১১. ওঘপঞ্হাসুত্তং

৩২৪. ‘‘‘ওঘো, ওঘো’তি, আৰুসো সারিপুত্ত, ৰুচ্চতি. কতমো নু খো, আৰুসো, ওঘো’’তি? ‘‘চত্তারোমে, আৰুসো, ওঘা. কামোঘো, ভৰোঘো, দিট্ঠোঘো, অৰিজ্জোঘো – ইমে খো, আৰুসো, চত্তারো ওঘা’’তি. ‘‘অত্থি পনাৰুসো, মগ্গো অত্থি পটিপদা, এতেসং ওঘানং পহানাযা’’তি? ‘‘অত্থি খো, আৰুসো, মগ্গো অত্থি পটিপদা, এতেসং ওঘানং পহানাযা’’তি. ‘‘কতমো পনাৰুসো, মগ্গো কতমা পটিপদা, এতেসং ওঘানং পহানাযা’’তি? ‘‘অযমেৰ খো, আৰুসো, অরিযো অট্ঠঙ্গিকো মগ্গো, এতেসং ওঘানং পহানায, সেয্যথিদং – সম্মাদিট্ঠি সম্মাসঙ্কপ্পো সম্মাৰাচা সম্মাকম্মন্তো সম্মাআজীৰো সম্মাৰাযামো সম্মাসতি সম্মাসমাধি. অযং খো, আৰুসো, মগ্গো অযং পটিপদা, এতেসং ওঘানং পহানাযা’’তি. ‘‘ভদ্দকো, আৰুসো, মগ্গো ভদ্দিকা পটিপদা, এতেসং ওঘানং পহানায. অলঞ্চ পনাৰুসো সারিপুত্ত, অপ্পমাদাযা’’তি. একাদসমং.