৭. সঞ্ঞানানত্তসুত্তং

৯১. সাৰত্থিযং ৰিহরতি…পে… ‘‘ভদন্তে’’তি তে ভিক্খূ ভগৰতো পচ্চস্সোসুং. ভগৰা এতদৰোচ – ‘‘ধাতুনানত্তং, ভিক্খৰে, পটিচ্চ উপ্পজ্জতি সঞ্ঞানানত্তং, সঞ্ঞানানত্তং পটিচ্চ উপ্পজ্জতি সঙ্কপ্পনানত্তং, সঙ্কপ্পনানত্তং পটিচ্চ উপ্পজ্জতি ছন্দনানত্তং, ছন্দনানত্তং পটিচ্চ উপ্পজ্জতি পরিল়াহনানত্তং, পরিল়াহনানত্তং পটিচ্চ উপ্পজ্জতি পরিযেসনানানত্তং. কতমঞ্চ, ভিক্খৰে, ধাতুনানত্তং? রূপধাতু…পে… ধম্মধাতু – ইদং ৰুচ্চতি, ভিক্খৰে, ধাতুনানত্তং’’.

‘‘কথঞ্চ, ভিক্খৰে, ধাতুনানত্তং পটিচ্চ উপ্পজ্জতি সঞ্ঞানানত্তং, সঞ্ঞানানত্তং পটিচ্চ উপ্পজ্জতি সঙ্কপ্পনানত্তং, সঙ্কপ্পনানত্তং পটিচ্চ উপ্পজ্জতি ছন্দনানত্তং, ছন্দনানত্তং পটিচ্চ উপ্পজ্জতি পরিল়াহনানত্তং, পরিল়াহনানত্তং পটিচ্চ উপ্পজ্জতি পরিযেসনানানত্তং?

‘‘রূপধাতুং, ভিক্খৰে, পটিচ্চ উপ্পজ্জতি রূপসঞ্ঞা, রূপসঞ্ঞং পটিচ্চ উপ্পজ্জতি রূপসঙ্কপ্পো, রূপসঙ্কপ্পং পটিচ্চ উপ্পজ্জতি রূপচ্ছন্দো, রূপচ্ছন্দং পটিচ্চ উপ্পজ্জতি রূপপরিল়াহো, রূপপরিল়াহং পটিচ্চ উপ্পজ্জতি রূপপরিযেসনা…পে… ধম্মধাতুং পটিচ্চ উপ্পজ্জতি ধম্মসঞ্ঞা, ধম্মসঞ্ঞং পটিচ্চ উপ্পজ্জতি ধম্মসঙ্কপ্পো, ধম্মসঙ্কপ্পং পটিচ্চ উপ্পজ্জতি ধম্মচ্ছন্দো, ধম্মচ্ছন্দং পটিচ্চ উপ্পজ্জতি ধম্মপরিল়াহো, ধম্মপরিল়াহং পটিচ্চ উপ্পজ্জতি ধম্মপরিযেসনা.

‘‘এৰং, খো, ভিক্খৰে, ধাতুনানত্তং পটিচ্চ উপ্পজ্জতি সঞ্ঞানানত্তং, সঞ্ঞানানত্তং পটিচ্চ উপ্পজ্জতি সঙ্কপ্পনানত্তং, সঙ্কপ্পনানত্তং পটিচ্চ উপ্পজ্জতি ছন্দনানত্তং, ছন্দনানত্তং পটিচ্চ উপ্পজ্জতি পরিল়াহনানত্তং, পরিল়াহনানত্তং পটিচ্চ উপ্পজ্জতি পরিযেসনানানত্ত’’ন্তি. সত্তমং.