৯. সম্মাদিট্ঠিসুত্তং

৮৯. এৰং মে সুতং – একং সমযং ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. তত্র খো আযস্মা সারিপুত্তো ভিক্খূ আমন্তেসি – ‘‘আৰুসো ভিক্খৰে’’তি. ‘‘আৰুসো’’তি খো তে ভিক্খূ আযস্মতো সারিপুত্তস্স পচ্চস্সোসুং. আযস্মা সারিপুত্তো এতদৰোচ –

‘‘‘সম্মাদিট্ঠি [সম্মাদিট্ঠী (সী. স্যা.)] সম্মাদিট্ঠী’তি, আৰুসো, ৰুচ্চতি. কিত্তাৰতা নু খো, আৰুসো, অরিযসাৰকো সম্মাদিট্ঠি হোতি, উজুগতাস্স দিট্ঠি, ধম্মে অৰেচ্চপ্পসাদেন সমন্নাগতো, আগতো ইমং সদ্ধম্ম’’ন্তি?

‘‘দূরতোপি খো মযং, আৰুসো, আগচ্ছেয্যাম আযস্মতো সারিপুত্তস্স সন্তিকে এতস্স ভাসিতস্স অত্থমঞ্ঞাতুং. সাধু ৰতাযস্মন্তংযেৰ সারিপুত্তং পটিভাতু এতস্স ভাসিতস্স অত্থো. আযস্মতো সারিপুত্তস্স সুত্ৰা ভিক্খূ ধারেস্সন্তী’’তি. ‘‘তেন হি, আৰুসো, সুণাথ, সাধুকং মনসি করোথ, ভাসিস্সামী’’তি. ‘‘এৰমাৰুসো’’তি খো তে ভিক্খূ আযস্মতো সারিপুত্তস্স পচ্চস্সোসুং. আযস্মা সারিপুত্তো এতদৰোচ –

‘‘যতো খো, আৰুসো, অরিযসাৰকো অকুসলঞ্চ পজানাতি, অকুসলমূলঞ্চ পজানাতি, কুসলঞ্চ পজানাতি, কুসলমূলঞ্চ পজানাতি – এত্তাৰতাপি খো, আৰুসো, অরিযসাৰকো সম্মাদিট্ঠি হোতি, উজুগতাস্স দিট্ঠি, ধম্মে অৰেচ্চপ্পসাদেন সমন্নাগতো, আগতো ইমং সদ্ধম্মং. কতমং পনাৰুসো, অকুসলং, কতমং অকুসলমূলং, কতমং কুসলং, কতমং কুসলমূলং? পাণাতিপাতো খো, আৰুসো, অকুসলং, অদিন্নাদানং অকুসলং, কামেসুমিচ্ছাচারো অকুসলং, মুসাৰাদো অকুসলং, পিসুণা ৰাচা [পিসুণৰাচা (ক.)] অকুসলং, ফরুসা ৰাচা [ফরুসৰাচা (ক.)] অকুসলং, সম্ফপ্পলাপো অকুসলং, অভিজ্ঝা অকুসলং, ব্যাপাদো অকুসলং, মিচ্ছাদিট্ঠি অকুসলং – ইদং ৰুচ্চতাৰুসো অকুসলং. কতমঞ্চাৰুসো, অকুসলমূলং? লোভো অকুসলমূলং, দোসো অকুসলমূলং, মোহো অকুসলমূলং – ইদং ৰুচ্চতাৰুসো, অকুসলমূলং.

‘‘কতমঞ্চাৰুসো, কুসলং? পাণাতিপাতা ৰেরমণী কুসলং, অদিন্নাদানা ৰেরমণী কুসলং, কামেসুমিচ্ছাচারা ৰেরমণী কুসলং, মুসাৰাদা ৰেরমণী কুসলং, পিসুণায ৰাচায ৰেরমণী কুসলং, ফরুসায ৰাচায ৰেরমণী কুসলং, সম্ফপ্পলাপা ৰেরমণী কুসলং, অনভিজ্ঝা কুসলং, অব্যাপাদো কুসলং, সম্মাদিট্ঠি কুসলং – ইদং ৰুচ্চতাৰুসো, কুসলং. কতমঞ্চাৰুসো, কুসলমূলং? অলোভো কুসলমূলং, অদোসো কুসলমূলং, অমোহো কুসলমূলং – ইদং ৰুচ্চতাৰুসো, কুসলমূলং.

‘‘যতো খো, আৰুসো, অরিযসাৰকো এৰং অকুসলং পজানাতি, এৰং অকুসলমূলং পজানাতি, এৰং কুসলং পজানাতি, এৰং কুসলমূলং পজানাতি, সো সব্বসো রাগানুসযং পহায, পটিঘানুসযং পটিৰিনোদেত্ৰা, ‘অস্মী’তি দিট্ঠিমানানুসযং সমূহনিত্ৰা, অৰিজ্জং পহায ৰিজ্জং উপ্পাদেত্ৰা, দিট্ঠেৰধম্মে দুক্খস্সন্তকরো হোতি – এত্তাৰতাপি খো, আৰুসো, অরিযসাৰকো সম্মাদিট্ঠি হোতি, উজুগতাস্স দিট্ঠি, ধম্মে অৰেচ্চপ্পসাদেন সমন্নাগতো, আগতো ইমং সদ্ধম্ম’’ন্তি.

৯০. ‘‘সাধাৰুসো’’তি খো তে ভিক্খূ আযস্মতো সারিপুত্তস্স ভাসিতং অভিনন্দিত্ৰা অনুমোদিত্ৰা আযস্মন্তং সারিপুত্তং উত্তরি [উত্তরিং (সী. স্যা. পী.)] পঞ্হং অপুচ্ছুং [অপুচ্ছিংসু (স্যা.)] – ‘‘সিযা পনাৰুসো, অঞ্ঞোপি পরিযাযো যথা অরিযসাৰকো সম্মাদিট্ঠি হোতি, উজুগতাস্স দিট্ঠি, ধম্মে অৰেচ্চপ্পসাদেন সমন্নাগতো, আগতো ইমং সদ্ধম্ম’’ন্তি?

‘‘সিযা, আৰুসো. যতো খো, আৰুসো, অরিযসাৰকো আহারঞ্চ পজানাতি, আহারসমুদযঞ্চ পজানাতি, আহারনিরোধঞ্চ পজানাতি, আহারনিরোধগামিনিং পটিপদঞ্চ পজানাতি – এত্তাৰতাপি খো, আৰুসো, অরিযসাৰকো সম্মাদিট্ঠি হোতি, উজুগতাস্স দিট্ঠি, ধম্মে অৰেচ্চপ্পসাদেন সমন্নাগতো, আগতো ইমং সদ্ধম্মং. কতমো পনাৰুসো, আহারো, কতমো আহারসমুদযো, কতমো আহারনিরোধো, কতমা আহারনিরোধগামিনী পটিপদা? চত্তারোমে, আৰুসো, আহারা ভূতানং ৰা সত্তানং ঠিতিযা, সম্ভৰেসীনং ৰা অনুগ্গহায. কতমে চত্তারো? কবল়ীকারো আহারো ওল়ারিকো ৰা সুখুমো ৰা, ফস্সো দুতিযো, মনোসঞ্চেতনা ততিযা, ৰিঞ্ঞাণং চতুত্থং. তণ্হাসমুদযা আহারসমুদযো, তণ্হানিরোধা আহারনিরোধো, অযমেৰ অরিযো অট্ঠঙ্গিকো মগ্গো আহারনিরোধগামিনী পটিপদা, সেয্যথিদং – সম্মাদিট্ঠি সম্মাসঙ্কপ্পো সম্মাৰাচা সম্মাকম্মন্তো, সম্মাআজীৰো সম্মাৰাযামো সম্মাসতি সম্মাসমাধি’.

‘‘যতো খো, আৰুসো, অরিযসাৰকো এৰং আহারং পজানাতি, এৰং আহারসমুদযং পজানাতি, এৰং আহারনিরোধং পজানাতি, এৰং আহারনিরোধগামিনিং পটিপদং পজানাতি, সো সব্বসো রাগানুসযং পহায, পটিঘানুসযং পটিৰিনোদেত্ৰা, ‘অস্মী’তি দিট্ঠিমানানুসযং সমূহনিত্ৰা, অৰিজ্জং পহায ৰিজ্জং উপ্পাদেত্ৰা, দিট্ঠেৰধম্মে দুক্খস্সন্তকরো হোতি – এত্তাৰতাপি খো, আৰুসো, অরিযসাৰকো সম্মাদিট্ঠি হোতি, উজুগতাস্স দিট্ঠি, ধম্মে অৰেচ্চপ্পসাদেন সমন্নাগতো, আগতো ইমং সদ্ধম্ম’’ন্তি.

৯১. ‘‘সাধাৰুসো’’তি খো তে ভিক্খূ আযস্মতো সারিপুত্তস্স ভাসিতং অভিনন্দিত্ৰা অনুমোদিত্ৰা আযস্মন্তং সারিপুত্তং উত্তরি পঞ্হং অপুচ্ছুং – ‘‘সিযা পনাৰুসো, অঞ্ঞোপি পরিযাযো যথা অরিযসাৰকো সম্মাদিট্ঠি হোতি, উজুগতাস্স দিট্ঠি, ধম্মে অৰেচ্চপ্পসাদেন সমন্নাগতো, আগতো ইমং সদ্ধম্ম’’ন্তি?

‘‘সিযা, আৰুসো. যতো খো, আৰুসো, অরিযসাৰকো দুক্খঞ্চ পজানাতি, দুক্খসমুদযঞ্চ পজানাতি, দুক্খনিরোধঞ্চ পজানাতি, দুক্খনিরোধগামিনিং পটিপদঞ্চ পজানাতি – এত্তাৰতাপি খো, আৰুসো, অরিযসাৰকো সম্মাদিট্ঠি হোতি, উজুগতাস্স দিট্ঠি, ধম্মে অৰেচ্চপ্পসাদেন সমন্নাগতো, আগতো ইমং সদ্ধম্মং. কতমং পনাৰুসো, দুক্খং, কতমো দুক্খসমুদযো, কতমো দুক্খনিরোধো, কতমা দুক্খনিরোধগামিনী পটিপদা? জাতিপি দুক্খা, জরাপি দুক্খা, মরণম্পি দুক্খং, সোকপরিদেৰদুক্খদোমনস্সুপাযাসাপি দুক্খা, অপ্পিযেহি সম্পযোগোপি দুক্খো, পিযেহি ৰিপ্পযোগোপি দুক্খো, যম্পিচ্ছং ন লভতি তম্পি দুক্খং, সংখিত্তেন পঞ্চুপাদানক্খন্ধা [পঞ্চুপাদানক্খন্ধাপি (ক.)] দুক্খা – ইদং ৰুচ্চতাৰুসো, দুক্খং. কতমো চাৰুসো, দুক্খসমুদযো? যাযং তণ্হা পোনোব্ভৰিকা নন্দীরাগসহগতা [পোনোভৰিকা (সী. পী.)] তত্রতত্রাভিনন্দিনী [নন্দিরাগসহগতা (সী. পী.)], সেয্যথিদং, কামতণ্হা ভৰতণ্হা ৰিভৰতণ্হা – অযং ৰুচ্চতাৰুসো, দুক্খসমুদযো. কতমো চাৰুসো, দুক্খনিরোধো? যো তস্সাযেৰ তণ্হায অসেসৰিরাগনিরোধো চাগো পটিনিস্সগ্গো মুত্তি অনালযো – অযং ৰুচ্চতাৰুসো, দুক্খনিরোধো. কতমা চাৰুসো, দুক্খনিরোধগামিনী পটিপদা? অযমেৰ অরিযো অট্ঠঙ্গিকো মগ্গো, সেয্যথিদং, সম্মাদিট্ঠি…পে… সম্মাসমাধি – অযং ৰুচ্চতাৰুসো, দুক্খনিরোধগামিনী পটিপদা.

‘‘যতো খো, আৰুসো, অরিযসাৰকো এৰং দুক্খং পজানাতি, এৰং দুক্খসমুদযং পজানাতি, এৰং দুক্খনিরোধং পজানাতি, এৰং দুক্খনিরোধগামিনিং পটিপদং পজানাতি, সো সব্বসো রাগানুসযং পহায, পটিঘানুসযং পটিৰিনোদেত্ৰা, ‘অস্মী’তি দিট্ঠিমানানুসযং সমূহনিত্ৰা, অৰিজ্জং পহায ৰিজ্জং উপ্পাদেত্ৰা, দিট্ঠেৰধম্মে দুক্খস্সন্তকরো হোতি – এত্তাৰতাপি খো, আৰুসো, অরিযসাৰকো সম্মাদিট্ঠি হোতি, উজুগতাস্স দিট্ঠি, ধম্মে অৰেচ্চপ্পসাদেন সমন্নাগতো, আগতো ইমং সদ্ধম্ম’’ন্তি.

৯২. ‘‘সাধাৰুসো’’তি খো তে ভিক্খূ আযস্মতো সারিপুত্তস্স ভাসিতং অভিনন্দিত্ৰা অনুমোদিত্ৰা আযস্মন্তং সারিপুত্তং উত্তরি পঞ্হং অপুচ্ছুং – ‘‘সিযা পনাৰুসো, অঞ্ঞোপি পরিযাযো যথা অরিযসাৰকো সম্মাদিট্ঠি হোতি, উজুগতাস্স দিট্ঠি, ধম্মে অৰেচ্চপ্পসাদেন সমন্নাগতো, আগতো ইমং সদ্ধম্ম’’ন্তি?

‘‘সিযা, আৰুসো. যতো খো, আৰুসো, অরিযসাৰকো জরামরণঞ্চ পজানাতি, জরামরণসমুদযঞ্চ পজানাতি, জরামরণনিরোধঞ্চ পজানাতি, জরামরণনিরোধগামিনিং পটিপদঞ্চ পজানাতি – এত্তাৰতাপি খো, আৰুসো, অরিযসাৰকো সম্মাদিট্ঠি হোতি, উজুগতাস্স দিট্ঠি, ধম্মে অৰেচ্চপ্পসাদেন সমন্নাগতো, আগতো ইমং সদ্ধম্মং. কতমং পনাৰুসো, জরামরণং, কতমো জরামরণসমুদযো, কতমো জরামরণনিরোধো, কতমা জরামরণনিরোধগামিনী পটিপদা? যা তেসং তেসং সত্তানং তম্হি তম্হি সত্তনিকাযে জরা জীরণতা খণ্ডিচ্চং পালিচ্চং ৰলিত্তচতা আযুনো সংহানি ইন্দ্রিযানং পরিপাকো – অযং ৰুচ্চতাৰুসো, জরা. কতমঞ্চাৰুসো, মরণং? যা [যং (পী. ক.), সতিপট্ঠানসুত্তেপি] তেসং তেসং সত্তানং তম্হা তম্হা সত্তনিকাযা চুতি চৰনতা ভেদো অন্তরধানং মচ্চু মরণং কালংকিরিযা খন্ধানং ভেদো, কল়েৰরস্স নিক্খেপো, জীৰিতিন্দ্রিযস্সুপচ্ছেদো – ইদং ৰুচ্চতাৰুসো, মরণং. ইতি অযঞ্চ জরা ইদঞ্চ মরণং – ইদং ৰুচ্চতাৰুসো, জরামরণং. জাতিসমুদযা জরামরণসমুদযো, জাতিনিরোধা জরামরণনিরোধো, অযমেৰ অরিযো অট্ঠঙ্গিকো মগ্গো জরামরণনিরোধগামিনী পটিপদা, সেয্যথিদং – সম্মাদিট্ঠি…পে… সম্মাসমাধি.

‘‘যতো খো, আৰুসো, অরিযসাৰকো এৰং জরামরণং পজানাতি, এৰং জরামরণসমুদং পজানাতি, এৰং জরামরণনিরোধং পজানাতি, এৰং জরামরণনিরোধগামিনিং পটিপদং পজানাতি, সো সব্বসো রাগানুসযং পহায…পে… দুক্খস্সন্তকরো হোতি – এত্তাৰতাপি খো, আৰুসো, অরিযসাৰকো সম্মাদিট্ঠি হোতি, উজুগতাস্স দিট্ঠি, ধম্মে অৰেচ্চপ্পসাদেন সমন্নাগতো, আগতো ইমং সদ্ধম্ম’’ন্তি.

৯৩. ‘‘সাধাৰুসো’’তি খো…পে… অপুচ্ছুং – সিযা পনাৰুসো…পে… ‘‘সিযা, আৰুসো. যতো খো, আৰুসো, অরিযসাৰকো জাতিঞ্চ পজানাতি, জাতিসমুদযঞ্চ পজানাতি, জাতিনিরোধঞ্চ পজানাতি, জাতিনিরোধগামিনিং পটিপদঞ্চ পজানাতি – এত্তাৰতাপি খো, আৰুসো, অরিযসাৰকো সম্মাদিট্ঠি হোতি, উজুগতাস্স দিট্ঠি, ধম্মে অৰেচ্চপ্পসাদেন সমন্নাগতো, আগতো ইমং সদ্ধম্মং. কতমা পনাৰুসো, জাতি, কতমো জাতিসমুদযো, কতমো জাতিনিরোধো, কতমা জাতিনিরোধগামিনী পটিপদা? যা তেসং তেসং সত্তানং তম্হি তম্হি সত্তনিকাযে জাতি সঞ্জাতি ওক্কন্তি অভিনিব্বত্তি খন্ধানং পাতুভাৰো, আযতনানং পটিলাভো – অযং ৰুচ্চতাৰুসো, জাতি. ভৰসমুদযা জাতিসমুদযো, ভৰনিরোধা জাতিনিরোধো, অযমেৰ অরিযো অট্ঠঙ্গিকো মগ্গো জাতিনিরোধগামিনী পটিপদা, সেয্যথিদং – সম্মাদিট্ঠি…পে… সম্মাসমাধি.

‘‘যতো খো, আৰুসো, অরিযসাৰকো এৰং জাতিং পজানাতি, এৰং জাতিসমুদযং পজানাতি, এৰং জাতিনিরোধং পজানাতি, এৰং জাতিনিরোধগামিনিং পটিপদং পজানাতি, সো সব্বসো রাগানুসযং পহায…পে… দুক্খস্সন্তকরো হোতি – এত্তাৰতাপি খো, আৰুসো, অরিযসাৰকো সম্মাদিট্ঠি হোতি, উজুগতাস্স দিট্ঠি, ধম্মে অৰেচ্চপ্পসাদেন সমন্নাগতো, আগতো ইমং সদ্ধম্ম’’ন্তি.

৯৪. ‘‘সাধাৰুসো’’তি খো…পে… অপুচ্ছুং – সিযা পনাৰুসো…পে… ‘‘সিযা, আৰুসো. যতো খো, আৰুসো, অরিযসাৰকো ভৰঞ্চ পজানাতি, ভৰসমুদযঞ্চ পজানাতি, ভৰনিরোধঞ্চ পজানাতি, ভৰনিরোধগামিনিং পটিপদঞ্চ পজানাতি – এত্তাৰতাপি খো, আৰুসো, অরিযসাৰকো সম্মাদিট্ঠি হোতি, উজুগতাস্স দিট্ঠি, ধম্মে অৰেচ্চপ্পসাদেন সমন্নাগতো, আগতো ইমং সদ্ধম্মং. কতমো পনাৰুসো, ভৰো, কতমো ভৰসমুদযো, কতমো ভৰনিরোধো, কতমা ভৰনিরোধগামিনী পটিপদা? তযোমে, আৰুসো, ভৰা – কামভৰো, রূপভৰো, অরূপভৰো. উপাদানসমুদযা ভৰসমুদযো, উপাদাননিরোধা ভৰনিরোধো, অযমেৰ অরিযো অট্ঠঙ্গিকো মগ্গো ভৰনিরোধগামিনী পটিপদা, সেয্যথিদং – সম্মাদিট্ঠি…পে… সম্মাসমাধি.

‘‘যতো খো, আৰুসো, অরিযসাৰকো এৰং ভৰং পজানাতি, এৰং ভৰসমুদযং পজানাতি, এৰং ভৰনিরোধং পজানাতি, এৰং ভৰনিরোধগামিনিং পটিপদং পজানাতি, সো সব্বসো রাগানুসযং পহায…পে… দুক্খস্সন্তকরো হোতি. এত্তাৰতাপি খো, আৰুসো, অরিযসাৰকো সম্মাদিট্ঠি হোতি, উজুগতাস্স দিট্ঠি, ধম্মে অৰেচ্চপ্পসাদেন সমন্নাগতো, আগতো ইমং সদ্ধম্ম’’ন্তি.

৯৫. ‘‘সাধাৰুসো’’তি খো…পে… অপুচ্ছুং – সিযা পনাৰুসো…পে… ‘‘সিযা, আৰুসো. যতো খো, আৰুসো, অরিযসাৰকো উপাদানঞ্চ পজানাতি, উপাদানসমুদযঞ্চ পজানাতি, উপাদাননিরোধঞ্চ পজানাতি, উপাদাননিরোধগামিনিং পটিপদঞ্চ পজানাতি – এত্তাৰতাপি খো, আৰুসো, অরিযসাৰকো সম্মাদিট্ঠি হোতি, উজুগতাস্স দিট্ঠি, ধম্মে অৰেচ্চপ্পসাদেন সমন্নাগতো, আগতো ইমং সদ্ধম্মং. কতমং পনাৰুসো, উপাদানং, কতমো উপাদানসমুদযো, কতমো উপাদাননিরোধো, কতমা উপাদাননিরোধগামিনী পটিপদা? চত্তারিমানি, আৰুসো, উপাদানানি – কামুপাদানং, দিট্ঠুপাদানং, সীলব্বতুপাদানং, অত্তৰাদুপাদানং. তণ্হাসমুদযা উপাদানসমুদযো, তণ্হানিরোধা উপাদাননিরোধো, অযমেৰ অরিযো অট্ঠঙ্গিকো মগ্গো উপাদাননিরোধগামিনী পটিপদা, সেয্যথিদং – সম্মাদিট্ঠি…পে… সম্মাসমাধি.

‘‘যতো খো, আৰুসো, অরিযসাৰকো এৰং উপাদানং পজানাতি, এৰং উপাদানসমুদযং পজানাতি, এৰং উপাদাননিরোধং পজানাতি, এৰং উপাদাননিরোধগামিনিং পটিপদং পজানাতি, সো সব্বসো রাগানুসযং পহায…পে… দুক্খস্সন্তকরো হোতি – এত্তাৰতাপি খো, আৰুসো, অরিযসাৰকো সম্মাদিট্ঠি হোতি, উজুগতাস্স দিট্ঠি, ধম্মে অৰেচ্চপ্পসাদেন সমন্নাগতো, আগতো ইমং সদ্ধম্ম’’ন্তি.

৯৬. ‘‘সাধাৰুসো’’তি খো…পে… অপুচ্ছুং – সিযা পনাৰুসো…পে… ‘‘সিযা, আৰুসো. যতো খো, আৰুসো, অরিযসাৰকো তণ্হঞ্চ পজানাতি, তণ্হাসমুদযঞ্চ পজানাতি, তণ্হানিরোধঞ্চ পজানাতি, তণ্হানিরোধগামিনিং পটিপদঞ্চ পজানাতি – এত্তাৰতাপি খো, আৰুসো, অরিযসাৰকো সম্মাদিট্ঠি হোতি, উজুগতাস্স দিট্ঠি, ধম্মে অৰেচ্চপ্পসাদেন সমন্নাগতো, আগতো ইমং সদ্ধম্মং. কতমা পনাৰুসো, তণ্হা, কতমো তণ্হাসমুদযো, কতমো তণ্হানিরোধো, কতমা তণ্হানিরোধগামিনী পটিপদা? ছযিমে, আৰুসো, তণ্হাকাযা – রূপতণ্হা, সদ্দতণ্হা, গন্ধতণ্হা, রসতণ্হা, ফোট্ঠব্বতণ্হা, ধম্মতণ্হা. ৰেদনাসমুদযা তণ্হাসমুদযো, ৰেদনানিরোধা তণ্হানিরোধো, অযমেৰ অরিযো অট্ঠঙ্গিকো মগ্গো তণ্হানিরোধগামিনী পটিপদা, সেয্যথিদং – সম্মাদিট্ঠি…পে… সম্মাসমাধি.

‘‘যতো খো, আৰুসো, অরিযসাৰকো এৰং তণ্হং পজানাতি, এৰং তণ্হাসমুদযং পজানাতি, এৰং তণ্হানিরোধং পজানাতি, এৰং তণ্হানিরোধগামিনিং পটিপদং পজানাতি, সো সব্বসো রাগানুসযং পহায…পে… দুক্খস্সন্তকরো হোতি – এত্তাৰতাপি খো, আৰুসো, অরিযসাৰকো সম্মাদিট্ঠি হোতি, উজুগতাস্স দিট্ঠি, ধম্মে অৰেচ্চপ্পসাদেন সমন্নাগতো, আগতো ইমং সদ্ধম্ম’’ন্তি.

৯৭. ‘‘সাধাৰুসো’’তি খো…পে… অপুচ্ছুং – সিযা পনাৰুসো…পে… ‘‘সিযা, আৰুসো. যতো খো, আৰুসো, অরিযসাৰকো ৰেদনঞ্চ পজানাতি, ৰেদনাসমুদযঞ্চ পজানাতি, ৰেদনানিরোধঞ্চ পজানাতি, ৰেদনানিরোধগামিনিং পটিপদঞ্চ পজানাতি – এত্তাৰতাপি খো, আৰুসো, অরিযসাৰকো সম্মাদিট্ঠি হোতি, উজুগতাস্স দিট্ঠি, ধম্মে অৰেচ্চপ্পসাদেন সমন্নাগতো, আগতো ইমং সদ্ধম্মং. কতমা পনাৰুসো, ৰেদনা, কতমো ৰেদনাসমুদযো, কতমো ৰেদনানিরোধো, কতমা ৰেদনানিরোধগামিনী পটিপদা? ছযিমে, আৰুসো, ৰেদনাকাযা – চক্খুসম্ফস্সজা ৰেদনা, সোতসম্ফস্সজা ৰেদনা, ঘানসম্ফস্সজা ৰেদনা, জিৰ্হাসম্ফস্সজা ৰেদনা, কাযসম্ফস্সজা ৰেদনা, মনোসম্ফস্সজা ৰেদনা. ফস্সসমুদযা ৰেদনাসমুদযো, ফস্সনিরোধা ৰেদনানিরোধো, অযমেৰ অরিযো অট্ঠঙ্গিকো মগ্গো ৰেদনানিরোধগামিনী পটিপদা, সেয্যথিদং – সম্মাদিট্ঠি…পে… সম্মাসমাধি.

‘‘যতো খো, আৰুসো, অরিযসাৰকো এৰং ৰেদনং পজানাতি, এৰং ৰেদনাসমুদযং পজানাতি, এৰং ৰেদনানিরোধং পজানাতি, এৰং ৰেদনানিরোধগামিনিং পটিপদং পজানাতি, সো সব্বসো রাগানুসযং পহায…পে… দুক্খস্সন্তকরো হোতি – এত্তাৰতাপি খো, আৰুসো, অরিযসাৰকো সম্মাদিট্ঠি হোতি, উজুগতাস্স দিট্ঠি, ধম্মে অৰেচ্চপ্পসাদেন সমন্নাগতো, আগতো ইমং সদ্ধম্ম’’ন্তি.

৯৮. ‘‘সাধাৰুসো’’তি খো…পে… অপুচ্ছুং – সিযা পনাৰুসো…পে… ‘‘সিযা, আৰুসো. যতো খো, আৰুসো, অরিযসাৰকো ফস্সঞ্চ পজানাতি, ফস্সসমুদযঞ্চ পজানাতি, ফস্সনিরোধঞ্চ পজানাতি, ফস্সনিরোধগামিনিং পটিপদঞ্চ পজানাতি – এত্তাৰতাপি খো, আৰুসো, অরিযসাৰকো সম্মাদিট্ঠি হোতি, উজুগতাস্স দিট্ঠি, ধম্মে অৰেচ্চপ্পসাদেন সমন্নাগতো, আগতো ইমং সদ্ধম্মং. কতমো পনাৰুসো, ফস্সো, কতমো ফস্সসমুদযো, কতমো ফস্সনিরোধো, কতমা ফস্সনিরোধগামিনী পটিপদা? ছযিমে, আৰুসো, ফস্সকাযা – চক্খুসম্ফস্সো, সোতসম্ফস্সো, ঘানসম্ফস্সো, জিৰ্হাসম্ফস্সো, কাযসম্ফস্সো, মনোসম্ফস্সো. সল়াযতনসমুদযা ফস্সসমুদযো, সল়াযতননিরোধা ফস্সনিরোধো, অযমেৰ অরিযো অট্ঠঙ্গিকো মগ্গো ফস্সনিরোধগামিনী পটিপদা, সেয্যথিদং – সম্মাদিট্ঠি…পে… সম্মাসমাধি.

‘‘যতো খো, আৰুসো, অরিযসাৰকো এৰং ফস্সং পজানাতি, এৰং ফস্সসমুদযং পজানাতি, এৰং ফস্সনিরোধং পজানাতি, এৰং ফস্সনিরোধগামিনিং পটিপদং পজানাতি, সো সব্বসো রাগানুসযং পহায…পে… দুক্খস্সন্তকরো হোতি – এত্তাৰতাপি খো, আৰুসো, অরিযসাৰকো সম্মাদিট্ঠি হোতি, উজুগতাস্স দিট্ঠি, ধম্মে অৰেচ্চপ্পসাদেন সমন্নাগতো, আগতো ইমং সদ্ধম্ম’’ন্তি.

৯৯. ‘‘সাধাৰুসো’’তি খো…পে… অপুচ্ছুং – সিযা পনাৰুসো…পে… ‘‘সিযা, আৰুসো. যতো খো, আৰুসো, অরিযসাৰকো সল়াযতনঞ্চ পজানাতি, সল়াযতনসমুদযঞ্চ পজানাতি, সল়াযতননিরোধঞ্চ পজানাতি, সল়াযতননিরোধগামিনিং পটিপদঞ্চ পজানাতি – এত্তাৰতাপি খো, আৰুসো, অরিযসাৰকো সম্মাদিট্ঠি হোতি, উজুগতাস্স দিট্ঠি, ধম্মে অৰেচ্চপ্পসাদেন সমন্নাগতো, আগতো ইমং সদ্ধম্মং. কতমং পনাৰুসো, সল়াযতনং, কতমো সল়াযতনসমুদযো, কতমো সল়াযতননিরোধো, কতমা সল়াযতননিরোধগামিনী পটিপদা? ছযিমানি, আৰুসো, আযতনানি – চক্খাযতনং, সোতাযতনং, ঘানাযতনং, জিৰ্হাযতনং, কাযাযতনং, মনাযতনং. নামরূপসমুদযা সল়াযতনসমুদযো, নামরূপনিরোধা সল়াযতননিরোধো, অযমেৰ অরিযো অট্ঠঙ্গিকো মগ্গো সল়াযতননিরোধগামিনী পটিপদা, সেয্যথিদং – সম্মাদিট্ঠি…পে… সম্মাসমাধি.

‘‘যতো খো, আৰুসো, অরিযসাৰকো এৰং সল়াযতনং পজানাতি, এৰং সল়াযতনসমুদযং পজানাতি, এৰং সল়াযতননিরোধং পজানাতি, এৰং সল়াযতননিরোধগামিনিং পটিপদং পজানাতি, সো সব্বসো রাগানুসযং পহায…পে… দুক্খস্সন্তকরো হোতি – এত্তাৰতাপি খো, আৰুসো, অরিযসাৰকো সম্মাদিট্ঠি হোতি, উজুগতাস্স দিট্ঠি, ধম্মে অৰেচ্চপ্পসাদেন সমন্নাগতো, আগতো ইমং সদ্ধম্ম’’ন্তি.

১০০. ‘‘সাধাৰুসো’’তি খো…পে… অপুচ্ছুং – সিযা পনাৰুসো…পে… ‘‘সিযা, আৰুসো. যতো খো, আৰুসো, অরিযসাৰকো নামরূপঞ্চ পজানাতি, নামরূপসমুদযঞ্চ পজানাতি, নামরূপনিরোধঞ্চ পজানাতি, নামরূপনিরোধগামিনিং পটিপদঞ্চ পজানাতি – এত্তাৰতাপি খো, আৰুসো, অরিযসাৰকো সম্মাদিট্ঠি হোতি, উজুগতাস্স দিট্ঠি, ধম্মে অৰেচ্চপ্পসাদেন সমন্নাগতো, আগতো ইমং সদ্ধম্মং. কতমং পনাৰুসো, নামরূপং, কতমো নামরূপসমুদযো, কতমো নামরূপনিরোধো, কতমা নামরূপনিরোধগামিনী পটিপদা? ৰেদনা, সঞ্ঞা, চেতনা, ফস্সো, মনসিকারো – ইদং ৰুচ্চতাৰুসো, নামং; চত্তারি চ মহাভূতানি, চতুন্নঞ্চ মহাভূতানং উপাদাযরূপং – ইদং ৰুচ্চতাৰুসো, রূপং. ইতি ইদঞ্চ নামং ইদঞ্চ রূপং – ইদং ৰুচ্চতাৰুসো, নামরূপং. ৰিঞ্ঞাণসমুদযা নামরূপসমুদযো, ৰিঞ্ঞাণনিরোধা নামরূপনিরোধো, অযমেৰ অরিযো অট্ঠঙ্গিকো মগ্গো নামরূপনিরোধগামিনী পটিপদা, সেয্যথিদং – সম্মাদিট্ঠি…পে… সম্মাসমাধি.

‘‘যতো খো, আৰুসো, অরিযসাৰকো এৰং নামরূপং পজানাতি, এৰং নামরূপসমুদযং পজানাতি, এৰং নামরূপনিরোধং পজানাতি, এৰং নামরূপনিরোধগামিনিং পটিপদং পজানাতি, সো সব্বসো রাগানুসযং পহায…পে… দুক্খস্সন্তকরো হোতি – এত্তাৰতাপি খো, আৰুসো, অরিযসাৰকো সম্মাদিট্ঠি হোতি, উজুগতাস্স দিট্ঠি, ধম্মে অৰেচ্চপ্পসাদেন সমন্নাগতো, আগতো ইমং সদ্ধম্ম’’ন্তি.

১০১. ‘‘সাধাৰুসো’’তি খো…পে… অপুচ্ছুং – সিযা পনাৰুসো…পে… ‘‘সিযা, আৰুসো. যতো খো, আৰুসো, অরিযসাৰকো ৰিঞ্ঞাণঞ্চ পজানাতি, ৰিঞ্ঞাণসমুদযঞ্চ পজানাতি, ৰিঞ্ঞাণনিরোধঞ্চ পজানাতি, ৰিঞ্ঞাণনিরোধগামিনিং পটিপদঞ্চ পজানাতি – এত্তাৰতাপি খো, আৰুসো, অরিযসাৰকো সম্মাদিট্ঠি হোতি, উজুগতাস্স দিট্ঠি, ধম্মে অৰেচ্চপ্পসাদেন সমন্নাগতো, আগতো ইমং সদ্ধম্মং. কতমং পনাৰুসো, ৰিঞ্ঞাণং, কতমো ৰিঞ্ঞাণসমুদযো, কতমো ৰিঞ্ঞাণনিরোধো, কতমা ৰিঞ্ঞাণনিরোধগামিনী পটিপদা? ছযিমে, আৰুসো, ৰিঞ্ঞাণকাযা – চক্খুৰিঞ্ঞাণং, সোতৰিঞ্ঞাণং, ঘানৰিঞ্ঞাণং, জিৰ্হাৰিঞ্ঞাণং, কাযৰিঞ্ঞাণং, মনোৰিঞ্ঞাণং. সঙ্খারসমুদযা ৰিঞ্ঞাণসমুদযো, সঙ্খারনিরোধা ৰিঞ্ঞাণনিরোধো, অযমেৰ অরিযো অট্ঠঙ্গিকো মগ্গো ৰিঞ্ঞাণনিরোধগামিনী পটিপদা, সেয্যথিদং – সম্মাদিট্ঠি…পে… সম্মাসমাধি.

‘‘যতো খো, আৰুসো, অরিযসাৰকো এৰং ৰিঞ্ঞাণং পজানাতি, এৰং ৰিঞ্ঞাণসমুদযং পজানাতি, এৰং ৰিঞ্ঞাণনিরোধং পজানাতি, এৰং ৰিঞ্ঞাণনিরোধগামিনিং পটিপদং পজানাতি, সো সব্বসো রাগানুসযং পহায…পে… দুক্খস্সন্তকরো হোতি – এত্তাৰতাপি খো, আৰুসো, অরিযসাৰকো সম্মাদিট্ঠি হোতি, উজুগতাস্স দিট্ঠি, ধম্মে অৰেচ্চপ্পসাদেন সমন্নাগতো, আগতো ইমং সদ্ধম্ম’’ন্তি.

১০২. ‘‘সাধাৰুসো’’তি খো…পে… অপুচ্ছুং – সিযা পনাৰুসো…পে… ‘‘সিযা, আৰুসো. যতো খো, আৰুসো, অরিযসাৰকো সঙ্খারে চ পজানাতি, সঙ্খারসমুদযঞ্চ পজানাতি, সঙ্খারনিরোধঞ্চ পজানাতি, সঙ্খারনিরোধগামিনিং পটিপদঞ্চ পজানাতি – এত্তাৰতাপি খো, আৰুসো, অরিযসাৰকো সম্মাদিট্ঠি হোতি, উজুগতাস্স দিট্ঠি, ধম্মে অৰেচ্চপ্পসাদেন সমন্নাগতো, আগতো ইমং সদ্ধম্মং. কতমে পনাৰুসো, সঙ্খারা, কতমো সঙ্খারসমুদযো, কতমো সঙ্খারনিরোধো, কতমা সঙ্খারনিরোধগামিনী পটিপদা? তযোমে, আৰুসো, সঙ্খারা – কাযসঙ্খারো, ৰচীসঙ্খারো, চিত্তসঙ্খারো. অৰিজ্জাসমুদযা সঙ্খারসমুদযো, অৰিজ্জানিরোধা সঙ্খারনিরোধো, অযমেৰ অরিযো অট্ঠঙ্গিকো মগ্গো সঙ্খারনিরোধগামিনী পটিপদা, সেয্যথিদং – সম্মাদিট্ঠি…পে… সম্মাসমাধি.

‘‘যতো খো, আৰুসো, অরিযসাৰকো এৰং সঙ্খারে পজানাতি, এৰং সঙ্খারসমুদযং পজানাতি, এৰং সঙ্খারনিরোধং পজানাতি, এৰং সঙ্খারনিরোধগামিনিং পটিপদং পজানাতি, সো সব্বসো রাগানুসযং পহায, পটিঘানুসযং পটিৰিনোদেত্ৰা, ‘অস্মী’তি দিট্ঠিমানানুসযং সমূহনিত্ৰা, অৰিজ্জং পহায ৰিজ্জং উপ্পাদেত্ৰা, দিট্ঠেৰ ধম্মে দুক্খস্সন্তকরো হোতি – এত্তাৰতাপি খো, আৰুসো, অরিযসাৰকো সম্মাদিট্ঠি হোতি, উজুগতাস্স দিট্ঠি, ধম্মে অৰেচ্চপ্পসাদেন সমন্নাগতো, আগতো ইমং সদ্ধম্ম’’ন্তি.

১০৩. ‘‘সাধাৰুসো’’তি খো…পে… অপুচ্ছুং – সিযা পনাৰুসো…পে… ‘‘সিযা, আৰুসো. যতো খো, আৰুসো, অরিযসাৰকো অৰিজ্জঞ্চ পজানাতি, অৰিজ্জাসমুদযঞ্চ পজানাতি, অৰিজ্জানিরোধঞ্চ পজানাতি, অৰিজ্জানিরোধগামিনিং পটিপদঞ্চ পজানাতি – এত্তাৰতাপি খো, আৰুসো, অরিযসাৰকো সম্মাদিট্ঠি হোতি, উজুগতাস্স দিট্ঠি, ধম্মে অৰেচ্চপ্পসাদেন সমন্নাগতো, আগতো ইমং সদ্ধম্মং. কতমা পনাৰুসো, অৰিজ্জা, কতমো অৰিজ্জাসমুদযো, কতমো অৰিজ্জানিরোধো, কতমা অৰিজ্জানিরোধগামিনী পটিপদা? যং খো, আৰুসো, দুক্খে অঞ্ঞাণং, দুক্খসমুদযে অঞ্ঞাণং, দুক্খনিরোধে অঞ্ঞাণং, দুক্খনিরোধগামিনিযা পটিপদায অঞ্ঞাণং – অযং ৰুচ্চতাৰুসো, অৰিজ্জা. আসৰসমুদযা অৰিজ্জাসমুদযো, আসৰনিরোধা অৰিজ্জানিরোধো, অযমেৰ অরিযো অট্ঠঙ্গিকো মগ্গো অৰিজ্জানিরোধগামিনী পটিপদা, সেয্যথিদং – সম্মাদিট্ঠি…পে… সম্মাসমাধি.

‘‘যতো খো, আৰুসো, অরিযসাৰকো এৰং অৰিজ্জং পজানাতি, এৰং অৰিজ্জাসমুদযং পজানাতি, এৰং অৰিজ্জানিরোধং পজানাতি, এৰং অৰিজ্জানিরোধগামিনিং পটিপদং পজানাতি, সো সব্বসো রাগানুসযং পহায, পটিঘানুসযং পটিৰিনোদেত্ৰা, ‘অস্মী’তি দিট্ঠিমানানুসযং সমূহনিত্ৰা, অৰিজ্জং পহায ৰিজ্জং উপ্পাদেত্ৰা, দিট্ঠেৰ ধম্মে দুক্খস্সন্তকরো হোতি – এত্তাৰতাপি খো, আৰুসো, অরিযসাৰকো সম্মাদিট্ঠি হোতি, উজুগতাস্স দিট্ঠি, ধম্মে অৰেচ্চপ্পসাদেন সমন্নাগতো, আগতো ইমং সদ্ধম্ম’’ন্তি.

১০৪. ‘‘সাধাৰুসো’’তি খো তে ভিক্খূ আযস্মতো সারিপুত্তস্স ভাসিতং অভিনন্দিত্ৰা অনুমোদিত্ৰা আযস্মন্তং সারিপুত্তং উত্তরি পঞ্হং অপুচ্ছুং – ‘‘সিযা পনাৰুসো, অঞ্ঞোপি পরিযাযো যথা অরিযসাৰকো সম্মাদিট্ঠি হোতি, উজুগতাস্স দিট্ঠি, ধম্মে অৰেচ্চপ্পসাদেন সমন্নাগতো, আগতো ইমং সদ্ধম্ম’’ন্তি?

‘‘সিযা, আৰুসো. যতো খো, আৰুসো, অরিযসাৰকো আসৰঞ্চ পজানাতি, আসৰসমুদযঞ্চ পজানাতি, আসৰনিরোধঞ্চ পজানাতি, আসৰনিরোধগামিনিং পটিপদঞ্চ পজানাতি – এত্তাৰতাপি খো, আৰুসো, অরিযসাৰকো সম্মাদিট্ঠি হোতি, উজুগতাস্স দিট্ঠি, ধম্মে অৰেচ্চপ্পসাদেন সমন্নাগতো, আগতো ইমং সদ্ধম্মং. কতমো পনাৰুসো, আসৰো, কতমো আসৰসমুদযো, কতমো আসৰনিরোধো, কতমা আসৰনিরোধগামিনী পটিপদাতি? তযোমে, আৰুসো, আসৰা – কামাসৰো, ভৰাসৰো, অৰিজ্জাসৰো. অৰিজ্জাসমুদযা আসৰসমুদযো, অৰিজ্জানিরোধা আসৰনিরোধো, অযমেৰ অরিযো অট্ঠঙ্গিকো মগ্গো আসৰনিরোধগামিনী পটিপদা, সেয্যথিদং – সম্মাদিট্ঠি…পে… সম্মাসমাধি.

‘‘যতো খো, আৰুসো, অরিযসাৰকো এৰং আসৰং পজানাতি, এৰং আসৰসমুদযং পজানাতি, এৰং আসৰনিরোধং পজানাতি, এৰং আসৰনিরোধগামিনিং পটিপদং পজানাতি, সো সব্বসো রাগানুসযং পহায, পটিঘানুসযং পটিৰিনোদেত্ৰা, ‘অস্মী’তি দিট্ঠিমানানুসযং সমূহনিত্ৰা, অৰিজ্জং পহায ৰিজ্জং উপ্পাদেত্ৰা, দিট্ঠেৰ ধম্মে দুক্খস্সন্তকরো হোতি – এত্তাৰতাপি খো, আৰুসো, অরিযসাৰকো সম্মাদিট্ঠি হোতি, উজুগতাস্স দিট্ঠি, ধম্মে অৰেচ্চপ্পসাদেন সমন্নাগতো, আগতো ইমং সদ্ধম্ম’’ন্তি.

ইদমৰোচাযস্মা সারিপুত্তো. অত্তমনা তে ভিক্খূ আযস্মতো সারিপুত্তস্স ভাসিতং অভিনন্দুন্তি.

সম্মাদিট্ঠিসুত্তং নিট্ঠিতং নৰমং. [ইতো পরং কেসুচি পোত্থকেসু ইমাপি গাথাযো§এৰং দিস্সন্তি –§দুক্খং জরামরণং উপাদানং, সল়াযতনং নামরূপং. ৰিঞ্ঞাণং যা সা পরে, কতমা পনাৰুসো পদানং§কিং জাতি তণ্হা চ ৰেদনা, অৰিজ্জায চতুক্কনযো. চত্তারি পরে কতমা, পনাৰুসো পদানং কেৰলং§আহারো চ ভৰো ফস্সো, সঙ্খারো আসৰপঞ্চমো. যাৰ পঞ্চ পরে কতমা, পনাৰুসো পদানং কিং§কতমন্তি ছব্বিধা ৰুত্তং, কতমানি চতুব্বিধানি. কতমো পঞ্চৰিধো ৰুত্তো, সব্বেসং একসঙ্খানং পঞ্চনযপদানি চাতি]