৫. দসকম্মপথসুত্তং

১১১. সাৰত্থিযং ৰিহরতি…পে… ‘‘ধাতুসোৰ, ভিক্খৰে, সত্তা সংসন্দন্তি সমেন্তি. পাণাতিপাতিনো পাণাতিপাতীহি সদ্ধিং সংসন্দন্তি সমেন্তি; অদিন্নাদাযিনো…পে… কামেসুমিচ্ছাচারিনো… মুসাৰাদিনো… পিসুণৰাচা… ফরুসৰাচা… সম্ফপ্পলাপিনো সম্ফপ্পলাপীহি সদ্ধিং সংসন্দন্তি সমেন্তি; অভিজ্ঝালুনো অভিজ্ঝালূহি সদ্ধিং সংসন্দন্তি সমেন্তি; ব্যাপন্নচিত্তা ব্যাপন্নচিত্তেহি সদ্ধিং সংসন্দন্তি সমেন্তি; মিচ্ছাদিট্ঠিকা মিচ্ছাদিট্ঠিকেহি সদ্ধিং সংসন্দন্তি সমেন্তি’’.

‘‘পাণাতিপাতা পটিৰিরতা পাণাতিপাতা পটিৰিরতেহি সদ্ধিং সংসন্দন্তি সমেন্তি; অদিন্নাদানা পটিৰিরতা…পে… কামেসুমিচ্ছাচারা পটিৰিরতা… মুসাৰাদা পটিৰিরতা… পিসুণায ৰাচায… ফরুসায ৰাচায… সম্ফপ্পলাপা পটিৰিরতা সম্ফপ্পলাপা পটিৰিরতেহি সদ্ধিং সংসন্দন্তি সমেন্তি; অনভিজ্ঝালুনো অনভিজ্ঝালূহি সদ্ধিং সংসন্দন্তি সমেন্তি; অব্যাপন্নচিত্তা অব্যাপন্নচিত্তেহি সদ্ধিং সংসন্দন্তি সমেন্তি; সম্মাদিট্ঠিকা সম্মাদিট্ঠিকেহি সদ্ধিং সংসন্দন্তি সমেন্তী’’তি. পঞ্চমং.