৬. সগাথাসুত্তং

১০০. সাৰত্থিযং ৰিহরতি…পে… ‘‘ধাতুসোৰ, ভিক্খৰে, সত্তা সংসন্দন্তি সমেন্তি. হীনাধিমুত্তিকা হীনাধিমুত্তিকেহি সদ্ধিং সংসন্দন্তি সমেন্তি. অতীতম্পি খো, ভিক্খৰে, অদ্ধানং ধাতুসোৰ সত্তা সংসন্দিংসু সমিংসু. হীনাধিমুত্তিকা হীনাধিমুত্তিকেহি সদ্ধিং সংসন্দিংসু সমিংসু’’.

‘‘অনাগতম্পি খো, ভিক্খৰে, অদ্ধানং ধাতুসোৰ সত্তা সংসন্দিস্সন্তি সমেস্সন্তি. হীনাধিমুত্তিকা হীনাধিমুত্তিকেহি সদ্ধিং সংসন্দিস্সন্তি সমেস্সন্তি.

‘‘এতরহিপি খো, ভিক্খৰে, পচ্চুপ্পন্নং অদ্ধানং ধাতুসোৰ সত্তা সংসন্দন্তি সমেন্তি. হীনাধিমুত্তিকা হীনাধিমুত্তিকেহি সদ্ধিং সংসন্দন্তি সমেন্তি.

‘‘সেয্যথাপি, ভিক্খৰে, গূথো গূথেন সংসন্দতি সমেতি; মুত্তং মুত্তেন সংসন্দতি সমেতি; খেল়ো খেল়েন সংসন্দতি সমেতি; পুব্বো পুব্বেন সংসন্দতি সমেতি; লোহিতং লোহিতেন সংসন্দতি সমেতি; এৰমেৰ খো, ভিক্খৰে, ধাতুসোৰ [সব্বত্থপি এৰমেৰ দিস্সতি] সত্তা সংসন্দন্তি সমেন্তি. হীনাধিমুত্তিকা হীনাধিমুত্তিকেহি সদ্ধিং সংসন্দন্তি সমেন্তি. অতীতম্পি খো অদ্ধানং…পে… অনাগতম্পি খো অদ্ধানং…পে… এতরহিপি খো পচ্চুপ্পন্নং অদ্ধানং ধাতুসোৰ সত্তা সংসন্দন্তি সমেন্তি. হীনাধিমুত্তিকা হীনাধিমুত্তিকেহি সদ্ধিং সংসন্দন্তি সমেন্তি.

‘‘ধাতুসোৰ ভিক্খৰে, সত্তা সংসন্দন্তি সমেন্তি. কল্যাণাধিমুত্তিকা কল্যাণাধিমুত্তিকেহি সদ্ধিং সংসন্দন্তি সমেন্তি. অতীতম্পি খো, ভিক্খৰে, অদ্ধানং ধাতুসোৰ সত্তা সংসন্দিংসু সমিংসু. কল্যাণাধিমুত্তিকা কল্যাণাধিমুত্তিকেহি সদ্ধিং সংসন্দিংসু সমিংসু.

‘‘অনাগতম্পি খো, ভিক্খৰে, অদ্ধানং…পে… এতরহিপি খো, ভিক্খৰে, পচ্চুপ্পন্নং অদ্ধানং ধাতুসোৰ সত্তা সংসন্দন্তি সমেন্তি. কল্যাণাধিমুত্তিকা কল্যাণাধিমুত্তিকেহি সদ্ধিং সংসন্দন্তি সমেন্তি.

‘‘সেয্যথাপি, ভিক্খৰে, খীরং খীরেন সংসন্দতি সমেতি; তেলং তেলেন সংসন্দতি সমেতি; সপ্পি সপ্পিনা সংসন্দতি সমেতি; মধু মধুনা সংসন্দতি সমেতি; ফাণিতং ফাণিতেন সংসন্দতি সমেতি; এৰমেৰ খো, ভিক্খৰে, ধাতুসোৰ সত্তা সংসন্দন্তি সমেন্তি. কল্যাণাধিমুত্তিকা কল্যাণাধিমুত্তিকেহি সদ্ধিং সংসন্দন্তি সমেন্তি. অতীতম্পি খো অদ্ধানং… অনাগতম্পি খো অদ্ধানং… এতরহিপি খো পচ্চুপ্পন্নং অদ্ধানং ধাতুসোৰ সত্তা সংসন্দন্তি সমেন্তি. কল্যাণাধিমুত্তিকা কল্যাণাধিমুত্তিকেহি সদ্ধিং সংসন্দন্তি সমেন্তী’’তি.

ইদমৰোচ ভগৰা. ইদং ৰত্ৰান সুগতো অথাপরং এতদৰোচ সত্থা –

‘‘সংসগ্গা ৰনথো জাতো, অসংসগ্গেন ছিজ্জতি;

পরিত্তং দারুমারুয্হ, যথা সীদে মহণ্ণৰে.

‘‘এৰং কুসীতমাগম্ম, সাধুজীৰিপি সীদতি;

তস্মা তং পরিৰজ্জেয্য, কুসীতং হীনৰীরিযং.

‘‘পৰিৰিত্তেহি অরিযেহি, পহিতত্তেহি ঝাযীহি [ঝাযিহি (সী.), ঝাযিভি (স্যা. কং.)];

নিচ্চং আরদ্ধৰীরিযেহি, পণ্ডিতেহি সহাৰসে’’তি.