৬. চতুত্থউপোসথসুত্তং

৩৪৭. সাৰত্থিনিদানং. একমন্তং নিসিন্নো খো সো ভিক্খু ভগৰন্তং এতদৰোচ – ‘‘কো নু খো, ভন্তে, হেতু, কো পচ্চযো, যেন মিধেকচ্চে ওপপাতিকা নাগা উপোসথং উপৰসন্তি ৰোস্সট্ঠকাযা চ ভৰন্তী’’তি?

‘‘ইধ, ভিক্খু, একচ্চানং ওপপাতিকানং নাগানং এৰং হোতি – ‘মযং খো পুব্বে কাযেন দ্ৰযকারিনো অহুম্হ, ৰাচায দ্ৰযকারিনো, মনসা দ্ৰযকারিনো. তে মযং কাযেন দ্ৰযকারিনো, ৰাচায দ্ৰযকারিনো, মনসা দ্ৰযকারিনো, কাযস্স ভেদা পরং মরণা ওপপাতিকানং নাগানং সহব্যতং উপপন্না. সচজ্জ মযং কাযেন সুচরিতং চরেয্যাম, ৰাচায… মনসা সুচরিতং চরেয্যাম, এৰং মযং কাযস্স ভেদা পরং মরণা সুগতিং সগ্গং লোকং উপপজ্জেয্যাম. হন্দ, মযং এতরহি কাযেন সুচরিতং চরাম, ৰাচায… মনসা সুচরিতং চরামা’তি. অযং খো, ভিক্খু, হেতু, অযং পচ্চযো, যেন মিধেকচ্চে ওপপাতিকা নাগা উপোসথং উপৰসন্তি ৰোস্সট্ঠকাযা চ ভৰন্তী’’তি. ছট্ঠং.