অব্যাকতো অকুসলস্স… চক্খুং অস্সাদেতী’’তিআদিনা আরম্মণপচ্চযে চ,

‘‘কুসলো কুসলস্স অধিপতিপচ্চযেন পচ্চযো. আরম্মণাধিপতি, সহজাতাধিপতি. আরম্মণাধিপতি – দানং দত্ৰা’’তিআদিনা অধিপতিপচ্চযে চ,

‘‘কুসলো কুসলস্স অনন্তরপচ্চযেন পচ্চযো’’তিআদিনা ৰিত্থারতো অনন্তরসমনন্তরসহজাতঅঞ্ঞমঞ্ঞনিস্সযপচ্চযেসু চ,

‘‘কুসলো কুসলস্স উপনিস্সযপচ্চযেন পচ্চযো. আরম্মণূপনিস্সযো অনন্তরূপনিস্সযো পকতূপনিস্সযো. আরম্মণূপনিস্সযো – দানং দত্ৰা’’তিআদিনা আরম্মণপচ্চযে ৰুত্তনযেন, ‘‘অনন্তরূপনিস্সযো – পুরিমা পুরিমা কুসলা খন্ধা পচ্ছিমানং পচ্ছিমান’’ন্তিআদিনা অনন্তরপচ্চযে ৰুত্তনযেনেৰ, ‘‘পকতূপনিস্সযো – সদ্ধং উপনিস্সায…পে… উপোসথকম্মং করোতি. ঝানং, ৰিপস্সনং, মগ্গং, অভিঞ্ঞং, সমাপত্তিং উপ্পাদেতি. সীলং, সুতং, চাগং, পঞ্ঞং উপনিস্সায…পে… পঠমস্স ঝানস্স পরিকম্মং পঠমস্স ঝানস্স উপনিস্সযপচ্চযেন পচ্চযো…পে… আকিঞ্চঞ্ঞাযতনং নেৰসঞ্ঞানাসঞ্ঞাযতনস্স…পে… যথাকম্মূপগঞাণং অনাগতংসঞাণস্স…পে… পঠমস্স মগ্গস্স পরিকম্মং পঠমস্স…পে… ততিযো মগ্গো চতুত্থস্স. মগ্গো সেখানং অত্থপটিসম্ভিদায…পে… ঠানাঠানকোসল্লস্স উপনিস্সয. কুসলো অকুসলস্স…পে… আরম্মণূপনিস্সযো. পকতূপ…পে… পকতূপনিস্সযো – সদ্ধং উপনিস্সায মানং জপ্পেতি. দিট্ঠিং গণ্হাতি…পে… সদ্ধা সীলং সুতং চাগো পঞ্ঞা রাগস্স, দোসস্স, মোহস্স, মানস্স, দিট্ঠিযা. পত্থনায…পে… কুসলো অব্যাকতস্স…পে… আরম্মণূপনিস্সযো. অনন্তরূপনিস্সযো. পকতূপ…পে… পকতূপনিস্সযো – সদ্ধং উপনিস্সায অত্তানং আতাপেতি…পে… কাযিকস্স সুখস্স, দুক্খস্স, ফলসমাপত্তিযা. কুসলং কম্মং ৰিপাকস্স…পে… মগ্গো অরহতো অত্থপটিসম্ভিদায পচ্চযো.

অকুসলো অকুসলস্স…পে… পকতূপনিস্সযো – রাগং উপনিস্সায পাণং হনতি…পে… সম্ফং পলপতি…পে… সঙ্ঘং ভিন্দতি. দোসং, মোহং, মানং, দিট্ঠিং, পত্থনং উপনিস্সায…পে… সঙ্ঘং ভিন্দতি…পে… পাণাতিপাতো পাণাতিপাতস্স…পে… সঙ্ঘভেদকম্মস্স…পে… পচ্চযো.

অকুসলো কুসলস্স…পে… পকতূপনিস্সযো – রাগং উপনিস্সায দানং দেতি…পে… মগ্গং উপ্পাদেতি…পে… সমাপত্তিং উপ্পাদেতি. রাগো…পে… পত্থনা. সদ্ধায, সীলস্স…পে… পঞ্ঞায উপনিস্সয. পাণং হন্ত্ৰা তস্স পটিঘাতত্থায দানং দেতী’’তিআদিনা চ উপনিস্সযপচ্চযে চ,

‘‘অব্যাকতো অব্যাকতস্স পুরেজাতপচ্চযেন পচ্চযো…পে… আরম্মণপুরেজাতং – অরহা চক্খুং…পে… ফোট্ঠব্বে, ৰত্থুং ৰিপস্সতি…পে… দিব্বেন চক্খুনা রূপং পস্সতি…পে… রূপাযতনং চক্খুৰিঞ্ঞাণস্স…পে… ৰত্থুপুরেজাতং – চক্খাযতনং চক্খুৰিঞ্ঞাণস্স…পে… ৰত্থু ৰিপাকাব্যাকতান’’ন্তিআদিনা পুরেজাতপচ্চযে চ,

‘‘কুসলো অব্যাকতস্স…পে… পচ্ছাজাতা কুসলা খন্ধা পুরেজাতস্স ইমস্স কাযস্সা’’তিআদিনা পচ্ছাজাতপচ্চযে চ,

‘‘কুসলো কুসলস্স…পে… পুরিমা পুরিমা কুসলা খন্ধা’’তিআদিনা আসেৰনপচ্চযে চ,

‘‘সহজাতা নানাক্খণিকা, সহজাতা কুসলা চেতনা…পে… সম্পযুত্তকানং খন্ধানং চিত্তসমুট্ঠানানঞ্চ রূপানং. নানাক্খণিকা ৰিপাকানং খন্ধানং কটত্তা চ রূপান’’ন্তিআদিনা কম্মপচ্চযে চ,

‘‘অব্যাকতো অব্যাকতস্স…পে… একো খন্ধো তিণ্ণন্ন’’ন্তিআদিনা ৰিপাকপচ্চযে চ,

‘‘কুসলো কুসলস্সা’’তিআদিনা আহারপচ্চযাদীসু চ, ‘‘কুসলো অব্যাকতস্স, সহজাতং, পচ্ছাজাতং, সহজাতা চিত্তসমুট্ঠানানং রূপানং. পচ্ছাজাতা ইমস্স কাযস্স…পে… অব্যাকতো কুসলস্স…পে… পুরেজাতং ৰত্থু কুসলানং খন্ধানং ৰিপ্পযুত্তপচ্চযেন পচ্চযো’’তিআদিনা ৰিপ্পযুত্তপচ্চযাদীসু চ পাল়িগতি ৰেদিতব্বা.

তত্থ কুসলধম্মো নামেস যস্মা উপ্পজ্জন্তো ঠপেত্ৰা পচ্ছাজাতপচ্চযং, ৰিপাকপচ্চযঞ্চ সেসেহি দ্ৰাৰীসতিযা পচ্চযেহি উপ্পজ্জতি. কুসলস্স চ পচ্চযো হোন্তো ঠপেত্ৰা পুরেজাতপচ্ছাজাতৰিপাকৰিপ্পযুত্তপচ্চযে সেসেহি ৰীসতিযা পচ্চযেহি পচ্চযো হোতি. এৰং কুসলো কুসলাদীনং, অকুসলো চ অকুসলাদীনং যথানুরূপং পচ্চযা হোন্তি, তস্মা কুসলাদীনং তংতংপচ্চযুপ্পন্নৰিভাগং দস্সেতুং পঞ্হাৰারো ৰুত্তো. তত্থ সেখা গোত্রভুন্তি সোতাপন্নং সন্ধায ৰুত্তং, ৰোদানন্তি সকদাগামিঅনাগামিনো. তেসং হি গোত্রভুচিত্তং ৰোদানং নাম. মগ্গা ৰুট্ঠহিত্ৰাতি মগ্গৰীথিতো ৰুট্ঠায. ন হি মগ্গানন্তরা পচ্চৰেক্খণা নাম অত্থীতি অযং অনুলোমপট্ঠানে কুসলত্তিকনযো.

ৰেদনাত্তিকাদীসু ‘‘সুখায ৰেদনায সম্পযুত্তং ধম্মং পটিচ্চ সুখায ৰেদনায সম্পযুত্তো ধম্মো উপ্পজ্জতি হেতুপচ্চযা. সুখায ৰেদনায সম্পযুত্তং একং খন্ধং পটিচ্চ দ্ৰে খন্ধা. দ্ৰে খন্ধে পটিচ্চ একো খন্ধো’’তিআদিনা কুসলত্তিকে ৰুত্তানুসারেন পটিচ্চৰারাদীসু পঞ্হাৰারপরিযোসানেসু সত্তসু ৰারেসু একেকস্মিং পচ্চযানুলোমাদীহি চ একমূলাদীহি নযেহি চ সব্বত্তিকেসু লব্ভমানপদৰসেন গণনানযো যোজেত্ৰা ঞাতব্বো. তত্থ ৰেদনাত্তিকে ৰেদনাক্খন্ধস্স অলব্ভনতো ‘‘একং খন্ধং নিস্সায দ্ৰে খন্ধা’’তিআদি ৰুত্তং. সব্বত্থ ৰিসেসো পাল়িঅট্ঠকথানুসারেনেৰ ঞাতব্বোতি অযং অনুলোমপটিলোমে তিকপট্ঠাননযো.

দুকপট্ঠানে পন ‘‘হেতুং ধম্মং পটিচ্চ হেতু ধম্মো উপ্পজ্জতি হেতুপচ্চযা. অলোভং পটিচ্চ অদোসো. অমোহো. অদোসং অমোহং পটিচ্চ অলোভো. অদোসো. লোভং পটিচ্চ মোহো. মোহং পটিচ্চ লোভো. দোসং পটিচ্চ মোহো. মোহং পটিচ্চ দোসো. পটিসন্ধিক্খণে হেতুং ধম্মং পটিচ্চ নহেতু ধম্মো উপ্পজ্জতি…পে… হেতূ চ নহেতূ চ. নহেতুং পটিচ্চ নহেতু ধম্মো ন…পে… হেতূ চ নহেতূ চা’’তিআদিনা হেতুদুকে,

‘‘সহেতুকং ধম্মং পটিচ্চ সহেতুকো ধম্মো উপ্পজ্জতি হেতুপচ্চযা. সহেতুকং একং খন্ধং…পে… সহেতুকং ধম্মং পটিচ্চ. অহেতুকো…পে… চিত্তসমুট্ঠানং রূপং. পটিসন্ধিক্খণে…পে… সহেতুকো চ, অহেতুকো চ…পে… অহেতুকং খন্ধং পটিচ্চ অহেতুকো. ৰিচিকিচ্ছাসহগতং উদ্ধচ্চসহগতং মোহং পটিচ্চ সম্পযুত্তকা খন্ধা…পে… চিত্তসমুট্ঠানং. আহারসমুট্ঠান’’ন্তিআদিনা সহেতুকদুকাদীসু চ কেনচিৰিঞ্ঞেয্যদুকৰজ্জিতেসু সব্বদুকেসু পচ্চেকং পটিচ্চৰারাদীসু সত্তসু মহাৰারেসু একেকস্মিং পচ্চযানুলোমাদীসু চতূসু নযেসু একমূলকাদীহি সব্বৰারেহি কুসলত্তিকে ৰুত্তানুসারেন যথানুরূপং ৰিভঙ্গনযো যোজেত্ৰা ঞাতব্বো. সব্বস্মিম্পি হি পট্ঠানে কেনচিৰিঞ্ঞেয্যদুকং ন লব্ভতীতি অযং দুকপট্ঠাননযো.

দুকতিকপট্ঠানে পন ‘‘হেতুং কুসলং ধম্মং পটিচ্চ হেতু কুসলো ধম্মো উপ্পজ্জতি হেতুপচ্চযা’’তিআদিনা হেতুদুকেন সদ্ধিং কুসলত্তিকে কুসলং পদং যোজেত্ৰা পটিচ্চৰারাদীসু সত্তসু ৰারেসু পচ্চযানুলোমাদীনং চতুন্নং নযানং ৰসেন লব্ভমানকপচ্চযা একমূলকাদিনযেহি দস্সিতা. যথা চ কুসলং পদং, এৰং অকুসলং পদং, অব্যাকতঞ্চ হেতুদুকেন যোজেত্ৰা ৰুত্তনযেন দস্সেত্ৰা হেতুকুসলদুকতিকন্তি ঠপিতং. পাল়ি পন অতিসংখিত্তা. যথা কুসলত্তিকং, এৰং ‘‘হেতুং সুখায ৰেদনায সম্পযুত্তং ধম্মং পটিচ্চ হেতু সুখায ৰেদনায সম্পযুত্তো ধম্মো উপ্পজ্জতি হেতুপচ্চযা’’তিআদিনা লব্ভমানকপদৰসেন ৰেদনাত্তিকাদযোপি হেতুদুকেন যোজেত্ৰা হেতুৰেদনদুকতিকাদীনি একৰীসতিদুকতিকানি দস্সিতানীতি. যথা চ হেতুদুকেন সদ্ধিং লব্ভমানকপদৰসেন দ্ৰাৰীসতিতিকা যোজিতা, এৰং সহেতুকদুকাদীহি সব্বেহি সদ্ধিং পচ্চেকং দ্ৰাৰীসতিতিকা যোজেতব্বা. পাল়ি পনেত্থ ইতো পরেসুপি সব্বত্থ অতিসংখিত্তা. এৰং দ্ৰাৰীসতিতিকে গহেত্ৰা দুকসতে পক্খিপিত্ৰা দুকতিকপট্ঠানং দেসিতন্তি অযং দুকতিকপট্ঠাননযো.

তিকদুকপট্ঠানেপি ‘‘কুসলং হেতুং ধম্মং পটিচ্চ কুসলো হেতু ধম্মো উপ্পজ্জতি হেতুপচ্চযা’’তিআদিনা কুসলত্তিকেন সদ্ধিং হেতুপদং যোজেত্ৰা পটিচ্চৰারাদীসু সত্তসু মহাৰারেসু পচ্চযানুলোমাদিনযচতুক্কৰসেন লব্ভমানকপচ্চযা একমূলাদীহি সব্বৰারেহি দস্সিতা. যথা হেতুপদং, এৰং নহেতুপদম্পি কুসলত্তিকেন সদ্ধিং যোজেত্ৰা কুসলহেতু তিকদুকন্তি ঠপিতং. যথা চ কুসলত্তিকেন সদ্ধিং হেতুদুকং, এৰং ‘‘সুখায ৰেদনায সম্পযুত্তং হেতুং কুসলং ধম্মং পটিচ্চা’’তিআদিনা ৰেদনাত্তিকাদীহিপি তং যোজেত্ৰা ৰেদনাত্তিকদুকাদীনি একৰীসতিতিকদুকাদীনি দস্সিতানি. যথা চ হেতুদুকং, এৰং সহেতুকাদযোপি সব্বে পচ্চেকং দ্ৰাৰীসতিযা তিকেহি লব্ভমানপদৰসেনেৰ যোজিতা. এৰং দুকসতং দ্ৰাৰীসতিযা তিকেসু পক্খিপিত্ৰা তিকদুকপট্ঠানং দেসিতন্তি অযং তিকদুকপট্ঠাননযো.

তিকতিকপট্ঠানেপি ‘‘কুসলং সুখায ৰেদনায সম্পযুত্তং ধম্মং পটিচ্চ কুসলো সুখায ৰেদনায সম্পযুত্তো ধম্মো উপ্পজ্জতি হেতুপচ্চযা’’তিআদিনা কুসলত্তিকং ৰেদনাত্তিকাদীহি সব্বত্তিকেহি, ৰেদনাত্তিকাদযো চ কুসলত্তিকাদীহি ৰুত্তনযেন যোজেত্ৰা পচ্চযা দস্সিতা. এৰং তিকেসু এৰ তিকে পক্খিপিত্ৰা তিকতিকপট্ঠানং দেসিতন্তি অযং তিকতিকপট্ঠাননযো.

দুকদুকপট্ঠানেপি ‘‘হেতুং সহেতুকং ধম্মং পটিচ্চ হেতু সহেতুকো ধম্মো উপ্পজ্জতি হেতুপচ্চযা’’তিআদিনা হেতুদুকং সহেতুকাদীহি, সহেতুকঞ্চ হেতুদুকাদীহি যোজেত্ৰা হেট্ঠা ৰুত্তনযেহি পচ্চযা দস্সিতা. এৰং দুকেসু এৰ দুকে পক্খিপিত্ৰা দুকদুকপট্ঠানং দেসিতন্তি অযং দুকদুকপট্ঠাননযো. এৰং তাৰ অনুলোমপট্ঠানে –

‘‘তিকঞ্চ পট্ঠানৰরং দুকুত্তমং,

দুকতিকঞ্চেৰ তিকদুকঞ্চ;

তিকতিকঞ্চেৰ দুকদুকঞ্চ,

ছ অনুলোমম্হি নযা সুগম্ভীরা’’তি. –

ৰুত্তা ছ নযা ৰেদিতব্বা. পচ্চযৰসেন পনেতেসু ছসু একেকস্মিং পট্ঠানে পচ্চযানুলোমাদীনং চতুন্নং নযানং ৰসেন এতেন পরিযাযেন চতুৰীসতিনযপটিমণ্ডিতমিদং ধম্মানুলোমপট্ঠানন্তি ৰেদিতব্বং. অযং অনুলোমপট্ঠাননযো.

পচ্চনীযপট্ঠানে পন ‘‘নকুসলং ধম্মং পটিচ্চ নকুসলো ধম্মো উপ্পজ্জতি হেতুপচ্চযা. অকুসলং অব্যাকতং একং খন্ধং পটিচ্চ…পে… দ্ৰে খন্ধা, চিত্তসমুট্ঠানঞ্চ রূপ’’ন্তিআদিনা তিকপট্ঠানে, ‘‘নহেতুং ধম্মং পটিচ্চ নহেতু ধম্মো উপ্পজ্জতি হেতুপচ্চযা. নহেতুং একং খন্ধং পটিচ্চ…পে… চিত্তসমুট্ঠানঞ্চ রূপ’’ন্তিআদিনা দুকপট্ঠানে চ, ‘‘নহেতুং নকুসলং ধম্মং পটিচ্চ নহেতু নকুসলো ধম্মো উপ্পজ্জতি হেতুপচ্চযা. নহেতুং নকুসলং অব্যাকতং একং খন্ধং পটিচ্চ তযো খন্ধা’’তিআদিনা দুকতিকপট্ঠানে চ, ‘‘নকুসলং নহেতুং ধম্মং পটিচ্চ নকুসলো নহেতু ধম্মো উপ্পজ্জতী’’তিআদিনা তিকদুকপট্ঠানে চ, ‘‘নকুসলং নসুখায ৰেদনায সম্পযুত্তং ধম্মং পটিচ্চ নকুসলো নসুখায ৰেদনায সম্পযুত্তো ধম্মো উপ্পজ্জতী’’তিআদিনা তিকতিকপট্ঠানে চ, ‘‘নহেতুং নসহেতুকং ধম্মং পটিচ্চ নহেতু নসহেতুকো ধম্মো উপ্পজ্জতি হেতুপচ্চযা’’তিআদিনা দুকদুকপট্ঠানে চাতি ছসু পচ্চনীযপট্ঠানেসু অনুলোমতিকপট্ঠানাদীসু ছসু পট্ঠানেসু ৰুত্তেন সব্বেন পকারেন পাল়িনযো ৰেদিতব্বো. ইদঞ্চ কুসলাদীনং, হেতুআদীনঞ্চ ধম্মানং পচ্চযুপ্পন্নভাৰপটিক্খেপৰসেন পৰত্তত্তা ধম্মপচ্চনীযপট্ঠানং নাম জাতং. তত্থ হি নকুসলং ধম্মং পটিচ্চাতি কুসলস্স পচ্চযপটিক্খেপো. নকুসলো ধম্মো উপ্পজ্জতীতি কুসলস্স পচ্চযুপ্পন্নভাৰপটিক্খেপো. তথা ‘‘অকুসলং অব্যাকতং একং খন্ধং পটিচ্চ…পে… অকুসলা, অব্যাকতা খন্ধা চিত্তসমুট্ঠানঞ্চ রূপং উপ্পজ্জতী’’তি এৰমাদিনা নযেনেত্থ অত্থো ৰেদিতব্বো. এৰমেত্থ পচ্চনীযপট্ঠানে –

‘‘তিকঞ্চ পট্ঠানৰরং দুকুত্তমং,

দুকতিকঞ্চেৰ তিকদুকঞ্চ;

তিকতিকঞ্চেৰ দুকদুকঞ্চ,

ছ পচ্চনীযম্হি নযা সুগম্ভীরা’’তি. –

ৰুত্তা ছ নযা ৰেদিতব্বা. পচ্চযৰসেন পনেত্থাপি একেকস্মিং পচ্চযানুলোমাদীনং চতুন্নং চতুন্নং নযানং ৰসেন চতুৰীসতিনযপটিমণ্ডিতমিদং ধম্মপচ্চনীযপট্ঠানন্তি ৰেদিতব্বন্তি অযং পচ্চনীযপট্ঠাননযো.

অনুলোমপচ্চনীযপট্ঠানে পন ‘‘কুসলং ধম্মং পটিচ্চ নকুসলো ধম্মো উপ্পজ্জতি হেতুপচ্চযা. কুসলে খন্ধে পটিচ্চ চিত্তসমুট্ঠানং রূপ’’ন্তিআদিনা তিকপট্ঠানে, ‘‘হেতুং ধম্মং পটিচ্চ নহেতু ধম্মো উপ্পজ্জতি হেতুপচ্চযা’’তিআদিনা দুকপট্ঠানে চ, ‘‘হেতুং কুসলং ধম্মং পটিচ্চ নহেতু নকুসলো ধম্মো উপ্পজ্জতী’’তিআদিনা দুকতিকপট্ঠানে চ, ‘‘কুসলং হেতুং ধম্মং পটিচ্চ নকুসলো নহেতু ধম্মো উপ্পজ্জতী’’তিআদিনা তিকদুকপট্ঠানে চ, ‘‘কুসলং সুখায ৰেদনায সম্পযুত্তং ধম্মং পটিচ্চ নকুসলো নসুখায ৰেদনায সম্পযুত্তো ধম্মো উপ্পজ্জতী’’তিআদিনা তিকতিকপট্ঠানে চ, ‘‘হেতুং সহেতুকং ধম্মং পটিচ্চ নহেতু নসহেতুকো ধম্মো উপ্পজ্জতী’’তিআদিনা দুকদুকপট্ঠানে চ হেট্ঠা ৰুত্তনযেন সব্বেন পকারেন পাল়িনযো ৰেদিতব্বো. ইদং কুসলাদীনং ধম্মানং পচ্চযত্তং অপ্পটিক্খিপিত্ৰা পচ্চযুপ্পন্নানং কুসলাদিভাৰপটিক্খেপৰসেন পৰত্তত্তা ধম্মানুলোমপচ্চনীযপট্ঠানং নাম জাতং. তত্থ হি কুসলং ধম্মং পটিচ্চাতি কুসলস্স পচ্চযভাৰৰিধানং. নকুসলো ধম্মো উপ্পজ্জতীতি কুসলস্স পচ্চযুপ্পন্নভাৰনিৰারণং, তস্মা ‘‘কুসলে খন্ধে পটিচ্চ চিত্তসমুট্ঠানং রূপ’’ন্তিআদিনা ৰিস্সজ্জনং ৰুত্তন্তি ৰেদিতব্বন্তি এৰমেত্থ অনুলোমপচ্চনীযপট্ঠানে –

‘‘তিকঞ্চ পট্ঠানৰরং দুকুত্তমং,

দুকতিকঞ্চেৰ তিকদুকঞ্চ;

তিকতিকঞ্চেৰ দুকদুকঞ্চ,

ছ অনুলোমপচ্চনীযম্হি নযা সুগম্ভীরা’’তি. –

ৰুত্তা ছ নযা ৰেদিতব্বা. পচ্চযৰসেন পনেত্থাপি একেকস্মিং পচ্চযানুলোমাদীনং চতুন্নং চতুন্নং নযানং ৰসেন চতুৰীসতিনযপটিমণ্ডিতমিদং ধম্মানুলোমপচ্চনীযপট্ঠানন্তি ৰেদিতব্বন্তি অযং অনুলোমপচ্চনীযপট্ঠাননযো.

পচ্চনীযানুলোমপট্ঠানে ‘‘নকুসলং ধম্মং পটিচ্চ অকুসলো ধম্মো…পে… নকুসলং ধম্মং পটিচ্চ অব্যাকতো ধম্মো উপ্পজ্জতি হেতুপচ্চযা’’তিআদিনা তিকপট্ঠানে, ‘‘নহেতুং ধম্মং পটিচ্চ হেতু ধম্মো উপ্পজ্জতী’’তিআদিনা দুকপট্ঠানে চ, ‘‘নহেতুং নকুসলং ধম্মং পটিচ্চ হেতু অকুসলো ধম্মো…পে… হেতু অব্যাকতো ধম্মো উপ্পজ্জতীতি’’আদিনা দুকতিকপট্ঠানে চ, ‘‘নকুসলং নহেতুং ধম্মং পটিচ্চ অকুসলো হেতু ধম্মো…পে… অব্যাকতো হেতু ধম্মো উপ্পজ্জতী’’তিআদিনা তিকদুকপট্ঠানে চ, ‘‘নকুসলং নসুখায ৰেদনায সম্পযুত্তং ধম্মং পটিচ্চ অকুসলো সুখায ৰেদনায সম্পযুত্তো ধম্মো…পে… অব্যাকতো সুখায ৰেদনায সম্পযুত্তো ধম্মো উপ্পজ্জতী’’তিআদিনা তিকতিকপট্ঠানে চ, ‘‘নহেতুং নসহেতুকং ধম্মং পটিচ্চ হেতু সহেতুকো ধম্মো উপ্পজ্জতী’’তিআদিনা দুকদুকপট্ঠানে চ, হেট্ঠা ৰুত্তেন পকারেন পাল়িনযো ৰেদিতব্বো. ইদঞ্চ কুসলাদিধম্মানং পচ্চযত্তং পটিক্খিপিত্ৰা তেসং পচ্চযুপ্পন্নভাৰঅপ্পটিক্খেপৰসেন পৰত্তত্তা ধম্মপচ্চনীযানুলোমপট্ঠানং নাম জাতং. তত্থ নকুসলং ধম্মন্তি কুসলস্স পচ্চযভাৰনিৰারণং. অকুসলো ধম্মো উপ্পজ্জতীতি অকুসলস্স উপ্পত্তিৰিধানং. কুসলং পন পটিচ্চ কুসলস্স উপ্পত্তিঅভাৰতো ‘‘কুসলো ধম্মো উপ্পজ্জতী’’তি অৰত্ৰা ‘‘অকুসলো ধম্মো উপ্পজ্জতী’’তি লব্ভমানপদৰসেন ৰুত্তং. কুসলং, হি অকুসলং, অব্যাকতং ৰা সহজাতপচ্চযং কত্ৰা উপ্পজ্জমানো কুসলো নাম নত্থি, তস্মা অকুসলস্স চ অব্যাকতস্স চ ৰসেন দেসনা কতা. এৰমঞ্ঞত্থ. এৰমেত্থ ধম্মপচ্চনীযানুলোমপট্ঠানে –

‘‘তিকঞ্চ পট্ঠানৰরং দুকুত্তমং,

দুকতিকঞ্চেৰ তিকদুকঞ্চ;

তিকতিকঞ্চেৰ দুকদুকঞ্চ,

ছ পচ্চনীযানুলোমম্হি নযা সুগম্ভীরা’’তি. –

ৰুত্তা ছ নযা ৰেদিতব্বা. পচ্চযৰসেন পনেত্থাপি তিকপট্ঠানাদীসু একেকস্মিং পচ্চযানুলোমাদীনং চতুন্নং চতুন্নং নযানং ৰসেন একেন পরিযাযেন চতুৰীসতিনযপটিমণ্ডিতমিদং ধম্মপচ্চনীযানুলোমপট্ঠানন্তি ৰেদিতব্বন্তি অযং পচ্চনীযানুলোমপট্ঠাননযো.

এৰমিদং ভগৰতা অনুলোমপট্ঠানাদীসু চতূসু একেকস্মিং পট্ঠানে তিকদুকাদীনঞ্ঞেৰ ছন্নং ছন্নং নযানং ৰসেন চতুৰীসতিনযপটিমণ্ডিতং সমন্তপট্ঠানমহাপকরণং দেসিতং. পচ্চযৰসেন পনেতেসু চতুৰীসতিযা পট্ঠানেসু একেকস্মিং পচ্চযানুলোমাদীনং চতুন্নং চতুন্নং নযানং ৰসেনেতং ছন্নৰুতিনযপটিমণ্ডিতং হোতি, ধম্মৰসেনেৰ চেতং পকরণং চতুৰীসতিসমন্তপট্ঠানং ৰুত্তন্তি অযমেত্থ ৰিভঙ্গনযো.

মোহৰিচ্ছেদনিযা অভিধম্মমাতিকত্থৰণ্ণনায

পট্ঠানমাতিকত্থৰণ্ণনা নিট্ঠিতা.

নিগমনকথা

এত্তাৰতা চ –

১. মাতিকাযাভিধম্মস্স, আরদ্ধা অত্থৰণ্ণনা;

মোহৰিচ্ছেদনী নাম, যা সা নিট্ঠমুপাগতা.

২. নিট্ঠং যথাযং সম্পত্তা, লজ্জীহি অভিপত্থিতা;

সব্বে নিট্ঠং তথা সন্তা, সমেন্তু সুমনোরথা.

৩. যো গম্ভীরো সসাদীনং, সমুদ্দোৰ ভযাৰহো;

কালেস্মিং ধীমতঞ্চাপি, অপি গন্থাৰলোকনে.