৩. ধম্মৰাদীপঞ্হাসুত্তং

৩১৬. ‘‘কে নু খো, আৰুসো সারিপুত্ত, লোকে ধম্মৰাদিনো, কে লোকে সুপ্পটিপন্না, কে লোকে সুগতা’’তি? ‘‘যে খো, আৰুসো, রাগপ্পহানায ধম্মং দেসেন্তি, দোসপ্পহানায ধম্মং দেসেন্তি, মোহপ্পহানায ধম্মং দেসেন্তি, তে লোকে ধম্মৰাদিনো. যে খো, আৰুসো, রাগস্স পহানায পটিপন্না, দোসস্স পহানায পটিপন্না, মোহস্স পহানায পটিপন্না, তে লোকে সুপ্পটিপন্না. যেসং খো, আৰুসো, রাগো পহীনো উচ্ছিন্নমূলো তালাৰত্থুকতো অনভাৰঙ্কতো আযতিং অনুপ্পাদধম্মো, দোসো পহীনো উচ্ছিন্নমূলো তালাৰত্থুকতো অনভাৰঙ্কতো আযতিং অনুপ্পাদধম্মো, মোহো পহীনো উচ্ছিন্নমূলো তালাৰত্থুকতো অনভাৰঙ্কতো আযতিং অনুপ্পাদধম্মো, তে লোকে সুগতা’’তি.

‘‘অত্থি পনাৰুসো, মগ্গো অত্থি পটিপদা এতস্স রাগস্স দোসস্স মোহস্স পহানাযা’’তি? ‘‘অত্থি খো, আৰুসো, মগ্গো অত্থি পটিপদা এতস্স রাগস্স দোসস্স মোহস্স পহানাযা’’তি. ‘‘কতমো, পনাৰুসো, মগ্গো কতমা পটিপদা এতস্স রাগস্স দোসস্স মোহস্স পহানাযা’’তি? ‘‘অযমেৰ খো, আৰুসো, অরিযো অট্ঠঙ্গিকো মগ্গো এতস্স রাগস্স দোসস্স মোহস্স পহানায, সেয্যথিদং – সম্মাদিট্ঠি সম্মাসঙ্কপ্পো সম্মাৰাচা সম্মাকম্মন্তো সম্মাআজীৰো সম্মাৰাযামো সম্মাসতি সম্মাসমাধি. অযং খো, আৰুসো, মগ্গো অযং পটিপদা এতস্স রাগস্স দোসস্স মোহস্স পহানাযা’’তি. ‘‘ভদ্দকো, আৰুসো, মগ্গো ভদ্দিকা পটিপদা, এতস্স রাগস্স দোসস্স মোহস্স পহানায. অলঞ্চ পনাৰুসো সারিপুত্ত, অপ্পমাদাযা’’তি. ততিযং.