৩. উপোসথসুত্তং

৩৪৪. একং সমযং ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. অথ খো অঞ্ঞতরো ভিক্খু যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি. একমন্তং নিসিন্নো খো সো ভিক্খু ভগৰন্তং এতদৰোচ – ‘‘কো নু খো, ভন্তে, হেতু, কো পচ্চযো, যেন মিধেকচ্চে অণ্ডজা নাগা উপোসথং উপৰসন্তি ৰোস্সট্ঠকাযা চ ভৰন্তী’’তি?

‘‘ইধ, ভিক্খু, একচ্চানং অণ্ডজানং নাগানং এৰং হোতি – ‘মযং খো পুব্বে কাযেন দ্ৰযকারিনো অহুম্হ, ৰাচায দ্ৰযকারিনো, মনসা দ্ৰযকারিনো. তে মযং কাযেন দ্ৰযকারিনো, ৰাচায দ্ৰযকারিনো, মনসা দ্ৰযকারিনো, কাযস্স ভেদা পরং মরণা অণ্ডজানং নাগানং সহব্যতং উপপন্না. সচজ্জ মযং কাযেন সুচরিতং চরেয্যাম, ৰাচায সুচরিতং চরেয্যাম, মনসা সুচরিতং চরেয্যাম, এৰং মযং কাযস্স ভেদা পরং মরণা সুগতিং সগ্গং লোকং উপপজ্জেয্যাম. হন্দ, মযং এতরহি কাযেন সুচরিতং চরাম, ৰাচায সুচরিতং চরাম, মনসা সুচরিতং চরামা’তি. অযং খো, ভিক্খু, হেতু, অযং পচ্চযো, যেন মিধেকচ্চে অণ্ডজা নাগা উপোসথং উপৰসন্তি ৰোস্সট্ঠকাযা চ ভৰন্তী’’তি. ততিযং.