১০. গিলানদস্সনসুত্তং

৩৫২. তেন খো পন সমযেন চিত্তো গহপতি আবাধিকো হোতি দুক্খিতো বাল়্হগিলানো. অথ খো সম্বহুলা আরামদেৰতা ৰনদেৰতা রুক্খদেৰতা ওসধিতিণৰনপ্পতীসু অধিৰত্থা দেৰতা সঙ্গম্ম সমাগম্ম চিত্তং গহপতিং এতদৰোচুং – ‘‘পণিধেহি, গহপতি, অনাগতমদ্ধানং রাজা অস্সং চক্কৰত্তী’’তি.

এৰং ৰুত্তে, চিত্তো গহপতি তা আরামদেৰতা ৰনদেৰতা রুক্খদেৰতা ওসধিতিণৰনপ্পতীসু অধিৰত্থা দেৰতা এতদৰোচ – ‘‘তম্পি অনিচ্চং, তম্পি অদ্ধুৰং, তম্পি পহায গমনীয’’ন্তি. এৰং ৰুত্তে, চিত্তস্স গহপতিনো মিত্তামচ্চা ঞাতিসালোহিতা চিত্তং গহপতিং এতদৰোচুং – ‘‘সতিং, অয্যপুত্ত, উপট্ঠপেহি, মা ৰিপ্পলপী’’তি. ‘‘কিং তাহং ৰদামি যং মং তুম্হে এৰং ৰদেথ – ‘সতিং, অয্যপুত্ত, উপট্ঠপেহি, মা ৰিপ্পলপী’’’তি? ‘‘এৰং খো ত্ৰং, অয্যপুত্ত, ৰদেসি – ‘তম্পি অনিচ্চং, তম্পি অদ্ধুৰং, তম্পি পহায গমনীয’’’ন্তি. ‘‘তথা হি পন মং আরামদেৰতা ৰনদেৰতা রুক্খদেৰতা ওসধিতিণৰনপ্পতীসু অধিৰত্থা দেৰতা এৰমাহংসু – ‘পণিধেহি, গহপতি, অনাগতমদ্ধানং রাজা অস্সং চক্কৰত্তী’তি. তাহং এৰং ৰদামি – ‘তম্পি অনিচ্চং…পে… তম্পি পহায গমনীয’’’ন্তি. ‘‘কিং পন তা, অয্যপুত্ত, আরামদেৰতা ৰনদেৰতা রুক্খদেৰতা ওসধিতিণৰনপ্পতীসু অধিৰত্থা দেৰতা অত্থৰসং সম্পস্সমানা এৰমাহংসু – ‘পণিধেহি, গহপতি, অনাগতমদ্ধানং রাজা অস্সং চক্কৰত্তী’’’তি? ‘‘তাসং খো আরামদেৰতানং ৰনদেৰতানং রুক্খদেৰতানং ওসধিতিণৰনপ্পতীসু অধিৰত্থানং দেৰতানং এৰং হোতি – ‘অযং খো চিত্তো গহপতি, সীলৰা [সীলৰন্তো (ক.)] কল্যাণধম্মো. সচে পণিদহিস্সতি – অনাগতমদ্ধানং রাজা অস্সং চক্কৰত্তী’তি, ‘তস্স খো অযং ইজ্ঝিস্সতি, সীলৰতো চেতোপণিধি ৰিসুদ্ধত্তা ধম্মিকো ধম্মিকং ফলং অনুপস্সতী’তি. ইমং খো তা আরামদেৰতা ৰনদেৰতা রুক্খদেৰতা ওসধিতিণৰনপ্পতীসু অধিৰত্থা দেৰতা অত্থৰসং সম্পস্সমানা এৰমাহংসু – ‘পণিধেহি, গহপতি, অনাগতমদ্ধানং রাজা অস্সং চক্কৰত্তী’তি. তাহং এৰং ৰদামি – ‘তম্পি অনিচ্চং, তম্পি অদ্ধুৰং, তম্পি পহায গমনীয’’’ন্তি.

‘‘তেন হি, অয্যপুত্ত, অম্হেপি ওৰদাহী’’তি. ‘‘তস্মা হি ৰো এৰং সিক্খিতব্বং – বুদ্ধে অৰেচ্চপ্পসাদেন সমন্নাগতা ভৰিস্সাম – ‘ইতিপি সো ভগৰা অরহং সম্মাসম্বুদ্ধো ৰিজ্জাচরণসম্পন্নো সুগতো লোকৰিদূ অনুত্তরো পুরিসদম্মসারথি সত্থা দেৰমনুস্সানং বুদ্ধো ভগৰা’তি. ধম্মে অৰেচ্চপ্পসাদেন সমন্নাগতা ভৰিস্সাম – ‘স্ৰাক্খাতো ভগৰতা ধম্মো সন্দিট্ঠিকো অকালিকো এহিপস্সিকো ওপনেয্যিকো পচ্চত্তং ৰেদিতব্বো ৰিঞ্ঞূহী’তি. সঙ্ঘে অৰেচ্চপ্পসাদেন সমন্নাগতা ভৰিস্সাম – ‘সুপ্পটিপন্নো ভগৰতো সাৰকসঙ্ঘো, উজুপ্পটিপন্নো ভগৰতো সাৰকসঙ্ঘো, ঞাযপ্পটিপন্নো ভগৰতো সাৰকসঙ্ঘো, সামীচিপ্পটিপন্নো ভগৰতো সাৰকসঙ্ঘো, যদিদং চত্তারি পুরিসযুগানি অট্ঠ পুরিসপুগ্গলা এস ভগৰতো সাৰকসঙ্ঘো আহুনেয্যো পাহুনেয্যো দক্খিণেয্যো অঞ্জলিকরণীযো অনুত্তরং পুঞ্ঞক্খেত্তং লোকস্সা’তি. যং খো পন কিঞ্চি কুলে দেয্যধম্মং সব্বং তং অপ্পটিৰিভত্তং ভৰিস্সতি সীলৰন্তেহি কল্যাণধম্মেহীতি এৰঞ্হি ৰো সিক্খিতব্ব’’ন্তি. অথ খো চিত্তো গহপতি মিত্তামচ্চে ঞাতিসালোহিতে বুদ্ধে চ ধম্মে চ সঙ্ঘে চ চাগে চ সমাদপেত্ৰা কালমকাসীতি. দসমং.

চিত্তসংযুত্তং সমত্তং.